رواية مكتوبة علي اسمي كامله بقلم ملك ابراهيم ) جميع الفصول مكتملة حتي الاخير الخاتمه

رواية ذئاب لا تعرف الحب 

الجزء الثاني2الفصل الثاني2

بقلم نجمه براقه

وفاء 

جه بدر عشان نروح المشوار اللي اتفقنا عليه وننفذ الخطة اللي مجهزها  وهي اننا نسيب جويريه لوحدها في مواجهة الشباب اللي المفروض انهم يخطفوها ك محاولة مننا اننا نخليها تواجه خوفها يمكن بعد كده تكون اشجع وتخرج من اللي هي فيه  و خدناها وطلعنا وقبل ما نوصل لنقطة اللي اتفقنا عليها جاني اتصال من المستشفي اللي شغاله فيها كانوا طالبيني اروح ضروري ف قولت ل بدر 

_ انا لازم اروح المستشفي حالا  ،  خد جويريه وارجعوا البيت ونبقوا نروح المشوار ده في يوم تاني 

_ ليه ما انا ممكن اعمله 

_ لا يا بدر  اوعي  انا هروح معاكم بس في يوم تاني  ،  رجعها لو سمحت 

_ حاضر 

جيت انزل ف قالي 

_ لا لا خليكي كملي المشوار بالعربية واحنا هنرجع مشي المسافة قريبه

_ طيب يا حبيبي  كويس بردو علشان الحق اوصل اسرع  

#بدر

نزلنا انا وجويريه وهي مشيت  ف قولت لنفسي اني هكمل اللي جاي عشانه  ولما جت ترجع وقفتها وقولت

_ رايحه فين 

_ مروحه

_ طيب ما تيجي نتمشي شوية وبعدين نروح 

_ لأ عاوزه اروح 

_ هنروح بس نتمشي شوية 

صوتها اتخنق وهي بتقولي 

_ عاوزه اروح دلوقتي 

_ طيب ماشي هنروح بس ممكن تيجي معايا السوبر ماركت اللي هناك ده هجيب حاجه ونمشي 

_ هستناك هنا 

_ تستنيني فين  ، تعالي دقيقة وهنرجع يلا متخافيش انا معاكي 

_ اها 

مشينا مع بعض لغيت السوبر ماركت وفي الطريق بعت رساله لشباب قولتلهم مكاني  علشان يلحقونا من هناك بدل ما نتوه من بعض  وبعدها دخلنا الماركت وسط الزحمة ولما بصيت عليها لقيتها بتبص لناس بخوف وبتقرب مني ف وقفت وقولت وانا بمسك دراعها

_ متخافيش انا معاكي 

مسكت فيه وقالت 

_ روحني 

شديت علي ايدها وقولت

_ حاضر هنروح بس تعالي هنجيب حاجة ونمشي تعالي متخافيش 

كلبشت في دراعي ومشينا لغيت مكان الحلويات ف مسكت كيس شيكولاته وقولت بعد ما التفيت ليها بكل جسمي وبقت قدامي وكل اللي يفصلنا نص خطوه

_ خدي 

 خدتها وقالت بتوتر وهي بتبص حوليها 

_ عاوزه اروح 

_ طيب هجيب اللي انا عاوزه ونمشي 

_ انت عايز ايه 

_ هايلتر 

وسعت عينيها وهي بترجع تبصلي وتقول 

_ هتنفذ طلب صحابك 

_ اه طبعاً ده تحدي 

نزلت جفونها ومعلقتش علي الموضوع تاني ف قولت 

_ بس المشكلة مش عارف احطه ازاي  ،  بيحطوه ازاي 

اشرت علي خدها ومناخيرها  ف قولت 

_ اااه ده البتاع اللي بيكون منور في الوش

هزت دماغها ف قولت 

_ طيب والله فكره حلوه انا هحطه في وشه كله واللي يسألني وشك منور ليه هقوله من شدة الايمان 

ضحكت ضحكة خفيفة وبعدين بصتلي وقالت 

_ هيبان انه هايلتر 

_ لا ما انا هعمل دبلنج بينه وبين الفونديشن البودر 

عقدت حواجبها وقالت

_ أيه 

_ عشان ميبنش 

_ اه

ابتسمت لبرائتها الزايدة وقولت

_ عارفة 

بصتلي ف قولت 

_ بحسك لسه طفلة 

نزلت جفونها ومردتش وبعد ثواني جم مجموعه من الناس ياخدو حاجات من نفس القسم اللي احنا فيه ف رجعت خطوات للخلف وهي لسه ماسكة في دراعي وموقفتش غير لما اصتدمت بارفف الشيكولاتة وهنا بقت بيني وبينه محاصرها بكل جسمي وشايف نظراتها لناس وخوفها منهم ولما شديت علي ايدها علشان تطمن رفعت جفونها وبصتلي وقالت بخوف وصوت واطي 

_ عاوزه اروح 

بقيت باصص لعنيها ومردتش ف قالت عاقده حواجبها 

_ بدر 

_ إيه 

_ عاوزه اروح 

_ هنروح 

_ امتي

_ لما تهدي  علشان ميحسوش بخوفك ويضربونا  ،  اهدي 

سكتت وهي بصالي وطالت نظراتي ليها وانا مبيفصلنيش عنها حاجة وفجاة وانا تايهه وبنجذب ليها اكتر واكتر انتفضت لما اخترق ودني صوت ضرب رصاص وبعدها صوت زعيق وصراخ وقبل ما التفت لاي ناحية هي شبطت فيه ودارت وشها في حضني حطيت دراعي علي ضهرها وقولت وانا ببص حوليه وشايف مجموعة من الملثمين بينتشروا في المكان وبيقولوا كله يقعد علي الارض 

_ متخافيش  اقعدي 

قالت وهي بتبكي وكل جسمها بيرتعش من الرعب 

_ عاوزه اروح  

 نزلت بيها وقولت وانا بضمها بأيديه الاتنين 

_ اهدي  هنمشي  بس اهدي لو سمحتي 

قالت ببكاء 

_ عاوزه اروح دلوقتي  

حضنتها اكتر وقولت 

_ هنروح بس بطلي عياط  ،  ارجوكي اهدي  

كملت وانا بمسح علي دماغها 

_ مفيش حاجه هتحصلك انا معاكي  اهددددي  ، اهدي 

بطلت بكاء وزادت في الاختباء في حضني مداريه وشها فيه وانا ببص حولية وكلي خوف من ان يحصلها حاجه ومقدرش احميها ف تزيد عقدتها اكتر من الاول 

#جويريه 

كنت بموت من الرعب جسمي كله بيترعش وبزيد في الاختباء في حضن بدر اللي محاوطني بدرعاته وبعد وقت وانا سامعه زعيق الناس دول سمعت صوت سرينة البوليس وبعدها تعالت اصوات الناس وبعد لحظات سمعت صوت صراخ طفل و واحد بيقول 

_ لو حد دخل هنموته  ،  هنموتهم كلهم 

زاد خوفي وزيدت تمسك ب بدر وبعد لحظات من صراخ الطفل وزعيق الراجل وتحذير البوليس في الميكرفون حسيت ب بدر بيبعد عني ف مسكت فيه وقولت وانا ببكي 

_ متسبنيش 

_ جايلك تاني خليكي هنا اوعي تتحركي 

مسكت فيه أكتر وقولت 

_ لا لا  ونبي متسبنيش انا خايفه قوي 

مسك وشي بين ايديه وقال 

_ اهدي  ،  هرجعلك  ،  اهدددي  

قولت ببكاء 

_ هتروح فين 

_ جاي  ،  سيبيني بس  

فلت ايدي وقالي 

_ اوعي تتحركي من هنا 

سابني مرعوبه وبقا يمشي وهو مميل وبيتواري بالارفف عن عيون العصابه لغيت ما اختفي عن عيني وانا قعدت مكاني ضامه نفسي ومداريه وشي وجسمي بيتهز بشدة من كتر الخوفوبنتفض مع كل طلقة بتضرب واتخيل انهم هيمسكوني ويقتلوني  وفجاة سمعت صوت واحد بيصرخ بأسم بدر وبعدها اصوات البوليس بتنتشر ف كشفت وشي  وبصيت حوليه لقيت العساكر ماسكينهم وبيمشوا بيهم  ف قومت بسرعة وطلعت اجري زي المجنونة وانا  ببص هنا  وهناك لغيت ما وصلت عند باب الخروج وهناك لقيت كام واحد ساندين بدر  اللي واقف مكانه وبيشاور عليه ورصاصة مخترقة دراعه والدم  مالي قميصه ولما شفته بشكل ده ولقيت نفسي لوحدي وسط كل الناس دي رجليه عجزت عن الحركة وحسيت الدنيا بتلف بيه و وقعت بس كنت لسه حاسة بالدنيا شوية وبعد لحظات حسيت نفسي بتشال عن الأرض وحد بياخدني ويمشي بيه في احساس اشبه لأني طافيه فوق امواج بتحركني  وبعد وقت فوقت لقيت نفسي في عربية ومميله بدماغي علي كتف بدر اللي كان دمه لسه بيسيل وبيتألم وجفونه بتترفع بصعوبه شديدة وبيبصلي بجهد كبير ويقولي 

_ متخافيش  انتي كويسة 

قالها وغمض عينيه فاقد الوعي تماماً 

#بدر

كنت في الشغل مع عبيدة وبشر لما جاني اتصال من جويريه  وبتقولي بصوت مهزوز وخايف

_ بابا   الحقني ارجوك 

وقفت وقولت بقلق قدام نظرات عبيدة وبشر 

_ ايه يا جويريه 

قالت بنفس النبرة

_ بدر  ...  

_ ماله بدر 

_ اتضرب بالنار 

_ ايييه!!  انتوا فين! 

قال عبيدة 

_ في ايه يابدر  

_ استني  ..  انتوا فين يابتي

قالت ببكاء 

_ رايحين المستشفي اللي شغاله فيها ماما 

_ طيب طيب  

قفلت معاها روحنا كلنا واهناك لقينا تلاته  صحاب بدر و وفاء كانت جمبهم حاضنة جويريه  وقفنا عندها وقال عبيدة والقلق ماليه 

_ ولدي حصله إيه يا وفاء 

_ متخفش هو بخير 

قولت 

_ ايه اللي حصل  ومين ضربه 

جه واحد من صحابة وقال 

_ مجموعة من المجرمين اقتحموا سوبر ماركت كان فيه و ضربوه بالرصاص لما كان بيساعد ولد صغير كانوا هيقتلوه

#بشر

كلنا كنا هنتجنن عليه قبل ما يطلع الدكتور ويقولنا 

_ الحمدلله خرجنا الرصاصه وهو بخير اطمنوا 

قالت مرات عمي 

_ هو كويس يعني 

_ ايوه الحمدلله بس خسر دم كتير واحنا بننقله دم دلوقتي  شوية وتقدروا تشوفوه 

قال كده ومشي وبعد شوية دخلوا علينا خالتي وزيد وعمي شبل ومراته و كلهم وقفوا جمب عمي وابوي الا هاجر جت وقفت جمبي وقالت ودموعها ماليه عينيها 

_ بدر عامل ايه 

_ كويس  الدكتور طمنا وقالنا شويه ونقدر نشوفه

سندت ضهرها علي الحيط  وبقت تبكي ف قولت 

_ هو كويس مفيش داعي للعياط ده 

بصتلي وقالت ودموعها بتسيل علي خدها

_ لو بدر حصله حاجة هموت يا بشر 

مردتش وديرت وشي عنها وانا حاسس قلبي بيتقسم نصين بسبب كلمتها وخوفها عليه بالشكل ده  ،  معقول ولا مره حست بشعوري ناحيتها ولا انا اللي تقيل مش باين عليه  او هي اللي صغيرة لسة مش فاهمة حاجة 

#هاجر 

بعد ما هديت شوية خدت بالي من الكلمة اللي قولتها ل بشر  بس بعد ما بعد عني و وقف في ناحية تانية  ، بقيت بصاله ومش عارفه ازاي اصلح اللي قولته وبعد وقت وانا بصاله  وهو مبصليش ولا مره روحت وقفت عنده وقولت بخفوت 

_ بشر 

قال من غير ما يبصلي

_ اه

_ انا... 

بصلي بتلبد  ف قولت 

_ انا مش قصدي اللي فهمته 

_ فهمت ايه 

_  لما قولت لو حصله حاجه هموت  ، انا بتكلم علي انه اخويا يعني 

رجع بص قدامه وقال 

_ وايه المشكله 

_ مفيش بس خوفت تكون فهمتني غلط 

_ وحتي لو فهمت غلط فيها ايه يعني  ، متقلقيش انا يشرفني طبعاً تكوني مرات اخويا 

_ مفيش الكلام ده 

_ ولو فيه 

_ مفيش 

_ ولو فيه 

_ بقولك مفيش 

_ اها ماشي

سكتنا للحظات وبعدين بصلي وقال

_ طيب بالمناسبة وانا عارف انه مش وقته 

_ إيه 

_ تقصدي مين بالاستوري اللي دائما بتنزليها 

_ وانا بنزل ايه

_ اغاني  ،  صور رومانسية عن الحب من طرف واحد وكده يعني 

ديرت وشي عنه وطال السكوت بينا وانا بفكر في حاجه اقولها وبعدين بصيتله وقولت 

_ مقصدش حد دي حاجه بتعجبني ف بنزلها 

_ ايوه قولتيلي 

_ بقولك مقصدش حد 

_ ما انا عارف  ،  انا عارفك اكتر من نفسك  ده انا عمو ولا نسيتي 

قولت بابتسامة

_ اجمل عمو في الدنيا  ،  ايه رأيك واحد فينا يقطع ودنه واتجوزك 

_ وليه قطع الودن مينفعش تجوزيني بودنين

_ علشان تحللي ههههه 

ابتسم ابتسامة باهته وقال 

_ هتبقي خسارتين 

_ يعني ايه 

_ يعني لو حصل هيكون خسارة ودن وخسارة مخ علشان انتي اصلا صداع 

_ انت الخسران علي فكره 

_ اجمل خسارة  واسكوتي 

سكت وانا لسة بصاله وعلي وشي ابتسامة خفيفه ف اتنهد وقالي من غير ما يبصلي 

_ شايفك بصي بعيد 

_ ههههه طول عمرك قافشني 

ركز نظراته لعنيه وقال 

_ مش كده بردو  

_ كده 

طالت نظرته ليه بنفس النظرة اللي بتوترني وبتخليني مش قادره  ابصله  اكتر ف ابتسمت ابتسامه سريعة ومشيت من جمبة و وقفت جمب جويريه وكل ما عيني تروح عليه الاقيه واقف نفس الوقفه  ساند ضهره علي الحيط ومربع ايديه قدامه وساكت سكوت يحير ويزيد حيرة لما يبصلي..  

هو كده بشر غريب سكوته ونظراته تحير ومش مفهومين  ورغم كده انا بحبه هو اقرب حد ليه  اكمنه من صغري بيهتم بيه زي اخ كبير  ،  وهو فعلاً كده اخويا الكبير اللي ربنا عوضني بيه عن قلت الاخوات  والصديق الشاب اللي بيغنيني عن صحبية شباب من بره  ومش هبالغ لو قولت وكان ليه اب 

#زيد

محدش فاهمه قدي ولا حد ملاحظ حبة ليها قدي  ورغم كده متكلمتش لحساسية الموقف لاني عارف زي ماهو كمان عارف انها بتحب بدر  يعني من الصعب يتقدملها او يتجوزها ف كان الحل الاسلم هو السكوت  ولكن ده ممنعش اني اقف عنده واقوله وانا  بحط ايدي علي كتفه

_ مالك يا بشر  ، انت كويس 

_ الحمدلله  

_ طيب قلقان ليه 

_ يعني مش شايف الكل قلقان اشمعنا انا مش هقلق يعني 

مش بتقول الدكتور قال انه كويس 

_ ايوه 

_ طيب امال ايه مالك 

_ مفيش

_ واضح انك بتحبه قوي علشان تكون قلقان  قوي كدة 

قال بتنهيدة 

_ بحبه يا زيد  ،  بحبه 

سكت وبقيت مركز معاه وشايف الوجع في عينيه وهو بيبص ل هاجر الغبيه اللي ولا مره حست بشعوره تجاهها ولا بوجعه لما بيشوف اهتمامها ب بدر  وبعد شوية وهو  علي  نفس الحاله دخلنا ل بدر لقيناه مفتح وابتسامه خفيفه علي وشه ف جريت عليه خالتي وقالت بدموع 

_ حبيبي يا ولدي  ،  قلقتني عليك ياحبيبي 

ابتسم بتعب وقال 

_ انا كويس يا ماما 

قال ابوي وهو واقف علي الجهه التانيه 

_ خوفتنا عليك قوي يا بدر 

قال بإبتسامة 

_ كنت بختبر حبكم ليه 

قال عمي بدر 

_ واختبرت ياخوي  ،  ايه وداكم اهناك 

راحت عينيه ل وفاء مرات عمي ف قالت 

_ كنا رايحين كلنا مع بعض السوبر ماركت نشتري شوية حاجات بس انا اضطريت اسيبهم علشان اتصلوا بيه في المستشفي  

قال عمي

_ تشتروا من سوبر ماركت تاني واحنا عندنا سوبر ماركت  

توترت وهي بتقول 

_ ما احنا كنا رايحين ليكم بس اضطريت اقف في مكان قريب ف نزلوا و واضح ان بدر كان محتاج حاجه مهمة 

قال بدر

_ ايوه صح كنت محتاج حاجه مهمه والسوبر ماركت كان جمبنا ف دخلنا 

بعد ما خلصوا التحقيقات معاه و اطمنت انه كويس سيبتهم ورجعت البيت علشان كان في جلسة مع واحده علي الإنترنت ولما وصلت لقيت خلود جايه جري تستقبلني وتقولي بقلق 

_ استاذ بدر عامل ايه 

_ الحمدلله كويس 

_ بجد 

_ ايوه  وهيجي النهارده 

اتنفست براحه وقالت 

_ الحمدلله 

_ الحمدلله  ، امال فين دادة امينه 

_ راحتلكم من شوية مشوفتهاش 

_ لا 

_ يمكن مخدتش بالك منها 

_ يمكن  ،  طيب انا داخل ورايا شغل 

_ طيب 

مشيت خطوات ناحية الاوضه ف وقفت لما افتكرت زعلها مني ف رجعت وقولت 

_ خلود 

_ نعم 

قولت وانا برجعلها 

_ متزعليش من كلامي اللي قولتهولك امبارح  ،  انا كنت خايف عليكي 

_ ده مش خوف  ، بس انت ممكن تعتبرني اختك ومتحاولش تحبطني ويبقي شكر الله سعيك 

_ انا لو هعتبرك اختي بجد همنعك من اللي بتعمليه من اساسة بس انا مراعي ان ليكي حياتك وجدتك مش معارضه

_ وليه بقا فين الغلط في اللي انا بعمله 

_ ظهورك لوحده غلط 

_ انت هتعملي زي المتخلفة التانية ،  فين الغلط في ظهوري  هو انا برقص لا سمح الله 

_ المتخلفة التانيه؟  يعني انا المتخلف الاول 

_ مقصدش بس انا عاوزة اعرف فين الغلط فى اللي بعمله فهموني 

_ مبتغلطيش  ، ولا مبترقصيش ولا حاجة ومحتواكي محترم ويناسب اي سن بس انتي لو اختي صح كنت منعتك بردو، لان احنا صعايدة ومعندناش الكلام ده 

_ اقولك حاجه ومتزعلش مني 

قولت ببرود لاني عارف ان بعد الجملة دي في طولت لسان

_ ها قولي 

_ انت دكتتور 

رديت بنفس البرود وقولت

_ لا مسمهاش كده  ، انا دكتور مش دكتتور   شيلي حرف التاء الزيادة ده

_ ومستفز بجد 

_ انتي اللي متهوره ومش بتقبلي الكلام الصح  طموحك في الشهرة مجننك واخرتك هتكون وحشة 

_ استغفر الله العظيم يارب  ،  يعني احلف ما ادخل بيتكم تاني  

_ وايه دخل ده ب ده 

_ اسال نفسك،  انا مش فاهمه انت حاططني في دماغك ليه 

_ مسمهاش حاطك في دماغي اسمها بنصحك تبعدي عن الغلط 

قالت بغيظ

_ انا بغلط في ايه!!!!  هاتلي فيديو واحد فيه حاجه خارجة  ،  طيب والله معايا واحده صحبتي ما بتبطل تقولي البسي ملفت عشان تزودي الفلورز وانا برفض  ،  بلاش دي  ،  جت امبارح طلبت مني انزل قصص استغفر الله العظيم علشان دي القصص اللي بتشد وانا رفضت علشان مبقاش بغلط ، ف فين الغلط فهمني 

_ لا لحظه واحده  ،  بتقولي صحبتك طلبت منك تلبسي ملفت وتنزلي قصص استغفر الله العظيم 

_ اه بس انا رفضت 

_ ومقطعتيش علاقتك بيها 

_ انا بكلمك في ايه وانت في ايه دلوقتي 

_ ردي علي سؤالي 

_ لا 

_ ليه 

_ علشان هي تنصح وانا اعمل اللي شيفاه صح  بالظبط زي مانت بتنصح وبتحبطني وبعمل اللي شيفاه صح 

قربت منها خطوه وانا عاوز اكسر دماغها ف رجعت وكانت هتتكعبل مسكت ايدها وشدتها ف خبطت في جسمي وبعد لحظات وهي واقفه وعينيها في عنيه بعدت وقالت بتوتر 

_ عاوز ايه 

قولت بغيظ

_ عاوز اكسر دماغك  

_ افندم  ليه بقا 

_ علشان بتشبهيني بصحبتك الصايعه  ، انا بنصحك لمصلحتك وعشان انا اكبر منك وفاهم عنك انما التانيه عاوزاكي تصيعي وتمشي علي حل شعرك يا فنانه يا نجمة

_ والله علي الاقل هي بتقول كده علشان تساعدني انجح حتي لو كانت طريقتها غلط الدور والباقي عليك كل كلامك احباط وكسرة نفس  بس لا  انا هثبتلك اني اقدر انجح وانافسك بمحتوايه ده  

ضيقت عنيه ف قالت وهي بترجع 

_ متبصليش كده 

_ علي فكره  ،  انتي مش بس هتفشلي  ده انتي كمان هتوقعي نفسك في مصيبة بسبب طموحك الهايف ده  ،  انتي بتتحديني في ايه!!!!  انا دكتور ودي شغلتي وبتكلم في تخصصي وعامل بيدج علشان اشتغل واساعد الناس مش حب في الشهره!!!! 

قالت بعند وتلعثم

_ بـ.، بردو 

ضميت قبضتي وكنت هرزعها في وشها ف رجعت خطوات للخلف وقالت بكبر 

_ لو ايدك اتمدت عليه..  هـ...  هـ.. 

قربت منها وحاصرتها عند التربيزه وقولت 

_ هتعملي ايه 

بلعت ريقها وهي بصالي بخوف و قالت 

_ ولا حاجه  ابعد كده 

قولت بتحذير 

_ خلود  انا محترم دادة امينة ومش عايز ازعلك 

بصتلي بعيون واسعه من غير رد ف قولت وانا ببصلها بحده وبميل عليها 

_ ف اهدي واعقلي  ،  هااا اهدي و اييييه 

غمضت عينيها بخوف وقالت

_ اعقل 

_ ايوه صح  ، برافو  عليكي  العقل حلو  للبنات 

وقفت شويه ابصلها واشوف خوفها وهي شبه الفار في المصيده ومستنيها تبجح بس  متجرأتش ترفع عينها فيه ف مشيت و وقفت عند الباب لقيتها بصالي  بغيظ ف قولت 

_ اييييه؟ اجيلك؟ 

مردتش ف قولت 

_ ايوه كده اهدي واعقلي 

تمتمت بكلمات مش مفهومه وهي بصالي بقرف ف قولت قاصد استفزازها

_ ياريت يا خلود تعمليلي قهوة  بحب قوي القهوة من ايد ستات البيوت بتطلع عسل منهم 

قولتها ودخلت وقفلت الباب وانا متأكد انها مش هتعمل القهوة  وبعد شويه رجعت افتكر شكلها وهي خايفة مني وبقيت اضحك عليها بصوت مسموع ف لقيت بشر بيفتح الباب ويقولي 

_ زيد بيضحك  معجزة

_ ههههه قال يعني مش بضحك  حبيبي الكلمة دي تتقال ليك انت  ،  ها طمني بدر عامل ايه 

_ تمام قوي  انا هغير وهروحله تاني وهنجيبه معانا   

#بيجاد 

كنت طول اليوم قاعد بذاكر ومحستش بغياب ماما او جويريه وبعد ساعات سمعت صوتهم هما وبابا وسمعت ماما بتقول 

_ خافت قوي النهاردة  

كلمتها ثارت فضولي خلتني اطلع علشان اشوف في ايه ف لقيت جويريه ماسكه في ماما بخوف قربت منهم وقولت 

_ ايه يا جماعه في ايه 

قالت ماما 

_ روحي ياحبيبتي ارتاحي في اوضتك

_ حاضر 

دخلت ف قولت 

_ في ايه ما تفهموني 

رد بابا 

_ بدر اتضرب بالنار

_ ايه!!!  ازاي ومين ضربه وحصله إيه 

_ ناس اتهجموا علي سوبر ماركت كان فيه هو وجويريه بس ربنا سترها الطلقة جت في دراعه ولحقوه ودلوقتي روح 

_ طيب ليه محدش كلمني 

قالت ماما 

_ محدش كان فيه دماغ لحاجة بس الحمدلله عدت علي خير والولد بقا كويس 

قولت بتنهيده 

_ الحمدلله  

كملت بعتب

_ بس ليه يا ماما تخلي جويريه تروح مع بدر  ما انا موجود 

_ انا كنت رايحه معاهم وهو كان بيوصلنا بس اضطريت اروح المستشفي واسيبهم 

_ بردو  كان قولتيلي انا اوصلكم 

قال بابا 

_ وفيها إيه لما بدر يوصلهم ده ولد عمك ومبعدش دول فوقينا 

_ يا بابا بصراحه كده انا مش برتاح لدخلته عندنا كل شويه  هو الوحيد في اخواته اللي بيجي كل يوم ومش عارف عاوز ايه 

_ كلام ايه ده ياد  ده ولد عمك يجي وقت ماهو عاوز 

_ يا بابا ينور في اي وقت مقولناش حاجة بس مش كل مره يطلب يقابل جويريه ماله بيها 

قالت ماما 

_ اسكت يا بيجاد بطل فتنه انا عارفاك  

_ فتنه ليه بقاااا هفتنها ليه  ايه يخليكي تقولي الكلمة دي غير لو كنتي شايفه ان في سبب افتن بيه 

قال بابا

_ ايه اللي بيحصل  ،  مالكم

قولت مقاطع كلام ماما 

_ بصراحه يا بابا بدر مهتم بجويريه زياده عن اللزوم وانا مش مرتاحله وماما شايفه وساكته لا وكمان بتندها تقعد معاه 

_ بيجاد  !!!!  مفيش  حاجه يا بدر الواد ده  سوسه  ،  بدر قالي عاوز يتجوزها وانا قولتله ان في حالتها دي مش هتنفع تجوز

_ اهووووو طلع عاوز يتجوزها اهوووو يعني انا صح 

_ اااسكت 

 قال بابا 

_ يعني ايه عاوز يتجوزها  ،  هو قالك 

_ اه 

قولت 

_ طيب ومقلناش احنا ليه

_ هو مطلبهاش مني  هو قال كلمة في وسط الكلام 

_ يا سلام 

قال بابا 

_ خلاص يا بيجاد اسكت 

_ اسكت ايه يا بابا يعني عاجبك اللي بيحصل 

_ معجبنيش  وتاني مره لو طلب يقابلها قولوا نامت  

قالت ماما 

_ ايه يا حبيبي ده ابن عمها وانت اللي مربيه

_ ايوه بس لو الموضوع اكده ومجاش كلمني راجل  ل راجل ف بلاش منها احسن 

قولت 

_ صح يا بابا  هي دي الاصول 

قالت ماما 

_ اه منك انت ما تقعد 

_ يا ماما انا بتكلم في الاصول  ، مينفعش يفضل داخل خارج كده من غير صفة رسمية 

قال بابا 

_ صح يا وفاء  ،  هو لو جد هيطلبها مني وانا مش هرفض  ولما مطلبهاش يبقي بيلعب ف نختصروا المشاكل احسن 

_ صح يا بابا 

قالت ماما 

_ طيب اسكت وروح شوف مذاكرتك 

_ اوووكي  ،  عن اذنكم 

_ طيب والله لا حسابي معاك بعدين  

انا زيي اي اخ بيغير علي اخته  ، وبتضايق من بدر وتنطيطه كل يوم عشان يشوفها من غير صفة رسمية وبعد ما بابا قال متشفهوش ارتحت جداً  وده ضايق ماما ف دخلت عندي ادتني كلمتين ومشيت عشان شيفاني مفتري وقالتلي كلمة وسط الكلام ان هيجي يوم وهتكون زيه ومش هترحمني وقتها ضحكت عليها وقولت 

_ مسكينه ماما متعرفش ان ابنها سبع ميتنططش عشان بنت ولو روحه فيها  

  قولتها بثقة كامله وانا متاكد ان عمره ما هيجي اليوم ده  

#جويريه 

علي قد الخوف اللي كنت حاسه بيه بس   اللي حصل مع بدر  علم معاي  ،  بقيت قاعدة علي السرير  مش شاغلني غير اللي حصل وريحة البرفان بتاعته اللي شبكة في هدومي  ، مش عارفه اذا كان التقارب اللي حصل هو السبب في الاحساس ده ولا لأني اكتشفت حاجات مكنتش واخده بالي منها  مع انها كانت واضحة وضوح الشمس.. 

وجه اليوم التاني وبقيت قاعده في انتظار جيته زي ما عودني انه يجي كل يوم وطال انتظارب  لغيت ما افتكرت انه تعبان يمكن ميقدرش يجي النهارده  وبعد ما ماما راحت المستشفي والبيت فضي فكرت اطلع اشوفه بس خوفي كان منعني وبعد ساعة وصلني اتصال منه وقفت شويه ابص لرقم وانا متوتره قوي ومش عارفه ارد ولا لا وفي النهاية رديت وقولت 

_ اه

_ عامله اية دلوقتي 

_ كويسه 

_ لسة خايفه 

_ لأ 

_ اه  ،  طيب انا قولت اطمن عليكي بس 

_ شكراً 

_ اممم بتعملي ايه 

_ مبعملش 

_ طيب امك هتيجي امتي علشان اجي اطمن عليكم 

اترسمت ابتسامتي وانا بقول 

_ معرفش 

_ اه  ، طيب ممكن لما تيجي ترنيلي 

_ طيب 

_ اها 

سكت شويه ف قال 

_ انتي لسه فاتحه 

_ اه 

_ طيب محتاجه حاجه 

_ لأ 

_ ماشي  هبقي اشوفك 

_ طيب 

_ مع السلامه 

قفلت معاه وانا لسة ابتسامتي علي وشي وبعد شوية تلاشت الإبتسامة دي لما وصلتني الذكره اللي كانت ومازالت قادره تحطم اي ابتسامه وتمحي اي سعادة ممكن احس بيها وتمحي اي فكرة في المحاولة اني اديله فرصة يدخل حياتي  ومع كده لما جت ماما اتصلت بيه وقولتله  انها جت وكنت متوقعة ان ماما تيجي تقولي زي كل مره تعالي سلمي لان وللاسف رغم احساسي إلا ان كان جوايا حاجه عايزة تقابله  يمكن لاني حسيت للحظة معاه بالأمان وبقي في نفس المكانه مع بابا وماما وبيجاد  

#بدر 

حتي بعد اللي حصل كان كلامها زي ماهو محستش باي تغيير ويسد النفس  وبردو وروحت مع اني تعبان بس انا اتعودت اشوفها كل يوم   وبعد ما سلمت علي امها قولت 

_ جويريه عامله ايه دلوقتي 

_ كويسه حبيبي 

_ طيب ممكن اسلم عليها 

_ نايمه دلوقتي لما تصحي  

_ نايمه؟ 

_ اه رجعت من الشغل لقيتها نايمة  

سكت ف قالت 

_ انت خرجت ليه مش كنت ارتحت لغيت ما تخف

_ حسيت نفسي مخنوق من البيت ف جيت اشوفكم 

_ تسلم يا حبيبي  ،  هعملك عصير 

_ ماشي 

مشيت وانا قعدت موجه عيني ناحية اوضة جويريه وبفكر في السبب اللي خلي امها تكدب عليه  معقول تكون بتكدب علشان اللي حصل والخطر اللي كان ممكن يحصلها بسببي  وبعد وقت قصير دام في التفكير  اتفاجأت بالباب بيفتح وبتخرج جويريه لوحدها من غير  ما حد  يطلب منها وبعد ما بصتلي بصه سريعة رجعت تبص للارض وتتقدم وهي بتفرك في صوابعها ف وقفت في انتظارها لغيت ما وصلت و قولت وابتسامتي علي وشي 

_ ازيك يا جويريه  ، عامله ايه دلوقتي 

_ تمام 

_ دائما يارب 

_ اه 

_ طيب اقعدي واقفه ليه

_ طيب 

قعدت وفضلت ساكته شوية وبعدين بصتلي بصه سريعة وقالت 

_ خفيت 

_ شوية 

_ طيب 

_ بس هخف 

_ طيب 

سكت وبقيت ابصلها وانا مش عارف فيها ايه مخليني مشغول بيها كده  مع ان كلامها يقفل اي حد  منها 

#جويريه 

مع اني كان المفروض اتكلم واشكره عن اللي عمله بس مقدرتش و فضلت ساكته وباصه للارض لغيت ما جت ماما حطت العصير قدامه وقالتلي

_ إيه ياحبيبتي صحيتي امتي 

بصتلها وقولت 

_ منمتش

_ ههههه والله يمكن انا لما شوفتك نايمه قولت نعسانه ولا حاجه  ، خلاص حبيبتي ادخلي ارتاحي 

_ مش عاوزه انام 

_ طيب حبيبتي خليكي 

قعدت جمبي وبقت تتكلم مع بدر اللي بيلعب في صوابعه وشكله بيقول في حاجه  وفجاة قام وقال

_ طيب انا ماشي 

قامت وقالت 

_ طيب ياحبيبي  ارتاح شوية علشان تخف بسرعه 

_ حاضر 

بصتلها وانا مستغربه انها مطلبتش منه يقعد زي عادتها ف سمعته بيقولي 

_ مع السلامه يا جويريه 

_ سلام 

مشي ف جت وقفت قدامي وقالت 

_ كل مره بتحايل عليكي تخرجي تسلمي عليه اشمعنا المره دي  

مردتش ف قالت 

_ طيب حبيبتي ممكن متطلعيش تاني لما يكون موجود 

_ حاضر 

قولت كده ولفيت علشان امشي ف قالتلي

_ مش عاوزه تعرفي ليه 

_ ماشي 

_ ماشي إيه 

_ اعرف 

_ حبيبتي مينفعش طريقتك دي علي الاقل خدي وادي في الكلام   ، ارفضي واقبلي  استفسري 

_ ما انا بستفسر اهو يا ماما 

قالت بتنهيده 

_ جويريه حبيبتي  ،  ممكن نقعد مع بعض ونشوف انتي عاوزه ايه وبتفكري في ايه  ،  نحكي لبعض اللي حسين بيه  ولا انتي مش حابه نكون صحاب 

_ حابه بس مفيش حاجه اقولها

_ لا في كتير  ،  في  احتياجات  ،  احلام  ، اهتمامات  ، في كلام بنات  ورغي طول الوقت  

_ اه

_ اااه ايه يا حبيبتي هتنقطيني 

غلبتني دموعي وانا موطيه دماغي ف جت عندي حضنتني وقالت 

_ ياحبيبتي مش كده  مش معني اني تنرفزت اني هعاقبك ابوس ايدك حاولي تخرجي من الحاله دي 

بصتلها وقولت ودموعي لسة بتسيل

_ انا بخاف قوي يا ماما 

مسكت وشي بين ايديها وقالت 

_ من إيه يا حبيبتي  ،  شاركيني مخاوفك دي

_ بخاف من كل حاجه 

_ طيب ليه  ، إيه السبب 

_ مفيش سبب 

_ ازاي مفيش سبب في حاجه في الدنيا من غير سبب 

_ خوفي

_ طيب ياحبيبتي  ممكن اعرف محتاجه ايه علشان خوفك ده يروح  او يخف شوية 

_ مش عاوزه حاجه  ، انا عاوزه انام 

سيبتها ودخلت اوضتي  قفلت الباب علي نفسي وسندت ضهري عليه وبقيت ابص للاوضه لغيت ما عيني وقعت علي القصة  قربت منها ومسكتها وقولت في نفسي 

_ كام سنة دلوقتي وانتي بتقريها في انتظار القصة التانيه اللي مش عارفه هيتقال فيها إيه ولا هتيجي ولا لأ 

                ***

بدر 

كان واضح قوي ان مرات عمي بتوزعني ومكنتش عاوزاني اشوف جويريه بس ليه مش فاهم   ،  ولما مشيت مشيت علشان منظري بقا وحش مش علشان  هي عاوزه  تبعدني عنها  ومكنتش هسكت ومروحش تاني لا ده انا قررت اروح تاني واشوف ظروفها إيه  ما انا مش هسمح انها تمنعني اشوفها تاني وانا ما صدقت انها طلعت مره واحده من نفسها عشان تشوفني

              الفصل الثالث من هنا 

لقراءة باقي الفصول من هنا

تعديل المقال