رواية مكتوبة علي اسمي كامله بقلم ملك ابراهيم ) جميع الفصول مكتملة حتي الاخير الخاتمه

رواية ذئاب لا تعرف الحب

 الفصل التاسع عشر19

بقلم نجمه براقه 

 طلعت في الجنينه وهناك شوفت بدر ف بقيت واقف لثواني متردد اروح عنده اسأله عامل اية ولا لأ  وفي النهايه روحت  ايوه كنت خجلان منه بس بردو روحت  وقولت وانا واقف ومبعد عينيه عنه

:  عامل ايه دلوك 

_ الحمدلله   ،  هو انت عملت ايه في موضوع بت عمك؟!   التحليل طلع ايه؟! 

: طلعت هي اللي قولتلك عليها  

سكت شويه يفكر وقبل ما يتكلم سمعنا صوت ورد بتقول عايزه تمشي ف روحت وهو جه ورايا وقولت 

_ عاوزة تمشي؟! 

قالت وهي بتتهرب من البصه ليه 

:  ايوه  انا هروح مع اختي 

_ اخت مين انتي ملكيش اخوات غير دي  ،  دي مش اختك  واللي اهناك مش ناسك

: بس انا معرفش ناس غيرهم  وانا مش مرتاحه اهنه 

قولت بنفاذ صبر 

_ طيب ادخلي جوه  

بصتلي بتحدي وقالت

:  مش داخله  انا هروح مع اختي  ،  يلا يابت 

مسكت يد تماضر ف وقفت قدامها وقولت 

_ بقولك ادخلي جوه 

:  مدخلاش 

مسكت يدها وبعدتها عن يد تماضر وقبل ما اتكلم بدر وقفني وحاش يدي عنها وقال 

_ خلاص سيبها 

:  بتقولك عاوزه ترجع اسيبه كيه 

_ له مش هترجع  

بصلها وقال 

:  مينفعش ترجعي تاني انتي مش منهم   دول ناس خاطفينك وحرموكي من اهلك طول عمرك 

_ انا مليش دعوه بالناس دي انا هروح مع اختي  

قولت 

:  له مريحاش!!!  واسمعي الكلام   ،  ولو عاوزه دي  ،  تقدر تجيلك كل  يوم وتشوفيها 

_ له بردك مش هقعد 

كنت هزعق لولا ان بدر وقفني وقال 

:  اصبر...  انتي ليه مش عاوزه تقعدي 

_ عشان معرفش حد اهنه  ،  وعشان اختي هي مبقلهاش حد تقعد امعاه 

قولت باندفاع 

:  تقعد اهنه مع ليلي  

قولتلها ف لقيت بدر بيبصلي وهو مش راضي  بس متكلمش  ف قالت تماضر وكانها صدقت ما لقتها 

_ ماشي  

بصتلها بغيظ وقالت 

:  تماضر!!!!  له مهنقعدش 

_وه  ، هتكسري كلام الكبير علشان طلعتي منهم يعني  

اتنهد بدر وقال

:  ماشي خليكي  عشانها ، بس  ! 

كمل بتحذير 

_ بس اي غلط منك  هحاسبك عليه  مفيش اهنه مد يد

:  امرك ياكبير "

بقت ورد  باصالها بغيظ وبعدين بصتلنا وقالت بقلة حيله

_ ماشي 

مسكت يدها وشدتها وهي بتقولها 

:  تعالي 

_ اااه براحه هتملخيني 

#تماضر 

كانت فرصه اني اقعد عندهم مع اني عمري ما كان يخطر علي بالي انهم يقولو اكده  بس اهم قالوا ومن دلوك هشوف بدر كل يوم  ، وبأذن واحد احد اقدر اخليه يحبني...  وده اللي قولته ل ورد قبل ما تمسك في دراعي وتعضني بكل ما فيها 

:  آآآه  حرام عليكي يا ورد  

سابتني وبقت تقول وهي بتضرب

_ يحبك ؟!!!   كيه انا اقول همشي عشانك وتيجي انتي تقولي هقعد   ، عاجبك اكده 

:  وميعجبنيش ليه هو انا اطول اقعد في بيت الكبير واشوف بدر كل يوم  

_ يا حماره يا بهيمه هتكوني خدامه  

:  خدامه خدامه  هو انا اطول 

_ يجيكي الشلل اللي ما تشفي منه يا تماضر  يابت روايح   ، يابت حرام عليكي   ، انا مكنتش عاوزه اقعد  

:  يختي قولي انك خايفه لا تتزنقي مع عبيده  بس متخافيش مرته هتحرصكم 

رجعت مسكت عض في دراعي وانا بقيت اصرخ لغيت ما لقيناه ورانا وبيقول

_ في ايه 

سابتني و وقفت متوتره وهي بتبصلي تهرب من البصه ليه 

:  مفيش  حاجه  

بصلي وقال 

_ روحي دلوك انتي 

قولت بحزن 

:  امشي؟! 

_ له روحي  المطبخ  

:  ونبي صوح  ،  شالله تعيش يارب ويعلي مراتبك 

_ طيب امشي  

:  حاضر حاضر 

#ورد 

سابتنا ومشت وانا لما لقيت اني هكون امعاه  لوحدي  كنت هجري وراها بس وقفني وقال 

_ رايحه فين 

قولت بتوتر

:  رايحه اشوف ست دعاء 

_ اول حاجه اسمها دعاء من غير ست  ، تاني حاجه  ايه مخليكي عاوزه تمشي  مش كنتي بتقولي انك   بتتمني تكوني واحده من بنات النجع اديكي طلعتي بت من كبارات النجع  زعلانه ليه عاد

:  ايوه بس انا مكنتش عاوزه اكون مخطوفه ومضحوك عليه  ،  وانا مش مرتاحه اهنه 

_ طيب نعمل ايه علشان ترتاحي  إيه ناقصك

قولت وانا ببعد وشي عنه 

:  مفيش حاجه  ،  رايحه عند ست دعاء 

وقف قدامي وقال 

_ اسمها دعاء!!!  دعاء 

رفعت عيني وبصتله وانا قلبي بيدق بسرعه وقولت 

:   عديني 

_ اسمها ايه؟! 

:  بقولك  عديني 

:  اسمها ايه؟!!! 

سكت شويه وانا بحاول اقولها وبعدين قولت بنرفزه

_   اسمها دعاء  ارتحت اكده  

:  له لسه 

_ عاوز ايه تاني 

:  عاوز تعقلي وتقعدي علي حيلك  مسمعش عاوزه تمشي دي تاني 

قولت بضيق 

_ يابوي انا مش مرتاحه اهنه  ،  انا معرفكمش هعيش امعاكم كيه  ،  ونبي خلوني امشي  

:  له مش هتمشي    ،  احنا مش هنقبلوا ان واحده من بناتنا تعيش مع الغجر  

_ بس انا عيشت طول عمري امعاهم 

:  مكناش نعرف انك بتنا والا مكناش سكتنا  ويمكن لو الحال غير الحال دلوكتي كنا عاقبنا كل الغجر علي اللي عملوه متولي ومرته 

_ اه 

:  طيب هتعقلي ولا لا 

_ عقلت 

قال بإبتسامة 

:  جدعه يلا روحي  ،  خلي اختك توديكي تسلمي علي عمك هو عاوز يشوفك 

_ عمي؟!!  رضوان العربي!!!  

:  ههههه ايوه رضوان العربي خايفه اكده ليه 

_ وكيه مخافش دي رضوان العربي  

قال بإبتسامة 

:  ايوه رضوان العربي عمك   

_ بس متقولش عمك  دلوك خليني اعرف اخد نفسي 

:  ههههه متخافيش مش بيعض  ،  يلا  انا  هروح  امعاكي احرسك منه  

بصتله وقولت بتوتر 

_ له انا هروح مع دعاء  

ابتسم ابتسامه ظاهريه وقال 

:  زي ما تحبي   ،  يلا بالاذن انا  

قال كده ومشي وانا مشيت وراه بعيني   اشوفه وهو بيبعد   وبتحسر علي حظي  ، يعني يوم ما قلبي يتفتح لحد واحب يطلع جوز اختي 

#دعاء 

مبقتش عارف افرح برجوع اختي ولا ازعل وانقهر من اهتمامها هي وجوزي ببعض  ،  الموضوع متعداش النظرات بس متاكده ان في حاجه حصلانه  ،  وبذات لما شوفته جاي من عندها عنيه بتلمع  وقعد شارد لغيت ما جت و وقفت جمبنا  تكلمني وتقولي انها عاوزاني ادخل امعاها تسلم علي عمي  فضل باصصلها مع الكل بس كانت بصته تختلف  وهي كمان كان باين ان فيها حاجه  ، كانت خايفه تبصله وبتداري عينها عنه   وهو لو مكنش مهم عندها مكنتش اهتمت تبعد عينها عنه بشكل ده  ،  اتوجعت قوي بس مهما اتوجع مش هخسر اختي بعد ما لقيتها 

#عبيده 

قولت اني هحاول اتعامل امعاها علي انها اختي وهنسي اللي كنت بفكر فيه بس مجرد ما شوفتها قدامي نسيت اللي كنت ناويه ومفتكرتش غير اني مشغول بيها ومش قادر ابعد عيني عنها  ونسيت دعاء اللي مهما كان ف هي اسمها مرتي ودي اختها وللحقيقه كنت قلقان قوي ان الشعور ده يطور مع وجودها قدام عيني كل يوم  

#بدر 

بعد ما عرفت ان ورد تبقي بت عمي طلعت من غير ما اقول لحد  وروحت منطقة الخيام بمجموعه من الغفر و سألت عن متولي ف قالولي هج هو ومرته  وبعد تفكير في  اللي قاله عبيده بقي في  سؤال  في بالي  ، وهو هما عرفو منين ان عبيده عرف انها بت عمي وهربو قبل ما يوصل   معقول يكون في حد وصلهم الخبر  بس يكون مين اللي لحق يقولهم بسرعه دي  ،  مكنتش عارف ولا قدرت اخمن ممكن يكون مين  ف مشيت ورجعت السرايا علشان اقابله وأسأله  بس لما دخلت الجنينة ولقيتها اهناك قاعده وشارده  نسيت عبيده و وقفت ابصلها وهي سارقه عيني وكل تركيزي معاها  وطالت بصتي ليها لغيت ما انتبهتلي  وجت عندي و وقفت قدامي  متضايقه  ومتوتره وعاوزه تقول  حاجه ف قلت 

:  ايه مالك 

_ انت ايه خرجك وانت تعبان  "

كلامها وطريقتها مكنوش مناسبين لتعاملنا مع بعض ف بقيت  باصصلها وساكت " 

_ اسفه لو بتدخل  وبنسي وضعي هنا  بس انا متوتره شويه ومش عارفه اقول ايه  

:  ايه اللي موترك 

اتنهدت  بخنقه وقالت 

_ الليله اللي فاتت شوفت كابوس ومن شويه غفلت عيني  رجعت اشوف نفس الكابوس فـ... 

: ف ايه  ،  خايفه من الكابوس ؟! 

_ خايفه يكون ده عاده كل يوم  ،  هو انا ممكن افضل احلم بكوابيس كده كتير  ومقدرش اكمل ليلة كامله في النوم   "

مكنتش فاهم هي بتحكيلي انا بذات ليه ولا اذا كان في نيه ورا اكده ولا له   بس بقيت حاسس بالمسؤليه ناحيتها وكأن طمئنتها حاجه مرتبطه بيه انا وانا اللي مفروض عليه اطمنها واحميها  وكأنها تخصني مش خاطفها ف قولت 

:  له شويه وهتبطلي  ، ولو عاوزه انا ممكن اخلي ليلي تبات معاكي 

_ لأ شكرآ   

كملت بتردد  

:  ممكن اطلب طلب  

_ اطلبي 

:  انا متضايقه  نفسي اخرج من هنا 

_تمشي؟! 

:  لا اخرج اتمشي   ،  ولو قلقان ممكن تيجي معايا 

قولت بعد سكوت دام في النظر عليها ومراقبة قلقها وعنيها اللي بصالي وبتطلب مني اوافق 

_ ماشي   ،  جاهزة علي اكده؟! 

ابتسمت بسعاده وقالت 

:  بتتكلم بجد  يعني هنخرج نتمشي 

_ ايوه  

مسكت يدي وقالت بفرحه 

:  انت اجمل كبير في الدنيا كلها  ،  خريج اعلام بجد  ههههه  يلا بينا  

منعت ابتسامتي وانا بداري وشي عنها وبقول _ يلا

مشينا انا وهي وخدتها ناحية النيل وهناك وقفت في انتظار اي مركب علشان نعدي البر التاني بعيد عن زحمة المعديه ف قالت وهي بتبص لنيل 

:  الجو هنا مريح للأعصاب  ،  خُضره  ،  وميه  ،  وطبيعه من غير اي دوشه زي ما بيحصل في القاهرة والمدن  ،   هنا الواحد لما يحس انه زهقان ممكن يوقف هنا يبص لشكل الميه او يروح الزرع يجري شويه  واووو متعه 

_ يجري ليه اتجن

:  لا مش جنون   ،  بس بيكون في احساس بالانطلاق والحريه 

_ هه خياليه قوي انتي 

:  دي حقيقه ع فكره  ، انا بحب قوي اعيش في الخيال حتي لو بتفكير  

دارت ليه بكل جسمها وقالت 

_ كل الناس كده   كل واحد بيرسم قصه في خياله للحياه اللي نفسه يعيشها  وانت اكيد كده 

:  له انا مش زيكم   انا  لسه بعقلي 

_ يا سلام  معقول  

:  وليه مش معقول 

_ يعني انت عاوز تفهمني ان مفيش وقت غمضت عينك ورسمة قصه لنفسك  

:  له 

رفعت حاجبها وقالت 

_ امممم 

:  ايه ده عاد 

_ ماهو انت لو مكنتش جربت الاحساس ده تبقي  مش طبيعي  متزعلش مني يعني 

:  لو اكده الطبيعه ف انا مش طبيعي   ،   اتخيل ليه واعيش حكايه وهميه وانا  عارف ان في الآخر هفوق علي واقع مرير انا عايشه  ، ف اتعب نفسي ليه واتخيل 

_  علشان في الخيال بتحس براحه  بتحس ان كل حاجه حصلت زي مانت عاوزها ان شاءلله حتي تتخيل انك ملك وبتحكم العالم   ،  هي لحظات جميله بنعيشها وبعدها نرجع نواجه الواقع المرير اللي بتقول عليه  ،  المهم نفصل 

:  امممم مش بقلك خياليه وغاويه فلسفه 

قالت بإبتسامة 

_ طيب ما تجرب تعيش فلسفتي دي و تكون خيالي زيي   ،  جرب مش هتخسر حاجه 

:  قصدك اكون مجنون زيك 

_ ههههه  ماشي نمشيها جنان  اتجنن زيي  ،  اقولك غمض عينيك 

:  اغمض عنيه ليه 

_ غمض بس 

_ اغمض ليه ولا عاوزه تزوقيني في  الميه 

_ بقولك غمض!!! 

قالت اكده وحطت يدها الناعمه علي عينيه  ، وانا مش عارف ايه جرالي خلاني واقف ساكت ومن جواي مبسوط بلمستها  وقربها ومحاولتش ابعدها ف قالت 

:  ايوه كده   ،  قولي بقا ايه اكتر حاجه نفسك تحققها "

حطيت يدي علي يدها عشان اشيلها ف بعدت يدي وقالت وهي لسه مغمياني

_ جاوب!!!   ،  ايه اكتر حاجه نفسك تحققها

:  نفسي تبعدي عني وتبطلي اللي بتعمليه ده 

_ غيروووو

اتنهدت وقولت 

:  ايه فايده اللي بتعمليه ده  ،  اكده هتخليني خيالي زيك يعني 

_ اه ههههه   ،  يلا قول  

سكت شويه افكر ايه اللي نفسي فيه ف قولت  وانا مطاوعها في  اللي بتعمله 

:  نفسي كل المشاكل دي تخلص  ،  او  متكونش حصلت اصلا 

_ قصدك مشكله فاطمه 

:  اه

بعدت يدها وقالت 

_ انا مش عارفه ايه اللي حصل  وليه هربو مع ان بيجاد أكدلي انه راجع لوحده  وأنها عملتله بلوك لمجرد اقتراح فكرة الهروب  بس اكيد اللي حصل كان أكبر منهم ، او يمكن هي متخيلتش حياتها من غيره  وخافت لما لقته مسافر  وهيبعد عنها ف راحت معاه 

_ ايوه  وباعتنا كلنا وكانت انانيه مبتفكرش غير في نفسها 

:  ويمكن بردو في حاجه احنا منعرفهاش  أجبرتها تمشي   ،  خلي عندك الاحتمال ده   بلاش تتوقع بشكل كامل انها باعت  

_  له مش هتوقع غير انها باعتنا  

:  انا بقولك خلي عندك احتمال   يمكن تتفاجيء بحاجه تانيه  

_ جايز بردك  ،  قفلي علي السيره معوزش اتكلم فيها 

ابتسمت وقالت 

:  حيث كده نكمل الخيال  ،  غمض عينيك

قولت بزهق  

_ وبعدين 

حطت يدها علي عينيه وقالت وانا حاسس بقربها

:  بلاش تغمض انا اغميك   ،  قولي إيه اكتر حاجه نفسك فيها دلوقتي 

_ نفسي تبعدي عني 

:  ههههه وانا نفسي كمان والله بس حضرتك رافض  ، ها  غير انك نفسك ابعد عنك  "

استسلمت لجنانها وفكرت في سؤالها وبعدين قولت 

_ نفسي ابعد عن كل حاجه  في حياتي 

:  متضايق من حياتك 

_ ايوه  ،  هي حياتي بس معملتش فيها حاجه بمزاجي 

:  وايه مناعك 

_ ايه منعني من إيه 

:  انك تختار  او انك تبعد 

بعدت يدها وقلت

_ مانعني  ان المسؤليه كلها عليه 

:  اي مسؤليه  

_ النجع كله 

:  لا دي مش مسؤليتك  ،  في ناس بتقوم بالمسؤليه دي  

_ قصدك الحكومه 

:  ايوه  

_ بس دي من المحرمات عندنا مينفعش الحكومه تدخل 

:   كل حاجه كده محرمه؟!  ،  ياكبير حرام عليك  انتوا عندكم كل حاجه محرمه حتي الحب  عايشين ازاي كده 

_ مين قالك ان الحب محرم مافي كتير متجوزين عن حب اهنه 

:  اه بس في اطار انتو محددينو  واللي يتخطاه يتقتل في الساحه  ،  وزي مانت شايف انا هنا دلوقتي علشان اتنين حبو بعض   

_ كل حاجه ليها قاونين  حتي الحب ده  مينفعش نتعدي القوانين فيه  

:  يا سلام  يعني انت ضامن نفسك انك متحبش من بره النجع زيها 

_  انا ضامن نفسي محبش خالص 

:  وليه بقا معندكش قلب 

_ عندي بس القلب دوره النبض وضخ الدم مش للحب والكلام الفارغ 

:  افهم من كده انك عمرك ما حبيت 

_ ولا عمري هحب 

طالت نظراتها لعينيه وبعدين قالت 

:  يمكن  

_ اكيد  

:  جايز 

_ بقولك  اكيد 

_  الله واعلم بقا  ، بس انا مش مصدقه كلامك  

:  قصدك إني بكدب 

_ لا أبداً بس انت محبتش علشان معندكش وقت ولا سامح لنفسك تحب  بس اكيد هيجي يوم ومتعرفش تبطّل تفكير في واحده كده  ،  انا مش عارفه هي مين بس اكيد ده هيحصل في يوم  

:   ايوووه  واجبلها ورده احطهالها بين سناني ودبدوب احمر و اوقفلها تحت الشباك اغنيلها شحات الغرام  

_ هههههههههههههههههه لا مش لايق عليك  "

ضحكتها دوبت ضيقتي منها ف قولت وانا بحاول مسهمش قدامها

:  بقولك ايه  انا مبحبش  كلام الحريم ده  اسكوتي 

_ سكت اهو  

 قالت اكده ورجعت تبص للميه وابتسامتها علي وشها وعيونها بتلمع مع انعكاس ضوء  الشمس في الميه  كانت جميله قوي جميله لدرجه اني مقدرتش اشيل عيني عنها  لثانيه واحده وحاسس اني بنجذب ليها من غير ارادتي  وحتي لما رجعت تبصلي بقيت باصصلها زي المغيب  وغرقان في  جمالها وطالت بصتي ليها  وانا شايفها بتكلمني وتحرك يدها قدامي  بس مفوقنيش غير حطت يدها علي عينيه  وقتها مسكت يدها وبعدتها عني ورجعت ابصلها واقول بتحذير مش ماشي مع توهتي في عنيها 

:  متعمليش اكده تاني 

قالت بتوتر شديد 

_ ماشي  بس سيب ايدي 

فضلت مكمل في مسكتها وقولت بعد ما قربت منها خطوه 

:  اخر مره هحذرك 

رفعت عينيها وبصتلي وطال السكوت بيني وبينها لغيت ما سمعت صوت  ف فوقت لنفسي وهي شدة يدها وبعدت ولما بصيت ناحية الميه وانا حاسس بقلبي بيدق بسرعه لقيت مركب جايه ف قولت من غير ما ابصلها 

_ اهي مركب جت 

ناديت علي ريسها وجالي ف طلعت وبعدين رجعت ابصلها لقيتها واقفه مكانها وبتبص للمسافه اللي بين الميه والمركب ف رجعت خطوه  ومديت ليها يدي وقولت 

:  هاتي يدك 

_ هقع وهدومي هتتبل 

:  متخافيش  هاتي يدك 

حطت يدها ف يدي وخطت المسافه دي وكانت هتوقع لولا اني حواطتها بدراعي  ف بصتلي بتوتر وبعدتني عنها قوام ورجعت خطوتين ف قولت وانا بدير ليها ضهري 

_ ودينا البر التاني يا ريس 

#وفاء 

مش عارفه ايه حصلي  وانا واقفه قدامه وعيني في عينه  ،  حسيت نفسي متكتفه ومش قادره ابعد  عنه  وكأن في حاجه بتجذبني ليه وبتقربني منه أكتر   ، وطول وجودنا في المركب بلاقي نفسي ببصله بشكل لا ارادي واشرد في شكله  اللي يبان من بره انه قاسي لكن من جواه مفيش اطيب منه  ،   وده احساس مفرحنيش ولا امبسطت باكتشافي ليه  لأن انا قربتله واخترعت حكاية الكوابيس دي بس علشان اعرف اهرب مش علشان اكتشفه وانجذب ليه .. 

🍒🌹🍒🍒🌹🍒🌹

بعد ما وصلنا البر التاني وانا متضايقه من نفسي وساكته مبتكلمش قال 

:  وقفتي ثرثره  يعني ،  انتي تعبانه  

_لا بس المركب دوختني 

:  انا قولت اكده  ،  طيب تعالي هنقعد 

اهناك 

خدني و وقفنا جمب النيل في مكان واقفين فيه ناس كتير ، وكل اتنين واقفين مع بعض يتكلموا ،  وكان قدرنا انا وهو اننا نوقف جمب اتنين شكلهم في ثانوي  واقفين وبيحبو في بعض   وبعد سكوت مني انا وهو سمعنا البت بتسأل الولد  

: هوانت ممكن تتخلي عني يا إسلام"

خدني فضولي اني اعرف رده ف ركزت قوي وسمعته وهو بيقول 

_ انتي مجنونه!!  هو في حد يتخلي عن روحه  ، يابت انا لو سيبتك يبقا بسيب روحي  ، ده انا  ممكن  اقيم حرب عشانك  ومسبكيش

ردة البنت وقالت

: انا كنت متاكده اني حبيت راجل 

مقدرتش امسك  وبقيت اضحك بهثتريا  وانا ماسكه في جلبية بدر  اللي لما ركزت وبصتله لقيته بيحاول يمنع ضحكته وبعدين بيبصلي ويقول بصوت واطي

_ انا نفسي اسأله هيقيم حرب كيه بدرعاته دي الواد عنده ديدان 

:  هههههههههههههههههه  

بقيت اضحك ومش قادره أبطل  لغيت ما مسك دراعي وقالي 

_بس  الناس بتبص عليكي 

:  هههههههههههههههههه مش قادره بجد  "

كملت ضحك وانا بمسك في هدومه من غير قصد   لغيت ما قدرت اتماسك وارجع ابصله ف لقيته مركز معايا بأبتسامه وعنيه جت في عنيه ف بطلت ضحك  وديرت وشي عنه بارتباك ف قال 

_ نمشي؟! 

هزيت دماغي بالموافقه وكملنا مشي واحنا الاتنين ساكتين لغيت ما وصلنا محل بيعمل عصير قصب ف قالي 

:  نجيب عصير قصب ولا ملكيش فيه 

_ ليه 

:  طيب دقيقه واحده  

مشي وسابني وانا وقفت ابص عليه وعيني متشالتش عنه لحظه لغيت ما جه و قالي 

_ لتاني مره يكون قدامك فرصه تهربي ومهربتيش 

بصيت حوليه وعلي المسافه بيني وبين محل عصير القصب ولقيت فعلاً ان دي كانت فرصه  ولو جريت واختفيت في اي مكان مكنش هيلاقيني  ف بصتله وقولت 

:  انت عاوزني اهرب  ليه؟! ،  طيب ما لو كده  مشيني انت 

_ انا عمري ما همشيكي قبل ما اخوكي يرجع اختي  ،  دورك انتي تحاولي تهربي يمكن تقدري

ابتسمت وقولت 

:  حقيقي حقيقي انا مش حاسه بأني مخطوفه  ،  واديك قولت لتاني مره تيجيني الفرصه ومهربش 

_ عجبتك القعدة امعانا ولا ايه 

:  لا مش كده بس انت قولت لما يرجع بيجاد هتمشيني

_ وافرضي مرجعش  هتفضلي تضيعي الفرص كده كتير 

:  مش عارفه 

_ مش عارفه إيه 

بصتله وقولت وأنا قاصده احسسه اني مرتاحه عندهم

:  مش عارفه ليه بضيع الفرص ومهربش 

_ يمكن الخوف بيمنعك  ،  وحاسه انك مش هتقدري تكملي هروبك 

:  مش عارفه  

قولت بإبتسامة 

_ بس انا مبقتش عاوزة اهرب زي الاول   وحاسه ان النجع مش وحش بنفس الدرجه اللي فهمتها من كلام بيجاد   ،  في حاجات كتير كويسه  هنا ،  انتو نفسكم ناس كويسين  ،  وانت كمان مطلعتش وحش  ، حساك انسان طيب 

:  زين  انك حاسه بكده  اهو تهون مدة قعدتك عندنا  

ابتسمت وقولت 

_ صح  طيب ايه مش هتديني العصير ولا عاوزني احاسب علي مشروبي 

اداني العصير وقال 

:  له خدي 

خدته منه وبدأت اشرب ف وقفت وقولت بقرف 

_ ايه ده  

:  عصير قصب 

_ مين فهمك ان ده عصير قصب  ،  ده وحش جداً 

:  كيه يعني وحش ده اجمل مشروب في الدنيا  

قال كده وشرب شفطه وبعدين مط بوقه بقرف وقال 

_ ايه ده  ،  معبيلنا مية مجاري علي انها عصير قصب ولا ايه  

:  هههههههههههههههههه 

رما الكيس وخد مني الكيس بتاعي ورماه 

_ هاتي مش هنشرب عصير قصب تاني  

:  ههههههههههههههه النهارده هموت من الضحك انا متاكده 

قال بإبتسامة 

_ طيب نمشي خلينا قريبين من مستشفي علشان  نلحقوكي 

:  ههههه اوكي 

مشينا وبقينا نلف علي رجلينا ونتكلم في حاجات كتير عنه وعني وكلنا في مطعم هناك وبعدين حلينا وكلنا تسالي  واحنا تقريبا ناسين ايه اللي جمعنا  ، وانا نسيت هدفي مع ان كان فيه مليون فرصة للهروب  وعدي الوقت ومحسناش بيه غير قريب المغرب  ف رجعنا وروحنا السرايا  وانا طلعت فوق  كنت هلكانه من التعب واترميت علشان انام  بس مقدرتش  ،  حقيقي مقدرتش انام لحظه واحده الليلة دي  

#بدر 

كنت في اوضة شبل بحاول انام بكل الطرق ومقدرتش   ، عقلي كان طول الوقت  مشغول باللي حصل النهارده  ومش قادر اشيل صورتها من خيالي ولا ابطل تفكير فيها وببتسم لما افتكر جمال ضحكتها وجنانها  وخيالها اللي اتمنيت اعيشه  وبعد وقت وانا شارد وبفكر فيها جاني صوت شبل اللي كان في سابع نومه وهو بيقول 

: صعبان عليه يا بدر تلاقيك مش قادر تنام من كتر التفكير فيها 

_ يخرب عقلك صحيت ميته  ،  هي دي مين دي ياد  ،  انا افكر في واحده  

:  انا امتي قلت واحده  ،  انا اقصد التفكير في الدنيا  ،  انا عارف طبعاً ان بدر مفيش واحده تشغله حتي لو كانت جميله زي البنت اللي فوق 

مسكت فيه بغيظ وقولت 

_ هي مين دي اللي جميله ياد 

:  ههههههههههه البنت اللي فوق   ، هي جميله قوي بجد  ،  لون بشرتها لوحده حكايه  ولا عنيها   وشعرها يخربيت الجاموسه اللي جابت القشطه دي  كلها 

: انت باين عليك نفسك تموت 

وقعته وحملت عليه ونزلت فيه ضرب بالمخده 

:  هههههههههههه ااااه يابدر حرام عليك   ،  خلاص مش جميله  اااه  ،  خلاص بجد 

سبته وقومت وانا بقول

_ ده انت عيل ***** 

:  ههههه طيب والله وقعت ولا حد سمي عليك 

_ وقعت عليك السرايا بتلات الدوار بتوعها مين ده اللي وقع ياد انت معارفش بتكلم مين  

:  باين قوي يابدر متكابرش  ،  انت وقعت  ، و فيها إيه  لا عيب ولا حرام 

_ له عيب وحرام ولا ناسي اننا ركبنا العار بسبب اخوها  حتي لو وقعت وحبيت في يوم مش هتكون دي 

:  ليه  

_ ده هيقولي ليه   ،  انت عاوزني احب واحده اخوها هرب مع اختك  

:  هقولك تاني يابدر فاطمه مهربتش  بمزاجها فاطمه في حاجه حصلت معاها  ،  هما الاتنين في مشكله   الاتنين محدش يعرف عنهم حاجة  

_ له  الاتنين هربو واختفوا علشان منوصلهمش  مفيش حاجه حصلتلهم   ، و معوذش كلام في الموضوع ده ولا حتي تلميح  فاهم يا شبل ولا نخسرو بعض 

:  فاهم  

قفلت امعاه الحديت ونمت دايرله ضهري وبقيت طول الليل افكر في كلامه ولقيت اني صح ميلت للبت دي وكان لازم اوقف ومسمحش ان يحصل تطور اكتر من اكده  

#ورد 

:  صاحيه 

قولتها ل دعاء اللي كانت متمدده  جمبي وباين ان  النوم طاير من عينيها زيي ف قالت من غير ما تبصلي  

_ ايوه 

: مجيكش نوم ليه 

_ لنفس السبب اللي مطير النوم من عينك 

:  مفهماش 

قامت وقالت وهي بتبصلي بتركيز

_ عبيده 

حسيت قلبي انتفض بشده ف قولت وانا ببعد عيني عنها 

:  و عُبيده يسهرني  انا  ليه

_ يعني   '  اكيد بتسألي نفسك هو سايبني ونايم بعيد ليه 

اتتفست براحه وقولت 

: له  ،  انا عارفه انه سايب الاوضه علشان انا اهنه 

_ له هو سايبها من قبل   ،  عبيده قال اني انسا انه جوزي  ، انا وهو بقينا  نص متجوزين  

:  ليه 

اتنهدت وقالت 

_ كنت فاكره انه زعل مني لما عيرته باخته بس باين اكده ان في حاجه تاني 

: بتقولي عيرتيه باخته؟!   له ده سبب كفايه قوي انه ميقعدش امعاكي في نفس الاوضه  دي بت عمك  يعني عارك زيك زيهم كيه تعايريه بيها 

_ عمك ده السبب في موت ابوكي وامك  

:  كيه السبب  ،  ايه اللي حصل  صح احكيلي 

بدات تحكي اللي حصل يومها ونهت كلامها بأن هو السبب لو جابلنا بيت بسقف بدل البوص او بتوجاز مكنش ده حصل ف قولت 

:  له مش هو السبب 

بصتلي ودموعها ماليه عنيها 

_ امال مين 

:  انتي  ،  انتي اللي سيبتي النار علشان تروحي تتفرجي وانتي عارفه ان امك مش في البيت وابوكي عاجز 

قالت وهي بتبكي

_ انا كنت عيله مفهمش وحتي لو كنت قاعده مكنتش همنع النار 

:  بس كنتي قدرتي تتابعيها ومتسرحش علي باقي البيت  

قالت ببكا

_ اسكوتي معوذش اسمع كلمه  

قالت اكده وقامت دخلت الحمام  وبعد ما مشت شوفت خيال تحت عقب الباب وباين ان في حد بيسمعنا  ف قومت وفتحت الباب ملقتش حد   بس عرفت هو مين من غير ما اشوفه 

#ليلي 

كنت صاحيه وسمعت كلام شبل  و بدر وبعدها  كلام ورد و دعاء  وجه تاني يوم وقولت رايحه السوق وروحت بعد ما كلمت شحاده وقولتله يستناني اهناك   وبعد ما وصلت وبدات انقي الخضار لقيته واقف جمبي وبيقولي بصوت اسمعه انا وحدي 

:  عندك ايه 

انتبهتله وقومت بعدت شويه وهو جه وراي 

ف قولت بعد ما بصيت حوليه 

_ البت اللي اسمها تماضر جت وهتقعد عندهم 

:  وايه تاني 

_ و ورد مسمعتهاش قالت اي حاجه عنكم  ،  وسمعت كلام بين شبل و بدر ان بدر  بيحب البت اخت الدكتور  

:  امممم  و رضوان سيباه ليه 

_ مبيقعدش وحده دقيقة  ومش لاقيه فرصة 

: طيب وبعدين يعني  ،  اهو النجع كله عارف ان البت هربت وهما لسه زي ما هما  متحركوش   ولا الموضوع فرق  ، لازم نعمل حاجه 

_ شوف انت عاوزني اعمل ايه وانا اعمله 

:  انتي قولتيلي ان بدر اتجوز البت دي صح 

_ ايوه  بس علي الورق  كل واحد بيبيت في اوضه 

:  طيب واهلها محدش سأل منهم 

_ له حتي خطيبها مرجعش تاني 

:  طيب وهي قايله ايه  حباه ولا عاوزه تهرب 

_ معرفش بس لحقته بعد ما كان هيموت مع انها كانت قادره تهرب 

:  اخبارك زي وشك  مش فيداني بحاجه  

_ انا ملقياش اخبار تاني اعمل ايه 

:  اعملي اي حاجه ان شاءلله تقتليهم كلهم 

_ هو القتل سهل اكده 

:  ايوه سهل  بنفس سهولة قتلك لفاطمه 

بصيت حوليه اشوف لو كان حد شاف وسمع اللي بيتقال ولا لا وبعدين بصتله وقولت بغيظ

_ بطل تعايرني مانت كمان  دفنتها وبعدها قتلت الدكتور   يعني احنا الاتنين في الهوا سوا 

ضحك ببرود وقال 

:  صح  ،  متزعليش قوي كده   ،  يلا روحي ولو في جديد كلميني 

مكنتش طيقاه ولا طايقه ارد عليه ف مشيت من غير ما ارد بكلمه وبعد مسافه شوفت تماضر واقفه بعيد بتبصلي  ،  حسيت انها شافتني ف قربت منها وقولت 

_ بتعملي ايه اهنه

:  امك بعتاني اجيب وزه  ،  شوفتي شحاده؟! 

_ شـ..  شحاده مين ده  ،  بتقولي ايه انتي 

            الفصل العشرون من هنا

لقراءة باقي الفصول من هنا

تعديل المقال