رواية زهرتي الفصل الثامن عشر18بقلم شيماء الجندي
"قعدنا نتغدي وانا ببص لكل واحد شويه ومش مصدقة إن اخيرا بقي عندي عيلة ومش اي عيلة لا دي عيلة مليانة حب و دفئ واستقرار وناس بتحبني
بجد مش اسم علي ورق وصدفة جمعتني بأهلي وحقيقتي اللي عرفتها متأخر بس مش مهم الاهم اني عرفتها ومعرفش
ليه حاسة ان يوسف مش علي بعضة كل ما اقرب من بابا بس مهما كان انا مرتحالة من لحظة
ما شوفتة وعيونة مريحة بجد لدرجة اني بحسد اللي هتكون من نصيبة وفجأة قطع شرودي صوت بابا وهو بيقول:-زهرتي كلي يا حبيبتي انتي مكالتيش حاجة
:-هاا.. اه انا باكل اهو
" "شال طبقة وحطة قدامي كله بايدة اليمين وماسك أدم بايدة الشمال ومش راضي يسيبه من ساعة ما شافة:-طب اتفضلي انا عايز الطبق ده يخلص كله
:-ايييه كل ده لا لا شكرا انا متشكرة لحضرتك انا قدامي اكل كتير اهو
:-حضرتك!! انا اسمي بابا يا حبيبتي وانا عاذرك وهسيبلك الوقت اللي تتعودي عليا فيه بس تأكدي اني دائما جمبك
" ابتسمت من قلبي قبل وشي وفعلا فرحانة بوجودة اوي وبوجودي وسطهم وماما
طبطبت علي دراعي بحنان وقالت لبابا:-هو انت فاكر انها مش بنتي انا كمان وخايفة على صحتها من اول ما عرفتها ولا ايه يا استاذ دي بنوتي انا وبس
"بوست ايدها بحب وامتنان:-ربنا يخليكي ليا يارب وميحرمنيش منگ ابداً انا حبيتك من اول ما شوفتك والله فما بالك وانتي عمتي
" رد يوسف بسماجة:-ماشاءالله علي بيت الحب ده ياعيني عليك يايوسف يا للي محدش معبرك
"ضحكنا كلنا علي طريقتة الطفولية وبابا قاله
:-ما انت حته مني يا دكتور مش ابن اختي وبس ولو قعدت عمري كله مش هوفيك حقك انك كنت سبب في اني اجتمع ببنتي واطلب واتمني وانا هلبي اي طلب ليك
" بصلي نظرة جميلة من ورا نضارتة الطبية اللي مخبية اجمل عيون بلون القهوة وراها
وقال بابتسامة جميلة تشببه جمال قلبة:-احم.. قريب ان شاءلله ياخالو هطلب منك بس مش دلوقت لما اتاكد من طلبي الاول انه موجود
"اتكسفت اوي من نظرتة قدامهم وقلبي دق جامد فقومت بسرعة من مكاني:-احم انا هعمل الشاي
دخلت المطبخ وحطيت ايدي علي قلبي وفي حفلة نبض شغاله جوا بس قولت لنفسي:-فوقي يا زهرة متحلميش ده دكتور وعازب وانتي مطلقة بفضيحة من واحد معندوش نخوة وطلعوكي من اولي ثانوي يعني لا نسب ولا تعليم ولا ماضي وكمان معاكي عيل يعني
فوقي احسنلك مش ناقصة وجع قلب" عملت الشاي وخرجت واتعمدت اتجاهلة وسبت ادم مع بابا وماما وخرجت للبلاكونا وخدت الشاي في ايدي
«شيماء حمدي»
"انتهزت فرصة ان خالي وماما بيكلموا سوا وروحت وراها لاقيتها واقفة وباصة للسماء بحزن
:-الحزن مش لايق عليكي علي فكره بقي في واحده تبقا عندها ابن زي دومي وتبقا زعلانة كده
" بصيتلي بعيونها العسلي اللي شكلي وقعت فيها من ساعة ما شوفتها وگانها عاملالي سحر بس سحر ابيض مش اسود وقالت بصوتها الجميل:-الحمدلله على كل شيء بس يمكن مستغربة الموضوع كله تخيل تعيش حياتك كلها في كدبه وان اهلك مش اهلك وان كل شيء كدب وظلم وفجاة تشوف حياة تانيه واهل تانين بجد الموضوع مش سهل ابدا
:-لو ربنا مش بيحبك مكانش اختبرك اوي كده وتأكدي ان عوضة عظيم يازهرة لانك تستاهلي كل خير بجد
:-متشكرة يا دكتور وفعلا جميلك في رقبتي
:-ايه الهبل ده جميل ايه؟؟ ثم مش قولت اسمي يوسف وبس
:-الناس مقامات يا دكتور
"لسه مكملتش كلامي لاقيت بابا داخل يقولي:-يلا يا زهرتي عشان نروح بيتنا
" انصدمت ورديت بسرعة:-نعم!!!؛ تروحوا فين زهرة مش هتمشي من هنا
:-يا سحرررر تعالي خدي ابنك عشان شكلي هرمية من البلكونة
:-في ايه بس مالكم
:-الحقي ياماما ده عايز ياخدها معاه
:-وانت زعلان ليه يايوسف ده ابوها يابني هو حد غريب ثم صاحبة الشأن موجودة وهي ادري بقرارها
"كلنا بصينا ليها وكان علي وشها حيرة وخوف
:-انا مش عايزة اتقل علي حد اكتر من كده بس انا من جوايا مش هكون مطمنة غير لما نعمل تحليل Dna
عشان خاطري لوسمحتم
" البنت دي ناوية تخطف قلبي صح؟ يعني كلنا متأكدين انه ابوها وكمان نسخة منه ولسه عايزة تحليل عشان تتاكد هو انا ازاي كنت غبي وشكيت فيها
قبل كده بس كده خالي هيزعل وحقه طبعا بس اتفاجات به بيبوس راسها بحب:-فاطمة عرفت تربي حاضر ياقلبي هنعمله رغم اني متأكد انك بنتي بس عشان تطمني
"فرحت اوي انها مش هتمشي وهتفضل قدامي بس خالي صدمني لما قال:-خلاص خليكي هنا مع سحر فترة وانا هاخد يوسف معايا عشان مينفعش يقعد هنا
:-نعم ياخوياااا!!!!