رواية ذئاب لا تعرف الحب
الجزء الثاني2الفصل الحادى عشر11 والثاني عشر12
بقلم نجمه براقه
هاجر
مكنتش هروح معاهم ورفضت لما بابا قالي واتحججت بصداع وبعد ما الكل راح قعدت علي اعصابي كنت عاوزه اعرف هيعمل ايه وهي هتتصرف ازاي وهيقعدوا جمب بعض ولا لأ وبعد تردد كتير بيني وبين نفسي قومت وقولت هروح وهتفرج علي اللي هيحصل ومش ههتم بحد ولبست بسرعه وروحت وريان فتحلي وقال بإبتسامة
_ اهلا اتفضلي
_ شكراً
قولتها ودخلت متجاهله ابتسامته الاوڤر و لقيتهم قاعدين في الصالون كلهم بما فيهم بشر اللي تجاهلني بسرعة لما شافني واسراء اللي قاعدة مكسوفة وعينيها في الارض ف اتقدمت ناحيتهم وانا جوايا نار بتغلي متجاهله نظرات بابا وماما ليه وقعدت بعد ما رميت السلام وعيني بدأت تتنقل بينه وبينها وشوفت كسوفها الزايد من غير داعي وجموده هو وكأنه جاي في عزا لغيت ما قامت والستات قاموا وراها وبعد لحظات بصلي بابا وطلب مني بنظراته اني امشي وراهم ف دخلت عندها لقيتها واقفه وسطهم وشها احمر من الكسوف و مرات عمي بتحضنها وتبوسها بسعادة ف قولت متجاهله نظرات ماما ليه
_ براحه يا طنط هتخلصيها من البوس
ردت وسط ضحكات سنيه و وفاء مرات عمي ودادة امينة
_ فرحانه بيها ، عقبال ما افرح بيكي قريب انتي كمان
قولت
_ لا مش عاوزه
قالت ماما
_ لا وانتي حد قال اتجوزك وانتي اعترضتي
_ لو قولت يا جواز هلاقي كتير
بصتلي بحده وكأنها حاسه باني بفتح وصله لردح ف ديرت ليها ضهري متجاهله كلامهم وهزارهم وفتحت الباب وبقيت بصاله وهو بيتكلم بالعافيه وكانه مغصوب علي الجايه
#بدر
صحيت متأخر ولما شوفت الساعة لقيتها 10:30 ف قومت فوراً دخلت استحميت ولبست وجريت علي البيت ولما وصلت ملقتش غير خلود بتقولي انهم راحوا بيت عمي السبع ف سيبتها ونزلت جري روحت علي هناك وانا متمني الحق بشر قبل ما يشوفها وانا خايف يرفضها بس لما روحت واستقبلني ريان وابتسامته علي وشه فهمت ان بشر وافق عليها ف قولت
_ الموضوع مشي
_ اه الحمدلله قعدوا مع بعض شافها وشافته ودلوقتي الرجاله بيتكلموا
_ طيب الحمدلله
_ اتفضل
دخلت ومع اول ظهوري ليهم توجهت ليه نظرات الكل وبعدوا سريعاً الا بشر الا طالت نظرته ليه ف قولت بعد ما قعدت عنده
_ الف مبروك
بصلي وقال بخفوت ونظرات جامده
_ الله يبارك فيك، اديني خطبت ومشكلتك اتحلت
_ مشكلتك انت اللي اتحلت قبلي
حدت نظرته وهو بيقول
_ انا مكنش عندي مشكله غيرك
_ ايه
رجع بص قدامه ومردش وعدا الوقت ومشينا ف وقفته قبل مدخل العمارة وقولت
_ بشر استني
وقف من غير رد ف قولت
_ مالك
_ مالي
_ يعني ايه معندكش مشكله غيري ، تقصد ايه
_ اقصد اني مكنتش عايز اتجوز واديني هتجوز علشان مشكلتك انت تتحل
قال كده ومشي وانا وقفت مكاني مش عارف اقول ايه لغيت ما جه بابا وقال
_ واقف ليه
قولت بتنهيده
_ بشر وافق يتجوز علشان مشكلتي انا تتحل محسسني اني كنت السبب في سجنه مش جوازه ، يجرا ايه لو كنت وافقت من غير الشرط ده
_ مش هكون مرتاح ، ويلا امشي هنرجع البيت
مشينا مع بعض ولما وصلت بيت عمي بدر وقفت لحظه ابصله ف قال
_ امشي لما هقابل عمك هكلمه في موضوعكم
_ بجد يا بابا
_ بجد
_ ربنا يخليك ليا يارب يا حبيبي
_ طيب يا خوي مشي
#بشر
قعدت ساعات في اوضتي لغيت ما دخل زيد عندي وقال
_ في ايه يا بشر ، حابس نفسك ليه
_ مصدع شوية
_ مصدع ولا زعلان انك هتجوز
سكت ف قال
_ طيب وافقت ليه ، انا مش قولتلك ملكش دعوه بيهم واعمل اللي يريحك
_ اللي يريحني انا تاعب الكل
_ مدام مش انت السبب ف مش مهم مكنتش مجبر تاخد قرار مش راضي عنه علشان حد
_ اللي حصل و سؤاء بمزاجي او لا كان هيحصل في يوم كنت هفضل عازب لامتي
_ طيب ما تجرب يمكن ينفع
قولت باستفهام
_ هو ايه
_ بتكلم عن هاجر
توترت من كلامه ف قولت وانا ببعثر نظراتي
_ مش فاهم مالها هاجر
_ بتحبها
_ احب مين بطل كلام فارغ
_ بالعكس مش كلام فارغ ولا حاجه ، انا فاهم اللي انت بتمر بيه عارف انك بتحبها وعارف انك كنت ملاحظ اهتمامها ب بدر ، بس انا ملاحظ انها مبقتش مهتمـ.....
قولت مقاطعه
_ اسكت يا زيد ااااسكت
_ يابني انا بتكلم معاك وبقولك هي مبقتش مهتمه ب بدر ولا فرق معاها اللي حصل عشان جويريه مش يمكن توافق عليك
_ بقولك اسكت يا زيد ، انا سيبهالك
مشيت وانا منفعل بسبب كلامه اللي جه في الوقت ده بذات جه بعد ما اتكلمنا مع الناس واتفقنا يعني حتي لو في حل مبقاش ينفع وبعد وصلت عند البحر وقعدت شويه افكر في اللي بيحصل سمعت صوتها وهي بتقعد جمبي بتقولي
_ ممكن اقعد ولا اسراء هتزعل اني قعدت معاك عند البحر في مكان عام
بصتلها من غير رد ف قالت بعد سكوت
_ تعرف! لو كنت اعرف ان ده هيحصل مكنتش اتوسطت، بس تصدق احسن علشان افهم بسرعة ان الناس بتتغير ومفيش حد دايم ومتعشمش بزيادة
_ من ناحية احسن ف هو احسن ، بس علشان انا افهم ان مش مهم انا عاوز إيه والمهم بدر ، كلكم خلتوني كبش فدا عشان بدر حتي ابوي عمل مشكله علشان يجبرني انا اعمل حاجة انا مش عاوزها ، وخالتي عملت اللي تقدر عليه علشان انا اتجوز وابنها يرجع البيت وتريحه ، وانتي زيهم كان همك.....
قاطعتني بردها
_ انا زيهم في ايه ، وخليناك كبش فدا ازاي ده احنا بنقولك اتجوز مش موت نفسك ، كل الشباب مش بيصبروا يتجوزا بس انت لا ، تقدر تقولي ايه اسبابك علشان ترفض ، ولا عشان واحده مكنتش حاسه بيك ويمكن لو كانت حست كانت اختصرتك او فهمتك غلط وبعدين تعاله هنا اما انت زعلان قوي كده ايه معني الكلام اللي قولته عن اسراء ، انت بتعمل ايه وبتفكر ازاي ، ما تفهمني
مردتش ف قالت بنظرات مترقبه لردي
_ كلامك عنها وعن خوفك علي زعلها كان ايه
فضلت ساكت ف قالت وهي بتقوم
_ بلاش ما تقولش وقوم بينا دلوقتي نحل المشكلة دي مش انت زعلان علشان قولتلك تجوز يلا هنقولهم خلاص مش عاوزين وتعتذر لناس، بلاش منها الجوازه دي
بصتلها ف قالت
_ انا مش فاهمه انت بتفكر في ايه بس واضح ان اللي حصل ضغط علي اعصابك ، يلا ننهي كل حاجة
كملت وهي بتمسك في دراعي
_ قوم
شديت دراعي منها وقولت بجمود وانا مش شايف احقر منها في اللحظة دي
_ طيب والبنت واحساسها لما اجي اقول لا بعد ماقولت عاوزها ، واحساسها لما تفكر اني رفضت علشان الجرح اللي في وشها
_ دي مشكلتها انت ملكش دعوة بيها مش هتجوزها تعطف علي حالتها
طالت نظرتي ليها ف قالت
_ انت ملكش ذنب تصتبح بواحده وشها مشوه علشان متجرحش احساسها
_
_ قوم قاعد ليه يلا
رجعت تشدني من دراعي ف وقفت معاها وقولت
_ انتي عندك حق ، يلا هنروح البيت زمان بابا هناك دلوقتي
ابتسمت وهي بتقول
_ يعني هتقولهم خلاص مش عاوزها
_ هقولهم
مشيت سابقها بخطوة وهي ورايا لغيت ما وصلنا البيت ولكن ملقتش ابوي ف قولتلها تستني يكون جه
#هاجر
كنت مبسوطه قوي انه هيرفضها ومفكرتش في اي حاجه غير انه هيرجع زي الاول معايا ومش هخسرة علشان اي حد وفوراً دخلت ل خلود الاوضه ف قالت لما لاحظت فرحتي
_ ايه الابتسامة دي
_ مفيش
_ بت عليه انا ، قولي
_ امممم اصل
_ ايوووه
_ بشر
_ ماله
_ هينهي موضوع اسراء ومش هيتجوزها
_ يا نهار اسود ليه دي تيته بتقول ان الموضوع مشي والبنت كانت مبسوطه
_ بس انا مكنتش مبسوطه
_ افندم!!! ، يعني انتي اللي خلتيه يسيبها
_ مش انا هو لو عاوزها مكنش وافق علي كلامي
_ انا مش مصدقاكي والله ، ايه يابنتي ، ايه الجبروت ده مكنتيش كده
_ ايه انتي ، في ايه ، واحد ومش عاوزها هيتجوزها غصب
_ هاجر حرام عليكي انتي كده بتجرحي احساس البنت دي تيتة وطنط ورد مبطلوش كلام عن فرحتها معقول هتعملي فيها كده "
ديرت ليها ضهري بعد ما حسيت بالخزي من كلامها ف قالت بعد ما وقفت قدامي
_ طيب ليه فهميني مش بتقولي مش بتحبيه ليه تعملي في البنت كده
_ معرفش يا خلود ، ممكن تعتبريها انانيه مني او ظلم بس لا بشر مش هيتجوز
بصتلي بذهول ف قولت بتردد
_ انا مش عاوزاه يتجوز ، هيبعد عني ، ونبي افهميني انا مقدرش اتخيل انه يبعد عني لأي سبب ، انتي متعرفيش حاجه ، هو مجرد ما وافق وهو مختصرني علشان السبب ده وبيقولي ان مراته هتزعل من طريقة تعاملنا مع بعض
_ طيب والكلام ده علشان هو اخوكي وصاحبك بردو
_ مش عارفه والله مش عارفه انا مش هفكر في حاجه دلوقتي وبعد ما نخلص من اسراء دي هقعد مع نفسي واشوف
_ واااالله حرام عليكي
_ حرام عليكي انتي اسكتي هيسيبها يعني هيسيبها وبعدين دي مشوهه ، انتي مشوفتيش الجرح اللي في وشها هيبصلها ازاي دي ....
قولت كده ف جاني صوته بينادي عليه ف قولت بإبتسامة
_ اكيد بينادي علشان عمي جه هروح اشوفه
مسكت فيه وقالت
_ اصبري
_ ايييييه
_ فكري في البنت حرام عليكي
_ مششش هفكر في حاجه ملكيش دعوة
قولت كده وطلعت لقيت عمي وزيد و طنط ورد و بشر قاعدين قعدت عندهم ف قال عمي موجه كلامه ل بشر
_ احكي اهي جت
ركز نظرة علية وقال في الوقت اللي قلبي بيخفق بسرعة
_ عاوز اقول ان لولا هاجر وزنها مكنتش وافقت اتجوز ، هي اللي اقنعتني اتجوز علشان تفرح بيه وعشان تريح الكل ، بس لما عرفت اني اخترت اسراء زعلت وجت لغيت عندي تقولي ارفضها علشان مشوهه ، مش عاوزاني اتجوز واحده فيها عيب وكتر خيرها انها مهتمه ..
رجع يركز نظره عليه شوية وكمل
_ بس انا قررت اتمسك بيها اكتر واقولكم محدش يسمع للبت دي عشان عارفها طالما حطت حاجة في راسها مش هتسكت غير لما تنفذها
اتصدمت من كلامه وبقيت بصاله بذهول ف كمل كلامه وقال
_ ومتخافيش يا هاجر جرحها مش هيخليني احس اني ناقص ، وبعدين ده محليها واكيد هكون عوض ليها وهتكون عوض ليه
بص لابوه وقال
_ ياريت يابوي تتكلم مع عم السبع وتعجل في الجواز
بقيت بصاله وانا حاسه الدنيا بتلف بيه ومش مفسره كلام الباقين وبعد وقت وانا علي نفس الحاله قام وقالي
_ مش هسيبها علشان جرح صغير في وشها كفاية انها تكون سالكه من جواها
قال كده وسابني وسط انظار الكل ف قولت بصعوبة وجهد عشان الكلام يطلع طبيعي
_ انا بس كنت متمنيه يتجوز واحده كويسة مفهاش عيب
قال زيد
_ ماهي كويسه البنت محترمه والكل يشهد بكده ، انا مش مصدق انك بتفكري بالطريقة دي يا هاجر
قال عمي
_ ده كان رأيي في الاول بس علي قولهم البت كويسة جرحها ميعبهاش
قولت بتلعثم
_ اكيد ، طيب هروح اشوف ماما تصبحوا علي خير
قولت كده ورجعت البيت وانا دموعي بتسيل وهناك لقيت بابا وماما في وشي جيت ادخل واسيبهم ولكن بابا وقفني وقال
_ هاجر
وقفت مكاني ف قال وهو بيتقدم ناحيتي
_ بتعيطي ليه
مسحت دموعي وانا بقول
_ مش بعيط
_ بقولك بتعيطي ليه ، كنتي فين
_ كنت بيت عمي عبيدة
_ طيب بتعيطي ليه
معرفتش ارد ف جت ماما عندي وقالت
_ اكيد بتعيط لأني اتصلت بيها هزقتها علشان اتأخرت هناك
بصلي ف قولت
_ صح ماما زعقتلي وخلود سمعت صوتها
بصلي بشك ف قالت ماما
_ انا قولتلك متتأخريش انتي اللي جبتيه لنفسك يلا ادخلي شوية وهجهز العشا
_ حاضر
دخلت ومسكت التليفون علشان ابعتله واطلع كل غضبي فيه ف لقيت رساله منه بيقولي فيها
_ عارف انك اول حاجة هتعمليها انك تبعتيلي وتحكي في اللي حصل وانا هريحك من اي كلام هتقوليه واقولك مش عايز اعرفه ، ومش عايز اتكلم مع عيله زيك مبتفكرش في شعور الناس "
مسابليش فرصة اتكلم لانه عملي بلوك وسابني وسط زحمة من الافكار والاسئلة اللي مش عارفه اجابتها
#بدر
جه تاني يوم ورحت مع بابا الشغل بعد انقطاع فترة كبيرة والمره دي كانت مختلفة عن كل مره المره دي مكنش مجرد مشوار لشغل لا ده كان تحقيق لحلم عشت اربع سنين احلمه وهو طلب ايد جويريه علشان ابدء معاها رحلة الصداقة اللي هتخليني اقدر اساعدها للخروج من الحاله اللي هي فيها وروحنا وبعد وقت قليل وصل عمي بدر وبشر وبعد ما قعدنا شوية وانا عمال المح لبابا علشان يتكلّم قالي
_ ما تبطل يخربيت
اتنحنحت بحرج ف قال عمي
_ مالكم
قال بابا
_ عمال يغمز ويبحلق بعنيه علشان اتكلم
ابتسم عمي وهو بيبصلي وقال
_ تتكلم انت ليه وهو صغير ولا لسة متفطمش
قولت بحرج
_ هههههه لا مش كده بس... بس هو الكبير
رد ابوي بسخريه وقال
_ لا وانت بتحترم الكبار قوي ، قول ياخوي
قال عمي
_ احكي يا بدر عاوز إيه
بصيت لبشر اللي فضل ساكت متكلمش من اول ما دخلنا وقولت
_ شاركنا يا بشر
اعتدل في قعدته وقال
_ مش لما اعرف ايه الموضوع الاول
_ انت عارف
_ لا مش واخد بالي احكي واديني فكرة
_ اها ماشي ، انا
قال ابوي
_ ايوه انطق
خدت نفس وقولت من غير مقدمات
_ انا طالب ايد جويريه
_ جويريه بتي
_ ههههه افتكر هي
_ والله ياولدي انت فاجئتني بطلبك ده
قال ابوي
_ وانا كمان
_ هههههههه طيب ايه رايكم في المفاجأة موافقين ولا لأ
قال عمي
_ انا معنديش مانع بس الرأي رأيها هي ادعي بس متخافش وتوافق
_ اسمحلي يا عمي لو موافقتش اقعد اتكلم معاها شوية وانا متاكد اني هقدر اخليها توافق
_ طيب احترمني طيب
_ هههههه اسف بس هي لو رفضت هيكون خوف وانا اقدر اطمنها
ضحكوا ف قال ابوي
_ انت اكده مش بتصلح كلامك انت بتزيده هباب بتقول ايه يا فقري
_ هههه قصدي اقنعها انتوا اكيد فاهمين اللي اقصده
رد عمي وقال
_ طيب انا هكلمها ولو رفضت هخليك تقعد معاها يمكن تقدر تخليها توافق
_ متشكر قوي قوي ربنا يخليك
اتكلمنا شوية وبشر مشاركناش بكلمة واحده ف قومت وقولتله عاوزك وجه معايا من غير ولا كلمه و وقفنا بره وقولت
_ انت ليه محسسني اني كنت سبب في مصيبه حصلت في حياتك
_ وانا اتكلمت ما انا ساكت اهو
_ اتكلمت امبارح وسكوتك النهاردة كان اصعب من كلامك ، طيب انا راضي ضميرك لو ابوك فضل مُصر طول عمره محدش فينا يتجوز قبلك وانت نفسك مهفتش علي الجواز كنت هترتاح واحنا حياتنا واقفه بسببك
_ كنت هرتاح لو مدخلتونيش في قصصكم دي
قال كده ورجع جوه وسابني مش عارف اعمل معاه إيه وبتعدي الساعات وهو بيشوف شغله وانا بشوف شغلي وبعدين بمشي واروح اقابل ريان اللي حالته متفرقش عن بشر هما الاتنين يحيروا حتي لو ريان بيتكلم ف بردو محير ودايما شارد واخر ما زهقت قولتله
_ هو انت لسة بتكتب
_ اه ، ليه
_ اه انا قولت ان الجنان ده مش من فراغ
_ ليه يعني وانا عملت ايه
_ معايا ومش معايا ، وبعدين هتفضل منفصم كده كتير
_ يابني وانا عملت حاجه ما اديني بتكلم وبرد عليك
_ لا انا المجنون
_ وايه الجديد ، مالك فيك ايه النهارده
_ أبداً بس كان في خبر عايز اقولك عليه لكن شكلك ميشجعش
_ قول ياخويا يارب يجي من وراك خبر عدل
_ لا عدل ، النهارده كلمت عمي وطلبت ايد جويريه بس...
_ بس إيه
_ مقلق من انها ترفض انا متوقع قوي انها متوافقش بسبب خوفها
_ لو حالتها زي ما بتقول ف هتخاف توافق البنات عموما عندهم رهبه من الجواز ما بالك بيها هي
_ ما انا قولتلها قبل كده اني هخطبها وبس علشان نعرف نتشارك الحاجات اللي بنحبها وانا اساسا مش هقول اتجوز غير لو هي كانت مستعده
_ خليك علي كلامك ده انت كدة ماشي صح
_ ايوه بس بردو خايف ترفض
_ ممكن اعرف طبيعة تعاملكم مع بعض ، بتخاف منك انت كمان
_ لا
افتكرت اللي حصل في السوبر ماركت ف كملت بإبتسامة
_ مفتكرش بتخاف مني ، موقف حصل قبل ما تيجي...
_ ايووه كمل
_ هو موقف صعب شوية ، كنت متفق مع العيال علشان يعملوا انهم هيخطفوها وتواجه خوفها وكده بس سبحان الله كأن ربنا عالم بينا وتقريبا حصل اللي كنا مخططينله
_ حصل ايه ، اتخطفت
_ لا احنا دخلنا سوبر ماركت ف عصابة اقتحمت السوبر ماركت ده وهي بقا اترعبت واستخبت في حضني واحتمت فيه
بهتت ملامحه وهو بيقول
_ اها وبعدين
_ وبعدين خدت رصاصه ولما شافتني بنزف وبموت اغمي عليها بس مش عارف من خوفها انها بقت لوحدها ولا اتخضت عليه ، وبعدها طلعت لوحدها تسلم عليه وبقا في بينا كلام قليل جداً بس طبعا فرق عن الاول بكتير في الاول مكنتش تقول ربع كلمة وكانت امها تطلعها بالعافية علشان تسلم
_ ايوه يعني كده حست بالامان معاك
_ اظن كده
_ لا هو كده ، ف انت اشتغل علي النقطة دي ، وكمان شاركها الحاجات اللي بتحبها وفاجئها بحاجة من اهتمامتها ده ان كان ليها اهتمامات
_ بتحب القرايه وهي مره واحده شاركتها لما قالتلي علي قصة بتقراها ف قريتها وقولتلها رايي
_ طيب ده حلو كده مقدمكش غير انك تجبلها كتاب في اول زياره
_ مبعرفش انا في الكتب مش عارف ايه يناسبها
_ هي القصة اللي قالتلك عليها اسمها ايه وانا اقولك
_ والله نسيت اسمها بس هي اتعملت فيلم اجنبي بردو مش فاكر اسمه بس هو بيتكلم عن بنت مريضة سرطان
_ اااه عرفتها « The Fault in our Stars »
سكت شويه يفكر وبعدين قال
_ يعني هي بتحب القصة دي
_ اه
تابع وهو بيبعثر نظراته
_ تمام ، انا هشوف حاجه شبها واقولك
_ ما تجيب القصة الرومانسيه بتاعتك اكيد مقرتهاش قبل كده
_ تؤ مش عايز
_ ليه
_ مش عايز
_ ليه يابني هي قبيحه ولا حاجه
_ لا بس مش حابب حد يقراها
_ ليه طيب قولي سبب
_ من غير ليه اسكت يا بدر
_ ولا انا شاكك فيك
_ طيب ما تشك هو انت كنت خطيبتي
_ استغفر الله العظيم بلاش يا لساني علشان انت قليل الادب
_ هههههههه شهد شاهد من اهله
_ واي شاهد ده لساني
#جويريه
في يوم عيد ميلادي ال 15 الكل جاب هدايا الا هو وعلشان اعرف اذا خلص القصة اللي وعدني بيها ولا لا قولتله بعد تردد كبير قوي وخجل وربكة
_ انت مجبتليش هدية زيهم
ابتسم بخجل وقال
_ مش عارف ممكن اجبلك ايه
_ انت قولتلي قبل كدة ان اول قصة هتكتبها هكون انا اول حد اقراها ، خلصتها ولا لسه
_ مكتبتش فيها كتير
_ هتخلصها امتي
_ مستعجله تقريها
_ ايوه انا من وقت مانت قولتلي وانا مستنيه اقراها
_ وعلي كدة خلصتي القصة اللي ادتهالك
_ اه خلصتها من زمان ، سهرت عليها لغيت ما خلصت
_ وإيه رأيك فيها
_ حلوة قوي قوي عجبتني بس نهايتها حزينه
_ اه عشان اغسطس مات
_ ايوه
_ بس بردو حلوه
_ كانت هتكون احلي لو فضل عايش ، انا مكنتش عاوزه حد فيهم يموت
_ ههههه عمره كدة نعملة ايه
قولت بإبتسامة
_ صحيح بس انا مبحبش النهابات الحزينة ممكن القصة اللي هتكتبها متخليش نهايتها حزينه
قال بإبتسامة
_ حاضر
_ وممكن تخلصها بسرعة
رد بنفس الإبتسامة وقال
_ حاضر ، و...
رجعت بصتله ف قال
_ وممكن تعتبريها هدية عيد ميلادك وعلي فكرة
_ اية
طالت نظرته لعنيه وقال بتردد
_ البطلة سميتها جويرية علي اسمك
بعثرت نظراتي بخجل ف قال
_ وشبهك كمان
بصتله للحظات وفورا نزلت جفوني وقولت بربكة
_ اه.. طـ.. طيب انا هستنا القصة دي
_ ماشي
_ شكرا ، انا انا ، هروح اشوف البنات
_ دقيقة
_ اية
طالت نظرته ليه قبل ما يقول
_ طالما القصة هتكون هدية ليكي ف هتكوني انتي بطلتها
توترت من كلامه ف قولت وانا ببعثر نظراتي بربكة
_ مش فاهمه ، انت هتكتب إيه عني ما انا معنديش قصة تكتبها
_ هعملك قصة من خيالي
_ اه ، مـ ، ماشي
كملت بتوتر
_ هستناها
قال بإبتسامة
_ ولو اتأخرت شويه متقلقيش، اصل القصص بتاخد وقت
_ قد ايه يعني
_ سنة اتنين تلات ان شاءلله تستلميها في عيد ميلادك ال 18
_ ههههه
ابتسم لضحكتي وقال
_ كل سنه وانتي طيبة يا جويرية
قولت بخجل
_ وانت طيب ، اناهمشي
مشيت وانا كلي خجل وربكة وابتسامتي مالية وشي ف لقيت ماما واقفه قدامي عاقدة ايديها قدامها وبتقولي
_ كنتي بتتكلمي في ايه مع ريان
قولت بارتباك
_ مـ.. ممفيش حاجه ..
_ جويرية!!
_ نعم
_ معجبنيش وقفتك معاه بالشكل ده وابوكي و عمامك لو خدوا بالهم هيزعلوا قوي دي اول واخر مرة تحصل
اومات بدماغي من غير رد ف قالت وهي بترفع وشي ليها
_ حبيبتي انا عارفه انك مبتغلطيش بس انتي صعيديه ومش بس كدة ده انتي كمان من العرب ميصحش يكون ليكي كلام مع اي ولد غريب
_ حاضر يا ماما مش هكلمه تاني
بعد ما خلصت كلامها مشيت وسابتني ومن غير ادراك عيني راحت ناحيته لقيتة واقف بعيد وعينه عليه وفوراً بيبعدهم ويرجع يبصلي تاني ويبتسم ..
ريان كان الطف انسان شوفته في حياتي ، طيب ومثقف وخجول ومحترم جداً ومختلف عن كل الشباب اللي في سنه
#ريان
في الوقت اللي خلود و هاجر كانوا بيلعبوا بالعرايس والحجله كانت هي بتقعد تقرا وترسم وتكتب ، كان كل البنات اللي في سنها تجري وتتجنن ولسه اهلهم بيعلموهم ازاي البنات يتصرفوا وهي كانت عارفه كل ده وبتتصرف زي اي بنت كبيرة وناضجه وكانت لما تيجي عندنا علشان اسراء اللي كانت اكبر منها باربع سنين وتلاقيني جيت كانت بتمشي علشان مينفعش تقعد وفي ولد موجود ، وفي الوقت اللي كل البنات بيقولوا احنا صغيرين علي الحجاب كانت هي محجبه حجاب كامل والحجاب زادها جمال وعقل وادب وزادها فتنه فتنتني بيها وحبيتها وكنت بهتم بكل حاجه وكل كلمة تخصها وبحب قوي لما اسراء تتكلم عنها وعن تفكيرها وبعد محاولات كتيره بأت بالفشل مني لأني انا اصلا كنت محترم ومليش في الكلام مع البنات قدرت افتح معاها كلام وكانت الطريقه الوحيدة هي الكتب
جبت مجموعة من الكتب اللي عندي وحطيتهم علي التربيزه في الصالون وقولت محدش يشيلهم وبعدين طلعت وبقيت متربص لبيتنا بالساعات لغيت ما شوفتها داخلة عندنا ف رجعت بعد دقايق وبصيت من الشباك لقيتها قاعدة في الصالون والصدمه كانت لما شوفتها ماسكه اجندة من اللي كاتب فيهم قصة وبتقراها ف جريت علي البيت وفتحت بالمفتاح وفي لحظة كنت قدامهم وبقول
_ أسف
قالت اسراء
_ مالك يا ريان
_ مفيش بس عايز...
_ عايز ايه
مديت ايدي ل جويريه وقولت
_ الاجندة
بصتلي وبصت لاجندة وقالت بحياء
_ انت كاتب القصة دي
قالت اسراء
_ ايوه ما انا قولتلك انه بيكتب قصص وعنده كتير قوي جوه
قولت بحده
_ اسراء اسكوتي ، هاتي من فضلك
قالت بربكة
_ عاوزه اكملها ، لو سمحت
قولت بتوتر
_ طيب بس متخدهاش معاكي
قالت اسراء
_ يابني هتقراها هي و واقفه يعني ، خليها تاخدها وتجيبها تاني
قالت هي
_ مش هبوظها هرجعها زي ما هي
قولت بإبتسامة وانا كسوفي ميقلش عنها
_ ماشي خديها
ابتسمت ابتسامه هاديه وجميله جداً وقالت
_ شكرا ، انا ماشيه يا اسراء
مشيت وخدت الاجندة وقلبي وعقلي معاها ورجعت الاجندة تاني ومرجعتش الباقين لغيت دلوقتي ودي مكنتش اول مره تاخد مني قصة تقراها وترجعها تاني وبعد ما خلصوا القصص الرومانسيه والدراميه والقصص الهاديه كلهم قالتلي بنفس الخجل اللي مفارقهاش رغم تكرار كلامنا مع بعض
_ في تاني
_ ههههه باين كدة ان قلمي نال اعجابك
_ قصصك حلوة قوي واسلوبك شيق في اثاره وطول ما انا بقرا مش مستنيه اعرف الباقي
_ مبسوط قوي بكلامك ده بس...
_ مش هبوظها هرجعهالك زي ماهي
_ ايوه طبعا معنديش شك بس الباقي كله رعب واشباح
_ يخوفوا
_ المفروض بس مش عارف اصل محدش قراهم
_ طيب ممكن قصه منهم واشوف
_ بلاش لا تخافي
_ هجرب
#جويريه
اداني قصة اسمها عهد الشيطان قريت منها صفحة واول ما دخلت في الرعب خوفت جداً لأن انا كنت اصلا خوافة لوحدي ومقدرتش اكمل ف رجعتها وقولتله
_ خوفت اكملها بلاش رعب
_ هههههه انا قولتلك هتخافي
_ صحيح ، طيب معندكش من التانيين
_ لا والله خلصوا انا مكتبتش تاني حاجات كده وركزت علي الرعب بس ، بس هكتب قصة تاني وهتكوني اول واحده تقريها
قولت بإبتسامة خفيفه
_ ياريت
قال بإبتسامة
_ ان شاءلله ، طيب ايه رايك انا عندي قصة متأكد انها هتعجبك خديها ولو عجبتك خليها معاكي انا عندي نسختين منها
_ ماشي اشوفها
دخل ورجع بقصة «The Fault in our Stars» ودي كانت اول مره اشوفها او اسمع عنها ومن كتر حماسي ليها خلصتها في يوم واحد او بمعني اصح ليله واحده وبقيت مستنيه القصة الجديدة بتاعته واللي بعدين قالي اني انا هكون بطلتها ولغيت النهارده مشوفتهاش ، وهمي الوحيد اني اشوفها واعرف كتب فيها ايه
#ريان
بعد ما قولتلها هكتب قصة تانيه وهتكون هي اول واحده تقراها بدأت اكتبها وكنت انا وهي الأبطال جويريه وريان ولأني كنت بكتبها بتسلسل الاحداث اللي بتحصل بيني وبينها كنت بكتبها ببطئ وفي نفس الوقت بكمل قصة تانيه رعب كنت بكتب فيها من قبلها وده كان بخليني دايما منعزل عن اللي حواليه ومش مهتم بدراستي ولا بشتغل حاجة وحصلي مشاكل في البيت مع بابا وضغوط كتيره ودخلت في حاله اكتئاب ف غصبت علي نفسي وبعدت شوية عن الكتابه وبدات ادور علي حاجه تانية اشغل نفسي بيها ومن ضمن الحاجات دي هي معرفة ناس جديدة وللأسف الناس دي خدوني لسكة المخدرات وبقيت مدمن وبردو مكنتش قادر أبطل كتابه في القصتين لغيت ما زاد ادماني للمخدرات واهلي عرفوا وحصلي مشاكل كتير معاهم وبعد عيد ميلاد جويريه بيوم واحد قرروا يدخلوني مصحه بالقوة وغصب عني وقعدت في المصحة دي فترة وبعد ما بدأت اتحسن شويه طلبت من امي تجبلي الاجندة اللي بكتب فيها قصتي مع جويريه وكتبت اللي حصل في اخر مره شوفتها فيها يوم عيد ميلادها، وكلامنا مع بعض و وعدي ليها ان القصة دي هديتي لعيد ميلادها و وصفت شكلها كانت قد ايه جميلة وبعد كدة مكنش في بينا أحدث ، للأسف كل الاحداث انتهت مع انتهاء حفلة عيد ميلادها مكنتش شوفتها تاني علشان اكمل وبعدها دخلت المصحة ف كملت القصة جزء منها يخصني بحكي فيه اللي مريت بيه وجزء تاني كان مشاهد تخيلية تخصها هي عن نجاحها ومنستش اتكلم عن اشتياقي ليها وعن عدي للأيام اللي فاضلة عشان أرجع واشوفها تاني ولكن...
قبل ما أخرج من المصحة بيوم بابا جه وقالي بجفي زي عاداته من وقت اللي حصل اننا هنسافر السعودية وسافرنا وعيشنا هناك كام سنة كنت بكتب فيهم لغيت ما نهيتها نهاية سعيدة وهي اني لما ارجع هلاقيها كبرت كفاية وهطلب ايدها واتجوزها بس بعدين اكتشفت ان الواقع لا يمس القصص بأي صله وان النهايات السعيدة كلها خرفات انا واللي زي بنألفها .
لما رجعت اول حد جه علي بالي هو بدر صاحبي اللي مكنش في باله حب ولا عمره جاب سيرت جويريه في حياته وكل تركيزه كان في تعليمه وبس وكنت عاوز اطلبها منه هو الاول بعد ما عرفت انها لسه متجوزتش ولا اتخطبت ولكن احلامي كلها وقعت قدام عيني اتكسرت وتناثرت زي قطع الازاز لما بدر قالي انه بيحبها وعاوز يتجوزها وكانت صدمه اكبر لما حكالي اللي حصلها واللي حطم نص الرواية وهي جزئية النجاح اللي انا تخيلته ليها و مكنتش لاقي تفسير لحالتها غير انها اتعرضت لموقف صعب عمل فيها كده بس هو ايه مكنتش اعرف ولا كنت هعرف غير لو اتكلمت معاها ومكنش ولا بقي ينفع نتكلم ولا حتي اشوفها ولا ينفع اوافق علي طلب بدر انه ياخدلها القصة تقراها
_ كنت ادتهاله يمكن متوافقش عليه وتوافق عليك انت
قالتهالي اسراء بعد ما حكتلها اللي حصل ف قولت بخيبه
_ مبقاش ينفع ده بدر صاحب عمري وحتي لو مكنش صاحبي انتي ناسية هما اصلهم ايه يعني من المستحيل ترفضه وتوافق عليه وكمان متنسيش ان اي حاجة هعملها هتأثر علي مستقبلك مع بشر
_ هو لسه بقالنا مستقبل ، حاول انت بس وسسيبك مني
_ هتكون محاولة فاشله ، واضح كده اني هغير النهاية علشان تكون قصة كاملة
_ مين عارف مش يمكن النصيب ليه رأي تاني
_ مفتكرش
بصتلها وقولت
_ مروحتيش شوفتيها بردو
_ لا ما انا قولتلك بيتهم مليان شباب
_ طيب ما تحاولي تكلميها
_ ليه مش انت بتقول مبقاش ينفع
_ ايوه وانا مش بتكلم عن كده بس عايز اعرف اللي حصل معاها خلاها تخاف من الناس زي ما بيحكوا عنها
_ دول بيقولوا تقريبا مبتتكلمش تفتكر ممكن تحكيلي
_ اه مانتوا كنتوا صحاب
_ ايوه بس مكنتش تحكي عن نفسها بردو
_ حاولي مش هتخسري حاجة
_ حاضر لما تيجي هاجر او اي حد من عندهم هاخد رقمها واكلمها
_ تمام
كملت وانا بقوم بفزع من مكاني بعد ما سمعت صوت فتح باب الشقة
_ ده اكيد ابوكي
_ ايوه هو
_ طيب ما تطلعي بلاش يجي هنا ويلاقيني
_ وافرض لقاك اقعد
_ لا انا فيه اللي مكفيني مش حمل كلمة منـ....
بترت كلمتي لما فتح علينا الباب وقال وهو بيبصلي من فوقي لتحتي
_ قاعد عندك ليه
_ قاعد
_ ايوه قاعد ليه
قالت اسراء
_ ازاي ليه يا بابا اخويا وقاعد معايا
_ اخوكي؟ ياما طيبة يابنتي ، ربنا يصلح حالك ، اقعدي بس متتعلميش منه كفاية واحد
قالها وقفل الباب وراه ف قالت اسراء وهي حاطه ايدها علي كتفي
_ متزعلش ، هو طيب بس كلمتين لازم يقولهم
_ عادي، خليه يمكن كلامه يكون دفعة ليه علشان افلح في حاجه
_ طيب مانت فالح في الكتابه
_ هههههههه اااه يا مرك يا عين اسكتي يا اسراء اسكوووتي خليني ساكت
#زيد
بقالها كام يوم قافله لا بتبعت ولا بترد علي رسايلي وده قلقني عليها وقلقي قلقني من نفسي وانا مش مستوعب ان ازاي دكتور زيي يهتم بحاله عنده بشكل ده وبعد وقت وانا قاعد في الصاله جت خلود عندي تقولي بتوتر
_ انا واقعه في مصيبة
_ مصيبة إيه
_ حد اخترق حسابي وبيهددني انه هيعمل من صوري حاجات مش كويسة
_ مين هو ده والكلام ده من امتي
_ خرق الحساب من كام يوم واللي كلمني كلمني من يومين بيقولي لو منفذتيش كلامي هينزل صوري ستوري بطريقة مش كويسة
_ وهو عاوزك تعملي ايه
_ معرفش مقاليش ، قالي بس انه هيكلمني تاني ولغيت دلوقتي مكلمنيش بس انا خايفه
_ طيب والصور اللي عنده دي جيبها منين
_ اكيد من الحساب والبيدج
قولت بنرفزه
_ شوووفتي جالك كلامي
_ من فضلك ده مش وقته هتساعدني ولا لا
_ وانا قدامي ايه غير اني اساعدك ، يلا هنبلغ مباحث الانترنت
_ طيب مش نعرف عاوز ايه
_ نعم!! واحد بيبتزك بصورك هيكون عاوز ايه ، يلا غيري هنروح
_ حاضر
دخلت وانا بقيت العن فيها لغيت ما رجعت وقالتلي بتردد
_ خلاص واحده كلمتني كُنت قيلالها تساعدني والحساب رجع
_ رجع ازاي
_ رجع
_ متاكده
_ اه
_ بردو ولو لازم نبلغ
_ مش مهم خلاص
_ خلود انا علي اخري منك هو ايه اللي مش مهم ده حد حطك في دماغه وهكرلك حسابك واكيد هيحاول تاني
_ لو حصل تاني هنبلغ
_ عارفه يا خلود
_ ايه
_ نفسي اديكي علقة نضيفه
ابتسمت هي وبتقول
_ وقتها هروح ابلغ بس هبلغ عنك ، وابلغ ليه انت اصلا متقدرش ، ابقي اتكلم علي قدك
_ اتكلم علي قدي
_ ايوووه اتكلم علي قدك
قربت منها خطوه وكنت متوقع انها تبعد وتخاف بس فضلت واقفه مكانها وبتتحداني بنظراتها مع ابتسامة خفيفه علي شفايفها ف قولت
_ انا لو اتكلمت علي قدي هتزعلي
_ متقدرش تعملي حاجه
#خلود
وفجاة قبض علي دراعي وقرب خطوه وقال وعينه في عيني بنظرات حاده قاصد بيها تخويفي
_ طيب تحبي اوريكي اقدر ولا لأ
صابتني ربكه لاول مره احس بيها من قربه ومسكته لدراعي ف قولت وانا بمسك في ايده وبحاول افلاتها عني
_ سيب دراعي ، بقوولك سيب
شد عليه اكتر وقال بنفس النبره
_ خلود كني وارسي
_ طـ.. طيب بس ابعد
_ ناس تخاف ما تختشيش، امشي من قدامي
تنحنت وانا بتراجع كام خطوه وبعد ما ضمنت اني في امان قولت
_ بتتشطر علي بنت يا دكتور المجانـ....
بترت كلمتي لما شوفت حركته ناحيتي وطلعت اجري علي الاوضه قفلت علي نفسي وبقيت اكتم صوت ضحكتي لغيت ما عيني وقعت علي التليفون وقتها نسيت ابتزاز الشخص ده ليه وطلبه اللي انا مش عارفه اتوقعه ممكن يكون إيه وخوفي اللي خلاني اكدب علي زيد واقوله الحساب رجع وجريت علي التليفون فتحت حساب اسيل لقيت رسايل منه ف رديت وقولت
_ اسفه علي عدم الرد
جاني رده بعد ثواني بيقولي
_ حمدالله علي السلامة ، ايه الغيبه دي كلها ، انتي تمام
_ الحمدلله تمام بس شوية ظروف متشكره علي سؤالك ، حضرتك عامل اية
_ انا تمام بس ياتري الظروف دي ايه ظروفها
_ هههههههه ظروف الظروف كويسه ، كان عندنا فرح في العيله
_ اه الف مبروك وعقبالك
_ متشكره وعقبالك انت كمان
_ نسأل الله التساهيل
__ مش بينلها تساهيل في الموضوع ده حضرتك شبهت الشخصة المناسبه بقطعت البازل
_ صعب يعني
_ مستحيل
_ ليه ده انا حتي طموحاتي بسيطه
_ ايوه صحيح ده انا معرفتش ايه الموصفات اللي عاوزها في قطعة البازل دي
_ هههههه خلاص هي بقت اسمها قطعة البازل عندك
_ حضرتك اللي قولت
_ هههههه ماشي ياستي وعلي العموم انا مش عاوزها مرأه خارقة ، عاوزها تناسبني فكرياً يعني متبقاش هايفة وتكون ناضجة
_ ده كده امرك سهل ، طيب وبنسبة لجمال والشكل
_ بتدوريلي علي عروسه ولا ايه
_ هههه لا دي دردشه عادية ومتردش لو مش عاوز
_ لو دردشه ف اكيد اتمني يكون شكلها حلو ، وممكن تكون عادية مش لازم الجمال القوي لكن مش وحشه
_ افرض لقيت كل المواصفات اللي تناسبك وكانت قطعة البازل اللي بتدور عليها ولكن شكلها وحش
_ مش هفتي واسبق الاحداث بس لو لقيت الشخصية اللي انا بفضلها أكيد هشوفها حلوه
_ حتي لو كانت وحشه
_ ههههههه هو في ايه هتخوفيني منك ليه
_ واخوفك مني ليه
_ ولا حاجه ، طيب بعيد عن الموضوع ده ومتفهميش سؤالي غلط
_ اتفضل
_ شكلك عامل ازاي
_ ايه مناسبة السؤال ده
_ من غير مناسبة بس طبيعي يكون عندي فضول اعرف شكل اللي بكلمهم
_ وده شعور بتحسه تجاه كل المرضي اللي بتعالجهم اون لاين
_ انا مبعتبركش مريضه يا اسيل انتي معندكيش مشاكل ولا عقد عاوزه تتعالج ، انا بعتبرك صديقه
رديت وانا مبستمه بسبب كلامه ده وقولت
_ حضرتك صديق ليه انا لا انا مقدرش اتخيل حتي انا دكتور في مكانتك يكون صديق لواحده كحيانه زيي متخفيه ورا اسم مستعار
_ ههههه اهي الكحيانه دي تعتبر اول صديقه ليه ، محصلش قبل كده ان صادقت بنات
_ بجد؟
_ بجد
_ مش عارفه اقول لحضرتك ايه متشكره قوي
_ علي إيه
_ انك اعتبرتني صديقة
_ طيب اقولك حاجة؟
_ اتفضل
_ اول حاجه انا عايز اقولك بس اني بحب اقول اللي حاسس بيه تجاه اي شخص في حياتي مبحبش اخفي شعوري
زادت خفقات قلبي وانا مستنيه رسالته التانيه اللي قالي فيها
_ انا بقيت بحب كلامي معاكي وبستناه
اترسمت ابتسامتي وانا بقول
_ ربنا يخليك ، القلوب عند بعضها
_ يعني شعور متبادل
رديت بإبتسامة
_ ايوة
_ حيث كدة ف انا حابب العب تاني ، عندك ايه جديد
زادت ابتسامتي وانا بقول
_ دقيقة افكر
_ طيب ايه رأيك العبك انا يكون لقيتي لعبة
_ ماشي
_ اوكي ، لعبة الأذواق
_ طيب اسأل وانا هفهم
_ اوكي ، بتفضلي ايه ، الاغاني القديمه ولا الحديثة
_ شوية من هنا وشوية من هنا
_ زي؟
_ بحب قوي فايزة احمد في القديم وبحب عبدالحليم ومبحبش ام كلثوم
_ مبتحبيش ام كلثوم؟!!!!
_ لا انا بحبها بس مبحبش المط في الاغاني يعني اغنيه تعدي الساعة ونص وهي اخرها عشر دقايق ، في ناس بتقص المط وتختصر الاغنيه ودي بقا اللي انا بحبها
_ معاكي حق وانا كمان ، طيب والحديث
_ لا مبتابعش الحديث لكن ممكن نقول ليه مفضلين من فترة التسعينات ، زي مدحت صالح ، هاني شاكر ، جورج وسوف
_ بتحبي هاني شاكر
_ اه
_ وانا بحبة جداً جداً
_ طيب ايه كمان
_ بحب ام كلثوم ، بحب عبدالحليم ، بحب محرم فؤاد جداً ، بحب محمد قنديل ، محمد فوزي
_ حلوين طيب والحديث
_ احم بحب عمر كمال و وليد العطار
_ هههههههه عمر كمال بتاع انتي معلمة
_ اه والله ، بحب كمان البنت اللي بتقول الصحاب حالها مال
_ هههههههه وحمو بيكا؟
_ لا مبحبهوش مبعتبرهوش مطرب اصلا ، بس ساعات الواحد بيحب يتجنن علي اغاني المهرجانات بتاعته
_ مع انك دكتور نفسانيّ
_ وايه المشكله ، امال لو قولتلك ان معظم الابليكشنز اللي عندي العاب هتقولي ايه
_ لا دي عادي انا كمان عندي العاب كتير ، كاندي كراش ، العاب طبخ ، العاب المطعم
_ ايوه دي اللعبة اللي بتقدمي لزباين اكل ولما تتأخري يكشروا ويمشوا
_ هههههههه اه ، بحس اني طباخه شاطرة جداً في اللعبة دي وبتحمسني قوي اني افتح مطعم
_هههههههه بتحصل معايا بس فورا بدخل المطبخ الوص في كباية شاي ف يروح الاحساس ده فوراً
_ هههههههه
جاتني رسالته التانيه صدمة وهو بيقولي
_ هو احنا ينفع نتواصل صوت
توترت جداً وانا بقول
_ للاسف انا طول الوقت محاطة بناس حولية ولو اتكلمت هيسمعوني
_ مش مشكله ، انا بس كان عندي فضول اسمع صوتك
_ انا اسفة بس في اول فرصة هكلمك
_ تمام مستني الفرصة دي
_ حاضر
قفلت معاه بسرعه بعد ما توترت وحسيت انه ممكن يكون لسة شاكك فيه او انه ممكن يكون عرفني وبيحاول يوقعني ف طلعت من الاوضه لصالون وبصتله يمكن افهم من نظراته او تلمحاته انه عرفني بس لقيتة شارد ومبتسم ومحسش بيه خالص وبعد وقت انتبهلي وقال بقرف
_ خوفك راح وقدرتي تقابليني تاني اهو
_ وانا امتي كنت بخاف منك ، ولا تهزني
قال وهو بيقوم
_ انتي بنت دماغك فاضيه هروح اشرب احسن
مشكتش للحظة انه ناصبلي فخ وكنت واقفه وانا مطمنه وبعد خطوات لقيته قدامي ومحاصرني عند عمود كبير في نفس المكان اللي كنت فيه وبيقولي بنظرات حادة
_ مسكتك ومفيش حد في البيت ينجدك مني النهاردة ، اناااا دكتور مجانين؟
توترت من قربه الزايد ونظراته ف قولت
_ وسع
زاد في محاصرتي وقال
_ لا وجاوبيني مين ده اللي دكتور مجانين احكي خااايف ليه مش كنتي عامله فيها شبح من شويه
قولت وانا بصاله بربكة
_ مش هقول تاني بس وسع
_
_ وووسع
جيت ازقه ف مسك ايدي ثبتها في الحيط وقال
_ اعتذري
حاولت افك ايدي منه وانا بصاله وبدوب قدام نظراته وقربه ف قال
_ هتعتذري ولا لا
ازدادت لعابي بتوتر وقولت وانا عيني بتتفحص شكله
_ اسفه
_ اها عفونا عنكي بس لو لسانك طول علية تاني هلعقك من شعرك في السقف يا خلود مفهوووم
اومات بدماغي وبعد ما طالت نظرته تفحص لشكلي نزل جفونه وبعد عني وقال بعد ما رجع مكانه
_ اعمليلي قهوة ، اتحركي ، هتعملي تمثال عندك
#زيد
مش عارف رد فعلها كان ارتباك بسبب قربي منها ولا في حاجه تانيه انا مخدتش بالي منها معقول يكون لطفها من وقت ما رجعت بسبب مشاعر جواها ليه ولا بتخطط لحاجة ، بس مشاعر ليه وامتي دي مش بتطيقني وعمرنا ما اتفقنا ولا انا عملت حاجه تخليها تحس بحاجة ناحيتي
_ القهوة
قالتها وهي بتحطها قدامي وبعدين استدارت علشان تمشي ف قولت
_ خلود
رجعت بصتلي وقالت وهي بتبعثر نظراتها
_ ايه
_ مالك ، زعلتي؟
_ لا
_ مزعلتيش؟
_ انت عاوزني ازعل
_ لا بس مش بعادة متزعليش
_ المرة الجاية هزعل
قولت بإبتسامة وانا بتفحص تعابيرها
_ مفيش مرات جاية لو عقلتي
_ يبقي كتر خيرك
_ طيب مالك ، ليه وشك كده
_ اصلي مغسلتهوش ف تلاقيه مكشر شوية
_ هههههههه ، طيب روحي اغسليه
مشيت من غير ما تضيف كلمة علي غير عادتها ولما دخلت منسيتش تبصلي بصه سريعة قبل ما تقفل الباب
#جويريه
دخلت عليه ماما قعدت جمبي وقالت وابتسامتها علي وشها
_ ممكن اتكلم معاكي شويه
_اتفضلي
_ طيب هتكوني هاديه ولا هتخافي
_ في ايه يا ماما
_ مفيش حبيبتي بس بطمن انك هتكوني هاديه
_ هكون هاديه
_ طيب انتي متقدملك عريس
_ عريس؟
اتوترت وانا بكمل واقول
_ مين
_ بدر كلم ابوكي امبارح عنك
_ اه
_ قولتي ايه
_ لأ
_ ليه حبيبتي ده بدر بيحبك
_ انا مش هتجوز
_ مين قالك انك هتجوزي دلوقتي دي خطوبه وبس
_ مش عاوزه
_ طيب حبيبتي انا مش هضغط عليكي بس بدر طالب يشوفك ممكن تقعدي معاه وتشوفي عاوز يقولك ايه
_ حاضر
قالت بتفاجيء
_ موافقه
_ اه
مكنتش مصدقه اني وافقت ولا انا عارفه ليه وافقت بس يمكن كان عندي فضول اعرف اتكلم مع ريان ولا لا ولو اتكلم ف هل قاله حاجه ولا لا
#وفاء
طلعت من عندها كلمت بدر قولتله اللي قالته وقفلت ف لقيت بيجاد بيكلمني من عند الباب وبيقولي
_ والله عيب لما متخدوش رأيي
_ رأي ايه يا حبيب قلب ماما ، ده انت مشيتنا كلنا علي مزاجك ولا نسيت حكمك انه ميدخلش البيت
_ انا عملت كده ، ربنا يسامحك ، انا قولت يجي لما احنا نكون هنا امتي قولت ميجيش وحشه قوي انتي يافوفا
_ ده انا اللي وحشه
قال وهو بيحاوط رقبتي بدراعة
_ وانا اقدر اقول كده ده بابا هو اللي بيقول
رديت بنرفزه وانا بحاول ابعده
_ ابعد كده بتخنق ، يا ولد ابعد
_ ايه يا فوفا مطيقنيش ليه ابنك انا ولا لقيط
_ اه لقيط انا لقطتك يا ولد ااابعد خنقتني
بعد عني وقال
_ ماشي خليكي فاكره كلامك ده كويس خليكي فاكره انك دوستي علي قلبي ، ربما لم يكن شيء مهم لديكي لكنه كان قلبي
_ هههههههه يا ولد اخفي من وشي
_ اخفي بتقوليلي اخفي انتي ازاي ام
_ امممم
_ خلاص يا فوفتي بهزر المهم طبخالنا إيه
_ فراخ ومكرونه
_ بس
_ انت عاوز ايه
_ ولا حاجه انا هعمل لوحدي
_ عاوز ايه وانا اعمله
_ انا هعمل اللي انا عاوزه ، روحي استحمي انتي بس علشان ريحتك تخنق
_ ولد!
_ ايه يافوفا انا بوعيكي علشان الكبير لو شم ريحتك دي هينفر منك ويبص بره ويجيبلنا مرات اب وبعدين عيال ياخدو مننا الورث ومراته تسلطه علينا وتتهمنا تهم وحشه ف يطردنا من البيت ويغضب علينا شوفتي لو استحميتي هتبعدي عننا مشاكل قد ايه يلا روحي وبرفناتك ومكياجاتك بقا ولعلعي عاوزك تطلعي قمر
_ انت اهبل يابني
_ لو ابنك اه
_ لا اناهمشي بعقلي احسن
_ ايه ده ، طيب ورجليكي
_ بيجااااااد!!!
_ اسف اتفضلي
مشيت من عنده من غير ما اضيف كلمه علشان مش هخلص منه ودخلت استحميت ولبست لبس البيت العادي وبعدين طلعت لقيته بينهي مكالمه ولما بيشوفني بيقولي بقرف
_ انا قولتلك لعلعي ايه اللي لبساه ده عبايه بيتي
_ اللعلع!
قال وهو بيمسك دراعي
_ اه تلعلعي ، تعالي انا هلعلعك
رديت بنرفزه وانا بدفعه عني
_ بيجاد هضربك!!! انت مجنون يابني
_ ايه يا وفاء مش بنضفك علشان جوزك ميتجوزش عليكي
_ يابني اتلم انا جبت اخري منك
_ والله ما كان عندي جبتيه مني ازاي
_ ايه،، هو ايه ده
_ اخرك
_ وحيااااااة ربنا هفتح دماغك بطاسة انا ماشيه من وشك احسن
_ ماشيه من وشي ازاي هو انتي حب شباب هههههههه
محستش بنفسي غير وانا بسحب المغرفة واخبطة بيها فوق دماغه وصرخنا مع بعض انا من الخضه وهو من الالم
_ ياشيخه اتقي الله ، موتي هيكون علي ايدك
_ حبيبي انا اسفه والله بس انت خرجتني عن شعوري
_ يابختك
_ إيه
_ بتخرجي عن شعورك انا شعوري قافل عليه بالقفل مبيخرجنيش
قال كده وطلع يجري وسابني اضرب كف بكف
_ يارب لا تاخـدني لا تاخـ..... ولا بلاش ربنا يهديك
بعد لحظات الجرس رن ف سيبت الطبيخ وطلعت اشوف مين ولما خرجت من المطبخ لقيته بيحضن واحد وشه متداري عني بس عرفته هو بيجاد حتي لو الزمن غيره وشكله كبر وحتي لو مشوفتش وشه هعرفه.
وقفت مكاني رجليه مش سعفاني للحركة ناحيته دموعي بتجمع في عيني وصوتي بيتحشرج وانا شايفه اخويا واقرب حد ليه بعد بدر رجع بعد السنين دي كلها علشان يشوفني بعد ما باختياره باعني زمان
_ وفاء!
قالهالي بلهفه بعد ما عيني وقعت عليه وقفت للحظات متردده ارد ولا لا وبعد ما عجزت عن كبت عياطي دخلت المطبخ تاني وسيبتهم وقفت عند البتوجاز اكتم صوت شهقاتي قبل ما ينتفض جسمي فجأة لما بيحط ايده علي كتفي وفوراً زقيت ايده وانا بستدير ليه واقول
_ ابعد ايدك عني
قال بدموع وصوت متحشرج
_ وحشتيني قوي يا وفاء ، مكنتش متخيل اني هشوفك تاني
زدت في بكايا وكنت همشي لكن بيجاد ابني وقف في طريقي وقال
_ ارجوكي يا ماما اقعدي واسمعي هيقولك إيه
_ هيقول ايه!!! هيقول انه رجع يدور عليه بعد ما لقا نفسه لوحده ولا هيقولي هيعوضني ازاي عن كل السنين اللي عدت وهو سايبني
_ اسمعي ولو مأقنعكش انهي الكلام
قال مقاطعني قبل ما اتكلم
_ سيبنا دلوقتي يا بيجاد
_ حاضر
ربت علي ايدي ومشي ف لقيت بيجاد اخويا بيوقف قدامي ويقول
_ انا عارف ان اي كلام هيتقال مش هيرضيكي ولا هيمحي اللي حصل ، بس يمكن لو عرفتي السبب اللي رجعني من امريكا بعد ما قولت اني عمري ما هرجع تسامحيني
_ هه ، هيكون ايه السبب ده؟ ، ابهرني ، لا يا بيجاد والله ما في حاجه هتقولها هتمحي من دماغي فكرة انك تخليت عني بعد ما وقعت في كذا مصيبة من وراك
_ مش عارف ممكن تمحي ولا لا بس هقول انا اصلا راجع من امريكا علشان اقول
_ امم احكي سمعاك ، قول ياخوي
طال سكوتة قبل ما يقول بتنهيدة
_ قولتلك قبل ما اسافر انك مش هتحضري جنازتي وانك مش هتعرفي هموت امتي ولا هدفن فين ، وعمري ما خوفت الموت يجيني وانا قاعد لوحدي أو ان جثتي تعفن وملاقيش اللي يدفنها لأن انا عمري ما خوفت من الموت ومن وقت موت فاطمة وانا بترجاه من ربنا ، انا دايما كان خوفي علي اللي بحبهم وبس ودلوقتي بردو مش خايف علي نفسي ، انا خايف اسيب فاطمة لوحدها في الدنيا بعد ما اموت
صوتي مأسعفنيش لرد ودموعي شوشت رؤيتي ف قال
_ انا تعبان يا وفاء الموت بيحوم حوليه كل يوم ودعيت ربنا يمد في عمري لغيت ما اقابلك واوصيكي عليها
نطقتها بصعوبة
_ بتقول ايه .. انت ..
_ انا عندي تعب في القلب محتاج عملية نسبة نجاحها متتعداش الخمسه في المية بيقولولي اني مش هستحملها وهموت
ارتجف جسمي وحاولت اتكلم بس مقدرتش انطق صوتي كان معلق بين حنجرتي ف قال
_ انا مش بقولك علشان تشفقي عليه ، انا والله مش خايف ده انا كنت متمنيها من زمان ويمكن لولا وجود فاطمة مكنتش خدت اي علاج يأجل موتي ، انا بقولك علشان متسبهاش
كمل ودموعه بتسيل بغزاره
_ فاطمة ملهاش حد في الدنيا غيري انا ولو موت هتضيع لوحدها
زاد بكايا وانا بقول
_ بردو اناني وقلبك اسود ، حتي لما رجعت وبتموت مهتمتش بيه انا وبتفكر في ناس تانيه بس انا دلوقتي عاوزة اعرف حاجه واحده اتجوزت ازاي ، ازااااي جالك نفسك تجوز بعد ما زلتني علشان اتجوزت اللي حرمك من فاطمة اللي عامل انك مش قادر تنساها ، انت بتضحك عليه ولا بتضحك علي نفسك ده انا قولت عمرك ما هتجوز من حزنك عليها
بلع ريقة وقال بتردد
_ انا متجوزتش ، فاطمة مش بنتي
_ إيه!!!! مش بنتك؟ امال بنت مين؟
12
_ مش بنتي
_ امال بنت مين
_ بنت صديقة وجارة ليه في امريكا ، كانت حامل من حبيبها اللي خانها بعدين واول ما ولدتها بسبب كرهها لحبيبها ده كانت هتحطها في ملجأ ومش عاوزاها وللحظة وانا شايف البنت دي قدامي فكرت ان ممكن ربنا عايز يعوضني ويملا حياتي بيها بدل ما اعيش لوحدي ف قولت لست دي تخليها وانا هكتبها علي اسمي ، رفضت واصرت تحطها في ملجأ بس بعد ما الحيت عليها وقولتلها اني هاخدها منها واربيها لوحدي وافقت وكتبتها عليه انا وهي وبعدين الست دي مشت ومسألتش فيها تاني ، وانا فهمت فاطمة انها ماتت وهي بتولدها
_ مش ممكن ، اكيد ده تخريف ، مفيش ام تسيب ابنها
_ وانا هكدب ليه ، وبعدين ازاي مفيش امال اللي بيرموا ولادهم في الزبالة من اول ما يتولدوا دول اية ، صدقيني يا وفاء مش بنتي انا متجوزتش ولو شوفتيها هتعرفي انه مش تخريف البنت ملامحها اجنبيه مفهاش اي حاجة مني
_ ماشي مصدقاك ، بس انا اوافق ليه اهتم بواحدة مليش علاقة بيها
_ علشاني
_ وانت عملتلي ايه علشان اهتم بيها عشانك
_ معملتش
_ طيب امال بتطلب مني ليه
_ كنت فاكر اني لسه بعز عليكي
_ كنت قبل ما تتخلي عني
قال بتنهيدة
_ماشي يا وفاء ، مش مشكلة ، هي ليها ربها
قال كده وخطي خطوات ناحية الباب ف وقفته وانا بقول بنرفزه
_ يااخي حرام عليك ، انت إيه!! ، يعني تغيب كل السنين دي ولما ترجع متهتمش حتي تسأل عاملة إيه
مبصليش ف كملت بانفعال
_ انت لا يمكن تكون بني ادم ، انت إيه رجعك
كملت وانا بتقدم ناحيته وازق كتفة
_ إيه رجعك تاني !!!
_ رجعت ، ومش محتاج اسألك باين قوي انتي عامله اية ، باين علي شكلك انك متعبتيش وان بدر مريحك ، انا لو كنت سألتك كنتي هتقوليلي اللي يثبت اني غلطت في حقه ، ده غير ان في حاجات كتيره اهم من السؤال ده ، كنت هقولها ولو اتفقنا كنت هستغل كل دقيقه بقيالي في السؤال عن حالك
_ بردو ندل ، وااالله ندل
كملت وانا بضرب قبضتي في كتفة
_ بس انا هكون احسن منك واوقولك موافقه مش هسيبها
غمض عيونه وتساقطت دموعه بغزارة ف قولت ببكا
_ ولا هسيبك انت تموت
كملت وانا بحضنه
_ مش هسيبك تموت ، انا هجبلك احسن دكتور قلب يعملك العملية دي
_ انا موتي مسألة وقت واي عمليه هتأجل منه ، المهم عندي اني اموت وانا مطمن انها هتكون بخير
حررني من بين ايدية وقال
_ ومش هطمن عليها غير معاكي انتي ، وكفاية قوي عندي انك وافقتي كدة ردتيلي روحي
#بيجاد
بعدت عن المطبخ ومفسرتش كلامهم غير بعدين وهما بيزعقوا وبعدين بيتكلموا عن عملية حاولت متدخلش واعرف من ماما بعدين بس مقدرتش ف دخلت عندهم ولما شافوني مسحوا دموعهم ف قولت
_ عملية إيه
ماما كانت هتتكلم بس هو مسك ايدها ومنعها وقال
_ مفيش حاجه
كمل بإبتسامة
_ بس ازاي ده ابنك ، ده اطول مني
بصتلي بصة سريعه ومردتش ف قال
_ دلوقتي جه وقت السؤال ، عاملة إيه في حياتك
بصتله بقرف وقالت
_ الحمدلله بدر مريحني ومخلنيش احتاج لحد ربنا يخليهولي ابن الاصول
_ هههههههه ده اللي انا قولته من ثواني
قالت وهي بتضرب كتفة
_ ندل ، تعاله هعرفك علي جويريه
مشينا من المطبخ وقعدنا في الصالة انا وهو في الوقت اللي ماما دخلت تنادي جويريه ف قولت
_ حضرتك كويس
_ اه يا حبيبي كويس ، انت عامل اية وبتشتغل إيه
_ انا معيد في الكلية
_ ما شاللة ده انت كنت شاطر علي كده
_ بيقولوا
_ وطبعا مش متجوز
_ لا والله لسه
_ خاطب
_ لا بردو
_ هتعمل زي ابوك ولا ايه
_ لا بس لسه مقابلتش بنت الحلال
_ ياه البلد كلها مفهاش بنت حلال واحدة
_ هههههههه في كتير بس مفيش واحدة مناسبة ، يعني ليه شوية مواصفات عاوزها في اللي هرتبط بيها
_ وهي ايه بقي
_ يعني ، مؤدبه ، متعلمة ، عاقلة ، جميلة ، جميلة جداً
_ لا كده نفصلك واحده تفصيل
_ هههههههه وده رايي انا كمان بس مفيش حاجه بعيدة علي ربنا
_ ونعم بالله
_ وانت ازاي حضرتك
_ الحمدلله
قولت وانا من جوايا قرفان
_ والانسة فاطمة ازيها
_ الحمدلله بخير
_ دائما يارب
_ اهي جت
كانت دي كلمة ماما قالتها وهي ماسكه جويريه وبتقدمها ليه ف وقف وقال بإبتسامة
_ ما شاللة انتي يا وفاء نسخة منك بس هي احلي شوية شويتين
قالت بقرف
_ اه ماهي واخده حلاوة من ابوها كمان ، بدر حبيبي ربنا يخلهولي سندي في الدنيا
_ امممم مش هنخلص ، ازيك يا جويرية
_ سلمي يا حبيبتي سلمي متخافيش
#جويرية
اتقدمت وانا حاسه بتوتر شديد وضيق نفس ويدوب حطيت ايدي في ايده وسحبتها بسرعه ورجعت مكاني امسك في ماما ف قال
_ ايه ده مالها
قالت ماما
_ بتخاف من الناس
_ وبتخاف ليه ، حد بيضربك في الناس دي يابنتي
قال بيجاد
_ اه بناخد ورديات في تعذيبها طيخ طاخ ، انا بحب اتضرب فيها علي الملاكمة ، وبابا بيحب المبارزه بالسيف ، وماما بقا هواياتها المفضلة في التعذيب السكاكين بتحب تنشن
ضاق نفسي من كلامه وزاد توتري وكنت همشي ف مسكت فيه ماما وقالت
_ رايحه فين استني ، ده خالك
قال
_ مالك ياحبيبتي خايفه من ايه
لمعت دموعي وانا بقول
_ عاوزة ارجع اوضتي
كملت باختناق
_ سيبيني
_ طيب ياحبيبتي روحي واهدي مفيش حاجه
سبتها ودخلت اوضتي وقفلت الباب علي نفسي قعدت علي السرير دموعي بتسيل بعد ما كلام بيجاد رجع يفكرني باللي حصل ورجعني لكام سنة ورا وكأني عايشة نفس التفاصيل في الوقت ده وبعد شوية قومت كنت عاوزة اشم هوا بعد ما حسيت ان نفسي ضاق اكتر ف فتحت الشباك اللي انا تقريبا مبفتحهوش و وقفت شوية ابص لشارع الخالي من اي انسان قبل ما المح واحد ظهر من العدم وبعدين شوفته بيدخل بيت عمي السبع ، وقتها حسيت نفسي ضاق اكتر والدنيا بتلف بيه لما عرفته ، كان ريان مفيش غيره حتي لو كبر ومشوفتش وشه بردو هعرفه وفجأة رجليه مشالتنيش و وقعت مستحش بنفسي تاني
#ريان
كنت راجع البيت واول ما وصلت المدخل استدرت علشان ابص لشباكها زي عادتي في كل مره مع اني من وقت ما رجعت مشوفتهاش واقفة عنده وكنت بشوفها زمان بس ومكنتش متوقع اشوفها تاني ولكن المفاجأة اني شوفتها كانت واقفه وبتبص لجهة التانيه
كبرت وبقت انسة جميلة ولسه بنفس الهدؤ والرقة رغم السنين اللي عدت
حسيت قلبي بيدق بسرعه ورجليه خدتني خطوات ناحية العمود المقابل ليها ، كنت بفكر اشاور او اصفر علشان تشوفني بس فجأة جه علي بالي بدر صاحبي وخطيبها ف وقفت وديرت ضهري ليها قبل ما تشوفني ورجعت بيتنا
#وفاء
علي قد فرحتي برجوعه علي قد ما الحزن عشش في قلبي بسبب كلامه عن الموت ومفيش حاجة كانت مهدياني شوية غير شكي بأنه بيكدب مكنتش مصدقة قوي انه بيتكلم جد وبعد ما دخلت جويرية طلبت من بيجاد يجيبلي حاجة من محل قريب كنت عايزة اوزعه علشان اعرف اتكلم مع بيجاد اخويا في الموضوع ده لاني لقيته مش عايز حد يعرف ف قعدت جمبه وقولت
_ بيجاد ، قول انك كنت بتكدب عليه في الكلام اللي قولته انت مش هتموت صح
ابتسم ابتسامة خفيفه وقال
_ كلنا هنموت يا وفاء محدش عارف مين هيموت قبل التاني ، بس انا من الناس اللي مستنية موتها ومتوقعاه في اي وقت
_ يعني الكلام اللي قولته حقيقي ولا كدب
_ لا دي حقيقه انا اكتشفت التعب ده من سنتين بقيت ماشي بالعلاج علشان أأجل موتي لغيت ما اقابلك وحتي فاطمة متعرفش
نزلت دموعي وانا بقول
_ طيب ليه مجتش من اول ما عرفت كنت وقفت جمبك وكنا لحقناه
_ وانا مش عايز الحقة مش عايز اعيش
_ ليييه بلاش عشاني ، علشان فاطمة
_ البركة فيكي بقا
_ بيجاد حرام عليك انت طول عمرك معذبني كده
_ ههههه مش هعذبك تاني
_ يعني ايه هتستسلم للموت وتسيبني تاني
_ اكيد لا ، انا اديني باخد العلاج ودي اقصي حاجة ممكن اعملها، اي عمليات هتموتني
_ مش شرط في كتير دكاترة يقدروا يعالجوك ، هنروح لدكتور مجدي يعقوب بنفسة يعملك العملية بس حاول عشاني
ابتسم وقال
_ مش يمكن لو عملتها اعجل بموتي ، انتي عارفه ان كل واحد ليه اجل وحتي لو تعبان وبحتضر مش هتطلع روحي غير في المعاد المحدد دي حكمة ربنا اللي مفيش حاجه هتغيرها
كمل وهو بيمسك ايدي
_ متشغليش بالك هعيش اللي ربنا كاتبهولي ، انا قبل كده يعتبر موت ورجعت للحياة ويمكن مموتش المرة دي مين عارف
ذات دموعي وانا بقول
_ ربنا يبارك في عمرك
قال بعد ما باس ايدي
_ ربنا يخليكي ليه ، كنت عارف ان قلبك طيب ومش هترجعيني خايب
_ مقدرش ده انت اخويا يا بيجاد
قال بإبتسامة
_ ربنا يخليكي ليه يا وفاء ، وسامحيني علي اللي عملته
_ سامحتك يا حبيبي
_ ربنا يخليكي ليا وميحرمنيش منك
كمل وهو بيخرج محفظته
_ مش عاوزه تشوفي فاطمة
_ اشوفها
_ اهي
خرج صورة من محفظته لبنت قمة في الجمال جمالها غربي ولكن محجبة ف قولت
_ ما شاللة جميلة قوي قوي يا بيجاد ، والله ما حد خسران غير امها اللي سابتها
_ انا اللي كسبان
قولت بتردد بعد ما جه علي بالي ان هو اللي رباها لوحده وهي بكل الجمال ده
_ عاشت معاك لوحدها
_ ايوه
_ و ولا مره حست انك مش ابوها
_ لا لأن انا كنت ليها اب بجد
_ وانت اعتبرتها بنتك بشكل كامل ولا..
قال بمقاطعة
_ عارفك بتفكري في ايه، بس لا يا وفاء ، انا عيني عمرها ما تروح لواحدة غير فاطمة ، فاطمة دي بنتي وبس
_ بس انا سمعت انك خليتها تنتقب وعملتها نسخة تانيه من فاطمة
_مخلتهاش كل حاجه هي اللي اختارتها بنفسها ، تعليمها ، لبسها ، حجابها وبعدين النقاب انا كنت بعلم بس وسايبلها هي الاختيار
_ ومعقول اختارت النقاب في بلد اجنبي واكيد مفيش حد هناك مسلم من اساسه
_ في مسلمين بس الحجاب مفيش في الولاية اللي كنا فيها ، وكمان انا كنت عملها دولة لوحدنا ف الشقة ، بره امريكا وعاداتها ، وفي الشقة مصر ومقام سيدنا الحسين كمان
_ هههههه وعلي كده بتتكلم مصري ولا انجليزي
_ بتعرف انجليزي طبعاً بس كلامها معايا كله مصري مش هتشكي للحظة انها عاشت بره ، دقيقة هكلمهالك اخليكي تسمعي بنفسك
_ ماشي
اتصل بيها وقال
_ ايوه يا بطة ، عاملة ايه يا حبيبتي.... انا الحمدلله... لأ لسه هناك ، اه ، طيب في واحده عاوزه تكلمك... ههههه اه هي خدي اهي معاكي
اداني التليفون حطيته علي ودني وقولت
_ ازيك حبيبتي
_ عمتي؟
_ هههههههه اه حبيبتي انا، عاملة ايه يا روحي
_ الحمدلله مبسوطه قوي اني بكلم حضرتك ، متعرفيش بابا شوقني اشوفك قد ايه
_ يااحبيبتي وشوقني انا كمان ولما سمعت صوتك اشتقت اكتر، بس والله ما ليكم حق كنتي جيتي معاه
_ انا قولتله اجي معاك قالي هروح انا اول مره وبعدين اخدك المره الجايه
_ مش مشكله مستنياكي تيجي في اقرب وقت ، عاوزه اشوفك
_ وانا كمان نفسي اشوفك قوي ، ان شاءلله هنجيلك قريب
_ تنوري الدنيا كلها
_ متشكرة ، بنتك عاملة ايه، سمعت انك معاكي بنت
_ ايوه معايا جويرية وهي كويسه لما تيجي هتشوفيها
_ ياريت ، نفسي اشوفكم كلكم
_ واحنا كمان والله ، بس انتي طلعتي جميلة جداااا وكويس انك منتقبة مكنتيش هتسلمي من المعاكسات
_ ههههه وانا اجي جمبك ايه ، انتي اللي جميله انا شوفت صورتك
_ هههههه طيب ابقي تعالي عشان تشوفيني لما كبرت و وحشيت بقا
اتكلمت معاها شوية لقيت انها لطيفه جداً وذوق بالإضافة لشكلها الجميل وبعد ما قفلت دخل علينا بيجاد قعد جمبنا شوية ف قولت
_ مش انا كلمت فاطمة بنت خالك
ابتسم ابتسامة ظاهريه
_ اها عظيم
_ بس جميلة قوووووي
_ طبعاً طبعاً ، ربنا يخلي
قولت وانا بقدمله الصورة
_ شوف اهي....
قبل ما يبص بيجاد شد ايدي وقال
_ اسف بس هي منتقبة دي حتي لبست النقاب قدامه
قولت باحراج
_ اسفة ، بس ازاي لبسته قدامه
_ مبتقلعهوش قدام اي حد
#بيجاد
كان نفسي اتقمص من تصرف خالي بس الحقيقة انه عتقني من شوفتها ، مكنتش حاب اشوفها ولا كان عندي ذرة فضول اعرف شكلها وبعد وقت قام وقال
_ امشي انا بقا
قالت ماما
_ لا تمشي فين انت هتستني يكون بدر جه
_ أكيد هشوفه في مرة تانية ، بس مش هقدر اتأخر علي فاطمة اكتر من كده ، هي لوحدها ومتعرفش حد هناك
_ لا كده مينفعش ، انت تجيبها وتيجوا تسكنوا هنا
_ ونسيب بيتنا لمين
_ يعني هو هيتسرق ، اسمع الكلام احنا شقتنا القديمه لسة موجوده وبعيدة عننا ب عشر دقايق مشي هتيجي انت وهي تقعدوا فيها
_ بعدين نشوف الموضوع ده ، خلي بالك من نفسك وسلميلي علي بدر وجويرية
_ يوصل.. يلا يا بيجاد وصل خالك لغيت البيت
_ لا ملوش لزوم
قولت
_ لا طبعاً ليه هوصلك بالعربية بدل ما تاخد مواصلات
قالت ماما
_ صح ، متسبهوش غير قدام البيت
قال
_ ماشي يا وفاء متشكرة ... دقيقة عاوزك
خدها بعيد اتكلموا شوية وكنت شايفها بتطمنه وكانه بيطلب منها حاجه ، مكنتش سامع اللي بيتقال بس قدرت اتوقع انه طلب منها تحفظ سر ، وانا مدققتش ولا اهتميت اعرف السر ده وبعد ما خلصوا خدته ومشينا
#بدر
قالي عمي اروح ازورهم وانا مضيعتش وقت وسيبت الشغل وروحت فوراً لقيت مرات عمي لوحدها ولما سالتها علي بيجاد قالت راح يوصل خاله وبعد كلام عن خاله اللي رجع فجأة ده قالتلي هندهلك جويرية تسلم عليها ودخلت وسابتني مستني شوفتها بلهفة قبل ما تصرخ باسمها وتقولي الحقني جريت عليها لقيت جويرية واقعة علي الأرض ومغمي عليها شيلتها علي السرير وفوقناها وفجاة اترمت في حضن امها وبقت تبكي بجسم مرتجف وخوف حاولت اتكلم بس مقدرتش وامها قالتلي اطلع وطلعت وانا كلي قلق وبعد وقت كبير مرات عمي طلعت لوحدها وقالت
_ بقت كويسه
_ هي مالها ، ايه خلاها يغمي عليها
_ مش عارفه والله
_ طيب وكانت خايفه ليه كده
_ معرفش ، مقالتش
_ هي نايمه دلوقتي
_ لا صاحيه
_ طيب ما تندهيها
_ قولتلها تيجي مردتش
قولت بتردد
_ ممكن طيب ادخلها .. دقيقتين وهطلع
_ ماشي اتفضل
_ متشكر قوي
دخلت عندها لقيتها قاعدة علي السرير مغطية نص جسمها بالبطانية ودموعها في عينيها ف قولت وانا بقرب
_ عاملة اية دلوقتي
نزلت جفونها ومردتش ف قولت وانا بقعد قدامها
_ إيه اللي حصل خلاكي توقعي وتخافي كده
كملت في سكوتها ف قولت بتنهيدة
_ جويرية ، انتي لازم تتكلمي وتقولي حاسة بأية واية اللي مخوفك كده ، قولي علشان نساعدك ، العماره فيها سبع رجاله وست ستات يعني خوفك ده هيتبخر قدامنا بس احنا نفهم ليه وكلنا جمبك وهنحميكي ، الكل عنده استعداد يعمل اي حاجة علشان تخرجي من الحالة اللي انتي فيها دي
ارتجف فكها من غير رد ف قولت
_ طيب قوليلي سبب واحد و اوعدك هساعدك كلنا جمبك وهنساعدك
رفعت جفونها وقالت بصوت متحشرج
_ مفيش أسباب
_ في حاجه في الدنيا من غير اسباب ، جويرية! علي الاقل واحد بس تشاركيه مخاوفك ده هيشيل عنك كتير وهيساعدك ، اي حد ترتاحيلوه المهم تتكلمي
_ مفيش حاجة اقولها
_
كملت بعد لحظات من الصمت
_ ممكن اطلب منك طلب
_ إيه
_ توافقي علية
سكتت ف قولت
_ انا مش عايز اكتر من سبب يخليني اتكلم معاكي ومفيش اي سبب تاني غير الخطوبه والجواز
_
_ وافقي وانا هجبلك مجموعة قصص نفس نوع القصة اللي رشحتهالي ، انا مستني قصة هتوصلني متاكد انها هتعجبك
_ قصة إيه
_ لسة مش عارف بس انا طلبت من ريان يشوفلي قصص تشبه للقصة اللي بتحبيها
بعثرت نظراتها وهي بتقول
_ انت قولتله علي القصة اللي بحبها
_ قولتله علشان يساعدني في اختيار القصة المناسبة اصل هو بيكتب قصص وعارف قصص كتير
قالت بتوتر
_ بيكتب قصص ، اه طيب
_ طيب إيه موافقه
_
_ هجبلك كل القصص اللي تحبيها ومش بس قصص ده انا هشاركك كل اهتمامتك
_ احم ، ماشي بس انا عاوزه...
_ ايووووه قولي اللي انتي عاوزاه هجبهولك
_ عاوزه اشوف القصص اللي بيكتبها ريان ، انا اصلي معرفش ناس بتكتب نفسي اشوف حد بيكتب
_ بس كده حاااضر هجبلك كل القصص اللي عنده حتي الرعب هجبهملك
_ مبحبش الرعب
_ ماشي هخليه يجيبلي قصص تانيه
_ ماشي
_ طيب موافقه علي الخطوبه ولا لا
_ مـ.....
_ موافقه؟!
سكتت شوية وبعدين اومات بالموافقة ف قولت بسعادة
_ انتي وافقتي بجد!!! ، بصي ، عمرك ما هتندمي علي قرارك ده ابدا ابدا ، جويرية!!!! انا... يالهوووي انتي مبتهزريش معايا صح
نزلت جفونها بدون اي تعابير للفرحه ف قولت بعد ما تلاشت ابتسامتي
_ انا فاهم الحالة اللي بتمري بيها و اوعدك هعمل كل اللي اقدر عليه علشان اشوف السعادة علي وشك لموافقتك عليه
رجعت تبصلي وقالت
_ انت قولت خطوبة بس
_ خطوبة بس لغيت مانتي بنفسك تطلبي نتجوز
_
_ طيب ممكن تيجي نقعد في الصالون
_ لا
_ ماشي يا جويرية ، بعدين هنقعد كتيرر ، انا دلوقتي هروح اجبلك القصص واي حاجة هتطلبيها هتلاقيها قدامك في لحظتها بس انت قولي
#ريان
كنت قاعدة بفكر فيها وابتسامتي مش مفرقاني لأني اخيرا ً شوفتها وفجاة ضرب جرس التليفون يعلن عن نهاية بسمتي ونهاية اي امل ممكن يجمعني بيها .. كان بدر متصل يقولي بسعادة
_ عاوز اشوفك دلوقتي حالا
_ لية
_ عاوزك ضروري ، وهات كل القصص بتوعك معاك
_ ليييه
_ جويرية وافقت ، بس عاوزة تقري القصص بتوعك
زاد توتري وانا بقول
_ ليه
_ ليه ايه انت علقت
_ ليه عاوزة القصص بتاعتي
_لما عرفت انك بتكتب حبت تقراهم ، هاتهم بس
سكت شوية افكر في معني كلامه ، يعني ايه لما عرفت اني بكتب حبت تقراهم ماهي عارفه اني بكتب وقرتلي كتير... معقول تكون لسه فاكره القصة ومستنياها
_ الوووو
قالهالي بدر فوقني من شرودي ف قولت
_ ايوه معاك ، ماشي ماشي هجبلك كام قصة
_ ماشي مستنيك قدام العمارة
_ تمام
قفلت معاه وخدت كل القصص اللي قرتهم هي زمان وكام قصة رعب خفيف وطلعتله بيهم لقيته مستني هناك ف ادتهمله وقولت
_ اهم قصص رومانسيه علي دراما ودول رعب خفيف عشان لو بتخاف يعني
قال وهو بيقلب فيهم
_ طيب القصة اللي حكتلي عنها فيهم
_ لا
_ ليه
_ دي هدية لواحد صاحبي وعدته محدش يقراها قبله
_ ياما فاضي ، بس ماشي دول كفاية دلوقتي
_ ماشي بس ابقي رجعهم
_ طيب
#جويرية
من أول ما جابهم خدتهم منه ودخلت اوضتي وبقيت اقلب فيهم وادور عن قصة جديدة مقرتهاش قبل كدة وملقتش غير رعب ، وفضولي خلاني اقرا كام سطر فيهم يمكن تكون واحدة منهم ، دورت في كل القصص عن اسمي ملقتش ، كنت عايزة اعرف كتب فيها ايه بس ملقتش اي حاجة تخصني ومقدرتش اسأل بدر باي طريقه عن القصة دي
#ريان
لو كنت بعتهالها كانت عرفت اني بحبها ، كانت عرفت اني ادمنت المخدرات ، كانت عرفت كل حاجة حصلت وبفكر فيها و وقتها لأما كانت هتكرهني لأن حياتي كلها مفهاش ميزة اتحب علشانها وفاشل او كانت حبتني بعد ما تعرف اني فضلت سنين برجع اخر اليوم اكتب اللي حصل معايا واوصف شعوري لاشتياقي ليها وابعتلها في كل فصل رسالة تملا خمس صفحات ك اعتراف بمشاعري ليها، وفي الحالتين مبقاش ينفع تقراها ، بس اللي انا مش فاهمة هي ليه فهمت بدر انها اول مره تعرف اني بكتب، وليه لسة محتفظة بالقصة بتاعتي وبتحبها ، معقول تكون بتحبني وكانت مستنياني زي ما انا كنت مستني ارجع واشوفها طيب وبعدين مهما كان شعوري او شعورها نحيتي ينفع اخسر بدر عشانها ده اللي قولته ل اسراء قبل ما تقولي
_ لو هي عاوزاك وانت عاوزها مش من حق بدر يزعل
_ انا بخمن متنسيش انها وافقت عليه
_ اه صح ، مش عارفه بقا ، يمكن هي اتكسفت تقوله ان كان ليها كلام معاك وطلبها انها تقرا قصصك لانها متوقعه انك كتبت جديد او أنك كملت القصة اللي قولتلها عليها
_ يمكن وده التحليل الأقرب
قالت وهي بتمسك ايدي
_ متزعلش نفسك ربنا هيرزقك باحسن منها
_ عادي
كملت بتنهيدة
_ انا بس كنت بحسب كل ساعه وكل دقيقه علشان ارجع واشوفها ، وقضيت سنين انمي حبها في قلبي بالكتابة ف مش سهل اني انسي
كملت بحزن
_ بس كده تمام ، لايقة علي حياتي وانا امتي اتعودت اوصل لحاجة انا عاوزها
قالت وهي بتحضن ايدي
_ ريان انت كويس مش فاشل والله انت بكتباتك دي اسمك فنان وقادر ربنا يفتحلك باب خير مين عارف
_ ههههه فنان اه ، شكلك ناسية ان كتباتي دي هي السبب في اللي انا فيه، هي السبب في كرة بابا ليه ، هي السبب في اني اترميت علي شلة جرتني لسكة المخدرات ، وهي السبب في اللي انتي فيه
_ لا مش هي السبب ، انا اللي عملت في نفسي كده انت ملكش دعوة والله ، انا اللي كان لازم اخد بالي متغاشمش
ابتسمت بخيبة وقولت
_ انتي عارفه لو كرهتيني زي ابوكي كان اهون عليه من كلامك ده ... حمليني ذنبك شوية
قالت والدموع بتسيل من عينيها
_ انت ملكش ذنب علشان احملهولك انتـ....
قاطع كلامنا دخلت بابا علينا ولما لقاني وزع نظراته بينا وبعدين قال بجفا
_ قاعد عندك بتعمل ايه
قولت وانا بقوم
_ قاعد مع اسراء
_ اممم ، طيب
بصلها ورجع بصلي وقال بجفا
_ تعاله ، روح هات طلبات البيت يمكن بشر يجي في اي وقت واهو يلاقي حاجه يشربها ، بلاش نضيع الفرصة دي كمان زي اللي قبلها
بصتلها ف اومات بجفونها تهون عليه تلمحاته ف قولت وانا بتقدم ناحيته
_ حاضر
وقفني بعد ما خرجت من الاوضه
_ معاك فلوس...
وقفت وبصتله من غير رد ف قال وهو بيطلع من جيبة
_ معكش، هتجيب منين انت فاكر ان الكتابه وحبستك طول النهار في اوضتك هتجبلك فلوس او تصرف علي بيت ، خد
طالت نظرتي للفلوس ف مسك ايدي وضربهم فيها وهو بيقول
_ امسك ، شد عليهم كده!!! الفلوس دي الرجاله بتشقي علشان تجيبهم
ضميت ايدي عليهم من غير ولا كلمة ف قال
_ يلا واقف ليه ولا اروح انا
اومات بدماغي ومشيت من غير ولا كلمة ومع ان ده تعاملنا من وقت اللي حصل بس مقدرتش اعتاد المعاملة دي كل مرة بمشي من عنده مكسور ..
وحاولت كتير اغير حياتي يمكن اعجبه واتعفي من طريقته دي بس كنت بفشل ، مفيش شغلانه اشتغلتها فلحت فيها وكله بسبب الحالة اللي حصلالي بسبب الكتابة عامل زي اللي حابس عقلة في كهف مظلم مش شايف النور ولا قادر اتواصل مع حد ولا ليه خلق اتعامل مع الناس ، هي اسراء بس ، وكنت فاكر ان بدر هيرجع صاحبي زي زمان بس للأسف جويرية بقت بينا ومهما احكيله مش هقدر احكي ربع اللي عندي
#هاجر
مع كل محاولاتي اني اكون هادية ومفكرش وبردو مش قادره حاسه بغيظ ونار والعة جوايا وفي وقت كنت انا لوحدي في البيت بقيت رايحه جايه في الشقة بحاول اطلع كمية العصبية اللي عندي باي شكل وبردو مقدرتش ف طلعت فوق وانا ناوية اتكلم معاه واخرج طاقة غضبي فيه ولكن لما روحت وسألت عنه قالولي في الشغل وكنت همشي ف وقفني صوت زيد وهو بيقولي
_ مااالك
_ مااالي
_ حاسك شايطة ومحتاجه جردل مية يطفيكي
سكت وحاولت اخد نفس عشان اهدي ف قال
_ ايه اللي حصل
قولت وانا بتقدم عنده
_ مفيش
_ كده مفيش
_ مفيش حاجة ، عاادي ، متضايقة اية مش بتضايق
_ لا بتضايق ، طيب اسيبك شكلك مجنونة دلوقتي.
رجع يبص للاب توب متجاهل وجودي وبعد دقيقه وصلني رسالة علي مسنجر لقيتها رسالة منه لأني للأسف في لحظة ملل سجلت دخول علي حساب اسيل ونسيت افتش في رساليهم وكمان نسيت احذف الحساب وده خلاني اتوتر جداً واخبي شاشة التليفون ف بصلي وقال
_ مالك
قولت بتوتر
_ مفيش حاجه ، امال فين خلود انا دخلالها
سيبته ودخلت عندها لقيتها ماسكه التليفون ومبتسمه ولما شافتني اتعدلت وقالت
_ هاجر ، تعالي
قعدت جمبها وقولت
_ بيكلمك
_ مين
_ زييييد هو في غيره
_ ايوه
_ كنا هنتاخد كلبوش لاجل الحظ الاسود كنت مسجلة دخول علي الحساب ده و وصلني رسالة منه وانا جمبه
_ يا نهار اسود وخد باله
_ لا ربنا ستر ، بس في ايه انتي ناوية تكملي في الحوار ده كتير
_ ما انا قولتلك اني عاوزه اثبتله انه دكتور فاشل
_ دكتور فاااشل ، امممم طيب
_ مالك
_ مالي
_ شكلك مش مصدقاني
_ لا طبعاً مش مصدقاكي ، انا مش بفتش نهائي عندك بس متاكده ان كلامك معاه عاجبك
_ ولا عاجبني ولا حاجه عادي ، كل القصة اني مبسوطه بالمقلب اللي بعمله فيه
_ طيب ياختي
سابت التليفون وقالت
_ مالك ، حساكي نفسك تتخانقي
_ ايوه انا نفسي اتخانق ، نفسي اكسر البيت علي اللي فيه شوووفتي الحيوان عملي بلوك ومسألش فيه عشان اسراء ، يبيعني انا عشان واحده ميعرفهاش
_ طيب اهدي ، مالك
_ ماااالي ايه انتي كمان بقولك عملي بلوك
_ طيب ما تقابليه وتعتذريله
_ مين فينا اللي يعتذر ده قالي هيسيبها وطلع بيضحك عليه وجه قدام اهله خلي منظري زبالة
قالت بإبتسامة
_ طيب اهدي بس وقوليلي ، انتي زعلانه علشان اية بالظبط
_ من كل حاجه
_ عشان عملك بلوك
_ ده سبب من الاسباب
_ المفروض ميكونش في سبب غيره الباقين شيء طبيعي جداً لواحد هيتجوز ولا انتي بقا في حاجة في دماغك كدة ولا كدة ولا كدة
_ خلود انتي بتستهبلي وقولتهالك قبل كده اللي بيني وبين بشر كبير قوي اكبر من حب وكلام فاضي ، مش هكون مزوداها لو قولت ان بشر عيني لدنيا ، هو اللي عودني علي كده ، طول عمره بيهتم بيه ولا كأني بنته اللي محتويها بالكامل ، تخيلي يبعد عني دلوقتي علشان واحده غريبه
_ بس هو مش ابوكي ، ولا اخوكي ولا عمك وطالما مفيش التلاته دول يبقا اي حاجه تاني بعد كده هتتحط تحت بند الحب ، عيشي الواقع
_ حب
_ اه
_ لا انتي فاهمه غلط
_ انتي اللي مش فاهمه ، الحب مش شوية جنان ورسايل رومانسيه و ورد ، الحب ده عالم تاني ورابط كبير بين اتنين زي اللي بينك وبينه ، انتي محتاجه ايه علشان تعرفي انك بتحبيه ، عارفه لو صح اخ والله كانت فرحتك ما ساعتك دلوقتي كنتي زغرتي وجيتي تجري عليه علشان تساليني عن شكل الفستان اللي يناسبك مش تنهاري كدة
_ واذا حب
_ لا مش واذا حب ، هو حب فعلاً ، طالما مش عاوزاه يتجوز يبقي حب
يمكن كلامها صح بس علشان استوعب ان حبي لاخ وعم يتحول لحب عاطفي محتاجه وقت ازاي كنت بتعامل معاه علي انه اخ وطول عمري بحب بدر اجي دلوقتي اقول بحبه هو، الموضوع صعب واصعب لانه هو بيعتبرني اخته وبيحب واحده تانيه
#بشر
رجعت العمارة ولما وصلت بيت عمي شبل وقفت للحظات ابصله واتمني تطلع واشوفها مع اني قررت انسي بس كل حاجه جوايا رافضة ونفسي ارجع اكلمها واشوف جنانها ودلعها عليه واستغلالها ليه كل يوم ، وبعد لحظات وانا علي نفس الوقفة سمعت صوت خطوات جاية من فوق ولما بصيت لقيتها نازله خفيت توتري بسرعة وطلعت كام سلمة وانا بمنع نفسي ابصلها بس تفاجات بيها بتعوق طريقي وبتمنعني اعدي ف قولت
_ ابعدي عن طريقي
_ عاوزة اتكلم معاك
_ قولتلك مش عاوز اسمع ، الكلام بينا انتهي
_ ليه ، علشان قولتلك تسيبها يمكن تلاقي واحده احسن ، ولا علشان عاوزة مصلحتك
_ لا، علشان خسيسه ، علشان كنتي عارفه اني رافض الجواز لأني بحب واحده تانيه ومستني اللي يمكن تعجبني و ارتحلها وتنسيهاني كنتي عارفه ان النقطة دي مهمة قوي عندي وبردو بقيتي تجري ناعم معايا علشان اوافق اتجوز وحبيب القلب اللي مش حاسس بيكي يرجع البيت ، وبعدها عاوزاني اسيب البنت اللي ملهاش ذنب في اللي بيحصل ، بعد ما قالت انها مش موافقه خوف من اني ارفضها وانا قولت عوزها ، اسيبها ازاي وشعورها هيكون ايه!!
_ انا قولت كده علشان حسيت ان في ضغط علي اعصابك انت عارف اني عمري ما كنت بالخسة دي
_ طول عمرك خسيسه بس مش واخده بالك
انسابت دموعها وهي بتقول
_ ليه امتي كنت خسيسه معاك
_ كتير قوي ، بس الغباء مني انا ، انا اللي كنت ماشي ورا عيله
_ ده انت شايل في قلبك كتير اهو، طيب مكنتش تقول ليه ، وليه متقوليش موقف واحد كنت خسيسه معاك فيه
_
قالت بدموع
_ فهمني طيب عرفني غلطي
ازدردت لعابي وقولت بتنهيدة بعد ما استوعبت كلامي اللي ملهوش اساس
_ تصدقي وانا في وقفتي دي وبعد ما قولتلك الكلام ده اكتشفت ان انا الغلطان وانك مغلطتيش في حاجه ، الغلط من عندي انا وبس ، بس كان نفسي بعد الصبر ده كله اتفهم ويتحس بيه وبمشاعري ، مع ان والله كل حاجه كانت واضحه وضوح الشمس
_ انا مش فاهمه حاجه انت بتتكلم عن ايه
ضحكت من غلبي وقولت
_ هههههههه واااالله كنت عارف انك ما هتفهمي دي كمان ، لا ولا حاجة مفيش يا هاجر متخديش في بالك
كملت بتنهيدة
_ ولو علي الزعل ف انا مش زعلان وهشيل البلوك بس ياريت من الساعة دي يكون بينا حاجز ، انا هتجوز وانتي مبقتيش صغيرة علشان العب معاكي واهتهم بيكي
جيت امشي ف وقفت في طريقي وقالت بدموع
_ بشر والله مش فاهمه ، ارجوك فهمني في ايه ، انا آسفه لو كنت مزعلاك قوي كده بس انا بجد مش فاهمه ولا شايفه ان طلبي انك تجوز او انك تسيب اسراء يزعلك مني بشكل ده
مردتش ف قالت بعد ما مسكت ايدي
_ خلاص متقولش.، وانا مستعدة اعتذرلك من هنا لبكرة بس متكونش زعلان كده انا متعودتش علي الزعل ده انت عمرك ما عملتلي بلوك وعمرك ما طلبت ابعد عنك ، وانا مقدرش اتخيل انك متكونش جزء من يومي
_
_ انا اسفة
_ مش عارف انتي بتتاسفي علي ايه ، انتي موتره قوي يا هاجر ملكيش طريق سالك ماشية فيه ، بتحوجي يمين شمال ومحيراني معاكي ، انتي عاوزه مني ايه لو محتاجه اب وام ف ابوكي وامك عايشين انا خلاص مش هكون مسؤول عنك ولا هفسح ولا اجيب حلويات
_ عمري ما حسيت اني محتاجه اب، بابا مخلنيش احس اني محتاجه اب بداله ، وربنا عوضني عن الاخ اربع اخوات ورزقني بصحاب بس انت كل ده
_ والمعني
_ المعني انك كنت اخ واب وصديق وحاجات كتيره قوي لو ضيعتك مش هعرف اعوضك تاني
_ لييييه يا هاجر ليه ، ايه المسمي للعلاقة متعددة الجوانب دي عشان افهم بس انا الاخطبوط بشر صفتي ايه بنسبالك
_ انت كل دول
_ اللي هما
_ اخ واب وصديق
_ ومروحه بتطري في الصيف ودفاية بتدفي في الشتا وحمار في كل الفصول ، هااااجر اخفي من وشي انا دماغي مش مجمعة لوحدهااا
#فاطمة
في اخر اليوم الباب خبط وانا كنت لابسه فستان مينفعش اقابل بيه حد ف وقفت ورا الباب وقولت
_ مين
_ انا يا فاطمة...
_ بابا.، ما انت معاك مفتاح مفتحتش ليه
مسكت مقبض الباب وكنت هفتح لكن وقفتني كلمته لما قالي
_ انا وبيجاد ابن عمتك
سبت المقبض وقولت
_ ماشي اتفضلوا
دخلت جوه وانا متنرفزه انه رجع تاني وبعد دقيقة جه بابا يقولي
_ عامله ايه
_ الحمدلله ، لسة هنا ولا مشي
_ لا ممشيش ، هتيجي تسلمي عليه
_ لاا
_ ليه
_ مش عاوزه ، قليل الذوق قوي
_ وانا بقول كدة بردو
_ طيب هيمشي ولا هيبات
_ لا مش موافق هيرتاح من المشوار ويمشي
_ احسن قوله ميجيش تاني
_ عيب ، ممكن تتعبي وتعمليلنا شاي ولا دي كمان مش عاوزه
_ حاضر هلبس النقاب واطلع
_ ماشي حبيبتي متشكر
بعد ما طلع لبست عباية سودة والنقاب وخرجت علي المطبخ من غير ما التفت لمكانهم عملت الشاي وفي الوقت ده كنت سامعة صوت بابا بيستأذنه يروح الحمام وبعد ما خلصت خدت الصنية وطلعت حطتها قدامه و وقفت للحظات ابصله بقرف وهو بيبص يمين شمال وكأنه مش شايفني واخيراً بصلي وقال ببرود
_ مساء الخير
رديت باشمئزاز ومط للحروف وده بان علي صوتي
_ مساء اااالنور
ابتسم ابتسامه استفزازية ورجع يبص حولية بزهق ومع اني مكنتش طيقاه بس قعدت وقولت
_ هو انت عندك مشكله معايا
بصلي وقال بنفس البرود
_ لا ، ليه
_ شيفاك متضايق من شوفتي لتاني مره من غير سبب ، ومش بتقدر اللي قدامك
_ اها ، لا انا مقدرك جداً اصل عندنا طالما البنت منتقبة مبنكلمهاش او هي نفسها مبتكلمناش وتختصرنا اختصار كامل علشان النقاب مش بس لبس بيستر الجسد لا ده بيستر صوت البنت وبجاحتها ، اقصد طريقة كلامها
_ بجاحتها!!!
_ طريقة كلامها
_ stupid
قال بإبتسامة استفزازية
_ ثانكس اند يو تو
قومت وانا مش عارفه اشتمه ولا اشتم نفسي لأني ادتله اهتمام وبعد ما مشيت خطوات لقيت بابا طالع من الحمام تعبان قربت منه وقولت وانا بمسك ايده
_ بابا! مالك يا حبيبي
ابتسم بتعب وقال وهو بيقبض علي صدرة
_ اااه ، مفيش حبيبتي تعبت بس من المشوار متخافيش
_ يا بابا حضرتك تعبان ، لازم تكشف
جه عندنا وقال
_ حضرتك كويس
_ اه اه تمام هقعد بس
قولت بقلق
_ بابا من فضلك اسمع الكلام مره
بصيت لبيجاد وقولت بنرفزه
_ ما تتكلم اقنعه يكشف مش شايفة تعبان
قال بنرفزة
_ بتزعقي ليـ.....
بتر كلمته وقال وهو بيمسك ايده
_ تعاله ارتاح
بصلي بقرف وقال
_ روحي اعملي كباية كمون ومتحلهاش قوي معلقة سكرة صغيرة وشوفي انتينال
_ انت هتعمل فيها دكتور ، مينفعش ياخد علاج من غير كشف بطلوا تخلف بقا
ضم بوقة بغيظ وقال
_ انت بنـت مـش مـ.....
بتر كلمته وخد نفس عميق وقال
_ روحي اعملي كمون ، تعاله يا خالي
وزع نظراته بينا وقال
_ انتوا كدة قلقانين عليه
قولت بنرفزه
_ انا قلقانه بس هو واقف مش مهتم
قال
_ ااااتفضل حضرتك اتفضل وسعي
زق ايدي وخده علي الصالون وقعده وقعد جمبه وبعدين بصلي وقال
_ واقفه ليه اعملي الكمون
مردتش واخترت اسكت ومنزلش لاسلوبة المتدني عديم الذوق ودخلت جبت كمون ناعم وقولت اهو
بصلي بقرف وقال
_ انا قولت مغلي علشان قالوووولونه
_ ايه القرف ده كمون مغلي ، في حد يشرب كمون مغلي
_ وهو في حد يسف كمون ناعم
_ اه صحيح مينفعش ، خلاص متتكلمش تاني كمون قال انا هجيب انتينال