رواية ذئاب لا تعرف الحب الفصل السادس والستون66والسابع والستون67الاخير
بقلم نجمه براقه
وفاء
من وقت اتجوزت مشفتهوش وكل ما اكلمه واطلب منه يجي يزورني يقولي مشغول ويتحجج ب أي حجة علشان ميجيش وبعد شهر واحد من جوازي كلمني بابا وقالي
_ مال اخوكي؟
_ ماله يا بابا؟
_ من وقت ما اتجوزتي مدخلش البيت والنهارده جه خد اللي ليه ولما سألته ليه والحيت عليه في الاسئله قالي انه مسافر بره مصر بسأله ليه قالي مليش عيش هنا
_ مسافر بره مصر
_ ايوه هو اللي قال كده
_ طيب يا بابا هكلمك تاني
خلصت مكالمتي مع بابا واتصلت بيه ومكنش بيرد ف قولت ل بدر هروحله وافق وخدني وصلني هناك ومشي وانا خبطت الباب وفتحلي و قالي وهو داخل تاني
_ تعالي
_ ايه المقابله دي ، مالك
رد وهو مكمل طريقه لاوضته
_ مالها المقابله ، المفروض اعمل ايه يعني
_ ده انت شكلك زعلان مني بقا ايه الحكاية ، وايه موضوع السفر دة؟
مردش ف دخلت وراه لقيت شنطه علي السرير
_ إيه ده يا بيجاد ، انت مسافر بجد
قال وهو بيكمل لم حاجته في الشنطة
_ اه
_ ليه؟!!
_ لقيت شغل بره مصر
_ وانت مكنتش لاقي شغل هنا يعني
مردش ف مسكت منه القميص وقولت بنرفزه
_ كلمني وبعدين كمل اللي بتعمله
وقف وقال ببرود
_ عاوزه ايه
_ عاوزه اعرف مالك ، ايه مخليك عاوز تسافر وايه مغيرك معايا ده انا من وقت ما اتجوزت مشوفتكش
_ وانتي عاوزة تشوفيني ليه
_ يعني ايه عاوزه اشوفك ليه ، مالك يا بيجاد
قال بنرفزه
_ مااالي!
رجعت خطوه بفزع من زعيقة وقولت
_ في ايه
_ في ايه انتي ، مش خلاص اتجوزتي بدر عاوزه مني إيه تاني
بقيت ساكته بصاله وانا مش مصدقه اسلوبه اللي بدء يتحول وهو بيكمل كلامه
_ انا قولتلك قبل كده لو اتجوزتي بدر هتخسريني
_ انت بتقول ايه
_ بقول ان انا وبدر مننفعش نكون في حياتك يا انا يا هو
_ يا نهار اسود، بيجاد انت هتجنني انت اخويا وهو جوزي ايه اللي بتقوله ده ، انت فاهم معني كلامك
_ اسكوتي اسكوتي ، انتي اللي مش فاهمة ، مش عاوزه تفهمي ، وعشان اريحك من اللي جه في بالك
بقيت بصاله مستنيه يفهمني معني كلامه ويخرجني من الافكار اللي اتحطيت فيها بسببه كلامه اللي كان قادر يشل تفكيري ف قال
_ انا قولتلك لو كلمتي بدر مش هتحضري جنازتي واديكي اتجوزتيه ، تجاهلتي كل اللي حصل ، وتجاهلتي وجعي علي فاطمة واتجوزتيه ، عارف هتقولي انت اللي جوزتني ليه وكنت موافق ، وفعلا انا اللي جوزتك وكنت موافق بس علشان اكفر عن غلطي في حقك، وعشان متحسيش احساسي بفقدان فاطمة ، بس انتي مفكرتيش فيه ، كان المفروض ترفضي وتفهمي ان عمري ما هنسا ان هو السبب في موتها وعمري ما هحبه ، كان لازم تفهمي اني مش هقدر استحمل انه بعد كل ده اتجوز اختي بكل سهوله وناهيكي عن اللي بيحصل بينكم في البيت ، انتي مفكرتيش فيه يا وفاء ، وعشان كده انا همشي ، همشي علشان مش هقدر اشوفكم سعداء مع بعض زي اي اخ بيتمني يشوف اخته سعيدة مع جوزها ، همشي علشان انا لغيت دلوقتي ماسك نفسي بالعافيه علشان مبوظلكش جوازتك منه
كمل بصوت مخنوق
_ همشي علشان مش عاوز اشوفك ولا اشوفه ، هعيش لوحدي بعيد مع فاطمه اللي رغم موتها بس متخلتش عني مش زيك وزي ابوكي وابويا وكل اللي في حياتي
_ بيجاد
_ متقوليش ولا كلمة امشي وانسيني ، انا مبقاليش اخوات
قولت بصوت مخنوق
_ بيجاد علشان خاطري اهدي وخلينا نتكلم انا مكنتش فاهمه كده انت مقولتليش انك لسه كارهه
_ وانتي صغيره علشان متفهميش ومتحسيش باللي انا ممكن احس بيه وباني كل ما هشوفه هفتكر اللي حصل ، خلاص يا وفاء ، خلاص، انا عملت اللي يرضي ضميري وانتي اخترتيه هو ف خليكي معاه وعيشي حياتك معاه وانسيني ، يلا علشان همشي واقفل الشقة
قال كده ومسك دراعي علشان يخرجني ف قولت
_ بيجاد استني!! هنتكلم
قال وهو بيشدني
_ مفيش كلام ينفع يتقال ، حتي لو اطلقتي انا مش هقبل اي كلام هتقوليه ، اطلعي بره روحيله وانسي ان ليكي اخ
قولت ببكا
_ علشان خاطري اسمعني يا بيجاد مينفعش اللي انت بتعمله ده
خرجني بره وقال
_ انا قولتلك يا وفاء لو اخترتيه مش هتحضري جنازتي واهو انا مسافر وحتي جنازتي مش هتعرفي هتحصل امتي
قال كده وقفل الباب ف قولت وانا بخبط
_ بيجاد حرام عليك! يا بيجاد!!! افتح خلينا نتكلم مش هسيبك تمشي ، افتح ارجوك ورحمة ماما تفتح انا مقدرش اعيش من غيرك
مردش وانا استمريت في الخبط لغيت ما خرج بشنطه ف وقفت قدامه وقولت ببكا
_ ورحمة ماما تستني انا مش هقدر اعيش من غيرك
مردش وكمل طريقة متجاهل كلامي وترجيه ليه لغيت ما وصل العربية ودخل الشنط ولما جه يدخل وقفت بينه وبين العربيه وقولت وانا لسه ببكي بحرقة
_ هتسيبني لوحدي
_ ابعدي الطياره هتفوتني
_ مش هبعد غير لما نتكلم ، ارجوك يا بيجاد خلينا نتكلم
_ مش هنتكلم يا وفاء ، مفيش اي كلام هتقوليه هيمحي ان عدوي واللي حرمني من فاطمه ...
سكت شويه وبعدين قال
_ مفيش حاجه هتمحي ان عدوي خدك ، او بمعني اصح نام معاكي ، مع اختي اللي سلمته نفسها بمزاجها
وسعت عينيه بصدمه من كلامه ف قال وهو بيبعدني
_ جبتهالك من الاخر اهو ارجعيله وانسيني بقا ، اه وحاجة اخيرة ، كل ما تفتكري اني اتخليت عنك افتكري انك انتي اللي بعتيني الاول عشان بدر
قال كده ودخل العربيه وانا عجزت حتي عن اني اتكلم تاني وامنعه وبقيت واقفه وانا شيفاه بيمشي بالعربيه ولما رجعت البيت مقدرتش اقول ل بدر اللي حصل وقررت اسكت ومجبش سيرة وبتعدي الأيام والشهور وبتعامل مع بدر طبيعي وبحاول مبينش زعلي و واضح اني فعلاًبقدر اداري لدرجة ان بدر مخدش باله او يمكن قلقة بسبب تأخير الحمل لاهيه
بدر
عدت الأيام والشهور ومكنش لسة في حمل وعلي قد سعادتي مع وفاء كان قلقي اني اكون مبخلفش وبسبب اكده مكنتش قادر ارتاح وبيزيد قلقي مع كل شهر بيعدي من غير ما يحصل حمل وبعد سنه 11 شهر و10 ايام بالظبط اتغيرت فيهم حاجات كتيره ، زي اني بقيت اشتغل ، ومرت عبيده حملت وبشر دخل المدرسة وشبل رجع كُليته وبيجاد سافر بره مصر واتقطعت عننا اخباره رجعت البيت بعد يوم طويل من التعب لقيت وفاء مستنياني ومجهزه عشا رومانسي علي ضوء الشموع وموسيقي هاديه وبتستقبلني بحضن زي عادتها وبعدين بتمسك يدي وتقولي
_ تعاله
رجعتها ليه وقولت محاوط وسطها بدراعي
_ إستني بس ، تعالي هنا وفهميني ايه الحلاوة دي
قالت بدلال
_ يعني انا مكنتش حلوه قبل كده
_ طول عمرك حلوه بس اللبس والتسريحه الجديده والأكل والشموع كل ده وراه طلب
_ههههههه مش كانت بتتقال وراه سر
_ يعني وراه سر
_ امممم تعاله وبعدين هقولك
_ استر ياللي بتستر ، طيب انا هدخل اغير علشان مش طايق هدومي واجيلك علشان باين اكده سر طويل ومحتاجله قعدة
_ ماشي حبيبي الحمام جاهز
بوست جبينها ودخلت استحميت وطلعت لقيتها قاعده علي الكرسي ومميله بدماغها علي الطربيزه قربت منها وقولت وانا بحط يدي علي ضهرها
_ مالك يا وفاء
اتعدلت وقالت
_ مفيش سلامتك يا حبيبي تعاله اقعد
_ اقعد إيه فهميني مالك
مسكت يدي وقالت
_ اقعد بس
قعدت موجه نفسي ليها وقولت وانا ماسك يدها وبلمس جبينها باليد التاني
_ انتي تعبانه
ابتسمت وقالت
_ ايوه
_ إيه تاعبك
_ دايخه بقالي كام يوم
_ طيب ومقولتيش ليه ، يلا البسي هوديكي لدكتور
_ ما انا دكتورة واعرف مالي
_ بردك قومي هوديكي ونطمنوا
قالت بإبتسامة
_ بقولك عارفة مالي
خدت يدي وحطتها علي بطنها وقالت بإبتسامة
_ ده اللي تاعبني والسبب في الدوخه ، ده اللي مطلع عيني من اول شهر زي ابوه
بقيت لدقيقة باصصلها بحاول استوعب ان اللي فهمته صح ف قالت وابتسامتها علي وشها
_ مفهمتش ، انت هتكون اب ، انا حامل
وفاء
متكلمش ودموعه ظهرت وهو بيلمس بطني وعينه عليها ف قولت وانا بحط ايديه علي وشه
_ مالك يا حبيبي في ايه اهدي
رجع بصلي وقال ودموعه بتزيد
_ بتتكلمي جد
_ اه والله جد ودي فيها هزار
مكنش قادر يتكلم افتكر ان اي كلام كان هيقوله في اللحظة دي مكنش هيجي حاجه في اللي كان حاسه ، حضني وبس ، وكنت حاسه بدموعه لسه بتسيل وبعد دقايق وهو علي الحاله دي بعدت عنه وقولت وانا بمسح دموعه
_ انا كنت عارفة ان تأخير الحمل كان موترك ومخليك قلقان طول الوقت ، بس اهو حصل دلوقتي تقدر ترتاح
مسك ايدي باسها وقال بنبرة مهزوزه
_ الحمدلله ، الحمدلله ...
خد نفس عميق وقال بتوتر
_ مش عارف اتكلم
_ هههههه حاسه بيك
رجعت حضنته وقولت
_ انا لما عرفت اني حامل مفرحتش لنفسي فرحت ليك انت وقولت انك اخيرا هترتاح من التفكير والقلق والخوف اللي كنت حاسس بيه مع كل شهر بيعدي وميحصلش حمل
قال بعد ما بعد عني
_ احنا مطولناش ، سنه متعتبرش تأخير ، بس انا كنت قلقان اني اطلع صح مبخلفش .. الحمدلله الف حمد وشكر ليك يارب
قولت بإبتسامة
_ الحمدلله
مسح دموعه وقال
_ الحمدلله
خد نفس وكمل
_ ومدام ربنا رزقنا هطلب منك طلب
_ اؤمر
_ تاخدي أجازة من الشغل
_ اجازة ايه ده انا بفكر اسيب الشغل كله بسبب قلة الكشوفات منظري بقا بايخ قوي
_ مفيش اجمل من منظرك بس عشان الحمل يكمل علي خير
_ حاضر ، انا كنت هاخد اجازة من غير ما تقول
عبيده
عدت سنه تقريباً وانا كل اللي كان هممني ان بدر يخلف، كنت كل يوم بستني اسمع ان وفاء حامل وكأن انا اللي هكون اب بعد صبر سنين ولكن محدش جاب سيرة ، ولسبب ده انا محستش بفرحة لحمل ورد بالعكس انا زعلت انها حملت قبلها وعدت الشهور و وصلنا ليوم الولادة و وديتها المستشفي وقالولي انها ولاده فعلاً بس لسه شويه ف خليتها هناك ورجعت جبت غيارات ليها هي والعيل كانت هي مجهزاهم من اول الشهر التاسع وفي طريقي اتصلت ب شبل وقولتله وبعد ساعة ولا اكتر جه هو وبدر علي المستشفي ف قولت لشبل
_ ليه قولتله ياخي
قال بدر بعتب
_ ليه قالي! ده انت ضميرك كالح ياخوي
_ مش قصدي بس انت اكيد كنت في شغلك مكنتش عايز اعطلك
_ لا عطلني ، ايه الاخبار عملت ايه
_ لسه شويه
قال شبل
_ قالولك هتحتاج عمليه ولا طبيعي
_ طبيعي ان شاءلله
_ الحمدلله ، ربنا يقومها بالسلامه وتفرح بشوفت ابنك
_ يارب
قولت بتردد
_ عقبال ما تفرحوا بشوفة عيالك ياخوي
ابتسم ولمعة عينيه بفرحة اول مره اشوفها من يوم فرحه وقال
_ يارب
بصله شبل وكأنه لاحظ اللي انا لاحظته وقال
_ ايه
سكت وابتسامته علي وشه ف قولت بذهول
_ طيب قول والله
_ ههههه والله بس والله علي ايه
قال شبل
_ مراتك حامل
هز دماغه ف قولت
_ طيب احلف بالله انه حصل
_ هههههههه والله حصل انا كنت هجيلكم واقولك
_ ميته كنت هتقول ، ياخي حرام عليك
قال شبل
_ مش مهم المهم انك هتكون اب ، الف مبروك ياخوي
#شبل
قولت كده وحضنته ف قال وهو بيضمني
_ امين يارب ، عقبالك يا شبل
_ عقبالي ايه؟ احمل؟
_ تبرد.. تجوز ونشوف عيالك يا بارد
مردتش علي كلمته وقولت
_ قولي هي في الشهر الكام دلوقتي
_ في الشهر الاول
_ ربنا يكملها حملها علي خير ، يااااه مش مصدق اني هكون عم واضرب ابنك
_ تضربه!! ده انا كنت اموتك ، ما قدامك عيال عبيده من زمان مضربتهمش ليه
_ مزاجي اضرب ابنك ، انت مالك ولا ايه يا عبيده ، هتضرب معايا صح
مردش ف رجعنا بصناله لقيناه داير لينا ضهره ف قال بدر
_ متقلقش هتقوم بالسلامه
قال من غير ما يبصلنا
_ ان شاءلله ، هروح اشوفها
مشي ف قال بدر
_ باين عليه قلقان عليها قوي
_ لا ده فرحان ليك انت وخايف نشوف دموعه ، هو طول الفتره اللي فاتت كان بيسأل باهتمام اذا كنت سمعت ان مراتك حامل ولا لا
ابتسم وبعدين رجع بصله وهو بيبعد وقال
_ ايوه ، كان خايف ان ميحصلش حمل ويفضل مشيل نفسه ذنبي
_ صح
_ حتي لو محصلش هو مذنبهوش حاجه انا كشفت والدكتور قالي اقدر اخلف بس هو النصيب وامر ربنا ، الحمدلله علي كل حال
_ الحمدلله ، طمني هي عامله ايه
_ كويسه الحمدلله ، قولي إيه اخبارك انت عامل ايه في الكُليه وايه جايبك دلوكتي
_ زهقت من العيال اللي في السكن ف جيت اسبوع وهروح تاني
_ مش هي دي العيال اللي كنت طول الوقت معاهم
_ لا مش هما التانين اتخرجوا دول ناس غيرهم
_ بيضايقوك
قولت بتنهيده
_ لا انا اللي مبقتش احب اقعد مع حد
_ ليه يا ولدي هتعمل متعقد ليه
_انا مش عامل متعقد انا متعقد فعلاً
_ ليه يا فقري ، متضايق من قعدتك وحدك تيجي تقعد معانا
_ لا بالعكس انا مبرتحش غير وانا لوحدي
_ يخربيت ناسك يا شبل هتفكرني بأيام القرف ليه ، ما تجوز
_ بقولك بحب اقعد لوحدي تقولي اتجوز
_ الجواز هيخليك تحب تقعد مع الناس بلاش تضيع عمرك في الكلام الفارغ ده
قولت بتنهيده وانا بفتكر اللي حصل
_ انا مش معقد ولا كاره صنف الستات يا بدر ومعنديش مشكله في اني اتجوز ، بس بجد فقدت الثقه في نفسي يمكن لما اكبر شويه واكون مسؤل عن نفسي واخف تأثر بكل حاجه بتحصل حوليه زي الرجاله العاديه وانشف كده افكر اتجوز
_ انت اهبل ياد ، ايه اللي بتقوله ده ، يعني ايه مش واثق من نفسك وكيه يعني لما تبقي زي الرجاله ' وانت مش راجل؟
_ راجل ياعم بس شكلي طري زي ما قال ابوي وليلي ، انا فعلاً عاطفي وبتأثر بسرعه ، وقطعتي علي قدها ده انتوا كنتوا تشيلوني زي العيل الصغير
_ قطعت ايه ، يا ولدي انت لسه صغير بص حوليك وشوف اللي في سنك جسمهم صغير قد ايه ، وبعدين انت لسه مشقتش لما تجرب الشقي والمسؤليه هتلاقي نفسك نشفت ، ما طبيعي يكون شكلك طري وانت عمرك ما اشتغلت ولا وسخت يدك ، ولو بصيت حوليك في القاهرة والمدن هتلاقي اللي زيك بيتقال عليه ولد عز مش طري زي ما بيتقال علي اللي زيك في النجع ، و رايح تاخد علي كلام ابوك اللي عقدنا انا واخوك ومبقاش غيرك قدامه يعقدك ولا اللي تتقاد في نار جهنم اللي مصانتش العشره وغدرت بينا كلنا حتي اقرب واحده ليها ، بلاش تشوف نفسك بعين اللي بيكرهوك علشان هيقصدو يطلعوك باسؤ صوره ، هيمحوا كل حاجه حلوه جواك علشان يرضو سواد قلوبهم ، انت راجل ومفيش زيك متخليش عقلك يصدق اللي كانوا عاوزين يوصلهولك ، الرجوله ياخوي مش بشكل ولا طول وعرض الرجوله فكر وشرف وخوف من ربنا ، مين قال ان الرجوله بحجم وخشونه لا أبداً ، ما عندك ناس كتير طول وعرض بس **** والحريم احسن منهم
_ مش عارف بقا
_ لا اعرف دور علي الناس اللي بتحبك وشايفينك شخص كويس طالما بتتأثر قوي اكده بكلام اي حد
_ بس دول مش اي حد يا بدر
_ لا اي حد ، واحد قاسي وميعرفش ربنا والتانيه خاينه وقليلة الاصل ، سيبكم منهم وركز مع اللي بيحبوك ، عندك انا وعبيده ، و وفاء و ورد وصحابك اللي بيحبوك والبت الممرضه ، كل الناس دي بتحبك وشايفينك كويس متسبش كل ده وتمسك في اتنين زي دول
_ اها
_ اها ايه اتعدل لا اضربك ، كفاية تعب متعملش زيي استسلمت لعقدتي وضيعت عمري معاها
_ اممم
_ تصدق فقعتلي مرارتي امشي ياض من قدامي
_ هههههههه خلاص يا كبير اسفين
_ بطل برود ، انت بعقلك وطيبة قلبك احسن من مليون واحد عاش حياته في التنبله والنطاعة وقلت الدين
_ خلاص ياعم انت هتعمل فيها رائد تنمية بشريه خلاص هعيش حياتي
_ اما نشوف ولو متعدلتش هعدلك
_ هتعدل من عيني بس اكل عشان مبعرفش اتعدل علي معدة فاضية
_ تصدق انك عيل بارد
_ بدر ارحم امي العيانه ، عرفت اني بارد وبطري في الصيف كفااااية بقا ، ابوس رجل اهلك كفايه
_ كفاك علي وشك ما انت مستفز بتقلب الجد هزار...
بقا يشتم فيه شوية ف سيبته وروحت اجيب اكل وفي الطريق فتحت التليفون وبعت ل جميله اللي شيلت عنها البلوك بعد فرح بدر علي طول وبكلمها من وقتها علي الرسايل
_ انتي يا نص دكتوره يا فاشله
جاني ردها بعد دقايق
_ عاوز ايه يا نيله
_ هعوز منك ايه يعني ، بتتنيلي بتعملي ايه
_ هكون بعمل ايه قاعده في الحمام علشان متمسكش وانا بكلمك
_ هههههههههه انا لو منهم كنت خدتك كشفتلك علي قعدتك في الحمام وقت كبير كده
_ ماهو كله عشان جنابك ، يارب يتمر
_ طيب وايه جابرك علي كده
_ لا بقولك ايه هتطول لسانك هرميك في البلوك وعمري ما هطلعك متنساش ياخوي كلامك وترجيك ليه علشان اقبل نكون صحاب
_ انا اترجيتك؟
_ ايوه
_ وده امتي وترجيتك ازاي ان شاءلله
_ من سنه لما قولتلي من فضلك خليكي معايا انا محتاج صحاب زيك في حياتي
_ ايوه صح بس انا كنت سكران
_ ودلوقتي فوقت بعد سنه
_ سنه إيه انتي هتفتي
_ 11 شهر وتسع ايام زين اكده
_ وكام ساعة
_ معرفش بس كان بالليل
_ ههههههه عارفة يا جميلة
_ هبله وام شرطان عارفة
_ ايوه طبعا هبله وام شرطان بس مش هو ده اللي كنت هقوله
_ امال كنت هتقول ايه
_ كنت هقول انك جميلة
_طيب ما انا عارفه اني جميلة القانون نفسه والعالم كله عارفين اني جميلة
_ده علي اساس القانون والعالم كله يعرفك
_ ايوه
_ يا سلام
_ وحيات عبسلام
_ اسم الله
_ وحيات عبدالله
_طيب اخرسي
_ لا قول كلمه اعرف ارد عليها
_ جميلة انا اتخقنت منك اقفلي
_ انت اللي مكلمني علي فكره بطل تحسسني ان انا اللي كلمتك
_ يابنتي اسكتي انا طايقك بالعافية
استلمتها ومردتش ف بعت تاني
_ غورتي في اي داهيه
_ ايه انفصام الشخصيه ده مش بتقول طايقني بالعافيه
_ ايوه بس مش معناه انك تسكتي
_ انت عاوز ايه دلوقتي مكلمني ليه
_ اقولك ومتشوفيش نفسك عليه
_ قول
_ وحشتيني
مردتش ف رجعت بعتلها وقولت
_ مش وحشتيني قوي قوي يعني ، جمييله! ، انتي هنا ... انتي يا زفته ، انتي يا نص دكتوره يا معفنه... جميلة... طيب خلاص موحشتنيش ، يا نيلة روحتي فين ربنا ياخدك ❤
بقيت ابعتلها وهي تشوف الرساله ومتردش ف قولت هكلمها بعدين وروحت جبت اكل ورجعت لقيت بدر وعبيده واقفين وعبيده قلقان جداً قربت منهم وقبل ما اسأل حصل ايه سمعنا صوت عياط البيبي وبعد دقيقة الممرضة طلعت وقالت بإبتسامة
_ الف مبروك ولد
قال بفرحه
_ الحمدلله ولد بت كل اللي يجيبه ربنا زين ، المهم طمنيني هي كويسه
_ ايوه شويه وتقدر تدخلها
طلع بدر فلوس من جيبه وادهالها ورجع يحضن عبيده ويقول
_ حمدالله علي سلامتها وربنا يباركلك فيه هو واخواته
_ الله يبارك فيك يا خوي
قولت
_ قولي بقا هتسميه إيه ، شبل صح
ابتسم وقال
_ الولده الجاية ، المره دي هسميه بدر
قال بدر بإبتسامة
_ علي ايه تسميه بدر يمكن يطلع فقري زي عمه
_ بس ياريت يطلع زيك
قال بإبتسامة
_ تعيش يا خوي ربنا يبارك ويطلع احسن واحد في الدنيا
قولت بسخريه
_ ترا الدمعه هتفر من عيني ، اسمع! الواد ده يتسمي علي اسمي بلا بدر بلا قمر علي اسمي وبس انتوا فهمين يا كـ.......
مكملتش كلمتي لما لقيتهم بيتوجهوا ليه ونظرات الشر في عنيهم
_ مالكم يا رجاله بتصبولي كده ليه ، انا كنت هقول يا كبرات النجع ، بس حلو اسم بدر انا كمان ان اتجوزت وان خلفت هسمي قمر اكيد البدر مسيرة يكمل ويكون قمر
قال بدر وهو بيبصلي بقرف
_ ياد بطل برود ، انت مش مستبرد نفسك
قال عبيده
_ ده مكانه في القطب الشمالي ده ، ياد اسخن
وفاء
جه بدري عن معاده ولما سالته عن السبب قالي
_ خدت اجازه النهارده وروحت ل عبيده في المستشفي ورد ولدت
_ بجد ، طيب مقولتليش ليه كنت روحت معاك
_ محبتش اتعبك ، عامله ايه دلوقتي
_ كويسة بس بردو كنت قولتلي ، كنت وقفت جمبها
_ كنتي هتعمليلها ايه يعني ، اهي ولدت وقامت بالسلامه
_ الحمدلله ، ربنا اداها إيه
رد عليه بإبتسامة
_ بدر
_ اااالله ، لا كده لازملاها هديتين علشان الاسم
_ عبيده قال هسميه علي اسمك ، قولتله بلاش بس هو مسمعش الكلام
_ بلاش ليه هو في احلي من اسم بدر
_ مش قصة الاسم بتكلم عن صاحب الإسم
طوقت رقبته بأديه وقولت بدلع
_ مال صاحب الاسم ، مفيش زي في الدنيا كلها
قال بإبتسامة وهو بيقربني منه
_ من قلبك
_ طبعاً عندك شك في كده
_ تؤ معنديش
بوسته في خده بوسه سريعه وقولت
_ بحبك
ضيق عنيه وقال بمكر
_ ليه
_ ههههههه ايه هو اللي ليه ، بحبك من غير ليه ، دماغك متروحش بعيد
_ متروحش بعيد كيه ، انا اكده هفهمك غلط
_ هههههههههه ياااه ، احنا من وقت ما اتجوزنا مقولتليش الكلمه دي ، وحشتني بجد
_ ما بقيتي مرتي عاد يحقلك اي حاجه حتي لو فهمتك غلط ميضرش
_ ههههههه طلعت نيتك مش بيضه
_ عمري نيتي ناحيتك ما كانت بيضه الحقيقه فاكره لو حبستك في السجن وقليتي ادبك عليك وزنقتك في الزاويه، من وقتها وانا نيتي نحيتك مش قادر اصفيها
_ وبتقولها في وشي
_ معلش لفي خليني اقولها في ضهرك.. ههههههه ايوه بقولها في وشك
_ بقا كده وانا اللي فكراك بتحبني لشخصي
_ ما انا بحبك لشخصك ، كل حاجه فيكي تبقي جزء من شخصيتك ايه الكلام الغريب اللي بتقوليه ده
_ نفسي اغلبك في الكلام مره
_ مش كفاية عنيكي غلباني كمان هتغلبيني في الكلام
_اممممم انا بقول اروح اجهزلك تاكل عشان مش هخلص النهارده
حاوطني بدراعه وقال
_ انا بشبع من شوفتك
_ هههههههههه وبعدين طيب
_ مالك
_ مش بسلك معاك
_ وتسلكي ليه ايه مضايقك في كلامي
_ هههههههههه مفيش حاجه مضيقاني قول اللي انت عاوزه ، بحبك قوي
حضني وقال
_ وانا والله ما حبيت في حياتي غيرك ، ربنا يخليكي ليا ويديمك اجمل نعمة رزقني بيها ربنا
بهتت ملامحي حزن من اللي حصل مع بيجاد وقولت وانا بدفن نفسي في حضنه
_ ويخليك ليا ياحبيبي
بعد عني وقال
_ مالك يا وفاء
_ سلامتك يا حبيبي مفيش
_ له فيه ، إيه اللي حصل كنتي زينه
مقدرتش اخبي دموعي وقولت
_ مفيش حاجه
حط ايده علي وشي وقال
_ وفاء ، ايه اللي حصل
زادت دموعي وانا بقول
_ بيجاد وحشني ، كان نفسي يكون معايا دلوقتي
_متزعليش نفسك دلوكتي يتصل ويطمنك عليه
_ مش حاسه اني هشوفه تاني ولا يتصل حتي ، بيجاد خلاص راح
_ بتقولي إيه ، وحدي الله اكيد هو بخير بس في حاجه منعاه يكلمك
_ يمكن
_ في ايه يا وفاء ، انتي تعرفي حاجه
_ لا ياحبيبي مفيش ، انا بس قلقانه عليه
_ اكيد
_ اكيد
_ انا عارف انك كنتي متعلقة بيه قوي ، بس مش عاوزك تقلقي لو مظهرش انا هشوف طريقة نوصله بيها
_ لا ، بيجاد مش ناوي يرجع تاني هو قالي انه مش مرتاح هنا ومش هيرجع
_ هو قالك اكده
_ ايوه
_ مقولتليش يعني
_ قولت يمكن يكون كلام بيقوله في لحظة زعل ومش هيقدر يبعد كتير
_ طيب إيه السبب
_ مقاليش
_ يكون زعلان مني لسه
_ لا طبعاً بيجاد بيحبك وقالي اخلي بالي منك ومزعلكش
_ اكيد
_ اكيد ، هيكرهك ليه ما انتوا اصتلحتوا
_ اه
اتنهد بعمق وقال
_ ياريت كان بيدي اجوزلو فاطمة ، انا عارف ان اللي حصل مأثر فيه بس القرار مكنش بيدي انا جيت علي الدنيا لقيت نفسي جزء من عادات معموله من سنين طويلة مكنتش هقدر ، بس تعرفي والله لو عايشه دلوقتي لا كنت جوزتهالوا حتي لو هتحدي الكل ، بس نعمل ايه مفيش نصيب ، ربنا مأردش يكون ليه نصيب فيها
_ صح هو النصيب وده عمرها واكيد موافقتكم او رفضكم مكنش هيغير حاجة في قدرها هما مكنش ليه نصيب في بعض
ــــــــــــــــــــــــــــــــــــــــ
شبل
من وقت ما رجعت اكلمها اتعودت نتراسل قبل ما انام ، يومي مكنش يكمل لو متكلمناش وناقرنا مع بعض او اتناقشنا في اي موضوع او اتكلمنا في اي حاجه المهم نتكلم وخلاص ، زي كل يوم رجعت من عند عبيده وبقيت ابعتلها ، بعتلها كتير جداً وهي كانت تشوف الرساله ومتردش ومبقتش عارف هي وقعت في مشكله ولا زعلانه ، وجه اليوم التاني والتالت وبردو مفيش اي جديد وبعد اسبوع ردت اخيراً وقالت
_ نعم
_ ايه يابنتي فينك ، انتي كويسة
_ ايوه كويسة
_ جميله؟
_ ايوه انا
_ في حاجه حصلت معاكي
_ لأ
_ امال مبترديش ليه ، حد شافك؟
_ لا
_ لا إيه
_ لا محدش شافني
_ امال في ايه بقالي اسبوع ببعتلك مبترديش
_ عايز ايه يا شبل
_ عايز ايه ازاي ، مالك انتي زعلانه
_ والله مش عارفه
_ ايووووه ، ده زعل عرفته ، ها ارغي
_ أرغي اقول ايه
_ قولي حكم ومواعظ ، جميلة اتلمي وقولي في ايه
_ انا اللي في ايه ولا انت ، انت عاوز مني إيه يا شبل
_ مش فاهم يعني ايه عاوز منك ايه ، انتي مجنونة يابنتي ، ما تتكلمي
_ اتكلم اقولك ايه ، اقولك انك مش سالك وبتلعب علي الحبلين
_ وانا امتي لعبت علي حبال ، انا عملت إيه
_ معرفش شوف نفسك عملت ايه
_ ايوه ، فهمتك ، انتي زعلانه علشان قولتلك وحشتيني يا مهزقه يالي مش لاقيه حد يعبرك ف بتمسكي في الكلمه
_ ده انا
_ اه انتي
_اقولك حاجه ومتزعلش ، لا ازعل واتفلق ، انت راجل عره
_ انا عرة يا ام شرطان
_ ااااه عرة متكلمنيش تاني يا شبل
_ وقفي عندك
_ لا
_ بقولك وقفي
_ وقفي ايه انت اهبل انت بتكلمني شات
_ اقصد يعني متقفليش
_ عاوز ايه
_ اول حاجه اعتذري عن كلمة عرة علشان مزعلكيش
_ لا يا شيخ وبنسبة للقصيده اللي بعتها قبل كلمة عرة كانت ايه
_ انا بقول الحقيقه
_ يعني انا مهزقة ومش لاقيه حد يعبرني
_ افتكر كده
_ عارف ما تكون قدامي دلوقتي لا كنت دبيت سكينه في بطنك شبل غور مش عاوزه اعرفك
_ طيب والله ما تقفلي لا اجيلك لغيت البيت واقابل ابوكي
_ بتهددني
_ ايوه انا بهددك ، عارفه هقوله ايه
_ هتقول ايه ان شاءلله
_ هقوله بنتك جننت امي يا حج ومبقتش قادر اعيش من غيرها ، يومي بيكون ناقص لو متكلمناش ، هقوله طالب ايد بنتك علشان تكون شريكة حياتي واخدها ونبعد عن النجع المعفن بتاعكم واجيبها معايا اسكندريه نشتم في بعض براحتنا من غير خوف
بعتها واستنيت ردها كتير ومردتش ف بعت تاني وقولت
_ بتكلم جد مش بهزر ، انا عايز اتجوزك
جاني ردها بعد وقت
_ يا شبل انت عارف اني بكره الهزار ده
_ هزار ايه يا متخلفه انا بتكلم بجد ، انا عاوز اتجوز
_ كداااب
_ انتي عبيطه بابت
_ والله كداب انت بوشين اقفل يا شبل مش هرد عليك تاني
_ هههههههه طيب براحتك متصدقيش لغيت ما تلاقيني متقدملك
_ شبل وحيات ابوك ما تلعب بأعصابي
_ لا بقا هلعب بس لما تيجي علشان العب براحتي ده انا هقطعلك اعصابك عصب عصب عشان تبقي تقوليلي عرة تاني ، انا عرة يا ام شرطان يا فاشله
_ اقفل يا شبل بطل هزار
قالت كده وعملت بلوك ضحكت عليها شويه وبعدين كلمت بدر قولتله قراري بجوازي منها وطلبت منه يبعت عم حشمت يكلمهم وبعد ما قفلت لقيتها شالت البلوك وباعتالي رسالة بتقولي
_ طيب احلف باغلي حاجه عندك انك بتتكلم جد
_ هههههههههه وحياتك بتكلم جد ، يا بنتي انتي بقيتي حاجه اساسيه في حياتي وبجد محتاج لوجودك جمبي
_ لا انا مش مصدقه
_ فاهمك وعلي العموم بكره مش بعيد
_ هتيجي بكره يعني
_ لا طبعاً انا اتكلمت مع بدر وقولتله يبعتلكم عم حشمت يقول ل ابوكي
_ طيب وااااللهي كداب اقفل ياسيدي مش ناقصه توتر اعصاب
_ ههههههه يارب تموتي يابنتي والله بتكلم جد ، انا عاوزك
_ طيب ليه
_ ليه إيه
_ اقصد اثبت
_ ما انا هثبتلك بكرة
_ لا دلوقتي
_ واثبت دلوقتي ازاي
_ معرفش اتصرف
_ هههههههههه اتصرف ازاي بردو
_ يا شبل والله انا هطب ساكتة لو طلعت بتهزر
_ لدرجة دي كنت حلم كبييييير بنسبالك متخيلتيش انه يحصل
_ لا وحيات ابوك متتقندلش انا متوتره
_ هههههههههه جميله هقولك حاجه
_ قول
_ بحبك
_ يا شبل بقولك بطل هزار
_ يخربيت بيت ابوكي يابنتي هتجننيني ، بقولك إيه ، اقفلي متكلمنيش غير لما عم حشمت يجيلكم
_ لا استنا
_ إيه
_ انا بس مش مصدقه ، انت صح كنت حلم كبير بنسبالي ومش متصوره انه يتحقق
_ متغرنيش في نفسي ، بعدين هشوف نفسي عليكي
_ بتكلم جد ، انت فعلاً كنت حلم كبير بنسبالي
بهتت ملامحي وانا بقول
_ والله ما عارف يا جميله اذا كان هفضل حلمك ولا بعدين هتكتشفي انك غلطانه
_ والنعمة هزعل منك ، بلاش الكلام ده انت حاجة كبيرة قوي متخليش تجربه فاشلة تعمل فيك كده وبلاش الصراحه المفرطة في التعبير عن احساسك ، انا فاهماك بس غيري مش هيفهمك
_ هههههه اوكي ، اوعدك هستعيد ثقتي في نفسي
_ انت مكنش ينفع تخسرها اصلا انت غلطان
_ عندكحق
عبيده
رجعت من الشغل لقيت ورد تعبانه شايله بدر بتنام وهي قاعده من كتر التعب وبشر وزيد حواليها بيقولوها عاوزين ياكلوا ف خدت منها بدر وقولتلها تدخل تنام وبعد ما تاعبتني عشان توافق وتدخل تنام نيمت بدر ودخلت جهزت للعيال وبعدين كلمت عم محمد
_ ايوه ياعم محمد
_ ايوه يابني في حاجه
_ لا سلامتك مفيش حاجه ، بس كنت عاوزك في خدمة صغيرة
_ اؤمرني يابني
_ ميأمرش عليك عدو ، كنت عاوز اعرف كيه الاقي واحده تيجي تساعد ورد في شغل البيت ، واحده تكون امينه وياريت مره كبيره شوية بلاش بنات صغيره
_ ايوه يابني ساهله انا اعرف واحده كانت بتيجي ايام المرحومه ست معرفه ، امينه وطيبه ، واسمها امينه كمان
_ كام سنة دي
_ تجيلها 45 سنة دلوقتي وبتربي ايتام
_ زينه قوي ، ماشي ممكن تكلمهالي
_ حاضر يابني هكلمهالك وهخليها تجيلك
_ تعيش يا عم محمد كتر خيرك
_ وخيرك يابني، حاضر هكلمهالك
قفلت معاه ودخلت مع العيال في الاوضه قعدنا ساعتين نحكي ويلعبوا مع بدر لغيت ما هلكوني ف اتعصبت عليهم علشان يناموا وبعد ما ناموا خدت بدر ورجعت الأوضة التانيه نيمته علي سريره واترميت جمب ورد ونمت محستش بنفسي غير تاني يوم علي صوت ورد وهي بتقولي سلوي بره ومعاها واحده
طلعت لقيت المره اللي قالي عليها عم محمد سلمت عليها وعرفتها علي نفسي وعلي ورد وبعدين بدات افهمها المطلوب منها
_بنسبة لشغل البيت ف احنا شغلنا مش كتير ، مفيش غير بشر وزيد مطلوب منك تشوف طلباتهم
_ حاضر ، اللي يطلبوه البهوات هنعمله بس مين فيهم بشر ومين زيد
قدمتهم ليها وقولت
_ ده بشر ست سنين وده زيد اربع سنين
_ ماشاءالله ربنا يبارك ويحفظهم
_ يارب ، اسيبك مع ورد تتعرفوا وتشوفوا الدنيا هتمشي كيه
_ تمام حضرتك
_ تمام بس بلاش حضرتك دي
_ تمام حضرتك
_ ههههههه تمام
_ هههه تمام يا استاذ عبيده
اليوم التالي
الفصل السابع والستون
جميلة
عدا يوم واتنين وانا قاعدة علي اعصابي مستنيه حشمت اللي قال عليه شبل هيجي يكلم ابوي وبعد صبر طويل وتضارب الافكار في راسي اللي بتقولي ان شبل بيكدب جت امي اخيراً والابتسامة الخاصة بالعرسان علي وشها وبتقولي
_ بت يا جميلة
_ ايوه يا امه في حاجه
_ فيه
_ طيب في إيه يامه ما تقولي
قالت بفرحه
_ في الخير ، في السعد والهنا يابت
_ لقيتوا لقية ولا ايه
_ يسمع منك ربنا بس له مش لقية ، عريس
قولت ببراءة مصطنعه
_ لقيتوا عريس!
_ يابت جايلك عريس
حدت من نظرتها وقالت وهي رافعة صباعها بتحذير
_ بس بقولك من اولها اهه لو رفضتي المره دي ابوكي هيطلقني ويدبحك علشان ترتاحي يابت بطني
_ وه يامه ، مش اعرف هو مين الاول وبعدين اشوف هوافق ولا له
_ شبل ولد الكبير ياختي ، اهو واد صغير من سنك ومتعلم وهو وناسه علي قلبهم قد اكده
خفيت سعادتي ورا استعجاب مصطنع وقولت
_ شبل! وده متقدملي ليه ، مش كان مشلول ، له يامه مش موافقه
_ له ماهو خف وبقا زين وبيروح ويجي
_ له يامه معوزهوش ، انا مش هتجوز قولتلكم اكده مليون مره
ضربت علي خشمها وقالت
_ اششش يقدهولك مطرح ماهو قاعد بقولك ابوكي هيطلقني ويدبحك ، هتجوزيه غصب عنك فاهمه ولا له يابت
_ يوووه خلاص يامه بتزعقي ليه ، موافقه وامري لله انا ميرضنيش تطلقي بعد العمر ده كله بسببي قوليله موافقه وانا ربنا يصبرنا يمكن يطلع زين
_ ايوه اكده بتي حبيبتي ، وهيطلع زين وهتقولي امي قالت
_ ماشي يامه ، اللي تشوفوه
_ ربنا يهنيكي يابتي ، هروح اقول ل ابوكي موافقه
_ قوليله يامه
_ يابت اعدلي خلقتك هتلاقي زيه فين
_ يوه يامه قولتلك موافقه ، روحي يامه روحي وسيبوني في حالي ، ده ولا كاني مخلصة عيش البيت ومصبرينش عليه وعاوزين تغوروني
_ يجيكي حشه تحشك يابت بقولك ولد الكبير هتلاقي زيه فين
_ خلاص يامه قولتلك موافقه امشي قبل ما اغير رأيي
قولتها بحزن مصطنع وبعد ما طلعت قفلت الباب وبقيت اتنطط من فرحتي وسعادتي اللي الدنيا كلها مسيعهاش وكان هاين عليه ازغرت واقول لدنيا كلها حلمي اتحقق
شبل
طلعت من المحاضرة وفتحت الرسايل لقيت رسالة منها بتقولي فيها
_ انا مصدومه بجد
_ ومش بنطق ولا عارفة ارد
_ بتكلم جد ، انا حقيقي مصدومة
_ اصدميني معاكي
_ في عريس متقدملي
_ ده اعمي ولا اهبل متقدملك ليه ده
_ عشان اهبل
_ وحيات امك
_ وحيات ابوك هههههه ، انا مكنتش مصدقاك علي فكرة
_ ودلوقتي صدقتي
_ ايوه ، ورفضت
_ وحيات امك
_ وحيات ابوك
_ بتتكلمي جد
_ لا طبعاً ، بس مثلت شويه قال يعني متفاجأه وفي الاخر قولت خلاص موافقه اللي تشوفوه
_ قال يعني مغلوبه علي امرك
_ هههههه ومكسورة الجناح
_ يجيكي كسر رقبتك بقا انا تعملي انك اتغلبتي علي امرك و وافقتي عليه يا فاشله
_ وانت كنت عاوزني اوافق بسرعه علشان يشكوا فيه ويقولوا اني عاوزاك
_ يااسلام
_ وحيات عبسلام
_ جميله انا اتخنقت منك اقفلي
_ ماشي بس كنت عايزة اقولك حاجه
_ عاوزه ايه
_ عاوزه اقول ان مفيش حد اسعد مني دلوقتي ، انا عارفه انك هتقول عليه مدلوقه واه انا مدلوقه
اترسمت ابتسامتي وانا برد عليها
_ وانا مبسوط بدلقتك دي ، اقولك حاجه انا كمان
_ قول
_ دلقتك دي رجعتلي الثقة في نفسي
_ كانت هترجع بيه من غيري مع الوقت
_ ايوه بس مكنتش هعرف ممكن ترجع امتي
_ المهم انها رجعت
_ الحمدلله
_ اممم هو انت هتيجي النجع
_ اكيد امال هتجوزك ازاي
_ وعلي كده هتروح لابوك
_ مش عارف
بدر
من وقت ما مشيت من النجع وانا بتهرب من احساسي بالرغبة في الرجوع او الإتصال بيهم وكنت بقول مفيش حاجه هتخليني ارجع غير لو كانت حاجة كبيرة تضطرني ارجع واهي الحاجة جت وهي جواز شبل وكنت فاكر ان عبيده هيرحب وهيروح معايا من غير اعتراض بس رفض وقالي
_ لا انا مرايحش روحوا انتوا
_ وانت ، مش ده اخوك
_ اخوي وانا هجهزله شقته اهنه واعمله كل حاجة بس رجوع النجع له ، وياريت تخلصوا الموضوع في قعدة وتجيبوها وتيجوا
_ ده جواز يا ولدي كيه هنخلصه في قعدة تعالة بس معانا نوصل نتفق مع الناس ومتروحش معانا لما نروح نجيبها
_ له انا معوزش ارجع اهناك تاني
_ ولا انا طايق ارجع بس ده شبل لازم نقف معاه ، وافق وهنخلص المشوار ونرجع وان شاءلله منصادفش حد منهم في طريقنا ونرتاح
كان رافض رفض قاطع وبعد الحاح كتير مني وافق بشرط ميروحش بيت ابوه لو مهما حصل وقال انه هيخلص القعدة ويرجع علي طول قولتله ماشي وسيبته ومشيت وبعد يومين روحنا احنا التلاته
شبل
مكرهتش في حياتي مكان قد ما كرهت النجع وزاد كرهي ليه بعد اللي حصل مع فاطمه فاطمة اللي مقدرتش امنع دموعي تنزل لما افتكرتها وطلبت من اخواتي نروح نزور قبرها قبل اي حاجه وروحنا وقفنا هناك نبص للقبر واحساسي بروحي بتتسحب بيزيد كل ما افتكر تفصيله حصلت في طريقة موتها ، رفعت ايدي وقريتلها الفاتحة ودموعي لسه بتسيل وصوتي كان رايح مني مش مساعدني حتي علي خروج البكاء وبعد لحظات حسيت نفسي هموت فيها من حزني اللي رجع يتجدد لقيت بدر بيحط ايده علي كتفي وبيقولي ودموعه في عنيه
_ ادعيلها
مقدرتش ارد وزادت دموعي في عيني وانا بدير وشي عنه قبل ما يحضني ويقول بصوت مخنوق
_ وحد الله هي دلوقتي في مكان احسن من اهنه، ادعيلها
قال عبيده
_ متزعلش يا شبل ، فاطمة في الجنة ، انت لو كنت معانا لما شوفناها قبل اكده كنت فرحتلها
بعدت عن حضن بدر وقولت ودموعي مشوشه رؤيتي
_ كانت عامله ازاي
_ كانت لسه بنقابها مش باين منها غير وشها ، كانت كأنها نايمه نوم عميق مش ميته ، مفيش حاجه حصلت لجسمها ولا العفن طالها
رجعت ابص للقبر وقولت
_ مينفعش اشوفها
قال بدر
_ تشوفها إيه يا خوي وحد الله ، يلا هنمشي
_ وحشتني قوي يا بدر
_ وحشتنا كلنا بس ده امر ربنا وكلنا هنروحلها في يوم ، دلوقتي مش بيدنا حاجة غير ندعيلها ، ادعيلها بالرحمة
دعيتلها في سري و وقفت يجي نص ساعة جمب قبرها احكيلها اللي حصل معايا واللي جاي عشانه
جميلة
مع كل دقيقة بتعدي خوفي بيزيد ، خوف من ان يحصل حاجه تمنع الجوازه دي ، وخوف ان رضوان يتدخل ، وخوف من طمع ابوي اللي اكيد هيلاحظوه في كلامه وطلباته وزاد الخوف ده اكتر واكتر لما زاد تأخيرهم وكل اللي كان مني اني ادعي وبس وبيمر الوقت وقرايبنا بيوصلوا ويتسالوا هما مجوش ليه لسه وبعد وقت قضيته في نشفان الدم جت بت خالتي تقولي العريس وصل وبعد وقت جت اللحظة اللي كنت متمنيه الارض تتشق وتبلعني ومحضرهاش وهي اللحظة اللي هشوفه فيها بعد ما جه ابوي وقالي
_ تعالي يابت سلمي الراجل مستني في السقيفه
بقيت واقفه افرك في يديه وباخد نفسي بصعوبه ف جت خالتي ومسكت دراعي وقالتلي
_ امشي خايفه من ايه
_ استني ونبي يا خالتي مش قادره
قالت بتها
_ مش قادره ايه يا مدهوله ، خلصي العريس هيطفش امشي
_ يا جماعه متوتره اصبروا عليه
_ شدي يامه البت دي فقعتلي مرارتي
شدت دراعي ودخلوني عنده غصب عني ف وقفت عند الباب ابلع ريقي بصعوبه ولما خطفت نظره عليه لقيته واقف وابتسامته علي وشه ف زقتني خالتي تاني ناحيته وقالت
_ البت مكسوفه اعذرها يا استاذ شبل اصلها متعرفكش
سرقت نظره تانيه ليه لقيت ابتسامته زادت وهو بيقول
_ طبعاً
_ سلمي يابت
خدت نفسه وانا بفرك في صوابعي وبصيتله بعد ما استجمعت شجاعتي بالعافية وقولت
_ از.... ازيك
قال بإبتسامة
_ الحمدلله وانتي عامله ايه
_ الحمدلله
قال بمكر
_ انا اسمي شبل لو مكنتيش تعرفي
_ ايوه عارفه
قالت خالتي
_ وه متعرفكش كيه ماهي اللي كانت عندكم في السرايا بتراعيك ، وبعدين هو في حد في النجع كله ميعرفش عيال الكبير
قال بمكر
_ ايه ده انتي فعلاً كنتي بتراعيني ، بجد مش فاكر ، اسف بس انا كنت في حاله متسمحليش افتكر حد ، مش فاكر غير الشرطان ودوده كانت بتاكل في الكتب
منعت ضحكتي بصعوبه ف قالت خالتي
_ ايوه كتر خيرك وكمان البت دي فقريه بتتكسف ومبتتكلمش نُهائي دائما اكده ساكته لا بيتسمعلها حس ولا نفس وهادية قوي
_ هههههههههه احم.. طبعاً سماهم علي وجوههم باين عليه الهدؤء ، وانا جاي علي السيرة الكل بيتكلم عنها وعن هدؤئها
ديرت وشي وانا ماسكه نفسي علشان ضحكتي متطلعش ف قالت خالتي
_ اه والله يا استاذ ، اقعدي يابت مالك مكسوفه ليه اقعدي
قعدتني وبعدين قالت
_ هسيبكم دقيقتين وراجعه
قال بإبتسامة
_ اتفضلي
تبعها بعنيه لغيت ما طلعت وبعدين بصلي وقال بضحك
_ ههههههه خدتي بالك من هاديه ومش بيتسمعلها حس دي
قولت بخجل مقدرتش اداريه
_ ايوه
قال بإبتسامة
_ مالك انتي مكسوفه بجد ولا ايه
_ لا وانا هتكسف ليه
_ امال وشك احمر ليه
_ معرفش
_ لا شكلك مكسوفه
_ مش مكسوفه
قال بإبتسامة وعنيه عليه
_ واضح قوي ، طيب انتي شكلك زي القمر علي فكره ووحشتيني
نزلت جفوني وقولت بارتباك
_ طيب
_ يطيب خاطرك يا ضنايا ، استني هزودلك منابك ، ايه طيب دي
_ اقولك ايه
_ قولي وانت وحشتني اكتر
_ بس انت موحشتنيش
_ ياااادين النبي علي الكدب من اولها كدب
_ بس عاد متوتره
_ ايوه ما انا شايف ، طيب خد نفسي وقوليلي ايه رأيك احنا قولنا ان الفرح بعد شهر
_ شهر!
_ ايوه
_ مش قليل
_ قليل ايه ده انا قولت بعد اسبوع ابوكي قال لا خليها بعد شهر
قولت بإبتسامة
_ اللي تشوفوه
_ وانتي شايفه ايه
_ مش شايفه حاجه
_ واضح ان رأيك من رايي
ديرت وشي عنه ف قال
_ بالظبط طلع رأيك من رايي
_ لا مش رايي من رأيك ولا حاجه انا بقول اللي تشوفوه
_ ههههههه ماشي يبقي بعد شهر
_ اها... و...
_ إيه
_ هترجع اسكندريه طبعاً
_ ايوه هنمشي من هنا علي هناك علي طول
_ مش هتروح تشوف ابوك وامك
بهتت ملامحه وقال
_ لا
_ ليه
_ كده ، انهي الكلام
هزيت دماغي بالموافقه ف قال بعد ما قام
_ انا هرجع وان شاءلله هاجي علي الفرح واخدك ونمشي
قومت وقولت
_ انت زعلت
_ لا مزعلتش
_ طيب ابقي كلمني
_ اكيد
قال اكده ف سمعنا صوت زعيق بره بصينا لبعض وقال
_ ابوي؟
القلق بان علي وشي ف قال
_ متخفيش مفيش حاجه هتحصل
_ اه ، ربنا يسترها
_ يارب انا طالع
عبيده
دخل علينا واحنا قاعدين مع الرجاله وقف شوية يبصلنا انا وبدر والشر مالي عنيه بنفس النظره اللي عيشت طول عمري اكرهها ويديه بتبقض علي راس عصايته ف قال ابو العروسه وهو بيتقدم خطوات نحيته
_ اهلا يا كبير اتفضل ، جنابك نورت
قال ونظراته ثابتة علينا انا وبدر
_ مش جاي اتفضل ، جاي اعرف في ايه ، عيالي اهنه بيعملوا إيه
قال بدر ونظرات التحدي في عينيه
_ جاين نخطبوا ل شبل اخوي
_ من غير ما تعرفوني ولا تاخدوا رأيي
_ شبل بقا راجل ومش محتاج رأيك في حاجه
قال بغضب
_ راجل؟!!!! ومن ميته الكلام ده
اتقدم خطوة وقولت
_ من يوم ما خلقة ربنا تحب تشوف البطاقة
قال بدر وهو بيحط دراعة قدامي
_ استنا يا عبيده... عايز ايه يا بوي
_ عاوزكم تلموا نفسكم وتمشوا قدامي
قال عم العروسه
_ كلام ايه ده يا كبير ، قدرنا شوية
بصله من فوقه لتحته وقال
_ اقدركم ، ومن ميته بقيتوا تتقدروا
_ عيب اكده يا كبير انت في بيتنا
_ اااالله بقا معاكم بيوت يا شحتين
كمل وهو بيوجه صباعه ليهم
_ هما دول اللي عاوزين رضوان العربي يناسبهم يا عرة الرجالة
ضميت قبضتي وكنت هنفعل عليه ف مسك فيه بدر واومأ بجفونه وقال بخفوت
_ طول بالك
قال ابو العروسه رد علي كلام ابوي
_ بكفايه!!! انا ساكت احترام للقعدين
_ له تعاله اضربني تعاله
اتقدم بدر وقال
_ بزيادة يا بوي!!!
_ بزيادة انتوا!!! ولد رضوان العربي ميتجوزش من الناس دي
جانا صوت شبل وهو داخل
_ ومين اللي قال كده
بصله وقال
_ وه ده انت رجعت تمشي بعد ما كنت مشلول اهو ، ده انا قولت جاين يخطبوهالك علشان تعالجك ، امشي قدامي ياد
بص لابو العروسه وقال
_ وانت انسي اي كلام اتقال
قال شبل مقاطع همهمات الموجودين
_ لا يا حج متنساش ، انا جاي لغيت بيتك وبطلبها منك بنفسي ، وانا كبير وراشد ومسؤله عن اختياراتي ، ملكش دعوه بأي كلام يتقال، كلامك معايا انا
بصله بدر ولمعة عينيه وكانه فخور بكلامه ف اتقدم ابوي عند شبل وقال وهو رافع العصايه
_ والله يا ني
اتقدم بدر و وقف بينهم وقال بتحذير
_ لو قولت الكلمه دي تاني هنسي انك ابوي ، ارجع بيتك وبلاش تدخل في منافسه ملهاش لازمه
وسعت عنيه ف قال وهو بيضغط علي راس عصايته
_ بتقول ايه ياد
قال شبل
_ زي ما سمعت ارجع بيتك ، انت مش من حقك تدخل ، ولما نيجي نطلب منك فلوس متدناش
وزع نظراته علينا كلنا بما فينا اهل العروسه ودب بعصاية علي الارض وقال
_ ماشي ، ماشي
قال اكده ومشي ف قال عم العروسه موجه كلامه ل بدر
_ لا مأخذه يا كبير بس اكده مبقاش ينفع
قال شبل مقاطع كلام بدر قبل ما يتكلم
_ ليه يا حج ، انا جاي بنفسي اطلب اتجوز بنتكم وانا مسؤول عن نفسي ابوي ملهوش دعوة بيه
قال بدر
_ زي ما قالكم وشقة ودهب ومهر وكل اللي تحتاجوه هيجيبه ايه اللي ناقصه؟! ، ولو كان علي كلام ابوي وغلطه فيكم ف احنا بنعتذر يا جماعه
وجه نظره لابوها وقال
_ والمهر اللي تطلبه ياحج هيدفعه ، شبل اخوي معاه كتير ولو احتاج احنا هنساعده من جنيه ل 100 مليون
انضميت ليهم قولت مأكد علي كلامه
_ كلام بدر صح يا جماعه ، شبل مسؤول عن نفسه ومش محتاج ابوه في حاجه واللي تطلبوه هينفذه
بصوا لبعض ف قال ابوها مقاطع عمها اللي كان باين عليه انه هيعترض
_ موافقين ، واحنا بنشتري راجل ميهمناش فلوس ولا غيره
قال بدر
_ ايوه اكده يا حج ، واهه دول هديته للعروسة هو ساحبهم قبل ما نيجوا عشانها لو الموافقه تمت
شبل
قال كده وطلع مبلغ من جيبه مكنش قالي عليه ولا اعرف هو كام بصتله باستفهام ف غمزلي واشرلي بعنيه عليهم خدتهم منه واتقدمت ناحية ابوها وقولت وانا بدهمله
_ اتفضل يا حج
قال وهو بياخدهم
_ ليه كل ده يا استاذ ، ماشي مش هنكسفوكم ، الشربات ياواد ، الف مبروك
_ الله يبارك فيك
قولت كده ورجعت ل بدر و عبيده ف قال عبيده بإبتسامة
_ الف مبروك يا خوي
_ الله يبارك فيك
اتوجهت لبدر ف قال بإبتسامة
_ دلوك بس بقيت راجل عجبتني
خدت نفس وقولت وانا حاسس اني ثقتي في نفسي رجعتلي
_ تربيتك يا خوي
حضني وقال وهو بيطبطب علي ضهري
_ الف مبروك يا خوي ربنا يهنيكم
_ الله يبارك فيك ، بس ايه الفلوس دي مقولتليش عليها
_ ده لأني عارف كل واحد في النجع ديته إيه
_ هههههه فعلاً الراجل ده راجل نطع اصلا
قال عبيدة
_ طيب اسكتوا هيسمعوكم
قعدنا قعدتنا واتفقنا علي كل حاجه وبعدين مشينا وبعد ما ركبنا العربيه طلعت التيلفون وراسلت جميله
_ إيه الأخبار
جاني ردها بعد دقيقة واحدة
_ مش عارفه اوصف احساسي دلوقتي
_ ايوه يعني مبسوطه ولا زعلانه ولا لسه مكسوفه
_ كوكتيل من ده كله ، وسعادتي بيك اكتر حاجه حاسه بيه
_ طبعاً يابنتي وانتي هتلاقي زي فين
_ ههههههه اكيد بس انا بتكلم عن حاجة تانية
_ إيه هي
_ اقولك ومتفهمنيش غلط
_ اكيد قولي
_ بعيد عن انك مكنش ينفع تعصي ابوك بس اللي حصل ده معناه انك رجعت تثق في نفسك
_ ايوه بس علي فكره انا كتير بقف في وشه الرك علي الثبات بعد كده
_ يعني ايه
_ لا متقلقيش مش هسيبك ، مفيش حاجه ممكن تخليني اسيبك
_ انا النهارده سعادتي ما تتقدرش وبجملة الدلقة بس لو حاجة حصلت وبوظت الجوازه انا ممكن يجرالي حاجة ، هموت يا شبل
قولت بإبتسامة
_ وعد مفيش حاجه هتبوظها ، ما عليكي غير انك تغمضي عينك وتفتحيها وتلاقينا اتجوزنا
_ صح يا شبل؟
_ صح
« بعد شهر»
وقفتها قدامي وهي لابسه فستان الفرح وقولت
_ فتحي
فتحت عينيها وقالت بخجل وهي بتبص لشكل الاوضه
_ دي اوضتك
_ اوضتنا
_ جميلة
_ زي صحبتها
نزلت جفونها بخجل ف رفعتلها وشها وقولت
_ جميله بطلي كسوف مفيش حاجه
_ مش مكسوفه ، متوتره بس شوية
_ انا عارف ، اتنفسي وخدي راحتك ، ويلا ادخلي غيري الفستان ده وتعالي هوريكي حاجة مهمة قوي
_ حاجة إيه
_ هقولك لما تخلصي وتيجيلي في الريسبشن
_ حاضر
استنيتها في الريسبشن وقدامي دوسية الاوراق الخاصة بتقديم للكلية وبعد شوية طلعت ببجامه لونها زهري وشعرها مفرود ورا ضهرها كان شكلها حلو قوي ومغري بس انا كنت مقرر مستعجلش واخليها ترتاح براحتها خالص وقومت استقبلتها وقولت بإبتسامة
_ إيه الجمال ده
قالت بخجل
_ شكرا
_ جمييييله! ، مش لايق عليكي الكسوف احنا اتفقنا اننا هنتجوز علشان نناقر مع بعض ف من فضلك اخرجي من المود ده
خدت نفس وقالت بإبتسامة
_ ماشي احم ، هتوريني ايه
_ تعالي معايا
خدتها وقعدنا وقولت وانا ماسك الملف
_ اتفضلي
_ إيه ده
افتحيها
فتحتها وقالت وهي بتبص للورق
_ إيه ده مش فاهمه
_ ده يا ستي الحلم التاني ، هديت جوازنا
قالت بذهول
_ بتتكلم جد
_ اها ، انتي هتكملي تعليمك وهتكوني دكتوره قد الدنيا
_ شبل متهزرش
_ يابنتي بهزر ايه ماهي الاوراق في ايدك بس طبعا هنستنا السنه الجايه واهي خلاص قربت جداً
_ انا مش مصدقة ، شبل انت... انت
_ انا إيه
_ انت متأكد من انك عاوزني اكمل
_ طبعاً هتكملي وهتشتغلي كمان
نزلت دموعها وهي بتبص للورق شوية وبعدين خدت نفس وقالت هي وبتحطه علي التربيزه
_ له مش عاوزه
_ إيه هو اللي مش عاوزه
دارت ليه بكل جسمها وقالت
_ مش عاوزه اكمل ، انا كفايه عليه حلم واحد
_ ويجرا إيه لو حققتي الحلمين
_ يمكن اخسر الاول لو مسكت في التاني وانا مش عاوزه اخسرك
_ وتخسريني ليه يابنتي ، ما احنا هنكمل مع بعض ، انا كمان هعمل ماجيستير ودكتوراه
_ انا خايفه يجي يوم والدراسه تاخدني وقتها يمكن تقول اني استغليتك ، انا مش عاوزاك تحس في يوم اني فكرت فيك عشان مصلحتي
_ ايه الافلام دي ، انا اللي بطلب منك تكملي
_ ايوه بس في حالتك انت بذات اي تقصير هتفهمه غلط ، وانا والله اكتفيت من الدنيا علي اكده والوقت اللي ممكن اضيعة في محاضره اقضيه معاك انت احسن
مسكت ايدها وقولت بتنهيده
_ انا عارف ان كلامي معاكي قلقك مني وبقيتي خايفه افهمك غلط بس ده مش هيحصل ، ولو حصل تقصير منك بسبب الدراسة انا هكون فاهمه لأني مريت بنفس التجربة وعارف يعني ايه زحمة مذاكره وامتحانات عارف كل ده ، وحاجة كمان
_ ايه
_ انا من اول ما قررت اتجوزك وانا بدعي ربنا ان لو كان وجودك في حياتي شر متكملش الجوازه دي ، واهي كملت وانا ثقتي في ربنا كبيرة ، ومتاكد انك مش هتخذليني في يوم ، انا هقدملك اللي محتاجاه وهيسعدك وانتي طول مانتي كده ف انتي مقدمالي اللي انا محتاجه واللي بجد بيسعدني
_ وانا بقولك مش عاوزه غيرك كفايه قوي عليه اني اكون مرتك
_ وانا عايز مراتي تكون دكتورة انا مش اقل من بدر
قالت بإبتسامة
_ يا شبل
_ هقلب عليكي اسد دلوقتي اخلصي ، وبعدين انا بعرفك انما لسة شوية علي الخطوة دي
قالت بإبتسامة
_ ماشي ، وان شاءلله ربنا يقدرني مقصرش
_ ولو قصرتي دي سنة الحياة ، يلا بقا ، انا جعان
_ ههههههه وانا
_ اوكي يلا نجهز مع بعض
_ يلا
خدتها ودخلنا المطبخ وجهزنا واكلنا ورجعنا شيلنا الاكل وعملنا شاي وقعدنا نشرب وبعدين قولتلها بتردد شديد
_ ندخل ننام؟
قالت بخجل
_ ماشي
مسكت ايدها ودخلنا الاوضه وقولت لما لقيتها متوتره جداً
_ جميلة فكي ، انا علي فكره قاصد اسيبك براحتك يكون ارتحتي ، احنا معانا العمر كله مش مستعجل علي حاجه ف متتوتريش قوي كده
سكتت ف قولت
_ تقدري تنامي لو عاوزه
وقفت قدامي وهي مغمضه عنيه وبتاخد نفس عميق وبعدين فتحت وقالت
_ مش عاوزه انام
_ عاوزة اية
قربت خطوه وحاولت تتكلم وانا واقف قدامها باصصلها ومستني اسمع هتقول ايه وفجاة اترمت في حضني
ـــــــــــــــــــــــــــــــــــــ
وفاءء
منمش دقيقة واحدة وفضل ماسك التليفون طول الوقت وكل ما اسأله مالك يقولي
_ مفيش حاجه
وبعد ما ألحيت عليه قالي وقلقه باين عليه
_ اصلي اتفقت مع شبل يكلمني
_ يكلمك ليه ده عريس في ليلة دخلته
_ عاوز اطمن عليه
' هههههههههه تطمن ايه يا بدر ده راجل مش بنت
_ يعني مفهماش ، هو كان تعبان و وقع قبل اكده خايف يكون ده اثر عليه
_ لا ان شاءلله مفيش حاجه
_ بردك قلقان
_ هههههههه والله ولادنا محظوظين بيك يا بدر حد يصدق ان شبل اخوك
_ انا معتبره ولدي مش اخوي انا اللي مربيه
_ ياعيني علي الرضا طيب واشمعنا شبل
قالت بإبتسامة خفيفه
_ هو اللي كان متعلق بيه من صغره كان يسيب امه ويجي ينام معاي انا وكان بيفرض نفسه عليه وانا مش طايق حد يكلمني ، يعني عمل لنفسه مكانه خاصة في قلبي
_ ربنا يخليكم لبعض ، ومتقلقش كله هيكون تمام
_ يارب
_ طيب يلا بقا نام شوية
_ مش هيجيني نوم غير لما يكلمني
_ والله تلاقيه نسيك ده عريس ولا نسيت يعني ايه عريس وليلة دخلة
قال بإبتسامة وهو بيميل عليه
_ له منستش ولولا حالتك كنت قولتلك نكررها
_ لا بلاش انا مش مستغنيه عن البيبي
_ ولا انا
حط ايده علي بطني وقال
_ إيه ياولدي هتفضل جوه كتير مش هتيجي تشوف ابوك وامك
_ هههههههه قوله لسه الاقامه باقي فيها ست شهور وشوية
_ كتير ما تتصرفي انتي مش دكتوره
_ هههههههههه هتصرف ازاي يعني اركبله الناقص من عندي
_ هههههه استغفر الله العظيم بس والله مشتاق قوي لشوفته وحاسس الأيام بتمشي ببطيء شديد قوووي
_ وانا
_ ربنا يعديهم علي خير
فكر شوية وبعدين قال
_ إيه رأيك لو كان ولد نسمية عبيده
_ هو اسم عبيده حلو وانا معنديش اعتراض عليه بس انا كان نفسي اسـ..... خلاص خلاص حلو عبيده
مسك يدي وقال بتفهم
_ لا بلاش عبيده المره دي ده ان جه ولد يعني ، المره دي نسمي بيجاد انا عارف انك نفسك تسمي علي اسمه
_ ايوه فعلا ، نفسي يعرف اني بحبه وسميت ابني علي اسمه
_ خلاص هو بيجاد ، اصلا اسم بيجاد حلو قوي وانا بحبه
بوست ايده وقولت
_ ربنا يخليك ليا يارب
_ ويخليكي ليا
قال كده ف وصله اتصال وفجاة قام ورد
_ الوو
بدر
اتصاله وصلني زي نجده ف رديت بلهفه وقولت
_ الوو
_ هههههه اااااسف جدا والله نسيتك
_ مش مهم ، طمني
_ عيب عليك اخوك كبر وبقا اسد
_ صح يا شبل
_ شبل اية ، بقولك اااسد
_ يعني الدنيا تمام
_ ايوه تمام قوي
اتنفست براحة وقولت
_ الحمدلله ربنا يسعدكم
_ شكلك منمتش
_ لا مقدرتش اغفل دقيقة بس الحمدلله دلوك اطمنت
_ حبيبي يا بدر ربنا يخليك ليه يا غالي ، يلا بقا نام شوية
_ ماشي حبيبي ، الف مبروك
_ الله يبارك فيك
قفلت معاه واتمددت مريح راسي علي المخده ومغمض عيني براحه ف لقيت وفاء نايمه في حضني وبتقولي
_ اطمنت دلوقتي
_ ايوه طبعا ربنا يهنيهم
_ وربنا يخليك ليهم ولينا كلنا
_ ربنا يخليكي ليا ويعدي الأيام علي خير ونشوف اللي مش عاوز يطلع ده
_ عد علي صوابعك من واحد لستة وانت هتلاقيه جه وصوت عياطه مالي البيت
_ هههههه نجرب ، واحد ، اتنين ، تلاته....
« بعد ست اشهر»
فتحت عيني علي زقت يدها ف قومت بسرعه وقولت وانا ماسك دراعها وساند ضهرها
_ مالك يا وفاء
قالت بألم شديد
_ تعبانه قوي ، شكلي بولد ، ااااه
_ طيب طيب هنروح لدكتور ، تعالي
خدتها وروحنا لدكتور وهي طول الطريق بتتوجع لغيت ما وصلنا ودخلوها اوضة العمليات وبعد نص ساعة تقريباً كلمني شبل يطمن ف قولتله وبعد ساعة جه هو وعبيده وجميلة و ورد والعيال ف قال عبيده
_ ايه ياخوي عملت ايه
قولت بقلق
_ لسه جوه
قال شبل
_ متقلقش ياخوي دلوقتي يطلعوا ويطمنونا
_ يارب
قالت جميله
_ ربنا يطمنك عليهم
_ يارب ، تعيشي يا جميله ، يارب يارب
قالت ورد
_ متقلقش يا ولد عمي هتقوم بالسلامة
_ ان شاءلله
بقوا يصبروني لغيت ما سمعت صوت بكا العيل وبعد دقيقة طلعت الممرضه شيلاه وبتدهوني وتقول
_ مبروك ولد زي القمر
خدته بين يديه وبقيت باصصله ودموعي بتنزل وانا مش مصدق اني شايل ولدي بين يدي بعد كل العذاب اللي شوفته بقيت شايله وبقوله في نفسي اني عمري ما هخليه يحس اللي انا حسيته ولا هوجع قلبه زي ما ابوي وامي عملوا بقيت اكلمه عن مستقبلة اللي انت محضرهوله من قبل ما يتولد وطال كلامي معاه وعنيه معلقين عليه ومش سامع حد من اللي حوليه لغيت ما خده مني شبل وقال
_ ما تسيبه بقا ايه هتاكله
وجه كلامه ليه وقال
_ تعالالي ده انا كنت مستنيك اكتر من ابوك علشان اضربك
بصلي وقال
_ هتسميه إيه بقا ، هتسميه علي اسمي طبعاً
قولت بإبتسامة وانا بمسح دموعي
_ لا هسميه بيجاد
_ نعم ياخويا طيب وانا مين هيسمي عليه
قال عبيده بضحك
_ وعد لو خلفت تاني هسمي عليك
قولت انا
_ و وعد مني لو خلفت ولد تالت هسمي عليك
_ والتاني اعترض علي اسمي ولا اية ، انتوا بتهزروا ، اسمع انت وهو اللي مش هيسمي علي اسمي مش هسمي علي اسمه والنهارده عندكم بكره عندي
قولت
_ انا اتسمي عليه خلاص شوف عبيده يمكن عاوز يتسمي عليه
قال عبيده
_ لا انا مش عايز لخبطة ، وكمان لو سمي علي اسمي وشتمه هقتله
بقينا شوية نهزر ونضحك مع بعض وبعدين خدت بيجاد ودخلت اطمن علي وفاء ولما شافتني ابتسمت بتعب قربت منها وحبيت علي راسها وقولت
_ حمدالله علي سلامتك يا حبيبتي
_ الله يسلمك ، وريهوني
حطيته علي دراعها وبقت تبصله وتضحك بتعب
_ ههههه ياربي ، صغير قوي
_ مش لسه اول يوم بكره يكبر
قالت وهي بتتأمل شكله
_ ربنا يحفظه ، ياه اخيراً جه
_ جه ونور الدنيا كلها ، ربنا يحفظه
_ يارب
بصتلي بإبتسامة وقالت
_ فرحان
_ فرحان وبس ، تقريبا يا وفاء ملقوش كلمة توصف الشعور اللي انا حاسس بيه دلوقتي
_ عندك حق وانا كمان مش شايفه ان في كلمة توصف احساسي دلوقتي
« يوم السبوع »
ورد
من وقت ما عرفت عبيده عمري ما شوفته مبسوط قد الوقت ده وكأنه هو اللي بقا اب مش بدر ، كنت شيفاه بيروح ويجي ويحضر حفلة لأسبوع بيجاد في بيتنا معملهاش ل بدر ولما قولتله اكده وقف عن اللي بيعمله ودار ليه بكل جسمه وقال
_ انتي زعلانه
_ لا أبداً مش زعلانه بس مستغربه
_ اصلك مش فاهمه ، انا خلفت قبل اكده غير بدر اللي انا كنت السبب في حرمانه من الخلفه
_ ايوه صح
_ متزعليش اهو عيد ميلاده قرب وهعمله حفلة كبيرة قوي
_ مش زعلانه والله بس مستغربه وبس ، ربنا يباركلهم فيه
_ امين يارب .. طيب تعالي ساعديني زمانهم جاين في الطريق عاوزين نجهز كل حاجة قبل ما يوصلوا
_ حاضر
_ في امينه تجيب الكبايات
_ ما انا قولتلك خدت اجازة عشان فرح بتها
_ ايوه ايوه افتكرت ، خلاص ، يلا شهلي
بقيت اساعده في ترتيب الطربيزه والشموع وتحضير كوبايات العصير وبعد وقت وصل بدر و وفاء ف استقبله عند الباب وقال
_ ايه التأخير ده كله مكنتش عاوزه تيجي ولا ايه
_ ودي تيجي ، ده انت عاملنا حفلة مخصوص اقدر مجيش
قال وهو بياخد بيجاد منه
_ كله علشان حبيب عمه ده ، عامل ايه ياد
_ متقولش ياد يا عبيده اسمه البشمهندس بيجاد
قالت وفاء حاطه يديها في وسطها
_ بشمهندس ايه ، انا ابني هيطلع دكتور زي امه ، اسمه الدكتور بيجاد
_ بشمهندس
_ لا دكتور
_ وانا بقول مهندس
_ لا بقا دكتور هههههه
قال عبيده
_ اسكتوا انتوا الاتنين ، الواد هيطلع ظابط "
في اللحظة دي دخل شبل ومن وراه جميله وقال
_ انتوا بتتكلموا في اييييه! بس هو يعيش لغيت ما يكبر مش يمكن يمووووت ... ايه مالكم... ايه يا بدر مالك ... في ايه يا عبيده ... ايه يا جماعه في اييييه
قال بدر وهو بيزنقه في الباب
_ يمكن ايه
قال عبيده وهو محاصرة من الجمب التاني
_ رد ، يمكن إيه
رد شبل بخوف وهو حاطط يديه قدام وشه متفادي الضربه اللي ممكن تجيلوه من اي واحد فيهم
_ ايه يا شباب وحدوا الله مش كده ، الموت علينا حق انتوا هتلحدوا ولا ايه ، مش في حياه وموت ، والموت ميعرفش كبير وصغير عندكم انا مثلا يمكن اموت دلوقتي بتحصل
قال بدر وهو بيمسكه من قفاه
_ لا مش يمكن تموت ، انت هتموت دلوك صح ، مين ده اللي يمكن يموت ياد ، ها
_ وحيات ابوك يا شيخ بلاش ، وحيات امك تسيبني منظري قدام مراتي يا بدر ، يرضيك اتضرب قدامها ، عبيدة وحياة ولادك خليه يسيبني
قال عبيده
_ طيب قول انا بارد
_ ما اناااا بارد وربنا بارد ، جميله!!! فزمتك مش لما تلمسيني بتحسي الدنيا بردت
سابه بدر وقال
_ هههههههههه الله يقطعك يا بعيدة ادخل
دخلوا كلهم وبعد دقايق جه عم محمد وهبه و سلوي و كريم شاركونا الحفلة ف قالت هبة
_ امال فين امينه
_ خدت اجازة عشان فرح بتها
_ اه صحيح
كملت بتنهيده
_ ربنا يتولاها
_ يتولاها ايه هههههه بقولك فرح بتها انتي متعقده من الجواز ولا ايه
_ لا هههههه ، بس بنتها مريضة مرض وحش واحتمال تموت ، بس خطيبها بقا بيحبها ومتخلاش عنها واصر يتجوزها
_ وه ، امينة مجبتليش سيرة خالص
_ مبتحبش تتكلم عن المشاكل اللي عندها
_ ربنا يشفيها يارب
_ يارب
رجعنا ليهم واحتفالنا بسبوع بيجاد اللي كانت فرحته كبيرة قوي في قلوب الكل حتي بشر و زيد وبدر كمان اللي كان دوره يدب يده في اي حاجه قدامه وبهدلني طول الوقت.
وبتمر الأيام والشهور والسنين والعيال واحنا بنكبر ، بشر بقا في سنة سته مع كريم في نفس المدرسة وبقوا هما الاتنين صحاب قريبين قوي ، وزيد وصل سنة رابعه ، وبدر ولدي دخل المدرسة ، وعبيده وشبل وبدر الكبير بقا معاهم سوبر ماركت خاص بيهم جنب شغل عبيدة مع عم محمد اللي بيكبر يوم عن يوم ، وجميلة حامل وباقيلها شوية وتتخرج وتبقي دكتوره زي وفاء اللي حامل تاني بردو وبنسبالي انا اديني قاعدة مع العيال ومع امينة اللي بقا حالها يحزن علي بتها اللي حملت وخايفة عليها تموت بسبب الحمل ده
بدر
خمس سنين عدوا كانوا اجمل سنين عمري مع بيجاد و وفاء ، خمس سنين محصلش فيها تغيرات كتير غير ان وفاء و جميلة حملوا في نفس الوقت وبيجاد دخل الحضانه وبدر دخل سنه اولي ابتدائي وانا وعبيده و وشبل فتحنا سوبر ماركت وبيقنا شركاء وكل حاجه كانت ماشية حلو لغيت ما في يوم كنت عازم اخواتي وحريمهم وعيالهم علي الغدا وفجاة الباب خبط وقومت افتح ف لقيت اللي مكنتش اتخيل انه اشوفه تاني بيدخل ويقولي وهو بيمسك في ياقة قميصي
_ بنتي فين يا بدر
قولت وانا ببعده عني
_ ابعد كده ، بنت مين
_ بنتي ، انت اللي خطفتها مفيش حدغيرك
قاموا كلهم ف قالت وفاء وهي بصاله بصدمه
_ طارق!!