رواية عذراء الرعد كامله بقلم بسمه ) جميع الفصول حتى الاخير الخاتمه

 

رواية ذئاب لا تعرف الحب 

الفصل الرابع عشر14

بقلم نجمه براقه

بدر 

دخل علينا عبيده وهو مش مركز في حاجه و ملخبط  ولأن علاقتي بيه متسمحش اسأله ايه اللي حصل ملخبطه ومخليه تايهه اكده سكت ومتكلمتش في حاجه  ف قال ابوي لما لقاه قاعد ساكت 

:  مالك ياد 

انتبهله وقال 

_ مفيش حاجه يابه  ،  سلامتك  ،  عامل اية دلوكيتي؟! 

:   زين   ،  مبعتليش الضبع وبت ليه زي ما قُلتلك

_ يووه  ،  والله يابوي راح من بالي  ،  بس انت هتطلع وتشوفهم في البيت  ملهاش عازه  يجو اهنه 

قولت بعد ما احترت في سبب طلبه ليهم وبذات ليلي 

:  مالك بيهم يابوي 

_ مفيش حاجه  ،  روح هات العربيه خليني امشي 

:  استنا شويه لما نشوف الدكتور 

_ له مش هستنا اكفايه اكده روح يلا 

:  حاضر يابه 

مشيت ناحية الباب ف وقفني صوت عبيده وهو بيقولي 

_ دقيقه يابدر انا جاي امعاك 

قال ابوي

:  رايح فين 

_ جاي تاني يابوي  

طلعت انا  وهو بره المستشفي ف قلي بعد ما وقفت قباله مستنيه يقول اللي عنده 

: كان في حاجه حصلت عاوز اقُلك عليها بما انك ليك خبره في حل مشاكل النجع   

_ قُل

قال بتردد 

:  في بت غجريه من اللي ساكنين في النجع حد حاول يقتلها  ،  عاوز اوصل للي عمل اكده  

_ ايوه انا عرفت الحكايه دي ولسه متحدت مع ناساها   بس بيقولو كان مداري وشه  ومحدش يعرف هو مين  ،  هنعرفه كيه ده   

:  معرفش علشان اكده بسألك  

_ طيب بس نرجع ابوي البيت ونشوف جلال العيانه ده   وبعدين نفضالها ونقعد معاها يمكن  نعرف  منها حاجه توصلنا ليه 

: انا سألتها لو في حد حاول يضايقا أو انها تكون شاكه في حد قالت مفيش  

_ اكيد فيه وهي مقيلاش  دول ناس المشاكل في رجليهم وتلاقيها حاولت تسرقه ف ضربها 

:  له له هي بت غلبانه 

_ غلبانه؟! 

اتوتر ومردش ف قولت 

:  مفيش حد في الغجر غلبان  ،  بس احنا هنشوف مين اللي عمل اكده وهنحاسبه 

_ طيب وهنعرفه كيه  

:  لما نفضي شويه من اللي ورانا 

_ طيب  انا وقفت غفيرين اهناك متخلهمش يمشو 

:  وقفت غفيرين  اهناك  ، ايوه ،  طيب مش اكفايه كل اللي واقفين قدام اوضتها  من ناسها 

_ له  ،  احنا منعرفش مين اللي حاول يعمل اكده  مش يمكن واحد منهم 

:  اه  ...  طيب  زي مانت عاوز خليهم  ..  هروح اجيب العربية وارجع  

_ طيب  

 شكله مكنش طبيعي واهتمامه بيها زايد  ، انا عمري ما شوفته مهتم بحد  اكده  وده خلاني اشك ان زعله مع مرته بسبب البت دي   

ـــــــــــــــــــــــــــــــــــــ 

#ليلي 

 جه شبل وانا مقدرتش ادخل عنده ولا اشوفه  ، اول سبب ان نفسي كانت مكسوره بسبب اللي عملوه ابوي وامي فيه  علشان دعاء ترضا ومتفضحناش قدام رضوان  وعياله ف يطردونا ولا يجلدونا  او يدبحونا حتي  ،  وتاني سبب وده الاهم ان امه ومرت ابوه اهناك طول الوقت  ولو دخلت هيقولو بتدحلبله زي ما بتقول دعاء   وزادت عليهم البت الجديده اللي طلعت من الاوضه اللي فوق بعد ساعات ودخلت تسأل عليه وبعدين طلعت  ولما شافتني وقفت عندي وقالت

:  انتي اسمك ايه 

_ اسمي ليلي  

ضمت شفايفها بخجل وقالت

:  طيب انا بصراحه جعانه يا ليلي  مش عارفه اقول لمين غيرك  ممكن تيجي معايا توريني اكل اي  

_ بس اكده دقيقة والوكل يكون عندك اتفضلي اقعدي انتي 

:  لا انا هروح معاكي  انتي بس عرفيني ممكن اكل ايه وانا هجيب لنفسي

_ طيب تعالي 

خدتها ودخلت المطبخ فتحت التلاجه وطلعت منها الوكل ولما جيت اسخن قالت 

:  لا مفيش داعي انا هاكول من الجبنه بس

_ كيه جبنه بس  في وكل كتير غير الجبنه كل منه 

:  لا كفايه جبنه انا هاكل علشان جعانه قوي ونفسي غمت عليه من الجوع 

_ طيب ما ده يخليكي تاكلي وكل حرش انا هجهزلك 

وقفتني وقالت

:  لا ونبي  كفايه كده  ،  وبعدين هو  في واحده مخطوفه تاكل اكل حرش 

_ ههههه عندك حق  

بهتت ملامحها وسكتت ف قولت 

:  زعلانه من حبستك حتي لو قاعده  زي الضيفه 

:  انتي رايك ايه   ،  لو خطفوكي وحطوكي في  جنه  حتي مش سرايا هتكوني مبسوطه 

_ اكيد  له  بس بردك اهون من السجن  ده انتي حتي لو فكرتي تهربي هتلاقيها ساهله  

:  يمكن ساهله بس انا معنديش الجرأه اهرب  ،  لأن كبيركم هيقتل بابا لو هربت  ، حضرته مخلي واحد هناك عشان يقتله اول ما يرنله 

_ مين ده!   بدر يقتل ولا حتي يسلط حد  ،  له ياست غلطانه هو ميقدرش يعمل اكده   ،  ده غلبان علي قد شكله وهيبته دي كلها 

:  لا يقدر  ومش غلبان ولا حاجه  ، ده قدر يجيبلي صورتي من اوضة نومي 

_ ايوه يقدر يجيب الصورة بس ميقدرش يقتل  ، بدر  طيب قوي وبيقُلك اكده عشان يخوفك بس

: لا   هو قلي في واحد هناك وهيقتل بابا  لو منفذتش كلامه

_ وانا بقولك محصلش  ،  هو لا يمكن يقتل حد 

:  ليه يعني مش ممكن ما بيقتلو هنا عادي  اشمعنا بابا اللي مش هيقتلوه 

_ مين قالك انتي ان القتل عادي  اهنه  ، طيب اديني عشرين سنه  ، و لغيت دلوك ماشوفتش حد اتقتل  ، كل اللي سمعتي عنه  ده حاجات قديمه  واللي اتقتلو علي  مر السنين ميتعدوش علي صوابع اليد الواحدة  

:  ازاي يعني  امال الساحه دي معموله ليه  مش  للقتل والجلد 

_ الساحه  معموله للي يغلط ولو غلطه  يستحق القتل هيتقتل  بس من الخوف الناس متجرأش تغلط الغلط اللي يموت  ،  يعني كل اللي شوفته في الساحه  هو الجلد وبس  

:  امال ايه حكاية اللي اتقتلوا دول 

_ بقولك عشرين سنه مشوفتش ودي كلها حكاوي قديمه  وحتي لو حد قتل الايام دي مش هيكون بدر  ،  بدر غلبااان هو شكله بس اللي يقول انه قاسي لكن له مفيش فيه اي قسوه  بالك لو رضوان مكانه وهو اللي جابك من مصر لهنه    كان زمانه حبسك في سجن النجع وعذبك  عذاب عمرك ما شوفتيه ولا  سمعتي  عنه  ، مش تقوليلي بدر اللي جايبك في اوضته وسيبهالك ترتاحي فيها  ، لا ياست ايام الكبير راحت  وبدر خشم وبس  وكتيره يخوفك 

:  اه طبعاً انتي هتقوليلي  ،  هو كان  هيأكلني لديب بس 

_ ههههه  له هو مكنش هيدخلك عنده  أبداً  ، هو كان عارفك هتخافي وهتوافقي علي كلامه   ولو موافقتيش مكنش قدر يدخلك  

: ايه الثقه دي  ،  هو انتي... 

_ له له مش زي مافهمتي  ، انا بقولك اكده عشان  هو جرب قبلك وعارف يعني ايه خوف 

:  جرب قبلي ازاي  ،  حاول يرمي حد لديب؟! 

_ له هو اللي اترما مع الديب جوه القفص وهو عيل عنده عشر سنين او اقل  ومن وقتها  بيقوم مفزوع من نومه   ،  هو مش زي مانتي  شيفاه وعمره ما هيقدر يقتل  بقولك  غلبان 

:  انتي بتحوري عليه  ،  ازاي يعني اترما مع الديب  و مكلهوش  ،  ده شكله شرس ونوعه نادر جداً  ومن اخطر انواع الذئاب 

_ له ماهو مش هو ده الديب اللي دخل عنده  ، التاني هو قتله 

:  نعم!!!  مين ده اللي قتل الديب 

_ بدر  زمان قتل الديب 

:  ازاي يعني  ايه خلاه يقتله 

_ قتله لما رموه ليه زمان  ، بصي انا هحكيلك  ،  انا مشوفتش بس اتقالي بعدين من امي وامه ومرت ابوه    ،  ابوه  زمان  رماه ليه علشان خاف يقتل اخر راجل اتقتل في النجع ايام زمان  ،  يومها اداله مسدس فيه طلقه واحده وقاله لو مقدرتش تقتل الديب خليه ياكلك وهو بنفسه رماه لديب  ومن كتر خوفه ساعتها وهو شايف الديب بيهجم عليه  ضربه بطلقه موته  

شردة شويه وبعدين بصتلي وقالت 

:  ابوه اللي رماه؟!   ازاي هان عليه ابنه 

_ له ما تقوليش  ،  دي حاجه قليله  جمب اللي عمله فيه هو واخواته  ،  يمكن ست فاطمه بس اللي متضربتش منه   ، كانت عيله  ولما كبرت شويه  كان بدر بقا راجل وهو اللي بقا مسؤول عنها  ،  علمها  وخلي ابوه يوافق انها تكمل تعليم في  الكليه  ،  الله يمسيها بالخير  كانت زي الاميره وسط اخواتها  كان الكل يحبها  وبذات  شبل اخوها التؤام وبدر   وعلشان اكده هو خطفك انما هو اغلب من الغلب وميقدرش يدبح فروجه 

_ يعني لو هربت مش هيخلي حد يقتل بابا 

:  ههههه له  مش هيقتله بس مش هتقدري تهربي  حتي لو الظابط ده جه تاني بكل اللي معاه   

#وفاء 

فاكره انها بتهديني ناحية بدر بس متعرفش  ان كلامها ده خلاني افكر  في الهروب واحس انه مش صعب زي ما كنت متخيله  ... ومنكرش بردو اني حسيت بالتعاطف معاه واشفقت عليه  ومش مصدقه ازاي ابوه قدر وقلبه طاوعه يقدمه بنفسه لديب   ،   وبعد شويه وانا لسه شاغلني كلام ليلي سمعنا  صوته داخل من بره البيت ف  وقفت عند المطبخ ابص عليه لقيته بيسند ابوه  بحرص لغيت ما وصله اوضته  وشوفت اهتمامه بيه اللي موضح قد ايه هو بيحبه وقريب قوي منه  وعلاقتهم كويسه من غير اي شروخ  وده خلاني اشك في كلام ليلي واقول  لو صحيح كان عمل فيه كده  مستحيل كان هيهتم بيه بالشكل ده  وبعدها رجعت المطبخ  وكلت علي السريع وقبل ما اخلص لقيته داخل وبيتنفس براحه وكأنه كان بيدور عليه ف سيبت الأكل وبلعت اللي في بوقي و وقفت وانا شيفاه داخل عندي وبيكلمني يوضح تصرفه 

:  ملقتش في الاوضه فـ.... 

_ ف جاي تجري خايف يكون هربت 

:  مسمهاش خايف  ،  انا مبخافش  بس بحرص 

_ ليه الحرص لما انت واثق انك محاصرني كويس  ، ولا انت متوقع اني احاول اهرب وتيجي في  مره متلاقنيش 

:  له انا متأكد انك هتحاولي تهربي  ، بس مش هتقدري   ، حتي لو طلعتي من اهنه مش هتقدري تطلعي من النجع  ،  الطريق مليان ناس اعفش مننا وكلاب سعرانه وديابه   بس حقك تحاولي  يمكن تقدري 

_ عندك حق  ،  بس انا مبفكرش اهرب  ، انا رضيت بالأمر الواقع  وهفضل هنا لغيت ما بيجاد يرجع  

:  غريبه دي 

_ ايه الغريب انت بتقول اني لو هربت منكم مش ههرب من كلاب وديابة النجع  ف خليني وخلاص 

:  اها  تبقي ريحتي نفسك وريحتيني من مراقبتك 

_ بس يارب ايدك ما تطول عليه تاني  ولا تجبرني علي حاجه جديده 

:  انتي اللي هتختاري يدي تطول ولا له  ،  ومفيش حاجه اجبرك عليها  

_ لو كده ف انا هعتبر نفسي ضيفه عندكم   وهطلب شويه كتب تجبهملي

عقد حواجبه ف قولت 

:  كتب هحتاجها في دراستي  ،  وانا هرجعلك فلوسك لما  ارجع  وعد 

_ اه  ،  طيب اكتبي اسامي الكتب اللي محتاجاها وانا هبعت اجيبهم 

التف علشان يمشي وبعدين وقف وقال 

:  ايوه  .    واحنا مبنقلبش تمن حاجه من الضيوف 

ابتسمت وقولت 

_ لو كده  هكتب اسماء كتب كتير قوي  دي فرصه وانا استغلاليه ههههه  

بقا واقف وعنيه مش ثابته عليه ولا علي اي جهه وكأنه مكسوف يبصلي  وقال  

:  اكتبي اللي انتي عاوزاه 

قال كده ومشي وانا وقفت مكاني افكر اذا الطريقه دي هتخليني اكسب ثقته ويطمن من نحيتي  ولا لأ علشان  اقدر اهرب من غير ما حد يمنعني   

#عبيده 

دخلت عند ابوي بعد ما خلصت  من ركن العربيه ف لقيته بيقول 

:  فين البت ليلي 

قالت شجر 

_ عاوز حاجه اجبهالك انا 

:  عاوز ليلي 

قولت وانا مش فاهم ماله بيها 

_ مالك بيها يابوي  

:  انت ايه دخلكم  ، هاتولي البت واطلعوا

قالت احكام 

_ حاضر  ،  يلا يا شجر  

:  حاضر ياخوي  ،  دقيقة هبعتهالك  ،  يلا يا عبيده  

طلعت معاهم ومفكرتش كتير في اللي ممكن يكون عاوز منها  ودخلت اوضة فاطمه  لبست لبس الصيد وفوقيه جلبيتي وروحت  علي طول علي الغيط بتاعنا قلعت جلبيتي ودريت وشي وبعدها اتجهت علي  منطقة الخيام  وبقيت اسأل اهناك عن اللي حصل مع ورد  واسمع اي كلمه بتتقال بين اي اتنين واقفين يتكلموا  وابص حوليه يمكن الاقي حاجه تخصها  واعرف مين اللي عمل فيها اكده  وبعد ما دخلت في نص المنطقة  شوفت واحد بشوفه كتير في النجع بس مش فاكر اسمه المهم انه كان قبل اكده بيشوف وعنيه سلام  ، لكن معرفش ايه حصله المره دي   كان ماشي مشايفش و بيتحسس اي حاجه قدامه  لغيت ما اتعنقل و وقع  ،  روحت نحيته قوام وساعدته يوقف وانا بقول 

:  قوم امعاي  ،  ايه اللي حصل لعنيك 

بعد يدي وقال وهو بيبكي بعجز 

_ محدش ليه دعوه  محدش يسألني 

:  حد عمل فيك اكده ولا اتعميت لوحدك  

_ قولت محدش ليه دعوه!!!  امشي مش عايز حد يساعدني  امشي  

سابني ومشي وهي مادد يديه قدامه  وبعد كام خطوه وقع تاني  وقعد مكانه يبكي ويقول 

:  ذنب مين ده  !!!  ولو ذنب حد مخلصش منه هو ليه زيي 

زاد بكاه وقال 

_ يبقا هي ورد   مفيش غير ورد 

شغلتني كلمته ف قربت منه وقولت 

:  مالها ورد ياد انت  

مسك شوية رمل ورماهم نحيتي وهو بيزعق ويقول 

_ قولتلك امشي  ،  امشي!!! 

مسكت يده بقوه وقولت 

:  انا عبيده العربي 

وقف بكاه وقال وهو بيمد يده ناحيتي  

_ عبيده؟!!  

:  ايوه انا  ،  مالها ورد  انت تعرف حاجه 

قال بلجلجه 

_ ايوه اعرف  ،  ورد  تبقي بنت عـ... 

قاطعه صوت شحاده من وراي وهو بيقول  

:  قلبك طيب يا فهيم  هتفضل زعلان منها لامتي 

حطيت الشال علي وشي قبل ما اقوم وابصله ف وقف قدامي وقال بإبتسامة خبيثه

_ عبيده العربي عندنا 

نزلت الشال بعد ما خلاص عرفني وقولت 

:  ايوه يا شحاده  ،  جاي اشوف ايه اللي حصل مع ورد ومين اللي حاول يقتلها  ،  في حاجه 

_ لا مفيش  ، بس انا بقولك متتعبش نفسك  وتسأل  انا سألت الكل ومحدش يعرف حاجه ولا مين اللي عمل فيها كده 

:  انا مش قولتلك متدخلش 

_ حقك عليه يا كبير انا بتكلم علشان الغجر هنا بيعتبروني انا كبيرهم  بس انتو الكبار وأولياء الأمر ومحدش يقدر يتخطاكم ولا يتخطي عداتكم طبعاً 

كان بيلقح بالحديت ف قربت منه وقلت وانا بشد لياقته 

:  شحاده!!!  انت غريب  وكمان غجري والناس كلها بتكرهك  يعني خاف علي نفسك  بدل ما تترمي انت والباقين بره النجع  

ابتسم بمكر وقال 

_ حقك عليه  لو فهمت كلامي غلط  ،  انا خدامكم مقدرش أبداً اتطاول علي اسياد النجع  وكبراته 

:  باين عليك مش هتكمل اهنه كتير    استنا بس افضالك

سبته ورجعت للواد التاني علشان اعرف كان هيقول ايه  بس ملقتهوش  اختفا خالص وكأنه فص ملح وداب ف رجعت بصيت لشحاده وقولت 

_ راح فين 

:  مشي  جنابك محتاجه في حاجه 

 رجعت بصيت ورايا ادور علي الواد  وملقتهوش ف رجعت احط الشال علي وشي ومشيت متجاهل شحاده ونظراته اللي لو حاسبته عليها هقتله  وروحت علي طول في طريقي للغيط لبست جلبيتي وبعدها روحت المستشفي  وهناك لقيت الغفر نايمين قدام الاوضه  كنت هقلع الجزمه وانزل فهيم ضرب بس قولت بلاش دلوك خليها بعدين  وسيبتهم نايمين  ودخلت لقيتها نايمه واختها عندها وهي كمان نايمه بس علي الكنبه وبعد ما اتاكدت انها مش صاحيه  قربت من سرير ورد من غير ما اعمل صوت و وقفت جمبها ابص علي وشها التعبان  لغيت ما شردة في ملامحها  ، ملامحها اللي تشبه لملامح دعاء بشكل كبير لكن تختلف في الصغر والبرائه  ، هي وشها بريء زي عيله عندها  15 سنه  عكس دعاء اللي كرهها للي حوليها مطبوع في شكلها وكل اللي بيشوفها بيشوف الكرهه  ده   . 

 وبعد دقايق وانا عيني بتتشد ليها اكتر  بدات تفتح عينيها 

#ورد 

فتحت عيني لقيته قدامي وقبل ما اركز في شكله شهقت وكنت هصرخ وقوام لحقني وحط يده علي خشمي علشان يسكتني وقالي 

:  ده انا  متخافيش 

بقا جسمي يرتجف من الخضه ف قولت بعد ما شيلت يده 

_ حرام درعتني 

:  ده انا مرضتش اعمل صوت علشان متصحيش  ،  بس لو اعرف اكده كنت صحيتك 

 اتنفست براحه وقولت 

_له عادي بس انا ادرعت لما افتكرت انك هو  

:  اللي ضربك 

_ ايوه 

قالي بصوت دافي

:  متخافيش محدش هيقدر يقربلك  ، والواد ده اناهجيبه قدامك اهنه ونحاسبه علي عملته 

قولت وانا مش قادره اشيل عيني من عينه 

_ تعيش  ، بس هو انت جاي ليه دلوكتي

: جيت....  ايوه جيت اشوف لو كان حد اتعرضلك تاني ولا له  انتي في حمايتنا دلوك 

ابتسمت وقلت 

_ ربنا يخليك 

:  طيب يلا  ارجعي نامي والصبح هجيلك تاني 

قولت ك محاوله مني  اخليه قاعد وقت اطول 

_ الغفر لسه قاعدين بره؟! 

:  ايوه قاعدين ومركزين قوي مغفلوش عنيهم دقيقه 

ابتسمت وقولت 

:  طيب  و... 

_ و ايه 

:  مفيش  حاجه 

_ قولي 

:  مفيش صح  ،  سلامتك

قال وهو بيجمع كلامه 

_  طيب  ،  عاوزه حاجه اجبهالك امعاي 

:  له  ،  سلامتك 

_ ايوه  ،  الله يسلمك  ،   سلام  

قال اكده ومشي لغيت الباب وهناك وقف ورجع بصلي شويه من غير كلام وبعدها مشي وقفل الباب وراه وانا ابتسامتي وسعت وحسيت اني خفيت ومبقاش فيه تعب من كتر فرحتي بشوفته   وفجأه راحت فرحتي و صرخت بعلو صوتي لما لقيت الفقر بتقوم علي غفله وتفط لغيت عندي وتقولي 

:  طيب والله بينكم حاجه  

قالت اكده ولما لقتني صرخت كتمت صرختي بيدها وقالت وهي بتدوس اكتر

_ اكتمي!!!  يقولو بتقتلها اكتمي يا ورد

بقيت ازوم واحاول ابعدها وهي تزيد في كتمها لنفسي وتقول 

:  يابت انا تماضر  ،  انا اختك متخافيش محدش هيقتلك  انا جمبك 

نفسي بدا يروح وهي مكمله دوس عليه لغيت ما دخل الغفير وبعدها عني وبعد طلوع روح علشان  نفهمه انها مكنتش تقصد تقتلني وانا هي اكده دبشه وعدوة نفسها سابنا وطلع 

وهي رجعت تقعد جمبي وتقولي 

_ شوفتي يابت  قال انا اقتلك قال   ده انتي اختي حبيبتي تؤامي  يجيها الغلب بمخه التخين ده 

قولت بغيظ

:  بس انتي كنتي هتقتليني صح   مكنتش هعيش لو ملحقنيش منك يا تماضر 

_ مانتي اللي صرختي كنتي هتجبيلي تهمه لازم اسكتك 

:  سكت حسك من الدنيا كلها  حرام عليكي يا خيتي مش  كفايه اللي حصلي  عاوزه تكملي عليه..  يعني هو مفلحش في قتلي تقومي انتي تقتليني 

_ ايوووووه اتهربي اتهربي انا عرفاكي زين  ،  بس انا مسيبكيش غير لما تحكيلي ايه اللي بيحصل بينك انتي وعبيده 

:  ايه اللي بيحصل بيني وبين عبيده  يا فالحه..  محصلش حاجه  الراجل جه يعمل شغله  

_ شغلوووووو 

:  ايوه شغلوووو  ،  كبير هو ولا مش كبير 

_ ايوه  كبير  بس من ميته طيب وبيهتم اكده    ،   ده كل النجع عارفه  بوزه عفش ويكره الناس 

:  حرام عليكي  متقوليش اكده  ،  والله عمري ما شوفت في طيبته  وسماحة وشه

شردة بإبتسامة وقولت 

_ وحنين قوي  وجدع   ،  وانا محستش بالامان غير لما جه وقالي ان مفيش حاجه عفشه هتحصلي  

:  واييييه كمان  

_ بطلي تريقه انا بكلمك جد  

:  تكونش حبتيه يابت

_ ايوه حبيته بس فايدتها إيه  هو عمره ما هيبصلي  ،  وكمان متجوز  واحده متفرقش عنه في طيبته وجدعنته 

:  ينيلك يا ورد  ،  يعني يوم ما تحبي  ،  تحبي ولد الكبير  وعبيده كمان  ،  طيب كان حبيتي شبل اهو واد حلو وطيب صح   

_ ههههه احنا كمان هنقي  جانا الطين انا وانتي  مختارين اصعب اتنين ورايحين نفكر فيهم  

:  نبي صح جانا الغلب  ،  بس انتي الواد زين امعاكي  انا اللي الفقر اخوه  مفتكرنيش لما شافني ولا كأننا اتقابلنا في غيطان الدره في ساعة عصاري انا وهو والشيطان تالتنا ههههه 

_ ههههه يجيكي ايه يا تماضر

#فهيم 

مشيت احسس علي اي حاجه قدامي لغيت ما وصلت لخيمه ودخلت جواها وانا مش عارف هي خيمة مين ولا اذا في حد جواها ولا لا  وقعدت هناك في  زاوية وانا مرعوب انه يلقيني او يكون قدامي ويقتلني وبعد وقت وانا علي الحاله دي  حد مسك يدي من غير ما يتكلم ف قولت وانا بترجف من  الخوف 

:  مين!!  مين!!!!! 

جاني صوته وهو بيقولي 

_ متخفش  ،  خايف من ايه  

قولت وانا ببكي 

:  معلم شحاده  ..  والله ما كنت هقول  انا كنت صح هشتم عليها لانها السبب في اللي حصلي  ، والله يا معلم ما كنت هقول  

_ متخفش  قوم معايا 

:  ابوس ايدك يا معلم  والله ما  هقول حاجه  ولو قولت اقتلني 

رفعني وحاوط رقبتي بدراعه وقالي 

_ ياض متخافش  ،  انا مش هأذيك  ،  اهدا

:  ونبي يا معلم  

_ ياض قولتلك متخفش  ،  انا مش هقربلك  ،  وهوديك لدكتور كمان علشان يعالجك ويرجعلك نظرك...  بس انا عاوز اعرف حاجه 

:  إيه 

_ حد شافك او عرف انت مين ولا عرف ان ورد هي بنت اخو رضوان 

:  لا لا  يا معلم انا كنت بداري وشي  ومقولتش انا مين  ولا قولت ان ورد بنتهم 

_ طيب تعاله واحكيلي قولت ايه بالظبط

:  حاضر  

خدني معاه وبقا يسألني وانا اجاوب لغيت ما عرف كل حاجه  ف قالي 

_ اه..  طيب  ،  يلا اوديك خيمتك 

:  هتقتلني يا معلم!! 

_ مش هقتلك انت 

#ليلي 

قبل وقت بعتلي الكبير وبقا يسألني عن الكلام اللي قولته ل دعاء  يوم ما تعب  ،  بقيت اقول معرفش حاجه واني قولت كده علشان هي بتقصد تهيني كل ما تشوفني  بس هو حلف لو مقولتش هيخلي عياله يرموني لديب  ف قلتله عن كلامها في  التلفون وكدبها علي شجر لما قالت انها راجعه من الجبانه  ،  في الاول مكنتش هقول علشان معرفاش كل اللي حصل  مش خوف عليها  هي  بس لما ضغط عليه قولت وبعدها طلعت وانا خايفه من اللي جاي واللي ممكن  قوي يتقلب عليه ولما طلعت قابلت شبل وهو طالع من اوضته وشه متبهدل ومن قلقي مكلمتهوش ولا سألته عامل اية  ف وقفني وقالي

:  مالك يا ليلي 

_ مفيش حاجه 

جيت امشي ف قالي

:  استني في إيه؟!  ايه اللي حصل جوه

قولت وقلقي باين عليه 

_ نصيبه  وقعت علي راسي يا شبل

_ في ايه يا ليلي اتكلمي 

حكيتله اللي حصل ف قال 

:  دعاء تعرف حد علي عبيده 

_ معرفش انا سمعتها بتكلم حد تقوله هجيلك لما يمشي جوزي وبعدين كدبت وقالت انها راجعه من الجبانه  ومره تانيه شوفتها طالعه ولما لقتني ماشيه وراها وقفت لغيت ما بعدت عنها لانها مكنتش عاوزاني اعرف هي رايحه فين  

:  لا لا ،  هي شرانيه  ايوه  بس اكيد متعرفش حد علي عبيده   ،  انتي كان لازم تمسكي لسانك والكلام ده ميطلعش منك  ،  ليه تفترضي حاجه زي كده من غير دليل واضح 

_ معرفش  ، اهو انا لما سمعتها بتقول هجيلك لما يطلع جوزي فهمت اكده  وانت عارف انها ملهاش قرايب تكلمهم وتقولهم الكلام ده 

#شبل 

كلامها خلاني اشك في دعاء بس مش نفس شكها هي  ،  دعاء ناشفه ملهاش في حب ومشاعر عشان تخون عبيده بس الاكيد ان في وراها مصيبه مش هتعجبنا لو عرفناها ومكنتش قادر افهم ولا اتخيل هي ايه لغيت ما جه عبيده في وقت انا كنت في اوضتي ومشفتهوش  لما جه مع اني كنت حريص اني اقابله قبل ما يدخل لابوي ويقوله الكلام اللي قالته ليلي  وبعد شويه صوته رج البيت وهو بيخبط علي اوضتة اللي فيها دعاء ويزعق  ولما طلعت علشان الحقه لقيت بدر كمان جاي من بره يجري علي صوته وقبل ما نوصله اتفتح الباب  ودخل عليها مسكها من شعرها  وبقا يزعق ويقول 

:  مين ده اللي بتروحي تقابليه لما انا اسيب البيت  

بصتله بعيون واسعه لأخرها وقبل ما تنطق شافت ليلي واقفه بره الاوضه ف قالت وهي  بتتوجع 

_والله الموضوع مش زي ما قالتلك هي عاوزه تخرب البيت  يا عبيده  ،  اسمعني وانا هفهمك  كل حاجه     

            الفصل الخامس عشر من هنا

لقراءة باقي الفصول من هنا

تعديل المقال