رواية زوجي وزوج اختى
الفصل الخامس
بقلم رودى سيد
حكوا شوية كتير وقليل عجبتني شخصية عامر ازاي كان
بيتكلم وازاي حاول يقنعهم عجبني
حبه للمرحومة كان باين من كل كلمة عنيه بتلمع صوته بيرجف اول ما بينطق اسمها
.....................
بابا: سما حبيبتي هاتي البنت تشوف ابوها
سما: حاضر يا بابا
كانت حلا قاعده مع المربيه مكنتش اسيبهم مع بعض غير في وضع زي ده
اخدتها منها اول ما شافتني مسكت في هدومي ومكنتش
عاوزة تسيبني وفضلت تطلع اصوات
حلوه زي اللي بيعملوها الاطفال اللي هي اغغغااا من كتر ما
بتنام في حضني وبحضرها الرضعه
بدات احسن ان البنت فكراني امها
اول ما نزلت بيها علي السلم ابوها وقف وابتسم
سما: شوفي مين جه يشوفك يا حلا
طبعا البنت لسه صغيره ومش متعوده عليه علشان كده لما جه ياخدها مسكت في هدومي وفضلت تعيط
سما: ده بابا يا حلوة
بس اول ماخدها مني فضلت تشاور عليا عوزاني اخدها
ماما فضلت باصه علينا ومستغربة
ماما: هاتها انا هشيلها شوية
بس حلا كانت تبص عليا وتبكي عوزاني انا
ماما: هو في ايه في حاجه وجعاها؟
سما: لا يا ماما هي عوزاني هاتيها كده
روحت خدتها من ماما سكتت علطول كلهم استغربوا وبعدها
بابا قعد علي الكنبه وقال الطفله
في السن ده بدأت تتعرف علي الحاجات والاشخاص وبعتقد انها فاكره سما امها
ساعتها ماما بصتلي وحسيت من نظراتها انها بتفكر في حاجة مظهرتش الا بعدين حتي عامر
قعد جمبي وفضل يمسك ايد البنت ويضحكلها وهي تضحكله بس في حضني
ماما: سما حضري عشا
سما: جاهز يا ماما
ماما: روحي اعملي حاجه جديدة وسخني الاكل زمانه برد
من الاخر فهمت ان ماما بتطرقني وعوزاني اقوم
................
دخلت المطبخ وخدت البنت معايا بس اللي استغربته ان ماما جات وبصتلي بعصبية وقالتلي
متطلعيش غير لما انادي عليكي وقفلت باب المطبخ وراها
في ايه يا ماما فهميني ؟
كان كل همي ان اللي بيحصل ميزعلش ماما ويخلي صحتها تدهور
سخنت العشا وكان قرب يبرد تاني واخيرا جات ماما وشها
احمر زي الدم وفضلت تنقل معايا الاكل علي السفرة بعصبية
سما: ماما في ايه مالك؟
حطت ايدها على خدي وقالتلي مافيش حاجه
روحت ابص علي الصاله اشوف في ايه لقيت كل حاجه متغيرة كأني غبت عنهم سنة
عامر باصص في الارض وايده علي جبينه وبابا فارد ايده علي ضهر الكنبة
ماما: ياجماعه الاكل جاهز
كنت مستغربة اللي بيحصل في حاجه مش طبيعيه
قربت من بابا ووشوشته
سما: بابا في اية؟
بابا باصلي ولف وشه تاني
قعدنا على السفرة وماما كانت بتاكل بطريقه غريبة كانها بتنتقم من الاكل بتاكل بعصبية
فضلت ابص عليهم كل واحد علي وشه 100 الف تعبير بس بردوا مكنتش فاهمه حاجة
خلص الاكل ورفعته وعامر مشي ماما راحت وراه على الباب
وسمعتها بتهمس الموضوع ده عليا واعتبره منتهي
ايه الموضوع عليا دي مفهمتش المهم نضفت السفرة ودخلت
للنونه غيرتلها هدومها ولسه داخله انام ماما جات
ماما: ايه يا سما هتنامي؟
سما: ايوة يا ماما
قومت اتعدلت وبصتلها
سما: في ايه يا ماما ؟
سحبت كرسي المكتب وقعدت قدام سريري
ماما: عاوزه احكي معاكي كلمتين
سما: خير يا ماما
بس الصراحه وشها مكنش بيدل علي اي خير بالعكس قولت اكيد في مصيبة
ماما: انتي بتحبي اختك الله يرحمها؟
سكتت
ماما: بتحبيها ولا لا ؟
قالتها بعصبية
سما: في ايه يا ماما ايه الكلام ده؟
ماما: وبتحبيني انا ولا لا؟
مكنتش سيبالي فرصه اتكلم دموعها حرقوني
سما: ماما في ايه فهميني؟
ماما : لو بتحبينا فعلا روحي اتجوزي عامر
هي قالتها وانا مش فاكرة هي قالت ايه بعدها .......