![](https://blogger.googleusercontent.com/img/b/R29vZ2xl/AVvXsEiWGcURrkAXh7V5jMw4gCEnMW3Yta-opM0WR5kMsekzbhI3e9aDaQyZGvof_9HbiUxGyMJbf5a8qCYwIZX5tbsN_1H_sit5a0I61gunQ_NiavuQp0g00ubEiwgGg1u-McceKmcP9nZFsli04xMD-y3Zlk_FxDpNzVr6z5KYabvUysfHeErkIYBgPwl76GZK/s320-rw/FB_IMG_1714493315564.jpg)
رواية موضوع عائلي الجزء الثاني2الجميله والشعر الابيض الفصل الخامس5بقلم رحاب القاضي
جميله من فوق
خلاص بقي يا عموري سكة السلامه انت..
عمار بنفاذ صبر
يخربيتك علي بيت عموري يا شيخه..
وبص ليونس وقال
اا قرايبي هنا، هو انت ساكن هنا اصلا؟...
يونس بهدوء
قرايبي برضو هنا...
عمار
يا محاسن الصدف، بعد اذنك..
يونس
اتفضل..
_ ركب عمار عربيته ومشي، ويونس بص لفوق علي بيت جميله وابتسم بسخريه وطلع فوق بس راح لشقة صبري وفتحتله شهد...
شهد
تعالي اتفضل..
يونس
اخوكي فين؟..
شهد
قااعد جوه ما تدخل..
مسك يونس ايدها وقال بصوت عالي
انا واخد مراتي وماشي يا ابو اسر خلي بالك من الولاد لحد بكره..
طلع صبري وقال
في عينيا بس انتو رايحين فين؟..
يونس
يا عم اختك العيال واخدينها مني ومش عارف اشبع منها..
اتكسفت شهد وصبري ضحك وقاله
لا اذا كان كده حقك خدها مكان ما انت عايز والولاد هنا في الحفظ والصون..
يونس بصلها بهدوء وقال
يلا بينا بقي..
شهد
طيب ثواني هغير هدومي، ولا هنزل معاك باسدال الصلاه كده..
يونس
ده كده زي الفل..
_ واخدها ونزلو، واول ما ركبو العربيه فضلت شهد تضحك وهو قالها..
يونس
عجبتك الحركه مش كده؟..
شهد
بتعرف تاكل بعقلي حلاوه، تزعلني وبتعرف تصالني..
يونس
وانتي بتتصالحي عشان بتكوني عارفه ان مش قصدي ازعلك..
شهد بسخريه
لا وحياتك ده عشان قلبي ده ابن جزمه ومش عارف يبطل يحبك...
يونس
ليه الافتري ده عملت ايه انا عشان تبطلي تحبيني والحمد لله ان قلبك ابن جزمه ومش مطاوع دماغك الهبله دي..
شهد
بذمتك يا شيخ انت بقي يهمك افضل احبك ولا لا؟..
بصلها يونس بغضب وقال
ومدام انا في نظرك مكمله ليه معايا لحد دلوقتي..
شهد بحزن
عشان ولادي وقولتلك عشان مش عارفه اكرهك، بس لو حصل وكرهتك مش هكمل يا يونس..
يونس فتحلها باب العربيه وقال
انا غلطان اني جيت يا شهد انزلي روحي لعيالك...
شهد بحده
هو انا لازم اقولك عكس اللي جوايا عشان تبقي مبسوط..
يونس بحده
انزلي يا شهد وافتكري ان انا اهو اللي بقرب وانتي اللي بتبعدي...
شهد بسخريه
لما يبقي القرب لمزاجك ووقت ما تكون عايزني وخلاص يبقي مش قرب ولا يلزمني..
يونس بضيق
من بكره يوسف ويزن هيرجعو المدرسه انا حليت الموضوع، وبعد ما يرحو المدرسه ترجعي بيتك..
شهد بضيق
تصبح علي خير يا يونس..
_ قالت كلامها ونزلت من العربيه وطلعت فوق تاني واول ما شافها صبري قالها..
صبري
يوووه انتو لحقتو تتخانقو..
شهد وهي تكتم دموعها
لا خالص بس هو جاله شغل..
صبري
طيب ادخلي نامي جنب ولادك..
جات تدخل بس هو قام ومسك ايدها وقالها
ما فيش حاجه تستاهل زعلك يا شهد، ولو في حاجه بتزعلك يبقي ما تستاهلش تكون معاكي..
شهد بدموع
ربنا يعدي الفتره دي علي خير يا صبري، تصبح علي خير..
_ وسابته ودخلت الاوضه اللي فيها ولادها بصتلهم وهما نايمين وبرغم انهم توأم الا انهم مش شبه بعض خالص، يزن شبه يونس لدرجه كبيره ويوسف ملامحه قريبه منها ومن صبري اخوها بالاكتر...
_قربت منهم وباست الاتنين بهدوء وغطتهم كويس وراخت وقفت في البلكونه ومسكت موبيلها وفتحت الرساله اللي جاتلها من شويه وسمعتها للمره التانيه وكانت واحده بتقولها...
البنت
جوزك مش بيحبك ولو كان بيحبك ما كانش هيبقي كل يوم التاني مع واحده غيرك..
_ بعد ما سمعتها مسحت الرساله وعملت للرقم بلوك، بس ما قدرتش تتحكم في دموعها اللي نزلت علي وشها، وفي الوقت ده طلعت جميله البلكونه وهي ماسكه الشوكلاته اللي جبهالها عمار وقالت..
جميله
ايه ده انتي بتعيطي ليه هو في حد زعلك ولا ايه؟..
شهد مسحت دموعها بسرعه وقالت
لا لا ما بعيطش بس في حاجه دخلت في عيني..
جميله
يا ستي هو انا جوزك عشان تقوليلي كده، امسكي طيب كلي الشوكلاته دي غاليه علي فكره كنت ناويه اكلها لوحدي عشان جيبهالي الكراش وكده بس مش خساره فيكي..
ابتسمت شهد واخدتها منها وقالت
شكرا، واسفه اني زعقتلك من شويه..
جميله
لا ولا يهمك انا لو مكانك كنت عملت اكتر من كده، كلي الشوكلاته ما تتكسفيش..
شهد ضحكت وقالت
ههههههه خلاص والله هكلها جوه، شكرا يا... انتي اسمك ايه؟..
جميله بهدوء
اسمي جميله..
شهد
شكرا يا جميله.. وانا اسمي شهد..
_ ابتسمتلها جميله ودخلت شهد نامت جنب ولادها واكلت الشوكلاته وهي مبتسمه وفتحت موبيلها وبعتت رساله لهاجر وقالتلها..
شهد
وحستيني اووي علي فكره، بقيت اقول ياريتنا ما اتجوزنا ولا بعدنا عن بعض اصلا، لما تفضي كلميني وخلينا نتقابل...
_ وقفلت الموبيل ونامت، وفي البلكونه كانت جميله واقفه ومركزه علي الطريق، ورن موبيلها بوصول رساله، ولما فتحتها لقيتها من عمار وباعتلها.
عمار
حلوه الشوكلاته؟..
ابتسمت جميله وقالتله
برغم اني طلبت ايسكريم بس يلا مش مهم هيكان باين عليها حلوه بس للاسف ما كانتش من نصيبي..
عمار
ليه يعني هو انتي ما اكلتيهاش؟..
جميله
لا كانت في واحده جارتي بتعيط فحبيت اخليها تبتسم كده واديتهالها..
عمار
انتي عملتي كده بجد؟..
جميله
لا بص هو بصراحه اما كنت اكلت الشوكلاته بتاعت ابنها فحبيت احسن صورتي قدامها..
ضحك عمار وقالها
هبقي اجيبلك غيرها ان شاء الله..
_ وقبل ما يشوف ردها قفل لما لقي عايده الست اللي عندها 50 سنه طالعه من المطبخ وقالتله..
عايده
يعني هو زكريا ناوي يعملك حاجه بجد؟..
اخد منها عمار الاكل وقعدو علي السفره وقالها
لا طبعا هو بيقول اي كلام وخلاص، بس اللي دايقني اني ما كنتش حابب اسمع منه حاجه زي دي..
عايده
استغفر الله العظيم ياارب، طيب ما تسمع كلامي وتديه اللي عايزه..
عمار بجمود
لو كنت شايفه راجل وخايف عليا وعايز بجد يحط ايده في ايدي اقسم بالله كنت هخليه شريك رسمي معايا، انما هو بيكرهني امه زرعت فيه حقد وكره من ناحيتي، يلا ربنا يسامحها..
عايده وهي بتأكله في بوقه
ربنا يحرقها في جهنم، حلوه الفراخ..
ابتسم عمار وقالها
حلوه يا عايده تسلم ايدك، المهم عايز اقولك حاجه تاني..
عايده بحماس
قررت تتجوز صح انا كنت حاسه وانا طالعه من المطبخ لقيتك بتبص في تلفونك وبتضحك ضحكت كاظم الساهر كده بتاعت العشاق..
عمار
ما تأفوريش يا عايده وبعدين لسه ما وثلتش لمرحلة الجواز ده يدوب اعجاب..
عايده
امم طيب بص تبقي ارمله او مطلقه ما عنديش مشكله بس ما يبقاش معاها عيال انت عايز واحده تدلعك مش تربيلها عيالها..
عمار
اولا انا لو كنت لقيت واحده مناسبه ومعاها اولاد ما كانش هيبقي في مشكله..
عايده
يعني انت عايز تفهمني انك طول ال16 سنه دول ما لقيتش واحده مناسبه..
افتكر عمار جميله وقال
لقيتها اللي من صغري بتمناها زي ما رسمتها في خيالي بالظبط، بس حاسس اني لو طاوعت قلبي يبقي بظلمها وحاسس برضو ان بدري اووي علي الكلام اللي بقوله ده يا عايده..
عايده
الحب ما فيهوش بدري ومتأخر، ده بيجي في لحظه وبيدخل القلب من غير استئذاان كمان..
عمار بهدوء
يمكن بس واحد زيي وفي ظروفي دي لازم يفكر الف مره..
عايده
طيب كلمني عنيها حلوه ولا لا، بنت مين وعندها كام سنه وشوفتها فين؟..
عمار بهدوء
اسمها جميله وعندها 28 سنه ولسه انسه و..
عايده
تبقي طمعانه فيك..
عمار
ليه الفال الوحش ده يا عايده..
عايده
اومال ايه اللي يخليها ترضي بيك، لتكون مش حلوه يا واد يا عمار..
عمار بغيظ
اقفلي الموضوع يا عايده..
عايده
ما اقصدش انا بس ااا..
عمار
اقفلي الموضوع يا عايده، خليني اكل اللقمه بنفس مفتوحه..
ـــــــــ #بقلم_الكاتبه_رحاب_القاضي ــــــــ
_ عدي شهر علي ابطالنا..وفي بيت جميله..
كانت فريده قااعده في الصاله وجنبيها جميله وقصادهم راجل كبير شويه في السن حاطط رجل علي رجل وقال لجميله..
احمد
يعني انتي شغاله في شركة المنشاوي؟..
جميله حطت رجل علي رجل وقالت
ايوه يا عم احمد..
احمد بجمود
وليه ما قولتيش الاول، ولا هي وكاله من غير بواب..
جميله بصوت واطي
وحياتك بتبقي زريبه من لما بتدخلها..
احمد
طيب كان من باب اولي تيجي وتشتغلي عند عمك..
قامت جميله وقعدت جنبيه وقالت
لا اطمن يا عمي انا كده كده جييالك بس مش هشتغل عندك لا انا همسك المصنع والشركه معاك هو مش ده حقي انا وامي واختي..
احمد بضيق
ان شاء الله بس اتأهلي الاول لحاجه زي دي وبعدين نبقي نشوف...
فريده
فين يا احمد مصروف الشهر وياريت بعد كده تبعته او تجيبه من غير ما اطلب انا ما بشحتش منك ده حقي وحق بناتي...
احمد
طبعا طبعا يا مرات الغالي، بس المشاغل بقي اعمل ايه.والفلوس اهي..
وحط الفلوس علي الترابيزه وقال
ومصاريف مدرسة ايتن هتدفع النهارده، الا هي فين انا بقالي كتير ما شوفتهاش..
فريده
في السنتر عشان امتحاناتها خلاص بعد اسبوعين..
احمد
تنجح هي بس واي جامعه تشاور عليها تدخلها وانا رقبتي سداده من جنيه لالف..
جميله
لملايين يا عمي هو احنا برضو مش ورثنا ملايين..
احمد بتوتر
هاا ااه انا همشي بقي وابقو وصلو سلامي لايتن..
_ قال كلامه ومشي واول ما طلع من البيت بص عليهم بقرف وقال..
احمد
ما كانش ربنا قادر ياخدكم زي ما خد ابوكم يا بنات ال....
_ سكت ونزل تحت ولقي ابنه لسه واصل، زعق فيه وقاله..
احمد
انت لسه فاكر تيجي دلوقتي؟..
حسين
من ما خلصت الشغل اللي حضرتك قولتلي عليه..
احمد
طيب تعالي انا اديتهم الفلوس..
حسين
طيب اطلع اسلم عليهم وانزل..
احمد بحده
انا لما اقول كلمه تقول حاضر وبس، يلا قدامي علي الشغل..
بص حسين للارض بحزن وقال
حاضر يا بابا تحت امرك...
_ وركب عربيته وهو مدايق جدا واحمد بصله بسخريه وقال..
احمد
بلاش الدلقه دي، وهجوزهالك بس الصبر اصلا بنات عمك لازم يبقو تحت ايدك عشان شقانا وتعبنا ما يروحش بره..
_ سكت حسين وما ردش عليه، وكان مدايق من تفكير ابوه المادي...
ـــــــــــ #بقلم_الكاتبه_رحاب_القاضي ـــــــــ
_ في شركة يونس..
كانت ايتن قاعده هناك مع يونس ومعاهم يوسف اللي قال بسخريه..
يوسف
بس مش خساره ليكي يا دارين انك تسيبي شغلك مع باباكي وتقبلي تبقي مديرة العلاقات العامه هنا في الشركه..
ردت عليه دارين
لا مش خساره انا مش مهم عندي المنصب اد ما مهم عندي المكسب اللي هاخده فيما بعد..
_قالت كلامه وبصت ليونس وكأنها بتقوله انا اقصدك انت بالكلام ده، بس هو كان مركز في الورق اللي قدامه، ويوسف وقال وهو مدايق..
يوسف
طيب مبروك علينا وجودك هنا، انا هروح اشوف شغلي بقي..
يونس
ماشي يا يوسف وابقي شوف موضوع الموظفين والزياده ده..
يوسف
حاضر...
_ طلع يوسف ودارين قاامت وقعدت علي المكتب قدام يونس وقالتله وعي بتقرب منه..
دارين
عزماك علي العشا النهارده..
يونس بعد عنها وقال
انتي ايه اللي بتعمليه ده، وبعدين انا مش فاضي..
دارين بخبث
حتي لو قولتلك اني قربت اوصل لطريقه هتخليك تتعامل مع زكريا المنشاوي..
بصلها يونس باهتمام وهي ضحكت وقالت
هههههه بلاش تفهمني غلط احنا هنا اللي بينا شغل، هاا هنتعشي مع بعض النهارده؟..
يونس بتفكير
تمام يا دارين نتعشي مع بعض النهارده..
_ابتسمت دارين بأنتصار وقامت وراحت مكتبها، ودخل يوسف وقال وهو مدايق..
يوسف
لو عايز تشقطها كان بعيد عن الشغل يا سي يونس..
يونس
اقعد بس بلاش هبل، دارين دي عندها معارف كتير وهتفيدني في اللي انا عايزه..
يوسف
بس انت عارف غرضها ايه كويس دي بنت لامؤخذه يعني..
يونس
المهم شغلي يمشي زي ما انا عايز وبس..
يوسف
تمام يا يونس انت حر بس انا نصحتك وانت اللي ما سمعتش، وعلي فكره انت مش هتاخد كل حاجه لازم تضحي شويه وتبقي في حاجه مكان حاجه انما انك عايز كل حاجه ده هيرجعنا للصفر يا صاحبي..
_ قال كلامه وسابه وطلع بس يونس ما اهتمش بكلامه ورجع يكمل شغله تاني بكل هدوء...
ـــــــــ #بقلم_الكاتبه_رحاب_القاضي ــــــــ
_وفي مدرسة ولاد يونس..
وصلت شهد هناك وكانت رايحه لمكتب المديره، بس وقفتها مايا اللي قالت..
مايا
مدام شهد مش كده؟..
شهد بهدوء
ايوه انا هي مدام الهام جوه؟..
مايا بتوتر
مدام الهام مش عايزاكي انا اللي كلمتك عشان لازم اتكلم معاكي شويه..
شهد
هي في حاجه ولادي كويسين؟..
مايا بهدوء
ايوه كويسين ما تقلقيش، انا بس عايزه اتكلم معاكي في موضوع شخصي علي انفراد..
شهد بقلق
حاضر انا تحت امرك.
مايا ابتسمت وقالت
تمام اتفضلي معايا في مكتبي انا مش هعطلك ما تقلقيش..
_ وراحت معاها شهد مكتبها وكان من جواها قلقانه جدا من البنت دي وحاسه ان في حاجه كبيره من ورا كلامها...
ــــــــــ #بقلم_الكاتبه_رحاب_القاضي ـــــــ
_ في شركة عمار المنشاوي..
دخلت جميله المكتب اللي قاعده فيه هي والسكرتيره وقالت..
جميله
انا اتأخرت اووي مش كده؟..
فيروز
لا عادي اصلا وجودك زي قلته يا جميله..
جميله بهدوء
ما عشان لسه بتدرب يا بنتي، بالك انتي انا بعد ما اخلص تدريب انتي مش هيبقالك مكان هنا..
فيروز بغيظ
تمام ادخلي بقي عند عمار بيه عشان سأل عليكي اكتر من مره وانا قولتله انك لسه ما جتيش..
جميله بغيظ
فيكي منها اوووي علي فكره..
فيروز
هي مين دي؟..
جميله بخبث
ساره مكاتب ولو مش عرفاها اسألي جوجل...
_قالت كلامها وراحت دخلت عند عمار بعد ما خبطت علي الباب وهو بصلها وقال..
عمار
ما لسه بدري..
جميله بهدوء
معلش مش هتتكرر..
عمار بجديه
معلش ايه بس يا جميله انا بحاول اثبتك هنا فمش عايز اهمال..
جميله
يعني ايه تثبتني هنا... اااه خلاص فهمت علي الشغل خلاص، والله مش هتتكرر تاني..
عمار
تمام هاتيلي قهوه وانتي اللي تعمليها..
جميله ابتسمت وقالت
عارف انت ربنا هيدخلك الجنه والله عشان بتحب القهوه بتاعتي..
عمار
طيب يلا اعمليها وتعالي كملي شغلك..
جميله بهدوء
من عينيا...
ـ وبعد شويه جابتله القهوه وكانت فيروز واقفه جنبيه وهو بيمضي علي ورق مهم ومقربه منه اووي..
جميله
القهوه..
فيروز
حطيها عندك..
جميله
حاجه تانيه يا عمار بيه؟
عمار بصلها وقال
انتي من امتي بتقوليلي عمار بيه؟..
جميله
هو مش ده مكان شغل ولا ايه...
عمار
تمام اللي يرحك وميرسي مش عايز حاجه..
جات تمشي بس هو قالها
استني يا جميله..
بصتله وقالت
افندم...
استغرب طريقتها وقال
في اجتماع كمان شويه بره الشركه وهتيجي معايا..
ادايقت فيروز وجميله قالت
حاضر بعد اذنك..
_ خرجت جميله وعمار فضل باصصلها وهو مبتسم.، وفيروز بصتله بغيظ وقالت..
فيروز
الاروق يا عمار بيه حضرتك لازم تمضيهم..
عمار
اوكي...
_ وبدأ يكمل شغله، وفيروز كانت مدايقه جداً من اهتمامه بجميله..
ـــــــــ #بقلم_الكاتبه_رحاب_القاضي ـــــــــ
_في بيت يونس الصاوي..
وصلت شهد البيت ومعاها ولادها بعد ما خلص يومهم الدراسي، وقابلتها سعاد المربيه وسألتها بقلق..
سعاد
انتي كويسه يا بنتي..
شهد بجمود
ايوه خلي بس الولاد معاكي وما حدش يجي عندي خالص فوق..
سعاد
حاضر بس اا..
_ قبل ما تكمل كلامها طلعت جميله اوضتها وقفلت الباب عليها وفي اللحظه دي اتحول كل جمودها ده لانهيار، وقعدت علي الكنبه اللي في اوضتها وافتكرت الكلام اللي قالته ليها مايا..
_ فلاااااش باااك..
ـــــــــــــــــ
مايا
انتي طبعاً ما تعرفنيش بس انا اعرفك كويس اووي، وطلعتي حلوه بجد زي ما سمعت عنك..
شهد
شكرا ده من ذوقك، بس خير انا مش فاهمه في ايه وسمعتي عني من مين؟..
مايا بهدوء
انا اسمي مايان احمد العدوي او مايا زي ما الكل بيقولي المشرفه الاجتماعيه هنا، قبل كده انا كنت شغاله في شركة الصاوي..
شهد
ايوه دي شركة جوزي..
مايا بضيق
بالظبط انا اشتغلت هنا بعد ما اخدت سنه في حالة اكتئاب بسبب اني حبيت واحد وطلع؟؟؟..
سكتت واتملت عيونها دموع وقالت
اختار مراته وولاده وكان وجوده معايا مجرد. تسليه، انا مطلقه ولما اتعرفت عليه كنت خارجه من علاقه صعبه ووجوده هون عليا كتير..
شهد بخوف
انتي بتتكلمي عن مين؟..
مايا بحزن
اللي رجع ولادك المدرسه هنا دارين عزام دي صحبتي ما كانتش تعرف حاجه عن اللي بيني وبين... وبين يونس زمان..
شهد بدموع
يونس انتي بتخرفي تقولي ايه؟..
مايا بحزن
دي الحقيقه انا متابعه ولادك من لما جيت هنا وبحبهم جداً زي ما بحب يونس بس عارفه انه مش بيحبني وبيحبك انتي بس يونس دلوقتي بيستغل دارين عشان شغله وهي اعجابها بيه مخليها تعمل حاجات غلط كتير جداً..
بدأت شهد تتوتر جدا وقالت
اا انتي عايزه مني ايه خايفه علي صحبتك او قريبتك دي قوليلو هو يبعد عنها..
مايا بحزن
مش هقدر انا اضعف من اني اشوفه او اتعامل معاه، اللي بيني وبينه خلص زمان انا مش بقولك كده عشان اوقع بينكم انا بس عايزاكي بطريقتك تمنعيه يأذي دارين هي تبان قويه وجامده بس هي طيبه جداً وما تفهمش حاجه..
شهد ببكاء
انتي جايه تقوليلي جوزك كان بيخونك معايا وعايزاني اتعامل عادي عشان هو موضوع وخلص، انتي متخلفه وهو حيوان وصحبتك دي زيك عشان اللي تقرب من واحد متجوز وتكون علي علاقه بيه بتكون واحده رخيصه..
مايا بحزن
عارفه وانا غلطانه ومهما قولتي حقك، بس انا حبيته و..
شهد بعصبيه
اخرسي خالص ومالكيش دعوه بولادي تاني ابداً، وهو عندك اعملو مع بعض اللي انتو عايزنه..
_ قالت كلامها وطلعت من عندها ومشيت بسرعه وكانت بتحاول تستوعب كلامها وهي مش عارفه تصدقه ولا تصدق انه في يوم خانها وهي كانت مغفله ومش حاسه بحاجه..
_ بااااااااااك..
ـــــــــــــــــــ
_ حطت وشها بين ايديها وفضلت تعيط اووي، وفضلت قااعده علي الوضع ده لحد الليل ما جه، وجات رساله علي موبيلها وكانت من رقم مجهول..
_ولما فتحتها لقيت صوره لدارين وهي مع يونس في مطعم وهي ماسكه ايه وصوره تانيه وهما بيضحكو.. وبعدها في رساله مكتوب فيها..
"حتي لو عملتي بلوك للرقم ده مش هيغير حقيقة ان يونس مش بيحبك يا مدام شهد"..
رمت الموبيل جنبيها وقالت ببكاء
بس بقي كفااااايه... كفاااااااايه..
ــــــــ #بقلم_الكاتبه_رحاب_القاضي ــــــــ
_ وفي بيت عماد كان قاعد مع سماح في اوضته وقالتله بحده..
سماح _
لا يا حبيبي انا اجيبلك منين فلوس كل شويه ده انا ليا عندك شئ وشويات...
عماد. بضيق
وانا اجيب منين، الفلوس اللي اخدتها من ورث ابويا سدت بيها الديون اللي عليا...
سماح بخبث
طيب ما انت عندك اللي تاكل من وراها دهب..
عماد بعدم فهم
انتي قصدك مين يا بت يا سمااح؟..
سماح بخبث ردت عليه وقالت
انا قصدي البنت الحلوه الصغيره اختك، دي لو سيبتهالي والله اخليك تمسك فلوس عمرك ما كنت تحلم بيها..
عماد بحده شدها من دراعها وقال بعصبيه
انتي اتجننتي يا بت انتي في دماغك ولا ايه، انتي ازاي عايزه تخلي اختي تشتغل زيك..
سماح بغيظ
بقي كده يا عماد طيب وحياة امي ما انا جيبالك الكيف بتاعك تاني غير لما تدفع اللي عليك...
خاف عماد وقالها
ايه بس يا سماح انا ما اقصدش ازعلك، بس دي اختي وصية ابويا ما اقدرش اعمل فيها حاجه...
سماح بحده ردت عليه وقالت
لا وانت بتعمل بوصية المرحوم ابوك كويس، بقولك ايه اللي عندي قولته، قلبها في دماغك ورد عليا لو عايز...
_سابته سماح ومشيت وكان هو قاعد مدايق ومش معاه اي فلوس وكلم زكريا وقاله..
عماد
ايوه يا زكريا انت مش كنت عايز وحده من اللي عند سماح الليله دي؟...
رد عليه زكريا
ااه بس سماح كل اللي عندها يسدو النفس..
اتنهد عماد وقاله
بص يا زكريا انا هبعتلك وحده جديده خالص في الشغلانه بس هيكون السعر غالي شويه...
زكريا
ياا عم ابعت بس وانا اشوف وعلي حسب ما تعجبني ابعتلك وانت عارفني بقدر الجمال كويس....
_قفل مع زكريا وبعدين طلع خبط علي اوضة اخته جهاد فردت عليه وقالت..
فتحت جهاد. الباب وقالتله
عايز ايه يا عماد..
عماد بخبث
لا ابدا يا حبيبتي عايزك بخير انا بس كنت عايز اقولك متزعليش مني انا بس كنت مدايق بسبب الشغل وقولتلك كلام سخيف..
جهاد. بحزن
المشكله مش في كلامك بس يا عماد، البنت اللي بتجيلك دي...
عماد بخبث قالها
اسكتي مش دي مراتي بس في السر، هظبط بس اموري وهتجوزها قدام الناس بس انتي بلاش تزعلي هو انا ليا غيرك يا اختي..
جهاد بضيق ردت عليه وقالت
خلاص يا عماد، انت عايز حاجه اعملهالك..
عماد بتوتر
اا انتي مش كنتي بتدوري علي شغل، مش انا لقيتلك شغل بفلوس حلوه..
جهاد بحماس
طيب ماشي موافقه بس الشغل ايه هو؟..
ادايق عماد من نفسه وقالها
خلاص خلاص يا جهاد. بعدين..
_سابها وراح قعد في اوضته وكان تعبان اووي عشان ما اخدش الحاجات اللي بيتعاطاها ، وطلع لقي جهاد قاعده قدام التلفزيون فقالها..
عماد
بقولك يا جهاد كنت عايز ابعتك مشوار...
جهاد
حاضر يا عماد بس مشوار ايه؟..
رد عليها عماد وقال بخبث
عند واحد صاحبي هتقعدي معاه ساعتين وهيديكي فلوس وتيجي...
جهاد بخوف
انت بتقول ايه يا عماد انا اختك ازاي تطلب مني حاجه زي كده؟؟...
_تفتكرو هيحصل ايه؟..
ـــــــ #بقلم_الكاتبه_رحاب_القاضي ـــــــ
_وفي السنتر اللي بتاخد فيه ايتن ومروان دروسهم..
كانو طالعين مع بعض وهو قالها..
مروان
خلاص هبقي اشرحهالك مره تانيه، بس عشان تتأكدي اني بفهم اكتر منك..
ايتن
علي مره واحده يا مروان، طيب ما انا علي طول بشرحلك..
مروان
وطي صوتك طيب ليه الفضايح دي، تيجي نضرب كبده..
ايتن
للاسف متأخره وماما بتزعل اما بتأخر عن كده..
_قبل ما يرد عليها مروان جم وقفو معاهم اتنين من زمايلهم وقال واحد منهم..
ايهاب
ايه يا مارو مش كنت تقولنا ان طنط امك اتجوزت كنا جينا عملنا الواجب..
ادايق مروان وقال الولد التاني
يعم هنعمل الواجب امتي ولا امتي بس دي كل سنه بتتجوز سبع رجاله..
ضحك ايهاب وقال
رجاله ايه بس دول اصغر مننا تقريباً..
اتحولت ملامح مروان للغضب، وايتن قالتله بقلق
تعالي يا مروان نمشي عشان خاطري..
ايهاب
الا قولي يا مروان هي امك مدام بتحب العيال كده ما فضلتش ليه مع ابوك واهو علي الاقل كانت تربيك انت بدل ما تربي الغريب..
_ خلص كلامه وفضل يضحك هو وصاحبه، ومروان بكل قوه وغضب لكمه في وشه وفضلو يتخانقو..
_خافت ايتن جداً وخصوصاً لما الموضع زاد عن حده وما حدش كان عارف يوقف مروان، فطلعت موبيلها وكلمت عمار...
_ وعند عمار كان في شركه تانيه ومعاه جميله بيحضرو الاجتماع، وكان عامل موبيله صامت وجميله قاعده جنبيه وميلت عليه وقالت..
جميله
هو ايه ده يا اخويا هو كله كده انجليزي..
عمار
اوعي تكوني مش فاهمه انجليزي، اومال تعليم خاص ازاي؟..
جميله بضيق
لا فاهمه بس انا كنت بسقط كتير وبعدين دخلت المدارس الخاص وانا صغيره وكملت تعليمي في حكومي معادا الجامعه..
عمار بهدوء
طيب خلاص اقعدي ساكته وانا هركز..
جميله
طيب انا جعانه والناس دي بخيله اووي الا حتي من لما دخلنا ما وزعو علينا دور شاي..
عمار بنفاذ صبر
طيب روحي الكافيتريا واطلبي اللي انتي عايزااه..
جميله بغيظ
هو انت مالك بتتكلم كده وكأنك مش طايقني، قول كده بقي انت كنت عايز ساره مكاتب النسخه المحليه..
عمار بعدم فهم
مين ساره دي، جميله اطلعي بره..
جميله بغيظ
ماشي طالعه بس اللي ما يندمش..
_ طلعت جميله بره وهو فضل يتكلم مع اصحاب الشركه التانيه، وفجأه دخلت جميله وهي بتجري وقالت..
جميله
الحق يا عمار ابنك الصايع بيتخانق قدام السنتر واختي معاه..
قام عمار وقال بفزع
مروان ماله في ايه؟..
ــــــــــ #بقلم_الكاتبه_رحاب_القاضي ـــــــــ
_ رجع يونس البيت في وقت متأخر، واول ما دخل اوضه لقي شهد قاعده مكانها، بصلها بهدوء وقال..
يونس
مالك يا حبيبتي في ايه؟...
شهد بجمود
كانت حلوه سهرتك مع دارين؟..
_كان لسه هيغير هدومه بس لما سمع اللي هي قالته وقف وبصلها بقلق، وهي قامت ووقفت قدامه وقالت..
شهد بحده
بلاش دارين، علاقتك بمايان كانت كويسه ومبسوط معاها ولا لا، انت بتقولها مايا ولا مايان؟..
يونس بقلق
انتي جيبتي الكلام ده منين؟..
شهد بدموع
ليه تعمل فيا كده انا قصرت معاك في ايه، لو علي اني انشغلت بولادك شويه وقتها انا جيبت دادا سعاد عشان ما اقصرش في اهتمامي بيك، ليه توجعني كده وانا كنت كل حاجه شغلاني ازاي اهتم بيك وارضيك لو ما كنتش قادر تكمل معايا كنت سيبني بس ما كنتش عملت كده..
سكت يونس وبص للارض وهي قالتله بسخريه
مش لاقي كلام ترد عليا بيه، علي العموم هي خلصت كده اي كلام هتقوله مش هيفيد بحاجه فياااريت لو عايز تفضل حاجه كويسه بينا طلقني من سكات من غير اي كلام بينا تاني عشان انا مش هعيش مع واحد خاني..
_جات نمشي من قدامه بس هو مسك ايدها بسرعه وقال بحزن...
يونس
استني يا شهد انا اا...
سحبت ايدها منه وبعدت عنه وقالت بحده
اوعي تلمسني تاني او حتي تقرب مني، انا قرفانه من وجودي معاك في مكان واحد اصلا، طلقني يا يونس وروحلهم وروح لغيرهم انا كان ممكن اتحمل اي حاجه الا اللي عملته..
يونس بدموع
انا اسف يا شهد كانت غلطه والله ومش هتتكرر تاني ودارين اللي بيني وبينا شغل مش اكتر..
مسكت موبيلها وورته الرساله وقالت
انا ليه اتحمل يتقالي كده، اي اللي ناقص فيا عشان واحده زي دي تقولي كده..
يونس بسرعه قال
والله العظيم كدب، بصي كلمي يوسف واسأليه هيقولك اني ما فيش بيني وبينها غير الشغل وبس..
شهد بجمود
هو ده بقي كان سبب انك حابسني هنا في البيت، مش بخرج اروح اي مكان غير معاك معادا طبعا مشاوير ولادك، كنت خايف من ايه اشوف واحده منهم واعرف حقيقتك ولا خايف اللي بتعمله في الناس يترد فيك..
يونس بضيق
لا كنت خايف عليكي انتي ومش عايز تطلعي بره من غيري عشان ما حدش يبصلك او يشوفك غير انك ليا انا..
شهد بدموع
بس انا ما بقتش ليك، انا هبات عند ولادي وكلمت صبري وهو هيجي الصبح ياخدني..
_ قالت كلامها وسابته وطلعت بره اوضتهم، وهو قعد مكانها وكان مدايق جداً، وطلع موبيله وكلم دارين اللي ردت عليه وقالت..
دارين
هو مش انا كنت لسه معاك لحقت اوحشك..
يونس بعصبيه
اسمعي يا بت انتي رقم مراتي يتمسح من عندك، واقسم بالله لو لقيتك بتكلميني في حاجه غير الشغل ما تعرفيش هعمل فيكي ايه..
_ خلص كلامه وقفل في وشها، واقسم انه هيصالح شهد بأي طريقه ومش هيخليها تسيبه..