رواية ذئاب لا تعرف الحب الفصل الخامس والعشرون25بقلم نجمه براقه
بدر
بقيت وقت كبير قاعد في اوضة شبل بعد ما امي سابتني من غير ما تقول كلمه ولا تعلق علي اللي شافته وطول الوقت ده مكنتش قادر اطلع ل وفاء ولا اتكلم امعاها ولا احط عيني في عينها بعد اللي حصل ، وبعد محاولات كتير فاشله بأني اروحلها سيبت البيت وروحت المستشفي قعدت اهناك لليوم التاني وطول الوقت وانا مش عارف أبطل تفكير فيها وفي اللي حصل ومش فاهم هي طبيعي تتجاوب امعاي اكده ولا يكون حبتني ، بس هي هتحبني ليه وانا واخدها من حياتها وفرحها واهلها ومستقبلها وجابرها تقعد غصب عنها ، هتحبني ليه وانا بيني وبين اخوها دم وحكايتنا مش هتنتهي غير بيه .
حاجات كتيره بتمنع حبها ليه وانا مقتنع ان لو هي اخر وحده في الدنيا مش هننفع مع بعض ولكن لمجرد الفكرة ان تجاوبها ده كان حب فرحتني
: في ايه
قالهالي عبيده في وقت شرودي ف انتبهتله وقولت
_ مفيش حاجه ، هو الدكتور مجاش يطمنا ليه
: مش عارف بس لسه فاضل شويه علي ال 24 ساعه
بصيت لساعتي وقولت
_ ايوه صح
: تفتكر هيعيش
_ بأذن الله هيعيش ، املنا في ربنا كبير
: ونعم بالله
_ طيب انت من امبارح اهنه ما تروح البيت تغير ولو كان هترتاح شويه
: انا زين اكده
_ روح غير وتعاله احنا لسه مطولين
سكت وكأن في حاجه منعاه يروح ف قولت
: ايه
فرك في صوابعه وقال
_ مش عايز ارجع البيت تاني
: ليه
سكت مردش ف قولت
_ علشان بت عمك
هز راسه بالموافقه ف قولت
: طيب وهي مالها ، ما انت تروح تعمل اللي انت عاوزه وتيجي شاغل نفسك بيها ليه ، ولا تكون لسه مشغول بيها
_ له ، هي خلاص مبقتش تشغلني ، انا هروح اشوف دعاء والعيال واجي
#ورد
كنت خايفه قوي علي تماضر ومش عارفه هيعملوا فيها ايه ، كنت خايفه من كل حاجه ، ليلي وشيطنتها ، وان دعاء تعرف اللي حصل بيني وبين عبيده ، وان شبل يموت ، كانت كل حاجه مخوفاني ومحتاجه حد يطمني ويكون جمبي وبجملة الاحاسيس المحرمه انا كنت محتاجه ل عبيده ، كنت محتاجاه جمبي في الوقت ده قوي وكنت بقول لما هيجي اكيد هيجيلي يطمن عليه وقتها حكيلوه اللي حصل واتحاما بيه لأن هو الوحيد اللي ينفع اقوله.
وبعد وقت وانا مستنياه يجي وانا علي احر من الجمر سمعت صوته بره ف طلعت من الاوضه قوام وشوفته وهو واقف مع شجر وبتسأله عن شبل وبعد ما طمنها دار وراح لأوضته ومع انه شافني بس مبصليش ولا حتي رمي عليه السلام ، وانا قولت اكيد مشغول ومخه مش فيه دلوقتي ومزعلتش ولا انشغلت بتجاهله ده ف طلعت وقفت في الجنينه استناه لغيت ما طلع ومشي ناحية مخرج الجنينه ف ناديت عليه بس مردش ولا بصلي مع انه سمعني وكمل طريقه وبردك ملومتش عليه علشان الحاله اللي هو فيه اكيد مش فاضي يسمعني دلوك ، مع اني كنت محتاجه قوي اني اتكلم امعاه
: بتعملي إيه وحدك اهنه
قالتهالي دعاء وانا واقفه مكان ابص للفراغ اللي سابوا ف قولت
_ لا ولا حاجه كنت... اممم كنت
: كنتي بتنادي علي عبيده
قولت بتوتر وانا مش قادره ابصلها
_ ايوه كنت عاوزه اسأله عن شبل عامل ايه
: شبل زين قالي ان حالته مستقره
_يعني مش بيموت زي ما قال بدر
: هو تعبان قوي في الانعاش بس عايش
_ ايوه ، ربنا يشفيه ويطمنا عليه
: يارب ، عشان نفرح بيكم عاد
_ انا مش هتجوزه ، هو معوزنيش
: : بس ابوه حكم
_ ايوه وعشان اكده بيقولو رما نفسه ، له يا خيتي انا مش هتجوزه
: هتجوزيه بس اصبري يقوم بالسلامه ونشوف
_ حتي لو قام بالسلامه مش هتجوزه
بصتلي بشك وقالت
: ليه مع انك وافقتي وانتي عارفه ان هو معوزكش
_ ايوه بس مكنتش اعرف انه هيرمي نفسه من فوق
: اه
حسيت انها لسه شاكه فيه ف سيبتها ولما دخلت الأوضه شوفت ليلي اهناك
_انتي ايه دخلك اهنه
: اوضة صحبتي وادخلها زي ما انا عاوزه
_ بس دلوك صحبتك اللي انتي غدرتي بيها مقعداش ، اطلعي من اهنه
: له مش قبل ما اصبرك ، تلاقيكي زعلانه ان عشيقك معبركش ومشي
كلامها فور دمي ف مسكت فيها وانا بقول
_ طيب اطلعي لا احش رقبتك "
مسكت دراعي وتنته وراي حسيته هيتكسر بقيت اتوجع وهي بتقول
: باين عليكي اكده عاوزه تموتي
_ اااه يدي سيبني!!!!
شدت عليه اكتر وقالت
: هكسرهالك يدك دي اللي عاوزه تطول عليه ، وبعدها هفضحك واعرفهم اللي بيحصل بينك وبين عبيده ، ف عدي ايامك قبل ما اخلص عليكي
بكيت وانا بقول
_ سيبني يدي هتتكسر ، بعدي عني!!!
زقتني وجابتني علي الارض ف لقيتها فوقيه ماسكه في رقبتي وبتقول بغيظ
: خليكي عارفه ان صبري قليل ومبحبش قلت الادب ، وخليكي عارفه كمان اني اقدر اقتلتك دلوك ومحدش هيلحقك مني "
خوفت منها ف هزيت راسي وانا ببكي ف داسة اكتر وقالت
_ لو خشمك اتفتح هقطعلك لسانك قطع ، وحسك عينك تعملي نفسك هانم اهنه انتي غجريه ورقاصه فاهم يابت!!!
قولت ببكاء وانا حاسه نفسي بيروح مني
: حاضر حاضر
بقيت افك في يدها وانا اردد كلمة حاضر وهي تزيد وبعد ما خلاص نفسي راح سابتني وقالت وهي بتقوم
_ بعد اكده مش هسيبك غير وانتي خلصانه في يدي
.................
#ليلي
لو كنت قتلتها كنت اتعرفت ومكنتش هقدر انفد منهم علشان اكده سيبتها بس بعد ما خافت مني وعرفت انها واقعه في نصيبه لأما هفضحها لأما هقتلها وفي الحالتين ميته ميته ، وبعد ما طلعت من عندها روحت كلمت شحاده وقولتله علي النايبه الكبيره وهي ان شبل مماتش لسه ف قال
: ازاي يعني مماتش ، انتي قولتي انه مات
_ طلع مماتش وقال في الانعاش قال ، بقولك ايه الواد ده لازم يموت قبل ما يفوق ويفضحنا
: طيب وده هنطوله ازاي قبل ما يفوق
_ معرفش اتصرف ، روح المستشفي واقتله انت
: وهو هيكون وحده في المستشفي يا ختي ما اكيد اخواته والغفر هناك
_ طيب وانا اعملك ايه ، انت لازم تتصرف لأنك هتموت امعاي لو فاق
: لا متدوشنيش بعكك اللي عملتيه ، انتي لو متصرفتيش وصلحتي البلوه اللي حطتينا فيها هفضـ.....
_ لاااا هتطول لسانك وتهدد هقوم فيك دلوك ، لا ياحبيبي انت زيك زيي ، انا قتلت البت وانت دفنتها وقتلت الدكتور كمان يعني كلنا زي بعض متسوقش فيها عاد علشان مغرقش المركب بيه وبيك
: قادره
_ جبت القدر منك ياخوي ، خلص شوف هتعمل ايه وقولي مفيش وقت الواد لو فاق هيقر علينا وهنلاقي نفسنا مقتولين في نص الساحه
: ماشي انا هشوف طريقه اوصله بيها بس انتي طمنيني عملتي ايه مع ورد
_ كنت علي شويه هقتلها بس لحقت نفسها وخافت
: ومقتلتيهاش ليه!!! مستنيه تقول اللي حصل
_ كنت هتعرف و وقتها مكنتش هنفد منهم زي المرات اللي فاتت
: بقولك ايه اتصرفي البت دي لازم تموت او تبعتهالي انا وانا اموتها
_ مين قالك اني محاولتش ، له حاولت وطلعت تجري عليك بس رجعوها ، بس متقلقش هي لغيت ما انا الاقي طريقه اموتها بيها مش هتقدر تحكي ، خليك انت في الواد وهاتلي خبره
: ومالك بتكلميني كده كانك انتي المعلمه
_ له متتربربش علي فقر اللي جابوك ، دلوك مفيش معلمين ، دلوك يا قاتل يا مقتول ، ولو هتفضل ترط رط حريم اكده الواد هيفوق وهنبقا مقتولين ..
.................
#وفاء
بعد وقت كبير وانا في الاوضه مش عاوزه اطلع ولا اشوف حد جت شجر للمره العاشرة علشان تقولي انزل اكُل من غير ما تجيب سيرة عن اللي حصل وانا في كل مره اقولها مش جعانه ف تمشي ، وبقيت طول الوقت دماغي مشغوله وبفكر هعمل ايه ، وبعد تفكير خدت قراري اللي مفيش منه تراجع زي المرات اللي فاتت ، وطلعت من الاوضه وبعد ما اتأكدت ان مفيش حد تحت وكله في الاوض نزلت بسرعه وخرجت من السرايا واتسحبت علشان اشوف اذا في حد من الغفر ولا لا ، وللأسف لقيت الضبع واتنين تانين واقفين قدام البوابه ف رجعت تاني علي امل اني الاقي فرصه تاني وفي طريقي شوفت شجر ف قالت
: انتي طلعتي ميته
قولت بجديه
_ من دقايق ، طلعت اشم شويه هوا ورجعت اهو ، عن اذنك
: استني يابتي
وقفت من غير ما ابصلها ف جت وقفت قدامي وقالت
_ انا عارفه انك مضايقك من اللي حصل امبارح وعاوزه تمشي وانا هكلم بدر اخليه يمشيكي ، بس عاوزه اعرف حاجه
: ايه
_ هو مغصبكش واللي شوفته انه كان بخطرك ف ليه زعلانه
خرجت دموعي وقولت
: علشان بخطري يا حجه ، انا طالعه
سيبتها وطلعت فوق من غير ما ازود ولا كلمه
#بدر
في عز ما انا مشغول ومش قادر اشيل اللي حصل من تفكيري جه الدكتور و وقف قدامنا وقال
: الحمدلله الخطر زال ، واخوكم دلوقتي بخير
بصينا لبعض بسعاده ف قال عبيده
_ يعني فاق يا دكتور
: لا لسه
قولت
_ هيفوق ميته
: ممكن يفوق في اي وقت ، بس.... ادعولو
حسيت ان في حاجه مش عايز يقولها ف اتقدمت خطوه وقولت
_ في ايه يا دكتور شبل فيه حاجه
: والله يا كبير لسه هنشوف لما يفوق مقدرش اقولك حاجه دلوقتي
قال عبيده
' شاكك في حاجه؟!
: مجرد شكوك لكن نسأل الله انها متتأكدش ، المهم دلوقتي ان الخطر زال وهو بخير.. عن اذنكم
قال اكده ومشي في دار ليه عبيده بكل جسمه وقال
_ يعني ايه انت فهمت حاجه
: مش عايز اتوقع حاجه عفشه خلينا نستنا يكون فاق وهنعرف ، انا هروح البيت اطمنهم وانت ادخل لابوك قوله انه بقا زين
_ له مداخلش
: اسمع الكلام انت لازم تكلمه ده ابوك
_ انا مليش ابهات ومتتلكمش معاي في الموضوع ده
: ماشي انت حر
سيبته ودخلت انا لابوي لقيته نايم ف رجعت وبصيت لعبيده وقولت
_ نايم انا هروح البيت اطمنهم وارجع ، انت خليك يمكن يعوذو حاجه
: انا قاعد مش هتنقل
سيبته ورجعت البيت وانا بدور بعيني عنها لكن مشوفتهاش وليلي هي اللي قابلتني وقالتلي بلهفه
: طمني يا كبير الاستاذ شبل عامل ايه دلوك
_ زين بقا احسن
قالت بلهفه
: يعني فاق يا كبير!!!
_ له لسه
جت امي تقولي
: طمني يا ولدي اخوك عامل ايه
_ الحمدلله يامه شبل زال عنه الخطر وكلها شويه ويقوم
: الف حمد وشكر ليك يارب ، الف حمد وشكر ليك يارب ، وابوك يا ولدي
_ زين يامه
قولت اكده ف لقيت مرت ابوي جايه تقولي والحزن ماليها
: ولدي عامل اية يا بدر
_ الحمدلله يامرت ابوي بقا زين والخطر زال عنه اطمني
بقت تبكي وتقولي
: امانه خدني ليه
_ حاضر بس تشدي حيلك شويه انتي تعبانه
: له دلوك انا بقيت زينه
_ طيب اجهزي وانا شويه وجاي وهاخدك امعاي
سبتها وطلعت فوق ايوه كنت متردد بس كان لازم اكلمها وروحت وفتحتلي ، كنت متوقع انها تقفل في وشي او انها تكون غضبانه بس لقيتها عادي ويمكن فيها شويه كسوف ف قولت بتوتر
: صباح الخير
_ صباح النور
: انا ، انا كنت...
_ كنت إيه
: كنت جاي اقولك.... كنت جاي...
_ فهمتك ، انسا ، وطمني شبل عامل ايه
استغربت هدوئها وعدم انزعاجها ف قولت
: زين الدكتور قال ان الخطر زال عنه
_ طيب الحمدلله
: الحمدلله .... انتي عامله ايه
قالت بتنهيده
_ انا تمام بس مضايقه شويه
: ليه
_ من القعدة
: ايوه طيب لو عاوزه ممكن اطلعك شويه بعد ما اجي
_ انت رايح فين
: هروح اودي مرت ابوي المستشفي
_ طيب ممكن لو يسمح يعني نروح البر التاني نفسي اكرر الخروجه دي قوي
: ايوه ممكن بس يعني....
_ خلاص انا اسفه ، فعلاً مش وقته "
مكنش وقته صح بس انا كنت عايز اخرج امعاها ونتكلم ف قولت
: له وقته هوصلها واطمن علي ابوي وشبل واجيلك
_ يعني مش هزعجك ولا اعطلك عن حاجه
: له عبيده موجود ولو في حاجه هيكلموني
_ تمام متشكره قوي
: علي ايه معملتش حاجه ، بالإذن
_ اتفضل
مشيت وانا مش فاهم في ايه معقول اللي حصل كان عادي عندها وعدا اكده ببساطة ، مكنتش فاهم ولا عارف هي بتفكر في ايه ف مشيت علي امل اني اعرف منها لما ارجع واخدها البر التاني ولما نزلت قابلتني امي وقالتلي
: عاوزاك دقيقه
_ خير يامه
: تعاله عاوزاك
روحت امعاها اوضتها ف وقفت قدامي وقالت
_ شوف يا ولدي
: نعم يامه
_ كلنا عارفين ان البت دي مش مرتك ولا يحقلك تعمل امعاها اللي عملته امبارح "
مقدرتش ارد و نزلت عيني ف قالت
: انا عارفه انه غصب عنك وانك ميال ليها بس...
_ له يامه انا ....
قالت بمقاطعه
: ميال يا ولدي وهي كمان باين عليها انها مياله ليك والا مكنتش قبلت
_ يامه مفيش الكلام ده أبداً
: في يابدر ، بس مينفعش ، هي لازم تمشي قبل ما الحكاية دي تزيد
_ يامه...
: اسمع مني يا ولدي ، مش مهم تقول اللي حاسس بيه بس انت لازم تمشيها ، اخوها مرجعش لو كان هيرجع عشانها كان رجع من زمان ، هي قعادها اهنه غلط سيبها تمشي
_ انا هخليها بس هستنا شويه يامه يمكن يرجع
: لو استنيت منضمنش هيحصل ايه ، مش بعيد الفاس توقع في الراس وبعدين يجي اخوها وتطر تقتله وهيكون بينكم دم يا ولدي
مسكت يدي وقالت
_ مشيها يا بدر لمصلحتك ولمصلحتها "
كان صعب عليه اني اوافق بس هي عندها حق ف قولت
: ماشي يامه ، همشيها بس اطمن علي شبل وهبقا اوديها بنفسي لبيتهم
_ ربنا يحرسك يا ولدي ، ومتزعلش ان شاءلله هتلاقي غيرها كتير بس انت شاور والف مين يترمو تحت رجليك
: يامه مفيش الكلام ده ... همشي عشان اودي مرت ابوي
سبتها وطلعت وانا مفيش علي بالي غير حاجه واحده وهي اني مش عايز غيرها .. ولو هي مش هتكون ليه ف انا مش عايز
#وفاء
بعد وقت رجع تاني لقاني جاهزة ومستنياه في الجنينة ف وقالي يلا ومشينا وطول الطريق ساكتين مبنتكلمش ولا قادرين نبص لبعض وركبنا مركب عبرة بينا لغيت البر التاني وبقينا ماشيين شويه وفجأه مسك دراعي و وقفني وقال بعد تردد كتير وهو بيحاول ينطقها
: معلقتيش علي اللي حصل يعني "
توترت من كلامه ف قولت وانا بحاول ابان طبيعيه علي قد ما اقدر علشان ميفهمش نيتي
_ ايه اللي حصل مش فاهمه
: مش فاهمه ولا مكسوفه ، ولا اللي حصل كان عادي عندك
_ بتتكلم عن الحضن؟!
: الحضن وكل اللي حصل "
كان صعب اني ابص في وشه وهو بيقولي الكلام ده بس كان لازم ابان قويه ومفيش حاجه جوايا ف قولت "
_ اه انا قاصده مفتحش الموضوع لأن انت هتقولي هفهمك غلط وعيب تتكلمي كده علشان بنت
: له مكنتش هقول المره دي
طالت نظرته ليه وقال
_ بس انا مشوفتكش اعترضتي ، ف ليه؟!
درت وشي عنه وقولت
: ما عشان حضرتك هتقولي نفس الكلمه اللي قولتهالي قبل كده ، إن انا قانونياً مراتك
رسمت ابتسامه مزيفه وقولت بعد ما رجعتله
_ مكنتش هلاقي منك حق ولا باطل ، ف سكت احسن
: اها ، طيب سؤال
_ اسأل
: انتي عاوزه تمشي؟!
_ اه بس انا مستنيه انك ترجعني في الوقت اللي انت قولت عليه مش بفكر اهرب ، وزي ما قولتلك النجع مطلعش وحش
: يعني مرتاحه امعاي.... اقصد يعني مرتاحه امعانا اهنه في النجع
ابتسمت وجويا فاضله شويه وينهار
_ بعيد عن المصايب اللي شوفتها من وقت ما جيت بس أه انا مرتاحه وحابه القعدة معاكم ، و مش مستعجله خالص علي المشي ، ده انا مش بعيد اجيلكم تاني ، وكمان نتواصل انا وانت كمان
: ليه تتواصلي امعاي
قالها وهي بيترقب ردي ف قولت
_ علشان حسيت انك شخص كويس و...
: وايه
_ وبقيت عزيز عليه بحكم الفتره اللي قعدتها عندكم
: صح؟!
_ صح
: اممم لو اكده ، ف في حاجات جايه هي اللي هتقرر ينفع تتواصلي ولا له ، بس انا مبسوط بكلامك ده ، وياريت يكون ينفع نتواصل "
قالها وعينه في عيني ف قولت وانا بحاول اخفي توتري واحبس دموعي علي قد ما اقدر
_ طيب مدام بسطتك انا جعانه ونفسي في ساندوتش فول وطعميه من اللي هناك دي ، شكلها حلوه قوي علشان كده الناس ملمومه عليها
بص ناحيتهم وقال
_ صح ، طيب تعالي
: اجي فين ، زحمه ، روح وانا مستنياك هنا بس متتأخرش عشان انا جعاااانه قوووي
ابتسم وقال
_ ماشي دقيقتين وهاجي
: اها
مشي لغيت هناك و وقف شويه يكون اللي قبله خلصوا وفضل باصصلي وانا ببادله النظرات وحاسه اني روحي بتتسحب مني ودموعي رافضه توقف
#بدر
يمكن منقدرش نكمل بس كنت هعترفلها بإحساسي نحيتها عاوزها تعرف اني حبيتها حتي لو مش هشوفها تاني بس كان مهم عندي اعرفها ان بدر اللي عمر قلبه ما مال لواحده مال ليها رغم الحزن اللي جواه ومكنتش مستني اللي قبلي يخلصوا عشان أرجع واقولها كل اللي في قلبي وبعد ما اخيراً خلصو وجه دوري واستنيت الراجل يجيبلي رجعت بصيت عليها ملقتهاش ف سيبته وطلعت من وسط الزحمة وبصيت يمين شمال وبردو ملقتهاش
#عبيده
بعد ما بدر جاب مرات ابوي تشوف شبل دخلت بصت عليه وبعد شويه الممرضه طلعتها ف جت عندي تسألني فين اوضة ابوك ف شاورتلها عليها وبعد ما دخلت طلعت بعد دقيقة تقولي كلم ابوك مكنتش عايز ادخل بس اطريت ودخلت عنده من غير ما اتكلم ف قال بعد سكوت
: قاعد ليه؟! ليه ممشيتش وسيبتنا
مردتش عليه ف قال
_ ما ترد ياد ايه مقعد لسه اهنه
: قاعد عشان اخوي مقعدش عشانك
_ وه ، ده انت عايز تعاديني من صح
: لا عاوز اعاديك ولا عاوز اتكلم امعاك.. جيت امشي ف قال
_ وقف عندك؟!!!
وقفت من غير ما ابصله ف جه وقف قدامي يبحلقلي بغيظ
: كيه ياد تتكلم امعاي اكده ولا فاكر اني عجزت
مردتش ف ضربني بالقلم وقال في الوقت اللي انا كنت ماسك نفسي بالعافيه عشان مغلطش
_ فكرني عجزت وبتقل ادب وتعلي صوتك ، ناقص ايه؟! هتضربني بعدين "
بصتله وقولت وكرهي مالي عنيه
: انت عايز ايه تاني اكتر من اللي عملته ، موت امي وكنت هترمي بدر لديب ياكله ودلوك شبل بيموت عاوز ايه تاني علشان تهمد
رجع يضربني كف تاني ويقول
_ عاوز اربيك يا ولد ال ****** وعزة جلالة الله لا هوريك الربايه من اول وجديد وسط الساحه يا عبيده
قولت بسخريه
: هه ساحة ، ساحة إيه انت فاكر انك لما تخلي الغفير ينادي حد هيجي ، لا يابوي انسا خلاص انت مبقتش كبير النجع كله مبقاش يعتبرنا كبار بقينا اقل منهم
#فارس
روحت النجع وبقيت اسأل بالمداري واطقس عن اخبار بيت رضوان ف سمعت ان بنته هربت مع عشيقها وجابت لأهلها العار وكلام من ده ، وبعد ما سمعت اللي كفاني روحت منطقة الغجر اللي كان قيلي عليها بيجاد ودخلت خيمة الرقص قعدت شويه هناك لغيت ما شوفت شحاده ده وعرفته من كلام الناس معاه وبقيت شايف واحد بيتكلم معاه بس شكله كبير عن فهيم اللي قالي عنه بيجاد ، ف بقيت ابص عليه ومستني فهيم ده يظهر لكن مظهرش او يمكن ظهر بس انا معرفتهوش وجه نص الليل وانا هناك ولما جه شحاده بنفسه يسألني انا مين وممشيتش ليه قولت
: انا غريب عن هنا كنت جاي لواحد زميلي عايش في النجع بس دورت قالولي راح المركز وهيجي بكره والمعديه مشت ومش هعرف ارجع غير الصبح
_ مين زميلك ده يمكن اعرفه
: اممم اسمه.... اسمه محمد ، محمد احمد
_ معرفهوش بس مفيش حد بيجي هنا بالاسم ده
: اه ما انا عارف بس انا قاعد هنا لصبح وبعدين هروحله
_ ايوه ، بس هنا مش للبيات
: انا مستعد ادفعلك تمن الوقت اللي هقعده هنا لصبح
_ لا خلاص مفيش داعي خليك مش هيحصل حاجه اقعد
: متشكر قوي
سابني وطلع وانا بقيت قاعد مستني الصبح يطلع علشان اعرف فين فهيم ده كمان لأن بيجاد موصيني اعرف اخباره هو وشحاده واخبار بيت رضوان وكده مش ناقص الا هو ، وبعد شويه نمت و محستش بنفسي غير في وقت الضهر تقريبا علي لمسة ايد واحد بيصحيني وبيقولي كفايه نوم واطلت ف قومت وطلعت غسلت وشي من البحر ولما وقفت ومشيت ادور بعيني عن فهيم ده ملقتش او لقيته بس معرفتهوش وبعد شويه وانا بلف هنا وهناك شوفت شحاده واقف مع واحد في نفس السن اللي قال عليه بيجاد وتقريبا نفس اللبس وبيتكلم معاه و واضح انه بيقوله حاجه مهمه ف فهمت ان هو ده فهيم و استنيت يكون خلص كلام ومشي ف مشيت وراه كنت عايز اعرف رايح فين لأن شكله مطمنيش وبذات لما قرب من مستشفي في النجع وحط الشال علي وشه كان باين قوي انه ناوي علي حاجه ف مشيت وراه من بعيد ولما دخل دخلت وراه وشوفته واقف بيبص حوليه لغيت ما وصل غرفه مكتوب عليها العنايه المركزه ، ومع اني مش عارف في ايه بس طالما مداري وشي وبيتسحب زي الحراميه يبقي رايح يعمل مصيبه جوه ف لما دخل انا كنت بعيد في اول الطرقه ف جريت وقبل ما افتح الباب لقيت الممرضه في وشي بتحاول تمنعني وتقولي
: لو سمحت ممنوع
بعدت ايدها وانا بقول
_ وسعي!!!
فتحت الباب ف لقيته بيكتم نفس واحد نايم ف جريت عليه ومسكت فيه وقبل ما اعمل حاجه زقني وقعني وجري وانا جريت وراه علشان الحقه بس بعد ما وصلت لطرقه التانيه لقيته اختفي و واحد جاي يجري وبيمسك فيه يزنقني في الحيطه ويقول وهو حاطط ايده علي رقبتي
: انت مين!!!!
_ انت اللي مين ، ابعد كده!!!!
حاولت أبعده ف ضربني في وشي وفي اللحظة دي جت الممرضه تقوله
: مش هو ده ، ده اللي لحقه قبل ما يقتله
بصلها وقال
_ بتقولي ايه انتي
بصلي وقال
: انت مين
خدت نفس وانا ببعد ايده
_ انا غريب ياعم في ايه ، كنت جاي وشوفته بيتسحب ف لحقته وسع كده
......................
#وفاء
طلعت اجري قبل ما يشوفني وبعد مسافه كبيره وصلت لموقف العربيات اللي كان فاضي تقريبا مكنش في ناس كتير زي ما بشوف في محافظتنا ف جريت وركبت في عربيه هناك وقعدت وانا حاطه ايدي علي قلبي وبقيت مستنيه وببص لجهه اللي جيت منها بشوف اذا كان جاي ورايا ولا لا ولما رجعت بصيت لناحيه التانيه لقيت واحد شكله محشش واقف عند شباك العربيه ومركز معايا ، شكله خوفني قوي وبذات لما السواق وقف جمبه يكلمه وهما الاتنين بقو يبصو عليه ويتكلموا بصوت واطي ، و واضح كده اني جيت بدري واتغبيت ومسألتش هما رايحين فين قبل ما اركب عربيتمم ف رجعت ابص بعيد وانا مرعوبه حرفياً لا يخطفوني وكنت بفكر انزل ولكن قبل ما اتحرك حد تالت فتح الباب ودخل وقعد جمبي ولزق فيه مع ان مكنش في غيري في العربيه دي ، ف قولت وانا بنزاح بعيد عنه
: لو سمحت ابعد
قرب في قعدته وقال
_ طيب مش هبعد
كمل وهو بيتفحص جسمي بعنيه
: الا الحلوه منين ، شكلك مش من هنا "
ميلت لورا وقولت بخوف
: لو سمحت خليك بعيد
قولت كده ف لقيت الاتنين التانين بيطلعوا واحد منهم بيقعد في مقعد القيادة والتاني بيقعد ورايا
ف بقيت ابصلهم وانا شايفه نفسي متحاصره وسطهم ونظراتهم ترعب ومتبشرش بالخير وكنت هصرخ علشان الناس تلحقني
ف اللي كان جمبي طلع مطوه وحط طرفها علي وشي وقال
: اششششش مش عاوزين صوت
قولت وانا ببكي وجسمي بيرتجف من الخوف
_ انتوا عاوزين مني ايه
سرح بالمطوه علي جسمي وقال
: عاوزينك
ديرت وشي ابعده عنه وانا باقيلي شويه وهموت من الخوف ولما بصيت بره العربيه لقيت ....