رواية ذئاب لا تعرف الحب
الجزء الثاني2الفصل الثالث3
بقلم نجمه براقه
بيجاد
رجعت البيت لقيت كبايات عصير علي التربيزه قربت منهم وقولت وانا ماسك كباية منهم وبتفحص شكلها وادور علي اي بصمه تعرفني كان راجل ولا ست
_ ماما!!!
جت من المطبخ وهي ماسكه القماشه وبتمسح ايدها
_ نعم ياحبيبي
_ مين كان هنا
_ ليه
_ شايف كبايات عصير
زمت شفايفها وبصتلي بقرف وبعدين رجعت المطبخ ف روحت وراها وقولت
_ يبقي بدر جه
مردتش وكملت طبيخ ف اتقدمت عندها وقولت وانا بقلب في التقلية
_ جه ها
رفعت المعلقة في وشي وقالت
_ اول حاجة سيب الطبيخ تاني حاجة امشي من وشي يا بيجاد
_ معجبكش انتي اني اعترض علي وضع غلط عاوزه تبوظي اخلاق البنت
_ والله ما حد اخلاقه بايظه غيرك ، يا بارد اختك في عرض حد يهتم بيها يمكن يقدر يخرجها من الحاله دي وانت جاي توقف في وش مصلحتها
_ ماما بليييييز بلاش جو الافلام ده ، حضرته اغسطس يعني وهي هايزل وانا معرفش
_ ايه اغسطس وهايلز دول
_ ابطال الرواية اللي بنتك طول الوقت بتقراها ، ما انتي لو مهتمه كنتي عرفتي بتقرا إيه
رفعت عليه المغرفة وقالت
_ والله يا بيجاد هفتح دماغك ب دي يا اللي ما عندك دم
_ سوري ماما مش قصدي انك ام مهملة بس انا اخوها عاوزة تخرج انا اخرجها متركبلناش قرون ورحمة ابوكي
_ يا بيجاد امشي من وشي والله واصله معايا لهنا
_ لفين هنا
قولتها وانا بحط صباعي علي مناخيرها ف قالت وهي بتزق ايدي
_اوووعي هضربك
حاوطت رقبتها بدراعي وقولت
_ ماااام ليسن تو مي هقولك حاجه
حاولت تشيل دراعي وهي بتقول بعصبية
_ بكره الحركه دي ابعد
_ يا وليه اصبري عيب عليكي ، ااااهدي
_ ياولد
_ خلاص بقا اسمعيني
اتنهدت بزهق وقالت
_ اممممم
_ كنت عاوز اقولك ان عادي يدخل ويخرج بس بصفة رسمية انما يكون ليها ايه دلوقتي علشان يخرجها من الحالة اللي هي فيها ، انا مقدر طبعاً ان الرومانسية عندك مفرطه بعد ما اتحديتوا العالم انتي والكبير واتجوزتوا بس بيجاد اخوكي مكنش حمش انما انا حمش ف اهدي وقولي عيب للعيب متبقيش ام عاوزه ام تربيـكي.....
زقت ايدي وقالت وهي بتضربني
_ انا الغلطانة يا حيوان اني عملتك بني ادم وحكيتلك
_ طيب بس بس ، انتي محكتليش بمزاجك انا اللي مسبتكش غير لما حكيتي
زقتني عنها وقالت
_ طيب ابعد كده والله ما طيقاك
_ طيب هاتي هقلبلك التقليه هتتحرق
ادتني المعلقة و وقفت بعيد شاردة وباين انها اتقلبت عليها المواجع مش عارف ليه ف طفيت البتوجاز وقولت وانا واقف جمبها
_ ايه يا فوفه بتفكري في ايه
قالت بعبس
_ مفيش
_ لا فيه وانا عارف
_ وعارف إيه بقا يا ابو العريف
_ عارف ان خالي وحشك
_ ولا وحشني ولا فكراه من أصله ، الحمدلله بدر طلع ابن حلال ومخلنيش احس في يوم اني محتاجه اخويا حتي لما بابا مات محستش اني اتيتمت وكله ده بفضل بدر اللي هو قاطعني علشان اتجوزته
_ عارفة يا ماما هقولك حاجه ومتزعليش
_ قول ياخويا
_ خالي مش غلطان غير لما وافق وجوزك ليه بمزاجه وجه بعدين يلوم عليكي
بعدت عني وقالت
_ يعني انت مغلطني علشان اتجوزت ابوك
_ لأ طبعاً انا بس حطيت نفسي مكانه ازاي اجوز اختي لواحد حرمني من اكتر واحده حبيتها
_ بس ابوك مكنش بأيده يعمل حاجه وهو عارف
_ اي ان كان السبب ف مش سهل حد يقبل اللي حصل انا عن نفسي مقبلش
_ شوف ياحبيبي خالك هو الغلطان في كل ده هو اللي راح حب عمتك وهو عارف عاداتهم هو السبب الاول في موتها وهو السبب في ان انا اتخطفت واشوف ابوك والمفروض يدفع تمن غلطة مش يسيبني ويسافر ومعرفش اذا كان عايش ولا ميت
_ معاكي بس محدش بيحس بالوجع قد صاحبة واكيد عايش وهيرجع
_ مش باين انا تعبت من انتظاره
_ متعرفيش هو سافر فين
_ معرفش بس ليه
_ كان ممكن اسأل عنه يمكن كمان كنت سافرتله
_ معرفش ولو مجاش لوحده ف مش عاوزاه
_ مبصدقش الحريم في اي حاجه بيقولها
_ ولد
_ بنت
_ بيجاد!!!
_ وفاء
_ ههههه تصدق انك عيل متربتش
_ ده غلطك المفروض انتي اللي تتكسفي مش انا
_ ياحبيبي ارحمني طالع نسخه من ابوك في المقاوحه
_ يا مركز انت وعارفه انه بيقاوح وانه طيب وانه جدع والدنيا دي كلها والله شكلك بتحبيه ومخبيه
_ اووووف بيجاد امشي ضايقتني
_ ههههه ماشي بس متزعليش علشان الزعل بيبوظ البشرة
_ اممممم
كلنت هتتنقط مني ف مشيت وسيبتها وانا بضحك عليها وفي طريقي استوقفتني صورة خالي المعلقة علي الحيط من سنين وقفت جمبها وبقيت ابصله شوية واقول ياتري هيجي يوم واشوفة
#فاطمة
من بعد ما قالي انه معاه اخت وهو كل يوم يحكيلي عنها ف قولتله
_ والله شوقتني اشوفها واضح انها كانت جميله وطيبة
_ مكنش في اجمل ولا اطيب منها ، تعالي معايا
_ فين
_ هوريكي صورتها
_ بجد معاك صورتها وانا مشوفتهاش
_ اه تعالي
خدني لاوضته ونزل شنطة صغيره حاططها فوق الدولاب وفتحها وطلع شوية صور ف وقعت منهم صورة ولما مسكتها لقيتها صورة لبنت صغيره وفجاة خطفها مني وقال
_ سيبي دي
_ صورة مين دي ، وليه خطفتها
_ صورة واحدة قريبتي
_ طيب خطفتها ليه
_ عاوزك تشوفي صورة عمتك اهي
خدت منه الصورة وشوفتها لقيتها فعلاً جميله قوي ف قولت
_ جميله فعلاً بس مش شبهك
_ اه ماهي اختي من امي بس
_ معكش اخوات غيرها
_ ههههه تصدقي ما عارف
_ يعني ايه مش عارف
_ يعني سيبت جدك من انا وصغير ومعرفش اتجوز وخلف ولا لا
_ ياه يا بابا ليه حياتك كلها كده ، ليه بتبعد عن الناس
_ محدش اتمسك بيه
_ حتي عمتي
_ اولهم عمتك
_ عملت ايه
_ اتجوزت وسابتني
_ مش فاهمه يعني خاصمتك ولا سافرت
_ مخصمتنيش ولا سافرت ، اتجوزت
_ وانت مكنتش عاوزها تجوز
_ لا
_ ليه
_ مش عارف
_ باين عليك كنت بتحبها قوي
_ اه فعلاً
_ ههههه افهم من كده لو متجوزتش كنت انت كمان كملت من غير جواز
_ طبعاً
_ ومكنتش خلفتني
_ اه
_ بقا كده
_ كنت هتصرف واجيبك متزعليش
_ ههههههه وده ازاي مخدنهاش في الاحياء دي
_ بطلي بكش
_ ههههههه والله انت غريب قوي يا بابا
_ مجنون يعني
_ لا بس ليك حاجات تحير
_ اه كلهم بيقولوا كده
كمل بشرود
_ كلهم سابوني
بصلي وقال
_ بس مش هتساب تاني انا اللي هسيب المره الجايه
حسيت بالقلق من كلامه وقولت
_ مالك يا بابا يعني ايه هتسيب المره الجايه
_ مفيش حاجه حبيبتي
_ لا بجد في ايه قلقتني
_ اقصد اني مش هتمسك بحد مش هيتمسك بيه
_ اه فهمت بس مفيش حد ممكن يسيبك
_ ولا حتي انتي
_ بعينك انا قاعدة علي قلبك هههههههه ولا انت عايز توزعني وتجوز
_ اتجوز إيه يلا حسن الخاتمة
كمل بتنهيده
_ المهم عاوزين في الفترة اللي قاعدينها هنا نشوف حاجتنا ونشتري هدايا لعمتك ونعمل حسابنا في هدايا للولاد ده ان كانت معاها عيال صغيره
_ اكيد معاها وسمت علي اسمك كمان
_ حصل انا عرفت انها خلفت ولد وسمته علي اسمي قبل ما اخبارها تتقطع عني بس كبير دلوقتي لو عايش فاهو بقا راجل
_ واووو بجد
_ اه
_ وعنده كام سنة
_ بتسألي ليه
_ بقول لو كان مناسب وحلو زي مامته ف ايه يمنع اتجوزه ههههه
_ اممم فاطمة وبيجاد
_ ههههه بتجرب نطق الاسماء مع بعض يبقي موافق
_ لا هو ولا غيره احنا قولنا انك مش هتجوزي
_ يمكن نغير راينا مين عارف
_ واضح انك مستعجله
_ مش مستعجله قوي قوي ممكن استنا شهرين
_ بنت
_ ههههه بهزر معاك يا بيجو
_ متهزريش تاني
_ طيب ، اممم فكر ممكن نجيبلهم إيه
_ هدوم
_ ايوه وبرفان وساعات واكسسورات بتاعت ستات وكده ، وشيكولاته لبناتها شيكولاته كتير ولو مكنش معاها بنات اكلهم انا
_ ايوه قولي كده همك علي بطنك
_ ههههه دي حقيقه
#بيجاد
اسلوبها في الكلام وطيبتها وخفت دمها وصفاء روحها نسخه تانيه من فاطمة مع اختلاف الشكل ، فاطمة دي جميلة جمال قوي بشرتها بيضه قوي خدودها مورده عيونها عسلي شعرها بين البني والاصفر وليه لمعه وطويل بوقها صغير شفايفها مرسومه جسمها مليانه شوية مش طويله ولا قصيره ودي حاجه مضيقاني لو كانت شبه فاطمة كانت هتبقي احلي بكتيييير ، كانت هتبقي اجمل هديه رزقني بيها ربنا ، انا للاسف قدرت اخليها شبها في طبع ولبس بس الشكل مش بأيدي ولو بأيدي كنت خليتها شبها شبه فاطمه اللي رغم السنين متغيرش ، ايوه انا لسه بشوفها وبتكلم معاها ، وبتونسني في وقت غياب فاطمة بنتي بس اللي بيوجع انها مبتتكلمش معايا ولا بقدر المسها وتعبت قوي وانا في كل مره اترجاها تفضل معايا وبردو بتمشي وتسيبني اتعذب لغيت ما ترجع تاني ومفيش حاجة مهونه عليه غير اني رايحلها قريب قوي بس بدعي ربنا يأجلها شوية يكون رجعنا مصر علشان اوصي وفاء تخلي بالها من فاطمة وبعدها هرتاح للابد
#جويريه
يومين عدوا مشفتهوش فيهم ولا اتصل ف طلعت بره البيت وبصيت لفوق شوية لقيت بشر نازل ف دخلت بسرعه قبل ما يشوفني وبعد دقايق الباب خبط فتحت لقيته قدامي بيقولي
_ ازيك يا جويريه
_ كويسه
_ عامله ايه دلوقتي
_ تمام
_ دائما يارب ، انا كنت شايفك واقفه محتاجه حاجه
هزيت دماغي بنفي ف قال
_ طيب ما تطلعي فوق تقعدي مع الجماعه بدل ما تقعدي لوحدك
_ لا
_ اطلعي بيعملوا كيكه شوفيهم بيعملوها ازاي
سكت ف قال
_ طيب هسيبك براحتك
_ اها
سابني ومشي وبعد ما اتاكدت انه بعد طلعت تاني وقفت شوية وبعد تردد كتير مشيت خطوات ناحية السلم وطلعت كام سلمة واول ما وصلت شقة عمي شبل وقفت ورجعت تاني وقبل ما انزل السلم بالكامل سمعت صوت بدر بيقولي
_ جويريه
رجعت بصتله وهو نازل ف قال بعد ما وصلني
_ اخيراً طلعتي من البيت
_ انا .... انا
_ انتي إيه
_ عاوزة اروح
جيت امشي ف قالي
_ استني
رجعت ابصله ف قال وهو بيجي قدامي
_ كنت طالعه لمين
_ مش طالعه
_ امال بتعملي ايه
مردتش ف قال
_ مالك
_ مليش ، انا عاوزه اروح
_ استني بس ، إيه رأيك نقعد شوية هنا انا متضايق من القعدة فوق
مردتش ف قالت
_ اقعدي
قعدت وهو قعد جمبي وقال بإبتسامة
_ انتي عارفه لما بكون متضايق بحب اخرج من البيت مش عارف في حد زيي ولا انا بس.
كتير بحسه بيستعبطني او بيعاملني علي اني عيله علشان مبتكلمش ف سكت وبعد ما طال سكوتي قال
_ مردتيش علي سؤالي
_ كتير زيك
_ اه بس انتي طبعا مش تبع الكتير دول
مردتش ف قال
_ بتعملي ايه في وقت فراغك اديني اقتراحات ممكن
سكت شوية وقولت
_ بقرا
_ حلو قوي قوي ، ايه نوع الكتب اللي بتحبيها
_ قصص عالميه
_ ااالله طلعتي مثقفه اهو
_ اه
_ طيب انا بحب القرايه بس خلقي ضيق وبمل ما تقترحي عليه حاجه خفيفه اقراها
بصتله من غير رد ف قال
_ قولي نفسي اقرا
_
_ طيب ايه مش هترشحيلي كتاب ، قوليلي علي اكتر كتاب بتحبي تقريه
سكت شوية اجمع كلام اقوله وقولت وانا بلعب في صوابعي
_ انا معرفش اسمها بانجليزي بقرا مترجم بس هي قصة اتعملت فيلم معروف
_ اسمه ايه
_ بنفس اسم القصة
_ اسمها ايه القصة
_ ما تخبئه لنا النجوم ، اغسطس وهايزل
ابتسم وهو بيبصلي ويقول
_ بتحبي القصة دي بجد
_ اه
_ وانا كمان بس اول مره اعرف ان ليها كتاب انا بسمع الفيلم بتاعها وبحبه جداً
_ وانا
طال سكوته وهو بيبصلي بإبتسامة وبعدين قال
_ بتحبيها ليه
_ بحبها
_ طيب انتي عارفه ان البنت شبهك مش قصدي الشكل انتي اجمل
بصتله بصة سريعه ف كمل وقال
_ شبها في هدؤئها وسكوتها وعالمها اللي عايشه فيه لوحدها ، بس عجبني قوي ظهور اغسطس في حياتها فرق كتير
رجعت بصتله وعيني جت في عينه ف قال بخفوت
_ اتمني يظهر واحد زي اغسطس في حياتك انتي كمان
_ انا عاوزه اروح
قولت كده وقومت ف لحقني و وقف قصادي وقال
_ طيب اوعديني ان دي مش اخر مره هنقعد ونتكلم فيها
سكت ف قال
_ انا حابب نكون صحاب ونتشارك الحاجات اللي بنحبها
_ اه
_ موافقة
_ عاوزه اروح
_ جويريه حرام عليكي كل شويه عاوزه اروح
سكت ف قال
_ انا اسف بس قولي موافقه
_ ماشي
ابتسمتله ملت وشه وهو بيقولي
_ شكرا قوي
_ طيب
دخلت بيتنا وقفلت الباب ووقفت سانده ضهري عليه وقولت لنفسي
_ إيه خلاكي تقولي علي القصة دي بذات ما كان قولتي علي اي واحده غيرها
#هاجر
رجعت من الكليه لقيتهم قاعدين عند السلم وبيتكلموا ف رجعت واتخبيت قبل ما يشوفوني وسمعت كلامهم وفهمت هو ليه مش حاسس بيه وده وجعني قوي معقول يحب جويريه المريضة وميحبنيش انا ، انا مش بحقد عليها ولا كرهتها بس اتوجعت ولما مشيو طلعت فوق ومفكرتش اطلع عندهم النهاردة ولقتني بمسك التليفون وزي عادتي بنزل ستوري يعبر عن الحاله اللي انا فيها وبعد وقت فوقت من حزني راضيه بنصيبي وبقول مش مهم وايه يعني محبنيش وحبها هي وبعدها قومت ودخلت المطبخ اجهز اكل وفي الوقت ده وصلني رساله من بشر بيقولي
_ هاجر
_ نعم
_ مالك
_ مالي
_ ايه المحزنه اللي منزلاه دي
افتكرت اللي نشرته ف دخلت حذفته وبعدين رجعتله وقولت
_ انت شوفتها
_ اه مالك
_ أبداً كنت متضايقة شوية بس دلوقتي تمام وحذفتها
_ إيه السبب
_ مفيش متضايقة لوحدي
_ مفيش حاجه اسمها لوحدي ايه اللي حصل
_ مفيش والله ، كنت متضايقه بس علشان كل ما ارجع الاقي الدكاتره مش في البيت
_ مفتقده للمة العيلة ولا ايه
_ ههههه انا مش مفتقداها انا نفسي اجربها في بيتنا الحقيقة
_ طيب ما تجربيها في بيتنا
_ ما انا مجرباها في بيتكم مش عارفه امتي هجربها في بيتنا
_ حاسه انك وحيدة
_ لا مش لدرجة دي مش هأفور واقولك سايبني وجو الضحية ده ، هما بيجوا وبنتلم مع بعض ويسمعوني ويهتموا ويحبوا وكل الكلام الذيذ ده
_ كويس انك بتفكري كده
_ هما بيحبوني وبيشتغلوا علشان يوفرولي كل حاجه ، وبصراحه موفرينلي فلوس وحب
_ صحيح انتي محظوظة بيهم
_ الحمدلله ربنا يخليهملي ، ويخليك ليه اخي العزيز
_ ارجعي قولي عمو اخي مش حلوه
_ ههههه اوك يا عمو
_ اوك
_ اووووكي
_ طيب اجري خليني اشوف شغلي
_ بقولك
_ قولي
_ ما تخبيلي شوية شيبسي من وراهم نفسي في الشيبسي قوي النهارده
_ اسرق يعني
_ لا مش سرقه ماهو مالنا بس علشان ميخصموش من مرتبك
_ ههههه ماشي عاوزاه باي طعم
_ الشطة والمون بتنسي ليه
_ عنيه ساعة وهيكونوا عندك
_ ماشي ، متشكره قوي
_ عفوا يا اختي العزيزة
_ ههههه شكرا اخي العزيز ، ولا نخليها عمو العزيز
_ كل اللي يجي منك حلو
_ عارفه
_ غرور
_ لا مش غرور والله
_ امال ايه
_ فشخره هههههههه
_ هههههه ماشي يا مفشخره اقفلي
قفلت معاه وسيبت التليفون وقعدت اذاكر شوية وبعد وقت الباب خبط ولما فتحت لقيت كرتونتين شيبسي قدام الباب ف طلعت وبصيت لفوق لقيته طالع وبيوقف بعد كام سلمه ويقولي
_ كرتونتين اهم يارب نشبع
_ ههههه بشر استني
_ إيه
طلعت عنده وارتفعت سلمه علشان اوازي طوله وقولت بإبتسامة
_ امممم هو انا لو عملت حاجه اتدبح
_ علي حسب
_ هو مش لازم بطاقة علشان تكون اخويا وانا نفسي اعمل كده
قولتها وبوسته بوسه سريعة ف خده ف بصلي بصدمة وهنا بهتت ابتسامتي لما لقيته اتضايق وبيقولي
_ انتي ايه اللي عملتيه ده
قولت بربكه
_ بوستك
سكت ف قولت
_ إيه
_ ارجعي بيتكم يا هاجر
_ في ايه يا بشر
_ بقولك ارجعي بيتكم
_ علي فكره انا....
_ انتي قليلة الادب وعاوزه قلم علي عملتك دي
_ إيه
_ اخر مره في حياتك تعملي الحركة دي ، وانا غلطان اني بتعامل معاكي كويس
قال كده ومشي
#بشر
مش عارف هتوصلني لفين حاسس اني هتجنن بسببها ، خلتني ماشي بتعصب علي اي حد يكلمني واكترهم بدر اللي جه ورايا يسألني مالك قولت بعصبيه
_ انت ازاي تدخل من غير ما تخبط
_ من غير ما اخبط وانا من امتي بخبط ، مالك يا بشر انت اتجنن
_ لسه بس لو مبعدتش عن خلقتي دلوقتي هتجنن عليك ، اطلع بره
_ ماشي متزعلش ، انا كنت بطمن عليك بس
قالها بزعل ومشي وبعد دقيقة وانا بلوم نفسي اني انفعلت عليه لقيت زيد بيدخل عندي ويقول
_ مالك يا بشر
_ مفيش، اطلع بره وسيبني في حالي
_
_ اطلع يا زيد بقولك
_
_ بتبصلي كده ليه اطلع
_ حاضر بس اهدي
مشي وقفل وراه وانا اترميت علي السرير وحطيت دراعي علي عنيه بتعب لغيت ما اتفتح الباب ف قولت من غير ما اشيل دراعي
_ قولت سيبوني لوحدي
مجانيش رد وبقيت سامع خطوات بتقرب وفجاة حاجه لينه بتلمس خدي ف رفعت دراعي وبصيت قدامي لقيت هاجر ماسكه قطنة وازازه فيها حاجه زي الميه وبتقولي
_ مسحتهالك يمكن فيها جراثيم ولا حاجه ، دي اخر مره هبوسك فيها واخر مره هكلمك وشكرا قوي علي كسرت نفسي
قولت وانا بقوم من نومتي
_ اطلعي بره
_ بتطردني
_ اه بطردك
حدت من نظرتها وقالت بتهديد
_ بشر انا زعلي وحش
_ اتفلقي
_ يعني اتفلق
_ اه
رفعت حاجبها وقالت
_ اوكي هتفلق بس افتكر الكلمة دي كويس قوي
قالت كده ومشيت وانا فاهم معني كلامها عرفاني مبسبهاش زعلانه بس المره دي مكنتش هعمل اي حاجه وهسيبها زعلانه لاخر العمر
#بيجاد
رجعت البيت ذاكرت شويه وبعدين فتحت الكمبيوتر وشوفت تسجيلات الكاميرا ك نوع من التجسس علي الاستاذ بدر كنت عاوز اشوفه جه وانا مش موجود ولا لا والمفاجاة اللي مكنتش متخيلها اني لقيته قاعد هو وجويريه بره و واضح قوي ان جويريه كانت مرتاحه في قعدتها معاه ف طلعت فوراً وروحت عندها لقيتها ماسكه القصة بتاعتها ولما شافتني سابتها واتعدلت ف قربت منها وقولت
_ عاوز اتكلم معاكي
_ إيه
_ انتي قعدتي انتي وبدر لوحدك علي السلم
_ اه
_ ليه
_ كده
_ كده ليه
مردتش ف قولت
_ طيب اخر مره الموضوع ده يحصل ومتقابلهوش كمان
_ حاضر
_ جويريه
_ إيه
_ انا خايف عليكي
_ طيب
_ طيب ايه مش هتتكلمي وتفهمي بقولك كده ليه
تقوست شفايفها ودموعها نزلت ف حضنتها وقولت
_ ياحبيبتي مينفعش كده انا بتكلم معاكي المفروض تاخدي وتدي ، خلاص متزعليش امسحي دموعك
بعدت عنها وقولت وانا بمسح دموعها
_ مفيش حاجه ، اهدي وبطلي كل ما حد يكلمك تبكي محدش هيأذيكي ، ايه رأيك تيجي نخرج شويه
_ لا
_ طيب عاوزه ايه اجبهولك
_ مش عاوزه حاجه
_ خالص
_ خالص
اتنهدت بعمق وقولت
_ طيب بصراحه يا جويريه ، انتي حابه اللي بيعمله بدر معاكي
مردتش ف قولت
_ قولي لو وجوده فارق معاكي وممكن يخرجك من الحالة دي احنا ممكن نجوزكم
بصتلي وقالت
_ انا مش هتجوز
_ ليه بقا ناقصك ايه
_ كده
_ امممم طيب حبيبتي ارجعي اقري ولينا كلام تاني بعدين
_ طيب
مشيت من عندها وانا محتار في امرها ومش عارف ممكن اعملها إيه يخرجها من الحاله دي ، ولو كانت قالتلي ان وجود بدر بيفرق معاها كنت اتصرفت وخليته يخطبها علي الاقل بس مقالتش
#خلود
كنت بجهز الغدا انا وتيتة وطنط ورد وزيد كان قاعد مستني الاكل والاب توب قدامه عمال يكتب عليه ومشغول جداً وانا بقيت بصاله ونفسي اكسر الاب توب علي دماغه لانه اناني ومحبط بيحرم عليه اللي محلله لنفسه وبعد ما طالت نظرتي ليه بصلي فجأة وكانه كان شايفني ف قالي وهو بيبص علي الاطباق
_ الله ريحتهم تجنن واضح انك هتكوني ست بيت شاطره وهتنجحي قوي في بيتك
قولت بقرف
_ مش انا اللي طبخت دي تيتة
مط شفايفه بتعجب وقال
_ بس طريقة حطك للاطباق تدل انك ست بيت شاطره
_ انت عاوز ايه يعني من الاخر
_ عاوز ملح وكمون بحب احط للاكل منهم كل شويه
_ اممم طيب
_ يطيب خاطرك
دخلت وانا بدعي عليه في سري ورجعت انا وطنط ورد وحطيت الملاحه قدامه واستدرت علشان امشي ف قال
_ ايه ده ملح من غير شطة ، هاتي شطة وملح مع بعض يا خلود
ضميت بوقي بغيظ وانا لسه مدياله ضهري وبعدين بصتله وابتسمت ابتسامه واضح قوي انها ظاهريه وقولت
_ حاضر
قال ببرود
_ يحضرلك الخير
مردتش عليه ودخلت جبت الملح بالشطة ورجعت متجاهله طلبة باني اقعد اكل معاهم وبعد شوية جه المطبخ حط الاطباق علي الحوض وقالي في الوقت اللي انا ماسكه فيه التليفون
_ اغسليهم
مردتش ف قالي
_ واعملي قهوه بوش وهاتي طبق كيك
_ طيب
_ متشكر اوي واضح انك هتكوني ست بيت شاطره
ضميت بوقي بغيظ وانا بشيط من جوايا ف قال بإبتسامة استفزازيه
_ سيبي التليفون علشان متحصلهوش الميه
_ برد علي الكومنتات
_ ردي بعدين انا محتاج قهوه دلوقتي
_ طيب اتفضل
_ يزيد فضلك يا انسة خلود سيبي التليفون انا خايف عليه
وصلت لاخري ولقيت نفسي بمسك السكين من علي الرخامه ف بعد خطوتين وقال
_ صح صح حاسسها مشبره اغسليها ومتتأخريش بالقهوة
قال كده ومشي وانا مسكت الكباية وشربت علشان اطفي النار اللي والعه جوايا بسببه وبعد ما هديت شوية صغيره عملت القهوة و ودتهاله اوضته لقيته بيتكلم فيديو و واضح انه كان في جلسة من بتوعه ولما شافني ابتسم باستفزاز وقال
_ متشكر قوي حطيها هنا
كمل كلاظ مع اللي بيكلمه وقال
_ اوكي نتواصل كتابه اتفضلي
قفل الاب توب وقالي
_ في حاجه
خدت نفس وقولت
_ في
_ خير حابه تاخدي جلسة
_ استشاره
_ اتفضلي وببلاش كمان
_ انت ليه بتعمل معايا كده
_ لا ده سؤال مش استشاره
_ اعتبره زي ما تعتبره
_ اوكي ، مش هرد
_ ايه حرقت الدم دي
_
_ انت انسان مستفز بجد
قال ببرود
_ متشكر قوي ، يلا روحي اغسلي المواعين ورايا شغل كتير جداً
_ ماشي
_ مااااشي
وقفت شوية ابصله وانا نفسي احرقه حي ف تجاهلني ورجع للاب توب بقيت بصاله شوية لغيت ما لمعت في دماغي فكرة ف سيبته ومشيت ودخلت الاوضه وكلمت بنت متابعه ليه ودائما بتتواصل معايا بكذا حساب وطلبت منها تجبلي حساب مستعمل وقديم و وافقت بسرعه وادتهوني ف عملته متابعه وبعتله رساله
_ السلام عليكم لو سمحت يا دكتور انا عندي مشكله وكتير قالي ان حضرتك ممكن تساعدني
استنيت رده لساعتين تقريبا واخيرا رد وقالي
_ وعليكم السلام ورحمة الله ، اتفضلي ، اول حاجه دي استشاره ولا حابة نخليها جلسات
_ ياريت جلسات
_ تمام قوي يا... ده اسمك
_ اه اسمي
_ تمام قوي يا اسيل عندك كام سنة بقا
قصدت اكبر نفسي شوية علشان ميستهونش بيه زي عادته وقولت
_ 26 سنه
_ متجوزه ، مرتبطة
_ لا ، وهي دي المشكلة
_ طيب احكيلي
كتبت وانا بضحك
_ اول حاجه انا من الصعيد وزي ما حضرتك عارف مينفعش البنت تتاخر في الجواز لبعد العشرين بالكتير
_ ايوه فعلا ، كملي
_ وانا مشكلتي اني مش قادره اوافق علي حد بخاف ارتبط بحد
_ ايه السبب يا اسيل ، في مشكله حصلت معاكي قبل كده
_ اه فيه
_ هي إيه
_ حصل اني وانا في الكليه اتعرفت علي واحد حبني وحبيته وكنا متفقين نتجوز بعد ما نتخرج وقبل ما نتخرج بشهر واحد مات في حادثة
_ لا مش فاهم انتي خايفه توافقي علي حد ف يموت قصدك ولا ايه وضحي اكتر
_ بصراحه اه اصل انا اتخطبت بعدها وبردو مات ف خايفه اوافق علي حد تاني يموت ، وده غير كلام الناس حوليه اللي بيوصفوني باني نحس
_ ليه هو حد عرف بقصتك مع زميلك
حسيت اني وقعت في مطب ف قولت بعد تفكير
_ لا محدش عرف هما بيتكلموا علي موت خطيبي بس انا خوفي بسبب ان اتنين ارتبطت بيهم ماتوا
_ اه كدة الصورة وضحت ، طيب يا اسيل هل في حد متقدم
_ اه فيه وحاليا مستني الرد اللي انا بأخره بقالي شهرين
_ ماشي ، شوفي اول حاجه موضوع الموت ده مش بأدينا والاتنين دول كانوا هيموتوا بيكي من غيرك كل الحكاية ان صادفت انهم ارتبطوا بيكي وده مش معناه إنك نحس زي ما انتي او الناس اللي حوليكي متخيلين ، انتي طبعاً مؤمنة بالله وعارف ان الموت والحياة بأيد ربنا مش بأيد حد
_ عارفه بس مش قادره اشيل الفكرة دي من دماغي وخاصة ان في ناس كتير بتأكدهالي
_ انسي الكلام ده ، انتي لازم يكون تفكيرك في حاجه واحده بس وهو ان الناس دي مش كويسين كارهينك اللي بيقصد يوصل لحد فكرة مش كويسة عنه بسبب حاجة هو ملهوش يد فيها يبقوا أشخاص مش كويسين ولازم نختصرهم
قولت لنفسي
_ اه يا منافق بيوصف نفسه
رجعت كلمته وقولت
_ للاسف الناس دي موجوده في حياتي اجبار مش هيمشي معاهم اختصار فهمني حضرتك؟!
_ فاهمك طبعاً
بقا ينصحني وانا حلفت لا اعقده في عيشته واخليه يحس انه فشل وبقا يجيني يمين اجيله شمال لغيت ما زهق وقالي
_ تمام يا انسه اسيل كده الوقت خلص هنتكلم تاني
_ اتمني مكنش زهقت حضرتك وسديتها في وشك انا عارفه ان مشكلتي ملهاش حل
_ من ناحية زهقتيني فانتي فعلاً زهقتيني بس ليها حل لما تصتلحي مع نفسك وتحبيها وتكون عزيزه عليكي متسمحيش لاي حد يقلل منها
مطيت بوقي بسخرية وقولت
_ عندك حق يا دكتور متشكره قوي حاسه ان كلامي مع حضرتك خفف عليه شويه
_ اهلا بيكي يا اسيل
#زيد
بنت مستفزه اسلوبها ورفضها لكل الحلول حسسني انها قاصده تفشلني ، بس علي مين يا انا يا هي وهعرف ازاي اقنعها وعشان كده دخلت الاكونت بتاعها فرزته حته حته ولقيت منشوراتها كلها هايفه ده غير ان في كتير حاجات بتقول انها من القاهرة مش من الصعيد وغير الصور اللي حسيتها انها صغيره قوي علي انها تكون 26 ، وهنا حسيت انها بتشتغلني واول حد جه علي بالي هي خلود وتوقعت انها ممكن تكون هي
#هاجر
بعد ما فكرت للحظات لقيت ان عنده حق في انه يزعل من التصرف اللي عملته وعشان كده روحت وكنت هعتزرله ولكن لما قالي اتفلق عندت ومشيت وانا متاكده انه هيكلمني ويصالحني وطال عدم اتصاله يوم واتنين وانا بردو في قمة هدؤئي لاني عرفاه هيتصل لما غيابي يطول وبالفعل تالت يوم اتصل ف قفلت وكل ما كان يتصل كنت بقفل لغيت تاني يوم قبل ما اروح الكلية لقيته بيخبط عليه وبيقولي
_ مبترديش ليه
بقيت بصاله من غير رد ف قالي
_ بكلمك
مدتلهوش اي رد وبفضلت ساكته ومتنحاله وهو بيكلمني لغيت ما انفعل ومسك دراعي جامد وقال وهو بيقرب
_ انا مش بكلمك!!!
وقفت بصاله بنفس درجة البرود وشوفت انفعاله بيدوب واحده واحده قدام برودي وبعد لحظات دامت في نظراته لعنيه اتنقل بعنيه لشفايفي ف بلعت ريقي بتوتر وبعدته وقولت
_ مش انت قولتلي اتفلقي اديني بتفلق
بقا واقف قدامي متوتر شوية ف قولت
_ انا عرفت غلطي وجيتلك علشان اعتذر بس انت زودتها وبقيت تزعق
_ اه ف قررتي تعامليني زي العيل قدامك ومترديش واجيلك توقفي متنحه قدامي
ابتسمت بمكر وقولت وانا رافعة حاجبي
_ مش تناحة دي نظرة انتصار كنت متاكده ان مهما طال زعلك هتكلمني ، انا عجناك وخبزاك وعارفه انك طيب وسوري في الكلمه عبيط مبتقدرش تسيب حد زعلان منك
_ انتي صح انا عبيط علشان بقل من نفسي واجري ورا عيله زيك
كان هيمشي ف مسكت فيه وقولت
_ بشر استني
وقفت قدامه وقولت
_ وانا والله ما اقصد حاجه بالبوسه اياها وانت المفروض تكون فاهم كده انا طول عمري بعتبرك اخويا الكبير ولو بابا وماما هما اللي خلفوك كنت هفضل ابوسك بسبب ومن غير سبب ، الموضوع مش مستاهل الزعل ده كله
_ بس انا مش اخوكي
_إيه
_ قصدي اني حقيقي مش اخوكي حتي لو اتربينا علي اننا اخوات وعيشتي معانا اكتر ما عيشتي مع اهلك بس الحقيقه ان انا مش اخوكي وغلط جداً اللي انتي عملتيه
_ ماشي بس انا عمري ما شوفتك غير اخ ، بس تمام انت عندك حق وانا اسفه اوعدك مش هتتكرر
_ تمام
_ يعني مش زعلان
_ لأ
_ طيب شوف هتجبلي إيه حلاوة الصلح
_ نعم
_ إيه ، بقولك شوف هتجبلي إيه حلاوة الصلح
_ علي فكره انتي اللي مزعلاني
_ ماشي المهم ان كان في زعل ودلوقتي بقا في صلح ولازم حلاوة لصلح ده
_ طيب ومتجبيش انتي ليه
_ لأن انا بنت ومينفعش اجيب
_ لا نظرية بردو ماشي يا استغلاليه هجبلك عاوزه ايه
قولت بإبتسامة
_ فسحه
_ إيه
_ إيه
_ فسحة ازاي
_ فسحة زي الفسح إيه عمرك ما اتفسحت
_ بس انا مش فاضي
_ افضي
_ إيه البرود ده هقولهم مش جاي الشغل علشان هفسح هاجر
_ ما انا بصراحه مخنوقه من قعدت البيت وماما مش هتخليني اخرج لوحدي
_ شوفي خلود واطلعوا مع بعض
_ لا انا عاوزاك انت اللي تفسحني وهتفسحني ، اتفضل بقا كلمهم وقولهم مش جاي النهاردة
_ انتي هبله ، لا مش هفسحك واسكوتي
رفعت حاجبي وقولت
_ بشر
_ لااااا
_ بشررررى
_ إيه
_ هتفسحني
_ وانا بقول لا يعني لا ومتحاوليش علشان مش هتفلحي
_ بببببجد
_ اه ببببببجد
ابتسمت بمكر وقولت وانا رافعة حاجبي
_ بلاش اناااا
_ لا انتي بقا
_ بلاش انا يا بشر هتندم
قالي بتحدي
_ مش هتقدري يا هاجر
قولت ببرود
_ اوووكي
« بعد ساعات»
_ ياخي مكنتش قادر تاخدنا في مكان تاني غير ده ، بحر يا بشر انا زهقت من البحر
_ هو ده اللي عندي
_ لا مينفعنيش اللي عندك ده انا عاوزه اروح ملاهي
_ ملاهي ههههه اسكوتي طيب
_ لا بقي مش هسكت
_ لا هتسكتي لأما همشي واسيبك
_ هتوديني يا بشر
_ مش هوديكي يا هاجر
_ هتوديني يا بشر
_ مش هوديكي يا هااااااجر
قال كده ف ابتسمت بمكر ورفعت حاجبي ف قالي
_ لاااا انسي انسسسسسي والله ما تعملي ايه ما هوديكي ملاهي هه قال ملاهي قال هنستعيل علي اخر الزمن ، انسسسسي
« بعد وقت»
_ الله ياخدك هاجر انا بدوخ بجد
قالها وهو ماسك في ايدي وبيبص لتحت بخوف واحنا راكبين لعبة زي القطر بتلف بينا في مرتفاعات وتهبط وسط صراخ الناس اللي راكبين معانا ف قولت وانا بشد علي ايده
_ هههههههههه انسي خوفك وانطلق
بصلي وقال بخوف وضيق نفس
_ انطلق ايه انا بخاف
_ عيب قوي تكون راجل وتقول بخاف ، يلا صرخ اااااااااااااااااا
زاغت عينيه ومال لورا وهو بيقول
_ بس بس، قوليلهم يوقفوها بجد ، هاجر بطلي جنان وخليهم ينزلوني نفسي بيضيق
قولت وانا بمسك فيه
_ مالك يا بشر
_ دوخت
_ طيب طيب اهدا خلاص قربت تخلص ، قربنا ننزل
ميل بدماغه علي كتفي ف حطيت ايدي علي وشه وقولت بقلق
_ بشر انت كويس ، بشر
رفع جفونه وبصلي وقال بصوت مقدرتش اسمعه من صريخ الناس ف قربت ودني منه ف قال
_ عاوز انزل
رجعت بصتله وانا بنفس القرب وقولت
_ هننزل ، انا اسفه قوي مكنتش اعرف انك بتخاف قوي كده ، اهدا
_
_ متخافش هننزل
مر الوقت وانا لسه ماسكه فيه ورأسه علي كتفي لغيت ما خلصنا ونزلنا وبقا ماشي معايا غير متزن ف خدته وقعدته علي كرسي قريب وانا قعدت جمبة وقولت
_ عامل ايه دلوقتي
_ حط ايدية الاتنين علي وشه ومردش ف قربت شويه وقولت وانا بشيل ايده
_ بشر
بصلي بتلبد ف قولت
_ انا اسفه والله ما كنت اعرف انك هتتعب ، حقك عليه اخر مره هطلب منك نيجي هنا
_ مش عارف انا مبهدل نفسي معاكي ليه كده
_ ههههه علشان بتحبني
سكت ف قولت
_ اسفه والله اخر مره هخليك تيجي الاماكن دي
بقا ساكت لوقت طويل وبعدين قام وقالي
_ يلا نمشي
_ يلا
مشينا مع بعض ولما مسكت في دراعه زق ايدي ف قولت
_ إيه ام الرزاله دي
_ امشي انتي وساكته
_ طيب انا غلطانه اني مهتمه بزعلك
_ متبقيش تهتمي
_ ده انت رزل
_ مش ارزل منك اخلصي
طلعنا العربيه وساق بينا ف قولت وانا بصاله بإبتسامة
_ اقولك حاجه
_ لأ
_ يابخت اللي هتجوزك
بصلي بصة سريعه وقال
_ قولتلك لا
_ بتكلم جد ، انت طيب قوي بس مشكلتك كتوم ومفتكرش انك رومانسي ولا ليك في جنان الشباب
بصلي بقرف وقال
_ جنان الشباب اللي هو ايه ، قميص مفتوح ولا شعر واقف زي المتكهرب وبعدين اكون رومنسي مع مين ، مع الدولاب ولا في رايك ان الطبيعي ان اي حد يكون رومانسي من غير ما يكون في حد يمارس معاه الرومانسيه دي
_ بيبان
_ بيبان ازاي بقا يا فالحة
_ يعني مثلا ذوقك في الاغاني، في الافلام ، ده غير اني عمري ما سمعتك بتتكلم عن الحب ولا في يوم قولت انك حبيت
_ وده دليلك اني مش رومانسي
_ افتكر كده
_ تفكيرك غلط ، مفيش حد خالي من الرومانسيه بس كل واحد وظروفه
_ وايه هي ظروفك
_ وانتي مالك ، بتحققي معايا ليه
_ يابني بندردش فيها ايه
_ انا مش بدردش عندك حاجه تقوليها قولي معندكيش اسكتي
_ علي فكره انا كنت بتكلم معاك علشان لو حكيتلي احكيلك انا كمان
_ تحكيلي إيه
_ اللي عندي بس مش هتكلم غير لو قولتلي حاجه
_ حاجه زي ايه يعني
_ اي حاجه موقف حصل معاك ، قصة عشتها اكيد لو دورت هتلاقي
_ معنديش
_ يا سلام في شاب في سنك محصلش في حياته قصة
_ انتي عاوزه توصلي لايه
_ عاوزه اسمع قصة عشتها علشان اقولك اللي عندي
وقف العربيه ودار ليه بكل جسمه وقال
_ عاوزه تعرفي إيه
_ قولتلك
_ قصة عشتها
_ اه
سكت شويه يفكر وبعدين قال
_ ماشي هقولك ، قصة عشتها انا المفروض اتكسف اقولها بس هقولك
قولت بإبتسامة
_ قول
_ كان معايا زميل ليه في سنة سته ابتدائي
_ ايوه
_ في السنه دي بذات امه خلفت بنت
_بنت؟
_ اه
_ اممم وبعدين