🌻 رواية اعطيت لحبك فرصة فخدعتني
🌻الفصل التاسع عشر 🌻
٭٭٭٭٭ صباح وحيد ٭٭٭٭٭
أدهم: عشان حبيتك ياياسمينا ..انا بحبك
ياسمينا بصدمة وذهول: ب..بت..بتحبني !! طب ازاي دة حصل وامتي !!
أدهم: معرفش حصل امتي وازاي كل اللي عارفه دلوقتي اني مش هنفذ الكلام أللي كنت قولتلك عليه
ياسمينا وهي تبتسم بسخرية وتنظر للأرض ثم ترفع نظرها إليه: امممم بحبك ومش هنفذ الكلام أللي قولتلك عليه اممممم حاجة غريبة برضو أللي غيرك فجأة كدة من قرار زي دة يبقي اكيد في حاجة
أدهم: صح ..كلامك صح ..في اهم حاجة وهي انتي
ياسمينا بسخرية: انا !! انت بتضحك عليا ولا علي نفسك يابشمهندس !! انا وانت عارفين إن خطوبتنا صوري .. صورة قدام الناس وكام شهر وننهي الموضوع ونقول محصلش نصيب وكل واحد فينا هيروح لحاله يبقي حبيتني امتي وازاي بقي !!
أدهم: انا نفسي معرفش زيك امتي دة حصل ولا ازاي بس باين كدة أنه كان من بدري وانا أللي كنت بكابر بس لقيت مفيش فايدة للمكابرة خلاص ..في ناس بنشوفهم من أول نظرة بنرتاح ليهم وبنتمني نكمل معاهم عمرنا وحياتنا الجاية كلها .. ناس من أول مقابلة معاهم حسينا براحة ليهم ومعاهم وانا كدة معاكي
ياسمينا: خايفة ..خايفة اصدقك اكون بضحك علي نفسي وابقي انا أللي جبت السكينة وحطتها في قلبي بنفسي خايفة ماتكونش بتحبني زي مابتقول خايفة بعد أما اتعلق بيك وابتدي احبك تسيبني زي ماقولتلي خايفة تكون بتقولي كدة مجرد كلام بس عشان أصدقه واوافق وميبانش عليا حاجة قدام الناس والأمر يبان أنه طبيعي
أدهم: ليكي حق في كل كلمة قولتيها بس لو كل حد فكر كدة مش هيبقي في حب ولا حد هيتجوز طبيعي نكون كلنا اتوجعنا من تجربة في حياتنا بس اللي مش طبيعي هو أننا نبني كل الجاي وكل حياتنا الجاية علي فشل تجربة مرينا بيها لأننا لو عملنا كدة يبقي مش هنحقق ولا هنوصل لأي حاجة من أللي بنحلم بيها بسبب خوفنا من فشل اول تجربة لازم نحاول مينفعش اول مرة واستسلم خلاص ماهو مفيش حاجة بتيجي من أول مرة برضو ولو بنينا فشل تجربة مرينا بيها علي كل حاجة في حياتنا حتي لو كنا هننجح فيها هنفشل بسبب اننا حاطين الفشل قدامنا ومش قادرين ننسي الماضي فمن خوفنا مش هنوصل لحاجة والحكاية هتتعاد تاني
ياسمينا: كلامك صح بس دة أما اكون بحاول اوصل واحقق حاجة فبسعي ليها وبتعلق بأي حاجة توصلني ليها إنما مش حاجة انا داخلة وعارفة النهاية أنها خسارة في الاخر يبقي فين السعي هنا !!
أدهم: بصي ياياسمينا انا مريت بحاجات صعبة في حياتي وكان اصعبها تجربة حب فاشلة دي مش بس كسرتني دي دمرتني كنت فاكر اني هقدر انسي أو اني نسيت لكن لا ولا نسيت ولا قدرت ارجع زي ماكنت قولت هقفل علي قلبي ومش هحب تاني كنت فاكر اني مش هقدر احب من بعدها ..خمس سنين ..خمس سنين وانا بحاول انسي ومش عارف ولا قادر خمس سنين وكل حاجة بتتعاد قدامي كأنها لسة امبارح خمس سنين وانا بحاول اقنع نفسي وأللي حواليا اني نسيت لكني مش ناسي ولا قادر انسي خمس سنين وانا بحاول اتأقلم لحد اما قررت اعيش حياتي ولازم انسي لحد اما انتي جيتي حسيت انها إشارة من ربنا بعتهالي أو بيحطني قدام الأمر الواقع عشان يختبرني هل هعمل كدة فعلا ولا مجرد كلام عشان ميكونش ليا حجة ..حسيت فيكي حاجة غريبة شدتني ليكي حسيت انك ممكن تكوني سبب في اني انساها وانك عوض ربنا ليا بعد اللي شوفته ومريت بيه بلاش تكسريني زي ماهي كسرتني انا قررت اديلك قلبي بلاش توجعيه ولا تكوني سبب في جرحه انا مش بقولك حبيني دلوقتي احنا كدة كدة هنتخطب كل أللي طالبه منك انك في فترة الخطوبة دي ادي لنفسك فرصة وافتحي قلبك واديله فرصة ولو لقيتي نفسك مش مرتاحة ومش قادرة ولا عارفة أنا مش هغصب عليكي في حاجة وهبعد عنك نهائي بس لازم تدي لنفسك ولقلبك فرصة الأول وبعد كدة قرري اذا كنتي هتكملي ولا مش هتكملي وايًا كان اختيارك وقرارك انا هعملهولك
ياسمينا: هو انا ممكن أسألك ايه أللي حصل خلاك كدة !!
أدهم: اكيد هاييجي اليوم أللي احكيلك فيه كل حاجة بس دلوقتي انا مش حابب اتكلم ولا افتح الموضوع دة
ياسمينا: تمام ..وربنا يقدم أللي فيه الخير إن شاء الله
٭٭٭٭٭٭٭٭ صباح وحيد ٭٭٭٭٭٭٭
مريم: وحشتني ياكريم
كريم بصدمة: مريم !! ايه جابك هنا !!
مريم: ايه ياكريم دي مقابلة تقابلني بيها !! انا موحشتكش ولا ايه !!
كريم: اخلصي يامريم وقولي جاية عاوزة ايه
مريم: مش هتقولي اتفضلي ولا ايه !!
كريم بنفاذ صبر: اتفضلي ..اتفضلي يامريم
مريم: مكنتش فاكرة إن قلبك قاسي اوي كدة
كريم: تحبي تشربي ايه !!
مريم بضيق: شاي كويس
كريم: تمام ..عن اذنك
٭٭٭٭٭٭ صباح وحيد ٭٭٭٭٭٭
منال: مالك ياحسام فيك ايه !!
حسام: مفيش انا كويس ماتقلقيش عليا
منال: مقلقش ازاي بس انت مش شايف انت عامل ازاي !!
حسام: شوية مشاكل في حياتي وفي الشغل بس ماتشغليش بالك انتي
منال وتمسك يديه بإبتسامة: ومش من حقي أسألك ولا اعرف ايه المشاكل دي !!
حسام: من حقك كل حاجة بس انا مش عاوز اضايقك
منال: اومال انا حبيبتك وخطيبتك ازاي وقريب هبقي مراتك يعني المفروض اكون عارفة كل حاجة عنك والمفروض ابقي معاك في كل حاجة وفي الوحش قبل الحلو وفي الحزن قبل الفرح زي ماحبيتك وانت مبسوط يبقي لازم احبك وانت زعلان وفيك مشاكل الدنيا برضو لازم ابقي معاك في كل لحظاتك السيئة والسعيدة والا كدة مستاهلش اني اكون مراتك ولا اشيل اسمك
حسام ويقبل يديها: انتي اكبر نعمة في حياتي ربنا رزقني بيها ربنا يخليكي ليا يارب
منال: ويخليك ليا يارب ..ومتشيلش هم اي حاجة ربنا موجود يدبرها من عنده ماتقلقش لأن حياتك مش في ايد إنسان هو أللي بيرتبها عشان تخاف إنما دي في ايد ربنا فلازم تبقي مطمن لاختياراته ليك
حسام: ونعم بالله ..ونعم بالله
٭٭٭٭٭٭٭ صباح وحيد٭٭٭٭٭٭٭
كريم: يعني بقالك ساعة قاعدة وماقولتيش جاية ليه ولا عاوزة ايه
مريم: انا كنت فاكرة اني وحشتك زي مانت وحشتني واول أما تشوفني هتاخدني في حضنك وتعوضني عن ايام بعدك عني
كريم: ومين أللي كان سبب في البعد دة !! انا ولا انتي !!
مريم: خلاص عرفت اني كنت غلطانة وراجعة ومعترفة بغلطي اعمل ايه تاني !! دة ربنا بيسامح احنا مش هنسامح !!
كريم: جيتي متأخر .. متأخر اوي يامريم ..استنيتك كتير تيجي ومجتيش لحد اما الزعل اكل حبك في قلبي وسيطر علي كل قلبي ومخلاش حبك باين منه مش قادر اسامحك ولا قادر انساكي بتعذب في بعدك وبتعذب في قربك برضو مبقتش عارف ايه أللي بيحصلي ولا آخرته ايه ..بشوفك بيبقي نفسي أجري عليكي واخدك اخبيكي جوة حضني بعيد عن عيون الناس كلها واقول انك ملكي وليا انا وبس وفي نفس الوقت بخاف اعمل كدة لتعوريني وتكوني بالنسبالي شوك يهري جسمي بمجرد قربي منه .. قلبي عاوزك ورايدك وعقلي رافضك وفي صراع بينهم وانا متعذب مابين قلبي الملهوف عليكي وبين عقلي أللي رافض حتي قربك من بعيد
مريم بدموع: كل دة جواك كل دة شايله مني وانا اقول مش معقول يقعد الفترة دي كلها من غير مايسأل ولا يطمن عليا اتاريك شايل مني وساكت ودة اللي خلاك ماتسألش عليا الفترة دي كلها ..بس انا كمان مكنش سهل عليا أللي حصل ولا أللي شوفته زي مانت بالظبط مش سهل عليك بعدي وكلامي أللي وجعك انا كمان مكنش سهل عليا اشوف جوزي وحب عمري متجوز عليا فجأة كدة لا وتيجي تهددني لحد هنا بكل بجاحة انها مضربتكش علي ايدك عشان تتجوزها
كريم: لو كنتي بتحبيني بجد زي مابتقولي مكنتيش صدقتي عني حاجة ولا كنتي صدقتي اني اتجوز عليكي اصلا لو مكنش عندك شك ١٪ في حبي ليكي مكنتيش صدقتي إنما انتي شكيتي في حبي ليكي.. وكمان لانك انتي عارفة أنا عملت ايه عشانك وعشان اتجوزك وتبقي معايا وعارفة انا حاربت اد ايه واتحديت الدنيا كلها عشانك فمش بعد دة كله اتجوز عليكي ومن وراكي
مريم: غصب عني انت ليه مش عاوز تحس بيا وتفهم أنه غصب عني كنت عاوزني ابقي هادية ازاي وانا شايفة قسيمة جواز ليك معاها المفروض أما اشوف دة مطلوب مني اعمل ايه !! اي واحدة مكاني كانت هتعمل زيي واكتر مني كمان ..قولت يمكن عملت كدة عشان الخلفة وانت من حقك يكون ليك اولاد بس كنت تعرفني مش توجعني كدة كنت قولي الحقيقة مش تخدعني كنت تصبر عليا احنا مش بقالنا كتير متجوزين والدكاترة قالوا إنها مسألة وقت مش اكتر
كريم: لو بتحبيني بجد مكنتيش صدقتي وكنتي رديتي عني لو كنتي بتثقي فيا وفي حبي ليكي مكنتيش صدقتي ..وانا قولتلك قبل كدة انا المهم عندي انتي وبس ولو علي العيال لو مش من منك فانا مش عاوز وانتي عارفة الكلام دة كويس ومتاكدة منه يبقي ازاي بقي اروح اتجوز عشان اخلف !!
مريم: انا كنت ساعتها متلغبطة ومش عارفة احسب تصرفاتي ..لو انت في شغلك وجاتلك مكالمة تليفون اني مع واحد قاعدة معاه وبعتولك صور كنت هتعمل ايه !!
كريم سكت ومعرفش يرد فأكملت مريم: سكتت ليه ماتتكلم
كريم: بس بعد كدة أما اهدي واسمعك اكيد هعرف الحقيقة إنما انتي مدتيش فرصة لنفسك انك تسمعي ولا تصدقي ودة اكدلي انك مش عاوزاني وزي ماتكوني كنتي مستنية الفرصة لأن اللي بيحب بيهدي ويفكر وبيسمع ومش بس كدة لا دة كمان بيخترع مبرر لنفسه عشان بس ياكد لنفسه إن الشخص اللي بيحبه مستحيل يعمل فيه كدة وبيسمع منه عشان يتشعلق باي قشاية حتي لو كدب بس عشان ميخسروش دة أللي بيحب بجد وانتي كل تصرفاتك وكل كلامك قالت عكس كدة مدلتش علي الحب حاولت اتعلق حتي لو ب1٪ بس برضو مالقتوش واكدلي فعلا مش كله هيستحملك في أصعب اوقاتك ولا كله هيصدقك ويفضل معاك
مريم ببكاء: غلطت وعرفت غلطي وراجعة اهو بعتذرلك وبقولك سامحني واني لسة بحبك واتعلمت من غلطتي
كريم: كان نفسي ..كان نفسي اقدر اسامحك بس مش قادر كل أما بشوفك بفتكر كل كلامك ليا حتي لو قدرت ورجعنا لبعض هيفضل في حاجز بينا وهيفضل الحاجز دة موجود مش هنعرف ولا نعديه ولا نكسره .. أللي وجعني منك مش انك مشيتي أللي وجعني كلامك حبي أللي كنت بشوفه في عينيكي فجأة اتحول لكره ومابقتش شايفه كلامك إنك مش طايقاني ولا طايقة تبصي في وشي ولا طايقة العيشة معايا جيت علي نفسي وعلي كرامتي كتير عشانك عشان اللحظة دي لكن انتي مقدرتيش دة ودوستي اكتر ودمرتيني بأفعالك وكلامك ..فاكرة قولتلك ايه ساعتها !! فاكرة !! قولتلك مش هطلقك إلا أما اكشفلك الحقيقة عشان يوم أما تعرفي الحقيقة واطلقك اكون اخر حاجة سايبهالك مني حاجة حلوة واكون سايبلك عني صورة حلوة زي اول ماعرفتيني بالظبط ..مكنش ينفع اجي علي كرامتي اكتر من كدة .. واحايل فيكي شهر ..شهر وانا بقنعك بالحقيقة واني ماليش ذنب في كل اللي بيحصل دة وزيي زيك شهر وانا بقولك بلاش تدي لحد فرصة أنه يوقع بينا وانتي ولا كان فارق معاكي ولا علي بالك كنت مستني منك اي رد فعل يثبت حبك ليا زي مابتقولي لكن أللي طلع منك كله كان بيقول انك عمرك ماحبتيني ..قولتيلي كلام يوجع صعب لأي راجل ينساه ومع ذلك اتحملت لحد مانتي اختارتي النهاية ومكنش ينفع اقلل من نفسي اكتر من كدة بعد كلامك آخر مرة ليا
فلاش_باك
كريم: مريم عشان خاطري خلينا نتكلم شوية المفروض انك هديتي شوية
مريم: نتكلم !! نتكلم في ايه !! احنا مابقاش في بينا كلام عشان نتكلم فيه اصلا .. أرجوك بقي طلقني
كريم: لا فيه بينا كلام وفي بينا حب وعيشرة وايام وحاجات حلوة كتير
مريم: كان زمان ..كان زمان قبل ماتتجوز عليا وتخوني وانت قتلت دة كله جوايا ..انا هتطلق منك مهما كان التمن هتطلق ومش هرجعلك
كريم بعصبية: وانا مش مطلقك وابقي وريني هتعملي ايه ولا هتطلقي ازاي
مريم: هرفع عليك قضية خلع وهكسبها وهتطلق برضو
كريم: لو تقدري تعملي كدة ابقي اعملي
مريم بعصبية: انا بكرهك ..بكرهك ولا طايقة اعيش معاك ولا طايقة ابص في وشك انت ايه معندكش دم ولا بتحس !! بقولك مش عاوزة اعيش معاك خلي عندك دم بقي وطلقني ..هتعيش مع واحدة مش عاوزاك !! معندكش دم كدة !! مانت لو راجل تطلقني ولو عندك كرامة تطلقني وماتعيش معايا غصب عني لكن انت معندكش كرامة ولا دم ولا رجولة حتي
كريم بكسرة: تمام ..تمام يامريم انا مش هرد عليكي دلوقتي إنما افعالي ومعرفتك الحقيقة هما أللي هيردوا ..وبالنسبة للطلاق هطلقك ومش هعيش معاكي غصب عنك بس مش دلوقتي أول أما الحقيقة تبان ورقتك هتكون عندك عشان تكون اخر حاجة مني سايبهالك صورة كويسة عني وحطي في اعتبارك مادام طلقتك مستحيل ارجعك تاني مهما حصل لأن دة قرارك وانا مقدرش اجبرك علي حاجة ..وكمان عشان انا مش راجل ومعنديش لا دم ولا كرامة وانا مقبلكيش تعيشي مع واحد بالمواصفات دي ..عن اذنك يامريم هانم
#باك
كريم: كسرتيني بكلامك ساعتها وقولتلك لو حصل وطلقتك مش هرجعك حتي لو ايه كنتي مدية دماغك للشيطان وكلام الناس وماحاولتيش تفكري بدماغك كنت منتظر منك اي رد فعل يثبت حبك كنت منتظر منك تتحدي الدنيا كلها عشاني زي مانا عملت مكنش فارق معايا حاجة غيرك .. كلمة ..كلمة واحدة كنت مستنيها منك كنت مستني تقفي معايا في أصعب اوقاتي زي ماكنتي معايا في اسهل اوقاتي بدل ماتقفي جمبي ومعايا كنتي ضدي ..جاية دلوقتي ليه بقي !! عملتلك اللي عاوزاه مالكيش حاجة عندي تاني بقي خلاص دة كان قرارك وانا احترمته ومن حقك تتحمليه لوحدك نتيجته
مريم كانت منهارة من البكاء ومشيت من غير ولا كلمة وهي منهارة ..وكريم سند علي الباب بضعف: انا آسف .. آسف يامريم بس كان لازم اعمل كدة عشان بعد كدة متتسرعيش وتطلبي الطلاق ..وحشتيني وكان نفسي اخدك في حضني بس مقدرتش لأن ظهر قدامي كل الكلام أللي قولتهولي ومقدرتش أنساه ..
"ما اصعب الحب حقًا ماذا نفعل لكي نحب دون وجع !! ماذا !! فهل يوجد حب بدون وجع !! ام لانحب ابدا !! هل للحب ان ينتصر علي الوجع !! ام الوجع هو الذي يقتل الحب ولم يكن موجودا !!
ياتري من الاقوي الحب ام الوجع !!"
٭٭٭٭٭ صباح وحيد ٭٭٭٭٭٭
ادهم بإبتسامة: مساء الخير ..
سميحة بإبتسامة: حمد لله علي سلامتك ياحبيبي احضرلك الغدا بقي !!
ادهم: تعالي ياماما بس قبل الغدا عاوز اكلمكم في موضوع مهم
محمود: خير يابني
ادهم: خير ..خير إن شاء الله يابابا ..انا دلوقتي جبت الشبكة خلاص وكل حاجة تمام ياسمينا حفلة التخرج بتاعتها آخر الأسبوع دة إن شاء الله نهاية الأسبوع أللي بعده إن شاء الله الخطوبة علطول
سميحة بفرحة وتحتضنه: الف مبروك يابني ربنا يتمملك علي خير يارب أنا الفرحة مش سيعاني بجد
محمود بسعادة: إن شاء الله يابني مبروك وربنا يتمم بخير يارب ويسعدك
ادهم: ربنا يخليكم ليا يارب
سعدية: الغدا جاهز اتفضلوا
سميحة وهي تذهب إليها وتحتضنها بحب: باركي لادهم يادادة خطوبته نهاية الأسبوع أللي بعد الجاي إن شاء الله
سعدية بسعادة وفرحة: الف مبروك يابني وربنا يفرحك يارب
ادهم وهو يذهب إليها ويقبل رأسها: الله يبارك فيكي يادادة وربنا يخليكي لينا يارب ..وجهزي نفسك بقي عشان تحضري إن شاء الله
سعدية بسعادة: إن شاء الله يابني سيبها بظروفها
ادهم: إن شاء الله بس لازم تكوني موجودة عشان اتشرف بوجودك
سعدية: ربنا يخليك يارب يابني ويسعدك
سميحة بسعادة: ايه يادادة في ايه بقي امسحي دموعك دي وخلينا نفرح ..وبعدين أدهم بقي خد الحب كله ولا ايه !! أما اروح الحق اعزم الناس بقي
٭٭٭٭٭٭ صباح وحيد ٭٭٭٭٭٭
ملك: طيب وبعدين انتي ناوية تعملي ايه !!
ياسمينا: مش عارفة والله ياملك متلغبطة
ملك: لا لازم تعرفي مفيش حاجة اسمها معرفش
ياسمينا وبصت في عينيها: خايفة اقولك بحبه اكون اتعاطفت معاه وأنه مجرد صعب عليا لأني مريت بالوجع دة .. واكون سبب انا كمان في جرحه لتاني مرة بيتجرح في حياته وخايفة اقولك مش بحبه واسيبه اتعذب في بعده ولا احس بالندم وتأنيب الضمير اني علقته بيا وسيبته الأسباب واحدة باختلاف بدايتها بس
ملك: ليه بتتوقعي الوحش ماتحاولي تتوقعي الحلو كدة ..اديله فرصة يمكن يبقي نصيبك الطيب أللي ربنا بيعوضك بيه ..وصلي استخارة كدة وادعي ربنا يقربلك الخير
ياسمينا: يارب ..يارب عشان مش هتحمل وجع تاني
ملك: خير إن شاء الله ومفيش ولا وجع ولا حاجة
٭٭٭٭٭٭٭ صباح وحيد ٭٭٭٭٭٭
كريم: ايه ياهند
هند ببكاء شديد: ألحق مريم ياكريم
كريم بخوف وحس قلبه وقف: مالها مريم ياهند وهي فين دلوقتي وايه أللي حصل !!
هند ببكاء: معرفش ايه اللي حصل هي دلوقتي في مستشفي .....
كريم: طيب اقفلي وانا جاي حالا
"وبعد ربع ساعة تقريبا كان قد وصل كريم للمستشفي التي بها مريم"
كريم بقلق: ايه ياهند مالها مريم وايه أللي حصل فهميني !!
هند بعياط: مش عارفة ياكريم والله انا لقيتها بتكلمني ومنهارة وعاوزاني اروحلها في المكان اللي كانت فيه شوية ولقيت تليفونها بيرن وحد أللي بيكلمني وبيقولي أنها أغمي عليها في الشارع ..انا سمعت كدة واتجننت مبقتش عارفة اعمل ايه لحد اما روحت للمكان أللي كانت فيه ونقلتها علي المستشفي بسرعة وكلمتك
كريم بقلق: خير ..خير .. إن شاء الله خير
هند بعياط: يارب ..يارب ..ادعيلها .. ادعيلها ياكريم تقوم بالسلامة مريم بتحبك
كريم: إن شاء الله تقوم بالسلامة ..هي بقالها اد ايه جوة !!
هند: بتاع نص ساعة كدة ..وقاطع حديثهما خروج الدكتور فاتجهوا إليه مسرعين
هند بعياط: خير يادكتور طمني مريم مالها وايه اللي حصلها دة !!
الدكتور: اهدي ..اهدي هي كويسة جدا ماتقلقيش
هند: اومال ايه اللي حصلها دة ليه !! انا عاوزة ادخل اشوفها
الدكتور: لا مش هينفع تدخلي دلوقتي ماتقلقيش هي بخير ..بس هو فين جوزها ؟!
كريم بقلق: انا ..انا جوزها
الدكتور: مبروك المدام حامل في شهرين
كريم وهند اتصدموا وبصوا لبعض فتحدث كريم بصدمة وذهول: حامل !!
الدكتور: اه ..ومحتاجة الراحة التامة ومش الحركة الكتير عشان الحمل يستقر وميكونش في خطر عليها وعلي البيبي ..وهكتبلها علي شوية أدوية مقويات تقوي المناعة عندها عشان ضعيفة .. وياريت كمان تبعدوها عن أي توتر واي مشاكل واي زعل عشان مش كويس عشانها وعلي أللي في بطنها .. وألف مبروك وربنا يقومهالكم بالسلامة يارب ويطمنكم عليها
كريم ومازال مصدوم: الله يبارك في حضرتك يادكتور وشكرا جدا لحضرتك
وبعد أن ذهب الدكتور ذهبت هند لكريم: ايه ياكريم مالك !! انت مش مبسوط ولا ايه !!
كريم: لا انا مصدوم بس حامل ازاي !!
هند: استغفر ربك ياكريم انت هتعترض ولا ايه !!
كريم: استغفر الله العظيم
قاطعهم حديث الممرضة وهي تقول: فين استاذ كريم !!
كريم بلهفة: انا .. انا كريم في حاجة !! مريم كويسة !!
الممرضة: اه هي كويسة ماتقلقش بس هي عايزاك وعمالة بتردد اسمك تقدر تدخلها
"أومأ كريم برأسه للممرضة ثم دخل لغرفة مريم يراها راقدة"
مريم بتعب: كريم أنت هنا !!
كريم: اه ياحبيبتي انا هنا معاكي
مريم: عرفت منين إن أنا هنا ولا مين قالك وجيت ازاي !!
كريم: مش مهم اي حاجة دلوقتي المهم إن أنا هنا دلوقتي
مريم: تعالي ..تعالي ياكريم واقف بعيد ليه !!
كريم وقرب منها: سلامتك ياقلب كريم
مريم بتعب ومسكت يديه بين يديها: انا اسفة ع.. قاطعها كريم: هش ماتتكلميش في أي حاجة دلوقتي الدكتور قال غلط عليكي الإرهاق
مريم بتعب: لازم اتكلم ولازم تسمعني
كريم: انا اهم حاجة عندي دلوقتي هي سلامتك
مريم بتعب: بتحبني !! بتحبني ياكريم !!
كريم وهو يقبل يديها: ولا عمري عرفت احب حد غيرك
مريم بفرحة ممزوجة بتعب: الدكتور قالي اني حامل
كريم: أيوة ياحبيبتي ولازم تحافظي علي نفسك لحد اما تقومي بالسلامة وماتتعبيش نفسك عشان ابننا اللي في بطنك
مريم: حاضر ..حاضر ياحبيبي
كريم: مبروك ياقلب كريم
مريم: الله يبارك فيك ياحبيبي ..اخيرا ..اخيرا ياكريم هيبقالي حتة منك ويبقي شبهك واكون بحبك مرتين اخيرا حلمنا بيتحقق
كريم: ربنا كريم ..ربنا كريم اوي
مريم: بس كان نفسي افرح في ظروف احسن من كدة كان نفسي افرح من قلبي
كريم: احنا قولنا ايه بقي !! بلاش كلام وبلاش نتعب نفسنا
مريم: حاضر ..حاضر خلاص
كريم: انا هقوم بقي واسيبك عشان ترتاحي شوية
مريم: خليك معايا شوية
كريم: هجيلك تاني بس انتي لازم ترتاحي شوية ..وكمان عشان هند واقفة برة لوحدها هتجنن وتدخلك تطمن عليكي فهدخلهالك
مريم: ياحبيبتي تلاقيها اتخضت جامد
كريم: هقوم انا دلوقتي واخليها تدخلك
"خرج كريم لهند وكانت هند جريت عليه"
هند: ايه عاملة ايه !! كويسة !!
كريم: اهدي ..اهدي هي كويسة وعايزاكي ادخليلها
هند: حاضر
كريم: خلي بالك منها ياهند وماتخليهاش تتكلم في حاجة
هند: ماتخافش دي في عنيا ..بس انت رايح فين خليك معاها شوية
كريم: رايح اجيبلها اي حاجة تاكلها تلاقيها ماكلتش حاجة من الصبح ..عاوزة حاجة اجبهالك وانا جاي !!
هند: ربنا يخليك سلامتك
كريم: تسلمي ..هروح انا بقي اجيب الاكل عشان ناكل كلنا
"هند ودخلت لمريم بعد أن ذهب كريم"
هند بإبتسامة: حمد لله علي سلامتك يا احلي مامي
مريم بتعب: الله يسلمك ياهند
هند: مبروك ياحبيبتي وربنا يقومك بالسلامة يارب
مريم بإبتسامة: الله يبارك فيكي ياحبيبتي ..تعالي ياهند اقعدي جمبي
هند وذهبت إليها: مش عاوزة اتعبك بس
مريم: انتي اللي كلمتي كريم ياهند ييجي !!
هند وهي بتحاول تتوه: قوليلي بقي نفسك في ولد ولا في بنت !!
مريم بتعب: ماتوهيش ياهند وردي عليا انتي اللي قولتيله وكلمتيه ييجي !!
هند: مريم احنا قولنا ايه بقي !! بلاش كلام وانتي تعبانة الدكتور قال متتعبش نفسها
مريم: عشان خاطري ياهند جاوبيني وريحيني
هند بقلة حيلة: أيوة ..أيوة انا مريم مكنش ينفع مكلموش كان لازم يعرف انك حامل ولا كنتي ناوية تخبي عليه بعد ماعرفنا !! وكمان عشان مكنتش عارفة اعمل ايه ولا اتصرف ازاي فلقيت نفسي بكلمه
مريم بتعب: لا طبعا اكيد كنت هقوله ..بس كان نفسي يجيلي في ظروف احسن من كدة يكون جاي ليا انا من نفسه مش عشان تعبانة فاضطر أنه ييجي عشان دة الذوق
هند: كريم لسة بيحبك يامريم وانتي عارفة كدة هي بس مسألة وقت ماللي حصل مكنش قليل برضو
مريم: انا عارفة إن أللي حصل مكنش قليل .. وكريم مش بيحبني زي مانتي فاكرة كريم كرهني خلاص ووجوده هنا تأدية واجب مش اكتر وعشان ابنه أو بنته اللي في بطني إنما مش عشاني
هند: محدش كان يعرف انك حامل انتي نفسك مكنتيش تعرفي يامريم يبقي هو هيعرف منين !! كريم لسة بيحبك وهو هنا عشان بيحبك لأنه لو مش بيحبك مكنش زمانه هنا دلوقتي لانه ميعرفش انك حامل اساسا
مريم: انا روحتله ..روحتله ياهند لحد عنده واعتذرتله وطلبت منه يرجعني وهو رفض يبقي بيحبني فين بقي !!
هند: طب عشان خاطري خلاص كفاية كلام عشان غلط عليكي وأما تبقي كويسة نبقي نتكلم في الموضوع دة
٭٭٭٭٭ صباح وحيد ٭٭٭٭٭٭٭
شاكر: مساء الخير ..
سوزان وهي تنهض: حمد لله علي السلامة ..هحضرلك الغدا
شاكر وهو يمسكها: مالك في ايه !!
سوزان: مفيش انا كويسة ..هحضرلك الغدا
شاكر: سيبي الغدا دلوقتي مش عاوز اكل وقوليلي مالك
سوزان: مفيش ياشاكر صدقني انا كويسة تعبانة شوية بس وسما تعبتني النهاردة
شاكر: مع اني مش مصدقك بس ماشي مش هضغط عليكي بس وقت ماتحبي تحكي انا موجود
سوزان: ربنا يخليك ليا
شاكر: ويخليكي ليا ..فين سما ومروان صحيح !!
سوزان: مروان راح يقعد مع ماما يومين كانت هنا وشبط فيها خدته يقعد معاها يومين ومن ساعتها سما مابطلتش عياط لحد اما نامت بقي
شاكر: مفيش مشكلة ..وسما بتعيط عشان مروان راح وسابها يعني !!
سوزان: اه يا سيدي مكنتش عاوزاه يروح مانت عارف هما متعلقين ببعض ازاي
شاكر بابتسامة: ماودتهاش معاه ليه مادام كدة
سوزان: اوديها فين بس ياشاكر دي هتطلع عينيهم هناك مانت عارف سما مبتقعدش مع حد ومبتسبنيش
شاكر: لا كانت هتقعد مادام مروان معاها
سوزان: لا ياشاكر مينفعش كفاية مروان علي ماما مش هيبقوا الاتنين وبعدين سما مش هتقعد هي بس قعدت تعيط شوية وبعدين نامت
شاكر: شكلها صحيت قومي بصي عليها كدة
سوزان: اه صحيت هقوم اشوفها ..وذهبت سوزان وأتت بسما تحملها
شاكر وهو يتناولها منها بابتسامة: قلب بابا وحشتيني
سما: وانت تمان (كمان)
شاكر: تاكلي مع بابا بقي !!
سما: لا مس عاوزة اتل (مش عاوزة اكل)
شاكر: ليه كدة !! مش هتاكلي مع بابا حبيبك يعني !!
سما: لا مس عاوزة وبعدين سيبني بقي دلوقتي عسان زعلانة (لا مش عاوزة وبعدين سيبني بقي دلوقتي عشان زعلانة)
شاكر: مين مزعلك وانا اقطعهولك
سما وتنظر لسوزان وتشير إليها باصبعها: ماما
شاكر ونظر لسوزان: ماما !! عملتلك ايه ماما زعلك !!
سوزان: انا !! انا ياسما زعلتك !!
سما: اه انتي عسان خليتي ملوان يمسي ومس خلتيني الوح معاه (عشان خليتي مروان يمشي ومش خلتيني اروح معاه)
سوزان: وكنتي هتسيبي ماما حبيبتك لوحدها !!
شاكر: طيب قوليلي انا ماما عملت ايه
سما: عسان خلت ملوان سابني ومسي وماما سابته يمسي وانا تولتلها انا هتول بابا أما ييتي بس هي بلضو مس سمعت التلام (عشان خلت مروان سابني ومشي وماما سابته يمشي وانا قولتلها أنا هقول بابا اما ييجي بس هي برضو مش سمعت الكلام)
شاكر: وانتي كنتي عاوزة تروحي معاه !!
سما: اه كنت عاوزة الوح وماما مالضيتش (اروح وماما مارضيتش)
شاكر: وكنتي هتسيبي بابا حبيبك لوحده !!
سما: لا ماما معات اهي (معاك)
شاكر: يعني انتي مش عاوزة تقعدي معايا طب حاسبي بقي كدة انا زعلان منك خلاص
سما: لالا خلاث يابابا ياحبيبي مس تزعل انا خلاث عايزات انت ومش عايزة ملوان (خلاص يابابا ياحبيبي مش تزعل انا خلاص عايزاك انت ومش عايزة مروان)
شاكر وهو يقبلها: انا مقدرش ازعل منك ياقلب بابا ..ونظر لسوزان: حضري الغدا ياسوزان عشان نتغدي بقي
سوزان بإبتسامة: حاضر
٭٭٭٭٭٭ صباح وحيد ٭٭٭٭٭٭
وفي صباح اليوم التالي
كريم بهمس: هند ..هند
هند بخضة: ها نعم في ايه !!
كريم بنفس الهمس: هند فوقي انا كريم
هند: كريم في ايه مريم كويسة !!
كريم: تعالي نتكلم برة عشان ماتصحاش
هند: حاضر اطلع انت وانا هغسل وشي كدة واجي وراك
"ذهب كريم لانتظار هند بالخارج وبعد لحظات قليلة خرجت هند وذهبت إليه"
كريم: انا اسف اني صحيتك أو خضيتك
هند: لالا ماتقولش كدة مفيش حاجة خالص كدة كدة كان لازم اصحي عشان الشغل
كريم: شغل !! شغل ايه ياهند مش هينفع تروحي الشغل وانتي كدة انتي شكلك تعبانة ولازم ترتاحي وكمان مانمتيش كويس روحي نامي وارتاحي شوية وبعدين ابقي انزلي الشغل بكرة
هند: هكلم أدهم كدة اقوله اني مش هقدر اجي النهاردة
كريم: تمام ..قومي كلميه كدة وانا هدخل كدة ابص علي مريم
هند: خلاص تمام ماشي
"وذهب كريم لحجرة مريم للاطمئنان عليها وذهبت هند لتهاتف أدهم"
هند: الو ..صباح الخير يا أدهم
أدهم: صباح الخير ياهند ..متصلة بدري ليه كدة في حاجة ولا ايه !!
هند: انا آسفة لو كنت ازعجتك
أدهم: لا ولا إزعاج ولا حاجة
هند: طيب كنت بكلمك عشان اقولك اني احتمال مقدرش اجي الشغل النهاردة
أدهم: ليه كدة حصل حاجة ولا ايه !!
هند بحزن: اه مريم صحبتي كان اغمي عليها في الشارع ونقلناها مستشفي ومن امبارح وانا معاها ومنمتش غير ساعتين بس
أدهم: الف سلامة عليها ..خلاص تمام ماشي مفيش مشكلة أما تبقي كويسة اي وقت انزلي
هند: الله يسلمك ..تسلم يارب يا أدهم ربنا يخليك يارب ..اسيبك انا بقي عشان معطلكش
كريم وكان خرج: يلا روحي انتي بقي عشان تلحقي ترتاحي كتر خيرك
هند: حاضر خلي بالك منها ياكريم ومتمشيش وتسيبها لوحدها
كريم: ماتخافيش انا معاها
هند: حاضر هدخل اطمن عليها وامشي
كريم: اه طبعا اتفضلي
٭٭٭٭٭٭ صباح وحيد ٭٭٭٭٭
أدهم وهو يدخل لمكتبه وتلحقه سكرتيرته الخاصة: صباح الخير ياهدير لو عندك اي أوراق عاوزة تتمضي حضرهالي .. حالا وتكون علي مكتبي
هدير: حاضر يافندم تحت امرك ..تحب اجيب لحضرتك مج النسكافيه بتاعك ولا مش دلوقتي !!
أدهم وهو يمسك سماعة التليفون ليتحدث: أيوة ياريت ياهدير لو سمحتي من فضلك ..ولو في اي كلام في الشغل اجليه شوية لحد اما أفطر
هدير: تحت امرك يافندم ..عن اذنك
أدهم وهو يتحدث في التليفون: أيوة بقولك ايه تعاليلي علي مكتبي حالا ..ثواني والاقيكي قدامي ..يلا سلام
"بعد لحظات قليلة سمع صوت طرقات علي الباب فأذن بالدخول"
ياسمينا: ايه في ايه !!
أدهم وهو يضع الطعام علي طرابيزة صغيرة بعيد عن مكتبه: يلا تعالي اقعدي افطري معايا قولت نفطر سوا النهاردة وعملت حسابك معايا في الفطار
ياسمينا: بألف هنا بس انا فطرت في البيت قبل مانزل متعودة بفطر علطول
أدهم: طب اقعدي كلي اي حاجة كانك فطرتي معايا
ياسمينا ومحبتش تكسفه: حاضر بس هاكل حاجة بسيطة خالص
أدهم وهو يتناول الطعام: حفلة تخرجك كمان يومين !!
ياسمينا: اه إن شاء الله ..هاتيجي صح !!
أدهم: اه طبعا إن شاء الله دة اكيد
ياسمينا وهي تنهض: انا كلت اهو عشان ماتزعلش عن اذنك بقي هروح اكمل شغلي
أدهم: انتي ماكلتيش حاجة ..واعملي حسابك الغدا النهاردة عليا
ياسمينا: لالا غدا وفطار ..لا مش هينفع
أدهم: علي اساس انك فطرتي اوي صح !! المهم معاد الغدا هنتغدي مع بعض ..يلا اتفضلي علي شغلك بقي
٭٭٭٭٭ صباح وحيد ٭٭٭٭٭
أفاقت مريم وهي تفتح عينيها وتحاول التحرك بهدوء فشعرت بثقل علي جسدها لتجد وكأن يديها مكتفتين لاتستطيع التحرك فهناك من يتمسك بيديها بقوة فهو كريم فنظرت له بسعادة ممزوج معها الحب وهي تضع يديها الأخري علي رأسه الذي علي ذراعيها ويده الذي تمسك بيديها وكأنه يقول لاتتركيني ..ثم تحدث نفسها قائلة: وحشتني ..وحشتني اوي ياكريم واخيرا بقي هنحقق حلمنا ويبقي ليا ابن منك ويكون شبهك كدة وهكون بحبك مرتين ..انا فعلاً كنت مغفلة اني ضيعتك من ايديا وندمانة علي الغلطة دي بس اتعلمت خلاص ..بعدك عني علمني حاجات كتير كنت فاكرة أما ابعد عنك هقدر انساك سهل طلع بعدك عني اصعب اختبار ليا ..وكان بدأ كريم في الاستيقاظ وهي مازالت شاردة حتي شعرت بجسده يتحرك ويبتعد عنها بسرعة فتحدثت قائلة: مالك ياكريم في ايه !!
كريم بتوتر: مفيش ..انا آسف بس نمت غصب عني
مريم: وفيها ايه أما نمت !!
كريم: فيها اني مينفعش انام جمبك ولا ألمسك حتي لأنك انتي دلوقتي مش مراتي
مريم الكلمة وجعتها اوي بس حاولت تداري الوجع دة وقالت: بس كنت مراتك ودلوقتي مش مراتك بس ام ابنك
كريم: مهما كان انتي دلوقتي محرمة عليا مينفعش أقرب منك كدة بس كنت نمت غصب عني من غير ما ادري بنفسي ولقيت نفسي ماسك ايدك
مريم بوجع: محرمة عليك !! هو انت لسة مش عاوز تردني ليك حتي بعد ماعرفت اني حامل !!
كريم: بلاش كلام في أي حاجة دلوقتي عشان ماتتعبيش
مريم بعياط: يهمك صحتي اوي وخايف عليا !!
كريم ويحاول التظاهر بالبرود: اكيد طبعا مش هتبقي ام ابني !! وكمان الزعل والعصبية غلط عليكي دلوقتي عشان الحمل
مريم بعياط: انت خايف علي ابنك اللي في بطني إنما مش خايف عليا انا ..وكل أللي بقي بيني وبينك هو اني ابقي ام ابنك وبس !! مفيش اي حاجة تاني بينا !! عاوزني ارتاح ازاي وانا راحتي بتكون في قربي منك وانت بعيد عني
كريم: لو سمحتي يامريم أجلي الكلام في أي حاجة دلوقتي لحد اما تبقي كويسة عشان غلط عليكي
مريم: وهبقي كويسة ازاي وانا بعيد عنك !!
كريم: زي ماكنتي كويسة وانتي بعيد عني الفترة دي كلها أو كنتي هتبقي كويسة وانتي بعيد زي ماكنتي طالبة وعاوزة ..وتركها وذهب تبكي بشدة من شدة ألمها فقلبها يؤلمها بشدة ..أما هو فذهب من أمامها لانه شعر بأنه بدأ أن يضعف أمامها وأمام دموعها الذي تقتله وتمزق قلبه فأراد الانسحاب بسرعة قبل أن يحدث شيء ولم يستطع أن يتمالك نفسه أمامها وأمام دموعها ..
"الحب عذاب ..نعم .. هل عذاب !! نعم؛ أنه عذاب للقلوب الذي تحب حقًا ..عذاب للقلوب الذي عشقت ولكن الحياة فرقتهم فلم يستطيعوا النسيان عذاب لمن اعتقد أنه ينسي ولم يستطع أن ينسي عذاب لمن احب وترك من يحب ..فالحب ضعف المحب أمام المحبوب مهما كانت قوته"
٭٭٭٭٭ صباح وحيد ٭٭٭٭
سهير: السلام عليكم ..
سوسن بإبتسامة: وعليكم السلام ..ازيك ياأم ملك عاملة ايه !!
سهير بإبتسامة: الحمد لله انتي عاملة ايه واخبارك
سوسن: الحمد لله في نعمة نشكر ربنا
سهير: يارب دايما بالف خير
سوسن: يارب ياحبيبتي ليا وليكي وللجميع يارب
سهير: بقولك ايه بقي انا بكلمك عشان اعزمك علي خطوبة ياسمينا بنتي الخميس اللي بعد الجاي إن شاء الله ولازم طبعا تيجي تنورينا
سوسن بإبتسامة: الف مبروك وربنا يتمملها بخير يارب ويسعدها واكيد طبعا دي ياسمينا زي بنتي طبعا ولازم اجي طبعا إن شاء الله
سهير: تنوري الدنيا كلها والله ..انا قولت اعزمك بنفسي اهو عشان تيجي ومايبقاش ليكي حجة مادام مش بتخلينا نشوفك
سوسن بضحك: لا مقدرش معلش والله الفترة أللي فاتت دي كانت غصب عني بس شوية مشاكل كدة بس الحمد لله
سهير: خير إن شاء الله ربنا ييسرلك كل امورك يارب
سوسن: يارب احنا وانتي
سهير: المهم بقي مستنياكي تنورينا وتجيبي والد احمد وتنورونا
سوسن: اكيد طبعا عنينا ربنا يخليكي يارب وربنا يطمنك عليها يارب
سهير: اللهم أمين يارب تسلمي يارب ياحبيبتي
سوسن: وسلميلي علي ملك كتير الوحشة اللي مبتسألش عليا خالص دي غير كل فين وفين
سهير بضحك: الله يسلمك عنيا اول أما تيجي هخليها تكلمك علطول ماتزعليش منها هي غصب عنها الفترة دي بس مشغولة مع اختها بقي وكدة
سوسن: ربنا يخليهم لبعض يارب ويباركلك فيهم ويطمنك عليهم
٭٭٭٭ صباح وحيد ٭٭٭٭٭
ياسمينا: ايه يالول عاملة ايه !!
أمل: ياسو حبيبتي أنا تمام انتي اخبارك
ياسمينا: تمام ياحبيبتي ..بقولك ايه ماتحاولي تيجي كدة عاوزة نقعد ونتكلم واحكيلك علي حاجة
أمل: في ايه يابنتي !!
ياسمينا: اكيد مش هحكيلك في التليفون تعالي نقعد واحكيلك
أمل: تمام اديني ساعة كدة اكون خلصت شغل واعدي عليكي
ياسمينا: تمام مستنياكي ..خالتو عندنا علي فكرة
أمل: اه صحيح ماهي كانت قايلالي أنها هتجيلكم
ياسمينا: تمام خلصي وتعالي بقي ..انا لسة مخلصة شغل ولسة داخلة اهو
أمل: تمام ياحبيبتي اخلص علطول واجيلك
٭٭٭٭٭ صباح وحيد ٭٭٭٭
هند: ايه يامريومة عاملة ايه دلوقتي !! وفين كريم !!
مريم وهي تبكي: كريم مشي
هند وهي تجلس بجانبها وتلاحظ بكائها: ايه دة مالك في ايه !! وايه اللي حصل !!
مريم ببكاء وهي ترتمي بين أحضانها: كريم ..كريم ياهند
هند: اهدي بس وفهميني ماله كريم !!
مريم: كريم خلاص مابقاش يحبني ياهند ولا قادر ينسالي الماضي انا خسرته ..خسرته للابد ياهند
هند: بس اهدي وماتقوليش كدة كريم لسة بيحبك زي الاول واكتر كمان انتي ماشوفتيش كان خايف عليكي ازاي
مريم وهي تنهض: خايف عليا !! قصدك خايف علي ابنه أللي في بطني إنما مش عليا انا ..انا غلطت واتعلمت بس هو لسة برضو مش قادر يسامحني . .كريم ياهند ماكنش بيستحمل دمعة تنزل من عيني بكيت قدامه ولا أتأثر ولا اتحرك حتي ولا فارق معاه أللي كان الأول اول مايشوف دموعي يتجنن ..مكنتش عاوزة حاجة ياهند غير حضنه وحنيته في الايام دي مش عاوزة حاجة غيره وأنه يسامحني واتعلمت من الدرس كويس اوي ..انا مش قادرة اكمل حياتي من غيره ولا قادرة أنساه
هند: طيب ممكن تهدي وصدقيني كل حاجة هتبقي كويسة بس هي مسألة وقت مش اكتر وممكن كمان يكون اختبار من ربنا بيختبرك ويعرفك قيمة الحاجة أللي بين ايديكي ماهو الإنسان اما بيكون بين ايديه حاجة مابيحسش بقيمتها الا أما بتضيع منه أو بيحس أنها ضاعت منه ساعتها بس بيدرك اد ايه الحاجة دي كانت مهمة اوي بالنسبة ليه أما بيلاقي نفسه مش قادر يعيش في بعدها عنه .. لأن طول مالحاجة بتكون بين أيدينا مبنحسش بقيمتها بنبتدي نحس بقيمتها اما نحس اننا هنخسرها أو خسرناها ..مش هتعرفي قيمة الاكل أللي مش عاجبك إلا أما تجوعي اوي وماتلاقيش حاجة تاكليها ساعتها بس هتتمني أنه لو موجود عشان تاكليه
مريم: عندك حق وانا عرفت قيمة كريم اوي ياهند ..أما طلبت الطلاق كنت بموت جوايا الف مرة في الثانية مع كل مرة لساني بينطقها كنت بتدمر بس مكنتش شايفة قدامي من حبي فيه مابقاش مخليني مصدقة أنه ممكن يعمل كدة فيا عمري ماتمنيت اني ابعد عنه ولا اعيش من غيره
هند: اهدي ..اهدي ..وكريم بيحبك صدقيني حبه كان باين في عينيه وفي خوفه وقلقه عليكي حتي لو هو حاول يداري دة بس لازم تكوني انتي عارفة كدة ..هو مهما كان راجل برضو وأللي سمعه منك مكنش قليل فطبيعي يظهر قدامك بارد عشان كرامته واي حد مكانه كان هيعمل كدة واكتر
مريم: يارب ياهند يارب يكون لسة بيحبني ونرجع من تاني ..مش عاوزة حاجة غير أننا نرجع لبعض ونربي ابننا أللي جاي مع بعض
هند: إن شاء الله .. إن شاء الله ياحبيبتي بس ارتاحي انتي دلوقتي بقي
٭٭٭٭٭ صباح وحيد ٭٭٭٭
أمل: ها ياستي موضوع ايه المهم اللي عاوزة تكلميني فيه ومينفعش في التليفون !!
ياسمينا: قالي أنه بيحبني
أمل: هو مين دة !!
ياسمينا: ماتركزي معايا يا امل هيكون مين يعني أدهم طبعا
أمل بصدمة: بجد !! قالك أنه بيحبك !!
ياسمينا: انا اتصدمت زيك كدة بالظبط اول أما قالي
أمل: طيب وانتي ايه ناوية علي ايه ولا ناوية تعملي ايه ولا قولتيله ايه !!
ياسمينا: مش عارفة ..مش عارفة والله يا امل حاسة نفسي متلغبطة صراع مابين اني بدات احبه ومابين مش عاوزة اظلمه ولا اكون سبب في جرحه
أمل: ليه بس بتقولي كدة
"ياسمينا وقصت عليها الحديث بينهما"
أمل: طيب وهو محكلكيش ايه اللي حصل !!
ياسمينا: لا والله سألته وقالي اكيد هاييجي اليوم واحكيلك فمحبتش أسأل تاني علي حاجة زي كدة عشان مفتحش في جرح قديم وافكره بيه
أمل: ادي لنفسك فرصة واديه فرصة انتو الاتنين مجروحين وموجوعين زي بعض فممكن تكونوا دوا لبعض تعالجوا بعض لانكم عانيتوا من نفس الحاجة والألم فهتراعوا النقطة دي في علاقتكم مع بعض وكل واحد هيحافظ علي مشاعر التاني لانه جرب ومر بنفس التجربة فمش هيكون عاوز أنه يكون سبب في حاجة زي كدة عاني منها
ياسمينا: صح كلامك صح قررت اديه وادي لنفسي فرصة يمكن نكون علاج لبعض زي مابتقولي ..ادعيلي ربنا يقدملي الخير
أمل: إن شاء الله ياحبيبتي ربنا يقدملك الخير كله يارب
٭٭٭٭٭ صباح وحيد ٭٭٭٭
وبعد مرور يومان
في احدي القاعات تستمع ياسمينا إلي اسمها لتذهب إلي ذلك المسرح .. نعم فإنه اليوم حفل تخرجها ..بينما تجلس عائلتها وادهم سعداء بها بينما جعل سهير تبكي من شدة الفرحة بابنتها التي تكبر أمام عينيها وهاهي تتخرج من الجامعة الآن وحسين الذي تغمره سعادة كبيرة وهو يري ابنته في تلك المكانة وملك التي تشعر بفرحة كبيرة لرؤيتها اختها سعيدة إلي تلك الدرجة بينما كان يجلس أدهم وبداخله شعور مختلط من السعادة والفخر هل يكون قد احبها بالفعل !! ولكن ترك كل تلك الأفكار وهو يراها سعيدة إلي تلك الدرجة من السعادة ..وقد حان الوقت لتتحدث ياسمينا
ياسمينا بسعادة: السلام عليكم ..انا طبعا مبسوطة إن انا معاكم هنا دلوقتي وبشكر كل الناس الموجودة وكنت حابة اتقدم بالشكر لعيلتي اول ناس امي وابويا وملك اختي اكتر ناس وقفوا جمبي وشجعوني وحابة اقولهم لولاكم مكنتش وصلت للخطوة دي ولولا تعبكم معايا ووقفتكم معايا مكنتش عرفت احقق ولا اوصل لأي حاجة فالفضل يرجع ليكم من بعد ربنا وأنكم كنتم من أهم الأسباب في كل خطوة نجاح كنت بوصل ليها شكرا علي كل حاجة عملتوها معايا وشكرا لوقفتكم جمبي ومهما اقول مش هيوفيكم حقكم ولا هيوفي جزء من اللي كنتم بتعملوه وعملتوه معايا فحقيقي شكرا لوجودكم في حياتي .. وبشكر الدكاترة بتوعي علي مجهودهم معانا .. فقام الجميع بالتصفيق لها وسهير وحسين عيناهم لاتزال أن تخلو من الدموع وحديث ابنتهم عنهم ..وانتهي اليوم بسلام وفرحة من الجميع
٭٭٭٭٭ صباح وحيد ٭٭٭٭
أدهم: جهز نفسك بقي عشان خطوبتي الخميس الجاي إن شاء الله
حازم بسعادة: الف مبروووك ياحبيبي ربنا يتمملك علي خير يارب ..وربنا يجعلها نصيبك الطيب وعوض ربنا ليك بعد كل التعب أللي شوفته في حياتك
أدهم: يارب ادعيلي
حازم: إن شاء الله ..المهم بلاش تيجي عليها ولا تكون سبب في وجعها ولا جرح قلبها انت جربت وعارف يعني ايه جرح القلب ووجع الحب فبلاش تكون سبب في كدة
أدهم: انا شكلي حبيتها ياحازم وأللي بيحب مابيوجعش ولا بيجرح اللي بيحبه فإن شاء الله اكون حبيتها بجد عشان مكونش سبب في وجعها انا كرهت الحب بسببه
حازم: ربنا يقدملك اللي فيه الخير يارب ويسعدك
أدهم: يارب وييسرلك أمورك
٭٭٭٭٭ صباح وحيد ٭٭٭٭٭
ياسمينا بتعب: انا كنت فاكرة اخر زنقة هتزنقها في حياتي هي الامتحانات طلع الحوار اكبر من كدة بكتير
ملك: اومال انتي فاكرة الجواز دة سهل كدة ولا ايه ..وطبيعي تكوني مزنوقة ومتوترة مش خطوبتك كمان يومين !! يعني حضرتك عروسة إلا يومين
ياسمينا: لالا لو صعب كدة انا مش عاوزة اتجوز خلاص اما دة في الخطوبة اومال في الفرح هعمل ايه بقي ..يالهوي
ملك وامل قعدوا يضحكوا عليها علي طريقتها مما قاطع هذا الضحك صوت جرس الباب الذي يدق
ياسمينا: دة مين أللي هيجيلنا في أيام زي دي ماهو مش وقت زيارات في الزنقة اللي الواحد فيها دي
ملك بضحك: جايين يباركولك ياعروسة ..انا هروح اشوف مين
وذهبت ملك تاركة أمل وياسمينا لتري من علي الباب وقامت بفتحه لتظهر فتاة جميلة ذات شعر بنيًا جميل وتمتلك عيون خضراء جميلة ..لتنظر إليها ملك بتعجب قائلة: مين حضرتك !!
الفتاة: انا رشا ..ياتري آنسة ياسمينا موجودة اقدر اقابلها !!
ملك: اه اتفضلي ثانية واحدة اندهالك
"وذهبت ملك لتخبر ياسمينا"
ملك: واحدة بتسأل عليكي اسمها رشا
ياسمينا بتذكير: رشا !! انا معرفش حد اسمه رشا
ملك: اطلعي شوفيها طيب انا قولت يمكن زميلتك في الشغل ولا حاجة
ياسمينا: رشا !! لا معرفش حد بالاسم دة اما اطلع اشوف ايه حكايتها دي كمان
"وذهبت ياسمينا لتري من تلك الفتاة التي أتت إليها"
ياسمينا: أهلا وسهلا ..مين حضرتك !!
رشا: أهلا بيكي ياسمينا انا رشا وكنت عاوزة اتكلم معاكي في موضوع كدة
ياسمينا ونظرت لملك وامل الواقفتين: اتفضلي تحت امرك
رشا وهي تنظر إليهم: لا هو موضوع شخصي ممكن تنزلي معايا نقعد في أي مكان بعيد ونتكلم !!
ياسمينا: تمام ماشي تديني ٥دقايق بس أغير هدومي واجيلك
رشا: براحتك خدي وقتك وانا في انتظارك تحت في عربيتي
٭٭٭٭صباح وحيد٭٭٭٭٭
ملك: مين دي ياياسمينا وهتنزلي تقابليها وانتي ماتعرفيش مين دي !!
أمل: انا مش مطمنة ياياسمينا وبعدين موضوع شخصي ايه دة وهي تعرفك منين عشان يكون في موضوع شخصي بينك وبينها وليه مارضيتش تتكلم قدامنا !!
ياسمينا: انا والله معرفش زيي زيكم ونازلة اقابلها عشان اعرف مين دي وافهم في ايه ..ماتقلقوش يلا انا نازلة عشان ماتاخرش عليها اكتر من كدة
"وذهبت ياسمينا وتركتهم دون ترك فرصة لهم للرد عليها"
ياسمينا: اسفة لو اتأخرت عليكي
رشا: لا خالص ولا يهمك ماتأخرتيش ولا حاجة
"وبعد عدة دقائق ليست بكثيرة كانا قد وصلا إلي أحد الكافيهات"
رشا: ها تحبي تشربي ايه !!
ياسمينا: شكرا مش عاوزة اشرب حاجة قوليلي عاوزاني في ايه وموضوع ايه أللي يخليكي تجيلي البيت وتطلبي انزل معاكي وانا معرفكيش
رشا بتوتر: انا مش عارفة اقولك ايه ولا اجبهالك ازاي بس الكلام أللي هقولهولك دة هيبقي صعب عليكي تسمعيه بس لازم تعرفي
ياسمينا: من فضلك اتكلمي علطول انا مش فاضية
رشا بتوتر وحزن: ا..انا ..ابق..ا..
ياسمينا: ممكن تتكلمي علطول من فضلك
رشا بحزن: انا ابقي مرات أدهم المهدي
ياسمينا: ....