رواية اختلاج روح
الفصل الحادي عشر والثاني عشر
بقلم لولي سامي
بعد أن وصلت جودي الي الشركة دخلت والقت السلام على نهي زميلتها بوجه مقتضب فسألتها نهي/ يا ساتر يارب حد يصبح على حد كدة برضو؟
جودي بتنهيدة مؤلمة/ اسكتي يا نهي والنبي ما فايقة لهزارك.
استقامت نهي من على مكتبها وتوجهت إلى مكتب جودي وجلست أمامها فوق المكتب قائلة/ اسكت ده ايه تعرفي عني كدة برضه داحنا نسيب الشغل ونفوق ست جودي اللي مش فايقالي ده.
خير يا قمر طمنيني الاول انس عامل ايه النهارده؟
اومأت جودي برأسها وقالت/ بخير الحمد لله ادتله العلاج وسيبته مع ماما عقبال ما بابا يروحلها.
ليه هو باباكي سافر؟
سالتها نهي لتجيب جودي.
- لا أصل جه وصلني وزمانه مروح والله مضايقة اني تعبته على الصبح كدة .
سالت نهي بتريقة/ وجه وصلك ليه أن شاء الله توهتي ولا مبقتيش تمشي لوحدك في الشارع .
جودي بوجه مقتضب/ مش بقولك رايقة وعايزة تهزري وانا مش فايقة.
- خلاص خلاص هسكت اهو. قوليلي بقي ايه اللي حصل يخلي الحاج اشرف العسل اللي هيطلع من عيني ده يوصلك الصبح كدة ؟
- هحكيلك بس متقاطعنيش وتستظرفي كعادتك سامعه ؟
ويطلب تعاكسي بابايا بدل ما اقول لماما سامعه ولا لأ؟
- سامعه سامعه وادي قعدة قولي يا قمر
جلست نهي فوق سطح المكتب رافعة قدميها لتجلس أمام جودي بجلسة القرفصاء وبدأت جودي تسرد لها ما حدث بالأمس وما حدث بالصباح حتي انتهت جودي من سرد كل ما لديها لتعلق نهي / يخرب بيت شيطانه ده طلع بجح ومعندوش دم متزعليش مني يا جودي بس هو باي حق يحكم ويتحكم وكمان جاي يقنعك يتجوز عليكي لا ده كدة عدي بصراحة أنا دمي اتحرق.
جودي بتفكير / مش عارفه اعمل ايه يا نهي دانا كنت حاسه اني بولع وهو بيتكلم وعايزة أولع فيه بس متعرفيش احساسي ازاي لما لاقيته الصبح واقف تحت العمارة انا فعلا كنت زيك ودمي محروق منه اوي وكنت مستنياه يجي يعتذر الصبح بس لما شوفته الصبح فرحت بصراحة وعلشان كدة خوفت أضعف فطلبت من بابا يجي يوصلني.
نهي بعصبية/ لا لا لا استني هنا يعني ايه خوفتي تضعفي يعني كنتي هتوافقي يتجوز عليكي وترجعيله عادي كدة ؟
- لا طبعا مش قصدي كدة خالص.
انطلقت ناطقه بها جودي لتكمل موضحه/ انا قصدي خوفت أضعف ويبان حبه في عيني مش عايزة ابان قدامه ضعيفة يا نهي مش عايزه .
وبدأت بالبكاء واضعه يدها على وجهها لتاخذها نهي باحضانها فتزداد جودي بالبكاء لتربت عليها نهي قائلة/ بس يا جودي بس حبيبتي انا افتكرتك اقوي من كدة والله ليندم ويجري وراكي من تاني بس انتي متضعفيش زي ما بتقولي.
لتنتحب جودي بالبكاء قائلة بتقطع/ جر..حني اوي يا نهي مكنتش متخيلة ده يطلع منه .
- اه لو تسبيني أكلمه والله لعرفه قيمته معدوم الإحساس والقيمه ده.
ليقطع حديثهم صوت طرق على باب المكتب ليجدوا سكرتاريه أحمد تبلغ جودي بأن مديرها الاستاذ احمد يطلبها بمكتبه لتنظر لها جودي وتبلغها أنها قادمة خلفها فتذهب السكرتاريه لتتحدث جودي مع نهي / نهي لو سمحت هطلب منك حاجه وهبقي افهمك بعد كدة ممكن ؟
نهي مستفسرة/ خير يا جودي اطلبي يا قمر.
جودي/ تروحي لاستاذ احمد وتشوفي عايز مني ايه ومن غير ما تسألي هبقي افهمك بعد ما تيجي.
نهي بموافقة/ عيوني يا جميل بس لو قالي أنه طالبك اقوله ايه؟
- نهي انتي هتغلبي يعني هتعرفي تتصرفي .
اومأت لها نهي لتخرج من المكتب ذاهبه لمكتب أحمد مديرهم بالعمل.
.............................
بعد خروج يزن من مكتب آسر اقتربت فتنة من آسر محاولة الجلوس على قدمه ليبعدها آسر متحججا/ معلش يا فتنة عندي شغل كتير وكنت عايز اكلمك بخصوص لبسك ده مينفعش كده.
اعتدلت فتنة في وقفتها ثم توجهت إلى الكرسي المواجهه لمكتب اسر وجلست بهدوء وتروي/ مالك يا آسر مش مظبوط النهارده يا بيبي هو ابن خالتك اثر عليك ولا ايه؟ ده فظيع كدة وشايف حاله .
آسر / ملكيش دعوة بيزن دلوقتي أنا بكلمك بخصوص لبسك بتكسف كل ما حد يشوفك كدة .
فتنة بابتسامة لعوبه/ عيوني يا آسر انت تؤمر يا قلبي وانا انفذ انا كنت هغير كله بعد الجواز طبعا بس شكلك مستعجل اغيرلك كل اللي انت عايزه ولا يهمك المهم اني ارضيك.
بس مقولتليش هنتجوز امتي بقي بقالك مدة من ساعة ما جيت لماما ومفتحتش من ساعتها الموضوع تاني.
تنحنح آسر قائلا/ احم.... اه...... اصل في شوية مشاكل كدة مع جودي وانس ابني ....
لتقطع فتنة استرساله قائلة/ لا انا مليش دعوة ده حتي الشبكة مجبتهاش مش هنبدا من اولها مشاكل.
ثم توجهت إليه واضعة يدها حول وجهه قائله/ آسر حبيبي انت وعدتني وانا صدقتك اوعي تخلي بيا .
ينظر لها آسر بعيون ضائعة مشتته ثم يزيل يدها من على وجهه ويقول لها / طب بعد اذنك يا فتنة اديني فرصه لبكرة بس وهنقعد نتكلم علشان انا دلوقتي فعلا مضايق جدا .
لتنسحب فتنة من أمامه وتهم بأخذ حقيبتها / ماشي يا آسر هسيبك لبكرة بس مش هستني كتير باي يا بيبي.
وخرجت فتنة من إمامة ليطرق آسر على سطح المكتب بيده موبخا حاله/ ايه اللي عملته في نفسك ده غبي غبي جاي تفوق دلوقتي ادي اللي بتحبها سابتك واللي فاكر نفسك حبيتها فوقت من وهمك بعد فوات الاوان غبي غبي.
......................................
خرج يزن من شركة آسر متوجها إلى شركة جودي محاولا إلمام الأمر وتقريب المسافات فوصل الي وجهته ليصعد الي الطابق الذي به مكتب جودي كما سئل عنه الحراسة بالاسفل ليجد فتاة فارعة الطول ولكن بالنسبة له قصيرة وجسدها ممشوق ترتدي جاكيت روز قصير أسفله بنطلون كحلي لفتت نظره فحاول أن يستوقفها/ لو سمحت ياااااا .
- افندم حضرتك بتكلميني؟
نطقت بها نهي مستفسرة.
ليكمل يزن استفساره/ اسف جدا بس اصلي مش عارف حضرتك انسه ولا مدام فخفت اغلط يعني.
تسأل نهي بدورها/ أيوة وحضرتك عايز تسال عن ايه بقي؟
يبتسم يزن لفهمه من هروبها عن إجابة السؤال السابق فيقول/ كنت بسأل عن مكتب بشمهندسة جودي من اي اتجاه؟
لتتقضب ملامح نهي مستفسرة/ وحضرتك مين وبتسال عليها ليه؟
يجيب يزن بتسليه واضعا يده في جيبه بنطاله/ انا مين انا قريبها لكن بسال ليه ؟ اقترب من وجهها قائلا/ ملكيش فيه.
تضطرب نهي من حركته وترد محاولة تهداة حالها/ اه عرفتك انت اكيد قريب جوزها اصل كلكم شبه بعض.
ثم نظرت له من أعلاه لاسفله لتقضب ملامح يزن ويهز رأسه مستفسرا / معلش شبه بعض ازاي يعني مش فاهم حضرتك.
رفعت نهي رأسها بكبر/ مش مهم تفهم .مش انت عايز مكتب جودي تعالي ورايا .
ثم سارت أمامه متوجهه حيث مكتب جودي .رفع يزن حاجبيه ثم ذهب خلفها حتي وصلا الي مكتب جودي فدخلت نهي لتقل لجودي / في حد...
ليقطع يزن حديثها ودخل فجأة / برنسيس جودي اخبارك يا قمر .
لتستقم جودي عن كرسيها مرحبه به / اهلا اهلا يزن باشا عاش من شافك ،اتفضل اقعد .
يجلس يزن على الكرسي المواجهه لمكتب جودي ويضع قدم فوق قدم تحت أنظار نهي المتعجبه من طريقته لتلاحظ جودي وقوفها فتسالها/ واقفة ليه يا نهي تعالي اعرفك ده يزن باشا ابن خالة آسر .
نهي بابتسامة جانبية/ توقعت كدة برضه .
جودي بعدم فهم / توقعتي ايه مش فاهمه؟
ليجيب يزن بدلا عنها/ متخديش في بالك خلينا في المهم .
لتهمس نهي لنفسها/ انسان غريب والله.
فيسمعها يزن وينظر لها قائلا/ ولسه هتشوفي الأغرب .
ثم يلتفت مرة أخري لجودي ويغير الحوار/ ها يا ستي مقولتليش اخبارك ايه بقي بعد آسر بتاكلي وتضحكي وتشتغلي وبتعملي كل حاجه ولا زعلانه وكئيبة؟
لترد نهي / هتكون زعلانة وكئيبة ليه أن شاء الله اخر واحد في الكون؟
ينظر يزن الي نهي ولم يعقب ثم نظر إلي جودي ويأم برأسه ليحثها على الحديث فترد جودي / انت عرفت يا يزن باللي حصل ؟ طب عرفت ابن خالتك عمل ايه ولا جاي تغلطني ؟
لترد نهي / يغلطك ده ايه اهو ده اللي ناقص !
ياخذ يزن نفس عميق وينظر الاعلي ثم يلتفت الي جودي ويكمل حديثه/ جودي انا مش جاي اغلطك اكيد وعارف ابن خالتي عمل ايه انا جاي علشان احاول معاكي نرجعه ،
اسر تايه خالص وواجب الناس اللي بيحبوه يرجعوه لو لاقوه ماشي في طريق غلط .
لتقطع نهي حواره قائلة/ يعني تبقي مجروحه ومتخانة وتحاول معاه وترجعه وتتحايل عليه علشان ايه يعني وفين كرامتها ولا انتوا تعملوا اللي انتوا عايزينه واحنا المفروض نصبر ونستحمل ونرجعكوا عن الغلط كمان .
ينظر يزن لنهي ويبتسم ابتسامة صفراء ويقل/ انسه نهي ممكن اطلب منك طلب ؟
نهي / خير
يزن بفظاظة / اسكتي .
لتجحظ عين نهي وتسبه بداخلها ( انسان عديم الذوق) ثم تخرج من المكتب محدثه باقدامها دبدبة تعبيرا عن غضبها.
ثم يلتفت إلى جودي مكملا حديثه/ انا لا يمكن اقولك تتحايلي عليه علشان ببساطة مقبلش ده يحصل مع اختي لكن هقولك زي ما هقول لأختي مادام الإنسان جواه حاجه كويسة يبقي خسارة نسيبه وبالنسبة لغلطه فهو غلط بس برضو ده انسان يعني مش معصوم من الغلط وممكن يضعف.
جودي بكبرياء/ انا عملت معاه كل حاجه لدرجة اني اتحايلت عليه ومش هقلل من نفسي تاني اكتر من كدة .
ده عايز يتجوزها عليا هتقولي كمان معلش؟
يزن بعقلانية / لا طبعا وانا مش هوافق ولا هسيب ابن خالتي يقع الواقعة ده ولا هقولك تتحايلي عليه بس كل اللي بطلبه منك تطولي بالك وانا والله لاجبهولك لحد عندك يبوس القدم ويبدي الندم كمان ها ايه رايك؟
جودي بعزة نفس/ خلاص يا يزن مش هينفع ابن خالتك جه على كرامتي اوي وخاني وانا لا يمكن اسامحه.
يزن بعقلانية / يعني لما هو يغلط يفكر في نفسه وانتي تفكري في كرامتك محدش فيكوا فكر في انس يا ستي خلي اخر محاولة ده علشان خاطر أنس مش علشان خاطركم.
بصي انا هقابله النهارده وهسوهولك على الجانبين هقوله اني قابلتك وحاولت معاكي وانتي ابدا مخدوش يا بابا مخدوش يا بابا.
لتبتسم جودي فيعلق يزن/ أيوة كدة اضحكي والله لاخدلك حقك ثالث ومتلت ميعرفش انك ليكي اخوات ولا ايه بس انا بقولك اهو لو حاول يتصل مترديش الا بعد اربع خمس مرات يعني وحاولي ميشوفكيش وانتي اتقلي وانا هضرب على الحديد وهو سخن .
لتبتسم جودي مرة أخري ليقف يزن غالقا زر البدلة قائلا/ يالا همشي انا بقي.
فيجد نهي تدخل من باب المكتب قائلة/ انت لسه هنا؟
ليبتسم لها يزن ثم ينظر لجودي قائلا/ جودي ملكيش دعوة باللي ماشين تحت موجه اللي قادرة على التحدي والمواجهة ها .
لتومأ جودي برأسها مبتسمة ثم يذهب الي باب المكتب ليلتفت مرة أخري ناظرا لنهي مشيرا لها بإصبعه قائلا/ سمعتك على فكره وانتي خارجه شكرا لذوقك باااي.
ويخرج من المكتب لتنطلق جودي ضاحكة تحت نظرات نهي المعتادة/ بتضحكي على ايه انتي؟ ده انسان غتيت وعديم الذوق .
جودي وهي تضحك/ ابدا والله ده يزن عسل بس انتي دخلتي فيه شمال وهو ملوش دعوة .
نهي تزم شفتيها/ انا اللي محيرني كان بيسمعني ازاي ده .
لتكمل جودي ضحكتها تحت أنظار نهي الغاضبة.
فتسألها جودي محاولة تلطيف الحوار/ مقولتليش عملتي ايه عند أحمد ؟
نهي / اه صحيح انتي قولتي هتقوليلي بعدين في ايه بقي؟
بدأت جودي تسرد لها كل المواقف التي جمعتهم بداية من موقف احمد عند إيصال آسر ليلا مرورا بموقف ثناءه على زيها وصولا لموقف المشفي .
فعلقت نهي قائلة/ لا فعلا ده حركات مريبة وأحمد اصلا مش سالك يعني،كويس انك مروحتيش له وخليه عليا كل ما يطلبك اغتت انا واروحله .
اتاريه حسيت انه اتكبس حته كبسه اول ما دخلت زي ما يكون كان مستنيكي ولاقاني قالي امال فين جودي ؟
قولتله معاها فون بتطمن على ابنها واللي تقدر تعمله هي اقدر اعمله انا ، راح باصللي كدة وقالي لا خلاص اتفضلي على مكتبك وانا طالعة بقي خبطت في يزن ده يا ساااااتر على كمية الغتاتة.
لتضحك جودي مرة أخري فتلقي نهي عليها عدة اقلام من فوق مكتبها.
........................................
#اختلاج_روح
#لولي_سامي
البارت الثاني عشر بعنوان ( محاولة اخيرة)
بعد خروج فتنة من شركة آسر توجهت الي شركة أحمد لتخبره بمستجدات الأمر حتي وصلت إلى الشركة وعند خروجها من التاكس وجدت يزن يخرج من شركة احمد لتتوقف متفاجاة بوجوده كما لاحظها يزن ولكن عبر من أمامها دون توقف واستقل سيارته تحت أنظارها ثم دخلت الشركة حتى وصلت الي مكتب احمد الذي كان بدوره يجلس ويفكر كيف يقترب من جودي وكيف يخطط ليظهر آسر باسوأ صوره حتي لاحظ دخول فتنة مكتبه وأغلقت الباب خلفها لينتفض احمد من على مقعده ويتوجه إليها قائلا/ انتي ايه اللي جابك هنا دلوقتي ودخلتي ازاي كدة؟؟؟
فتنه بميوعه اقتربت منه ووضعت يدها حول رقبته لتقول/ وحشتني يا بيبي وحشتني اوي .
ينفض احمد يدها / بت اتعدلي، احنا في الشركة، وقولتلك متجيش هنا وقوليلي دخلتي ازاي؟
فتنة / ملقتش السكرتيرة بره دخلت على طول .
يجلس احمد خلف مكتبه ويقول لها/انجزي جايه ليه وبسرعة علشان مش فاضيلك؟
فتنة بعصبية/ خلاص يا عم هقولك انا جاية علشان تشوفلي حل علشان شكل آسر عايز يتهرب مبقاش يكلمني ولما بروحله الشركة بحسه بيتهرب مني ويتحجج باي حاجه .
أحمد وهو ينظر لها من أعلاها لاسفلها/ ليه وفين شطارتك يا قطة مش عارفه تبلفيه؟ ايه فقدتي سيطرتك ولا ايه؟ لا اتعدلي كدة اوعي تخليه يفوق ده خلاص هانت .
فتنة/ مش عارفه في ايه كان زي الخاتم في صباعي من ساعة ما بعد عن جودي وتحس اكنه بقي عنده خلل ده انا كنت اتجوزته وهو معاها اسهل من دلوقتي.
علي العموم انا ادتله ميعاد لبكرة ولو منفذش هفضحه في الشركة ايه رايك؟
احمد بتفكير / خليني افكر في الموضوع وارد عليكي بالليل .
انتفضت فتنة من مقعدها وتوجهت إليه محاولة التقرب قائله/ يعني استناك النهارده يا قلبي ؟
يوقفها احمد بإشارة من يده ليقول لها/ روحي مكانك يا فتنة انا مش آسر هتأثري عليا وبالنسبة لبليل هشوف إذا كنت هعدي عليكي ولا هكلمك في التليفون.
لتذهب فتنة الي مقعدها وتسحب شنطتها قائلة/ انا مش عارفه مالكم النهارده كل واحد يقولي مكانك على العموم يا بيبي مستنية منك تليفون لو قولتلي انك جاي هتلاقيني مجهزالك ليلة عنب .
ثم غمزت بعينيها قائله/ see you baby
وارسلت قبله بالهواء وخرجت من مكتبه نفخ احمد وارجع رأسه للخلف ليعيد التفكير في جودي وكيف عليه أن يسرع بخطواته قبل أن يفيق آسر ويحاول الرجوع إليها.
.........................
فور ركوب يزن سيارته اتي له اتصال يخبره بضرورة السفر الي عمله للقيام بمهمة ما وبعد انتهاء مكالمة العمل قام بالاتصال بآسر ليرد الاخير عليه / الووو يزن
يزن/ أيوة يا آسر انا بتصل بيك علشان اقولك ضروري اقابلك النهارده انا مسافر بكرة وضروري اقابلك علشان في مستجدات لازم تعرفها.
آسر / تمام هستناك في الكافيه الساعة ٧ كويس؟
يزن / كويس اوي اكون روحت واتغديت واتشطفت خلاص على ميعادنا أن شاء الله.
ثم يغلق الهاتف ليتوجه حيث شقته .
تنتهي ساعات العمل بشركة آسر ولكنه يفضل أن يبقي بالشركة بدلا من أن يتوجه إلى منزل والدته ويسمع ما لا يطيقه.
وهكذا الحال بشركة جودي انتهت ساعات العمل لتتوجه جودي الي منزلها وتطمئن على انس وتسرد لوالدها ووالدتها ما حدث من يزن وكيف سيحاول إرجاع آسر عما ينوي عليه دون المساس بكرامتها ليربت والدها على كتفها ويطمينها ويؤكد لها وجوده بجوارها بكل الحالات ليجلسا يتناولون الغداء معا.
...........................
جاء موعد لقاء آسر ويزن ليتقابلا بالمكان المحدد يجلس يزن ليخبر آسر بزيارته لجودي/ أنا روحت لجودي النهارده بعد ما كنت عندك..........
ليقطع حديثه آسر وعيونه كلها غضب/ روحت لجودي ليه يا يزن مش قولتلي مرات اخويا ولا يمكن تبصلها رايحلها ليه دلوقتي.
ينظر له يزن بكل برود ويرد عليه بهدوء تام/ خلاص خلصت كلامك؟ ولما انت مش بطيق عليها الهواء الطاير كدة سيبتها ليه ؟ جرحتها ليه كدة ؟وعلشان مين علشان واحدة استغفر الله العظيم! اللي شوفتها معاك في المكتب! انت ازاي اتخدعت كدة ؟ايه كان فين عقلك؟ مشوفتش الفرق ولا هي عمتك؟
ينظر آسر للاسفل لشعوره بالخجل من حاله قائلا/ معرفش.. معرفش يا يزن اللي حصل ده حصل ازاي؟ يمكن من انشغال جودي بالبيت وانس عني خلاني ابص بره. يمكن من إهمالها ليا وواحدة زي ده دخلت في الوقت الغلط مش عارف اقولك انا ازاي انسقت وراها ،مكنتش شايف ،مش عارف يا يزن وادبست ومش عارف اخلع ازاي ده لسه النهاردة بتفكرني بوعدي ليها بالجواز . والله يا يزن انا بحب جودي بحبها اوي ومتخيلش حياتي من غيرها ومتخيلهاش مع حد تاني ابدا ابدا ،بس مش عارف اعمل ايه ولا أخرج من الورطة ده ازاي؟
ينظر له يزن ويشفق على حاله ولكنه وعد جودي بأن يعاقبه على ذهاب عقله بهذا الشكل فأغلق عينيه برهة وأخذ نفس عميق ثم فتحها ليقول/بص كل اللي قولته ده مش مبرر ابدا للي عملته كان ممكن تحل مشكلتك بمية طريقة غير كدة على العموم يا آسر انا كنت عند جودي في الشركة علشان أقنعها ترجعلك بس طبعا رفضت بكل جوارحها وخاصة لما قالتلي انها يستحيل توافق على موضوع جوازك قولتلها طب لو صرف نظر عن الجواز هتوافقي ترجعي .
توقف يزن عن الحديث ونظر له وكأنه يريد أن يستشعر رد فعله ليجد آسر قد انتقل من المقعد المواجه له للمقعد المجاور قائلا/ والنبي يا يزن كنت بتقنعها ؟ طب قالتلك ايه ؟ وافقت ترجع ؟
ليزم يزن شفتيه ويحرك رأسه يمينا ويسارا / للاسف رفضت برضه وقالت زي ما خاني المرة دي هيخوني تاني .
ليقول آسر مسرعا/ لا والله عمري ما هخونها تاني كانت غلطة ولا يمكن أكررها.
ليستطرد يزن بالحديث/ مانا قولتلها كدة وقعدت اقولها اضمنهولك برقبتي بس للاسف مفيش فايدة كانت مصرة جدا على الرفض بس عارف يا آسر انا حاسس ان في امل.
اسر مسرعا/ ازاي قولي والنبي وكل اللي عايزاه انا تحت امرها بس توافق ترجعلي من تاني.
يزن لتروي/ بس الموضوع محتاج منك صبر ومحاولات كتييييير.
آسر/ ماشي ماشي بس قولي ازاي.
يزن / اولا تصرف نظر خالص عن فتنة ده.
لينظر آسر للاسفل قائلا/ نفسي بس اصلك مش عارف اللي فيها ولا عارف هخلع ازاي.
يزن / من غير ما اعرف انا فاهم النوعية ده كويس وبقولك عندي حل ليها ، كبيرها ارملها قرشين وكل حاجه هتتحل .
آسر/ تفتكر اصل يعني اللي حصل .
ليقطع حديثه يزن / من غير ما تقولي اللي حصل انا عارف بقولك ايه ولا انت مش عايز جودي ترجعلك.
آسر/ لا والله عايزها والنهاردة قبل بكرة ،خلاص تمام بكرة اكلمها واحاول أراضيها بقرشين بس يارب توافق .
يزن / لو موافقتش كلمني وانا بعد المأمورية اللي طالعها اخليها تقولك مع السلامه ومن غير ولا مليم.
آسر/ طب ده اولا وثانيا؟
يزن بابتسامة/ ثانيا ده بقي تعتمد على محاولاتك مع جودي يعني تتصل بيها تحاول تقرب شوية تحسسها باهتمامك وحبك مش معقولة يعني بعد اللي عملته واول ما تقولها يالا نرجع هتقولك ماشي على الاقل يا راجل تكفر عن غلطتك.
آسر بابتسامة حنين/ بس كدة من عيوني طبعا هي تستاهل عمري كله محايلة مش شوية وخلاص.
ليربت يزن على كتفيه ويقول/ ورينا بقي حركاتك بتاعة زمان يا آسر باشا عايز البت تموت لما اشوفك.
ليضحكا سويا ثم يتذكر يزن أمر ما فيسأل آسر قائلا/ صحيح يا اسر انا وانا خارج من شركة جودي لمحت فتنة داخله الشركة تعرف كانت رايحه لمين؟
آسر بلا مبالاه / تلاقيها كانت رايحه لاحمد علشان يخلص الشغل اللي ماسكه ماهي بتتعامل مع شركته في الديكور .
ليحك يزن ذقنه ويقول/ بس انا شايف حاجه تانية خالص لو خلصت المأمورية ده بدري هتبقي ده مأموريتي الجديده .
.........................
بمنزل فتنة ذهب لها احمد وبعد فترة من فعل المحرمات اعتدل احمد جالسا بجوارها وبدأ بإشعال سيجارة ليسألها بتفكير/ قوليلي يا تونه ايه اللي يخلي آسر يغير رأيه ؟
اعتدلت فتنة وامسكت بالملائه حول جسدها لتقول/ مش عارفه بس هو قالي في مشاكل مع جودي وابنه اكنه كان اللي ظابطه جودي ولما خرجت من حياته الدنيا اتبرجلت ،بالرغم أننا كنا عاملين حسابنا ،ولا لو شوفته بعد زيارة ابن خالته زي ما يكون اداله قلمين فوقه كدة.
آسر بتركيز/ فوقه ازاي يعني حصل ايه خلاكي تقولي كدة؟
فتنة/ يعني بعد ما مشي ابن خالته قعد يقولي لبسك وتغيريه وبتكسف لما حد يشوفك كدة والكلام ده.
آسر ينظر لها بوقاحه/ اخس عليه وعايز يحرمنا من الحلويات ده .
تضحك فتنة ضحكة لعوب لتقول/ هعمل ايه بقي المهم قولتله حاضر ونحاول اشتري كام طقم كدة.
يحك احمد ذقنه ويستاهل/ قوليلي يا تونه انتي علاقتك بيه وصلت لحد فين؟
تضحك فتنة بملئ فمها ثم تقول/ اسكت يا احمد ده لا يمكن يكون واحد متجوز من فتره دانا كل شوية اجرأه حبه بحبه .
احمد/ يعني برضه وصلتوا لفين جالك هنا قبل كدة ؟
فتنة / متبقاش غشيم لو كان جبته هنا كان شك فيا، محصلش حاجه طبعا اكتر من بوس والحصان.
- غبية يعني مش عارفه توقعيه من غير ما يحس انك تقصدي مثلا تتعبي مرة وتتصلي بيه وتحججي انك لوحدك ولما يجي تكوني مجهزة حالك بحيث يشوفك ميستحملش نفسه ايه يا تونه هو انا اللي هقولك تعملي ايه ؟
واحد زي آسر علشان تضمني ميطرش من ايدك لازم تخليه يعك جامد النوعية ده مبتقدرش تخلع بعد كدة .
فتنة بتساؤل/ أيوة بس ساعتها هيكتشف اني مش بنت واللي زي ده بيفرق معاه الحاجات ده اوي
نهرها احمد قائلا/ مالك النهارده يا تونه غبية ليه كدة بكرة اعملك قسيمة جواز بس انجزي ويا سلام بقي لو في صورة كدة ولا كدة في كذا وضع من اللي قلبك يحبهم ساعتها هتكتفيه بجد ولا حبيتي تهددي بالفضيحة ميقدرش يقول بم. مش تقوليلي تفضحه علشان كنتي بتجيله الشركة كتير .
ثم قرصها من وجنتها ليقول لها / فوقي كدة يا بيبي وتشتغلي صح عايز كل ده باقصي ميعاد على اخر الاسبوع سامعه؟
فتنة بابتسامة لعوب / سامعه يا بيبي بس أنا عايزة سيجارة .
ليعطيها سيجارة من علبته ويقول لها/ مش خسارة فيكي امسكي يا قمر.
.............................
بعد أن انتهي اسر من مقابلة يزن توجه الي منزل والدته وأثناء الطريق ظل يتصل بجودي مرارا وتكرارا ولكن دون رد ليرسل رسائل بتطبيق الواتساب لعلها ارد عليه وخصوصا عندما وجدها متصل الان ارسل لها رساله صوتيه قال لها/ جودي ارجوكي ردي عليا بتصل بيكي كتير مبترديش ليه؟
لتنظر جودي الي الهاتف وتستمع الي الرسالة ولكن لم ترد.
ليرسل لها رسالة صوتية أخري/ جودي انتي فاتحه وانا عارف انك بتسمعي رسايلي عايز اقولك اديني فرصه واسمعيني بس مش طالب غير انك تسمعيني.
ولكن وجد نفس الرد أنها استمعت للرسالة دون الرد ليرسل لها رسالة أخري/ جودي انا اسف والله العظيم انا اسف حقك عليا ، انا هعملك كل اللي انتي عايزاه بس لازم نتكلم علشان اشوف عايزة ايه واعملهولك.
يرسل رسالة أخري/ طب طمنيني على انس ، طب وحياة انس وحياة حبنا انا هعملك كل اللي عايزاه واي ترضية تطلبيها انا موافق .
ليجد أنها أغلقت هاتفها نهائي ليطرق على إطار القيادة عدة مرات ثم يتوجه إلى منزل والدته التي وجدها مازالت مستيقظة لتبدأ معه الحوار وتسأله/ ها يا اسر آخرة موضوعك ايه يا ابني جودي بنت حلال متضيعهاش من ايدك وابنك ما شاء الله عليه لازم يتربي بينكم .
لينظر آسر للاسفل قائلا/ حاضر يا ماما انا بحاول والله بس دعواتك بقي أو اتصلي اتوسطيلي عندها.
ام آسر/ والنبي يا ابني انا وشي منها في الأرض الله يسامحك يا ابني مش عارفه اقولها ايه؟ انا عارفه مين اللي لعب في دماغك كدة ؟ ما كنتوا كويسين ربنا يبعد عنكم الشيطان.
ليؤمن آسر خلفها ويربت على كتفها / اللهم امين .
ثم يستقيم ويقبل رأسها ويتوجه الي غرفته ليفكر كيف يستعيد ثقة جودي مرة أخري ويقرر مقابلة فتنة بالغد ومحاولة إنهاء كل شئ.
حتى يغلبه النعاس .