رواية ذئاب لا تعرف الحب
الجزء الثاني2الفصل السابع7والثامن8
بقلم نجمه براقه
بشر
خرجت الصبح لشغل وفي طريقي خبطت علي بيت عمي شبل وبعد دقيقتين فتحتلي هاجر ولما شافتني ابتسمت وقالت
_ صباح البشاير
رديت بإبتسامة مقدرتش اخفيها اول ما شوفتها
_ صباح الورد ، عامله ايه دلوقتي
_ بعيد عن دماغي اللي بتنقح عليه ف انا تمام
_ سلامتك الف سلامة عليكي
_ الله يسلمك ، علي فين كدة
_ الشغل
_ خسارة كنت بفكر استغلك النهاردة
_ مفيش استغلال انتي ترتاحي لغيت ما تخفي
_ متضايقة لوحدي
_ طيب ما تطلعي فوق تقعدي مع خلود
_ ماشي ، انت هتتأخر
_ لا يمكن ساعتين وارجع
_ تمام انا شويه وهطلع وهستناك علشان نتغدي مع بعض
_ بتعزمينا في بيتنا
_ لا في بيت عمي
_ ههههه موافق
_ ههههه تنور بيت عمي
_ منور بصحابه ، سلام
_ سلام
مشيت خطوات ف وقفني صوتها وهي بتقول
_ بشر
رجعت بصتلها لقيت عينيها بتلمع وهي بتقولي
_ امممم ممكن طلب
_ طلبين
_ عاوزه شيبسي
اشرت علي عنيه وقولت
_ عنيه هجبلك انا وراجع
قالت بإبتسامة
_ تسلملي عنيك يا عمو
رديت عليها بإبتسامة خفيفه وانا بكلم نفسي واقول
_ انتي عايزة تعملي فيه إيه اكتر من اللي عملاه ، ربنا يحفظ عقلي ومتجننش بدري
_ هووووي مالك
_ مفيش يلا باي
_ هههه باي
#هاجر
دخلت غيرت هدومي وبعدها طلعت فوق لقيت زيد قاعده في الريسبشن ومركز تركيز شديد مع الاب توب ولما قربت سمعت صوت خلود ولما حس بقربي بصلي شويه وقال بعد ما دار ليه شاشة الاب توب
_ اسمعي وقوليلي إيه رأيك في صحبتك
_ مالها
_ اسمعي بنفسك
قعدت علي الكنبة وبقيت اسمع اللي بتقوله واللي خلاني اوقف الفيديو بسبب الاحراج وبعدين بصتله وقولت
_ مش لطيف
_ مشششش لطيف ؟
_ اقصد يعني مش كويس
_ طيب قوليلها كده علشان انا لما بتكلم بطلع وحش وبحبطها وعدو لنجاحها
_ حاضر هقولها متزعلش نفسك
دخلت عندها لقيتها ماسكه التليفون ولما شافتني قامت واستقبلتني بإبتسامة ف قولت
_ ايه ده يا خلود
_ إيه
_ ايه الفيديوهات اللي بقيتي تنزليها دي ازاي وصلتي لكده
_ مالها الفيديوهات ما دي قصص حقيقيه بتحصل انا مجبتش حاجة من عندي
_ واذا بتحصل انتي تقوليها ليه منظرك ايه دلوقتي قدام الناس وانتي محتواكي بقا ايحائي ده انتي كده ممكن يتقبض عليكي بتهمة الفجور
_ فجور ايه وانا بتكلم في ايه يعني
_ انتي هتكابري مواضيعك بقت جنسيّة يا خلود عارفه يعني ايه جنسية
نزلت جفونها بخجل ف قولت
_ من فضلك وقفي كل ده حالا
اتنهدت وقالت
_ هاجر انتي شوفتي عدد المتابعين وصولوا لكام ، قربت اوصل لتنين مليون بعد ما قضيت سنين ويدوب كنت مكملة ال 3000 ودلوقتي بقيت اكسب فلوس حلوه قوي من الاعلانات واليوتيوب بسبب المواضيع دي ، المواضيع دي هي اللي وصلتني لهنا حرام يعني لما انجح حتي لو هتنازل شوية
_ وهو اي تنازل وخلاص ، حبيبتي انتي بتتنازلي عن اخلاقك وكرامتك عن احترام الناس ليكي وعن حيائك ، لو خسرتي كل دول وكسبتي متابعين وفلوس ميبقلهاش لازمه بلاش يا خلود
سكتت ف قولت
_ بلاش علشان شكلك قدام الناس وعشان متعمليش لنفسك مشكلة ، وعشان ميتبصلكش بصه مش كويسة ، وعلشان تعب دادة امينة معاكي
طال سكوتها ف مسكت ايدها وقولت
_ انا عارفه ان اللي وصلتيله مش سهل تتنازلي عنه بس دي مش انتي مش اخلاقك
قالت بتنهيده
_ حاضر هرجع للمواضيع القديمة
_ واحذفي كل الفيديوهات دي
_ ماشي بس تعالي اقعدي
_ اوعديني الاول
_ والله هحذفها ، اوعدك
#خلود
قبل ما تدخل عليه كنت بشير فيديو جديد وبعد كلامها قررت هحذف الفيديوهات اللي من النوع ده بس بعدين عشان محتاجه فرز وقعدت معاها ف سألتني عملت ايه مع زيد قولت بضحك
_ بقينا صحاب اه لو يعرف ان دي انا لا يعلقني من شعري علي باب الشقة
_ ههههه انا شوفت المشهد ده فين قبل كده
_ ههههه علي باب زويل وبعدين مانتي معاكي الباسوورد شوفي بنفسك
_ ولله بنسي اتجسس عليكي بس النهارده هقعد وافرز الشات كلمة كلمة
_ افرزي يختي افرزي
_ طيب قوليلي هو صدق انك مش انتي ولا لسه بيلف ويدور
_ لا بقا متأكد ان دي مش انا
_ طيب إيه
_ إيه
_ مش كفاية كده ولا عجبتك اللعبة
_ ههههه عجبتني اصلا بيديني طاقة ايجابيه بتمحي الطاقة السلبيه اللي بيدهاني وانا قدامه
_ ههههه يا خوفي يا مصلحي
_ لا متخافش يا مجاهد ده لو اخر إنسان علي وجه الارض مش هحبة بلا قرف هي ناقصه غم
_ علي فكرة يا خلود هقولك حاجة ، زيد بيتكلم صح بس هو مش بيعرف يوصلهالك براحه وبيحب ينكشك
_ واشمعنا اسيل بيعرف يوصلهالها براحه
_ ما انا بقولك بيحب ينكشك علشان تتنرفزي
_ طيب اسكوتي لا اتنرفز عليكـ....
قاطع كلامي فتحه الباب علينا ودخوله من غير استاذان وهو بيقول بعصبيه
_ انتي اية ، مفيش كسوف ولا ادب
توترت وبقيت ابص لهاجر وانا فاكره انه عرفني ف قالت هاجر
_ ايه يا زيد بتتكلم كده ليه
قال وهو بيبصلي بغيظ
_ شوفي الانسه ناشره ايه من شوية ، قال ايه عملت علاقة مع جوزي اختي اكتر من مره ومش عارفه اصارحها ازااااي
خدت نفس براحه ومردتش ف قالت هاجر
_ صح الكلام ده يا خلود
_ اه صح
بصتله بتحدي وقولت
_ وانت ملكش دعوة ، ولو زعلان علي جيتي عندكم ف انا همشي
مسك دراعي وضغط عليه بكل قوته وقال
_ انتي بنت عاوزه تتربي
بقيت اتوجع ف قالت هاجر وهي بتحاول تبعده عني
_ سيبها يا زيد ، سيبها بقولك !!! زيييييد
قولت ودموعي في عيني من الوجع
_ سيب بتوجعني
زق دراعي وقال
_ انتي حره خليكي مكملة لغيت ما توقعي علي جذور رقبتك
قال كدة وسابني بدلك دراعي دموعي ماليه عيني ف بصتلي هاجر وقالت بعتب
_ ليه بس
قالت كده ومشيت وانا قعدت مكاني ابكي لوقت كبير لغيت ما دخلت عندي تيتة وقالتلي
_ إيه اللي انا شفته و سمعته ده
_ إيه
_ الفيديوهات اللي انتي بتنزليها ، انتي مصورها بمزاجك
سكت وانا كلي خزي منها وفجأة لقيت قلم نازل علي وشي وبعدين بتمسكني وتهزني بعنف وبتقولي
_ يعني بمزاجك !!! ناقص ايه تاني ، ناااقص ايه!! اقول ايه لابوكي اللي اتحديته وخدتك عشان متعيشيش مع مرات اب ، اقول ايه لا اخوالك ، منظرنا قدام صحاب البيت ايه!!!!!
قالت كده ولحقتني بقلم تاني وقعتني علي السرير وبعدها شدتني من دراعي وقالت وسط بكايا
_ قووومي انتي هترجعي البيت وتقعدي هناك لوحدك ومفيش تليفون ولا انترنت
قولت بترجي وانا مواصله البكا
_ لا ياتيته ونبي هخاف لوحدي في البيت
_ خافي واتلبسي يمكن تتربي
شدتني لبرا الاوضه وهناك شوفت زيد قاعد في الريسبشن بيكتب علي الاب توب واقصي حاجه عملها انه رفع عينه بصلي بصه بعدم لا مبالاه ورجع يبص قدامه تاني ف لقيت ورد بتوقف قدامها وتقول
_ واخدها علي فين يا امينه
_ مروحاها يا ست ورد ، مش هتقعد هنا تاني
مسكت دراعي بعدتني عنها وقالت
_ استني بس ، ايه اللي حصل
_ لما اروحها هرجع هقولك ، ادهاني
قولت وانا بمسك في دراعها
_ لا ارجوكي يا طنط انا بخاف لوحدي
قالت تيته بعصبية
_ قولتلك اتلبسي وبردو هتروحي ، قدامي
قالت ورد
_ براحه يا امينه في ايه ، اقعدي وفهميني مالها ، تعالي
خدتها جوه بالعافيه وانا وقفت مكاني ابصله باستحقار وبعدين روحت عنده ورزعت غطاء الاب توب وقولت
_ هو ده اللي كنت عاوزه صح ، فتنتها عليه علشان توقف حالي
وقف وقال
_ اولآ حركة زي دي انا ممكن اربيكي عليها بس عامل حساب لحالتك ثانيا جدتك مش مستنياني انا اللي اقولها مصر كلها شافت وعرفت وشوية وابوكي كمان هيعرف ومش هتتحبسي بس في بيت جدتك ده كمان ابوكي هياخدك
قولت باستحقار
_ بردو هنجح ومش هشمتك فيه
_ انتي مجنونة اشمت فيكي ليه ، ده انتي بكل الفلورز اللي وصلتيلها دي متجيش ربع اللي عندي ، ولو النجاح هيكون بشكل ده ف زودي واسمعي كلام صحبتك اياها وهتلاقي متابعين اكتر من كده بكتير ، انا كنت بنصحك خوف عليكي علشان معتبرك واحده مننا بس انتي بقا اللي مش فاهمه ف انتي حره
_ بتنصحني ولا بتحبطني انت دكتور بتعالج عقد الناس وتساعدهم ، بس سبحان الله ياخي بتساعد فعلاً وجيت عندي انا وبقيت تدوس وتقتل طموحي بكلامك وسخريتك
_ اه وانتي بقا غيرتي محتواكي عشان تنجحي وتثبتيلي انك ناجحه ، بالعكس يا خلود انتي مطلعتيش انتي نزلتي لادني مستوي ، هايفه ملكيش هدف ، وهمك بس تظهري بأي طريقه حتي لو هتتنازلي عن....
_ عن ايه
_ بلاش
_ اها بس علي فكرة انتي اللي معقد ولعلمك حتي محاولتي لظهور هو في حد ذاته هدف و وصلتله ، ويمكن غلط بس طالما انت قولت انه غلط ف انا مش هتراجع عنه ، انا بجد بكرهك
_ ايوه ما انا عارف ورغم كده حابه تقلديني
بصتله بغيظ وملقتش كلام اقوله بس كان نفسي اضرب الاب توب في وشه وبذات لما سابني وقعد يكتب عليه متجاهلني ومتجاهل عصبيتي والمصيبة اللي حطني فيها
#زيد
بقت بصالي لوقت كبير لغيت ما جدتها خدتها ومشيت ولما سألت خالتي هتعمل معاها ايه قالتلي
_ هتخليها في البيت
_ هتقعد لوحدها في البيت
_ لا هي هتروح تبات معاها وتيجي تاني يوم
_ احسن
قالت بتنهيدة
_ ربنا يهدي عيال كلها مخالفة
_ مين العيال دول قصدك احنا
_ انت مفيش منك مشاكل ، بس الباقين كلهم مجانين كل واحد ماشي بمخه وملهمش دعوة بالباقين
_ ايه يا خالتي مالك
_ يعني مش عارف ، مش شايف اللي اخواتك بيعملوه ، طيب بأمانة قولي عاجبك اللي بيعمله بشر ده
_ انا مليش دعوة دي حياته
_ وحياته دي هيعمل بيها ايه ماهو بيضيعها من غير فايدة تقدر تقولي مش عاوز يتجوز ليه
_ مش عارف ومش شايف ان جوازه او عدمه هيعملنا مشاكل ابوي اللي محبكها
_ وبدر محبكها وبشر محبكها وبيجاد محبكها وانا اللي ضايعه في النص وبترجي ولدي يرجع وهو مش راضي ، ما تكلم بشر يا زيد يمكن يسمع منك ويخطب علي الاقل ولا عاجبكم اخوكم وهو سايب البيت ، طيب امانه لو بشر هو اللي مشي كنت بقيت قاعد مرتاح اكده
_ ايه يا خالتي لازمته ايه الكلام ده ما بدر كمان اخويا بس هما مش صغيرين هما رجاله ومسؤلين عن نفسهم
_ ايوه بس انت كلمهم لو مقدرتش تميل راس بشر علشان يتجوز ميل راس بدر علشان يرجع ، احنا نعرف هو قاعد عند مين ولا ممكن يعمل ايه وهو بعيد
_ حاضر يا خالتي انا هكلمهم هما الاتنين وان شاءلله اقنع حد فيهم
خلصت كلامي معاها واتصلت ب بدر وحاولت اقنعه يرجع وملقتش فايده فيه ف سكت
#بدر
بعد ما قفلت مع زيد اللي بقا يزن علي دماغي ساعة علشان ارجع وانا رفضت وصلني اشعار علي فيس بوك ولما فتحت لقيت طلب صداقه من ريان...
ريان صاحبي وابن جارنا وزميلي في المدرسة من اولي ابتدائي لغيت ثانوي و مشفتهوش من وقت ما سافرت اكمل تعليمي بره ولما رجعت وسألت عنه قالولي سافر هو واهله السعودية وفوراً قبلت الادد وبعتله
_ ريان؟!!!
_ هو بشحمة ولحمه ، اخبارك ايه وحشني
_ طيب والله نسيتك بجد ، ايه يابني فين اراضيك
_ في بيتنا انت فين
_ انهي بيت
_ اللي جمب بيتكم
_ طيب احلف بالله
_ اقسم بالله انت فين كده
_ انا هاجج من البيت ، تعاله هنتقابل انا عند حسام
_ هو فين حسام انا نسيت ساكن فين ، تعاله انت هنتقابل في الكافتيريا اللي كنا بنتقابل فيها
_ تمام جايلك
قفلت معاه وقومت وانا بقول
_ ولاااا يا حسام
جاني صوته من الاوضه وهو بيقول
_ عاوز ايه
دخلت عنده وقولت
_ عارف مين كلمني دلوقتي
_ مين
_ ريان
_ ريان مين
_ ريان السبع
_ ياه لدرجة دي شبح
_ شبح يعفرتك ياض ريان السبع صاحبي وجاري اللي كنا بندرس مع بعض انا وانت وهو
_ اااه وده كان مختفي في اي مصيبة
_ كان مسافر السعودية ، انا رايح اقابله تيجي معايا
_ لا مليش مزاج روح انت
_ براحتك
سيبته وروحت قابلت ريان في كافتيريا كنا دائما بنقعد فيها زمان ولما شفته لاحظت التغيير اللي حصل في شكله بقا راجل وده اللي قولتهوله وانا بحضنه ف قالي
_ امال انا كنت إيه هتلبخ من اولها
_ ههههه قصدي انك نضجت طول بعرض وعيني باردة عليك
_ لا وانا اجي جمبك ايه انت اللي شكلك اتغير ده انا معرفتكش
_ الدنيا بتغير يا صاحبي ، اخبارك ايه طمني عليك ، الدنيا عملت ايه فيك
_ سحلتني سحل ، من بعد ما انت سافرت وانا مشوفتش يوم راح
_ ياه لدرجة دي قطعت بيك واتعذبت من غيري
_ لا مش عشانك انت
_ ههههه طيب جاملني يلعن اللي جابك
_ مانت عارفني مبحبش اكدب
_ انت ايه رجعك ما كنا مرتاحين منك
_ بتكدب باين علي عينيك ، ها احكيلي ايه اللي اتغير وانا مش موجود
_ كبرنا
_ لا ياشيخ
_ واتخرجنا ، انا وبشر اشتغلنا مع بابا وعمامي في السوبر ماركت وزيد بقا دكتور نفساني
_ واتجوزت طبعاً
_ لاا ده بشر نفسه متجوزش
_ ايه ده بقاااا ليه
_ مش عارف ما انا سايب البيت الأيام دي علشان الحوار ده
_ علشان مش متجوز
_ علشان مش راضي يتجوز
_ ليه يعني
_ أبداً ياسيدي كل الحكايه ان ابويا رافض وراسه والف سيف محدش يتجوز قبله
_ لا كده حرام عليه ، طيب ايه اللي مانع بشر من الجواز لغيت دلوقتي
_ بيقول انه مش لاقي البنت المناسبه قال
_ ده عدي التلاتين بيتهيالي كل ده ومش لاقيها
_ اه والله تصدق
_ والله ممكن ، يمكن عاوز يتجوز عن حب
_ وهو مدي لنفسه فرصه ده محترم بزيادة لما هيخلينا نعنس جمبه
_ مستعجل انت علي الجواز
_ مستعجل علي الخطوبة
_ في واحده بتلاغيك ولا ايه
_ ولا بتكلمني وحياتك ولا بتكلم حد
_ تلاقيها بنت تقيله
_ تؤ معقدة ، جويريه بنت عمي
_ ايه! ، جويريه؟!
_ اه
_ جويريه الصغيره دي
_ اه جويريه الصغيره بس هي كبرت دلوقتي وبقت عروسه
_ اه ، سبحان الله الأيام بتجري
_ فعلاً ده يجي ست سنين او سبعة دلوقتي من يوم ما سافرت وسيبتكم
_ ايوه عارف ، طيب ومقولتش لابوك انك عاوزها
_ قولت بس هو رفض وضربني وسيبت البيت وبعدين جه قالي اكمل زعل علشان بشر يوافق غصب عنه انه يتجوز ومش عارف امتي بقي هيقرر يتجوز ويخلصني
_ واضح انك بتحبها قوي ومش صابر
_ بحبها جداً ومش مستني اليوم اللي هتكون ليه فيه ياض
_ حبيتها بعد ما رجعت طبعاً
_ ايوه انا سيبتها عيلة ولما رجعت لقيتها انسه و لقيتها متعقده كمان
_ معقدة ازاي
_ مش عارف بس انا قبل ما اسافر كانت طبيعية ولما رجعت لقيت واحده تانيه خالص
_ ليه ، مالها
_ بتخاف من الناس جداً لدرجة انها ممكن تبكي لو حد قربلها ، كلامها قليل ويكاد يكون معدوم بقت زي العيل اللي عاوز يتخبي في حضن امه لدرجة انها مكملتش تعليمها بسبب الموضوع ده
_ انت بتقول ايه جويريه بنت عمك بدر ولا واحده تانيه
_ بنت عمي بدر
_ يابني ازاي دي كانت طبيعية وشاطره قوي في مدراستها
_ ما ده اللي هيجنني
_ طيب إيه اللي حصلها ، انا اخر مره شوفتها فيها كانت طبيعية
_ محدش عارف مالها وكل ما اسأل اذا كان اتعرضت لحاجة هي اللي عملت فيها كده يقولولي مفيش بيقولو بس انها صحيت متأخر في يوم ساكته في الاول محدش ركز علشان هي طبيعتها هادية وكلامها قليل وبعدين بدؤء يلاحظوا التغيير ده
_ يكون حصلها مس مثلا مفكروش يعرضوها علي شيخ
_ لا شيخ إيه عمي ومراته مش بيقتنعوا بالكلام ده
_ كان جربوا مش هيخسروا حاجه
_ مفتكرش ممكن يوافقوا ، المهم احكيلي ايه اللي حصل معاك وليه سيبتوا البيت
_ ده موضوع يطول شرحه
_ احكي ورانا إيه
_ خليها بعدين مش حابب ادخل في تفاصيل بتضايقني دلوقتي
_ ولا يهمك ، ناوي تسافر تاني
_ لا رجعنا نهائي
_ احسن ، و اختك لسة معاكم ولا اتجوزت
اتنحنح وهو بيقول
_ لا لسة ، بابارافض يجوزها بره مصر
_ جدع خليها جمبكم احسن
_ احسن طبعاً واهو تكون قريبه مننا
_ صحيح و حمدالله علي سلامتك
_ الله يسلمك يا حبيبي
_ قولي صحيح اتجوزت
سكت شوية وبعدين هز دماغه بنفي وقال
_ لا
_ ليه
_ ملقتش اللي تناسبني
_ إيه الحكاية ، طيب انت عارف ان بيجاد وبشر و زيد كلهم بيقولوا نفس الكلمه في ايه مالكم نفسكم مش بتروح ناحية الستات ولا انتوا فيكم حاجه غلط
_ يمكن مش طفسين علشان ناكل اي حاجه
_ يا تعبيراتك ، ده الحمدلله الذي عفانا مما ابتلي به غيرنا ياخي
_ ياريته ابتلاك امال لو مش بتقول انك لقيتها معقدة وبتخاف ، ولا تكونش بتحبك
_ ههههه لا وغلاوتك لسه من يومين بتقولي انا مش هتجوز وكل ما اكلمها تقولي عاوزه اروح وتسيبني وتجري
_ امال هتتنيل تجوزها ليه
_ بحبها يابني
_ بتحبها ااااه طيب ربنا يهني
_ اااااامين يارب
#زيد
روحت العيادة وبعد ما استقبلت الحالات ومشيوا فتحت الاب توب لقيت رسالة من اسيل اللي بقالها كام يوم مكلمتنيش ولا ردت علي رسايلي بعد ما كان يومي ميخلاش من رسايلها واحلامها وطموحتها اللي حقيقي بقت بتعجبني رغم هيافتها وبساطتها وفوراً رديت عليها وقولت
_ اسيل رجعت تنورني تاني ، غيبتي كتير المره دي ، لعله خير
_ لا مش خير، اصيص الورد بتاعي وقع اتكسر والوردات ماتوا
_ عشان كده مكنتيش بتبعتي ولا بتردي
_ اه علشان كده
_ ده اول واحد صح
_ ايوه ماهو ده اللي مزعلني منه لله القط وقعة
_ ههههه فداكي قدامك خمسة تاني تبدعي فيهم
_ حاسه اني مش هقدر اعمل حاجه تانيه كل الدنيا اسودت في وشي
_ تسود ليه احمدي ربنا ان أصيص واحد اللي اتكسر وركزي علي الباقين وخدي بالك من القط لا يكسرهملك
_ قط عاوز الضرب فوق دماغه ، والله لولا الحرام لا كنت سميته بشوية سم فيران
_ ههههه سم فيران للقط، قلبك ابيض ده قط يعني حيوان مفهوش عقل ومن الاهانه لنفسك انك تعمليله قيمة
_ ما انا عارفه انه حيوان بس حطمني
_ حطميه برجوع الابتسامة علي وشك
_ مش هعرف وهو حيوان مش هيفهم معني ابتسامتي
_ مش مهم ، ابتسمي عشان تثبتي لنفسك ان مفيش حاجة هتحبطك
_ هحاول
_ حاولي ، بصي للمرايا ورددي انا قدها ، انا قويه مفيش حاجه هتكسرني حمسي نفسك وشجعيها
#خلود
جميل اني اخد نصايح عدوي للانتصار عليه وفعلا عملت زي ما قال وقفت قدام المرايا وقولت بثقه
_ انا قدها ، انا قويه وهستمر مش هسمح لحد بيكرهني انه يحبط عزيمتي ، انا مبدعه ، انا ناجحة
كملت بغيظ
_ انا بكرهه وهفضل طول عمري اكرهه
قولت كده ورجعت كلمته وقولت
_ نفذت اللي قولت
_ خدي نفس عميق وخرجيه بالراااااحة
عملت زي ما قال وقولت
_ تمام
_ خدتي نفس وخرجتيه بالراحة؟
_ اه
_ تمام دلوقتي مبقاش غير تدخلي تتوضي وتصلي
_ ماشي
_ مستني اخر التطورات
_ ماشي
قفلت معاه ودخلت اتوضيت وصليت وغصب عني بقيت ابكي بسبب الفيديوهات اللي نزلتها والتجاوز اللي عملته وبقيت اقول لنفسي
_ بصلي بأي عين وانا منزله الفضايح دي
ف قومت من علي المصلية مسكت تليفوني وحذفت كل حاجه حتي الكويس منهم وبعدين دخلت نمت مصحتش غير علي صوت رنة التليفون ف لقيتها نيرة بتقولي
_ بت الحقي شكله كده حد هكرلك الاكونت وقناة اليوتيوب بتوعك
_ ليه؟
_ انتي نايمة ومش حاسة بحاجة ، كل حاجه عليهم اتحذفت يا فالحه
_ انا حذفتهم
_ ليه يابنتي
_ علشان انا غلطت مكنش ينفع اعمل كده انا خلاص مش هنزل فيديوهات كده تاني ، خليت ايه للبنات الصيع وبنات الليل ، لا دي مش تربيتي ، انا هعمل فيديو واعتذر عن كل اللي نشرته
_ حبيبتي هقولك حاجه ، انتي دلوقتي بقيتي في نظر الكل بنت مش كويسه ولو ناديتي لصبح مش هيقتنعوا ف بلاش جنان وبلاش تضيعي مجهودك "
قولت باستفهام بعد ما حسيت انها دائماً بتقصد توصلي الفكرة دي
_ نيرة هو انتي بجد صحبتي
_ بتقولي كده ليه
_ مش عارفه بس دايما بحسك قاصده توصليلي اني بنت مش تمام واديكي بدل ما تقولي ابطل عشان منظري بقا وحش بتشجعيني اكمل ومش مهم اي حاجه
_ انا بقولك كده علشان عاوزه مصلحتك ، الناس عمرها ما بتسكت وبتتكلم علي المحترمة والغير محترمة وعلي فكرة انتي بيتقال عنك كلام كتير وحش وانك بنت مش كويسة وشمال من قبل ما تظهري علي الانترنت من اصله زي ما بيتقال عني انا بردو ف انا بتكلم في المفيد ، ف احنا نسيب الناس ونركز في نفسنا ومصلحتنا وبعدين ده انتي بنفسك قيلالي انك كسبتي الوووف الفترة اللي فاتت ، سهل تضيعي مكاسب زي دي ممكن تغنيكي عن شغل البيوت وتخليكي غنيه علشان كلام الناس
_ اولاً انا مكنتش بشتغل في بيوت عمي عبيدة قال ل تيته تجيبني عندهم وهو متكفل بمصاريفي زي ما يكون بنته وبالفعل كنت واحده منهم مكنتش خدامه يعني ، ويغور المكسب ويغورو الناس ، اقولك حاجه كمان وتغوري انتي يا نيره انا مش عاوزه اعرفك تاني
قولت كده وعملتها بلوك
#نيرة
حتي بعد كل اللي حصل لسة شايفة نفسها ، بعد ما اتعرفت بأنها شمال لسة بتقولي مش اخلاقي ومش تربيتي وحظرتني بس معذوره لأنها متعرفش ولا جربت قلبتي ولا شافت وشي التاني اللي انا نفسي مبحبهوش..
بعد ما قفلت معايا نار ولعت جوايا وحلفت لا اندمها علي كل كلمة قالتها وعلي البلوك اللي عملته ف كلمت حسن
_ عاوزه اقابلك دلوقتي حالاً
_ وراكي مصلحة
_ ايوه
_ نوعها
_ هقولك لما اجيلك
_ تعالي مستنيكي
الفصل الثامن
هاجر
_ يا ولدي كفاية وارجع البيت حرام عليك تسيبنا كل ده ..... يقطع الجواز وسنينه افرض اخوك مقالش هتجوز هتفضل سايبني ... لا بيدك محدش غاصبك تسيب البيت ... خلاص يا بدر روح عنك ما ترجع "
قفلت السكه وحطت ايدها علي عينيها وبكت وقلبي اشفق عليها خلاني اقعد جمبها واقول وانا بربت علي ضهرها
_ متزعليش يا طنط دلوقتي يرجع
_ الواد معاند وبيقول لو مخطبنلهوش جويريه مش راجع ، وابوه بيقول مش هيخطب ولا يتجوز قبل بشر وبشر مع كل اللي بيحصل قدامه دماغه ممالتش ولا قال اخطب حتي علشان اخوي ، محدش حاسس بيه ولا مقدر
_ طيب اهدي علشان خاطري ومتزعليش دلوقتي كل حاجه تتحل
_ كيه بس كيه
حطت يدها علي عنيها وسكتت شويه وبعدين بصتلي وقالت
_ بقولك ايه يا هاجر
_ قولي يا طنط
_ ما تكلمي بشر هو بيعزك وبيعتبرك اخته حاولي تخليه يوافق ان شاءلله يخطب بس
_ مش هيوافق ، بس حاضر هحاول معاه علي قد ما اقدر
_ حاولي ربنا يقدرك
_ حاضر اوعدك هعمل كل اللي اقدر عليه
_ تسلمي يابتي ربنا يخليكي
وعدتها وانا متاكدة انه مش هيوافق ، وك محاولة مني قولت استني تخلص الامتحانات وبعدين اكلمه واطلب منه يتجوز ك هديه ل نجاحي بس يارب انجح
#بشر
عمال افكر في هدية مختلفه علشان افاجئها بيها لغيت ما لقيت الفكره وهي اني اجمع صور ليها من مراحل عمريه مختلفة في تابلوه كبير ومن اول ما لقيت الفكره تواصلت مع حد بيعمل الشغل ده واتفقت معاه يعمله وبعدها اتصلت بيها
_ مساء الورد
_ مساء الجمال ، اخبارك
_ اخباري كويسه وانتي
_ انا مفحوته في المذاكره ادعيلي
_ ربنا يوفقك شدي حيلك
_ كله علي الله ، بتعمل ايه كده
_ قاعد في المكتب
_ لسه مرجعتش البيت
_ لأ
_ نفسيتك تمام
_ علي حسب هتطلبي مني حاجه ولا بتطمني
_ ههههه بطمن
_ يبقي تمام
_ عارف
_ ايه
_ انا حرفياً يومي مبقاش يعدي لو مكلمتكش
_ عاوزه ايه يعني
_ ههههه لا بكلمك بجد
_ بردو عاوزه ايه
_ لدرجة دي شايفني مصلحجيه
_ بصراحه ايوه
_ اخس عليك مكنش ده العشم
_ اسفين ياستي بس ممكن اعرف السبب اللي خلاكي تقولي كده
_ يمكن علشان الفترة دي حاسه انك بقيت قريب مني اكتر من الاول ، واكتشفت فيك حاجات جديده
_ والمعني
_ ههههه المعني اني بعزك ، وبعتز قوي بوجودك في حياتي ومش عاوزه مصلحه وااااللهيييي
اترسمت ابتسامتي علي وشي وانا برد عليها واقول
_يعني لو مبقاليش وجود في حياتك هتزعلي
_ طبعاً يابني ، لا مقدرش اتخيل حياتي من غيرك
_ ولا انا
_ يعني لو موت هتزعل عليه
_ اه
_ نجرب ونشوف
_ ناويه تموتي ولا ايه
_ والله مش بعيد بص انا بعد ما اخلص امتحانات هدخل في مخاطره ويا قاتل يا مقتول
_ يا ساتر يارب ، هتعملي ايه
_ بعد الامتحانات هقولك
_ قولي دلوقتي
_ بعد الامتحانات علشان لو كسفتني هطفش ومش هتعرفلي طريق جرة
_ مش فاهم اكسفك ازاي
_ هقولك بعد الامتحانات
_ في ايه يا هاجر
_ ههههه في اني مش هحكي حاجه قبل الامتحانات
_ طيب هي حاجه كويسه ولا وحشه
_ خمن انت لغيت ما اقولك وباي علشان عطلتني عن المذاكره
قالت كده وقفلت وسابتني محتار بسبب تلمحاتها اللي مش مفهومة وبعد وقت وصلتني رسالة منها لصورة عروسة ف رديت عليها وقولت
_ مين دي
_ انا بوريك الفستان
_ حلو
_ ينفع يعني
_ ينفع لمين مش فاهم
_ قصدي حلو؟
_ في ايه يا هاجر
_ لا وانت كمان مفهمتش ، طلع مخك تخين اقفل
قالت كده وقفلت بعد ما سابت دماغي تودي وتجيب ومحتار في اللي ممكن تكون بتفكر فيه ، معقول تكون فهمت احساسي ناحيتها ، ولو فهمت ايه معني اللي قالته ده لا لأ اكيد مش اللي جه في دماغي
#زيد
بعد ايام فتحت القناة بتاعت خلود ملقتش اي فيديوهات من اللي كانت منزلاهم مكنش فيه غير فيديو واحد بتقول فيه وهي لابس اسدال الصلاة
_ في رأيي وبعد تجارب شخصيه عيشتها فهمت ان الطموح سلاح ذو حدين في منه مُضر وفي منه نافع وانت اللي تختار طريقة استخدامك لطموحك ده سؤاء بالسلب او الايجاب وللأسف انا جه عليه وقت استخدمت طموحي بطريقة سلبيه وغلط ويمكن انتوا او البعض منكم شاف الطريق اللي كنت ماشيه فيه لسنين علي مواقع التواصل الاجتماعي وكنت ازاي مسالمه ومواضيعي بسيطة وتناسب اي بيت، كنت في الاول بعمل محتوي خفيف ، مجمعه شوية بنات كلنا كنا صحاب وبنعرض مشكلة ونحلها مع بعض لغيت ما في يوم دخلت تحدي بيني وبين شخص انا بجد مش بحبه بلاش بكرهه علشان دي كلمة تقيله شويه وبتمني لو هيشوف الفيديو يعرف ان رأيه ميفرقش معايا وانا معملتش كده علشان انت كنت شايف ان ده الصح ..
انا عملت كده لأني بعد ما فوقت من زهوة النجاح المفاجيء اللي حصلي في فترة صغيرة جداً اكتشفت ان دي مش انا ، مش اخلاقي ، مش تربية تيته امينه ليه الست الطيبه اللي ربت ايتام وكانت هي الاب والام ليهم وربتني انا من بعدهم بنفس الطريقة ويشهد ربنا ان لولا وجودها في حياتي مكنش جه عليه الوقت اللي افوق واعترف اني غلطت وكنت استخسرت مجهودي اللي بدء يجني ثمارة بسرعة واللي لو كملت فيه لسنه واحده بس مكنش في حد هيكون قدي ف لا انا متنازله عن كل ده عشان تيتة امينه وعشان البنات الصغيره اللي بيتابعوني ، وعشان مشيلش ذنوب ، وعشان اكون راضية عن نفسي ، وبالفعل انا نضفت القناة والبيدج من كل الفيديوهات اللي مش كويسه والكويسه بالمرة وإن رجعت اعمل فيديوهات تاني هتكون بنفس الطريقة القديمة والقرار ليكم هتقبلوني بالطريقة القديمة والمواضيع اللي تناسب اعمار البنوتات الصغيرة تمام مش هتقبلوني ف تمام بردو بحبكم قووووووي واسفة إني صدعتكم مساء الورد
اه وبنسبة للحجاب ف لا مش اتحجبت انا بس كنت بصلي ولسه مقلعتهوش "
عجبني كلامها وضحكتني رسالتها ليه ومع اني مش بعلق لحد بس قررت اعلق ليها هي واقول
_ مش غلط ان الانسان يغلط ويمر بتجارب تخالف مبادئة وتربيته والقيم اللي اتربا عليها او يتخذ قرارت متهوره في بعض الأحيان بالعكس دي حاجات علي قد ماهي تبان انها غلط لكن في الحقيقة هي شيء إيجابي جداً وبتساعده يتعلم من تجاربه وتزود خبرته في الحياة علشان لما يمر بمواقف مماثلة يعرف يتصرف فيها ازاي ، والاعتراف بالغلط علي الملاء زي مانتي عملتي شجاعة ومش اي حد يعملها ومش اي حد يقدر يعترف بغلطة حتي بينه وبين نفسه ، والاغلبيه بتكابر وحتي لو اعترفوا بغلطهم مش بيعترفوا بطريقتك دي وكويس جداً انك مخوفتيش من شماتت الشخص اللي بتوجهيله رساله في كلامك او انه يقولك انتي ٠ ( مكانك المطبخ )، كملي ، اختاري مواضيعك بعنايه لان واضح ان ليكي معجبين وفي منهم واخدك قدوة
خلود
شوفت تعليقه وبقيت اكابر علشان مضحكش وانا عارفه انه نيته مش النصح والدعم قد ما كانت نيته انه يقولي وسط الكلام وما بين قوسين ان مكاني المطبخ وبعد وقت وانا في صراع بيني وبين نفسي ارد ولا مردش وصلني اتصال منه ف رديت برخامه وقولت
_ افندم
_ شوفتي تعليقي
_ شوفت جملة مكانك المطبخ اللي حضرتك حطيتها بين قوسين
_ مع ان التعليق طويل جداً معقول مشوفتيش غير اللي ناسبك ههههه
_ انت عايز ايه
_ عاوز اقولك حمدالله علي السلامه
_ ليه وانا كنت مسافره
_ تقريباً
_ مش فاهمه
_ لا فاهمة وانا مش متصل اضايقك انا كنت عاوز اقولك برافو عليكي ، انتي بحذفك للفيديوهات واعترافك بغلطك رجعتي خلود اللي نعرفها
_ بس انت كنت معترض علي ظهوري من قبل الفيديوهات دي
_ ولغيت دلوقتي معترض انا مش مع ان الستات تدخل الانترنت بس دي حياتك
_ ماهي كانت حياتي بردو وانت بتحبطني
_ بطلي الكلمة دي انا عمري ما هحبطك لو كنتي ماشية في طريق صح ، انا كنت بنصحك
_ اممممم
_ متفكريش كتير وياااستي كل واحد وحياته انا صعيدي وعندنا مفيش ان واحدة تكون بلوجر ولا حتي تحط صوره علي حسابها انما انتي اسكندرانيه ودي حاجه للبعض منكم عاديه متعتبرش عيب وهي مش عيب علشان متزعليش لكن كل واحد وطبيعة حياته وانا اسف اني اعتبرتك ست وقولتلك مكانك المطبخ
_ قصدك اعتبرتني خدامه مين قالك انت ان الست مكانها المطبخ
_ ده اللي احنا شايفينه طول عمرنا
_ طيب
_ ههههه واضح اننا مش هنتفق حتي لو بقينا مشاهير زي بعض
_ عجبتني الكلمه دي مشاااهير زي بعض
_ طبعاً محدش يقدر ينكرها دي ، انتي نجحتي وبقيتي مشهوره ورأيي مش هيمحي الحقيقة دي
_ الحمدلله انك اقتنعت
_ اقتنعت طبعاً انا اقدر اتكلم
_ ماشي
_ طيب ايه مش هترجعي
_ لا مرتاحه بعيد عنكم
_ غريبه مع اننا مش مرتاحين وحاسين ان البيت ناقصة حاجه كبيرة من غيرك
ابتسمت ابتسامه خفيتها بكبر وانا برد واقول
_ بردو مش هرجع
_ اوكي براحتك ، لو احتجتي حاجه انا موجود
_ مش عاوزه منك حاجه
_ ههههه ماشي يلا هسيبك تلاقيكي مش فاضيه وبتنضفي المطبخ سلام
قال كده وقفل وانا معرفتش ابتسم ولا اكشر كان احساس مختلط بين الفرحه والغيظ
فرحه بانه اعترف اخيراً اني نجحت وبقيت زيه وغيظ بسبب انه مُصر يضايقني بأي شكل
وبعد وقت وانا لسه ماسكه التليفون بكتب رد وارجع احذفه وصلني منه رساله علي حساب اسيل ف فتحت الشات ورديت علي رسالته اللي بيقولي فيها
_ ازيك
_ الحمدلله وحضرتك
_ انا تمام وانتي نفسيتك عامله اية
_ ماشيه
_ ماشيه؟ افهم من كده انها مش تمام
_ تمام بس مش قوي
_ ليه القط كسر حاجة تانية
_ ههههه لا
_ امال ايه
_ مفيش بس قاعدة زهقانة شويه نفسي اخرج ومليش نفس ، جعانه ومليش نفس ، عاوزه انام ومليش نفس ، احاسيس مختلطة
_ فاهمه الشعور ده يمكن بمر بيه دلوقتي
_ طيب وايه السبب
_ الحقيقة مش عارف
_ وقررت تعمل ايه
_ قررت اكلمك
_ بس
_ ده اللي في ايدي دلوقتي لغيت ما ابدء الشغل
_ ايوه يعني انت اللي مانعك من الخروج او النوم ان معاد شغلك قرب
_ بالظبط
_ حاسس بالملل؟
_ ملل قاتل ولو مش مرتبط بمواعيد كنت مشيت
_ طيب تسمحلي اتجاوز حدودي والعب معاك لعبة يكون معاد شغلك جه
_ تجاوزي كده كده انا مش بتعامل معاكي علي اني دكتور ولا علي انك مريضة
_ اشمعنا
_ مشكلتك هينه نفس المشاكل اللي بتحصلنا كلنا في العادي مش مريضة نفسية يعني ولا حاجه
_ طيب امال حضرتك متابع معايا ليه
_ علشان ليه نصيب العب معاكي اللعبة اللي هتلعبهاني دلوقتي
ابتسمت انا وبرد
_ اوكي ، اللعبة هي اسئله عن الالوان ، حيوانات ، انواع اكل او نبات
_ ماشي ادخلي وهفهم من خلال سؤالك
_ اوكي ، بما اني انا بحب الزهور ف هبتدي بيها وبما انك دكتور نفساني ف يمكن تفهمني بسهولة
_ اوووكي
_ في ناس بيعبروا عن شعورهم تجاه بعض بالورد ف لو هنقول الوردة البيضاء هتهديها لمين ؟
_ اشمعنا البيضاء
_ اسفه مفهمتكش كويس بس الوردة البيضاء ترمز الي الصفاء
_ فهمت
_ طيب ايه
_لو قصدك اني ممكن اهديها لشخص شايفه صافي لا يحمل حقد في قلبه ف انا ههديها لكل عيلتي ولو تقصدي الصفاء بمعني اتصافي مع حد ف ههديها لشخص تقريبا اتصفيت معاه النهاردة
ابتسمت لإني عرفت اني انا المقصودة وقولت
_ هي تمشي مع الاتنين مفيش اي مشاكل ، تاني سؤال
_ لا جاوبي علي سؤالك انتي الاول
_ اهدي لمين الورده البيضاء قصدك
_ اه
فكرت شويه وبعدين قولت
_ لناس كتير في حياتي
_ متقوليش اهلك علشان مش هصدقك
_ لا مش لأهلي الحقيقه اني عمري ما حسيت نحيتهم بالصفاء بس في ناس غيرهم اعرفها تستاهلها
قولت كده لأني انا تقريبا معنديش اهل زيه ، لا اخوات ولا ام ولا اب وبعدين كملت كلامي وقولت
_ السؤال التاني ، الورده السودة ترمز للكره تهديها لمين
_ مش ههديها لحد مفيش حد في حياتي ممكن اهديله اللون ده
_ مفيش حد خالص زعلك زعل يكرهك فيه
_ لا مفيش انا اساسا راسم حدود مش بسمح لحد يتخطاها علشان اكرهه
_ ممكن اتدخل واسألك ايه اللي ممكن يخليك تكره
_ كتير ، شخص كسر ثقتي فيه ، والكداب ، المخادع ، اللي يتعدي عليه بأذي من غير وجه حق وكده يعني ، وده الحمدلله محصلش معايا
_ انت اول واحد في التاريخ ميتعرضش للمواقف دي خد بالك
_ مش معصوم منها بس زي ما قولتلك راسم حدود مفتكرش ان ممكن يجي يوم وحد يقدر يتخطاها
_ ايه الثقة الزايدة دي ضمنت منين
_ مش ضامن طبعاً بس بالإضافة ل رسم الحدود انا مش بعرض نفسي لمواقف ممكن حد يعمل الحاجات دي معايا عشانها
_ اها وصلت
_ طيب وانتي
_ لا كتير ، زمايل في المدرسة ، ناس محيطين بيه ناس كتير بقابلهم في حياتي يستاهلوها
_ طيب وتاني سؤال
_ ايه اللي ممكن يكرهني في شخص؟
_ ايوه
_ كتير ، كسر ثقتي فيه زيك بردو ، الاستهزاء من شعوري او الحاجات اللي بحبها ، التقليل مني ، اللي بيدسوا الكلام الجارح واللي يوجع وسط الكلام والهزار ، كتير جداً
_ عندك حق ، انتي عارفه هقولك حاجه افتكرتها قبل ما نكمل
_ قول
_ لو متأكدتش بنفسي كنت قولت انك واحده اعرفها
توترت من كلمته ف قولت
_ ازاي يعني
_ في واحده في حياتي نسخه منك
_ نسخة مني ازاي
_ طموحة زيك كلامها زيك نسخة منها في كل حاجة بس الفرق الاهتمامات مختلفة
_ لا دي تبقي معقدة بقا
_ لا بالعكس بنت ذكية وشاطره مع انها صغيرة في السن بس عقلها كبير واهتمامتها غير كل البنات اللي في سنها ، حاجة مختلفة جداً
_ وانا زيها في الحته دي بردو ولا ايه
_ اه بحسكم واحد ، بعيد عن انها محبتش زيك
_ شاكك انها ممكن تكون انا
_ ما انا بقولك اتأكدت ، في الاول كنت شاكك فيها بس بعدين اكتشفت انكم مش واحد
_ الحمدلله كنت خايفه اكون موضع شك
_ لا أبداً كملي
_ طيب الورده الصفرة وهي ترمز للغيرة
_ لو الغيرة المرتبطة بالحب ف انا مجربتش قبل كده بس ممكن اديها لستات في عيلتي مبحبش حد يقربلهم هما ملكية خاصة
_ طيب الحمراء ، ترمز للحب
_ لو بتتكلمي عن الحب العاطفي ف لا مفيش واحده في حياتي اهديهالها ومجربتش الحب ده ، ولو الحب عموماً ف انا ههديها لعيلتي اولاً وثانياً لناس تانيه اعرفها في شغل ودراسه وصداقة وانترنت زيك كده
رديت بإبتسامة
_ متشكر ده شرف ليه بس معقول محبتش خالص
_ طبعاً معقول ، انا عندي مواصفات قاسية جداً في اللي ممكن احبها
_ ههههه مع احترامي ليك بس اوبشن اختيار اللي نحبهم مش موجود في قاموس الحب
_ لا بقا موجود ده هو الأساس في اي قصة حب ، شوفي هقولك حاجة
_ قول
_ القلب ده ملهوش علاقة بالحب كل اللي قالوا ان القلب هو اللي بيحب كداب ، كلنا عارفين ان دور القلب و وظيفته الاساسية هي الاستمرار او توقف الحياة وضخ الدم طبعاً وناهيكي عن موسوعة كامله في دور القلب في حياة الإنسان دي مش هتكلم فيها ممكن تسألي دكتور بشري هيفيدك اكتر مني
_ ههههه طيب كمل
_ انا ك زيد ومن خلال شغلي وتجارب ناس كتيره اتعرضت عليه انا شخصياً علي لسان اصحابها اكتشفت ان العقل هو المسؤؤل الاول والوحيد عن اختياراتك لكل حاجة في حياتك ، سواء لبس ، اكل ، أصحاب ، حزن ، فرح ، معتقدات ، وحتي الحب ، العقل هو اللي بيختاره ، بيختار يميل لشخص بعينه شايف فيه المواصفات اللي بتعجبه سؤاء شكل او شخصية او مال مثلا وبتحصل في ناس كتير بتحب الشخص علشان ماله او مكانته في المجتمع ، وفي الغالب ونسبة كبيرة قوي من الناس تلاقيها مش بتحب هي انبهرت بحاجة شافتها ، او زي ما قولتلك لقو المال او المكانه اللي هما بيدوروا عليها و عقلهم اقتنع بده ف تلاقي كتير من قصص الحب بتفشل بعد الجواز بعد ما كل واحد يكتشف عيوب التاني ونفس العقل اللي زينله في الاول المميزات بيرفض العيوب وينسي كل المميزات عشانها ف بنسبالي انا محدد مواصفات البنت اللي هحبها وهكمل معاها حياتي طبعاً مش هقولك هختارها كاملة لأن مفيش حد كامل الا الله سبحانه وتعالي بس هختار مواصفات تناسبني وتناسب حياتي وعادتنا ك صعايدة واي عيوب بعد كده نحلها بالتفاهم
ابتسمت لكلامه وقولت
_ عندك حق كلامك مظبوط انا مكنتش فاهمه ده ، وشكلي هاخد كلامك مبدء في اختيار شريك حياتي
_كده يبقي تجاوزتي 90 في الميه من مشاكل ما بعد الجواز و99 في الميه من نسبة الطلاق المحتمله
_ ههههه طيب مفيش طريقة تخليني اتجاوز 100٪ من نسبة الطلاق
_ ههههه لا للاسف القدر والنصيب هو المسؤؤل عن النقطة دي بذات بس يعني لو هنمشيها اننا نتجاوز نسبة الطلاق اللي ممكن تحصل بسبب المشاكل ف ممكن تتجاوزيها ب اختيارك لشريك حياه يناسبك بنسبة كبيره 95٪ ك حد ادني ، حد ادني مش حد اقسي اديني بقولك ، يناسبك ازاي بقا ، هقولك تشبيه للي اقصده وهو ان انتي ممكن تختاريه يشبه للقطعة الاخيرة في لعبة البازل لتركيب الصور يعني اول ما تمسكيه الصورة تكمل
_ هههههههههه اخر قطعة في لعبة البازل ، والله شكلي كده مش هتجوز لو اعتمدت نصحيتك دي ، كمل
_ هههههههه ماشي ، وتتجاوزيه ازاااي كمان؟ برد فعلك الرزين من غير انفعال في وقت المشكلة ده اللي اقدر اقولة
_ عندك حق ولو ان كلامك فلسفي شوية وميمشيش مع الواقع بتاعنا بس اقنعني
_ ما انا دي شغلتي الفلسفه وبس... دورك بقا هتهدي لمين الورده الصفره والحمرة
_ مفيش حد ، مش بغير علي حد ولا بحب حد
_ولا حتي المرحوم
سكت شويه وبعدين قولت
_ ماهو مات بقا الله يرحمه
_ طيب سؤال
_ اسأل
_ لو كان عايش للوقت ده وانتي بمستوي تفكيرك ده كنتي هتشوفي ان هو الشخص المناسب وحطي اختيارات العقل في دماغك انتي وبتجاوبي
سكت شويه مش عارفه ارد اقول ايه وبعدين رديت وقولت
_ لو بالعقل ولو هحط في حساباتي اني هشارك حد حياتي لخمسين سنة قدام مثلا وانا ضامنه اني انجح معاه ف لا وافتكر اني لو هفكر بطريقتك عمري ما هتجوز مين دلوقتي تضمن نجاح حياتك معاه مفيش خالص
_ وده رأيي انا كمان مش شايف ان في حد ينفع بس ادينا بنحاول
_ ههههه ادينا بنحاول
_ اوكي مستني اعرف لو محاولاتك نفعت ، وشكراً علي اللعبة عجبتني وخرجتني من حالة الملل
_ العفو وانا كمان حاسه اني خرجت من الحاله دي
_ تمام مستني منك العاب جديده ولازم اقفل عشان معاد الشغل جه
_ تمام مع السلامه
_ مع السلامه
مش عارفه اوصف احساسي دلوقتي في حاجه غريبه حصلت كل اللي كان في دماغي نحيته اتبدل تماماً ومش فاهمه إيه اللي كان مخليني دائما في صراع معاه وشيفاه شخص وحش مع انه هو كده طول عمره ، بس افتكر انه لو جرب يعاملني زي ما بيعامل اسيل مكنش حصل الصراع ده من الاول وافتكر بردو ان طالما معترض علي ظهوري علي الانترنت ف عمره ما كان هيعاملني زي اسيل اللي بتحب الورد واقسي طموحها انها تزود نبته جديده في اصيص جديد تضيفه لصف الاصيص اللي عندها
« بعد ايام»
#بشر
كان كلامها بيوصلي احساس ان اللي هتقوله هيفرحني حاجه استنيتها وهتتحقق ومع كامل خوفي اني اتصدم إلا إني كنت ملهوف جداً اسمع اللي هتقوله ومجرد ما خلصت الامتحانات مستنتش النتيجة وروحت لراجل اللي وصيته يعملي التابلوه وخدته وروحت عند البحر وهناك اتصلت بيها ولما ردت قولت
_ الناس اللي خلصت امتحانات
_ ههههه اهلا بالناس اللي مش مستنيه ظهور النتيجة قدي
_ مش متصل عشان كده
_ امال متصل ليه
_ عشان اقولك جهزتلك الحاجه الحلوه اللي طلبتيها علي ذوقي
_ حاجه ايه دي
_ نسيتي
_ ااااه افتكرت ، مجهزلي ايه بقا
_ مستنيكي عند البحر تعالي وشوفيها بنفسك
_ شكل مزاجك رايق
_ شوية
_ لييييييه
_ نقول علشان هشوفك يكون لقيت سبب
_هههههههه اوكي المهم انه رايق ، انا عاوزاه النهارده بذات يروق
_ اشمعنا
_ هقولك لما اجي
_ ماشي استعجلي بس
قفلت معاها وقعدت استناها بلهفة وانا علي احر من الجمر لسماع اللي عايزة تقولي لغيت ما جت وابتسامتها ماليه وشها وبتقولي وهي باصه لتبلوه اللي متغطي بورق هدايا
_ هي دي الحاجه الحلوه
_ ايوه اتفضلي
مسكته مني وقالت بإبتسامة
_ ياااترا ايه أكيد مش باب ، افتحها عادي هنا
_ ماشي بس متقطعيش الورق علشان نغطيها تاني
_ اوكي
قعدت علي حجر وفتحتها ولما شافتها شهقت بصوت عالي وقالت
_ اااالله دي ليه
_ هتكون لمين غيرك
بصتلي وقالت
_ تحففففففه بجد يا بشر والله انت انسان عظيم ، حلوه قوي بجد
_ مبسوط انها عجبتك
_ طبعا لازم تعجبني اااالله يا بشر ، بس الصور دي جمعتها ازاي دي مش موجوده عندي
سكت ف قالت بإبتسامة ولمعه في عينيها
_ كنت محتفظ بيهم
_ ايوة مبحذفش حاجة
زادت ابتسامتها وهي بتقول
_ بشر والله ما عارفه ازاي اوصف شعوري ولا اوصف قد ايه انا بحبك
سكت وانا بظبط نفسي علشان اتأكد من قصدها ف قالت
_ انت بجد مفيش زيك في الدنيا كلها وانا محظوظه انك في حياتي
_ اه طيب قولي كنتي هتقولي ايه
_ طيب قولي الاول ، انا غالية عندك ولا لا
_ انتي عارفه انك غالية عندي بس قولي
_ يعني مش هتكسفني مهما اقول
_ هاجر اتكلمي علي طول
_ طيب احلف انك مش هتكسفني
_ ياستي مش هكسفك بس قولي
اتنفست بعمق وقالت
_ انا
_ انتي إيه قولي
_ انا عاوزاك تجوز ، كفاية عزوبية لغيت هنا ارجوك وافق بقا
_ اتجوز مين يعني ، مش فاهم ، هو في ايه
_ تجوز يا بشر تشوف عروسه وتجوزها
سكت شويه اجمع انفاسي واحاول اخفي توتري وقولت
_ ليه بتقولي كده ، ايه اللي جد
_ اللي جد انك كبرت والعمر بيجري ، اللي جد ان بدر اخوك سايب البيت ليه كتير وانت مهتمتش
سكت شويه اتمالك اعصابي واركز وبعدين قولت
_ اه ، يعني انتي عاوزاني اتجوز علشان بدر يرجع
_ علشانكم انتوا الاتنين ، علشان انت لازم تجوز وتفرحنا كلنا وعشان بدر يرجع
_ اه بس هو مش هيرجع عشانك ، ده مبيحبكيش انتي .....
قالت بمقاطعة
_ قولتلك اني نسيت وحتي لو منستش مش مهم يرجع عشاني ، المهم يرجع
ديرت ليها ضهري بعد ما عجزت عن اني احبس دموعي ف قالت
_ علشان خاطري لو صحيح غالية عندك اتجوز ، بشر علشان خاااطري وافق فكر في غيرك ، جوازك هيسعد الكل وانت اولنا
قولت وانا حاسس قلبي مقسوم نصين
_ ماشي ، هتجوز ، من دلوقتي هخليهم يشوفولي عروسه ، والله لا هتجوز يمكن مشاكلكم تتحل
قولت بعد ما رجعت ابصلها
_ بس هقولك حاجة كابسة علي نفسي ولازم اقولها ، انا اكتر حاجه ندمان عليها دلوقتي اني ضيعت سنين من عمري علشان حاجة متسواش
بعثرت نظراتها وقالت
_ يعني موافق
_ موافق يا هاجر
بصتلي بإبتسامة متردده وقالت
_ كويس قوي ، انا مبسوطة ، الف مبروك
_ الله يبارك فيكي كان نفسي اباركلك بس شكلي هحضر ايام حزنك قريب قوي بعد ما انا اتجوز وبعدي بفترة صغيرة بدر لا وبعدي ليه وعد هخليه يتجوز معايا في نفس الليلة
قولتها ومشيت من غير ما ابصلها تاني مشيت وانا حاسس اني بتمزق نصين ومش مصدق انها محستش بيه مع كل الحب اللي حبتهولها لا وكمان عاوزاني اتجوز علشان بدر يرجع ، بدر اللي مش شايف اهتمامها بيه ولا عمره هيشوفه ، حتي بعد ما ساب البيت علشان غيرها لسة عايله همه وبكل غباء بتدوس عليه علشانه وفي اللحظة دي قررت ادوس علي قلبي بالجزمة وانساها واتجوز واعيش حياتي ورجعت البيت وقابلت خالتي هناك ف قولتلها من غير مقدمات
_ شوفيلي عروسه في اسرع وقت
تجاهلت فرحتها هي وبتسألني اذا كان بتكلم جد ولا لا ودخلت اوضتي وقفلت علي نفسي
#فاطمة
كل ما يوم رجوعنا يقرب قلق بابا يزيد ولما سألته ليه قالي
_ مش عارف هقابل وفاء تاني ازاي بعد السنين دي كلها ، وايه هيكون رد فعلها
_ رد فعل زي العسل ، هتقابلك بالحضن علشان اكيد وحشتها
_ تفتكري ، يعني هي ممكن تنسي اني سيبتها ومسألتش عنها تاني
_ قولها اي حجة قولها مثلا ان رقمها ضاع او ان حصلك مشاكل هنا
_ لو كان علي الاسباب ف انا مش محتار فيها انا عليها هي مش عارف هتتفهم الاسباب دي ولا لا
_ هتتفهم وهتستقبلك احسن استقبال وحتي لو عتبت عليك مفهاش حاجه اتعاتبوا وانهي اي زعل بينكم
سكت وبعد وقت بقا يبتسم ابتسامه ظاهرية من غير سبب وكأنه بيداري حاجه ف قولت
_ مالك يا بابا حضرتك كويس
قال وهو بيتجه ناحية الحمام ويتهرب مني
_ اه بس عاوز اروح الحمام
مشي ورجع بعد شوية يبتسم بتعب روحت عنده ومسكت ايده ف ضمني الحضنه وقال وهو بيبوس دماغي
_ انا كويس حبيبتي متخافيش
_ شكلك مش مريحني الأيام دي ، حضرتك كويس
_ اه الحمدلله حبيبتي كويس بس عاوز انام شوية
_ بابا ارجوك تعاله نروح لدكتور انت شكلك تعبان
_ يابنتي انا كويس هما شوية مغص من اللخبطه في الاكل وهيروحوا لحالهم سيبيني انام بقا وانتي روحي حطي حاجاتك اللي مش هتستخدميها تاني هنا في الشنط علشان مش عاوزين ننسي حاجه "
سابني ودخل اوضته وانا وقفت شويه افكر في حاله اللي مبقاش عاجبني وعنده في انه ميروحش لدكتور
#بدر
كنت مع ريان بنتكلم ونستعيد ذكرياتنا مع بعض وفجأة قطع كلامنا رنة التليفون والمتصل كان ماما رديت عليها وقولت
_ ايوة يا ماما
_ انت فين تعاله البيت بسرعة
_ يا ماما انا قولتلك مش هاجي غير لما بابا يخطبلي جويريه
_ يا واد اخوك قالي اجمعله عروسه يعني هيتجوز ومشكلتك هتتحل
_ بتتكلمي جد يا ماما
_ ايوه بجد تعاله قوام
_ طيب طيب... ولا اقولك لا بعد ما يخطب او يتكلم علي اي واحده لربما يرجع في كلامه
_ حرام عليك يا ولدي متوحتش امك
_ وحشتيني يا ماما وانا بكلمك كل يوم واطمن عليكي اهو ، سامحيني ، حقك عليه متزعليش
_ لا والله زعلانه منك ، وممسمحاك
قالت كده وقفلت ولكن فرحتي نستني اني اتصل بيها تاني وبصيت ل ريان وقولت بسعادة
_ اخيراً هقدر اخطب جويريه
_ الف مبروك
_ ايه البرود ده ومالك بتقولها من غير نفس كدة
_ من غير نفس ازاي ازغرت يعني ، انت بس اللي فرحتك مش سيعاك ف حاسسها من غير نفس
_ عندك حق ، انا مش مصدق اني خلاص هخطبها ، يااااه عقبال ما تخف ونتجوز
_ هتخف وهتجوزوا انتوا الاتنين ولاد حلال وتستاهلوا بعض
_ حبيبي عقبالك
_ ههههه لا انا مش هتجوز بابا مش راضي يجوزني قبل اسراء
_ هههههههه بتتكلم بجد
_ لا طبعاً بهزر ده كان عايز يجوزني من زمان بس انا رفضت
_ ليه يافقري
_ ما انا قولتلك
_ ملقتش واحده مناسبه ومش هتلاقيها جكم الهم
_ عندك عروسه ليه
_ اه عندي البنت هاجر او خلود حفيدة داده امينه
ابتسم ابتسامه بهتت بسرعه وقال
_ هاجر كبرت ، شوفتها من يومين ، بس مشوفتش خلود ولا جويريه
_ الاتنين قد هاجر
_ فعلاً كانوا التلاته قد بعض
_ هما اتولدوا في نفس الشهر
_ ايوه انا فاكر كنتوا تعملوا اعياد ميلاد لتلاته سوا حتي حفيدة الخدامه
_ متقولش عليها خدامه داده امينه امنا التانيه وخلود متربيه معانا وبابا معتبرها بنته
_ ربنا يديم المعروف بينكم
_ يارب ، بس مالك من وقت ما رجعت وانا حاسس ان فيك حاجه
_ مش عايز انكد عليك
_ لا نكد براحتك، احكيلي مالك
_ والله يا بدر يا خويا طهقان من حياتي ومن الدنيا كلها
_ ليه كده
_ مش عارف اهو مخنوق وخلاص
_ طيب انت ليه مش بتدور علي شغل يسليك شويه
_ مش بدور علي شغل انا بدور علي منتج او مخرج ياخد القصص اللي بكتبها
_ نعم! انت لسه بتكتب
_ طبعاً ده انا عندي ولا 200 قصة نفسي واحده منهم تطلع لنور ، ربنا بلاني بكام مخرج كل اللي اعرض عليه قصة يقولي لا ده شغل مش هيمشي حاله في مصر ومحتاج انتاج ضخم
_ هو انت لسة بتكتب قصص رعب
_ اه معظمهم كده ، رعب اشباح ، رعب نفسي ، رعب دموي ، معظم قصصي كده ومتأكد لو قصة واحده منهم اتعملت فيلم او مسلسل والله لا باقي القصص يتاخدوا هوا
_ ياحبيبي انا قريتلك قبل كده بس فعلاً النوع ده مش شغال هنا ينفع في هليوود بس هنا لا ، اصلاً الحكومه ممكن تمنعه
_ بلاش دموي ، عندك قصص الاشباح ليه ميتعرضوش يلعن ابو ام الاحباط ياخي
_ ههههه هو احباط بشكل ، بس اسكت بجد القصص دي خطر افرض عيل حب يقلدها
_ ماهما بيشوفوا اوسخ من كده في الافلام الأجنبي
_ ماشي بس احنا مجتمع بيتأثر قوي بالافلام وبنقلد ، حاول تغير نوع القصص ، خليك في الاكشن ، فانتازيا ، رومنسي
_ كتبت شوية من الأنواع دي في الاول بس مش كتير علشان انا ذوقي رايح شويه لرعب ، واصلاً انا بداياتي كانت في القصص الرومانسيه وعندي في الشقة كمية قصص رومانسيه لكتاب مشاهير واجانب اتعلمت منهم كتير وهههه و....
_ واييه ، قول
هز دماغه بنفي ف قولت
_ قووول ، ايه سر الضحكه دي
_ ابدا بس....
_ بس ايه
قال بتنهيدة
_ زي ما قولتلك ان بدياتي كانت في القصص الرومانسيه كتبت كام قصة بالطابع ده وبعدين قولت كفاية كده مش لايق عليه الرومانسي وخاصة اني مكنتش مريت بمشاعر حب تدعمني في سرد القصص دي وبعدين حصلت حاجة خلتني ارجع تاني لنوع ده وبدأت اكتب قصة من قبل ما اسافر ومنهتهاش غير قبل ما ارجع بوقت صغير كانت قصة رومانسيه دراميه حزينه بس كان غالب عليها الطابع الرومنسي كتبتها بكل تفاصيلها دخلت بيها جوه الشخصيات لدرجة اني قعدت فترة كبيرة مش قادر اطلع منها وبسبب تأثري بيها كنت ماشي اسبل لناس في الطريق
_ ههههه لدرجة دي
_ اه والله
_ هي بتتكلم عن ايه
سكت شويه وقال
_ بتتكلم عن الفراق والحب والاشتياق ، كانت القصة بتتحكي علي لسان البطل ، وطول القصة بيوصف المعاناة اللي شافها في الفترة اللي غاب فيها عن البطلة وعن المرحلة اللي مر بيها من وقت ما مشي وسابها وبعدين بينتقل من مرحلة الاشتياق والفراق والحاجات اللي حصلتله لسنين لمرحلة القاء مره تانيه وبيمر بمشاكل وفي النهاية بتتحل ويتجوز البطلة ده اختصارها
_ قولتلي في حاجة حصلت خلتك ترجع تكتب رومانسي ، ياتري ايه هاا إيه
ضحك ضحكه ظاهرية وقال
_ حد بيخاف من الرعب وعدته هكتبله قصة خفيفة
_ حد ولا حده
_ هههههههه حد
_ امممم طيب وقصة مين دي تشبهك شوية؟
_ مش قصتي انت عارف اني مكنش ليه في الكلام ده واي وقت فراغ كنت بقضية في الكتابه
_ ايوه صحيح وكنت بتتأثر قوي باللي بتكتبه كنت دايما الاقي تعابير وشك بتتغير وانت قاعد معانا مره تكشر مره تنفعل مره تضحك كنت بحسك ملبوس
_ دي حقيقة انا فعلا بعيش الشخصية اللي بكتبها بلاقي نفسي بتحول من شخصية لشخصية
_ اه يعني انت ممكن تتحول دلوقتي وتقلب عفريت من بتوعك او قاتل متسلل وتقتلني
_ هههههههه لا لا مش بتحول بشكل ده انت فاهم غلط ، الموضوع ان انا دماغي طول الوقت بتفكر في تفاصيل الشخصية يعني مثلا تلاقيني قاعد معاك وفجاة سهمت وزي ما بتقول تعابير وشي بتتغير مع نفسها اهو انا في الوقت ده مبكنش معاكم
_ هههههههه طيب وليه الغلب ده ما بلاش منها
_ مقدرش ادمان يابني طيب تصدق اني حاولت كتير أبطل علشان الحته دي ف اضطريت امشي مع شوية صيع واللهي نفسي لغيت ما جروني لسكت المخدرات
_ بتهزر
_ والله بتكلم جد ، انا جت عليه فتره ادمنت المخدرات ومع كده مقدرتش أبطل كتابة كنت بتعاطي وبكتب
_ طيب عديت ازاي موضوع الادمان ولا معدتهوش ولسه بتتعاطي
_ لا طبعاً عديته ، اطردت من البيت مرتين تلاته وفي الاخر دخلوني مصحه لعلاج الادمان وخفيت
_ ده امتي ده
_ من زمان
_ اه يعني انت دلوقتي خفيت
_ اه طبعاً ولا مش باين عليه
_ باين
_ بجد باين
_ اه باين والله
برق بعنيه وكشر عن انيابه وقال بنظرات حاده متقمس دور مصاص دماء
_ متأكد انه باين يعني
_ هههههههه يلعن اللي جابك ولاااا همشي واسيبك
_ هههههههه