الفصل الثالث والرابع
بقلم رودي سيد
سكتت ناديه شويه وهي مش مصدقه كلام سلمي ...وابتسمت ابتسامه خفيفه وقالت: ربنا يسعدك يا حبيبتي ....انا ارتحتلك اوي وحابه نبقي أصحاب
وسكتت شويه وكملت كلامها ....انا معنديش أصحاب كل اللي شوفتيهم دول صحاب آدم ...ها قولتي إيه؟
رد سلمي بأبتسامه : اكيد طبعا ده شرف ليا
وقامت سلمي من مكانها : انا لازم امشي بقا ...مش عاوزه أتأخر علي البيت
قامت ناديه كمان وماسكه شنطتها وقالت : يلا بينا ..انا كمان ماشيه زمان آدم في البيت وتلاقيه قالب الدنيا عشان جعان طبعا 😁
وابتسمت وقالت : اصله مش بيعرف يعمل أكل
ضحكت سلمي وقالت : اكيد طبعا ...كل الرجاله كده
فضلوا ماشيين يتكلموا لغايه ما وصلوا لعربيه ناديه
ناديه: ماتيجي اوصلك انتي طريقك منين؟
سلمي: مفيش داعي انا هاخد المترو ☺️
ناديه: مترو ايه يا شيخه إحنا مش قولنا بقينا أصحاب ولا غيرتي رأيك ؟
سلمي : لا والله ابدا ..بس مش عاوزه اتعبك معايا
ناديه : ولا تعب ولا حاجه واهي فرصه تعرفيني عن نفسك اكتر طول الطريق
كل ده وناديه بتحاول تتقرب من سلمي اكتر وتطمنها لأنها حست انها مش واثقه فيها لانها طبعا اخت آدم
في الطريق.........
ناديه : قوليلي بقا بتحبيه؟؟!!
سلمي بإرتباك: هو مين ؟
ناديه ضحكت : خطيبك يا سلمي مالك في ايه؟
سلمي ابتسمت : اااه ....اه معلش مش مركزه بس
ناديه بغمزه : اللي واخد عقلك 😉
سلمي : لا ابدا بس المذاكره وكده وكمان بسهر كتير
ناديه: ارحمي نفسك شويه (إن لبدنك عليك حق).....
بقولك ايه ...ماتيجي نغير جو شويه أيه رأيك نطلع سفاري ؟
انا نفسي اطلعها من زمان
سلمي: مممم خلاص افكر واخد رأي بابا وهرد عليكي
ناديه: تمام هستني ردك
وصلت ناديه لبيت سلمي اللي طبعا وصفتلها مكانه
سلمي : اتفضلي اشربي حاجه وبالمره اعرفك علي بابا وندي اختي
ناديه : معلش خليها مره تاني وسلميلي عليهم وعلي طنط كتير
سلمي وظهر علي وشها ملامح الزعل ..ابتسمت بوجع وقالت: ماما الله يرحمها أنا واختي وبابا ملناش غير بعض ربنا يديمهم نعمه في حياتي
ناديه ضمت علي شفايفها وقالت: أنا اسفه مكنتش اعرف...ربنا يرحمها يارب
سلمي : ولا يهمك ..بس المره دي مش محسوبه بقا لينا مره تاني
ناديه: اكيد أن شاء الله
مشيت ناديه .... وطلعت سلمي البيت
كان ابوها عم حسين قاعد في البلكونه بيشرب شاي وبيقرا الجرايد
سلمي : حبيب قلبي انا ..وباسته في خده وحضنته
عم حسين: ايوه ايوه خديني بكلامك الحلو ده
سلمي: طب مش دي الحقيقه ... انا ليا حبيب غيرك؟
عم حسين: ياريت هو انا اكره
سلمي: ايه الكلام ده يعني عاوز تخلص مني يا سونه؟ 🙁
عم حسين: يا هبله انتي اول فرحتي ونفسي اشوفك متهنيه في بيت جوزك
سلمي: منا متهنيه اهو ...وبعدين مش وقته الكلام ده لما اخلص دراستي الاول واخد الشهاده ..ولا يرضيك اهل جوزي المستقبلي يقولو عليا تعليمي علي قدي وكدهون بقا 😁
عم حسين: انا كل اللي يرضيني راحتك يا ست البنات
سلمي مبتسمه: يالهوي علي ست البنات دي ...طب هات بوسه عشان الكلمه الحلوه دي 💋
ندي وهي خارجه من المطبخ وفي اديها ساندوتش ...
ايوه ياستي انتي واخده الدلع كله وانا طالع عيني في المطبخ
عم حسين : انتي بقالك ساعه في المطبخ وفي الاخر طالعه بالساندوتش ده 😁
ندي: بردوا كده يا بابا امال مين عملك كوبايه الشاي الحلوه دي ...ده بدل ماترفع من معنوياتي ...وقطمت حته من الساندوتش 😂
عم حسين : ماهي فعلا حلوه بزياده ...انتي عاوزه تجبيلي السكر يابنتي
ضحكت سلمي : كفايه عليها تقطيم كده يا بابا حرام صعبت عليا 😜
ندي قلعت مريله المطبخ : اتفضلي اهو بسلمك العهده من دلوقتي ..اتصرفي انتي بس بسرعه والنبي عشان جعانه 🙄
سلمي : طب استني عليا حتي اغير هدومي ياساتر منك ...وبعدين جعانه ايه امال الساندوتش ده ايه ؟
ندي : يابنتي ده تصبيره ...وبعدين بصالي في الساندوتش اهو خلص 🥺
سلمي: صبرني يارب 😁
دخلت سلمي تغير هدومها ...ودخلت ندي وراها
ندي : ها ياست سلمي كنتي فين بقا 😉؟
سلمي : وانتي مالك يا سوسه هانم ...هتفتحيلي تحقيق؟
ندي: انا غلطانه اني بطمن عليكي 🥺
سلمي : متخافيش عليا يا حنينه يا ام قلب خسايه 😂
ندي: انا غلطانه اني عاوزه اقولك أن خالد ابن خالتو اتصل وجاي عندنا بكره
سلمي قلبها اتنفض لما سمعت سيرته وملامحها اتغيرت : بكره ايه هو مش قال جاي اخر الشهر؟. ... وايه اللي هيجيبه بكره
ندي: هيكون جاي ليه يا عروسه 😉😉
سلمي بكشره: بس يا بت عروسه ايه وبتاع ايه انا مش ناويه ارتبط دلوقتي 🙄
ندي : عموما هو جاي يسلم عادي بس خالتو بتلمح لبابا بحاجات كده
سلمي : وبابا رده كان ايه؟؟
ندي : مردش طبعا وساب الكلام مفتوح ما انتي عارفه بابا مستحيل يغصب واحده فينا علي حاجه
سلمي: طيب سبيني بقت اغير هدومي عشان احضر الغدا زمان بابا جعان
خرجت ندي من الاوضه بس سلمي لسه بتفكر في كلامها
تاني يوم في الكليه .....
آدم بخطوات سريعه : سلمي ....سلمي استني
سلمي بأستغراب: خير في حاجه؟؟
آدم : احم ..صباح الخير ☺️
سلمي: صباح النور ...عاوز حاجه؟
آدم: لا ابدا حبيت أصبح عليكي ....وكمان اعتذرلك علي اللي حصل امبارح 😟
سلمي : حصل خير
آدم : طيب ايه رأيك تحبي نشرب حاجه في الكافتيريا؟
سلمي : معلش يا آدم انا مستعجله عندي محاضره ... عن اذنك... وسابته ومشيت
سلمي في نفسها : ايه اللي عملتيه ده ..دي قله زوق مني علي الأقل كان لازم أكلمه كويس ده كان جاي يعتذر ..... اوووف اللي حصل حصل بقا انا كده دبش
بعد المحاضره خرجت وعنيها بتدور علي آدم
سها: بتدوري علي مين يا قمر ؟
سلمي : هاااا ...لا مفيش عادي يعني
سها بخبث : اصل اللي بتدوري عليه قاعد في الكافتيريا بيشرب قهوه لوحده يا عيني
سلمي بصتلها بضيق : انا مش بدور علي حد .... سلام
فكرت سلمي تروحله وتعتذرله عن أسلوبها وبعد فتره من التردد ...لقت رجليها بتوديها ناحيه الكافتيريا
وآدم كان قاعد لوحده علي غير العاده من غير البنات اللي حواليه
سلمي : احم .... هاي يا آدم 😊
آدم بصلها وقلبه بيدق جامد ....بيقول جوه نفسه لقلبه ..انا المفروض زعلان منها اهدي بقا بطل دق جرالك ايه؟
آدم قام وقف : احم هاي يا سلمي ...اتفضلي اقعدي
قعدت سلمي : شكرا .... ممم شكلك زعلان مني مش كده؟ 🙄
آدم : لا ابدا ازعل ليه بس
سلمي نزلت وشها لتحت 😔 انا اسفه يا آدم مكنتش اقصد أقل زوق معاك
آدم في نفسه : هو ازاي اسمي حلو اوي منها كده ..وايه اللي جابرها تيجي تعتذر بعد اللي حصل امبارح المفروض انها تكرهني 🤔
رد آدم: عادي محصلش حاجه ..انا كنت عاوز اتعرف عليكي مش اكتر ومش قصدي اعطلك ولا حاجه ..بس انتي جديده في الكليه وقولت يمكن تحتاجي حاجه 😊
سلمي بإبتسامه خجل : ميرسي اوي يا آدم علي اهتمامك .... امال فين حريمك؟ 😁
آدم: افندم ؟!! 🙄
سلمي: قصدي حريم السلطان بتوعك اللي دايما ماشيين معاك ...وضحكت
آدم في نفسه ... يالهوي علي ضحكتها هو في كده 🙂
آدم: واضح انك مهتمه اوي ومركزه 😉
سلمي ابتدت تاخد بالها أنها دخلت في أموره الخاصه و ظهر عليها علامات الضيق ....لا ابدا ولا مهتمه ولا حاجه . انا اسفه علي السؤال ...عموما عن اذنك وقامت تمشي
مسكها آدم من اديها : انا اسف لطريقتي ..ارجوكي خليكي
سلمي دقات قلبها زادت اوي خصوصا انها اول مره تقرب منه كده وتشوف عنيه الرمادي الجميله من قريب
سلمي : معلش لازم امشي عشان متأخرش
آدم : معلش مش هأخرك اقعدي بس شويه واشربي حاجه
قعدت سلمي وفضلوا يتكلموا عن الكليه والدكاتره والمنهج والوقت خدهم
سلمي بصت في ساعتها : يا نهااار انا اتاخرت اوي
آدم: استني ... ممكن اوصلك؟؟
سلمي: لا لا شكرا انا هروح لوحدي .... وميرسي علي النسكافيه☺️☺️
آدم: سلمي بلييز مفيهاش حاجه لما اوصلك ..وعشان كمان ابقي مطمن عليكي
سلمي سمعت كلام آدم وسكتت وقالت في نفسها ...يطمن عليا ليه ؟؟ 🤔🤔
هزت سلمي رأسها بالموافقه
وصلوا عند بوابه الكليه
آدم : ثواني هجيب عربيتي 🙂
وفجاه عربيه جات بسرعه ووقفت قدام سلمي .....
ياتري العربيه فيها مين ؟؟
قدام بوابه الكليه...
آدم: ثواني هجيب عربيتي 🙂
وفجاه جات عربيه بسرعه ووقفت قدام سلمي
حاوطها آدم بدراعه ورجعها لورا وهو شايط من الغضب
وقفت العربيه وكان فيها بنت وشاب
راح آدم ناحيه الشاب ونزله من العربيه ومسكه من لياقه القميص ولسه هيضربه .....
سلمي بتعجب : خالد!!! 🤨
استني يا آدم استني متضربهوش ده خالد ...ابن خالتي
بصله آدم بغضب وسابه 😤
ندي بضحك هستيري : خفتي صح هههههههه كان لازم تتصوري
سلمي بغضب : انتي هبله كان هيموتني وتقوليلي خفتي 🔥🤬
ندي: متقلقيش خالد سوبر سواق وعمره ما كان هيفوت فيكي ابدا وغمزتلها 😉😉
بصت ندي لادم وقالتلها : مش تعرفينا بالبطل
سلمي بإرتباك : ااا آدم ...زميلي في الكليه
دي ندي اختي يا آدم وده دكتور خالد ابن خالتي ....دكتور جراحه في لندن
ندي موجهه كلامها لادم: ابن خالتها وخطيبها
الدم غلي في عروق آدم اول ما سمع خطيبها دي وبصلها كأنه بيقولها مقولتيش انك مخطوبه
مد آدم أيده عشان يسلم علي ندي وخالد
خالد: تشرفنا يا آدم وشكرا لانقاذك لسلمي
وبس لندي وابتسم 😁
فهم آدم أنها تريقه وقال: لا ازاي ده واجب واي حد مكاني كان عمل كده
عموما عن اذنكم ...وفرصه سعيده
ندي : انا اسعد والله 😍
مشي آدم وجواه نار 🔥 مش عارف يطفيها وعنده مليون سؤال ل سلمي مش عارف يسأله
ندي : مقولتيش انك عندك زمايل موووز كده ...ايه الجمر ده بس
سلمي : احترمي نفسك شويه وكفايه مراهقه واعقلي
خالد: وانتي محروقه ليه كده ...ماتسبيها تعاكس وتعيش سنها
سلمي بغضب: ولا محروقه ولا حاجه يا دكتور بس واضح أن العيشه بره خلتك تنسي حاجات كتير عن مصر
عموما هنروح ولا اخد تاكسي
خالد: هنروح اكيد اتفضلي اركبي
قعدت ندي قدام جمب خالد وسلمي ورا
في الطريق...... خالد: لسه زي ما انتي حلوه يا سلمي متغيرتيش
سلمي سمعت وطنشت الكلام
ندي: يا سمسمه ....خالد بيكلمك
سلمي بقرف : ااه معلش مش واخده بالي قولت ايه ؟
خالد : ولا حاجه متخديش في بالك 😏😏
ندي: بيقولك لسه حلوه زي ما انتي
ضربتها سلمي علي رأسها من ورا ....اسكتي شويه
ندي : 😤😤
شاف خالد كافيه حلو اوي وشيك في الطريق
خالد: ايه رأيكم نقعد هنا نشرب حاجه؟🙂
ندي : ياريت يلا
سلمي : لا ..... لازم نروح البيت عشان بابا لوحده وكمان اكيد مكلش حاجه
خالد : ربع ساعة بس
سلمي : معلش خليها مره تاني
خالد : طيب زي ما تحبي
وصلوا البيت وسلمي نزلت من العربيه قبلهم وطلعت البيت سلمت علي باباها ودخلت اوضتها علطول
وبعدها دخل خالد وندي ..... السلام عليكم
عم حسين: وعليكم السلام ورحمه الله وبركاته...... مالها اختك يا ندي دخلت اوضتها علطول حد ضايقها؟؟
ندي: لا يا بابا محدش ...عموما هدخل أشوفها
دخلت ندي لسلمي اللي كانت متعصبه علي الاخر 😤😤
ندي : في ايه مالك؟
سلمي بعصبيه: مالي؟ وكمان بتسألي ...انتي دايما بتتصرفي من دماغك من غير ماتفكري .. بتاخدي قرارات بالنيابه عني من غير ماتفكري هضايق ولا لا
ندي: في ايه طيب فهميني
سلمي: جبتي خالد الكليه واحرجتيني قدام زمايلي وقررتي نقعد شويه في كافيه ...فين بقت رأيي في كل ده ..امتي هتكبري وتعقلي
طبعا صوتهم كان جايب لبره الاوضه واللي سمعه ابوهم وخالد اللي كان موجود بره
حس خالد أن وجوده مش مرغوب فيه وأن كل ده بسببه
خالد: طب استأذن انا يا عمي وان شاء الله هزورك وقت تاني
عم حسين: ماشي يابني تشرف في اي وقت
خالد : مع السلامه
عم حسين : في حفظ الله
دخل عن حسين للبنات اللي كانو لسه بيتخانقوا ووقف وسطهم من غير ولا كلمه
فهموا أن صوتهم سمع بره من غير قصد وحسوا بالاحراج
الاتنين : بابا انا اسفه
عم حسين: ندي..... سبيني مع سلمي شويه
خرجت ندي وقفلت الباب
قعد عم حسين جمب سلمي علي السرير
مالك يا بنتي ليه كل ده ؟
سلمي بعياط: اسفه يا بابا مضغوطه شويه في الكليه والامتحانات قربت وفي كذا حاجه في دماغي ...ارجوك متزعلش
باس عم حسين رأسها وقال: يابنتي انا عمري ما ازعل منكم
انا زعلي كله عليكم .... سكت شويه وكمل... انا نفسي اشوفكم مرتاحين ومبسوطين قبل .....
حطت سلمي اديها علي بوقه: بس يابابا والنبي ما تكمل متوجعش قلبي انا مقدرش اعيش من غيرك انت كل حاجه ليا احنا من غيرك نضيع يا حبيبي
عم حسين : حبيبتي ... انا مش هجبرك علي حاجه بس خالتك كلمتني انهارده وانا حبيت اتكلم معاكي عن خالد
هو شاب كويس ومتربي معاكي وعارفينه كويس ودكتور قد الدنيا
هو متقدملك وحابب يخطبك وحابب اعرف رأيك
سلمي : .........
عم حسين: مترديش دلوقتي يا بنتي وفكري كويس وبعدين اديني رأيك
ومتزعلش من اختك انتي عارفه انها طايشه ومجنونه
سلمي : عارفه والله انا اضايقت شويه بس ..ربنا يهديها
عم حسين: ربنا يخليكم لبعض ويخليكم ليا
باست سلمي ايد ابوها ..وسابها وخرج ومن وقتها دماغها مش بتبطل تفكير
من بعد كلام ناديه في حاجات كتير اتغيرت جواها من ناحيه آدم وحاسه أنه هو كمان جواه حاجه ليها
بالرغم انها لسه متعرفش عنه حاجه ....ياربي مش عارفه اعمل ايه ونفسي افرح بابا واطمنه عليا..فضلت تفكر وتفكر لغايه ما غلبها النوم ونامت
عدي ٤ ايام من غير اي جديد ولسه سلمي مقالتش ردها وفي الفتره دي آدم كان بعيد عنها ومكنش بيكلمها وكل اللي بينهم نظرات ورجع آدم لعادته مع البنات اللي حواليه
فهمت سلمي أنه لا يمكن يتغير ابدا اللي زي آدم ميعرفش يرجع يحب تاني بعد قلبه ما مات
رجعت سلمي من الكليه وقلبها محروق مش عارفه السبب يمكن غيرانه علي آدم من اللي حواليه
ولا يمكن ندمت أنها حست أنه ممكن يتغير
دخلت سلمي البيت سلمت علي باباها كالعاده
سلمي : بابا انا موافقه ..