✨الفصل الرابع عشر ✨
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
فريد وشيري بصدمة: شاكر !!
شاكر وهو يجلس: أيوة شاكر أللي لعبتوا عليه اللعبة القذرة بتاعتكم ومفكرينه أنه نايم علي ودانه ..وبص لشيري: والهانم أللي كانت عاوزة تستغفله في ابن مش ابنه انتو ايه الحقارة أللي انتو فيها دي !!
شيري وقامت ناحيته: شاكر ارجوك تسامحني
شاكر ووقفها: اوعي تقربي مني واسمي ماتنطقهوش علي لسانك تاني انتي فاهمة !!
فريد ببرود: ماتهدي اعصابك كدة ياشاكر بيه انت مالك متعصب ليه كدة !!
شاكر: انت تخرس خالص انت واحد حقير مينفعش معاه الكلام
فريد ببرود: ليه كدة بس هدي اعصابك كدة مالك متعصب هو حصل مني حاجة !!
شاكر ورجع بضهره ووضع ساق فوق ساق وببرود: لا خالص ..تخيل كدة لو نبيلة هانم عرفت انك خونتها لا وكمان ايه كنت عاوز تطلق واحدة من جوزها عشان انت تتجوزها ياتري ممكن تعمل ايه !! لا ومنظرك قدام عيالك اللي واخدينك قدوة ليهم هيكون ايه !!
فريد وقام وقف بعصبية: انت بتهددني ياشاكر !!
شاكر ببرود: ايه يافريد بيه مالك بس في ايه متعصب ليه كدة !! وقام وقرب منه: اقولك انا ايه اللي هيحصل بقي نبيلة هانم هتطلب الطلاق علطول ولو ماوافقتش هترفع عليك قضية وهتطلق منك برضو وساعتها بقي أكيد في واحد عاوز يتجوزها وتبقي خطتك نجحت بالفعل بس بدل ماتنجح فيا بقت فيك أنت وأللي رتبتله حصل زي مانت عاوز بس حصل معاك اشرب بقي من نفس الكأس اللي كنت عاوز تسقيني منه ..وهتكون قلبت الطرابيزة عليك
شيري: انا مش فاهمة انت بتتكلم عن ايه ياشاكر
فريد: انت بتقول كلام ماحصلش وماعندكش دليل عليه فين الدليل أللي يثبت إن كلامك دة صح وأنها مش لعبة منك مثلاً !!
شاكر بضحكة: ههههه ألعب عليك !! دة ليه فاكرني وسخ زيك ولا ايه !! ايه السبب اللي يخليني اعمل كدة ولا اقول كدة !! مفيش سبب وإن كان علي الدليل فهو موجود ..ومسك تليفونه وشغل الفيديو: ها ايه رأيك لسة برضو مقتنع انها لعبة مني !!
شيري بصدمة: ايه دة يعني أنت كنت عايش معايا وعارف كل حاجة !!
شاكر: طبعا ياشيري هانم ليه فاكراني مغفل !! ولا ماتكونيش فاكرة اني ممكن ادخل واحدة تانية قلبي غير مراتي !!
فريد ببرود: ومابلغتش ليه طيب مادام معاك الدليل !!
شاكر: لأن انا مش غبي زيك يافريد سيبتكم تلعبوا لعبتكم وتسبكوها كويس اوي كمان واحسسكم اني عبيط واهبل ومش فاهم حاجة عشان تاخدوا حكم حكم يعني وكمان عشان ورق الصفقة اللي سرقتوه لو كنت بلغت عنكم مكنتش عرفت ارجعه وكنت هتحبس معاكم لأنها صفقة بملايين يعني مكنتش هستفاد من حبسكم بحاجة وكنتو سهل تطلعوا منها براءة بكدبكم وأنه أللي معايا مش دليل كافي وتحوروا الكلام وابقي انا اللي طلعت من المولد بلا حمص ولو علي الفيديو كنت هتبعت حد يضربني ويخدرني ويسرقه ويبقي كدة مفيش دليل وسهل تطلع منها بكل سهولة ويسر ..وكنتو هتأذوني في مراتي وعيالي بعد أما بلغت عنكم وسجنتكم وكان سهل جدا انكم تجيبوا محامي وتدفعوله مقابل يطلعكم وكان هيطلعكم منها ماهي الشرطة هتعرف منين بقي مانتو ماعترفتوش غير دة كله بقي اكتشفت إن الفيديو دة اللي معايا بس إنما المكتب والشركة للأسف ضاعوا لأن الكاميرات كانت باظت فكل حاجة اتمسحت وضاعت وطبعا لو كنت بلغت كان سهل تخرجوا منها وإن كلامك دة كله كان وقت عصبية وكان المحامي يقدر يثبت كدة لانك هتكون دافعله طبعا وكنتو هتطلعوا منها زي الشعرة من العجينة وهتفكروا تنتقموا مني في مراتي وعيالي فكان لازم اثبت انكم عملتوا كدة فعلا عشان ماتطلعوش منها حتي تحليل DNA أللي كنت هطلب أنه يتعمل كان ممكن سهل برضو انك تزور فيه ماهو أللي يفكر يقتل ويدمر عيلة يقدر يعمل اي حاجة في الدنيا عشان بس مايأذيش نفسه ويبعد نفسه عن اي اذي واي شبهات لأن بيكون بيهمه نفسه وبس وانت كدة يافريد كل أللي يهمك هو نفسك وبس والفلوس إنما مش مهم عندك اي حاجة تانية ولا مهم عندك حياة الناس
فريد ببرود: كويس انك عارف انا ممكن اقدر اعمل فيك ايه وكفاية عندي خوفك دة وانك ماقدرتش تعمل حاجة وخطتي نجحت وكل أللي كنت مرتبله يحصل حصل حتي لو بنسبة بسيطة مش مهم ..أيوة انا فعلاً عملت كدة وانا اللي قولت لشيري انها تسرق ورق الصفقة من مكتبك وتجيبهولي وأنها تطلب منك انك تتجوزها عشان هي حامل منك وإن دة حصل وانت مش في وعيك عشان كدة كنت هتصدق وتتجوزها وحتي لو كنت عملت تحليل كنت هزور فيه وكل الكلام اللي قولته اتنفذ والخطة نجحت ماعدا الفقرة الأخيرة بس مش مهم ..واه كل الكلام اللي قولته دة كنت في وعيي وريني بقي هتقدر تعمل ايه !! هتبلغ عني وتسجني !! هقول ماحصلش وبيضطهدني في شغلي واجيب شيري تشهد معايا وزي مانت قولت هجيب محامي وادفعله وهيطلعني منها
شاكر ببرود وضحك: وهو دة اللي كنت عاوز اسمعه منك ..وفجأة البوليس دخل واقتحم المكان وتحدث الظابط قائلاً: شكرا ليك ياشاكر بيه وتأكد القانون هيجبلك حقك
شاكر بإبتسامة: شكرا لحضرتك ياكمال باشا ومش عارف بجد اقولك ايه بس حضرتك وقفت جمبي كتير في أني اثبت حقي ولولا فضل حضرتك من بعد ربنا مكنتش قدرت اعمل حاجة وكان زماني دلوقتي خسرت مراتي وعيالي
كمال: ماتقولش كدة دة واجبنا نقف جمب المظلوم ونجيبله حقه والقانون لازم يكون في صفه عشان يرجعله حقه واحنا وظيفتنا حماية الناس
شاكر بإبتسامة وهو يسلم عليه: شكرا لحضرتك
كمال ويبادله الابتسامة وهو يسلم عليه: تحت امرك ولو في اي حاجة تاني كلمني ..وبص لعسكري معاه: هاتهم وتعالي ورايا يلا
شيري بصراخ وبكاء شديد: شاكر ارجوك عشان خاطري سامحني وماتخليهمش ياخدوني
كمال بزعيق: يلا قدامي ..اتفضل خدهم يلا
شيري بصراخ وبكاء: شاكر..شاكر..انا اسفة ارجوك يا شاكر وهعتذر لسوزان ارجوك ياشاكر
"وشاكر لم يرد عليها وكأنه لم يسمعها وتركها تصرخ وأخذها كمال هي وفريد ..فمن ملئ الكأس لغيره فسوف يشرب منه يومًا ما سواء بعد يوم او بعد شهر او بعد سنة لكنه بالتأكيد سوف يشرب منه فمن اذي غيره بأذي ما فسوف يُؤذي بنفس ماكان ينوي يأذي به غيره فكلنا نشرب من نفس الكأس الذي ملئناه"
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
"وذهبت ياسمينا وقابلت مصطفي فذهبوا لمطعم أمام الشركة وجلسوا علي احدي الطرابيزات"
مصطفي وهو ينظر في المنيو: ها تحبي تاكلي ايه بقي !!
ياسمينا: اي حاجة عادي
مصطفي: يعني ايه اي حاجة ..قولي عاوزة ايه يلا
ياسمينا وتأخذ منه المنيو لتنظر بها: خلاص هاخد واحد برجر وواحد هندوج وبطاطس طبعا والكاتشب
مصطفي: تمام وانا كمان زيك
ياسمينا: طيب علي بال مانت تطلب الغدا اروح الحمام بسرعة واجي بس
"وذهبت ياسمينا وطلب مصطفي الغداء ومسك بهاتفه يتجول به ثم شعر بأن شيء وقع بجانبه فمد يديه يأخذه فإذ هي بشنطة فالتف قائلا للفتاة الذي تجلس خلفه وهو يعطيها الشنطة دون النظر إليها
مصطفي: اتفضلي يافندم شنطة ح..ولم يكمل كلامه عندما رآها قائلاً بصدمة: هند !!!
هند بصدمة: مصطفي !!!
مصطفي بصدمة: بتعملي ايه هنا ورجعتي أمتي !!
هند: لسة ر..وقاطع حديثها صوت رنين هاتفه فأكملت قائلة: خلاص بقي اسيبك انا ونبقي نتكلم بعدين
مصطفي وأوقفها: لا استني قوليلي الأول انتي بتشتغلي في الشركة هنا !!
هند: اه بشتغل هنا لان أدهم المهدي يبقي ابن خالي محمود بيه المهدي
مصطفي بصدمة: بجد !! طيب احنا اكيد لازم نتقابل عشان نقعد ونتكلم
هند بإبتسامة: دة اكيد طبعا إن شاء الله ..اسيبك بقي دلوقتي عن اذنك
٭٭٭٭٭٭٭٭٭٭٭٭٭٭ صباح وحيد٭٭٭٭٭٭٭٭٭٭
شاكر يدخل إلي بيته لتقابله سوزان
سوزان: حبيبي كنت فين !!
شاكر وهو يقبل رأسها: ماتقلقيش كدة كنت في مشوار مهم
سوزان بتعجب: مشوار !! ومهم !! مشوار ايه دة أللي ينزلك وانت لسة تعبان !!
شاكر وهو يجلس وتجلس بجانبه: انا بقيت تمام يا حبيبتي ماتقلقيش عليا
سوزان: طيب مشوار ايه دة أللي كنت فيه !! وبغيرة وحيرة: ا..ان..انت ك..كنت عند شيرين !!
شاكر بخبث: ومالك بتتكلمي كدة ماتتكلمي علطول ..أيوة كنت عندها
سوزان بغيرة: كنت عندها ليه بتعمل ايه !! أنت مش طلقتها ايه يخليك تروح عندها تاني بقي !!
شاكر وقرب منها: دي غيرة دي ولا ايه !!
سوزان بتوتر: ايه !! اغير !! انا اغير انا !! ومن مين ! من دي !!
شاكر بخبث: طيب مادام كدة عاوزة تعرفي انا كنت عندها بعمل ايه ليه !!
سوزان بتوتر أكبر: ع..عش..ع..قاطعها شاكر: عشان ايه !! كملي
سوزان: عشان انت جوزي وانا مراتك ولازم أعرف تحركاتك ودة حقي
شاكر وكاتم الضحك: واديكي عرفتي انا كنت فين ..حاجة تانية بقي !!
سوزان وقامت: خلاص مش عاوزة اعرف حاجة ..عن اذنك
شاكر ومسكها من دراعها قبل ماتمشي: لسة برضو مش قادرة تفهمي إن قلبي مش بينبض لحد غيرك وإن كل دقة طالعة منه بتكون باسمك !!
سوزان: طيب كنت عندها ليه وبتعمل ايه !! مش كنا خلصنا بقي وطلقتها
شاكر ويمسك يديها: كنت بعمل الصح أللي كان المفروض يتعمل ..بلغت عليهم واتقبض عليهم والتهمة لبساهم لبساهم لأنه اعتراف رسمي منهم
سوزان بارتياح: يستاهلوا خليهم بقي ياخدوا عقابهم تمن اللي كانوا ناويين يعملوه
شاكر: كابوس بقي وخلصنا منه الحمد لله ..بس تصدقي صعبت عليا وهي عمالة تستنجد بيا عشان انجدها وتطلب مني اني اسامحها ومستعدة تيجي تعتذرلك وتعمل اي حاجة بس انجيها وماتدخلش السجن
سوزان: صعبت عليك !! بعد أللي عملته دة كله وتقولي صعبت عليك !!
شاكر: حسيت انها ضحية واتلعب بيها وكان لازم تعمل كدة سواء بمزاجها أو غصب عنها عشان تحمي نفسها من فريد واللي زيه لأنها ضعيفة ومفيش حد تتحامي فيه فكان لازم تعمل كدة يعني هي ضحية لعبة حقيرة مالهاش ذنب فيها إلا أنها ضعيفة وخافت علي نفسها وحاولت تحمي نفسها
سوزان: ممكن تكون زي مانت بتقول كدة بس هي غلطت ولازم تتعاقب وتاخد جزائها دي كانت هتدمر أسرة كاملة وكانت هتخرب بيتي وتحرمنا من بعض
شاكر: بس العقاب يكون في رحمة شوية لازم يبقي فيه في قلوبنا شوية رحمة ونقدر شوية لازم نحط اعذار انها ممكن جدا تكون عملت كدة خارج إرادتها بسبب ضغط وكان ممكن اي حد يعمل زيها أو يبقي مكانها
سوزان: كلامك كله صح بس انا مش ناسية أنها كانت مراتك وبتشاركني فيك وأنها كانت ممكن تكون سبب في اننا نبعد عن بعض
شاكر ومسك ايدها: حبيبتي فكري بعقلك مش بقلبك وعواطفك انسي الغيرة دلوقتي وأنسي اي حاجة وفكري انها اي واحدة تانية مش هي تخيلي كدة لو قابلتي واحدة في نفس موقفها دة .. كان هيكون ردك ايه ساعتها !! وساعتها بس تقدري تحكمي
سوزان وتنهدت: حاضر ..حاضر يا شاكر ..يلا طيب عشان ترتاح شوية
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
ياسمينا: طلبت الأكل ولا لسة !! عشان ورايا شغل كتير عشان نلحق ناكل بقي ..ولكن مصطفي لم يكن معها نهائيًا ولم يكن يسمعها فتحدثت ياسمينا وهي تشاور بيديها اتجاه وجهه: مصطفي ..مصطفي أنت معايا !!
مصطفي باستفاق: ها أيوة معاكي بتقولي ايه !!
ياسمينا: لا دة انت سرحت خالص كنت بقولك طلبت الأكل ولا لسة عشان نلحق ناكل عشان ورايا شغل كتير
مصطفي: أيوة طلبت وزمانه جاي دلوقتي
ياسمينا: مالك ي مصطفي فيك ايه !!
مصطفي: مفيش ي حبيبتي سرحت شوية بس غصب عني أما اتأخرتي
ياسمينا: هحاول اصدقك
مصطفي بإبتسامة: والأكل جيه أهو ي ستي خلينا نلحق ناكل بقي
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
حسام: ها يامنال فكرتي ولا لا !!
منال بتوتر: انت مستعجل ليه كدة ياحسام !! الموضوع محتاج تفكير
حسام: بس مش الوقت دة كله ..ولا أنتي مترددة ومش عاوزة !!
منال بتوتر: بصراحة أيوة مترددة وخايفة وعشان كدة مش عارفة اخد قرار لأني خايفة اخد قرار ارجع اندم عليه
حسام: مش هتخسري حاجة لو اديتي لنفسك فرصة وادتيني فرصة وإن شاء الله بس اكمل الفلوس واجي اخطبك رسمي علطول بقي
منال: طيب سيبني افكر كدة تاني وأرد عليك بكرة
حسام وهو يقوم: تمام ماشي ..خدي وقتك براحتك
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
هند: ازيك ياياسو
ياسمينا: ازيك انتي ياحبيبتي
هند: الحمد لله ي حبيبتي ..رغم مش بقالنا كتير نعرف بعض بس بجد مبسوطة اننا قربنا من بعض بالسرعة دي وارتاحتلك جدا والله
ياسمينا: وانا كمان جدا والله ربنا يديم صداقتنا
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
شاكر: تسلم ايدك كان واحشني أكلك
سوزان: ليه هي ست شيرين ماكنتش بتعمل اكل حلو ولا ايه !!
شاكر وساب المعلقة وبصلها: وايه جاب سيرتها دلوقتي بس !! مانا خلاص طلقتها وقولتلك سبب جوازي وكنا خلصنا من الموضوع دة
سوزان بغيرة: وانا مش بعاتبك بس مش قادرة انسي إن كان في واحدة غيري في حياتك وبتشاركني فيك
شاكر بإبتسامة: حياتي مش ملك لحد غير ليكي انتي وبس ومحدش في الدنيا كلها يقدر يشاركك فيا لاني ملكك انتي وبس
سوزان بإبتسامة: ربنا يخليك ليا يارب ..انا اتحمل اي حاجة في الدنيا إلا إن حد ياخدك مني أو حتي يشاركني فيك
شاكر: انا ملكك انتي وبس ومش ملك حد تاني
سوزان وكأنها تذكرت شيء: طيب قولي صحيح هو أنت ليه مارضتش تبلغ بالفيديوهات اللي معاك وكدة ومصور كل حاجة
شاكر: اولا عشان كنت خايف عليكي وعلي العيال لحد يأذيكم وكمان كان سهل جدا يسرقه ومايبقاش في دليل ويطلع منها ويأذيني وثانيا بقي عشان فريد كان معاه الورق أللي شيرين خلتني امضي عليه وكان سهل برضو يطلع منها إنما أنا حبيت اسيبه عشان يغلط ويقع بنفسه لأني بلغت واتفقت مع البوليس وادوني جهاز عشان يسمعوا بيه كل حاجة ووقعتوا في الكلام بحيث مستحيل يطلع منها حتي لو عمل ايه
سوزان: ياه ياشاكر كنت عايش في دة كله لوحدك ومتحمل كل دة لوحدك وانا ازاي محستش بيك !! بس كان جوايا احساس بيطاردني طول الوقت أنه في سبب وسبب قوي اوي كمان يخليك تعمل كدة بس خوفت امشي ورا احساسي اكون بضحك علي نفسي واكون سبب في جرح جديد لنفسي خوفت يكون مجرد احساس انا بحسه عشان انا اللي عاوزة كدة حاجة جوايا يعني وكنت دايما بسكت احساسي دة بطريقتك أما جيت قولتلي ..عارف كل مرة كنت افتكرك فيها كان بيبقي نفسي اجري عليك واصرخ فيك واقولك انت ليه عملت فيا كدة هونت عليك توجعني كل الوجع أللي انا فيه دلوقتي دة !! كل مرة كنت بتجيلي فيها وتتكلم معايا كان بيبقي نفسي اجري واترمي في حضنك وأنسي أللي حصل ونرجع نعيش مع بعض من تاني في حياتنا الهادية
شاكر وضمها إليه: انا عارف أني وجعتك بس صدقيني كل مرة كنت بوجعك فيها كنت بتوجع قبلك مليون مرة وضعف الوجع بس كان عندي اتحمل وجع دلوقتي ولا اتحمل وجع بعدك عني انتي كل حاجة ليا في الحياة انتي سري وقوتي وقت ضعفي انتي بالنسبالي الحياة
سوزان: ربنا يخليك ليا يارب ويبعد عننا اي حاجة وحشة
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
أحمد بإبتسامة: ها ايه رأيك عجبتك الشقة !!
ملك بسعادة: عجبتني !! دي تحفة يا أحمد ماشاء الله بجد .. وبحزن: بس دي شكلها غالية اوي ومحتاجة فلوس كتير اوي عشان تخلص
أحمد بإبتسامة: مفيش حاجة غالية عليكي وإذا كان علي الفلوس مالكيش دعوة ياستي انا هتصرف المهم انك أما تيجي تلاقي شقتك جاهزة من كل حاجة وشقة تليق بيكي انك تعيشي فيها
ملك بإبتسامة: ربنا يخليك ليا يارب ..بس انا قولتلك قبل كدة انا ولا يفرق معايا شقة ولا فلوس انا كل اللي يفرق معايا هو أنت وبس مش حاجة تانية مش هفرح بشقة وفلوس وانت ممكن تكون بعيد عني
أحمد: ربنا يخليكي ليا يارب ياأحلي هدية من ربنا ليا وانا لو بعدت عن الدنيا كلها مستحيل ابعد عنك ..وقاطع حديثهما دخول سهير وسوسن"
سهير بإبتسامة: ماشاء الله الشقة جميلة يا أحمد يابني ربنا يتمملكم علي خير يارب ويسعدكم
أحمد بإبتسامة: ربنا يخليكي لينا يارب
سوسن بإبتسامة: الشقة مش هتبقي أحلي إلا بوجود ملك فيها بقي
ملك بإبتسامة: ربنا يخليكي يارب ياماما كفاية انتي منوراها والله بوجودك معانا وفي حياتنا منور حياتنا كلها
سوسن بإبتسامة: ربنا يخليكي يارب ياملك انتي هتبقي بنتي مش مرات ابني
ملك: دة شيء يسعدني ويشرفني والله
سوسن: تسلمي حبيبتي الشرف ليا إن يكون عندي بنوتة جميلة زيك كدة ومؤدبة وفي اخلاقك
أحمد بهزار: خلاص عرفنا انكم بتحبوا بعض كفاية بقي وممكن نتغدي ولا ايه !!
سوسن وتخبطه في دراعه: وانت مالك أنت دة انت عيل رخم فعلاً ملوكة دي حبيبتي مش كدة ياملك ولا ايه ماتخليهوش يتدخل بينا
ملك بضحك: أيوة صحيح انا بتكلم انا وماما ماتدخلش أنت بينا
أحمد وبصلها: والله !! دلوقتي انا ماليش دعوة !!
ملك بهزار: لا طبعا انا بهزر معاك
أحمد بضحك: طيب يلا عشان ناكل بقي
٭٭٭٭٭٭٭٭٭٭٭٭٭٭ صباح وحيد٭٭٭٭٭٭٭٭٭٭٭٭٭
ياسمينا: مالك يامنال قاعدة ساكتة ليه كدة سرحانة في ايه !!
منال: بحاول افكر واخد قرار
ياسمينا: أيوة بتفكري في ايه برضو
منال وقعدت جمبها: بصي انا بصراحة تعبت من كتر التفكير ومش عارفة اعمل ايه فأنا هخليكي تفكري معايا يمكن نوصل لحاجة ..بصي انتي طبعا عارفة أما حكيتلك علي موضوع حسام
ياسمينا: أيوة صحيح عملتي ايه بقي
منال: ماهو دة اللي لسة بفكر فيه وحاسة أني متلغبطة ومش عارفة اخد قرار
ياسمينا: فاكرة أما جيت قولتلك علي مصطفي كنت نفس لغبطتك دي برضو وانتي حسستيني إن الموضوع سهل يتاخد فيه قرار افتكري بقي كلامي ساعتها وردك عليا
منال: الموضوع طلع صعب فعلاً يتاخد فيه قرار ..طيب قوليلي اعمل ايه ولا اتصرف ازاي هو مستني ردي
ياسمينا: انتي حاسة بميول ناحيته !!
منال: اه شوية بس خايفة يكون الميول دة عشان هو قالي أنه يحبني ميكونش ميولي انا فاهمة !! خايفة اكون حبيت حبه ليا مش حبيته هو ..فاهمة !!
ياسمينا: أيوة فاهمة ..بصي لو حاسة حاجة ناحيته مش هتخسري حاجة لو ادتيه واديتي لنفسك فرصة تعرفوا بعض ومع الوقت هتعرفي إذا كنتي بتحبيه فعلاً ولا حبتيه عشان حبه ليكي
منال: هفكر كدة
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
آمال: حنين انا نازلة شوية كدة
حنين: رايحة فين !!
آمال: هقابل واحدة صحبتي عاوزة تشتري شوية حاجات من مول وقالتلي اروح معاها وكدة
حنين: طيب وقولتي لماما !!
آمال: أيوة قولتلها ..عاوزة حاجة اجبهالك وانا جاية
حنين بإبتسامة: لا سلامتك ..خلي بالك من نفسك وماتتأخريش
آمال بإبتسامة: حاضر ياحبيبتي ..يلا سلام
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
أمل: أيوة ي ياسمينا انتي فين !!
ياسمينا: انا خلاص أهو دقيقتين واكون عندك
أمل: تمام ماشي وانا مستنياكي أهو .. وأغلقت أمل هاتفها وهي تنظر به فإذ اصطدمت بأحد فجأة لتعتذر سريعا
أمل بارتباك: انا اسفة بجد مش قصدي مقصدش خالص والله مكنتش واخدة بالي انا آسفة
حاتم بهدوء: بس بس اهدي محصلش اي حاجة تستحق دة كله خلاص حصل خير .. وبعدين انا اللي آسف
أمل: شكرا لذوق حضرتك عن اذنك
"وذهبت أمل بسرعة لكي تختفي من تحت أنظاره"
ياسمينا: ايه ي بنتي دة كله اتأخرتي ليه كدة !! انا مش أما كلمتك قولتي انك وصلتي
أمل بتوتر: معلش اتأخرت غصب عني
ياسمينا بقلق: مالك ف ايه !! وشك بيقول ف حاجة
أمل وبدأت تهدأ: هحكيلك كل حاجة
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
حازم: انا جاي بكرة بليل إن شاء الله اطلبك رسمي
حنان: ايه دة انت فجأتني بسرعة كدة !!
حازم بتعجب: قصدك ايه يعني بسرعة !! مش عاوزاني اجي اطلبك من أهلك !!
حنان بتوتر: لا مش قصدي ي حبيبي انت فهمتني غلط
حازم: اومال ايه قصدك !!
حنان: ي حبيبي انا قصدي أنك فجأتني والمفروض تعرفني قبلها عشان اجهز نفسي وانزل اشتري الحاجة أللي ناقصاني وكدة
حازم: بس انا متفق معاكي من فترة ي حنان وقولتلك خديلي ميعاد من باباكي عشان اجي انا وادهم
حنان بإبتسامة: انا اتفاجئت بس اما قولت بكرة ..تيجي تنور اي وقت
حازم بإبتسامة: طب مش هناكل بقي ولا ايه !!
حنان بإبتسامة: لا طبعا هناكل ماناكلش ازاي دة اهم حاجة ناكل
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
أمل بغيظ: والله مانا عارفة أنتي ميتة علي روحك من الضحك كدة ليه !! مفيش حاجة تضحك اوي كدة يعني
ياسمينا بضحك: كل دة ومفيش حاجة تضحك انتي بتهزري !! اصل تخيلت شكلك واكيد كان مسخرة
أمل بغيظ وهي تقوم: تصدقي انا غلطانة اني حكيتلك واني جاية اقابلك واقعد معاكي أصلا
ياسمينا بضحك ومسكتها: طب خلاص خلاص اقعدي
أمل بغيظ: وتبطلي ضحك
ياسمينا وتمنع ضحكاتها: سكتت أهو خلاص يا امولة ..بس قوليلي هو حلو ولا لا !!
أمل باحمرار وتوتر: وانا مالي انا اذا كان حلو ولا وحش
ياسمينا بغمزة: ي بت دة انتي وشك قلب طماطم
أمل بغيظ: انا ماشية انا غلطانة اني قاعدة معاكي أصلا
ياسمينا: خلاص اقعدي ..بس احكيلي بقي زي مانا بحكيلك
أمل بإبتسامة: بصي هو اه حلو وأمور وذوق جدا يعني وطريقته لطيفة .. وفجأة: أللي خبط فيا برضو أما كنا في المطعم مش فاكراه !!
ياسمينا بغمزة: الصدف بتجمعكم ولا ايه !! وبغمزة: لا انا مش فاكرة المهم انك انتي فاكرة
أمل بغيظ: يلا نقوم نمشي عشان انتي رخمة
ياسمينا بضحك: هنشوف ياأمولة شكلها كدة الصنارة غمزت
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
منال بتوتر: حسام انا فكرت في كلامك
حسام: وقرارك ايه !!
منال بخجل: موافقة ياحسام
حسام بفرحة: بجد !! بجد يامنال !!
منال بإبتسامة: أيوة بجد
حسام: عاوزك بقي تاخديلي ميعاد مع باباكي عشان اجي أقابله واطلبك منه رسمي بس مش دلوقتي شوية كدة بس اكون جهزت نفسي وعرفنا بعض اكتر
٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
ديما: مالك ياآمال من ساعة أما خرجنا وانتي سرحانة كدة مالك في ايه !!
آمال: مفيش ياديما متضايقة شوية بس
ديما: مفيش ازاي !! انتي عينيكي بتقول إن في حاجات مش حاجة واحدة بس
آمال: صدقيني ياديما مفيش حاجة انا كويسة
ديما ورفعت وجه آمال بيديها: انتي بتعيطي !! في ايه احكيلي مالك وفيكي ايه !!
آمال بدموع: موجوعة ياديما وبحاول اعالج وجعي دة واقفل جرحه لأني اكتفيت منه خلاص ومبقتش متحملة الوجع تاني خلاص
ديما وتحتضنها: طيب بس خلاص خلاص اهدي كدة وماتتكلميش في حاجة وانا اسفة وأما تبقي كويسة إن شاء الله نبقي نتكلم
آمال: لا ياديما انا هحكيلك لأني محتاجة اطلع اللي جوايا يمكن ارتاح شوية
ديما: طيب قومي بينا علي البيت مش هينفع نتكلم هنا كدة قدام الناس
آمال: يكون احسن برضو
ديما: تمام هحاسب كدة ونمشي علطول
"وحين آمال تنتظر ديما فرأت أدهم يدخل إلي الكافيه مع فتاة جميلة جدا نعم فهي هند كما توقعتم ..فشعرت آمال بالغيرة من تلك الفتاة التي تجلس مع أدهم وتتحدث معه وهي لاتستطيع فعل هذا فذهبت إليه"
آمال: أدهم ازيك عامل ايه !!
أدهم ببرود: الحمد لله تمام
آمال وبصت لهند بغيرة: ازيك ياأنسة !! مش آنسة برضو !!
هند: الحمد لله بس مين حضرتك !!
أدهم: هند دي آمال بنت خالتي وأختي الصغيرة
هند بإبتسامة: أهلا وسهلا بيكي ..وانا هند بنت عمة أدهم
آمال بصدمة من كلام أدهم: طيب انا أما شوفتك داخل الكافيه هنا وانا موجودة قولت مينفعش مجيش ماسلمش عليك واتشرفت بيكي ياأنسة هند ..عن اذنكم
هند بتعجب: هي مالها كدة شكلها زعلت من حاجة ولا ايه !!
أدهم: وهو حصل حاجة عشان تزعل !! سيبك منها المهم تشربي ايه !!
هند: ممكن اخد عصير فريش
"ذهبت آمال بعصبية من كلام أدهم وطريقته الباردة معها فهي لم تتخيل أبدًا أن تصل لتلك المرحلة مع أدهم وأنه يتجاهلها فكانت تشعر بألم يخترق قلبها ولكن ماذا تفعل !! فهي من اختارت هذا الوجع لنفسها ولقلبها فلتتحمل"
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
ديما: ها مالك بقي احكيلي في ايه !!
"آمال وبدأت تقص عليها من بداية ارتباطها بأدهم إلي انفصالهم"
ديما بصدمة: دة كله حصل !! ليه عملتي في نفسك كدة يا آمال !!
آمال وبدأت تتجمع الدموع في عينيها: مكنتش أعرف أني هتوجع اوي كدة مكنتش أعرف إن وجع الحب صعب اوي كدة انا مش وحشة ياديما زي مانتو شايفني انا بس كنت البنت المراهقة أللي لسة مش فاهمة يعني ايه حب وكان الحب بالنسبالها شيء جديد عاوزة تجربه وتدخل مجاله عشان تشوف ايه دة بس ماعملتش حساب الوجع أللي بيكون فيه وزي ماهو حلو وبيداوي جروح طلع برضو في شوك وبيفتح في جروح جديدة كنت فاكرة إن أي حد بيقولي بحبك يبقي بيحبني فعلاً كنت مفكرة الحب إن أي حد ضحكلي أو قالي كلمة حلوة كنت ببقي فرحانة واتعلق بيه وافتكر دة حب كان نفسي اجرب احساس الحب واهتمامه بس معملتش حسابي إن كمان لازم اجرب وجعه ماهو مفيش دخان من غير نار ومفيش حاجة حلوة من غير حاجة وحشة عشان الوحش بيعلمنا بس مكنتش اعرف إن الوجع صعب اوي كدة انا مش عارفة انا حبيت أدهم ولا لا مش عارفة إذا كنت بحبه عشانه هو ولا عشان اهتمامه وحبه ليا مش عارفة حبيته هو ولا حبيت حبه ليا معرفش حتي حبيت مهاب ولا لا دخل حياتي وقالي أنه بيحبني وجيه خطبني عارفة حاسة بتوهان حاسة نفسي تايهة ومش عارفة انا عاوزة ايه بس اقولك علي حاجة انا أللي غلطانة غلطانة اني وجعت نفسي كدة غلطانة اني كنت ضعيفة كدة غلطانة اني كنت بصدق اي حاجة ومكنتش بعرف افرق مابين الحب والصداقة ..تفتكري ياديما أني ممكن اقدر ارجع احب تاني من جديد !! أدهم جرحني اوي بكلامه بيقولي اني اخته ومش شايفني غير اخته تفتكري الكلام دة حقيقي !! تفتكري بعد الحب أللي ادهولي دة كله يكون قدر أنه ينساه كدة بكل سهولة وبقيت اخته فعلاً !! كنت البنت المراهقة أللي نفسها تحس احساس الاهتمام وإن في حد مهتم بيها وكانت بتفرح بدة بس ماعملتش حساب اللحظة دي
ديما: مش عارفة اقولك ايه بجد ياآمال بعد الكلام دة كله مش لاقية كلام ينفع اقوله في موقف زي دة وفي نفس الوقت مش قادرة ألوم عليكي واقولك انتي الغلطانة وانتي أللي عملتي في نفسك كدة وكنتي سبب في وجعك دة لأن مابقاش ليه لازمة الكلام دة دلوقتي ومش هيعمل حاجة كل أللي اقدر اقولهولك هو انك لازم تنسي عشان تقدري ترجعي وتعيشي في حياتك الطبيعية الحزن مش هيعملك حاجة ولا هيرجع أللي راح الحزن مش هيعمل حاجة غير أنه هيطفيكي تماما والندم لو كان بيرجع أللي راح وضاع مننا كنا ندمنا علي حاجات كتير في حياتنا لازم ترجعي تعيشي حياتك من تاني وتتأقلمي مع الوضع اللي اختارتيه لنفسك وتتعايشي مع الواقع وتنسي الماضي وتفكري في الحاضر
آمال: حاولت ياديما بس ماعرفتش احساس الوجع صعب وجرح القلب اصعب جرح مالوش علاج والجرح مش راضي يلم وكل مدي اتساع الجرح بيزيد وينزف اكتر وانا حاولت اوقف النزيف بس ماعرفتش لاني أنا اللي عملت الجرح دة لنفسي
ديما: اصعب وجع ممكن الإنسان يحس بيه هو وجع الحب خصوصا من انسان كان بيحبه ومديله كل حاجة ساعتها بس بيحس اد ايه هو كان أناني وأنه خسر انسان كان بيحبه بجد ومش عارف يعوضه بس مفيش حد فينا مابيغلطش وكلنا بنغلط وانتي غلطتي واختارتي يبقي تتحملي نتيجة اختيارك وتنسي وتبعدي وتعالجي جرحك وقلبك بنفسك زي ماعملتيه لنفسك انتي الوحيدة أللي عارفة علاجه وتعالجيه لنفسك
آمال: حاضر ياديما هحاول وانتي ادعيلي عشان انا تعبت مكنتش اعرف إن وجع القلب صعب اوي كدة ..المهم انا لازم امشي دلوقتي عشان اتأخرت وشكرا ليكي ع كل حاجة
ديما بإبتسامة ومسكتها: انتي اختي ياآمال وإن شاء الله هترجعي احسن واقوي من الاول واتاكدي كل ماكان الوجع صعب كان تعليمك للتجربة احسن وافضل
آمال بإبتسامة: ربنا يخليكي ليا يارب
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
في بيت حنان
حازم: ماتتكلم ياأدهم ولا خلي مامتك وباباك يتكلموا
أدهم: يابني ماتصبر أنت مستعجل كدة ليه
حازم: هصبر ايه تاني بس يلا بقي خلينا نتفق
محمود: طبعًا يا أستاذ صالح أنت عارف احنا جايين ليه النهاردة ..احنا يسعدنا ويشرفنا اننا نطلب ايد بنتك الآنسة حنان لابننا البشمهندس حازم واكيد مش هنلاقي ناس احسن منكم ومن بنتك نناسبهم وحازم دة يبقي ابني التاني
صالح بإبتسامة: دة شيء يشرفنا والله وشرف كبير لينا اننا نناسب ناس محترمة زيكم كدة والله
محمود بإبتسامة: ربنا يخليك دة اكيد الشرف لينا ..طيب نتفق بقي علي كل حاجة وميعاد الخطوبة
صالح: انا ماليش اي شروط ولا اي طلبات بس عندي كلمتين عاوز اقولهم لبشمهندس حازم انت قبل ماهتكون خطيب بنتي هتكون ابني ومش هطلب منك غير حاجة واحدة بس وهي انك تحطها في عينيك وتخلي بالك منها وتخاف عليها وتحافظ عليها لأنها بنتي الوحيدة أللي ماطلعتش إلا بيها من الدنيا انا ووالدتها فبعدها عننا هيكون صعب بالنسبة لينا بس هي دي سُنة الحياة وانا واثق انك راجل وهتحافظ عليها
حازم بإبتسامة: بنتك في عنيا ياعم صالح وماتقلقش عليها طول ماهي معايا
صالح: ربنا يباركلك يابني ..شوفوا بقي عاوزين تعملوا الخطوبة امتي
محمود: نتفق الأول وبعد كدة نشوف ميعاد الخطوبة
صالح: انا ماليش اي طلبات غير أللي قولته بس والله
محمود: معلش بس الأصول بتقول كدة برضو نتفق الأول وبعد كدة نحدد ميعاد الخطوبة امتي
صالح بإبتسامة: تمام نتفق
"واتفقا علي كل شيء وتمت قراءة الفاتحة في جو من السعادة والفرحة"
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
كوثر: حمد لله علي السلامة ياآمال ياحبيبتي اتأخرتي ليه كدة !!
آمال بإبتسامة: الله يسلمك ياماما ..ولا اتأخرت ولا حاجة روحت البيت مع ديما قعدنا اتكلمنا شوية بس
كوثر: ليه في حاجة ولا ايه !!
آمال: لا ياماما مفيش حاجة حسيت عاوزة اتكلم وافضفض فاتكلمنا بس ..عن اذنك ياماما هدخل اغير هدومي
كوثر ومسكتها ورفعت وشها بيديها: آمال حبيبتي انتي كويسة !!
آمال: انا كويسة ياماما ليه بتقولي كدة !!
كوثر: بقول كدة عشان مش دي آمال بنتي أللي اعرفها ام ضحكة حلوة أللي كانت روحها دايما في البيت مابتبطلش ضحك وهزار كانت زي الوردة المفتحة مش دلوقتي وشها بقي مطفي حتي ابتسامتها بقت مطفية
آمال وترقرت الدموع في عينيها: انا فعلاً انطفيت ..انطفيت اوي ياماما مابقتش زي زمان ولا بقيت آمال بتاعت زمان أللي كانت دائما تضحك وتهزر ومالية البيت بهجة وحيوية وماكنتش شايلة هم حاجة ولا فارق معاها تلطيش الدنيا بس ماكنتش تعرف ان الدور الجاي من تلطيش الدنيا هيكون ليها هي
كوثر وجلست واجلستها بجانبها: ودة كله سببه ايه !!
آمال: سببه وجع القلب ياماما واكتشفت ان وجع القلب اصعب من اي وجع تاني اصعب من وجع الجسم عرفت الكلام دة اما جربت فعلاً كنت فاكرة أني بضحكي وهزاري وبهجتي دي الدنيا عمرها ماهاتيجي عليا بس الدنيا مينفعش تسيب حد إلا أما تيجي عليه بس مكنتش اعرف إن اليوم دة بسرعة اوي كدة وان الوجع صعب اوي كدة
كوثر ومسكت ايديها: بصي ياآمال ياحبيبتي عاوزة اقولك علي حاجة مهمة كل واحد فينا عايش علي وجه الارض ليه غلطة كبيرة لازم يغلطها وتفضل ملازماه طول حياته يفضل يأنب في نفسه عليها عشان كل أما ييجي يغلط تاني يفتكرها ويحس بوجعها يقوم يتراجع عن اللي كان ناوي يعمله وكدة بيكون اتعلم الدرس صح ولولا الغلطة دي مكنش اتعلم خالص وكان فضل يغلط ويخسر حاجات كتير مع كل غلطة بتاخد منك حاجة سواء بقي طاقة أو مجهود أو بهتان وطفيان وتغيير بتاخد حاجات كتير بس مفيش حد مش هيغلط الغلطة دي كله لازم يغلط غلطة كبيرة عشان تفضل هي الدرس ليه في كل تصرفاته أللي جاية وكلنا مش نفس الغلطة وانتي غلطتي الغلطة اللي علمتك ولسة سايبة وجعها فيكي انتي كدة خدتيها خلاص طيب هل كدة مش هغلط تاني خلاص !! لا طبعا هتغلطي تاني مفيش حد مابيغلطش احنا مش ملايكة بس هنكون اتعلمنا ساعتها بقي وكل غلطاتنا هتكون الغلطات الصغيرة أللي طبيعي نغلطها بس وانتي بتغلطيها هتكون الغلطة الكبيرة قدامك هتخليكي تفكري ألف مرة قبل أما تعملي اي حاجة وفايدتها انها بتعلمك ماتكرريش غلطك تاني وتفضلي ندمانة عليها طول حياتك وعايشة بتندمي عليها
آمال: انا مكنتش واخدة بالي من الكلام دة خالص ياماما انتي فعلاً معاكي حق كل واحد فينا ليه غلطة لازم تكون هي الدرس ليه لأن لولاها مش هيتعلم حاجة معاكي حق في كل كلمة قولتيها وفعلا دة أللي حاصل معايا دلوقتي ندمانة علي أللي عملته وكل أما افتكر اقول لو الزمن يرجع بس ..بس اتعلمت واتعلمت كويس اوي كمان بس الوجع صعب نتحمله ..انا شوفت أدهم النهاردة ياماما وانا مع ديما وكان مع بنت تبقي بنت عمته وروحت وسلمت عليهم ..أدهم اتغير اوي بس انا عذراه عشان انا دلوقتي حسيت نفس إحساسه أللي كنت انا السبب فيه بس عندي امل حتي لو بسيط أنه ممكن نرجع بس زي مانتي قولتي لازم الغلطة دي تفضل موجودة كدة قدام عنينا عشان تبقي درس لأي حاجة تانية ونفضل عايشين بتأنيب نفسنا وندمنا
كوثر: انسيه ياآمال وعيشي حياتك انتو مش لبعض كفاية لحد كدة حتي لو رجعتوا هيبقي في حاجز بينكم ومع أقل مشكلة ولا أقل كلمة هيفتكر كل أللي فات وأثره هيبتدي يظهر زي لو في جرح في جسمك لو سيبتيه هيمشي لوحده غير لو فضلتي تقشري فيه هينزف وهيبان وممكن كمان يعلم في جسمك لفترة هو كدة دلوقتي الجرح موجود بس مش باين قربك منه هتفتحيه ليه وليكي وهتأذي نفسك اكتر
آمال: هحاول ..هحاول ياماما بس وجع القلب صعب مش عارفة انا عاوزاه عشان بحبه ولا عاوزاه عشان حبه ليا واهتمامه بيا ولو عاوزاه عشان بحبه كنت سيبته ليه من الاول ودلوقتي عاوزة ارجع ليه !! انا متلغبطة ياماما
كوثر: وإجابة السؤال دة عندك انتي وانتي الوحيدة أللي تقدري تجاوبي عليه وتقرري انتي عاوزة ايه بالظبط ..دلوقتي بقي قومي يلا عشان تغيري هدومك ونقعد نتغدي
آمال وهي تنهض: حاضر ياماما ..وقبل أن تذهب وقفت فجأة كأنها تذكرت شيء: علي فكرة ياماما شكرا ..شكرا علي كل حاجة شكرا علي احساسك بيا وقت ضعفي
كوثر بإبتسامة واحتضنتها: انتي بنتي مهما حصل ومهما عملتي فانتي بنت ومفيش ام قلبها يأسي علي بنتها مهما حصل منها انتي وأخواتك نور عنيا أللي بشوف بيها واغلي حاجة في حياتي ربنا ما يحرمني منكم ابدا يارب
آمال بإبتسامة: ولا يحرمنا منك ابدا يارب ياماما ويخليكي لينا
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
وبعد مرور شهر تقريبًا
هند بإبتسامة: صباح الخير
منال بإبتسامة: صباح النور
هند: الله اومال فين البت ياسمينا !! ماجتش ولا ايه !!
منال: لا كلمتها الصبح قالتلي انها إجازة النهاردة
هند وامسكت بهاتفها: طيب أما اكلمها كدة ..صحيح يامنول انا خطوبتي بكرة ها ولازم تنوروني طبعا
منال بفرحة واحتنضنتها: بجد مليوووون مبروووك ياحبيبتي وربنا يتمملك علي خير يارب ..مين بقي !!
هند وقاطعها رد ياسمينا علي الهاتف: ازيك ياهند عاملة ايه
هند: ايه ياياسو مجتيش ليه !!
ياسمينا: مفيش والله قررت اخد إجازة النهاردة في حاجة ولا ايه !!
هند: لا ياحبيبتي انا حبيت اطمن عليكي بس
ياسمينا: ربنا يخليكي يارب ياحبيبتي
هند بإبتسامة: انا خطوبتي بكرة إن شاء الله ومستنياكي طبعا ومفيش اعتذارات
ياسمينا بفرحة: بجد !! مليوووووون مبروووووك ياقمر وربنا يتمملك علي خير يارب ياحبيبتي ويسعدك
هند بإبتسامة: الله يبارك فيكي ياحبيبتي وعقبالك يارب ..مستنياكي بكرة اوعي ماتجيش
ياسمينا: لا جاية إن شاء الله ياحبيبتي
٭٭٭٭٭٭٭٭٭٭٭٭٭ صباح وحيد٭٭٭٭٭٭٭٭٭٭٭٭
ياسمينا: ملوكة بقولك ايه
ملك: قولي
ياسمينا: كنت عاوزة فستان من عندك احضر بيه خطوبة واحدة صحبتي بكرة إن شاء الله
ملك: انتي بتستأذني !! خدي انتي أللي عاوزاه وعقبالك يارب ياحبييتي إن شاء الله بقي
ياسمينا: ربنا يخليكي ليا يارب ياأحلي أخت في الدنيا
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
وفي اليوم التالي في احدي القاعات الضخمة تدخل ياسمينا للقاعة وتذهب للكوشة لتسلم علي العرسان لتقف منصدمة من هول المفاجأة فاقدة للحركة ولم تعلم ماذا تفعل وكأن عقلها توقف عن التفكير وكأن لسانها توقف عن النطق .. لتحدث نفسها بصوت خافض لايسمعه أحد غيرها: مصطفي !!!!!