كنا قفلنا الفصل أللي فات علي أما ياسمينا قالت لادهم أنهم لازم بسيبوا بعض وقولنا ياتري رد فعل أدهم هيكون ايه !! تعالوا بينا يلا نكمل نشوف أللي هيحصل ..قراءة ممتعة
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
ياسمينا: أدهم انا كنت عاوزة اقولك علي حاجة
أدهم: ايه هي !!
ياسمينا بتوتر وتردد: احنا لازم ننفصل
أدهم سكت وماردش فأكملت ياسمينا قائلة: انا مش هقدر اكمل معاك
أدهم: وحصل ايه عشان نسيب بعض !! يعني أما أهلي ولا اهلك ييجوا يسألوا هنقولهم ايه السبب !!
ياسمينا: وانت مش عارف السبب !!
أدهم: وهو انتي شايفة دة سبب نسيب بعض عشانه !! انا للدرجة طلعت رخيص اوي عندك كدة !! حتي ماحاولتيش تدافعي عن حبك ليا عملتي الحل الاسهل واستسلمتي
ياسمينا: أدهم اوعي تقول كدة انت عارف انا بحبك ازاي
أدهم: انا مابقتش عارف غير أللي شايفه منك دلوقتي وهو انك بتبعيني بسهولة وكأنك كنتي مستنية الفرصة تجيلك عشان تستغليها ..علي العموم بكرة اكشفلك الحقيقة وأما تبان هتعرفي انك كنتي غلطانة واختيارك كان غلط ..وانا آسف مش هقدر انفذلك طلبك ..عن اذنك ..
ياسمينا وهي توقفه: يعني ايه !!
أدهم وهو ينظر لها في عينيها: يعني أما ابقي اشوف دة في عينيكي انك عاوزة تسيبيني ابقي اعملهولك إنما أنا مش شايفه في عينيكي وانا مش زيك عشان ابيع وأمسك في أول فرصة تجيلي لأني بعرف احب وعارف يعني ايه حب ..عن اذنك .. وتركها وخرج واسندت ياسمينا علي الباب تبكي بشدة من قوة الألم بقلبها: ااااه سامحني يا ادهم سامحني ياحبيبي انا عمري ماحبيت حد غيرك اد ماحبيتك مش عارفة ازاي هعيش من غيرك بس كل دة عشان خاطرك وعشان بحبك ومسيرك هتعرف في يوم
علي الجانب الآخر أدهم يجلس بسيارته لايستطيع استيعاب ماحدث ويحدث نفسه قائلا: معقولة بالنسبالها الموضوع سهل كدة !! قدرت أنها تنطقها وتقولها عادي كدة !! ليه توجعيني انتي كمان بعد ماحبيتك واديتك كل حاجة ليه تنسي دة كله عشان موقف فاهماه غلط ..وتذكر سريعا وهو يقول: آمال !! مفيش غيرها عاوزة تخرب علينا هي آمال وقاد سيارته بسرعة ذاهب إليها بكل مايحمله من غضب
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
رامي وهو يدخل لغرفة صافي: ازيك ياصافي
صافي بصدمة: رامي !!!!
رامي ويذهب إليها ويقف أمامها: الف سلامة عليكي ياحبيبتي
صافي: الله يسلمك يارامي اتفضل اقعد واقف ليه
رامي ويسحب كرسي ويجلس بجانبها: وحشتيني ..وحشتيني ياصافي
صافي بحزن وضحكة حزن: وحشتك !! بأمارة ايه وحشتك !! بأمارة انك روحت اتجوزت ونسيتني ولا كأني كنت في حياتك !! لا وكمان علي حد علمي إن جوازك كان عن حب وخلفت كمان وبقيتك اب لولاد واحدة غيري
رامي ويمسك بيديها: وحياتك عندي وحياة حبي ليكي عمري ماعرفت احب حد غيرك ولا افكر في غيرك انا كنت معاها بجسمي بس إنما روحي وعقلي كانوا معاكي انتي مقدرتش انساكي لحظة ولا ثانية كنتي معايا في كل لحظة وكل ثانية مكنتيش بتفارقي خيالي وماعرفتش احب حد غيرك نفس الحب اللي حبتهولك
صافي: والمطلوب مني ايه !! اني اصدقك تاني !!
رامي: لازم تصدقيني لأني مبكدبش عليكي ودي الحقيقة اللي لازم تكوني عارفاها ومتأكدة منها اني محبتش ولا هحب غيرك
صافي بدموع: بتحبني !! انهي حب دة !! قولي كدة الحب ايه من وجهة نظرك !! الحب انك تروح تتجوز غير اللي بتحبها وتعيش معاها وتخلف منها وتقولها كلام الحب اللي المفروض يكون من حقي انا !! ازاي اصلا قلبك جابك تعمل حاجة زي كدة دة انت يعتبر خسرت اهلك عشانها اديني سبب واحد يخليني اصدقك حاجة واحدة تثبتلي حبك حاجة عملتها عشاني عشان تحافظ عليا ازاي بعد مااختارت انك تعيش مع غيري عاوزني اصدقك !! لو بتحبني بجد زي مابتقول مكنتش روحت لغيري وسيبتني
رامي: انتي مش فاهمة حاجة وكل اللي في تفكيرك غلط
صافي: فهمني أنت الصح ..ولا اقولك انا مابقتش عاوزة اسمع ولا أعرف حاجة كفاية أللي انا فيه مش ناقصة هم فوق همي ولا حزن فوق حزني اللي بحاول اتعايش معاه وكفاية فتح في جرح قديم اتقفل من زمان بلاش تخربش فيه بضوافرك وتفتح الجرح من تاني وتفك الخياطة اللي قافلاه
رامي: هاييجي الوقت وأللي تفهمي فيه كل حاجة وتعرفي فيه الحقيقة وتتأكدي اني محبتش ولا هحب حد غيرك ولا اد مابحبك وهتفضلي حبي الاول والأخير ..وسلامتك من اي حاجة واي وجع ياحبيبة عمري
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
كوثر وهي تجري علي الباب: حاضر حاضر ياللي علي الباب واقفين وراه احنا ..وتفتح لتجد أدهم أمامها: أدهم ازي..ولم تكمل كلامها ودخل أدهم بغضب كالطور الهائج ولم ينتبه لوجود خالته ودخل لعند آمال تجلس علي الأريكة ومسكها من شعرها بقوة جعلتها تنصدم من قوة الألم وصوته القوي وهو يقول بغضب: انا مش قولتلك مالكيش دعوة بيا ولا بحياتي ياللي معندكيش لا دم ولا كرامة ماتبعدي عني بقي وتسيبيني في حالي وقولتلك لو ايه اللي حصل عمري ماهفكر ارجعلك لاني بكرهك يا آمال بكرهك
آمال بألم: اه سيبني طيب انا مش فاهمة انت بتتكلم عن ايه بالظبط
أدهم ويشدد من قبضته علي شعرها: لا اعملي عبيطة وانك مش فاهمة حاجة ولا عارفة بتكلم عن ايه
آمال بألم وتحاول التخلص من يديه: طيب والله ماعارفة انت بتتكلم عن ايه ولا فاهمة اي حاجة
كوثر وهي تخلصها من بين يديه وبحدة: ماتسيبها كدة وتفهمنا في ايه بدل مانت داخل خناق كدة علطول من غير مانفهم حاجة وعمال توجه اتهامات
أدهم: الهانم جاتلي المكتب وقالتلي أنها في مشكلة ومحتاجة اني اقف جمبها وانا للأسف صدقتها ونزلت معاها بحكم انها لسة بنت خالتي وطلعت الهانم بتكدب عليا ومنزلاني اقعد معاها عشان تصورني وتبعتها لخطيبتي تفهمها اني بحبها وهرجعلها عشان نسيب بعض وطبعا دة أللي هي عايزاه ونفسها يتحقق ومحدش ليه مصلحة غيرها في الموضوع دة
آمال بصدمة: والله ماعملت كدة والله مانا ولا اعرف حاجة عن الموضوع دة وانا فعلا كنت
في مشكلة ولجئت ليك عشان تقف جمبي ..مانكرش اني نفسي نرجع بس والله العظيم مش انا اللي عملت كدة
أدهم بعصبية: اومال هيكون مين يعني !! محدش ليه مصلحة غيرك أنه يعمل كدة
آمال ببكاء: معرفش معرفش بس والله مانا مش انا مش أنا
أدهم بتوعد: اقسم بالله لو اكتشفت بس انك ورا الموضوع همحيكي من علي وش الأرض ومش هعمل حساب لا لعيشرة ولا صلة رحم وانتي حرة .. وتركها وذهب بعصبية وأغلق الباب خلفه بقوة وجلست آمال ويدها علي وجهها بحزن واسي وجلست بجانبها كوثر تنظر لها وهي تقول: احنا مش كنا قفلنا موضوع أدهم دة بقي ولا ايه !!
آمال وترفع وجهها: قصدك ايه ياماما ..اوعي تكوني مصدقة زيه ان انا أللي عملت كدة
كوثر: مين ليه مصلحة غيرك في كدة !! وانتي اللي وصلتينا للتفكير فيكي اي مشكلة تحصل مابينهم
آمال: والله مانا ياماما مش انا والله العظيم ومعرفش مين اللي عمل كدة ولا كان غرضه ايه وهو انا اللي ليا مصلحة بس !! مش يمكن ليه اعداء وليهم مصلحة برضو في أنهم يوقعوه
كوثر: طيب ياريت تنسي أدهم خالص وتلغيه من دماغك ومن حياتك وكأنه مدخلش حياتك وريحي نفسك بقي وريحينا وكفاية مشاكل لحد كدة مش كل مشكلة تحصل ييجي يعمل اللي يعمله دة بسببك كفاية بقي مشاكل
آمال: حاولت ..حاولت ياماما بس لقيت قلبي رافض الكره وعقلي رافض النسيان وانا ماليش رأي .. وأللي حصل دة انا ماليش دخل بيه ولا اعرف مين عمل كدة بس اكيد حد قاصد يوقع بينهم وهدفه في أنهم يفركشوا
كوثر بتحذير: لآخر مرة بقولك يا آمال موضوع أدهم دة تنسيه خالص والا هتصرف بعد كدة تصرف مش هيعجبك ..وتركتها وذهبت في ألم قلبها الذي يؤلمها علي فقدان حبيبها وتواجده مع غيرها وحبه لها
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
سهير: ايه ياياسمينا ياحبيبتي حابسة نفسك في اوضتك ليه كدة مابتطلعيش ليه تقعدي معانا
ياسمينا: مفيش تعبانة شوية بس ياماما
سهير وتجلس بجانبها: تعبانة مالك ياحبيبتي !!
ياسمينا: ممكن إرهاق بس ويومين وابقي كويسة
سهير وترفع وجهها: مالك عينيكي وارمة !! انتي كنتي بتعيطي !!
ياسمينا بتوتر: ها لالا خالص هعيط ليه بس دة تلاقيها إرهاق بس من قلة النوم
سهير: ومابتناميش ليه !! وإرهاق من ايه قاعدة من الشغل من يوم خطوبتك تقريبا الإرهاق هيجيلك من ايه !!
ياسمينا: عادي ممكن عشان بسهر كتير وكدة بس
سهير: انتي متأكدة انك مش مخبية حاجة عني !!
ياسمينا: لا ..لا هخبي عنك ايه بس ياماما !!
سهير: انتي متخانقة انتي وادهم !!
ياسمينا: ليه بتقولي كدة !!
سهير: بصي في عينيكي في المراية وانتي تعرفي انا قولت ليه كدة ..عينيكي مليانة حزن وكلام كتير بس خديها نصيحة مني ماتخليش الخلافات اللي بينكم تخسركم بعض وتهدم الحب اللي في قلوبكم خلي حبكم لبعض اقوي من أنه يتأثر بأي خلافات خلي حبكم قوي ومتين مش شوية هوا يطيروه مهما كانت حجم المشكلة أللي مابينكم ماتخلهاش تاخد مساحة في حياتكم ولا تاكل من قلبكم وخدوها نقطة قوة ليكم كل ماتحسوا بضعف ترجعوا ليها تستمدوا منها قوة وخليكم مصدر قوة لبعض لو حد فيكم ضعف التاني يقويه ويقومه من تاني مش يسيبه ويتخلي عنه
ياسمينا ببكاء: انا موجوعة ياماما موجوعة اوي
سهير بحنان: اهدي ياحبيبتي واحكيلي مالك
ياسمينا: جالي صورة لأدهم مع واحدة وأنها حبه القديم
سهير بهدوء: شوفتيه بعينك !!
ياسمينا: ياماما بقولك ك..قاطعتها سهير: شوفتيه بعينك !!
ياسمينا بقلة حيلة: لا
سهير: يبقي ماتصدقيش اي حاجة تجيلك أما تبقي تشوفي بعينك ابقي اتكلمي طول مانتي ماشوفتيش بعينك يبقي كدب ..ومش يمكن صورة قديمة واللي بعتها مصلحته أنه يوقع بينكم !! يبقي ليه تدي الفرصة !!
ياسمينا: لا مش قديمة لاني روحت المكان أللي كان فيه ولقيته قاعد معاها
سهير: وهو اي واحد قاعد مع اي واحدة في كافيه يبقي بيحبها !! ولو بيحبها كان جيه خطبك ليه !!
ياسمينا: اومال هيكون قاعد معاها ليه بس ياماما !!
سهير: ممكن شغل !! ممكن قريبته وانتي ماتعرفيش قرايبه كلهم يعني .. ليه قدمتي الظن السيء ؟!
ياسمينا: مش عارفة بقي ياماما المكالمة أللي جاتلي بتقولي أنه قاعد مع حبيبته القديمة وروحي المكان الفولاني وروحت ولقيتهم فماخلتنيش اركز في حاجة ولا افكر
سهير: واللي قالك عرف منين أنها حبيبته !!
ياسمينا: مش عارفة الصراحة
سهير: غرض اللي كلمك وقالك كدة أنه ينكد عليكم ودة معناه حد قريب منه وعارفه عشان كدة عارف تفاصيل حياته لأن لو حد غريب هيعرف منين !! ولو مالوش مصلحة في أنه يوقع بينكم هيعمل ليه كدة !! دة اكيد حد ليه مصلحة في أنه يعمل كدة وقاصد أنه يعمل كدة فالمفروض ماتديش الفرصة لحد يوقع بينكم وتكوني واثقة في خطيبك وواثقة في حبه ليكي ولو كان بيحب قبلك وعاوز يرجع كان ايه خلاه ييجي يخطبك !! وماتسيبهوش سهل للي بيحاول يكسبه لنفسه علي حسابك وحساب سعادتك بلاش تساعديه في كدة أنه ياخد خطيبك منك .. فكري يابنتي وحكمي عقلك وبلاش تهدمي حياتك بايدك من أول موقف لانك لسة ياما هتقابلي وتشوفي
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭٭٭
حازم وهو يتناول الطعام: ايه سرحانة في ايه !!
حنين بانتباه: ها لا ولا حاجة
حازم ويترك الطعام: مالك ياحنين في ايه !!
حنين: مفيش انا كويسة والله ماتقلقش كمل اكلك يلا
حازم: بصي انا عارف انك لسة مالحقتيش تحبيني وانك اكيد وافقتي عشان تدي لنفسك فرصة تعرفيني اكتر ودي طبعا حاجة موتراكي ودة طبيعي جدا طبعا لأي بنت بس صدقيني انا حبيتك ومابقتش شايف ولا عارف اشوف غيرك جيتي غيرتي حياتي بعد حزن كبير كان ماليها وجيتي خرجتيني من حاجات كتير كنت فاكر أني مش هقدر أخرج منها حتي لو فات عليها ألف زمن لكن بوجودك قدرت اتخطي دة كله وكأن مفيش حاجة حصلت وكأن الزمن بدأ من جديد من يوم أما قابلتك وأنه ماكنش في ماضي من الاساس عشان افتكره وجيتي عوض من ربنا ليا بعد حزن كبير فكرت نفسي مش هقدر اعديه .. بصي انا عارف انك لسة ماتعرفنيش وموضوع الخطوبة جيه بسرعة وانك لسة مالحقتيش تعرفيني عشان تحبيني بس انا هحاول علي اد مااقدر اني اكون ليكي الحبيب اللي تتمنيه أللي تشوفي فيه السند والضهر أللي تكوني مطمنة وانتي معاه وهو جمبك ..ولو فشلت في دة ومقدرتش اكون كدة ولا اخليكي تحبيني وانك مش هتقدري تكملي هنسحب من حياتك لأن عمري مااجبرك تعملي حاجة غصب عنك
حنين بإبتسامة حب وتمسك بيديه: حازم انت شخص طيب اوي وتستاهل كل الخير أللي في الدنيا وبجد انا مش عارفة أرد علي كلامك دة واقول ايه غير انك فعلاً طيب جدا واوعي تقول الكلام دة تاني لانك انت تتحب ومفيش حد يعرفك ومايحبكش
حازم: قولي انك انتي كمان بتحبيني
حنين: تؤ ..خليها تطلع مني احسن من غير سبب ولا مقدمات تطلع فجأة كدة من غير سبب ومن غير ماتكون رد لكلام اتقال بيكون طعمها اجمل بكتير
حازم بإبتسامة: لا اقنعتيني خلاص ..يلا كملي اكل بقي
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
أمل: يارب تكوني بقيتي احسن
ياسمينا بدموع: انا بقيت أسوأ
امل وتلاحظ دموعها وتحتضنها: ياسمينا انتي بتعيطي !! اهدي بس وفهميني ايه اللي حصل
ياسمينا بحزن: انا سيبت أدهم يا امل سيبته .. وجعت قلبي بايدي وضحيت بحبه وجيت عليه وماراعتش حاجة
امل بصدمة: ايه !! انتي بتقولي ايه !! انتي اتجننتي !! ليه عملتي كدة كان ايه حصل سبب لكدة !!
ياسمينا: أمل والنبي انا مش مستحملة كفاية اللي انا فيه
أمل: واللي انتي فيه كان مين السبب فيه !! مش انتي برضو !! احكيلي ايه أللي حصل
ياسمينا: كان قاعد مع واحدة في كافيه حبيبته القديمة
أمل: وانتي ايه عرفك أنها حبيبته القديمة ولا عرفتي منين اصلا أنه كان ليه حبيبة قديمة !! وحتي لو كدة فانتي مالكيش دعوة بماضيه ليكي دعوة ومن حقك تحاسبيه من يوم أما عرفك إنما قبل كدة مالكيش دعوة زي ماهو برضو مايجيش يحاسبك علي ماضي مصطفي مثلا .. ودلوقتي مثلاً هو لو شافك قاعدة مع هشام اخويا يقول قاعدة مع واحد حبيبها مثلا ويسيبك !! انتي شايفة إن دة سبب تسيبيه عليه !! انتي جرا لدماغك ايه !! ازاي تتصرفي كدة اصلا !! ماتفوقي شوية بقي لنفسك وتفكري بعقلك واكبري شوية انتي مش لسة عيلة صغيرة مراهقة
ياسمينا: انا هحكيلك الموضوع من أوله علي كل حاجة
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
حنين وهي تدخل البيت لتقابلها كوثر بإبتسامة
كوثر بإبتسامة: حمد لله علي السلامة ياحبيبتي .. اتأخرتي ليه كده !!
حنين بإبتسامة: كنت مع حازم
كوثر: حاسة انك مبسوطة
حنين: جدا ياماما الحمد لله
كوثر وهي تجلسها: لا دة احنا نقعد بقي وتحكيلي
حنين بإبتسامة: فرحانة باهتمامه بيا وحبه ليا وأنه مستعد يعمل اي حاجة عشاني احساس حلو أما تلاقي حد يحبك الحب دة كله ومستعد يعمل اي حاجة عشان بس يشوف ابتسامة فرحة منك ويمحي اي دمعة حزن في عينيكي حد بيدور ازاي يفرحك وبس ويهمه يشوفك مبسوطة وبس
كوثر: اوعي تغلطي غلطة اختك ياحنين وتحبي الاشياء المعنوية دي وتحبي فيه الحاجات دي بس أو تحبيه عشان خاطر كدة اوعي تظلميه معاكي
حنين: مش عارفة والله ياماما احكم علي الاحساس أللي جوايا إن كان حب ليه هو ولا حب للي بيعمله معايا واني حابة دة .. يمكن يكون دة سبب للحب والحب جيه نتيجة لكدة !! ولا ممكن من تصرفاته خلاني احبه !! بس انا حاسة بقيت احس بحاجة ليه وفي نفس الوقت انا خايفة لأكون بظلمه معايا لأن كل أما اجي افتح قلبي الاقي حب كمال طلعلي ويقولي معقولة نسيتينا !! معقولة هتحبي غيرنا وتحطيه في قلبك وتطردينا منه !! حاسة نفسي متلغبطة ياماما وخايفة اكون سبب في كسر قلب حد كل ذنبه أنه حبني
كوثر: كمال ياحبيبتي الله يرحمه هو في مكان احسن من هنا وانتي لازم تكملي حياتك وتعيشيها زي ماكنتي مخططة لانه هو مابقاش موجود هل وقوفك لحياتك هيرجعه من تاني !! موقفة حياتك هيرجع !! خدتي من الحزن الكتير لحد مامليتي بيه قلبك كله وحياتك كمان ومش معني انك هتكملي حياتك يبقي كدة نسيتيه ولا بطلتي تحبيه بالعكس بتفضلي فاكراه طول حياتك وفي كل موقف يفكرك بيه ..من أكبر نعم ربنا علينا هي النسيان ومع الوقت وانشغالك في الحياة هتتأقلمي إنما مش هتنسي لأن أللي بيحب مابيقدرش أنه ينسي
حنين: صح ..صح كلامك ياماما ادعيلي
كوثر: بدعيلك ياحبيبتي في كل وقت ربنا يسعدك ويعوضك
حنين: ربنا يخليكي ليا يارب .. عن اذنك ياماما هدخل بقي اغير هدومي
٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
أمل: وناوية تعملي ايه بقي !! ضحيتي بيه وبحبك ليه بسهولة كدة !!
ياسمينا: أمل أنا مش مستحملة كلمة ابوس ايدك فيا أللي مكفيني
أمل: لا عشان تعرفي غلطتك لانها مش اول مرة وحصلت قبل كدة في أول خطوبتكم لو تفتكري وكنتي برضو مختارة نفس الطريق السهل انتي بتحاولي
تختاري الطريق ومابتحاوليش حتي تتعبي نفسك في انك تعرفي الحقيقة ولا بتحاولي تدافعي عن حبه وبتدي فرصة للي بيعمل كدة أنه يعملها مرة والتانية وطول حياته يمكن
عدو ليه وحابب ينتقم منه وهو هيعرفه وهيعرف يجيب حقه الدور والباقي بقي عليكي انتي لو طلع عدو ليكي انتي هتعملي ايه وتتصرفي ازاي !! يبقي كل ماتتخطبي لحد تفركشي علي فكرة دي كلمة مش حلوة ولا سهلة عشان كل شوية تقولي انا سيبته تقدري تقوليلي هيبقي منظرك ايه أما يكشفلك الحقيقة !! طبعا مش هتبقي عارفة تردي تقوليله ايه بس
عاوزة اقولك مع كل مشكلة بتحصل انتي بتبني مكانة في قلبه اتجاهك والمكانة دي يإما بتكون بتكبر وحبه بيكبر ليكي يإما بتقل وحبه بيقل ليكي وانتي اللي متحكمة عاوزة تبقي انهي فيهم فكري كدة وحطي نفسك مكانه وشوفي موقفك ورد فعلك هيكون ايه وياريت تتعاملي مع الأمور احسن من كدة لانك واحدة عاقلة المفروض لأن بطريقتك دي مش هتنفعي في جواز مع حد
٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
ديما: انا مش قولتلك ابعدي وانسيه بقي ليه ماسمعتيش الكلام وعمالة تلفي وراه
آمال: انتو ليه كلكم مش مصدقني أنه مش انا والله أللي عملت كدة ولا اعرف مين اللي عمل كدة بس انتي عارفة دة معناه ايه !!
ديما: هيكون معناه ايه يعني !!
آمال: معناه ان في حد تاني بيحب أدهم وبيحاول أنه يوصله بس مين دي ياتري أو ليه اعداء بيحاولوا ينتقموا منه ويبقي أدهم كدة في خطر
ديما: سواء كدة او كدة وأيا كان السبب فدة مابقاش من حقك انك تخافي عليه ولا تفكري فيه حاجة متهمكيش دلوقتي
آمال: ماتقوليش كدة ياديما أدهم يهمني وهيفضل يهمني لاخر يوم في عمري
ديما: بمناسبة ايه !! يهمك بمناسبة ايه !! ياما قولتلك ونصحتك وانتي ولا هنا وقولتلك هتخسري مشيتي برضو أللي في دماغك
آمال: كل انسان فينا خطاء وكلنا بنغلط
ديما: صح انا معاكي كلنا بنغلط بس مش علي مشاعر وحساب اللي حوالينا اللي بيحبونا مش هنعمل حاجة احنا متأكدين أنها هتوجعهم ولو كانوا هما اللي عملوها مكناش قدرنا اننا نسامح مانبررش لنفسنا الغلط وليهم حرام ..انتي اختارتي البعد يبقي خليكي اد اختيارك وقرارك زي ماهو كان أد وعده معاكي
٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
سهير: السلام عليكم يابني
أدهم بسرعة وينهض من مكانه بترحيب: وعليكم السلام ..ازي حضرتك ياطنط ايه النور دة
سهير: انا الحمد لله بخير يابني ..كنت عاوزة اتكلم معاك في موضوع بخصوص ياسمينا
أدهم بقلق: مالها ياسمينا !!
سهير: مالهاش يابني هي كويسة ماتقلقش انا بكلمك من غير ماتعرف بعد ماعرفت المشكلة أللي حصلت بينكم وبكلمك اقولك كلمتين .. الحب مش كلام حلو وبس الحب دة تضحية وتعب وتمسك ومعافرة وأللي بيحب بيستحمل وبيكمل واللي حبه ضعيف بيقع مع اول شوية هوا يهزوا العلاقة ..انتو لسة ماشوفتوش حاجة من مشاكل الحياة والسبب أللي اتخانقتوا عشانه ايا كان مش مستاهل ولا ينفع يكون اقوي من حبكم لأن مينفعش اي مشكلة مهما كانت ايه هي أنها تكون اقوي من حبكم لأنكم لو سمحتوا مرة بكدة هتلاقي حياتكم كلها اللي بقي متحكم فيها هي المشاكل .. والدنيا مافيهاش مشاكل واي اتنين بيحبوا بعض طبيعي جدا يكون بينهم مشاكل فلو كل مشكلة اديناها الفرصة أنها تكون اقوي وتتحكم فينا هتبقي حياتنا كلها تحت سيطرتها لأننا بنختار الحل الاسهل وهو الاستسلام ..في أي علاقة لازم يكون فيه العصبي والهادي واحد يشد جامد اوي والتاني يحاول يرخي وفي العلاقة طبيعي بتتبدل الأدوار حسب الموقف فتلاقي الهادي اللي كان دائما بيرخي خد دور اللي دايما يزعق وهنا لازم التاني ياخد دوره في أنه يعمل زي ماكان هو بيعمل أنه يلم الموضوع بكلمة حلوة بموقف حلو لكن الاتنين بيشدوا قصاد بعض وتتدخل ناس والدايرة بتوسع لحد ماهتتملي وتبصوا تلاقوا نفسكم برة ومن كتر المشاكل بعدتوا اوي ..المشاكل بتاكل في قلب كل واحد فيكم بس بالبطيء فبلاش تدوها فرصة في أنها تتحكم في حبكم وعلاقتكم لانكم لسة ياما هتقابلوا ..انا كدة خلصت كلامي
أدهم: والله كلامك دة كله صح وعلي راسي بس هي رفضت تسمعني
سهير: وعشان رفضت تقوم انت تسكت !! في حالة عصبية وغضب إنما بعد كدة ييجي دورك بقي بالراحة وتفهمها الموقف وتشرحلها واكيد هتسمعك
أدهم: هي حكتلك ايه السبب !!
سهير: حكتلي يابني ودة اللي خلاني اجيلك اقولك زي ماقولتلها قبل ماتحصل حاجة تتهوروا وترجعوا تندموا عليها بعد كدة
أدهم وفهم إنها ماقالتش أنهم سابوا بعض: تسلمي ياأمي وربنا يخليكي لينا يارب
سهير: ربنا يخليك يابني فكر في كلامي اللي قولتهولك واوزنه في دماغك كدة مع نفسك وانا معرفش ايه اللي حصل بعد كدة بس اللي متأكدة منه انكم لو بتحبوا بعض هتعملوا المستحيل عشان تحافظوا علي حبكم دة مهما كانت الوسيلة
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
مريم باستيقاظ ووجع: اه ..كريم الحقني
كريم بنوم: نامي بقي يامريم مش هصحي دلوقتي لسة
مريم بألم: نوم ايه بس كريم بقولك الحقني انا تعبانة وبطني بتوجعني اوي
كريم بفزع: مالك في ايه !!
مريم بألم: معرفش بطني وجعاني اوي وخايفة اوي
كريم: قومي البسي واوديكي للدكتور يلا بسرعة
"وارتدت مريم ملابسها وذهبا لاحدي المستشفيات"
كريم بقلق: خير يادكتور طمني !!
الدكتور: لا خير خالص ماتقلقش
كريم: وهي عاملة ايه وسبب وجع بطنها دة
الدكتور: المدام حامل وطبيعي جدا يجيلها وجع بطن عادي ممكن بسبب اكل او حركة الجنين داخل بطنها وممكن بذل مجهود وهكذا كلها حاجات عادية ممكن تحصل ومش مضرة ولا فيه خوف منها وانا هكتبلها علي شوية أدوية تاخدهم تقوي بيهم المناعة عندها شوية عشان ضعيفة وإن شاء الله تبقي كويسة وتقوم بالسلامة
كريم: تمام شكرا لحضرتك جدا يادكتور
٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
ثريا: رامي ..رامي
رامي وهو يقف ويلتف: ثريا !!
ثريا: كويس اني لحقتك عاوزة اتكلم معاك
رامي: انتي لسة ليكي عين تيجي هنا تاني !!
ثريا: رامي عشان خاطري خلينا نتكلم انا واقفة مستنياك بقالي ساعة ومش عاوزة ادخل وعشان الحقك قبل ماتروح الشغل
رامي: نتكلم !! هو في كلام عشان نتكلم فيه !!
ثريا: اه في كلام ولازم نقعد ونتكلم انا ندمت وعشان خاطري لازم تسمعني
رامي وهو يركب: انا مش فاضيلك ياثريا ودي نتيجة غلطك تتحمليها لوحدك زي مابدأتيها لوحدك برضو
ثريا وهي تمنعه من دخول السيارة: رامي لو لسة بتحبني أو جواك ذرة حب ليا خلينا نقعد ونتكلم ولا بلاش عشاني وحياة عيالنا عندك خلينا نقعد
رامي بتفكير: ماشي ..اتفضلي اركبي
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
كريم وهو يسند مريم: ادخلي ياحبيبتي براحة وعلي مهلك
مريم بتعب: تعبانة اوي ياكريم مش قادرة
كريم: سلامتك ياحبيبتي ..تعالي استريحي شوية وهتبقي كويسة بإذن الله
مريم: ربنا يخليك ليا يارب
كريم: ويخليكي ليا يارب يااحلي مامي ..هروح اعملك حاجة دافية تشربيها وانتي خليكي مرتاحة هنا علي السرير ماتتحركيش
مريم: حاضر ياحبيبي ربنا يخليك ليا
كريم وهو يذهب: ماتتحركيش ها
مريم وهي تبتسم وفي نفسها: ياه دة عوض ربنا حلو اوي بجد ربنا طبطب علي قلبي وعلي وجعي وكل جرح جوايا بوجودك معايا ياحبيب عمري معقولة اكون استحق الخير أللي انا فيه دة كله واللي مريت بيه كان صعب اوي كدة عشان ربنا يطبطب عليا بكريم !! ألف حمد وشكر ليك يارب ألف مرة علي عوضك وعلي كل حاجة
كريم: وادي الحاجة السخنة اهي اتأخرت عليكي
مريم شاردة ولم تكن تنتبه لكريم فبدأ كريم بهزها وهو يقول: مريم ايه روحتي فين !!
مريم بانتباه: كنت بتنده ياكريم !! معلش سرحت شوية بس غصب عني
كريم: وسرحتي في مين بقي ياست هانم !!
مريم وهي تمسك خدوده: سرحت في حبيبي وكل حياتي
كريم: ربنا يقدرني واقدر اسعدك
مريم: وجودك جمبي طول العمر هو السعادة الحقيقية بالنسبالي
كريم ويقبل يديها: ربنا يباركلي فيكي يارب
مريم: ويباركلي فيك يارب ..عارف لو هتمني حاجة هتمني وجودك معايا دايما وانك تبقي جمبي وبخير لانك طول مانت جمبي انا كويسة لو هتمني حاجة فهتكون انت وتكون وجودك معايا
كريم: انا جمبك طول مافيا نفس انا جمبك ياأغلي عليا من نفسي
مريم: ربنا يحفظك ليا ويباركلي فيك يااغلي ماليا
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
حازم: مالك ياادهم في ايه !!
أدهم: بحاول ادور علي لغز الموضوع
حازم: لغز ايه يا ادهم هي مش قالت انها مش عاوزة تكمل لغز ايه بقي ؟!
أدهم: افهم ياحازم ياسمينا في حاجة مخبياها عليا واللي عمل كدة ليه مصلحة في انفصالنا ودة اللي بحاول أوصله
حازم: طيب ماهو محدش ليه مصلحة في انكم تسيبوا بعض غير أمال
أدهم: لا مش آمال المرة دي في حد تاني ودة اللي لازم اعرفه وأعرف مين بيدور ورايا
حازم: وانت ايه خلاك متأكد انها مش هي مع إن مفيش حد غيرها ليه مصلحة في كدة
أدهم: انا روحتلها وبهدلتها واكدتلي انها مالهاش علاقة بالموضوع وكان باين في عينيها فعلا انها مش هي المرة دي وحد تاني ولازم اعرف مين دة اللي بيحاول يدور ورايا كدة وعاوز يخسرني ياسمينا وايه مصلحته من ورا انفصالنا !!
حازم: هيكون مين يعني ليه مصلحة في كدة !!
أدهم: ماهو دة اللي بحاول أوصله أللي عمل كدة ليه مصلحة في اني اسيب ياسمينا ولازم اعرف مين دة
حازم: خير إن شاء الله ونعرف مين اللي عمل كدة
أدهم وهو يتناول اشيائه: يارب ياحازم ..يلا بينا
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
رامي: ادينا قعدنا اتفضلي قولي عاوزة تقولي ايه وكلام ايه أللي لسة بينا
ثريا: رامي انا غلطت وعرفت غلطي وبلاش انت كمان تكرر نفس غلطتي دي بلاش تغلط انت كمان زي مانا غلطت
رامي: ياه عرفتي دلوقتي هي اد ايه بتوجع وبتقتل !! انتي فعلا عرفتي غلطك وندمانة عليه بس متأخر اوي فوقتي متأخر اوي ياثريا فوقتي أما خليتي حقدك وغلك ياكل في قلبك لحد اما بقي مليان غباء وحقد ومن كتر ماهو مليان حقد مابقتيش عارفة تفكري لأن حقدك اتملك منك وبقي هو المتحكم فيكي وبقي كل تفكيرك في ازاي تأذي اللي حواليكي ومخدتيش بالك إن أول ناس هيتأذوا بسببك هما عيالك لأن من كتر غبائك مابقتيش شايفة وعمي عينيكي ومخلكيش تشوفي غير الكره وبس
ثريا: رامي عشان خاطري تسامحني وتديني فرصة تانية
رامي: مابقاش ينفع .. مابقاش ينفع ياثريا
ثريا: ليه !! ليه مينفعش !! انا عاوزة اكون مع ولادي ماتحرمنيش منهم
رامي: مابقاش ينفع بعد كل اللي عرفته وانك السبب في كل حاجة ماابقاش راجل لو وافقت ارجع اعيش معاكي من تاني
ثريا: طب وعيالي !! مش هشوفهم !!
رامي: معتقدش أنهم ممكن يفرقوا معاكي ..عن اذنك عشان هتأخر علي شغلي
ثريا: رامي .. رامي ..عشان خاطري ..ولكنه تركها وذهب وجلست تبكي بشدة بكل
مالديها من قوة بالبكاء فهي من اختارت ذلك
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
ملك: طمني يادكتور هو عامل ايه دلوقتي !!
الدكتور بإبتسامة: لا الحمد لله احسن كتير
احمد: بجد يادكتور يعني هقدر ارجع امشي علي رجلي تاني !!
الدكتور: اه طبعا في اسرع وقت كمان بس لازم تاخد العلاج في مواعيده وتهتم بنفسك عشان الكسر يلم والجرح يقفل
ملك: اهم حاجة هو بقي كويس يادكتور ويقدر يرجع يقف علي رجله من تاني !!
الدكتور بضحكة: اه والله هو بقي احسن كتير عن الاول انتو مش مصدقين ليه بس
ملك بإبتسامة: الحمد لله الحمد لله الف حمد وشكر ليك يارب
أحمد بإبتسامة: شكرا لحضرتك جدا بجد يادكتور
الدكتور: علي ايه انا ماعملتش حاجة بإذن الله تقوم بالسلامة وترجع زي الاول واحسن كمان بس انت حافظ على نفسك اهم حاجة
أحمد: حاضر يادكتور ربنا يباركلك يارب ..عن اذن حضرتك
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
سهير بسعادة: ملك وحشتيني
ملك وتحتضنها: وانتي اكتر والله ياماما عاملة ايه
سهير: الحمد لله ياحبييتي تعالوا ادخلوا
أحمد: ازي حضرتك ياماما عاملة ايه
سهير: الحمد لله ياحبيبي طمنوني انتو عاملين ايه
ملك: الحمد لله ياحبييتي كنا عند الدكتور عشان احمد ولسة مخلصين اهو وقولنا نعدي نقعد معاكم شوية
سهير: طمنوني وقالكم ايه !!
ملك: الحمد لله بقي احسن ويقدر يرجع احسن من الاول كمان إن شاء الله والباقي مسألة وقت بس مش اكتر الحمد لله
سهير: طب الحمد لله ربنا يتم شفاك علي خير يارب يابني
ملك: إلا صحيح هي فين البت ياسمينا مابتسألش عليا خالص دي
سهير: قاعدة في اوضتها يإما تلاقيها نايمة يإما صاحية ادخليلها
ملك: هدخل اشوفها الجزمة دي ..وذهبت لغرفة ياسمينا وطرقت الباب عدة طرقات ثم دخلت
ملك: مش عاوزة تطلعي تسلمي عليا كمان ولا ايه !!
ياسمينا بفرحة وتنهض: ملك وحشتيني اوي
ملك: لو وحشتك بصحيح زي مابتقولي كنتي سألتي عليا واخر مرة كنت موجودة تسيبيني وتنامي
ياسمينا: صدقيني والله ياملك كان غصب عني ماتزعليش مني
ملك: مالك ياحبيبتي في ايه !! ومال وشك مطفي كدة !!
ياسمينا وتمسح وجهها: مفيش انا كويسة تلاقيه إرهاق بس
ملك وتمسك بيديها: لا مش إرهاق وفين دبلتك !!
ياسمينا بسرعة: صحيح احمد عامل ايه دلوقتي !! هو معاكي برة اطلع اسلم عليه
ملك وهي تمسكها: ياسمينا انتي بتوهي ليه !! حصل ايه !!
ياسمينا بتوتر: أتوه !! وهتوه ليه بس
ملك: طيب قوليلي فين دبلتك !!
ياسمينا بقلة حيلة: بصراحة انا سيبت أدهم
ملك بصدمة: ايه !! سيبتيه ليه وايه اللي حصل !! وسهل كدة !!
ياسمينا: وطي صوتك محدش لسة يعرف حاجة .. كنا المفروض خارجين وأما اتاخر روحتله الشركة السكرتيرة قالتلي انه مش جوة ونزل مع واحدة اسمها آمال دخلت مكتبه اتاكد جالي تليفون وصورة علي الواتس معاها والتليفون اللي جالي قالي أنه مع حب عمره القديم واداني العنوان وروحت وشوفته معاها
ملك: انتي غبية صح !! انتي اكيد غبية ..هو اي حد يقولك اي حاجة كدة تصدقيه علطول معندكيش ثقة خالص فيه ولا في حبه ليكي !! مش فاكرة في أول الخطوبة حصل ايه ولا نسيتي ليه بتدي فرصة تاني !! انتي بتحبيه ولا لا !!
ياسمينا: ايه السؤال دة اه طبعا بحبه ياملك وعمري ماحبيت أده
ملك: يبقي بتضحكي علينا وعلي نفسك قبلنا لأن اللي بيحب بيحافظ علي حبه وعلي اللي بيحبه بيحارب الدنيا كلها عشان يبقي معاه ويحافظ عليه مش يستسلم بسهولة زيك كدة فين الحب دة اللي بتتكلمي عنه !! راجعي نفسك تاني وراجعي تفكيرك إذا كنتي بتحبيه ولا لا ولو كانت الحكاية العكس واتبدلت الأدوار كنتي هتفكري ازاي ساعتها ولو كان سابك زي مانتي عملتي كان هيكون ايه تفكيرك فكري وراجعي نفسك وشوفي ردك علي نفسك هيكون ايه وحكمك علي نفسك هيكون ايه واللي تحكمي بيه وترضيه علي نفسك احكمي بيه عليه ..وعاوزة اقولك كمان كلمتين مش معني اي شاب قاعد مع بنت يبقي في بينهم علاقة ممكن تكون علاقة شغل وممكن تكون قريبته ومش مبرر للي عملتيه انتي كدة هتخسري ومش أدهم بس لا هتخسري ناس كتير بسبب طريقتك دي لو فضلتي كدة وانتي حرة
٭٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
سوسن بقلق: طمني يادكتور صافي حالتها ايه بالظبط !!
صافي وهي تجلس أمام الدكتور: خير يادكتور نظام العلاج هيكون ايه !!
الدكتور بأسف: ورم في المعدة وهتاخدي شوية أدوية عشان يتجمع في مكان معين ويتم استئصاله
صافي بقلق: ونوع الورم ايه !!
مصطفي بتوتر وقلق: طمننا يادكتور والنبي هتبقي كويسة صح !!
الدكتور بأسف: للأسف خبيث
صافي:..........