وبعد مرور أسبوع تقريبا علي ابطالنا منهم من يحاول الابتعاد عن التفكير في أشياء تحزنه ومنهم من يتظاهر بالقوة ومنهم من يموت حزنا علي وضع لايستطيع التأقلم عليه ولكن بالنهاية النتائج تتشابه ولكن باختلاف الاسباب حتي لو كان التشابه غير ملحوظ
وذات يوم من الايام يجلس أدهم بمكتبه شارد في تفكيره حتي لا يسمع صوت الطرق علي الباب حتي فُتح الباب ولكنه لم يشعر بدخول أحد بسبب شروده القوي في تفكيره ..فتنحنحت ياسمينا وهي تصدر صوتًا وتجمع شجاعتها وتتحدث قائلة: ازيك يا ادهم
أدهم بذهول: انتي !!
ياسمينا: ايه ياادهم مكنتش عاوز تشوفني تاني ولا ايه !!
أدهم ويعطيها ظهره: راجعة عاوزة ايه !!
ياسمينا بحزن: انت كمان مش عاوز تبصلي !!
أدهم ويلتفت ناحيتها وينظر لها ويديه في جيب بنطاله: وانتي عاوزاني ابصلك ليه !! يفرق معاكي في ايه !! قولي راجعة عاوزة ايه عشان معنديش وقت
ياسمينا بدموع تحاول منعها: جاية اقولك علي حاجة وبعدها اسيبك تقرر .. الحقيقة اللي بتدور عليها أو علي الاقل نصها
أدهم ببرود: مابقاش يفرق معايا اعرفها لأنها جت متأخرة ومش هتغير حاجة
ياسمينا: يعني ايه !! انا مش فاهمة حاجة
أدهم: لا انتي فاهمة كل حاجة بس اللي مضايقك انك اتوجعتي انك حسيتي انك مش فارقة حسيتي انك خسرتي فجاية تصلحي الغلط دة مع أنه نفس اللي عملتيه وحسستيني بيه عرفتي أنها بتوجع !!
ياسمينا: وانا جاية دلوقتي يا ادهم عشان اقولك انا ليه عملت كدة
أدهم: مابقتش تفرق معايا اعرف لانك انتي نفسك مابقتيش تفرقي معايا لانك لو باقية عليا من الاول كنتي قولتي إنما ليه جاية تقولي دلوقتي !! عشان حسيتي اني انا اللي سيبتك مش انتي اللي سيبتيتي صح !! طبعا مش عاوزة اكون انا اللي سايبك عشان تبقي انتي اللي سايباني صح !!
ياسمينا: كفاية بقي تجريح بالكلام حرام عليك انا عملت كدة عشانك وعشان بحبك حاولت احافظ علي حبي ليك واحميك خوفت عليك وخوفت تتأذي بسببي جيت علي نفسي وعلي حساب مشاعري وعلي قلبي عشانك وانت حتي مفكرتش انا ممكن اكون عملت كدة ليه وانت عارف اني محبتش ولا هحب غيرك لو حد فينا غلطان فهو انت مش انا غلطان انك صدقت اني ممكن اعمل كدة واسيبك مع انك واثق ومتأكد مستحيل اعملها غلطان انك شكيت في حبي ومشاعري ليك
أدهم وهو يسقف: برافو ..برافو ياسمينا هانم حللتيها لنفسك وطلعتيني انا القاسي الشرير اللي ميحبش إلا نفسه دة انا جيتلك لحد بيتك ورفضتي تسمعيني أو تقوليلي اي حاجة حاولت اكلمك كتير لكنك كنتي دايما تتهربي مني كنتي مستنية اعمل ايه اكتر من اللي عملته !! اجي ابوس علي رجلك !! لو حد فينا غلطان فهو انتي ..انتي اللي مدتيش نفسك فرصة تسمعي ولا تحكي مخلتنيش اختار حتي
ياسمينا سكتت ومعرفتش ترد عشان حست انها هي الغلطانة فعلا وأنها خسرته وضيعته من ايديها بغابئها حيث اكمل أدهم قائلا: ايه سكتي ليه !! طبعا هتقولي ايه معندكيش حاجة تقوليها
ياسمينا: انا فعلا ممكن اكون غلطت بس دة من حبي ليك كنت خايفة اخسرك خوفت من خسارتك خوفت تتأذي بسببي وعشان كدة عملت اللي عملته جيت علي نفسي عشانك
أدهم: وايه كان مخوفك وخلاكي تعملي اللي عملتيه !!
ياسمينا بتوتر: اليوم اللي جيتلك فيه علي الكافيه وشوفتك وبعدها رجعنا علي الشركة هنا ومشيت كان كل اللي في بالي اني زعلانة منك وانك هتصالحني وتبررلي وبعد أما خرجت من عندك جالي تليفون بنمرة غريبة وكانت نفس النمرة اللي قالتلي علي مكانك
فلاش_باك
مجهول: اتأكدتي بنفسك ياسمينا هانم اديكي روحتي ولقتيهم قاعدين في جو رومانسي وأنه مش بيحبك وأنه بيتسلي بيكي وهيرميكي ويتجوزها
ياسمينا: مين !! مين اللي بيتكلم !!
مجهول: مش مهم تعرفي مين اللي بيتكلم المهم انك تعرفي الحقيقة ..ودلوقتي هقولك كلمتين ابعدي عن أدهم المهدي وسيبيه والا هخليه هو اللي يسيبك
ياسمينا بخوف: يعني ايه !! انا استحالة اسيب أدهم
مجهول: براحتك ياهانم يبقي انتي اللي اختارتي انك ماتشفهوش تاني
ياسمينا برعب: ايه !! انا مش فاهمة حاجة !!
مجهول: مش لازم تفهمي كفاية بس انك تفهمي إن وجودك معاه خطر عليه وعلي حياته يعني لو بتحبيه لازم تسيبيه لانك لو ماعملتيش كدة هيتقتل وبدل ماهتكوني سيبتيه وممكن تشوفيه وتبقي مطمنة أنه بخير هيكون ياعيني مات وعمرك ماهتشوفيه تاني وهتتحرمي منه الي الابد .. شوفي انتي عاوزة ايه .. سلام
ياسمينا: انتو مين ومالكم وماله ..الو..الو ...ولكن كان قد أغلق الخط وشعرت ياسمينا بدوار شديد يتملك رأسها وكأنها سوف يغمي عليها ولكنها ركبت سيارة أجرة بسرعة وفكرها لايتوقف وتحاول تمالك نفسها من الاغماء حتي تصل للبيت
#باك
ياسمينا بدموع: هددوني بقتلك لو ماسبتكش ولو حكتلك حاجة برضو وإن وجودي خطر علي حياتك واني لو ماسمعتش الكلام بتاعهم هيقتلوك ويحرموني منك للابد وبدل ماابقي مطمنة عليك واشوفك حتي من بعيد هتحرم منك حياتي كلها ..فخوفت من كلامهم وتهديدهم ليا خوفت عليك اخسرك فاختارت أبعد حتي لو كان البعد في عذابي وعذاب قلبي ارحم من عذابي لو حصلك حاجة حرقة قلبي وانا بعيد عنك ارحم من حرقة قلبي عليك لو حصلك حاجة
أدهم بهدوء: انا عاوز أسألك سؤال .. انتي شايفاني ازاي !!
ياسمينا بتعجب: يعني ايه شايفاك ازاي !!
أدهم: يعني شايفاني ازاي من وجهة نظرك
ياسمينا: شايفاك حبيبي وسندي وضهري وحمايتي من بعد ربنا سبحانه وتعالي شايفاك كل حاجة حلوة في حياتي
أدهم: سندك وضهرك وحمايتك ايه بقي بعد اللي حكتيه دة واحد مش عارف يحمي نفسه تفتكري أنه يقدر يحميكي !!
ياسمينا: ايه الكلام دة ياادهم انا مش فاهمة حاجة !!
أدهم بهدوء: يعني أنا مش هقدر ارجعلك ياياسمينا مش هقدر ابص في عينيكي بعد اللي حكتيه دة ..للدرجة دي شايفاني اني مقدرش احمي نفسي كدة فقررتي انتي تحميني !! للدرجة دي انا قليل اوي كدة وضعيف في نظرك عشان ماتجيش تحكيلي وتقرري تبعدي من غير حتي ماتفهميني من خوفك !! وعلي العموم انا مقبلكيش انك تتجوزي وتحبي واحد ضعيف مش قادر أنه يحمي نفسه ..انا مش هقدر ارجعلك بعد مابقيت كدة في نظرك
ياسمينا بصدمة: انت ايه الكلام اللي انت بتقوله دة !! انت ازاي تفكر كدة !!
أدهم: تصرفاتك هي اللي خليتني افكر كدة انك خوفتي تيجي تقوليلي خوف عليا ودة معناه انك شايفاني ضعيف مش قادر اني احمي نفسي يبقي ليه تاخدي واحد مش قادر يحمي نفسه هيقدر يحميكي انتي !! أما تبقي تشوفيني راجل قادر يحمي نفسه يبقي ساعتها نتكلم بقي عشان علي الاقل تكوني مطمنة علي نفسك وانتي معاه ..وعن اذنك بقي عشان عندي شغل ومش فاضي .. وجلس أدهم ينظر في الأوراق الذي أمامه دون أن يهتم لوجود ياسمينا الواقفة بصدمة لاتعرف ماذا تفعل وماذا تقول
ياسمينا بدموع: انا غلطانة مش غلطانة في اللي عملته وخدت قرار الانفصال لا انا غلطانة اني حبيتك واني جيتلك وكنت لسة باقية عليك لاني لسة هبلة وبصدق اي كلمة تتقالي غلطانة في طيبة قلبي وحنيتي غلطانة اني حبيت من البداية بس توبت علي ايدك شكرا للدرس وشكرا لانك علمتني وادتني قوة اقدر اقفل بيها علي قلبي مافتحوش من تاني لحد ..اسفة اني في يوم حبيتك وضحيت عشانك وجيت علي نفسي وعلي مشاعري بسبب حبي ليك ولو كان دة الحب ملعون ابو الحب اللي بالطريقة دي والذل دة ..عن اذنك يا ادهم بيه انا ماشية مش محتاج تعمل نفسك مشغول وتتهرب مني عشان امشي ماشية ومش هتعرف توصلي تاني ولا هظهر في حياتك من تاني هختفي من حياتك ومن حياة اي حد ممكن يوصلك بيا مش هخليك تشوفني حتي لو صدفة بس قبل أما امشي عاوزة اقولك اني عملت اللي عملته بتلقائية مني من خوفي انك تضيع مني كان عندي اكون بعيدة بس شايفاك قدامي من بعيد اهون عليا من اني معرفش اشوفك تاني خالص بس الظاهر كدة كنت غلطانة بس يلا مش مهم ماهو محدش بيتعلم ببلاش برضو والحياة تجارب في منها اللي بينجح وفي منها اللي بيفشل لكن بعد الفشل بييجي النجاح وانا تجربتي معاك فشلت يبقي اكيد نجاحها هيكون مع حد تاني ..عن اذنك ..وتركته ياسمينا وهي تبكي وهو في صدمته من أثر كلماتها التي شعر بوجع قلبه منها لوجع قلبها منه إلا هذه الدرجة وحبها له كل هذا الحب الكبير
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
ملك: اومال فين البت ياسمينا ياماما من يوم أما اتجوزت وانا مش بشوفها ولا بتسأل عليا
سهير: مش عارفة والله ياملك اختك مالها الايام دي فيها حاجة مش مظبوطة مش عارفة ايه هي
ملك: ماحاولتيش تتكلمي معاها طيب ياماما تعرفي مالها !!
سهير: حاولت اتكلم معاها لكن مابتحكيش حاجة مش عاوزة تتكلم وكل اللي علي لسانها انا كويسة ياماما ماتقلقيش ..حاولي أما تيجي كدة تتكلمي معاها يمكن تفضفض معاكي انتي وتحكيلك مالها
ملك: حاضر ياماما اكيد هحاول اتكلم معاها أما تيجي كدة اشوف مالها ..وقاطع حديثهما صوت مفاتيح ياسمينا وهي تدخل ووجهها يظهر عليه الحزن الشديد لتنظر لتجد ملك فتبتسم بحزن محاولة مداريته وهي تقول: ازيك ياملك وحشاني
ملك: وحشاكي ومش بتسألي عليا خالص كدة !!
ياسمينا: معلش ياملك سامحيني غصب عني ..هخش اغير هدومي وارتاح شوية واجي اقعد معاكي ..ودخلت ياسمينا دون أن تسمع ردها لأنها ليست لديها قدرة علي سماع حديث وسؤالها ماذا يوجد بها فدخلت لغرفتها تبدل ملابسها وتنظر في المرآة الي وجهها الحزين وعيناها الباكية بشدة لتحدث نفسها: للأسف محدش بيقدر الحب اللي بيتقدمله مش عارفة مين ممكن يكون الغلط لكن اللي عارفاه اني اديت وضحيت حتي لو كان في نظره حاجة تانية بس انا شايفة اني ضحيت باغلي حاجة امتلكها وهي قلبي ..لتنتبه للباب يُفتح وتدخل ملك لتمسح ياسمينا دموعها بسرعة حتي لا يظهر عليها شيء وتقول بإبتسامة: طمنيني عنك ياملك عاملة ايه بعد الجواز واحمد عامل ايه !!
ملك وتمسك وجهها وترفعه بيدها: مالك ياياسمينا فيكي ايه !!
ياسمينا: مالي ياملك في ايه !! مانا زي الفل قدامك اهو
ملك: زي الفل بعنيكي الوارمة من كتر العياط دي !! ولا بوشك البهتان دة
ياسمينا: مجرد إرهاق بس
ملك: إرهاق !! إرهاق من ايه !! مانتي قاعدة في البيت ..ياسمينا ماتكدبيش عليا وقوليلي مالك هو انا مش عارفاكي ولا ايه !!
ياسمينا: تعبانة بس ياملك مش قادرة اتكلم صدقيني
ملك: براحتك ياياسمينا بس افتكري اني كنت جمبك وانتي اللي بتحاولي تبعديني كنت فاكرة أني أما اتجوز وابعد هتفضل غلاوتي في قلبك زي ماهي وهفضل سرك وتحكيلي بس الظاهر كدة اني كنت غلطانة وكان لازم افهم اني مادام طلعت من البيت وبقي ليا حياتي يبقي خلاص مابقاش ليا مكان ارجع تاني ولا بقي ليا مكان في قلبك زي زمان كنت فاكرة أما اتجوز انك انتي اللي هتبقي معايا في كل حاجة لكنك بعدتي مكنتش اعرف اني رخيصة عندك اوي كدة لدرجة تتنازلي عني بالسهولة دي ..وعلي العموم انا عارفة مالك بس كنت حابة اسمع منك لاني كنت لسة بقنع نفسي اني ليا حتي لو حتة صغيرة من الحب جواكي واكدب كل حاجة حواليا منك وكان نفسي رد فعلك يكون زي ماكنت متوقعة بس للاسف طلع العكس واكدلي كل حاجة وان كل حاجة صح ..هنصحك نصيحة مادام غلطتي الغلطة اتحملي وجعها ومادام اختارتي طريق تمشي فيه كمليه للاخر بلاش تيجي في نصه وترجعي
ياسمينا: ملك ..ملك ..استني انتي رايحة فين
ملك وهي تنظر في ساعة يديها: اتأخرت علي جوزي وزمانه مستنيني وقلقان عليا يادوبك الحق اروحله واحكيله عن تفاصيل يومي يسمعني واسمعه ويحكيلي عن يومه يمكن الاقي عنده كلام يريحني ويعوضني عن الوجع اللي جوايا ..عن اذنك
ياسمينا وهي تحاول أن تمسك بها لكن ملك خرجت وذهبت سريعا ولا تلحق بها ياسمينا لتقول: هي كانت ناقصة كمان ليه كدة ياملك بس ..بس ليكي حق تزعلي ولازم اصالحك
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
ملك وهي تدخل وتمسح دموعها حتي لايراها احمد وهي تبكي وترسم ابتسامة علي وجهها وتتوجه للداخل وتسلم علي احمد وهي تقول: ثواني ياحبيبي والعشاء يكون جاهز معلش اتأخرت عليك انا عارفة حقك عليا
احمد وهو يمسك بها: مالك ياملك في ايه !!
ملك بتوتر: مفيش ياحبيبي انا كويسة اهو في ايه بس !!
أحمد وهو يمسك يدها ويجلسها بجانبه: تعالي بس اقعدي وقوليلي ايه سبب الحزن اللي شايفه في عينيكي دة
ملك وتتجمع في عينيها الدموع: عارف أما تكون واثق من مكانتك عند حد وفجأة تلاقي الحد دة مابقاش معاك زي الاول !! واللي بيوجع أنه قريب منك يعني لو كان بعيد كان هيبقي عادي إنما بتوجع أما يكون قريب منك اللي كان يحكيلك كل حاجة دلوقتي بقيت تعرف أخباره من برة وبقي عنده الأهم منك بقي يحكيله وانت بقيت مجرد في حياته كمالة عدد وخلاص اللي كان بيجري عليك ويحكيلك بقي دلوقتي يتهرب منك ويحكي لغيرك واما تيجي تسأله يهرب منك تلاقي نفسك بتقول معقولة !! معقولة يكون اللي كان ميعملش حاجة إلا أما يقولي بقينا بعيد كدة !! بتكون فاكر إن البعد صعب واما تكون قريب من حد صعب إن حاجة تفرقكم بس عرفت مهما كان القرب ممكن يحصل بعد عادي
أحمد: دة مين اللي مزعلك بعده اوي كدة !!
ملك بدموع: اختي يااحمد اللي المفروض تكون أقرب حد ليا كل مدي من يوم أما اتجوزت والمسافة بتبعد بينا معقولة بتكون دي فترة برضو من حياتنا وبمجرد مااتنقلنا لفترة جديدة في حياتنا يبقي بننهي القديمة !!
احمد: اهدي ياحبيبتي هي مش بالمعني اللي فهمتيه دة هي ممكن تكون بس مش عاوزة تشغلك بمشاكلها معاها وشايفة انك اتجوزتي وكدة مش عاوزة تشيلك همها عشان تركزي في حياتك ..فاهماني ياحبيبتي !!
ملك: فاهماك فاهمة كل الكلام دة بس انا عمري ماتخيلت في يوم اني ابعد انا وياسمينا كدة عارف انا طول الوقت كنت حاسة إن ياسمينا دي تبقي بنتي وأنها مسئولة مني انا أسرارها كلها كانت معايا حتي مشاكلها كانت مشاكلي فجأة بعدت واتبني بينا حاجز حاسة نفسي مش عارفة اعديه وادخلها
احمد: بصي ياحبيبتي افهميني مش معني أنها مابقتش تحكيلك حاجة يبقي دة معناه أنها بعدت عنك لا هي بس لقت إن بقي ليكي حياتك الخاصة ولسة في بداية جوازك مش عاوزة تنكد عليكي وكمان عشان عارفة ظروفي فتقولك كفاية عليها جوزها مش هاجي انا كمان واشيلها حمل فوق حملها فبتحاول أنها ماتظهرش بأي حاجة قدامك وتلاقيها كل مرة بتكون عاوزة تجري عليكي وتحكيلك بس مش بتقدر واحتمال كمان كانت ناوية في يوم تحكيلك لكن لقيتك مش فاضية فالشوية دول غيرت رأيها وعادت تفكير تاني ..انا شايف إن ياسمينا بتحبك لدرجة أنها ممكن تيجي علي نفسها عشانك وماتقولكيش حاجة وهي شايفاكي مبسوطة فمش عاوزة تنكد عليكي فأنتِ لازم تكوني فهمتي دة وحسيتيه كمان
ملك: كلامك ممكن يكون صح وانا اللي مفكرتش كدة انا بس صعب عليا نفسي اننا قريبين واقرب اتنين لبعض وفجأة الاقي نفسي معرفش عنها حاجة وشايلة كله لوحدها وكاتمة جواها غير الاول كنا بنتقاسم الحزن بس ماكنتش تشيله لوحدها كدة فوق طاقتها ومش بتتكلم ولا بتحكي
أحمد: طيب احكيلي بقي حصل ايه معاها عرفتيه مزعلك منها بالشكل دة
ملك: حاضر انا هحكيلك علي كل حاجة
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭٭
أدهم: مساء الخير .. انا جيت هطلع اريح شوية كدة
سميحة: حمد لله علي سلامتك ياحبيبي ..مش هتتعشي !!
أدهم: لا معلش ياماما انا شبعان محتاج ارتاح بس
سميحة: مالك ياحبيبي !! انت كويس !!
أدهم: انا كويس ياماما ماتقلقيش محتاج انام وارتاح بس من ضغط الشغل ..عن اذنك
محمود: ماله أدهم !!
سميحة بقلة حيلة: مش عارفة والله يامحمود قلبي واكلني عليه وحاسة أنه شايل هم فوق همه
محمود: طيب اطلعي شوفيه كدة ماله
سميحة: حاضر ..يارب يطمن قلبي عليك يابني
أدهم يجلس في غرفته شارد في التفكير ولم يخرج من هذا الا علي سماعه طرق علي الباب فياذن بالدخول ليجدها والدته تدخل وهي تحدثه قائلة: مالك يا ادهم فيك ايه !!
أدهم: مالي ياماما !! انا تمام اهو ياحبيبتي ماتقلقيش
سميحة: قلبي مش مطمن وقلقانة عليك حاسة إنك فيك حاجة مخبيها عليا مش عاوز تقولهالي ..متخانق انت وياسمينا !!
أدهم بتوتر: لا ..لا مش متخانقين ولا حاجة احنا تمام
سميحة: ماتكدبش عليا يا ادهم وقولي مالك قلبي حاسس بيك
أدهم: ماتقلقيش ياماما انا كويس ولو في حاجة انا هحكيلك دة بس إرهاق الشغل
سميحة: هعمل نفسي مصدقاك عشان مش عاوزة اضغط عليك تحكي غصب عنك
أدهم: ربنا يخليكي ليا يارب
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭
كريم وهو يدخل: مريم ..مريم
مريم وهي تخرج لعنده: ايه ياكريم في ايه بس !!
كريم: تعالي بس عاوز اوريكي حاجة
مريم: حاجة ايه دي !!
كريم: تعالي وانتي تعرفي يلا
خرجت مريم مع كريم لتشاهد تورتة جميلة يوجد عليها صورتها وهدية فخمة لتفتح عينيها من هول المفاجأة التي اسعدتها كثيرا
كريم بحنان: كل سنة وانتي أحلي حاجة في حياتي وكل عيد ميلاد وانتي منورة دنيتي كلها ياكل الدنيا دي بالنسبة ليا
مريم بلمعان دموع: انت عملت كل دة عشان عيد ميلادي وفاكر مش ناسي !! انا بحبك اوي اوي
كريم: انا انسي اي حاجة في الدنيا الا اليوم اللي اتولدتي فيه لانه كان اجمل يوم عشان جت في اجمل واحدة في الدنيا
مريم وتحتضنه: ربنا يخليك ليا يارب ويديم وجودك نعمة في حياتي بحمد ربنا كل يوم عليها انا من غيرك ولا حاجة ولو هتمني حاجة هتمني تفضل جمبي طول العمر
كريم: ويخليكي ليا يارب يااحلي مافي حياتي ..يلا بقي عشان نطفي الشمع
وظلا يغنيان في جو من البهجة والسعادة تحت ضحكات مريم الفرحة وضحكات كريم السعيدة لرؤية حبيبته سعيدة لتلك الدرجة بما فعله من أجلها وقد انتهيا من الغناء بعد الضحك والمرح بينهما ليقول كريم: يلا بقي ياحبيبتي طفي الشمع بس اتمني أمنية الاول
مريم وهي تطفي الشمع وتتمني أمنيتها لتحدث نفسها: اللهم لك الحمد علي عام مضي وعام اتي وهو معي وبجواري فاللهم احفظه لي وبارك لي فيه ..كنت عارفة يارب انك اكيد شايلي حاجة حلوة بس مكنتش اعرف انها حلوة اوي كدة ..يارب امنيتي في عامي الجديد انك تخليلي كريم وتحفظه ليا وتباركلي فيه وتكملي حملي علي خير كل امنيتي اني اشوفه مبسوط ومعايا ماتحرمنيش منه يارب فهو كل حياتي وكل حاجة حلوة فيها ..لتفوق من شرودها هذا علي صوت كريم: كل دة بتتمني أمنية !!
مريم وهي تطفي الشمع وتلتفت له وتحاوط رقبته بيديها: ربنا يخليك ليا يااغلي حاجة في حياتي
كريم: ويخليكي ليا يارب ياكل الدنيا دي ..بس مش هتقوليلي اتمنيتي ايه بقي !!
مريم: لا مش هقولك عشان تتحقق
كريم: وعشان خاطري !!
مريم: انت عارف انا اتمنيت ايه من غير أما اقول
كريم: ربنا يقدرني واسعدك
مريم بدموع: وجودك في حياتي السعادة الحقيقية
كريم ويمسح دموعها: ليه ..ليه الدموع دي !!
مريم: دي دموع الفرحة دموع العوض بعد التعب العوض طعمه حلو اوي
كريم: انتي تستاهلي الخير وبس
مريم وهي تجلس: عارف ياكريم علي التعب اللي شوفته في حياتي انا قولت اني كدة حياتي كلها بقت تعب خلاص عارف انا اخر عيد ميلاد ليا حضرته كان قبل أما جدتي تتوفي عملتهولي وجابتلي تورتة ولعب كتير وكنت مبسوطة اوي بس مكنتش اعرف انه اخر عيد ميلاد ليا واني اخر مرة هفرح فيها ومكنتش اعرف إن قصاد الانبساط دة هيكون في تعب اضعافه من يومها وانا بقيت بخاف افرح اوي ومن يومها كمان محتفلتش بعيد ميلادي تاني وبقي ييجي زيه زي اي يوم مابقتش بحس بيه ..كنت دايما بدعي ربنا يعوضني لحد الحمد لله أما عوضني بيك
كريم ويمسك بيديها: ليه شايلة كل الوجع دة جواكي لوحدك !! احكي ياحبيبتي انا حابب اسمعك واشاركك فيه وخلينا نتقاسم الحزن
مريم: حسيت الحكي مفيش منه فايدة عشان احكي الوجع اللي جوايا مهما عدي عليه ايام وسنين وبيتهيالي اني نسيته بكتشف أنه لسة عايش معايا ساعات بيكون اللي جوانا وحاسين بيه اكبر من أنه يتحكي أو يتفهم في وجع بيكون ليك انت وبس ومش مسموح لحد أنه يشاركك فيه لأن بيكون مكتوبلك انت وبس خاص بيك مش ذنب حد يشيله معاك مهما كان قريب منك لأن بسببه بتكون بتتجهزلك حاجة هتفرح قلبك فلازم تتحمل الوجع عشان تاخد الحاجة دي وتحس بطعمها
كريم: كل ماكان الوجع صعب ومؤلم كان صعب نسيانه وبنحس بيه أما ربنا بيعوضنا بنحس اد ايه هو كان صعب عشان نستاهل الخير دة كله اللي احنا فيه
مريم: اي وجع في الدنيا يهون الا وجع الفراق ومرارة الاشتياق وجع الحرمان والعذاب والقسوة اصعب وجع ممكن اي حد يتعرض ليه ..عارف انا بقيت بخاف احتفل بعيد ميلادي عشان مفتكرش ذكرياتي اللي فاتت وسنين العذاب اللي شوفتها لانها لسة عايشة جوايا غصب عني معرفتش اني انساها ووهمت نفسي اني نسيت بس ازاي انسي حاجة جرحها لسة مفتوح ماتقفلش !!
كريم: احكي ياحبيبتي احكي وطلعي اللي جواكي وانا هسمعك وخلينا نشيل مع بعض ونتقاسم الحزن
مريم بتنهيدة: قصة عذابي بدأت من وانا طفلة لسة عندي ٨ سنين من بعد وفاة جدتي الله يرحمها شوفت النجوم في عز الضهر زي مابيقولوا شوفت العذاب اشكال والوان وللاسف أنه كان من اقرب الناس ليا يمكن اللي كان واجعني اكتر من الوجع نفسه إن الوجع منهم اكتر ناس المفروض اطمن بوجودهم كان وجودهم هو القلق بالنسبة ليا وكان بعدهم هو الامان فضلت من وانا طفلة عندها ٨ سنين لحد ١٢ ولا ١٣ سنة تقريبا في السن دة مفيش يوم عدل في الفترة دي يوم واحد بس حتي ..كنت بتمني يوم واحد ارتاح فيه شوية من الضرب والإهانة والمذلة يوم واحد بس جسمي يرتاح إنما للأسف طول السنين دي مفيش يوم واحد ارتاحت اتعذبت من اقرب الناس ليا اللي هما المفروض انهم اهلي بس هو في أهل بالقسوة دي !! أما جدتي اتوفت عمي خدني عشان اعيش معاه وعشان كمان الميراث وكدة وكل حاجة تبقي تحت ايده شوفت أسوأ ايام حياتي هناك سنة مرت عليا من أصعب السنين في عمري كل يوم إهانة وشتيمة وضرب عارف من كتر الضرب كان بيتهيألي وانا نايمة اني بتضرب كنت بنام ومعدتي بتوجعني من الجوع واني خايفة اقوم اجيب اكل ولو اتكلمت ولا فتحت بوقي كان يهددني أنه هيرميني في الشارع واشحت وابات علي الرصيف سنة فيها كل أشكال العذاب مافيهاش يوم راحة عدت وابتدت سنة عذاب جديدة أما وداني عند عمتي كانت طول اليوم زعيق وخناق ومشغلاني خدامة بمعني الكلمة حتي لبسي ماكنش بيتغسل اتمرمطت عندها كل أشكال المرمطة لحد في يوم
#فلاش_باك
مريم: عمتي احنا رايحين فين !!
ثناء: هتعرفي دلوقتي ياختي مستعجلة علي ايه ..واخرسي بقي
مريم: حاضر
ثناء وترميها في الشارع: يلا ياختي دة بقي مكانك واوعي تيجي ورايا انتي فاهمة ولا لا !! عشان بعد كدة تبقي ماتسمعيش كلامي كويس اوي
مريم ببكاء: طيب انا عملت ايه لدة كله عشان خاطري مش تسيبيني هنا عشان خاطري
ثناء: شوف البت قال يعني مش عارفة عملت ايه ..بقولك ايه انا مش ناقصة وجع دماغ وانا قرفت منك اصلا ومش مستحملة حد أنا كفاية عليا عيالي اربيهم مش هربيكي انتي كمان فوق البيعة لا وكمان هصرف عليكي اكل وشرب ولبس وتعليم انا مش ناقصة
مريم: مش عاوزة حاجة بس ماتسبنيش هنا عشان خاطري وهسمع كلامك بعد كدة وهعملك كل اللي انتي عايزاه ومش عاوزة اذاكر ولا اروح المدرسة تاني خلاص بس عشان خاطري خديني معاكي
ثناء وهي تدفعها: حاسبي بقي كدة هو الواحد كان ناقصك انا مش عاوزة اشوف وشك تاني انتي فاهمة ولا لا !! وتركتها تبكي وذهبت
#باك
مريم ببكاء: ومن قسوة قلبها سابتني في الشارع ومشيت بس جت بليل تاخدني عشان توديني عند خالتي تاني يوم الصبح بعد أما عرفت بالصدفة إن جوزها اتخانق معاها بسبب الموضوع دة سمعتهم بليل بعد أما رجعنا وانا بايتة في المطبخ مانا كنت بنام في المطبخ كأني خدامة ولا كأني ليه انا بالفعل كنت خدامة ..وصحيت تاني يوم الصبح عشان ابتدي قصة عذاب جديدة مانا خلاص خدت علي كدة وروحت قعدت عند خالتي وقولت اني هرتاح شوية بس الظاهر اني كنت بحلم وبتمني الراحة من كتر الوجع اللي كنت فيه خالتي مقدرتش تستحملني ولا هي ولا جوزها بعد عذاب فيا وشغلي كأني خدامة ونزولي شغل عشان اجيب مصاريف نفسي من أول يوم في قصة عذابي واستحملت وجع الدنيا كله واتحملت ضغط صعب اني اتحمله غصب عني ورغم دة كله بتحمل لإحساس بيقولي ربنا بكرة يعوضني كنت حاسة إن تعبي دة مش هيفضل لحد اما خالتي جت ورجعتني لعمتي تاني ساعتها قولت خلاص انا هعيش عمري كله كدة في عذاب بس مكنتش اعرف إن دول اخر سنتين في قصة عذابي وتنتهي عشان ابتدي قصة سعادتي بقي اتحملت السنتين ولا التلاتة دول وانا معرفش ربنا شايلي ايه بس كنت حاسة أنه خير .. ومعرفش أنهم اخر حاجة وارتاح من العذاب اللي انا فيه دة بس كانوا صعبين برضة مانا عمري ماشوفت يوم سهل من بعد وفاة جدتي اللي كانت معوضاني عن امي وابويا قعدت مع عمتي الكام سنة دول في عذاب وذل وإهانة وعدت الايام والسنين لحد مافي يوم عمتي اتخانقت معايا خناقة كبيرة ووصلت أنها رمتني علي السلم وطردتني بعد مابهدلتني وسابتني مرمية ولا سألت فيا لحد اما لقيت هند ومامتها طالعين وخدتني طنط سماح مامة هند ودخلتني وقعدت تهدي فيا لحد اما بالفعل هديت وبدأت تسألني ايه عمل فيا كدة وبدأت احكيلها علي كل حاجة طفلة لسة عندها ١٢ ولا ١٣ سنة مش فاهمة حاجة لسة قعدت تحكي علي كل حاجة شافتها وهي مش فاهمة بس اما صدقت لقت حد تشكيله ويسمعها يمكن يحس بيها ..لقيت دموع ماما سماح نزلت واخدتني في حضنها وقعدت تطبطب عليا وحسيت بمعني الحنان في حضنها والامان ياه اخيرا حسيت بالراحة والأمان ومن اليوم دة وانا حياتي كلها اتبدلت من عذاب لراحة ومن حزن لسعادة وفرح ومن رعب وخوف لامان واطمئنان كل حاجة وحشة اتبدلت بكل حاجة حلوة وجيه الحلو كمل بقي أما انت جيت وحسيت اني ملكت الدنيا ومافيها أما بقيت معاك واتجوزنا حسيت اني كدة انا خلاص مش عاوزة حاجة تاني واني خدت حظي الحلو من الدنيا وربنا عوضني عن كل اللي شوفته في حياتي تعب سنين اه بس راحة علطول الحمد لله علي عوض ربنا
كريم ويمسح دموعه: ياه انتي ربنا بيحبك اوي كدة عشان يديكي الابتلاءات دي كلها !! عارفة انا اول مرة شوفتك فيها وانا في حاجة شدتني ليكي وبتقولي هي دي اللي بتدور عليها ولقيت نفسي مش عارف ابطل تفكير فيكي ومش عارف ابعد ولا عارف امشي لقيت نفسي كل أما ابعد أقرب واتاريني بقرب حتي في البعد خطفتيني بنظرة من أول مرة واستوليتي علي قلبي ليكي وقولت قلبي مش هيكون لحد غير ليكي وشوفت معاكي معني الحب الحقيقي وعرفت معاكي يعني ايه الفرحة اللي بجد في قربي منك عرفت حاجات كتير انتي السبب فيها ولولا وجودك ماكنتش هتكون موجودة لانها مش موجودة غير معاكي انتي وبس ويمكن تبقي موجودة بس انا مابحسهاش غير معاكي وليكي انتي وبس كنت دايما اقول اني ماحققتش اي حاجة اتكلم عنها في حياتي بس اكتشفت دلوقتي اني حققت اهم وأعظم حاجة واهم انتصاراتي وهي انتي يامريم انتي الحاجة الوحيدة الحلوة اللي اقدر اقول اني حققتها واكون فخور بدة روحي وقلبي بين ايديكي ملك ليكي العمر كله انتي النعمة اللي ربنا انعم عليا بيها وكل يوم بشكر ربنا علي نعمة وجودك وبدعي دايما أنه يديم نعمته دي عليا لأني حقيقي ماعنديش أغلي منك في حياتي كلها يااعظم انتصاراتي واجمل حلم حلمته وحققته
مريم بدموع: انا بحبك اوي اوي وبدعي ربنا ما يحرمني منك العمر كله وتفضل دايما جمبي وفي ضهري وجوة قلبي
كريم ويمسح دموعها: يلا قومي البسي عشان اخرجك بقي دة النهاردة عيد ميلادك مش عاوزين حزن
مريم بضحك: حاضر ياحبيبي ربنا يخليك ليا يارب
٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
ياسمينا وهي تحاول الاتصال بملك: ياربي ياملك مش بتردي ليه ومش وقت تزعلي مني والله حرام عليكي انا مش مستحملة ..ولكن دون جدوى فظفرت ياسمينا وهي تقول: مش بتردي يعني زعلانة طب خلاص براحتك مفيش حل غير اني اجيلك بكرة بقي مش معقولة مش هتفتحيلي الباب يعني ..لا دي مجنونة وتعملها والله ..خلاص بقي انا هوجع دماغي ليه انا فيا اللي مكفيني افتح نت كدة شوية يمكن اقدر اني انسي وجع من اللي جوايا شوية
وتمسك ياسمينا بهاتفها وتتجول في مواقع السوشيال ميديا بملل لتنصدم وتنهار من البكاء فجأة عندما رأت أثناء تجوالها في السوشيال صور لادهم مع فتاة جميلة جدا علي الفيس بوك وعليها بعض عبارات الحب من الفتاة لادهم ورفع هو أيضا صورة معها وعليها أيضا بعض العبارات فرمت الهاتف وظلت تبكي وتبكي من أثر الوجع الذي يؤلم قلبها وتشعر به بداخلها من تلك الصور وبدأت تحدث نفسها بوجع: اه ليه كدة ليه !! ليه تعمل فيا كدة انا كنت عملتلك ايه لكل دة !! كل دة عشان خوفت عليك وانت ماقدرتش حتي الخوف دة !! ليه كل حاجة مابتكملش ليه بتبقي مجرد ذكريات توجع فيا وتقطع في قلبي !! انا تعبت خلاص ومابقتش مستحملة وجع قلب تاني قلبي خد جراح لو فضلت العمر كله اعالج فيها هتفضل موجودة ..يارب هون علي قلبي يارب أنا تعبت اوي يارب .. وظلت تبكي بشدة حقًا وجع القلب مؤلم واصعب الم هو الم القلب ولكن من يكون السبب في هذا الالم نحن الذي نؤلم أنفسنا ام الذي حولنا هم الذين يفعلوا هذا بنا بسبب حبنا لهم !! من المخطيء نحن ام هم !!
٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭
في صباح اليوم التالي
سوزان: ايه ياصيفو عاملة ايه ياحبيبتي سما ومروان كلوا دماغي عاوزين نروح لخالتو صافي عاوزين نروح لخالتو صافي جبتهملك اهو
صافي وهي تضحك: هما فين حبايبي دول وحشوني اوي اوي بجد ووحشتني شقاوتهم ولعبهم
سوزان: قاعدين برة اهو ياختي اخرجلهم
صافي وهي تخرج لتتفاجئ بسما ومروان يقفزان عليها بسرعة يلعبون معها وهي تبتسم وتحتضنهم بحب: حبايب قلب خالتو اللي وحشوني وزعلانة منهم
سما: ليه ياخاتو زعلانة مننا ليه هو احنا عملنا حاتة عسان تزعلي مننا !! (ليه ياخالتو زعلانة مننا ليه هو احنا عملنا حاجة عشان تزعلي مننا)
صافي وتمط شفتيها: أيوة مش بتسألوا عليا يبقي ازعل ولا مازعلش بقي !!
سما: ماسي تزعلي بس احنا تولنا لماما عاوزين نلوح عند خاتو حتي اسألي ملوان تدة تمان ..صح ياملوان مس احنا تل سوية نسأل ماما علي خاتو !! (ماشي تزعلي بس احنا قولنا لماما عاوزين نروح عند خالتو حتي اسألي مروان كدة كمان ..صح يامروان مش احنا كل شوية نسأل ماما علي خالتو)
مروان: أيوة تل سوية نتولها نلوح عند خاتو (أيوة كل شوية نقولها نروح عند خالتو)
صافي بضحك: خلاص مصدقاكم وفين بوسة خالتو بقي !!
قفز سما ومروان يسارعان لتقبيلها وهي تحتضنهم بحب كبير وتأتي سوزان من الخلف: مش كفاية بقي لعب وتتعبوا خالتو ولا ايه !!
صافي: تعبوني فين دة بس ياسوزان دة يمكن انا ببقي كويسة عشان هما معايا بس وحضنهم بيهون عليا كتير حقيقي
سوزان: ربنا يخليكي ليهم يارب ياحبيبتي
صافي: ويخليكم ليا يارب
سوزان: طب يلا بقي عشان نتغدي ولا ايه !!
وقاطعهما صوت جرس الباب
سوزان: انتو مستنيين حد !!
صافي: لا خالص ..استني اقوم اشوف مين
سوزان: لالا خليكي انا هشوف مين
وذهبت سوزان لتفتح الباب لتجد خالتها سوسن ورامي فتقول بفرحة: اهلا اهلا ياخالتو تعالي اتفضلي
سامية وهي تخرج من المطبخ: مين ياسوزان
سوسن: هيكون مين غيري انا يعني
سامية بسعادة: اهلا اهلا يا سوسن دة ايه النور دة بس تعالي اتغدي معانا بقي حماتك بتحبك ..وتنظر لرامي: ازيك يارامي ياحبيبي عامل ايه !!
رامي: الحمد لله ياخالتي انتي عاملة ايه
سوسن: غدا ايه بس انا جاية اطمن علي صافي
صافي وتأتي من الخلف: وصافي بنفسها جاتلك اهي ياخالتو
سوسن وتحتضنها: عاملة ايه ياحبيبتي دلوقتي !!
صافي بإبتسامة: الحمد لله ياخالتو ..وتوجه نظرها لرامي: ازيك يارامي عامل ايه
رامي ويبادلها السلام: ازيك ياصافي اخبارك
صافي: الحمد لله تمام بخير
سوزان: يلا بقي عشان الغدا ونتغدي كلنا مع بعض
٭٭٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
ملك وهي تفتح الباب: ياسمينا تعالي ادخلي
ياسمينا وهي تدخل: انا اسفة ياملك مش عاوزاكي تزعلي مني
ملك: انا مش زعلانة منك عشان تعتذري
ياسمينا: انا عارفة انك حقك تزعلي بس صدقيني غصب عني
ملك: حصل خير ولا يهمك المهم تشربي ايه !!
ياسمينا: مش عاوزة اشرب حاجة عاوزة اقعد معاكي واتاكد انك سامحتيني ومابقتيش زعلانة مني
ملك: زعلي علي اد غلاوتك عندي وكفاية مجيتك لحد هنا
ياسمينا: عشان خاطري تسامحيني وبلاش عقابك دة وانتي عارفة أنه اصعب عقاب بالنسبة ليا بلاش تحملي عليا انا فعلا مش مستحملة والله فبلاش عشان خاطري تعاقبيني ببعدك عني عشان خاطري ياملك الا انتي
ملك: ومين قالك اني بعاقبك !! مش يمكن بحسسك بغلطك أو قررت اكون زي مانتي عاوزة بعيد !!
ياسمينا: انا عمري ماتمنيت انك تكوني بعيد
ملك: خلاص سيبك من الموضوع دة وانا مش زعلانة ولا بعاقبك زي مانتي فاهمة
ياسمينا بدموع: لا زعلانة وبتعاقبيتي باصعب عقاب واثقة ومتأكدة اني مش هقدر اتحمله ..بدليل كمان انك ماسألتنيش مالي رغم وشي اللي باين عليه الإرهاق وعنيا الوارمة من كتر العياط وملامحي اللي بقت باهتة من الحزن والزعل معقولة كل دة ومش قادرة تطمني تقوليلي مالك !! وعاملة نفسك مش واخدة بالك !! عقاب دة ولا مش عقاب !!
ملك: أسألك !! أسألك عن ايه !! أسألك وانا عارفة ردك هيكون ايه !! أسألك عشان تقوليلي مفيش انا كويسة !! كام مرة سألتك وماتحكيش !! ومش دة اللي انتي عاوزاه اني ماسألش وانا بعملك اللي عاوزاه اهو عشان اريحك
ياسمينا: انا عمري ماكنت عاوزة كدة وانتي عارفة كدة ياملك وماتخليش زعلك يقسي قلبك عليا اوي لأن قلبي فيه اللي مكفيه والله ومليان حزن وصدمة وخيبة امل مابقاش مستحمل أنه ينخدع تاني او يحزن تاني بلاش انتي كمان تيجي عليا ساعات بيكون في كلام جوانا مش قادرين اننا نطلعه لاننا مش عارفين هنحكيه ازاي ولا نرتبه ازاي عشان يتفهم كل اللي عارفينه إن قلبنا مابقاش زي زمان احنا نفسنا مابقيناش زي زمان روحنا بقت مطفية اوي وقلبنا مليان حزن وبس
ملك بحزن علي حال شقيقتها وتحتضنها: طب خلاص اهدي اهدي وقوليلي مالك في ايه !!
ياسمينا وتمسك بهاتفها: بصي كدة دايما اقرب الناس ليا هي اللي بتوجعني دايما اكتر ناس حبيتها واديتها كل حاجة هي اللي بتوجعني كل مرة كنت بدي حب واهتمام كنت بلاقي الرد علي دة وجع وخذلان قلبي مابقاش فيه حتة سليمة بقي كله مكسر مش عارفة حتي الم كسوره .. ليه كل حاجة حلوة عمرها قصير !! ليه أما النهاية كدة كان القرب من الاول !!
ملك: مين دي !! وهي دي الصورة اللي مضايقاكي !! يبقي انتي لسة ماتعلمتيش من الدرس صح لسة ماتعلمتيش رغم دة كله لسة هبلة وبتصدقي اي حاجة وبتخسري
ياسمينا: قصدك ايه ياملك !! أما الاقيه متصور مع واحدة وماسكة ايده ومياصة وقلة ادب يبقي انا الغلطانة يعني اروح اتصور صورة زي دي كدة مادام عادي بقي !!
ملك: انا ماقولتش انه عادي انا قصدي انك ماتعرفيش مين دي مش يمكن قريبته ولا حاجة
ياسمينا: قريبته !! قريبته تتصور معاه كدة !! طيب وكلام الصورة !! وكلامه ليها !! كل دة عادي !! ليه دايما تطلعوني انا الغلطانة ليه دايما تيجوا عليا !! ليه دايما انا اللي اتحمل والتمس العذر كفاية بقي انا تعبت مش كل حاجة شايفني فيها غلطانة وكل حاجة تحطه ليها الف سبب وسبب ومبرر عشان تخلوني اكمل وانا موجوعة حرام بجد انا جبت اخري ومبقتش قادرة اتحمل والمرة اللي جيت فيها وخوفت عليه ومقدرش دة محدش فيكم غلطه وقاله زي مابتقولولي دايما فين كلامكم ليا !! ليه دايما شايفني اني مش بعمل حاجة !! انا مابقتش مستحملة خلاص ووجع قلبي كل يوم يزيد وكل مرة اكتم جوايا واسمع كلامكم اتعب اكتر انا مش عاوزة اسمع كلام من حد تاني ولا عاوزة نصايح من حد ولا هحكي حاجة تاني مادام دايما شايفين اني غلطانة طول الوقت واني ظالمة كدة واني مبعملش حاجة ..عن اذنك
ملك وهي تسرع لتلحقها: ياسمينا ياسمينا استني ي.. ولكنها ذهبت سريعا وهي منهارة من البكاء لاتدري ماذا تفعل فهي تشعر بكثرة الآلام الذي اوهمت نفسها بأنها لم تكن موجودة فقد أرهقت من كتر التحمل الم يأتي الوقت للراحة إذًا !!
ملك بخوف: احمد ..احمد
احمد بنوم: ايه ياملك في ايه
ملك بقلق: احمد قوم بسرعة ياسمينا كانت هنا ولسة نازلة منهارة وانا قلقانة عليها اوي ونزلت بسرعة ماعرفتش الحقها قوم والنبي ننزل نبص عليها
أحمد وهو ينهض: طيب البسي بسرعة يلا وننزل
ملك: حاضر
وبعد قليل من الوقت خرجا احمد وملك معًا للبحث عن ياسمينا
احمد: رني عليها كدة
ملك: مش بترد وانا عارفة انها مش هترد وقفلت تليفونها
احمد: هو ايه اللي حصل طيب خلاها تعمل كدة !!
ملك: انا السبب انا السبب ماكنش ينفع احمل عليها في اللي هي فيه دة
أحمد: خير خير إن شاء الله ماتقلقيش
ملك بقلق: يارب يارب ..ربنا يسترها
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭٭
رامي: القمر قاعد لوحده ليه !!
صافي وهي تعتدل في جلستها: لا عادي بحب الهدوء بس والهواء مع مج النسكافيه مزاج تاني وقاعدة البلكونة
رامي: طيب ممكن تسمحيلي اشاركك اللحظة دي !!
صافي: اه طبعا اتفضل
رامي: اتغيرتي ..اتغيرتي اوي ياصافي
صافي: اتغيرت !! اتغيرت ازاي يعني !!
رامي: مابقتيش زي زمان حاسس اتغيرت فيكي حاجات كتير
صافي بإبتسامة: الوقت بيغير والمشاكل بتغير والوجع بيغير كل حاجة بنمر بيها بتغيرنا لأنها بتاخد مننا
رامي: وحشتيني ياصافي وحشتيني اوي
صافي: امممم وجع جديد دة ولا ايه !!
رامي: صافي عشان خاطري تديني فرصة تانية وتشوفي وتتأكدي اني لسة بحبك
صافي: صعب ..صعب صدقني صعب افتح جرح اتقفل ماتجيش وتخربش فيه بضوافرك خليه مقفول أما صدقت قدرت اني اداويه
رامي: صافي ..تتجوزيني !!
٭٭٭٭٭٭٭٭٭٭٭٭٭٭٭ صباح وحيد ٭٭٭٭٭٭٭٭٭٭٭٭٭٭٭
ياسمينا وهي تتجه نحو الشركة بتعب شديد وتصعد لعند مكتب أدهم وتطرق الباب طرقات خفيفة غير منتبهة لمناداة هدير عليها ثم تدخل بكل هدوء وتعب شديد حيث تحدث هدير نفسها بحزن علي حالتها: فعلا وجع القلب قادر يهد الإنسان ربنا يهون عليكي يارب
ياسمينا وهي تتجه لمكتب أدهم لتكون مقابلة له وتقف دون كلام حيث يرفع هو بصره ليراها
أدهم: ايه جابك هنا !!
ياسمينا بتعب وتمسك بهاتفها: مين دي !!
أدهم وينظر للهاتف ثم ينظر الي وجهها المرهق لكنه تجاهل هذا ويقول ببرود: اظن مابقاش شيء يخصك في حاجة ومش هيهمك لو عرفتي
ياسمينا وبدأت تشعر بالدوار يتملك رأسها: صح انت صح انا اللي غلطانة
أدهم ببرود: وعلي العموم عشان اريحك برضو هقولك هي مين ..دي تبقي خطيبتي
ياسمينا بصدمة والدوار تملك رأسها: خ..خ...خط..خطيبتك !! وسقطت ياسمينا فجأة ودخلت في حالة اغماء
أدهم: .......