رواية اسمهان
الفصل الثاني2
بقلم ريم ابو القاسم
جا كفتني وقال لامي وابوي البت الواحدة مهما دلعوها بربوها صح ولا كلامي غلط وانا البت دي لو اديتوني الصلاحيه بربيها ليكم ابوي زول مسكين شديد قال في شنوو انت ليك كل الحق ياكا اخوها وابوها وراجل عليها
طوالي امي نطت قالت لي ابدا انت عاجباك سماحتك وعايز تتحلحل من بتي طوالي اختاها م في شيء بالقوة قليها ي خالتي اسألها عملت شنو امي قالت لي خليها تعمل م ياها حركات المراهقين لو انت محسسها بالحب م بتفتش ليهو برا المهم زعلت من امي و بقت في جوطه شديده ابوي بس بقول استهدو بالله انعلو الشيطان و انا واقفه ببتسم لانو ده كلو عشان بحبني و ضمنته ما ح يخليني يوم ...
كنت ح اخلص تانيه وماشه تالته قام قال لي من للآخر كده عايزة تصلي لشنو قلت لي اطلع من حياتي...
سكت مسافه نظام ما مستوعب قال لي جدا الحب ما غصب ولا الزواج غصب والشي لو ما في رغبه ما بتم انا ما بغصبك علي و الله يديك ود الحلا اليسعدك انا قلت كده عشان اعمل زي المسلسلات وانو ح يجيني راجع براو ...
طوالي لفحته توبي ومشيت لي توته صحبتي (تقوى) حكيت ليها اي شي ... قالت لي انتي لسه في امورك دي يا نونا مش انا حذرتك من البتعملي في ده وانو ود خالتك لو اتلفتي ساي بشلبو منك انا دي عايزاهو طوالي لبعتها في ضهرا قلته ليها هوي يا توته هو ح يرجع لي انا متأكده من الحاجه دي اصلا ما بقدر يعيش بلاي انتي في وانا في قالت لي برضو الإنسان عندو قدره تحمل معينه لو وصل ليها خلاص وانا قلتي لي اطلع من حياتي متوقعه زول زي (فهد ) يدوس علي كرامتو و يرجع ليك ... صراحه كلاما مقنع بس أبيت اقتنع قلته ليها ده مع الناس معاي انا غير يا ماما قالت لي طيب نشوف اخرتكم شنو ...
قلته ليها يلا قومي جيبي مويه نشف ريقي من النضمي قالت لي بلاي جايه في نص النهار و كمان بتدى أوامر انا زاتي عايزه انوم اطلعي بره واشربي وسدي الباب وراك قلته ليها اصلك ما بتتغيري يلا مكان ما محترمني فيو ما في سبب يخليني اقعد دقيقه طلعته شربته مويتي و قفلته الباب مشيت البيت لقيت ابوي قاعد في الكرسي تحت الشجره طبعا عندنا شجره كبيره شديد جوه البيت مزروعه لاكن اغصانا طالعه بره الحيطه ضلها بارد قال لي تعالي يا بتي الكلام القالو ود خالتك ده صح .. قلته لي يا ابوي قال لي انا طول عمري ما بسألك لانو واثق فيك بس ود خالتك مقام اخوك و برضو عايزك بالحلال لو ما عايزك ما بصل الكلام ده لي و كل البتعرفيهم ديل دايرين يلعبو بيكي ما اكتر من كده وانتي زوله واعيه و كبيره و تعرفي الصح من الغلط نزلته راسي قلته لي صح قال لي طيب لي عملتي كده ما تعيدي لي كلام امك انك مراهقه لانو انتي واعيه وانا قبل كده حزرتك يا نونا من العلاقات المحرمه قلته لي صح قال لي طيب ده تصرف صح منك... قال لي العصر تمشي لي خالتك فهد بكون رجع تعتذري منو علي تصرفك ده و لو ما اتعدلتي انا الجمعه بعقد ليك اريحك طوالي قلته لا لا خلاص والله ما بتتكرر قال لي خلاص امشي ساعدي امك....