رواية ذئاب لا تعرف الحب الفصل الثاني والعشرون22بقلم نجمه براقه
مكنتش اعرف ان لو حلمي اتحقق في يوم هكون بالحزن ده كله ده اكتر وقت احس اني بموت ومخنوقه وكأن البيت ده مع كل وسعه بيضيق عليه واندم اني جيت وقعدت فيه وكل ده بسبب احساسي بالذنب تجاه دعاء وشعوري تجاه عبيده اللي حاسه انه متبادل مش من طرفي انا بس وبعد ما قعدت وقت كبيره في الاوضه متخفيه منه طلعت اشم شويه هوا في الجنينه بعد ما بقا البيت يخنق ف لقيت رجليه وخداني لعند الديب اللي كانت دي اول مره اشوفه تقريبا ولما وقفت ابصله وانا خايفه و حاسه انه هيطلع ياكلوني سمعت عبيده بيقولي من وراي
: عامله ايه
قلبي انتفض قبل ما ابصله واقوله
_ زينه
: الجرح خف
_ ايوه
قولت اكده وجيت امشي ف قالي
: استني يا ورد
قولت من غير ما ابصله
_ إيه
: مالك؟! بقيتي تتهربي مني من وقت ما جيتي
بصتله وقولت
_ ده بيتهيالك ، وبعدين انت بتكلمني ليه دلوك بعد ما خلفت بكلمتك امعاي
: كلمة ايه اللي خلفتها امعاكي
_ نسيت قوام؟! ، بتكلم عن انك رجعت تبيت بعيد عن دعاء ومزعلها ، عملتك ايه هي علشان تبعد عنها وتضربها كمان
: انا مضربتهاش انا يدي طالتها بالغلط ، هي كدبت عليكي
قولت بنرفزه
_ هي مقالتش انا سمعت زعيقك امعاها ، وشوفتها وهي يا حبة قلبي زعلانه بسببك
: انتي بتزعقي وتعلي صوتك ليه دلوك ، قولتلك مضربتهاش ومعملتلهاش حاجه تزعلها ، وبعدين انتي زعلانه عليها ليه ولا خلاص اعتبرتيها اختك
_ ايوه اختي!!! من امي وابوي حتي لو معشتش امعاها ، انا ودعاء اخوات!!!! يا جوز اختي
قولت اكده ورجعت جوه وانا مش قادره احبس دموعي اكتر وفي طريقي وانا ماشيه بسرعه خبطت في شبل ف جسمي مال لورا و وقعت ، وقتها حسيت بوجع شديد في الجرح ف بقيت اتوجع وانا بميل واتعدل من شدته و شبل قعد عندي حاطط يده ورا ضهري وبيمسك دراعي ويرفعني وهو بيقول
: انا اسف قوي ، قومي معايا
رفعني عن الارض وانا سانده بيدي عليه
وفي اللحظة دي لقيت عبيده قدامي بيمسك يدي من شبل ويقول بقلق
_ حصلك ايه
قولت بوجع ودموعي بتسيل
: الجرح وجعني قوي آآآه
_ طيب اهدي ، هنروح الدكتور
قال اكده وفجأه شالني علي درعاته ومن صدمتي نسيت الوجع وبقيت بصاله لثواني وبعدين قولت وانا بحاول انزل
: ايه ده نزلني
طنش كلامي وخدني للعربيه وشبل جه معانا وقعدوني ورا وهما قدام ف بقا شبل يبصلي كل شويه وهو قلقان ومحمل نفسه الذنب وبيقول
_ انا اسف قوي يا ورد والله ما خدت بالي
: انت ملكش ذنب انا مكنتش مركزه
_ في ايه يا عبيده ما تسرع شويه البت بتتوجع
قال اكده وفجأه زعق فيه وصوته رج المكان
: ما تسكت شويه!!!! اسرع من اكده ايه!!!! ولا نعمل حادثة علشان ترتاح ما تقعد صدعتنا برغيك من الصبح
_ في ايه يا عبيده انا بقولك بسرعه علشان البنت بتتألم
: ما تتألم ولا تموت مين قالها متاخدش بالها
بصلي في المرايا وقال
_ ابقي فتحي المره الجايه محدش ناقصلك
بكيت ومقدرتش ارد ف بصلي شبل وقال
: متزعليش حقك عليه انا يا ورد
زاد فجأه سرعته كان هيقلبنا بالعربيه وراح بينا علي المستشفي وهو مش حامل لحد فينا كلمه وعمال يزعق ويغلط وكل ده ومش فاهمين في ايه
.......................................................
#وفاء
مش فاكره قعدنا هناك قد ايه بس مفيش حاجه رجعتنا غير اتصالات شبل الكتير علي بدر وطلبه منه انه يرجع البيت ف قالي نمشي ولو حبيت اجي تاني نيجي وانا وافقت ورجعنا السرايا وقبل ما ندخل وقفني وقال
: مش عاوزك تشيلي هم الامتحانات هترجعي قبلها
_ ولو ان لازم اكون موجوده من دلوقتي بس ماشي المهم اني ارجع في النهاية
: هترجعي
قولت بإبتسامة
_ ايه حنن قلبك عليه صحيح
: له محنش ولا حاجه انتي ملكيش ذنب يضيع مستقبلك بسببنا
_ اها
: امممم ، طيب اطلعي ارتاحي ، و ، وبلاش يعني الحبسه ، ابقي اطلعي كلي واقعدي مع الناس
_ اها اوكي
دخلت الاوضه اترميت علي السرير وحضنت المخده وانا مغمضه عنيه وابتسامتي علي وشي وبسترجع في عقلي اللي حصل النهارده من هزار لكلام لنظرات وفجأه بيفسد كل ده كلامه عن جواز بناتهم من بره النجع ف قومت وسيبت المخده وقولت
_ لأ ، مش ممكن اقبل ان قلبي يميل ليه ولا لأي حد من البلد دي ، هما مش احسن مني ، وبعدين مش هو ده اللي عاوز يقتل اخوكي علشان حب اخته ، ازاي تفكري فيه كده ، افرضي لقاه وقتله .
...............................................................
#بدر
كنت مبسوط قوي وانا معاها اتمنيت الوقت اللي جمعنا ميخلصش أبداً ، وكان عندي احساس بسعاده مش فاكر اني حسيته قبل اكده وقولت يارب تختار انها تكمل اهنه مع إني مش عارف هي مياله ليه او ممكن تحبني في يوم بس انا عاوزها مش عاوزها تسيبني وبقيت سرحان بفكر فيها لغيت ما افتكرت فاطمة واخوها اللي مشكلتنا مش هتتحل غير بدمه ف فوقت لنفسي ورجعت للواقع لأن انا مش هقدر مقتلش بيجاد وهي حتي لو عازتني مش هتقدر تكمل مع قاتل اخوها وحكايتي امعاها اتكتب عليها الموت قبل ما تبدء
: كنت فين يابدر
قالهالي شبل اللي دخل عليه في اوضته ف قولت بعد ما فوقت من تفكيري
_ عاوز ايه مبطلتش رن من الصبح
: انت نسيت كلامنا ولا ايه ، مش هتكلم ابوي
_ اصبر يا شبل ،، اصبر يكون الدنيا اتظبطت
: افرض متظبطتش دلوقتي ، كلمه علشان خاطري ناخد الموافقه وبس ، علشان خاطري يا بدر كلمه "
اتنهدت بعمق وقولت وانا مش ناويها
_ ماشي ياشبل هكلمه
حضني وقال بفرحه
: حبيبي يا بدر وربنا كبير وما اكبر منك غير ربنا ايوه كده يلا
شدني من يدي لغيت اوضة ابوي
_ ياد اصبر في ايه
قال وهو بيقف بينا عند الباب
: يلا يا كبير ، اقنعه متطلعش غير لما تقنعه ها
_ شبل انا كنت عايز اقولك حاجه
: هنقول كل حاجه بعدين
_ يا ولدي افهم....
فتحت الباب وقالي
: بعدين بعدين يلا
زقني لجوه وقفل عليه وسابني في وش ابوه اللي بقا يبصلي و يقول
_ في ايه يا بدر
: مفيش يابوي
قربت منه وقولت
_ عامل ايه دلوك
: زين يا ، ايه اللي بيحصل مال الواد ده
:_ ملهوش يابه
قولت بتردد وانا خايف من زعل شبل
: انا سمعت انك عاوز تجوز ورد ل شبل صح الكلام ده
: والله كنت عاوز بس لما فكرت فيها لقيت انها كانت رقاصه ودول غجر منعرفش حصل ايه تاني ف بقيتها ولا انت ايه رايك
_ ايوه يابوي بس دي بت عمه وهو اولي بيها ، وحياتها مع الغجر حاجه مش بيدها المهم اللي جاي
: يعني اجوزهالوا
_ ايوه يابه ده الصح
: ماشي ابقي قوله الكلام ده انت ، وخليه يشيل الخدامه من راسه ، وعرفو اننا هنعقدله علي البت اهي تبقي متجوزه بدل ماهي قاعده اكده وسطكم
_ حاضر يابه
قولت اكده وفجأه الباب اتفتح ودخل علينا وهو بيبصلي بصدمه وبيقرب مني ويقولي
: بدر انت قلت ايه؟! مش هو ده اللي اتفقنا عليه يابدر
_ بعدين يا شبل
قال ابوي
: تعاله ياد
قال بانفعال
_ مش جاااي!!!
بصلي وقال بانفعال
: مش هو ده اللي اتفقنا عليه !!!! انا قولتلك تكلمه عن ليلي ، ايه اللي انت قولته فهمني "
قال ابوي
: واد!!! هقوملك لو صوتك علي علي اخوك تاني
_ يابوي ده انا متفق امعاه علي حاجه تانيه ، بدر فهمني ايه ده !!!!
قومت وقفت عنده
: ورد انسب ليك يا شبل ورد بت عمك وانت اولي بيها
زق يدي اللي حطيتها علي كتفه وقال بانفعال
_ بس مش هو ده اللي اتفقنا عليه انت خدعتني
بص لابوي وقال
: انا مش هتجوز ورد يابوي
قام ابوي من مكانه وهو بيمسك الكرباج المعلقه علي الحيط وقرب منه وهو غضبان
_ بتزعق فيه يا ******
وقفت قدامه امنعه وقولت
: براحه يابوي ميقصدش يزعق .. امشي انت دلوك
_ مش ماشي انا مش عيل معاكم علشان تضحكو عليه
قال اكده وفجأه ابوي بعدني وضربه بالقلم وكان هيضربه بالكرباج بس انا لحقته
: له يابوي !! بلاش هو ميعرفش بيقول ايه "
زعقت في شبل وقولت
_ اطلع بره ياد!!!
قال ابوي بانفعال
: ميطلعش ، وقف عندك!!!! طيب والله لا تجوزها ولو هكتفك واجيبك قدام الماؤذن زيك زيي الوليه يا ***** ياد فاكر نفسك راجل وهتزعق وتختار علي كيفك ، ده اخوك الكبير انا جوزته غصب عنه تيجي ايه انت جمبه يا ني يا مايع ، ياد ده انت بتسبسب شعرك زيك زيي البنته وبتعوج لسانك "
نسيت نفسي واتعصبت وانا بقول
_ بس!!! اكفايه ، هو هيتجوزها ملهوش عازه الكلام ده
بصيت ل شبل اللي دموعه ماليه عنيه وقولت
: اطلع بره محدش ناقصلك
طلع بسرعه وانا رجعت لابوي اللي بيقولي
_ صوتك علي علي ابوك يا بدر
: يابوي حاشا لله بس ده مش كلام تقوله
_ وانا قولت ايه ماهو صح ني وهو والبنات واحد
: يابوي بزيداك!!! عيب اكده
_ بزيادي وعيب يا بدر ؟!!! بتسكت ابوك؟!
نزلت دموعي من كتر ضيقتي
: يابه مش قصدي بس كيه تقولو اكده ، انت عارف كلامك ده ممكن يعمل فيه إيه
_ يعمل اللي يعمله ومش اتكلم بس انا اضربه بالجزمه علي خلقته كمان وروح قوله لو معقلش هحبسه مع الديب خليه ياكله ونخلص منه طالما مش راجل
قولت بانفعال بعد ما رجعني لعشرين سنه ورا
_ الله يقطع الديابه اللي انت معندكش عقاب غيرها... طيب اطلع افرغ فيه مسدس ونخلصو منه الديب ده اللي انت مفيش علي لسانك غيره
مكملتش كلمتي ولقيت قلم نازل علي وشي والكرباج بيعلم علي دراعي وهو بيزعق ويغلط وانا علي قد الوجع بس محاولتش اتكلم ولا أمنعه لأني لو اتكلمت مكنتش هضمن ممكن اعمل ايه وبعد ما ضربني مرات بالكرباج وقف مع دخول امي ومرت ابوي وقال
: اطلع بره!!!! معوزش اشوف خلقتك قدامي والله في سماه لا اربيكم كلكم ، خلاص مفيش رقاد تاني!!!!
مشيت من غير ولا كلمة وفي طريقي شوفت وفاء واقفه ودموعها في عنيها وقفت ثواني قدامها وبعدين سيبت البيت وطلعت وقبل ما اوصل المكتب لقيت عبيده جاي وراي يجري ويوقفني
#عبيده
مكنتش قادر ادخل عندهم وهما بيتكلموا في موضوع ورد رغم زعيقهم وصوتهم اللي مالي البيت وضربه ل شبل و بدر وبعد وقت لقيت مرت ابوي جيالي تجري وتقولي الحق اخوك يا عبيده وقفه ما تخلهوش يمشي لا يجراله حاجه ف طلعت اجري لغيت ما لحقته قريب المكتب و وقفته ف لقيت دموعه ماليه عنيه
: رايح فين
_ سيبني يا عبيده
: له مينفعش تمشي اكده ، تعالي هنقعدو في المكتب
قال وهو بيحاول ميبكيش
_ معاوذش اقعد بعد عني
_ له مينفعش تمشي قدام الناس وانت اكده تعاله
فتحت الباب بالمفتاح بعد ما كنت واخده عشان ابيت هناك الليله اللي فاتت ودخلته وقعد علي المرتبه وهو مميل وحاطط يديه علي وشه وانا بقيت واقف مش متجرء اكلمه وكل اللي قدرت اقوله
: انت زعلت ليه ماهو اكده ابوك
مردش عليه وبعد تردد مني قعدت جمبه وبصعوبه حطيت يدي علي كتفه وقتها اتعدل وبصلي ف نزلت يدي وقولت
_ متزعلش
بقا باصصلي شوية من غير كلام ف قومت من جمبه وقولت وأنا بتهرب من نظراته
: اقعد اهنه متطلعش وانت زعلان اكده ، اهو المفتاح
حطيت المفتاح علي الطربيزه وطلعت ولما وصلت المدخل شوفت البت دي واقفه اهناك وقلقها باين عليها وبتقول
_ ممكن تخليهم يسيبوني اروحله
بصتلها شويه وانا مستغرب كيه دي مخطوفه ف قولت
: تعالي هوديكي
_ شكرا
خدتها وصلتها اهناك واول ما هو شافها انا سيبتهم ومشيت
#وفاء
قلبي وجعني لما سمعت اللي حصل وشوفت شكله وهو طالع من عند ابوه مكسور وحزين ف روحت عنده ولما شافني وقف وهو بيتهرب مني ب عنيه ف قولت
: انا اسفه اني جيت بس...
سكت شويه وبعدين قولت
_ متزعلش هو يمكن متضايق من حاجه ... بس دلوقتي يهدي وهيتأسفلك "
مردش ف جيت قدامه وقولت وانا ببص لاثر الكرباج علي كُمه
: عورك؟! ممكن اشوف
مردش ف قربت منه ورفعت الكُم لغيت ما ظهر اثر الجلد وقتها حسيت قلبي هيخرج من مكانه الكرباج كان معلم بشكل واضح ف لمست مكانه بأيدي ورجعت بصتله وقولت
_ بتوجع؟!
بصلي من غير كلام وانا رجعت اشوف دراعه وحطيت ايدي عليه اتحسس مكان الجلد ولما رجعت ابصله عيني جت في عينه كان مركز معايا قوي ف حسيت بالتوتر وبسرعة نزلت ايدي وبعدت والتفيت عشان امشي وفجأه لقيته بيمسكني يرجعني ليه ويحضني قوي وانا حسيت نفسي شليت وبقيت واقفه مبعملش حاجة لا بحضنه ولا ببعده وفضل حضني كده شويه وبعدها بعد عني وبصلي شويه وهو قريب مني ولسه ايديه محاوطني ف قولت بتلعثم بعد ما بعدته عني
_ انت عملت ايه
حك ودنه وهو بيقول
: ايه اللي انا عملته
_ اللي عملته دلوقتي
: ايوه ايه اللي انا عملته دلوكتي
: انت! ، انت ازاي تحضني ، مين قالك تلمسني
قال بزهق
_ هترجعي تاني لسيره اياها وهرجع اقولك عيب وهتخليني افهمك غلط
: ايه؟!!! انت بتقول ايه ، انت حضنتني ودي مش اول مره
_ بردو هترجع تتكلم في الكلام ده ، عيب عليكي
: يا فندم انت اللي...
دار عنيه بزهق وقال
_ له مانتي متقوليش حضن وكلام قلت ادب وتجيبيها فيه ، عيب ها عيب انتي بت "
نزلت عنيه وقولت ببلاهه
: طيب
افتكرت ان هو اللي حضن ف رجعت بصتله و قولت
_ بس انت اللي حضنتني وانا بحاول اقولك ان ده ميصحش مش قصدي اتكلم في حاجات عيب والله
: وانا ايه عرفني انه مش قصدك انا ليه اللي بسمعه
_ اه صح ، اسفه
: ولا يهمك بس متكررهاش تاني
_ حاضر
: تحضري
قال كده ودار ضهره ليه وانا وقفت لدقيقه علي ما استوعبت اللي بيحصل ف وقفت قدامه لقيته بيضحك
_ ده انت بتستعبطني!!!
ضحك وهو بيقول
: ايوه شويه
_ اممم ممكن طيب ما تفكرش تحضني تاني ولا ايدك تلمسني ، لو سمحت يعني ده ان تكرمت
: متزعليش انا بس كنت متضايق شويه ف لقيتك قدامي
_ اه مش مشكله ، طيب انا همشي
: اها
مشيت لغيت الباب وانا مش قادره امنع ضحكتي لغيت كده ف وقفت شويه اضحك وانا بكتم صوتي بأيدي وبعد ما قدرت امسك نفسي بصتله لقيته مبتسم ف قولت
_ الغلط مش عليك الغلط عليه انا اللي عبيطه
قال بإبتسامة
: وده رايي انا كمان
_ كتر خيرك وربنا يسامحك انا ماشيه لحسن اتهزقت
قولت كده ومشيت وانا مش قادره اخفي ابتسامتي لغيت ما وصلت قريب المدخل ف رجعت ابص علي المكتب لقيته واقف هناك بيبصلي وقتها فضلت واقفه مكاني عيني عليه وقلبي بيدق بسرعه لغيت ما سمعت صوت الغفير ف رجعت كملت طريقي وطلعت فوق وانا ندمانه للمره العشره تقريبا وحاسه اني بكون ضعيفه قدامه
#بدر
لما لقيتها قدامي وجايه تطمن عليه بشكلها اللي بيخلي عقلي مبيبقاش فيه تماديت وحضنتها واتمنيت مطلعهاش من بين درعاتي وتفضل في حضني اكده علي طول ، لكن في الاخر فوقت لنفسي وبعدتها وعلشان منظري ميبقاش عفشه قدامها قلبت الموضوع ضدها وهي صدقت وسكتت وانا مقدرتش امنع نفسي من الضحك علي برأتها اللي بتظهر فجأه ، ولا امنع نفسي اقف ابصلها وهي بتبعد ، حقيقي مش بكون عارف نفسي ولا علي طبيعتي وانا امعاها فجأه بتحول من واحد جد وهيبه لطفل صغير قدامها بنسي نفسي لدرجة اني نسيت شبل وصدمته فيه اللي انا مش عارف كيه هوضحله قصدي بجوازه من ورد مش هقدر اقوله انه لازم يتجوزها علشان عبيده
#شبل
اكبر صدمه في حياتي خدتها النهارده لما حطيت كل ثقتي في بدر وهو جه وخذلني قدام ابوي اللي انا عارفه طالما قال حاجه لازم يعملها ، بس انا مكنتش هوافق علي كده وفورا بدأت احط هدومي وحاجتي في الشنطه ولما جيت اطلع لقيته قدامي واتنين من الغفر وراه وهو في ايده الكرباج وبيقولي
: علي فين
رجعت خطوه وقولت بتوتر
_ راجع الكليه
: له مهترجعش كليات
_ انا اتاخرت و محاضرات كتير راحت عليه
دخل عليه بالكرباج وقال
: قولت له لما تكتب علي بت عمك الاول
_ يابوي انا!!
قولت كده ف ضربني ضربه بالكرباج
: آآه يابوي!!!
_ كلمه كمان وهضرب فيك لصبح "
قولت وانا ببكي
: يابوي انا مش عايز اتجوز ورد ، انا عايز لـ....
مكملتش كلمتي ونزل فيه ضرب بالكرباج وانا اصرخ من الوجع لغيت ما جه عبيده وحاشه عني وقال
_ بزيادة يابوي ، سيبه الله يخليك
: مش هسيبه غير لما يعقل ويسترجل وقسما عظما لو ما عقلت وسمعت الكلام وشيلت البت دي من راسك لا اقتلك واقتلها... تجوز بت عمك فاهم ياد ولا اكمل عليك
قولت وانا ببكي
_ مش هـ....
حط عبيده ايده علي بوقي وقال
: هيتجوزها يابوي ، بس مش تشوفها يمكن هي متوافقش عليه
بعدت ايده وقولت
_ انا مش عايز اتجوزها
خدني بعيد شويه وقال
: اسكت!!! هي مش هتوافق
_ وافرض وافقت
: مش هتوافق ، قول طيب وخلاص
_طيب افرض وافقت!!!!! انا اعمل ايه
: انا هكلمها واخليها متوافقش
_ هنشوف
رجع لابوي وقال
: اهو موافق يابوي ، بس لازم نسأل البت عن رايها اكيد انت مش هتجوزهالوا غصب لو معوزاش
_ هتوافق بس انت اطلع منها
بصلي وقال
: وانت والله لا اربيك واعرفك كيه تسترجل يا بتاع الخدامه
قال كده وطلع وانا وقفت مكاني ابكي لغيت ما شوفت ليلي واقفه بره وبتبص عليه شويه وبعدين تمشي ، قد ايه حسيت نفسي اني عيل قدامها ومليش لازمه ومش عارف ازاي هحط عيني في عينها تاني.
وبعد شويه وعبيده واقف جمبي يحاول يهديني جه بدر ودخل عندي وانا لاول مره اكون متضايق منه كده مكنتش طايق اشوفه قدامي ولما جه كلمني زعقت فيه وقولت
: ملكش دعوه بيه تاني!!! انت من النهارده لا اخويا ولا اعرفك
_ اسمعني يا شبل انا....
: مش عايز اسمعك اطلع بره مفيش كلام بيني وبينك تاني ، انت السبب في كل اللي حصل ، انت السبب في ضربي ومنظري الزباله قدام الكل ... اطلع مش عاوزك هنا
بصو لبعض هو وعبيده وبعدين طلع وسابني
#ورد
كنت سامعه كل حاجه وانا في الاوضه ومطلعتش لغيت ما جت تماضر تقولي عبيده عاوزك بره ف مسحت دموعي وطلعت عنده ف قال
: عامله ايه دلوك
_ زينه
: متزعليش مني ، انا بس كنت متضايق شويه
_ مش زعلانه
: طيب انا عايز اتكلم امعاكي في حاجه
_ ايوه
: لما ابوي يسألك موافقه تجوزي شبل قولي مموافقاش من غير خوف هو مش هيغصبك
_ وايه عرفك اني مش هوافق
: لأن ، لأن انتي..... اقصد لأن شبل بيحب ليلي وعاوزها وانتي اكيد عرفتي اكده
_ اه صح
: طيب ايه ، هترفضيه؟!
_ ايوه هرفضه... داخله اشوف دعاء
: ورد استني
_ اييييه
: ايه انتي ، مالك هو انا زعلتك في حاجه
_ ايوه زعلتني لما زعقت فيه
: ازعق واديكي بالجزمه كمان ، ولا عاجبك منظر شبل وهو حاضنك
_ له ده انت شكلك عقلك ضرب انا ماشيه
: وقفي عندك انا لسه مخلصتش كلام
_ مفيش كلام
قولت اكده ورجعت الاوضه وبعد شويه بعتلي عمي ف روحت وانا مقرره هقول ايه وليه وعشان مين