رواية صعيدي علمني الحب الفصل الاول1والثاني2 بقلم حنين عادل مدونة كرنفال الروايات

صعيدي علمني الحب الجزء الثاني من صعيدي علمني الادب بقلم حنين عادل    

يونس بصوت عالي: هيا دي المفاجأة حرااااام عليييييييكي.

روح بصوت عالي : اجري يا نمر اجريييييي انفد بحياتك

روح والنمر بيجروا ووراهم قطيع تيران .

يونس: مش فاااااهم ده ايه

روح: دا سباق سان فيرمن 

يونس بصوت عالي: هانفضل نجريييي لإمتي 

روح بصوت عالي: لحد ما تنتصر عليهم اجري يا نمر

يونس: انا كنت عايز ادخل دنيا مش اخرج منها حرااام عليكي يا شيخه

الناس بتجري ويونس وروح بيجروا والتيران وراهم.

روح وهيا بتضحك : اخص عليك يا نمر انا عاوزاك تعمل رياضه

يونس وهوا بيجري: عشان كده جايبانا أسبانيا دا شهر العسل يا جدعان شهر العسل .

في ناس التيران بتدوس عليهم وناس بتلحق نفسها ..

يونس ماسك ايد روح وهوا بيجري ..

بس روح بتبدأ تهبط وبتسيب ايده ..

يونس بيبص عليها بيلاقي الطور جاي عليها وهيا ماعدتش قادره تجري..

بيقومها بس مش بتقدر..

بيجري علي الطور اللي جاي ناحيتها وبيركب فوقه وبيمسكه من قرونه الطور بيتعصب وبيفضل ينط عشان يوقع يونس ..

روح بتيجي علي الجمب ..

روح: اخص عليك يا نمر كنت مرجحني معاك ..

يونس بينط من علي ضهر الطور علي جمب .

روح: اه يا نمر يا جامد طلعت مش غاشش وكنت بتذاكر..

يونس بيقوم من علي الأرض وبيحاول يقومها مش بتقدر بيشيلها وبيجري لحته فاضيه بعيد عن التيران الهايجه..

بيقعد يونس علي الارض وروح .

يونس: مافيش فايدة فيكي انتي عارفه اننا كنا هنموت

روح: الحياة مالهاش طعم من غير المغامرات دي من غير ما تتحط في مواقف زي دي تعرفك قيمه حياتك

يونس : لأ مش دي وجهه نظري

روح: أومال ايه وجهه نظرك بقي يا نمر

يونس: الحياة مالهاش طعم من غير حاجه واحدة بس

روح: ايه هيا بقي

يونس بيشاور عليها : روح ..روح النمر 

روح بضحك: خد قلبي

يونس بغمزة: اخدته شوفي حاجه تانيه 

روح بكسوف: يونس ..

يونس: ههههه نفسي اعرف ليه لما بتتكسفي بتقولي يونس .

روح: ههههه مش عارفه يلا بقا ورانا حاجات كتير

يونس: مش عاوز حاجات مجنونه ارجوكي 

روح: اخص عليك يا نمر لأ بجد اخص عليك انا بعمل حاجات مجنونه.

يونس: انتي مافيش اعقل منك يا روح النمر 

.................................

في الصعيد ..في صالون البيت الكبير.

كرم: عشانك يا كريمه اروح السيما 

كريمه: انشف ياض

كرم: اه دا انتي هاتتعبيني قوي طب بحبك بقا 

كريمه: تكونش فاكر اني هاتحرج وهاحط وشي في الارض

كرم: لأ كوكي هاتقولي وانا كمان صوح

كريمه بتمسكه من لياقته ..

كريمه: مين كوكي دي بتخوني قبل ما نتجوز

بيمسك كرم ايدها بقوه ..

كرم: ماعدتش تحوصل تاني يا بقره انتي كوكي يا غراب البرك 

كريمه بابتسامه: مش تقول كده 

كرم: واللهي بتتحولي كده كيف ..كيف بالسرعه دي انا حاسس انك مش قابلاني لو مش عاوزة نكمل انا....

بتحط ايدها علي بوقه..

كريمه: لاه ماتقولهاش مين قالك اكده 

كرم: حسيت من تعاملك دا انتي مابتبليش ريقي بكلمه حلوة

كريمه: مااتعودتش اقول حديت حلو كل اللي حواليا ماكنوش يستاهلوا كلمه حلوة كانوا يستاهلوا ياخدوا فوق نفوخهم وبس .

كرم: طب وانا 

بتبصله كريمه وبتحط وشها في الارض بابتسامه

كرم: يادين النبي ..ماتچيبي 

كريمه: كرررم 

كرم: خلاص ..خلاص..ربنا يعدي الأيام اللي قبل الفرح دي علي خير اصل خايف اتهور وتموتيني 

كريمه: بعيد الشر عنك يا ..

كرم بغمزة: قولي يا حبي ..يا عمري يا اي حاجه كده بلاها كرم دي ما الكل بيقولي كرم خليكي مختلفه.   

كريمه بكسوف : يا نن عين كريمه

كرم : يابووووي  ..

...............................

في المكتب...

مصطفي: يابوي يا عسل انت 

شاكر: عاوز ايه يا مصطفي

مصطفي: طلب صغنن قد اكده

شاكر: مش هاغير العربيه اللي لسه مغيرها من سنه

مصطفي: اديك قولت من سنه يا بوي يعني طلع احدث يرضيك مصطفي شاكر النمر يمشي بعربيه قديمه

شاكر: انا مش بلاقي الفلوس علي الأرض يا واد

مصطفي: ثق ان ربنا بيكرمك عشان العبد لله 

شاكر: ربنا بيكرمني عشانك

مصطفي: عشان انا قلبي ابيض ونيتي بيضه وعاوز العربيه الجديده تبقي بيضه 

شاكر: بش كده هاتتوسخ بسرعه

مصطفي: لاه ما تقلقش انا هاخليها عروسه هاحميها معايا

شاكر برفعه حاجب: هيا مين دي يا واد

مصطفي: العربيه يا بوي .

شاكر: طيب 

مصطفي: حبيبي يا بوي امتي بقا

شاكر: في التأني السلامه يومين تلاته كده

مصطفي: انت عارف اليومين التلاته بينزل كام سهم بورصه وناس بتموت وبيجيلها سكته قلبيه من البورصه وبتخسر كل فلوسها وناس بتكسب وبتتريش دا في اقتصاد بلاد بيضيع في اليومين التلاته دول وبتقولها عادي اكده..

شاكر: لاه وانا يرضيني اقتصاد بلاد يضيع في اليومين تلاته دول خد يابني اشتري من الفيزا دي العربيه .

مصطفي: يعجبني انك وطني يا بوي ربنا يزيدك من فضله 

بيخرج مصطفي وهوا بيضحك..

شاكر بيقعد علي المكتب وهوا بيضحك: يخرب عقلك يا مصطفي ..

(مش عارفه ليه ومصطفي بيقول يا بوي متخيلاه محمد هنيدي في عسكر في المعكسر ( هاتموتي يا سوسو 😂))

..............................

في القاهرة.

ميرا قاعده علي الكافتيريا بتشرب قهوة..

إسلام: الدكتور الجديد ده كان فظيع انا ماكنتش قادر امسك نفسي من كتر الضحك

ميرا: هههههه وانا واللهي لو بتفرج علي مسرحيه مش هاضحك الضحك ده كله فصلان .

إسلام:  اقلدهولك 

ميرا: بتهزر!

إسلام: بجد ..

ميرا: وريني يا جامد 

قام اسلام من علي الترابيزة ومشي وكل شويه يرفع بنطلونه ..

اسلام: انت يا طالب يا اللي بتضحك قولي انا قولت ايه 

ميرا كانت فطسانه علي نفسها من الضحك.  

* انت يا طالب يا اللي بتتريق قدامي علي مكتب العميد

إسلام بيبص وراه ..

اسلام: انا؟!

* اومال امي 

ميرا: احنا اسفين يا دكتور عبد الغني 

بيقرب الدكتور منها ( عنده 40 سنه) 

* العيال اللي قليله الادب دي لازم تتأدب يا ميره 

ميرا: سامحه معلش يا دكتور

* ماشي عشان خاطرك بس بالك لو ماتوسطلوش كنت بهدلته 

ميرا: شكرا يا دكتور

بيمشي الدكتور وبيعدي من جمب اسلام

الدكتور: عيل قليل الادب ما يختشيش 

ميرا واسلام بعد ما مشي :ههههههههههههههههه

مش تضحكوني معاكوا كده...

ميرا اتبدلت ملامحها 

خالد شد كرسي وقعد .

اسلام: ايه قله الذوق دي انت مين ياض انت عشان تقعد كده

خالد: لا دا انتي مستغني عن حياتك بقا

اسلام: انت...

بتقاطعه ميرا: بس يا اسلام ده خالد صديق 

خالد: ومين اسلام ده 

ميرا: صديق زيك كده يا خالد 

.............................

كرم نايم علي السرير 

كرم: يحرق ابو الواتس علي الإيمو علي الفيس علي الرواتر اللي دافع في دم قلبي منزلكم ليه مش عشان اتكلم فيديو هاتكلم عليكوا فيديو ميته ( امتي) 

بيجيلوا طلب صداقه من يخربيت طعامتي طالعه لمامتي ..

كرم بيقبل علطول..

بيجيله رساله منها ..

_ممكن نتعرف

كرم :  قوي قوي انا كرم

_ مرتبط

كرم: لاه بس بفكر ارتبط 

_ كان ليك علاقات سابقه

كرم: كنت خاطب بس تعيشي انتي سابت فراغ كبير انا مچرووح قوي 

_ ليله امك سوده يا كرم يابن نعيمه 

كرم: مين 

_ انا المرحومه يا روح امك اللي سابت فراغ كبير 

كرم بيحدف التليفون من ايده بخضه ..

كرم: يلعن ابو اللي جابوا ابوك كده الله يرحمك بقا دي مفتريه يعني اول مره اعملها اتقفش 😥

..............................

في الطياره..

يونس: لأ ااااا لاااااا بخاف من المرتفعات 

روح: انشف يا نمر ونط يلا بقا 

يونس: انط منين يا مجنونه من الطياره ..

روح: اه هانعمل سكاي دايڤينج ماتخفش بقا 

يونس: اخاف ..لأ ازاي دا انا ابقي جبان لما انط من الطياره يا مجنونه 

* طيب تعالي ننط انا وانتي يا أنسه 

يونس: انسه وانا مش مالي عينك يعني 

روح: ايه ده انت مصري 

• ايوه ..

روح: يلا يا نمر بقا طب هانعد من واحد ل.تلاته 

يونس: انتي ماقلتيش قبل مانطلع ليه 

روح: عشان ماكنتش هتوافق يلا بقا يا نمر خليك نمر زي اسمك دا النمور ليها سبع ارواح 

يونس: يستحيل انط بطلي جنان بقا 

روح: بقي كده يا نمر مااشي

يونس: هاتعملي ايه يا مجنونااااااه 

بتقرب روح ناحيته و...........