رواية عذراء الرعد كامله بقلم بسمه ) جميع الفصول حتى الاخير الخاتمه

رواية ذئاب لا تعرف الحب الفصل الرابع والستون64بقلم نجمه براقه

بدر 

_ اهلا ياعم محمد ازي حالك 

_ الحمدلله يابني بأفضل حال 

_ يارب دائما بأفضل حال 

_ ويهديك 

_ اممم  ، يارب  ، يهدينا جميعا يا حج  ، أآمرني شكلك جاي عشاني 

_ فعلاً  ، انا جاي عشانك  ، وزعلان قوي منك 

_ ليه بس  ، انا زعلتك في ايه 

_ وكمان مش عارف؟!  إيه يابني الجحد ده  ، انت ايه 

_ وه ياحج في ايه  ،  ليه الكلام ده 

_ عشان  انت جاحد  ، انا مش بشتمك انا بقولك اللي شايفه منك   ،  ممكن تقولي هتفضل مخاصم اخوك كده لأمتي  ، انت متعرفش النبي صلي الله عليه وسلم قال ايه عن اللي بيخاصم وبيجهر اخوه 

_ عليه افضل الصلاة والسلام  

_ عليه افضل الصلاة والسلام  ،  النبي قال يابني  ، لا يحل لمسلم أن يهجر أخاه فوق ثلاث  ، فمن يهجر فوق ثلاث  فمات دخل النار   . وشوف انت هاجر اخوك بقالك كام يوم  انت عاوز تدخل النار  وتتشوي في الدرك الاسفل مع الكفار يعني

_ لا اله الا الله  ياعم محمد انت هتكفرني ليه ،  اعوذ بالله 

_ هو انا اللي بقول  ده النبي هو اللي بيقول   ،  انت هتتحدف في النار مع ابليس واتباعه 

_ استغفر الله العظيم  ،  في ايه ياعم محمد ايه الكلام ده  شايفني مشارك في معركة احد جمب الكفار 

_ تقريباً  .

_ تقريباااااً؟!  

_ ايوه  ، يابني  ربك غفور رحيم وبيقبل توبة عبده  ، وانت مش قادر تسامح اخوك علي غلطه ندم عليها  تبقي هتروح النار ولا لا  

_ ربنا يجيرنا منها  ، بس انا بني آدم ياعم محمد  مش آله علشان اغفر  ،  انا مقادرش اسامح اعمل ايه 

_ ومقادرشي ليه  ،  ايه اللي انت عاوزه  ،  يعمل ايه تاني  ،  طيب بالله عليك قلبك موجعكش وانت شايف دموعه حزن علي اللي بيحصل  ،  إيه يابني ده حتي اخوك بيقول عليك طيب  

_ مين قال اني طيب ده هو اكتر واحد عارف اني قلبي اسود ومبنساش  ، وبعدين  يعني انا طلعت العفش علشان مش قادر اسامح وغلطه هو عادي 

_ غلط وندم  ، وانت ايوه عفش  ، ابو قلب قاسي مفيش اعفش منه   ،  اللي قلبه ميحنش لما يشوف دموع اخوه يبقي وحش وميأتمنش 

قولت بتنهيده

_  انت مش فاهم حاجه  ،  وحتي لو فاهم  بس انت مجربتش شعوري ،  الموضوع مش بالبساطه دي  

_ امال ازاي 

_ ولا حاجه  ،  انا مش عايز اي حاجه منه كفايه يكون بعيد عني 

_ يبعد عنك  ازاي ،  ده اخوك عارف  يعني  ايه اخوك يعني لو ميلت يعدلك لو الزمن جار عليك يوقف جمبك  ،  مفيش بعد الاخ  ، يابني  ابوك خلاص كبر مش هيقدر يجبلك اخوات تاني  

مردتش ف قال 

_ بردو؟!  ،  خساره يابني  خساره  ،  خليك كده لوحدك  ،  بطريقتك دي مش هيبقالك حد  ،  الناس مش بتبطل تغلط بس لو مع كل غلطه هنخسر واحد هنبص نلاقي نفسنا لوحدنا في الدنيا  ،  وانت بحالتك دي مش مطول علشان تكون لوحدك 

#شبل 

رجع بعد ساعات وجه عندي وقعد من غير ما يتكلم ف قولت 

_  ايه يا بدر 

_ مفيش 

_ انت لسه زعلان مني

_ له

_ طيب في ايه 

_ مفيش 

_ طيب كلمت عبيده؟ 

_ ولا هكلمه 

_ ليه يا بدر انت عمرك ما كنت قاسي كده   

_ هي إيه الحكاية   الكل سايب فعله وماسك في رد فعلي انا  

_ اي حد هيعرف اللي عمله هيقول غلطان  ،  بس هو ندم يا بدر  انت مشوفتش حالته بقت عامله ازاي  هو رجع يقفل علي نفسه من تاني ومش بيكلم عياله حتي 

_ وانا اعمله ايه  ،  ولا انت مش شايف ان غلطه كبير  

_ انا مقولتش ان غلطه هين  ،  بس يعمل ايه علشان يرضيك  ،  يا بدر عبيده بيحبك ولو متهمهوش مكنش دور عليك ولا حاول يقربلك  

_ شبل  !  ،  انا ممكن اسامحه في اي حاجه  ،  اسامحه في تزويره لتحليل والدوا اللي كان بيدهوني من غير ما احس بس عمري ما هقدر اسامحه في معايرته ليه في ذنبه هو  

_ هو مكنش عارف يعمل ايه 

_ مكنش عارف يعمل ايه في ايه 

_ بدر افهمني  ، عبيده بعد ما مراتك ماتت حس بتأنيب الضمير لاانه عارفك عمرك ما كنت هتجوز تاني  ،  كان عاوز يقنع نفسه انك صحيح مبتخلفش  

_ مقتنع بكلامك ده انت  ،  هو اللي ضميره بيأنبه علشان غلط يروح يعاير ويزيد غلطه 

_ مع عبيده اه   ،  مش عارف هتفهمني ولا لا  بس عبيده كمان اتظلم لما انت بعدت عنه بعد ما كنت أقرب حد ليه  ،  ولما شاف امه بتموت وابوك مسألش فيها علشان زعلان منها  ،  ولما ملقاش حد جمبه  يطبطب عليه في الوقت ده بذات  ،  ولما ابوك مهتمش بحزنه واحساسه باليتم وكان بيعاقبه علي اي غلط  ،  هو مش بيكرهك هو زعلان منك   ،   هو قالي ان بعد موت امه جالك علشان كنت اقرب حد ليه بعدها هي  بس انت بعدت عنه تاني  ،  جالك انت بذات علشان مكنش في اقرب منك ليه وكان محتاج حد يحن عليه ،  زي ما تقول حس بالخزلان منك  وكمل حياته وحيد هو التاني   انتو الاتنين اتظلمتوا زي بعض  ، بس الفرق ان عبيده مكنش بيظهر وجعه زيك  كان دافنه جواه لدرجة ان احنا ولا مره حسينا ويمكن لو محكاليش مكنتش عرفت هو بيفكر في ايه  ... صدقني يا بدر هو عمره ما كرهك  ، هو كان بيعاقبك علشان اتخليت عنه  مش عشان حقد ولا طمع في كبرانيه ولا حب ابوك 

_ جايز يكون كلامك صح بس ده مش عذر  ،  هو شاف بنفسه اللي انا  مريت بيه  وانا اهنه مش بتكلم عن اني كنت هموت  ،  انا بتكلم عن حاجات تانيه حسيتها كسرتني وعجزتني في  لحظتها  ،  حاجات ضيعت طفولتي في لحظة وأنا قبلها بساعه كنت بلعب واجري معاه هو وجلال  هو شاف بنفسه التحول اللي حصل في ساعه واحده  ،  الكلام ده كان قبل موت امه بكتير  ، انا مكنتش بتنكرله ولا ببعد بمزاجي  ،  ده غير اني كنت عيل  ، كان عندي عشر سنين وقتها  يعني كان اخري هاخده اجيبله حاجه حلوه بيحبها او نلعب مع بعض  ، يعني لا كنت هحضن ولا اطبطب واحنا كنا عيال منفهموش الكلام ده  عبيده بيتحجج وبيبرر لغلطه 

_ لا مش بيتحجج  ،  مكنش ده مبرر لغلطه بس احساسه بالخزلان منك حقيقي  ،  يمكن انت شوفت وفاكر ازاي امه ماتت  ،  وفاكر ابوك كان بيتعامل معاه ازاي  ،  وفاكر ان مكنش حد بياخده في حضنه  ،  انا وانت عيشنا مع امهاتنا  كانوا بيهتموا بينا حتي لو انت كنت نافر من امك وبتبعد عنها بس كانت بتهتم بيك  ،  انما هو لا  مكنش حد بيهتم بيه ولا يسالوا مالك ساكت ليه  ،  ولا يسأله انت نفسك في ايه زينا  ،  يمكن انت شايف ان الموضوع هايفه  بس محدش بيحس بالالم غير اللي مر بيه  ،  عبيده بيحبك ومحتاجك جمبه  حتي لو كبر وبقا راجل وابو لعيلين  ،  لو مش بيحبك مكنش زعل ولا اهتم يراضيك  ،  علشان خاطري يا بدر كلمه وانهي الزعل اللي بينكم  

مقدرش يتكلم وقام من عندي دخل اوضته وقفل علي نفسه الباب  وانا رجعت اتصل ب جميله اللي بتقفل عليه من اخر مكالمه ومش فاهم في ايه معاها 

#وفاء 

كنت مُحرجه اكلم بابا في موضوع  بدر ف كلمت بيجاد وطلبت منه نتقابل في العياده قبل معاد الشغل وبعد ما وصلت بدقايق جه وقال 

_ شغلتيني  ، في ايه 

_ تشرب ايه الاول 

_ انتي هتضيفيني قولي مالك 

قولت بتردد 

_ مفيش حاجه كنت....

_ ايوه 

_ احم  كنت عاوزه اقولك بس ان بدر طالب يقابلكم 

ضيق عنيه وقال 

_ بدر؟ 

قولت وانا بتهرب من نظراته

_ اه

_ اه؟   ،  هو انتي مش كنتي رفضتيه  وقولتي مش هتوافقي غير لما يبذل مجهود علشان يرضيكي  ،  بذل ولا ايه 

_  لا مبذلش  ،  اقصد بذل بذل  ،  كلمني واعتذر وقالي مش عايز غيرك 

_ يااااااه ده بذل مجهود كبير 

نزلت جفوني بخجل ف قال بإبتسامة 

_ جديد الكسوف ده عليكي  ، اوكي خليه يجي 

بصتله وقولت 

_ طيب وبابا مش عارفه ممكن يقول إيه 

_ مش هيمانع   ،  قوليلوه بس انتي اننا مستنينه بكره وانا هكلم عمي

_ تفتكر هيوافق 

_ متشليش هم حاجه  وقوليله يجي 

قولت بإبتسامة 

_ متشكره قوي يا بيجاد 

_ علي ايه ربنا يسعدكم  ،  يلا اسيبك تشوفي شغلك وبالليل هنتكلم

قالها وقام ف قولت 

_ عقبالك 

بهتت ملامحه وقال 

_ لا انسيني انا  ،  يلا سلام 

قال كده ومشي بعد ما وجع قلبي عليه وحسيت قد إيه هو حزين ومش ممكن هينسي فاطمة واللي حصلها  ،  وبعد دقايق اتصلت ب بدر علشان اقوله اللي قاله بيجاد ف جاني صوته زي ما يكون باكي ف قولت 

_ مال صوتك 

_ مفيش  ،  اخبارك ايه 

_ انا تمام  ، بس مالك صوتك زعلان ليه

_ مفيش حاجه ،  قوليلي عملتي إيه 

_ كلمت بيجاد وقالي اقولك تيجي بكره   ،  بس بردو  مالك مش هسيبك غير لما اعرف 

قال بتنهيده 

_ موضوع عبيده 

_ مالو

_   مش عارف اسامح فيه  مع اني شايف التغيير اللي حصله  

_ التسامح مش هيجي بسرعه كده  ،  انت ممكن تتسامح وتديلوه فرصه 

_ اتسامح يعني ايه ماهي نفسها 

_ لا مش هي نفسها  ،  تتسامح يعني تعمل انك مسامح وترجع تتكلم معاه وبتعامل والمواقف هتنسي وتسامح بجد 

_ ولو قولتلك نفسي مطيباش اكلمه  مع علمي انه صح اتغير وندم ،  هو انا اكده ابقا قاسي صح 

_ مش شرط  ،  في حاجات اكبر من اننا نسامح فيها لكن هو اخوك واتغير زي ما بتقول وده يشفعله ويخليك تحاول تديه فرصه  

_ مش عارف  ،  هسيبها لظروفها  ،  خلينا فينا احنا دلوقتي  عاوزين نتكلم في شوية حاجات  نمشي عليها ان سهل ربنا والجوازه تمت 

_ بعد ما ناخد الموافقه هنتكلم  ، انا دلوقتي مش عاوزه حاجه غير ان بابا يوافق  ،  واقولك الصراحه انا قلقانه ان يحصل حاجه تاني 

_ لا هي مش حكايه وهنعيدها  ، لو حصلت حاجه تاني هخطفك بجد 

_ وخطف ليه انا هروح معاك  من غير خطف 

_ يعني عندك استعاداد تسيبي كل حاجه عشاني 

_ اه عندي   استعداد كامل اني اسيب كل حاجه و اكون معاك  

_ باذن واحد احد مش هتسيبي حاجه  ادعي ربنا يعديها علي خير  ،  وعاوز بعد الفرح ان تم يعني نهرب بجد  ،  عاوز ابعد عن الناس سنه او اتنين  واكون معاكي انتي بس  

_ وانا موافقه بعد الفرح هروح معاك لاخر الدنيا 

_ ميته يجي اليوم ده  ،  ده لما يجي انا هعمل عمايل 

_ امممم 

_ ايه

_ ولا حاجه 

_ له قولي ايه الامممم دي انا اكده هفهمك غلط 

_ انا اللي فهمتك غلط  ،  يعني ايه هتعمل عمايل 

_ هاخدك في حضني مش هطلعك منه أبداً 

_ انا بقول اقفل دلوقتي 

_ هههههه  بعيد عن قلت الادب انا صح مش هطلعك من حضني  

_ بدر

_ ايوه 

_ نتقابل بكره 

_ ايه هتحضنيني؟ 

_ ههههه اقفل  

قولت كده وقفلت السكه ف بعتلي رساله بعد دقيقة بيقولي فيها قصيدة شعر غزل  

_ ‏إني لأحسد جاركم لجواركم

طوبي لمن أمسي لبيتك جاراً

ياليت جاركم باعني من داره

شبراً  فأعطيته مقابل شبره دارً

_ هههههه ده طمع في بيت جارنا بقا 

_ ده طمع في مجاورة القمر  

_ هههههه مالك يا بدر كنت كويس ايه جرالك 

_ حبيتك 

_ وبعدين  

_ وبعدين انا معنديش صبر لانك تكوني معاي 

_ ولا انا والله بس براحه عليه  مش تسكت تسكت وبعدين تقلب نذار قباني 

_ لا يا شيخه انا مرضيش اقرب من نذار قباني علشان متحظرنيش  ،  انا هستنا بعد الفرح وبعدها علي طول هقولك اشعاره وانفذها 

_ بدر!!!   اااقفل  ،  متبعتش مش هرد عليك تاني  

#شبل 

 الموضوع زاد عن حده وبقيت متأكد انها مش مشغوله وتصرفها ده وراه حاجه  ومع انها مش مطلوب منها ترد ولا تهتم باتصالاتي بس زعلتني وفكرتني بموقف ليلي معايا لما فجأة بدات تبعد عني من غير سبب ف بعتلها رساله قولت فيها 

_ في ايه يابنتي   ،  بتقفلي ليه  ما تردي وتقوليلي مالك   ،  هستنا اتصالك لو متصلتيش مش هبطل ارن عليكي  

بعتها واستنيت ساعه ورا ساعة لغيت ما اخيرا رنت ف قفلت ورنيت عليها وقولت بنرفزه بعد ما اتاكدت انا هي 

_ ايه اللي انتي بتعمليه ده  عمال ارن عليكي بقالي يومين وانتي ممعبراش امي بكلمه واحده  

قالت ببرود زود انفعالي 

_ مش فاضيه 

_ نعم يختي  ، يعني ايه مش فاضيه وراكي ايه طول النهار  ،  خلاص بقيتي مهمه قوي مش فاضيه نص دقيقة تقوليلي انك مش فاضيه 

_ عاوز ايه يا استاذ شبل 

قولت بنرفزه 

_ متقوليلش استاذ زفت لا اغلط في اللي خلفوكي دلوقتي  مسميش استاذ 

_ انتي كيه تكلمني اكده 

_ اتكلم زي ما انا عايز  

_ له متتكلمش زي مانت عاوز انت بتكلمني انا مش بتتكلم مع نفسك 

_ لا يا شيخه  ، طيب ما تكملي قوة شخصية و فهميني بتتعوجي عليه ليه  ،  شايفه نفسك علي ايه  ولا عشان انا اللي كلمتك صدقتي نفسك 

_ انا مصدقه نفسي من قبل ما تكلمني  ،  وعشان اريحك انا هتجوز ومبقاش ينفع نتكلم ،  متتصلش عليه تاني 

_ اوعي تقفلي  ،  يعني ايه هتجوزي  ،  انتي مش قولتي مش هتوافقي 

_ حاجه متخصكش   ،  ودي اخر مره تتصل بيا تاني 

_ فعلاً هتكون اخر مره  ،  بس انا الكسبان لما مكلمكش  ،  عشان انتوا كلكم نفس النوع  الكويس مبينفعش معاكم 

قولت كده وقفلت السكه وانا مش في بالي غير ليلي واللي عملته ورجعت لنفس اللحظة  اللي واجهتني فيها من غير خوف  ،  رجعت افتكر نظرتها ليه وهي بتدبحني بكل كلمه بتقولها  ، ورجعت افتكر إنها مكنتش شيفاني راجل  واني كنت فعلا عيل قدامها لدرجة انها قدرت تخدعني سنين  واخرها قدرت ترميني من فوق بكل سهوله 

#بدر

سمعت صوت زعيقه ف روحت عنده لقيته قاعد علي السرير دموعه بتسيل وحزين لدرجة ان يده بترتجف ف قربت منه وقولت وانا بقعد جمبه واحيط كتفه بدراعي 

_ مالك يا شبل 

بكي وهو بيميل دماغه علي دراعي  ف حضنته وقولت 

_ في ايه ياشبل  مين مزعلك  

قال ببكا 

_ احنا مأذنهاش  ،  محدش حبها قدنا انا وفاطمة  وهي غدرت بينا احنا الاتنين  من غير  رحمة 

_ يابوي  ،  إيه فكرك بيها تاني  بس

_ منستهاش وعمري ما هنساها  هي سابت جوايا جرح مش هيطيب طول عمري  ،  ليلي  قدرت تخدعني  ، وقدرت تعجزني   وقتلت فاطمة  نصي التاني  ،  وكأنها حلفت لا تموتني مليون مره ونجحت  ،  بس ليه  ،  ليه انا وفاطمة بذات 

_ علشان هي شيطانه  ، و هتنساها يا شبل وهتكمل حياتك  ،  هي خلاص غارت وربنا هيحاسبها علي كل اللي عملته 

مردش وفضل في  حضني دموعه منشفتش لغيت ما نام ف ريحته علي المخده وقعدت جمبه امسح علي راسه واقراله قران وبعد شويه غلبني النوم ونمت جمبه  وتاني يوم  صحيت ودخلت اتوضيت واثناء صلاتي صحي وبعد ما خلصت قالي 

_ حرماً 

_ جمعاً ان شاءلله  ،  عامل اية دلوقتي 

_ تمام  

قولت وانا بقعد جمبه 

_ إيه اللي حصل خلاك تفتكر  

_ اهو افتكرت وخلاص 

_ في حد قالك حاجه 

_ لأ  

_ طيب انا لازم اروح القاهرة دلوقتي  ولما ارجع هنقعد ونتكلم 

_ تعمل اية في القاهرة 

_ لما ارجع هقولك 

_ هتقابل وفاء 

_ ايوه  ،  ووو  ،  وهقابل ابوها واطلب يدها منه  قولتلك  اهو يمكن ده يفرحك 

قال بإبتسامة 

_ بجد 

_ ايوه 

_ الف ألف مبروك  ربنا يتملكم علي خير 

_ بس قول يارب يوافقوا 

_ هيوافقوا  ،  يلا روح وابقي كلمني 

_ طيب هتحتاج حاجه قبل ما امشي 

_ لا سلامتك  يلا عشان متتاخرش

_ ماشي حبيبي عقبالك  

بهتت ملامحه وهو بيقول 

_ ابقي كلمني  

#جميله 

بقيت طول الليل افكر في كلمته الاخيره  « كلكم نفس النوع مبينفعش معاكم الكويس»  مكنتش عارفه هو بيعيش دور الضحيه ولا لسه متأثر باللي عملته البت اياها معاه  ف كلمته  ، حتي بعد اللي قاله كان لازم اكلمه و يفهمني كويس ايه اللي هو عمله  معاي ف بيعايرني بيه  و رنيت رنه وبقيت مستنياه ساعات  ومتصلش وبردو مسكتش ورنيت تاني لغيت ما قفل ورن ولما فتحت عليه فضل ساكت ف قولت 

_ الو  ،  أنت معاي؟ 

_ متصله ليه 

_ متصله علشان اعرف يعني ايه كلنا نفس النوع  مبينفعش معاكم الكويس،  إيه الكويس اللي انت قدمتهولي  

مردش ف قولت 

_ ما تقول  ولا  ملقيش  ،  ايوووه ليكون قصدك  علي الفلوس اللي ادهاني اخوك  ، بس له دول مش منك  دول من اخوك  ويعتبروا مقابل شغلي  وسهري جمبك ،  ولو قصدك علي التليفون ف انا هرجعهولك هو لسه زي ماهو محصلهوش خدش 

_ انا مبتكلمش علي كده 

_ امال بتتكلم عن ايه  ،  ايه اللي انت قدمتهولي وانا مصنتهوش وقليت باصلي معاك فيه 

فضل ساكت ف قولت 

_ ساكت ليه ما تفهمني انا عملت ايه  ،  ده انا حتي لما انت بعتلي رصيد استلفت وردتهولك 

_ مبتكلمش عن فلوس ولا عن رصيد انا بتكلم علي انك استغلاليه   ،  كنا بنتكلم اخر مره وكويسين مع بعض وجايه بعد مليون اتصال معبرتيش امي فيهم تقوليلي مش هينفع اكلمك تاني عشان هتجوز  ،  ما انا قولتلك ننهي الكلام علشان هتجوزي انتي قولتي انك مش هتوافقي  ،  ايه اللي اتغير في ساعتين عشان تتعوجي عليه كده   

نزلت دموعي وانا بقول 

_ ايه دخل اللي بتقوله في الاستغلال  ، انا استغليتك في ايه  ،  انا معملتش معاك حاجه عفشه ولا خدت منك حاجه 

_ ماشي  ،  خلاص كده الكلام انتهي

_ لا منتهاش  ،  وطالما قولت اكده  لازم تعرف انا مش عاوزه اتكلم معاك ليه وتعرف مين فينا اللي غلطان واستغلالي   

قال بسخريه

_ وليه بقا  ،  وضحيلي استغلالي وعرفيني قد ايه انا وحش  

_ متتريقش 

اتنهد وقال 

_ مش هتريق قولي 

سكت شويه افكر اجبهاله كيه ف قال 

_ لسة هتدوري علي كلام تقوليه 

_ له كلامي جاهز  من اول ما قررت مردش  ،  انا مردتش وناويت ابطل اتكلم  معاك علشان  انت مش دغري  ،  بتمدح فيه طول الوقت وتطلب اننا نكون اصدقاء وفي نفس الوقت كلامك مش بيخلي من التلمحات اللي انا بفهمها بطريقة تانيه غير الصداقة  ،   وبعدها تختمها برساله زي اللي بعتها  لاهي محصله حب ولا صداقه  

سكت ف قولت 

_ الكلام ده غلط لما اقوله انا وبذات انك مفتحتش الموضوع  ، بس  انت مش واضح  ،  وانا مش فاهمه انت عاوز ايه  ،  هل انت عفوي بزيادة وبتقول اللي في قلبك من غير تعقيد ولا بتقصد تعلقني بيك..  لانك عارف اني.. 

مكملتش وبقيت كاتمه صوت شهقتي ف قال 

_ لاني عارف انك بتحبيني؟ 

مردتش ف قال 

_ ايوه يا جميله انا عارف  ، بس انا عمري ما وعدتك بحاجة  ، و عمري ما كنت بوشين ولا بقصد العب بالالفاظ ،  انا بقول اي حاجه حاسسها تجاه اي حد  ،  وفعلا كنت حابب كلامي معاكي ومكدبتش لما قولتلك بكون مبسوط وانا بكلمك  ، ولا كدبت لما قولتلك انك مختلفه عن الباقين  ولما مدحتك  ، بس  هي دي طبيعتي مع الكل رجاله وستات   يعني  انا مش قصدي اشغلك بيه بكلمتين حلوين  قولتهم في  حقك   ، ولو  دي مشكلتك  كنتي جيتي قولتي وانا  هقولك اقصد إيه  ،  كنت هقولك طريقتي مع الكل عامله ازاي  وكنتي فهمتي  ، مش تقفلي من غير ما تفهميني وتسيبيني محتار ومش فاهم اي غلطه عملتها علشان تبعدي فجأة وارنلك مترديش 

حسيت بالحرج من كلامه ف قولت 

_ اها  ، عندك حق  واعذرني ما انا متعاملتش مع شباب قبلك ف طريقتك مكنتش مفهومه  بس اديك فهمتني  ،  اسفه  ،  سلام  

_ استني يا جميله  متقفليش

بقيت ساكت ف قال 

_ انا اللي اسف  ،  انا  الغلطان  مش انتي  ، كان لازم اخد بالي من طريقتي معاكي  وخاصه اني كنت عارف انك حباني وفي نفس الوقت انا مكنتش ناوي ادخل في اي علاقات عاطفيه  ،  اقولك الحقيقه مش انتي اللي استغلاليه  ،  انا  اللي استغلالي  كلمتك لاني كنت بحس براحه في الكلام معاكي وكنت شايف ان وشك حلو عليه   ومهتمتش بأني كده بعلقك بيه حتي لو مش قصدي..

سكت شويه وبعدين قال 

_جميله انتي بجد مميزه ومختلف عن الكل  وياريت كنت عرفتك قبل كده يمكن كنت قدرت ابادلك شعورك  ،  بس انا منفعكش  ،  انا مبقتش انفع حد  ولا انفع نفسي حتي  ،  انا ثقتي في نفسي اتدمرت مبقتش حاسس اني انفع اكون زوج 

كمل بعد سكوت  

_ ولا حاسس اني انفع اكون راجل اصلا  

كمل بصعوبه وكنت حاسه بالوجع في صوته وهو بيقول 

_ ليلي  فقدتني الثقة في نفسي بقيت شايف نفسي مليش اي لازمه    

سكت شوية وبعدين قال 

_ ايه اللي انا بقوله ده ، انا بخرف باين  ، خلاص كده كفاية  ، و انا اسف يا جميله  انتي مش وحشه ولا استغلاليه انتي انسانه كويسه وتستاهلي فرصه عشان تكملي تعليمك وتوصلي للي انتي عاوزاه   ،  ف مبروك علي العريس روحي ودي هتكون اخر مكالمه 

_ شبل استني.... 

قفل ولما رجعت اكلمه لقيته عامل حظر 

#وفاء 

صحيت بدري وانا حاسه بسعاده لا توصف  ودخلت غسلت وشي وبدات تنضيف البيت  وانا نفسي قوي اشغل اغاني وارقص بس كنت محرجه من بابا اللي  لقيته  داخله عليه وبيقولي  

_ صاحيه بدري يعني 

سيبت القماشه وقولت وانا حاسه بالخجل منه 

_ أبداً بس لقيت المكان مش نضيف ف قولت أصحي بدري قبل معاد الشغل 

_ ايوه فعلاً  ،  طيب هنتكلم في موضوع العريس اللي طلعلنا في المقدر ده ولا هنخلي بيجاد وسيط بينا 

_ اتفضل 

_  انتي عاوزاه بعد كل اللي حصل 

_ اللي تشوفه حضرتك 

_ لا مش اللي اشوفه انا كده كده مش موافق  ،  انتي هترتاحي معاه 

خدت نفسي وقولت بعد ما استجمعت شجاعتي 

_ يا بابا بدر شخص كويس ومتعلم وطيب  وحكيم  مفيش حاجه تنقصه  ولو علي اللي حصل ف اهو اكرمني وممسنيش بأي اذا وانا في بيتهم  ولما بيجاد رجع سابني ارجع معاه وطلقني من غير شوشره 

_ اه بس خطفك وفضحنا قدام الناس

_ عارفه ان ده غلط  كبير بس دي عادات مش بأيده  كان كل همه يلاقي اخته  

_ وانتي وانا ذنبنا إيه  اهي طلعت اتقتلت منهم وفيهم انتي تتخطفي ليه  ،  وبعدين هتعيشي ازاي في الجو ده  هتسيبي شغلك ومستقبلك اللي تعبتي سنين علشان تعمليه وتروحي تعيشي في مكان زي ده 

_ يا بابا بدر مش هيقعدني من الشغل وكمان هو ساب بلدهم ومش هيرجع تاني وهنعيش هنا او في اسكندريه 

_ افرضي قال هرجع 

_ يا بابا افهمني بدر بيحكم النجع ومسؤليته مكنتش تقل عن رئيس دوله وبيقوم بيها يمكن احسن من مجموعة من الحكام انا كان اعتراضي عن عاده واحده عندهم وبس ولكن هو قالي انه ممكن يتخلي عنها لو كانت تخصه وهي جواز البنات بره   

_ ايوه يعني لو قالك هنروح هتروحي معاه 

_ مظنش انه هيرجع 

_ ولو رجع 

_ وقتها نبقي نشوف 

_ ده انتي عندك استعداد تروحي معاه اهو 

_ لا يا بابا  ، هو اصلا مش هيرجع

_ واضح اني مش هلاقي لا حق ولا باطل معاكي  ،  واضح كمان انك متمسكه بيه ومش هقدر عليكي 

_ بابا انا اسفه بس... 

قال بمقاطعه 

_ خلاص يا وفاء  دي حياتك  

_ والله هتحبه بجد 

_ مش مهم انا احبه المهم انتي  ، والمهم يحافظ عليكي  ،  انا لو مش خايف اظلمك تاني مكنتش وافقت أبداً  

قال كده ومشي وبعد شويه جت كاريمان تساعدني ولما سألتني مالك قولتلها ف بقت تطمني انه هيجي يوم ويحبه والحقيقه ان مكنتش هضيع فرصه تجمعني ب بدر علشان قلق بابا ف هديت ورجعت اكمل اللي بعمله وبعد وقت جه بيجاد وقالي

_ بدر ساعة ويوصل 

وشي احمر من الكسوف واتوترت ف قالت 

 قالت كاريمان 

_ انتي لسه هتلعبي في صوابعك اجري ظبطي نفسك وانا هخلص كل حاجه 

_ ماشي 

جيت امشي ف وقفني بيجاد وقال بإبتسامة 

_ ربنا يتملك علي خير ويسعدك 

قولت وانا بحضنه 

_ حبيبي ربنا يخليك ليا وافرح بيك قريب 

بعدني عني وقال 

_ يلا قوام اجهزي 

سيبتهم ودخلت اوضتي استحميت وجهزت بسرعه  ومحطتش غير كحل  وروج بسيط جدا  وبقيت مستنيه علي احر من الجمر وهو كان  لسه مجاش ومكنتش عارفه انا اللي مش  صابره ولا  هو  اللي اتاخر ف دخلت عليه كاريمان وقالت وهي بتصفر

_ اوعااا ايه الجمال ده  

قولت بإبتسامة واسعة

_ بجد حلوه 

_ قممممممر مع انك لابسه ازبل  لبس عندك بس موزه يا بنت الأيه  ، انا كده فهمت سبب حلاوتك طبعاً بتحبي واحد صعيدي  والصعيدي بيحبك واللي صعيدي يحبها يبقي يحزنها يا غلبها يا نيلتها السوده يا مرارها الطافح   ، بقولك  ما تشوفيلي عريس من عندهم نفسي اجرب احساس الغلب ،  اقولك شوفيلي اخوه الاسمريكا ابو دقن اسود اللي جه قبل كده 

_ايييييه  ،  اااافصلي ده المكن بيفصل  

_ وانا مال امي بالمكن هتشوفيلي عريس ولا لا 

_ يابت اكتمي  ،  قوليلي حلو كده ولا احط ميكاب تاني 

_ لا كده حلو  ربنا يحفظك  ويسعدك ويديكي ويرضيكي  تجيبلي عريس من هناك  علشان امشي معاه اصيد الناس بالبندقيه  ،  مش هما بيصدوا في الناس في وقت الفراغ بردو 

_ يصيدووووا  ،  ليه عصافير  بت ابعدي عني  انا متوتره 

بقت ترغي ترغي لغيت ما الجرس رن وفجأه ملقتهاش قدامي اختفت  وبعد دقيقة رجعت تقولي 

_ بت بت الحقي ده جايب جاتوه و ورد  انا كنت بجري علشان استلقي قفص الفراخ وحزمتين قصب وصندوق فلوس بس طلع جايب ورد وجاتوه  ،  الراجل ده مبوظ منظر الصعايدة في عيني مش عارفه ليه  

قولت بتوتر 

_ هو بجد  

_ اه والله هو  وهجري اعمل قهوه علشان تقدميها 

مشيت وسابتني وانا وقفت عند الباب وفتحته براحه وشوفته قاعد مع بيجاد وبابا وبقيت بصاله وابتسامتي علي وشي وفجاه الباب اتفتح اتقلبت علي ضهري ودخلت كاريمان ولما شافتني صرخة 

_ وفااااء حصلك ايه ياااالهوي 

_ اااه يابت الغبيه  ، اشششششش 

جه بيجاد وقال 

_ في ايه مالها وفاء 

مسكت ايدها وقومت وانا بقول 

_ بت العبيطه وقعتني 

قالت بصوت عالي 

_ وانا ايش عرفني انك واقفه ورا الباب بتتفرجي علي الذئب 

قرصتها ف قالت 

_ اااه اقصد بدرررر 

قال بيجاد 

_ طيب عيب كده الراجل يقول علينا إيه   روحي اعملي قهوه وتعالي سلمي 

قالت كاريمان بنفس مستوي الصوت

_ لا ما انا عملتها  ،  تلات فناجين قهوه نصهم وشوش 

بصتلي وانا بصك علي اسناني من غيظي منها ف قالت بصوت واطي

_ مالك في ايه  ،  يلا علشان توديلهم القهوه 

قال بيجاد 

_ بعد ايه انتي فضحتينا كلنا 

_ ربنا يسامحكم  ولا ميسامحكمش  بقا داخله اشوف القهوه 

سابتنا ومشيت ف قولت لبيجاد

_ بقولك ايه ما تجوزها وتعقلها 

_ بقولك ايه انتي اخلصصصصي 

قالها ومشي وانا استنيت شويه لغيت ما جت كاريمان وفي ايدها صينيه القهوه  

_ يا شيخه ينتقم منك انتقام الجبابره  ،  يابنتي هتنقطيني اقدمها ازاي انا دلوقتي  

_ اوووبس تصدقي صح 

_يارب ياخدك 

_ ما هياخدني يابنتي طال العمر او قصر هياخدني انتي هتعملي فيها الشيخة خضره خلصي امشي قدامي  ابو ام اللي يقدملكم مساعدة 

بقيت ماسكه نفسي بالعافيه علشان مدلقش القهوه في وشها وبعدين خدت منها الصينيه وطلعت وانا مش عارفه هيقول عليه إيه  ولما بيجاد شافني قام خد مني القهوه وحطها علي التربيزه وقالي سلمي  

#بدر 

مش عارف ايه اللي فيها مش بيخليني اقدر اشيل عيني عنها طول ماهي قدامي  حتي وانا قاعد وسطهم وفي وجود ابوها واخوها عيني جريت عليها من اول ظهورها  وبعد ما جت تسلم عليه قومت وحطت يدها في يدي وبقيت باصصلها وانا بسألها عامله ايه وشايف  وشها اللي بقا لونه احمر من الكسوف والتوتر  وبعد ما خطفت مني يدها ولفت لفه حولين نفسها بربكه شديدة  شدتها كاريمان وقعدتها وهي بتقول

_ كفايه لف اقعدي دوختينا  ،  اسفين بس هي كده لما بتتوتر  بتبوظ كل حاجه  طبعا  حقها دي..... 

بصلها خالها بحده ف قعدت من غير ما تضيف كلمه تاني  

  وبعد ما اتكلمت  وطلبت يد وفاء قولتلهم ياخدوا وقتهم في التفكير ف قالي بيجاد 

_ وقت إيه  هو احنا لسه هنعرفك  ،  موافقين طبعاً 

حسيت بعدم الرضا من ابوها ولكن اكد علي كلام بيجاد وقال موافقين  وهنا زادت ابتسامة وفاء قبل ما تقوم وتدخل  

# وفاء  

كنت طايره من الفرحة والدنيا كلها مش سيعاني  ومع كده روحت الشغل في معادي وقولت للبنت ان اي كشف النهارده ببلاش  وبعد دقايق جت وعلي وشها ابتسامه و قالتلي في حاله بره ف قولت 

_ ياسلام اشمعنا النهارده جت الزباين من اول اليوم  ،  دخليه 

مشت وبعد دقيقة دخلت وقالت بإبتسامة 

_ اتفضل 

قومت من مكاني وقولت بذهول 

_ انت!!! 

بصيت للبنت وقولت

_ روحي انتي  

مشيت وهو دخل وقال بإبتسامة 

_ جيت الاعاده  ،  ينفع ولا راحت عليه 

خرجت من ورا المكتب وقولت وسعادتي باينه في عنيه 

_ ولو مينفعش ننفعه  ،  اتفضل  اما نشوف الكلبشه خفت ولا لسه 

اتقدمت خطوه ناحية سرير الكشف  ف وقفني قدامه وقال 

_ استني  

_ ايه 

_ خليها شويه   ،  قوليلي  مبسوطه بالخطوه دي 

_ مبسوطه بس  ،  كلمه مبسوطه قليله قوي علي احساسي دلوقتي  انا طايره من السعادة  ،  فرحانه قوووووي 

طال سكوته وعنيه بتتأمل وشي قبل ما يقول 

_ وانا مبسوط بس خايف 

تلاشت ابتسامتي وانا بقول 

_ خايف ليه 

_ خايف لأن الدنيا عمرها ما رضيت عني لدرجة دي  ، معقول ابوكي يوافق بسرعه دي  ، انا كنت متوقع ان الصعوبه هتكون في رفضه  ودلوك مش عارف العقبه هتكون فين 

_ ربنا ميجبش عقبات  ،  انا فاهمه احساسك لأن انا كمان حاساه  بس ان شاءلله مفيش حاجه هتحصل  

_ طيب إيه رايك نعجل بالفرح  ، الشهر الجاي زين 

_ مش بدري شوية 

_ له انا اقدر اجهز كل حاجه في الشهر ده  ،   وكل اللي تحتاجوه انا هجيبه   ،  مش عاوز أآجل كتير 

قولت بإبتسامة 

_ ماشي نشوف الموضوع ده مع بابا وبيجاد  

قال بتنهيده

_ يارب 

_ مالك بس في ايه  ليه كل القلق ده 

_ بقولك الدنيا عمرها ما رضيت عني  ،  بصراحه قلقان قوي 

_ مفيش حاجه هتحصل  ،  اهدا ولا انت بتتلكك علشان تسيبني 

_ ده انا متلكك علشان اجي اشوفك  ،  بس ادعي كتير متبطليش دعا غير وانتي في بيتي 

_ ربنا يجمعنا مع بعض علي خير  

_ يارب 

كمل بإبتسامة 

_ طيب  يلا عشان تكشفيلي 

_ اكشفلك علي ايه

_ مش عارف اهو نعمل حاجه بالفلوس اللي سحبتها مننا الممرضه   ،  علي فكره انا ادتلها حق كشف جديد 

_ هههههههه ماشي اتفضل 

اتمدد علي السرير وانا وقفت جمبه وبدات افكله زراير القميص ف بصلي بنظره كلها مكر ف قولت بربكه

_ في ايه 

_ ولا حاجه اكشفي 

_ طيب نزل عينك 

_ حاضر 

نزل عينيه وانا لامست صدره بالسماعه ف رجع يبصلي نفس البصه  وفجاه بيمسك ايدي ويضمها لصدره ويقول 

_ اكشفي زين مدفعش فلوس وخلاص 

قولت بإبتسامة وانا بحاول افلت ايدي منه

_ طيب سيب ايدي وعيب اللي انت بتعمله ده 

_ مانتي اللي مبتعرفيش تكشفي 

شديت ايدي منه وقولت وانا برجع لمكتبي

_ طالما مبعرفش اكشف ف متجيش تكشف عندي تاني  

قال وهو بينزل رجليه وبيقعد 

_ ايوه بس انا دافع حق الكشف 

_ هههههه خده انت وماشي 

جه وقف قدامي وقال وهو بيسند ايديه علي المكتب  

_وفاااء 

_ افندم 

_ وفاء 

_ اااافندم 

_  يلا اكشفيلي احسنلك 

ربعت ايديه قدامي وقولت 

_ مش هكشف 

_ يعني مش هتكشفي 

_ ههههه لا 

اتعدل وقال 

_ حيث كده مقدميش غير حل واحد 

_ هههههههههه هو ايه 

_ امشي واخد حق الكشف 

_ هههههههههه 

طال سكوته وهو بيبصلي بإبتسامة ف قولت 

_ إيه 

قال بإبتسامة 

_ كنت بقول منتقابلش تاني غير يوم الفرح  ، او متضحكيس قدامي  ولا تبصيلي غير لما نتجوز 

قولت بإبتسامة 

_ اشمعنا 

_ اممم علشان....  ولا اقولك مش مهم انا ماشي  ،  سلام 

_  لحظه 

_ ايه 

_  اممم  ،  ما...  اه مقولتليش شعر انت النهارده 

_ وانتي مكشفتليش  واكده متعادلين  ، يلا هنمشي  ، ولا هتعرفي تروحي وحدك  ، يبقي هتعرفي   

_ هههههههههه ماشي عيد براحتك  هيجي دوري 

قال بإبتسامة 

_ هكلمك خلي الواتس مفتوح

_ ماشي 

مشي وبعد شويه وصلتني رسالة منه ولما فتحتها لقيته بعتلي قصيدة بتقول  

_ ‏أخفيك عنهم بعيداً .. بين أعماقي

       ويفضح الحب لوعاتي وأشواقي..!

و أخبر الناس أن لا عشق يسكنني ،

        و يقرؤونك في صمتي ، وإطراقي...

ملبس بك مسحورا ، طغا شجني 

       و لم أجد لي في طب الهوى راقي..!!

أقول إني بريئً منك ، عن ثقة

       و يلمحونك في وجهي ، و أحداقي .

رديت عليه وقولت 

_ ههههه فيك حاجه غريبه من وقت ما خطفتني اخر مره   

_ خسرت وقاري يعني ولا ايه 

_ لا بس بقيت بتعمل حاجات غريبه وبتصدمني 

_ ولا غريبه ولا حاجه  ده انا  ، معاكي انتي بذات انا بكون بطبيعتي  

_ اشمعنا انا 

_ علشان بحبك  

زادت ابتسامتي وانا بقول 

_ مش أكتر مني  

#بدر 

علي قد السعادة اللي حاسس بيها علي قد ما انا خايف وقلقان من ان تحصل حاجه تمنع جوازنا  ،  وبتمر الأيام وانا خوفي بيزيد لكن هي في كل مره بتطمني وتقولي من " اعتاد القلق ظن الطمئنينة فخ " وتقريبا عندها حق انا خايف لاني مجربتش الفرح تقريبا  وعشان اكده مش مصدق ان الدنيا ممكن تبتسملي من كتر المطبات اللي وقعت فيها  

#ورد 

جه يوم الفرح وهو طول الأيام اللي فاتت مبيتكلمش كلمتين علي بعض وكل ما احاول اقربله  يقولي سيبيني لوحدي لغيت ما زهقت ف دخلت عنده لقيته بيغير ف قربت وقولت 

_ عاوزة اتكلم معاك 

_ البت اللي هتزوقك قربت توصل  روحي شوفي هتعملي ايه 

وقفت قدامه وقولت بنرفزه 

_ تزوقني ليه  ،  ده شكل واحد فرحه النهارده  مبلاش منها احسن وخلينا اكده  ،  انا مش هلبس الفستان ولا هتزوق   

قولت اكده ومشيت ودموعي في عيني  وبعد شويه جه وقعد جمبي علي السرير وقال والحزن ماليه 

_ متزعليش انا شويه وهرجع زي الاول 

_ مش باين  ،  ابقيها من الفرح مفيش عريس بيكون زعلان قوي اكده  ، انا معوزاش افراح 

سكت شويه وبعدين اتنهد بعمق وقال 

_  انا عايز  يلا قومي  ،  ولما تخلصي هتلاقيني رجعت زي الاول واحسن وده وعد  ،  يلا المره زمانها جايه  

قال اكده وقام وبعد شويه جت الكوافيره وكملت ساعتين وهي تلون في خلقتي  ،  وبعد ما خلصت ورتني شكلي في المرايا  وبصيت لنفسي من غير اي اهتمام  مكنش في  فرحه ولا  حاسه  باي حاجة حلوة ممكن  تحصل في  المسخره اللي هتحصل  وبعد شوية  قالتلي ادي ضهري للباب علشان العريس هيجي يشوفني  ف وقفت زي ما قالت  وبعد دقيقة لقيته جاي وبيوقف قدامي ف قالت  

_ حرام عليكي بوظتي اللحظة كنتي طلعتي عينه شويه   

_ ماهو كان هيشوفني لازمتها إيه 

رجعت ابصله لقيته مبتسم ابتسامه باهته راسمها غصب عني  بيقولي 

_ اجمل عروسه شافتها عيني 

_ من قلبك 

_ من قلبي امال ايه   ، انا  مشوفتش عروسه اجمل منك في حياتي 

_ وهكون اجمل لو ضحكت  يا عبيده

زود ابتسامته وقال 

_ هضحك وهرقص كمان  ،  يلا عشان عم محمد والبنات مستنين 

دور دراعه ف تجاهلت حركته دي وحضنته وقولت 

_ لو صح بتحبني كفاية زعل  ،  امانه بلاش زعل النهارده بذات 

ضمني وقال 

_ حاضر  مفيش زعل 

حب علي راسي ومسك يدي وقال بإبتسامة 

_ يلا بينا 

نزلنا تحت واهناك لقينا عم محمد وسلوي وهبه وبناته الباقين  ومعاهم عيالهم وبشر وزيد  ومن اول ما شافونا بقوا يزغرتوا ف قال عبيده بإبتسامة 

_ شوفتي مش قولتلك هما كفاية  

_ ههههه كفاية قوي 

سلمنا عليهم كلهم والبنات حضنوني وجيت عند سلوي وطال حضنها ليه ولما بعدت ورجعت ابص ل عبيده لقيته حاضن شبل اللي بقاله كام يوم مجاش وبعدين بيبعد عنه ويقول 

_ ده انا قولت انك انت كمان خاصمتني 

_ اخاصمك ايه يا عريس  كنت تعبان شويه  واديني خفيت 

_ الف سلامه عليك 

_ الله يسلمك  ،  الف مبروك يا ورد 

_ الله يبارك فيك  

#عبيده 

لاخر لحظه وانا عندي امل انه يجي ومجاش ف كملت طريقي وقررت مزعلش دقيقة تاني  علشان ورد قبل اي حاجه  ،  وبقيت طول الوقت مبتسم لكن من جواي زعلان  منه  ومش عارف كيه طلع قلبه قاسي اكده ومرقش دقيقة  ولا قال اروح اقف معاه في اليوم ده وبعدين ارجع ازعل  زي ما انا عاوز..

 وبعد ما وصلنا القاعه ودخلنا بدات الفرقة الموسيقيه تعزف والعيال يرقصوا  وانا عيني علي مدخل القاعه مش قادر اشيلها ف لقيت بيجاد وفارس وابو وفاء داخلين وجاين ناحيتنا ف قومت وسلمت عليهم ومع اني مش بطيق بيجاد بس جيته بسطتني عشان ورد تحس انها عروسه بجد لما تلاقي الفرح مليان ،  ومش بس بيجاد اللي بسطني  وجلال كمان اللي بعد دقايق لقيته داخل ومعاه كام  واحد من الغفر داخلين علينا وبيباركوا وبعدين بيوقف   في النص ويقول وهو ماسك العصايه 

_ ايه المزيكا دي شغل مزمار صعيدي ياد 

قال شبل 

_ انا  قولت مفيش غير جلال هو  اللي هيحي الفرح ده  

_ امال ايه  صبرك عليه  ،  ما تزمروا فيه ايه 

قولت 

_ هههههه هترقص بالعصا  

_ ايوه امال إيه  ،  هات العصايه ياد هنرقصوا العريس الاول  

خد العصايه من واحد من الغفر وادهاني وقالي 

_ ارقص يا عريس  الليله ليلتك 

مسكتها منه وقولت وانا شايف الكل بيعملوا دايره حولينا وابتسامتهم ماليه وشوشهم 

_ دقيقة انتوا مين قالكم 

بص لشبل اللي زادت ابتسامته وقال 

_ اللي قالنا عاد  

بصيت ل شبل وقولت 

_ انت اللي قولتلهم 

اشر بعنيه ناحية الباب ولما بصيت لقيت.... 

           الفصل الخامس والستون من هنا 

   لقراءة باقي الفصول من هنا

تعديل المقال