أعطيت لحبك فرصة فخدعتني
✨الفصل التاسع✨
★٭★٭★٭★٭★ صباح وحيد ★٭★٭★٭★٭★
شاكر: وحشتيني ي سوزي
سوزان بصدمة: شااااااكر !!!!!
شاكر ببرود: أيوة ي روحي شاكر حبيبك ولا نسيتي !! شاكر أللي سيبتيه ومشيتي شاكر أللي بيحبك
سوزان بعصبية: انت لسة
ليك عين تيجي هنا وتتكلم كمان امشي اطلع برة ومش عاوزة اشوف وشك تاني .. وكنت
بحبك بس خلاص بح كان زمان وجبر ..امشي اطلع برة يلا بقولك .. مش طايقة اشوفك قدامي
سامية بتحذير: سوزان .. عيب كدة ومن أمتي واحنا بنطرد حد من بيتنا مهما حصل
منه من امتي كانت دي أخلاقنا !! وماتنسيش أنه لسة جوزك وغير دة كله فهو ابو عيالك
يعني ليه فيهم زيك بالظبط
سوزان: مع أللي زيه الطرد مش عيب ي ماما لأني أنا مش عاوزاه ف حياتي تاني ولا حياة عيالي ومش عارفة ايه جايبه أصلا وبأنهي وش راجع
سامية: مينفعش أللي بتقوليه دة وعيب أللي بتعمليه دة وانك تطرديه دخليه ونشوف
عاوز ايه واسمعيه عاوز يقول ايه .. وبصت لشاكر: تعالي ي شاكر ادخل اتفضل
شاكر بإحراج: انا مش عارف اقول حضرتك ايه ولا اشكر حضرتك ازاي
"ودخل كلاً من سامية وسوزان وشاكر ليجلسا"
سما ومروان وجريوا ع شاكر يحضنوه: بابا وحستنا اوي انت تنت فين تل دة (الترجمة😂: بابا وحشتنا اوي انت كنت فين كل دة)
شاكر بإبتسامة: معلش ي حبايبي كان عندي شغل كتير
سما: ماسي مس تلوح السغل تاني بتي عسان ماما تل سوية تعيط واحنا مس عالفين نعمل ايه انا وملوان عسان نخليها مس تعيط (الترجمة😂: ماشي مش تروح الشغل تاني بقي عشان ماما كل شوية تعيط واحنا مش عارفين نعمل ايه انا ومروان عشان نخليها مش تعيط)
مروان: اه ي بابا بتعيط علطول مس بتستت خالث تل سوية تعيط (الترجمة😂: اه ي بابا بتعيط علطول مش بتسكت خالص كل شوية تعيط) "شاكر كان بص لسوزان"
سوزان بزعيق: سما مروان بس ويلا اطلعوا ع اوضتكم
سما ومروان: لا احنا اعتين مع بابا عسان واحسنا
(الترجمة 😂: لا احنا قاعدين مع بابا عشان واحشنا)
سوزان بزعيق: وانا قولت اطلعوا يلا اسمعوا الكلام
سامية: بس خلاص ي سوزان .. وبصت لسما ومروان بإبتسامة: ممكن بقي تيجوا مع تيتة عشان ماما وبابا عاوزين يقعدوا يتكلموا مع بعض شوية عشان اوريكم حاجات حلوة ونلعب مع بعض !!
سما ومروان: هيييه تيتة هتلعب معانا وتدبلنا حاتة حلوة (وتجبلنا حاجة حلوة)
سامية: اه يلا هجبلكم العاب كتير وحاجات حلوة كتير .. وبصت لسوزان وشاكر: انا هسيبكم تقعدوا تتكلموا مع بعض شوية عشان تاخدوا راحتكم "وتركتهم وذهبت"
شاكر وبص لسوزان: ناوية ترجعي بيتك أمتي أنتي والعيال !!
سوزان وبصتله ورجعت بصت قدامها وبضحكة: ارجع فين !! بيتي !! مابقاش بيتي خلاص ي شاكر ارجع ليه ولمين !!
شاكر: لا لسة بيتك ي سوزان وهترجعي
سوزان بضحكة هم وبصتله: كان بيتي .. كان بيتي ي شاكر ايام ماكنت جوزي وحبيبي كان بيتي ايام ماكنت ابو عيالي كان بيتي ايام ماكنت ليا انا وبس وملكي انا وبس مش حد بيشاركني فيك كان بيتي ايام ماكنت بتحبني كان بيتي قبل أما تمد ايدك عليا .. ارجع ليه بقي بعد دة كله ها !! ارجع عشان اعيش لوحدي !! ارجع عشان واحدة تانية
تشاركني فيك !! قولي ارجع ليه وعشان ايه ها !!
شاكر: ترجعي عشان انتي لسة مراتي وام عيالي وغير دة كله حبيبتي وحب عمري كله و..قاطعته سوزان وهي تضحك جامد: ايه !! ههههه حبيبتك !! كنت حبيبتك ي شاكر كنت ودلوقتي مابقتش خلاص كنت حبيبتك ايام ماكنت ليا لوحدي وكنت لوحدي أللي ف قلبك.. وحطت ايديها ع صدره: ايام ماكان دة ملكي انا وبس وكنت أنا لوحدي أللي جواه مفيش حد تاني معايا إنما دلوقتي مابقاليش مكان هنا خلاص لانه مايشيلش اتنين ي شاكر
شاكر ومسكها: وانا لسة بحبك ي سوزان ولسة قلبي ملك ليكي وجاي عشان اخدك انتي وعيالنا ونرجع نعيش مع بعض تاني
سوزان بضحكة هم: اه لسة بتحبني .. قلبك مابقاش ملك ليا خلاص قلبك بقي لغيري ماهو لاكون انا لوحدي أللي موجودة فيه يإما لا إنما مينفعش حد يكون موجود معايا ..قولي ي شاكر انت كان ناقصك حاجة !! انا قصرت معاك ف حاجة !!
شاكر: ايه ي سوزان ليه بتقولي كدة
سوزان: جاوبني بس
شاكر: لا ي سوزان ماقصرتيش
سوزان: عمري زعلتك ولا نكدت عليك !!
شاكر: لا برضو عمرها ماحصلت
سوزان: عمرك طلبت مني حاجة ومانفذتهاش !!
شاكر: سوزان ف ايه وليه كل دة مش فاهم !!
سوزان بدموع: وأما هو كله لالالا كنت روحت اتجوزت عليا ليه !! قصرت معاك ف ايه !! نقصك ايه ماعملتوش خلاك تبص برة !! عمري ماعليت صوتي عليك ولا عمري قولتلك ع حاجة لا ولا عمري زعلتك ليه عملت فيا كدة !! بص ي شاكر أنا محبتش حد ف الدنيا أد ماحبيتك بس عمري ماتوقعت إن أول ضربة هاخدها ف حياتي هتكون منك أنت تعرف ليه !! عشان كنت متوقعة إن أول ضربة هاخدها ف حياتي هتكون انت جمبي تاخدني ف حضنك وتطبطب عليا وتقف جمبي وتقويني بس للاسف طلعت انت صاحب الضربة دي وبدل ماتقف جمبي سيبتني وبدل ماتقويني كسرتني وبدل ماتاخدني ف حضنك وتطبطب عليا مديت ايدك عليا ..ربنا يسامحك ع أللي عملته فيا وكسرة قلبي دي لاني أنا مش هقدر اسامحك ..ماهو الصدمة أما بتجيلك من أقرب ناس ليك مكنتش تتوقع منهم كدة بيكون ساعتها بس قلبك مش قادر يسامح لانك بتكون مش قادر تصدق أنهم يعملوا فيك كدة وأنت كنت أقرب حد ليا واكتر حد انا بحبه ..عارف ي شاكر أنا مش زعلانة عليك ولا زعلانة انك اتجوزت انا بس مش صعبان عليا غير حاجة واحدة عيالي ذنبهم ايه ف اللي بيحصل دة كله ها !! ذنبهم ايه يتربوا بعيد عن ابوهم !! اقولك انا ذنبهم ايه ذنبهم انك ابوهم لانك انت أللي عملت فيهم كدة ومن غير اي سبب ..طيب اقولك حاجة تانية محدش يعرفها انا حاولت الاقيلك مبرر عشان احطهولك واقدر اسامحك ونرجع نربي عيالنا مع بعض تاني بس للأسف مالقتش مبرر المرة دي كنت مستعدة ارجعلك ونعيش مع بعض ونربي عيالنا لو كنت لقيتلك المبرر للي أنت عملته بس مالقتش للأسف
شاكر بندم: سوزان حبيبتي أنا آسف سامحيني أنا غلطت وعرفت غلطتي وندمان عليها
سوزان: والأسف هيغير ايه ها !! هيرجع الحب أللي كان بينا !! هيعالج الالم والجراح اللي جوايا !! هيعالجلي كسرة قلبي !! ساعات كتير الأسف بيكون مالوش لازمة أما بيكون الجرح كبير والجرح بيكون ع اد المحبة وغلاوة الشخص وأنت كنت غالي عندي اوي ي شاكر ..امشي ي شاكر امشي عشان وجودك مش هيغير حاجة ولا هيرجع أللي راح ويعالج الجراح
شاكر: مش همشي غير أما تيجي معايا واخد عيالي ونرجع نعيش كلنا مع بعض تاني انتي مش من حقك تحرميني منهم لأني ليا فيهم زي مانتي ليكي فيهم بالظبط ويمكن أكتر كمان
سوزان: انا اكيد مش هحرمك منهم عيالك تقدر تيجي وتشوفهم وتقعد معاهم براحتك واي وقت زي مانت عاوز إنما رجوع معاك تاني انسي
شاكر: سوزان ارجوكي عشان خاطري سامحيني وخلينا نرجع زي الاول عشان خاطر عيالنا حتي مش عشاننا احنا هما مالهمش ذنب ف أللي بيحصل دة ومالهمش ذنب ف مشاكلنا بلاش عشان خاطري لو لسة جواكي ذرة حب ليا بلاش فكرة الطلاق دي انتي عارفة أني مقدرش اعيش من غيرك وانك كل حاجة ليا ف حياتي غلطت أما اتجوزت وغلطت أما مديت ايدي عليكي وعرفت غلطي وطالب انك تسامحيني عشان خاطر عيالنا مايتربوش بعيد عن حد فينا بلاش تبهدليهم ي سوزان
سوزان: وانا أللي كنت بهدلتهم !! أنت اللي عملت كدة مش انا .. وبعدين انت كنت فاكر ايه بعد أما تتجوز عليا وتجيبها وتمد ايدك عليا اني هعيش معاك تاني !! دة يبقي انا رخيصة اوي ..وقربت منه: اصل الست اللي تقبل واحدة تانية تيجي وتشاركها ف جوزها يبقي ماعندهاش دم زي الراجل أللي يعيش مع واحدة وهو عارف انها مابتحبوش بس عايش معاها غصب عنها ..وانا مش بتكلم ع الكل انا بتكلم عن نفسي يمكن غيري يقبل ويرضي بالأمر الواقع بس انا لا مش هقدر اصل كل واحد فينا ليه طاقة وقدرة ع التحمل وانا مش هقدر اتحمل واحدة تانية تشاركني ف جوزي أللي المفروض هو ملكي انا وبس ضغط كبير عليا مش هقدر اتحمله دة ربنا مش بيحمل حد حاجة فوق طاقته أنت بقي عاوز تحملني فوق طاقتي راعي ربنا شوية .. انا عندي اتعذب ببعدك ولا اتهان كل يوم منك واتوجع اكتر واكرهك عندي استغني عن حبك ولا اتوجع منك أللي عمري ماتوقعت انك توجعني وكل دة عشان مش عاوزة أكرهك وافضل محافظة علي حبك..امشي ي شاكر امشي لأن وجودك مامنوش فايدة ولا هيجيب نتيجة امشي وسيبني وانساني أبعد وسيبني اعيد حساباتي من تاني
شاكر: انا همشي ي سوزان بس هرجع تاني ومتأكد انك هترجعي معايا ومش ههون عليكي ومتأكد انك هتفكري وهتاخدي القرار الصح لأنك متأكدة أني بحبك فعلاً ..اوعديني انك هتفكري تاني ف الموضوع وهسيبك تفكري براحتك وتاخدي قرارك ..عن اذنك..وقبل أن يذهب أوقفه صوتها وهي تقول:
سوزان: ساعات كتير الندم مش بيفيد بحاجة لأنه مش بيرجع أللي راح يعني ندمك دة ولا هيرجعلي أللي راح ولا هيعالجلي جراحي ولا هيرجعلي ثقتي فيك من تاني .."ومشي شاكر بعد ماسمع كلامها من غير أما يبصلها أو يرد عليها" "وجلست سوزان تبكي بشدة فهي حقًا تحبه لا فهي تعشقه فإنه حبيبها وزوجها وأبو اولادها وكل مالها في الحياة فكيف لها لاتحبه !! فظلت تبكي حتي أتت إليها والدتها احتضنتها وتخفف عنها ألمها ..حقًا إنه وجع الحب عندما تتعذب من مَن تحب ومع ذلك تظل تحبه وغير قادر ع أن تكرهه تريد أن تسامحه ولكنك غير قادر حقًا أصعب وجع هو وجع القلب من أقرب الناس"
"ما أصعب الألم عندما يكون ف القلب وأن يكون من أقرب الأشخاص إلينا كان ربما ليس يكون كبير بهذا القدر لو كان من أشخاص آخرين ولكن ليس من أقرب الأشخاص إلينا الذي لم نتوقع منهم كل هذا الالم ..يكون الوجع أضعاف عندما يكون من أشخاص قريبة لقلوبنا .."
★٭★٭★٭★٭★ صباح وحيد ★٭★٭★٭★٭★
خرج شاكر وركب عربيته وهو متعصب اوي وروح ع بيته وهو داخل البيت قابلته شيرين (شيري)
شيري: حبيبي حمد لله ع السلامة كنت فين !!
شاكر من غير مايبصلها: الله يسلمك ..كنت ف مشوار
شيري: حبيبي مالك فيك ايه حصل ايه !! ومشوار ايه دة أللي مخليك راجع متضايق كدة !!
شاكر: مفيش حاجة انا كويس
شيري: مفيش حاجة ازاي انت مش شايف نفسك عامل ازاي !!
شاكر بعصبية: شيرين انا مش طايق نفسي فاسكتي احسنلك
شيري بدلع: شيرين !! أول مرة تقولي شيرين مش شيري ..مالك احكيلي فيك ايه !!
شاكر بعصبية: يوووووه بقي ي شيرين انتي شكلك فايقة وانا مش فايقلك خالص وقولتلك مفيش حاجة يبقي تسكتي بقي ماتفضليش نازلة كلام وأسئلة
شيرين بعصبية: أنت بتزعقلي ليه !! صوتك دة مايعلاش عليا تاني وإلا يكون آخر يوم قعدالك فيها وتكشيرة وشك دي مش معايا ي حبيبي افرد وشك أما تيجي عندي ..ولا تكون ست سوزان هانم حبيبة القلب منكدة عليك فاتيجي تطلعه عليا انا بقي لا ي حبيبي فوق كدة مش معايا انا الكلام دة ..دة انا شيري ي عمري يعني مش هسكتلك مش هسيبك تزعقلي وتتعصب عليا من غير سبب واقف اتفرج عليك
شاكر: أنا فعلاً غلطت غلطة عمري أما فكرت اتجوز ع مراتي ام عيالي أللي عمرها مازعلتني ولا علت صوتها عليا انا دلوقتي بس عرفت قيمتها أما اتجوزتك انا خسرتها وخسرتها عشان واحدة زيك وخسرت عيالي كمان
شيري بتريقة وقربت منه: ارجعلها ي حبيبي بس قبل أما ترجعلها انا ماضربتكش ع ايدك عشان تحبني ولا عشان تتجوزني أنت أللي طماع وعينك فارغة وجيتلي لحد عندي وكنت هتموت عليا ..روح ارجع لمراتك ست سوزان هانم حبيبة القلب وأم عيالك بس دة لو رضيت ترجعلك بعد أما اتجوزت ..ولو وافقت ورجعتلك يبقي ماعندهاش دم ..وإذا كانت هي بتسكتلك فأنا لا اوعي تكون فاكرني ست سوزان واني اسامح في حقي
شاكر وصفعها بقوة ع وجهها: اخرسي ي حيوانة ي زبالة وأوعي تجيبي سيرتها تاني ع لسانك سوزان دي أنضف منك وأحسن منك مليون مرة دي بيكي وبعيلتك كلها
شيري بعصبية وزعيق: انت بتضربني !! بتضربني أنا ي شاكر !! قدرت تمد ايدك عليا !! أقسم بالله ي شاكر لأدفعك تمن أللي عملته دة غالي اوي واخليك تندم ع اليوم أللي شوفتني وعرفتني فيه عشان تمد ايدك عليا اوي تاني وكل دة ليه عشان واحدة بتقارنها بيا وانا أحسن منها واحدة ولا ليها اي تلاتين لازمة ف سوق النسوان كله روحلها ارجعلها خليها تشبع بيك
شاكر ومسكها من شعرها وبزعيق: قولتلك أما تيجي تتكلمي عنها تتكلمي بأدب وسيرتها ماتجيش ع لسانك لأنها أنضف منك ولو سيرتها جت تاني ع لسانك هيكون آخر يوم في عمرك أنتي فاهمة !! "وسابها ومشي من قبل أما ترد عليه أو يديها فرصة للرد"
★٭★٭★٭★٭★ صباح وحيد ★٭★٭★٭★٭★
آمال: حنين انتي لسة زعلانة مني !!
حنين وبصتلها ورجعت بصت قدامها تاني: ودة يفرق معاكي ف حاجة ي آمال !! وماتقلقيش انا ماحكتش حاجة لماما وحاتم أما سألوني
آمال: وانا جاية عشان اشكرك إنك ماحكتيش ..بس عشان خاطري بقي سامحيني وماتزعليش مني هنفضل كدة علطول مش بنكلم بعض واحنا وشنا ف وش بعض وفي بيت واحد !!
حنين: مش انتي أللي عاوزة كدة ي آمال !!
آمال وقعدت جمبها: لا انا مش عاوزة كدة ي حنين انا عاوزة نرجع أخوات زي الاول وتفضلي تناقري فيا وانا كمان مش عاوزة نبقي بعيد عن بعض كدة واحنا مع بعض ي حنين عشان خاطري سامحيني بقي طب وحياة حاتم عندك تسامحيني
حنين: انتي بتمسكيني من ايدي أللي بتوجعني يعني !! عشان عارفة أما تحلفيني بحاتم أني هسامحك علطول ماشي ي آمال هسامحك بس بشرط قولتي ايه !!
آمال: شرط ايه دة ي حنين !!
حنين: تنسي أدهم نهائي وتطلعيه من دماغك وتسيبيه يعيش حياته بقي بعيد وينساكي
آمال: مقدرش ي حنين مقدرش
حنين: خلاص انتي حرة انا قولت أللي عندي ..بس خلي بالك مش هتفضلي مستخبية كدة كتير ولا انا هعرف اداري عليكي كتير كدة وهاتيجي مرة وتتكشفي ولو ماما عرفت انتي عارفة كويس هي ممكن تعمل فيكي ايه
آمال بارتباك: خلاص ي حنين حاضر هحاول أنساه وهحاول مافتحش الموضوع دة تاني عشان ماتزعليش مني تاني
حنين بإبتسامة: والله ي آمال انا بقولك كدة عشان خايفة عليكي ومش عاوزاكي تتأذي مش عاوزاكي تبقي عايشة ف حلم جميل وتصحي ع كابوس ولو مش بحبك ومش خايفة عليكي عمري ماهقولك كدة وهساعدك ف إنك ترجعي بس رجوعك فيه وجعك وعدم راحتك لأنه هو مش سهل يسامحك وكل أما يشوفك هيفتكر كل حاجة وف كل مرة هيتوجع كأنها اول مرة وساعتها وجعه منك هيطلع عليكي أنتي ..خايفة عليكي تفضلي متعلقة بحلم جميل وتصحي ع كابوس الواقع أنه مش ليكي خايفة عليكي من صدمة وجوده مع واحدة تانية وجوازه واحدة غيرك ساعتها هتبقي الصدمة شديدة اوي عليكي زي ماكانت شديدة عليه أما شافك مع غيره عرفتي بقي ي آمال اني مش ضدك ولا حاجة واني بتمنالك الخير وخايفة عليكي
آمال بدموع: أنا خسرت أدهم ي حنين ..خسرته ومش هعرف ارجعه ليا تاني خسرت حبه واهتمامه وطيبته وحنيته خسرت واحد كان شايلني ع كفوف الراحة ومش مخليني محتاجة حاجة ..تعرفي ايه اصعب احساس !! اصعب احساس هو إنك تعرفي قيمة الحاجة أللي كانت بين ايديكي بعد أما تضيع منك وماتعرفيش ترجعيها ليكي تاني بس بتفضلي عايشة بوجعها طول حياتك وبتتعذبي بيها وتندمي انك ضيعتيها بس ساعتها بتكوني مش هتعرفي تعملي حاجة عشان ترجعيها فكل أللي تقدري تعمليه ساعتها هو الندم تندمي انك ضيعتيها وماحافظتيش عليها انا ندمانة أني سيبت أدهم وضيعته واتخطبت لشهاب بس الندم مش بيفيد بحاجة لأنه لو كان بيفيد كان رجع أللي راح ساعتها بيبقي قدامك خيارين مالهمش تالت يإما ترضي بالأمر الواقع وتتحملي مسئولية اختيارك ونتيجة أفعالك وتتعايشي مع الواقع المحيط يإما تعافري وتعملي المستحيل عشان ترجعي الحاجة دي ليكي من تاني بس عقبال أما تيجي ترجعيها ممكن تكون بقت بتاعت حد تاني وماتعرفيش انك ترجعيها وتفضلي عايشة بوجعها وندمك عليها انك انتي أللي ضيعتيها ومش هتعرفي ترجعيها كمان لانك لو كنتي تعرفي ترجعيها كنتي حافظتي عليها من الأول بدل ماتضيعيها وترجعي تدوري عليها وانتي عارفة انها لو ضاعت مش هترجع وانا ضيعت كل حاجة ضيعت اكتر انسان كان هيسعدني لانه كان بيحبني بجد وجرحته ووجعته بس بحاول ارجعه ليا تاني واكفر عن ذنبي اتجاهه يمكن يسامحني ويمكن يلاقيلي عذر ماهو اللي بيحب بيحط أعذار للي بيحبه بحاول اصلح غلطتي واداوي الجرح أللي كنت سبب ف نزيفه "وظلت تبكي بشدة"
حنين وهي تحتضن أختها: آمال أهدي عشان خاطري أهدي ومسكت وشها رفعته: أنتي غلطتي اه ي آمال بس مش واخدة بالك إنك وأنتي بتفكري تصلحي الغلطة دي انك بتغلطي غلطة اكبر منها وبدل ماهتوقفي نزيف الجرح هتفتحي ف الجرح اكتر وينزف اكتر ومش هتعرفي توقفيه ويبقي تاني غلطة تغلطيها بس المرة دي هتكون ف حق نفسك والجرح بدل ماهيكون ف أدهم هيبقي فيكي انتي وهتفتحي جرح لنفسك بنفسك ومش هتعرفي تقفليه لأنه هو اكيد مانسيش أللي حصل ومجرد ماهيشوفك هيفتكر كل حاجة والجرح يفتح تاني وكأنه لأول مرة انتي ممكن تكوني عاوزة تصلحي غلطتك بس مش واخدة بالك إنك وأنتي بتصلحيها بتصلحيها بغلطة اكبر منها فأحسن حاجة عشان تريحيه وتريحي نفسك هي انك تنسيه خالص ي آمال لأن كدة هيكون راحة ليكي وليه كمان وماتنسيش كمان إن دة كان طلبك من الاول وقرارك من البداية وهو نفذلك رغبتك فاضل أنتي كمان بقي تكوني أد قرارك وتنسيه لانه مابقاش ليكي خلاص ولا هيكون ليكي وتفكيرك فيه مش هيعمل حاجة غير هيتعبك ولا ندمك ودموعك هيرجعوه لأنهم لو كانوا بيرجعوه كان رجع من زمان انسيه وإن شاء الله ربنا يعوضك ويكتبلك الخير
★٭★٭★٭★٭★ صباح وحيد ★٭★٭★٭★٭★
سامية: وبعدين معاكي بقي ي سوزان أهدي شوية ي بنتي وماتعمليش ف نفسك كدة وفهميني ايه أللي حصل قالك ايه خلاكي كدة
سوزان بشهيق البكاء: قالي أنه عاوزني ارجع البيت أنا والعيال
سامية: وانتي قولتيله ايه !! فكري كويس ي سوزان عشان خاطر عيالك فكري فيهم وفي مستقبلهم وهما بعيد عن ابوهم
سوزان: قولتله لا ي ماما وقولتله ينسي الموضوع دة نهائي هو فاكر أني ممكن ارجع واعيش معاه ف بيت واحد بعد أما اتجوز عليا ومد ايده عليا دة مستحيل يحصل ي ماما مستحيل اسامح ف حق نفسي وكسرة قلبي ونفسي
سامية: ي بنتي ماتفكريش بالطريقة دي غلط وبلاش تخربي بيتك بإيديكي وتعذبي عيالك وبعدين هتقولي ايه لابوكي وأخواتك أما يلاحظوا ويسألوكي وانتي بتقولي مش عاوزة تحكي حاجة ها !!
سوزان: هقولهم اي حاجة ي ماما وخلاص مش لازم يعرفوا حاجة يعني
سامية: نفسي افهم بس انتي ليه مش عاوزاني اقول ابوكي ولا انتي عاوزة تقوليله ولا عاوزة حد يعرف حتي اخواتك ومش عاوزة ترجعي لبيتك وجوزك وكدة كدة هيعرفوا انا مابقتش فاهمة حاجة خالص ولا بقيت فاهماكي .. وبعدين انا مش عارفة هو قالك ايه ولا اتكلمتوا ف ايه !!
سوزان بدموع: مش عاوزة حد يعرف اي حاجة ي ماما عشان يفضل كبير ف نظرهم زي ماهو ويفضلوا يحترموه مش عاوزاه يقل ف نظرهم ولا يكرهوه ي ماما حتي انتي ماكنتش عاوزاكي تعرفي حاجة ي ماما عشان مايقلش ف نظرك وتفضلي شايفاه كبير زي مانتي شايفاه لأنه ف يوم من الايام كان جوزي ولسة جوزي وأبو عيالي وحتي بعد أما اتطلق هيفضل ابو عيالي وعيشت معاه ايام وسنين شوفتي ي ماما لآخر لحظة خايفة عليه وع مقامه ومش عاوزاه يقل ف نظركم عشان لو حصل حاجة يفضل ف نظركم زي ماهو ونظرتكم فيه ماتتغيرش ..وكان راجع يقولي ي ماما ارجع البيت أنا والعيال وأنه لسة بيحبني وميقدرش يستغني عني خايفة اقولك حسيت ف كلامه بصدق ابقي بخدع نفسي للمرة التانية وأما صدقت سمعت منه الكلمتين عشان اثبت لنفسي أنه بيحبني عشان ماخسروش وخايفة ماصدقش كلامه أكون بظلمه واضيعه وارجع اندم اني صممت ع رأيي واخسره ماهو أصل أللي بيحب حد بجد ي ماما بيسامحه وبيحطله مبرر حتي ولو بالكدب بيبقي مستني يسمع منه انشالله كلمة بس عشان يثبت لنفسه أنه غلط حتي لو كان عارف انه هو الصح بس اما بيصدق يلاقي اي حاجة يتعلق بيها زي الغريق كدة أما بيصدق يتعلق حتي لو بقشاية مع أنه ممكن يكون عارف انها مش هتنقذه وتطلعه بس اهو أما بيصدق يتعلق بيها ويحاول يطلع بيها احسن مايفضل غرقان وانا عاملة زي الغريقة أما اصدق اتعلق بقشاية والقشاية دي هي كلام شاكر ليا أنه لسة بيحبني وعاوزني ودة لاني بحبه فبحاول احطله مبررات وأما اصدق اسمع منه كلمتين حلوين يثبتلي بيهم أنه لسة بيحبني واني لسة في قلبه
سامية: بصي ي سوزان ي بنتي هقولك ع حاجة ربنا مابيعملش حاجة وحشة ولا بيبعد عننا حاجة وحشة ربنا كاتب لكل واحد فينا نصيب هيشوفه وهياخده ومحدش هياخد اكتر من نصيبه ولا اكتر من أللي مكتوبله ودة نصيبك ارضي بيه وقولي الحمد لله واحمدي ربنا وقربي منه وادعيله بكل أللي ف قلبك هو عالم بيكي وحاسس بيكي من غير أما تتكلمي احنا مالناش غير ربنا يحس بينا ويمكن كمان ربنا حب يختبر قوة إيمانك بيه وصبرك ع ابتلائه ليكي وهتعملي ايه وتتعاملي ازاي وكل أما الابتلاء كان صعب كان حب ربنا ليكي كبير وغفرانه لذنوبك اكتر ماتزعليش أما ربنا يبتليكي بحاجة انتي ماتعرفيش هو ابتلاكي بيها ليه وعشان ايه يمكن ابتلاكي خير ليكي وترتيب لحاجة عظيمة من عند ربنا ليكي بس قبل أما يديكي الحاجة أللي بيرتبهالك دي لازم يختبر صبرك الاول وقوة ايمانك وعشان كدة ابتلاكي زي انتي مثلاً لو ليكي حد عزيز عليكي وبتحبيه اوي وقررتي تجيبله هدية غالية شوية بس قبل أما تجبيها أو تدهاله بتعمليله اختبار صغير كدة تختبريه بيه اذا كان يستاهلها فعلاً ولا لا لو نجح في الاختبار أللي انتي عاملاهوله هتعرفي انك ماتصرفتيش غلط وأنه يستاهل فعلاً ولو طلع مش اد الاختبار ساعتها بس بدل ماكنتي هتديله الهدية الغالية دي مش هتدهاله وهتندمي وتعرفي إن اختيارك كان غلط ربنا برضة بيعمل معانا كدة بيرتبلنا حياة وحاجات كتير بس قبل أما يدينا الحاجات دي كلها لازم يختبرنا إذا كنا نستاهل كل دة ولا لا والاختبار بيكون هو الابتلاء واما يجيلنا الابتلاء المفروض نتقبله بنفس راضية ونقول الحمد لله ونحمد ربنا كتير ع كل حاجة ثقي ف ربنا لأن حياتك في ايده
سوزان بارتياح: ياه ي ماما كلامك ريحني كتير اوي وخلاني اخد بالي من حاجات مكنتش واخدة بالي منها الحمد لله ع كل حاجة وع كل أللي ربنا يجيبه وانا راضية بكل حاجة ربنا كتبهالي
سامية واحتضنت ابنتها: ربنا كبير ي بنتي ماتقلقيش من حياة ربنا اختارها ليكي ومرتبهالك ..ربنا يسعدك يارب ويريح قلبك يارب ..قومي يلا بقي كدة اغسلي وشك كدة عشان ابوكي وأخواتك زمانهم خلصوا شغل وع وصول خلاص مايشوفوكيش كدة
★٭★٭★٭★٭★ صباح وحيد ★٭★٭★٭★٭★
أدهم: مساء الخير عليكم
محمود وسميحة: مساء النور ي حبيبي تعالي يلا عشان تتعشي بقي
أدهم: حاضر اطلع بس اغير وأصلي كدة ونازل علطول
محمود: ماتتأخرش ي أدهم عشان عاوزك ف موضوع كدة بعد أما نتعشي
أدهم: تحت امرك ي بابا ..عن اذنكم
سميحة: موضوع ايه دة أللي عاوزه فيه ي محمود !!
محمود: سماح راجعة من السفر كمان اسبوع وكنت عاوز أدهم يشوف لهند بنتها شغل ف الشركة معانا وتشتغل معانا ويمكن يغير رأيه ويريح قلبنا بقي
سميحة: ياريت..ياريت ي محمود نفسي اطمن عليه اوي مع بنت الحلال أللي تستاهله
★٭★٭★٭★٭★صباح وحيد★٭★٭★٭★٭★
حنين: حاتم ..مشغول مش فاضي ولا ايه !!
حاتم: لا ي حبيبتي تعالي عاوزة حاجة ولا ايه !!
حنين: اه كنت عاوزة اتكلم معاك شوية
حاتم: ف حاجة ولا ايه !! آمال زعلتك تاني ولا حاجة !!
حنين: لالا ي حبيبي ماحصلش حاجة انا عاوزاك ف موضوع تاني كدة
حاتم: طيب اتكلمي انا سامعك اهو
حنين: بص بصراحة أنا حاسة إن آمال متضايقة اليومين دول فكنت بقترح يعني اننا ناخدها نفسحها كدة ونخرجها خروجة حلوة تفرفش فيها عن نفسها شوية وتنسي أللي مضايقها وتبقي مبسوطة ..عشان نحسسها انها مش لوحدها وأننا جمبها ومهتميين بيها يعني وكدة عشان تفرح عشان ماتحسش أنها فاقدة الاهتمام ومحدش بيهتم بيها ولا وجودها فارق مع حد مش عاوزاها تحس الاحساس دة
حاتم واخذ أخته بين أحضانه وقبّل رأسها: أنتي حنينة اوي ي حنين اسم ع مسمي فعلاً رغم أنها كانت مزعلاكي وبرضو جاية وبتحاولي تعملي حاجة تفرحيها بيها ..حاضر ي حبيبتي هقولها وناخدها ونخرج وأحاول اتكلم معاها كدة واشوف مالها
حنين: لا مش هترضي تحكيلك حاجة عشان بتقول مفيش حاجة هي مخنوقة شوية بس لاني حاولت معاها كتير ماقالتش حاجة غير أنها مخنوقة خنقة عادية وخلاص وعشان كدة بحاول اعمل اي حاجة عشان اطلعها من أللي هي فيه دة وتفرفش كدة وخنقتها دي تتفك شوية كدة ..بس ممكن طلب !!
حاتم بإبتسامة: انتي مش بتطلبي أنتي تؤمري
حنين بإبتسامة: ربنا يخليك ليا يارب ..ممكن بس اما تروح تقولها ماتقولهاش أني قولتلك حاجة ولا انا أللي قولتلك يعني قولها ايه رأيك نخرج انا وانتي وحنين كدة كأنك ماتعرفش حاجة عشان ماتقولش أني أنا أللي قولتلك
حاتم باستغراب: ليه اشمعنا يعني وفيها ايه !!
حنين: عشان تقول إن الاهتمام جاي منك انت وإن الخروجة دي هي فكرتك أنت عشان حسيت انها متضايقة فقولت تفسحها يعني وكدة إنما لو قولتلها إن أنا أللي قولتلك كدة هتقول انك مجتش ولا لاحظت إلا أما أنا قولتلك وجيت عشان انا قولتلك يعني مش من نفسك ولا عشانها عاوزاها تعرف إن الاهتمام جاي منك انت وانك واخد بالك منها عشان دي حاجة هتفرحها لأن آمال بتدور ع الاهتمام وحد يحس بيها
حاتم بإبتسامة: انتي ازاي كدة ي حنين !! ازاي بالحنية دي كلها !! ربنا يخليكي لينا يارب ي حبيبتي ويحفظك وافرح بيكي ف الكوشة مع ابن الحلال أللي يستاهلك مع اني هكون ساعتها بغير منه عشان خدك مني وشاركني فيكي
حنين وتحتضن أخيها: مفيش حد يقدر ياخدني منك ابدا وانت عارف كدة كويس وعارف انت عندي ايه انت بالنسبالي كل حاجة ليا ومقدرش استغني عنك ..طيب اقولك ع حاجة بصراحة أنا بغير من اللي هتكون مراتك من دلوقتي مش عاوزة حد يشاركني فيك مش عاوزاك تتجوز عشان تبقي معايا دايما ومش عاوزة واحدة تيجي وتشاركني فيك وتاخدك مني
حاتم: ي حبيبتي انتي مفيش حد يقدر ياخدني منك وانتي عارفة كدة كويس انتي كل حاجة بالنسبة ليا مش بس أختي الصغيرة لا انتي كمان بنتي وكل حاجة ليا ف الدنيا ومعنديش أغلي ولا اعز منك ف حياتي كلها
حنين بإبتسامة: ربنا يخليك ليا يارب ي أحلي اخ ف الدنيا ودايما معايا كدة وفي ضهري
★٭★٭★٭★٭★ صباح وحيد ★٭★٭★٭★٭★
أدهم: خير ي بابا قولتلي انك عاوزني
محمود: عمتك سماح راجعة من السفر كمان اسبوع هي وجوزها وهند بنتها
أدهم: يوصلوا بالسلامة إن شاء الله ..وايه المطلوب مني !!
محمود: هند بنت عمتك معاها كلية هندسة وكنت عاوزك تشوفلها شغل معاك ف الشركة عشان أما ترجع
أدهم: بس كدة !! طيب دي حاجة سهلة اوي ..من بكرة إن شاء الله ي بابا يكون شغلها جاهز وأول أما ترجع تستلم وظيفتها علطول وتشتغل
محمود: ربنا يباركلك ي بني ويوفقك يارب
★٭★٭★٭★٭★ صباح وحيد ★٭★٭★٭★٭★
وجاء يوم الجمعة موعد شراء الشبكة
أحمد: السلام عليكم ..بقولك ايه ي حاج وريني أحلي حاجة عندك هنا
عم إبراهيم (صاحب محل الدهب): وعليكم السلام .. تحت أمرك ثانية واحدة
ملك: احمد مش لازم تجيب حاجة غالية اوي
أحمد: هش اسكتي انتي مالكيش دعوة بحاجة
عم إبراهيم: اتفضل شوف دة كدة ..مين العروسة !!
ملك: أنا ..انا العروسة
عم ابراهيم: ربنا يتمملك بخير يارب ي بنتي ..اتفضلي قيسي دة كدة وشوفيه وإن شاء الله ييجي مقاسك ويعجبك
ملك: شكرًا ربنا يخلي حضرتك يارب ..هو جميل بس مفيش فورمات تانية !!
عم إبراهيم: لا فيه ثانية واحدة ..اتفضلي شوفي دة كدة يعجبك !!
ملك وشافت سلسلة عجبتها اوي وغالية أوي: واو حلوة اوي السلسة دي ماشاء الله ممكن اشوفها !!
عم إبراهيم: اه طبعا تحت أمرك ..اتفضلي أهي
ملك: ايه رأيك ي أحمد !! ايه رأيك ي ماما انتي وياسمينا !!
سهير: جميلة اوي ي حبيبتي ماشاء الله وشكلها جميل
ملك: بجد ي ماما !! وانتي ي ياسمينا ايه رأيك !!
ياسمينا: تحفة بجد ي ملك ورقيقة جدا والله
أحمد: طيب مادام عجبتك ..هناخد السلسلة دي ي حاج خلاص شوفهالنا بكام والنبي ..وورينا الدبل كدة بقي
عم إبراهيم: تحت امركم ي بني عن اذنكم ثانية واحدة
ملك: بس دي شكلها غالية اوي ي أحمد !!
أحمد: هي مش عجبتك !! يبقي مالكيش دعوة بحاجة بقي
ملك: بس ي...قاطعها احمد: مفيش بس خلاص واسكتي بقي عشان الراجل جاي
عم إبراهيم: السلسلة دي عاملة ١٠٠٠٠ جنيه ..واتفضل دي كل انواع الدبل أللي عندي شوفوا أللي يعجبكم وانا تحت امركم
أحمد: تمام ي حاج هناخد السلسلة اعملهالنا بقي وهنشوف الدبل كدة
عم ابراهيم: تحت امرك ي بني مبروك عليكم
ملك: أحمد دي غالية اوي خلاص مش لازم ونشوف حاجة غيرها تكون أقل ف السعر شوية وماتضغطش ع نفسك
أحمد: مالكيش دعوة بحاجة خالص ولا تفكري ف حاجة انا قولتلك انتي تشاوري وانا اجيب علطول والحمد لله كرم ربنا واسع ولو اطول اجبلك الدنيا كلها هعمل كدة مينفعش ماجبلكيش حاجة عجبتك عشان غالية شوية فداكي كل حاجة والمال كله مقابل اشوفك سعيدة وبتضحكي ..ماتقوللها حاجة ي طنط انتي وياسمينا
سهير: هي خايفة عليك ي بني بلاش تضغط نفسك ي بني وجيب أللي في مقدرتك
أحمد: انا لو اقدر اجبلها الدنيا كلها كنت عملت كدة عمري مااستخسر فيها اي حاجة مهما كانت
ملك: ي حبيبي افهمني أنت أكيد محتاج الفلوس دي وهتعمل بيها حاجات أهم فبلاش تصرفها كلها وترجع ماتلاقيش وانا قولتلك قبل كدة ميفرقش معايا حاجة غير هو وجودك معايا وجمبي ومش عاوزة حاجة إنما الفلوس خليها تستفاد بيها لانك هتحتاجها ولسة هتوضب الشقة وهتحتاج فلوس عشان
ماتزنقش نفسك
أحمد: مالكيش دعوة بأي حاجة خالص وانا قولتلك مش هشوف حاجة عاجباكي وماجبهالكيش وربنا يقدرني وأقدر اسعدك وخلينا ننقي الدبل بقي
عم إبراهيم: ها عجبكم حاجة
أحمد: اه ي حاج هناخد دول وعاوزين نشوف خاتم ومحبس بقي والغوايش والانسيالات والحلقان
ملك: احمد عشان خاطري كفاية مش لازم دة كله دلوقتي خليها وقت تاني طيب كفاية دبلة وحلق وخاتم
أحمد: هش اسكتي لازم اشرفك والناس كلها تشوف شبكتك
ياسمينا: حلو الحلق دة ي لوكا ايه رأيك ي ماما !!
سهير: جميل ورقيق جدا شوفي كدة ي ملك انتي أللي هتلبسي مش احنا
ملك واختارت الشبكة خلاص وكل حاجة
أحمد: قولي بقي ي حاج كدة تمن كل حاجة كدة وحسابك كام
عم إبراهيم: السلسلة ب٧٠٠٠ جنيه و..قاطعه احمد: مش حضرتك قولت إن السلسلة ب١٠٠٠٠ جنيه !!
عم إبراهيم بإبتسامة جميلة: أيوة ي بني واعتبر ال٣٠٠٠ دول نقطتي ليكم وتسمحولي اشارككم فرحتكم ..انا سمعت خطيبتك وهي بتقولك مش لازم حاجة غالية ومكنتش عاوزة تاخدها عشان غالية وبص لملك وابتسم ورجع بص لأحمد: ي بختك بيها واحدة بتحبك بجد وبتخاف عليك وكل أللي فارق معاها هو انت وبس مش حاجة تانية ومش زي باقي البنات أللي تبقي عاوزة أغلي حاجة ومش بتراعي ظروف خطيبها أللي زي خطيبتك اوعي ف يوم تخسرها أو تبعد عنها لأنها بتحبك بجد ومش هتلاقي حد يحبك زيها ربنا يسعدكم ويتمملكم بخير يارب
ملك بإبتسامة: بجد شكرا جدا لكلام حضرتك دة حضرتك راجل طيب ومفيش حد كدة دلوقتي
أحمد بإبتسامة: ربنا يخليك ي راجل ي طيب ويباركلك ف صحتك يارب وانا تحت أمرك ف اللي هتقول عليه
★٭★٭★٭★٭★ صباح وحيد ★٭★٭★٭★٭★
في اليوم التالي
منال: ياسو بقولك ايه ماتيجي نخرج كدة ونفرفش شوية ونفرح ونطلع كبت الشغل دة حاكم بصي انا ع أخري خلاص من الشغل الكتير دة وضغط الشغل عليا .. ياسمينا..ياسمينا..وبزعيق: انتي ي بنتي
ياسمينا بتوهان: ها ايه ي منال ف ايه بس بتزعقي ليه خضتيني
منال: لا مفيش اصلي بقالي ساعة بتكلم وانتي ولا هنا وطلعت بكلم نفسي ف الآخر
ياسمينا: معلش ي منال ماتزعليش المهم كنتي بتقولي ايه
منال: لا خلاص بقي انتي مش معايا خالص أصلا
ياسمينا: سامحيني ي منال غصب عني بس خطوبة أختي كمان اسبوع وكدة فتلاقيني مش مركزة خالص عشان مشغولة معاها بقي الايام دي وكدة
منال: ألف مبروك وعقبالك بقي يارب..بس كنتي ناوية تعزميني بقي ولا لا !!
ياسمينا: اه طبعا دة لو محتاجة عزومة يعني ..عن اذنك بقي البريك جيه وانا ع لحم بطني وهموت من الجوع
★٭★٭★٭★٭★ صباح وحيد ★٭★٭★٭★٭★
حسين: ملك نقت الشبكة وعجبتها !!
سهير بسعادة: أيوة ي حاج هي اللي نقت كل حاجة ع مزاجها وخطيبها واد كويس وابن حلال وبيحبها من قلبه بجد وبقي عاوز يجيبلها حتة من السما
حسين بإبتسامة: ربنا يسعدهم يارب ويتمملهم ع خير
سهير: يارب..الايام بتجري بينا وادينا بنجوز ملك كنا بنقول ياه امتي ييجي اليوم أللي نفرح بيهم فيه ونطمن عليهم واهو جيه بس مكنتش متخيلة أنه بسرعة كدة
حسين: كل حاجة بتعدي مفيش حاجة مابتعديش والأيام بتجري وكله من عمرنا ربنا يتمم فرحتنا ع خير يارب ونطمن عليها ف بيت جوزها ونفرح بياسمينا يارب ونطمن عليها هي كمان مع ابن الحلال أللي يستاهلها ويريح بالها
★٭★٭★٭★٭★ صباح وحيد ★٭★٭★٭★٭★
حازم: آنسة حنان خلصتي شغلك !!
حنان: أيوة ي بشمهندس ف حاجة !!
حازم: لا أبدًا اصل انا كمان خلصت بدري النهاردة فكنت محتاج اتكلم معاكي ف موضوع كدة وبالمرة اوصلك
حنان: موضوع ايه دة اتفضل تحت امرك
حازم: لا مش هينفع هنا تسمحيلي نمشي واعزمك ع فنجان قهوة !!
حنان بتوتر: تمام مفيش مشكلة بس مش عاوزة أتأخر
"حازم وحنان ووصلوا للكافيه"
حنان: خير ي بشمهندس موضوع ايه دة أللي حضرتك عاوزني فيه وعزمتني ع فنجان قهوة !!
حازم بتوتر: بصي ب..بص.. بصراحة..ك..كد..كدة
حنان مقاطعة حديثه: ممكن تتكلم علطول من فضلك
حازم بتوتر: بصي بصراحة كدة انا بحبك ومعجب بيكي
★٭★٭★٭★٭★ صباح وحيد ★٭★٭★٭★٭★
في مكتب أدهم
هدير(السكرتيرة): أدهم بيه ف واحدة برة وبتسأل ع حضرتك وعاوزة تدخل لحضرتك
أدهم بتعجب: واحدة !! مين دي وماقالتش اسمها ايه !!
هدير: لا ي فندم ماقالتش هي قالت عاوزة تدخل لحضرتك
أدهم: طيب ماشي دخليها أما اشوف مين دي كمان وعاوزة ايه
هدير: تحت أمرك ي فندم عن اذنك .."وخرجت هدير تأذن للفتاة بالدخول"
آمال بدلع: وحشتني ي دومي
أدهم: .........