رواية مكتوبة علي اسمي كامله بقلم ملك ابراهيم ) جميع الفصول مكتملة حتي الاخير الخاتمه

رواية ذئاب لا تعرف الحب 

الجزء الثاني2الفصل السادس6

بقلم نجمه براقه

زيد 

كنا انا وبشر وخالتي قاعدين في الريسبشن  لما رجع ابوي من عند بدر متعصب ف اتقدمت خالتي وقالت 

_ مالك يا عبيده  الواد قالك حاجه 

_ قوله اسود ومهبب علي راس اللي خلفوه بقا الواد يقولي انا لو مخطبتليش جويريه مش هرجع البيت  طيب ما عنه ما يرجع ميت عليه انا ولا يكونش بيصرف علينا وهنموت من الجوع لما ميرجعش 

قال بشر 

_ يابوي وفيها إيه لما تخطبهاله 

_ اسمع ياد انت  ، انا قولت من سنين ان مفيش حد هيتجوز قبلك قولتها علشان اخواتك الاتنين  محدش فيهم دماغه تميل ويقول هتجوز  وده اخر كلام عندي مش هغيره أبداً  والواد ده محدش يكلمه تاني  

_ يابوي حرام عليك  انت كده مخليني انا السبب في المشكله 

_ انتهينا  ، مفيش كلام في الموضوع ده  

قال كده ومشي وخالتي راحت وراه وانا قربت من بشر وقولت

_ متزعلش نفسك انت ملكش دعوه بحاجه  هما حرين مش مهم يتجوزها مش هيموت يعني 

_ حرين ازاي وابوك عاملني العقدة  

_ لا عقدة ولا حاجه سيبك منهم 

_ ازاي يعني اسيبني منهم  ،  انت مش فاهم حاجه ولا هتفهم الموقف اللي انا محطوط فيه 

_ طيب خلاص اتجوز طالما زعلان قوي كده 

_ بردو لا  انا مش عاوز اتجوز هو غصب 

_ يوووه خلاص اعمل اللي انت عاوزه 

_ انا ماشي 

مشي وانا  وروحت العيادة وبعد ساعات خلصت شغل وفتحت الاب توب ارد علي الاستشارت اللي بتوصلني وبعد ما خلصت وقفت عند شات اسيل وكنت متردد ابعتلها ولا لا وبعد دقايق هي اللي بعتت وقالتلي 

_ السلام عليكم 

رديت عليها فوراً بعد ما ابتسمت لصدفة اللي حصلت وقولت 

_ وعليكم السلام ورحمة الله وبركاته  ،  ازي حالك 

_ الحمدلله  ،  حضرتك كويس 

_ الحمدلله بأفضل حال  ، اخبار النفسية 

_ النفسية زي الفل  

_ باين كده ان في تطورات 

_ عرفت ازاي 

_ من كلمة زي الفل 

_ ايوه فعلاً 

_ طيب ايه   وافقتي علي العريس شكلك 

_ لا ده انا رفضت وموضوعه انتهي نسيت اقول  لحضرتك الحتة دي 

_ امال ايه التطور اللي مخليكي مبسوطه كده 

_ ههههه مكنتش اعرف ان الامبساط بيبان في الكتابه بس الحقيقه انا فعلاً مبسوطه  

_  ها معاكي قولي 

_ اصيص الورد بتاعي طلع وردة 

_  اصيص ورد؟ 

_ ايوه 

_ وده اللي مخليكي مبسوطه كده 

_ واكتر اصل حضرتك مش عارف انا زارعه الاصيص ده بقالي فترة كبيرة قوي ومكنش بينبت وكتير بقوا يقولولي سيبك منه مش هينبت وكنت خلاص يأست بس الحمدلله نبت 

_ واضح ان احلامك بسيطه قوي علشان تفرحي علشان حاجه زي دي 

_ كل واحد بيشوف الحلم بتاعه كبير جداً في نظرة حتي لو اللي حوليه شايفينه هايف وميستاهلش  ،  تعرف انا نفسي في ايه دلوقتي 

_ نفسك في ايه 

_ نفسي اخد الاصيص ده واوريه لكل اللي قالوا مش هينبت واقولهم اهو شوفوا اللي كنتوا بتحبطوني من نحيته اهو نبت وبعدين الاصيص ده هيكون مشتل كامل  

_  مقدر شعورك لكن يستحسن تثبتي في صمت هما طالما مركزين هيعرفوا من غير ما تقولي 

_ بجد 

_ بجد وانا بدعمك  ومستني اشوف التطورات

_ اكيد  متشكره قوي لحضرتك 

_ العفو يا انسة اسيل اهلا بيكي في اي وقت 

بقينا نتكلم شويه وطول الوقت ده وانا شايف السعادة في كلامها بسبب الورده اللي نبتت ومع ان فرحتها بسبب نجاحها في زراعة وردة ابسط ما يكون بس عجبني حماسها وشغفها تجاه الحاجة اللي بتحبها   ،  ومش هي وبس اللي  كدة خلود كمان كده ولكن هناك فرق شاسع بين احلام واهتمامات الاتنين  اسيل احلامها لطيفة ولو جنت سمارها هتكون حاجة كبيرة قوي بعدين  عكس خلود اللي  مستغله طموحها غلط واهتمامتها كمان غلط واتمني عندها معايا ميخليهاش تتمادا في الغلط ده وتزيد في الفيديوهات اللي بقيت بشوفها منها وللأسف بأحرج اتكلم معاها فيها لحساسيتها 

« بعد ايام» 

#خلود 

من وقت ما نزلت الفيديو بتاع البنت اياها والتفاعل في تزايد مستمر  مش علشان الفيديو ده بذات لا وكمان بقا يجيني مشاكل كتير من نفس النوعيه كنت بختار اللي ينفع واحذف اللي مينفعش بس شويه بشوية طمعي خلاني اقبل مشاكل اقوي واسخن من مشكلة البنت دي ومع الوقت وزيادة الفلورز لقيت نفسي بنزل نفس نوع القصة اللي قالتهالي نيرة  وبالتالي بدات اكسب من اليوتيوب وكذلك الاعلانات اللي بتجيلي فلوس كتيره   ، وحاجات كتيرة قوي اتغيرت في وقت قصير ومن ضمن الحاجات دي  استهزاء زيد وسخريته مني اللي مبقتش بشوفهم ومش عارفة سببهم ومش قادرة اقول لنفسي انه سكت علشان شاف اني نجحت متاكده ان في سبب تاني لسكوته ده  وبعد ايام وصلتني رسالة من نيرة بتقولي فيها 

_ ايوه مانتي بقيتي مشهورة تسألي فينا ليه  

_ انا اسفة يا نيرة غصب عني والله مشغوله جداً 

_ فاهمة حبيبتي ربنا معاكي  بس انا عاتبه عليكي في حاجة 

_ ليه بس 

_  الفيديوهات اللي بتنزليها الفتره دي  تقدري تقوليلي تفرق ايه عن القصة اللي انا قولتلك عليها 

_ والله يا نيرة مكنتش مخططه ل ده كله بس هي جت كده  حقك عليه 

_ ايوه اديكي نسيتي البنات الصغيره ونسيتي الأدب والتربيه اللي كنتي بتقولي عليهم ما الشهرة طعمها حلو وتنسي فعلاً 

_ لا ابدا انا معملتش كده غير علشان اثبت لدكتور الفاشل اني اقدر انجح 

_ واثبتيله 

_ افتكر كدة  اصله بطل يتريق عليه 

_ برافو عليكي ايوه كده استمري متسمحلهوش يحبطك ويقل من عزيمتك 

_ يعني مش زعلانه 

_ لا طبعاً مزعلش منك وبجد مبسوطه قوي عشانك وبفتخر بيكي وسط الناس واقول انك صحبتي واشوف نفسي عليهم 

_ ههههه مش لدرجة دي 

_ لدرجة دي واكتر  

#هاجر  

كنت قاعده مع مليكة في الكافيتيريا وبنتكلم ونحكي في اي حاجه لغيت ما سألتني عن جويريه  ف قولت 

_ إيه حكايتك ليه مهتمه بجويريه قوي كده هو انتي تعرفيها 

_ معرفهاش  انا بس عندي فضول اعرفها من كلامك عنها  ،  حالتها ثارت فضولي ونفسي اعرف بتفكر ازاي وبتشوف الناس ازاي علشان تخاف منهم كده  وايه اللي حصل خلاها توصل للحاله دي

_ مش عارفه  هي كانت كويسه وكنا بنلعب مع بعض دائما واحنا صغيرين  ، ايوة اهتمامتها كانت اكبر من لعب بالعرايس والتنطيط  بس  كانت طبيعية وبتتعامل مع الناس من غير خوف وبعدين اتغيرت فجأة  بقت ساكته وبتخاف من التجمعات ولأن هي اصلا خجولة محدش استغرب في البداية لغيت ما بدء الموضوع يزيد عن حده وبقت تخاف مننا احنا وتعبد 

_ يمكن في حاجه حصلتلها وهي مش عاوزه تقول 

_ مظنش  محصلش ان حد مثلا اتعرضلها او حاول يخطفها هي كانت نايمة صحت تاني يوم وهي كدة 

_ طيب ومحدش فكر يعرضها علي دكتور نفساني

_ عرضوها بس هي كانت تخاف منه ومكنتش تتكلم 

سكتت شويه تفكر وبعدين قالت 

_ علي فكره انا متأكدة ان في حاجه حصلت وكانت السبب في الحالة اللي هي فيها  اصلا مش معقول تتغير بين يوم وليلة

_ لا معقول انا بقولك انها كانت خجولة وتقيلة يمكن الخجل والتقل دول تطوروا 

_ يا شيخه لدرجة يعني اكيد لا 

_ مش عارفه  ،  ماما بتقول يمكن محسودو او ملبوسة 

_ يمكن ليه لأ  ،  بقولك ايه ما تعرفيني عليها 

_ ههههه ده انتي مهتمة قوي بحالتها 

_ جداً  عرفيني عليها بليييز

_   هي اصلا مش هتوافق تتكلم معاكي اخرها تسلم عليكي وهي ماسكه في حد 

_ ماشي بس انتي عرفيني عليها وانا هعرف ازاي اتكلم معاها 

_ اوكي في يوم هظبطلك مقابله معاها بس يارب اقدر  

_ مستنيه علي احر من الجمر 

_ هههههههههه هتجنني.. ايه ده   هشوف بيجاد 

سيبتها وطلعت اجري علي بيجاد اللي واقف قدام مجموعة من البنات المنتقبات وبيتكلموا معاه و واضح ان في مشادة بينهم  ف قربت منهم وسمعت واحدة بتقول 

_ مش ذنب النقاب ان بنت سيئه لبسته عشان تداري علي غلطها حضرتك كده بتظلمنا وتضيع مستقبلنا 

_ يا انسه انا مليش دعوه  وانا معترضتش علي وجودك انا مالي بيكم  البسوا ان شاءلله  بطاطين دوشني ليه 

قربت منهم وقولت

_ يا انسه انتي من فضلك متبقيش ترددي كلام زي البغبغان  ،انتي سمعتيه بودنك بيتكلم عليكم؟ 

_ كلنا عرفنا انه طرد زميلة لينا ومانعها تحضر  وكمان مقوم الدكاتره عليها علشان منتقبة وشوفت بغضه وكرهه في نظراته لينا  ف اكيد الكلام ده حقيقي مش لازم نسمع بودانا 

_ لا مش حقيقي ولو حقيقي هو مش عاوزكم في الكلية كان قادر يعملكم مشكلة  مش يتكلم عنكم والكلام الفارغ ده  فكروا بعقولكم  

بصيت لبيجاد اللي متنحلي وقولت بهمس

_ أيه 

رد عليه بخفوت

_ ايه انتي يا جمال يا عبدالناصر بتخطبي ليه  انتي ايه حشرك اما شي بارد

قولت بنرفزه

_ انا شيء بارد!!!!...  طييييب اتفحم وسطهم  ، يا بنات  حقيقي الكلام اللي بيتقال هو اصلا منضم لمجموعة من عباد الشيطان اناشوفته   

_ انا عبدتك يابنتي

_ قصدك انا شيطان 

_ لا مقدرش اقول كده   ، الشيطان ياخد علي خاطره 

قال كده ومشي ف مشيت وراه وانا بقول بنرفزه 

_ ده جزائي اني خرجتك من مشكله يا دكتور حشو علي متفرج بدكتور حقيقي  

_ هاجر هسحب منك الكارنيه لو ملمتيش نفسك 

_ وانا هقول لبابا يسقطك 

_ ابو الرزاله بت حلي عن دماغي 

كمل وهو بيبص لمجموعة  واقفين وبيبصوله بكره 

_ يا ساتر يارب  هو في ايه  ،  الناس اتجننت ولا ايه 

_ شوفت مكروه ازاي 

_ انتي هتسكوتي ولا لا 

قال كده ورجع يبصلهم بابتسامه ف قولت 

_ انت  بتعمل 

_ بحرق دمهم  ،  مجربتيش انتي المتعه اللي بحسها وانا ببتسم لناس اللي بتكرهني  ،  جربيها هتعجبكم 

_ هههههههههه بجربها وفعلا احساس جميل  

_ ربنا يديمه علينا  ،  طالعين زي الكبير  سمعت ان هو وجدوده مكنوش يردوا بلسانهم وكانوا بيخلصوا حوار او وقفه زي دي برصاصة ودماغهم كانت اخر روقان  ولا يعصبوا نفسهم ولا الهوي ، الله يرحمه بقا هو واجداده

_ عايش 

_ مين

_ جدك 

_ والله سمعتها كتير بس عقلي رافض يصدق مش عارفه ليه

_ وانا  

وقف فجأة وقال بذهول

_ اوووبس

_ ايه مالك 

_ يعني انتي ممكن تورثي منه الحتة دي واشوفك كتير

_ لا ان شاءلله متشوفنيش وتموت في عز شبابك 

_ وحياة امك

_ وحيات امك انت ما تكرر الكلمه دي تاني لا اقول لبابا وابقي وريني رسالتك هتخلص امتي 

زم شفايفه وضيق عينيه ف قولت برفعة حاجب

_ مفهوم ولا اخليك تعتذر 

بصلي من فوقي لتحتي وقال

_ انتي عارفه يا هاجر اني لو قتلتك ودفنتك في شبرين محدش هيحس بحاجه 

تراجعت خطوتين وقولت

_ نمشي 

_ ايوه كده اظبطي لا اظبطك 

مشينا وطول الطريق وهو بيبتسم للي بيكرهوه ف قولت 

_ وحيات ما يخليلك اهلك عدي يومك علي خير مش شايفهم بيبصولنا ازاي   ، انا قلبي مقبوض من الصبح 

_ وده منين

_ معرفش اهو قلقانه وخلاص 

_ لا انا بتكلم علي القلب

_ هاهاهاها هموووووت مش كده  خف  خفة دمك دي  ده انت لتييييف

_ وزرييييف

_ وسائيييييييل 

_ اخرررررسي 

 طلعنا العربيه وبعد مسافة لقينا تلاته راكبين موتسيكل بيطلعوا قدامنا  فجأة ونظرات الشر في  عينيهم ف بصلي بيجاد وقالي وهو بيبلع ريقة 

_ قولتي قلبك مقبوض

قولت بعبس 

_ اااه مقبوض  ،  انت وقفت ليه 

_ مش بمزاجي انا اتحطيت قدام الامر الواقع 

_ توقع عليك عمارة بخمسين دور ارجع بالعربيه هنطحن 

_ ودي تيجي ده انا حفيد رضوان العربي... الله يرحمه 

_ عايش

بصلي بتفاجيء وقال 

_ طيب احلفي

_ اقسم بالله  

_ اه ماهي ناقصه هبل وده وقته  اسكوتي  ،   لو حصل ايه متطلعيش من العربية وصوتي الستات بتنفع في الحالات دي  صوووتي ها

_ لا لا لا مش هتنزل لاااا

قال وهو بيفتح العربيه 

_ اااخرسي  ، بوومه انا ايه خلاني اخدك معايا  

نزل من العربية وبدء يرفع اكمامه وهو بيتقدم نحيتهم  في الوقت اللي هما بدؤ يحاصروه من كل جانب  ف خرجت تليفوني من شنطتي واتصلت علي بابا لقيت تليفونه مقفول  وبعد بابا اول حد جه علي بالي هو بشر اتصلت بيه وانا ناسيه التحدي اللي عملته بأني مكلمهوش وكنت متوقعه انه يرد عليه فوراً بعد ما غيبت عنه لأيام  ،  ولكن رنيت مره واتنين وتلاته وخمسة وهو كل مره يقفل من غير ما يهتم  وبين احساسي بالخزلان من ناحيته وخوفي وانا شايفه التلاته بيحاوطوا بيجاد وبيشتبكوا معاه  كنت هتجنن والدنيا كلها ضاقت في وشي خلتني مش عارفه  افكر وبعد ما يأست من ردة  طلعت من العربية وانا بصوت واستنجد بناس وبعدها شيء الاهي خلاني افتكر عمي بدر واتصل بيه وقولت من اول ما فتح

_  عمي بدر ،  الحقني !!! 

_ في ايه يا هاجر  

قولت بصوت اقرب لصراخ

_ بلطجيه وقفونا في الطريق ومسكين بيجاد بيضربوه الحقني ونبي  هيموتوه

_ انتي فين!!! 

_ معرفش  معرفش  ،  استني هبعتلك لوكيشن  

قفلت وبعتله الموقع وبعدين رميت التليفون جوه العربية وجريت عليهم وهما ماسكينه اتنين مكتفينه بأيديهم والتالت بيضرب فيه  ف مسكت دراع اللي بيضربه وشديته ومسكت فيه بسناني وعضيته بكل عزمي ف زقني وهو بيصرخ من الوجع وبعدين  مسك شعري من تحت الطرحة  وضربني قلم بكل قوته وقعني ودماغي اتخبطت في الرصيف اتفتحت وبقيت شايفة الدم سايل علي وشي 

#بيجاد  

بعد ما كنت فقدت قدرتي علي الدفاع عن  نفسي وقدروا عليه دمي غلي في عروقي وانا شايفه بيضربها ودماغها اتفتحت بسببه  وبالعافية قدرت اجمع  قوتي وشديت ايديه منهم وحطيتهم خلف دماغهم وخبطتهم في بعض وهجمت علي التاني مسكت فيه وبقيت اسدد ليه ضربات قويه في وشه وانا بسب وبلعن فيه  وفجاة  جت خبطة شديدة فوق دماغي دوختني و وقعت وبعد لحظات من الجهد علشان اقدر اقوم  بصيت ورايا لقيتهم بيهربوا بالموتسيكل ف جاهدت لغيت ما قدرت اقوم وروحت ناحية هاجر بخطوات تقيله قعدت جمبها وقولت وانا برفعها علي دراعي

_ هاجر

رفعت جفونها بصعوبه وقالت

_ دماغي اتفتح  ، انا هموت يا بيجاد  ،  انت نبرت فيها من شوية 

_ لا مش هتموتي عمرك طويل  ، قومي هنروح المستشفي

 

#بشر 

كنت مع عمي لما وصله اتصال منها وقالتله انه في  بلطجيه اتهجموا عليهم وانا قبلها بثواني كنت بقفل عليها علشان مش عايز اقربلها تاني  ، كنت بختصرها بكل الأشكال  ومكنتش اعرف ان هي  بتستنجد بيه وانا منجدتهاش ولما روحنا الموقع  وملقنهمش رجعت اتصل بيها وانا كلي قلق وخوف  وبعد لحظات  بيجاد هو اللي رد وقال  ان دماغها اتفتحت وبعد ما قفلت معاه رجعت اسوق ف قال ابوي

_ ايه اللي حصلهم

قولت بتوتر 

_ هاجر اتضربت 

مكتفوش بالرد ده  واستمرو في  طرح الاسئله   ،  ليه  ،  مين  ، وفين  ولكني مردتش علي اسألتهم ولا اتكلمت لغيت ما وصلنا وهناك سيبتهم ونزلت من العربيه ودخلت بسرعه سألت في الاستقبال عنهم وقالولي اوضة الدكتور اللي هما فيها ف روحت وفتحت الباب  لقيتها نايمة علي سرير الكشف الدكتور بينهي ربط دماغها والمحاليل معلقة في دراعها وشكلها مجهد وتعبان ولما شافتني اتقابلت عينينا للحظات قبل ما تتحول تعابيرها للحزن وتدير وشها عني ف قولت بعد ما جمعت حروفي بصعوبه 

_ عاملة ايه يا دكتور 

بصلي وقال 

_ كويسه خيطنالها الجرح وربطناه اهو وبقت تمام  قوي 

سكت وانا لسة عيني عليها ف قال بيجاد 

_ خبطه بسيطه 

وجهت نظري ليه لقيت الكدمات ماليه وشه وهدومه متبهدله ف قولت 

_ ضربوك انت كمان  

_ ايوه 

_ مين دول وعملوا معاكم كده ليه 

_ معرفش 

_ ضربوكم من الباب لطاق كدة يعني 

_ مش عارف انا اول مرة اشوفهم

_ طيب احنا لازم نبلغ والعيال دي تجاب وتتحاسب

_ نبلغ عن مين انا معرفش حد فيهم  

في اللحظة دي دخل ابوي وعمي ف قال عمي هو بيوزع نظراته بينهم 

_   ايه ده  ، مين اللي عمل فيكم كده وليه 

_ معرفهمش ولا اعرف ليه  ، بس الحمدلله عدت علي خير  هاجر بس اتعورت في داماغها 

 قال ابوي 

_ ربنا يجازيهم ولاد الحرام  ،  ينفع اللي حصل للبت ده  

قال بيجاد 

_ الحمدلله انها جت علي قد كده 

_ الحمدلله  ،  عامله اية يا هاجر 

بصتلي بصه سريعة بعتب ورجعت تبص لابوي وقالت 

_ كويسه ياعمي حاجة بسيطة  وربنا ستر 

كملت بعد ما بصتلي 

_ ربنا هو الحامي 

#هاجر  

كنت زعلانه قوي منه انه مهتمش بإتصلاتي ولا قلق من كترها  وقولت ان عمري ما هكلمه بس بعد ما جه وشوفت القلق في نظراته اللي مبعدهاش عني لحظة حتي واحنا في العربيه وهو واخدنا انا وعمي عبيده علي البيت هديت شوية من ناحيته وخف زعلي   ، وبعد ما وصلنا وطلعوني الشقة  قال عمي 

_ ارتاحي وانا هبعتلك خلود و ورد يكونوا معاكي  وبلاش تكلمي امك او ابوكي استني لما يجوا بلاش تقلقيهم 

_ حاضر 

_ تحضري   ،  يلا يا بشر

_ لا لا خليه يكون جم عشان خايفة بسبب اللي حصل 

_ طيب  

مشي وساب الباب مفتوح ف رجعت ابص لبشر  بعتب ولوم في الوقت اللي عينه كانت عليه مشلهاش  لحظة وقولت 

_ مكنش ده العشم طيب كنت رد شوفني يمكن بموت 

لمحت الدموع بتتجمع في عينه وهو لسة ساكت ف قولت 

_ إيه ده  ،  انت زعلان 

كملت وانا بقرب منه خطوه

_ انا اسفه والله مش قصدي ازعلك انا بس عشمت فيك  اسفه خلاص متزعلش  

سقطت دمعته ف دار وشه عني قربت منه خطوه كمان وقولت وانا بحط ايدي علي خده وارجعه ليه 

_ بشر مالك  ، انا اسفه  والله 

مسك يدي  وقال بصوت متحشرج 

_ انا اللي اسف  ،  اسف قوي مكنتش اعرف انك ممكن تكوني واقعه في مشكله  ،  اسف 

قولت بإبتسامة 

_ خلاص محصلش حاجه  ،  ههههه والله انت طيب قوي  بدل ما انا اللي ازعل زعلت انت ،  بس خلاص متزعلش انا اهو كويسة والحمدلله انها جت علي قد كده مين عارف كان ممكن يحصل ايه اكتر 

كمل بنفس النبرة وهو بيضم ايدي 

_ لو كان حصلك حاجة مكنتش هسامح نفسي طول عمري 

_ انت ملكش ذنب  وحتي لو كنت رديت مكنتش هتلحقني  ،  انا عشمت فيك شويه بس انا عارفه ان ظروفك ملخبطه بسبب مشكله بدر وبسبب الشغل والبنت اياها 

طالت نظرته لعنيه ودموعه منشفتش ف رفعت ايدي بعد تردد ومسحت خده منها ونزلتها بسرعة ف اتحسس اثرها وقال 

_ مين فينا اللي يمسح دموع التاني 

_ اللي يمسح بقا متدققش  ،  انا اسفة  ، متزعلش بقا 

_ ا.... 

 قولت بترقب

_ قول

_ اقول ايه 

_ انت عاوز تقول حاجة 

_ اه  ، كنت عاوز اقول ألف سلامة عليكي  

_ اه  ، الله يسلمك  يا بشر  ،  وتسلملي مكنتش اعرف انك بتعزني قوي كده  

_ عمري ما عزيت حد قدك 

رديت بإبتسامة ف حط ايده  مكان التعويره وقال 

_ اتعورتي جامد؟ 

_ شويه  

استمر في لمس دماغي وانا بصاله وشايفة اهتمامه وحنيته عليه وبعد لحظات رجع يبصلي وعيني جت في عينه وقال 

_والله ما اعرف هما مين ما اسيب فيهم حته سليمه علي العمله دي 

ابتسمت ابتسامه خفيفه من غير رد واستمرت نظرته لعنيه نظرات كلها خوف واعتذار عن اللي حصل  لقيت نفسي بنجذب لنظر ليه في حاجه بتشدني ليه وبتاخدني من كل حاجه ليه هو وبتعزلني عن كل حاجه  حوليه ومكنتش حاسه غير بأيدة بتنزل وتلامس خدي بلطف  وبعد وقت معرفش كان قد اية وانا علي نفس الحاله لقيته بيرمش بعنيه وينزل ايده وجفونة وايد بتلمس كتفي وصوت خلود بيقولي 

_ هاجر حبيبتي  سلامتك 

انتفضت بعد ما صوتها فوقني من الحالة اللي كنت فيها وبصيت جمبي لقيتها  ماسكه في دراعي ولما رجعت ابصله لقيته ماشي تبعته بعنيه لغيت مامشي وقفل وراه وانا لسة تايهه ومتأثر بنظراته ومش منتبه ل خلود اللي بتكلمني  لوقت كبير  لغيت ما قالت وهي بتهزني

_ هيييييي  هاجر انتي سمعاني

_ هه  ،  ايوه سمعاكي  

كملت بعد ما رجعت ابص للباب

_ تصدقي بشر طيب  انا متاكده اني لو كان معايا اخ مش هيكون كده   ،  يا حرام زعل قوي من نفسه عشاني  

كملت بابتسامة 

_ يارب افرح بيك قريب يا بشر  يارب توافق تجوز بقا 

« في المساء» 

#جويريه 

دخلت عليه ماما تقولي 

_ جويريه قومي غيري علشان هنطلع نطمن علي هاجر بنت عمك

_ ليه 

_ بلطجيه ضربوها في دماغها هي وبيجاد 

ارتجف جسمي من الخوف ف قولت 

_ ضـ....ضربوها 

_ ايوه بس ضربه صغيره مش كبيرة 

كملت بقلق

_ وبيجاد 

_  اتضرب شويه بس كويس 

_ هو فين  

_ في اوضته 

سيبتها وطلعت اجري عليه وفتحت الباب من غير ما اخبط لقيته باصص للمرايا وبيتحسس الكدمات اللي في وشه ولما شافني التف ليه ف جريت عليه واترميت في حضنه ف قال وهو بيضمني 

_ حبيبتي متخافيش انا كويس 

كمل وهو بيبعدني عنه 

_ اخوكي بطل محدش يقدر عليه 

نزلت دموعي ف قال بإبتسامة 

_ كنتي خايفه اموت 

_ لا 

_ مكنتش خايفه اموت 

_ لا 

_ اخس عليكي 

_ انت مخوفتش؟ 

_ اخاف من إيه 

_ لما ضربوك 

_ لا مخوفتش  ، ايوه طحنوني بس قدرت انفد منهم 

_ اه

_ متخافيش اخوكي قدها 

سكت ورجعت بتفكيري في اللي حصل زمان ف قال 

_ سرحتي في ايه 

_ مفيش 

قولت كده ف لقيت ماما بتدخل عليه وتقولي 

_ انتي لسه عندك  يلا عشان نروح عيب لما نتأخر كل ده 

قولت بعبس

_ مش عاوزه اروح 

_ لا لازم تروحي متخافيش انا معاكي

متكلمتش تاني ورجعت اوضتي غيرت وبعدين طلعنا وروحنا فوق لقينا باب الشقة مفتوح وعمامي وبابا وطنط جميله وطنط ورد هناك  مسكت في دراع ماما ف قالت وهي بتمسك ايدي

_ متخافيش مفيش حاجه هتحصل يلا 

خدتني من ايدي وخلتني اسلم عليهم كلهم وبعدين قالت طنط جميله 

_جوووويريه  ، ده انا لو اعرف ان ضرب هاجر هيخليكي تيجي كنت ضربتها من زمان  

ضحكوا كلهم وفجاة مسكت ايدي وقالت

_ تعالي سلمي عليها هي وصحابها 

مسكت في ماما وقولت بتوتر 

_ لا مش عاوزه 

_ تعالي بس متخافيش دول كلهم بنات وقدك كمان 

بصيت لماما وانا لسه ماسكه فيها ف قالت وهي بتفلت ايدي  

_ روحي متخافيش من حاجه  ، روحي حبيبتي 

مردتش وروحت معاها وانا متوتره جداً وخايفه ولما دخلت لقيت هاجر قاعده علي السرير وتلات بنات قاعدين علي الكنبة ومنهم واحده اول ما شافتني وقفت وقالت 

_ جويريه مش كده 

قالت هاجر 

_ ايوه يا ستي هي دي جويريه  ،  ودي بقا مليكة هتموت وتتعرف عليكي يا جويريه  

 اتقدمت ناحيتي  وقالت 

_ ازيك  انا اسمي مليكة كان نفسي اتعرف عليكي من كلام هاجر عنك  و وصفها لجمالك وهدؤئك بس الصراحه معرفتش توصفك كويس طلعتي اجمل بكتير

رجعت خطوه وقولت وانا بوزع نظراتي بينهم 

_ شكرا 

قالت مرات عمي 

_ متخافيش حبيبتي  تعالي اقعدي 

مسكت مليكة في دراعي وقالت 

_ لا مش هتقعد  تعالي هنطلع في البلكونة المكان هنا يخنق 

شديت ايدي ف اتمسكت بيها اكتر وقالت بإبتسامة 

_ متخافيش، تعالي عاوزه اقولك حاجه مهمه 

رجعت ابص لمرات عمي وانا حاسه نفسي هبكي من كتر التوتر وضيقت النفس ف قالت 

_ روحي حبيبتي متخافيش كلنا جمبك 

روحت معاها او بمعني اصح هي اللي خدتني وطلعت بيه البلكونة  وقالت بعد ما سابت ايدي 

_ انا عارفه اني رزله شويه بس طيبة والله   وعملت كده علشان حسيتك مش مرتاحه في الزحمة زيي 

_ اه

_ عندك كام سنة بقا 

قولت بتوتر

_ عشرين 

_ انا اكبر منك بكام شهر  

_ اه 

_ انتي مبتروحيش الكليه صح

_ لا

_ وصلتي لفين في التعليم 

قولت وانا حاسه نفسي بيضيق

_ اعدادي 

_ انا اسفه حبيبتي خلاص اهدي  يلا نرجع  ،  انا بس كنت حابه اتعرف عليكي  ،  تعالي 

خدتني ورجعنا عندهم قعدت معاهم دقايق وبعدين سيبتهم ومشيت ملقتش لا ماما ولا عمامي موجودين ف طلعت اجري بره البيت وبعد كام سلمة اتفاجئت ب بدر في وشي وكنت هخبط فيه بس هو لحقني وسندني بايديه ف بعدت ايده وكنت همشي  ولكنه وقف في طريقي وقال  

_ استني 

وقفت قدامه متوتره جداً ف قال 

_ مش هتسلمي عليه  

_ لا 

_ ليه انتي زعلانه مني

_ بيجاد قالي مكلمكش 

رد بضحك وهو بيحك حاجبه

_ اممم ههههه وقالي انا كمان  

كمل بإبتسامة 

_ بس فترة كدة ومش هيقدر يمنعنا نقعد ولا نتكلم مع بعض 

مردتش ف قالي 

_ عاوزه تعرفي ازاي 

_ ازاي 

_ هخطبك 

_ انا مش هتجوز 

_ انا قولت هخطبك مش هتجوزك  ،  هخطبك علشان نكون صحاب  

سكت ف قال 

_ خطوبه بس 

_ انا عاوزه اروح 

_ استني بس 

_ ايه 

_ لو وافقتي هتكسبي صديق يفهمك ويشاركك كل حاجة بتحبيها ومش هتندمي 

قولت بتوتر

_ عاوزة اروح  وسع 

_ ماشي ماشي متضايقيش  اتفضلي 

قال كده وبعد عن طريقي ف نزلت اجري وبعد كام سلمة وقفني وهو بيقول 

_ جويريه 

وقفت من غير ما ابصله ف قال 

_ قريت القصة بتاعتك شدتني اكتر من الفيلم 

رجعت بصتله ف قال 

_ ولسه عند رأيي فيكي كتير من هايزل 

قولت بتوتر بعد ما استجمعت نفسي 

_ انا مش شايفه كده ومش بقراها عشان هايزل تشبهني

_ بس انا شايف انها شبهك مع اختلاف الظروف

مردتش ف قال 

_  بس الفرق بينكم ان سرد القصه علي لسانها وسمعت او شوفت كلامها و وصفها لشعورها  اللي وصلني ،  عارفه لو اعتمدت الحوار بس مكنتش فهمتها  ،  ياريت اسمع سرد قصتك بلسانك انتي 

_ تسمعها ليه  ،  لو بتفكر تكون اغسطس وتساعدني اخرج من الحالة دي  ف نهايتك هتكون الموت 

_ معنديش مشكله المهم اخد مكان في حياتك 

مردتش عليه ومشيت وانا بفتكر قصة هايزل  ،  وافتكرت اغسطس الطف انسان قابلته واي ان كانت الطريقة ف مفيش حد ازاها قده  لما علقها بيه وبعدين مات وسابها 

#خلود 

كنت قاعده في اوضة هاجر بالليل  بتابع التفاعل وبرد علي الرسائل  واقلب في الانستجرام والفيس بوك وصفحات الأكل والزرع لغيت ما لقيت حد عارض صور لخمسة من اصيص الورد منبت جديد  وبيسأل يهتم بيه ازاي ف حفظت الصورة وفتحت الشات بتاع زيد من صفحة اسيل وبعتهاله من غير ما اكتب حاجة وبعد دقيقة بالكتير بعتلي رساله بيقولي فيها 

_ مبروك  

_ الله يبارك في حضرتك  ، اسفه اني دوشاك معايا بس كنت مبسوطه اني اشتريت الاصيص دول وبعتهم لكل اللي اعرفهم 

_ ولا دوشه ولا حاجه  ابعتي انتي اي تطورات بس كل ده بيخليني احس اني نجحت في علاجك مع انك كويسه لوحدك 

_ متشكره قوي  

_  طيب ايه بقا نوع الورد ده 

جااالك الموت يا تارك الصلاة  لقد وقعنا في الفخ  ده اللي قولته لنفسي لما سألني السؤال دة وبعد تفكير سريع قولت 

_  لڤندر وريحان 

_ بس 

_ اه ماهو ده اللي متوفر معايا دلوقتي  

_ حلوين جداً  ، انا بعشق ريحة الاڤندر والريحان كمان بيريحوا النفسية 

_ انا مشوفتش غير الريحان لسه الاڤندر مش عارفه ظروفه 

_ اوكي مستني صوره ليهم لما يكبروا 

_ ااه طبعاً  

اول مره اندم اني كلمته ومش عارفه  ايه السبب اللي خلاني اكدب وليه بوصله فكرة غلط عني وبعد ما اتخنقت من اللي عملته قفلت معاه وبصيت ل لهاجر اللي بتراسل حد وقولت 

_ بتعملي ايه 

_ ببعت لبشر

_ وهو بشر بيكون صاحي في الوقت ده  ده بيدخل اوضته من العشا

_ لا بيسهر بس بيحب يقعد لوحده 

_ يمكن  

#بشر 

كان الوقت متأخر وخوفت تكون نامت وعشان كده مقدرتش اتصل بس بعتلها رساله وقولت لو فاتحه هترد وردت فعلاً 

_ الحمدلله احسن شويه 

_ ده انا قولت انك نمتي 

_مش عارفه انام

_  تعبانه ولا في سبب تاني 

_ دماغي بتلق وفي سبب تاني اه

_ ايه هو 

_ انت 

_ انا 

_ اه كنت عاوزه اكلمك اطمن عليك واشوفك هديت ولا لسه زعلان من نفسك 

_ طيب ومبعتيش ليه

_ حبيت اشوف هتفتكر تسأل عني ولا هتستندل 

_ استندل ليه  ،  كنت عايز اتصل من بدري بس خوفت تكوني نايمه وازعجك

_ ايه الادب ده  لا ازعجني في اي وقت  

_ يعني ايه  ايه الادب ده  شيفاني قليل الادب 

_ ههههه كلام بجد انا عمري ما شوفت في ادبك 

_ ما ده اللي مضيعنا مع واحده زيك 

_ ههههه محدش قالك تعودني عليك  

كتبت بعد ما ظهرت ابتسامتي 

_ لا اتعودي  ،  عمك ولازم استحملك

_ اجمل عم والله  ،  عارف 

_ ايه 

_ لما شوفتك زعلان من نفسك وشوفت خوفك عليه قولت لو كان ليه اخ مكنش هيخاف عليه كدة 

_ اه امال ايه يابنتي عمك انا ولا مش عمك

_ ههههه عمي  ، متشكره قوي

_ العفوا يا ستي 

_ طيب فين 

_ فين إيه 

_ حلاوة الصلح

_ انتي استغلاليه علي فكره 

_ ههههه عارفة فين بقا 

_ عاوزه ايه 

_ مش عارفه انت ممكن تفاجئني 

_   طيب سيبيني افكر واشوف 

_ ماشي  هستنا اوعي تنسي 

_ مش هنسا ومتقلقيش لو اتأخرت شوية 

_ ماشي 

_ طيب هتنامي ولا صاحيه 

_ انت هتنام ولا صاحي 

_ مانتي عارفه مبنمش بدري كده 

_ تمام يبقا لسه شويه  

رجعت ابتسامتي تجدد وانا برد 

_ صاحيه علشان تتكلمي معايا يعني  

_ ايوه فرصة مش هضيعها مش بدل ما تيجي الصبح تقولي مشغول 

_ مش هنشغل تاني  تقدري تكلميني في اي وقت  

_ ميررسي... عارف 

_ إيه 

_ كنت متضايقة قوي الأيام اللي فاتت علشان انت كنت بتتعوج عليه 

_ مش عوجه  انا بس كنت مشغول وانتي عارفه اللي بيحصل 

_ وانا مالي باللي بيحصل  ماهو انت متعودنيش علي اهتمامك زي ما تكون اب ليه وبعدين تختفي 

رديت بإبتسامة 

_ اخر مره هختفي 

_ هههههه ماشي  هبعتلك فيديو يضحك  حلاوة رجوعك بالسلامة 

_ ابعتي  

بعتتلي فيديو قمة السخافة بس لانه منها ضحكت وبقيت اتكلم معاها لساعة تقريبا ومكنتش عاوز اقفل لغيت ما شحن التليفون تقريبا خلص  ف قولتلها تصبحي علي خير وقفلت وبقيت لساعات بفكر ايه اللي ممكن اجيبهولها يفرحها ومكنتش لاقي فكرة 

                    الفصل السابع من هنا

لقراءة باقي الفصول الجزء الثاني من هنا

لقراءة الجزء الاول جميع الفصول الفصول من هنا 

تعديل المقال