رواية مكتوبة علي اسمي كامله بقلم ملك ابراهيم ) جميع الفصول مكتملة حتي الاخير الخاتمه

رواية ذئاب لا تعرف الحب

 الجزء الثاني2الفصل التاسع9والعاشر10

بقلم نجمه براقه

خلود 

بعدت عن كل المواقع   لكام يوم عشان اريح اعصابي شوية واكتفيت ب حساب اسيل لتواصل مع زيد اللي لسه ميعرفش ان دي انا  وبعد الفترة دي حبيت ارجع واشوف البيدج بتاعتي والقناة حصل فيهم ايه وبدأت اتوتر لما حاولت ادخل باسوورد الحساب لاكتر من عشر مرات ومفتحش  ف كلمت واحده اعرفها وقولتلها علي المشكلة قالتلي انها تعرف حد يعرف يفتح الحساب ف ادتلها الايميل والباسوورد وبقيت مستنيه ترد عليه وفي الوقت ده كلمتني هاجر وقالتلي

_ عجبتك القعدة عندك ولا ايه  مش هترجعي 

_ تيتة مش راضيه وانا مرتاحه كده 

_ طيب ما تيجي تقعدي معايا شوية  انتي وحشتيني 

_ مالك  في حاجه مزعلاكي ولا ايه 

_ مخنوقه شوية  هتيجي 

_ طيب حد من اهلك عندك 

_  قاعدة لوحدي  تعالي 

قفلت معاها وروحتلها علي طول لقيتها  متضايق ومش بتهزر زي عادتها ف قولت 

_ ايه مزعلك 

_  متضايقة من غير سبب  ، سيبك مني وقوليلي انتي اخبارك ايه 

_ انا تمام اكيد لاحظتي اني حذفت الفيديوهات اياها 

_ اه خدت بالي برافو عليكي  كده احسن 

_ الحمدلله  احسن بكتير 

_ طيب وزيد عملتي معاه ايه لسة بتكلميه

_ ايوه 

_ ولسة معرفكش

_ لسة 

_  طيب وهتستمري في الكدبه دي لامتي 

_ عادي انا مبكلمهوش علي طول 

_ واضح ان عجبتك التمثليه دي 

_ مش فارقه قوي ممكن أبطل عادي 

_ اممم 

_ ايه 

_ مفيش  بس واضح انك مرتاحه 

بعدت عيني عنها وقولت 

_ عادي بتسلي وبس

_ اهااا تتسلي طبعا  اتسلي مفهاش حاجه 

اتنهدت وقولت 

_ بصراحه انا مرتاحه  ،  هو بيكلمني باحترام وادب وكلامه بيريحني عكس كلامه معايا ك خلود  ومتنسيش ان هو دكتور نفساني بردو 

قالت بمكر

_ ايوه طبعاً انا فاهمه كل الحاجات دي 

_ بطلي مش اللي في دماغك  

_ وانا اتكلمت يابنتي 

_ نفسك تتكلمي

_ هههه مش هتكلم خلاص 

_ احسن  وقوليلي مالك مودك مش مظبط ليه

_ أبداً مفيش حاجه 

سكتت لحظات وبعدين قالت بتردد

_ مش بشر وافق يتجوز 

_ طيب احلفي

_ والله 

_ يااااه اخيراً  ،  الف الف مبروك 

_ الله يبارك فيكي 

_ وهيتجوز مين بقا 

_ معرفش  لسة بيدوروا علي عروسه

_ اه ،  المهم انه وافق ويتجوز 

_ اه

لاحظت انزعاجها ف قولت 

_ انتي كويسة يابنتي 

سكتت شوية وبعدين اتنهدت بعمق وقالت

_ لا لا مش كويسة 

_ سلامتك  ،  ايه اللي مزعلك احكيلي 

_ معرفش متضايقة وخلاص 

لمعت دموعها وهي بتقول 

_ مش عارفه مالي  مخنوقه ومش طايقة نفسي 

حضنتها وقولت 

_ اهدي طيب  وقوليلي في ايه 

اتخنق صوتها وهي بتقول 

_ معرفش  وده اللي هيجنني  ،  انا مش عارفة إيه اللي مزعلني كده 

_ طيب في حاجه حصلت  ، حد قالك حاجه 

حاولت كتير اعرف مالها وهي كل اللي عليها معرفش وبعد ساعة تقريبا استمرت في نفس السؤال سيبتها ومشيت و وقفت شوية علي السلم ابص لفوق وعقلي بيقولي اطلعي  وتنفيذ لكلام عقلي طلعت ورنيت الجرس وبقيت واقفه شوية نبضي زايد ومتوتره من غير سبب وبعد ما فتحتلي تيته تفاجئت بوجودي وقالت

_ ايه جابك 

جاني صوت عمي عبيدة من جوه بيقول 

_ مين 

دخلت وقولت وابتسامتي علي وشي 

_ انا 

_ خلووود عندنا تعالي ده انا لسه بقول لجدتك اني هنصلك ودانك  

_ ههههه ليه بس 

_ مش عارفه ليه  ،  كيه تسيبي البيت من غير ما تسأليني 

بصيت لجدتي ف قالت 

_ قولنا تقعد في البيت بدل ماهو فاضي 

_ اديكي قولتي فاضي يعني مينفعش تقعد لوحدها  افرضي حد عرف انها هناك  ودخل عمل معاها حاجه 

_ المنطقة امان وكل اللي هناك حبايبنا 

بقيت ساكته وانا بدعي في نفسي انه يضغط عليها عشان توافق اني اقعد  وكأن ربنا استجاب لدعاية وقال 

_ مفيش حاجه اسمها امان  خلود هتقعد معانا  ادخلي جوه وملكيش دعوه بيها 

بصتلها ف قالت 

_ يا استاذ عبيدة.... 

قال مقاطع كلامها

_ متزعلنيش منك  خلود دي بتي ولا انتي ليكي رأي تاني 

رجعت بصتلها ف قالت بتنهيده

_ لا طبعاً وانا اقدر اقول غير كده  هي متعرفش اهل غيركم  ، خلاص خليكي 

وسعت ابتسامتي وانا بقول 

_ ماشي  ، متشكره يا عمي

_ علي ايه  ده انتي بتي 

_ ربنا يخليك ليا يارب  

قولت كده واستدرت علشان ادخل الاوضه ف لقيت عيني رايحة ناحية اوض زيد اللي مش بينله صوت  وبعدها كملت طريقي وبعد لحظات جت جدتي وادتني التحذيرات الكامله  ومشيت  وفوراً خرجت تليفوني وفتحت مسنجر ملقتش اي رسايل منه ف بعتله وقولت 

_ السلام عليكم 

جاني رده بعد ساعة تقريبا بيقولي 

_ وعليكم السلام ورحمة الله وبركاته  ،  الناس الغايبه 

_ ههههه غايبه فين لسه مكلمه حضرتك اول امبارح 

_ صحيح  سوري ملخبط شوية  ،  عامله ايه 

_ الحمدلله وحضرتك 

_ الحمدلله بخير  ،  النفسية عامله ايه دلوقتي 

_ زي الفل اول مره تكون متظبطه كده 

_ لعله خير 

_ خير طبعاً 

_ ممكن اعرف السبب  

_ سبب هايف بس انا خرجت النهارده وقابلت ناس ليه كتير  مشفتهمش 

_ طيب ممكن اعرف كمان ايه صفتهم في حياتك  

_ صحاب قدام 

_ يستاهلوا فعلاً ان نفسيتك تتظبط عشانهم 

_ صحيح 

_ والمهم انك بتخرجي وتروحي وتيجي 

_ اه بس مبخرجش كتير

_ ولا بتسافري طبعاً 

_ لا مبسافرش 

_ اممم هو انتي بعيدة قوي عن اسكندريه 

_ ليه 

_ بصراحه بحاول اوقعك عشان اعرف من اي مكان 

_ ههههه ماشي اقولك عادي انا من اسيوط بس فين بالظبط خليها عشاني 

_ ماشي وانا مش هضغط عليكي  مسيرك تقولي بمزاجك 

_ ايوووه يعني حضرتك مهتم تعرف انا ساكنه فين 

_ المفروض اصلا اكون عارف كل التفاصيل  وادق ادق التفاصيل كمان بس نقول ايه انتي حاله خاصة وانا مش عايز اضغط عليكي 

_  لو هيفيد بحاجه في الجلسات كنت قولتلك 

_ هتعرفيني شغلي يعني  ، انا شايف انه هيفيد بس براحتك 

بقيت اتكلم معاه لدقايق وبعد ما قفل بساعة سمعت صوته بره ف قومت بسرعه وفتحت الباب وشوفته وهو واقف مع طنط ورد وقفت شوية ابص عليه وانا حاسه بتوتر شديد وحسيت قلبي انتفض لما شافني 

#زيد 

تفاجئت بيها عندنا ف سيبت خالتي وقولت وانا بتجه ناحيتها 

_ مش معقول النجمة عندنا 

حاولت تخفي ابتسامتها وهي بتقول 

_ اه عمي عبيدة طلب اقعد في مشكله  ، امشي؟ 

_ وانا اقدر اقول كلمة بعد كلمة عمك عبيدة  تنوري طبعاً البيت بيتك  واحنا اللي نمشي 

_ هههههههه شكرا 

_  مفيش شكر بين المشاهير  وبما انك جيتي ادخلي المطبخ اعمليلي قهوة انا مبعرفش اعملها زي الستات   هما بارعين في المطبخ  

كنت متوقع انها تتعصب بس فاجئتني لما ضحكت وقالت 

_ حتي لو كنا مشاهير زي بعض مش هتبطل طريقتك دي  بس حاضر اعملك قهوة وكده اكون متفوقة عليك في حاجه  ،  مشهوره وبعرف اطبخ واعمل قهوة 

_ هههههههههه غلبتيني   ومتشكر مقدماً علي القهوة

قالت بإبتسامة 

_ مفيش شكر بين المشاهير 

سابتني ودخلت المطبخ وانا دخلت اوضتي اترميت علي السرير وغمضت عيني  ولقيت نفسي ببتسم لما مر في بالي كلام  اسيل  اللي انا معرفش حتي اسمها ولا شكلها ولا اي معلومه عنها وبعد لحظات وانا سارح وبفكر فيها الباب خبط ف اعتدلت وقولت 

_ ادخل 

فتحت الباب وقالت 

_ القهوة

قولت وانا بقف واتجه علي مكتبي 

_  متشكر قوي  ، تعالي 

حطتها قدامي وقالت 

_ العفو بس متتعودش علشان دي اخر مره 

_  ماشي واسفين اننا قللنا من مكانتك وخليناكي تعملي القهوة 

_ الناس لبعضيها ههههه 

قالت كده وجت تمشي ف قولت 

_ خلود استني لحظه 

رجعت تبصلي ف قولت بتردد

_ هو انتي مخليه حد ادمن معاكي في البيدج بتاعتك 

_ لا انا بس ليه 

_ اممم 

_ ايه 

_ انا لما شوفت اللي شوفته قولت اكيد حد تاني بس طلعتي انتي  

بصتلي باهتمام وقالت 

_ فيها ايه البيدج  

_ فيها ستوري مش كويسه خالص 

وسعت عينيها بصدمه وهي بتقولي 

_ يا نهار اسود يعني الحساب اتهكر 

قولت باستفهام 

_ اتهكر؟!! 

سابتني وطلعت تجري من غير رد وانا قعدت افكر في حالها اللي مبقاش يعجب حد  متهوره  ، مش بتقبل النصح واخلاقها بدات تتلوث وبقت تريند في الوقاحه وقلة الادب  

#هاجر 

كنت فاكره اني هكون اسعد انسان لما يوافق انه يتجوز،  كنت كل السنين دي بخطط في دماغي للحاجات اللي هعملها في يوم فرحه  هلبس ايه  وهنحتفل ازاي وهصاحب مراته ولا لا  مكنتش فاكره اني هتضايق قوي كده وليه مش عارفه معقول اكون بغير عليه علشان كان اقرب حد ليه   طيب وبعدين واذا قريب مكنش هيجي يوم ويتجوز*"

بعد ما غلبت خلود معايا ومشيت مسكت التليفون واتصلت بيه  ودي كانت اول مره اتجراء من وقت ما وافق يتجوز واكمل اتصالي   ف جاني رده بعد ثواني  بيقولي بجديه مفرطة 

_ ايوه 

_ عامل ايه 

_ الحمدلله 

_ لقيتك مبتسألش قولت اسأل انا 

_ مش فاضي 

_ وراك ايه شاغلك لدرجة متفضاش ثانية تسأل 

_ كتير يا هاجر   انتي عارفه الشغل والبحث عن العروسه وبعدين خطوبه وفرح ويمكن مفضاش ارد بعد كده ف متزعليش 

_ يعني ايه متفضاش ترد  ، من اولها كده 

_ ايوه من اولها  يدوب هقدر اقسم وقتي بين الشغل وبين بيتي ومراتي 

_ مراتك؟!  من قبل ما تعرف هتكون مين بتقول مراتك وبتتكلم كده  

_ اه ما انا كنت مقرر اني من اول  ماهقول يا جواز هتفرغلها تماماً  ،  يدوب هخلص الشغل  هطلع اسلم علي اهلي علي السريع واجري علي البيت اقعد معاها 

نزلت دموعي وانا بقول 

_ لدرجة دي  

_ واكتر ما انا كبرت بقا وهعوض كل سنه ضاعت من عمري من غير جواز  ،  وانتي مسيرك تجربي وتفهمي 

_ مش عاوزه اجرب ولو جربت مش هطلع في الوطينه بتاعتك دي  ،  مش هبعد عن الكل علشان جوزي 

_ تقولي ايه للأسف واطي  يلا ورايا شغل 

قال كده وقفل السكه في وشي رفعت التليفون لمستوي نظري وبقيت بصاله بذهول ودموعي مش موقفه ومش مصدقة انه من اولها كده هيبعد عني علشان واحد لسه معرفش هي هتكون مين 

#بشر 

خلصت المكالمة ورجعت الشغل  لابوي وعمي بدر في المكتب وبعد ما قعدت شوية قال عمي  

_ ايه يا بشر مش ناوي تفرحنا  ، وافقت تجوز ولسه مقولتش هتجوز مين

_ اديني مستني اعرف زيي زيكم ياعمي  ،  خالتي ودادة امينة بيدوروا 

_ طيب وانت مشايفش واحده تنفع هنا ولا هناك 

_ مش بركز  

قال ابوي

_ وانت لو كنت بتركز كان بقا ده حالك  

قال عمي 

_ طالع مأدب زي ابوه

_ زي عمه وانت الصادق  

_ هههه علي قولك  

_ لا والله الواد طالع زيك   ، جد قوي وملهوش في صنف الحريم  بس ده هنجبله منين واحده زي وفاء تخليه يعقل ويتجوز  

قولت بزهق

_ ما انا وافقت يابوي واللي هيجبوهالي انا هتجوزها اعمل ايه تاني 

_ انت هتجوز علشان ترضينا يعني 

_ لا عشان انا عاوز اتجوز بس مش شايف بنات حوليه ف سايب المهمه دي لخالتي ودادة امينة 

قال عمي 

_ طيب بقولك ايه عندي ليك عروسة بت حلال ومؤدبه ونعرفها كويس 

قال ابوي 

_ مين دي يا بدر 

_ اسراء بت السبع جارنا  هما رجعوا وشوفتها من يومين  كبرت وبقت عروسه ما شاءلله عليها 

_ ايوه بس ياخوي دي متعوره في وشها انا كمان شوفتها ولقيت ظرفة مطوه في دقنها 

_ متبالغش ده جرح صغير ومش عايبها  ،  انت شوفتها يا بشر  

سكت شويه افتكرها لغيت ما جمعتها وقولت 

_ ايوه  ، لا مشوفتهاش لما رجعت بس عارفها  ،  ماشي كويسه 

قال ابوي 

_ ماشي ايه  ،  موافق عليها 

_ ايوه  طالما مش متجوزه ليه لأ 

_ ياولدي بقولك متعوره في وشها  

قال عمي 

_ تاني هتقول متعورة  دي حتت تعويرة بسيطه متوقفش حالها يعني  المهم ادبها وسمعتها هي واهلها الطيبة انا اللي هقولك عليهم يعني يا عبيدة 

_ ايوة مقولناش حاجة بس يا.... 

قولت مقاطع كلام ابوي 

_ كويسه يابوي  ،  انا عاوزها  ،  كلمولي اهلها 

وافقت عليها وانا مش فاكر شكلها ولا عارف شكل الجرح اللي في  وشها  ،  وافقت علشان كلام عمي عنها وعلشان اخلص من الكلام في الموضوع ده وبعد ما رجعت البيت استقبلتني خالتي بالاسئله

_ كلام اي ده يا بشر قال عاوز تجوز اسراء 

_ ايوه يا خالتي 

_ ياولدي ده ابوك بيقول ان وشها متعور هتجوزها كيه 

_ وعمي بدر بيقول انها تعويره صغيرة  ، كويسه يا خالتي  كلميهم انتي بس 

نهيت الكلام معاها وسيبتها ودخلت الاوضه 

#اسراء 

كنت واقفه  بتحسس الجرح اللي في وشي  وبيتعاد قدام عيني الحادثه اللي حصلتلي من خمس سنين وفجأة قطع شرودي صوت ريان وهو بيدخل عندي ويقولي

_ وبعدين يا اسراء هفضل لامتي ادخل عليكي الاقيكي بتحسسي علي جرحك ده  ،  والله  انا..... 

قاطعت كلامه وقولت 

_ مفيش حاجه يا ريان  ، بقت عادي عندي متشغلش بالك 

_ مشغلش بالي ازاي وانا كل ما ادخل عندك الاقيكي كده 

_ عادي يا ريان  ، اني بس اتعودت ايدي تروح ناحية الجرح   انسي  وقولي 

كملت بإبتسامة 

_شوفتها ولا لسه 

_ هي مين 

_ هي ميييين؟ يا ولا عليه انا 

مط شفايفه بعبس وقال 

_ لسة مقولتلكش اللي عرفته ده بدر بيقولي ان....... 

قاطع كلامنا صوت جرس الباب ف طلعنا من الاوضه لقينا ماما بتستقبل اتنين ستات بالحضن ولما ركزت في شكلهم عرفت انهم خالتي ورد وخالتي جميله وفوراً روحت عندهم وقولت وانا بحضن خالتي جميله 

_ خالتي جميله وحشتيني قوي قوي 

_ حبيبتي حبيبتي  والله انتي اكتر  

بعدتني عنها وقالت

_ ما شاءلله عليكي كبرتي وبقيتي عروسه اهو 

_ مش كده بردو ههههه

سبتها وحضنت خالتي ورد 

_، خااالتي ورد وحشتييييييني 

_ وانتي كمان يا قلب خالتك ورد 

بعدتني عنها وقالت 

_ بسم الله ماشاء الله بتك كبرت يا سنيه 

_ الاتنين كبروا ومطلعين عيني وحياتك  اتفضلي اتفضلوا

قبل ما نتحرك وقعت عينهم علي ريان ف قالت ورد 

_ ريااان!  ياربي العيال كبروو وكبرونا   تعاله ياواد سلم علينا 

ابتسم وقال وهو بيتقدم ناحيتها 

_ ازيك يا خالتي 

_ الحمدلله ياحبيبي  بقا كده تيجي ومتفكرش تيجي تسلم عليه

_ كنت هاجي لما بدر يرجع البيت  ، ازي حضرتك وعمي عبيده والشباب عاملين إيه 

_ بخير يا حبيبي 

_ ان شاءلله دايما 

كمل موجة كلامه ل جميلة

_ ازي حضرتك 

قالت بإبتسامة 

_ الحمدلله بخير  وانت عامل ايه اديك كبرت وبقيت راجل اهو وشكلي هجوزك هاجر بنتي 

ابتسم وقال 

_ يشرفني طبعاً  ، هي عامله اية 

_ الحمدلله بتسلم عليك 

_ الله يسلمها اتفضلوا واقفين هنا ليه  

قعدنا في الصالة واتكلمنا كتير وطبعاً الكلام مخليش من سؤالهم عن الجرح اللي في وشي وعن سببه وعن سني ومؤهلاتي وبعد ما دخل ريان اوضته طلبت مني ورد اعملها شاي كان باين انها بتوزعني وبالفعل اتوزعت ودخلت اعمل شاي ورجعت وبعد ما شربوا قاموا مشيوا ف لقيت ماما بتبصلي بإبتسامة انا حفظاها كويس وبتقولي 

_ باين كده ان ربنا كان شايلك خير كتير واحنا منعرفش 

_ امممم  ،  هو في اييييه بالظبط 

_ في الخير كله  ، خالتك ورد كلمتني عنك عاوزة تجوزك لبشر

_ بشر! هو لسه متجوزش

_ لا بتقولي كان رافض يتجوز لغيت ما عرف انك رجعتي 

_ انا؟!  ليه

_ ليه إيه  عاوز يتجوزك يابنتي 

_ ليه 

_ ليه ايييه 

_ ما انا مش فاهمه ده بشر كان المفروض اتجوز من قبل ما احنا نسافر  ،  يعني  هو اتجوز وطلق ولا اترمل ولا مراته مشلوله ماهو اكيد دي مش اول جوازه ليه

_ هههههههه لا ونبي اول جوازه وما اتقدم لواحده قبلك  شكله كان عينه عليكي وما صدق انك رجعتي 

قولت ببلاهه مشيرة علي نفسي 

_ عينه عليه انا  

_ امال عليه انا 

_ ماما ماما في ايه 

_ ياخرااااابي يابنتي بقولك طلب يتجوزك

_ انا؟! 

قالت وهي بتزقني

_ غوري يابت امشي هقولهم مش موافقين ناقصة غباء 

_ يا ماما استني اصل بشر ده عمره ما بصلي ده مكنش بيرمي السلام حتي ف ازاي جاين يطلبوني ليه 

_ الراجل محترم ولا انتي مش بتحبي المحترمين

_ لا بحبهم 

كملت باستياء

_ بس هو لو شاف وشي هيحبني  ،  اكيد هيرفضني  ،  انا مش موافقة 

#هاجر 

رجعت ماما من بره مبتسمه ف مشيت وراها علشان افهم سبب الإبتسامة دي وقولت 

_ في ايه 

وقفت وقالت بعد ما دارت ليه بكل جسمها 

_ إيه  ،  مالك 

_ مالك انتي ليه مبسوطه 

_ ليه مبسوطه! 

_ اه  ،  كنتي فين 

_ مالك بتتكلمي كده ليه 

_ مالي يا ماما شيفاكي مبتسمه ف عاوزة اعرف مالك 

_ هههههه يجازيكي يا بنتي  ،  أبداً كنا في بيت عمك السبع بنطلب ايد اسراء ل بشر 

سهمت من كلامها  ف قالت 

_ بس كبرت وبقت عروسه زي القمر  عقبالك يا حبيبتي 

_ 

_ مالك 

_ هه  لا لا مفيش  ،  طيب و  و... 

_ و إيه 

_ بشر عرف 

_ ده هو اللي طلب من ورد نروح نكلم اهلها بس مش عارفه هيقول إيه بعد ما يشوفها خايفه يغير رأية 

_ ليه   مالها 

_ في جرح قديم في وشها 

_ جرح 

_ ايوه بيقولو ان بلطجي اتهجم عليها وضربها بمطوه   ربنا ينتقم منه بوظلها وشها 

ابتسمت وانا بقول 

_ بايظ خالص 

_ لا مش بايظ بس جرح واضح قوي وشكله مش حلو  وبذات انها بنت  ،  خايفه بشر يغير رأية 

قولت وانا مبسوطه من جوايا 

_ طيب ما يغير وهو يتبلي بيها ليه 

_ إيه يتبلي بيها دي البنت جميله ومؤدبه 

_ بردو  هو ذنبه إيه يتجوز واحده واخده مطوه في وشها  ،  اممم انا هروح اشوفها 

قولتها واستدرت علشان امشي ف قالت 

_ استني عندك 

_ اييييه يا ماما 

_ رايحة فين 

_ رايحة اسلم عليهم

_ تسلمي عليهم ولا تشوفي الجرح

_ الاتنين  ماهي لو كانت وحشه اكيد هقول ل بشر ميتجوزهاش  

_ وانتي مالك 

_ يعني ايه انا مالي  بشر اخويا ويهمني يتجوز واحده شكلها حلو 

_ هاجر 

_ ايييه يا ماما  

_ ملناش دعوة  بشر عرف بالجرح ده قبل ما يقول روحوا اطلبوها وعجباه متدخليش انتي 

_ إيه  

_ ايوه 

_ اكيد موصفهوش ليه كويس  انا هشوفها 

قولت كده وطلعت متجاهله كلامها وروحت علي طول علي هناك وامها فتحتلي وفوراً عيني بحثت عنها لغيت ما لقيتها جايه قدامي مبتسمه وجرحها واضح وضوح الشمس وهنا زادت سعادتي لأني عارفه انه مش ممكن يوافق يتجوزها وهي كدة 

#فاطمة 

بتمر الأيام  وجه يوم السفر وخدنا شنطنا وطلعنا علي المطار وانا متحمسه جداً ومتوقعه ان أكيد حياتي هناك هتكون احلي من حياتي في امريكا ولكن..... 

بعد ساعات وصلنا مصر وطلعنا من المطار وروحنا شقة بابا اللي كانت في الدور التاني وقفنا هناك وبدء يدور في جيوبه عن المفتاح وبعدين بيبصلي ويقولي

_ في مشكله 

_ إيه 

_ المفتاح ضاع من اكتر من 20 سنه 

_  امال بتدور في جيوبك ليه

_ اتعودت   كده مقدمناش غير اننا نكسر الباب 

_ مين هيكسره 

_ مش انا 

_ واكيد مش انا 

_ دقيقة واحدة 

قال كده وخبط علي باب قدامنا ف طلع منه ولد صغير يجي سبع سنين ف قاله بتعجب

_ انت محمد  سبحان الله مكبرتش لسة 

_ انا ابنه 

_ ما شاءلله  فاطمة الحقي 

_ إيه 

_ محمد اتجوز 

_ محمد مين 

_ ابو ده اخر مره شوفتها فيها كان قده

_ ههههه ومن الطبيعي انك تلاقيه بنفس الشكل  انت بتقوله سبحان الله مكبرتش 

_ ماهو نسخه منه اعمله ايه  ، فين ابوك وعمامك يابني 

_ انتوا مين

_ قولهم عمي بيجاد

_ عمي بيجاد مين

_ جارهم 

_ جار مين 

_ جار اهلك

_ جار اهلك انت  

قولت بضحك

_ هههههههههه حبيبي انده حد كبير 

دخل الولد وانا بقيت واقفه يضحك علي بابا  لغيت ما جه واحد يجي حاجة وتلاتين ولما شاف بابا اتفاجيء جداً وبعد كلام كتير وترحيب  جه كسرلنا الباب ودخلنا لقينا الشقة كلها غبار ومش بينلها ملامح بقيت بصالها بصدمه وانا بقول 

_ المفروض اننا هنضف كل ده لوحدنا 

_ لا طبعاً هنشوف واحده تساعدنا

_ ياريت  انا مستحيل اقدر انضف كل ده لوحدي 

كلم الشاب اللي كسرلنا الباب وطلب منه يجيبلنا واحده تنضف وبعد وقت جت ونضفنا البيت وطبعا بوقنا اتملي تراب لغيت ما كنا هنموت وبعد ما خلصنا اترمينا علي الكنبه ناخد نفسنا اللي اتقطع وبعد وقت قالي ادخلي استحمي وريحي شوية 

_ وانت 

_ انا هنزل اجيب اكل واجي

_ ماشي بس متتأخرش 

_ حاضر 

#بيجاد 

روحت شقة ابو وفاء وانا متوقع الاقيه ميت بس كنت عاوز اسأل هناك يمكن الاقي وفاء او حد يعرف رقمها ولما روحت لقيت بنت شابة بتفتحلي وتقولي 

_ انت مين 

_ انا بيجاد   مش ده بيت ابو وفاء 

_ ايوه بس ده مات من زمان

_ امال انتي مين 

_انا بنت ابن اخته 

_ اه طيب وفاء بتيجي هنا 

_ لا مش بتيجي من وقت موت ابوها  انت مين  

_ انا اخوها 

_ اااه عرفتك  اهلا بحضرتك 

_ اهلا بيكي  ، طيب عارفه  رقمها او اذا كانت لسه عايشه في شقتها اللي في  اسكندريه 

_ لا معرفش رقمها ومعرفش عنونها بس سمعت انها غيرته وسكنت في مكان تاني 

_ طيب مين يعرف عنوانها الجديد او رقم تليفونها

_ بابا 

_ هو فين دلوقتي  

_ في الشغل 

_ طيب ممكن تديني رقمه

_ حاضر 

دخلت جابتلي الرقم وخدته ومشيت وفي طريقي اتصلت بيه وبعد ما رحبت وسلمت طلبت الرقم والعنوان واداهمني واول حاجة عملتها اني اتصلت بيها بس مردتش  وكنت خايف انها ترد 

#وفاء 

طلعت من غرفة العمليات وشوفت التليفون لقيت رقم غريب متصل بيه مهتمتش و رجعت البيت لقيت بيجاد وجويريه قاعدين عند التليفزيون  ف قولت 

_ يا خبر أبيض جويريه طلعت من جحرها  حصلت ازاي دي 

_ جبتها غصب مانتي عارفاها 

_ غصب غصب المهم انها طلعت 

سيبت الشنطة علي التربيزه وقولت

_ داخلة اخد دش وهخرج أجهز الغدا 

_ سيبهالي انا دي 

_ طيب ياحبيبي  

#بيجاد 

دخلت وانا قولت لجويريه يلا نجهز وقبل ما نتحرك تليفون ماما رن ولما طلعته من شنطتها  لقيت رقم غير مسجل ف دخلت اوضتها وقولت

_ ماما في حد بيتصل بيكي 

ردت من داخل الحمام وقالت

_ مين

_ معرفش رقم من غير اسم

_ طيب رد وشوف عاوز ايه 

فتحت الخط وقولت

_ الو 

جاني صوته بعد سكوت بيقولي 

_ ده رقم الدكتوره وفاء 

_ ايوه هو  مين؟ 

_ انت مين 

_ انت مالك بيه انا مين  

_ بدر ولا بيجاد 

_ انت متصل تستظرف هتقول انت مين ولا اقفل في وشك 

_ تبقي بيجاد ده مش صوت بدر 

_ شكرا علي الاضافه مين بقا 

_ بيجاد 

قولت بزهق

_ ايوه انا  ،  هتقول مين ولا ارزعك بلوك 

جاني صوت ماما وهي بتقولي 

_ في ايه يا بيجاد

_ واحد بيستظرف يا ماما 

_ اسمي بيجاد  ،  بيجاد خالك

10

#بيجاد  

سكت للحظات متجاهل كلام ماما وبعدين قولت 

_ بيجاد مين 

_ قولتلك بيجاد خالك 

_ ياعم متهزرش هعملك بلوك والله

_ ههههه طيب اعمل يابن وفاء 

قولت بتوتر 

_ ده هيلبخ  ، ماما الحقي واحد بيقول انه خالي بيجاد 

رجعت اكلمه وقولت

_ طيب اثبت انك انت 

_ انت عارفني يعني علشان اثبتلك

قولت بلهفه

_ اعرف خالي  ،  طيب لو صح قولي هو كان شغال ايه 

_ دكتور بيطري

كملت بلهفة

_ سافر امتي

_ 27 سنه  ،  أي اسئلة تانية 

_ يعني  انت بجد خالي 

_ لما اشوفك هوريك البطاقة تتأكد بنفسك اني انا 

 قبل ما ارد جاني صوت بنت بتقولي

_ وانا بقي بنته  بنت خالك

_ انتي مين

_ فاطمة  معقول مش عارفني ههههه 

_ إيه  

_ ايه انت بتزعق من فرحتك برجوع خالك  ولا انت كده لسانك متبري منك ههههه 

سكت شويه استوعب دي هبله ولا فيها حاجة في دماغها  ف جاني صوت ابوها بيقولي 

_ وادي تأكيد علي كلامي  ،  ها صدقت ولا لسه  

_ انت كنت فين كل ده  

_ كنت في امريكا  ،  فين وفاء بقي 

_ دقيقة وجايه  ،  حضرتك ساكن فين دلوقتي 

_ في القاهرة  ،  هتجيلي ولا هتستني اجيلكم 

_ طبعاً اجيلك ده انا مكنتش مستني اني  اشوفك من كتر كلام ماما عنك  

_ حكتلك أيه  

_ حكتلي كتير قالتلي ان مكنش في اخ في طيبتك وجدعنتك معاها  

في اللحظة دي خرجت ماما من الحمام وجت نحيتي بخطوات تقيله  ف ادتلها التليفون بعد ما شغلت الاسبيكر  خدته مني بأيد مهزوزه حطته علي ودنها وسكتت شوية لغيت ما جاها صوته بيقول 

_ متكلمتيش بس عرفت انك معايا  ،  وحشتيني يا وفاء 

كتمت بكاها  بأيدها  وقفلت السكه ف خدت منها التليفون وقولت 

_ قفلتي ليه!!!! 

كملت وانا بحضنها

_ خلاص بتعيطي ليه اهو كلمك وبيقولك وحشتيني كمان 

 قالت وهي بتواصل بكائها

_ مش معقول  انا حاسه اني بحلم ، اكيد في حاجه غلط  

_ مش بتحلمي خالي رجع بجد 

بصتلي وقالت بتفاجيء 

_ رجع مصر؟ 

خطفت مني التليفون وبصت لرقم وقالت

_ فعلاً ده رقم مصري يعني بيجاد في مصر دلوقتي 

_ اه هو في القاهرة 

قالت بلهفه

_ انا هروح..... 

بترت كلامها فجأه  وقالت وهي بتمسح دموعها 

_ لا مش هروح 

قالتها قبل ما يوصلها اتصال منه ف  قفلت وقالت

_ مش هنرد

_ لييييه قفلتي  ، ماما من فضلك هاتي هكلمه

_ لاا!!  مش هنكلمه  ، امشي هغير

_ طيب هاتي التليفون 

_ قولت لا ويلا من هنا 

_ يا ماما  .!!! 

_ بيجاد!!!  قولت لا   ، انا اخويا مات  والميت مش بيرجع 

طردتنا من اوضتها وبقيت  مستني فرصه عشان امسك تليفونها  واخد رقمه ولكن ملقتش اي فرصة   وبعد محاولات استمرت لغيت ما بابا رجع قالتلي قدامه

_   مش هتطوله

_ يا ماما من فضلك هاتي هاخد الرقم وبس 

_ قولت لا يعني لا 

قال بابا 

_ مالكم 

_ خالي بيجاد رجع مصر وكلمها وهي قفلت في وشه ومش عاوزاني اكلمه 

_ بيجاد رجع؟!! 

_ ايوه  

_ رجع امتي

_ معرفش بس اتصل بيها وهي مش راضيه ترد ولا راضيه تديني رقمه اكلمه كلمها يا بابا 

بصلها وقال 

_ ليه مش عاوزه تكلميه يا وفاء 

_ يعني ايه ليه 

_ ايوه ليه مش هو ده بيجاد اللي كنتي زعلانه انه سافر و سابك

سكتت ف قولت انا 

_ يا ماما يمكن عنده ظروف خلته ميكلمكش  كلميه واسمعي هيقولك ايه 

_ طالما عايش يبقي ملهوش عذر عندي  ، وطالما قدر يغيب كل ده  خليه غايب كل العمر 

قال بابا 

_ طيب اسمعي منه لو طلعت اسبابه مش مقنعه بلاش منها 

مردتش ف قولت وانا بحط دراعي علي كتفها

_ ماما لوووو سمحتي اديلوه فرصه  شوفي هيقولك ايه  مش هو ده خالي اللي ياما حكتيلي عنه لغيت ما خلتيني هموت واشوفه  ،  عشان خاطري  ، بلاش علشان خاطري  علشان خاطر بابا   ارفضي بقا عشان يقول ملهوش خاطر عندك 

قال بابا 

_ ارفضي عشان اعرف اني مليش قيمة عندك 

سكتت شويه وبعدين قالت بزهق 

_ ماااشي يا بيجاد طول عمرك سوسه  ، خد رقمه اهو  وكلمه لو عاوز بس انا مش هكلمه غير لو جه لغيت عندي واترجاني اسامحه 

_ ماااشي  هخليه يجي ويستسمحك 

خدت الرقم وسيبتها مع بابا ودخلت اكلمه وجاني رده بعد الاتصال التاني بيقولي 

_ مين

_ انا بيجاد  انا اسف علي اللي حصل بس هي واخده علي خاطرها منك شويه 

_ ايوه انا عاذرها 

_ طيب حضرتك ممكن تيجي 

_ ان شاءلله 

_ امتي 

_ لما ربنا يأذن

_ كده يبقي مش ناوي تيجي 

_ لا طبعاً هاجي 

_ بكرة 

_ بكره لا

_ انت لو مجتش انا هجيلك 

_ ههههه تعاله واهو نتعرف عليك 

_ بتقول فيها طيب والله لا اجيلك  اديني العنوان  

خدت منه العنوان واستنيت لصبح وروحت بعد طلوع النهار.

  كنت رايح لخالي اللي ماما شوقتني لشوفته من صغري  بس مكنتش عامل حسابي ان مشوار زي ده هيكلفني كتير 

# فاطمة 

صحيت الصبح نضفت البيت وطبخت  وكنت متحمسه قوي لمعرفة عيلتي الجديده  وللمه اللي عمري ما حسيت بيها وانا في امريكا  وبعد ما خلصت دخلت استحميت ولبست نقاب كامل حتي عنيه داريتهم  ،  وانا لسة واقفه في اوضتي لقيت بابا واقف عند الباب وبيبصلي ف قولت وانا برفع القماشه عن عيني 

_ ايه يا حبيبي مالك 

_ انتي هتلبسي النقاب قدامه

_ اه طبعاً 

_ ده ابن عمتك 

_ ايوه بس يعتبر اجنبي عني  بس طبعا هكلمه انا مش هقدر مكلمهوش واسأل عن كل حاجه  انا عارفه ان ده يخالف النقاب بس المره دي وبعدين مش هيكون ليه كلام معاه 

_ عادي مفيش مشكله بس بلاش سوري  و اوكي في الكلام  ، انتي مصريه 

_ حاضر هاخد بالي  

بعد ما خلصنا التوصيات والتحذيرات طلع وسابني وبعد وقت الجرس ضرب ولأني  كنت مشغوله وبراسل صديقة ليه من امريكا مقدرتش اطلع علي طول وقفلت معاها علي السريع وطلعت لقيت شاب طويل معدي بابا بعشر سم تقريباً لابس قميص ازرق  وبنطلون جنز كحلي بشرته حنطية مع شعر كثيف ومموج   وشكله مزيج بين الوسامه والخشونه اترسمت ابتسامتي وانا بقول في نفسي ده ابن عمتي؟  ما مصر طلع فيها ناس حلوه غير بابا ورشدي اباظة واحمد عز اهو  

وفوراً غضيت بصري عنه بعد ما لقيت ان شكله بيجذبني لنظر ليه اكتر  بس كنت لسه باصه للموقف ك كل وشوفته واقف مع بابا اللي بييبصله وبيقول بتعجب 

_ ما شالله انت ابن وفاء بجد 

_ اه مش باين عليه ولا ايه دول بيقولوا اشبهلها 

_ شويه فيك من ابوك اكتر 

رد بضحك

_  بيقولوا فيه من الاتنين 

_ الاتنين حلوين  ، ربنا يحفظك ليهم  تعاله نقعد  تعاله 

قعدوا وكملوا كلام ف اتقدمت ناحيتهم وقولت 

_ السلام عليكم  ، البيت نور

تلاشت ابتسامته بعد ما بصلي ونظرات الاستغراب في عينيه وهو بيتفحص مظهري  وبعدين بيقول من غير نفس 

_ وعليكم السلام  ،  متشكر

قالها ورجع يبص لبابا ف قال بابا وهو بيقدمني ليه

_ دي فاطمة بنتي

_ اه تشرفنا  

كمل باستفهام بعد ما رجع يبص  وكأنه مستغرب طريقة لبسي 

_ هو حضرتك كنت مسافر فين بالظبط

_ امريكا 

قال ومازالت نظراته بتتفاحص شكلي

_ امريكا! 

شاح بنظره عني وكمل مغير مجري الحديث 

_ بس انتوا نورتوا البلد 

استفزني اسلوبه ف قعدت علي الكرسي المقابل ليه وقولت 

_ منوره بيكم بس في ايه  ، ايه معني بصاتك دي   

بصلي من غير اي  اهتمام ف قال بابا 

_ في ايه يا فاطمة 

قولت بنرفزه

_ مش عارفه بس الاستاذ بيبصلي بقرف   

قال بهدؤء زود استفزازي

_ اسف لو فهمتي غلط بس هو ده شكلي جد ومليش في الكلام مع ناس معرفهمش  ،  مليش كلام مع البنات عموماً

رجع كلم بابا وقال 

_ حضرتك معاك ولاد شباب 

ابتسم بابا وقال 

_ لا معنديش غير فاطمة 

_ اها ،  وعلي كده حضرتك مش ناوي تسافر تاني 

_ مش مسافر وهستقر هنا 

_ احسن حاجة 

حسيت اني لو قعدت دقيقه كمان هعمل مشكله كبيره قوي معاه ف قومت ومشيت بعد ما اتحولت سعادتي لبغض ويمكن كره ليه بسبب تصرفه ده 

#بيجاد 

زيها زي غيرها كتير  لبس محتشم مش مبين حتي عينيها لكن اسلوبها متناقد جدا مع شكلها ده     وزادت صورتها سوء لما كانت عاوزه تتخانق معايا علشان مدتلهاش اي اهتمام  وزيها زي غيرها بردو مدتش لزعلها  اي اهتمام وكملت كلام مع خالي اللي بيقولي 

_ وفاء زعلانه مني قوي 

_  شوية  اصل حضرتك متعرفش استنتك قد ايه  وكان نفسها تشوفك   

_ وانا والله يابني  بس غصب عني مقدرتش اكلمها 

_ لا مش غصب حضرتك كان بأيدك تكلمها  ،  وانا عاتب عليك  ،  ليه عملت معاها كده 

سكت شويه وبعدين قال بتنهيده

_ اول حاجه فاطمه متعرفش المواضيع القديمة انا محكتلهاش  ،  وتاني حاجه انا... 

قطع كلامه في الموضوع ده و قالي باستفسار

_ لحظه!  هي وفاء حكتلك ايه عني بالظبط

_ حكتلي كل حاجه  من يوم ما روحت النجع لغيت ما بابا خطف ماما وصول لجوازهم اللي حصل بعد الفضيحة اللي حصلت بسبب اتنين اتفقوا عليها   ، وحكتلي انا بس انك سافرت عشان هي اتجوزت بابا ، ومقالتلهوش هو الحكاية دي مكنتش عايزة تزعله ولا تحسسه انه كان سبب في خسارتك  ولا تزعله منك 

_ 

_ ماما ملهاش ذنب يا خالي ولا بابا  كمان ، انت خدتهم بذنب ناس تانين  

_ مش هتحس باللي حسيته غير لو جربت... يمكن تفتكر انها مجرد قصة حب مش مستاهله اللي انا عملته  بس لا فاطمة مكنتش ولا عمرها هتكون قصة عابره  موت فاطمة كان موت ليه انا كمان  بقيت عايش سنين جسد من غير روح ولغيت دلوقتي انا مقدرتش اعدي اللي حصل ولا انساه ،  انا عملت كده من وجعي اني مش هشوفها تاني"  

وانا بسمعه كنت بمنع نفسي اني اقوله طيب ازاي وانت اتجوزت وخلفت وعيشت حياتك بس مقولتش مكنتش حابب ابوظ اول مقابله بانتقادي ليه ف قولت رد علي كلامه

_ الله يرحمها  ويصبرك انا معاك وحطيت نفسي مكانك كتير وانا بتكلم مع ماما في الموضوع ده بس هي بردو ملهاش ذنب  ،  ده لو قولنا ان حد اتاخد بذنب التاني في القصة دي ف هتكون هي اللي اتاخدت بذنبك اكتر من مره وحضرتك ادرا مني باللي حصلها 

_ انا عارف انها ملهاش ذنب وعارف التلات كوارث اللي حصلتلها بسببي بس غصب عني وقتها مكنتش عارف افكر 

_ مش مشكله المهم ان  دلوقتي شيلت كلامك القديم من دماغك وتقدروا ترجعوا زي الاول 

_ طبعاً ده انا راجع مخصوص عشانها  وعشان ارجع كل حاجه زي الاول  

_ طيب لو كده ف حضرتك هتيجي معايا دلوقتي 

_ لا مش دلوقتي خليها يوم تاني 

_ ليه 

_ احنا بقينا العصر هروح امتي وارجع امتي  ومقدرش اسيب فاطمة لوحدها 

قولت وانا من جوايا مش عايز كده ولا حابب اني اشوفها تاني 

_ حضرتك ممكن تيجيبها معانا 

_ مش هينفع اول مره اخدها انا هروح وبعدين اجيبها ونجيلكم تاني 

 اتفقنا انه هيجي في يوم تاني  وبعدين قالي هناكل رفضت كتير بس هو اصر ف دخل اوضه هناك وطلع هو والمنتقبه ودخلوا المطبخ جهزوا الاكل وبعدين وقفت موجهه نفسها ليه مش عارف نظراتها كانت عامله ازاي علشان كانت مغطيه عنيها بس طبعاً كنت متاكد انها نظرات مش لطيفه زيها

#بشر 

رجعت البيت لقيت خالتي بتستقبلني وتقولي

_ كويس انك جيت انا كنت لسه هكلمك 

_ ليه 

_ ام العروسه كلمتني وقالتي انها كلمت ابوها وقال نروح  

_ تمام شوفي ابوي واتفقوا وبلغوني

_ طيب استني  رايح  فين  ،  في حاجة تانيه عاوزة اقولهالك 

_ ايه

_ امها قالتلي بيني وبينها ان البت خايفه تشوفها وترفضها علشان التعويره اللي في وشها ف قالتلي اقولك ممكن توريك صورتها وتشوفها الاول ولو مش هتعجبك بلاش جيتك علشان متجرحهاش 

_ موافق يا خالتي كويسه 

_ طيب شوف صورتها الاول 

قولت بزهق

_ كويسه يا خالتي انا موافق مهما كان شكلها 

قولت كده ودخلت قعدت في اوضتي وبعد ساعتين تقريباً دخلت عليه وقالتلي

_ بشر

اعتدلت في قعدتي ف قالت وهي بتفتح تليفونها 

_ انا كان لازم اوريك  ،  اهي

_ يا خالتي مش هشوف حاجه انا عاوزها كده 

_ بص مش هتخسر حاجه  ،  عشان خاطري خد 

اتنهدت بزهق وقولت 

_ وريييني 

خدت منها التليفون وبصيت لصوره لقيت ان شكلها حلو والجرح مش مبوظها مع انه واضح بشكل ملحوظ ف قولت 

_ كويسه  عجبتني 

قالت بسعادة

_ صح يابشر

_ صح يا خالتي  ، اتفقوا معاهم ومع ابوي علي معاد وهنروح

_ حبيبي ربنا يهنيك يارب  هروح اكلم امها الاول  

مشيت وانا رجعت اقعد مع نفسي مخنوق وخايف من قراري  وفي الوقت ده  الباب اتفتح ولقيت هاجر بتدخل  وتقولي 

_ لقيتك مبتردش علي اتصالي ف جيت 

_

_  ممكن اعرف انت مبتردش ليه 

_ مش فاضي 

_ وراك إيه  مانت قاعد اهو 

_ قاعد بس مشغول بفكر ممكن اجيب ايه شبكه للعروسه وهسكن هنا ولا اسكن بعيد احسن  ،  اعملها ايه علشان تتبسط وكده يعني 

بعثرت نظراتها وهي بتقول 

_ اه  ،  طيب وعلي كده انت شوفت عروستك 

_ شوفتها وعجبتني  باين عليها طيبه وبنت حلال

_ وشوفت وشها المتشوه

_ متشوه؟ 

_ ايووه فيها جرح كبير  ،  اكيد مشوفتهاش والا كنت رفضتها 

_  شوفتها وعجبتني بجرحها اللي بيميزها وبعدين انا اهم حاجه عندي اخلاقها  وانا مش هقولك علي اخلاقها انتي تعرفيها اكتر مني 

_  لا مش فاكره  انا كنت صغيرة ،  بس تمام طالما عجباك مبروك  انا بس كنت بنبهك يمكن مش واخد بالك او محدش قالك

_ لا واخد بالي متشغليش بالك انتي  ،  اه وحاجة كمان  ، متبقيش تدخلي عليه كدة  الوضع ده لازم يتغير  اسراء ممكن تزعل

نزلت دموعها وهي بتقول 

_ بجد  ،  يعني مبقاش ينفع علشان اسراء  ،  هننهي الاخويه اللي بينا عشان واحده لسة مدخلتش حياتك 

_ اسف يا هاجر بس الحقيقه احنا مش اخوات ولا انا عمك  ،  انا ابن عمك  ،  مش محرم ليكي يعني  ، وانتي عارفه الستات اكتر مني  ، وانا مش عايز ازعلها  

_ بتتكلم جد 

_ وانا من امتي ليه في الهزار  ، مانتي عرفاني 

_ ااااه   ،  ده انت شكلك بتعاقبني علشان قولتلك تجوز  بس مكنتش مجبر توافق  

_ اعاقبك ليه  ده انا عاوز اشكرك  ،  من غيرك كنت هفضل طول عمري لوحدي  

قالت ودموعها في عينيها 

_ لو كنت اعرف انك هتتغير كدة مكنتش اتدخلت 

_ ومعقول كنتي هتفضلي ساكته وتسيبي بدر سايب البيت 

_ لا مكنتش هسيبه علشان هو احسن منك متغيرش مع حد علشان جويريه  

#هاجر 

سيبته ورجعت  الشقة وبقيت احلف ما ليه دعوة بيه تاني  وقررت ابعد عنه ومعتبرهوش لا اخ ولا عم بس مقدرتش علي غير عادتي مقدرتش اهدي نهائي كان في دوشه في دماغي والحزن ماليني  وبالعافيه عدي اليوم ده وانا بمسك نفسي علشان متصلش بيه 

#خلود 

المشكلة اللي حصلت لحسابي وكلام زيد ان في ستوري مش كويسة عليه شغلتني عن حساب اسيل وبقيت مستنيه اتصال البنت عشان تطمني وبعد طول انتظار وقلق وصلني اتصالها ف رديت بلهفه وقولت

_ ايوة  عملتي ايه طمنيني 

_ الولد كلمني وقالي ان حسابك تم اختارقه ومش عارف يرجعه

_ يا انهار اسود  ده اللي اخترفة بينشر ستوري وحش علي البيدج وشكله هيعملي مشاكل كتير اعمل ايه 

_ نزلي فيديو زي ما قولتلك وقولي ان حسابك اتهكر 

_ طيب طيب هعمل كده  باي 

قفلت معاها وقبل ما اعمل حاجه وصلني اتصال من رقم غريب رديت ف جاني صوت علية مؤثرات صوتيه وبيقولي

_ ازيك يا نجمة  وحشتينا و وحشتنا فيديوهاتك المخله بالاداب

_ انت مين وعاوز إيه 

_ انتي اللي عاوزه 

_ انت هتقول عاوز ايه ولا اعمل بلوك 

_ روقي دمك يا فنانة  ، حسابك  وصورك عندي 

_ انت!!  ،  انت مين وبتعمل كده ليه 

_ هقولك  ، اكيد شوفتي الاستوري اللي نزلت علي البيدج طبعاً 

_ ايوه شوفتها  وبعدين  إيه اللي انت هتستفيده من القرف ده  

_ هستفاد ايه؟! مش عارف  بس لو منفذتيش كلامي الاستوري المره الجايه هتكون بصورك انتي  بس صور ايه  ، ملط  ،  اه وياريت تقولي للي بيحاول يرجعلك الحساب يبطل عشان مفيش حد ممكن يرجعه غيري  ،  استني مني اتصال تاني 

قال كده وقفل في وشي السكه  وسابني هتجنن وانا مش عارفه ممكن يعمل ايه  ولا عاوز ايه 

#وفاء 

استنيت بيجاد ساعات لغيت ما جه وبعدين ادعيت عدم الاهتمام ومسألتهوش عمل ايه وهو مفتحش الموضوع  لغيت ما رجع بدر من الشغل وقعدنا نتعشي وبعد ما استنيت حد فيهم ينطق قال بدر اخيراً

_ صح نسيت  ،  انت روحت لخالك النهارده بصلي بطرف عين وقال

_ اه  وهحكيلك علي اللي حصل بعدين بيني وبينك 

ركزت نظري في الطبق وبقيت اقلب في الرز علشان اخفي اهتمامي ف قال بدر وهو بيبصلي وابتسامته علي وشه

_ يستحسن بردو  علشان متضايقش امك 

مدتلهمش رد بأي شكل وبعد ما خلصنا قومت شيلت الأكل ودخلت اوضتي وبعد لحظات لقيت بدر جاي عندي بيوقف جمبي وانا بداري دموعي وبيقولي وهي بيلفني ليه 

_ مالك  

مسحت دموعي وقولت وانا بتهرب من نظراته

_ سلامتك 

رفع وشي ليه بلطف وقال 

_ وانا لسه هعرفك  ،  احكيلي ايه مزعلك 

مردتش ف قال 

_ عاوزة تعرفي اللي حصل مع بيجاد  ولا زعلانه علشان مجاش 

نزلت دموعي تاني وانا بقول

_ زعلانه علشان لو ليه قيمة عنده مكنش مشي من الاول  او كان جه مع بيجاد لما راحله   او حتي حاول يكلمني تاني  ،  بيجاد اتغير مبقاش زي الاول 

_  هو لسه بيحبك بس يمكن بيمر بحالة نفسيه سيئه خلته يبعد،  اسأليني انا عن الحاله النفسية لما تسؤء  ،  مينفعش حد يلوم علي حد بسببها 

_ و 27 سنه مكنوش كفاية يصلحوا حالته النفسية  

_ ولا العمر كله لغيت ما تحصل حاجة تجبره يخرج منها  اصبري لغيت ما يجي وتتكلمي معاه  متاكد ان اللي عنده هيقنعك 

_ بيجاد قالك اللي حصل 

_ مقاليش كل حاجه  تعالي هنقرره 

_ لا اصلاً الواد ده واطي زي خاله من الصبح مش راضي يتكلم ويقول عمل ايه معاه 

_ هضربهولك بالجزمه خليه يتكلم تعالي ولا اقولك استني هخليه يجي...  بيجاد!!!  ياد يابيجاد 

دخل ونظرات المكر في عينيه  وقال

_ افندم يا كبير 

_ تعاله 

_ اؤمرني 

_ عملت ايه عند خالك 

_ هحكيلك بعدين لما نكون لوحدنا 

ضربته وقولت 

_ اتكلم بطل رخامه 

_ مين اللي بيتكلم 

قال بدر

_ ما تحكي وبطل برودك ده  وقت لعبك 

_ علشان خاطرك بس يا كبير  ،  حاضر  

بقيت مستنيه يحكي وهو فضل ساكت علشان يزيد فضولي واستفزازي ف قال بدر

_ انت هتتكلم ولا هضربك

_ هههههههه اوووكي هتكلم  ،  محصلش حاجه اكتر من اني قابلته وسلمت عليه وقعدنا نتكلم وبعدين قالي هيجي في يوم تاني علشان  يشوفها  ،  اه وطلع معاه بنت  عارفين اسمها ايه؟ 

قولت بصدمه

_   يعني اتجوز 

_ أكيد امال خلفها ازاي  ماهو لازم يتجوز 

_ اتجوز  وهو الـ....... 

مسك ايدي وضغط عليها ف فهمت انه بيهديني قبل ما انفعل واتكلم في اللي حصل ف قال بدر بترقب لاجابته

_ اسمها فاطمة 

_ ايوووه ومنتقبة زيها  كمان  

شرد للحظات وبعدين سابنا من غير ما يضيف ولا كلمة ف قال بيجاد 

_ واضح انه مش سهل علية يتقبل ان واحد بيحب اخته لدرجة انه يستنسخها مره تانيه  

_ هو فعلاً استنسخها  بس مش هي دي المشكله  ،  المشكله انه اتجوز اهو وعاش حياته  ده انا قولت عمره ما هيتجوز 

_ كان هيفضل من غير جواز لأمتي يعني  

_  وعلي كده مراته معاه 

_ لا بيقول ماتت  هي وبتولد 

_ ماتت  ،  يعني بنته اتربت من غير ام

_ اه بس مش غلبانه زي مانتي متخيلة دي لسانها مبرد وعدم وجود ام في حياتها باين عليها  

_ يعني ايه

_ يعني قليلة الادب  اخوكي معرفش يربي يا وفاء

#اسراء 

جت ماما عندي تقولي 

_ ورد كلمتني دلوقتي وقالتلي وجايين بكرة هما بشر 

_ جايين ليه 

_ عشان يتكلموا في تفاصيل الجواز 

_ ايييييه  ،  مامااااا  ، انا قولتلك مش موافقه 

_ انتي قولتي مش موافقه علشان هو ممكن يرفض لو شاف الجرح اللي في وشك بس هو شاف صورتك وقال انه بردو عاوزك 

_ شافها فين!!! 

_ بعتها ل ورد 

_ ليه يا ماما!!!  مين قالك تعملي كده  ،  بتدللي عليه 

_ اه بدلل عليكي  ، ليه نضيع فرصة زي دي علشان حاجة ملكيش ذنب فيها   ، حبيبتي الراجل شاريكي وراضي بيكي علي كده نرفضه ليه

_ ويرضا بيه ليه وانا كده 

_ انتي عاوزه ترفضي وخلاص مش كانت مشكلتك انه لو شاف الجرح هيرفضك اهو شافه وعاوزك 

سكت ف قالت

_ وافقي يا حبيبتي مش هتلاقي زيه هو  ولا عيلته 

_ ايوه بس...

_ مبسش  ،  هو لو مش عاوزك مكنش قال اتقدم من اساسه 

شردة شوية افكر في كلامها وبعدين قولت 

_ ماشي بس  انا لازم اعرف هو متجوزش ليه كل ده وليه اتقدملي انا بذات 

_ ما انا قولتلك شكله كان مستنيكي

_ يستناني ليه ده عمره ما كان ليه كلام معايا 

_ ياستي اهو هيخطبك واسأليه واعرفي منه بنفسك 

#بدر

كلمتني ماما وقالتلي ان الصبح هيروحوا بيت عمي السبع علشان يتكلموا في تفاصيل الجواز  تفاجأت جداً  بالخبر ده لان مكنش حد قالي وفي نفس الوقت فرحت لانه هيتجوز اسراء اخت ريان  وبعد ما قولتلها هاجي الصبح وهحضر معاهم كلمت ريان اعاتبه انه مجابليش سيرة ف قال

_ وانا ينفع اقولك يعني،  المفروض انت تكون عارف 

_ محدش قالي  ،  بس والله فرحت بالخبر ده اكيد مش هيلاقي زي اسراء 

_ مش عارف بقا 

_ يعني إيه 

_ يعني اسراء فيها جرح في وشها  هي نفسها رفضت في الاول علشان خايفه يشوفها ويرفضها بسببه

_ جرح إيه  ،  ده امتي حصلها اصلا

_ من سنين 

_ وده  جالها منين

_ حادثة حصلتلها من كام سنة 

_ اه طيب والجرح ده كبير قوي يعني 

_ شوية 

_ اممم

_ هيرفضها صح 

_ باذن الله لا  

_ اقولك حاجه ومتفهمنيش غلط 

_ اكيد مش هفهمك غلط   قول 

_ اتمني ميرفضهاش الحقيقة ان الجرح ده هو السبب اللي مخلهاش تجوز مش موضوع ان بابا رافض يجوزها بره مصر  ،  اسراء طيبة وجميلة ومش علشان اختي بس الجرح ده مش عايبها لدرجة انها تترفض عشانه في كل مره  

_ وبشر مش بتاع مظاهر واكيد عرف معلومة زي دي من قبل ما يقول عليها  

_ اتمني  ، عشان نفسيتها بس 

_ ان شاءلله هتم حتي لو متمتش ف اكيد نصيبها هيكون احسن منه مليون مره  

_ يارب 

_ يارب  بس ايه ياعم الحب ده كله  ده انت مكنتش تبطل خناق معاها  

_ كنا صغيرين بس دلوقتي كبرنا وبصراحه حاسس بالذنب ناحيتها شكلها وهي بتبص لجرح كل شوية بيزعلني قوي  "

كلامه وترني وخلاني قلقان ان بشر يرفضها لما يشوفها  وبعد ما قفلت معاه اتصلت ب بشر اربع مرات ومردش عليه   كنت عاوز اطلب منه يكمل ويتجاوز موضوع الجرح ده 

#هاجر 

جه تاني يوم وصحيت علي صوت امي وهي بتقولي وهي بتفتح الستاير 

_ اصحي كفاية نوم 

قولت وانا بغمض عيني عشان ضوء الشمس اللي اخترقها بقوة

_ في ايه يا ماما  

_ قومي علشان تفطري

_ افطر ايه بس وانا من امتي بفطر بدري كده 

_  قومي الساعة 11 هنروح بيت عمك السبع 

قومت وانا بقول 

_ نعمل ايه في بيت عمي السبع

_ كلنا رايحين  ،  بيت عمك بدر وعمك عبيده و ولادهم علشان هيتكلموا في جوازة بشر واسراء

قولت بنرفزه 

_ انا مش رايحه 

_ إيه ده في ايه  

قولت وانا بقوم وبتجه لبره الاوضه 

_ في اني مش هروح 

جت ورايا وهي بتقولي 

_ انتي اتجننتي  ايه اللي بتقوليه ده 

وقفت وبصتلها وانا بقول بعصبية

_ اه اتجننت  ومش هروح 

_ وليه ان شاءلله 

_ علشان الاستاذ اللي من قبل ما تتم الموافقة بيقولي ملكيش دعوة بيه دي اسراء هتضايق  ،  انا مش هحضر لا فرح ولا خطوبة ولا داخله بيتهم تاني 

_ طيب اهدي  ، قوليلي  ايه اللي حصل  

_ ما انا قولتلك 

_ طيب وهو ليه قالك كده 

_ بيعاقبني الاستاذ علشان قولتله يتجوز  وبدل ما يرفض زي عادته رايح يوافق ويقولي انا ابعد عنه علشان المشوهه ام جرح في وشها 

_ اشششش اسكتي عيب  ،  عييييب افرضي سمعوكي 

قولت بخنقة

_ خليهم يسمعوا  انا عاوزاهم يسمعوا وبذات هو  

بصتلي بشك وقالت 

_ إيه يا هاجر  ، انتي زعلانه علشان قالك ابعدي  ولا عشان هيتجوز 

اربكني سؤالها ف قولت بتلعثم وانا بدير ليها ضهري 

_ انا  ..  انا زعلانة من قلت ذوقه  ،  بيقولي قال متدخليش تاني عندي علشان اسراء هتزعل 

_ وانتي دخلتي عنده فين 

_ اوضته زي عادتي من صغري 

_ طيب ماهو عنده حق  وانا قولتلك بلاش تقتحمي اوضته  ،  انتي مبقتيش صغيرة للحركات دي 

نزلت دموعي وانا بقول 

_ وانتي كمان مكتشفتيش اني كبرت غير دلوقتي  ،  بس ماشي  لا هكلمه ولا هروح عندهم تاني 

كملت ببكا

_ مش عاوزه اعرفه تاني  

قولتها ورجعت اوضتي قعدت علي السرير مش قادره اوقف دموعي لغيت ما جاني صوت ماما وهي بتقولي 

_ ده انتي معملتيش ربع كده لما عرفتي ان بدر عاوز يتجوز جويريه وساب البيت عشانها ايه يا هاجر انتي بتحبي مين فيهم 

بصتلها بصدمه من كلامها اللي انا عمري ما فكرت فيه وقولت 

_ احب مين فيهم؟!!  قصدك ايه

_ قصدي اللي فهمتيه 

قومت وقفت قدامها وقولت بنرفزه 

_ ما دي المصيبه  ، انتي قصدك اني انا بحب بشر اللي معتبراه اخويا وهو بيعتبرني اخته الصغيره   ولا بشر اللي انا من سنتين بس كنت بقوله يا عمو وبصعوبه قدرت أبطل الكلمه دي لما ضغطتوا عليه   انا احب بشر اللي اكبر مني ب 12 سنة 

_ امال عامله في نفسك كده ليه  

_ علشان بيبعني من اول ما جت اسراء 

_ متاكده 

_ ماما من فضلك!!!!  

_ صوتك ميعلاش!  انا بتكلم عن حاجه بانت زي الشمس  وبلاش بتحبيه نقول بتغيري عليه  بس مفيش واحده بتغير علي اخوها 

قالت كده وسابتني اكمل  بكا لغيت ما جاني اتصال من مليكه لاكتر من مره وفي كل مره كنت بقفل عليها  وبعد شويه لقيت خلود بتدخل عندي الاوضه وبتقولي 

_ الحقينـ.... 

بترت كلمتها لما شافت عيوني الحمره من كتر العياط ف جت قعدت عندي وقالت 

_ إيه ده  هاجر انتي كويسه 

رجعت دموعي تنزل وانا بهز دماغي بنفي ف قالت وهي بتحضني

_ مالك بس يا حبيبتي 

بقيت ابكي من غير رد ف بعدتني عنها وقالت بقلق

_ في ايه يا هاجر قلقتيني 

قولت وانا بواصل عياطي 

_ انا تعبانه قوي  

_ طيب اهدي وقوليلي مالك  ،  إيه اللي حصل بس 

_ معرفش 

_ طيب بطلي عياط 

مسحت دموعي ف قالت بعد ما هديت شويه 

_  مين مزعلك 

_ مفيش حد 

_ طيب امال بتبكي ليه 

سكت شويه وبعدين بصتلها وقولت 

_ مش عايز بشر يتجوز 

_ ايه! 

نزلت دموعي تاني وانا بقول 

_ لو اتجوز هيبعد عني 

_ طيب اهدي بس  ،  ازاي يعني مش عاوزاه يتجوز  ،  في ايه يا هاجر 

ديرت وشي عنها ف قالت 

_ انتي بتحبيه 

رديت بنرفزه بعد ما قومت من جمبها

_ لا ومحدش يقولي الكلمة دي تاني  ،  اللي بيني وبينه كفاية قوي يخليني محبش انه يتجوز ويبعد عني 

_ وايه هو اللي بينك وبينه يخليه يوقف حياته عشانه  

_ صحاب واخوات واقرب اتنين لبعض ده كله مش كفاية 

_ وده هيعوضه عن زوجه ولا ناويه تجوزيه علشان تكملي

_ اااخرسي 

ردت وهو بتقوم 

_ ماشي هخرس بس انتي بتحبيه  لكن للأسف عرفتي ده متأخر قوي  بشر واهله كلهم بيجهزوا علشان يروحوا بيت عمي السبع يتفقوا علي الجواز دلوقتي 

قولت بعصبيه  

_ مبحبهووووش  بشر اخويا وصاحبي وبس  ،  انتي مش هتعرفي انا حاسه بايه اكتر مني 

_ طيب اهدي  خلاص مبتحبهوش  ، ولو مبتحبهوش بجد ف انتي لازم تجهزي حالا وتروحي معاهم وتظهري ابتسامتك  علشان اخوكي وصاحبك  والا مش انا بس اللي هقول انك بتحبيه والكل هيقول 

#وفاء

في الوقت اللي انا شايل هم مقابلة بيجاد وفيه اللي مكفيني جت جويريه لما عرفت ان في مناسبه وهناخدها معانا توترت وحبست نفسها في الاوضه وكل ما ادخل عندها واقولها تروح معانا تبكي ف قربت منها وقولت 

_ ياحبيبتي في ايه  هو احنا هنخطفك ده احنا هنروح هنا بيت عمك السبع  شويه ونرجع 

قالت ببكا 

_ لا مش هروح  ونبي مش هروح  عشان خاطري يا ماما  ونبي  

_ طيب اهدي اهدي  خلاص مش هتروحي بس اهدي 

هديت شوية ف قولت 

_  معقول عمايلك دي  ،  ما كلنا معاكي وجمبك خايفه من ايه 

_ مش عاوزه اروح 

خدتها في حضني وقولت 

_ طيب ياحبيبتي خلاص متروحيش بس اهدي   

رفعت وشها ليه وقالت ودموعها لسة بتسيل

_ متتأخروش عليه يا ماما 

_ حاضر هنروح وكل شويه هاجي اطمن عليكي  

قولت كده ف سمعت صوت جرس الباب بيضرب  سيبتها وروحت افتح ف لقيت بنت شوفتها قبل كده لما جت ل هاجر وقت ما اتعورت 

_ اهلا حبيبتي اتفضلي 

قالت بإبتسامة

_ انا اسفه اني جايه من غير معاد بس انا كنت طالعه ل هاجر وقولت اسلم علي جويريه هي هنا  ، اه نسيت اعرفك علي نفسي انا مليكة 

_ اه حبيبتي اهلا وسهلا  ، وهي  هنا اتفضلي 

 قعدتها في الصالون ودخلت ل جويريه وقولت 

_ جويريه حبيبتي ممكن تيجي تسلمي علي مليكة 

_ مليكة مين 

_ صاحبة هاجر جايه مخصوص تسلم عليكي 

_ ليه 

_ ايه هو اللي ليه  ،  يلا عيب

_ طيب 

#مليكة 

صدقت ما خلصت الامتحانات علشان ابتدي اتواصل مع جويريه واكتشف حالاتها اكتر بعد ما ثارت فضولي بشكل كبير من خلال كلام هاجر عنها وبعد ما جت مع مامتها وهي متوتره زي اول مره شوفتها فيها وقفت سلمت عليها بإبتسامة وقولت 

_ ازيك يا جويريه 

_ كويسه 

قالت امها 

_ هعملكم عصير 

_ ميرسي يا طنط ملهوش لزوم

_ لا ازاي  دقيقتين وجايه

قالت كده ودخلت وانا رجعت ابص ل جويريه واقول

_ انا عارفه انك خايفه مني بس انا مش عاوزاكي تخافي انا مش هأذيكي 

_ مش خايفه 

_ امال كامشه في نفسك ليه 

مردتش ف قولت بإبتسامة 

_ مش مشكله  ،  بس انتي عارفه ان فيكي كتير من مامتك 

_ اه 

_ وانا كمان فيه شبه من مامتي كلنا كده انا وماما وخالتي وبنتها  شكلنا اجانب شوية  اصل جدت مامتي وجدها فرنسيين  وانتشر الشكل اللي انتي شيفاه ده في العيله كلها  ،  طبعاً بتقولي عليه مغروره ودي حقيقه انا مغروره  فعلا ههههه 

مضحكتش ولا ابتسمت ف قولت بحرج

_ انتي ملكيش في الهزار صح 

هزت دماغها بنفي ف قولت 

_ ولا انا  ،  مبحبش اتكلم كتير كمان 

ابتسمت ف قولت 

_ هههههههه ممصدقنيش  عندك حق انا اصلا رغايه 

_ لا مش رغايه  وانتي جميلة فعلاً 

_ حبيبتي ربنا يخليكي ياااارب  ، انتي اللي جميله والله 

_شكرا  

كملت رغي وهي يدوب كانت ترد بكلمه بالكتير ده ان ردت وبعد لحظات مامتها جابت العصير وشربنا وبعد شويه الباب خبط وجه راجل شكله كده بيقول انه ابوها ولما شافني  قالت مامتها

_ دي مليكة صاحبة هاجر وجايه تسلم علي جويريه 

_ اهلا وسهلا نورتي 

_ متشكره  ده نور حضرتك  اتمني مكونش ازعجتكم 

_ لا ابداً تشرفي في اي وقت 

_ ميرسي  ،  طيب امشي انا ولو تسمحولي ممكن اجي تاني اسلم عليها ولا في مشكله 

قالت مامتها

_ لا طبعاً حبيبتي تنوري في اي وقت  البيت بيتك 

_ ميرسي ربنا يخليكي  ، عن اذنكم 

جيت امشي ف قالت جويريه 

_ خليكي معايا 

بصولها بأستغراب ف قولت بإبتسامة 

_ حبيبتي مره تانيه 

_ خليكي 

قالت مامتها بتعجب

_ سبحان الله  ،  لو مش مشغوله خليكي  هي اول مره تطلب من حد يقعد ف اكيد عاوزاكي تقعدي

_ بجد 

_ اه حبيبتي  

_ ههههه طيب كويس  والله ليه الشرف اني اكون اول حد تطلب منه ف هقعد طبعاً 

_ تنوري حبيبتي  ، احنا هنروح مشوار وهنرجع  طبعاً مش بقولك تقعدي علشان هنسيبها  هي متعوده تقعد لوحدها بس واضح انها حبتك

قولت بإبتسامة 

_ وانا كمان حبيتها والله 

قال ابوها

_ يعني هي مش هتروح معانا 

_ لا خايفه تروح 

_ ليه يا جويريه ده ولد عمك كيه متروحيش 

قالت جويريه 

_ مش عاوزه اروح  

_ يابتي كيه عمك هيزعل

_ ونبي لا مش عاوزه  روحوا انتوا وانا هقعد 

حاولوا معاها كتير وهي رفضت وبعد شويه مشيوا وقعدت انا وهي ف سألتها

_ ليه مروحتيش معاهم 

_ مش عاوزه 

_ خايفه من الزحمة 

شردت شويه وقالت 

_ اه 

_ ليه يا جويريه  ،  ايه مخوفك من الناس كلها كده 

كملت لما طال سكوتها من غير رد 

_ حبيبتي مش كل الناس يخافوا منها  كل اللي حواليكي باين عليهم ناس محترمين وطيبين ميتخفش منهم 

_ 

_ طيب ممكن اعرف بتحسي بأيه وقت ما  بتكوني خايفه،  ايه اللي بتتخيليه وقتها 

سكتت شويه وبعدين قالت 

_ بتخيل انهم بيعذبوني 

_ طيب ليه

مردتش ف قولت 

_ طيب انتي دلوقتي لو روحتي معاهم مفيش حد هيقربلك علشان هما معاكي وهيحموكي 

_ مش هيحموني  ،  مش هيسمعو صوتي  ،  محدش هيسمع صوتي في العماره كلها 

_ حصل قبل كده ومحدش سمع صوتك ولا قدرو يحموكي 

سكتت ف قولت 

_ حصل؟ 

مدتنيش اي رد ف قولت 

_ واضح انك مريتي بحاجه كبيرة كانت سبب في الحاله دي  و واضح كمان انك مقولتيش لحد 

بصتلي ف قولت 

_ اقولك حاجه  ،  اي ان كان اللي حصل ف انتي محتاجه تواجهي خوفك  لو واجهتيه واتغلبتي عليه هتتحسني ومش هتتحسني غير لما تخرجي لدنيا وتتعاملي مع الناس 

_ مش عايزة  

             الفصل الحادي عشر من هنا

لقراءة باقي الفصول الجزء الثاني من هنا

لقراءة الجزء الاول جميع الفصول الفصول من هنا 

تعديل المقال