رواية اعطيت لحبك فرصة فخدعتني
🥀الفصل الثالث والعشرون 🥀
بقلم صباح وحيد
وبعد مرور أسبوعين جاء اليوم الذي ينتظره الجميع وخصوصا احمد وملك ..وكان يجلس الجميع في سعادة لاتوصف وكان قد جاء المأذون وذهبا الجميع إليه ليتم عقد قرآن ملك وأحمد
المأذون: الف مبروك وربنا يتمم بخير ..فين والد العريس والعروسة واتنين شهود
ادهم: وهو يعطيه البطاقة اتفضل يا مولانا
المأذون: كويس دة الشاهد الاول فين الشاهد التاني !!
شخص وهو يرمي البطاقة علي الطرابيزة أمام المأذون وهو يقول: انا الشاهد التاني يامولانا
سوسن بصدمة: رااامي !!!!!!!
رامي بحزن: قولت مش معقولة يبقي اخويا كتب كتابه ومحضرش ومكونش موجود جمبه في يوم زي دة
سوسن ببكاء وتحتضنه: وحشتني يارامي وحشتني يابني
المأذون: يلا يا أستاذ لو سمحت خلينا نكتب
أحمد: معلش يامولانا اخويا بس بقاله فترة غايب عننا
المأذون: اه ..حمد لله علي سلامته
رامي: اتفضل يامولانا انا جاهز وبعتذر منك
وختم المأذون كتب الكتاب بقوله: وبارك الله لكما وبارك عليكما وجمع بينكما في خير
"وقد ملئت الزغاريط ارجاء المكان والفرحة تعم المكان والسعادة في قلوب الجميع والفرحة ظاهرة علي وجوههم ..واحتضن أحمد ملك بقوة وهو يقول: اللهم لك الحمد كما ينبغي لجلال وجهك وعظيم سلطانك اللهم لك الحمد علي جمعنا معا ..ثم أمسك بيديها وقبل بأعلي رأسها قائلاً: بحبك
ملك بإبتسامة: وانا بموت فيك
"وظلت الزغاريط تملأ المكان والسعادة في قلوب الجميع ..ما أجمل الفرح حقًا عندما يكون من القلب ما أجمل السعادة الحقيقية في وسط اشخاص يحبوننا ونحبهم ..ما أجمل فرحة الحب الحقيقي الذي ينتهي بتحقيق هذا الحلم الذي طال انتظاره بعد تعب ومشقة ..حقًا طعم سعادة له شكل آخر وطعم النجاح في تحقيق إنجاز ما بعد تعب ومشقة له طعم آخر من السعادة"
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
حنين: ماما
كوثر: نعم ياحبيبتي
حنين بتوتر: انا كنت عاوزاكي في موضوع كدة !!
كوثر: قولي ياحبيبتي
حنين: بصي بصراحة كدة ياماما في ..ح. ح..
كوثر وهي تضع يديها علي وجه حنين بحنية: اتكلمي ياحبيبتي علطول بلاش الخوف والتوتر دة
حنين: بصي بصراحة كدة ياماما في واحد معجب بيا وبيحبني وعاوز ييجي يتقدم
كوثر بإبتسامة: أهلا وسهلا بيه ييجي يتقدم الباب مفتوح يتفضل ..بس قوليلي عرفتيه منين وشافك فين وقالك امتي !!
حنين: دي حكاية طويلة اوي ياماما
كوثر بإبتسامة: اسمعها
حنين بإبتسامة: هحكيلك
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
أحمد بحب: مبروك ياعروسة
ملك بإبتسامة: الله يبارك فيك
أحمد: نورتي بيتك ياحبيبتي ياأحلي واجمل عروسة شافتها عيني
ملك: منور بوجودك فيه
أحمد: قومي غيري هدومك واتوضي وتعالي نصلي ركعتين نبدأ بيهم حياتنا الجديدة
ملك بطاعة: حاضر ..عن اذنك
"وبعد ربع ساعة تقريبا خرجت ملك مرتدية إسدال الصلاة فنظر إليها احمد بإعجاب شديد ..فتحدثت ملك قاطعة لهذا الصمت وهي تقول: ادخل اتوضي يلا وانا مستنياك
"ودخل احمد ليتوضأ وبعد مرور بعض الوقت ليس بكثير خرج وانتهي من وضوءه"
أحمد: يلا
ملك بطاعة: يلا
"وقد أقام احمد الصلاة وبعد مرور القليل من الوقت كانا قد انتها من اداء صلاتهما"
أحمد وهو يعتدل ويمسك بيد ملك: كنت مستني اليوم دة ييجي من زمان اوي من يوم ماحبيتك ودخلتي قلبي وانا كنت مستني اليوم دة وكان نفسي تفرحي من قلبك بجد زيك زي اي عروسة نفسها تفرح بنفسها وفستانها وعريسها وكان نفسي يكون في ظروف احسن من كدة بس قدر الله وماشاء فعل ..كنت عمال بفكر وبحلم بفرحنا وازاي اعملك فرح محصلش في الدنيا ويليق بيكي ويوصلك حبي ليكي مع أنه مفيش حاجة تقدر أنها توصف ولا توصل حبي ليكي
ملك وتمسك وجهه بين يديها وبدموع: انت فرحي وفرحتي وجودك كويس وجمبي بألف فرح عندي ..انا كنت بموت يا احمد من ساعة أما عرفت اللي حصلك عنيا مكنتش بتلحق تنشف من الدموع قلبي من كتر الحزن أللي كان فيه حسيت وكأني مافرحتش قبل كدة فجأة لقيت كل حاجة اسودت في وشي وكل حاجة اتقفلت بقيت واقفة متصنمة من أثر الصدمة مش عارفة المفروض اني اعمل ايه ولا اتصرف ازاي دخلت في كذا حالة اغماء ..فصدقني اللي حسيته وشوفته يخليني اقولك ولا فارق معايا فرح ولا اي حاجة غيرك انت وانك تبقي كويس ومعايا وبس ..وانا حابة اكون معاك دلوقتي في التوقيت دة بالذات مش بعده اكون جمبك بسندك وبدعمك وبقويك
أحمد: انتي دايما جمبي وعمرك ماكنتي بعيد
ملك: والعمر كله مع بعض يارب ..يلا عشان تنام عشان ترتاح
أحمد: حاضر ياحبيبتي
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
كوثر بإبتسامة: وانتي رأيك ايه ياحبيبتي !!
حنين: مش عارفة ياماما حاسة اني متلغبطة ومش عارفة اخد قرار
كوثر: لا لازم تعرفي ولازم تاخدي قرار
حنين: خايفة ..خايفة ياماما
كوثر بحنان: خايفة من ايه بس ياحبيبتي !!
حنين: خايفة اكون بظلمه معايا ياماما
كوثر: ليه بتقولي كدة بس يابنتي !!
حنين بدموع: لاني لسة مقدرتش انسي كمال الله يرحمه
كوثر بحزن: الله يرحمه يابنتي ويجعل أراضيه الجنة
حنين: مش قادرة اتخيل اني ممكن احب واحد تاني غير كمال واتجوزه مش قادرة أنساه ولا قادرة اتخيل أني ممكن اكون مع حد غيره واني اقدر احب حد تاني غيره مش بيفارقني ياماما ولا بيفارق خيالي لحظة ودايما معايا في احلامي وكل مكان بروحه بيكون معايا فيه وببقي شايفاه في كل الأماكن بفتكر ياماما واقول كان زماننا دلوقتي متجوزين ومعانا عيالنا واتخرجت وخلصت واتخيل حياتنا سوا أللي عيشت بحلم بيها طول حياتي وفجأة اتبدلت كل حاجة في لحظة وفاكرة كل حاجة كأنها امبارح ..مش شايفة غيره ولو شوفت غيره بكون شوفته فيه شايفة ملامحه في الناس اللي بشوفها لكني مش شايفة ملامحهم هما ولا قادرة اتحقق منها
كوثر: ياحبيبتي ادعيله هو محتاج الدعاء وهو اكيد حاسس بيكي وبكل حاجة
حنين بدموع: بدعيله ..بدعيله ياماما بس مش قادرة أنساه ياماما ولا قادرة احب غيره وخايفة اظلم حد معايا بسبب كدة
كوثر بدموع: اهدي ياحبيبتي وادعيله ربنا يرحمه ويحسن إليه
حنين: صعب ..صعب اوي ياماما فراق حد عزيز عليكي وغالي اوي عليكي صعب العيشة في الحياة من بعده والاصعب من دة كله كل مكان بتروحيه تشوفيه فيه وشايفة ملامحه في وشوش الناس
كوثر وتحتضنها: بس خلاص أهدي هو في مكان احسن من هنا مليون مرة ادعيله بس
حاتم وهو يدخل: أيوة ..أيوة ..ماليش انا شوية من الحنية دي
كوثر: ياسلام دة انت اول فرحتي والحيلة وسندي وضهري
حاتم وهو يجلس ويلاحظ بكاء حنين: مالك ياحنين في ايه !!
حنين: مفيش ياحاتم انا كويسة
حاتم: اومال معيطة ليه كدة !!
حنين: اه دة كان حاجة دخلت في عيني مضايقاني فبتخلي عنيا تدمع كأني معيطة
حاتم ويرفع وجهها بيديه: عنيكي بتقول انك بتكدبي ودموعك بتقول إنك كنتي معيطة جامد
حنين: مفيش صدقني انا تمام
حاتم: ماما بعد اذنك سيبيني مع حنين شوية
كوثر: حاضر يابني بس بالراحة عليها
حاتم: ماتقلقيش ياحبيبتي
كوثر: هروح احضرلكم الغدا
حاتم: ها احكيلي بقي فيكي ايه !! ولا هتخبي عليا !!
حنين: اصل كان في عريس متقدملي وعاوز ييجي يقابلكم وكدة
حاتم: وبتعيطي عشان كدة !!
حنين: لا بعيط عشان افتكرت كمال ومش متخيلة اني ممكن ادخل حياتي حد بعده ولا احب غيره
حاتم: بصي ياحبيبتي كمال مات الله يرحمه وكلنا هنموت ودة كأس وداير علينا كلنا ولازم كلنا نشرب منه بس كل واحد وليه معاد هيشرب من الكاس دة ولحد ماييجي معادنا بيكون معانا كاس تاني بنملاه بأعمالنا واحنا أللي بنختار نملاه بايه عشان يوم ماييجي دورنا ونشرب من الكاس التاني نبقي مطمنين إن كاسنا أللي مليناه هنشرب منه بس من الكاس التاني بقي ..زعلتي علي كمال اد ايه !! سنين وايام وليالي طيب واخرتها !! هو راح للي احسن مني ومنك وأللي احن عليه اكتر مني ومنك يبقي ندعيله دعاء ينفعه
حنين: بس مش قادرة أنساه ياحاتم مش قادرة اتخيل اني احب حد غيره
حاتم: طيب وبعدين !! الحزن في القلب ياحبيبتي ومش معني كدة بقولك انسيه بس برضو عيشي حياتك خدتي من الحزن أللي يكفيكي خلاص بقي تتجهي لحياتك وتكملي حياتك مع انسان يكون بيحبك ومش معني كدة بقولك اكرهيه لا حبيه برضو واديله حقه من الحب والاهتمام زي ماهتاخدي منه ..وكل شيء مقدر ومكتوب مالناش اي دخل بيه ولازم نرضي باللي ربنا كتبهولنا ونقوله الحمد لله ربنا بيختبرنا وبيختبر صبرنا وقوة إيماننا بيه ولازم نصبر ونثق في ربنا لأن حياتنا كلها بين ايديه وربنا اما بيحب حد اوي بيبتليه ابتلاء صعب لأن الابتلاء علي اد المحبة فدة ابتلاء من ربنا تاخدي عليه حسنات وكمان "إن الله لا يكلف نفسا إلا وسعها" يعني ربنا عمره مايديكي حاجة وهو عارف انك مش هتقدري تتحمليها هو اه وجعنا في حاجات بنحبها بس عشان يدينا حاجات محتاجين ليها ويعوضنا بالاحسن ..مش يمكن لو كنتو اتجوزتوا كان حصل بينكم مشاكل وكرهتوا بعض !! وربنا مش عاوز كدة وعاوز تكونوا بتحبوا بعض زي مانتو وآخر حاجة بينكم حب ومودة ومشوفتيش منه حاجة تخليكي تكرهيه وهو كمان كدة ربنا ليه حكمة في كل حاجة بتحصل في حياتنا .. ويمكن ربنا أراد مايجمعكيش بيه في الدنيا عشان يجمعك بيه في الأخرة ويعوضك بحد يعوضك عنه في الدنيا ويمكن كمان ربنا جعله سبب أنه ياخدك للجنة معاه ربنا ليه حكمة في كل حاجة بتحصلنا وبنعرف الحكمة دي بعدين بس الإنسان بطبيعته ضعيف لانه بشر
حنين بارتياح: كلامك كله صح والحمد لله علي قدر ربنا اختاره لينا وربنا يرحمه يارب ويجعل مأواه الجنة ..هو الفراق بس أللي صعب
حاتم ويحتضنها: ربنا يسعدلي قلبك يارب ويفرحك واشوفك اسعد إنسانة في الدنيا
حنين: ربنا يخليك ليا يارب
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
سهير: بس البيت فضي علينا
ياسمينا: فعلاً والله ياماما ملك كانت عاملة حس مش متخيلة البيت من غيرها
حسين: ربنا يهدي سرها يارب
سهير: يارب ..بس كان نفسي تعمل فرح ونفرح كلنا وتكون في ظروف احسن من دي
حسين: ماهو كتب الكتاب كان حلو وفرحنا فيه كلنا
سهير: لا بس برضو الفرح دة بيبقي حاجة تانية انا مش عارفة هي استعجلت علي ايه
حسين: بنتك ولا استعجلت ولا حاجة بنتك اتصرفت صح
سهير: ازاي يعني أما متعملش فرح دة صح !!
حسين: دي حاجة ترجعلها هي وجوزها ..ولقت جوزها تعبان ومش هيقدروا يعملوا فرح دلوقتي تستني لما يبقي كويس ويعملوا !! إنما هي بنت اصول قالت لا واكون معاه وجمبه في تعبه مش بعيد عنه عشان بتحبه والحب تضحية وهي ضحت عشان تثبتله الحب دة
سهير: عندك حق وهو كمان بيموت فيها
حسين: ربنا يهدي سرهم يارب ..ونظر لياسمينا: وعقبال الشعنونة الصغيرة بتاعتنا بقي
ياسمينا: بقي كدة يابابا !! ماشي
حسين: شوف البت هتعمل نفسها مقموصة
ياسمينا بضحك: مقدرش ياابو ملك ازعل منك ياجميل انت ياقمر
حسين بضحك: أيوة هاتي من الاخر وقولي عاوزة ايه
ياسمينا بضحك: يافاهمني انت ياأبو ملك ياقمر ..نازلة ساعة كدة وجاية
سهير: نازلة رايحة فين !! رايحين لأختك النهاردة
ياسمينا: ماتخافيش مش هتاخر رايحة الشركة كدة وجاية علطول عشان اشوف انزل الشغل امتي
سهير: طب ماتتصلي بأدهم واسأليه بدل ماتنزلي وتيجي
ياسمينا: ماهو أدهم مابيردش وقلقانة عليه فاطمن عليه بقي
حسين: افهمي بقي هي نازلة عشان تشوفه
ياسمينا بضحك: اخ منك انت اه ياابو ياسمينا ..بس والله فعلا مش بيرد وانا قلقت عليه
حسين بضحك: طيب ياحبيبتي انزلي بس ماتتأخريش
ياسمينا: عيوني ..يلا سلام
سهير وحسين: سلام ياحبيبتي
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
ياسمينا تدخل الشركة ومتجهة لمكتب أدهم فتقابلت مع مصطفي الذي أوقفها
مصطفي: ياسمينا ازيك
ياسمينا دون النظر إليه: الحمد لله بخير
مصطفي أوقفها: مبروك لملك وربنا يهدي سرها
ياسمينا: شكرا ليك وعقبالك انت وهند
مصطفي: هو انا ممكن اتكلم معاكي شوية !!
ياسمينا: تتكلم معايا ليه وبمناسبة ايه !! احنا مفيش بينا كلام
مصطفي: هما كلمتين ..ياريت تكوني مسامحاني ومش شايلة مني وبلاش الطريقة دي في التعامل وتتعاملي معايا كزميل زي مابتتعاملي مع الباقي
ياسمينا: بالنسبة للسبب الأول مابقاش فارق معايا ولا بقيت حساه ولا شايفاه لاني مابقتش شايفاك اصلا ولاني كمان ربنا عوضني بالاحسن الحمد لله ورزقني باللي عوضني عن كل الوجع دة والحب الحقيقي ..أما بقي للسبب التاني هو مفيش بينا تعامل اصلا عشان تقولي اتعامل معاك ازاي
مصطفي: علي فكرة انا حبيتك بجد ومكنتش بتسلي زي مانتي فاكرة بس ظهور هند المفاجئ لغبطني ابقي معاها واني كنت مستنيها بقالي سنين بعد ماكنت فقدت الامل في رجوعها ولا اكمل معاكي وقلبي معاها واخبي عنك الحقيقة واظلمك معايا
ياسمينا: مابقاش ليه لازمة الكلام دة دلوقتي انك تقوله وانا اسمعه لانه مابقاش يفرقلي ولا بقي يفرق معايا إذا كنت بتحبني ولا لا وكل أللي طالباه منك هي حاجة واحدة انساني ..تنساني يامصطفي لاني فعلا نسيتك ودلوقتي بقيت مخطوبة وبحب أدهم ومستحيل اخونه لاني اكتشفت اني محبتش ولا هحب غيره فانساني راحة ليك انت ..عن اذنك
"وتركته واقفا وذهبت متجهة لمكتب أدهم وطرقت طرقات خفيفة علي الباب ثم دخلت"
ياسمينا: قافل تليفونك ومش بترد ليه !!
أدهم بتعب وينظر لشاشة هاتفه: انتي رنيتي كتير فعلا معلش انا اسف من التعب نمت غصب عني
ياسمينا بقلق: مالك انت تعبان !!
أدهم: لا عشان سهرت امبارح بس بخلص شغل كتير
ياسمينا: طيب قوم روح وارتاح بدل مابتنام في الشغل كدة
أدهم: لا خلاص انا فوقت هشرب مج نسكافيه وافوق كدة ..انتي جاية في حاجة ولا ايه !!
ياسمينا: لا لقيتك مش بترد وبعد كدة تليفونك مقفول فقلقت عليك قولت اجي اشوفك واطمن عليك
أدهم: ربنا يخليكي ليا ..ناوية تنزلي الشغل امتي !!
ياسمينا: كنت بسألك هنزل امتي بقي
أدهم: انتي عاوزة امتي !!
ياسمينا: ممكن من بكرة عادي لو حابب
أدهم: لا خليكي من أول الشهر احسن
ياسمينا: اشمعنا يعني من أول الشهر !!
أدهم: هتنزلي نص الشهر تعملي ايه فخليكي من الاول احسن
ياسمينا: أللي تشوفه
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
سوسن: وحشتني يارامي هونت عليك يابني !!
رامي: سامحيني يا أمي علي غيابي ..انا خلاص فوقت
شاهين: جاي عاوز ايه يارامي !!
رامي: جاي محتاج لحضنكم
شاهين: حضننا أللي بعيته واشتريت بيه حضن مراتك !!
رامي: تعبت خلاص يابابا مابقتش مستحمل
شاهين: ليه مش دي اللي بعتنا كلنا كدة عشانها !! مش دي أللي وقفت قصادنا عشانها !! مش دي اللي قالتلك ياأنا ياأهلك واختارتها !! اقولك ايه ولا ايه بس
رامي بتعب: معاك حق تقول كدة واكتر من كدة كمان ومقدرش أرد ولا ادافع عن نفسي حتي لأني غلطان مش في حقكم وبس لا وفي حق نفسي انا كمان قبل منكم ..غلطان أما اتجوزتها وانا عارف أللي هيحصل غلطان أما صدقتها وسمعت كلامها وجيت علي نفسي وعليكم عشانها وهي ماتستاهلش غلطان عشان اديتها حجم اكبر من حجمها وقيمة اكبر من قيمتها غلطان اني اديتها الفرصة أنها تسيطر عليا واسمع كلامها واكون ليها لوحدها غلطان اني حبيتها غلطان في اختياري من البداية واديني اهو بتحمل نتيجته لوحدي زي برضة ماختارته لوحدي
سوسن: ايه أللي حصل يابني !!
رامي بتنهيدة: انا طلقت ثريا
سوسن بصدمة: ايه !! طلقتها !!
شاهين: وطلقتها ليه !!
رامي: عشان دة الصح واللي المفروض كان يحصل من زمان لكن انا أللي كنت بكابر مع نفسي وخليت حبي ليها هو اللي ينتصر واديت الفرصة لقلبي ينتصر علي عقلي
سوسن: والعيال يابني !! خراب البيوت مش بالساهل
رامي: هو خلاص اتخرب ياأمي ومن زمان اوي بس انا اللي مكنتش واخد بالي أو مكنتش عاوز اخد بالي عشان محدش يغلطني واسمع كلمة من حد انا عارف اني هسمعها عشان محدش ييجي يقولي اختيارك وياما قولنا بلاش عشان مشوفش نظرة الشماتة والانتصار انهم هما اللي كانوا صح وانا أللي غلط لكن كان لازم اشوف دة وقررت اشوفه وخدت القرار أللي كان المفروض يتاخد من خمس سنين فاتوا ..وبالنسبة لعيالي هيتربوا معايا وفي حضني مش هسيبهم ليها طبعا تربيهم زيها وتطلعهم زيها بنفس عيوبها ..هربيهم علي الأصول وعلي الحب والخير مش علي الحقد والكره والأنانية
شاهين: بص يارامي انا هقولك كلمتين يابني خراب البيوت مش بالساهل وكلمة طلاق مش كلمة سهلة عشان نستهون بيها كدة عيالك ذنبهم ايه في اللي بيحصل بينكم !! ذنبهم ايه يتربوا بعيد عن حضن ابوهم ولا حضن امهم ليه مايبقوش بين حضن ابوهم وأمهم ..اقولك انا ذنبهم ايه ذنبهم انك أما جيت تختارلهم ام اختارت غلط وحاربت الدنيا كلها عشانها وخسرت كل حاجة عشانها وبعت العالم كله عشان تشتريها ازاي قدرت تخسر كل حاجة عشانها وهي مقدرتش حتي تخسر حاجة واحدة عشانك ولا تضحي عشانك ..ازاي مفكرتش انها مالهاش خير في أهلك مش هيبقي ليها خير فيك ولا في عيالك !! ومش أمينة علي اهلك يبقي عمرها ماتكون أمينة عليك وعلي بيتك وعلي عيالك ..بتكرهك في أهلك يبقي هتطلع العيال يحبوا ازاي !! انت اختارت غلط واديك بتتحمل نتيجة اللي حصل اهو ولوحدك وفوقت بس فوقت متأخر شوية
رامي: الحمد لله علي كل حاجة في الاول وفي الاخر نصيب ومحدش بياخد اكتر من نصيبه ولا اكتر من اللي مكتوبله مهما عمل ودة كان نصيبي وقدر ربنا وانا راضي بيه والحمد لله
سوسن بحزن: الحمد لله يابني
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
سامية بزعيق: ياصافي ياصافي
صافي: أيوة ..أيوة ياماما في ايه بس !!
سامية: تعالي اقفي معايا وخلي عندك دم شوية هتبقي ست بيت ازاي بس !!
صافي: حاضر ياماما قولي عاوزة ايه وانا هعمله ومن غير زعيق وخلاص
سامية: وهو انا لازم اقول ماتعملي من نفسك تلاقيني واقفة في المطبخ تيجي من نفسك مش لازم اندهلك هتتعلمي امتي بس ..وتركتها وخرجت
"وأنهت صافي المطبخ ومابه وذاهبة ليوقفها صوت والدتها وهي تقول: انتي مش شايفة الدنيا متبهدلة ازاي هتسيبيها كدة !! ماتعملي من غير ماقول
صافي وتجلس بجانبها: ماما علي فكرة انتي لو كنتي طلبتي مني وقولتي اعملي كذا كنت عمري ماهقولك لا إنما انتي عمالة تزعقي وكأنك بتتلككي بلاش ياماما متضايقة من حاجة تطلعيها عليا من غير سبب ومن غير مافهم ليه وعشان ايه
سامية: انا كل دة خايفة عليكي بكرة تتجوزي ويبقي ليكي بيت عندك اخوكي هيجيب واحدة تخدمه
صافي: عارفة المشكلة ايه !! إن كل ام بتدرب بنتها ازاي تكون خدامة شاطرة وكأنها ولدتها عشان تخليها خدامة وأنها في الاول وفي الاخر ومهما طلعت فهي في الآخر خدامة ومش هتكون اكتر من كدة
سامية: وهي دي سُنة الحياة وربنا قال كدة و..قاطعتها صافي: ماتقولوش كلام انتو أللي قايلينه وتقوله اصل ربنا اللي قال كدة ..ربنا قال البنت تبقي خدامة ويتجوزها عشان تخدمه !! ربنا قال بتتولد عشان تكون خدامة بس !! دة ربنا موصي علي المرأة في القرآن والرسول قال رفقًا بالقوارير ..احنا مش بنتولد عشان نكون خدامين وإن كانت البنت أللي بتتجوز بتخدم جوزها فدة زوقيا منها واخلاق إنما مش أمر عليها انتو أللي اخترعتوا دة وأما بتيجوا حتي تعلموا بناتكم بتعلموها بطريقة غلط بتعلموها انك في الاول وفي الاخر مجرد خدامة وتعالي ادربك تكوني خدامة شاطرة ازاي عشان محدش يهينك مع انها لو قالتها بطريقة تانية زي مثلا تعالي نعمل أكلة كذا مع بعض عشان بعد كدة انتي اللي تعمليها لينا وكل يوم تتعلمي حاجة جديدة هيكون احسن من كل شوية تقولها انتي اخرك ست بيت ومش هيتحملك يوم و..و..وكلام كتير اللي بنسمعه يعني حتي بتعلموا بطريقة غلط ماهي طبيعي أما تسمع كدة تكره الجواز وتكره كل حاجة حتي لو شاطرة في البيت وييجي منها بسبب الكلام دة هتتعب نفسيا من الموضوع مش هتعمل ولا هتتعلم حاجة لانكم أما جيتوا تعلموها علمتوها بطريقة غلط ووصلتلها انها خدامة فدة بقي ليه اثر في نفسيتها أنها بتتعلم ازاي تكون خدامة فطبيعي بتتقفل من الحاجة دي وعلي شرط لو بصيتوا من ناحية تانية هتلاقوها ناجحة في حاجات تانية وممكن تكون مقاربة لنفس الفكرة بس الفرق بقي أنها بتعمل دة وهي حباه وأنه ليها وإفادة لنفسها مش لغيرها ولا جرح ليها
سامية: جايز يكون كلامك صح بس مفيش حد بيفهم الكلام دة يابنتي دلوقتي
صافي: لانكم انتو السبب في دة وانتو اللي رخصتوا بنفسكم لكدة واديتوا الفرصة لكدة ..ولو كان الراجل بيتجوز عشان واحدة تخدمه ففي الف واحدة ممكن تخدمه ومن غير مايتجوز ويكلف نفسه الهدف الأساسي من الجواز هو الحب لأن الحب قادر يعمل اي حاجة لأن حبها ليه هيخليها تعمله كل الحاجات اللي بيحبها وتتعلمها كمان عشان بس بتحبه ومعظم الستات اللي علاقاتها بتفشل بيكون بسبب أمهاتهم وعقدة نفسية عندهم اسمها خدامة فلو حتي هتعمل وتكون ممتازة في بيتها فدة هيقتل الحاجة دي جواها بسبب العقدة دي إنما لو اتعلمت بطريقة صح فتلاقيها ناجحة في بيتها لأنها هتكون بتحبه وحابة أنها تعمل وعندها طاقة تعمله كل اللي بيحبه وهي مبسوطة مش وهي متضايقة عشان واجب عليها ..ياريت أما تيجوا تعلمونا علمونا صح وبلاش كلامكم أللي يوجع وتحسسونا اننا جينا خدامين وبس في كذا طريقة تخلونا كويسين في بيوتنا غير طريقتكم دي وكلامكم اللي هو سبب في تدمير بيوت كتير بسبب العقد النفسية اللي عندهم أنهم ستات بيوت فشلة وهيطلقوا وإن اجوازهم متجوزينهم عشان كدة بس وكل دة بسبب كلامكم طول الوقت أنه هيتجوزك عشان كذا ولو مبقتيش كذا هتخربي بيتك
سامية: كلامك صح ياصافي ومحدش فينا خد باله من دة ولا حسبناها زيكم كدة ..بس انا تعبت ياحبيبتي وبكون عاوزاكي تساعديني وعشان خايفة عليكي برضو
صافي: انتي عارفة اني مش بتأخر ياماما بس انا الفترة دي مش فاضية وتعبانة بس وانتي عارفة مجرد مابعمل حاجة بتعب
سامية: مش عارفة ايه موضوع التعب دة قلقني عليكي تعالي نبقي نكشف يابنتي نطمن
صافي بدموع: اطمني ياماما انا كشفت وعرفت اللي عندي .. عندي كانسر وممنوعة من الزعل والمجهود الكتير واهو بتعالج منه والمفروض أنه ليا عملية وهتتعمل كمان شهر من دلوقتي إن شاء الله
سامية بصدمة وبكاء شديد: ايه !! من أمتي وازاي ماقولتيش حاجة زي كدة !!
صافي: اقول !! اقول ايه ولا اقول لمين !! الفترة اللي فاتت مكنتش مناسبة اني اقول اي حاجة ونفسيتي كانت صعبة مكنتش قادرة اقول ولا اتكلم في أي حاجة
سامية: انتي بنتي المفروض كنتي تقولي مهما كنا في ايه انتي بنتي عارفة يعني ايه ام !!
صافي: عارفة ..عارفة ياماما بس محبتش ازود عليكي الحِمل والزعل قولت فيكي أللي مكفيكي مش هاجي انا كمان وازود عليكي انا عرفت من فترة قصيرة اوي وبتعالج دلوقتي وإن شاء الله اعمل العملية واكون كويسة ويتكتبلي عمر جديد او يكون العمر انتهي لحد هنا وامشي
سامية بمقاطعة وتحتضنها: الف بعيد الشر عليكي يانور عيني وإن شاء الله هتعمليها وترجعي احسن من الاول كمان وترجعي صافي الشقية الفرفوشة أللي مالية البيت كله بهجة وحيوية
صافي: يارب ياماما ادعيلي
سامية: إن شاء الله ياحبيبتي ..هو اختبار من ربنا بس اختبار صعب
صافي: إن الله لايكلف نفسا إلا وسعها ..يعني لو ربنا عارف أنه هيديني الحاجة دي وانا مش هتحملها ماكنش عمره ادهاني وانا راضية بقضاء ربنا واختياره والحمد لله علي كل شيء
سامية ببكاء: الحمد لله ياحبيبتي
٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭
سمية: وبعدين ياثريا هتعملي ايه !!
ثريا: هعمل ايه في ايه بس ياماما !!
سمية: في بيتك وعيالك يابنتي
ثريا: قصدك أللي كان بيتي ياماما
سمية: طيب وعيالك ولا أللي كانوا عيالك برضو !!
ثريا بضعف ودموع: عيالي ..!! ماخدهم مني وحرمني منهم خلاص وياتري هعرف اشوفهم تاني ولا لا
سمية: ياما حذرتك يابنتي عشان نقطة زي دي لكنك ماسمعتيش وعملتي أللي في دماغك برضو
ثريا: كل دة عشان بحبه !! بصي ياماما انا معترفة اني أنانية في حبي ليه بس انا كنت عاوزاه ليا لوحدي عاوزاه معايا طول الوقت محدش ياخده مني عاوزة يكون لينا حياتنا لوحدنا محدش يعرف عنها حاجة ولا يقولنا نعمل ايه ومانعملش ايه ..ازعل ييجي ويصالحني وننسي أللي مزعلنا ونقعد نضحك ونسهر للصبح مع بعض مش حد يقوله لا سيبها هي غلطت لو انتو شايفيني غلطت فأنا بقولكم لا اني ماغلطتش انا كنت بحافظ عليه
سمية: مشكلتك انك لسة بتكابري برضو حتي وانتي غلطانة وعارفة انك غلطانة ..ليه أهله ماقالوش زيك كدة مع انهم هما أولي يقولوا كدة لأنهم هما اللي ربوه وكبروه وخلوه راجل يقدر يفتح بيت ولولاهم ولا كان اتجوزك ولا كنتي شوفتيه ..لو حد ليه الحق يقول الكلام دة فهيكون أهله مش انتي لأنهم هما الأحق بيه وانتي أللي جيتي وخدتيه منهم مش العكس ..مش بقولك متحبيش بس ماتبقيش أنانية في حبك لأن كل واحد في حياته ليه حق عليه من الحب والاهتمام وكل واحد حواليه ليه مكانة معينة في قلبه مالهاش علاقة بالتاني يعني أهله ليهم مكانة وانتي وعيالك ليكم مكانة برضو والاتنين مايتقارنوش زي مثلا مينفعش اقولك ياحنا ياجوزك وعيالك زي مانتي عملتي مينفعش حد فينا يختفي من حياتك لأن وجودنا كلنا في حياتك بيكملك وكل واحد ليه جزء في حياتك ولو اي طرف اختفي من حياتك هيأثر عليكي انتي بالسلب وهيكون علي الطرف الآخر برضو .. ومفيش حد بيتقطع من اهله يعني هو مش بيحبك !! ماهو معملش معاكي زي ماعملتي معاه ماقطعكيش من اهلك زي مانتي عملتي هل كدة يبقي مش بيحبك ؟! دي حاجة ودي حاجة تانية خالص ومينفعش الاتنين يتقارنوا ببعض ومهما بعد عن أهله فترة طويلة مسيره في يوم كان هيرجعلهم لأنهم في الاخر أهله أللي ربوه وكبروه وصرفوا عليه .. وأللي بتعمليه دلوقتي دة بكرة ولادك يعملوه فيكي أضعاف ..عند ربنا مابتضعش الحقوق ولا بيتظلم حد ..انتي ماعندكيش سبب ولا مبرر للي عملتيه تخليه حتي يرجعلك ويسامحك عشانه ..فوقي يابنتي وبلاش تخلي الحقد ياكل قلبك وتفوقي بعد فوات الاوان بعد ماتكوني خسرتي كل حاجة وترجعي تندمي في وقت ماينفعش فيه الندم
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
ملك بإبتسامة: صباح الخير ..
أحمد: أحلي صباح في الدنيا
ملك وتجلس بجانبه: عامل ايه دلوقتي !!
أحمد: احسن كتير
ملك: الحمد لله ياحبيبي ربنا يتم شفاك علي خير يارب
أحمد: ربنا يباركلي فيكي ياأغلي من روحي وعمري وحياتي
"وقاطع حديثهما طرق علي الباب فأذنا بالدخول"
أحمد: تعالي اتفضلي ياماما
سوسن: رامي اخوك عاوز يدخل يطمن عليك
أحمد وهو يعتدل في جلسته: خليه يدخل طبعا
رامي وهو يدخل: مليون مبروك ياحبيبي
أحمد: الله يبارك فيك يارامي ..تعالي اقعد
رامي وينظر لملك: مليون مبروك ياعروسة وربنا يخليكم لبعض يارب ويهدي سركم
ملك: الله يبارك فيك شكرا جدا
أحمد: دة رامي اخويا الكبير ياملك
ملك: أهلا وسهلا بحضرتك
رامي: طبعا انتي ماتعرفنيش واول مرة تشوفيني وكان نفسي اكون معاكم في الفترة اللي فاتت دي واتعرف عليكي من بدري بس يلا النصيب الحمد لله ..وكفاية كلام ماما عنك
سوسن: ملك دي بت بنت حلال وبنت أصول لو لفينا الدنيا كلها مش هنلاقي زيها ولا في ادبها ولا في اخلاقها وقبل ماتكون مرات ابني فهي بنتي
ملك: ربنا يخليكي يارب ياماما سوسن والله كتير عليا الكلام دة
سوسن: مفيش حاجة كتير عليكي دة كفاية خوفك ولهفتك علي احمد وحبه أللي شوفته مالي عينيكي
ملك: احمد دة مش بس جوزي لا دة كل حاجة ليا في حياتي وأقرب حد ليا دة حتة مني وربنا يقدرني يارب واقدر اسعده
أحمد: ربنا يخليكي ليا يارب يااعظم إنجازاتي
ملك: ويخليك ليا يارب
رامي بهزار: نجيب شجرة واتنين ليمون ونطلع برة احنا بقي ولا ايه يعني !!
أحمد بضحك: عرسان جداد بقي وكدة وانت فاهم
رامي: اه ..طيب استأذن انا بقي عشان شكلك بتطردني بالذوق
أحمد: لا مقدرش
رامي: حبيبي تسلملي هسيبك بقي عشان ترتاح مش محتاج حاجة !!
أحمد: لا سلامتك ياحبيبي
رامي: مبروك يا مدام ملك واتشرفت بمعرفتك
ملك: الله يبارك فيك ..وشكرا جدا اكيد الشرف كان ليا
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
سوزان: يلا ياسما عشان تاكلي
سما وهي تشاور لها بالسكوت وبهمس: بس عسان بابا نايم مس يصحي (عشان-مش يصحي)
سوزان بهمس: طيب ممكن تقومي معايا ياحبيبة مامي عشان تاكلي
سما وتنام في حضن والدها ماسكة بالهاتف: لا مس عاوزة (مش عاوزة)
سوزان: هاخد منك الموبايل لو مكلتيش
سما وتتمسك بشاكر: لا مس عاوزة (مش عاوزة)
شاكر بنوم وهو يستيقظ: في ايه بس !!
سما: ماما عاوزة تأتلني وانا بتولها مس عاوزة اتل بتولي هاخد منت التيفون (ماما عاوزة تأكلني وانا بقولها مش عاوزة اكل بتقولي هاخد منك التليفون)
شاكر وهو ينهض ويحتضنها: طيب وانتي مش عاوزة تاكلي ليه بقي !!
سما: عسان انا مس عاوزة هاتل مع ملوان أما يصحي (عشان انا مش عاوزة هاكل مع مروان أما يصحي)
شاكر: ومش هتاكلي مع بابا حبيبك يعني !!
سما: لا هاتل معات بلضو بس عسان ملوان مس يزعل مني عسان بيلعب معايا (لا هاكل معاك برضو بس عشان مروان مش يزعل مني عشان بيلعب معايا)
سوزان: طيب ممكن بقي تبطلي لماضة وتسيبي بابا يقوم يغسل وشه ويصلي عشان نتغدي
شاكر: طيب صحي مروان وجهزي الغدا عشان نتغدي
"وقاطعهما صوت رنين هاتف سوزان لتقول: دي ماما
سوزان: أيوة ياماما عاملة ايه ياحبيبتي
سامية ببكاء: اختك تعبانة ياسوزان
سوزان بقلق: أهدي بس ياماما في ايه أللي حصل انا مش فاهمة حاجة ..وبتعيطي ليه !!
سامية ببكاء: صافي تعبانة ياسوزان
سوزان: انا مش فاهمة حاجة ياماما تعبانة مالها !! اقفلي طيب وانا جاية
شاكر: خير في ايه !!
سوزان بقلق وهي تلبس: معرفش والله ماما بتقول صافي تعبانة ومعرفش مالها
شاكر: خير ..خير إن شاء الله البسي انتي ولبسي العيال بسرعة وتعالي اوديكم
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
ملك: عمرك يعني ماحكيتلي عن اخوك رامي دة
أحمد: دي حكاية طويلة اوي
ملك: وليه محكتليش عليها !!
أحمد: بلاش نقلب في الماضي عشان خاطري ونفتح في جراحه من تاني خليه مقفول زي ماهو كدة احسن
ملك: عندك حق واهم حاجة وجوده في وسطيكم ومش مهم اي حاجة تانية تتحكي وربنا يخليكم لبعض يارب
أحمد: ويخليكي ليا يارب
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭
حازم: انا ناوي أخطب وكنت عاوزك تيجي معايا
أدهم وهو ينظر إليه: دة بجد !!
حازم: اه والله بنت كويسة وحبيتها
أدهم: تعرفها منين طيب ولا امتي !!
حازم: لا دي حكاية طويلة ابقي احكهالك
أدهم: ماشي ياعم ..ايه هتروح امتي ولا كدة !!
حازم: لسة مش عارف هو انا قولتلها وهي بتفكر ولسة ماردتش عليا
أدهم: خير إن شاء الله
"وقاطع حديثهما صوت رنين هاتف حازم"
حازم: الو سلام عليكم مين !!
حنين: انا حنين وكنت عاوزة اقابلك
حازم ونظر لادهم بمعني هي ففهم أدهم: طيب تحبي امتي وفين !!
حنين: كمان ساعة من دلوقتي لو يناسبك في كافيه ...........
حازم: تمام في انتظارك
أدهم: ايه طلبت تقابلك !!
حازم: اه
أدهم: طيب يلا قوم روح ومبروك مقدمًا
حازم: خايف ياأدهم
أدهم: ماتخافش وسيبها علي ربنا .. يلا قوم دلوقتي وأما تيجي نبقي نتكلم
٭٭٭٭"٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
سوزان بقلق: خير ياماما في ايه !!
سامية ببكاء: صافي عندها كانسر
سوزان بصدمة: ........
٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭
حازم: خير ياآنسة حنين
حنين: انا فكرت في الموضوع أللي كلمتني فيه
حازم بتوتر: طيب وقررتي ايه !!
حنين: .........