رواية جريمة قتل ميت كاملة
بقلم شيماء عبدالحميد
الفصل الاول
بس دي جريمة قتل
لا متقوليش كدا ياسارة ،ازاي اقتل شخص وهو اصلا ميت
دي الحقيقة ياحور ، فيه حد اتقتل يعني دي جريمة قتل.
-ايوة بس اللي اتقتل ده مش إنسان
-يعني اي مش إنسان؟
-يعني لو اللي اتقتل ده إنسان كان نزل دم ،لكن اللي ضربته
بالسكين منزلش اي نقطة دم ياسارة ومات يعني مش إنسان مش بشر.
-او بشر بس ميت اصلا
-حتي لو كان ميت واتضرب بسكين كان هينزل دم برضو
وكمان كدا تبقى مش جريمة قتل اصلا
-انا مش عارفة اقول اي ياحور ولا فاهمه حاجه ،انا مش
مستوعبه لحد دلوقت انتي ازاي تسلمي عقلك للأفكار دي
،وازاي تنفذي اوامر لعبه ،ازاي لعبه تتحكم فيكي بالشكل ده
لدرجة انك تقتلي
-قولتلك مقتلتش ياسارة ،منزلش دم يعني انا مقتلتهوش
وكمان دي مش لعبه دي بؤرة امنيات .
-ما ده في حد ذاته كارثه ياحور لأنها مش لعبه عاديه واللي
أسسها و بيتحكم فيها مش بشر دول سكان العالم السفلي
فاهمه ده معناه اي ،يعني هتفضلي مرغمه تنفذي كل اوامرهم
لأخر ليفل في اللعبه ومن اولها جريمه قتل
-متقوليش قتل ياسارة واكبر دليل ان مفيش جثه اصلا
=لا قتلتي ياحور بس اللي اتقتل ده مش بشر
-انتي بتقولي اي يا منى ،حتى انتي كمان مش مصدقه.
=مش مصدقه اي ياحور ، اذا كان انتي نفسك بتقولي انك
ضربتي واحد بالسكين ومات
-ايوة بس اختفي يعني مماتش ،اكيد عايش ومشي
=مشي ازاي وانتي بتقولي مكنش فيه نفس وكمان منزلش دم
وفي نفس الوقت ميت
-مش عارفه بس انا خايفه
-اسمع بقا ياسيدي
-قولي ياست هنا
-عبارة عن حاجه كدا بنعملها زي لعبة يعني بس بتتعمل في
سريه تامه ،المهم اننا بنعمل طقوس معينه للعبه دي وبعدها
بنتمني أمنيه وتاني يوم بتتحقق.
-ده اللي هو ازاي بقا؟
-ده اللي عرفته ياعلي ،انا نزلت الطقوس اللي هنعملها للعبه دي
وقررت أعملها بعد بكرة.
-اشمعنا بعد بكرة يعني
-لان بابا وماما هيكونوا سافروا وهكون لوحدي في البيت
والطقوس دي بتفرض اني اكون لوحدي في المكان ولازم
تتعمل من الساعه ٢ للساعه ٣ قبل اذان الفجر يعني.
-انتي بتتكلمي جد ياهنا ،انتي بجد هتعملي التخاريف دي؟
-دي مش تخاريف ،انا سمعت ان كل اللي عملوا طقوس اللعبه دي امنياتهم اتحققت
-ربنا بس اللي بيحقق الامنيات ، ربنا وحده اللي قادر علي كدا
،مش مجرد لعبه ، انتي عارفه لو الكلام اللي بتقوليه ده صحيح يبقا معناه اي؟
-هيكون معناه اي يعني ياعلي.
-معناه ان دي مش مجرد لعبه عاديه
-مش فاهمه
-اديني اسم اللعبه دي بسرعه
-اوك
غاب عنها ساعتين ورجع يكلمها تاني
-الوو
-هنا اوعي تعملي اي حاجه من الطقوس دي ياهنا
-ليه ياعلي؟
-اسمعي كلامي اوعي تعملي اي حاجه من الهبل ده ،دي مش
مجرد لعبه امنيات زي ما انتي فاكرة ،دي اخطر من كدا بكتير
-مش فاهمه حاجه
-دي مش طقوس لعبه ياهنا دي طقوس استدعاء وسيط من
اهل العشيرة ياهنا والوسيط ده بتبقا حياته في خطر لحد اخر
ليفل في اللعبه يعني ممكن يتقتل او انتي نفسك ممكن تقتليه
في اي وقت من غير ما تحسي ولو الوسيط ده اتقتل هتبقى
كارثه بمعنى الكلمه واللي هيحصل فيكي أكبر من انك تتخيليه اصلا
-اي الهبل دي ياعلي
-دي الحقيقة ياهنا صدقيني اوعي تخاطري بحياتك عشان خاطري.
-فيه ناس من صحابي عملوها ومحصلهمش اي حاجه وكل اللي
اتمنوه اتحقق، انت جبت الكلام الفاضي ده منين
-يعني اي ياهنا؟
-يعني انا هعمل طقوس اللعبه دي ياعلي وهثبتلك ان كلامك
غلط وهتشوف
-هنا ، ياهنا
رواية جريمة قتل ميت
الفصل الثاني
بقلم شيماء عبدالحميد
-طب اهدي ياحور واحكيلي من الاول انتي جبتي طقوس
اللعبه دي من فين ومين قالك عليها؟
-بنت اجنبيه اتعرفت عليها علي السوشيال ميديا اخدنا فترة
كبيرة نتكلم وبعدها جات سيرة الامنيات فبسألها اي امنياتك قالتلي يعني اي امنيات؟
-قولتلها الحجات اللي نفسك تتحقق
-قالتلي مفيش لان اي حاجه عايزنها بتتحقق في نفس الوقت
اللي بتيجي فيه علي بالنا ،كنت مستغربه جدا من كلامها يعني
اي اي حاجه يفكروا فيها تتحقق في نفس الوقت فسألتها
ازاي؟ . قالتلي لأن عندنا بؤرة الامنيات فسألتها يعني اي
وعايزة اعرف اكتر عن بؤرة الامنيات دي ،فهمتني انها طقوس
معينه بتتعمل وبعدها كل امنياتهم بتتحقق وانها منتشرة
ومعروفه في كل بلاد الغرب وفهمتني ان ده اساس حياتهم .
في الاول مكنتش مقتنعه بس هي اقنعتني اني اجرب واني
مش هخسر حاجه لو جربت وطلبت منها التفاصيل وبعتتهالي
وقالتلي اعمل اي بالظبط. بعدها جمعت المواد اللي هستخدمها ونفذت كل الطقوس دي
-اي المواد دي؟
-حجات عاديه يعني كام شمعه بس يكون عددهم فردي تلاته
او سبعه ونار وخيوط وطبق فيه ميه بملح وحجات زي كدا يعني
-كملي
-البنت دي أكدت عليا اني لازم اكون لوحدي ومينفعش حد
يقاطعني وبالفعل انا اخترت الوقت اللي كل اللي فالبيت
نايمين بس للأسف أحمد صحي فالوقت ده وقاطعني نادى عليا
وخرجني من اللي كنت بعمله وقتها شوفت واحد بيقرب من
احمد وبيحاول يخنقه مكنش قدامي غير السكين اللي ضربته
بيها وبعدها وقع علي الارض حاولت افوقه بس مكنش فيه اي
نفس ،جريت علي المطبخ اجيب ميه يمكن يفوق رجعت
ملقتهوش والغريب ان أحمد كان واقف يعني شايف كل اللي
بيحصل بس اما سألته عن الشخص ده قالي انه مشفش اي
شخص ولا اي حاجه حصلت من اللي انا بقولها ،حسيت ان
احمد زي مايكون انه كان متخدر ومكنش شايف اي حاجه من اللي حصلت.
-حاولي تنسي كل اللي حصل ده ياحور ومتفكريش فيه كأنه
محصلش ولا كأنك عملتي طقوس اللعبه دي.
-انسى ازاي يامني ؟
-انتي بتقولي ان الشخص ده اختفى ومحدش شافك وانتي
بتعملي كدا حتي احمد مكنش حاسس بأي حاجه حصلت يبقا
ننسي كل ده كأنه محصلش وترجعي تعيشي حياتك زي الاول خالص.
-ماشي يامني هحاول
-اي ياهنا مالك؟
-علي مش راضي اني ادخل اللعبه دي يا أروى
-ليه؟
-بيقول انها خطر اووووى وان فيها وسيط وقتل واذى وكلام كتير انا مش فهماه
-ده اللي مضايقك؟
-اللي مضايقني انه مش بيحبني يا أروى طول الوقت عايز يأمر
وانا أنفذ وبس بدون نقاش ،حتى مجرد لعبة بسيطة هلعبها
بيحاول يمنعنى منها وبيألف كلام كتير وحش عنها عشان
يخوفني وملعبهاش ،يعني مجرد حاجه هتسليني بيمنعني منها ،
هو ليه بيحب يتحكم طول الوقت فيا.
-ما انتي سبب كل ده يا هنا
-انا؟
-ايوة انتي اللي طول الوقت بتحكيله انتي بتعملي اي
وهتعملي اي وليه ،ياهنا مش كل حاجه تحكيهاله ،فيه حجات
في حياتك مش لازم تحكيهاله ،انتي بكدا بتخليه يتحكم في كل حاجه
-انا بحبه ومبعرفش اخبي عنه اي حاجه حتي لو حاولت اخبي
بلاقي نفس من غير ما احس بحكيله كل حاجه ،هو عودني اني
مخبيش عنه حاجه وانا مش عارفه ابطل العادة دي
-لازم تتعودي تبطلي
-هحاول
-المهم انتي ناوية تدخلي اللعبه دي ولا خلاص كدا.
-انتي شايفه اي؟
-مش عارفه بس لو عملتيها انا كمان هعملها وبعدين مش
هنخسر حاجه او جربنا مش يمكن يظهرلنا مارد ينفذلنا كل طلباتنا .
-واي هي بقا طلباتك ياست اروى
-اول حاجه هطلبها يجبلي ديك رومي كبير اوووووي وبيتزا
وحمام وايس كريم واكل كتير اووووي
-هو انتي مفيش في حياتك غير الاكل يابنتي😂
-ما انتي جايه تسأليني عن طلباتي وانا اصلا جعانه اوووووي😂
-طيب خلاص يلا نروح اي مطعم ناكل ونقرر امتي نعمل اللعبه دي
-اوك يلا
كل مجهول مخيف وكل مستقبل مجهول والخوف بيدمر
الحاضر للاسف ، احنا ليه كبشر بنفكر ان المجهول دايما هو
حاجه وحشه هتحصل رغم انه ممكن يكون العكس ممكن
يكون كل الحجات اللي انت بتتمنى انها تحصلك ، يبقا انت
ضيعت وقتك في خوف ملهوش اي مبرر ، ازاي كبشر بنطلب
من بعض امنياتنا واحنا عارفين كويس ان الامنيات بأيد الخالق
بس سبحانه ، او نطلبها من جن رغم ان الجن كمان مخلوق زيه
زينا ، وملوش حول ولا قوة إلا بأمر الخالق برضو .
-مالك ياعلي من وقت ماجينا وانت بتتكلم في حجات غريبه
مش فاهم منها حاجه.
-تعرف اي عن الجن يا أحمد؟
-مخلوق زيه زينا ،احنا اتخلقنا من طين وهو اتخلق من نار ،
احنا اخدنا شكل البشر ده وهو عبارة عن مخلوق شفاف
مبنقدرش نشوفه عشان هو والهوا واحد ، بس ربنا اداله القدرة
علي التشكل ،يقدر ياخد شكل حيوان او حشرات او حتى
انسان ، عندهم قدرة علي الطيران ليهم قدرات كتير برضو
بس معرفهاش كلها .
-تعرف بيعيشوا فين؟
-في كل مكان معانا وحولنا وفي المقابر والمساكن المهجورة
بس مكان التمركز بتاعهم هو العالم السفلي تحت الارض
واعرف ان ليهم وقت محدد علي الارض ووقت يرجعوا فيه
العالم بتاعهم وان اللي بيخالف الوقت ده تقريبا بيتحرق.
-تعرف اننا نقدر نأذيهم
-لأ ،اعرف انهم ممكن يأذوا البشر بطرق كتير لكن ان البشر يأذوهم لأ
-للأسف اوقات كبشر بنأذيهم وكمان من غير ما ندرك ده ،زي
انك تستدعي وسيط منهم وتقيده بطقوس معينه في الوقت
اللي المفروض يرجع فيه العالم بتاعهم فيتحرق.
-ايوة بس ليه الانسان يعمل كدا وهو عارف انه مش هيسلم من
شرهم لو عمل ده وانهم مش هيسبوه
-ما انا قولتلك يا أحمد الانسان مبيبقاش مدرك ده وهو بيعمله.
-انا مش فاهم حاجه وانت بتتكلم ليه فالموضوع ده دلوقت.
-خايف علي هنا يا أحمد
-ليه مالها؟
-ناويه تأذيهم
-نعم😮
-بعد الاكل الحلو ده تحبي نعمل اللعبه امتي؟
-مش هنضيع وقت نعملها انهاردة
-تمام هجهز كل حاجه واكلمك
-في اي ياحور؟
-ألحقيني يا سارة القتيل رجع تاني