رواية الخلخال
الجزء الخامس والاخير
بقلم زهرة
كانت هذيك الليلة اجمل ليلة عشتها في حياتي .........
في الصباح فقت على اجمل كلمة ممكن نسمعها همسلي في
وذني وقالي ""نحبك ""ماحليتش عينيا قتلو انا تاني باسني بين
عينيا وقالي وين كنتي قبل هذا الوقت قتلو في دارنا ضحك
وقالي ارواحي نديك تشوفي للعوادا تاوعي قتلو ماعليه
دوشت و حطحطت الحطا وخرجت معاه وهو يخي ديما حطا
وبو قوص خموس عليه هبطنا للكوزينا تقهوينا و قصرت مع
خالتي سكينة و خالتي فطيمة ضحكنا حكاتلي على زهير كي
كان صغير ويخاف من لعوادا وكي كبر ولا خيال كبير قالي زهير الجو شباب اليوم هيا
نروحو رحت انا وياه جينا خارجين تلاقينا بسي بوعلام
اناخفت كنت رح نرجع على طريقي بصح زهير حكمني من
ايدي وقالي امشي قالو صباح الخير بابا وجزنا من قدامو رد
عليه قالو صباح الربح ياولدي خزرت مورايا شفت السي بوعلام يتبسم وفرحان حسيتو مجرد اب يخمم في ولدو ويتمنالو السعادة .
خرجنا مشينا على لحشيش وبين الشجر والورد رحنا للكوري شفنا العواد ورهملي كامل وحكالي كيفاش يتعامل معاهم وواش يوكلهم وكان متحمس بزاف المهم قضينا وقت شباب ونص نهار جينا راجعين لدار . لقيتهم في الصالة مونجي شافنا باباه عيطلو قالو زهير ارواح تاكل معانا انا قتلو نروح نعاونهم في الكوزينا رحت لقيت سلوى وزهية يحطو وسعاد قاعدة المهم وجدت معاهم راحو قعدو كي العادة كل وحده مساميا راجلها وسي بوعلام على راس الطابلة وجات عجوزتي قعدت على جنبو منبعد قال زهير
لزهية وين راهي كريمة قاتلو في الكوزينا قاللها عيطيلها ولا خلي انا نعيطلها جاليا وقالي اياي تتغداي معانا قتلو لالا باباك او ثما قالي مايديرلك والو جبدني وقالي قتلك ارواحي رحت معاه وانا خايفة من السي بوعلام قعدني وقعد رحبو بيا خاوتو وعجوزتي تتبسم وزهية وسلوى وحتى وليداتهم الصغار فرحو بيا الا سعاد طبعا بصح انا ماديتهاش فيها
بداو ياكلو ويقصرو ويحكو حتى سي بوعلام كان مبسوط يحكي ويضحك المهم جاز وقت مليح كملنا تعاونا على لماعن غسلناهم انا وسلوى وزهية ومنبعد طلعت لقيت زهير شاد في ايدو بزاف ورق ويقرا فيه كي
شافني خباهم بالخف في لقجر وسكر عليهم بالمفتاح شفتو شحال من مرة وكان ديما يخبيهم ويقولي تاع الخدمة برك المهم جازو نهارات ملاح بزاف.
وفي يوم خرج زهير ونسا مفاتحو لقيتهم خممت نحل لقجر ونشوف واش فيه بصح خفت زهير يفوق بيا خليت لمفاتح وخرجت بصح السوسة الي فيا ماعشرتنيش رجعت وفتحت لقجر ويالريتني مافتحتو لقيتو مليان غير ببراوات من عند حورية حسيت لارض لعبت
بيا دخل زهير لقاني قدام لقجر قالي واش داك لحاجة خاطياتك جاني نحالي لورق من ايدي رجعهم في لقجر وسكرو وحكمني وقالي قريتيهم شفتي واش فيهم و انا دخت و تغاشيت بين ايديه .....
فقت لقيت عجوزتي تفطن فيا بالريحة وزهير متقلق بزاف عليا قاتلو الحمد لله راهي فاقت كريمة
جاني زهير وقالي واش راكي تحسي في روحك ماحبيتش نرد عليه قال ليماه شفتي يايما قتلك بلي هذي لحكايا تبقا تبع فيا طول عمري قاتلو اصبر ضركا نفهمها كلشي قاتلي شوفي ياكريمة بنتي كي تزوجت بعمك بوعلام كنت صغيرة وهو كان واعر وقبيح بزاف كان يحلف باطلاق على اتفه لاسباب وكل مرة كان يرجعني ويزيد يعاودها
كنت جبت عزالدين و جمال ومراد وزهير كنت نافسا بيه وعندو غير شهر في عمرو .
وفي ليلة كان بوعلام سهران يقمر مع صحابو وحلف بطلاق وكانت هذيك المرة الثالثة وحرمت عليه جاني في الليل وقالي راكي حارمة عليا خلاص طلقتك ثلاث مرات ومانجمش نرجعك . لمي حوايجك ورواحي نديك عند باباك .
قتلو وولادي قالي ولادي يبقاو هنا قتلو لالا خليني نقعد عندك غير خديمة نربيهم ونتهلا فيهم قالي لالا تروحي، قعدت نبكي ونحلل فيه ماحبش يسمعني ولملي حوايجي وجرني لطوموبيل وبعثني عند بابا
غير مع الشيفور باب كان كبير وزاوالي ماقدر يديرلي والو قعدت نبكي على ولادي ليل نهار فات ست شهر وماعندي حتى خبر على بوعلام ولا ولادي
بابا قالي يابنتي انا راجل كبير ومريض وخايف نهار نموت و نخليك تتبهدلي مورايا ماضنيتش بوعلام يرجعك ولا يخليك تشوفي ولادك
اليوم جاني ولد عمك علي وخطبك مني هو زوالي بصح يتهلا فيك راكي دمو ولحمو خليني نموت مرتاح يابنتي راني متحير عليك بزاف .
مكانش عندي حل اخر وقطعت لياس من بو علام
تزوجت بعلي بن عمي ورفدت الحمل وعلي ماطولش و مات في حادث فالخدمة تاعو خلاني بالحمل ربي يرحمو.
رجعت مرة اخرى لبابا وولدت جبت طفلة شابا بزاف سميتها ......حورية ايه حورية بنتي من بن عمي وزواج شرعي على سنة الله ورسولو بعد شهرين
جا الشوفور تاع بوعلام وقال لبابا بوعلام بعتني نسقسي على بنتك عايشة سمع بلي راجلها مات ...قالي ونقلك حاجة
قالي اذا كان عندها كاش ولد ولابنت مانسحقهاش غير خليها مع ولدها عند باباها الشوفور قال لبابا انا راني سقسيت مليح بصح اذا حبيت مانقلوش بلي عندها بنت شدها نتا وهي تروح لولادها لخرين راهم يشفو الكافر وبنها زهير راه مريض وباغي يموت
كي سمعت بلي زهير مريض وممكن يموت مابقاش فيا عقل ماعرفتش واش نعمل قتلو نروح لولدي زهير ادوني لولدي زهير قالي بابا ماعليه روحي وانا ندبر راسي مع حورية
لميت شوية حوايج تحضنت حورية بنتي وسلمت عليها بزاف بزاف وطيتها
ورحت مع الشيفور وقلبي يتقطع على بنتي حوريه وعلى زهير
وصلت لقيت زهير مريض بزاف والحمة تقتل فيه بقيت معاه شربتلو دواه ماكانش يحب ياكل رضعتو من صدري. بشوية رفد صحتو وبرا كان ناقص حنانة وانا عطيتو كل حنانتي عليه وعلى حورية بعد عشر ايام برا زهير مليح
بوعلام بعث الشيفور يجيب بابا باش يعقد عليا من جديد جابابا وعقد.
داني بجيهة وحسيتو كان تعبان قالي شوفي يابنتي انا راني مانقدرش نربي حورية انا كبير بزاف وصحتي زايدة تنقص كاين مرا حبت تديها وتربيها قتلو بصح يابابا انا وين نعرف بلي راح تتهلافيها وبلاك كشمايصرالها قالي ربي هو الي يتوالاها ويحفظها هاكي هذا ""الخلخال،"" نحاس تاع يماك راني عطيتلها واحد وجبت
لاخر وقتلها هذي هي لمارة خليه عندك وكي يحب ربي راكي تروحي توريهلها وتشوفي بنتك عطالي اسم لمرا وعنوانها والخلخال وبقاني على خير وراح ومن هذاك اليوم ماشفتش بابا مات ربي يرحمو
فاتو ليام سافر بوعلام قلت نروح نشوف حورية ركبت مع الشيفور ورحت للعنوان الي كتبولي بابا قالولي الجيران لمرا هذي رحلت ومكانش حتى
واحد يعرف وين راحت فاتو سنين وعوام كل متجيني الفرصة نروح ونحوس عليها بلا فايدة حتى قطعت لياس وبعد سنين ومنين بوعلام تعرف على تاجر كبير وحب يكبر الخدمة تاعو معاه وباش يوطد العلاقة مليح قال لزهير نخطبلك بنتو
رها هي الوحية عندو وهي الي راح تورث كل ثروتو زهير ماقبلش زواج المصلحة بصح بوعلام اصر عليه و قالو دعوة الشر اذا عصيتني وماخضيتش رايي
زهير قبل بسيف ورحنا خطبناها و بعد مدة درناعرس كبير و جبناها انا كنت فرحانا بزاف خصوصا اسمها على اسم بنتي وماشكيتش وماجاش في
بالي بلي تكون حورية بنتي خاطر باباها ويماها كانو يحبوها وماتخيلتش يكونو ماشي والديها
في ليلة العرس وفي اخر لحظة كانت حورية طالعا في الدروج رفعت لاغوب بلونش تاعها باش تطلع الدروج لمحت خلخال في رجلها شبهتو لتاع يما ماصدقتش حاولت نتاكد رحت وعملت روحي نعاون
فيها ورفدتلها الروبا شفت خلخال يما هو اكيد سبقتهم ورحت لغرفتي وجبدت فردت الخلخال الي عندي وخرجت نجري كانو الناس كامل هبطو وحورية وزهير دخلو لشمبرتهم حليت الباب بلا ماندقدق ودخلت قلتلها وريني الخلخال الي في رجلك
نحيه وهاتيه ستغربت وخافت مني وزهير قالي يما واش راكي تعملي قلتلها نحيه وضرك نفهك عطاتولي جبتهم وحطيتهم مع بعض لقيتهم خاوا قتلها هذا الخلخال منين جاك قاتلي تاع ماما لبستو للفال قلتلها هذا خلخال يما وتما حكيتلهم
كل شي حورية كانت عارفة بلي والديها ماهمش والديها الحقانيين جازت علينا ليلة كحلة بكينا فيها لبكا تاع عمر كامل مالقينا نفرحو كي تلاقينا ولا نبكو على
المصيبة الي تحطينا فيها زهير قالي نديرو سبة نطلقو ومانفضحكش قتلو واشمن سبة رايحا تقنع باباك بيها قالي
نخمم و غدوا يفرج ربي حورية راحت بعد اسبوع لدارهم وما
رجعتش بوعلام ماسكتش وحب يعرف السبة راحيجيب فيها
ماحبتش قعد يحاول وراح مرة وثنين وفي الثالثة دا ولادو
وكامل وداني بوعلام قال لباباه خليها تجي هنا وتقابلنا وتقلنا
وعلاش ماراهيش حابة ترجع باباها قالو خليك بصح بوعلام اصر عليه وحاول معاه حتى راح عيطلها
خرجت لينا حورية و قالت ما نرجعش لوليدكم وليدكم ماهوش راجل
ما تتخيليش واش صرا فينا وخصوصا زهير هو الي قال لحورية تقول هكا لخاطر بوعلام ماحبش يستسلم
زهير عمل المستحيل باش ما نتفضحش حتى و زواجي كان شرعي بصح بوعلام ماكانش راح يغفرهالي
فهمتي يابنتي هاذي هي الحقيقة الي خباها عليك زهير
مالقيت مانقلها والله بكيت معاها و حسيت بيها قلتلها الله يصبرك وخلاص
قاتلي انا نروح ونت تهلاي في روحك راحت
قالي زهير ضركا كي عرفتي الحقيقة ريحتي قتلو ايه هاذ وين
عرفت بلي يماك اسها عايشة ضحلي و قالي مالا نوضي نخرجو نحوسو شوية
نضت بزربا دخت وكنت رايحا نطيح غير حكمني زهير قالي
ماراكيش مليحا قتلو ايه اني تعبانة ودايخة قالي اقعدي
وماتتحركيش انا نجيبلك الي تسحقيها هبط جاابلي لعشا ماقدرتش ناكل و رقدت
فطنت على كلامو لحلو قالي نحبك ونموت عليك ريحت حنونتي ؟؟
قتلو ايه
قالي اليوم الجمعة وراهم ملمومين كامل ارواحي نروحو
نتقهواو معاهم لبست روبا شابا ومشطت شعري وماكييت
شوية وهبطت انا وياه قعدنا معاهم تقهوينا وقصرنا وجازت
قعدة تهبل زهير خرج مع خاوتو لبرا يحكو وانا وسلافاتي
وجدنا لغدا بقصرة وضك توحشت زهير خرجت نحوس عليه
لقيت سي بوعلام قاعد يقرا الجرنان برا كي عادتو خفت منو
و حبست في مكاني قالي كريمة بنتي زهير حالتو مليحة
تهلاي فيه بنتي هاهو جاي جا زهير حكمني من ايدي ودخلني
قالي واش قالك بابا قتلو والو قالي تهلاي في زهير قالي عندو
الحق تهلاي فيا ضحكنا ودخلنا تغداو وانا ماحملتش ريحت
الماكلا ماذقت والو كي كملنا قاتلي زهية واش بيك ماكليتي
والو قتلها دايخة ومانحملش حتى ريحة قاتلي مبروك عليك
وقيلا راكي بالحمل قلتلها منك بصح قاتلي زيدي تاكدي من الطبيبة .
طلعت انا وزهيرلشمبرتنا حكمني وقالي عندي حاجة شابا
نقلهالك قتلو انا ثاني عندي حاجة شابة نقولهالك قالي منك
بصح قتلو ايه قالي حاجتي شابة على حاجتك قتلو لالا مكاش
حاجة تكون شابة على حاجتي ضحك وقالي مالا قولي
ضحكت وقتلو ايا قول نتا قبل
قالي نقلك قتلو ايه
قالي اليوم يجي خوك و دارهم يطلو عليك بعثتلهم الشيفور
قبل مايكمل تلحت عليه تحضنتو وقتلو نموت عليك
هو قالي كون عرفت هكا كون جبتهم هذي مدة !!...
بعدها قالي قولي حاجتك
قتلو وجد روحك قالي هاني واجد
قتلو راني حاملا
حبيبي زهير قريب تغاشا قالي منك بصح قتلو لازم ناكد من
عند الطبيبة قالي نروحو ضرك قتلو ودارنا شكون يستقبلهم
قالي مالا غدوة قتلو ان شاء الله
تمت