رواية ذئاب لا تعرف الحب الفصل السابع والخمسون57بقلم نجمه براقه
وفاء
زعلانه قوي منهم ومش قادره اسامحهم ، وطول الوقت محافظة علي سكوتي قدامهم رغم محاولاتهم باكتر من طريقة علشان اتكلم وانسي اللي عملوه ، ولما زهقت من اهتمامهم اللي انا مش قبلاه وزهقت من قعدت المستشفي وريحة البينج قومت وهما قاعدين جمبي ونزلت عن السرير ف قاموا وجه بيجاد وقف عندي وقالي
_ قايمه ليه اقعدي ، عاوزه ايه وانا اجبهولك "
بعدت ايده عني ومشيت ناحية الباب متجاهله سؤاله ف قال بابا بعد ما لحقني
_ رايحة فين انتي تعبانه لسه
قال بيجاد
_ وفاء استني وفهمينا رايحه فين
قولت بجمود وانا مش قادره ابص في وشهم
_ راجعه البيت
قال بيجاد وهو بيوقف قدامي يمنعني اعدي
_ انتي لسه تعبانه لما تخفي كويس ، اقعدي
بصتله بحده وقولت
_ عاوزه ارجع البيت وسع من طريقي
قال بابا وهو بيمسك ايدي
_ بنقول لسه تعبانه ارجعي
بصتله وقولت
_ انتوا بذات متقولوش حاجه تاني ، انا هعمل اللي شيفاه صح ، ولا مش عاوزني ارجع بيتك؟ ، عادي انا ممكن اروح اي مكان تاني
_ انتـ.....
قال بيجاد مقاطع كلام بابا
_ خلاص يا عمي سيبها علي راحتها ، خليها تروح وتكمل علاج في البيت ، يلا يا وفاء
مشيت قدامهم وانا حاطه ايدي علي الجرح اللي حاسه بوجع شديد مقدرتش اخفيه لا في مشيتي ولا أهاتي اللي بحاول اكتمها علي قد ما اقدر ف لقيت بيجاد بيمسك دراعي ويحط ايده ورا ضهري اتعصبت وكنت عاوزه ابعده ف قالي
_ اوصلي البيت بالسلامه وبعدين اعملي اللي انتي عاوزاه ، يلا انتي تعبانه
مشيت معاه من غير ولا كلمة ورجعت البيت ودخلت اوضتي وقولت لما دخلوا ورايا
_ عاوزه انام
_ ماشي لو احتجتي حاجه اندهي علي عمي انا شويه وجاي مش هتأخر
مردتش عليه وقعدت علي السرير ولما مشيوا بقيت ابص لشكل الاوضه وانا عقلي مشغول باللي حصل و ب بدر اللي متصلش تاني ولا سأل ، ف طلعت تليفوني من جيبي علشان اشوفه بعت حاجه ولا لا ولما ملقتش بعتله رساله وانا متنرفزه منه ومنهم ومن نفسي وقولت فيها
_ طبعاً ما انت ما بتصدق تقفل ونحل عن دماغك
جاني رده بعد ساعتين وقال
_ انا بصدق ما تحلي عن دماغي ؟
رديت في اقل من ثواني وقولت
_ اخيراااا افتكرت ترد ، والله انا لو عندي دم ما اكلمك
_ مالك في ايه ، ايه مزعلك
_ يعني مش شايف حاجه تزعل
_ مش واخد بالي ، فهميني حصل ايه
_ ولا حاجه يا بدر شكرا ، مش هضايقك تاني
قفلت وانا حاسه اني متهانه قوي وعاوزه اضرب نفسي قلمين علشان كلمته ف وصلني اتصال منه بعد دقيقة ولما رديت قالي
_ الو
_ نعم!!
_ ايه يابوي مالك ، بتقفلي في وشي ليه
_ يعني انت مش شايف انك غلطت
_ يمكن غلطت بس مش واخد بالي فهميني في ايه
_ لا مش هفهمك مانت لو مهتم كنت عرفت لوحدك
_ إيه
_ بتكلم جد مش بهزر ، انت لو مهتم كنت عرفت ايه معصبني
_ ههههه طيب روقي وفهميني مالك ، انا والله ما مركز
_ ماشي ، انا زعلانه علشان مبتسألش يا بدر ، متصلتش ولا بعت رساله تشوفني ميته ولا عايشه
_ اهااا
_ اهاااا؟، طيب ايه؟ مش من حقي ازعل
_ لا حقك بس انا من وقت ما قفلتي امعاي وانا ماسك التليفون مستنيكي تتصلي
_ يا سلام
_ والله
_ طيب ومتصلتش ليه ولا اللي حصل خلاك مش...
قال بمقاطعه
_ وفاء ، وفاء ، مش عاوزك تجيبي سيرة الموضوع ده تاني ، علشان مزعلش انا ، قولتلك الموضوع ده مفرقش امعاي ، انا عارف انك مغلطتيش
_ طيب متصلتش ليه
_ كنت مستني ، قولت هي ادرا بظروفها وبالوقت اللي تقدر تكلمني فيه
_ اها بردو كنت بعت رساله علي الاقل
_ صح بس راحت عن بالي مكنتش اعرف انك ممكن تفتحي نت دلوك
_ اه فعلاً انا مفتحتش غير لما بعتلك ، علي العموم حصل خير
_ الحمدلله رضيت ، ده انا قولت زعلك هيطول
_ لا ما خلاص انت لحقت نفسك
_ يعني لو ملحقتش نفسي كنتي زعلتي لبكره
_ لو مش مهم عندي مش هزعل
مردش وانا فهمت سبب سكوته ف قولت
_ بدر
_ ايوه
_ سكت ليه
_ مفيش حاجه اقولها
_ في كتير بس خايف تقول ، بس انا مش خايفه اقول حاجه
_ هكلمك تاني يا وفاء
_ لا!!! استنا ، خلاص مش هتكلم
طال سكوته قبل ما يقول
_ وفاء ، احنا ممكن نكون صحاب ، حاجه تانيه غير اكده لا ، انا اصلا ضد الكلام او التعامل لغير الضروره مع اي واحده بس انا حابب اني.... يعني اقصد..
قولت والدموع في عيني
_ فهماك و للأسف هكون بهين نفسي لو اتكلمت تاني ، اللي تشوفه ، خلينا صحاب
_ متزعليش بس انا...
قولت بمقاطعه
_ انا فهماك ومش زعلانه
_ طيب هكلمك تاني
#بدر
قفلت امعاها وانا حاسس بقلبي بيتكسر وانا اللي بكسره ب يدي ، وجود وفاء في حياتي قادر يعوضني عن حاجات كتيره ، قادر يرجعلي الفرحه لحياتي ، بس للأسف انا مليش حظ في اي حاجه زينه كل حاجه واقفه ضدي حتي قدري ، حتي نفسي مقبلاش انها تكون انانيه رغم كل اللي مرت بيه .. وانا تعبت ومبقتش قادر اتعامل مع حد ، ولا طايق اكلم حد ، عاوز اكون وحدي وبس ، ورجعت البيت من غير ما اسأل علي شبل اللي لسه سايبه عند عبيده وبعد ساعه وانا متمدد علي الكنبه الباب خبط قومت فتحت ف لقيت عبيده جايب شبل وجاي بصتلهم بتلبد وقولت
_ تعالوا
قولت اكده ودخلت الاوضه وبعد دقيقة جم وراي ف بصتلهم بصه سريعة ورجعت ابص قدامي ف قال شبل
_ مالك يا بدر ، انت تعبان
هزيت راسي بنفي ف قال عبيده
_ امال في ايه ، انت من وقت ما رجعت وانت زعلان
بصتله وقولت بوجع
_ انا من وقت ما جيت علي الدنيا وانا زعلان
كملت بصوت مخنوق
_ انا مش عارف إيه الذنب اللي عملته علشان اعيش العيشة دي ، ليه مقادرش افرح زي الناس ، ليه دايما زعلان وفي حاجه تملي تضايقني ، هو انا عفش ، قولوا الحقيقه مش هزعل انا عفش قوي اكده علشان ميكونش ليا نصيب في الفرح
قال شبل
_ مفيش حد اطيب ولا احسن منك يا بدر ، اكيد هيجي يوم وترتاح والدنيا تضحكلك
_ لا يا شبل عمرها ما هتضحكلي عمرها
قال عبيده
_ إيه اللي حصل طيب فهمنا يمكن نقدر نساعدك
قولت وانا مش قادر احبس دموعي اكتر من اكده
_ اللي حصل ان انا مليش نصيب في حاجه ، كل حاجه معانده امعاي
اتقدم عبيده وقعد جمبي ولما حاول يحط يده علي كتفي بعدته وقولت
_ بس معوذش حد يرضيني ، شويه وهرجع زي الاول ، سيبوني لوحدي
_ لما نطمن عليك الاول ، مش هنسيبك في الحاله دي
بصتله وقولت
_ لا سيبوني انت بذات تسيبني ، خليك بعيد عني ، كفاية تمثيل عاد
#عبيده
مش فاهم ممكن اعمل ايه تاني علشان يصدق اني مش في نيتي اضايقه ولا أأزيه واني صح مهتم بزعله وبأنه يكون بخير. ولقيت نفسي وانا بحاول اقرب منه واصلح علاقتي بيه بكره نفسي واهينها ، واحس ان مفيش فايده واني في كل مره هفشل ف قومت وسيبته وقبل ما اوصل الباب جاني صوته بينادي عليه ويقولي
_ عبيده استنا
وقفت لغيت ما جه وقف جمبي وقال والدموع في عنيه
_ متزعلش انا بس متضايق شويه ومش عارف بقول ايه
_ اصدق الكلام الكلام اللي بيتقال في وقت الزعل ياخوي ، بس انا كنت بحاول اهون عليك ، قولتلك قبل اكده اني عايز نبدؤ صفحة جديدة ومن وقتها وانا مضايقتكش بكلمه وبسأل وبتكلم ، مش عارف اعمل ايه تاني علشان تصدق اني مش عايز اضايقك او نويلك علي حاجه ، اصلا مفيش سبب يخليني افكر اضايقك ولا في مصلحه ليه ، عندك ايه انت دلوك اطمع فيه ولا حاول اخربه
سكت وبعدين قال بصوت مخنوق
_ كلامك صح ، بس انا مش حاسس انك بتعمل اكده علشان تصلح علاقتك بيه بالعكس انا حاسس انك قاصد تعمل اكده لسبب انا معرفهوش
_ والله أبداً ، انا مبعملش اكده غير عشان انت اخوي وعاوز نكون زنين مع بعض ، مش بخطط لحاجة
_ اها ماشي يا عبيده ، متزعلش مني انا بس كنت متضايق شويه ، تعاله
قولت بخنقه
_ له مجييش ، وانا مش هحاول اصلح حاجه تاني
جيت امشي ف مسك فيه وقال
_ عبيده اسكت ، انا مفيش حيل اصالح دلوك اقعد
_ له ، انا ماشي ، كفاية علي اكده
_ بقولك اقعد!!!! ايه!! ، انا متضايق لو صح عاوز تصلح علاقتك بيه تستحمل زنقتي ، مفيش احساس خالص
نزلت دموعي وانا بقول
_ له فيه
_ والله ما فيه !!! انت بذات مفيش احساس ولا دم
سكت ف حضني وقال بصوت مخنوق
_ متزعلش ، حقك عليه ، انا بس والله تعبان وهطق من الخنقة اللي انا فيها
ضميته وقولت بدموع
_ فاهمك ، ربنا يهون عليك ياخوي
بعد عني وقال وهو بيمسح دموعه وبيتنفس بعمق
_ يارب ، كفاية زعل روح هات العيال ومرتك وتعالوا هنطلبوا وكل ونتغدوا سوا
#ورد
رجع زعلان ولما سألته عن السبب قالي
_ مفيش اجهزي هنروح نتغدا عند بدر
وبعدها دخل روحت وراه لقيته فاتح الدولاب وبيبص للهدوم من غير ما ياخد حاجه ف اتقدمت عنده وقولت
_ عبيده
_ إيه
_ ايه مزعلك اكده ، حاجه حصلت تاني كفالله الشر؟!
بصلي وقال بتنهيده
_ لأ ، بس مش عارف الغلط من مين ، انا اللي مش عارف اوصله اني بحبه ومعنديش نيه عفشه نحيته ، ولا هو اللي قلبه اسود مبينساش ، انا مش عارف اعمل ايه علشان يصدقني ، احلفله واحاول تاني ولا اريح راسي واسيبني منه احسن
_ بتتكلم عن بدر؟
_ هو في غيره
_ طيب ليه بتقول اكده ، هو عمل ايه؟
_ ممصدقش خوفي ولا اهتمامي بيه ، شايف اني بعمل اكده علشان ناويله علي حاجه وكاني هدسيله قنبلة تنفجر فيه
_ متزعلش مني ، بس هو حقه يقلق منك انت بنفسك قولت انك مكنتش زين امعاه ودايما كنت تضايقه وتعايره
_ كنت ودلوكتي بحاول اصلح علاقتي بيه ، اعمل ايه طيب علشان يبطل يشك فيه ، احب علي رجله
_ لا تحب علي رجله إيه ، الأحسن تخليك طبيعي معاه من غير زيادة وهو هيتعود عليك اكده ، ومين عارف مش يمكن مش قلقان منك ولا حاجه ويطلع في حاجه تانيه مضيقاه
_ ايه يعني اللي مضايقه ، ولو في حاجه تانيه مضيقاه يعاملني انا ليه اكده ، ده اكده مخوفني احكيله اللي حصل ، مش حاسس ان هينفع احكيله وهو مش مطمنلي ومستعد يزعل مني في اقل كلمة
_ لا ده انت لو حكيتله هيصدقك عاد هيعرف انك صح اتغيرت وبتقوله علشان يلحق الباقي من حياته
_ مش باين ، انا متأكد اني لو قولتله هيقاطعني
_ مش هيحصل ، عمره ما هيقاطعك ، هو هيزعل شويه وبعدين يرضا
_ لا يا ورد انا دلوك عرفت انه مش هيسامح ، انتي مشفتهوش وهو بيصدني لما بحاول اطمنه او اهون عليه همه ، انا خلاص مش هحكيله
_ كيه يعني مش هتحكيله؟ وهتسيبه طول عمره اكده
_ طيب اعمل ايه ماهو هيزعل ومش بعيد يقاطعني طول عمره بدر زعله عفش ومبينساش حاجه
_ ايوه بس من حقه يعرف ويكمل حياته ، انت قولت انه معوزش يتجوز علشان شايف انه مبيخلفش ، يعني لو مقولتلهوش عمره ما هيعرف انه يقدر يخلف ولا هيتجوز
_له مش هقوله ، ولو عليكي متخافيش انا هعمل الفرح وهنتجوزوا ، ومين عارف مش يمكن يغير ويتجوز هو كمان
_ انا مش علي نفسي ، انا بتكلم علي حق
_ ماشي بس انا مقدرش ، مشايفش اي حاجه تشجعني اني اعترفله ، متاكد اننا هنخسر بعض مجرد ما اقوله .. انا مش هقول يا ورد ، مش هقول
#شبل
جه عبيده و ورد والعيال ومن بعدهم الديليفري واتغدينا مع بعض وقعدنا شوية وبعدين مشيوا وانا رجعت اوضتي زق بالكرسي وبقيت باصص لسرير بحاول اقوم وحاولت ومقدرتش وبعد وقت علي الحاله دي وانا لوحدي وبدر ناسيني اتصلت ب جميله ف قالت من اول ما ردت
_ ده انا قولت رقمي اتحذف من عنده
_ لا ده رقم لزقه زي صحبته مبيتحذفش
_ ايه
_ بقول لزقه زي صحبته
سكتت ف قولت
_ الو
_ ايوه
_ إيه مالك
_ مش عارفه بس شكلي مهزئه قوي في عينك
_ مهزئه ازاي يعني مش فاهم
_ مش عارفه بس كل هزارك بيقول اكده ، شايفني مهزئه؟
_ انا اسف والله انا بهزر معاكي ، زي كلمة ام شرطان وهبله مش قصدي اهينك
_ اها
_ انا اسف يا جميله
_ ولا يهمك ، انا دلوقتي في المستشفي ومشغوله لازم اقفل
_ استني يابنتي ، والله مش قصدي حاجه ، انا بهزر ، وبعدين اكيد يعني مش ملزقه انتي مبتتصليش عليه من نفسك اصلا
_ ايوه ، بس هقولك حاجه ، انا بزعل من الاهانه اللي علي شكل هزار لكن مبحبش ابين علشان اللي قدامي ميزعلش وميكونش في تعقيد في التعامل بينا لكن انا بزعل عادي
_ عندك حق ، انا اسف
_ مش مشكله ، هشوف الشغل
_ جميله متزودهاش قولت اسف مليون مره
_ مش زعلانه ، بس انا بجد مشغوله قوي
_ طيب اكلمك امتي ما انا مش هسيبك غير لما اعرف انك مش زعلانه
_ هخلص واتصل بيك ، بس اوعي تفتح عليه
_ مش هفتح يلا مستنيكي
قفلت معاها وبقيت العب بالتليفون لغيت ما زهقت وتعبت ف ميلت بدماغي علي الكرسي و عيني غلفت وبعد وقت صحيت علي رنة التليفون كانت رنه من جميله ف اتصلت بيها وانا بميل واهرش رجلي من قرص الناموس ولما ردت قولت
_ ايه يابنتي مكنتيش هتتصلي ولا ايه
_ يدوب فضيت شوية وجيت اكلمك ، عامل ايه
_ تمام جداً بس الناموس بيتعشا بيه شكله مفطرش
_ ههههههه باين اكده ، ايه الاخبار مفيش جديد
_ من اي ناحية
_ في حالتك
_ لا أبداً مفيش زي ما انا
_ ولا اي حركه
_ لا
_ معلش دلوك تتحرك
_ ان شاءلله
_ اكيد متضايق من القعدة طول الوقت
_ متضايق بس بدأت اتأقلم
_ يكفيك شر التأقلم بكره تخف وتقوم تجري
_ يارب بقا ، لحسن حاسس شكلي بقا بارد قوي وانا محمل اخواتي مسؤليتي وعمالين يشيلو ويحطو فيه زي العيل الصغير
_ فتره وهتعدي
_ ان شاءلله
بقيت بكلمها والناموس مش مبطل قرص فيه ف قولت
_ استغفر الله العظيم يارب هو ربنا بيخلق ناموس ليه ، ايه الفايده من وجوده في الدنيا مش فاهم
_ هههههههه انت هتعترض علي خلق ربنا ، رشله اي مبيد وخلاص
_ مفيش جمبي دلوقتي ، وهما عضعضوني لما ورمو جسمي
_ طيب داري المكشوف من جسمك بأي حاجة يكون حد جالك
_ اه صحيح
مسكت المفرش من فوق السرير وغطيت نفسي بيه وقولت
_ يوروني هيطلوني ازاي بعد كده
_ ههههه دول هيطقوا يموتو من الغيظ
_ يارب يموتوا كلهم ، دول بهدلوني ومش مبطل هرش زي الجربان
_ ههههه متزعلش تلاقيهم اشتهوا يدوقوك
_ حقهم ما انا عسل
_ مش قوي اكده
_ له قوي اكده امال بيعضعضوني ليه
_ هو اكده الناموس بيعضعض وخلاص مبيفرقش امعاه الشكل
_ بتهزق انا؟
_ ههههه له وانا اقدر يا ولد الكبير
_ احسب
بقت تتكلم وانا فجأة ركزت في حاجه ف وطيت تاني وقرصت رجلي وحسيت بالقرص ، رفعت ايدي وقرصت فوق ركبتي وبردو حسيت ولما حاولت احركها لقيت اني بقدر احركها حاجة بسيطة ، حاولت اقوم لكن كنت تقيل ف قولت بذهول
_ جميله
_ إيه يابوي ، روحت فين
_ جميله انا حاسس برجلي ، كده إيه
قالت بصوت مليان بهجه
_ بتتكلم بجد
_ اه والله ، كده ايه؟ هخف
قالت بفرحه
_ انت اكده خفيت ، بتقدر تحركها طيب
_ شوية صغيره بس حاسس بيها ، اقسم بربي حاسس بيها ، يعني كده انا هخف صح؟!
_ ايوه ، ايوه هتخف وهتقوم
توترت جداً ومبقتش عارف بقول ايه ف قولت بلخبطه
_ بجد يعني انا كده هقوم وهمشي ، جميله انتي جميله يا جميله ، والله جميله يخربيت ابوكي
_ هههههههههه تشكر ، والف مبروك
_ بجد مش مصدق حاسس اني موهوم ، ياااابدر!!! بدر!!!!
_ طيب اقفل اقفل
_ لا استني رايحه فين
_ مش بتنادي علي اخوك اقفل انا دلوك
_ طيب طيب ، انا متشكر قوي يا جميله ، انتي اجمل جميله في الدنيا اقفلي انتي لسه هنا، ياااابدر ، ياااااض
قولت كده ف دخل عليه وقال
_ يا ليله سوده، حقك عليه والله روحت عن بالي ، تعاله
جه يشيلني ف وقفته وقولت
_ لا ، بص كده
_ إيه
_ بص علي رجلي
بص عليها ف حركتها حركه بسيطه علي قد ما قدرت ف بصلي بذهول وابتسامته علي وشه
_ قادر تحركها؟
_ هههههههههه ايوه ، بقيت حاسس برجلي نصي كله حاسس بيه
حط يده عليها وقال بذهول
_ صح؟ طيب واكده
قالها وقرصني بعزم ما فيه ف قولت
_ ااااه بدر يخربيت دماغك ، هههههههههه وجعتني بقيت حاسس وربنا بقيت حاسس حتي شوف كده رجلي بتتحرك ، اجري هات الدوا هشربه كله علشان اخف اسرع
حضني وقال بسعاده
_ شبل!! حمدالله علي سلامتك يا خوي
نزلت دموعي وقولت بصوت متحشرج
_ الحمدلله ، الحمدلله ، بس لسه بردو مش قادر اقوم
بعد عني وقال
_ دلوقتي تقدر ، الف حمدالله علي سلامتك ياخوي
_ الله يسلمك ، الحمدلله يارب
فرحتي مكنتش سيعاني وفي نفس الوقت مكنتش ناسي جميله ، وحسيت ان وشها حلو عليه ، عقلي ربط وجودها بتعافي اللي حصلي ، ومش عارف اذا كان احساسي صح ولا مجرد صدفه ، وبعد ما خلصت قعدتنا انا وبدر بعتلها رساله علي رقمها قولتلها فيها
_ علي فكره انتي وشك حلو عليه يا جميله ، ما تيجي نتواصل علي طول يمكن يطلع حلو عليه دائما وانجح في حياتي
بعتها وبعد شوية وصلتني منها رنه سريعه وقفلت ف اتصلت بيها وقولت وانا مش قادر اخفي سعادتي
_ بخيله ، مكنتش هفتح عليكي
_ لا دي رنه من الشركة ، التلات دقايق خلصوا من زمان
_ هههههههههه طيب دقيقة واحدة
دخلت علي تطبيق عندي وبعتلها رصيد ورجعت كلمتها وقولت
_ وصلك
_ إيه
_ شوفي الرسايل
سكتت شوية وبعدين رجعت تكلمني وقالت
_ إيه ده
_ رصيد
_ ليه
_ عادي بعتلك فيها ايه
_ ليه بردو
_ في ايه يابنت ، انا عندي كتير في المحفظه ف عادي
_ امممم 100 جنيه بحالهم رصيد
_ ايه 100 بحالهم دي ، يدوب يعملوا باقة دلوقتي
_ طيب انت عامل محفظه علي رقمك ده يعني
_ اه ليه
_ بسأل عادي
_ انتي زعلتي
_ له ، انا بس كنت متصله اقولك حمدالله علي سلامتك ، ومبسوطه ان وشي طلع حلو عليك مع انه والله ما شغال معاي
_ ههههههه ع فكرة انتي جميله بجد ، انتي اول مره جيتي عندنا البيت عرفتي نفسك بانا جميله ده اسمي انما الشكل اهو حاجه الناس تعرفنا بيه وخلاص مش هندقق ، انتي مش وحشه
_ ما انا عارفه بس مبحبش اقول علشان ميقولوش عليه مغروره ، ومتشكره قوي ، وانا هقفل دلوقتي علشان هموت وانام
_ دلوقتي
_ ايوه
_ طيب هكلمك الصبح؟
_ ماشي لما الاقي وقتي سامح هتصل بيك
_ ماشي
قفلت معاها وبقيت لساعات بفكر في كلامها وابتسم لغيت ما نمت وصحيت تاني يوم متاخر وفتحت التليفون فتشت في الرسايل ف لقيت تحويل 100 جنيه للمحفظة عندي من رقم غريب ف اتصلت بيه لقيته مقفول فكرت ابعتهاله تاني بس قولت استني يمكن حد يتصل ويقولي ابعتهاله وبعد وقت اتصلت جميله ف رديت عليها وقولت وابتسامتي علي وشي
_ صباح الورد
_ صباح ايه عاد ، قصدك مساء ، عامل ايه
_ زي الفل وانتي
_ الحمدلله ، وصلتك الفلوس؟
_ فلوس ايه؟! ايه ده ، انتي اللي بعتي 100 جنيه
_ اه
_ ليه
_ حقك
_ ايه الهبل ده ، مين قالك اني عاوزها
_ ومين قالك انت اني هقبل فلوس منك ولا عشان قبلت قبل اكده هتفكر اني جعانه لا ده انا معايا فلوس تشتري بلد بس مبحبش الفشخره
_ هههههه يخربيتك ، جميله هبعتلك الفلوس وبطلي تخلف
_ لو اتبعتوا مش هكلمك تاني لو مش عاوز تكلمني ابعتهم وهتبقا خسرت وشي الحلو عليك ، سلام ورايا شغل
_ جميله
_ نعم
_ انتي هبله
_ عارفه ، بس خلقة ربنا مش هنتعرض
_ طيب انتي متخلفه
_ بردو عارفه وده نصيب مش هنعترض ها واي كمان قبل ما اقفل
قولت بإبتسامة
_ وجميله
سكتت شوية وقالت بربكه بانت علي صوتها
_ بردك عارفه كل الناس بتقولي يا جميله ، سلام
« بعد ايام»
#احمد
بعد ما انتهت التحقيقات واتوقفنا عن العمل نهائي جه تاني يوم وبيجاد رفع علينا قضية رد شرف وطلب تعويض كبيييير جداً ومش بس كده ده كمان عاوز يحبسنا بالإضافة انه اثار الراي العام علي مواقع الانترنت وفعل هشتاج مخصوص لينا بيطالب فيه بدعم الناس ليه علشان نتعاقب ، وانا معترضتش علي حاجه وسيبته يعمل اللي هو عاوزة لأن كان في الاهم من كده لازم اركز معاه ...
_ كنتي فين
قولتها ل " ايه " اختي بعد ما دخلت من الباب ف قالت
_ كنت في الدرس
_ طيب تعالي واقفه عندك ليه
جت قعدت وقالت وهي بتبص بعيد واكنها مش طايقه تبصلي
_ نعم
_ مالك
_ مفيش حاجه
_ متأكده؟
_ ايوه
_ طيب حد اتعرضلك تاني
_ لا مفيش ، ما خلاص حادثه وراحت لحالها ، اطمن مفيش حاجه هتحصل
_ مطمن عارفك ناصحه متغلطيش
اتغيرت نظرتها وقالت
_ ايوه بالظبط ، مش بغلط يا أحمد ، انا محافظة علي تربية اهلي ليه
_ ايه الطريقه دي
_ اخاف اقولك تزعل
_ لا قولي
سكتت ف قولت
_ احكي
سكتت شوية وبعدين اتنهدت وقالت
_ انا صحابي كلهم بعدوا عني حتي سهي اقرب صاحبه ليه اهلها منعوها انها تكلمني ، كل اهالي صحابي خايفين عليهم منك ، ومنين ما اروح بيتبصلي بصات وحشه قوي ، بسببك يا احمد
قولت بخجل من نظراتها وكلامها
_ اها
_ اسفه بس انت اللي طلبت اتكلم
_ طيب سيبك من الموضوع ده ، وقوليلي مين اللي كنتي واقفه معاه النهارده
_ انت كنت بتراقبني
_ لا حد قالي ، انا هراقبك ليه
_ اه ، طيب هقولك عادي ، ده الولد اللي ساعدني
_ اسمه إيه
_ حازم
_ وكنتوا بتتكلموا في ايه
_ قابلني ف وقف يسلم عليه
_ بس
_ بس ، اطمن مبغلطش
_ بصي طالما متعرفهوش ف سلامك عليه غلط حتي لو ساعدك
بصتلي بصه فيها كل الكلام اللي بيدور في دماغها ف قولت
_ مفيش داعي للبصه دي ، سيبك مني انا راجل مهما اعمل مفيش ضرر عليه ، متكلميش الولد ده تاني ، وعلشان تكوني عارفه ، اللي حصل مع البنت دي كان بدايته زي اللي حصل معاكي حد حاول يخطفها وجيت عملت نفسي المنقذ
_ اه بس اللي حصل معايا مش مدبر ، وحتي لو مدبر محدش هيقدر يوصل لحاجه انا عارفه الصح من الغلط ومش بغلط
_ بصي ، انا عارف انك مبتغلطيش وعارف ان منظري قدامك زبالة بس انا بقولك كده علشان مصلحتك ف مفيش دعي لعوجة اللسان دي قولي حاضر وخلاص
_ حاضر يا أحمد لو حصل وقابلته تاني هقوله ميكلمنيش ، تمام كده
هزيت دماغي من غير رد ف قالت وهي بتقوم
_ داخله اوضتي
قالت كده ومشيت بعد ما خلت منظري زبالة قدام نفسي ودي اكتر حاجه وجعاني في كل المشكلة اني نزلت من نظر الكل ، ومبقتش اقدر اتحمشن وانا بكلمها وبتناقش معاها في حاجه عدلها قلم علي وشها
#بيجاد
قضية رد شرف وطلب تعويض كبير ومعاقبة المجرمين مع هشتاج نزل علي كل المواقع ، واثارة لرأي العام بالاضافة لشوية اراء سلبيه جداً وتعليقات موجهه ليه بأني بتاجر بشرف اختي وكل همي الفلوس وفي منهم بيتهمني باني ديوث وبيقولوا
_ ده بدال ما كنت تداري علي الفضيحه رايح تنشرها علي العلن علشان تقبض قرشين " كلام كتير بشكل ده ، وكل اللي يعرفوني بيوسوني ويقولوا متزعلش من الاراء دي احنا عارفين انك بتدور علي حق اختك ، وانا بسكت مبتكلمش واقوم واسيبهم ف اسمعهم بيقولو مسكين مستحمل الاهانه وساكت علشان يرجع حق وفاء ، ميعرفوش اني انا اساس التعليقات دي وزي ما عملت حمله اطالب فيها بحق وفاء عملت حمله تشتم فيه و برد مبسبهمش يشتموا وردي دائما هو
_ انا مش طماع انا هحبسهم وهفلسهم مش هخلي معاهم قرش علشان ميستقوش بيه ، ف بيجيني رد الناس
_ دي حجه بتقولها انت كل همك الفلوس وبس
وبعمل اغضبني واسكت وارجع استنا الوقت المناسب اللي هجيب حق وفاء وحقي من عنيهم هما الاتنين بطريقتي انا ومن غير ما اتحبس فيهم يوم واحد ، ويوم ما اتسأل عن اللي حصل هقول انا هستفاد إيه لما اعمل كده ، ده انا زعلان علشان التعويض راح عليه ، ندل بقا وبشهادة الرأي العام
#وفاء
لسه مكمله في مجافاتي لبابا وبيجاد رغم محاولاتهم بالصلح معايا وبشوف وبسمع اللي بيعمله بيجاد علشان يرجعلي حقي ، ومع اني مستغربه ان بيجاد فكر يطلب تعويض بس متدخلتش وسيبته يعمل اللي هو عاوزة ومن ناحية تانية بتواصل مع بدر ك اصدقاء زي ماهو طلب ، بنصبح ونمسي ونتناقش ونحكي مستجداتنا لبعض ، واخر مستجداته هي انه كلمني وقالي
_ في حاجه هعملها مش عارفه هتفرق معاكي ولا لا
_ ايه هي
_ جاي القاهرة
قولت بسعاده
_ بجد
_ ايوه
_ ليه
_ سمعت ان في دكتور مخ واعصاب عندكم هعرض عليه شبل
_ ليه مش بتقول حرك رجليه وبيتحسن
_ ايوه بس لسه مش بيقدر يتحرك كويس يدوب يقوم ومبيقدرش ينقل رجليه بشكل مظبوط ، خطواته تقيله قوي
_ طيب تمام هاته واطمن
_ هشوفك ولا اروح علي طول
_ طبعا هتشوفني دا انا هموت واشوف شبل
_ اها ، تمام ماشي ، هتشوفي شبل
قولت بإبتسامة بعد ما حسيت بغيرته
_ متشكره قوي هتيجوا امتي بقي عشان اعمل حسابي
_ بكره
_ هتمشوا علي طول
_ لا هنروح لدكتور وهنروح لمركز علاج طبيعي ف هنقعد اسبوع وبعدين نرجع ، عايز ارجع بيه خافف خالص
_ وانا شايفه كده وانا هكون المرشده بتاعتكم طول الاسبوع لو حابب يعني
_ لا مش لدرجة دي نشوفك مره وخلاص ، اصل شبل كمان عاوز يشوفك وقالي لما نروح عاوز اقابل وفاء ف قولتله طيب
_ شبل هو اللي طلب
_ ايوه
_ اهااا ، لا لو كده ف نشوف شبل يا سلام وانا اطول ، حبيبي شبل
_ اها ، طيب انا هقفل
قال كده وقفل السكه في وشي بقيت اضحك وانا طايره من السعادة وفورا نطيت عن السرير بصيت للمرايا لقيت وشي مجهد ومتبهدل ف روحت الحمام غسلت وشي وطلعت عملت ماسكات وتقشير وتظبيط من كل حاجه عشان اكون حلوه لما اقابله يمكن يحس علي دمه ودماغه تلين
#بدر
عدت ايام بنتكلم فيها علي اننا اصدقاء بس الحقيقه اننا بنكدب علي نفسنا وكل كلامنا لا يمس الصداقة باي شكل ، وبعد ما غلبني شوقي ليها قولت ل شبل هاخدك اكشفلك عند دكتور في القاهره وبالمره اوديك مركز علاج طبيعي اهناك
بصلي بمكر وقال
_ ايوه طبعا لازم نروح مركز علاج طبيعي ف القاهرة علشان مفيش مراكز خالص في اسكندريه
تجاهلت خبثه ولوعته وقولت
_ طيب اجهز هنروح بكره
وبعدها سيبته وكلمت وفاء قولتلها وعدت الساعات وجه تاني يوم وطلعنا علي القاهرة .........