رواية عودة ابليس
الفصل الاول 1
بقلم رشا منصور
أنا سهيله وأهل الحته بيقولولى يا سهي عندى 20 سنه عايشه في السويس مع أمي واخويا الكبير عبدالله اللى خرج من الدراسة وبقي بيشتغل في أى حاجة صبي في ورشه أو بياع في محل ولا حتى تباع على عربيه ميكروباص أى حاجة بتجيب قرش حلال أخويا أشتغل فيها
لحد ما واحد جارنا قال له أن المصنع اللى شغال فيه طالب ناس كتير ومنهم عمال بدون مؤهل في الفرع الجديد في البحر الأحمر وراح أخويا وقبل الوظيفه وفرحنا أن أخيراً هيبقي في مرتب شهري
رغم أننا مكناش عارفين هنعيش طول الشهر إزاى لحد ما يقبض وبعد ما سافر بيومين جه صاحب البيت عاوز أجرة الاوضه اللى قاعدين فيها وقال أنتوا عليكوا شهرين لو مدفعتوش في خلال أسبوع هطردكوا اترجيتوا يستني لحد ما أخويا يرجع من السفر بس قالي هو أسبوع واحد وأنا كل اللى معايا ميكملش مئة جنيه والمفروض أدفع لصاحب البيت 1200 جنيه إيجار الاوضه المتأخر
علشان كده فكرت ادور على اى حاجه اشتغلها اجيب بها فلوس منها أصرف ع البيت ومنها أدفع لصاحب البيت أى مبلغ
وكان في مستشفى كبيرة في الشارع اللى ورايا الكل كان بيشكر في صاحبها وأنه راجل طيب قولت يمكن الاقي فيها شغل روحت عند الكشك بتاع الست أم هشام هو قدام باب المستشفى ع طول وسألتها متعرفيش يا خالتي المستشفى طالبه ناس تشتغل ولا لأ
قالت ليا يابنتي هو في شغل للشباب لما تلاقي انتي قولت لها طب أعمل إيه يا خالتي طب متعرفيش أى محل محتاج بياعه أنا مستعدة اشتغل من الصبح لحد بالليل بس يحاسبني باليوم
قالتلي طب وأمك يابنتي دى تعبانه قولت لها هعمل ايه يا خالتي مش أحسن ما نطرد من البيت سكتت شويه بعدين قالت ليا طب اسمعي يا سهي أنا بقفل الكشك هنا ع الساعه 5 او 6بالكتير ايه رأيك تقعدى للساعه عشرة واهو تبقي طول النهار مع امك وتشوفي طلباتها وتجيلي الساعه 5 وهديكي خمسين جنيه في اليوم لحد ما ربنا يسهل وتلاقي شغل
فرحت أوى قولت لها موافقه طبعاً قالت ليا طيب روحى دلوقتي وتعاليلي ع الساعه 5 ومشيت وأنا مبسوطه وروحت علشان افرح أمي قابلت صاحب البيت عند السلم قولت له أنا لقيت شغل وأن شاء الله هدفعلك جزء الاسبوع ده وكل اسبوع ادفعلك 300 جنيه
قالي أنا قولت اخرك الاسبوع ده وهطردكوا ومن الآخر بقي أنا محتاج الاوضه هعملها مخزن سيبته ودخلت الاوضه
افرح أمي رغم أنى عارفه أن الفلوس مش هتكفي حاجه بس أحسن من مافيش ولما جت الساعه 5 روحت ل خالتي أم هشام لقيتها كاتبه ليا الأسعار ع علب البسكويت وقالت ليا أنها بتعمل شاى ونسكافيه وبتعمل ساندوتشات جبنه وحلاوة للموظفين المستشفى الصبح أو وقت الزيارة
و قالتلي خلي بالك من نفسك أنا هكلم الأمن اللى ع البوابه يبقي كل شويه يبص عليكي ولو حد ضايقك 🔪🔪 الجبنه جنبك وعندك كمان الحديدة اللى بحطها ع باب الكشك وبالليل هبعتلك حد من عيالي يقفل الكشك قولت لها متخافيش عليا يا خالتي سبيها ع ربنا
وبعد ما مشيت الدنيا بدأت تضلم ويادوبك مافيش غير عواميد النور ولقيت الشارع ساكت ومافيش حد وحسيت بخوف وفجأة شوفت بتاع الأمن جالي وقالي اعملي لنا كوبايتين شاى وقالي أنا إسمي عم عثمان لو في أى حاجة نادى من هنا وأنا اجيلك متخافيش وهو واقف شاف عربيه إسعاف داخله البوابه سألته مش باب المستشفى الرئيسي الناحية التانية أومال ليه الإسعاف داخله من هنا
قالي لأن البوابه دى بتاعه المغسله والجراج بتاع عربيات الاسعاف ومواظفين المستشفى
بصيت له قولتله يعني قدام منى مغسله أموات
ضحك وقالي خايفه من ايه الخوف يابنتي من الاحياء مش من الأموات وخد الشاي ومشي
كنت خايفه فضلت أقول قرآن طول ما أنا قاعدة وبعدين سرحت شويه ولقيت طفله صغيره بتلعب عند البوابه فضلت ابص عليها رشامنصور و أستغربت ايه اللى جابها هنا والزيارة المفروض أنها خلصت وبعدين لقيتها بصت ليا وشاورتلي وجريت وجت عربيه ماشيه بسرعه اتخضيت عليها وخرجت من الكشك اجري علشان الحقها ملقتش حد الشارع فاضي
روحت ل عم عثمان ناديت عليه وسألته هى البنت الصغيرة دخلت جوه ولا راحت فين قالي يابنتي مافيش اطفال هنا والزيارة مشيت من بدري من البوابة التانيه هنا المغسله بس 🙄😲....
رجعت للكشك تاني معقوله يكون بيتهيقلي بس إزاى دى كانت بتلعب وشاورتلي كمان روحت قعدت تانى فى الكشك وفضلت أفكر في كلام صاحب البيت
وببص لقيت تلات قطط واقفين جنب رجلي اتنين كبار وواحدة صغيره بصيت لهم وحسيتهم سقعانين
نزلت قعدت على الأرض وخدتهم ع رجلي وفضلت اطبطب عليهم وقولت لهم والله لو معايا فلوس كنت جبت لكم أكل وغصب عني بكيت ولقيت نفسي بحكي للقطط ع حالي يمكن لأن معنديش حد اشيله همي كفايه علي امى مرضها واخويا ربنا يرزقه برزقنا
مش عارفه ليه حسيت أن هم وانزاح من ع صدري من بعد ما اتكلمت معاهم وسمعت صوت خطوات رجلين شيلت القطط وحطيتهم ع الكرسي وقومت وقفت ببص لقيت ناس جايه ع الكشك خوفت وبصيت للقطط وقولت لهم ربنا يستر ومسكت الحديدة في ايدي ولقيت راجل حوالى خمسين سنه بيقولى يابنتي متعرفيش أى حته نجيب منها أكل ونشرب كوبايتين شاى الليله شكلها لسه طويلة يابنتي
قولت له أنا بعمل شاى ونسكافيه وساندوتشات جبنه وحلاوة ينفع يا عم الحج
الراجل .....
بنت حلال يابنتي ع الأقل نبقي جنب المستشفي أصل بنتي هتولد وأمها وحماتها معاها جوه وأحنا أهو منتظرين الفرج يابنتي ادعيها
سهي.....
أن شاء الله تقوم بالسلامه وتجيب الخلف الصالح وكنت فرحانه اوي أخيراً حد هيشتري مني حاجه وكمان ونس ليا احمدك يارب
كنت خايفه خالتي أم هشام لما تلاقي أن محدش اشتري مني حاجه تمشيني وارجع أدور ع شغل
والحمد لله خدوا ساندوتشات كتير علشان الناس اللى معاهم وغير الشاى كمان
وكان حسابهم 45 جنيه بس الراجل جاله تليفون أن بنته جابت ولد قالي يا وش السعد وادانى مئة جنيه
كنت فرحانه اوي وبصيت للقطط وقولت لهم الحمد لله
بس أنا هعرف بردو خالتي أم هشام
لان لولا الكشك مكنتش الفلوس جاتلي وحقها نقسمها سوي ولقيت أبنها هشام جاي من بعيد ناديت ع
عم عثمان بتاع الأمن واخدت منه حق الشاى وطلب كوبايه كمان واخد بسكويت ودفع حقهم
وهشام فضل واقف لحد ما خلصت وقولت له احسبك أنت ولا خالتي
قالي سيبي الفلوس في الدرج واكتبي ورقه بهم وهى لما تفتح بكره تبقي تشوفهم بصراحه اخدت الخمسين جنيه وحطيت الباقي ومعاهم ورقه بالحاجات اللى بيعتها
وخرجت من الكشك وهو قفل
ولقيت وأنا ماشيه القطط ماشين معايا حسيت بالونس بصراحه الشارع كان هادى أوى ويخوف
ولما روحت البيت اتفاجأت ب.......