رواية الخلخال
الجزء الثالث
بقلم زهره
هبطت مع الحيط وقعدت في لرض تكيت على الحيط ورقدت .....................
فطنت الصباح على دقديق فالباب سمعتهم قالو لفطور راو عند الباب وقفت وجسمي كامل يوجعني قلت في قلبي يامزينها الرقدة في دارنا على الاقل كان عندي فراش وغطا .
شفت لفراش لقيتو مازالو راقد حليت الباب دخلت لفطور حطيتو فوق الطابلة وبقيت واقفا خفت نفيقو ...
بقيت واقفا كان متغطي قربت شويا حاولت نشوف وجهو مليح زدت قربت وزدت قربت ...تقلب هو وانا جيت نبعد طحت عليه فطن هو حكمني من ذراعي ورماني بعيد كي الدميا وناض ليا جاوقفني شدني من ذرعيا وقالي يخي قتلك ماتقربيش لفراشي وما تدنايش ليا زاد رماني على لفراش وانا عيطت عيطة وحدة من الخوف ...
حسيت الناس كامل سمعوني بقيت يابسة فوق السرير حتى دقدق الباب هو دخل لدوش وانا سقمت شعري وحوايجي ورحت فتحت الباب لقيت سلفتي لكبيرة قاتلي غير الخير وشنو هذا الحس وشفت باباه واقف من لهيه من بعيد !! قاتلي غير الخير مالقيت مانقول لعبتها حشمت وقتلها هذي حالت العرسان الجدد ضحكت معايا وقاتلي قولي والله انا ستغربت !! و باباه ملهيه ضحك وقال كنت عارف بلي ولدي راجل حاجة ماتخصو راح وهو يضحك ويقول كنت عارف كنت عارف قاتلي مرت سلفي مبروك عليك وهي فرحانة بزاف قاتلي افطري في غرضك ولبسي واش تحبي من لخزانة انا لي خيرتلك القش الي فيها ان شاء الله يعجبك وراحت
سكرت الباب ودرت لقيتو واقف يخزر فيا قالي لعبتيهالهم اه و قعد يفطر ومرة مرة يخزر فيا كمل وراح لبس قشو وخرج
انا رحت فطرت كنت ميتة بالجوع و بعدها دوشت ورحت للخزانة حليتها لقيتها معمره لبسة باينة غالية وشابا بزاف حرت واش نلبس منها... لبست روبا حمرة تهبل ومشطت شعري ولميتو لفوق وقلت نخرج نشوف واش كاين برا خرجت لقيت كولوار يدي لؤل كبير ضاوي وفيه صالو هايل زدت مشيت لقيت شنابر بزاف هبطت مع الدروج لقيت سلفتي جاتني سلمت عليا وقاتلي الروبا واتاتك بزاف قاتلي انا" زهية "مرت سلفك لكبير "عز الدين"ارواحي نعرفك على عايلتك الجديدة داتني للكوزينا كبيرة لقيت النسا الي شتهم البارح قاعدين على الطابلة قاتلي هذي عجوزتك وهذي "سلوى " مرت سلفك "جمال" اكبر من "زهير "وهذي "سعاد "مرت سلفك"مراد "اكبر ثاني من" زهير " اصغر منوغير"كمال "ماهوش مزوج ماحضرش لزواجكم راه في الجامعة يقرا في الطب الله يبارك... وكاين زوج نسا قاتلي هذو شغل من العايلة هوما لي رباو ولاد العايلة خالتي سكينة وخالتي فطيمة و اليوم راهم يربو حتى في احفادها ... لقيتهم كامل ملاح الا وحدة "سعاد" تقول تكرهني من زمان المهم لقيتهم طيبو لغدا قتلهم كشما نعاونكم قالولي لالا انت عروسة اقعدي وحنا نحطولك
قعدت نخزر كلشي بطبع و الشان كل شي متول وفي بلاصتو
زهية قالت هاهو جا عمي خفوخفو حطو لغدا في الصالة مونجي
حطو الماكلا وتلايمو على الطابلا كل وحدة قعدت بجنب راجلها وذراري الصغار قعدو مقابلينهم وسي بوعلام قعد على راس الطابلة جاتني زهية قاتلي انت مازالكي عروسة تاكلي مع راجلك في شمبرتكم اطلعي وضركا نبعتولك قتلها في قلبي كون تعرفي مايخلينيش حتى نقعد قدامو ماشي ناكل معاه .
طلعت وقعدت في شمبرتي جاداخل كي الاعصار خبط الباب بقوة ودخل لدوش غسل وجهو بدل حوايجو وجا رقد في مكانو كاني ماشي موجودة في الشمرة كامل وانا واقفة في ركنتي حتى حطو لغدا عند الباب ودقدقو .دخلتو حطيتو فوق الطابلة ورجعت لمكاني هوا ماتحركش وبقا راقد وانا واقفا
قعدت في لرض تكيت على الحيط غمضت عينيا فطنت على صوت الباب تسكر بقوة نضت لقيتو هو خرج ماكلا ماذاق من هذيك الماكلا .....
جازو خمس ايام على هذي الحالة .
وفي اليوم السادس في الليل رحت لبلاصتي الباردة باش نرقد سمعت صوت زهير في الكولوار يهدر طليت لقيتو يهدر مع يماه قالها ماقتلكمش زوجوني خلوني في حالي و جا يدخل رجعت لبلاصتي سكر الباب وقرب ليا قالي انت منين جابوك ماعندكش والديك ماعندكش مالي وعلاش راكي قاعدة لضرك عجبات حالتك هذي.....
ضنيتو راح يضربني لسقت في الحيط و قتلو ايه ماعنديش ....ماعنديش والدين ماتو وانا صغيرة ماعنديش موالي عندي غير خويا .....مرتو قاتلي هذي دارك وما عندكش من غيرها راني قاعدة هنا وما عندي وين نروح .....ملامح وجهو تبدلت ونقصلو الزعاف قالي اوفففف منك وراح ..
حمدت ربي ماضربنيش ...رجع ورقد في بلاصتو انا بقيت واقفا حتى عييت قعدت في لرض تقعد وقالي السرير كبير تقدري ترقدي من هذيك الجيهة وتغطا ورقد قلت زعما صح نرقد معاه في السرير في لول قلت لالا بصح مع البرد وتعب من هذيك لرض اليابسة نضت بالعقل ورحت هزيت لغطا غير بشوية ودخلت في لفراش على الحاشية تاع السرير وتغطيت لقيتو دافي رقدت بالخف
في الصباح حليت عينيا لقيتو يخزر فيا خفت ونضت واقفا ناض هو و راح لدوش غسل ولبس وخرج ماقاليش كلمة
وفي الليل جا قعد في مكانو وانا واقفا ستنيو حتى ضنيتو رقد هزيت لغطا ودخلت في
للفراش غير بشوية وتغطيت تقلب ليا كنت رح نهرب حكمني من ايدي ...