أعطيت لحبك فرصة فخدعتني
الفصل السابع
سوزان بلهفة وهي تحتضن أحمد بقوة: أحمد !!..وحشتني اوي اوي اوي ي بيبي
أحمد بصدمة وهو يبادلها الحضن: سوزان !! وحشتيني اكتر
سوزان بإبتسامة: أنتي بقي ملك خطيبة أحمد !! ازيك عاملة ايه معلش انشغلت مع أحمد عشان كان واحشني اوي
ملك بغيرة: أيوة أنا..عادي ولا يهمك..مين حضرتك ماتعرفتش بحضرتك !!
سوزان بإبتسامة: أنا ابقي بنت خالة أحمد و...قاطعها صوت والدتها التي تنادي عليها قائلة:
سامية: مين ي سوزان !!
سوزان: دة أحمد ي ماما وملك خطيبته..تعالوا اتفضلوا واقفين ليه
سامية: كدة موقفاهم ع الباب ي سوزان
سوزان: معلش بقي ي ماما انشغلت معاهم وأحمد كان واحشني أوي
سامية وهي تحتضن أحمد: وحشتني اوي ي حبيبي كدة من يوم ماخطبت وانت ناسينا ولا كأن ليك خالة..العروسة واخداك مننا بقي ولا ايه !!
أحمد بإبتسامة: انا اقدر برضو ي خالتي دة انتي ف القلب وعارفة غلاوتك عندي بس هي قلة فضي والله ومشغوليات بقي وكدة غصب عني والله
سامية وهي تحتضن ملك: ازيك ي قمر..ووجهت كلامها لأحمد لا عرفت تنقي فعلاً ايه الحلاوة دي ليها حق سوسن تقول عليكي قمر وجمال مايتوصفش
ملك بإبتسامة: ربنا يخلي حضرتك يارب دة بس من ذوق حضرتك والله واكيد مفيش أجمل من حضرتك ومجيش جمبك حاجة والله
سامية بإبتسامة: ايه كمية كلمة حضرتك أللي ف الموضوع دي قوليلي ي خالتو علطول زي أحمد كدة
ملك بإبتسامة: دة شرف ليا والله
سامية: تسلمي ياقمر يلا تعالوا ادخلوا ماتتكسفوش البيت بيتكم..وقاطعها صوت سوزان التي تنادي عليها فتركتهم وذهبت..وهم يدخلون تحدثت ملك قائلة:
ملك بغيرة: مين سوزان دي !! وازاي تحضنك قدامي عادي كدة !! وانت واقف ساكت عادي !!
أحمد بضحك: بتغيري عليا ولا ايه !!
ملك بعصبية: أحمد مش وقت هزار بجد مين دي
أحمد: طيب اهدي بس ومش وقته دلوقتي تعالي ندخل دلوقتي وبعدين نتكلم
ملك: ماشي ي أحمد..بس هتقولي مين دي وعلاقتك ايه بيها..ودخلوا ليجدوا والدته تجلس فتسلم ملك عليها
سوسن: أخيرًا شوفناكي ي ملك
ملك بإبتسامة: أنا موجودة أهو ي ماما علطول..وحشتيني والله
سوسن: وأنتي اكتر ي حبيبتي والله..ليقاطع حديثهم صوت سامية قائلة: يلا ي جماعة الغدا جاهز
يلتف الجميع حول السفرة ليأتي صوت صافي وهي تدخل وتقول: ايه الروايح الحلوة دي..ايه دة وكمان عندنا ضيوف
سوسن: وحشتيني ي أم لسان طويل
صافي بفرحة: خالتو سوسن وحشتيني اكتر وانا اقول البيت منور ليه اتاريكي انتي هنا ي خالتو
سوسن: ي بت بتاكلي بعقلي حلاوة
صافي: وانا اقدر برضو ي خالتو..واندفعت نحو ملك..ولوكا كمان عندنا وحشتيني اوي..ووجهت حديثها لأحمد ازيك ي أحمد عامل ايه
سامية: انتي تعرفي ملك خطيبة أحمد ي صافي !!
صافي: اه طبعا ي ماما ملك أخت ياسمينا صحبتي وأما اتقابلنا جت معاها هي وأحمد وطلعت هي ومصطفي يعرفوا بعض وبيشتغلوا مع بعض
سامية بضحك: كل دة وانا معرفش..شوفتي العيال ي سوسن
سوسن بضحك: انا زيك اول مرة اعرف حكاية ياسمينا وصافي يطلعوا صحاب
★٭★٭★٭★٭★صباح وحيد★٭★٭★٭★٭★
حسين: ي سهير مينفعش ملك بنتك تتنطط كل يوم والتاني مع أحمد كدة مش معني أنه قرأ فاتحة يبقي كدة خلاص لسة مفيش خطوبة ولا دبلة ف ايديها لحد الآن تثبت أنه خطيبها
سهير وهي تجلس بجانبه: جرا ايه بس ي حاج ماهو الواد كويس ومحترم واحنا عارفينه وبيحب بنتك
حسين: محدش قال حاجة وانا عارف أنه محترم وعارف أخلاقه وإلا مكنتش وافقت عليه زوج لبنتي..بس مينفعش كل يوم تخرج معاه كدة ولسة دبلته مش ف ايديها الناس تقول علينا ايه !!
سهير: عندك حق بس هي حماتها كلمتها وعزمتها ع الغدا معاه عند خالته ومكنش ينفع تقولها لا بقي
حسين: مفيش مشكلة المرة دي بس بعد كدة ماتتكررش تاني لأنها مينفعش تدخل بيتهم دلوقتي وهي لسة قارية فاتحة بس..عشان كلام الناس وانتي عارفة بقي
سهير: مش هتكرر تاني إن شاء الله ي حاج
"وهنا كانت قد جاءت ياسمينا"
ياسمينا: مسا مسا ع الناس الكويسة
سهير: حمد لله ع السلامة ي لمضة
ياسمينا وهي تقبل والدتها: الله يسلمك ي قلب اللمضة
حسين: انا نازل عاوزين حاجة من تحت اجبهالكم وانا جاي
ياسمينا بضحك: رايح فين بس ي حاج ولا هو إن حضرت الشياطين ذهبت الملائكة بقي !!
حسين بضحك: وانتي مالك ي بت انتي رايح فين
ياسمينا بغمزة: رايح تقابل مزة ولا ايه !!
حسين: لا ي لمضة ع رأي أمك..رايح اقابل صحابي من زمان ونسهر مع بعض
ياسمينا بضحك: أيوة بقي ي عم مين قدك..وبغمزة: بس لو رايح تعمل حاجة كدة ولا كدة قولي انا بنتك ستر وغطا عليك واوعدك ماما اول واحدة هتعرف قصدي مش هتعرف يوووه
حسين بضحك: انتي عاوزة ايه ي بت ماتسيبيني أنزل بقي وبعدين انا مفيش واحدة تملي عيني غير أمك
سهير: ي بت بطلي لماضة مع ابوكي بقي وسيبيه ينزل
ياسمينا بضحك: حاضر ي سوسو عشان خاطرك بس..ماهو مين هيدافعله غيرك مش لسة قايل فيكي كلمتين حلوين لازم طبعا تدافعي عنه
حسين وهو يضرب رأس ابنته بخفة: انا عارف أني مش هخلص معاكي وهتأخر كدة ولازم أنزل بقي..مش محتاجين حاجة
سهير: تسلم ي حاج عاوزين سلامتك
"وذهب حسين وتركهم وبعد أن ذهب دق جرس الباب"
ياسمينا بضحك: شوفتي ي ستي أهو شكله نسي المفتاح رجع تاني
سهير: افتحي طيب ليكون مش ابوكي
ياسمينا وهي تفتح الباب: نسيت المفتاح و..ولم تكمل جملتها وقالت بفرحة: خالتو ناهد وأمل !! وحشتوني اوي..تعالوا ادخلوا واقفين ليه البيت بيتكم ي جماعة والله
سهير: مين ي ياسمينا !!
ياسمينا: خالتو ناهد وأمل ي ماما
ناهد وهي تذهب ناحية سهير: ازيك ي سهير
سهير وهي تحتضنها: ي أهلاً..ي أهلاً..ايه النور دة وكمان امولة معاكي ايه النور دة كله
أمل وهي تحتضن خالتها: ربنا يخليكي ي خالتو دة نورك وحشتيني والله ي خالتو
سهير: انا برضو اللي وحشتك ولا ياسمينا وعشان كدة جاية عشانها ها !!
أمل بضحك: أنتو كلكم وحشتوني والله ي خالتو
ناهد: فين ملك اومال !!
سهير: ملك مع أحمد خطيبها خالته عازماهم ومامته كلمت ملك قالتلها لازم تيجي وحسين لسة نازل حالاً أهو هيسهر مع صحابه
ناهد: اه ماهو قابلنا تحت وسلم علينا
ياسمينا: عن اذنكم احنا بقي أصل البت أمل وحشاني اوي وعاوزة اقعد معاها
ناهد بضحك: اتفضلوا مانتو اتلميتوا ع بعض بقي وماتقلقيش هي قاعدة معاكي النهاردة وبكرة كمان
ياسمينا بفرحة: بجد !! انتو هتباتوا معانا بجد !!
ناهد: اه ي ستي عشان تشبعي مننا
سهير بسعادة: ي ألف نهار ابيض دة البيت كله ينور وإن ماشلتكوش الأرض نشيلكم فوق دماغنا..حاكم انتي كمان وحشاني اوي ي ناهد وعاوزة نقعد نتكلم زي زمان واحنا عيال..وبصت لياسمينا يلا اتفضلوا انتو بقي شوفوا هتعملوا ايه عاوزة اقعد مع اختي شوية لوحدنا
ياسمينا وبتبص لأمل: اه احنا بنتطرد بس بالذوق يلا ي بنتي ع اوضتنا بكرامتنا أحسن
"وذهبت ياسمينا وأمل بالفعل وتركوا لهم مطلق الحرية لإستعادة ذكرياتهم معًا عندما كانوا أطفالاً صغار"
"ونسيبهم مع بعض شوية بقي يتكلموا أخوات" 😂
***********صباح وحيد***********
ملك: يدوم يارب ي خالتو
سامية: ربنا يخليكي ي حبيبتي..بس انتي ماكلتيش حاجة
ملك: لا كلت والله لحد ما شبعت دايما عامر بحسكم
أحمد: طيب احنا هنقعد ف البلكونة شوية كدة
سامية: براحتك ي حبيبي دة بيتك..واحنا هنلم الاكل كدة ونعمل الشاي ونيجي علطول
"ملك وكانت بتلم الاطباق وشافتها سامية"
سامية وهي تأخذ الاطباق من ملك: انتي بتعملي ايه ي ملك سيبي كل حاجة زي ماهي مالكيش دعوة بحاجة..وروحي يلا اقعدي مع خطيبك عشان ميقعدش لوحده بقي ويقول إننا واخدينك منه
ملك: لا مينفعش ي خالتو لازم ألم معاكم مينفعش اسيبكم
سامية: والله العظيم مايحصل مش هتعملي حاجة..يلا بقي انا حلفت..وبعدين سوزان وصافي موجودين أهو هيلموا كل حاجة وانا هعمل الشاي وجاية علطول
ملك: طيب خلاص خليكي مرتاحة انتي وانا هعمل الشاي
سامية: لا طبعا مش هيحصل انتي بتقولي ايه..انتي مش هتعملي حاجة دة انتي اول مرة تدخلي بيتنا
ملك: سيبيني اساعدك طيب انتي تعبتي واقفة طول النهار
سامية: مش هيجيلي اعز منكم اتعبله..وعقبال أما اتعبلكم يوم فرحكم كدة يارب..يلا روحي بقي لاحمد ف البلكونة اقعدي معاه وماتوجعيش قلبي
ملك: خلاص حاضر ي خالتو
"وذهبت ملك لأحمد وجلست ع كرسي بجانبه"
أحمد: كنتي فين !!
ملك: مفيش كنت بلم معاهم السفرة بس خالتك مارضيتش تخليني اعمل حاجة
أحمد: اه..مستحيل هتخليكي تعملي حاجة
ملك: بس طيبة اوي خالتك
أحمد: اه بحبها اوي بجد..وقاطع حديثهم دخول مصطفي
مصطفي: أحمد ابن خالتي بنفسه عندنا وأنا معرفش ومعاه خطيبته كمان كانوا معزومين عندنا علي الغدا
أحمد: شوفت بقي..اتأخرت ليه ي بني كنت فين
مصطفي: مفيش ي عم الشغل هعمل ايه بقي..ازيك ي ملك عاملة ايه
ملك: الحمد لله..ازيك ي بشمهندس
مصطفي: الحمد لله تمام..وقاطعهم صوت سامية وهي تنادي: يلا ي ولاد الشاي جاهز
ملك: والله ي خالتو تعبناكي النهاردة ومكنش ليه لازمة الحاجات دي كلها والله
سامية بإبتسامة: ولا تعب ولا حاجة عقبال يارب ماتعبلكم يوم فرحكم..وبعدين انا معملتش حاجة دة شوية كيك جمب الشاي كدة
أحمد: ربنا يخليكي ي خالتي وتسلم ايدك
★٭★٭★٭★٭★٭صباح وحيد★٭★٭★٭★٭
في غرفة ياسمينا
أمل تتحدث مع ياسمينا ولكن ياسمينا ليست معها تمامًا فهي ف عالم آخر
أمل: ياسمينا..ياسمينا..وبزعيق: انتي ي بت
ياسمينا بخضة: ايه ي أمل خضتيني ف ايه !!
أمل: لا اخس عليا بجد..ف ايه !! لا مفيش حاجة خالص بقالي ساعة بتكلم بس وانتي مش معايا خالص وطلعت بكلم نفسي ف الآخر.. اللي واخد عقلك
ياسمينا: معلش ي امل ماتزعليش غصب عني بجد سرحت شوية
أمل: احكيلي طيب ف ايه !!
ياسمينا بإبتسامة: هحكيلك كل حاجة وهو من امتي بخبي عنك حاجة أسراري كلها معاكي
"ونسيبهم شوية بقي تحكيلها😂"
★٭★٭★٭★٭★ صباح وحيد ★٭★٭★٭★٭★
حنين: مالك ي آمال ف ايه !!
آمال ونظرت لأختها: مفيش حاجة ي حنين
حنين: انتي أختي وانا عارفاكي ف حاجة ضايقتك ومش عاوزة تتكلمي
آمال بدموع: انا تعبانة اوي ي حنين..تعبانة ومش عارفة مالي ولا عارفة اعمل ايه
حنين وتحتضن أختها: طيب أهدي كدة بس واحكيلي ف ايه وحصل ايه لدة كله !!
"وهنا كانت كوثر معدية سمعت كلامهم قررت تقف تسمع بنتها مالها وهتقول ايه"
آمال بعياط: أدهم..أدهم ي حنين
حنين بعدم فهم: أدهم ابن خالتو سميحة !! ماله أدهم !!
آمال بعياط أكثر: انا بحبه ي حنين بحبه اوي ونفسي يرجعلي تاني
حنين: طيب اهدي بس وفهميني ف ايه انا مش فاهمة حاجة..وإن شاء الله يرجعلك
آمال بعياط: مش هيرجعلي ي حنين مستحيل يرجعلي..انا جرحته اوي جرحته وهو مايستحقش مني كدة جرحته عشان خاطر واحد مايستاهلش مستحيل يسامحني ي حنين مستحيل..وقالي إننا أخوات وجع قلبي اوي بالكلمة دي
دخلت كوثر قائلة: واشمعنا انتي وجعتي قلبه بيها أما قولتهاله !! وبوجودك مع غيره !! هو فعلاً مستحيل يسامحك ويبقي حقه كمان
آمال بصدمة: ماما !!
كوثر وبصت لحنين: حنين اخرجي دلوقتي وسيبيني مع اختك شوية عاوزة اتكلم معاها
حنين: انا مش فاهمة حاجة..هو ف ايه واختي مالها !!
كوثر: حنين حبيبتي اخرجي دلوقتي وبعدين ابقي افهمك بس انا عاوزة اتكلم مع اختك شوية لوحدنا
حنين وهي تقوم من جانب أختها: حاضر ي ماما
كوثر: اقفلي الباب وراكي ي حنين
آمال: ايه ي ماما في ايه !! وليه خرجتي حنين وقفلتي الباب..هو حصل حاجة !!
كوثر: انتي أللي هتقوليلي ف ايه وحصل ايه !!
آمال بتوتر: ا..ان..انا..لا..م..مف..مفيش حاجة خالص
كوثر: أنا سمعت كلامك مع حنين عن أدهم كنت معدية من ع باب الاوضة وسمعتك وانتي بتعيطي قولت اكيد ف حاجة ولو جيت كلمتك هتنكري فقولت اقف اسمع هتقولي ايه..انتي لسة عاوزة أدهم !!
آمال بعياط: انا بحبه ي ماما..بحبه اوي ي ماما ونفسي يرجعلي ويكون ليا..مفتقدة وجوده اوي ف حياتي
كوثر: لا الجملة كدة غلط ماتتقالش كدة تتقال أنك بتحبي اهتمامه بيكي وحبه ليكي وفاقدة اهتمامه وحبه ليكي إنما مش بتحبيه هو ولا مفتقداه هو لانك لو بتحبيه زي مابتقولي مكنتيش جرحتيه بالشكل دة ولو مفتقدة وجوده ف حياتك فعلاً مكنتيش قدرتي تبقي مع غيره وتستحملي بعدك عنه يوم واحد إنما انتي مش بتحبيه ولا عمرك حبتيه ولا عمرك هتحبيه أنتي حبيتي اهتمامه بيكي وحبه ليكي .. وهو يستاهل واحدة احسن منك مليون مرة تستاهل حبه واهتمامه وتقدره إنما انتي ماتستاهليش واحد زي أدهم ولا تستاهلي حبه ليكي واهتمامه بيكي..انتي عاوزاه وقت فراغك وقت مانتي مش لاقية حد يهتم بيكي زيه ويحبك زي ماكان بيحبك انتي مفتقدة الشيء دة دلوقتي ومش لاقياه مع حد ومالقتهوش وماحسيتهوش غير مع أدهم وعشان كدة عاوزة ترجعيله دلوقتي معتبراه سد خانة وحطاه ع الرف ف الاحتياطي
آمال بصدمة: انتي بتقولي ايه ي ماما !! أدهم مستحيل يكون لواحدة غيري مستحيل اسيب واحدة تاخده مني..وانا عاوزة ارجعله لأني بحبه مش زي مانتي بتقولي كدة
كوثر: واشمعنا انتي روحتي لغيره وبقيتي معاه !! ولا هو حلال ليكي وحرام ليه !! حب !! حب ايه دة أللي بتتكلمي عنه تعرفي ايه عن الحب أنتي !! بتحبيه تجرحيه وتبقي مع غيره تعلقيه بيكي وتخليه يحبك وتقوليله خلينا أخوات وأول أما بقيتي لوحدك عاوزة ترجعيله فين الحب أللي بتتكلمي عنه دة !! وأما انتي بتحبيه زي مابتقولي كنتي سيبتيه ليه وضيعتيه من ايديكي !!
آمال بعياط: انا لسة بحبه ي ماما..وغلطت أما عملت كدة بس كنت مش حاسبة تصرفاتي كويس غلطت ومفيش حد مابيغلطش
كوثر بزعيق: بت ايه !! بتحبيه !! انتي كدابة انتي عمرك ماحبتيه بتحبيه بأمارة ايه ها !! بأمارة أما سيبتيه وروحتي لغيره !! عملتي ايه او ضحيتي بإيه عشان تثبتي حبك ليه دة !! فين الحب أللي بتتكلمي عنه دة..عارفة ي آمال حتي هو لو سامحك ودة طبعا مستحيل وانا متأكدة من كدة بس لو حصل وجيه أنا أللي مش هوافق لانك ماتستاهليش واحد زيه وهو يستاهل الاحسن منك مش هقبل أنه ينجرح منك للمرة التانية..وبطلي كدب بقي تصرفات ايه أللي بتتكلمي عنها عندك ٢١ سنة كان سن الرشد وتقولي اصلي مش حاسبة تصرفاتي لو فعلاً زي مابتقولي ماكنتيش قولتيله الكلام اللي قولتهوله دة مكنتيش وافقتي ع غيره وتبقي مبسوطة معاه وأول أما سابك عاوزة دلوقتي ترجعي لأدهم..هو فعلاً كلنا بنغلط بس غلط عن غلط يفرق وانتي غلطك كان بمزاجك مش غصب عنك يعني عملتي وانتي عارفة دة غلط وعارفة نتيجته يبقي اتحملي بقي وماتعلقيش غلطك ع شماعة كلنا بنغلط
آمال: ي ماما عشان خاطري انسي الماضي بقي وخلينا ف الحاضر وانا بحب أدهم وعاوزاه
كوثر: انا هنساه ي بنت بطني لأني امك ومهما حصل هفضل احبك لانك بنتي ومهما تغلطي هسامحك بس هو مستحيل هيسامحك ع أللي عملتيه دة..انسيه..انسيه ي آمال لأنه مش ليكي ولا عمره هيكون ليكي انتي مش بتحبيه ولا حاجة انتي بس محتاجة حد يحسسك بحبه ليكي واهتمامه بيكي مش اكتر انتي افتكرتي ايامك وذكرياتك معاه او ممكن تكوني حسيتي بالذنب من ناحيته وعاوزة تكفري عن ذنبك ناحيته بس مش واخدة بالك انك كدة بتظلميه معاكي اكتر وبتجرحيه اكتر..انسيه لانك مش عاوزاه عشان بتحبيه إنما عاوزاه عشان حبه واهتمامه بيكي..وتركتها وذهبت وقبل أن تخرج وقفت فجأة وبصتلها: خالتك كلمته عنك قالها إنه شايفك اخته ومش هيعرف ولا هيقدر يشوفك غير كدة فياريت تشيليه من دماغك بقي وتسيبيه يعيش حياته وينساكي ويعالج جرحه أللي كنتي السبب فيه ودة كان طلبك أنه مايشوفكيش غير أخت ليه وهو احترم طلبك يبقي انتي كمان لازم تحترمي احترامه ليكي وتنفذي طلبك انك أخته وبس زي ماقولتي..وعلفكرة خالتك ماتعرفش حاجة خالص..وفري دموعك دي لنفسك لأنك انتي أللي عملتي ف نفسك كدة كان بين ايديكي وضيعتيه فامترجعيش تعيطي بقي..ساعات مانحسش بقيمة الحاجة وهي بين ايدينا إلا أما تضيع مننا بس مابيبقاش ف إيدينا حاجة نعملها لأننا لو كنا نقدر نعمل حاجة كنا حافظنا عليها بدل مانضيعها ونرجع ندور عليها واحنا عارفين إننا مش هنقدر نرجعها
" وتركتها وذهبت تبكي بشدة من شدة الألم الذي تشعر به فى قلبها هاهي من ضيعت حبيبها من بين يديها الآن تندم ع فعلتها هذه وتتمني رجوعه لها ولكن ماذا يفيد الندم بعد حدوث الفعل !! ولو كان يفيد الندم لندمنا ع الكثير ولو كان يفيد البكاء ويرجعلنا أللي راح مكناش بطلنا بُكا..فكلٌ منا يتعلم من نتيجة أفعاله "
★٭★٭★٭★٭★صباح وحيد ★٭★٭★٭★٭★٭★
أمل بلهفة: أنتي بتتكلمي بجد ي ياسمينا !!
ياسمينا بإبتسامة: يخربيتك وطي صوتك هتفضحينا..وهي الحاجات دي فيها هزار برضو ي أمل !!
أمل بضحكة: معلش بس فرحانة ومش مصدقة..طيب قوليلي بقي انتي حاسة بإيه ناحيته !!
ياسمينا بإبتسامة: بصي ي أمل بصراحة مش عارفة احدد لحد دلوقتي إذا كنت بحبه ولا لا
أمل: نعم ي ختي !! مش عارفة اي !! اومال وافقتي ازاي
ياسمينا: ي بت افهمي مش عارفة أحدد إذا كنت بحبه لشخصه هو وعشان عاوزة أحبه ولا بحب حبه ليا ووافقت عليه عشان حبه ليا..مش عاوزة اظلمه معايا
أمل: امممم..طيب فكري كويس قبل اي حاجة ترجعي تندمي عليها
ياسمينا: انتي هتقلقيني ليه بقي..بصي انا اديته فرصة نتكلم لحد اما ييجي يتقدم عشان اعرف طبعه وشخصيته واتعرف عليه اكتر وكدة
أمل: مع اني مش موافقة ع الخطوة دي بس ربنا يجعله خير ليكي
ياسمينا: انا كمان مكنتش موافقة بس زي ماحكيتلك بقي
أمل: ربنا يسعدك يارب ويجعله خير ليكي
ياسمينا: يارب ادعيلي لأني مش هقدر اتحمل اي صدمة من أول واحد حبيته..اوعي حد يعرف حاجة
أمل: ماتقلقيش مش هيحصل غير كل خير إن شاء الله..لا محدش هيعرف من امتي وانا بحكي لحد حاجة انتي قولتهالي
★٭★٭★٭★٭★صباح وحيد★٭★٭★٭★٭★
ملك: أنا لازم اروح بقي عشان انا كدة اتأخرت وماما هتقلق
سامية: مانتي قاعدة ي حبيبتي لسة بدري واحمد معاكي
ملك بإبتسامة: كان نفسي اقعد معاكم اكتر من كدة بس تتعوض مرة تانية إن شاء الله
سوسن بإبتسامة: نورتينا النهاردة ي حبيبتي..وسلامي لماما وبابا وياسمينا كتير
ملك بإبتسامة: الله يسلمك ي ماما يوصل
سامية: خلينا نشوفك تاني بقي
ملك: أكيد طبعًا إن شاء الله..شكرًا ليكم وشكرًا ع تعبك ي خالتو معانا النهاردة مش عارفة اقولك ايه والله بس هو كان يوم حلو بيكم وعشان كنت معاكم واتعرفت عليكم وكان وقت حلو معاكم بس هو دايما كدة الأوقات الحلوة بتعدي بسرعة
سامية بإبتسامة: دي حاجة قليلة والله دة انتي نورتينا النهاردة والله
سوزان: اتشرفنا بيكي النهاردة ي ملك ونورتينا
ملك: ربنا يخليكي ي سوزان البيت منور بصحابه
سوزان وذهبت لتسلم ع ملك: اكيد هتخلينا نشوفك تاني بقي
ملك: اه اكيد إن شاء الله
أحمد: هاتيجي معانا ي ماما ولا قاعدة
سوسن: لا ي حبيبي روح أنت وصل ملك انا ابوك هاييجي ونروح مع بعض
أحمد: خلاص حاضر ي ماما ولو ف حاجة كلميني..وبص لملك: يلا ي ملك عشان اوصلك
"ملك وسلمت ع الجميع وذهبوا"
★٭★٭★٭★٭★ صباح وحيد ★٭★٭★٭★٭★
في سيارة أحمد
أحمد: مالك قاعدة ساكتة ليه كدة !!
ملك بضيق: هتكلم اقول ايه يعني !!
أحمد: امممم..لسة موضوع سوزان مضايقك
ملك بغيرة: هي بنت خالتك ع عيني وراسي بس بنت خالتك ازاي تحضنك كدة وقدامي كمان !!
أحمد: وفيها ايه بس ي حبيبتي بنت خالتي وبقالها كتير ماشافتنيش
ملك بعصبية: والله !! أنت شايف أنه عادي ومافيهاش حاجة !!
أحمد: أيوة مش شايف الموضوع مستاهل
ملك باستفزاز: امممم..طيب تمام مادام هو كدة يبقي انا كمان بقي أما اشوف ابن خالتي ابقي اسلم عليه واحضنه عشان بقالي كتير ماشوفتوش برضو
أحمد ووقف فجأة بفرامل جامدة وبعصبية: انتي بتقولي ايه !! انتي محدش يلمسك غيري أصلاً ويبقي يتجرأ أو انتي ابقي اعمليها كدة وشوفي انا هعمل ايه
ملك: طيب اشمعنا ليك أنت !! وبعدين مين سوزان دي وعلاقتها ايه بيك تخليها تتجرأ تعمل كدة وقدام خطيبتك كمان
أحمد وقد قاد السيارة مرة أخري وبخبث: كنا بنحب بعض زمان وعشان كدة أول أما شافتني عملت كدة
ملك بصدمة والدموع لمعت ف عينيها: ايه !! كنت ايه !! بتحبها !! وعشان كدة اول أما شوفتها فرحت اوي كدة وسبتها تحضنك عادي قدامي !! ماهمكش مشاعري واحساسي انا هيكون ايه !! وأما أنت كان ف حياتك حد قبل مني ولسة مش قادر تنساها قربتلي ليه !! خطبتني ليه !! خلتني احبك ليه ها !!
أحمد وهو يمسح دموعها: بس..بس..انتي هتعيطي ولا ايه اهدي كدة بس وبعدين ايه الكلام دة انا معنديش أغلي منك في حياتي ومقدرش اجرحك وانتي عارفة كدة ومستحيل أسمح لحد أنه يجرحك مهما كان..سوزان بنت خالتي وأختي ف الرضاعة يعني احنا اخوات مش اكتر
ملك وهي تضربه ف كتفه: انت رخم علفكرة وهزارك رخم
أحمد: بصي ي ملك انتي مفيش قبلك حد ولا هيكون ف بعدك حد خليكي واثقة من كدة مفيش أغلي منك ف حياتي وعمري ماهبص لغيرك لأن مفيش غيرك أصلاً أما ببقي معاكي مابشوفش غيرك وانا مش معاكي مش ف دماغي غيرك ولا بيلفت نظري حد غيرك انا دخلتك جوة قلبي وقفلت عليكي أنتي أول وآخر حب ف حياتي
ملك بإبتسامة: انا بحبك اوي ربنا يخليك ليا يارب
★★★★★ صباح وحيد ★★★★★
حازم: ازي حضرتك ي طنط عاملة ايه
سميحة: الحمد لله ي حازم ي حبيبي..تعالي اتفضل انت مش غريب
حازم: اه طبعا ربنا يخليكي ي طنط..أدهم فين اومال !!
سميحة بحزن: في اوضته فوق اطلعله ي حبيبي
"حازم ابتسملها وطلع لأوضة أدهم وطرق الباب عدة طرقات ثم دخل"
حازم: أدهم باشا قاعد ف اوضته وقافل موبايله ليه
أدهم: تعالي ي حازم..عادي ماليش مزاج أكلم حد ومش ناقص صداع كل شوية
حازم: مالك ي أدهم فيك ايه !!
أدهم بكذب: مفيش ي حازم انا كويس اهو مالي ف ايه بس
حازم: عيني ف عينك كدة..ابقي ماعرفكش كويس لو صدقتك وماستاهلش اكون صاحبك..أنت فيك حاجة حتي مامتك وانا بسألها عليك حسيتها زعلانة فأكيد حصل حاجة ف ايه احكيلي بقي
أدهم: أمي فتحت ف جرح قديم من غير ماتقصد كنت فكرت أنه اتقفل..مخدتش بالي إن الجرح كبير وماتقفلش أصلاً ومحتاج وقت عشان يتقفل
حازم: قصدك موضوع آمال !!
أدهم: وهو ف جرح ف حياتي غيره !!
حازم بحزن: طيب ايه أللي حصل خلاك تفتح الموضوع تاني
أدهم وقد قص عليه كل ماحدث: وطبعًا هي استغربت وعاوزة تعرف سبب رفضي ليها ليه وعصبيتي ف الرفض بعد أما شوفتها..وغصب عني ف عصبيتي حكيتلها كل حاجة مكنتش اعرف اني وانا بحكيلها بفتح ف الجرح من تاني بس هي ماذنبهاش حاجة ولو كانت تعرف عمرها ماكانت هتفتح الموضوع دة واهي عرفت الحقيقة بقي
حازم: أنساها ي صاحبي وطلعها من قلبك واطردها برة حياتك..أنت تستاهل واحدة احسن منها واكيد ربنا هيعوضك ببنت الحلال أللي تحبك وتقدرك وتخاف عليك
أدهم بألم: خالتي قالتلي نفس الكلام..تعرف ي حازم ايه اصعب احساس ف الدنيا !! الخذلان..الخذلان اصعب احساس ممكن اي حد يحسه وبالذات أما ييجي من أقرب الناس ليك أللي عمرك ماتوقعت منهم كدة وكنت فاكرهم دواء لجروحك طلعوا هما سبب جروحك دي أصلاً وهما أللي عملوهالك كمان..أنا بشكرها لأنها علمتني درس عمري ماهنساه ماهو محدش بيتعلم ف الدنيا دي ببلاش برضو
حازم بحزن ع صديقه: بص ي أدهم ساعات ربنا أما بياخد مننا حاجة بنزعل اوي أنه خدها لأننا بنكون بنحب الحاجة دي اوي ونعتقد اننا مش هنقدر نعيش من غيرها بس بعد كدة بنكتشف إن الحاجة دي لو كانت فضلت موجودة كنا مش هنقدر نعيش ف وجودها فعلاً وكنا هنتأذي بسببها..ربنا أما بياخد حاجة بيكون خدها لأنه عارف مدي تأثيرها وخطرها علينا لو كانت فضلت موجودة..فاحنا المفروض مانزعلش لأن ربنا بيعوضنا بالأحسن منها مليون مرة..هو اه ممكن يكون خد منك حاجة انت بتحبها بس عشان يديك حاجة انت محتاجها ومفتقدها احمد ربنا ع كل حاجة ولو كانت خير مكنش ربنا بعدها عنك وهتعرف كلامي دة وهتتأكد أما تقابل واحدة تحبك بجد زي مانت هتكون بتحبها ساعتها بس هتحمد ربنا ع أللي حصل وتعرف حكمته
أدهم بارتياح: ونعم بالله ي حازم..كلامك كله صح ومظبوط وربنا كبير واحن من أنه يعلقني بحاجة مش من نصيبي الحمد لله ع كل حاجة..بس ي حازم معتقدش بعد أللي حصلي دة اني اقدر احب تاني
حازم: صوابعك مش زي بعضها والناس برضو مش زي بعضها ماتاخدش البنات كلهم بذنبها ف بنات نضيفة وكويسة لو كل واحد اتجرح من حبيبته وقفل ع قلبه بعدها وخاف يدخل ف علاقة جديدة وبيحكم عليها بالفشل من قبل أما تبتدي مكنش حد اتجوز خالص بقي
أدهم: عندك حق..ادعيلي ربنا يرزقني ببنت الحلال
حازم: ربنا يفرحك ويسعدك ويرزقك ببنت الحلال أللي تريح بالك وتحبك وتحبها
★٭★٭★٭★٭★ صباح وحيد ★٭★٭★٭★٭★
ملك وهي تدخل من باب الشقة.. تقابلها والدتها وهي تقول: وملك جت أهي
ملك: عندنا ضيوف ولا ايه !!
ناهد بإبتسامة: اه ضيوف رخمين شوية
ملك بفرحة: خالتو ناهد ايه المفاجأة الحلوة دي بس
أمل وهي تقفز فوقها تحتضنها بقوة: وحشتيني اوي ي لوكا
ملك وهي تحتضنها: ي قلب لوكا وحشاني اكتر.. اخيرا شوفناكي ي ست أمل هانم
أمل: مشغوليات بقي وكدة ي بنتي والشغل وكدة..وبعدين ي ستي احنا قاعدين معاكم النهاردة
ملك بفرحة: بجد !! دة أحلي يوم والله
ناهد بإبتسامة: يلا ي حبيبتي ادخلي غيري هدومك وتعالي
"ودخلت ملك تبدل ملابسها وتأدي فرضها..وبعد أن انتهت ذهبت لتجلس مع خالتها"
ملك: معلش ي خالتو اتأخرت عليكي بس غيرت وكنت بصلي بقي
ناهد بإبتسامة: تقبل الله ي حبيبتي
ملك: منا ومنكم إن شاء الله..وحشاني ي خالتو اوي والله والكلام معاكي زي زمان
ناهد: وانتي اكتر ي قلب خالتو..ي حبيبتي تعالي نتكلم براحتك
ياسمينا: ايه ي خالتو واحنا هوا قاعد ولا ايه يعني !!
ناهد بضحك: اه صحيح انتو ايه مقعدكم هنا ماتقوموا تقعدوا ف حتة تانية يلا..عاوزة اتكلم مع ملك شوية
ياسمينا بحزن مصطنع: كمان بنتطرد..يلا ي أمولة نمشي بكرامتنا ونرغي احنا مع بعض وابقي خلي ملك تنفعها بقي
"وذهبت ياسمينا وضحك الجميع ع طريقتها"
ناهد بضحك: اختك دي مشكلة..وبحب: احكيلي بقي عاملة ايه ف خطوبتك ومع خطيبك
ملك بإبتسامة حب: أحمد !! أحمد دة ي خالتو لو قولت فيه كل كلام الحب أللي ممكن يتقال هبقي بظلمه..هو حاجة حلوة اوي كدة ف حياتي من جمالها ماتتوصفش..شاب محترم جدًا وبيحبني بجد وبيحاول يفرحني ويعملي كل حاجة حلوة بحبها
ناهد بسعادة: بتحبيه اوي كدة للدرجة دي !!
ملك بإبتسامة: حتي كلمة حب قليلة..أحمد ي خالتو أول أما شافني وحبني جيه اتقدملي علطول تعب عشان يبقي معايا بيحاول يفرحني حتي لو ع حساب نفسه بس مايشوفش الحزن ف عينيا بيضغط ع نفسه ومتحمل ضغط فوق طاقته عشاني وعشان يسعدني وعشان يشرفني قدام أي حد وميديش لحد فرصة أنه يتكلم أو يجرحني بكلامه مش بيستحمل عليا كلمة وبيخاف عليا اكتر مانا بخاف ع نفسي حتي بيخاف عليا من نفسه..عارفة ي خالتو رغم الضغط أللي هو فيه دة إلا أنه عاوز يجبلي شبكة ويقولي تليق بمقامك رغم إن مقامك عندي اكبر من اي حاجة وانا لما عرفت أنه مضغوط قولتله مش مهم شبكة دلوقتي كفاية دبلتين ونبقي نشوف موضوع الدهب دة بعدين اي وقت أو نجيب حاجة ف المعقول ساعتها قالي انتي هتنزلي وتنقي الشبكة أللي تعجبك ومالكيش دعوة بحاجة..ومضغوط ف الشقة جامد وكل دة عشان يعملهالي أحسن حاجة قولتله الحاجات دي كلها ماتفرقش معايا أللي يفرق معايا هو وجودك معايا وبس قالي وانا لازم اخلص كل حاجة وتبقى جاهزة عشان أما تيجي مايبقاش ناقصك حاجة ولا حد يفتح بوقه بكلمة معاكي مش هدي لحد فرصة أنه يهينك أو يستقل بيكي حتي لو بينه وبين نفسه لازم اعيشك ف أحلي حاجة وفي نفس المستوي أللي كنتي عايشة فيه وأعلي كمان عشان يقولوا أنها خدت راجل مايقولوش مستخسر فيها وتستاهل احسن منه..قالي هتعب واضغط نفسي واستحمل عشانك لأن مجرد ماتبقي معايا هنسي كل التعب دة وكل التعب هيروح..دة كله ومش عاوزاني احبه !! دة كله وعاوزة كلمة حب توصفه !! وحاجات كتيرة اوي لو حكيت مش هتخلص
ناهد بدموع الفرح: ياه ي ملك ربنا يسعدكم يارب ي حبيبتي ويتمملكم ع خير يارب..كنت عاوزة اطمن وانتي طمنتيني وريحتي قلبي وفعلاً عرفتي تختاري ودايمًا اختيارك بيطلع هو الصح ربنا يفرحنا بيكم يارب ويخليكم لبعض
ملك وهي تمسح دموعها وتحتضنها: دموعك دي غالية عليا ومحبش اشوفها ع وشك هي الضحكة بس أللي تكون موجودة ع وشك عشان تنور وشك الجميل دة
ناهد بسعادة: ربنا يخليكي ليا يارب ي حبيبتي دي دموع الفرح
ملك وهي تقبلها: ويخليكي ليا يارب ي أحلي خالتو
★٭★٭★٭★٭★ صباح وحيد★٭★٭★٭★٭★٭★
ومرت الأيام ع أبطالنا في سلام منهم من يبكي بشدة ويشعر بألم كبير ف قلبه ليس له علاج ومنهم من ليس لديه وقت للتفكير في أي شيء ويركز ف عمله فقط ولم يسمح بغير ذلك حتي لايفكر في أي شيء ومنهم من يفعل المستحيل من أجل الحفاظ ع حبه..وطبعا خناقات حازم وحنان مستمرة مش بيبطلوا الاتنين ناقر ونقير 😂 وكل يوم المسافة بتقرب اكتر بين مصطفي وياسمينا وحبهم لبعض بيزيد كل يوم وياسمينا بدأت أنها تتعلق بيه وبدأت تشعر بسعادة تغمر قلبها ف قربها منه وإنه لم يمضِ يوم إلا عندما يتقابلون ويتحدثون كل يوم..وكان أدهم قد أعطي مهلة للموظفين أسبوعين لتسليم المشروع ودة طبعا قرب مصطفي وياسمينا لبعض اكتر
★٭★٭★٭★٭★ صباح وحيد★٭★٭★٭★٭★
وذات يوم استيقظ أدهم من نومه
أدهم: صباح الخير
سميحة: صباح النور ي حبيبي تعالي يلا اقعد عشان تفطر قبل ماتنزل شغلك
محمود: قولي ي أدهم هتستلم تصميمات المشروع أمتي من الموظفين !!
أدهم: النهاردة إن شاء الله ي بابا
محمود بدهشة: النهاردة !!
أدهم: اه إن شاء الله مانا اديتهم فرصة اسبوعين كمان اهو والنهاردة معاد التسليم
محمود: طب كويس..ربنا معاك يارب ي بني ويوفقك
أدهم وهو ينهض: يارب ادعولي..عن اذنكم انا بقي عشان ماتأخرش
★٭★٭★٭★٭★ صباح وحيد★٭★٭★٭★٭★
ياسمينا عمالة بتدور ف درج المكتب وقالبة المكتب كله
منال: اهدي ي ياسمينا مايمكن نستيه ف البيت ولا حاجة
ياسمينا بعصبية: لا ماخدتوش معايا البيت انا متأكدة..سيبته هنا ف درج المكتب قولت عشان وانا جاية مانسهوش ف البيت
منال: طيب اهدي وهتلاقيه إن شاء الله هيكون راح فين يعني
ياسمينا: بشمهندس أدهم قال هيستلمهم النهاردة اقوله ايه انا دلوقتي !!
★٭★٭★٭★٭★ صباح وحيد ★٭★٭★٭★٭★
في مكتب أدهم
ياسمينا بخوف: بشمهندس أدهم
أدهم: أفندم !! خير ف حاجة !!
ياسمينا بتوتر: ا..ان..انا..م..قاطعها أدهم: انتي ايه قولي علطول ف ايه
ياسمينا بتوتر أكبر: ح.. حاضر.. انا..م..مش لاقية تصميم المشروع بتاعي
أدهم بهدوء: وعايزاني اعملك ايه يعني انا دلوقتي !! أقوم ادورلك انا عليه مثلاً !! مش مشكلتي دي غلطة حضرتك
ياسمينا: ي بشمهندس انا كنت سايباه ف درج المكتب بتاعي عشان وانا نازلة الصبح مانسهوش ف البيت جيت بدور عليه دلوقتي مش لاقياه
أدهم: وانا اعملك ايه اقوم ادورلك عليه مثلاً !! حضرتك مش عارفة تحافظي ع حاجتك يبقي انا أللي هحافظلك ولا ايه مش فاهم !! دي غلطتك واتحمليها..والتصميم يكون عندي خلال ساعة ف الاجتماع
ياسمينا واتضايقت من طريقة كلامه معاها: إن شاء الله ي فندم شكرًا لحضرتك واسفة لازعاج حضرتك..ثم ذهبت باكية فقابلها مصطفي
مصطفي: حبيبتي مالك ف ايه بتعيطي ليه حصل ايه !!
ياسمينا ببكاء: مش لاقية تصميم المشروع بتاعي ومش عارفة راح فين وروحت بقول لبشمهندس أدهم كلمني بطريقة وحشة
مصطفي: طيب أهدي كدة بس وإن شاء الله هتلاقيه وسيبك من كلامه خالص ولا تزعلي نفسك
ياسمينا بإبتسامة: ربنا يخليك ليا
★★★★★ صباح وحيد ★★★★★
وبعد مرور ساعة ف قاعة الاجتماعات
أدهم: طبعًا ي جماعة النهاردة تسليم التصميمات بتاعت المشروع ومش معني مثلاً انك سلمت المشروع يبقي كدة خلاص أو اختارنا حد يبقي حضرتك كدة خلاص..احنا هنختار حد انا والبشمهندس حازم يكمل معانا المشروع يكون مشرف عليكم وبيشتغل معاكم برضو ودة صاحب أجمل تصميم..وطبعًا هنتقسم مينفعش اختار واحد من ضمن الف واحد هو أللي يكمل كدة يبقي انا بظلم الباقي وبضيع تعبهم ع الأرض كلنا هنشتغل ف نفس المشروع مع بعض .. غير كدة كمان اكيد كل التصاميم هتبقي حلوة فحرام اخد واحد بس واظلم الباقي وتعبهم يروح ع الأرض
حازم: ي جماعة احنا كلنا هنشتغل ع نفس المشروع والبشمهندس أدهم هيراجع التصميمات بتاعتكم النهاردة ولو ف تعديل ولا حاجة اكيد هيقولكم عليه..المشروع كبير ومحتاج شغل ومينفعش نختار واحد من وسط ألف يكمل زي البشمهندس أدهم ماقال لأننا لو عملنا كدة يبقي تعب الناس كلها راح علي الأرض إنما كلنا مع بعض هنشتغل عليه
حنان بغيظ: يعني كدة كلنا مع بعض مفيش اختيار تصميم واحد بس من التصميمات هو أللي يكمل مع حضرتك صح !!
أدهم: بالظبط كدة..مينفعش يبقي مثلاً جايلي ألف تصميم واختار تصميم واحد بس..كدة هبقي بضيع تعب الناس أللي تعبوا واشتغلوا حرام..هنتقسم كلنا ناس هتبقي مع البشمهندس حازم وناس هتبقي معايا وهنعلن برضو عن أجمل تصميم وهو هيكون مسئول عن الاستلام والمراجعة ثم عرضها علينا..يعني بنسلم بعض كدة.. وطبعًا أللي محتاج اي حاجة احنا تحت أمره..بكرة إن شاء الله هنعلن عن التصميم..الاجتماع انتهي تقدروا تتفضلوا ع اشغالكم
★★★★★ صباح وحيد★★★★★
ياسمينا وهي تدخل المكتب وجدت فلاشة ع احدي المكاتب فوجدتها تصميمها ففرحت كثيرًا ولكن وقفت تفكر للحظة لماذا أتت الفلاشة ع هذا المكتب وكيف تم أخذها من مكتبها !! وكانت حنان دخلت ف الوقت دة
ياسمينا: فلاشة تصميمي بتعمل ايه ع مكتبك ي حنان !!
حنان بتوتر: و..ا..انا اش عرفني
ياسمينا: اومال مين أللي يعرف !! جت ازاي ع مكتبك !!
حنان: قولتلك معرفش جت ازاي مش ذنبي انك مهملة ومش معني أنها ع مكتبي يبقي انا أللي اخدتها ممكن تكون كانت هنا ولا هنا وحد لقاها حطها ع مكتبي..ثم كمان انتي ازاي تقلبي ف مكتبي وانا مش موجودة !!
ياسمينا: ماشي ي حنان هعديهالك بمزاجي
حنان: انتي بتهدديني ولا ايه !!
ياسمينا: لا خالص اهددك ليه !! وسابتها ومشيت
★★★★★صباح وحيد ★★★★★
في مكتب أدهم سمع خبط ع الباب فأذن بالدخول
ياسمينا: بشمهندس أدهم !!
أدهم من غير مايبصلها: افندم ي بشم..ولم يكمل جملته عندما وجدها هي..نعم عاوزة ايه ضيعتي حاجة تاني وجاية عاوزاني الاقيهالك !!
ياسمينا بضيق: لا خالص كنت جاية اسلم لحضرتك التصميم بتاعي
أدهم: ايه دة مش كان ضايع ومش لاقياه !! ياريت بعد كدة حضرتك تخلي بالك بقي وبلاش إهمال بعد كدة وركزي ف شغلك واعرفي انتي شغالة فين ومع مين
ياسمينا بعصبية: لقيته ع مكتب واحدة زميلتي معايا ف المكتب ومعرفش راح ع مكتبها ازاي حضرتك عاوز تصدقني صدقني مش عاوز حضرتك حر
أدهم بسخرية: أيوة أصله هيطلع من درج مكتبك هيروح لمكتبها لوحده..ماتعلقيش اهمالك ع شماعة غيرك وتتهميهم بالسرقة كمان وهما هيسرقوا مشروعك ليه ويعملوا بيه ايه
ياسمينا بزعيق: أولاً انا متهمتش حد بالسرقة انا قولت أللي حصل حضرتك بقي مش عاوز تصدقني انت حر.. ثانيًا بقي مش بعلق غلطي ع شماعة حد وبعدين انا مش مهملة..ثالثًا بقي حضرتك عمال توجه اتهامات ليا وخلاص وطريقة حضرتك معايا ف الكلام ياريت تكون افضل من كدة
أدهم بزعيق: انتي اتجننتي ولا ايه انتي ازاي تكلميني بالشكل دة أنتي مش عارفة بتكلمي مين ولا ايه..أما واحدة تيجي تقولي اصل مش لاقية تصميمي وبعد كدة تلاقيه دة تسميه ايه ها !! مش إهمال برضو !! انا ممكن ماستلمش منك التصميم عقابًا ليكي وهيكون تعبك كله راح ع الأرض وممكن كمان امشيكي من الشركة واقولك روحي شوفيلك شغل ف مكان تاني بس انا مش هعمل كدة..لأنك ماتستاهليش الواحد يعملك قيمة أصلاً..ومش انتي أللي هتقولي لبشمهندس أدهم يتكلم ازاي
ياسمينا بعصبية وزعيق: لا وع ايه حضرتك تتعب نفسك وتضايق نفسك كدة ساعة واستقالتي هتكون ع مكتبك ومش هتشوف وشي تاني ف شركتك ي أدهم بيه
أدهم بعصبية: طلبك مرفوض ومفيش استقالة..لو كنت عاوز امشيكي كنت مشيتك إنما امشيكي تروحي تبيعي أسرار وتصميمات الشركة للشركات المنافسة..اتفضلي يلا ع شغلك وركزي ف شغلك وبلاش إهمال
ياسمينا وكانت لسة هتتكلم بس هو قاطعها: قولت اتفضلي ع شغلك يلا انتي مابتفهميش !! مش عاوز اسمع كلام تاني يلا اطلعي برة
★★★★★صباح وحيد★★★★★
"ياسمينا طلعت من مكتب أدهم بتعيط جامد من كلامه الجارح ليها ولقت نفسها بترن ع مصطفي عاوزاه يجيلها مكان البريك فكان قد جاء وقت البريك"
مصطفي: ايه ي حبيبتي رنيتي ع..ولم يكمل كلامه عندما وجدها تبكي بشدة: مالك ف ايه !! ايه اللي حصل !!
ياسمينا ببكاء شديد: م..في..مفيش..ح..حاجة
مصطفي: مفيش حاجة ازاي انتي مش شايفة نفسك عاملة ازاي !! اهدي كدة شوية بس وفهميني حصل ايه !!
"ياسمينا وقصت عليه كل ماحدث"
مصطفي: وايه جاب تصميمك عند أللي اسمها حنان دي !!
ياسمينا بعصبية: معرفش..معرفش ي مصطفي
مصطفي: طيب خلاص اهدي وقومي يلا اغسلي وشك اكون انا طلبت الغدا
ياسمينا: انا آسفة ماتزعلش مني مقصدش والله اتعصب عليك بس أنا متلغبطة
مصطفي بإبتسامة: انا عمري مابزعل منك وبعدين اضحكي بقي يلا مفيش حاجة مستاهلة..ربنا يخليكي ليا
★★★★★صباح وحيد ★★★★★
حنين: فهميني بقي ي آمال مالك ف ايه وادهم ماله وليه ماما مارضيتش تتكلم
آمال بدموع وقد قصت عليها كل شيء: بحبه ي حنين..بحبه ومش قادرة اتقبل فكرة أنه ممكن يكون لواحدة غيري
حنين: هو بعد أللي حكيتيه دة وأللي عملتيه فيه هو دة بتسميه حب !! فين الحب دة ي آمال..بطلي أنانية بقي وسيبيه يعيش حياته وينسي أللي حصله بسببك وأما انتي مش متقبلة فكرة وجوده مع غيرك انتي ازاي قدرتي تبقي مع غيره ومقدرتيش مشاعره وإحساسه هيكون ايه أما يشوفك مع غيره !! دة لو ع كلامك انك بتحبيه فعلاً
آمال: هيرجعلي ي حنين..هيرجعلي عشان بيحبني..ومش هيبقي لغيري ومش هسيب حد ياخده مني
حنين بعصبية: فوقي بقي..فوقي..ومستحيل يرجعلك بعد دة كله..لو هو أللي كان عمل فيكي كدة كنتي هترجعيله !!
"آمال سكتت وماعرفتش ترد عليها"
حنين: ماتردي مش بتردي ليه !! شوفتي بقي انك أنانية عاوزة كل حاجة لنفسك وبس عاوزة توجعي وتجرحي بس انتي ماتتوجعيش عاوزة تجرحي براحتك ويرجع يسامحك بس لو هو جرحك ماتسامحيش مش بتفكري غير ف نفسك وبس.. انسيه وسيبيه يعيش حياته ف هدوء بعيد عنك دة لو بتحبيه فعلاً زي مابتقولي أللي بيحب حد بجد بيبقي دوا لجروحه وانتي كنتي سبب جروحه دي بدل ماتدوايها انتي أللي عملتيها..لو بتحبيه انسيه وسيبيه وماتحاوليش تقربي منه أللي بيحب بجد بيحب يشوف حبيبه مبسوط وهو مبسوط ف بعده عنك..انتي طلبتي منه أنه يشوفك زي أخته وهو احترم دة يبقي انتي كمان بقي لازم تحترمي دة..
"وتركتها غارقة في دموعها وألم قلبها الذي لم تجد له علاج الآن تندم عليه..فقد خسرته وخسرت اهتمامه وحبه لها فهي تريد الرجوع له من أجل اهتمامه بها وتعبيره عن حبه لها..لاتتقبل فكرة إنه يوجد مع غيرها فأنانيتها تجعلها تريد كل شيء لنفسها فقط..لكن السؤال هل هي تحبه فعلاً !! أي حب من هذا النوع !! "
★★★★★صباح وحيد ★★★★★
وفي صباح اليوم التالي ف قاعة الاجتماعات حيث يجلس أدهم وجميع الموظفين من حوله
أدهم: صباح الخير ي جماعة
الموظفين: صباح النور ي أدهم بيه
أدهم: زي مانتو عارفين طبعًا واتكلمنا امبارح إننا هنختار احسن تصميم وهو أللي هيقوم بالإشراف عليكم والمراجعة والتسليم لينا يعني هيكون مسئول بصفة عامة عن تسليم اي تصميمات جديدة بعد مراجعتها طبعًا ويسلمها لينا نراجعها ونمضي عليها بس طبعًا هو هيكون مراجعها ومنظمها وكل حاجة زي كدة السكرتيرة مثلاً هي أللي يتخلص كل الشغل وبتراجع الاوراق كلها وبيكون ناقص الامضة عليها بس وزي الحسابات وغيره وهكذا..فصاحب التصميم أللي وقع عليه الاختيار يكون قد المسئولية دي ويقدر يقوم بيها
الموظفين: تمام ي أدهم بيه فاهمين حضرتك
أدهم: ودلوقتي هيتم الاعلان عن اسم من وقع عليه الاختيار للقيام بتلك المهمة
الموظفين بتوتر: اتفضل ي أدهم بيه..سامعين حضرتك
أدهم: ..........
★★★صباح وحيد★★★
وانتهي الفصل السابع ع إن أدهم هيعلن عن اسم أللي وقع عليه الاختيار..😂
تعالوا نتعرف ع الشخصيات الجديدة أللي معانا
أمل تبقي بنت خالة ياسمينا وهي قدها وخريجة اسنان وهي قريبة جدا لياسمينا
حنين تبقي أخت آمال الصغيرة واخر سنة ليها ف كلية الآداب
سوزان تبقي الأخت الكبيرة لمصطفي وصافي واتجوزت وسافرت مع جوزها وتبقى أخت أحمد في الرضاعة