رواية الخلخال
الجزء الاول
تعبت في المواصلات باش نروح نكمل تكوين تاع لخياطة
مانجحتش في قرايتي وقررت نتعلم صنعة تنفعني في
المستقبل بصح حتى الدراهم تاع النقل بسيف ندبرهم من
عند خويا الي يمدهملي جحدة على مرتو الي ماتحبنيش
نحسها تستخصر فيا كلشي حتى الماكلة وتتغشش كي تشوف
ولادها يحبوني ويعزوني هوما وخويا الي هو خويا و بابا ويما
وكل شي بالنسبة ليا
يما طولت ماضنات جابت خويا بسيف وبعدو قعدت 15 سنة
ماضناتش جرات بزاف حتى جابتني .
خويا "كريم " هو الي سماني على اسمو" كريمة "حكاتلي يما
بالي كان هو الوحيد الي يقدر يسكتني كي نبكي كان يدوشني
ويلبسني ويرقدني عندو كنت متعلقة بيه بزاف وهو تاني.كي
كان في عمري 12سنة يما و بابا سافرو وخلاوني مع خويا من
هذيك ما رجعوش لينا صرالهم حادث وماتو في زوج
بقيت اناوخويا وحدنا في هذي الدنيا
خويا تهلا فيا بزاف كان هو الي يطيب و يغسل لحوايج بشوية انا تعلمت ووليت انا الي نطيب ونغسل ونسيق في الدار وخويا يروح يخدم .ونهار جاتنا وحد العجوزة من عايلتنا قالت لخويا لازمك تتزوج وتجيب وحدة تشدلك الدار وتقوم بيك وباختك باش تكمل قرايتها... قاتلو راهي كاينة طفلة يتيما كيمانتوما وعاقلة وتتهلا فيكم وماتتشرطش عليك وخالها قالك اكسي ودي
خويا قبل .وانا فرحتلو بزاف اخيرا خويا رح يتزوج ويلقا وحدة تفرحو وتهنيه .
ماطولش خويا وزتزوج وجات مرتو لدارنا في البدايا كانت مليحة معايا ومن بعد ولات تبين في حقيقتها كنت نعاونها كي نرجع من لقرايا وكنت ندير كلش ومانخليهش كامل تتعب بصح هي كرهتني من النهار لول ...
كبرت وكبرت مسؤليات خويا واولادو 4 مكانش لاحق بيهم وكنت نحس روحي عبئ كبير عليه هذا الشي الي بيناتولي مرتو بزاف كانت تقول لخويا وعلاه دخلتها لتكوين باش تخسر دراهمك برك بالحق تقعدها فالدار تتعلم الشغل كي لبنات خويا مكانش يحب يكثر الهدرة معاها يخرج ويخليها ونهار من النهارات وقت العصر قاتلي مرت خويا طيبي القهوة طيبت القهوةو ديتهالها كانت قاعدة مع خويا في الحوش وحطيتها قدامها قاتلي سربيلي فنجال ولخوك فنجال سربيت وعطيتهم كنت مانقدرش نهز حاجة ولا ناكل حاجة بلاما تعطيني الاذن قعدت نخزر حتى قاتلي سربي فنجال هذا واش تعرفي رفدت لبريق ولسع راح نسربي دقدق البا بقوة تنشعت وسيحتها قلبي تقبض وحسيتو راح يخرج من مكانو طبعتني مرت خويا وقاتلي جايحة امشي ادخلي دخلت و طليت من التاقة خويا راح يجري فتح الباب لقا واحد قالو انت كريم بن احمد قالو ايه انا قالو سي بوعلام يحوس عليك قالو وينا بوعلام قالو ماتعرفش سي بوعلام اكبر تاجر في لبلاد قالو خويا واش يحب عندي قالو يحب يشرب قهوة في دارك قالو خويا اهلا وسهلا بيه قالو راه في الطومو بيل نروح نعيطلو
دخل خويا يجري ولا يحوس على حاجة يقعد عليها الراجل ماعندناش كراسى وقال لمرتو طيبي قهوة دخلت قاتلي روحي طيبي القهوة وهي بقات طل من التاقا وانا نصبت القهوة ورحت نطل من الثقبة الي في الحيط تاع الكوزينا شفت واحد الراجل جا داخل لابس كوستويم اكحل و كرفاط كحلة وعليه وحد الهيبة ...ودخلو موراه زوج شبان شباب بزاف قالهم خويا اقعدو في لرض اسمحولي ماكش كراسا قلو ماعليش ماعليش رنا مرتاحين هكا سكتو شويا وبقاو يخزرو في دارنا قديمة وحيوطها متصدعا .نطق خويا قال القهوة ضك توجد انا تفكرت القهوة رجعت نجري نوجد فيها وجدتها وديتها لمرت خويا باش تديها لخويا لقيتها واقفا ومدهوشا وشفايفها بياضو والدم هرب من وجها حطيت القهوة في لرض وقتلها واشبيك واش سمعتي وطليت من التاقا لقيت خويا واقف وجامد كيفها مافهمت والو ...من بعد حط هذاك الراجل ايدوعلى كتاف خويا وقالو روح روح شاورهم وردلي بالخبر .جا خويا داخل قالنا ماتامنوش واش قالي سي بوعلام قالي راني جيت نخطب اختك" كريمة" لولدي "زهير "
الجزء الثاني
بقلم زهره
دخل خويا وقاللنا ماتامنوش واش قالي سي بو علام قالي
جيت نخطب اختك "كريمة لابني زهير............
قعدت نخزر في خويا وهو يخزر فيا. بانلي الوقت حبس...
مرت خويا طبعاتو وقاتلو واش قتلو قول قول؟ قالها قتلو نشاور مولات الشي هيا الي رايحة تتزوج قاتلو نندب في حناكي هذي حاجة تسنا مشاورة فيها قلو ايه ايه بنتي كريمة اكيد راها قابله وين راح تلقا زواج خير من هذا!! بن السي بوعلام شكون مايعرفش سي بوعلام ؟ ولايسمع بيه كريمة ،يخي راكي قابلة قولي.؟؟
خزر كريم فيا وقالي انا مانقول والو مانعمل والو حتى تقبلي انت انتي الي راح تتزوجي ونحلفلك برحمة والدينا مانحتمك على حاجة حتى يصرا واش يصرا الراي رايك .
مرت خويا بغات تموت بالقنطة قاتلو كون قتلو موافقين من لهيه للهيه هذي باينة شكون المهبولة لترفض ولد سي بوعلام !! قاللها اسكتي نتي .
انا ماعرفت واش نقول قتلو قلهم خلونا نخممو ايامات ومن بعد نردولكم لخبر قالي هنا تلقياي المشكل راهو قالي جاوبوني ضرك واذا ماقبلتوش حد ما قال لحد واذا قبلتو العرس لخميس الجاي قتلو لخميس الجاي! مستحيل ، نقزت مرتو بيناتنا قاتلي هذي فرصتك متضيعيهاش يالجايحة اقبلي
بقيت نخمم.
صفقو برا وقال سي كريم ردلنا لخبر رانا مزروبين... مرت خويا ولات تندب في وجها وتقطع في شعرها وتخضفيا قولي ايه قولي ايه
وخويا يشوف فيا ويستنا في جوابي حبيت نقول لالا بصح عرفت بلي مرت خويا تشبعني مرار اكثر من بكري ونخلصها طول وعمري....
ولا نقول نعم باينة الحكاية فيها ان وماتعجبش
زادو عيطو رانا رايحين ، كريم ولا يروح ويجي واناا قتلو .....موافقة قالي متاكدة قتلو ايه قابلة... قالي خممي مليح قتلو في قلبي نخمم في خمس دقايق !!باينة الشقة من حواشيها بصح المهم نخرج من هذي الدار ونبعد على مرت خويا مقدرتش نزيد نحملها ومانيش حابة نكون سبب مشاكل بينها وبين خويا ملا ...........قتلو راني قابلة.
مرت خويا طارت من الفرحة اخيرا راح تتخلص مني و زيد كشما تربح من البيعة
خرج خويا قالو رانا قابلين ضحك سي بوعلام ضحكا قاويا بصوت عالي ومتجبر قالو كنت عارف كنت عار ف .مال سي بوعلام براسوعلى خويا وقالو بالعقل روح عيط للعروسة نسلموعليها ...جاني كريم قالي اخرجي شوفيهم قتلو لالا مانقدرش قاتلي مرت خوياعادي ارواحي نخرج انا وياك وحكمتني من ايدي وجبدتني داتني للحوش طبعتني قدامهم وهي تقول هذي عروستنا شابا وصغيرة انا كساني لعرق و جمدت قدامهم قال سي بوعلام الله يبارك الله يبارك ودخل ايدو في تصديمو جبد كمشا دراهم عطاهملي انا مامديتش حتى ايدي نشدهم شدتهم مرت خويا بالخف وخباتهم عندها وقاتلو يعطيك الصحة يا سي بو علام هذي بنتي كريمة ربيتها على ايدي عاقلة ومتربية وتخدم شغل الله الله . في هذاك الوقت
انا رفدت عينيا شفت زوج شباب طول وعرض باينين ولادو بصح شكون منهم زهير ؟؟
سي بوعلام قال لخويا احكم هذي عشر ملاين شرط لعروسة وماتجيبو والو كلشي راه موجود ونهار لخميس رانا نجو نهزو انشاء الله مارحش نديرو عرس غير حنا في حنا
عيط لولادو موراد جمال اياو عرفت بلي واحد منهم ماهو زهير !
خرجو وكريم وصلهم لطوموبيل ورجع جبد الدراهم قالي هذا مهرك
خطفاتو لالا وقاتلو يخي قالك ماتجيب والو هذا حقي حق ماربيتها هذو لعوام كامل قالها كريم جبيهم هنا قاتلو لالا تاوعي انا وولادي هي راهي رايحا لهيه عندهم تعيش في الخير والخمير وانا نقعد في الفقر مانمدش هذا حقي انا وولادي
كريم كان راح ينحيهملها بسيف قتلو خليها خلاص خلاص
رحت قعدت وحدي وبقيت نخمم واش عملت في روحي صليت ودعيت ربي سبحانو طلبت منو يسترني ويبينلي طريق سلاكي هذا مكان ورقدت على هذاك الحال
ااسبوع فات يجري وانا مادرت والو من غير مرة وحدة خرجت انا ومرت خويا داتني للبلاد نشرو حوايج ... خيرتلي ارخس حاجة شراتلي قندورة تاع دار ولبسة تاع خرجة وزعما نويزات هذا مكان .
نهار لخميس نضت بكري اصلا ما قدرتش نرقد وبايته ندعي في ربي يسهل اموري
مرت خويا قاتلي ارواحي نوجدك ونديرلك شويا ماكياج شراتو ليها ماشي ليا ...
دارتلي ولبست اللبسة الي شريتها وقعدت واولاد خويا يدورو بيا ويسلمو عليا وانا في عالم اخر قلبي تقبض كي سمعت صوت طوموبيل حبست عند الدار طبطب الباب فتح خويا لقا الشيفور جا قالو راني جيت نديكم جاني خويا كريم قالي راكي واجدا ارواحي تروحي لدارك نضت وركبت الطوموبيل انا وياه ومرت خويا واولادها .
خرجنا من لبلاد ومشينا مسافة طويلا حتى وصلانا لفيرما كبيرا فتح العساس الباب ودخلنا باطوموبيل لقينها جنة فوق لرض لخاضار الشجر والورد و شجر الفاكيا وشفنا من بعيد الخيل والبقر قاتلي مرت خويا شوفي شوفي الخير الي ديتك ليه ونتي خايفا
شوية وصلنا لفيلا كبيرة بزاف حبسنا قدام الباب وهبطنا
خرجولنا شوية نسا وولاد لابسين ومصنعين سلموعلينا وهوما فرحانين وياهلو ويسهلو بينا دخلونا و قعدونا في وحد الصالو كبير بزاف و شباب بزاف وسقساونا واش نشربو حطولنا الحلويات والفاكيا القهاوي لتاي ومشروبات من كل نوع ومنبعد حطو لغدا مرت خويا ماخلات حاجة ماكلاتش منا ولا ماذقتش منها كلات ووكلت ولادها وانا غير نشوف بيعينيا
من بعد قالو راهم رايحين يعقدو انا ماشفت ماسمعت والو ومن بعد كي زغرتو عرفت بلي عقدو وكملو النسا هذوك جاويسلمو عليا وهوما فرحانين كي راحو جاتني مرا كبيرة بصح شابا بزاف سلمت عليا وقاتلي انا ام زهير مبروك عليك وعلينا انشالله تتهناي معا ولدي شوية عيطولها قاتلي اسمحيلي وراحت
نسا هذوك قصرو وزهاو وحكاو وانا قاعدا في مكاني ماتحركتش ومانطقتش بكلمة وحدة منبعد قالو لمرت خويا راجلك قالك نوضي تروحي ناضت نضت معاها خرجنا للؤل لقيت خويا كريم سلمت عليه وتحظنتو ماكنتش باغيا نطلقو كامل وهو تاني زير عليا بزاف وقالي ماتخافيش ربي ماراحش يخيبنا...... جبداتو مرتو وسلمت عليا وقاتلي تبقاي على خير وقاتلي ديري في بالك هذي هي دارك من اليوم ماعندكش منغيرها وراحو ....جاتني وحدة شابا قاتلي انا مرت سلفك لكبير ارواحي نوريلك شمبرتك دارو بيا النسا لخرين وهوما يزغرتو ويصفقو طلعنا دروج عاليين ومشينا في كولوار قاتلي ادخلي هذي هي الشمبرا تاعك والله يهنيك انا قلت ضركا نلقا واحد معوق ولامشوه ولاحتى مجنون قلت في قلبي ربي يصبرني على الشي لي راح نلقاه وخلاص دخلت وهوما راحو سكرت الباب لقيت الضو طافي شعلتو عيط عليا واحد قالي طفيه طفيه طفيتو بالخف وبقيت واقفا مالحقتش نشوف مليح شغل واحد راقد في السرير بقيت واقفا في مكاني متحركتش شعرة من الخوف بقيت مدة حتى عييت من الوقفة كنت رح نقعد دقدق الباب يبست مع الحيط عيط و قالي حلي واشبيك طرشة جيت نحل قالولي جبنالكم لعشا حطوه عند الباب وراحو حليت الباب ودخلتو قالي شعلي الضو حطيت السنية في لرض وشعلت الضو قالي حطيه فوق الطابلة وناض من لفراش لقيتو ........راجل طول وعرض وزين الي عطاهلو ربي وحدو يهبل مافهمت والو قعد باش ياكل وماخزرش فيا كامل جيت رح نقعد قالي اياكي ثم اياكي تقربي لفراشي ولا لماكلتي جبدت روحي ووقفت في الركنة هو كلا وطفا الضو وحكم بلاصتو وانا بقيت واقفا حتى عييت هبطت معا الحيط وقعدت في لرض تكيت على الحيط ورقدت ..