رواية الزهرة المفترسة الفصل الحادي والثاني والخمسون والاخير بقلم ديدي
علم لطفي ان سامي يبحث عن شوقي بعد
معرفته بأنه هو من قتل نور..وخاف كثيرا ان علموا انه
يساعده فسوف يقتلونه لا محاله.. وخاصة
بعدما علموا بما فعلوه بمازن..لذلك قرر..
لطفي بخوف:سامي بيه..انا..
سامي بملل:اخلص في يوم
اهلك يالطفي..انا مش فاضيلك..
لطفي بخوف:ياباشا انا كنت جاي علشان
اقولك علي حاجة..بس الاول تديني الامان..
سامي بحدة:ماتخلص..انت هتقعد
تغني عليا..قول وانا هديك الامان..
لطفي وهو يبتلع ريقه:انا..انا عرفت انك بتدور علي شوقي..
لينتفض سامي ويمسك بلطفي مكملا بعصبية:انت عارف فين..انطق..
لطفي برعب:ايوة ياباشا..بس انت وعدتني تديني الامان..
انا ساعدته في الاول اه..لكن بعد ماعرفت باللي
عمله..وانكم عايزينه جيت اقولكم علي مكانه..
سامي بغضب:فينه..قولي..
لطفي بتعلثم:هو في(....) قاعد هناك..انا مليش ذنب ياسامي بيه..
سامي: خلاص..مادام قولت عليه يبقي سماح..
غور من هنا..ولرجاله بلهجة آمرة..هاتولي شوقي بسرعة..
ليذهب رجاله الي المكان المتواجد به شوقي ويحضروه..
>>>>>>>>>>>>>>>>>>>>>>>>>>>>>
وذهب الي بيت ممدوح..
ممدوح: ازيك ياعمي..عامل ايه.. خير فيه حاجة..
صفاء بلهفة: ايه ياعمي.. مالك.. لين عملت
حاجة..سمعت انها اتجننت..هتوديها السرايا امته..
كاظم بغضب: سرايا لما تلمك..لا ياختي لين وهشام
الحمد الله بخير.. انا جاي علشان اسحب منكم الارض بتاعتي..
ممدوح بصدمة: ايه..ليه..
صفاء وهي تضرب علي صدرها: يالهوووي..ليه..
وبفرحة.. ايه هشام طلق لين خلاص..
طيب يبقي هي السبب احنا مالنا..
كاظم وهو يجذ علي اسنانه: اهمدي يابت ال...
هشام عمره ماهيسيب لين.. وموتي بغيظك ياصفاء.
.لين حامل ياختي..
ممدوح: طب امال عايز ايه..هتاخد الارض ليه..
كاظم: علشان ماتستهلوش مليم منه.. انا كنت
بديكم علشان هشام..وهو مش عايز.. خلصنا..
صفاء بغل: اكيد لعبت في مخه..عقربه.. وبتوعد..
بس مش هسبها..انا هسقطها بإيدي..واموتها وارتاح منها..
ليقترب منها كاظم بعيون كالجمر كالنسر المنقض علي فريسته:
بتقولي ايه يابت ال... طب قربي منها كدة.. ده انا امحيكي..
وعارفة بقي انتي هتتصلي بهشام وتباركي للين..والوقتي..
صفاء: استحاله..
كاظم لممدوح: عندك جاز جوه..
ممدوح بتعجب: ليه ياعمي..
كاظم بتوعد: علشان اولع في مراتك..
صفاء برعب لانها تعلم غضب كاظم: خلاص هعمل اللي انت عايزه..
كاظم بقرف: غوري جاتك داهية وانا مش عايزك
تتكلمي اصلا معاهم.. ولممدوح بلهجة آمرة..الارض
تتسلم بكرة..وكفايه عليك اللي معاك..مفهوم..
ممدوح بتوتر: مفهوم ياعمي مفهوم..
ويتركهم ويرحل وهو يتمتم بقرف عيله هم.. علي رأي
لين مش عارف كنت عايز احافظ عليكم علي ايه.. جاتكم البلاوي..
>>>>>>>>>>>>>>>>>>>>>>>>>>>>>
وجد سامي شوقي بعد ان كان فارا..من شهور..
واتصل بهشام الذي اسرع بإخبار لين..وذهبا سويا
الي سامي.. وعندما رأته وتذكرت الفيديو وهو يقتل نور..
تحولت عيناها الي جمرة حمراء تشع غضبا..
وانقضت عليه وابعدها عنه هشام..
لين بغضب وعصبية وصدرها يعلو ويهبط:
سيبني.. سيبني اموته انا هاكله بسناني..
هشام بحدة: اهدي شويه..
لين بعصبية: ابعد عني.. خليني اخلص عليه..
هشام بعصبية: قولتلك اهدي.. يجرالك حاجة..
لين بغضب: اهدي ازاي.. انا هقتله زي ماقتل نور..
هشام بنفاذ صبر: ارحمي اللي خلفوني.. اهدي شويه
هيجرالك حاجة انتي واللي في بطنك..اطلعي برا يالين..
لين بغضب وعصبية :انت بتستهبل بعد مالقيته..
تقولي اطلعي برا..وهي تدفعه بغضب..
وسع من سكتي خليني اخلص عليه..
هشام وقد فاض به الكيل يحملها
ويخرج من الغرفة وسط سباب وهياج لين..
لين بهياج: ابعد عني ياابن... سيبني انا هقتله..
ليمسكها هشام وبعيون غاضبه وصوت جهوري:
اخرسي بقي.. انا وعدتك هنلاقيه بس مش هموته الوقتي..
لين بعصبية: امال هتسيبه انت اتهبلت..
هشام بصوت هادئ: لأ بس هعمل فيه اللي اكتر من الموت..
لين بترقب: يعني ايه..
هشام بشر: يعني هخليه يترحم علي نفسه يالين..
لين بعدم فهم: يعني هتعمل ايه..
هشام بإبتسامه شيطانية: زي ماكان عايز يعتدي علي نور وقتلها ..
هخليه يتحسر علي نفسه وهشويه حي.. خليكي انتي هنا..
وبتحذير حسك عينك تدخلي فاهمة.. واهدي واقعدي..
لتجلس لين بغضب وهي تهز ساقيها بعصبية..
وبعد دقائق تسمع صراخ شوقي وهو يتوسل الي
هشام الا يفعل ذلك.. ولكن صوت هشام..
هشام بغضب: انت يابن ال....كنت عايز تعتدي
علي نور وقتلتها.. وبعيون مشتعلة.. وخليت
لين هتتجنن وعايزني اعتقك..لاااا..انت
اللي لعبت معايا يبقي اتحمل اللي يحصل..
ولرجال سامي بلهجة آمرة يلا خلصوا..
ليصرخ شوقي بشدة من احتراقه من ماء النار..وبعد قليل يخرج هشام..
هشام وبهدوء: يلا يالين..
لين بغضب: ايه انت هتسيبه ومش هتقتله..
هشام بإبتسامة جانبية: اصبري.. هقتله بس لما يتحسر
علي نفسه شويه.. ده اكبر عقاب ليه.. الموت راحة ليه..
ويكمل بتنهيدة...لين احنا كدة خلصنا منهم.. ارتاحي بقي..
لين بحزن ودموع: وفكرك يعني.. ده طفي ناري علي موتها..
ليحتضنها هشام: لما تشوفي نور الصغيرة
وتشيليها بين ايديكي هتبرد شويه..
لين بغيظ: ماهو طلع ولد ياهشام..
هشام بضحكة غامزا: وماله المرادي ولد.. المرة
اللي جايه بنت يالين.. واللي بعدها واللي بعدها..
لين بحنق: انت هتسوق فيها.. انت عارف انا عايزة عيل ليه..
هشام وهو يضع اصابعه علي فم لين متوسلا: ابوس ايدك كفاية..
انا تعبت من كتر الخناق والكدب اني بكرهك ومش بحبك..
يالين انا بعشقك حرام عليكي.. امتي هتحسي بيا..
لين بحزن: انت عارف يا هشام اني...
هشام بأسي: عارف انك مش بتثقي في حد..
بس سيبيني اثبتلك اني بحبك وهخليكي تعيشي
مبسوطة واعوضك عن السنين اللي فاتت..
لين: موعدكش ياهشام انا لين المغربي وعمري ماهتغير..
هشام بضحكة: عارف ولسانك الزفر عمره ماهينضف..
بس وحياه نور اللي هنجيبها بعد الحلو ده.. لهعوضك
عن العذاب اللي شفتيه وهفضل احبك واحميكي حتي لو محبتنيش..
لين بتزمر: ماتخلص بقي انت هتفضل
تتنحنح كدة كتير انا مبحبش كدة..
هشام بضحكة: يلا يابنت المغربي..
>>>>>>>>>>>>>>>>>>>>>>>>>>>>
بقي كاظم في المزرعة لمدة حتي يتسلم زمام الامور ثم عاد..
عاد كاظم الي المنزل ودلف الي لين..
كاظم بإبتسامة: خلاص يااعز
الحبايب عملت اللي انتي عايزاه..
لين بتنهيدة: ماشي ياجدي..
ليقترب كاظم منها وبحنو: متخافيش مش هخلي حاجة تضايقك..
لين وهي تنظر اليه: عارفة ياجدي..انت طول عمرك سندي..
كاظم بضحكة: طبعا يابت ده انتي بنتي
ام لسان زفر بس مقدرش علي زعلك..
لتحتضنه لين وببكاء: انا بحبك ياجدي..متزعلش مني..
كاظم وهو يحاوطها بذراعيه وبحنو ابوي: عارف يابنت المغربي..
وبضحكة.. بس شكل العيل عامل عمايله ومخليكي بتوزعي حب عالكل..
لين بخفوت: علشان انت تستحق ياجدي مهما
عملت كنت بتفضل جمبي..وتحميني حتي من هشام..
كاظم: اهو هشام ده بقي انا هربيهولك..لو لعب بديله تاني..
لين بتوعد: لأ المرادي هفرمه ورب العزة..
كاظم: يالهوووي..يابت اهمدي شويه..يلا نامي علشان ترتاحي..
لين: ماشي ياجدي..
كاظم وهو يدلف من الغرفة وبتنهيدة
لنفسه: مسيرك هترتاحي يالين وتفرحي..
>>>>>>>>>>>>>>>>>>>>>
كان هشام نائما واذا به يستيقظ
مفزوعا علي صياح وضرب لين له..
لين بعصبيه: ااااه يا زباله طول عمرك هتفضل كدة..
لينتفض هشام من نومه: ايه فيه ايه..
لين بعصبية: فيه ان ليلتك
سودة ياهشام انا هقتلك الليله..
هشام بعدم فهم: ليه..عملتلك ايه..
لين بغضب: انت هتستهبل
ياحيلتها مش عارف عملت ايه..
هشام بقلق: وربنا ماعرف..
لين بصوت عالي: بتخوني ياهشام برضو اللي فيك فيك..
هشام بنظرات مشدوهة: انا..وربنا ابدا..
لين بحدة: كداب انا شفتك بعيني..وتضربه واطي وزباله..
هشام بضيق ونبرة محذرة: ايه هي الحاله
جاتلك ولا ايه..اهدي علشان متغباش عليكي..
لين بصوت عالي: لأ..انا هوريك الوقتي..
ويأتي علي صوتهما كاظم بقلق: ايه فيه ايه بتصوتي ليه..
لين بعصبية وبكاء: تعالي ياجدي شوف البيه بيخوني..
كاظم بدهشة: ايه..وبغضب تاني ياهشام..
هشام بدفاع: والله ماعملت حاجة دي هي اللي مجنونه..
لين بغضب: جن لما يلخبطك انا شيفاك بعنيا هتكدبني..
كاظم بعصبية: برضو ياهشام..
هشام وهو يمسح وجهه بيديه بنفاذ صبر:
يالهوووي قسما برب العزة ماخنتها..
لين وهي تضربه: جهنم مستنياك بحلفانك ياكداب..
هشام وهو يجذ علي اسنانه ويكور يديه ويزفر في غضب:
طب امته وفين انا بسيبك..قوليلي شوفتيني فين..
لين بغضب: انت كداب وبجح..
هشام بنفاذ صبر: اخبط نفوخي في
الحيطة انطقي خنتك فين وامته..
لين بعصبيه: في الحلم ياواطي..حلمت بيك وانت
بتخوني.. لأ وكمان هتسمع كلام امك وتتجوز عليا..
هشام وكاظم وهم ينظرون الي بعضهما..
كاظم بتعجب: بتقولي شفتيه فين..
لين بحدة: في الحلم ياجدي..
هشام وهو يحاول كبح غضبه: وحياه امك
في الحلم.. سامع ياجدي..
كاظم بنفاذ صبر: حلم..كل ده علشان حلم
حرام عليكي هتجننينا..اتهدي شويه..
لين ببكاء: واطي من يومه انا هقتله..اهئ اهئ..
هشام وهو يجذ علي اسنانه: وربنا لولا انك
حامل كنت رنيتك.. انتي بتستهبلي.
لين ببكاء: انت هتتجوز عليا وتسمع كلام امك ياهشام..
هشام بنفاذ صبر: يادي النيله السودة انتي
كنتي بتحلمي..حلم حلم يابت المهفوفة..
لين بعصبية: لأ انت كداب..هتسيبني
بعد ماتاخد الفلوس من كاظم..
هشام لكاظم بغيظ: اقتلها الوقتي..
كاظم بتنهيدة وهو يتجه الي لين: لين ياحبيبتي
هشام زعلك في حاجة..ماهو كويس..
ترتمي لين في حضن كاظم وتبكي: ده خاين
ياجدي خليه يبعد عني..اهئ اهئ..
كاظم: خلاص ياهشام ابعد عنها..
هشام بعصبية: وانا كنت قربتلها.. ديه فزعتني..
كاظم: خلاص غور من هنا مش شايف حالتها..
هشام بغيظ: صبرني يارب..
كاظم: طب عايزة ايه الوقتي يالين..
لين: خليه يجبلي جاتو بالشيكولاته..
هشام بتعوج: ناااعم ياختي عايزة ايه..
لين لكاظم: خليه يجيبه ياجدي وكمان
بعد مايجيبه يفضل قاعد معايا ومينمش..
كاظم: حاضر روح ياهشام..
هشام بغيظ: نعم انتو عارفين الساعة كام..
لين ببكاء: شفت اهو مش بيسمع الكلام..
كاظم بنفاذ صبر: روح ياهشام..
هشام بعصبيه: ياجدي..
لينظر له كاظم ويشاور بيده علي انها مجنونه..
هشام بغل: حاضر هغير واتنيل اروح..
لين: لأ بلبسك ده..
هشام بعصبيه: لين متجننيش انزل ازاي كدة بالبيجامه..
لين: مش مشكلتي بلبسك ده يلا..
كاظم: روح ياهشام..
ليخرج هشام وهو يتمتم بغضب: ياغلبك ياهشام..
شكلها كدة ايام سودة اختها ماتت ولسعت ع الاخر
وجت علي دماغي بزيادة بحملها.. صبرني يارب..
الحارس: مالك ياهشام بيه بتكلم نفسك ورايح فين بالمنظر ده..
هشام بتحسر: ديه اخرة لما تتعدل وتبقي زوج مثالي
يامرزوق.. بص روح هاتلي جاتو بالشيكولاته من اي حته..
مرزوق بدهشه: الوقتي.. مين هيبقي فاتح الوقتي يابيه..
هشام: ايوة..هاته من اي حته يامرزوق وانا مستنيك هنا..
ليرحل الحارس متعجبا ويجلس هشام يرثي نفسه
وما ال اليه حاله منذ حمل لين وبعد ساعة يعود
مرزوق بالمطلوب ويجد هشام نائما منتظره..
الحارس وهو يوقظه: هشام بيه اللي طلبته اهو..
هشام: هه طيب اسيبك انا..بقولك ايه يامرزوق بلاش
تتجوز..الجواز بهدله.. انا العايب اني رجعت للين ويصعد..
لين بحدة: اتأخرت كدة ليه..
هشام بإبتسامه صفراء: معلش عبال مالقيته..اتفضلي..
لين: اقعد هنا رايح فين..
هشام: هغور في اي حته انام..
لين: لأ اقعد معايا..يلا ياجدي روح نام..
كاظم بتنهيدة: انا رايح انام..الله يكون في عونك يااتش..
ليظل هشام معها حتي الصباح..
>>>>>>>>>>>>>>>>>>>>>>
البارت الثاني و الخمسون و الاخير..
هشام وهو يزفر في ضيق: انا تعبت منها
خلاص وربنا لولا انها حامل كنت قتلها وارتحت..
سامي: ليه يعني عملتلك ايه..
هشام بتنهيدة : قول معملتش..جننتني..
سامي ضاحكا:هههه.. هي لسه مكنتش جننتك يااتش..
لينظر له هشام بغيظ.. ويكمل سامي.. خلاص خلاص كمل..
هشام بتنهيدة: من ساعة موت نور وهي
اتجننت بزيادة..وحملها كمان خلاها غريبة..
سامي: معلش ياهشام انت عارف اختها كانت
ايه بالنسبالها..اللي جرالها مش قليل برضو..
هشام بضيق: عارف ياسامي..بس ديه زيادة..
انت عارف لونايمة وصحيت ملقتنيش جمبها
بتخرب الدنيا..وافضل احايل فيها..
سامي بتهكم: الله..مش انت اللي كنت عايزها
تبقي كدة معاك..ايه اللي تاعبك..ولا عايز ترجع تتسرمح..
هشام بتعوج: اتسرمح انا لاقي وقت..ده انا بروح الشركة
بالعافية..مش بسبها..ويكمل بضحكة.. طلع عندها حق..
سامي وهو يضيق عينيه وبتساؤل: عندها حق في ايه..
هشام ضاحكا: كانت قبل كدة قالتلي انها زوجة مثاليه
وان انا علشان هي ناجحة في جوازها انا بحب صنف
الحريم وبحب اجرب..لو كانت قرفاني في عيشتي كنت
كرهت صنف النسوان كله.. الوقتي اكتشفت ان كلامها صح..
الوقتي عرفت انها قرفاني وكرهتني في صنف الحريم كله..
ليضحك سامي بشدة: ههههه..ياعيني عليك يااتش..
مش مصدق..انت تقول كدة..ده انت مكنتش تقعد ليلة
من غير مزة..الوقتي بتقول كدة.. وبخبث.. طب ماتسيب
لين ايه اللي جابرك..اهي هتجبلك عيل وتاخد الفلوس وتعيش..
هشام بإستنكار: انت بتقول ايه..اسبها مش ممكن...
بس يالا..وبعدين انت عايزها تقتلني.. انت نسيت عملت
ايه اخر مرة عملت كدة..ديه كانت هتوديني في داهية
وخلتني اطلقها غصب عن اللي جابوني..
سامي برفعة حاجب: انت بتعشقها يا اتش.. فبلاش
ترسم عليا..واللي بتعمله لين علي قلبك زي العسل..
هشام بتنهيدة وهو يسند وجهه علي يديه: ايوة بحبها ومقدرش
استغني عنها.. بقولك ايه اسيبك وارجعلها بدل ماتخرب الدنيا..
سامي وهو يهز رأسه بتعجب: الله يرحم يااتش..
صافي بتساؤل: مالك ياحبيبي بتكلم نفسك اتش مشي..
سامي بضحكة: ايوة اصل الحب بهدله..
صافي وهي تجلس بجواره: لأ الحب مفيش احلي منه..
سامي بضحكة وهو يطوق خصر صافي: ده بالنسبه
لينا ياقلبي..لكن بالنسبه لإتش..بهدله ومرمطة..
صافي بإبتسامة: اهااا..ليه يعني..
سامي بغمزة: سيبك منهم وخليكي معايا..
صافي: معاك لآخر الخط..
سامي: معايا مفيش اخر..
>>>>>>>>>>>>>>>>>>>>>>>>>>>
بعد فترة..
كانت لين تجلس مع كاظم وهشام..
هشام: هاااا..ياجدي.. هنعمل ايه..
كاظم بتنهيدة: ولا حاجة الصفقة ديه مش مهمة سيبك منها..
هشام: ليه يعني..مافيها مكسب برضو..
كاظم: يااتش بلاش طمع سيب غيرك يسترزق..
هشام بتعوج: من امته ده ياجد..
لين بملل: بقولكم ايه انا زهقت انا قايمة طالعة فوق..
وتنهض ثم تكمل بخفوت.. او هقعد تاني..لتسقط فاقدة الوعي..
ويصرخ هشام: لين.. ويسرعوا بها الي المشفي..
هشام بقلق: مالها..
الطبيب: مفيش حاجة بس الضغط مش متظبط..متقلقش..
كاظم بخوف: طب هيأثر عليها..
الطبيب: لأ مفيش حاجة هترتاح شويه وتبقي كويسه..
ليدلفوا اليها..
هشام: حرام عليكي سيبتي مفاصلي..
لين بضيق: قالك ايه حشوة القماش..
هشام بتنهيدة: الضغط..مش قولتلك اهدي شويه..
لين بتذمر: مانا هاديه.. وبضيق..
انا مش عايزة اقعد هنا..عايزة امشي..
كاظم بحدة: تمشي فين وانتي وقعتي من طولك اسكتي شويه..
لين بحنق: مش بحب المستشفيات كاتمة علي نفسي..
هشام: حاضر بس شويه ترتاحي ونمشي..
لين: النهاردة مش هقعد فيها لبكرة..
هشام: حاضر..
وبعد ساعات يخرج الطبيب لين بعد
اصرارها علي الرحيل ولكن يوصيها بالراحة..
>>>>>>>>>>>>>>>>>>>>>
بعد ان عادت لين من المشفي وجلست في غرفتها علي الفراش..
كاظم: ارتاحي شويه وانا هخلي
ام جميل تحضرلك حاجة تاكليها..
لين: مش جعانه ياجدى امال هشام راح فين..
كاظم: الشركة شويه وراجع يلا نامي انتي..
لين: طيب..
وتنام وبعد ساعات تستيقظ..وتهبط الي الاسفل.. وتجد صفاء..
لين بعصبيه: بتعملي ايه هنا..
هشام بضيق: مفيش جايه تسلم وهتمشي..
صفاء بتعوج: اهلا بالغندورة اخبار حفيدي ايه..
لين ببرود: زي الفل متخافيش انا هبقي كويسه..
صفاء بحدة: انا بسأل عن حفيدي مش عنك..انتي في داهية..
هشام بعصبية: فيه ايه انتي جايه تتخانقي..
صفاء بحزن مصطنع: بقي كدة ياهشام
بقي انا اللي جايه اسال عليك وحشتني..
لين بتعوج: ميوحشكيش غالي ياحماتي..
صفاء بغل: فاكرة انك هتبعديه عني..
ده بعدك هيرجعلي ويسيبك..
لين بتأوه: اااي....
ليسرع اليها هشام بقلق: مالك حاسه بإيه..
لتنظر لين الي صفاء بمكر وتكمل:
ابدا يااتش بس البيبي ضربني جامد..
صفاء بغيظ: يامسهوكة..
لين: تعالي يااتش طلعني فوق علشان ارتاح شويه..
هشام وهو يتجه معها للاعلي: تعالي ياحبيبتي..
لين وهي تنظر خلفها وتكمل: معلش ياجماعة
البيت بيتكم بس متقليش سلام ياحماتي..
صفاء بغل: شوف البت بلفته ازاي اخ ياناري..
كاظم بصرامة: صفاء اذا كنتي جاية
علشان تحرقي دم لين احسنلك تمشي..
صفاء بغيظ: امرك ياباشا انا ماشية..
في الاعلي
هشام: ايه يالينو اخبارك ايه..
لين وهي جالسه علي الفراش:
هشام ايه اللي جاب امك هنا..
هشام وهو يمط شفتيه: علمي علمك..
لين بنظرات ضيقة: هشام..
هشام: مفيش يالينو.. وبضحكة.. كالعادة فتحت معايا اني
اتجوز عليكي.. وبصراحة بفكر في الموضوع بعد اللي بتعمليه فيا..
لتنظر له بغيظ..
هشام بسرعة: الله الله انتي هتتعصبي انا بهزر..
لين بهدوء: انا ولا هتعصب ولا هفور دمي كل اللي فيها اني..
وبعيون متوعدة.. هقتلك واولع في اللي جابوك..
هشام بضحكة: احبك وانت غيران يالينو..
متقلقيش..انا ليا غيرك ياجميل..
لين بشرود وهي تنظر الي الفراغ ولم تعلق..
هشام بضحكة: خلاص بقي بهزر..
لين: لأ..
هشام: وانتي من امته...
لتقاطعه لين: هشام انا هولد الوقتي..
هشام بعد تصديق: ياشيخة قولي كلام
غير ده..ماكنا لسه في المستشفي..
لين بعصبية: بقولك هولد الحقني..
هشام: انتي بتتكلمي جد..
لين بألم: امال بهزر ااااي..
هشام بتوتر: طب ايه.. وبصوت عالي ياجدي..الحقني..
ليأتي كاظم سريعا: فيه ايه..
لين ببكاء: بولد ياجدي..اهئ اهئ..والغبي ده متنح..
ليلكزه كاظم وبحدة: يلا ياهبل ع المستشفي..
هشام ببلاهة: طب ليه..
كاظم بعصبية: انت غبي يالا..
مش وقت هبلك ده يلا بسرعة..
هشام: حاضر حاضر..
ليحملها ويذهبوا الي المشفي..
هشام بقلق: استر يارب..
كاظم: خير ان شاء الله يا اتش..
ويصل سامي وصافي..
سامي: ها ايه الاخبار..
كاظم: لسه..
هشام برجاء: بقولك ايه ياصافي
انتي مش دكتورة ماتدخلي معاها..
صافي بضحكة: طب ماتدخل انت يااتش..عادي..
هشام بخوف: ايه انا ادخل لأ...
سامي: معلش ادخلي ياصافي..
وبعد مدة تخرج صافي بإبتسامه وهي
حامله الصغير: مبروك يااتش..يتربي في عزك..
هشام بفرحة: ولدت..
كاظم وهو يحمل الصغير: ايوة ياهبل
امال جيبالك مين..سمي وشيل..
هشام بخوف: لأ اشيل مين خليه معاك..يقع مني..
سامي بضحكة: هههههه..شوفي عامل ازاي
لو يشوفوه في النادي يبقي مهزأة الكل مكنش يومك يااتش..
وبعد قليل يذهب الجميع الي غرفة لين ويعطوها الصغير
لين بإبتسامه: شايف ياهشام..
هشام وقد جلس بجوارها وبإبتسامه: ايوة حلو زي ابوه..
لين: ايه ده بيفتح عينيه..
كاظم بضحكة وهو يميل عليهم: نفس لو عنيكم
ربنا يحميه.. وبتنهيدة.. ويجيره منكم..
سامي بضحكة: يلا ادهوني وانا اخليه في ظرف
خمس سنين.. اكس خليفة جناب الكوماندة..
هشام وهو يلكزه: لااااا.. ابني مش هسمح
لحد يقرب منه.. خلاص بطلنا ده كله..
لين: خلاص هنعيش من غير اي لبش ياسامي..
كاظم بضحكة: يعني انت هتبطل هبلك ومصارعة ياهشام..
هشام وهو ينظر لصغيره: ايوة..
كاظم: وانتي يالين هتبطلي عفرتك..
لين بضحكة :موعدكش بس هحاول.. وتبدأ في البكاء..
هشام: خلاص يالينو بقي المرة اللي جايه هنجيب نور..
صافي بضحكة: ها طيب هتسموه ايه..
هشام: ادهم..
سامي بإبتسامة: مبروك يااتش..
هشام: عبالك ياسمسم..
كاظم بإبتسامه وهو ينظر اليهم وهم منشغلون بصغيرهم
ولنفسه: هو ده اللي هيغير حياتكم ويصلحها..ويطفي نارك يالين..
..>>>>>>>>>>>>>>>>>>>>>
انجبت لين ادهم الصغير وبعده تبدل حال هشام تماما..
فأصبح يهتم بهما كثيرا وبعد عاما ونصف تجدهم في
حديقة المنزل يلعب هشام وكاظم مع ادهم..
لين لنفسها وهي تنظر اليهم: كاظم كان عنده حق..
لما قال ان اننا لو خلفنا هنقرب من بعض ويتصلح حالنا..
هشام حاله اتبدل عن الاول.. اينعم عينيه زايغة.. بس بيبص بس
الوقتي ميقدرش يعمل حاجة تانيه..وبضحكه.. اصل اللي فيه
داء عمره مايغيره.. ادهم بقي كل حياتنا.. والصراحة مقدرش اكدب
اتش بيحاول يسعدني علي قد مايقدر وينسيني اللي حصل..
هشام ضاحكا: يلا يا دومه حبيب بابا تعالي..
ادهم راكضا بضحكة: بابا..
ليحتضنه هشام بحب ويقبله مكملا: روح قلب بابا يلا..
ويأخذه ويدور به في سعاده كأنه طفل صغير يلعب معه ..
كاظم: ايه يا اتش سيبه شويه بقي..
هشام بإستنكار وهو يحتضن صغيره وكأنه يخبأه:
اسيب مين حد يسيب روحه لا ياجدي مش ممكن..
كاظم: ياولا خليني العب معاه شويه.. وروح شوف مراتك..
هشام ضاحكا: ماهي قاعدة ولا ايه ياحبيبتي..
لين بآبتسامه وتهديد: علي فكرة اخد ادهم
منكم انتو الاتنين.. انتو بهدلتوه خالص..
هشام بتحدي وهو يحدث ادهم:
دومه.. تروح مع ماما ولا مع بابا..
ادهم ببراءة: ماما..
هشام بغيظ: كدة ماشي يابن امك..
تعالي بقي.. ويركض خلفه ضاحكا..
ليربت كاظم علي كتف لين مكملا: عيشي حياتك
بقي وانسي.. هشام بيحبك..وبقي معاكي ادهم..
لتنظر له لين وتكمل بحزن: بحاول ياجدي..وبإبتسامة..
يلا تعالي نروح نشوفهم بدل ماهشام يهلك ادهم في اللعب..
كاظم بضحكة: يلا بينا..
ولتدلف خلفهم رغم سعادتها بطفلها ولكن.. هناك جراح لاتنسي..
دائما ما يأتي الينا الحب بعد ان نتحطم
ونكون مجرد اشلاء متناثرة علي طرقات الحياة..
ليحاول جمعها ولكن مهما حاول ستظل هناك اشلاء مبعثرة
قد اخفتها اتربه الجراح لا يمكن رؤيتها فتترك وتظل عالقة
علي ذاكرة لا يمكن نسيانها او الشفاء من الالامها..
>>>>>>>>>>>>>>>>>>>>>>>>>>>>>
وبعد ثلاثة اعوام تجدها امام قبر نور و..
هشام: يلا يالين بقي.. انا هاخد ادهم واسبقك
ع العربية.. متتأخريش علشان متتعبيش من الوقفة..
لتبتسم لين بحزن الي قبر نور وتكمل..
اهداء الي اختي الغالية..
لا ازال لا اعلم مامعني الموت حقا.. لقد اخذ مني اشخاص لم اتوقع رحيلهم..
ولكني لا اصدق ذلك.. عقلي لايستوعب.. احقا رحلوا بلا رجعة..
اشعر اني احلم لا افهم ماهو الموت.. اشعر انهم
مسافرون الي ارض ما وسوف اسافر لهم ولكن لا اعلم متي..
ولكن كيف يستطيع الانسان ان يعيش بعد رحيلهم..
اتدري ما معني ان تفقد اختا.. ان تكونا دائما معا وبلحظة ترحل ولا تجدها..
من كانت تقتسم معك كل شئ فرحك حزنك احلامك طموحك وحتي دموعك..
اتعلم ما شعور ان تبني احلام واماني وتجدها مرة واحدة اصبحت سراب..
شعور لا يوصف كل ما تستطيع فعله هو الصمت والبكاء ثم رسم
عدم المبالاة والجمود الذي يداري خلفه اطنان من الحزن والاسي..
لا احد يشعر بك الجميع يواسونك..نعم لن تشعر بالوحدة الان.. ولكن انتظر
عند المساء علي فراشك عندما تهاجمك ذكرياتك.. ذكريات كانت معها وعنها..
هل جننت ام اني اراها امامي..ولكن كمشاهدة التلفاز لا استطيع لمسها..
يا الله كم اشتقت اليها كم مر من الزمن ..
أشعر ببعدها كأنه الدهر.. ولكن بذكراها كأنها كانت معي أمس..
كانت ماضي وحاضري ومعها رسمت مستقبلي..
ولكن الان اصبحت ماض في نظر الاخرين ولكنها لا تزال معي في حاضري..
لا تقلقي لن انساكي حبيبتي طالما حييت.. سيظل اسمك معي..
لين وهي تربت علي بطنها المنتفخ وبإبتسامة تكمل:
ابنتي المستقبليه ساطلق عليك اسم اغلي شخص عندي..
وسأحكي لكي عنها.. حتي نلتقي حبيبتي انتي في قلبي وخاطري..
ساخبركم بشئ عن الموت..
(الموت يرقص بصمت في ظل الجميع)
ولا يبالي ..سواء كنت صغيرا ام كبيرا..صالحا ام طالحا..
حينما يأتي اجلك سترحل رغما عنك..فلتنظر كيف سترحل..
حقيقة قد ادركتها مؤخرا زهرتنا المفترسه..وربما تحاول ان تكفر عما فعلت..
تمت