رواية اعطيت لحبك فرصة فخدعتني
✨الفصل السابع عشر ✨
كنا قفلنا الفصل أللي فات علي خروج ياسمينا المفاجئ وردها الصادم ورفضها لطلب أدهم في وسط صدمة وذهول من الجميع ..تعالوا بينا يلا نكمل نشوف ايه أللي هيحصل ..قراءة ممتعة♥️✨
٭٭٭٭٭٭٭٭٭ صباح وحيد ٭٭٭٭٭٭٭٭٭
أدهم: طبعا أنا يسعدني ويشرفني اني اطلب ايد الآنسة ياسمينا بنت حضرتك و..قاطعته ياسمينا بخروجها المفاجئ وردها الصادم وسط صدمة الجميع: طلبك مرفوض يا أدهم بيه
حسين واتصدم من ردة فعل بنته: ايه أللي بتعمليه دة ياياسمينا في حد يعمل كدة مع ضيوف في بيته !!
محمود: خلاص احنا اسفين ياحسين ونستأذن احنا بقي
حسين: استني بس يامحمود ..وبص لياسمينا: ماتقولي في ايه !!
ملك بإرتباك: معلش يابابا ياسمينا غصب عنها انت عارفها متسرعة ..معلش ياجماعة احنا اسفين بس عشان هي اتفاجئت ومكنتش عاملة حسابها ..وكادت ياسمينا أن تتكلم إلا أن اخذتها ملك ودخلوا للغرفة
حسين: انا اسف جدا مش عارف اقولكم ايه بجد ولا عارف هي ايه خلاها تعمل كدة
محمود: لا ولا يهمك حصل خير ..واحنا آسفين مرة تانية ..عن اذنك
حسين: استني بس يامحمود
محمود: استني ليه !! بنتك طلعت ورافضة ابني يبقي قعادي مالوش لازمة وبعتذرلكم علي الازعاج
أدهم: بابا ممكن نقعد شوية من فضلك
سميحة: نقعد ليه يا أدهم !! احنا اتهزقنا يعتبر
حسين: انا محرج منكم اوي والله بس انا ليا تصرف تاني معاها ..عن اذنكم
أدهم: معلش ياماما عشان خاطري خلينا نصبر شوية
٭٭٭٭٭٭٭٭٭ صباح وحيد ٭٭٭٭٭٭٭٭٭
"ودخل حسين لياسمينا وملك وهو يزعق لياسمينا"
حسين بزعيق: اقدر افهم ايه أللي عملتيه دة !!
ياسمينا بدموع: انا مش موافقة يابابا
حسين: مش موافقة ليه انتي قعدتي معاه عشان توافقي أو ترفضي اديتي لنفسك فرصة تعرفيه !! اديني سبب واحد يخليكي ماتوافقيش وحتي لو مش موافقة تتصرفي بالمنظر دة ؟! حد قالك اننا هنغصبك تتجوزي غصب عنك !!
ياسمينا: يابابا يبقي مديري في الشغل وانا سيبتله الشغل بسبب كذا مشكلة عملتها معاه فازاي دلوقتي بقي عاوزني اوافق اتجوزه !!
حسين: واحنا ماقولناش وافقي أو ارفضي احنا قولنا تقعدي معاه وتتعرفوا وبعد كدة تفكري براحتك ونرد عليهم إنما أللي عملتيه دة اسمه قلة ذوق وعدم تربية ..وبعدين شخصيته في الشغل غير شخصيته برة الشغل يعني تعاملك معاه في الشغل دة الطبيعي عشان في مكان عمل وتعامل شغل مش اكتر ..اكيد مش هيقف يتكلم ويهزر معاكي في الشغل
ياسمينا: اللي حصل بقي يابابا انا اسفة
حسين: اتفضلي يلا عشان تطلعي تعتذري للناس وتقعدي معاه ..صغرتيني قدام الناس وكنتي هتخسريني اعز اصدقائي ..واحد غيره كان مشي لولا محافظ على الصداقة أللي بينا وابنه أللي احرجتيه هو أللي صمم يقعد بعد موقفك الزبالة دة ..دقيقة والاقيكي ورايا وحسابك معايا بعدين علي أللي عملتيه دة
سهير: خلاص ..خلاص ياحسين اطلع انت وهي هاتيجي وراك علطول ومش هتتأخر ..خرج حسين بعد أن نظر لها نظرة جعلتها تندم وتعرف خطأها ونظرت لها امها دون كلام ولكن النظرة كفيلة تعبر وخرجت وتركتها"
ملك: بتعيطي ليه دلوقتي !! وايه أللي هببتيه دة !!
ياسمينا ونظرت لها بدموعها: خايفة ..خايفة ياملك خايفة اتوجع تاني خايفة يكون مش بيحبني خايفة بعد أما اتعلق بيه يسيبني أو اكتشف أنه محبنيش نفس الحب أللي حبيتهوله خايفة اكون بظلم نفسي للمرة التانية واوجعها
ملك وهي تجلس أمامها: وانتي ايه خلاكي متأكدة أنه يطلع وحش !! مش يمكن يطلع كويس ويبقي عوض ربنا ليكي ..ليه حطيتي الوحش وبس قدامك ومفكرتيش في الحلو !!
ياسمينا: لأن مفيش حب من غير وجع وكمان انا مش عاوزة اتجوز دلوقتي
ملك: هو صح مفيش حب من غير وجع بس برضو مفيش حب مافيهوش وجع اي حب مع أي حد لازم يكون في مشاكل بس مهما كانت المشاكل الحب دة بيفضل موجود جوانا يعني مهما تحصل مشاكل دة الطبيعي بس عمر المشاكل ماتكون سبب في اننا نكره بعض أو نستغني عن بعض المشاكل عمرها ماكانت سبب في أنها تقلل الحب جوة قلوبنا ..بالعكس دي بتكون السبب في تقوية العلاقة بينا وبتخلينا نتمسك ببعض اكتر
ياسمينا: طيب والمفروض اني أنا أعمل ايه بقي دلوقتي أوافق يعني !! وانا لسة خارجة من صدمة مش حمل صدمة تانية
ملك: ماقولتلكيش وافقي ولا ارفضي بس علي الاقل تقعدي معاه وتتكلموا وتفهمي شخصيته وبعد كدة توافقي أو ترفضي بقي دي حاجة ترجعلك انتي إنما لو فضلتي ترفضي كدة طول حياتك بسبب تجربة مريتي بيها يبقي مش هتتجوزي خالص وهتفضلي قافلة علي نفسك كدة وهو ولا فارق معاه عايش حياته وهيتجوز ويخلف وانتي لسة قافلة علي نفسك مينفعش عشان مريت بتجربة اطبق دة كله علي أللي جاي بعد كدة
ياسمينا: وجعك من تجربة بيخليكي خايفة تدخلي اي تجربة تاني تشبهها لانك بتكوني اتعلمتي ..وبمجرد مابتقابلي حاجة تشبهها بتحسي بنفس الوجع من تاني
ملك: مش معني أنها تشبهها يبقي هتأدي لنفس النتيجة مانتي عندك المنهج واحد إنما مش كله بيجيب امتياز !! وعندك خطوات التحاليل واحدة لكن كل تحليل بيطلع بنتيجة حتي الاخوات كل واحد ليه طبع وشخصية مختلفة عن التاني مع انهم متربيين في بيئة واحدة وشخصية واحدة هي أللي مربياهم بس رغم كدة كل واحد ليه طريقة تفكيره وشخصيته المستقلة بيه
ياسمينا: حاضر ..حاضر ياملك هفكر
ملك: قومي اخرجي يلا واعتذري للناس علي اللي حصل واقعدي معاه ..بدل مانتي عارفة بابا ممكن يعمل ايه
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
ياسمينا بحرج: انا آسفة ياجماعة ماقصدش انا بس تعبانة ومفاجأة الموضوع خلتني اتصرف كدة
محمود: ولا يهمك يابنتي احنا اللي آسفين واكيد مش هنضغط عليكي تعملي حاجة غصب عنك
أدهم: ممكن ياعمي بعد اذنك اقعد معاها لوحدنا ونتكلم !!
حسين: اه طبعا يابني خد راحتك ..وخرجا حسين ومن معه للخارج ليتركوا المساحة لياسمينا وادهم
أدهم وحاطط رجل فوق رجل: اقدر افهم بقي ايه أللي عملتيه دة !!
ياسمينا: فارق معاك اوي أللي أنا عملته !!
أدهم: انتي احرجتينا اوي وبابا كان هيمشي وانا أللي قولتله لا نفهم في ايه الاول بس خليكي عارفة كسفة امي وأبويا دي مش هتعدي كدة
ياسمينا: انت بتهددني ولا ايه !!
أدهم: لا خالص لاسمح الله ..اقدر افهم بقي !!
ياسمينا بتوتر: انا قولت إن الموضوع جيه فجأة وانا مكنتش مرتباله فاتصرفت كدة غصب عني
أدهم: عارفة اني كنت همشي فعلاً بس مارضتش تعرفي ليه !!
ياسمينا: ليه !!
أدهم: عشان ابويا وامي مالهمش ذنب في انهم يتكسفوا من واحدة زيك قليلة الذوق ويمشوا زعلانين ومكسور بخاطرهم ..أو يتهزقوا من واحدة زيك
ياسمينا: وأما انا كدة جاي عاوز تخطبني ليه !! كنت مشيت
أدهم: قعدت عشانهم وعشان ميتكسرش بخاطرهم وينزلوا من هنا وهما مكسورين بسبب تافه زي دة عشان مايبقوش مكسوفين ونفسهم مكسورة ويودوا وشهم فين عشان رأسهم ماتتحطش في الأرض بدل ماتترفع لفوق عرفتي بقي مارضتش امشي ليه !!
ياسمينا: وايه المطلوب مني دلوقتي المفروض اني اعمله !!
أدهم: احنا كدة كدة هنتخطب سواء بمزاجك ولا غصب عنك فاحنا هنتخطب فترة وبعد كدة نبقي نقول محصلش نصيب إنما امي وأبويا محدش يهزقهم بالطريقة دي
ياسمينا: امممم يعني هتقضي معايا وقت وخلاص
أدهم: افهميها زي ماتفهميها انتي حرة بس انا قولتلك أللي عندي مش علي اخر الزمن تيجي واحدة زيك تكون سبب في إن ابويا وامي يتكسر بخاطرهم ولا يوطوا راسهم بسببك ..وفجأة خرج لوالد ياسمينا تاركها في صدمتها: نقرأ الفاتحة ياعمي وحدد معاد الخطوبة عاوزها امتي
حسين: ها ايه رأيك ياياسمينا ..لكن ياسمينا كانت واقفة مصدومة مش عارفة ترد فأكمل حسين: علي بركة الله يابني نقرأ الفاتحة
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
في سيارة أدهم
محمود: انا مستغرب لحد دلوقتي اللي انت عملته دة
أدهم: ليه وهو انا عملت ايه !! مش انتو أللي عاوزيني اتجوز واديني بحققلكم دة اهو ..يعني ولا كدة عاجبكم ولا كدة عاجبكم اعملكم ايه طيب !!
سميحة: ابوك مايقصدش يا أدهم هو قصده مستغرب ثباتك وازاي البنت طلعت قدامنا كلنا وقالت لا وبعد كدة توافق ..كنا فاكرينك هتاخدها تلكيكة وتمشي إنما أنت عملت العكس واصريت انك تقعد وتتمم الموضوع
أدهم: عادي هي كانت رافضة من رهبة الموضوع ودة خلاها تتصرف كدة إنما أما قعدنا واتكلمنا فوافقت ..وكمان ماعاش ولا كان أللي يكسر بخاطركم ولا يهزقكم انا قعدت عشانكم
محمود: هحاول اصدقك ..ربنا يخليك يارب يابني ويسعدك
أدهم: لا يابابا لازم تصدقني عشان هي دي الحقيقة
محمود: أنت حبيتها يا أدهم
أدهم: وهو انا لحقت !!
محمود: الايام جاية وهنشوف
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
كوثر: هتفضلي قاعدة وقافلة علي نفسك كدة كتير !!
آمال: عاوزاني اعمل بس ياماما اقوم اتحزم وارقص !!
كوثر: لا عاوزاكي تنسي وتتأقلمي مع الوضع الجديد
آمال بسخرية: الوضع الجديد !! انهي وضع دة ها !! وضع إن بشوف حبيبي مع واحدة تانية !! وضع اني كل مااشوفه معاها قلبي يتحطم مليون حتة ..وضع أنه كان في يوم من الايام ليا ودلوقتي بقي لغيري !! وضع إن اهتمامه وحبه ليا مابقاش دلوقتي ليا وبقي لواحدة تانية غيري !! انهي وضع دة ياماما أللي عاوزاني اتأقلم عليه قوليلي
كوثر: الوضع دة انتي أللي اختارتيه ..وحبيبك دة كان في ايدك وانتي أللي ضيعتيه وبالنسبة لوجع قلبك فهو أتوجع قبل منك وكتير اوي أنتي أللي بدأتي واختارتي البداية يبقي اتحملي النهاية بقي ..أدهم عمره ماكان هيرجعلك لانه ماعتش ينفع خلاص
آمال: ليه ياماما مكنش هيرجعلي ياما مخطوبين ومرتبطين بيسيبوا بعض وبيرجعوا تاني عادي ليه لا بقي !!
كوثر: صوابعك مش زي بعضها وعشان كدة برضو الناس مش زي بعضها وأما بيرجعوا بيكون في حاجز بينهم اسمه خذلان أو كسرة وبمجرد اي حاجة بتحصل بيشتغل قدامهم كأنه فيلم ..لو رجعتي لادهم كنتي هتكرهيه بدل ماتحبيه وهو كمان كان هيكرهك اكتر بسبب الجرح اللي موجود في قلبه منك الجرح اه ممكن يكون اتقفل بس لسة سايب علامة مكانه زي بالظبط أما الدكتور بيعملك عملية جراحية ويخيطها هي بالفعل بتكون خلاص خفت بس لسة سايبة علامة في جسمك مكان الخياطة فكل أما تبصي تفتكريها ..كل واحد فينا عايش علي الأرض دي بيسيب ذكري لكل أللي حواليه سواء بقي حلوة أو وحشة وانتي اختارتي الذكري بتاعته منك ليه تكون وجع وجرح ولو حاولتي ترجعي بتفكيرك انك تقدري تعالجي الجرح دة يبقي بتضحكي علي نفسك لأنك هتفتحيه من غير ماتاخدي بالك ولو الجرح اتفتح اول حد هيجرحه هو أنتي
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
حسين: انتي ايه أللي انتي عملتيه دة قدام الناس ..انتي احرجتيني مع الناس اوي وخليتي وشي في الأرض منهم
ياسمينا: انا آسفة يابابا انا معرفش انا ازاي عملت كدة
حسين: يعني ايه مش عارفة !! مفيش حد يعمل أللي عملتيه دة ناس داخلة بيتك تحرجيهم وتحرجيني بالشكل دة !! ولا كأني قاعد وكأني ماليش رأي ولا ليا لازمة هو حد كان قالك اننا هنجوزك غصب عنك !! انتي ماعملتيش احترام لوجودي ..هو دة أللي ربيتك عليه !!
ياسمينا وذهبت تقبل يد والدها: انا آسفة يابابا سامحني انا عارفة اني غلطت بس مكنتش اقصد اصغرك والله ولا احرجك هي جت معايا كدة غصب عني
حسين: وايه خلاكي توافقي بقي مادام كنتي رافضة !!
ياسمينا بتوتر وبصت لملك: ع..عادي يعني يابابا أما اتكلمت معاه لقيته شخص محترم وقولت مش هخسر حاجة لو اتخطبنا واتعرفنا اكتر واديه وادي لنفسي فرصة
حسين: اممممم يبقي ماكنش ليه لازمة أللي عملتيه دة بقي وكنتي قعدتي معاه من الاول بدل أللي عملتيه دة
سهير: خلاص بقي ياحسين حصل خير
حسين: اسكتي انتي عشان بعد كدة تاخد بالها من تصرفاتها
ياسمينا: أنا آسفة يابابا سامحني
حسين: خلاص قومي نامي دلوقتي يلا
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
حسين: يعني انتي عاجبك أللي بنتك عملته دة والموقف أللي زي الزفت أللي حطتني فيه دة !! الناس داخلين بيتنا نعاملهم كدة !! الناس تقول علينا ايه دلوقتي ماعرفناش نربي !! ولولا الواد محترم كان مشي لأن أي حد مكانهم كان هيعمل كدة ويبقي حقهم
سهير: معلش عيلة طايشة مش فاهمة حاجة واتصرفت بتلقائية وكمان ماتنساش انها اتفاجآت بالموضوع يعني مكنتش مرتباله فرد فعل طبيعي من رهبة الموضوع وماتنساش أنه يبقي مديرها في الشغل يعني اكيد حصل بينهم مشاكل خليتها تتصرف كدة ومش معني كدة اني مش مغلطاها لا طبعا غلطانة بس خلاص أللي حصل حصل بقي هنعمل ايه !! مش هنعرف نرجعه تاني احنا نقرس عليها شوية بعد كدة عشان تتعلم ونفهمها إنما الموضوع مايتاخدش قفش كدة ..بس أنت هدي اعصابك
حسين: استغفر الله العظيم يارب ..اصلك ماشوفتيش منظري كان عامل ازاي وانا قاعد مع الناس وفجأة تطلع وترفض ولا كأني موجود ولسة الناس بتتكلم مدتش فرصة يكملوا كلامهم ولا فرصة اني ارد حتي ..يقولوا اننا غصبنها علي الجواز من ابنهم !!
سهير: معلش ياحسين واهو عدي الحمد لله وهي عرفت غلطتها
حسين: ربنا يقدم أللي فيه الخير ..يلا ننام بقي
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
في غرفة ياسمينا وملك
ملك: هتفضلي قالبة وشك كدة كتير !!
ياسمينا: عاوزاني اعمل ايه طيب اقوم اتحزم وارقص !!
ملك: لا انا ماقولتش كدة بس هتفضلي كدة يعني ساكتة مابتتكلميش !!
ياسمينا وبصتلها: اتكلم !! اتكلم اقول ايه !! اقول اني هتخطب من غير إرادتي وغصب عني !! اقول اني مجرد فترة في حياته !! المفروض اني افرح عشان خطوبتي وانا عارفة انها منتهية من قبل ماتبتدي أصلا ..المفروض اقول ايه !! يعني الخطوبة هتتم عادي ومفيش اي مشاكل بس بعد كام شهر من الخطوبة هيسيبني والله اعلم هكون اتعلقت بيه ولا لا عاملة زي لعبة واللعبة هتنتهي في يوم من الايام فجأة وهتسبلك الذكري منها متخيلة اني هتخطب وانا متأكدة انها مش هتكمل !! وأنها هتنتهي ف اي لحظة !! عارفة خطوبة مظهر كدة ..ها ايه بقي يفرح وانا افرح
ملك: وايه هيخليه يعمل كدة !!
ياسمينا: عشان أدهم المهدي مابيتقالوش لا مفيش واحدة تقدر تقوله لا فازاي بقي اجي انا اول واحدة تقوله لا
ملك: لو واحد مكانه كان خد أهله ومشي بعد أللي عملتيه انتي غلطتي برضو وكل كلمة قالها ليكي عنده حق فيها فعلاً مفيش حد يقبل أمه وأبوه يتهانوا بالطريقة دي بس هو قعد رغم اللي عملتيه وتمم الموضوع ومتكلمش في حاجة ..مش هتخسري حاجة لو ادتيه واديتي لنفسك فرصة ويمكن يكون بيحبك ويكون عوض ربنا ليكي
ياسمينا: مش عارفة ياملك انا مش عاوزة اظلم حد معايا أو اخليه يحبني ومقدرش اديله نفس الحب دة
ملك: وهتفضلي كدة لحد أمتي مش قادرة تنسي وتفضلي عايشة في ذكريات الماضي !! هتفضلي انتي كدة بترفضي أي حد يجيلك وهو عايش حياته ولا فارق معاه انتي حالتك ايه لازم بقي تفوقي ولازم تنسيه وتطلعيه برة حياتك فوقي بقي من وهمك دة وارجعي افتحي قلبك من تاني للي جاي يخبط عليه إنما هتفضلي عايشة حياتك كلها بالمنظر دة !! واخرتها طيب !! دة هيرجعه مثلا !! فوقي بقي وكفاية كدة واطلعي بقي من الدور دة
ياسمينا: رغم إن كلامك وجعني بس فوقني ..انتي عندك حق انا زودتها اوي وطولت اوي وعشت الدور اوي طب أقولك علي حاجة انا كنت أما اقعد وافكر مع نفسي كنت أقول انا هفضل كدة لحد أمتي هفضل في حالة الحزن والكآبة دي لحد أمتي !! عارفة كنت زي مااكون حابة الموضوع ومش عاوزة اطلع منه وزي ماكون صدقت اني ضحية فعلاً وقررت اعيش الدور شوية واني فعلاً ضحية عشان بس احسس نفسي اني اتحملت كتير واثبت لنفسي اني اتحملت اللي محدش يتحمله معرفش ليه بس يمكن عشان كنت ببرر لنفسي عشان احاول اطلع من دة ..بس انتي جيتي وفوقتيني من وهم كنت عايشة فيه ..انا هدي لنفسي فرصة وادهم برضو مش هخسر حاجة بس عاوزة اقولك اني بكون داخلة معركة تانية انا خسرانة فيها يعني داخلاها وانا عارفة نهايتها فيها وجع قلبي وموافقة برضو
ملك بتعاطف: حبيبتي انتي ليه بتقولي كدة !! وليه بتتوقعي الوحش وبس ليه بتحكمي علي كل حاجة من برة قبل ماتشوفيها من جوة !! مايمكن يطلع كويس ويحبك وتحبيه ومش معني أول تجربة حب في حياتك كانت فاشلة يبقي تبني عليها كل تجارب الحب أللي جاية ..زي بالظبط منهج الجامعة أو المدرسة امتحان كل سنة غير السنة أللي قبلها وتقديرات ودرجات كل سنة مختلفة مع أنه نفس المنهج ونفس الامتحان إلا إن التقديرات اختلفت والدرجات من طالب للتاني مينفعش اجي ابني فشل طالب في سنة من السنين علي كل الطلبة ولا علي المنهج لأن المنهج كله واحد بس القدرات كلها مش واحدة ليه مع أنه نفس الكلام بس في اللي بينجح وفيه أللي بيفشل وفيه أللي بيجيب درجات عالية وفيه أللي بيجيب أقل مع أنه نفس الكلام كله واحد يعني مقدرش اقول العيب في المنهج عشان فشل طالب واحد وباقي الطلبة ناجحين لتقديرات مختلفة ومينفعش ابني الفشل علي كله بسبب واحد بس فشل ..شوفتي بقي مع أنه السبب واحد بس النتائج مختلفة ..مش معني مصطفي وحش يبقي تاخدي كل دول بذنبه وتقولي كلهم وحشين كل واحد ليه أسلوبه وطريقته وفكره الخاص بيه كل واحد ليه شخصية مستقلة بذاتها تختلف عن كل أللي حواليه
ياسمينا: كلامك كله صح وعندك حق السبب واحد لكن النتائج مختلفة بس الواحد أما بيتحط في تجربة ويتوجع منها اوي غصب عنه بيخاف يقرر نفس التجربة تاني لأنها بتبقي سايبة علامة جوانا زي بالظبط العملية الجراحية اتخيطت بس مكان الخياطة لسة موجود وزي لو اتخبطتي في حاجة وخفت بتخافي تختلطي بالحاجة دي تاني وبتبعدي عنها مع إن جرحها خف بس أثره لسة موجود وعلامة الجرح لسة في جسمك ..خايفة أقرب واتعلق بيه يسيبني وخايفة هو اللي يقرب ويتعلق بيا ومقدرش اديله نفس الحب أللي هيدهوني خايفة اظلمه معايا
ملك: صلي استخارة وشوفي ربنا هيختارلك ايه وثقي في اختيار ربنا ليكي مهما كان واطمني لحكمته
ياسمينا: يارب ..يارب خير
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
في صباح اليوم التالي
استيقظت ياسمينا علي صوت جرس الباب فقامت لتفتح وهي تقول في نفسها: مين أللي هاييجي بدري اوي كدة دي الساعة لسة سبعة ونص حد ييجي لحد في وقت زي دة ..وقامت بفتح الباب لتنصدم بوجود أدهم
أدهم: لسة نايمة !! مش وراكي شغل ولا ايه !!
ياسمينا بصدمة: انت ايه جابك هنا في وقت زي دة اتفضل امشي
أدهم: دي مقابلة تقابلي بيها خطيبك برضو !! بدل ماتقوليلي اتفضل ولا تشرب ايه !!
ياسمينا: اتفضل ايه وبتاع ايه بقولك امشي من هنا
أدهم: ولو قولتلك مش ماشي هتعملي ايه !!
ياسمينا: انت جاي عاوز ايه !!
أدهم: جاي عشان اعرف الهانم مابتجيش الشغل ليه فقولت يمكن مكسلة تنزل الصبح بدري ولا حاجة .. فقولت لنفسي روح ياواد خدها بنفسك مهما كان خطيبتك برضو وميصحش
ياسمينا: شغل ايه اللي جاي تتكلم عنه انا سبتلك الشركة كلها
أدهم: مفيش حاجة حصلت من الكلام دة واتفضلي يلا ادخلي البسي وانزلي 5دقايق والاقيكي جاهزة ونزلتي
ياسمينا: انت ب.. قاطعها أدهم: انا قولت أللي عندي 5دقايق والاقيكي قدامي وإلا انا مش مسئول عن أللي هعمله ..وتركها واقفة في صدمتها ثم أفاقت ودخلت لتبديل ملابسها وهي تقول: دة شكله مجنون وممكن يعمل حاجة علي ايه ألبس وانزله اشوفه عاوز ايه هو كمان ..شكلي كدة هتعب معاه وهتكون خطوبة زي الفل يعني أنا كان ايه خلاني اوافق بس ياربي .. أوافق !! هو انا لحقت أوافق ولا أرفض ولا اداني فرصة اصلا دة قال كلمتين من هنا وسابني وطلع ولا استني يسمع رأيي كأني كرسي بيحطه مكان ماهو عاوز ..ياختااي انا سرحت ونسيت أنه تحت أما الحق ادخل ألبس وانزله اشوفه عاوز ايه حاكم دة مجنون ممكن يعمل حاجة
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
نزلت ياسمينا بالفعل لتجد أدهم يجلس داخل السيارة ينتظرها فوقفت واخذت نفس عميق وذهبت إليه وهي تقول: اتفضل قول عاوز ايه !!
أدهم: اركبي الاول طيب مش هنتكلم في الشارع
ياسمينا: كلام ايه مفيش بينا كلام أللي عاوز تقوله اتفضل قوله دلوقتي
أدهم: هتركبي ولا انتي حرة بقي وماتلوميش غير نفسك
ياسمينا وهي تنفخ وتحدث نفسها: دة شكله مجنون ويعمل حاجة أما اركب وخلاص واشوف عاوز ايه ونخلص ..قاطعها صوت أدهم: بتقولي حاجة !!
ياسمينا بخضة: ها لا خالص هقول ايه يعني
أدهم: مالك خايفة كدة ليه مش هاكلك انا والله فطران قبل مانزل ماتخافيش
ياسمينا وهي تحدث نفسها: دة طلع كمان ظريف وبيهزر ماشاء الله شكلها خطوبة فل يعني يارب صبرني يارب ..بس الصراحة دمه خفيف ..ثم قالت: هو احنا رايحين فين !!
أدهم: هتعرفي كل حاجة دلوقتي
"وبعد دقائق وصل أدهم أمام الشركة"
أدهم: اتفضلي انزلي يلا وصلنا
ياسمينا بصدمة: انت جايبني هنا ليه !! انا بقولك اني سبتلك الشغل والشركة وكل حاجة انت ليه مش عاوز تفهم !!
أدهم: مش بمزاجك ..انا أللي اقول سيبتيها ولا لا وانا أللي اقول تكملي ولا لا ..
ياسمينا: دة ليه بقي إن شاء الله !! وجايبني هنا ليه !! انا قولت اني مشيت ومش راجعة تاني عاوز ايه بقي !!
أدهم: اسمعي الكلام وانزلي من غير كلام كتير ..وقولتلك انا أللي احدد مين أللي يمشي ومين أللي يقعد
ياسمينا: لا مانا لازم افهم انت عاوزني ليه وانت اصلا مش طايقني
أدهم: حضرتك عندك شغل علي المشروع أللي المفروض يخلص وانتي لسة ماخلصتيش يعني مينفعش تمشي والمشروع لسة شغال لانك عضوة فيه زي باقي زمايلك أما المشروع والتصاميم بتاعته تبقي تتسلم ابقي امشي محدش هيكلمك ..اتفضلي يلا انزلي
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
"ودخل أدهم متجهًا إلي مكتبه ليقابله حازم قائلاً: ايه يا أدهوم صباح الفل
أدهم وهو يدخل المكتب ويجلس علي كرسيه: صباح الخير ياحازم ..طمني ايه اخبار الشغل !!
حازم: الشغل ماشي تمام اوي زي مانت عاوز ماتقلقش انت بس
أدهم: طب كويس واخبار المشروع والموظفين ايه !!
حازم: كله تمام ماتقلقش
أدهم: حازم انا مش عاوز اي غلطة فتح عينيك
حازم: ماتقلقش ..كل حاجة تمام
أدهم: تمام
حازم: مالك كدة في حاجة حصلت ولا ايه !!
أدهم: مالي في ايه مانا كويس قدامك اهو
حازم: عينيك بتقول عكس كدة
أدهم: مانمتش كويس بس ودة أللي تاعبني انا كويس ماتقلقش
حازم: طيب الحمد لله ..وجاء يذهب ولكنه وقف فجأة كأنه يريد قول شيء وينظر لأدهم ثم التف ليخرج وكأنه تراجع في قراره ..ولكن أوقفه صوت أدهم وهو ينادي عليه ..
أدهم: استني ياحازم ..عاوز تقول حاجة ولا ايه !!
حازم: لا حاجة ايه مفيش حاجة
أدهم بتحذير: حازم ..في ايه !! عاوز تقول ايه
حازم وجلس أمامه: بصراحة كدة كنت عاوز اقولك مش من الواجب برضو انك تكلم آمال تطمن عليها عملت ايه من آخر مرة تعبت ونقلناها المستشفي
أدهم: وأكلمها ليه وبمناسبة ايه !! احنا مش اتطمنا عليها وطلعت وخلاص
حازم: قصدي انها بنت خالتك ومن الواجب تطمن عليها عاملة ايه وكدة
أدهم: اممممم .. اكلمها عشان تستغلها فرصة هي وتمثل أنها تعبانة لأطول وقت عشان طبعا هطمن عليها كل يوم عشان بنت خالتي والواجب وكدة وهي تستغل دة في أنها تعبانة طبعا عشان نتكلم وتبني أمل علي اننا هنرجع واكون بدي لقلبي السكينة التانية وبفتحله الجرح القديم وافتحله جرح جديد ..صح !! وكل دة ليه عشان الواجب الواجب دة لو هيجبلي وجع قلبي انا مستغني عنه ومش هعمله
حازم بحزن: أدهم انا كان قصدي بس ا..قاطعه أدهم: حازم ..خلاص الموضوع انتهي وياريت ميتفتحتش تاني انا موضوع آمال منتهي بالنسبالي ومش عاوز اتكلم فيه تاني ..وكمان انا دلوقتي بقيت يعتبر خاطب يعني مالوش لازمة الكلام في الموضوع دة
حازم بصدمة: ايه دة بجد !! حصل امتي الكلام دة !!
أدهم: روحت امبارح بليل وقرينا فاتحة ولسة هنحدد معاد الخطوبة بقي
حازم بفرحة: ألف ألف مبروك ياحبيبي فرحتلك من قلبي والله
أدهم بإبتسامة: الله يبارك فيك ياحبيبي
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
أحمد: مالك ياملك سرحانة في ايه كل دة !!
ملك بانتباه: ها ..لا مفيش انت كنت فين !!
احمد وهو يفتح الطعام: لاااا دة انتي مش معايا خالص
ملك برجاء: معلش يا أحمد سامحني انا عارفة اني قصرت في حقك الفترة أللي فاتت دي وانك حاسس طريقتي فيها حاجة متغيرة بس صدقني غصب عني انا نفسي متلغبطة
أحمد وهو ينظر لها ويمسك يدها: انتي بتعتذري علي ايه !! انتي محصلش منك حاجة عشان ازعل منك وطريقتك عادي زي كل يوم مش متغيرة ولا حاجة وحتي ياستي لو اتغيرتي شوية غصب عنك وايه يعني ايه أللي فيها !! انا مقدرش ازعل منك مهما حصل انتي مش بس خطيبتي انتي حبيبتي وحياتي ومراتي وام عيالي في المستقبل انتي كل حياتي وكل همي اطمن عليكي مش ازعل منك
ملك: ياحبيبي ..ربنا يخليك ليا يارب ويديملي وجودك في حياتي يارب
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
مصطفي: بقولك ايه ياهند ..ولم يكمل كلامه فتقابل مع ياسمينا وهي تدخل وتقابلت عينيهما معًا فألقت ياسمينا السلام ذاهبة من أمامه لمكتبها
هند وهي تحمل مج النسكافيه: ايه يامصطفي واقف عندك ليه كدة !!
مصطفي وهو ينظر لياسمينا ولم ينتبه لكلام هند
هند: مصطفي .. مصطفي انت معايا !!
مصطفي بانتباه: ها اه معاكي ياهند
هند: بقولك ايه موقفك برة كدة !!
مصطفي: ها لا ولا حاجة كنت جايلك بس مالقتكيش كنتي فين صحيح !!
هند: كنت بعمل مج نسكافيه عشان دماغي هتموتني من الصداع ..في حاجة ولا ايه !!
مصطفي: ألف سلامة عليكي ياحبيبتي ..نتقابل في البريك عشان نتغدي مع بعض
هند: تمام ماشي
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
هند: ازيك ياياسمينا عاملة ايه وحشتيني .. حمد لله علي سلامتك
ياسمينا بإبتسامة: الحمد لله تمام ..وحشتيني اكتر والله ..الله يسلمك ياحبيبتي
هند: عن اذنكم هروح الحمام بس
ياسمينا: اتفضلي ياحبيبتي
منال وهي تقترب من ياسمينا: لسة مانسيتهوش برضو ياياسمينا !!
ياسمينا وهي ترفع نظرها من الورق الذي أمامها: هو مين دة يامنال !!
منال: ماتحاوليش تخبي ياياسمينا عينيكي فضحاكي أول أما عينيكم اتقابلت
ياسمينا: ماشي يامنال لسة مانسيتش بس بحاول انسي وبحاول اعيش وبدأت بالفعل اني انسي في ايه بقي !!
منال: حبيبتي مقصدش اضايقك والله بس انا عاوزة اطمن عليكي ..انا عارفة إن مش سهل انك تنسي وإن طول ماهو قدامك وهند كمان دة بيكون أصعب عليكي وعارفة كمان تعاملك مع هند مش سهل عليكي انك تتعاملي معاها عادي وهي مرتبطة بالشخص أللي انتي كنتي مرتبطة بيه يعني واخدة مكانك
ياسمينا بإبتسامة: الوقت بينسي يامنال وكدة كدة لازم انسي عشان اقدر ارجع اعيش حياتي من تاني ..أما بالنسبة لهند بقي فهي مالهاش ذنب بأي حاجة البنت بتتعامل معايا بمنتهي الأدب والاحترام
منال: انا بصراحة معرفش ازاي بيجيلها وش تتعامل معاكي عادي كدة وهي اكيد عارفة إن مصطفي كان مرتبط بيكي الاول ..وأنها يعتبر خطفاه منك
ياسمينا بإبتسامة: منال هو انتي أما اتخطبتي لحسام عرفتي هو كان مرتبط بحد قبلك ولا لا !!
منال بتعجب: لا بصراحة بس ايه جاب دة لدة
ياسمينا: لأن دة نفس الموضوع أللي بتتكلمي فيه يعني انتي ممكن تكوني بتتعاملي مع بنت كان حسام مرتبط بيها قبلك عادي جدا وانتي ماتعرفيش وهي في اعتقادها انك خطفتيه منها بس الحقيقة غير كدة والحقيقة انك بتتعاملي بتلقائية معاها زيها زي اي واحدة تانية وانتي ماتعرفيش حاجة
منال: قصدك ايه ياياسمينا !! قصدك إن هند متعرفش حاجة !!
ياسمينا بإبتسامة: بالظبط كدة وعشان كدة البنت بتتعامل معايا باحترام جدا كزملة في الشغل لكنها متعرفش أي حاجة عن أللي كان بيني وبين مصطفي وانا طبعا بتعامل معاها عادي علي هذا الأساس لأنها هي وافقت وهي متعرفش أنه مرتبط بيا يعني هو الغلطان مش هي هو مرتبط بيا وراح اتقدم لغيري واتفق على كل حاجة في عز ماكانت ظروفه صعبة زي ماكان بيقول وهي ياعيني متعرفش حاجة وبتفكره مش مرتبط ولو كانت تعرف مكنتش وافقت من الاخر كدة يعني هي مش خطفاه مني زي مانتي فاكرة ..وغير كدة كمان لازم اتعامل معاها عادي عشان هي بنت عمة خطيبي
منال بصدمة: بنت عمة خطيبك !! نعم بتقولي ايه !! انا مش فاهمة حاجة ..انتي اتخطبتي !! اتخطبتي امتي ومين !!
ياسمينا: لسة مش خطوبة هي بس قراية فاتحة ولسة الخطوبة شوية كدة
منال بصدمة: دة حصل امتي الكلام دة وايه دخل هند في الموضوع دة من أساسه !!
ياسمينا: هي مش هند تبقي بنت عمة أدهم المهدي ي..قاطعتها منال: اوعي تقولي إن أدهم المهدي هو خطيبك !!
ياسمينا بإبتسامة: أيوة هو اديكي فهمتي اهو
منال بصدمة: ازاي دة حصل وامتي !!
ياسمينا وهي تقوم: هحكيلك علي كل حاجة بس واحنا بناكل بقي
٭٭٭٭٭٭٭٭٭٭ صباح وحيد ٭٭٭٭٭٭٭٭٭
مصطفي: مالك ياهند في ايه مش بتاكلي ليه !!
هند: مصطفي هو انا ممكن أسألك سؤال !!
مصطفي: اه طبعا ياحبيبتي بس كلي الاول وأسالي براحتك زي مانتي عاوزة
هند: لا معلش انا عاوزة اعرف إجابة السؤال دلوقتي عشان انا بقالي كام يوم بفكر فيه ومش لاقياله إجابة
مصطفي بقلق وترك الطعام من يده: في ايه ياهند مالك !!
هند: مصطفي انت خطبتني ليه !!
مصطفي بتعجب: نعم !! انا خطبتك ليه !! وانتي مش عارفة أنا خطبتك ليه !!
هند: من فضلك تجاوبني أنت خطبتني ليه !! يعني طول السنين أللي فاتت دي عاوز تقنعني انك مابصتش ولا ارتبطت بحد غيري !! فضلت مستنيني دة كله لحد اما ارجع !! افرض مكنتش رجعت !! دة انت مدتش نفسك فرصة ولا ادتني فرصة نفكر حتي جيت علطول وكأنك مجهز كل حاجة
مصطفي: وايه لزمته الكلام دة دلوقتي !! يعني انتي متضايقة عشان خطبتك ولا عشان ايه !! مش دة كان حلمي انا وانتي زمان !! وليه اصبر مادام مفيش حاجة تعطلنا عن تحقيق حلمنا
هند: كان حلمنا اه بس من غير مانوجع قلب حد مالهوش اي ذنب
مصطفي: قصدك ايه انا مش فاهم !! مين أللي وجعنا قلبه دة !!
هند: لا قصدي انت فاهمه كويس وفاهم انا عاوزة اقول ايه كمان ..انت كدبت عليا يامصطفي ..كدبت عليا أما قولتلي انك مانسيتنيش كدبت عليا أما قولتلي مدخلتش حد حياتك بعدي وعشان كدة بسألك انت خطبتني ليه !!
مصطفي: انا فعلا مش فاهم انتي بتتكلمي عن ايه ولا عاوزة تقولي ايه
هند: انا هقولك انا بتكلم عن ايه يامصطفي .. أنت حبيت بعدي يامصطفي صح ولا لا !!
مصطفي: لا طبعا محبتش بعدك
هند: كداب ..كداب ..اومال ياسمينا كانت ايه !!
مصطفي بصدمة: ايه !!
هند: ايه كنت فاكرني مش هعرف ولا ايه !! نفسي أسألك سؤال واحد بس .. ليه !! ليه !! ليه عملت فيها كدة !! أما أنت محبتهاش ليه قولتلها انك بتحبها وقربت منها وعلقتها بيك وخليتها تحبك وبعد دة كله سيبتها وجاي تقولي محبتش غيري حتي في غيابي .. يعني انت محبتهاش اومال ليه بقي عملت دة كله !!
مصطفي: هند ممكن تهدي عشان نعرف نتكلم وانا هفهمك كل حاجة
هند: نتكلم !! نتكلم في ايه يامصطفي !! انت حققت حلمنا علي حساب واحدة بريئة مالهاش ذنب في حاجة خدتها معاك في السكة كل ذنبها أنها صدقتك ووثقت فيك وحبيتك ازاي جالك قلب تقرب منها وتعلقها بيك وانت مش جواك اي مشاعر ليها !! ازاي كنت بتقدر تقولها كلمة بحبك وانت مش حاسس بيها ولا بتحبها !! جالك قلب تلعب بيها وانت متاكد انك مش هتكمل معاها !! قولي ازاي قدرت تعمل كدة !!
مصطفي: انتي عرفتي الموضوع دة منين !!
هند بسخرية: والله !! هو دة كل اللي فارق معاك !! انا عرفت منين وازاي !! مش فارق معاك انك دمرت قلب بريء وانك بتبني سعادتك علي تعاسته !! كان وعدنا اننا نحقق حلمنا بس من غير ضحايا ومن غير مانوجع حد وانت خالفت دة ..ومش أنا أللي ابني حياتي علي حساب حد وافرح واتبسط وعارفة إن في حد غيري بيموت بسببي
مصطفي وهو يمسكها: هند لو سمحتي اسمعيني ارجوكي
هند: كان ممكن يامصطفي .. كان ممكن اسمعك لو كنت جيت عرفتني الحقيقة
مصطفي: عشان خاطري اسمعيني انا بحبك
هند: حتي دي مبقتش اقدر أصدقها منك .."وتركته وذهبت"
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭
ياسمينا: بس كدة ياستي هي دي كل الحكاية ودة كل أللي حصل
منال: مبروك ياحبيبتي ربنا يتمملك على خير يارب ويسعدك ويجعله نصيبك الطيب ..بس كان حصل حاجة كدة لازم تعرفيها
ياسمينا بقلق: حصل ايه !! في ايه يامنال اتكلمي !!
منال بارتباك: لا خير إن شاء الله ماتقلقيش
ياسمينا: طيب ماتقولي علطول يامنال في ايه !!
منال بارتباك: اصل بصي بصراحة كدة انا حكيت لهند كل حاجة
ياسمينا: قصدك ايه مش فاهمة ؟! يعني ايه حكيتي لهند كل حاجة !!
منال: حكيتلها علي اللي كان بينك وبين مصطفي
ياسمينا بصدمة: انتي هبلة يامنال !! ايه خلاكي تحكيلها حاجة زي كدة وازاي اصلا تحكيلها حاجة زي كدة !!
منال: اهو أللي حصل بقي ياياسمينا
ياسمينا: أللي حصل !! يعني ايه اللي حصل !!
منال: اصل بصراحة ياياسمينا ايام مانتي مكنتيش بتيجي كانت دايما بتسأل عليكي كتير فأنا بصراحة شكيت من طريقتها أنها تكون عارفة إللي كان بينك وبين مصطفي وعاوزة تشمت فيكي
ياسمينا: ها وبعدين ايه اللي حصل
منال: كنا قاعدين في يوم في الشغل
#فلاش_باك
هند: ازيك يامنولة فين ياسمينا اومال بقالها بتاع اسبوع مبتجيش هو في حاجة ولا ايه !!
منال: لا مفيش حاجة هيكون في ايه يعني !!
هند: الله اومال هي مابتجيش ليه !!
منال بقرف: وهو انتي مش عارفة هي مابتجيش ليه !!
هند بتعجب: وانا هعرف منين !! وبعدين مالك يامنال بتكلميني كدة ليه من فوق لتحت بقالك كام يوم ومش طايقاني وانا ساكتة فممكن افهم بقي في ايه !!
منال: لا هيكون في ايه يعني مفيش حاجة ..عن اذنك
هند وهي تمسكها: منال في ايه !! بتعامليني كدة ليه !! انا عملت حاجة ضايقتك !!
منال: انتي كمان بتستعبطي عاوزة تفهميني انك ماتعرفيش
هند: اعرف ايه ومعرفش ايه وبستعبط في ايه !! انا مش فاهمة حاجة خالص ماتفهميني في ايه يامنال
منال: لا والله !! عاوزة تفهميني انك ماتعرفيش موضوع ياسمينا ومصطفى !! يعني اتخطبتي ليه وليكي عين كمان تسألي عليها مش كفاية أللي عملتوه فيها
هند بصدمة: ايه !! انتي بتقولي ايه !! لا تعالي اقعدي معايا كدة وفهميني قصدك ايه بالكلام دة
منال: ولا اقعد ولا نتكلم اصلا مفيش بينا كلام
هند: منال ارجوكي فهميني في ايه انا مش فاهمة حاجة خالص وايه موضوع ياسمينا ومصطفى دة !!
منال: ليه هو انتي ماتعرفيش إن ياسمينا ومصطفى كانوا مرتبطين وبيحبوا بعض وكانوا هيتخطبوا لولا ظهورك في حياتهم فجأة بوظ كل حاجة
هند بصدمة: ايه !! انتي بتقولي ايه !!
منال: لسة برضو هتمثلي انك مكنتيش تعرفي بس اقول ايه ماهو دة الطبيعي بعد اللي عملتيه
هند بزعيق: ارجوكي بقي يامنال كفاية انا والله العظيم ماكنت اعرف حاجة زي كدة ولو كنت اعرف كان مستحيل اوافق علي مصطفي أما جيه اتقدملي أللي انتي ماتعرفيهوش بقي إن انا ومصطفى كنا بنحب بعض من زمان اوي من ايام الكلية وكنا متفقين علي الجواز لولا بس حصلت شوية ظروف كدة وانا كنت سافرت كان زماننا متجوزين دلوقتي يعني أنا أعرف مصطفي قبل ياسمينا ومجيتش خطفته منها زي مانتي بتقولي ولو كنت اعرف ان ياسمينا بتحبه انا كان مستحيل اوافق إنما أنا وافقت عشان كان وعدي انا ومصطفي اننا لبعض ومصطفي أما اتقابلنا وأتكلم معايا وقالي أنه لسة بيحبني وعاوزني وهاييجي يطلبني من أهلي ماقاليش حاجة زي كدة خالص ولا جابلي سيرة الموضوع دة حتي بعد أما اتخطبنا .. إنما مش انا يامنال أللي تبص لحبيب صحبتها حتي لو مفيش في الدنيا غيره ..عن اذنك وشكرا اوي ليكي ..وتركتها وذهبت
#باك
منال: دة كل أللي حصل
ياسمينا: يخربيتك يامنال ايه خلاكي تتصرفي كدة !! انتي لازم تعتذري ليها انتي وجعتيها بكلامك دة من غير مايكون معاكي دليل كنتي قوليلي طيب قبل ماتتصرفي كدة
منال بندم: اهو أللي حصل بقي
ياسمينا: حصل خير ..حصل خير ..اتفضلي قومي يلا ورانا شغل
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
حازم: صحيح ياقلبي جهزي نفسك عشان خطوبة أدهم قريب إن شاء الله
حنان بصدمة: ايه دة المفاجأة دي
حازم بضحك: هي فعلا مفاجأة بس الموضوع جيه بسرعة بقي
حنان: ربنا يتممله بخير
حازم: ويتمملنا بخير ياعمري
حنان: يارب ..صحيح هيخطب ياسمينا خلاص !! وجابوا الشبكة وكدة ولا لسة !!
حازم: اه ياسمينا أللي معانا ..لا لسة هينزلوا إن شاء الله
٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
ياسمينا: افندم
أدهم: تعاليلي المكتب حالا عايزك
ياسمينا: آسفة ورايا شغل
أدهم: 5 دقائق والاقيكي قدامي ..وقفل السكة
ياسمينا وهي تنظر لشاشة هاتفها: وكمان بتقفل السكة في وشي !! لا دة انت هتشوف مني ايام سودة بس اصبر عليا ..وذهبت لمكتب أدهم خبطت عليه فأذن بالدخول فدخلت
ياسمينا: افندم عاوزني ليه !!
أدهم وهو يرفع بصره إليها: اتمني تتكلمي معايا بأسلوب احسن وارقي من كدة لأني أنا دلوقتي مديرك وخطيبك في نفس الوقت
ياسمينا: لا والله !! وانت أما قفلت في وشي السكة دة كان ايه !!
أدهم: بقولك ايه انا مش فاضي لشغل العيال بتاعك دة ..انا كنت باعتلك عشان اقولك شوفي يوم تنزلي تجيبي الشبكة فيه
ياسمينا: لا والله كتر خيرك تاعبينك معانا ..عن اذنك
أدهم وقام مسكها من دراعها: مش كل شوية هفكرك اني خطيبك ولازم تتعاملي معايا بأسلوب احسن من كدة ومتنسيش كمان اننا دلوقتي ف الشغل واني مديرك
ياسمينا بألم: حاضر ..حاضر ..خلاص حاسب ايدك انت كدة بتوجعني
أدهم: اتفضلي
٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
أحمد: حبيبي قاعد سرحان في ايه !!
ملك: ولا حاجة ياحبيبي
احمد: ملك مالك في ايه ياحبيبتي بقالك كام يوم كدة متغيرة وسرحانة طول الوقت ومش معايا خالص
ملك بأسف: معلش ياحبيبي سامحني بس غصب عني
أحمد: انا مش زعلان منك انا بس عاوز اطمن عليكي في ايه احكيلي
ملك: ياسمينا يا احمد
أحمد: مالها ياسمينا !!
ملك: ياسمينا المفروض هتتخطب
احمد: وانتي زعلانة عشان هتتخطب ولا ايه !! مانتي كمان هتتجوزي
ملك: لا طبعا مش عشان كدة دة انا نفسي اشوفها أحلي عروسة مع أللي قلبها يختاره
احمد: اومال في ايه بقي !!
ملك: انا هحكيلك كل حاجة
٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
مصطفي: هند ..هند
هند ووقفت وبصت وراها بنفاذ صبر: افندم يامصطفي
مصطفي: ممكن نقعد ونتكلم واشرحلك كل حاجة
هند: معلش يامصطفي أنا تعبانة ومحتاجة اروح
مصطفي: ارجوكي ياهند عشان خاطري اديني فرصة اشرحلك كل حاجة
هند: تشرحلي !! تشرحلي ايه !! انت كدبت عليا يامصطفي انت خليت الناس تشوفني بصورة وحشة خليت الكل يبص عليا ويشاور ويقول أللي خطفت حبيب صحبتها اهي مكنتش بفهم نظراتهم ليا في الاول وكنت بستغرب جدا هما ليه كدة بس بعد كدة عرفت هما ليه كدة وطلعت انا الوحيدة المغفلة أللي ماكنتش فاهمة حاجة
مصطفي: هند انا آسف انا عارف اني غلطت
هند: بس بس انا مش عاوزة اسمع حاجة ..ارجوك يامصطفي سيبني يومين كدة مع نفسي
مصطفي: ماشي ..براحتك ياهند ..سلام
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
ديما: هتفضلي قاعدة كدة حاطة ايدك علي خدك
آمال: عاوزاني اعمل ايه يعني ياديما
ديما: عاوزاكي تقومي تخرجي تتفسحي تتبسطي وتنسي
آمال: اتبسط !! اتبسط ازاي وهي خطوبته كمان كام شهر ياديما !! انا اه غلطت بس مكنتش اعرف إن النتيجة صعبة ومؤلمة اوي كدة ..انا حبيت بس معملتش حساب للوجع بتاع الحب مكنتش اعرف انه بيوجع اوي كدة
ديما: آمال بصيلي كدة ..انتي مش بتحبيه انتي مش بتحبي أدهم صدقيني فمتعذبيش نفسك بوهم في دماغك وتجري ورا الوهم دة لانه هو وهم مجرد خيال بتجري وراه مالوش اي اثر انتي بتجري ورا فراغ مش موجود اصلا
آمال: ليه كلكم بتقولوا اني مش بحبه ليه محدش مصدق اني فعلا بحبه
ديما: لأن هي دي الحقيقة ياآمال الحقيقة أللي لازم تتعايشي معاها الحقيقة أللي انتي اختارتيها الحقيقة أللي انت كنتي السبب فيها ..الحقيقة أللي بتقول انك لو بتحبيه فعلا مكنتيش سيبتيه وكنتي اتمسكتي بيه اكتر من كدة
آمال: يمكن غلطت بس رجعت وعرفت غلطي دة وندمانة عليه
ديما: ساعات بيكون الوجع مالهوش علاج وساعات بيكون الجرح عميق بيسيب علامة مش سهل أنها تختفي وعشان كدة الندم عمره ماكان علاج لجروح كنا السبب فيها ..انتي بيتهيألك انك بتحبيه بس لا انتي عاوزة ترجعيله عشان اهتمامه بيكي وعشان حبه انتي حاسة بفراغ جواكي وعاوزة تملي الفراغ دة ومكنش حد بيملاه غير أدهم .. انسيه ..انسيه يا آمال لو كنتي بتحبيه بجد زي ما بتقولي يبقي انسيه وسيبيه يكمل حياته أللي بيحب بيضحي وأللي بيحب مش بيوجع وانتي قربك هيوجعه مهما كان بينكم حب هيفضل العلامة موجودة زي الجرح بالظبط مهما يخف بس لسة معلم في جسمك وبمجرد تذكيرك للموقف بتحسي بوجعه ..
"هل من السهل أن ننسي حب كان بحياتنا !! وإن كنا نحب بالفعل بهذه الدرجة فلماذا تركنا هذا الحب منذ البداية !! ولماذا نحاول إعادته من جديد الان !! ولكن يبقي السؤال هنا ماهو الحب وكيف نعرف اننا نحب ..!!
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
أحمد بصدمة: يانهار ابيض كل دة حصل !!
ملك: انا آسفة انا ماكنتش عاوزة احكيلك
احمد: آسفة !! آسفة علي ايه !! ومكنتيش عاوزة تحكيلي ليه !!
ملك: آسفة اني حكيتلك حاجة زي كدة ومكنتش عاوزة احكيلك عشان مهما كان مصطفي يبقي ابن خالتك ومينفعش تخسروا بعض
أحمد: ابن خالتي وطلع زبالة ومش جدع وبيلعب ببنات الناس انا معرفش ازاي قدر وجاله عين يعمل كدة ازاي عمل كدة وعارف إن دة ممكن يدمرني انا
ملك: وانت مالك وماله يااحمد !!
احمد: بعد أللي مصطفي عمله دة اي واحدة مكانك غيرك كانت أول حاجة هتفكر فيها هي أنها تفسخ خطوبتها عشان خاطر أختها
ملك: انا عمري ما فكرت بالطريقة دي يا أحمد وانت مالكش ذنب في حاجة ومينفعش اخدك بذنب مصطفي عشان مجرد انك ابن خالته لانك مكنتش معاه في أللي عمله ولا تعرف عنه حاجة يبقي ليه اخدك بذنبه !!
أحمد: ماشي ..ماشي ..ماشي يامصطفي اما اشوفك بس
ملك: احمد عشان خاطري ماتكلموش في حاجة كل واحد راح لحاله خلاص وفي النهاية كل شيء قسمة ونصيب
احمد: بس لازم يعرف غلطه عشان مايكرروش تاني
ملك: وحياتي عندك يا احمد بلاش ..غير كدة كمان الكلام مابقاش يفيد بحاجة لانه كدة كدة خطب خلاص والكلام مش هيفرق معاه يعني ولا هيقدم ولا هيأخر فممنوش فايدة بقي وكمان عشان محدش يعرف حاجة وهو خلاص مع خطيبته وياسمينا كمان هتتخطب والموضوع انتهي
احمد: عندك حق الكلام مش هيعمل حاجة لانه فات أوانه خلاص ..طب قوليلي ياسمينا رأيها ايه في موضوع الخطوبة دة !!
ملك: اهي متوترة شوية برضو ..انت مش هتصدق هتتخطب لمين
أحمد: مين ياتري !!
ملك: أدهم المهدي صاحب شركات المهدي أللي ياسمينا بتشتغل فيها ويبقي مديرها في الشغل
احمد بصدمة: أدهم المهدي !!
ملك باستغراب: أيوة يا أحمد ماله أدهم المهدي
احمد: أدهم دة يبقي صاحبي من زمان اوي وشاب كويس ومحترم جدا وطيب فوق مما تتخيلي بعيدا عن طريقته مع الموظفين في الشغل وأسلوبه في الشغل بس هو في الواقع اطيب شخص ممكن تقابليه في حياتك وأما بيحب بيدي بدون اي مقابل
ملك: اومال ياسمينا مش موافقة ليه وخايفة بس ..وانت اتصدمت ليه أما قولتلك اسمه ؟!
احمد: اتصدمت عشان أدهم كان رافض فكرة الجواز بقاله فترة ورافض يفتح قلبه لأي حد فمعني أنه فجأة كدة يقرر يخطب دي حاجة غريبة
ملك: وليه كان رافض طيب !!
أحمد: لا دي حكاية طويلة ابقي احكهالك بعدين بقي إنما دلوقتي يلا عشان ألحق اوصلك عشان اتأخرتي
ملك وهي تنظر في الساعة: ياخبر دة انا اتأخرت اوي فعلا يلا بينا
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
صافي بفرحة: مصطفي بص جبت لبس جديد ايه رأيك ..انهي أحلي
مصطفي: بعدين ياصافي انا مش فايق دلوقتي
صافي: عشان خاطري بقي يامصطفي قولي انهي أحلي عشان هحضر بيه حفلة التخرج بتاعتي
مصطفي بعصبية: قولت مش دلوقتي ياصافي مش فايق انا دلوقتي
صافي بحزن: ماشي ماما بتقولك تعالي عشان تتعشي
مصطفي: روحي أنتي ياصافي انا مش جعان
صافي: مش جعان ازاي يامصطفي قوم يلا اتعشي بقي ماما حضرتلك العشا وقالتلي اندهلك
مصطفي بعصبية وزعيق: خلاص بقي ياصافي قولت مش جعان ومش عاوز انزل روحي انتي
صافي بدموع: براحتك
سامية: فين اخوكي اومال ياصافي مانزلش ليه !!
صافي: بيقول مش جعان ياماما
سامية: يعني ايه مش جعان دة لسة جاي من الشغل ولازم ياكل
صافي: معرفش بقي ياماما ماليش دعوة ..عن اذنك انا طالعة أوضتي
"صافي دخلت اوضتها وقعدت تعيط جامد وصعبت عليها نفسها اوي ..وفجأة لقت الباب بيخبط فمسحت دموعها بسرعة وقالت: ادخل
مصطفي من وراء الباب: ممكن ادخل ولا لا !!
صافي: اتفضل
مصطفي: ممكن اعرف بقي الصغنن بتاعنا قاعد لوحده وزعلان ليه !!
صافي: مفيش حاجة
مصطفي: انا اسف ياحبيبتي مقصدش ازعلك والله ولا انكد عليكي غصب عني معلش سامحيني
صافي ببكاء: انت من يوم ماخطبت وانت بقيت بعيد عني اوي يامصطفي فاكر .. فاكر ..فاكر يامصطفي يوم ماقولتلك انا نفسي اشوفك بالبدلة واشوف فرحتك بس خايفة !! فاكر بقي ساعتها قولتلك خايفة من ايه !! قولتلك خايفة الجواز ياخدك مني وتنساني خايفة تبعد عني وتنشغل عني .. فاكر بقي ردك عليا كان ايه !! قولتلي انا مستحيل اقدر ابعد عنك ولا حاجة تشغلني عنك واديك بعدت اهو من يوم ماخطبت ..أما زعقتلي مازعلتش منك اد مازعلت علي نفسي حسيت اني وحيدة وحسيت اني لوحدي فصعبت عليا نفسي اوي احنا اتنين يامصطفي وانا ماليش غيرك ورغم ذلك وانت معايا حاسة بالوحدة اومال بقي اما تتجوز وتبعد !!
مصطفي وأخذها في حضنه: بس ..بس ياحبيبتي وأوعي تقولي كدة تاني طول مانا موجود انتي فاهمة !!
صافي: يامصطفي أنت بعدت اوي بعدت لدرجة أنك ممكن تبقي معايا بس انت مش معايا ومش حاسة بوجودك معايا انت اه معايا بس معايا بجسمك بس إنما روحك وعقلك وكل حاجة فيك في حتة تانية خالص غير اللي معايا فيها
مصطفي: يمكن اكون بعدت غصب عني بس صدقيني عمري ماقدر ابعد عنك ولا قلبي يقسي عليكي انتي مش بس اختي الصغيرة انتي كمان بنتي ودموعك دي محبش اشوفها عشان انتي عارفة أنتي غالية عندي ازاي وسامحيني لو اتعصبت عليكي غصب عني مقصدش والله
صافي بإبتسامة: خلاص انا مش زعلانة بس بشرط
مصطفي: كمان هتتشرطي !! قولي ياستي
صافي: تيجي مع بابا وماما حفلة التخرج بتاعتي
مصطفي بفرحة: اخيرا هيعملولك حفلة التخرج بقي ..دة اكيد طبعا ياحبيبتي دة انا بقالي كتير مستني اللحظة دي لحظة ماشوفك وانتي محققة احلامك وبتتخرجي
صافي: ربنا يخليك ليا يارب وتفضل معايا في كل نجاح بوصله
مصطفي وهو يقبل رأسها: ويخليكي ليا يارب يااحلي صغنن في حياتي
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
ياسمينا: انتي بتضحكي ياملك !! اموت وافهم بتضحكي علي ايه !!
ملك بضحك: الموضوع يضحك بصراحة والله أدهم دة مسخرة
ياسمينا: مجنون قصدك ..دة مجنون والله انا مش عارفة هستحمل اتعامل معاه ازاي
ملك: اديه وادي لنفسك فرصة ياياسمينا مش هتخسري حاجة
ياسمينا: لا ياملك فيها خسارة هخسر قلبي وانا مش حمل خسارة تانية كفاية مرة اوي ..يوم أما تقرري تدي لازم تعرفي انك لازم هتخسري حاجة اصلك مش هتدي ببلاش ولا هتاخدي ببلاش ..وانا خسرت مرة والتانية اهي كمان بس الفرق بقي بين المرتين إن الاولي مكنتش اعرف إنما التانية انا عارفة
ملك: إن شاء الله خير ومفيش خسارة ولا اي حاجة وحشة
ياسمينا: يارب ياملك يارب عشان انا تعبت
سهير وهي تدخل: انتو لسة مانمتوش مش وراكم شغل الصبح !!
ملك: اه هننام اهو ياماما
ياسمينا: اه ماما صحيح ..أدهم كان قالي نحدد يوم عشان ننزل نجيب الشبكة
سهير بإبتسامة: إن شاء الله ياحبيبتي نشوف يوم تكونوا فاضيين فيه وننزل
ياسمينا بإبتسامة: تمام ياماما
سهير بإبتسامة: يلا مش عاوزين حاجة !!
ملك وياسمينا: سلامتك ياماما
سهير: يلا تصبحوا علي خير
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
وبعد مرور أسبوع تقريبا
حازم يتحدث مع حنان ولكن حنان لم تكن معه: حنان ..حنان ..
حنان بانتباه: ها انت بتكلمني ياحازم !!
حازم: دة انا بقالي ساعة بكلمك ولا أنتي هنا خالص ..مالك في ايه !!
حنان بتوتر: حازم بصراحة أنا كنت عاوزة اتكلم معاك في موضوع بس خايفة
حازم بقلق: في ايه ياحنان اتكلمي ماتخافيش
حنان بتوتر: حازم ..ا..ا..احنا ..لا..لازم نسيب بعض
حازم: ........