رواية عذراء الرعد كامله بقلم بسمه ) جميع الفصول حتى الاخير الخاتمه

 

رواية ذئاب لا تعرف الحب الاسيره 

الفصل السابع

بقلم نجمه براقه

قولت متلعثمه وانا بحاول في عقلي اجمع حاجه اقولها بعد ما لقيت نفسي في ورطه كبيره بعد ما سمعني

: مـ،  مفيش حد  ،  ده ده  واحد بيجي الـ... 

 قامت تماضر وقالت مقاطعه حديتي 

- ايه يا شحاده مش تكح قبل ما تدخل  افرض البت كان معاها واحد 

:  تماضر!!!  

غمزتلي وهي بتعض علي  شفتها وقالت 

- اسكوتي  

بصلها بضيق من كلامها وقال 

:  امك بتناديكي روحي شوفيها 

- لسه جايه من عندها وكانت نايمه  

قرب منها بهدؤء و فجأه شد شعرها وهو لسه محافظ علي هدؤئه وقال وهي بتتوجع من شد شعرها 

:  انتي عارفه ان اكره ما عليه حد يعارضني  ، واكره حنجلت البنات  وخفت دمهم ،  قولتلك شوفي امك  

زقيت يده عنها وقولت وانا بقف بينهم 

- يدك!!!  انت فاكر نفسك امعلم علينا  لا يا حبيبي احنا ملناش معلمين  ،  يلا يابت 

بصتله بكره وقالت 

:  تتشل يدك 

مسكت يدها ومشيت بعد ما وقفت في وشه  وانا من جواي خايفه وقلقانه قوي من اللي ممكن يعملو فيه  لأني عرفاه شراني  ومش بيحب حد يعارضه او يقف في وشه  ،  وبعد ما تماضر هديت وبطلت شتيمه ودعاوي عليه   سابتني ومشت  وانا بقيت واقفه مكاني افكر كيه الدكتور قدر يهرب بعد اللي سمعه وبعد كلامه انه مش هيهرب مهما حصل  ده قالي انه مش هيسمحلهم يخلصو من رضوان علي حسابه هو وفاطمه..

بقيت افكر وافكر وانا بحاول اكدب اللي سمعته من تماضر  وبعدها ناويت اسمع بنفسي اللي بيتقال وقومت من مكاني قوام دخلت وسط النجع  و وقفت عند اول جمع لشوية بنات لقيتهم بيتحدتو في السيره دي وبيقولو نفس اللي قالت تماضر  ومش بس اكده دول قالوا   ان رضوان راقد في المستشفي  وعياله محدش بقا يشوفهم ومش قادرين يورو وشهم لناس  وده اللي زعلني و وجع قلبي  وبقيت اقول لنفسي كيه ده يحصل  ، كيه قدرو يهربو بعد تحذيري ليهم كيه مخافوش علي حد غير نفسهم ومهتموش باللي هيحصل لنجع بسبب عملتهم دي  ..

و قلبي وجعني قوي وانا ببص علي البنات وانا بتخيل ان لو مفيش رضوان حالهم هيبقي زي حالي وبذات لو شحاده قدر يعمل اللي في راسه.

  وبعد شويه وانا  علي الحال ده رجليه خدتني ناحية العيادة   وقفت قدامها شويه وانا نفسي يطلع اللي بيتقال كدب وفي وسط شرودي وتفكيري في اللي اتقال واللي هيحصل  لقيت يد بتلمسني  اتفزعت من مكاني وبصيت وراي لقيته عواد ف قولت وانا اخد نفسي 

- يا فندي حرام عليك في مره هتموتني بطريقتك دي  ،  مش تكح يابوي 

قالي بوش خالي من اي تعبير وكأن في حاجه مزعلاه 

:  بتعملي ايه اهنه  

- جايه اشوف الدكتور   

:  وتشوفيه ليه ده دكتور بهايم 

- ايوه اضحك يعني ولا ايه  ،  ما انا عارفه انه دكتور بهايم 

بصلي ومردش ف تجاهلت وجوده و رجعت ابص للعياده وقولت لنفسي بصوت مسموع 

- مش مصدقه 

:  مش مصدقه إيه  

انتبهتله تاني ف قولت وانا عيني علي العيادة 

- صح الدكتور هرب مع بت رضوان ولا الناس بتكدب؟! 

: ولو هرب معاها انتي ايه يشغلك 

رجعت ابصله وقولت 

- يعني ايه شاغلني  دي نصيبه  ولا انت غريب عن النجع ومش فاهم 

:  ايوه  انا غريب  ،  فهميني ينوبك ثواب 

- انا قولت اكده بردك  ، بس  اللي حصل ده نصيبه وحلت علي  النجع    ،  ورضوان وعياله مش هيقدرو يحكمو الناس تاني  

:  و انتي ايه مزعلك  هو انتي ليكي قرابه ب رضوان وعياله 

- له  انا غجريه  

:  طيب ومالك بتقوليها بزعل اكده  هو انتي زعلانه من كونك غجريه 

- له  زعلانه من كوني مليش حد يحميني  ...   انا ماشيه 

:  دقيقة  ...  يحميكي من ايه بالظبط 

وقفت وقولت 

- منك ومن اللي زيك  

:  ليه يعني مالنا احنا 

-  مالكم!!!   امال لو  مكنتش زبون وبتشوف اللي بيحصل معاي في الخيمه    كل واحد سكران بيجي يترمي عليه ومحدش بيقول غلط واللي معاي ويفرحو لأني اكده هربي زبون   ،  ياريتني كنت واحده من بنتت النجع يسري عليه اللي يسري عليهم  ،  بس خلاص دلوكيتي الرؤس هتتساوي  ،  وهتشوفو 

كنت همشي ولكن وقفني وهو بيقول 

- استني  عندك 

:  ايه 

- يعني ايه الرؤس تتساوي قصدك ان بنات النجع هيكونو زيك اي حد سكران يحسس علي جتتهم  حتي لو كان ابوهم  

: تقصد إيه  

قال بزعيق 

- اقصد ان عمر  رضوان وعياله ما هينتهو وهيفضلو كبارات واسياد و محافظين علي النجع وبناته وعمرهم ما هيكونو زيك انتي واللي معاكي  

: وانت ليه محموق اكده  ، انا بسألك قصدك ايه بكلمة حتي لو كان ابوهم  

دار وشه عني ومردش بس عرفت انه لاحظ تصرفات ابوي ف قولت بعد ما دموعي نزلت 

- تبقي خدت بالك  ،  بس  هو ميفرقش عنكم في حاجه  كلكم صنف واحد  ومتبقاش تتحمق قوي اكده وانت تقول زيكم  اهو اللي زينا دول انت وامثالك بيجو يترمو عند رجلينا علشان نبصلهم ونرضا عنهم

#عبيده 

قالتها بصوت مخنوق ولما بصيت عليها لقيت دموعها ماليه عنيها  ، وانا وقفت ابصلها و مكنتش عارف اتكلم ولا حتي  قدرت اقولها ان انا  ولد رضوان  وعمري ما روحت عندهم علشان  اشوف رقصها ولا  اترميت عليها زيهم ف سكت وهي مشت  وبعد ما بعدت قوي وانا تابعها بعنيه افكر فيها وفي كلامها اللي مش ماشي مع حياتها  رجعت السرايا ودخلت اوضتي قعدت اهناك هموم الدنيا علي دماغي  ومش طايق حتي الجلبيه اللي عليه  وفجأه جاني صوت دعاء وهي بتقولي 

:  مين دي اللي كنت واقف معاها بره  ،  وكنتو بتقولو ايه 

مهتمتش بحديتها ولا  طريقتها اللي  تفرس ولا رديت عليها بكلمه واحده وكأن كلامي خلص ولساني خرس عن الرد  ولو رديت كنت هرد بيدي بسبب طريقتها دي وبعد ما طال سكوتي وتجاهلي ليها   وقفت قدامي وقالت وهي حاطه يدها في نصها  

- انا بسألك مين دي يا عبيده!!!  ،  غجريه صح؟! ،  ايوه غجريه عرفتها من لبسها  ،  مرافق غجريه يا عبيده  ،  ناسي ابوك واختك اللي جابتلكم العار وحطت راسكم في  الطين ومرافق غجريه  

قالت اكده وانا مبقتش عارف بعمل ايه  ،  قومت ومسكت فيها ضرب بعزم ما فيه وشد في شعرها  وهي تصرخ بعلو صوتها لغيت ما دخلت شجر مرت ابوي وبعدتني عنها وقالت  

:  وه ياولدي وده وقته  ،  حرام عليك كانت هتموت في يدك  ،  متزعليش يابتي  

قالت دعاء  وهي بتمسح الدم من خشمها بقفا يدها   وكأن كل الضرب اللي خدته مأثرش فيها ولا خوفها  

- فداه يا مرت عمي  ،  فداك يا ابو عيالي  ،   لازم نستحملوه مهما  يعمل   ، الراجل مزنوق ومش عارف يعمل ايه  ،  وحقه هو بعد ما البت هربت مع الدكتور  الواحد بقا فيه عقل "

كلامها ومعايرتها  فورو دمي وخلوني عاوزة أقطعها تقطيع وارمي لديب في القفض  ولو مرت ابوي مبعدتنيش عنها مكنتش هتعيش دقيقة  تاني  ف قولت وانا بحاول اجيبها من رواها 

- عليه الطلاق لـ... 

قاطعتني مرت ابوي وقالت 

: اكتم!!!    جرا ايه مفيش احترام لوجودي  ،  مشي من اهنه  ،  وانتي لمي لسانك لقصهولك 

قولت وانا هنفجر من غيظي 

- ماشي يا مرت ابوي  ، بس   قسماً عظماً  لا اربيكي يا دعاء  اصبري بس افضالك وانا  هوريكي اللي  عمرك ما شوفتيه يابت المحروقين  

قولت اكده وطلعت وانا مش طايق خلقاتي ولا طايق حد في وشي  وقعدت في الجنينه جمب قفص الديب ابصله وهاين عليه اجيبها واحطها معاه ياكلوها قدامي  

ـــــــــــــــــــــــــــــــــــــ 

#ليلي

بعد ما شبل سابني وهو زعلان مكنتش عارفه اكلمه ولا  في  فرصه تجمعني بيه وحدنا لغيت ما سمعت صوت دعاء بتزعق مع عبيده  وبعدين بتصرخ وعبيده بيضرب فيها وقتها طلعت من اوضتي من اول الخناقه   ف لقيت شبل  بعد ما بدء عبيده يضرب فيها  طالع يشوف في ايه ولما شافني  وقف دقيقه يبصلي وعنيه مليان عتب وزعل مني  وبعدين بيسيبني ويدخل  اوضته  ومش عارفه كيه  قدرت ادخل وراه مستغله ان محدش شايفني ومستغله حبه ليه اللي هيخليه يسمعني وميزعلش مني كتير واول ما شافني داخله وراه بصلي وبص للباب وقال 

:  ايه ده انتي ازاي تدخلي كده ،  اطلعي قبل ما حد يجي ويشوفك 

قولتله وانا بتقدم نحيته 

- شبل اسمعني امانه  ،  انا مكنتش اقصد اداري عنك  بس انا خوفت وانت عارف ان اهنه مفيش حاجه اسمها حب  كيه كنت هقدر اقولك اختك بتحب الدكتور وبينهم كلام  

:  خوفتي مني انا وانتي عارفاني انا بفكر ازاي  

- ايوه يعني كنت هتعمل ايه  ،  أكيد مكنتش هتجوزهم 

:  ايوه مكنتش هجوزهم بس كنت هعرفها الخطر اللي ممكن يحصلها  ،  كنت هلحقها قبل ما تضيع نفسها  وتضيعنا معاها 

- انت صح  ،  بس والله خوفت يا شبل  انت عارف اكتر مني الدنيا اهنه عامله كيه والناس بيفكرو كيه 

بصلي وقال بعتب مغير الموضوع 

:  انتي مكنتيش خايفه تقوليلي  ،  انتي مكنتيش عاوزه  يكون بيني وبينك كلام   ،  كنتي بتبعدي عني 

- ايوه كنت ببعد عنك  ، وعاوزاك تنساني وتبطل تكلمني  ، وطلع عندي حق وانت شوفت بنفسك  ،  بقيتو انت وست فاطمه تقولو ان محدش هيمانع جوازنا لغيت ما شوفت بعينك اللي حصل وكلام الكبير  ،  اهنه مفيش مكان للحب  يا شبل وبذات لو كانت بت غفير وخدامه زي ما قالوا 

:  انا مليش دعوه بحد لو انتي كنتي فضلتي معايا مكنتش هحتاج رأيهم  كنت هتجوزك غصب عن الكل 

ضحكت بغلب من بين دموعي 

- هههههه ضحكتني والله  ،  غصب كيه وانت اللي اخترت تكمل تعليم في مصر علشان تبعد عن التحكمات دي  ،  انت هربت وسيبت النجع يا شبل 

:  انا مهربتش  !!! انا بعدت علشان كاره مش علشان خايف  وكنت هتجوزك برضاهم او غصب عنهم بس انتي اللي جيتي فجأه واتغيرتي ومبقتيش عاوزه تتعاملي معايا  

- وطلع عندي حق  ،  انا ايوه مش متعلمه بس عارفه الصح واللي ماشي في النجع  وعارفه قيمتي وسطكم  ، اتقالتلي كتير ياشبل  ،  انتي خدامه بت خدامه بت غفير  

:  وانا عمري ما شوفتك خدامه  انتي كنتي وهتفضلي حبيبتي وصحبتي اللي كبرت معاها 

- ايوه صح  ، بت الغفير حبيبة ولد الكبير  ... خلاص يا شبل ملهوش عازه الكلام ده  ،  انا كنت جايه اقولك كلمتين وقولتهم خلاص  

جيت امشي ف سبقني علي الباب و وقف قدامي يمنعني وهو بيبص لعنيه ويقول  

:  ليلي!  انا فاهمك وعارف ان اللي حصل جرحك بس صدقيني انا عاوزك ومش هسيبك مهما يقولو 

قولت وانا ببكي بعد ما افتكرت اللي حصل 

- مش هتقدر تعمل حاجه  ، انت وست فاطمه بس اللي مش شايفني خدامه بس كل الباقين شايفين اكده ولو اطربق السما علي الارض مش هيسمحو  

كملت وانا بفتكر اللي حصلي من صغري  في البيت ده 

:  من صغري وانا بيتقالي يابت الخدامه  ، روحي ياخدامه  ،  تعاله يا خدامه  ،  حتي ست فاطمه من غير ما تقصد كانت تقولهالي  ،  كانت تجبلي خلقها القديم وتقولي البسيه   ولما تعوزني ابيت معاها في اوضتها كنت انا انام تحت وهي علي السرير   ،  للحق هي في الاول كانت تقولي بأصرار تعالي  نامي امعاي  ، بس امي مرضتش وقالتلها المقامات محفوظة  مينفعش تنامي معاكي ياست فاطمه  وهي وافقت وبقيت عادتي انام في الأرض  زي الخدامه  ...  له وزي ليه ما انا خدامه صح  ،  كله قالهالي يا استاذ شبل حتي  هي  ،  متبقاش تزعل مني عاد لما احفظ المقامات  

- فاطمه عمرها ما فكرت كده  هي كانت بتعتبرك صحبتها وانتي اكتر واحده عارفه  

: ايوه انا عارفه انها كانت معتبراني صحبتها وعمري ما شكيت في حبها ليه  ،  كانت دائما بتهتم بيه وتهتم انها تعلمني وانا كمان اتأثرت بيها وبقيت اتكلم زيي زيها و محدش بيصدق اني متعلمتش علشان هي علمتني كيه اتكلم زي المتعلمين  ،  انا بحب ست فاطمه ومكنش في أقرب منها ليه  ، بس بردك مش ناسيه اني مقدرش اقول اسمها من غير ست  

#شبل 

حسيت من كلامها ان الموضوع ده تاعبها ومأثر فيها قوي  كانت بتتكلم وهي مش قادره تبطّل بكا  وصعبت عليه وقلبي رق لحالها زي ما بيحصل دائما  ، عمري ما كنت احب اشوفها زعلانه وفي كل مره كان حد بيزعلها انا كنت بحاول ارضيها  بحاجه بتحبها ، والمره دي ولاول مره  لقيت نفسي بقرب منها واضمها لحضني  مع ان دي فضيحه لو حد شافها بس مقدرتش اشوفها زعلانه وبتبكي كده  ،  وهي كمان حزنها خلاها تنسا او متخدش بالها وتضمني وتبكي  وبعد شويه هديت وبطلت بكا بس فضلت مكمله ومريحه رأسها علي كتفي ف سيبتها ونسيت اللي احنا فيه واترسمت ابتسامه علي وشي قبل ما تنتفض فجأه وتبعد عني وتقف بعيد شويه تلملم نفسها وتقول 

- ايه ده!!  يا دي الفضايح  ،  ليه اكده  مين قالك تقربلي 

قولت وانا لسه ابتسامتي علي وشي 

: محدش قالي  ، مقدرتش اشوفك زعلانه وامنع رغبتي في ضمك لحضني  

قالت بارتباك 

- انت قليل الادب  وانا هقول لابوي 

جت تمشي ف وقفت قدامها ومنعتها وقولت وانا ببص لعنيها 

: هتقولوله إيه اعقلي  ،  بحبك يا ليلي  ،  وعارف انك بتحبيني

هدي توترها وفضلت بصالي ف كملت وقولت 

- خليكي جمبي لغيت ما المشكله دي تتحل و اوعدك هعمل كل حاجه عشان نكون مع بعض  

- وافرض مقدرتش 

:   اوعدك هقدر

بعدت عني وقالت 

-طيب لما تقدر نبقا نتكلم  ،  عديني 

: لا  مش هتعدي غير لما ترجعي زي الاول  وتقولي انك عاوزاني  

- انت عارف اني عاوزاك  

:   انا اقصد انك هتفضلي معايا وتبطلي تبعدي عني كل  ما اقربلك 

- مش وقته الكلام ده  ،  احنا نسينا ست فاطمه وبنتكلم في ايه

فوقتني من احلامي الورديه علي واقع متهالك ف قولت بحيره 

:  عندك حق  ،  فاطمه،  الله واعلم بيها حصلها إيه  ولا هي بتعمل ايه دلوقتي 

بصتلي وقالت بإبتسامة 

- انا مش راضيه عن اللي حصل وزعلانه انها سابتنا  بس اكيد هي دلوك مرتاحه  بعد ما بقت مع اللي بتحبه 

:  هضربك علي وشك  ،  ايه مرتاحه دي  متنسيش انه غريب عنها  

- ايوه بس لو صح راحت امعاه هيتجوزو  هي كانت بتحبه قوي وهو كمان 

: انا مش عارف ايه اللي حصل معاها بس لو طلعت هربت معاه بجد انا هزعل قوي  ،  مينفعش الهروب  كده مش بنتمرد علي عادات غلط مش عاوزينها  ، كده تبقي هي اللي بتغلط ومن حقهم يعملوا فيها اللي عاوزينه 

- الله واعلم بيها  وباللي ممكن يكون حصل امعاها  ، لكن انا عارفه ان ست فاطمه مش بتغلط   ،  طيب انت عارف انها  كانت قبلها بيوم خايفه ومرعوبه ان حد يعرف   ورغم اكده مفكرتش تهرب  لغيت ما وصلها منه رساله  في نفس اليوم عاد  ،  شكله اكده قدر يقنعها 

:  رساله إيه؟!  مفيش رسايل منه في نفس اليوم  

- له فيه  هو بعتلها رساله 

: يعني ايه؟! معقول تكون حذفتها وسابت الباقي  ،  فيها ايه الرساله دي علشان تحذفها

- له مش رساله علي التلفون  ،  هو كتبلها ورقه 

:    ليه ورقه مبعتلهاش علي التليفون ليه 

- علشان كانت عملالوه حظر 

لما قالت كده روحت ناحية الطربيزه مسكت تليفونها اللي مخليه معايا وفتحت الشات علشان اتاكد ف لقيت فعلاً عملالوه بلوك ف قولت 

:  ايوه فعلاً  ،  يعني هي مكنتش عاوزه تهرب  ،  بس ايه اللي اتقال في الرساله خلاها تروحلوا  ،   في حاجه مش مفهومه   "

- هتكون ايه  الحاجه  دي  اكيد  رساله  زي باقي الرسايل  بيقولها فيها اللي مقدرش يقوله بسبب الحظر 

: هيكون قالها ايه اكتر من الرساله دي اللي بيقولها فيها ان نسيبه هيحميهم  علشان توافق تهرب  

- معرفش 

: طيب  انتي تعرفي خبت الرساله دي فين او ممكن تكون عملت فيها ايه 

- لا  وقتها قالتلي اطلع اراقب لو في حد جاي اقولها 

:  ومقالتلكش فيها ايه 

- له ملحقتش تقولي  وقتها انا سيبتها وروحت اشوف ابوي وبعدين شوفتها طالعه من البيت  

:  انا لازم اعرف فين الرساله دي طيب  روحي اقلبي الاوضه عليها لغيت ما تلقيها  ،  اكيد فيها حاجه مهمه  

- هيكون فيها ايه يعني  اكيد زي باقي الرسايل  

:  لأ  اللي يخليها تمشي فجأه كده اكيد حاجه كبيره  

- يمكن  ،  طيب انا هشوفها 

:  تمام يلا 

- ماشي بس شوف الطريق 

:  طيب  

طلعت وبصيت في المكان ملقتش حد ف قولتلها تخرج وعدت علي خير الحمدلله ومحدش شافها وانا فضلت قاعد في اوضتي مشغول بالرساله دي وبللي ممكن  يكون  فيها  وقررت مجبش سيرتها لحد لغيت ما اعرف فيها ايه  وبعد شويه مسكت تليفونها اللي احتفظت بيه معايا وبقيت اقلب في باقي الرسايل يمكن الاقي حاجه  

ـــــــــــــــــــــــــــــــــــــ 

#فهيم 

قالي شحاده  امشي وراها واشوفها رايحة فين ف لقيتها رايحة تاني عند عيادة الدكتور وهناك قابلت عبيده و وقفت تحكي معاه وكان واضح انها تعرفه قبل كده  ولما قولت لشحاده  قام من مكانه فجأه وقالي 

:  قولت عبيده؟!  عبيده ولد رضوان 

- ايوه  وكانت بتتكلم معاه كانها تعرفه قبل كده 

:  ازاي يعني تعرفه  ،  مسمعتش قالوا ايه 

- لا كنت بعيد 

:  هيكون يعرفها منين  وايه الكلام اللي بينهم 

- معرفش  

:  لا لازم نعرف  انت بتقول وقف يتكلم معاها وشكله يعرفها   لازم نعرف في ايه  ..  ناديلي روايح قوام 

- حاضر  

روحت ناديتلوه روايح ورجعت معاها ومن اول ما دخلت استقبلها بالاسئله 

:  ورد تعرف عبيده منين  ومن امتي 

- عبيده مين  

:  عبيده ابن رضوان العربي  هيكون مين يعني 

- يانصيبتي  ،  تعرف عبيده ازاي ده ومن امتي 

:  بتسأليني انا 

- انا اول مره اسمع منك دلوقتي 

:  طيب اسمعي  تروحي تسأليها براحه  متخلهاش تشك في حاجه  

- طيب طيب  

مشت روايح وانا وقفت جمبه اسأله في ايه وانا مش فاهم ماله ف قالي اللي اول مره اعرفه ومخطرش علي بالي  

:  ورد تبقا بت اخو رضوان  

- ايه!!!  ورد بت متولي 

- ايوه ورد بت متولي 

- ازاي ده 

:  يوم الحريقه امها جابتها ورجعت والناس افتكروها اتحرقت معاهم 

- ايوووه  ،  معقول  ،  طيب ومرجعتهاش ليه يا معلم 

:  انا قولتلها مترجعهاش  ،  كنت فاكر اني هحتاجها 

لمعت في  راسي فكره وقولت 

- وكنت فاكر ليه ما احنا ممكن نستغل الموضوع ده  

:  نستغلو ازاي يعني 

- نطلب منهم فلوس ونرجعهالهم 

:  نعمل ايه ياخويا! ،  انت فاكر ان لو رضوان عرف هيسيبنا في النجع ده ممكن يقتلنا  ،  انا بحذرك ان حد يعرف 

قولت حاضر بس مقدرتش اشيل الموضوع من بالي وبقيت افكر فيه كتير قوي 

ـــــــــــــــــــــــــــــــــــــ 

#ورد 

جاتني امي وانا قاعدة قدام المرايا في الخيمه بحط زينتي و وقفت ورايا وقالتلي وهي بتبص لانعكاسي في المرايا 

:  تعرفي منين عبيده ولد رضوان 

- مين؟!  

:  عبيده 

بصتلها وقولت 

- عبيده مين  ولا عمري شوفته 

:  ازاي يعني مشفتهوش امال بيقولو كنتي واقفه معاه ليه 

- معرفش يمكن قابلته مره بس انا معرفهوش  وانا هعرف كل اللي بيجو يعني 

:  بيقولو انك شوفتيه عند بيتهم متكدبيش 

- بيتهم؟!  بيت مين  ،  بتتكلمي عن مين  

:  عبيده ولد رضوان العربي  بطلي كدب وقولي تعرفيه منين 

لما قالت اني شوفته عند بيته افتكرت عواد  وتخيلت لدقيقه انه يكون هو بس رجعت وقولت لنفسي وهو هيكدب ليه  وكيه ولد رضوان بهيبته وجبروته اللي بسمع عنها هيهتم أنه يكدب عليه  ،  ف  استبعدته ورجعت  قولت ل امي 

:  يامه قولتلك معرفهوش سيبيني في حالي خليني اخلص قبل ما الناس تتلم 

ـــــــــــــــــــــــــــــــــــــ 

#فهيم 

رجعت من عندها تقول لشحاده 

- سألتها قالت انها متعرفهوش

:  ازاي يعني  ،  ياد انت مش قولت قابلها 

- اه والله يامعلم انا شوفت بعيني 

شرد بتفكيره وقال 

:  تكون عارفه هي مين  ولا بتحذره مننا 

بصلنا وقال 

- اسمعو  تركزو معاها كويس  ولو حصل واتقابلوا تاني  عرفوني 

:  هتعمل ايه 

- معرفش لسه بس اكيد في حاجه هتتعمل 

ـــــــــــــــــــــــــــــــــــــ 

#بدر 

روحت  بيت الدكتور اللي في مصر بعد ما خدت عنوانه من الراجل اللي عرفني عليه ولكن  لقيته مقفول ف رجعت  اتصل بالراجل  وسألته عن اخته واذا ليه قرايب ولا لا قالي انه يعرف عنوان ابوه بس هو مش عايش معاه ف خدت العنوان ورحت احتمال يعرف عنه حاجه واقدر الاقيه  ولما روحت استغرب دخلتنا عليه واستغربنا احنا شخصياً ولكن استضافنا وبعد ما قعدنا  سألته عنه قالي انه ميعرفش عنه حاجه ومعتبره ميت ف قولت 

:  كيه يعني وبتك بتكلمه طول الوقت 

- بت مين يا حضرت انا معنديش بنات 

:  امال وفاء دي بت مين مش اخته ولا تكون واحده مرافقها 

- وفاء؟!  ااه  لا دي اخته من امه مش بنتي 

:  طيب ودي نلاقيها فين 

- هو في ايه يا حضرت  بتسألو عنهم ليه 

:  بينا حسابات عايز اخلصها امعاه بس اديني عنوان اخته دي لو سمحت 

- انا مبتعملش مع الناس دي 

:  ماشي بس يمكن تعرف عنوانهم  ،  لو سمحت محتاجه ضروري 

فضل ساكت شويه وبعدين قالي طيب  واداني العنوان ف روحت انا  وجلال ولما وصلت هناك لقيت الباب مفتوح وفي ناس كتير هناك ف سألت واحده كانت معديه 

- لو سمحتي! 

انتبهتلي وجت نحيتي وقالت وهي بتبصلنا انا وجلال باستغراب 

:  ايوه يا فندم مين حضراتكم 

- انا اكون صاحب بيجاد اخو الانسه وفاء  ،  مجاش اهنه؟! 

: لا هو مرجعش لسه من السفر 

- طيب  ممكن اقابل اخته 

: لا والله   هي دلوقتي راحت للكوافير   ،  تحب نبلغها بحاجه لما ترجع 

- هو النهارده الفرح ولا بكره 

:  لا بكره  ان شاءلله 

- طيب ممكن تديني عنوان الكوافير ده 

:  هو في ايه   

- لا مفيش كنت عاوزها في حاجه بس 

:  الحقيقه يا فندم مش هقدر اديك العنوان بس انا ممكن اكلمها واقولها 

- لا ملهوش لزوم انا هاجي تاني  

:  ماشي يافندم 

سبتها ورجعت الفندق وقعدت هناك انا وجلال وطول الوقت مش عارف اعمل ايه   ، واذا هعرف لو  كانت هتكدب عليه لو سألتها عليه ولا لا  بس اللي كنت عارفة اني مش هرجع قبل ما اوصله   وبعد ليله طويله عدت في التفكير خدت قراري اللي مفيش منه رجعه 

ـــــــــــــــــــــــــــــــــــــ 

#وفاء 

رجعت من الكوافير متأخر وطول ما انا هناك وانا بتصل ب بيجاد لكن تليفونه كان لسه مقفول وبعد ما سلمت علي الضيوف اللي هما اساساً قرايبي دخلت اوضتي ورجعت اتصل بيه ف دخلت ورايا كاريمان بنت عمتي وبعد ما تعليقات كتير عن الفرح افتكرت حاجه ف قالتلي  

:  اه صحيح كنت هنسا  ،  في اتنين صعايده جم يسألوا عليكي  

- صعايده بتسأل عليه انا  ،  مين دول 

:  اللي كلمني قال انه صاحبه 

قومت من مكاني اقول بقلق 

- يكون بيجاد حصله حاجه  ،  طيب مسابوش معاكي عنوان ولا رقم تليفون 

:  لا مش باين انه يعرف اذا  بيجاد حصله  حاجه ولا لا  لأنه سأله عنه هو كمان وقال انه هيجي تاني " 

كلامها خلاني افضل قاعده علي اعصابي ومش مستنيه الشخص ده يجي تاني عشان اعرف مين دول وفي اخبار عن بيجاد ولا لا  

ـــــــــــــــــــــــــــــــــــــ 

#ليلي 

وانا بقلب اوضة ست فاطمه رُكن رُكن حتي خلقاتها فتشتهم بالواحده لقيت دعاء داخل عليه و واقفه عند الباب تقولي 

:  بتسرقي ايه يا حراميه  يابت الحراميه 

سبت اللي في يدي بعد ما اتوترت وقولت 

-  انا كنت بشوف الخلق النضيف من الظُبط علشان نغسل بكرة   وتعالي شوفي لو حاجه ناقصه 

: ايوه لازم تقولي اكده  ، وانتي عارفه ان الكل هيصدقك بس مش عليه يابت الخدامه  وحيات امك لا اخليهم يرموكي بطول دراعهم من البيت لما يعرفو حقيقتك  ،  فكراني زيهم ياك مصدقه دحلبتك وطيبتك 

طريقتها كانت بتقول مش هتجيبها لبر ف قررت المره دي اقف ضدها و اوقفها عند حدها ف وقفت قدامها وقولت بهدؤء علشان تعرف اني مش خايفه منها وقولت 

- طيب ما اديكي عارفه اني بدحلب وعفشه  وبوشين وفيه كل العبر  مخيفاش علي نفسك مني ليه عاد 

:  ايوه اكده تعاليلي دوغري بلاش شويه المسكنه اللي بتعمليهم قدامهم  ،  باني علي حقيقتك 

ابتسمت قصدي استفزازها وقولت 

- صعبانه عليه قوووي لاقيه الكل بيكرهك ومحدش طايقك ف هتطقي بسببي لانك عارفه اني محبوبه  ومكمله بس انتي اللي شكلك مش هتكملي كتير بسبب طريقتك دي  ، تحبي اعلمك شوية دحلبه علشان تكملي بدل ما جوزك قرب يكرهك وهيطلقك  ومرافق الغجريه عليكي  هههههه  مش غجريه بردك تؤتؤ والله صعبتي عليه  يا غلبانه "

دمها فار مني وكانت هتمسك فيه وتضربني بس انا جبت اخري منها وناويت اعلمها الادب ف مسكت يدها وبيدي التانيه مسكت شعرها وجبتها علي الارض ونزلت فيها ضرب يوجع ميعلمش  وانا بصرخ واقول الحقوني ولما سمعت اصواتهم اتقلبت تحتها ولما جم شافوها هي اللي ماسكه فيه  ومنهم جوزها اللي جه نحيتها وشدها بغيظ وهي بقت واقفه مصدومه مش عارفه تقول ايه ولا مصدقه اللي انا عملته ف لقيت شبل داخل وسطهم يمسك يدي ويرفعني ويرجعني ورا ضهره ويقول بغيظ 

- انتي ايه!!!  عملتلك ايه البنت الغلبانه دي علشان كل شويه تهنيها وتضربيها 

بصلها عبيده وهي بتحاول تتكلم وقال وكرهه ليها باين في عنيه

:  متزعلش نفسك ماهي اللي تشمت في ناسها وتفرح في نصايبهم تعمل اكتر من اكده  ،  امشي قدامي  

قالت وهي تصك علي اسنانها من الغيظ 

- دي كدابه  هي اللي ضربتني   والله هي اللي ضربتني  

قالت شجر

:  حرام عليكي يابتي عملتلك ايه ليلي علشان تعامليها اكده  

قولت وانا بتصنع البكا 

- يا حجه لو انا مضيقاكم انا همشي من اهنه 

قال شبل بعد ما بصلي 

:  مش هتمشي  

بصلهم وقال 

- انا هتجوز ليلي  ،  والكل يحترمها لانها هتكون مراتي 

الكل بصوله بصدمه علشان يقول عبيده 

:  تجوزها!!  واختك اللي طفشت مع الدكتور  وعارتنا  هتسيب كل ده وتجوز 

- ياخوي انا مقولتش اني هتجوز دلوك انا بس بنبه علشان محدش يغلط في ليلي  واقصد بكلامي مراتك اللي مش بتبطل تضايقها "

حاولت تهجم عليه وهو بتقول بغيظ 

:  يا حربايه  ولعتيها وخلتيهم يصدقو  ،  هقتلك وسعوووو!!! 

مسك عبيده دراعها وضربها بالقلم وبعدين شدها وراه وهي بتصرخ وتحلف لا تقتلني 

وبعدها وقف قدامي شبل يطمن عليه ويقول 

- وجعتك 

:  له انا زينه 

قالت شجر

- متزعليش يابتي  وهي ربنا يهديها 

:  تعيشي يا حجه  انا هروح اشوف امي 

سبتهم ومشيت وانا من جواي طايره من الفرح اني قدرت اخلص منها اللي عملته فيه ومقدرتش تثبت عليه حاجه وده هيكون التعامل معاه من دلوك 

#شبل 

قولت هتجوزها وانا مش عارف ابوي هيقول ايه  بس مكنتش هتراجع حتي لو هيتبرا مني  وبعد ما اتفضت الخناقه طلعت علشان اروح لابوي المستشفي ف لقيت عبيده طالع وهو مش شايف قدامه ف وقفته وقولت 

- مالك استهدي بالله 

:  بعد عني ياشبل 

- طيب اهدا بس  ، اللي حصل حصل متزعلش نفسك 

:  مزعلش نفسي كيه وانا متجوز واحد بتعايرني باختي اللي هي بت عمها  وجايه تردح مع البت في اللي احنا فيه ده  ،  والله لولا الحاله اللي احنا فيها لا كنت قتلتها او طلقتها 

- ربنا يهديها يا عبيده  دلوك تعقل 

:  تعقل؟!  دي تعقل دي  ،  بس الغلط مني انا اللي اتجوزتها 

- نصيب ياخوي معلش استحملها علشان عيالك 

:  ربنا ياخدها وما تلحق تربيهم 

- ربنا يهديها متزعلش نفسك  ،  انا رايح لابوي تروح معاي 

:  ايوه  ،  كلمت بدر؟! 

- كلمته وسالته عمل ايه وناوي علي ايه 

:  قالي مشغول دلوقتي  وقفل معايا  ،  انا خايف يعمل حاجه تضره 

- هيقتله هناك يعني  ، طيب والله يبقا ولد ابوه وكبير صح

:  ايوه  بس بردو هيوقع نفسه في مشكله  ده انا عرفت ان قريبه لواء 

- ان شاءلله يكون رئيس دوله  هيموت يعني هيموت 

:  ان شاءلله ربنا يخلف ظننا ومتطلعش هربت  

- يااااابوي متخلنيش اشرك خلقاتي  انا حامل نفسي بالعافيه  ، يعني ايه متطلعش هربت هتكون راحت فين فهمني 

:  معرفش  ياخوي 

- تبقا تسكت  متجلطنيش بكلامك ده  "

مردتش عليه ومشينا علي طول وروحنا لابوي لقيناه نايم ومفتح عنيه وسبحان الله  كل قوته وجبروته اتحولو لعجز وكسره  وحتي الكلام مش قادر يتكلمه ولما نطق اخيرا قال حاجه واحده 

:  لقتوها 

قال عبيده 

- له  ،  بس بدر سافر ومش هيرجع من غيرها 

قال 

:  عاوزهم عايشين  

قولت 

- متشغلش نفسك يابوي  لو في جديد هنقولك 

رجع لسكوته تاني وبعد وقت واحنا قاعدين جمبه جه الدكتور وكشف عليه ف سألته 

:  يقدر يخرج يا دكتور 

- ايوه تقدرو تخدوه معاكم بس تبعدوه عن اي انفعال او زعل  ويرتاح ميعملش اي مجهود "

بعد ما كتبله علي ادويه خدناه ورجعنا البيت ودخل اوضته وبعد ما الكل اتجمع حوليه وحاولو يتكلموا معاه  مردش وفضل ساكت  

ـــــــــــــــــــــــــــــــــــــ 

اليوم التالي 

#وفاء 

بتعدي الساعات وانا قلقي بيزيد علي بيجاد اللي مفيش اخبار عنه  ومرعوبه اني اسمع خبر عنه مش كويس  وفي وقت كنت في اوضتي مستنيه الميكب ارتيست اتصل بيه حامد وكأني كنت مستنيه حد يكلمني عشان أبكي وقولت 

- بيجاد لسه مظهرش انا خايفه عليه  ، ونبي اتصرف كلم حد يعرف يوصلنا ليه 

:  لسه متصلش ولا جه 

- مفيش اي اخبار عنه  ، مفيش غير اتنين صعايده يعرفوه جم سالو عليه وانا مش موجوده  وبقول يمكن من طرفه بس حتي دول معرفش عنهم حاجه  

:  مين دول يعني  ويسالو عنك ليه 

- ما انا بقولك يمكن من طرفه 

:  طيب مش عاوزك تقلقي انا هكلم حد يجبلنا اخباره المهم انتي اهدي وبطلي عياط و قلق 

- مش قادره  ، انا خايفه عليه قوي 

:  طيب اقفلي هعمل اتصالاتي واكلمك 

- بسرعه ونبي يا حامد 

:  حاضر  خمسه وهكلمك 

قفل معايا  وبعد شويه جت الميكاب ارتيست وقالت هنبدء قولتلها مش دلوقتي ف بقت تقول عشان نلحق وتحكي كتير ف قولت طيب  ولبست الفستان وقعدت قدامها ومجرد ما خلصت تنضيف البشرة جت كاريمان تقولي الاتنين اللي امبارح واقفين بره 

ف بعدت الست عني وطلعت اجري ولحسن حظي ان بابا مكنش قدامي والباقين مشغولين بالرقص والاغاني ونزلت جري لغيت ما وصلت خارج العماره ولما وصلت شوفت اتنين و واضح ان واحد منهم رئيس التاني وده اللي قرب مني وقال 

:  انتي وفاء  

                      الفصل الثامن من هنا 

                     

لقراءة باقي الفصول من هنا

تعديل المقال