رواية ذئاب لا تعرف الحب
الجزء الثاني2الفصل الاول1
بقلم نجمه براقه
احمد
بعد تلات سنين عيشتها في فرنسا قابلت بنت ايه في الجمال تشبه لبنات كتير شوفتها في البلد دي وكأنها واحده منهم عيون زرقه شعر اشقر بياض غير طبيعي ومكنتش اتوقع للحظة واحده انها ممكن تكون مصريه وفجاة وفي نفس اللقاء الاول اللي جمعنا في كافية واحد موبايلها رن وردت باللهجة المصرية وهنا كانت المفاجأة اللي خلتني مركز معاها وبحاول استوعب ان الشكل ده في منه في مصر وكانت فرصة مش ممكن هضيعها وفورا قومت من مكاني وقفت عندها وقولت
_ انتي مصرية
_ علي ما يبدو كدة وانتي شكلك كمان مصري
رديت وانا بقعد
_ ايوه انا من القاهرة بس انا اذهلت لما سمعت كلامك بالمصري ازاي انتي مصرية
رفعت حاجبها وقالت
_ طيب سالتني تقعد ولا لا
_ ههههه سوري حسبت اننا ولاد بلد واحده ف عادي انا احمد ، االرائد احمد ، سابقاً مش سابقاً قوي من تلات سنين كدة
قالت وهي بتقوم ومبتمسك شنطتها ودفاترها
_ تشرفنا يا حضرت الظابط ، انا مريم من اسكندريه واهل بيك ف فرنسا
قالتها ومشيت وفورا قومت ومشيت وراها وانا بقول
_ انتي رايحه فين استني هنتعرف ، يا انسه مريم
وقفت ودارت عيونها بزهق وقالت
_ امممم اااافندم
_ انتي مش مبسوطه انك قابلتي حد من بلدك
_ لا والله عادي اصل انا ليه معارف هنا في فرنسا وزمايل في الدراسه مصريين وعرب حضرتك مش في فيلم هنا علشان افرح لما الاقيك فكك مني
_ افكني منك ، لا دي طلعت مصرية بجد طيب استني بس حضرتك جايبه الملامح دي منين انا مش مصدق انك مصرية اكيد في حاجه غلط
وقفت تاكسي ومشيت من غير ما ترد وانا طلعت وراها كان لازم اعرف ساكنه فين وزي عادتي ناويتلها وكنت مخطط لصحوبيه بس السكة دي مكنتش سكتها وتعبتني قوي سنه كاملة وانا بحاول معاها ومعرفتش ويدوب قدرت اعرف انها جايه تكمل تعليمها وان سبب الملامح دي ان جدتها فرنسيه وتوارثت هي واختها نفس الملامح وبس ف قررت اتنازل واعقل وامشي مستقيم واتجوزها وطلبت ايدها وبعد ما طلعت عيني وافقت ورجعنا مصر واتجوزتها هناك وعيشت معاها سنة كانت اجمل سنة في حياتي وزادت جمال لما ربنا رزقنا ب أيسل ، بنوته جميلة واخده جمال مامتها عاشت معانا سنة واحده قبل ما تتخطف وتموت او..
او تدبح.. ومن هنا بدات اسؤاء ايامي والحزن اقتحم حياتنا انا ومريم وخلاني ابكي بدل الدموع دم وصورة بنتي اللي مكملتش سنة وهي مدبوحه مفارقتنيش ولا قادر احذفها عشان لو جه يوم وعرفت اللي عمل فيها كده مشفقش عليه لثانية واحده وانا بسلخ جلده عن لحمة ...
الحكاية بدات لما اتصلت بيه مريم وانا في الشغل وقالتلي بانهيار
_ الحقني يا احمد أيسل اتخطفت
سيبت كل حاجه ورجعت علي البيت باقصي سرعة ولما دخلت لقيتها هي و" مها " اختها اللي حاضنه مليكة بنتها وبتبكي وقولت بانفعال
_ اتخطفت ازاي وانتوا كنتوا فين
ردت مريم وهي بتبكي
_ انا سيبتها مع مها ومليكة وروحت اجيب ساندوتشات رجعت ملقتهاش ، مها بتقول شافت واحد بيخدها ويمشي بعربيه ، اتصرف يا احمد بنتي لازم ترجع
تجاهلت كلامها وتوجهت ل مها وقولت
_ واحد مين وشكله إيه ، ايه اللي حصل اتكلمي!!!
قالت وهي بتبكي
_ كنا في جنينه انا وهي ومريم ومليكة بنتي ولما راحت مريم تجيب ساندوتشات سابتها معايا ف خدتها هي ومليكة عشان العبهم علي المرجيحه ف لقيت واحده جايه من ورايا وبتكلمني بصتلها دقيقتين واتلكمت معاها ولما رجعت ابص علي البنات ملقتش ايسل بقيت ابص حوليه وادور عليها ف شوفت واحد بياخدها ويبعد طلعت اجري وانادي عليه واصرخ علشان حد يلحقني بس هو كان طلع بالعربية ومشي
_ شكله إيه تعرفيه قبل كده
_ معرفهوش اول مره اشوفه ، هو شاب يجي 35
وقفت لدقيقه وسط عياط الاتنين وانهيار مريم افكر مين ممكن يكون ليه مصلحه وهل قاصدنا ولا لا وفجأة افتكرت بدر وكلامه في اخر مره انه هيقابلني وهيبهرني باللي هيعمله ، محدش غيره هو ممكن يعملها ، لا مش هو وبس وبيجاد كمان اكيد منسيوش اللي عملت مع وفاء وفورا طلعت من البيت اجري علي بيت ابو وفاء القديم ولما شافني مفتكرنيش وقالي وهو بيدقق نظره فيه
_ انت مين
_ انا عاوز بيجاد هو فين
_ بيجاد مين، ابن بنتي؟
مستغربتش انها خلفت وسمت علي اخوها وقولت بنرفزه
_ يا حج انا هعمل ايه بابن بنتك انا بسال عن بيجاد اخوها هو فين
_ اه بيجاد اخوها ، بيجاد مسافر بره مصر بقاله سبع تمن سنين دلوقتي يابني ، انت مين انا شوفتك قبل كده فين
_ سبع تمن سنين؟ يعني مرجعش
_ لا ، انت مين وعاوز منه إيه
سكت شوية افكر في كلامه اللي لو كان صح ف يبقي مفيش غير بدر هو اللي ممكن يكون خطفها ف قولت
_ انا صاحبه ، طيب انا عاوز عنوان بدر جوز بنتك
_ انت صاحب مين فيهم
_ صاحب الاتنين يا حج هتقول العنوان ولا لا
خدت منه العنوان وطلعت علي هناك ولما وصلت فتحلي بدر ف مسكت فيه وقولت بغضب
_ بنتي فين يا بدر
قال وهو بيفلت ايديه عنه
_ ابعد كده ، بنت مين!
_ بنتي ، انت اللي خطفتها مفيش حد غيرك
نهيت جملتي وانا في قمة غضبي ف جاني صوت وفاء وهي بتقول
_ طارق!!
وجهت نظري ناحيتها ورغم اللي انا فيه بس لما شوفتها سرحت في شكلها اللي اتغير نسبياً واتحول من شكل البنت المرحه الخفيفه لست بيت في التلاتين بطنها قدامها وابنها ماسك في ايدها وعينه عليه وبعد لحظه فوقني من شرودي شبل اللي هو كمان اتغير وشكله بقا انضج بكتير عن الاول بيقرب مني وبيقولي
_ انت!
بصيت لبدر متجاهل كلمته وقولت
_ بنتي فين يا بدر رد عليه بدل ما اقلب الدنيا عليك
_ بنت مين انا مشوفتش بنات ولا اعرف انك مخلف اصلا
_ امال مين خدها يعني
اتقدمت وفاء وقالت
_ انت ايه جابك هنا ، وبأي عين تتهم بدر بخطف بنتك
قال بدر
_ استني يا وفاء ، تعاله معايا
قالت
_ رايح فين ده مجرم
_ بقولك استني ، تعاله
مسك دراعي وطلعنا بره ف وقف قدامي قال
_ انا مشوفتش بنتك ، ولو كنت بفكر انتقم منك تاني مش هختار اخطف حد ملهوش ذنب
_ امال هيكون مين ماهو مفيش غيرك انت او بيجاد
_ بيجاد مسافر بقاله سنين هيخطفها ازاي
_ امال مـ....
قاطع كلامي اتصال وصلني من رقم خاص ولما فتحت جاني صوت واحد بيقولي
_ البقاء لله يا حضرت الظابط
تلعثمت في كلامي خوف من اني اسمع الخبر اللي توقعته بسبب نبرته اللي كلها خبث
_ في مين ، انت مين
_ شوف الرسايل وهتعرف
قفل السكه وانا فتحت الرسايل وشوفت صورة ل ايسل...
#بدر
بص لتليفون بصدمه وعنين شاخصه وجسم متجمد للحظات من غير حركة بقيت أسأله في ايه ومردش ف مسكت التليفون منه لقيت صورة لطفلة مدبوحه دبح وتوقعت فوراً ان هي دي بنته ويمكن صدمتي مكنتش تقل عنه كتير وانا شايف المنظر ده ومش متخيل انه مهما كان الذنب اللي عمله يكون ده الانتقام اللي يستحقة ، بقيت واقف وشايفه في الحالة اللي هو فيها ومش لاقي كلام يتقال وفجاة خطف مني التليفون وطلع يجري زي المجنون خطيت خطوتين علشان الحقه بس وقفت لما افتكرت اللي عمله مع وفاء واللي يمنعني حتي اني اشفق عليه ورجعت البيت وانا لسة مصدوم من المنظر اللي شوفته ومش قادر اتمالك اعصابي ف استقبلوني كلهم بالاسئله
بصتلهم وانا جوايا خوف شديد علي بيجاد اللي تخيلت للحظة انه ممكن يحصله زي ما حصل للبت ف ضميته ليه وقولت بتوتر
_ حد بعتله صورة بته اللي مكملتش سنه تقريبا وهي مدبوحه
وسعت عينين الكل بصدمه ف قالت وفاء
_ دبح!!!
اومات بدماغي ف قال عبيده بذهول
_ دبح مره واحده ، لا اله الا الله ، هيكون عمل ايه علشان ينتقموا منه كده
قالت وفاء بسخط بعد ما استجمعت نفسها
_ اكيد عمله مهببه ، وكان اولي هو اللي يتدبح مش بنته
قال شبل
_ خلاص يا جماعه العيال هيخافوا ، ربنا يصبره
سكت الكل وقفلنا علي السيرة وتقريبا مش احنا بس اللي قفلنا علي السيرة وبعد ما كنت متوقع ان جريمة زي دي هتهز البلد كلها ملقتش اي خبر عنها وطبعا مكنتش محتاج اقعد مع احمد تاني واتكلم معاه علشان اعرف سبب سكوته اكيد ناوي يجيب حق بنته بنفسه ومع اننا عمرنا ما هنكون في صف واحد بس موافقه علي الفكرة دي ولو مكانه كنت هعمل زيه
ـــــــــــــــــــــــــــــــــــــــ
« ليلة لا تنسي »
بعد شهر من الحادثة دي نورت دنيتنا جويريه كانت جميله وجمالها كان بيزيد كل ما بتكبر وعلي عكس كل البنات اللي في سنها بعد ما وصلت لسن ال 12 سنه طلبت تتحجب وكانت ذكيه ومثقفه وهاديه والكل يشهد بأدبها اللي متعبتناش نهائي علشان توصله لانها ببساطة خدت هدؤئي وخدت ذكاء امها وخفة دم بشر وتُقل عبيدة وطموح جميله وشطارة ورد خدت من كل واحد فينا احسن صفه لانها اتربت وسطنا بعد ما اتجمعنا كلنا في نفس العماره وبعد ما وصلت لسن ال 15 وبعد حفلة عيد ميلاها اللي قضيناها انا واخواتي وجارنا الجديد الاستاذ السبع وعياله وصحاب العيال كلهم صاحب بيجاد طلب مني انه ياخده ويبات عنده علشان يذاكروا وبالفعل راح وقريب الساعة اتنين صباحا وصل اتصال من المستشفي ل وفاء وطلبوها تيجي لان في حاله طارئة ومع ان المستشفي بينها وبين البيت ربع ساعة مشي بالعربية روحت اوصلها ودي عادتي في كل مره تضطر تروح بالليل وروحنا وسيبنا جويريه نايمه واحنا مطمنين انها هتكون بخير ودخلت وفاء غرفة العمليات وبقيت مستنيها لغيت ما خلصت و اطمنت علي المريض وبعدها رجعنا علي سته الصبح ولأن كان يوم جمعه ف اكتفينا بالاطمئنان علي جويريه من غير ما نحاول نصحيها ولما دخلنا لقيناها نايمه وفي كركبة بسيطه في الاوضه ودي حاجه طبيعيه بعد حفلة عيد ميلادها اللي كانت كلها هداية من الكل ورجعنا نيمنا وصحينا علي العصر وبعد دقايق جت وفاء تقولي بحيره
_لقيت جويريه لسة نايمه ولما جيت اصحيها شدت الغطا علي نفسها ومرضتش تقوم
_ تلاقيها تعبت من حفلة امبارح
_ غريبة مش متعوده تنام كل ده
_ حاجة عادية متشغليش نفسك
عدينا الموقف ده وبعد ساعات جه وقت العشا دخلت وفاء عشان تناديها ورجعت بعد دقيقة تقولي مش راضيه وشكلها خايفه دخلت عندها لقيت دموعها في عينيها قعدت عندها وقولت بقلق
_ مالك ياحبيبتي خايفه من ايه
هزت دماغها بنفي ف قولت بقلق
_ في حاجه حصلت
رجعت تنفي بس دموعها وخوفها كانوا بيقولوا ان في حاجة وبعد الحاح وضغط قالت صحيت ملقتكمش وخوفت لوحدي بس مذكرتش ان في حاجه ملموسه حصلت ف طمناها وقررنا منسبهاش لوحدها تاني وكنا فاكرين ان ده موقف وهيعدي بس بتمر الأيام وجويريه سكوتها مبينتهيش وكلامها بيكون علي قد السؤال وبتخاف من اي حد لدرجة انها بطلت دراسه واعتزلت كل صحابها واعتزلتنا احنا شخصياً واكتفت بالقرايه ودي الحاجه الوحيدة اللي بقت مستمره عندها وخاصه رواية « The Fault in our Stars « اللي بعد سنتين من الحاله اللي دخلت فيها بقت مداومة علي قرأتها ولما اسأل وفاء عن سبب تكرار قراءة نفس القصة تقولي
_ كلنا لينا فيلم او مسلسل او قصة مفضله بنحب نكررها متركزش واكيد جويريه عمرها ما هتكون مصدر شك البنت مبتطلعش من اوضتها ادعي بس ربنا يهديها وتوافق تتكلم مع الدكتور لحسن غلب معاها
قولت يارب تتكلم وكل مره بقول نفس الكلمه بس مبتتكلمش ويفضل سبب حالتها دي مجهول ومش لاقين ليه سبب
« بعد سنوات»
#بيجاد
سميتها فاطمة ، ومش بس سميتها فاطمة ده انا حرصت انها تكون نسخة منها وعدت السنين وانا وهي عايشين لوحدنا بربيها زي ما انا عايز بحفظها قران واحاديث وبحببها في الحجاب والستر لغيت ما هي بنفسها جت عندي وهي في سن ال 18 تقولي
_ بابا
_ نعم يا حبيبتي
قالت بتردد
_ كنت عايز اقولك حاجه
_ طبعاً يا حبيبتي قولي
_ كنت عاوزه البس نقاب
سيبت اللي بعمله وقولت بإبتسامة بعد ما ديرت ليها بكامل جسمي
_ طيب ومالك بتقوليها وخايفه
_ يعني موافق
_ طبعاً
_ ده انا قولت انك هترفض
_ وارفض ليه
_ علشان المجتمع اللي احنا عايشين فيه ، هنا مفيش بنات متحجبه حتي
_ يولع المجتمع وتولع امريكا المهم احنا عاوزين ايه ، موافق طبعاً تقدري تلبسيه من النهارده لو عاوزة
ارتفعت علي صوابع رجليها وباست خدي وبعدت بسرعه وهي بتقول بسعادة
_ حبيبي يا بابا
قولت بإبتسامة
_ ربنا يحفظك حبيبتي ، يلا سيبيني بقا علشان اجهز غدا ولا انتي مجوعتيش
_ لا طبعاً جوعت انا هموت من الجوع
_ طيب اجري جهزي السفره وساعديني شوية
_ اوكي حبيبي
_ تاني اوكي
_ هههههه اقصد Okay bab
_ فاطمة
_هههههه بابا حرام عليك حضرتك بتنسا اننا عايشين في امريكا وطبيعي اتكلم كده
_ انا قولتلك طول ما احنا في البيت هنتكلم مصري وبس بره اعملي اللي انتي عاوزاه ان شاءلله تتكلمي صيني حتي
_ هههههههه اوكـ....
_ اممم وبعدين!
_ اقصد حاااااضر بلي ، نعم
_ شاطره يلا بقا انا عصافير بطني بتصوصو
_ الف سلامة علي عصافير بطنك من الصوصوه ، الا قولي صحيح
_ إيه
_ تكونش العصافير دي اللي بسمعك بتكلمها وانت لوحدك
ديرت ليها ضهري وقولت
_ قولتلك بدل المره مليون مره بتكلم مع نفسي
_ اممم انا لو بأمن بوجود العفاريت كنت قولت انك بتتكلم معاهم
_ ومبتأمنيش ليه بقا مش مذكورين في القرآن ولا مفيش منهم في امريكا
_ يعني بتتكلم مع عفاريت بجد
_ اه ما انا بتكلم معاكي عادي اهو
_ يعني انا عفريته
_ انتي حوريه بس يلا انا جوعت بجد
ـــــــــــــــــــــــــــــــــــــــ
#بيجاد
كنت واقف قدام الطلاب في السيكشن بشرحلهم وصابب كل تركيزي في اللي بشرحه وبتجاهل الوشوشه والهمسات اللي سامعهم من اتنين قاعدين جمب بعض علي قد ما اقدر ولكن لكل شيء نهاية حتي صبري كان ليه نهاية ف وقفت وبصيت علي اتنين بيقولوا انهم مخطوبين وطول الوقت قاعدين جمب بعض في السيكشن وكذلك في الكافيتريا وطول الوقت ضحك وهزار ومياصه علي بعض ، ومش هو ده اللي ضايقني انا اللي ضايقني ان البنت منتقبة او بتمسي نفسها منتقبة ومش فاهم ده ازاي مع ان لبسها بارز شكل جسمها ومفسر مفاتنها بشكل يجزع النفس وحاطه حتت قماشه علي وشها مش مبينه منه غير عينيها الواسعه المكحله بكحل عربي اصيل مع ماسكره موقفه رموشها زي اسنان الشوكه بالإضافة لضحكتها اللي للأسف جميلة وبشهادة الكل واللي بتقصد تسمعها للي حواليها حتي لو هتصتنعها ، ومش دي المشكله المشكلة انها بتدعوا للبس النقاب والتعفف في الكليه وبتنصح البنات بستر نفسها علشان لقاء ربنا وانا كل ده وساكت عليها وعلي غيرها كتير جداً بشوفهم في حياتي وانا رايح وانا جاي وكلهم من عينتها تقريبا بس النهارده بذات طفح الكيل ومقدرتش اسكت ف اتقدمت ناحيتهم وانا حاطط ايدية في جيوبي و وقفت جمبهم شوية واما شافوني وقفوا قصادي باحترام مش مناسب ليهم ف قولت
_ ايه يا انسه مش مركزه وبترغي مع حمو ليه
_ سوري يا دكتور مفهمتش ، حمو مين
_ الاخ اللي جمبك ده مش حمو بردو
_ لا ده اسمه شادي وهو خطيبي وكل الجامعة عارفه
_ كل الجااامعه واضح انكم مشهورين قوي وانا معرفكمش ، طيب والكلام المهم اللي سايبين الشرح عشانه مينفعش يتأجل لبعدين
قال الولد
_ سوري يا دكتور بس كنت بصالحها اصلها قافشه شوية
_ نعم!! تصالحها وقافشة في السيكشن؟!!!!!! وانا صوتي منبوح عشان تفهموا
كملت بنرفزه وانا بسقف وببص لباقي الطلبة
_ عظيم عظيم ، ايه يا جماعه مفيش شجرة هنا يستظلوا بظلها عشان المشهد يكمل ، عصير يابني عشان القعدة لازملها حاجة تطريها يمكن الانسه تصتلح وتفك وانا صوتي منبوح في ام الشرح يمكن هي وقرة عينها يفهموا وينجحوا
كملت وانا بشاور علي الباب بعد ما رجعت ابصلهم
_ انتوا الاتنين متحضروليش تاني عشان انا مش عارف المره الجايه ممكن اعمل فيكم إيه
قالت
_ حضرتك بتكلمنا كده ليه ، الموضوع مش مستاهل
_ امال ايه اللي يستاهل ده انا لو متعلم بفلوس حرام مش هيوقع في طريقي اتنين زيكم ، ااااطلعوا بره ، اطلعواااا
#هاجر
كنت قاعده في السيكشن وبحاول امنع نفسي من الضحك وانا شايفه بيجاد بيتحول لصايع بسبب الاتنين دول وبعد ما خلص والاتنين مشيوا و بصلي دوناً عن الكل وقال
_ إيه يا انسه هاجر عجبتك المسرحيه
اتنحنحت وقولت باحترام
_ سوري يا دكتور
_ اها
بص للكل وقال
_ سوري يا شباب ، نكمل ونرررررركز عشان انا اتخنقت
سمع صوت ولد بيضحك ف قال
_ لا كده مبقاش تعليم نقلبها مسرح احسن ، اييييه!
قال الولد وهو بيحاول يمنع ضحكته
_ سوري يا دكتور بس حضرتك عندك حق في اللي عملته برافو
قال كده وسقف والكل سقفوا وراه تشجيع ليه ف قال بعصبيه
_ ياااانهار اسود ، شباب وربنا هقلبلكم علي الوش التاني مفيش الكلام ده هنا ركزوا هتسقطوا يخربيتكم
ضحك الكل ف قال وهو بيرجع ويشوح بأيدة
_ يووووه دي مبقتش عيشه انا كان مالي ومال التعليم ، خليكم كده انتوا حرين هتسقطوا.
بيجاد ابن عمي طيب جداً وشاب شيك وملتزم والبنات كلها هتجنن عليه بس لما بيتغاظ بيتحول لصايع ميه في الميه وانا طول الوقت ببصله وانا حاطه ايدي علي بوقي اكتم ضحكتي اللي مش قادره اوقفها بسبب طريقة شرحه اللي بقت تضحك بعد ما اتنرفز وبعد المحاضره وقفني وانا ماشيه في الكليه وقال
_ اييييه يا انسه هاجر احنا جاين نتعلم ولا نضحك
_ هههههه اسفه بس انت تضحك وانت متعصب
_ لا والله ، طيب هقول ل ابوكي يا هاجر
_ وانا كمان هقوله
_ تقوليله إيه
_ هقوله وخلاص
_ هااجر اتقي شري انا براضي في ابوكي لغيت ما اخلص الرساله لو عملتي حاجه هموتك
_ طيب مش عاوزني اقول متقولش انت كمان
_ شوفوا البنت
_ مش ببتزك علي فكرة
_ امال ده ايه
_ بساومك
_ هاهاهاها بطني وجعتني من الضحك كفاية ارجوكي
_ هاهاهاها رخم ، امشي ماما محذراني اقف اتكلم معاك
_ نعم يختي
_ مش اللي فهمته بس هي بتقولي علشان كلام الناس وانت فاهم بقا يا بيجو
_ بيجو ، طيب امشي لا ادوسك
_ علي اساس عربيه وكده هاهاها دمك خفيف قوي محتاج عملية تقل دم
قال برخامة
_ اهو احسن من اللي معندهمش دم من اساسه
رديت بنفس طريقته
_ زرررريف ولتييييف امشي بقا
سيبته ومشيت وفي طريقي شوفت مليكة زميلتي وصحبتي وقفت عندها وقولت وانا بحضنها
_ حبيبتي مليكة عامله ايه ياروحي
_ الحمدلله حبيبتي وانتي عامله ايه وحشاني
_ وانتي كمان ايه فينك ليكي كتير مجيتيش
_ باجي بس مش بصادفك كتير طمنيني عليكي اخبارك ايه
_ الحمدلله عايشه
_ طيب ابقي كلميني
_ اكيد حبيبتي يلا باي هتاخر علي المحاضره
رجعت البيت وكالعادة ماما وبابا مش هنا واحد في الكلية والتانيه في العيادة وكالعادة بردو طلعت فوق لبيت عمي عبيدة اقعد هناك يكون جم مع اني اقدر أقعد لوحدي بس انا بتلكك عشان اروح لأجل عيون بدر افندي اللي مش حاسس بيه اللي للأسف اتعميت ومعجبه بيه وهو ولا هو هنا ، ولما وصلت فتحتلي خلود حفيدة دادة امينة وتعتبر صحبتي لاننا متربين مع بعض ف قولت وانا بدخل
_ ازيك يابت
_ تمام وانتي
_ رايقة ، إيه الاخبار فين الناس
_ ههههه رايقه؟! ، ماشي ، عمك في شغله وطنط ورد مع أستاذ بشر في اوضته بتزن عليه كعادتها علشان يتجوز واستاذ بدر خرج والاستاذ زيد بيسجل فيديوهات تنمية زفت بشرية زي كل يوم
_ يا عيني ابن عمي بقي من المشاهير
_ وانا كمان ولا نسيتي اني بقيت بلوجر قد الدنيا
_ قد الدنيا فعلاً عندك 2000 متابع و 999 غيري مانا متبعاكي بعد ما صعبتي عليه وانتي بتحكي مع نفسك في ام الفيديو
_ الله يسد نفسك يا بعيدة ، اعمل ايه ما انا مش عارفه اكتر الفلورز
_ ميلي علي زيد وخليه يعملك شير عنده وهما يكتروا لوحدهم
_ لا مقدرش طبعاً ، وبعدين ده بيقصد يحبطني ومش بيبطل يتريق عليه مانتي بتشوفي بنفسك ، محبط ومستفز
_ منفسن خايف تاخدي منه الفلورز بتوعه وتنجحي ذكوري متعفن ، بس ولا يهمك هميلك انا
_ طيب بقولك ايه ما تيجي معايا تشوفيني وانا بعمل لايف النهارده
_ اوكي قوي قوي يلا
روحنا مع بعض في البلكونة وبدات الايف وانا قاعده ورا الكاميرا بضحك علي طريقتها اللي بتتحوله في الفيديوهات وفجاة دخل علينا زيد وقال
_ ارحمي نفسك من التليفون شوية يا نجمة
قالت خلود موجهها كلامها للفانز
_ سوري يا جماعه جايه
مشيت من قدام الكاميرا و وقفت قدامه وقالت
_ استاذ زيد من فضلك حل عن دماغي ولا عشان بصور في بيتكم ، ما انت كمان طول الوقت بتصور
_ طيب انا بتكلم في تخصصي وبرد علي استشارات الناس وبعمل جلسات اون لاين انما انتي ايه الهطل اللي بتقوليه ده ، يعني ايه تديلهم نصايح ازاي يحلوا مشاكلهم الهايفه
_ يا سيدي وده تخصصي مالك انت
قولت
_ ملكش حق يا زيد ده بدل ما تساعدها تزود عدد المتابعين
_ ويزود ليه هو اصلا دايما يحبطني كده
_انا مش بحبطك بس المحتوي بتاعك ملهوش لازمه حب شهره وخلاص وده غلط عليكي
_ حب شهره؟
_ اه ملهاش تفسير تاني زيك زي بتوع التيك توك والبلوجرز اللي بيصورا اي كلام هابط عشان يكونوا تريند
رجعت بصتلي وشوفت الزعل في عنيها وبعدين رجعت للايف متجاهله وجوده وكملت ف بصلها شوية وبعدين مط شفايفه ومشي ف روحت وراه وقولت
_ ياخي حرام عليك كسرت نفسها
_ انا قولتلها الحقيقه ولا انتي شايفة ان اللي بتعمله ليه لازمه ، يعني ايه بتنصح البنات يتصرفوا ازاي
_ علي فكره يا زيد هي بتنصح البنات صح وبتحللهم مشاكلهم وكتير بنات بيبعتولها رسايل بمشاكل حصلت معاهم ولو مكنتش صح وبتقدر توصل اللي عاوزاه لناس مكنش حد بعتلها
_ بردو هيافه
_ وتفرق ايه عن الفيديوهات بتاعتك
_ شوفتي اديكي قولتي تفرق ايه ، خلود بتقلد
_ ياسيدي مبتقلدش انت بتتكلم في مشاكل نفسيه وازاي الناس تتعامل معاها وهي بتتكلم في مشاكل بتحصل مع البنات
_ انتي عاوزه ايه دلوقتي
_ عاوزاك تبطل تكسر نفسها
_ انا بتكلم في مصلحتها
_ ياسيدي طالما مبتغلطش متتكلمش
_ هي حره انا معتبرها اختي وخايف عليها
_ شكر الله سعيك يا سيدي
_ رزاله وكده ابقي فكريني اعالجك منها
_ هاهاهاها خفيف
جاني صوت بشر من ورايا وهو بيقول
_ مالكم صدعتونا
قال زيد
_ هي اللي صداع داخل ورايا لايف ومش عايز صوت
_ يارب الروتر يفصل
_ يارب انتي اللي تفصلي
قالها ومشي ف بصيت ل بشر وقولت
_ انا مش عارفه الناس متابعينه علي إيه
_ يمكن علشان مش بيرغي رغي من غير فايده
_ قصدك ان انا رغايه
_ ايوه
_ خسئت يا ابن عمي
_ خسئت؟
_ اه هههههه دعوه من زمن الجاهليه ، ها ايه الاخبار لسه مقتنعتش تجوز
_ ليه يعني
_ اصلي سمعت ان مرات عمي بتزن عليك علشان تجوز زي عادتها
_ حصل
_ طيب وصلتوا لايه
_ متدخليش في اللي ملكيش فيه
_ لا بجد ونبي يا بشر ليه مش راضي تجوز
قال وهو بيتجه ناحية التلفزيون
_ قولتلك متدخليش
قعد ف قعدت علي نفس الكنبة وقولت
_ علي فكره انا كبرت واقدر افهمك بس انت احكيلي
_ كبرت قد ايه يعني
_ قربت اكمل العشرين سنة يعني كبيره بما يكفي عشان افهمك
_ ههههه صح
_ طيب احكي
_ احكي اقول ايه يابنتي
_ ليه مش عايز تجوز
_ مش عايز وخلاص
_ ليه بردو
_ من غير ليه
_ بشر قولي الحقيقة ، في وحدة كدة ولا كدة
تجاهل سؤالي وبدء يقلب في التليفزيون ف قولت
_ يبقي فيه ، بس لو فيه ليه متجوزهاش ايه اللي يمنع
مردش ف قربت منه في قعدتي وقولت
_ بشر ونبي احكيلي احنا مش صحاب وانا بحكيلك كل حاجه ، احكيلي هي مين وليه مش عايز تجوزها
_ هي مين ، انت بتغني وبتردي علي نفسك
_ يعني مفيش
_ لا مفيش
_ امممم
_ متفكريش كتير مفيش حاجه ، قوليلي عاملة اية في الكلية
_ حلوة
_ ماشية تمام ولا في حاجه واقفه معاكي
_ لا تمام قوي لو كان فيه كنت لقيتني نطالك تحلهالي
_ نطيلي ياستي ولا يهمك ما انا اتبليت بيكي من حضانه لابتدائي لاعدادي لثانوي لكلية لشيبسي لكولا لفسح كاني خلفتك ونسيتك
_ هههههه اعمل ايه طيب انت عودتني علي كدة
_ عدي الجمايل
_ هههههه لا كتير بصراحه ، ربنا يخليك ليا يا ابن عمي والله انت اقرب حد ليه وبحبك
بصلي بصه سريعة بصه دائماً بشوفها منه ومش بفهمها بس هو كده بشر مش مفهوم كلامه قليل جداً وتقريبا مش بيتكلم مع حد كتير غيري انا
#بشر
كانت قاعدة جمبي وبتتكلم معايا وبتمدح فيه وفجاة دخل بدر وهنا اتبدلت وقامت من جمبي وهي مبتسمه وبترد عليه السلام ولما قعد معانا سابتني وقعدت علي الكرسي القريب منه وقالت باهتمام وابتسامتها مش مفارقة وشها
_ ايه ياعم فينك محدش بيشوفك
_ مانتي عارفه اني طول اليوم في الشغل مع بابا وعمك
_ ليه مش بترتاح يوم زي اخواتك ايه مبتتعبش
_ بتعب بس انتي عارفه مبحبش اقعد
بصلي وقال
_ هوووي مالك
_ مالي
_ ساكت
قالت بضحك
_ هههههه ومن امتي بيتكلم يعني عادته ولا هيشتريها
قولت وانا بقوم
_ اهي العفريته قالتلك ، هروح الشغل ، عاوزه حاجه
قالت من غير ما تبصلي
_ لا شكرا
مشيت وبعد ما نزلت من العمارة وقفت علشان ارد علي اتصال كريم
_ ايه الاخبار
_ تمام
_ بتعمل ايه دلوقتي
_ رايح الشغل لبابا
_ طيب ما تستني اجيلك ونروح الشغل التاني احسن اكيد اخواتك وعمك مع ابوك ومش محتاجينك
_ اخواتي في البيت بس ماشي نروح الشغل التاني يلا بسرعة مستنيك قدام العمارة بتاعت العيلة
_ ماشي حبيبي
وقفت استناه وبعد وقت لقيت ورده بتتحدف عليه من فوق ولما بصيت لقيت هاجر بتشاورلي من البلكونة ف رديت عليها وبعدين حطت ايدها علي خدها وسكتت كان شكلها متضايقه من حاجة وطبعا مكنتش محتاجة اللي يعرفني سبب الضيقة دي ، اكيد بدر مخدش باله منها زي عادته ولا عمره هياخد باله منها ولا هي هتاخد بالها مني ، وحقها هتاخد بالها ازاي وانا اكبر منها ب 12 سنه وكانت بتقولي يا عمو من سنتين بس
#بدر
من كام سنه سافرت اكمل تعليم بره مصر ورجعت لقيت جويريه بنت عمي كبرت وبقت انسه جميلة وهاديه جدا ، بس مش الهدؤء اللي الكل فاهمه هدؤء خوف وقلق ورهبة من الناس ، جويريه كانت طبيعية قبل ما اسافر ولما رجعت لقيتها بتخاف تتكلم وبتخاف تتواجد في اي مناسبه بتخاف من الزحمة لسبب مش مفهوم ولما سألت في إيه قالولي عندها رهاب اجتماعي ومحدش عارف سببه ولا عارف يخرجها منه حاولت كتير اكلمها واخرجها من الحاله دي ومعرفتش نهائي لانها بتخاف تتكلم معايا ف دخلت عند زيد لقيته بيتكلم في لايف ولما خلص ودار ليه في قعدته وقال
_ في ايه
_ يابني انت مش شغلتك تعالج المرضي النفسيين ولا انت بتتمنظر علينا وبس
_ بيقولو بس عاوز ايه يعني
_ عاوزك تعالج جويريه
_ هو حد قالي عالجها وانا رفضت
_ انا بقولك اهو
_ انت متنفعش هي لازم تكون عاوزة تتعالج
_ هي بتخاف وعمرها ما هتعوز
_ خلاص علاجها انت
_ وده ازاي يا فالح
_ قرب منها
_ مين قالك اني محاولتش ، حاولت كتير بس هي مش بترضي وكمان انا مش عارف اعمل حاجه علشان اخوها وابوها اخري ازورهم واتكلم معاها في غيابهم وبس
_ اخطبها
_ اخطبها؟
_ اه انت مش بتحبها بردو ولا ايه
مكنتش قولت لحد الموضوع ده لكن واضح انه باين عليه ف هزيت دماغي بالموافقه ف قال
_ خلاص اخطبها وهيكون عندك فرصه تتواصل معاها اكتر وتخرج معاها ، مش هقولك اتجوزها لانها بتاكيد مش هتيجي الفرح بسبب حالتها
_ ماشي حتي لو هخطب انت وبشر مفيش حد فيكم فكر يخطب ازاي بابا هيوافق اني اخطب قبلكم
_ انا ملقتش اللي عاوزها ده اولا وثانيا علشان بشر لغيت دلوقتي مش راضي يتجوز واكيد مش هتجوز قبله ،، بس انت عندك اسبابك ولو قولتلها ل بابا اظنه هيوافق
_ تفتكر
_ افتكر
_ لا لا اكيد مش هيوافق انا سمعته كتير بيقول محدش هيتجوز قبل بشر ، انا هحاول اقربلها وبس يكون بشر حن عليه وخطب حتي
_ تمام يلا بقا ورايا استشارات كتير لازم ارد عليها
_ طيب قولي الاول
_ إيه
_ تفتكر في سبب لحالة جويريه ممكن يكون في حاجه حصلتلها وهي صغيرة عامله فيها كده
_ وارد جداً بس مش اكيد يعني ده مرض ممكن يحصل لاي حد من غير ما يكون اتعرض لاي حاجه في صغره ، بس حاول يمكن تكتشف حاجه
_ بس انا فاكر هي كانت كويسه ، كانت طبيعية ، افتكر لو في حاجة حصلت هتكون حصلت وانا مسافر
_ وانا معاهم من زمان مشوفتش حاجة تذكر حصلتلها كله طبيعي ف اكيد دي حاله طبيعية من غير سبب
_ اها ، طيب كمل شغلك
#زيد
طلع وسابني وانا فتحت الرسايل وبقيت ارد عليها بالإضافة لجلسات كامله مع حالات بعالجها اون لاين وقبل ما اخلص لقيت خلود بتخبط الباب وبتفتح وشكلها كان متعصب جداً
_ في حاجه يا خلود
ردت بنرفزه وهي بتتقدم نحيتي
_ انا مقدرتش ارد عليك علشان كان في لايف
_ اه ، طيب انا دلوقتي مشغول نتكلم بعدين
_ لا دلوقتي زي مانت اقتحمت الايف بتاعي من غير تقدير انا كمان هقتحم شغلك
_ بقولك مشغول اتفضلي وبعدين هنتكلم
_ لا دلووووقتي حالاً لازم افهم ايه مشكلتك معايا
قولت بنرفزه
_ خلود!!! متنسيش نفسك ، اتفضلي ورايا شغل
نزلت دموعها وهي بتهز دماغها بالموافقة وبعدين مشيت وانا رجعت كملت الرد علي المسجات بعدم تركيز بسببها ف سيبت الشغل وطلعت دورت عليها ملقتهاش في البيت ولما سألت داده امينه عنها قالتلي
: راحت لصحبتها
#خلود
طول الوقت ينتقدني ويقلل من اي حاجه بعملها وبسبب طريقته دي زاد جوايا رغبة في اني انجح وازود المتابعين واتشهر علشان اثبتله اني اقدر اكون زيه ويمكن احسن بس ازاي مكنتش عارفه مفيش حد يساعدني ولا معايا فلوس وده اللي قولته ل نيرة صحبتي ف قالتلي
_ انا قولتلك طول مانتي محتواكي هادي كده مش هتلاقي متابعين ، يابنتي اتجنني شويه اظهري بلبس ملفت ، اعرضي مواضيع ساخنه اكتبي سكريبات بنفسك متستنيش اسئلة البنات الهايفه دي
_ ملفت إيه انتي هبله لا طبعاً ومواضيع ساخنه ازاي في اسخن من واحده خطفت خطيب او جوز صحبتها
_ خطفت خطيب او جوز صحبتها يالهوووي علي القباحه انا وشي احمر من الكسوف
_ بتتريقي
_ طبعاً بتريق هو ده الساخن عندك والله انتي كيوت ، بصي سيبيلي نفسك وانا هفهمك تعملي ايه وعلي ايدي مش هيكون في اشهر منك وهتكسبي فلوس كتير قوي
_ قولي يا فهيمه اما نشوف ده هيحصل ازاي
_ من غير تريقة
_ ماشي قولي
_ شوفي اولآ لبسك ده مينفعش سيبيلي انا حكاية اللبس دي انا عندي ملابس تنفع
_ انتي شكلك عاوزاني اتدبح لا طبعاً لبسك مينفعش وانا قولتلك مليون مره بلاش تلبسيه وانتي حره ترفضي بس انا البسه لا
مطت بوقها بعدم رضا وقالت
_ انتي حره انا بقولك اللي في مصلحتك
_ طيب سيبك من اللبس وقوليلي إيه المواضيع اللي ممكن اتكلم فيها
_ لا بلاش انتي مش وش خير اصلا
_ لا قولي ونبي ، قولي وهشوف ينفع ولا لا
بقيت الح عليها لغيت ما وافقت تحكي وقالت بعد تفكير
_ طيب شوفي الموضوع اللي هحكيهولك ده حصل بجد من واحده انا اعرفها هقولهولك ك فكره للمواضيع اللي الناس بتحب تسمعها
_ قولي
_ في واحده اعرفها كانت محترمه جداً ولبسها محتشم جداً جداً ومكنش ليها في سكة الصحبيه ولا كانت بتتعامل مع ولاد من اساسه لغيت ما في يوم شافها واحد واعجب بيها ولما حاول معاها صدته وهزئته ف حطها في دماغه وعمل اييييه صاحبنا ده بقااا
قولت بتركيز
_ عمل ايه
_ دفع لواحده قريبه منها فلوس علشان تقنعها تروح حفله معاها وبالفعل قدرت البنت دي تقنعها تروح ولما وصلت مكان الحفلة ملقتش حد ولما سالت فين الناس قالتلها هيجوا دلوقتي وبعدين قالتلها شويه وجايه وطلعت والبنت كانت هتطلع وراها بس البنت التانيه جريت وقفلت الباب عليها ف اتفاجئت صاحبتنا بالولد ده طالع في وشها ومعاه تلاته صحابوا مسكوها واغتصبوها وصورها وبقوا يبتزوها بالصور دي
بقيت فاتحه بوقي بذهول وانا بسمعها ف قولت
_ طيب وعملت إيه ، بلغت عنهم
_ لا تبلغ إيه متقدرش دي اهلها غلابة والواد غني و واصل
_ امال عملت ايه متقوليش انتحرت
_ لا انتحرت ايه استني جيالك في الكلام بعد ما بقوا يبتزوها وافقت علي طلباتهم
_ هي إيه الطلبات دي
_ انها تروح مع اي واحد فيهم وقت ما يجيله مزاجه
قولت بصدمه
_ يا نهار اسود وراحت
_ طبعاً راحت ، بس متتصدميش قوي كده لان البنت نفسها بقت في امر واقع الموضوع مبقاش بالصعوبه اللي انتي متخيلاها وبقت تروح عادي جداً وتطلب منهم هدايه كمان
_ هه ،طـ طب وبعدين ، وصلت لفين
_ حملت
_ يا نهار اسود ، واهلها
_ اهلها مين انت ليه تفكيرك سطحي السؤال الصح البيبي ده يكون ابن مين فيهم
_ ابن مين فيهم
_ محدش يعرف
وقفت شويه مصدومه من كلامها ف قالت
_ انا بقولك القصة دي علشان تعرفي ايه اللي ممكن يزود تفاعلك ، يعني انتي لو قولتي القصة دي علي انها جاتلك في رساله وقولتي مثلا ان البنت سؤالها هو مين يعرف اسم دكتور مضمون تقدر تنزل عنده البيبي ده هتلاقي التفاعل والمتابعين علي ودنهم هتلاقي ناس بتشتم وناس بتقول عنوان دكتور وناس بتشير الفيديو
_ اه بس انتي بتقولي ان البنت بقا عادي عندها وانا عندي بنات صغيره بتابع مينفعش انزل الحاجات دي
_ صغيره ايه يا حبيبتي مفيش حاجه اسمها صغيره دلوقتي ، انتي اللي هبله ، اسمعي الكلام واتجهي للمواضيع دي وهو اسبوع وهتلاقي عندك ميقلش عن مليون متابع وكل ما تزودي هيزيد المتابعين
شردت شويه افكر في كلامها وبعدين قولت
_ لا لا لا يا نيرة مقدرش انا عاوزه اثبت ل زيد اني اقدر انجح بس مش بالطريقة دي ، حرام واخلاقي متسمحليش
_ هههههه اخلاااااقك ، انتي ليه محسساني انك البنت الوحيدة المحترمة طيب مانتي بتنزلي فيديوهات والكل بيشوفك فين الاحترام بقا
_ انتي هبلة يابت هو عشان انا بنزل فيديوهات واسمي بلوجر ف خلاص اكون مش محترمه
_ لا مش كده بس مش اي حد يقبل ان بنته تعمل اللي بتعمليه ف اعتبريها بجملة الظهور والشهره
_ انتي بتقولي ايه ، يعني انتي شيفاني مش محترمه علشان بظهر علي الانترنت ولا يكون شيفاني زي البنات اللي بيرقصوا علي التيك توك
_ والله مش فارقة كتير
_ نعم
_ مش قصدي بس يعني مش الصح انك تظهري علي الانترنت في بنات كتير لو نزلت ليها صوره بتدبح فهماني
_ لا مش فهماكي ، وعلي فكره انا اه بظهر علي الانترنت بس باحترامي مبقولش كلمه غلط ولبسي محتشم في كتير بنات بقا مبيظهروش وبيعملوا كوارث واديكي انتي بنفسك قيلالي قصة دلوقتي
_ بس مبيظهروش محدش بيشوفهم
_ يا سلام يعني انا لو بطلت اعمل فيديوهات واطلع لايف وصيعت كده ابقي محترمه عشان محدش بيشوفني
_ انتي زعلتي ولا ايه ، انا بقولك راي الناس في البلوجرز البنات حتي لو بيقدموا طبخ محدش بيحترمهم
_ انا مش مصدقاكي بجد ، طيب وانتي رأيك فيه اني مش محترمه
_ يابنتي لا انا صحبتك انا بكلمك علي الناس التانيه
_ اممم
_ حبيبتي افهميني انا قصدي انك تنازلتي ف لو عاوزه تكملي تنازلي شويه كمان علشان تنجحي
_ تنااازلت إيه متجننينش فين التنازل في اني اعرض مشاكل البنات ونحلها سوا ومشاكل متجيش واحد من ميه جمب القصة اللي حكيتيها
_ بردو مش فهماني
_ ولا عاوزة افهمك انا ماشيه
#بيجاد
رجعت البيت سلمت علي ماما وبعدين دخلت ل جويريه اشوفها عامله اية ف لقيتها قاعده وبتقرا نفس القصة اللي مبتزهقش منها ولما شافتني قفلتها ف قولت
_ نفسي اعرف بتقفليها ليه ما انا عارفها كلمه كلمه
_ عادي
_ ولما هو عادي بتقفليها ليه
مردتش ف قولت
_ ماشي كمليها انا بس كنت جاي اطمن عليكي
_
_ يابنتي مالك في ايه
_ مفيش حاجه
_ مش هينفع كده يا جويريه لازم تخرجي من الحاله دي
كملت وانا بحط ايدي علي كتفها
_ طيب قوليلي ايه اللي انتي محتاجه يساعدك تخرجي من الحاله دي
_ انا كويسه
_ كويسه ايه انا بحسك عامله عمله وبتخافي تتكشف
_ حاجة ايه ، والله ما عملت حاجه
اتخنق صوتها وهي بتكمل وتقول
_ انا مبخرجش اصلا
_ ما انا عارف يا حبيبتي انا بديكي مثل مالك في ايه اهدي
نزلت دموعها ف قولت
_ حبيبتي مفيش حاجه ، خلاص ارجعي كملي القصة
#جويريه
هي حادثة وعدت بس سابت اثر كبير جوايا بقيت بخاف من الناس حتي القريبين قوي قوي مني بخاف من انتقاداتهم بخاف من العقاب بخاف من النظرات ، بخاف من انهم يتحولوا من أشخاص طول عمري شيفاهم طبيبين وبيحبوني لاشخاص يتلذذوا بتعذيبي وبتخنق لما بيكون عندنا عزومه او مناسبه وبحب اجري بسرعه استخبي جوه اوضتي
_ جويريه حبيبتي
قالتهالي ماما وانا بكمل قراية في القصة ف قفلتها تاني وقولت
_ نعم
_ بدر ابن عمك عاوز يسلم عليكي
قولت بعبس
_ ليه يا ماما
_ ليه ايه ، ابن عمك عاوز يسلم عليكي مالك
_ ما انا سلمت امبارح
_ هههههه معلش تعالي سلمي تاني النهارده ، ده بيقولك كتر السلام يجل المعرفه تعالي
الناس كلها بتقول يقل المعرفه بس ماما علي حظي قالتها بمعناها الصحيح يجل المعرفه وده معناه انه يقوي المعرفه اللي انا مش عاوزاها تقوي مع اي حد وطبعا مقدرتش ارفض وروحت لقيته قاعد هو وبيجاد واول ما شافني وقف وقالي
_ ازيك يا جويريه عامله ايه
قولت وانا بفرك في ايديه
_ الحمدلله
قال بيجاد
_ اقعدي
بصتله ف قالي
_ اقعدي في ايه ، يابنتي محدش هياكلك اااقعدي
قالها بنرفزه ف نزلت دموعي وبدر خد باله ف قاله
_ ايه يا بيجاد مالك مابراحه
قال بنفس النبرة
_ بارحه ايه وانا اتكلمت ، مااالك حد بيعضك ااااقعدي
بص لبدر اللي واقف ومركز معايا قوي وقال
_ اقعد يا بدر اقعد متشغلش بالك مالك واقف ليه
#وفاء
طلعت من المطبخ علي صوته وهو بيزعقلها ولقيتها رايحة ترجع ف وقفت قدامها وقولت وانا برجعها
_ تعالي حبيبتي متخافيش
قولت موجهه كلامي ليه هو
_ في ايه يا ولد ازاي تزعق لاختك كده
_ انا امتي زعقت ، انا بقولها تقعد
_ طيب اسكت ، تعالي حبيبتي اقعدي
قالت ودموعها ماليه عنيه
_ عاوزة ارجع اوضتي
_ لا مش هترجعي تعالي هنقعد مع بعض
بصيت ل بدر اللي عينيه عليها وقولت
_ معلش يا بدر بس الدكتور متعصب مش عارف ليه النهارده
_ لا عادي يا طنط
وقف بيجاد وقال وهو بيحط دراعه علي كتفها
_ اتجننت يعني ، انا اسف يا ست جويريه متزعليش بس انتي تضايقي ، تعالي هنقعد مع بعض ، وااالله ما فينا حد بيحب لحوم البشر ولا إيه يابني ولا تكونش بتاكل لحوم بشريه من ورانا
_ هههههه لا باكل فراخ بس
_ اهو طلع مبيستطعمش طعم البني ادمين
#بدر
عدا الوقت وانا مستني فرصه تخليني اقعد معاها وبعد وقت طويل حسيت نفسي ضيف تقيل علي قلبهم وعلي قلب بيجاد خاصه قام وقالي
_ البيت بيتك يا بدر هدخل اوضتي وراي شغل مهم
_ طبعاً اتفضل
مشي وهي كمان كانت عاوزه تمشي ف قولت
_ استني يا جويريه
وقفت ف كملت وانا محرج من امها
_ رايحه فين
_ داخله اوضتي
قامت امها وقالت
_ لا اقعدي شويه يكون عملت شاي ، مينفعش يقعد لوحده
_ بس....
_ مبسش اقعدي مش هتاخر
قعدت وامها مشيت ودي كانت الفرصه اللي كنت مستنيها ف قولت بتردد
_ إيه ، متضايقه من وجودي ولا ايه
قالت وهي منزله جفونها
_ لأ
_ امال ايه
_ مفيش
_ اها ، طـ طيب انا بس كنت عايز اسالك في حاجه مش فاهمها
كملت بعد ما بصتلي
_ انتي عارفه طبعاً اني معنديش اخوات بنات يجوبوني ف قولت اسالك انتي
_
_ كنت مع صحابي بنلعب مع بعض لعبة صراحه وجراءه ، ف اخترت جرائه قام واحد قالي بكره تيجي وانت حاطط هايلتر
ضيقت عينيها باستفهام ف قولت
_ انا بسمع الكلمة دي كتير من البنات بس طبعاً مينفعش اسأل اي حد ف ممكن اعرف ايه البتاع ده
وطت راسها وقالت وهي بتفرك في ايديه
_ نوع مكياج
قولت بذهول مصطنع
_ بتهزري
قالت من غير ما تبصلي
_ اسأل ماما
_ لا مصدقك ، الله يخربيتهم ده حكم يحكموه عليه
مردتش ولا ضحكت ولا ابتسمت حتي ف اتنفست بعمق وبعدين قولت
_ جويريه انا بحاول اخرجك من اللي انتي فيه بأي هبل وخلاص ، هتفضلي كده لامتي ، مستقبلك هيضيع وانتي حابسه نفسك وخايفه من الناس
قامت وكانت هتمشي ف لحقتها ومسكت ايدها انتفضت بفزع ورجعت تبصلي وجسمها كله بيترعش وبتقولي بصوت مهزوز
_سيبني
_ جويريه استني ، انا عايز اساعدك
قالت وهي بتبصلي بهلع ورعب
_ ماما!!!! مـاما
_ خلاص خلاص انا اسف
سيبت ايدها وطلعت تجري وفي الوقت ده جت امها وكأنها عارف اللي حصل وسمعته ف وقفت قدامي وقالت
_ متحاولش انا وابوها وبيجاد حاولنا قبلك
_ طيب ليه يا طنط متعرضهاش علي دكتور نفساني
_ حصل بس بقت تبكي ومرضتش تتكلم معاه
_ طيب وبعدين هتفضل كده طول عمرها
_ والله مش عارفه انا غلبت معاها
قولت بتردد
_ انا....
_ انت إيه
_ انا عايز اتجوزها
ابتسمت وقالت
_ اخاف اقولك انها مش هتوافق ولو وافقت هتخاف تكمل تزعل مني
_ لازم توافق
_ ليه لازم
_ عاوز اساعدها ومش هقدر اعمل كده غير لو اتجوزتها
_ عاوز تجوزها عشان تساعدها بس
_ عشان بحبها ، انا قولتلك الصراحه اهو ، انا بحب جويريه وعاوزها
قالت بإبتسامة
_ ماشي يابدر بس هي وفي الحاله دي مش هتقدر تجوز واكيد مش هنغصبها
سكت شويه بعد ما لمعت فكرة في دماغي ف قالت
_ بتفكر في ايه
_ بفكر انها لازم تواجه مخاوفها
_ ازاي
_ هتساعديني
_ اساعدك في ايه مش افهم الاول
_ تتخطف
_ إيه!!! تتخطف عاوزني اساعدك تخطف بنتي يا نهار اسود ده انت اسمك بدر ازاي مخدتش بالي
#فاطمة
سنتين ونص من وقت ما لبست النقاب وطول المدة دي انا بواجه مشاكل وعنصريه بسببه ومبقولش ل بابا علشان ميزعلش بس مبقتش قادره اخبي بعد زادت مضايقات الناس واتهامها ليه بأني ارهابيه ف رجعت وانا مقرره احكي لبابا علشان يشوفلنا حل لاما نمشي من هنا او نرجع مصر ولما وصلت البيت دورت عليه لقيته طالع من الحمام وشكله تعبان ودي مش اول مره اللي اشوفة كده ليه سنه وشوية ملاحظه التعب اللي فيه ولما اقوله مالك يقولي ارهاق من الشغل والمره دي كمان سألته قالي
_ مفيش حاجه ياحبيبتي شوية ارهاق بس ، تعالي نقعد
_ يا بابا انت تعبان لازم تروح لدكتور
_ قولتلك شوية ارهاق ، سيبك مني وقوليلي عاملة اية في الكلية
قولت بتنهيده
_ مش مركز خالص بصراحه كده يا بابا انا من وقت ما لبست النقاب وانا بواجه مشاكل وعنصريه من كل اللي هنا
_ عنصريه ازاي يعني
_ يعني في كتير بيضايقوني ويقولولي ارهابيه وكلام من ده
اتنهد بعمق وكمل طريقة لصاله من غير رد ف قولت وانا ماشيه وراه
_ بابا هو احنا ينفع نسيب هنا ونروح ولاية تانيه
قعد ف قعدت جمبه وقولت بعد ما طال سكوته
_ إيه يا بابا مبتردش ليه
بصلي وقال
_ انا كنت لسة بفكر نرجع مصر بعد ما تخلصي دراستك هنا
_ ليه
_ ليه إيه مش عاوزه تروحي مصر
_ اه طبعاً عايزه ده انا اتكسفت اقولك لاني عارفه انك مش ناوي ترجع بس ليه فكرت دلوقتي في الرجوع
_ علشان....
_ ايووه
_ علشان مسيرة الطير يرجع لعشة كفاية غربة
_ ولو ان غريبه كلامك ده وانت بتقول ملكش حد هناك بس عندك حق الوطن امان حتي لو كان خراب هروح اغير هدومي وارجعلك نكمل كلامنا مش هتأخر
مشيت خطوتين ف وقفني كلامه وهو بيقولي
_ ليه اخت هناك
رجعت بصتله وقولت
_ إيه
_ اه وفاء عمتك
_ مش فاهمه ، يعني انت ليك اهل في مصر
_ ليه اخت
_ امال ليه قولت ملكش حد هناك
_ كنا زعلانين ومكنتش فاكر اني ممكن ارجع
قولت وانا برجع ليه
_ زعل ايه اللي يخليك تخبي عني حاجه زي دي
_ مواضيع قديمة راحت لحالها مش عاوز اتكلم فيها
_ طيب يا بابا...
_ عارف ان عندك اسأله كتير بس خلي كل حاجه بعدين
_ بعدين بعدين بعدين انا مش عارفه امتي هيجي بعدين ده
_ بعدين
_ بعدين!
_ اه
_ اهاااا اوكي داخله اغير
_ اسمها طيب
_ اه طيب طيب طيب ماشي ماشي ماشي
اسئلة كتير مش لاقيالها اجابات ودلوقتي زادوا سؤال وهو مين عمتي دي وليه سافر وسابها وهل لما اقابلها هلاقيها طيبة ولا زي العمات اللي بشوفها
في الافلام العربي مش عارفه بس بقيت متحمسه جداً لسفر لمصر حاسه ان الدنيا هناك احلي وهتناسبني اكتر من هنا وربنا يستر