رواية مكتوبة علي اسمي كامله بقلم ملك ابراهيم ) جميع الفصول مكتملة حتي الاخير الخاتمه

رواية ذئاب لا تعرف الحب الفصل الثالث والستون63بقلم نجمه براقه

وفاء 

وقفت وانا بحاول اخفي ربكتي ولمعة عيوني وسعادتي لما لقيته قدامي  وقولت بكبر 

_ انت ايه جابك  ،  ده مكان شغل مش مكان حاجة تانية 

قال وهو بيتجه علي مكان الكشف 

_ ما انا عارف انه مكان شغل مش مكان حاجه تانيه   ،  انا جاي اكشف  ولا انتي مبتكشفيش علي رجاله 

خفيت ابتسامتي بسرعة وقولت وانا بمسك السماعه وجهاز الضغط  

_ لا بكشف علي رجاله  ،    نام 

قال وهو بيقرب مني 

_ ويجي منين النوم والبال مشغول يا دكتوره  ، اه لو تعرفي اللي مطير النوم من عيني وشاغل قلبي وعقلي   

_ انت هتغنيلي  ،  اتمدد خليني اكشفلك 

_ ايوه ومش تقولي اكده   ، اهو اتفضلي 

اتمدد ف اتقدمت ليه وانا بحاول بجهد كبير اداري ابتسامتي  وربكتي 

_ احم  ،  بـ...  بتشتكي من إيه 

_ من في الم في الحته دي  

قالها وهو بيشاور علي مكان قلبه ف قولت وانا بقاوم ابتسمتي بصعوبه 

_ طيب 

قربت منه وحطيت السماعه في نفس المكان ف  قالي 

_ إيه ده  

_ ايه 

_ اول مره اشوف دكتور بيكشف فوق الهدوم 

_  لا ماهو في تطور  في الطب 

_ مليش دعوه بالتطور ده اكشفي زي الناس 

_  انا الدكتوره هنا  ،  هتعرفني شغلي 

_ دكتوره علي نفسك انا عايز كشف عدل مدفعش فلوس علشان تعكي  ،  حياة الناس مش لعبة في يدكم  ،  افرضي موت 

_ تموت من الكشف فوق الهدوم 

_ خلصي انتي هترغي مع المرضي 

_ ماااشي 

قربت خطوه وانا بحاول مبصلهوش علشان مرتبكش بسبب نظراته وفتحت زرارين من القميص ودخلت ايدي ف انتفض وقال 

_ اووف 

_ مالك 

_ يديكي متلجه 

_ اااانت هتسكت ولا تشوفلك دكتور تاني 

مردش ف بدات اكشف وانا بقول 

_ ايوه اخرس  ، و خد نفس عميق 

عمل زي ما قولتله ف قولت 

_ بتحس بأيه بالظبط 

_ بكلبشه 

_ إيه 

_ ايوه بحس بكلبشه

_ ازاي يعني في نغزه ولا نفسك بضيق ولا ايه 

_ لا لا كلبشه  ،  هما بيقولولي ان في حد جوه قلبي مكلبش فيه 

_ هههههه 

كتمت ضحكتي بسرعه وقولت بجدية 

_ طيب قوم 

سيبته ورجعت المكتب وقولت وانا بكتبله الروشته

_ دول شويه التهابات هيخفوا اول ما تاخد من العلاج ده  

_ والاعاده ميته

_ مفيش اعادات 

_ لا حقي بيقولي في إعادة  واهو مكتوب في الروشته 

_ وانت حالتك لا تستدعي اعادات 

_ انتي هتعرفي حالتي اكتر مني  ، انا هاجي وهتشوفي خفيت ولا لا 

_ ماشي الاعاده بعد اسبوع من النهارده 

_ له خليها بعد يومين علشان مسافر  

_ ماشي يومين 

_ ولا اجي بكره

_ الصبر يارب   ،  ماشي بكره 

_ تمام يا دكتوره  شكراً  ،  انا اديت حق الكشف للبت اللي بره لربما تدسه وتقول مدتلهاش 

_ ماشي متشكرين 

قال وهو بيبص لشكل الاوضه 

_ بس ممتاز اختيارك للون الابيض  فيه راحه نفسيه 

_ امممم وبعدين  

قعد قدامي وقال 

_ وبعدين انا تعبت من تمثيل المرض  ،  هتلمي نفسك ميته 

_ مرض ايه اللي انت كنت بتمثله  ، انت مبتعرفش تمثل  ،  وبعدين ايه الم نفسي دي 

_ امال اقولك ايه وانتي سايقة عليه العوج 

_ من فضلك ده مكان اكل عيش مش عاوزه اي كلام في اي حاجه تانيه  اتفضل 

_ اعقلي يا وفاء انا ساكتلك

_ ايييه ده  ، يعني ايه ساكتلي  وايه اعقلي دي

_ يعني لو متعدلتيش مش هتأمني شري 

_ هتعمل ايه يعني 

_ لو متعدلتيش هتعرفي 

_ طيب مش هتعدل هه 

قام وقال وهو بيزرر زراير قميصه 

_ ماشي هنتقابل تاني  

قال كده ومشي وانا رجعت ابتسامتي علي وشي وحماسي للي هيعملوا فيه  وجه تاني يوم  واستنيته يجي الاعاده ومجاش  ،  وجه اليوم اللي بعده واللي بعده واللي بعد بعده ومفيش اي اخبار ورجعت لنفس حالة الملل والحزن  وبعد يومين من الحاله دي كلمتني كاريمان وقالتلي

_ عامله اية دلوقتي يا فوفتي 

_ تمام 

_ لسة بردو النفسية مش متظبطه 

_ مالها نفسيتي  كويسه 

_ لا انا حساكي مش تمام الفتره دي  ،  ف ايه رايك  نصيع بكره قبل معاد الشغل 

_ مليش نفس 

_ لا يكون ليكي  غصب عنك ،  انا لميت كل بنات العيله وهنروح رحلة نيليه عشان نتنيل كلنا سوا 

_   نتنيل اكتر من كده 

_ اه بس في النيل هناك فرق  ،  هتيجي ولا لا 

_ ماشي   نتنيل منتنيلش ليه  ،  جايه 

_ ماشي اصحي بدري هنروح من اول اليوم

_ اوكي

قفلت معاها  وبعد ما خلص اليوم  رجعت البيت لقيت فستان علي السرير بالون الابيض  ف دخل عليه بابا وقال 

_ كاريمان جابتهولك 

_ جابته ليه

_ بتقولي ان كل هدومك قدموا وانتي مش عاوزه تغيري 

_ منها لله البعيده  بقا انا مش بغير  ،  انا هكلمها

اتصلت بيها وقولت 

_ يابت الهبله  إيه ده 

_ إيه 

_ الفستان اللي جيباه 

_ اااه  ،  اصل انا روحت اجيب لنفسي ف عجبني ده وقولت هيطلع يجنن عليكي  ومتخافيش اعتبريه هديه بمناسبة افتتاح العيادة  

_ واشمعنا دلوقتي ،  بت انا مش مرتحالك 

_ اتنيييييلي  ، انا جبتهولك علشان الرحله احسن البنات كلهم بيقولوا انك الوحيدة في العيله لا بتغيري ولا  بتهتمي بنفسك وجبتيلنا الكلام حتي البت صفاء اللي بتحط ايشادو ازرق لامع بدون دمج  عيبت عليكي  

_ هههههههههه الله ياخدك  ،  ماشي هلبسه  ،  هديه مقبوله  يا جميل 

#شبل 

اول مره من وقت ما تعبت اخرج علي رجليه  رغم تقل خطواتي شويه  ولكن بدر اصر يخدني معاه  ونتمشي شوية عند البحر ولما وصلت منستش اخد صورة لنفسي وانا  واقف وابعتها ل جميلة ف قالي بدر 

_ بتتصور لمين  

_ مش بتصور لحد  

_ جميله 

_ ههههه جميله مين لا طبعاً 

_ بقول علي الصوره جميله انت فهمت ايه 

_ هههههه بقيت لئيم انت يا كبير 

_ انا لئيم يا جزمة 

_ مش لئيم قوي قوي يعني 

_ قليل ربايه 

_ تربيتك هههههههههه 

برقلي بعنيه ف قولت 

_ اسف يا كبير  ،  طيب بقول ايه  ،  عبيده قالي انه هيعمل فرح ليه هو و ورد الاسبوع الجاي  وقالي انه نفسه تيجي   

سكت ف قولت 

_ ايه  ،  مش هتروح وتكون جمبه في مناسبة زي دي 

_ له 

_ ليه يا بدر  عمرك ما كنت قاسي  

_ اسكت يا شبل 

_ والله حرام عليك  ،  هو ندم علي عملته واعترفلك  ،  ايوه غلط بس اهو ندم  ،  تخليه يزعل من نفسه انه حاول يصلح غلطته ليه  

_ يعني بعد اللي عمله اطلع انا الغلطان علشان مقادرش اسامح 

_ لا حقك تزعل طبعا بس اديله فرصة  ولا انت مش شايف ان عبيده اتغير عن الاول وكان مهتم انه يقربلك 

_ اسكت يا شبل

_ طيب علشان خاطري حاول تديله فرصه  

_ خلص يا شبل ويلا هنرجع 

_ لما تقولي انك هتسامحه الاول 

_ بقولك خلص و امشي يا شبل  ،  ومتفتحش السيره دي معاي تاني علشان منزعلش مع بعض  ،  يلا 

حاولت اكلمه ومكنش مديني فرصة اتكلم ف سكت ورجعت البيت دخلت اوضتي واتصلت ب جميله ومجرد ما ردت دخل عندي وقال

_ نسيت اقولك اني بكره مسافر القاهرة  من الفجر 

_ ليه تاني 

_ ورايا شغل هناك 

_شششغل  ، اه ماشي  

_ امشي يا بارد   ،  تصبح علي خير  

_ هههههه وانت من أهله 

طلع وقفل الباب وانا رجعت اكلم جميله 

_ اسف  بدر دخل عليه  ، عامله اية 

_ الحمدلله  ، شوفت الصور اللي انت بعتها  ، الف حمدلله علي سلامتك 

_ الله يسلمك  ،  دي كانت اول مره امشي لوحدي من غير مساعدة من حد ف حبيت اوريكي 

_ فرحتلك بجد  ،  ربنا يديم عليك الصحه  ويبعد عنك كل سؤء 

_ متشكر قوي يا جميله  والله انا مستبخت بيكي  ، انتي وشك كان حلو عليه 

_ كله بأمر ربنا  وشي ملهوش دعوه 

_ ونعم بالله  ،   ايه اخبارك  طمنيني عليكي 

_ انا تمام الحمدلله

_ في جديد 

_  في بس لسه شويه علشان يحصل ده ان حصل  يعني 

_ خييير؟

_ خير  

_ طيب ما تقولي ولا هو سر 

_ له مش سر  ،  في دكتور جديد في المستشفي   طالب يدي 

تلاشت ابتسامتي وانا بقول 

_ طالب ايدك؟

_ ايوه 

_ طيب وانتي رايك ايه 

_ والله لسه مش عارفه  ،  قولتله اديني فرصه افكر  ،  ف قالي معاكي شهر  ،  اصله هيسافر يعمل عمره بعد  كام يوم ولما يرجع هيشوف رأيي 

_ اها  ،  يعني هتوافقي 

_  لسة هفكر 

_ طالما هتفكري يبقي شيفاه مناسب  ،  وبعدين ده دكتور ترفضيه ليه 

_ مش مسألة دكتور  ، بس مش عارفه هيجيني احسن منه ولا له  ،  انا خايفه افضل ارفض ارفض وبعدين اندم 

_ طيب وانتي عاوزة ايه دلوقتي 

_ مش عارفه والله   اديني هفكر  واشوف 

_ ماشي 

_ انت رايك ايه  

_ رايي في ايه انتي حره دي حياتك 

_ بسألك انت شايف ايه 

_ مش شايف حاجه  

_ ايه الرد الناشف ده   ،  خلاص معوذاش رأيك في حاجه  

_ احسن  ،و افتكر كده مبقاش ينفع نتكلم تاني 

_ ليه 

_ ايه هو اللي ليه مش هتجوزي 

_ اتجوز ايه انا لسه مفكرتش اصلا 

_ ولو فكرتي و وافقتي هتطلبي بنفسك منتكلمش  

_ مفكرتش في الموضوع ده  وسيباها لظروفها 

_ لا متسبهاش لظروفها  وننهي الكلام من دلوقتي  ،  مع السلامه 

قولت كده وقفلت السكه وانا مخنوق منها لأني عارفها بتحبني ورايحه تجوز واحد تاني 

وبعد دقيقة اتصلت ف قفلت ورنيت عليها وقولت 

_ ايوه 

_ انت قفلت في وشي ليه 

_ مقفلتش ولا حاجه انا قولتلك  مع السلامه 

_ قولتها وقفلت  

_ ماشي وانتي كنتي هتقولي ايه اكتر من مع السلامه وانتهت المكالمة 

_ طيب ومالك بتكلمني اكده وكأني مزهقاك اتصالات

_ لا ممزهقنيش بس ملهوش لازمه كلامنا دلوقتي  

_ ليه ملهوش لازمه  ايه اللي اتغير 

_ اللي اتغير انك هتجوزي 

_ لا مش هتجوز 

_ يعني ايه  مش بتقولي دكتور متقدملك 

_ ايوه بس هرفضه 

_ ليه 

_ مش مرتاحه 

_ ليه وانتي عاوزه ايه اكتر من دكتور  ده مش بعيد يخليكي تكملي تعليم 

_ هو فعلاً قالي هخليكي تكملي لانه شايفني شاطره  بس انا مش مرتاحه من اول ما قالي  

اترسمت ابتسامه علي وشي وانا بقول 

_ طيب براحتك دي حياتك 

_ شكرا يابوي 

_ طيب بالمناسبة  ايه مواصفات الشخص اللي انتي عاوزاه 

_ مليش مواصفات  

_ خالص 

_ خالص 

_ امال بترفضي ليه  ،  والشخص اللي هتوافقي عليه يختلف في ايه عن اللي قبله 

_  مرسماش في خيالي موصفات  معين  ،  بس لو كان ليه نصيب في حد اكيد هتشدله و اوافق 

_ صحيح  عندك حق 

_ طيب وانت  ايه مواصفات فتاة احلامك 

بهتت ملامحي لما افتكرت ليلي ف قولت 

_ مليش مواصفات  ،  مش هتجوز اصلا  

_ ليه 

_ مش عاوز 

_ ليه بردو 

_ كده  ،  مش ناوي اتجوز  

_ احسن بردو الجواز ده وجع راس  

_ و وجع قلب  

_ صح 

_ واضح اننا متفقين ومش هنتجوز لا انا ولا انتي 

_ هههه صح  ،  انا عن نفسي الجواز مش من ضمن احلامي 

_ ولا انا  ،  خلينا زي بعض  

_ خلينا ميضرش 

قولت بإبتسامة 

_ اقولك حاجه 

_ قول 

_ بقيت اقول لنفسي ياريتنا كنا صحاب من زمان  ،  حاسك شبهي 

_ وانا كمان  

_ وانتي كمان إيه 

_ حساك شبهي 

_ هو انا حلو قوي كده 

مردتش ف قولت بإبتسامة 

_ اقصد يعني اكيد مش حلو نفس حلاوتك انتي بنت وطبيعي البنت احلي من الولد 

_ وانا بقول كده  ،  انت اساسا مش حلو  

_ لا بقا حلو وموز النجع كمان  ، مفيش في وسامتي في النجع كله ومتنكريش 

_  شكلك عادي  متبالغش 

_ هبالغ وابالغ كمان  انتي بتحقدي عليه  اكمني احلي منك 

_ لا احلي مني ولا شوفته

بقينا نناقر مع بعض لساعه كامله وبعد ما فصل الخط اتصلت علشان اقولها تصبحي علي خير ومن غير ما احس بالوقت قفلت الساعة التانيه ف اتصلت تاني وقولت 

_ ساعتين كاملين بنتكلم  ،  انا محستش بالوقت 

_ ولا انا  ، بس كفاية اكده 

_ عاوزه تنامي 

_ ايوه 

_ طيب هكلمك الصبح 

_ ماشي  

_ تصبحي علي خير 

_ وانت من اهله 

قفلت وانا بقيت سهران ومشغول بالتفكير فيها وفي لحظه لقيت نفسي ببعتلها رساله اقولها فيها  

_ اقولك سر  ،  مكالمتك اكتر سبب ده ان مكنش السبب الوحيد اللي بتخليني احس بالراحة والامبساط  ،  ايه رأيك نفضل صحاب طول العمر منفترقش 

#جميله 

مبقتش فاهمه هو بيفكر كيه هل هو عفوي بزيادة  وبيتعلق بناس ويقولهم اللي حاسه تجاهم ببساطة  ولا لئيم وقاصد يعشمني من غير ما يكون ناوي يخليلي مكان في حياته مبقتش فاهماه ولا عارفه نهاية كلامي معاه إيه   وبعد ما كنت مبسوطه وانا بكلمه جت رسالته علي قد ما فرحتني علي قد ما زعلتني منه وبقيت طول الليل الوم نفسي  وجه تاني يوم وروحت الشغل وبعد وقت رن  ف قفلت عليه   وقررت مكلمهوش تاني وكمان اوافق علي العريس 

#ورد 

خد اجازة من شغله وخدنا انا والعيال وطلعنا نتفسح ونشتري هدوم جديده  وقبل ما اختار اي حاجه  قالي 

_ تعالي هنشتري اهم حاجة وبعدين نشتري  باقي الحاجات  

_ حاجة ايه 

_ تعالي بس 

خدنا لمكان فساتين الفرح ف بقيت بصالهم وانا مذهوله من جمالهم وبعد ثواني بهتت ابتسامتي ف قالي 

_ مالك  كشرتي ليه  معجبنكش نروح مكان تاني 

_ له دول حلوين قوي  ،  بس ليه  ، ما احنا مش هيجيلنا حد 

_ مين قالك ان محدش هيجي  ،  شبل وعم محمد وبناته هيجوا 

_ ايوه بس بردك قليلين علي فستان الفرح  "

اتنرفز فجأة وكأنه كان راسم فرحته رسم عشاني انا  والعيال وقال 

_ ورد متعكننيش عليه  انا وانتي كفاية قوي علشان تلبسي الفستان  اختاري هتلبسي ايه 

_ متزعلش مني بس... 

قاطع كلامي  وقال 

_ اختاري يا ورد 

_ حاضر 

رجعت ابص علي الفساتين وشاورت علي واحد وقولت 

_ هاخد ده 

مردش عليه وقال للبت اللي واقفه جمبنا تاخدني اقيسه ودخلت لبسته ورجعت بيه ف بصلي بصه سريعه ورجع يكلم البت ويسألها علي سعره  ف قال بشر وهو بيمسك في الفستان 

_ ااالله يا خالتي حلو قوي 

قولت بإبتسامة 

_ عجبك 

_ ايوه حلو قوي قوي  ،  هتاخديه؟!  

_ ايوه 

قال زيد

_ هتكوني عروسه؟! 

_ ايوه  حلوه ولا له  

قال بخجل 

_ اه 

نزلت وحبيته وانا بقول 

_ بتتكسف  ،  من ميته الكسوف ده 

قولت اكده ف جت البت وقالتلي

_ مبروك يا عروسه اتفضلي غيري 

_ حاضر 

دخلت غيرت الفستان وحطته في شنطه وخدناه ومشينا لمكان تاني ف قالي بجمود 

_ شوفي عاوزة ايه

_ مش عاوزه تاني 

قال بعصبيه 

_ بقولك شوفي عاوزة ايه  

_ معوزاش تاني كفاية اللي جبناه 

دار ليه بكل جسمه وقال 

_ انتي عاوزه ايه دلوك 

_ معوزاش حاجة   ،  مالك زعلان ليه 

_ يعني معوزاش 

_ لو عاوزه هاخد 

مسك يدين العيال وقال وهو وماشي 

_ طيب يلا مروحين 

مشي وهو بيتنرفز علي العيال لغيت البيت وبعد ما وصلنا العماره سابهم وطلع قبلنا ولما وصلنا قولتلهم يدخلوا يلعبوا في اوضتهم ودخلت عنده في الاوضه لقيته قاعد علي الكنبه وشارد ف حطيت الفستان علي السرير وقعدت جمبه وقولت 

_ عبيده 

بصلي من غير رد ف قولت 

_ مالك  ،  إيه مزعلك 

_ مفيش  ،  عاوز ارتاح شويه روحي شوفي وراكي ايه 

مسكت يده وقولت 

_ طيب متزعلش نفسك  ،  هعملك حاجه تاكولها  انت مفطرتش 

شال يده مني وقال بضيقه

_ مزعلانش ومعوزش اكل  ،  سيبني ياورد  ،  روحي دلوك وبعدين نتكلم 

_ حاضر  

طلعت وسيبته وانا زعلان عليه وعلي الحاله اللي هو  فيها  وكنت مستنيه شبل يجي عشان اقوله يتصرف ويصلح ما بينه وبين بدر لأني كنت عارفة ان زعله ده بسبب زعلهم مع بعض  

#وفاء  

قالتلي علي المكان اللي هنتقابل فيه وقالتلي اسبقيني وانا هاجي وراكي ف روحت ولقيت انه  نفس المكان ونفس اليخت الل روحت فيه انا وبدر وشبل  ف وقفت لدقايق ابص لليخت اللي مش شايفه حد فيه نهائي واترسمت ابتسامتي لفكرة جت في دماغي واتمنيت تطلع حقيقه ومطلعش موهومه  ،  وبعد دقيقة بدات احس واتاكد كمان انها حقيقه لما لقيت الراجل اللي بيسوق اليخت جاي وبيقولي 

_ اتفضلي  

مسألتش مين جوه ودخلت وبعد ما وقفت عند حاجز اليخت بدء يبحر بينا ف قولت 

_ ايه ده  ،  انت بتمشي ليه  لسه محدش جه 

مردش ف كملت استعباط وقولت 

_ يا ريس انا بكلمك  ،  انت موديني فين  ،  وقف لا اوديك في داهيه 

قولت كده ف حسيت ب حد بيوقف ورايا وحسيت ضربات قلبي بتزيد وانفاسي بتتسارع ف استدرت وقولت بتفاجيء مصطنع

_ انت!!!  انت ايه اللي بتعمله ده  

قال بإبتسامة 

_ بخطفك  

قولت بإبتسامة فشلت في اخفائها 

_ من فضلك بلاش استعباط ورجعني 

_   مفيش رجوع انتي مخطوفه  ،  وهنكون انا وانتي علي يخت لوحدنا ونبعد عن كل حاجه  ،  وكده رحلتك الخياليه اتحققت 

قولت بإبتسامة 

_ انا مش عاوزه اكون معاك في مكان لوحدنا 

قرب مني وقال 

_ طيب عيني في عينك 

بصتله شوية وبعدين بعدت وشي وقولت

_ لا  ،  وهبلغ عنك لو مرجعتنيش

قرب اكتر وقال بإبتسامة ولمعه في عنيه 

_ بلغي 

_ يعني ابلغ   ،  طيييييب 

جيت اخرج التليفون من الشنطة ف خدها مني ورماها بعيد ف قولت بغضب مصطنع

_ ايه ده  !!  

استدارت عشان اجيبها ف مسك دراعي وشدني ليه حاوط وسطي بأيده وقال 

_ رايحة فين 

زادت ضربات قلبي وقولت بانفاس متسارعه 

_ شيل ايدك عني  

حطيت ايدي علي مرفقه والايد التانيه علي كتفه وقولت وانا بحاول ابعده  

_ بدر انا بكلمك  ابعد عني

ضمني اكتر وقال 

_ هتسمعي الكلام ولا لا 

_ طيب سيبني وهسمعه 

قال بخفوت وهو بيقربني منه اكتر 

_  تسمعيه الاول 

بعدت وشي وقولت بإبتسامة 

_ سمعته ممكن تسيبني بقا 

مسك وشي بلطف ورجعني ليه وقال وعينه في عيني 

_ قولي موافقه اتجوزك الاول 

_ مش موافقه 

_ يبقي معوزنيش اسيبك 

حاولت ابعده وانا بقول 

_ مش موافقه وسيبني  ،  ابعد بقولك 

_ بصي علشان نكون واضحين انا مش هسيبك ولا هنرجع غير لما تعقلي وتقولي موافقه  

_ يا سلام هو بمزاجك 

_ وبمزاجك انتي كمان  ،  احنا مش هنضيع عمرنا في العند قبال بعض  ،  انا عاوزك علي طول جمبي ومن دلوقتي 

_ وانا ايه يخليني اوافق 

_ يعني عاوزة تفهميني انك معوزنيش 

سكت ف قال 

_ سكتي يبقي كلامي صح ،  انا وانتي عارفين انك عاوزاني زيي ويمكن اكتر ف ايه الفايده في اللي انتي بتعمليه ده انا ما صدقت كل المشاكل اتحلت  وبقيت حاسس ان  أن الاوان اني اعيش حياتي  ،  ف بلاش عند متخلنيش احس ان مش مكتوبلي فرح  

_ ما انت وجعتني لما رفضتني مرتين كان لازم تجرب شعوري 

_ انا كنت بوجع نفسي اكتر منك  ،  مكنش سهل عليه ارفضك  ،  ومش هقولك تاني اني عملت اكده علشان مصلحتك  ،  خلينا نرمي كل اللي فات ورا ضهرنا ونبدء حياتنا مع بعض  ،  ولا انتي صح معوزنيش 

_ يعني مش قوي

_ مش قوووي  امال ايه 

قولت بإبتسامة 

_ احم  عاوزني اوفق 

_ ايوه امال انا خاطفك ليه 

_ ههههه طيب موافقه بس بشرط 

_ هو إيه 

_ تركع  وتطلبها مني 

عقد حواجبه ف قولت 

_ والله ده شرطي لو معملتش كدة ف مش موافقه  

_ امممم،  امر مولاتي 

نزل علي ركبته وقال وهو ماسك ايدي 

_ مولاتي تقبل تجوزني 

_ افكر هههههههههه  ،  موافقه 

طلع خاتم من جيبه وقال وهو وبيلبسهوني 

_ اشكرك ان تفكيرك مطولش ومعذبتنيش اكتر

وقف قدامي وقال وعينه في عيني 

_ بحبك 

_ ايه بحبك دي  ،  عبر كتير  انت نشفت دمي 

_ هههههه بحبك  ،  بعشقك  

_ بس كده 

_ ده المسموح بيه لغيت ما نتجوز 

_ بدر لاااا قول تاني  ،  قولي شعر  

_ لو علي الشعر ف سهل  ، اجمل شعر عشان عيونك  

كمل وهو بيتأمل عينيه 

_ لا السيف يفعل بي ما أنت فاعلةً .. ولا لقاء عدوي مثل لقياك  لو بات سهم من الأعداء في كبدي .. ما نال مني ما نالتة عيناك

قولت بضحك

_ وعجبببي  ، هههههههههه الكبير بيقول شعر  يا عيني لا انا مش قدك 

_  مش انا اللي كاتبهم  انا حافظ بس  

_ طيب قول اللي حافظة 

سكت شوية يفكر وبعدين اتنهد  وقال وهو بيبص لعنيه 

_ اممم  ،  بيقول  ..  قل للتي بلغ النصاب جمالها !! 

إن الذكاة علي الجمال تبسم  ، أدي الي ذكاة حسنك  ... واعلمي أن الذكاة علي سواي محرم 

ابتسمت ف كمل بخفوت وهو بيزيد في قربه 

_ وعينـاي التـي لـم تـرف لأحـد سجـدت لعينــاكي عشقـاً "

كمل  وابهامه بيتحسس وشي بلطف

_ ولقد نويت الحب حين رأيته ولكل قلب في المحبة ما نوي... أهواه!!  عند القرب.. او في بعده ما ضل قلبي في هواه وما غوي

كمل بخفوت وهو بيقرب مني اكتر 

_ خذني إليك فكل شيء موحش

حتي المسير بلا يديك كئيب 

كمل وقال بنفس النبره 

_ ‏تملكتي الفؤاد بدون علمي

فما أزهي الفؤاد وأنتي فيه 

قال بإبتسامة خفيفه ولمعة عيونه بتزيد

_ كل الاشعار دي وكل اشعار الغزل  اتعملت عشانك انتي  ولو في وقت سألقيها كلها الي مسمعك سيدتي الجميله 

رديت وانا مش قادره اشيل عيوني عنه 

_ طلعت مش سهل  ، اممم ووو  ، احم و بمناسبة القصائد  ، ف القصيده دي اتعملت عشاني انا  وصف لشعوري دلوقتي  ، اقولهالك؟! 

_ اكيد  ،  سمعيني

بصلي بانصات ف قولت 

_ هي بتقول  ...  حقـاً أحبـــك إني لسـت أنكرها 

وكيفَ أنكر بي مــا الله مُبديــه

  هل ينكر الطير غصناً كان يحمله ؟ 

أم ينكر الزهر غيمــاً كان يسقيه ؟

حقاً أحبك لا زالت علي شفتي 

تستنزف الشوق خمراً ثم تسقيه 

ما لي على القلب سلطانً لأمنعه 

عشقاً براه وشوقاً بات يشقيه

حقاً أحبك موشوم بها قلبي 

فكيف أمسح وشماً عالقاً فيه

أحتاج عمراً جديداً فيك أبدؤه 

و ثالثاً باكتمال الوصل أنهيه

إني أحبك حلماً في أزرعه

ومنك يا قبلة الأحلام أجنيه

لازال قلبي شقياً في تقلبه

الهجر يقتله والوصل يحييه

هبني يتيماً و أنت اليوم كافله 

فامسحْ علي الرأس يا أغلي أمانيه

باقٍ على حبك المكتوب لي قدراً 

لا رده الله عني حين أبغيه 

زادت لمعة عيونه وهو بيقول 

_ بتعرفي تقولي شعر 

_  مش انا اللي كتباها  ،  انا حفظاها وبس لكن حسيتها بتقول اللي ممكن اقولهولك  ،  وبتوصف شعوري 

_  لو هنوصف شعورنا  بالشعر ف انا مش هلاقي شعر يوصف كل اللي حاسه ناحيتك ولا هلاقي شعر يوصف كل حاجه فيكي  ،  انتي مفيش كلام يوصفك ولا يوصف اللي انا حاسه دلوقتي 

حطيت ايدي علي ايده اللي بتلامس وشي وقولت وانا ببص لعنيه  

_ ولا في اي كلام ولا شعر يوصفك  ،  بحبك قوي  ،  وانا موافقه ومش هضيع يوم تاني من عمري وانا بعيدة عنك  

_ لو اكده  ف انا عاوز اقعد مع ابوكي وبيجاد واطلبك منهم ونتجوز في اسرع وقت

قولت بإبتسامة  

_  هكلمهم واخدلك معاهم معاد  

اتنقل بنظرات بين عنيه وقال 

_ طيب انا نفسي في حاجه دلوقتي 

قولت بإبتسامة 

_ هي ايه 

ضيق عنيه وقال 

_ عصير قصب 

_ هههههههههه 

_ بتضحكي ليه 

_ هههههههه مفيش 

_ امال انتي فكرتي إيه 

_ مفكرتش في حاجه 

_ ايوه  كنت هفهمك غلط  لو فكرتي في حاجه غير عصير القصب 

مسكت في هدومه وقولت 

_ تفهمني غلط ازاي  ،  عقلك بيقولك إيه نفسي اعرف 

_ بيقولي انك بتفكري في حاجه مش كويسه 

_ زي إيه 

مسك ايديه وقال بإبتسامة 

_ بلاش وبعدي علشان انا بدات افهمك غلط 

_  قصدك يعني اني بفكر في  كدة 

قولتها وبوسته بوسه سريعه في خده ف قال بإبتسامة 

_ ايوه  بس مش كده بالظبط 

_ امال ازاي  

_ احنا في الطل هقولك بعد ما نتجوز 

_ هههههههههه  انت قليل الادب 

_ وانتي مأدبه قوي  ،  انتي اللي بوستيني علي فكره  وانا اكده هفهمك غلط  

_ هههههههههه ارحم امي  ،  ايه كمية هفهمك غلط دي 

_ بستفزك عشان تتلحلحي وتعتدي عليه 

_ ههههههه ولو اتلحلحت واتعديت عليك مش هتفهمني غلط 

_ له بس مش هضمن اني اقدر امنعك  ، يمكن تقدري عليه 

قولت بإبتسامة 

_ خلاص ابعد كده  وحافظ علي  نفسك الراجل منكم ملهوش غير سمعته  ، وتعاله نبص للبحر 

مسك ايدي وقال بإبتسامة 

_ وانا بقول كده 

وقفنا جمب حاجز اليخت وبقينا نتكلم في كل حاجه  ونرسم احلامنا سوا ونتفق علي اللي هنعمله بعدين  وخلص اليوم  وكان اجمل يوم عيشته في حياتي  واتمنيت انه ميخلصش ونفضل علي طول في اليخت  ،  وبعد ما رجعت اتصلت ب كاريمان هزئتها علشان الفصل ده  وقولتلها بس لما اقابلك هربيكي وقفلت السكه في وشها واترميت علي السرير افكر في كل اللي حصل 

«اليوم التالي» 

 

#ورد

  تاني يوم جه شبل اللي كنت مستنياه بفارغ الصبر  وبعد ما سلمنا عليه قعد هو وعبيده في الصاله وبقيت مستنيه ان عبيده يدخل اوضته لأي سبب لغيت ما اخيراً دخل الحمام ف روحت عند شبل و قولت  

_ ازيك يا شبل

_ الحمدلله  وانتي عامله ايه 

_ تمام  بس كنت عايز اقولك حاجه ضروري 

_ قولي 

بصيت للاوضه اتأكد ان عبيده مش جاي ف رجعت  بصيت لشبل وقولت 

_ عبيده طول الوقت زعلان   بسبب زعل بدر منه  ،  ما تكلمه وتهديه من ناحيته شويه 

_ اكلم مين

_ بدر  ،  ده طول الوقت قاعد لوحده ومش بيكلم عياله حتي  وكل ما أسأله مالك يقولي مفيش وسيبيني لوحدي  ،  خايفه يحصل معاه زي ما حصل قبل اكده  

_ انا فعلاً كلمت بدر  ،  ده انا مبطلتش اكلمه  وهو بردو زعلان ومش عاوز يكلمه 

_ طيب وبعدين هنسيبهم اكده 

_ مش عارف اقولك ايه 

سكت لحظه وبعدين قال 

_ طيب انا هحاول اعمل حاجه وان شاءلله تنفع 

_ طيب اعمل الحاجه دي  ،  ونبي اهتم 

_ حاضر   ،  من غير ما تقولي انا بحاول  

#بدر 

رجعت امبارح في نص الليل ودخلت اوضتي قضيت ساعات افكر فيها لغيت ما نمت وبعد وقت كبير صحيت علي صوت رنة التليفون  ولما شوفت المتصل رجعت ابتسامتي تملا وشي من تاني ف رديت وقولت 

_ صباح الورد 

_ صباح النور  ،  عامل ايه 

_ مشتاقلك 

_  مشتاقلي قد ايه 

_ مشتاقلك للحد اللي خلاكي تكوني بطلة رحلاتي الخياليه قبل ما انام وبطلة احلامي لما نمت 

_ ههههه وانت كمان كنت بطل احلامي النهارده

_ وحلمتي بأيه 

_ حلمت انك مبتحبنيش وكنت زعلانه قوي منك 

_ لا يا شيخه

_ ايوه لو بتحبني مش هتكسفني 

_ وانا ميته كسفتك

_ لسه هتكسفني 

_ شكله طلب واعر قوي علشان اكسفك

_ لا بالعكس طلب صغير  بس متوقف علي حجم حبك ليه

قولت بجديه

_ ايه هو الطلب ده 

_ مش هقولك غير لو قولتلي بتحبني ولا لا 

_ بحبك بس قولي علشان بدات اقلق

_  طلبي هو  ،  تسامح عبيده يا بدر 

سكت ف قالت 

_ انا معاك انه غلط وغلطه كبير قوي  ،  بس هو ندم ولو مش بيحبك مكنش قالك حاجه  ولا كان حاول يقربلك  ،  ولا كان بقي في الحاله اللي هو فيها دلوقتي بسبب زعلك منه 

_ انتي مين قالك الكلام ده 

_ عرفت  ،  علشان خاطري يا بدر متزودهاش عليه  عذاب الضمير  والندم عقاب كافي قوي لاي غلط  ،  ربنا بيغفر  اغفرله انت كمان  ،  ولا انت مش شايف انه اتغير وبيحبك 

_ هكلمك تاني 

_ بدر استنا 

_ إيه 

_ اديلوه فرصه علشان خاطري 

_ هكلمك تاني يا وفاء  

قفلت معاها وروحت ل شبل اوضته لقيته ماسك تليفونه ولما شافني سابه وقال 

_ تعاله 

_ انت اللي كلمت وفاء 

سكت ف قولت 

_ يبقي انت كلمتها 

قولت اكده وطلعت من عنده  وسيبت البيت كله وانا مخنوق ومش طايق حد يكلمني  ،  وفي الطريق شوفت عبيده واقف في المحل ولما شافني دخل جوه واتداري عني ف روحت عنده علشان اقوله ينسي ان يجي يوم واسامحه ولما وصلت لقيته واقف بعيد ف قولت 

_ تعاله دقيقة  

فضل واقف علي نفس الوقفه لثواني وانا شايفه بيمسح وشه بكمه وبعدين بيجيلي وهو موطي جفونه وبيقول من غير ما يبصلي 

_ عايز ايه  

بقيت باصصله من غير كلام ولما طال سكوتي بصلي ف لقيت عنيه محمره من اثر الدموع  

_ اطلب  ،  سكر  ، شاي  ،  زيت  

_ ولا حاجه  

قولتها ومشيت وروحت اقف عند البحر وافكر في  اللي عمله وفي تصرفاته في الفترة الاخيره وبعد شوية لقيت ايد بتلمسني ولما  بصيت علي صاحبها لقيته عم محمد  

           الفصل الرابع والستون من هنا 

   لقراءة باقي الفصول من هنا

تعديل المقال