رواية ذئاب لا تعرف الحب
الجزء الثاني2الفصل السابع عشر17والثامن عشر18
بقلم نجمه براقه
ريان
كلمني بدر وطلب يقابلني ضروري وبسرعة ، كانت طريقته تقلق، تخيلت ممكن تكون جويرية قالتله اني دخلت عندها الليلة اللي فاتت ، بس انا خوفي مكنش من اني دخلت انا خوفي كان علشان خبطت عليها من الاول ف بقيت افكر في اسباب اقولها لغيت ما وصلت عنده وبدء قلقي يقل شوية بشوية لما شوفته مبتسم وهو بيقولي
_ ابشر
قولت بإبتسامة ظاهرية
_ خير ان شاءلله
_ لقيتلك شغلانة
ابتهج وشي وانا بقول
_ بتتكلم جد
_ اه بابا قالي تقدر تيجي تشتغل من النهاردة
اتنفست براحه وقولت
_ الحمدلله ، متشكر قوي يابدر
_ علي ايه احنا صحاب ، يلا علشان نروح مع بعض و اوريك هتشتغل ايه
_ ماشي
#مليكة
روحت لمدير دار النشر بعد ما البنت خدتلي منه معاد وقابلته ولأني اعرفه قبل كده كان القاء من غير توتر ولا حرج وبعد ما سلمت عليه قولت وانا بخرج الاجندة من الشنطة
_ اتفضل
_ ايه دي
_ دي قصة قولت ل منه تعرضها عليك بس قالتلي اجيلك بنفسي احسن
قال وهو بيتنقل بين صفحاتها
_ انتي كتباها يا مليكه
_ هههههه لا والله مش انا ، اسم الكاتب عليها ، ريان السبع ولد موهوب بس مش لاقي فرصة ، انت شوف واحكم بنفسك
كمل تقليب في الصفحات لدقايق وبعدين بصلي وقال
_ باين عليها حلوه ، عجبتني ، بس ليه هو مجاش بنفسه
_ انا قولت اعرضها علي حضرتك الاول ولو عجبتك و وافقت تطبعها هجيبه يقابلك
_ ماشي هي حلوه بس لازم اقابله في عقود لازم تتمضي الاول واتفاقات
_ ماشي انا هجيبه لحد عندك
_ طيب سيبيلي القصة انا هشوفها يكون جبتيه وجيتي
قولت بسعادة
_ اوكي ميرسي اوي يا انكل
_ علي ايه ده شغل
_ اممم بس يعني هو....
_ مش معاه فلوس
_ افتكر كده والا كان كتبها علي لاب توب
_ مش مشكله الدار هتتكفل بالموضوع ده
_ ميرسي قوي
سيبته وروحت علي طول علي بيت جويرية وامها فتحتلي وبعد ما سلمت عليها دخلت عند جويرية لقيتها قاعدة شاردة وفي دنيا تانيه ، قربت منها وقولت
_ جويرية
_ هه... ازيك
_ الحمدلله وانتي عامله ايه وحشاني
_ وانتي
_ نسيت اخد رقمك ممكن تدهوني
_ اه
قولت بإبتسامة
_ طيب ممكن ارن علي نفسي واسجله
_ اه
خدت رقمها وبعدين قولت
_ تمام سجلته متشكرة قووي
_
_ في خبر مش عارفه هيهمك ولا لا
بصتلي بانتباه ف قولت
_ المرة اللي فاتت بالغلط خدت قصة من اللي عندك ، بتوع جاركم اكيد فكراهم ولما رجعت البيت قريتها وعجبتني ف عرضتها علي دار نشر وعجبت المدير و وافق ينشرها
شردت بعنيها وراحت في دنيا تانية ف قولت
_ ايه رايك
_
_ جويرية
_ اه
_ ساكتة ليه
_ مفيش... هو عرف
_ لا هو متصلش وانا معرفش رقمه
_ هتقوليله
_ طبعا ده لازم يمضي
_ اه
_ ايه مالك
_ مفيش
حسيت من سكوتها وشرودها ان في حاجه بخصوص ريان ده ف قولت بعد ما قعدت جمبها
_ في حاجه يا جويرية
_ لا
_ امال ليه حاسه ان في حاجة بخصوص ريان ، انا حسيت بكدة من المرة اللي فاتت
بعثرت نظراتها وهي بتقول بتوتر
_ مفيش حاجه ، هيكون في ايه... كلميه واتفقي معاه
_ طيب ممكن اعرف هو بنسبالك ايه
_ ولا حاجه ، جارنا وصاحب بدر خطيبي
_ اه.. طيب انا ممكن اكلم بدر واطلب منه رقم ريان
_ بتسأليني ليه كلميه
_ بستأذنك
_ عادي
#ريان
كنت مع بدر بقالي تلات ساعات بيوريني الشغل اللي هشتغله ويفهمني ايه المطلوب وفي الوقت ده وصله اتصال وبعد ما رد قالي
_ مليكة عاوزاك
_ مليكة مين
قال بمكر
_ المعجبة نسيتها
_ اه... افتكرتها.. هات
خدت منه التليفون ورديت
_ الو
_ ازيك يا استاذ ريان
_ الحمدلله وانتي
_ انا بخير وعاوزة اقابلك ضروري
_ انا دلوقتي في الشغل في حاجه
_ مش هاخد من وقتك كتير دقيقة وهمشي
قبل ما ارد خد بدر مني التليفون وقال
_ تعالي احنا في السوبر ماركت عارفاه ولا ابعتلك لوكيشن
_ بتاعكم
_ اه هو
_ طيب جايه
قفل معاها ف قولت بزهق
_ يابني مش تاخد رأيي يعني اول يوم شغل هقابل معجبات
_ ما خلاص يا احسان يا عبدالقدوس اصبر واعرف عاوزة منك ايه مش يمكن جيبالك خبر كويس
_ يمكن
استنيناها نص ساعة تقريباً لغيت ما جت وقالت
_ ريان وبدر؟
قال بدر
_ ايوه انا بدر وده ريان
_ اهلا وسهلا..
كملت موجهه كلامها ليه
_ اهلا بيك استاذ ريان ، انا اسفه علي اللي عملته من غير ما اخد اذنك بس انا جيبالك خبر يمكن يفرحك
_ خير ان شاءلله
_ انا بالغلط خدت اجندة من بتوعك وقريتها وعجبتني ف عرضتها علي دار نشر وعجبتهم و وافقوا يطبعوها وهما اللي هيتكفلوا بالنشر وطالبين يقابلوك
لمعت عيوني بسعادة اول مره في حياتي احسها ولكن تلاشت بسرعة مش عارف ليه ، يمكن لأني مجربتش احساس اني انجح قبل كده او لأني معنديش ثقة في حظي ف قال بدر بعد ما طال سكوتي
_ انت لسه هتفكر موافق طبعا وهيقابلهم
قالت
_ طيب اسمعها منه ، واضح ان في مشكله
قولت بتنهيدة
_ لا انا مش جاي
قال بدر
_ يخربيتك يا ريان مش جاي ايه يا غبي.. طبعاً جاي خدي معاد معاهم وانا هجيبهولك جر من قفاه
_ يا بدر مش هينفع ، اكيد....
_ اااخرس اخرس خالص هتقابلهم وهتمضي... هيجي يا انسة كلميهم بس انتي
_ طيب ممكن افهم ايه المشكله دول هينشروها ببلاش وبأسمك
قولت بتذمر
_ مش عايز
قال بدر
_ سيبك منه واسمعي مني انا هيجي وهيمضي
_ يا بدر....
_ مسمعش حسك ، هيجي انا بنفسي هجيبه
سكت ف قالت
_ طيب ايه
قولت بتنهيدة بعد ما اتحطيت قدام الأمر الواقع
_ ماشي هاجي
قالت بسعادة
_ اوكي وانا مش عاوزاك تقلق ، اصل حرام لما تضيع علي نفسك فرصة زيي دي مين عارف مش يمكن تكون فتحت خير عليك
_ بأذن الله
مشيت وانا رجعت اشوف الشغل وجوايا حاجه بتحطمني وتحطم اي امل جوايا وكأني مستكتر علي نفسي اني انجح في حاجه او ان اللي عيشت عمري كله اعمله يظهر لنور..
انا بدات كتابة من سن 14 سنة ولغيت دلوقتي معايا فوق ال 150 قصة كاتبهم بخط ايدي ، بين مستوي مبتدء لمتوسط لمحترف وكلهم غالين عليه وعيشت عمري احافظ عليهم من اي غبار او او اي خدش ومتمني واحده منهم بس تظهر ولما ظهر امل ان ده ممكن يحصل قلقت
#بشر
مر اول يوم ومشوفتهاش تاني وتاني يوم كان عمي شبل معانا في الشغل وقال انها صحيت تصرخ ف توقعت انها اتخضت بسبب اللي حصل ومع إني كنت ناوي اعاقبها ومكلمهاش غير لما تتربي بس مقدرتش زي عادتي وخرجت من عندهم وكلمتها ولما فتحت فضلت ساكته ومسمعتش غير صوت تنهيداتها وكأنها كانت بتبكي ف قولت باهتمام
_ هاجر.. مالك
_
_ هاجر!... يابت ردي في ايه
قالت بصوت باكي
_ حرام عليك يا بشر كنت قادر تعاقبني بأي طريقة تانية
_ في ايه يا بنتي ، اتخضيتي؟
_ طبعا اتخضيت ده انا كل ما عيني تغفل اصحي مفزوعه ولما بابا وماما راحوا شغلهم حاولت انام تاني وبردو صحيت مفزوعه
كملت ببكاء
_ مش حاسه بأيديه
_ خلاص اهدي ، انا راجع البيت وهشوفك سلام
قفلت معاها ورجعت علشان استأذن منهم ف قال ابوي
_ استنا عاوزين نتكلم معاك
_ نعم يا بوي
قال عمي شبل
_ انت نسيت انك اتكلمت علي البنت ولا ايه
_ لا ، ليه
_ يعني مسألتش تاني ولا اتكلمتوا في حاجه تاني
_ ما انا سيبلكم الموضوع دة
قال ابوي
_ وانت مش راجل علشان احنا نتكلم بدالك
_ لا يابوي انا بقول انكم الكبار
قال عمي
_ انت اللي مفروض تتكلم وتروح تزورهم ، انت كده معلقهم
_ حاضر هشوف الموضوع ده
قال ابوي
_ النهارده تروح تزورهم وتاخد معاهم معاد علشان نروح نتكلم
_ حاضر يابوي
حاولت علي قد ما اقدر الخص معاهم في الكلام علشان امشي وبعدين رجعت البيت وقبل مدخل العماره اتصلت بيها
_ فينك
_ في البيت
_ طيب اطلعي
_ انت فين
_ داخل العمارة اهو
_ ماشي طالعة
قفلت معاها وطلعت لقيتها قدام بيتهم عينيها مدمعه قربت منها وقولت وعيني بتتفحص وشها وخبثها اللي في عينيها ، وقتها عرفت انها بتمثل ف قولت
_ في ايه
هزت دماغها بنفي من غير رد ف قولت
_ انتي كويسة
نفت كلامي ف قولت بعبس مصطنع
_ انا اسف ، مكنتش اعرف انك هتخافي كده ، واضح انك اترعبتي جامد
_ ليه مكنتش تعرف المفروض احس بأية وانا بقع من فوق ، لدرجة مليش لازمة عندك وشايفني تافهة
_ كنت بهزر معاكي ، متزعليش ، تعالي معايا
_ فين
_ هرقيكي
_ لا مش عاوزه كتر خيرك لغيت هنا
قولت وانا بمسك ايدها
_ قولتلك تعالي
قعدتها علي درجة من درجات السلم وقعدت جمبها وحطيت ايدي علي دماغها وبدات اقرالها قران وارقيها ، كنت بكمل معاها تمثليتها لغيت ما اشوف اخرها
#هاجر
مثلت اني صحيت مفزوعة قدام باب علشان عرفاه هيقول وفعلا قال قدامه وهو متأخرش علشان يتصل عليه وكمان يجيني وكنت مبسوطه اني قدرت اخدعة بس لما شوفت قلقه عليه وزعله من نفسه ولمسة ايدة اللي كلها حنيه زعلت من نفسي قوي حسيت اني مفتريه وهو ميستاهلش ف قولت وانا حاسه بالخزي
_ شكرا
مردش بكلمة واستمرت نظراته لعنيه للحظات ف قولت
_ مالك
_ حاسس ان الزمن رجع وبتعامل مع هاجر الطفلة الصغيره المتدلعة اللي مكنتش تبطلت عياط غير لو شيلتها وخرجت بيها ونيمتها علي كتفي
_ بس انا لغيت دلوقتي بحس اني عيله وانا معاك
_ بس عيلة دماغها سم
قولت بإبتسامة
_ اعترف هههههه انا فعلا دماغي سم بس مش مؤذية والله
_ وده ازاي وانتي مسيباني شغلي علشان كدبة كشفتها من اول ما شوفتك
_ ههههههههههه والله كشفتني؟
_ كشفتك ، كان باين قوي انك بتتلأمي علية
_ يا خسااااارة القطرة هههههه
قال بإبتسامة
_ ماشي يا هاجر مردودالك بس ردي مش هيعجبك
_ طيب بعيد عن ردك ، ايه معني انك بترقيني وخوفت علية وانت اصلا كاشفني
_ كنت حابب اشوف نظرت الانتصار بتاعت كل مره بقالي كتير مشوفتهاش منك
_ مكنتش هتشوفها لأني حسيت بالزعل من نفسي بعد ما لقيتك مصدقني وخايف عليه... انت طيب قوي يا بشر
_ ليه
_ بتصفي بسرعه وبتهتم بيه حتي لو زعلانين
_ علشان بحبك
انتقض قلبي وانا ببصله وبدور عن قصدة في نظراته ليه ف قال بإبتسامة
_ وانا اللي مربيكي زي اختي الصغيرة
بهتت ملامحي وانا بقول
_ صح
_ ايه
_ ايه
_ كشرتي فجأة
_ مفيش حاجة ، رايح الشغل تاني
قال بعد ما تنهّد بعمق
_ تؤ.. رايح ازور اسراء
_ اسراء
_ اه
قولت بتذمر
_ هتزور اسراء ليه وانتوا مش مخطوبين رسمي
_ هقابلها علشان اخد معاد ونتخطب رسمي
ازدردت لعابي بتوتر واتهربت من نظراته ف قال
_ مالك
_ مفيش حاجه
كملت وانا بقوم
_ هسيبك علشان معطلكش
وقف قدامي وقال بإبتسامة
_ في ايه
_ مفيش حاجه انا بس عاوزه انام منمتش كويس بالليل
_ بردو
_ بردو
_ ومنمتيش كويس ليه
_ مش عارفه ، بجد مش عارفه...
كملت بتنهيدة
_ انا اكتشفت اني مش فاهمه حاجه خالص
_ طيب احكيلي وانا افهمك
_ ما انا مش لاقيه كلام يوصف اللي حساه ، انا تايهه مش عارفه انا عاوزه إيه
_ واضح ان الموضوع كبير قوي ، ممكن اعرف بخصوص إيه
قولت بصوت مخنوق
_ معرفش
_ ليه علاقة بحد
هزيت دماغي بالموافقة ف قال
_ مين
_ حد
_ بدر
قولت بنرفزه
_ انا قولتلك اني نسيته من اول ما عرفت انه بيحب جويرية ، مبقلوش اي احساس جوايا نهائي... ده انا كمان فهمت اني انا اقنعت نفسي اني بحبه ، انا محبتهوش بجد.. افتكر لو حبيته كنت زعلت انه هيتجوز
كملت بترقب
_ ولا ايه
ابتسم من غير كلام ف قولت
_ إيه مش كنت زعلت وحسيت بالغيرة
قال بضحك
_ انتي عارفه ، انا خايف اتعمق في كلامك ده ، صدقيني المره دي مش هقوم منها تاني ، ف انتي فكري مع نفسك ولما توصلي لقرار بلغيني
#زيد
خرجت من البيت لقيتهم قاعدين علي السلم ومخدوش بالهم مني .. كنت سامع كلامهم مع بعض.. كلام بشر باين انه حب انما هي انا بجد احترت معاها ومش عارف هي ازاي طلعت كدة وبتلعب علي الحبلين ، لا حبلين ايه دول تلات حبال.. لغيت دلوقتي مش قادر اصدق ان هي اسيل وانا زي العبيط صدقتها بس ليه بتعمل كده وعاوزه توصل لايه مكنتش فاهم وقررت اكمل لما اشوف اخرتها وبعد ما مشي بشر نزلت درجات السلم وقولت
_ بتعملي اية
قالت وهو بتبص لبشر وهو ماشي
_ مبعملش
_ مالك
_ مفيش
_ باين ان في حاجة مزعلاكي
قالت بتنهيدة
_ مفيش
التفت ليه بكامل جسمها وقالت
_ قابلت قبل كده حد مش عارف هو عاوز ايه
_ كتير
_ طيب ودول ايه علاجهم
_ علي حسب حالتهم.. بتسألي ليه
_ عادي
_ حاسه انك مش عارفة عاوزه ايه ، ولا مكسوفة تقولي عاوزه كل حاجة
_ إيه
_ عاوزة كل حاجة
_ يعني ايه عاوزة كل حاجة انت فاهم انا اقصد إيه
_ اذا كان انتي نفسك مش فاهمه انا هفهم ازاي ... سلام يا هاجر
قولت كده ومشيت وانا بفكر في اللي ممكن اعمله فيها ، مكنتش هعديلها اللي عملته كدة من غير رد فعل يناسبها
#خلود
بعد ما خرج بوقت قصير وصلني منه رساله بيقولي فيها
_ اللي مبتسالش
رديت وابتسامتي علي وشي
_ انا مش كلمتك الصبح
_ واحنا دلوقتي العصر شوفي كام ساعة
_ هههههههه معاك حق
_ طيب ممكن متتأخريشي عليه كده
_ ليه
_ انتي عارفه انك بتوحشيني
ذات ابتسامتي وانا بقول
_ طيب ما تبعت انت
_ انا بعت اخر مره وكمان انتي ادرا بظروفك وبالوقت المسموح للكلام فيه
_ صح
_ طيب هتبعتي ولا هتنسيني
_ هههههه هبعت
_ اوكي كل عشر دقايق الاقيكي باعته وبتكلميني
_ هههههههه هو انت موركش شغل
_ انا اجازة الأيام دي وفضيلك
_ ماشي بس يارب متزهق
_ محدش بيزهق من حبايبه
_ إيه
_ حبايبه.. ما انا بحبك ولا هتعملي مش فاهمه
ذات ابتسامتي وانا بقول
_ وانا هفهم منين مانت مقولتش
_ اديني قولت
_ ماشي شكرا ربنا يجبر بخاطرك
_ربنا يجبر بخاطري ايه! هو انا بشحتك انا بقولك بحبك.. عارفه يعني ايه بحبك ، يعني شغلاني وعاوز اكمل عمري معاكي
تلاشت ابتسامتي وانا بقول
_ اه بس انت متعرفنيش
_ عارفك كفاية
_ افرض معجبتكش
_ مظنش انك وحشه لدرجة متعجبنيش
_ افرض طلعت منسباكش في الحالة المادية
_ معنديش مشكله غير لو كنتي اعلي مني
_ افرض لو شوفتني محبتنيش
_ انا حبيتك من غير ما اشوفك
_ بردو افرض شوفتني محبتنيش
_ اسيل هقولك حاجه ، مفيش سبب هيخليني محبكش واكرهك وعمري ما هسامحك هو انك تطلعي بتخدعيني بس ودي حاجة انا مستبعدها
توترت جداً من كلامه ده ف قولت
_ اخدعك ليه انا هستفاد إيه
_ انا بقولك السبب اللي محبكش عشانه وطالما مش موجود ف انا معنديش مشكله
_ اه
_ طيب إيه
قفلت من غير ما ارد مكنش هينفع أكمل في الكدبة دي تاني وفي نفس الوقت مقدرتش اتخلص من الاكونت ف عملت تسجيل خروج وبقيت بحاول اتماسك ومفتحهوش
#بشر
مش صح إني اخطب ولا ارتبط بحد وانا مشغول ب هاجر ، ولا كان ينفع امشي واسيبها من غير ما نخلص كلام وافهم هي حاسة بأية وخاصة اني حسيت انها بتتكلم عني ، بس دي مش اول مره احس بكدة انا طول الوقت بحس انها بتتكلم عني وبتحبني وبتموت فية ، وفي الآخر ببلبس الصدمة وادخل علي اللي بعدها وعشان كده مكنش ينفع اوقف حياتي واخلي اسراء اللي ملهاش ذنب تستني ، ف روحت وامها فتحتلي ودخلنا جوه وبعد ما سلمنا دخلت ندهت عليها ف جت بعد دقايق وشها في الأرض ومكسوفة قوي وبعد ما سلمت عليها قالت امها انها هتعمل عصير وسابتنا لوحدنا انا مش عارف اقول ايه وهي مكسوفة وبعد لحظات استجمعت شجعتي وقولت
_ عامله اية
قالت بارتباك
_ الحمدلله
_ دائما
رجعنا لسكوتنا تاني لدقايق ف قولت
_ طيب إيه
_ إيه
_ مش عاوزه تسألي عن حاجه او تعرفي هنعمل ايه بعدين
_ اللي تشوفه
_ مش اللي اشوفه انا عايز اسمع منك محتاجه ايه وحابه نعيش ازاي
اتنهدت وقالت بعد ما استجمعت شجاعتها
_ دي حاجات هنتكلم فيها بعدين بس انا عندي سؤال كنت حابة اسألهولك من اول ما قالوا انك عاوز تتقدم
_ اتفضلي
_ سمعت انك متقدمش لوحده قبلي صح الكلام
_ صح
_ ممكن اعرف ليه
_ مكنتش لاقي البنت المناسبة
_ انت عندك كام سنة
_ ههههه 32
_ بتضحك يبقي فهمت قصدي
_ اه انتي عايزة تقولي 32 سنه ملقتش فيهم واحده مناسبة
_ ايوة
_ الحقيقة انا مدورتش وكنت مستني ان المناسبة دي تظهر لوحدها من غير بحث ، وعلشان اكون صريح معاكي واريحك من اسئله كتير في دماغك انا مكنتش مستعد لجواز ولا بفضل اني اتجوز صلونات بس كان في سبب لازم اتجوز عشانه
_ ممكن اعرف هو إيه
_ اه كنت هقولك من غير ما تسألي... السبب ان ابويا رافض ان حد من اخواتي يتجوز قبلي ف قررت اتجوز واشيل مشكله واقفة في طريقهم وبناء علي ترشيحك لية من عمي بدر جيت
_ اه... بردو مفهمتش ليه.. انت جاي علشان ترشيح عمك.. طيب وانت رايك ايه
_ رأيي اني مش محتاج اكتر من بنت ناس محترمين ومؤدبة
_ وبنسبه ل دي
قالتها وهي بتشير علي جرحها
_ مش شايف انها مشكله ارفضك عشانها، وعلي فكره هي مش وحشه بالعكس بتميزك
_ طيب علشان اكون انا كمان صريحه معاك ، انا اترفضت كتير جداً علشان الجرح ده ، ومش مكملة تعليمي ومش بشتغل ومعنديش اي مميزات تجوزني عشانها
_ بنسبالنا احنا الصعايدة ف احترام البنت وادبها مؤهل كفاية قوي علشان نتجوزها
_ اممم يعني انت مقتنع بيه من غير اي ضغط ولا اي نية ورا موافقتك دي
_ هههههه لا ولا ضغط ولا اي نية
_ اها
_ اي اسئله تانيه
_ اه... كنت عاوزه اعرف لو في حاجة ضروري اكون عارفها من دلوقتي
_ حاجة زي إيه
_ علاقة مع اي بنت.. مشكله حصلت ممكن تأثر علينا بعدين وكدة يعني
شردة للحظات وقولت
_ مفيش اي حاجة لا مشاكل ولا ارتباط من اي نوع
_ اه تمام.. كدة انا قولت كل اللي محتاجه اعرفه تقدر تسأل انت لو عندك اي اسئله
_ سألت محتاجه إيه
_ مش محتاجه حاجه
_ طيب وبنسبة لسكن ، في شقة فوق بيتنا المفروض انها ليه يناسبك ولا نسكن بره
رجعت لكسوفها وهي بتقول
_ ينسبني
_ تمام ولو شايف انك مش هترتاحي قولي انا معنديش مشكله في السكن بعيد
_ لا تمام
في اللحظة دي كنت بتناسا هاجر علي قد ما اقدر واقنع نفسي ان هاجر مش هتنفعني ولو فضلت متأمل انها تحس بيه هضيع عمري كله وبعد ما خلصت كلام معا اسراء وطلبت منهم معاد علشان نيجي ونتفق علي معاد الخطوبه مشيت و وقتها بس حسيت اني غلطت مكنش لازم اكلمها بالشكل ده واحساسها ان الحياة وردي لأن انا نفسي مش واثق اني هفضل ثابت علي رأيي
#وفاء
رجع بدر وبيجاد من المستشفي في وقت انا كنت جاهزة عشان اروح ف لقيت بدر بيقولي عاوزك دقيقة روحت وراه وهناك قالي
_ دلوقتي تقدري تقولي بيجاد عنده إيه
مكنتش هقدر اداري قدام بدر اولاً لأني مش هعرف ثانياً لأن مفيش منه قلق ف قولت
_ عنده مرض في القلب
_ القلب مرة واحدة!!!
_ عندة انسداد في الشرايين وللأسف بيجاد اهمل نفسه لغيت ما الموضوع تطور وبنسبة لعمره ف نسبة نجاح عملية قليل جداً وممكن ميستحملهاش ويموت
_ لا حول ولاقوة الابالله... طيب ليه ساب نفسه مضحي في حياته ولا ايه
_ مش عارفه.. بس مش عاوزه حد يعرف هو أمني علي السر ده لانه خايف فاطمة تعرف
_ من غير ما تقولي انا مكنتش هقول ، طيب والحل ايه
_ للأسف هو ماشي بالادوية ودي مش هتكون حل للمشكلة هي بتمنع تطورها نسبياً بس مبتنههاش وزي ما قولتلك العمليه نسبة نجاحها ضعيف وهو رافض
اتنهد بعمق وقال
_ فهمتك...
كمل وهو بيضمني لحضنه
_ ربنا موجود هو الطبيب والدوا
ريحت راسي علي صدره وسكت للحظات افكر في طلب بيجاد ف قال وهو بيبعدني عنه
_ بتفكري في ايه
قولت بإبتسامة ظاهرية
_ مفيش حاجه سلامتك
_ في ايه قولي
_
_ حصل ايه
قولت بتنهيدة
_ مش عارفه اجبهالك ازاي
_ احكي علي طول
_ بيجاد طلـ... ... خلاص خلاص مفيش حاجه
_ قوولي ، ماله
_ هو قالها من خوفه علي بنته ، قال يعني ان...
_ ميخليش بته تيجي عندنا
_ لا لا بالعكس ده طلب مني اجوزها لبيجاد لو مات علشان مش هيطمن عليها غير معانا
_ هو قالك كده
_ اه
_ مش هيطمن عليها غير معانا وهو حاسبني عدو ليه
_ أبداً يا حبيبي هو زعلان ومنسيش اللي حصل بس هو بيعزك
_ جايز
_ والله بيعزك
_ ميهمنيش يا وفاء كرهه او محبته مش هينقصوني ولا يغنوني.. وانا موافق انه بيجاد يتجوز بته وهو وعايش كمان ده كفاية ادبها
_ اه بس ...
_ بس ايه
كنت هقوله انها مش بنته بس تراجعت لما لقيت ان دي حاجه مش فارقة قوي في النهاية هو اللي مربيها ومكتوبة علي اسمه ف رديت وقولت
_ بقول ان بيجاد مبيحبهاش
_ مش يمكن لما يشوفها تعجبه ، انا هكلمه
_ مش هيوافق
_ هشوفه سيبيلي انا الموضوع ده وروحي اطمني علي اخوكي
_ ماشي يا حبيبي
سيبته وروحت علي المستشفي لقيت بيجاد نايم وفاطمة قاعدة جمبه وبتقراء قرأن من تطبيق داخل التليفون ولما حست بيه صدقت بالله وقالت بعد ما رفعت النقاب
_ اتفضلي
قولت بإبتسامة
_ عامله اية حبيبتي
_ الحمدلله وحضرتك
_ الحمدلله... نايم من امتي
_ من نص ساعة
_ اه تمام
_عمتو ممكن اسالك سؤال وتجوبيني بصراحه
_ طبعاً حبيبتي اسألي
_ بابا عنده ايه
_ ما قولنا ضغط بيوطي
_ بس ده مش تعب ضغط ،ده بياخد نفسه بصعوبة
_ مستهونه انتي بضغط الدم حبيبتي ضغط الدم احيانا بيوقف القلب وانتي شوفتي بنفسك لحقناه ازاي
_ طيب وده ممكن يحصله تاني
_ لا احنا علجناه وهنديلوا دوا يمشي عليه ومش هيتعب تاني
قالت براحة
_ الحمدلله
_ خايفة عليه
_ طبعاً ده انا مليش في الدنيا غيره
_ ربنا يخليهولك حبيبتي متخافيش هو بقي كويس
#بيجاد
دخلت اوضتي استحميت وخرجت اخد هدومي من الدولاب ف لقيت الطرحة قدامي مسكتها بين إيدية ابصلها وانا شايف صحبتها قدام عيني بجمالها ورقتها اللي مشوفتش زيهم في حياتي وبعد ما قربت الطرحة لوشي اتحسس نعومتها واشم ريحتها الباب خبط وفوراً رميتها في الدولاب وقولت وانا بسحب هدومي
_ مين
_ انا
_ لحظه واحده يا بابا بغير
خلصت قوام وفتحتله
_ اتفضل يا بابا
_ بتعمل ايه
_ كنت بستحمي في حاجه
_ لا بس كنت عايز اتكلم معاك
_ اتفضل
كان هيتكلم ولكن قاطع كلامنا خبط بدر علي الباب وبعد ما سلم قعد في الصالون وانا دخلت علقت علي الشاي وروحت ل جويرية اوضتها لقيتها ماسكة القصة ودموعها علي خدها ف توقعت انها بتعيط لموت اغسطس ف قولت وانا بتقدم
_ متعمليش في نفسك كده كلنا لها
قفلت الكتاب ومسحت دموعها بارتباك ف قولت وانا بقعد قدامها
_ دي البطلة مزعلتش عليه قدك
_
_ إيه؟ مش هتقومي
_ ليه
_ بدر بره
_ اه
_ مش هتقومي تسلمي
_ لأ
_ احسن خليكي هقولهم نايمة
مضغطتش عليها لأني انا اصلا محببهاش تقابله وروحت المطبخ صبيت الشاي وقدمته ولما قعدت رجعوا يتكلموا واكتشفت انهم بيتكلموا في ان بشر هيكلم نسايبه في موضوع الخطوبه وعاوز يعمل خطوبته هو وجويرية معاهم
كان مبسوط قوي وهو بيتكلم في الموضوع ومش مقدر انه بيتكلم مع ابوها واخوها وبعد ما بابا وافق وهو مشي قولت بقرف
_ مفيش اي احترام... شوف بيتكلم ازاي ومش مقدر انه بيكلم ابوها واخوها
مط بوقة باشمئزاز وقال
_ امال المفروض يكلم مين غير ابوها واخوها في موضوع زي دة
_ يكلمنا احنا بس مفيش داعي يظهر اهتمامه وسعادته
_ لا وهو انت لو حسيته مش مهتم وسعيد انه هيتجوز اختك كنت وافقت تجوزهاله
_ مستحييييل ، هو انا اختي قليلة علشان ميكونش سعيد ومهتم
_ طيب انت عاوز ايه يعني في الاخر يهتم ويكون سعيد ولا العكس
18
#هاجر
كنت قاعده علي السفرة بفطر انا وبابا وماما وطول الوقت كنت شاردة ومش معاهم لغيت ما ماما لمست كتفي وقالت
_ هااااجر!!
_ هه... نعم يا ماما
قال بابا
_ مش معانا لية
_ معاكم اهو بس مصدعة شوية
_ رجعتي تحلمي بكوابيس تاني
_ يعني
_ طيب واية السبب مكنتيش كده
_ عادي بتحصل كتير
_انا اول مرة اشوف انك بتصحي من كابوس ، لو اتكرر قوليلي عشان نشوفلك حل أحسن ما يحصلك زي اللي حصل ل جويرية
_ حاضر يا بابا
خلصنا فطار وشلنا الاكل كنت واقفة عند الحوض بغسل المواعين ف لقيت ماما بتمسك مني الطبق وتقولي
_ سيبيه انا هغسلة.. مالك فيكي ايه
_ مفيش حاجه
_ لا فيه انتي شكلك مش طبيعية النهاردة في حاجة حصلت
_ مفيش
_ هاجر!!
_ والله ما في يا ماما ، مخنوقه بس شويه من قعدت البيت
_ طيب ما تخرجي شوفي اي واحدة من صحابك وروحوا اي مكان
_ بعدين ، هدخل ارتب اوضتي سيباها مكركبة.
روحت اوضتي وبقيت بصالها شوية وانا حاسة ان مفيش حيل اني اعمل حاجه ف سيبتها ومسكت التليفون قلبت فيه شويه بملل وفي النهاية قررت اكلم بشر هو الوحيد اللي هيقدر يخرجني من الحالة دي وبعتله ولكن مجنيش ردة غير بعد ساعتين تقريبا بعد ما بابا وماما راحوا شغلهم وقالي
_ صباح النور ، عامل اية
_ مشششش كويسة
_ ليه مشششش كويسة حد ضربك
_ لا ومش عارفة لية مش كويسة
_ طيب عاوزه ايه يخرجك من الحالة دي
_ انت
_ امممم.. هاجر انا قايلك قولي الجملة علي بعضها بلاش تفرقيها
_ انت والله مفيش غيرك هيخرجني من الحالة دي
_ وده ازاي
_ مش عارفه انا قولت اكلمك ونشوف
_ عاوزه تخرجي
_ ياريت حتي نتمشي شويه علي البحر
_ ماشي جاهزة دلوقتي
_ جاهزة
_ طيب هستناكي عند المكان اللي بنقعد فيه
_ ماشي
قفلت معاه وروحت لقيته قاعد في نفس المكان اللي بنقعد فية وجنبه كيس ابيض مش باين في اية ف قولت بعد ما وصلتله
_ إيه اللي في الكيس ده
_ طيب سلمي وبعدين اسألي
_ ازيك عامل اية ، إيه اللي في الكيس بقا
_ خدي
اداني الكيس ولما فتحته لقيت شيبسي ولب وشيكولاته وبسكوت ف قولت وانا بمسك كيس الشيبسي
_ إية ده
_ شيبسي
_ وانا من امتي باكل الشيبس ب اي طعم تاني غير الشطة والمون
ضيقلي عينيه ف قولت بتحذير مصطنع
_ من فضلك متغيرليش الثوابت ، بعد كدة متجبش اي طعم غير الشطة والمون هفضل احفظهالك لامتي
_ انتي مش واخده بالك انك شحاته وبجحه
_ واية يعني مش خلاص اتحسبت عليه يبقي اكل اللي علي مزاجي
قال بإبتسامة
_ انا مش عارف حاملك ليه
بهتت ابستامتي وانا بقول
_ علشان بتحبني
قولتها وبصتله بترقب كنت عايزة اعرف هيقول ايه ف قالي
_ مش انا اللي مربيكي.. بس بردو خفي شوية.. واحكيلي مالك
_ قيلالك قبل كده اني مش عارفه
كملت بعبس
_ هو من الطبيعي ان يكون في انسان مش عارف نفسه هو حاسس بأية وعاوز إية
_ مفيش حد مش عارف نفسه هو عاوز ايه ، دائما الاحاسيس والجوارح كلها بتجري علي الحاجة اللي احنا عاوزينها.. كل الجوارح بتطلق صافرتها عند قدومه زي الموكب الملكي كده
_ ايه الكلام المقعلص ده
_ فين القعلصة اللي فيه ، هسهلهالك.. دلوقتي انتي بتحبي شيبسي الشطة والمون ولو جيتي السوبر ماركت مش هتروحي لأي نوع تاني غيره ف كده انتي عارفة بتحبي ايه وعاوزة اي نوع مش تكوني مثلا بتحبي شيبسي الطماطم ومش حاسه
_ هههههههه تصدق دي وصلتني اسرع
_ مانتي طفسة
_ هههههههه مقدرش انكر بس بردو مفهمتنيش
_ طيب ما تحكي حاجة كده وانا احاول افهم
شحت بعيني بعيد عنه وفكرت شوية في اللي ممكن اقوله من غير توضيح وبعدها قولت
_ انا عندي مشكلة في تحديد اللي انا عاوزاة ومش عارفه اغير ثوابت في حياتي ، في حاجه انا مش فهماها كدة
رفع عينه يفكر شوية وبعدين قال
_ عرفتها ، العجل في بطن امه
_ بتتريق
_ طيب انا راضي ضميرك انتي فاهمة نفسك
_ لا
_ طيب امال إية
_ مش عارفه
_ هههههههه
_ هههههههه ، بشر انا بجد في صراع داخلي جوه نفسي مش عارف انهيه
_ بخصوص إيه
_ بخصوص حاجة موجوده في اوضتي حاجات كبيرة جدا المفروض انقلها من المكان ده للمكان ده بس مش عارفه .. اولاً هي تقيله ثانياً مش عارفة هتقبل ازاي واتعامل معاها ازاي بعد ما اتنقلت من المكان ده للمكان ده فاهمني
قال بإبتسامة
_ والله انا بحاول مستنتجش حاجة من اي كلام بتقوليه ومصفي زهني علي الاخر
_ نعم امال انا بحكيلك ليه
_ مش عارف ، طيب ما تجربي تتكلمي مع حد تاني وتقوليلي وصلتي لأية
_ مفيش حد غيرك برتاح للكلام معاه
_ اممم ما علينا
_ بشر في ايه
_ ما انا قايلك مش عاوز استنتج اي حاجة من كلامك
_ ليه بقا
بهتت ابتسامته وهو بيقول
_ انا هقولك عشان عارف انك مش هتفهمي ولو فهمتي خير بردو يبقي عدينا ليفل الغباء
_ غباء
_ شوفتي مغلطتش في حاجة ، يعني سايبه كل الكلام ومسكتي في اخر كلمة
_ طيب قول اما نشوف
اتنهد وقال
_ انا بشر في عيب صغير... لا لا مش انا لوحدي ده اي حد متخلف زيي.. لما بنلاقي اي كلمة او اي تصرف يحسسنا اننا خلاص وصلنا للحاجة اللي احنا عاوزينها بنتشعبط فيه ونرسم عليه احلامنا ونقعد نتخيل إيه اللي هيحصل بعد كده لغيت ما هوبا نوقع علي جدور رقبتنا
_ مش فاهمه
_ هههههههه اه ما انا عارف
سكت شوية افكر في كلامه وبعدين قولت
_ لحظة بس... انت قصدك ان كلامي او تصرفاتي بتديك امل لحاجة
_ ساعات
_ امل في ايه طيب
_
_ ما تقول
_ اقول ايه
_ ليه كلامي بيديك امل
_ لا مش كلامك كله في كلمة بتتقال وسط الكلام لكن بتلحقيها بكلمة مضادة ليها دايما ف بتاخدي الامل اللي ادتهوني فوراً
_ ههههههههههههه انا بعمل كده .. امتي طيب
_ في كل مره بشوفك او بنتكلم .. تخيلي كل مره تديني امل وتاخديه
_ طيب ما توضحلي اكتر
_ اوضح إيه بقا لو اي بني آدم طبيعي كان فهم
قولت بإبتسامة
_ واضح اني غبية قوي
_ لا والله انتي ذكية جداً بس ساعات بتكوني غبيه جداً جداً جداً ، بحسك قصداها
_ قصدك علي طولت لساني يعني
_ ودي حاجه منهم
_ طيب وايه تاني
_ مبتفهميش الكلام المباشر او عقلك مش بيستوعبه
_ اللي هو ايه الكلام ده رجعني شوية لورا
_ لا ما خلاص راح اوانه.. اه صحيح انا مقولتلكش مش انا روحت بيت عمي السبع امبارح وقعدت انا واسراء واتكلمنا
_ وبعدين
_ سألتني عن شوية حاجات وجاوبتها وبعدين مشيت
_ وسألتك عن إيه بقا
_ عن سبب طلب جوازي منها وعن سبب عدم جوازي لدلوقتي واذا في غيرها ولا لا
_ وانت جاوبت بأيه
_ قولتلها اني مش هلاقي زيها محترمه واهلها طيبين
_طيب ورديت ب إيه عن سؤال عدم جوازك لدوقتي
_ قولتلها ملقتش بنت مناسبة
_ كدبت عليها
_ لا مكدبتش انا فعلاً ملقتش بنت مناسبة
_ اه بس انت مكنتش راضي تجوز علشان اخت صاحبك
_ ايوه وبردو لو لقيت واحده مناسبه تنسهاني كنت هتجوز
_ تبقي مش بتحبها ولا عمرك حبيتها
_ حبيتها بس كنت هضيع عمري علشان واحده مش حاسه بيه وفي كل جملة لازم تقولي اخويا
_ يمكن مش فاهمه نفسها كنت قولتلها انك بتحبها
_ يعني ايه مش فاهمه نفسها ، يعني لو قولتلها بحبك هتكتشف انها كانت تحبني
_ وليه لا مش يمكن مش قادره تتخيل انك تتنقل من منطقة الاخوة لمنطقة تانيه
_ زي الحاجه اللي في اوضتك كده
_ اه
_ اممم يعني انا لو قولتلها بحبك هتكتشف انها حباني
_ يمكن
_ نجرب ميجراش حاجة بس انا بقولك اهو انها غبية مش هتفهمها
_هي كمان غبية
_ اه
_ يمكن
_ عارفه يا هاجر
_ إيه
بص لعنيه وقال
_ انا بحبك
بهتت ملامحي بحزن لأني عارفة انه هيقولي زي اختي او هيلحقها بكلمه تانيه وبعد ما طال عدم ردي قال
_ وبحسك صديقة وفهماني رغم صغر سنك
_ وانا كمان
فجأة بقا يضحك من غير سبب ف قولت
_ في إيه
رد عليه وهو بيواصل ضحكه
_قومي اتأخرت علي الشغل
قالها وقام ومشي وهو لسة بيضحك ف روحت وراه وقولت
_ بتضحك علي ايه
_ افتكرت حاجه كده
_ طيب ما تقولها يمكن اضحك
_ مش هتفهميها
_ متحسسنيش اني غبية قوي كده
وقف قدامي وقال بإبتسامة خفيفة
_ والله غبية يا هاجر ، عمري ما شوفت اغبي منك ، مش عارف ده طبيعي ولا انتي قاصدة متفهميش
#بشر
معاها بكون عبيط مع اني عارفها غبية ومش هتفهم بس بردو مبطلتش تلميح وانا ناسي كلامي مع اسراء ومفكرتش لو هي فهمتني المرة دي هعمل إيه .. وبعد ما مشيت قولت الحمدلله انها مفهمتش وكملت طريقي لسوبر ماركت وهناك لقيت زيد وقفت جمبه وقولت
_ إيه جابك
_ زهقت من القعدة ف جيت.. كنت فين
_ كنت مع هاجر
_ سايب شغلك علشان هاجر
_ روحت اديلها حاجة ورجعت
_ مهمه قوي عندك هاجر
قولت وانا بتهرب من نظراته
_ عادي ، مفيش حاجه من اللي في دماغك
_ ياريت يكون كده فعلاً ، هاجر متناسبكش يا بشر
قولت بتذمر بعد رجعت ابصله
_ علشان صغيرة يعني
_ علشان متنفعش تكون زوجة ولا تراعي بيت
_ يعني ايه... مالها هاجر
_ مستهتره وتافهه مش هي دي اللي تنفع تكون زوجة ، انساها يا بشر خطيبتك بنت حلال وهي اللي هتناسبك وهتصونك
_ هتصوني! .. تقصد اية؟
_ معرفش المهم ان هاجر متنفعكش وخلاص
مردتش عليه وبعدت عنه وانا بفكر في كلامه اللي مأقنعنيش ، هاجر متدلعه شوية بس لسة صغيرة واستهتارها عمره ما كان سبب في تشوية صورتها في عيون الناس ، لبسها محتشم ومتعرفش اي شباب غيرنا وكلنا بتعتبرنا اخواتها بحكم تربيتنا مع بعض حتي بدر اللي كانت بتحبه عمري ما شوفتها تجاوزت معاه واكبر دليل انها تصلح زوجة واكون واثق انها ماشية مستقيمه انها غبية مبتفهمش الكلام الواضح لو ليها تجارب كانت فهمت وريحتني ياريتها جربت
#خلود
في وقت كنت بجاهد نفسي اني مسجلش دخول علي حساب اسيل جت هاجر تقولي
_ ايه يابنتي مبترديش علي الواد ليه المسنجر مبطلش تن تن من امبارح وصدع اللي جابوني
_ مش عاوزة
_ ليه ، علشان قالك هكرهك ومش هسامحك لو كنتي بتخدعيني
_ يعني قريتي الشات
_ مانتي عارفة اني ساعات بحب اتجسس عليكي ، بس مش بكتبله
_ اه ما انا عارفه
_ طيب مبترديش ليه
_ انتي قولتيها
_ خايفة تتقفشي ويزعل منك
_ اه
_ طيب ما تتقفشي ، بت عيشي حياتك وحبيه براحتك ولما تتقفشي يحلها الحلال ، ويمكن لو عرفك ميزعلش كتير وتجوزوا
_ مظنش
_ انا بقا اظن وشايفة انه بيحبك بجد ، انا وانتي عارفين زيد مش بتاع لعب ومسخرة ومفتكرش انه بيتسلي
_ مش عارفة بس انا خايفة قوي من زعله ولو تعمقت معاه وحبيت فيه بضمير وبعدين عرفني مش هقدر ابص في وشه تاني
_ طيب اقولك حاجه
_ قولي
_ قوليله كل حاجه بس متقوللهوش انتي مين ، قوليله كنتي داخلة تكلميه علشان تعرفيه انه فاشل لانك كنتي بتكرهيه ، وقوليله كمان انك بعدين عرفتيه كويس وحبتيه وانك هتبعدي ولو ممكن يسامحك في غلطك ده هتقوليله انتي مين
_ ما انا لو قولتله كل دة هيعرفني
_ ياستي قولي انك كنتي زميلة ليه وكان خانقك.. او انك كنتي مريضة عنده ، اي حاجة مش لازم تقولي انك خلود واكيد في بنات بتكرهه مش انتي بس اللي كنتي بتكرهيه
_ وتفتكري ممكن يسامحني
_ افتكر حتي لو زعل هياخد وقته ويصفي
_ طيب ولو صفي هيقبل انه يحب خدامة
_ انتي مش خدامة وبطلي الكلمة دي
_ بس دي الحقيقه
_ هزعلك قولتلك انتي مش خدامة
_ ماشي بس انا بردو خايفة
_ يابنتي انتي خلاص دخلتي في الموضوع واللي حصل حصل كملي للأخر كدة كدة سؤاء قولتيله او لا مش هترجعي زي الاول.. لو مقلتلهوش هتفضلي طول عمرك تعبانه وهتندمي انك ضيعتي الفرصة دي من ايدك بس لو قولتي احتمال كبير قوي انكم تجوزا
_ اسكوتي يا هاجر اسكوتي ارجوكي متزنيش عليه انا عارفة ان ده مش هيحصل.. انا غلطانة من الأول اني عملت كدة مكنش لازم اكلمه
_ وكلمتيه وحبتيه والفاس وقعت في الراس ، وبعدين! هتفضلي كدة لا محصلة سما ولا أرض
كملت وهي بتمسك ايدي
_ شوفي يا خلود انا مجنونة وبعمل اي حاجة في دماغي ومش بفكر في عواقب ، ليييييه؟! علشان مندمش اني مجربتش الحاجة اللي نفسي فيها وانتي اعملي كدة اتجنني ومتفكريش في حاجة ولو عرفك وقل ادبه قوليله بلغ عني لو عاوز انا عملت اللي انا عاوزاة وده المهم
_ يابنتي انا غيرك انا خوافة قوي حتت الجنان دي متناسبنيش علشان عارفة نفسي هرجع اعيط
_ ما ده حلو علشان تتعودي علي الصدمات وتنشفي
_ يا خوفي يا مصلحي
_ متخافش يا مجاهد... انطلقي وانا هتفرج عاوزه اعرف هتقولي إيه
سكت شوية افكر في كلامها ولقيت اني خلاص دخلت في الموضوع والخساير هتكون واحدة سواء قولتله بحبك واتجننت زي ما بتقول او وقفت لحد هنا ف قولتلها
_طيب بس متدخليش الشات وتجسسي
قالت وهي بتغمز
_ ليه.. هو انتي ناوية تجنني لغيت فين بالظبط
_ لا مش اللي في بالك ، جنان علي وش المية بس
_ ياخوفي اللي علي وش المية دة يوقع في قعر القاع ونفرح بحفيد ... لا خلي بالك جنان خفيف اصل مينفعش تجنني قوي تخيلي يعرفك ويرجع يفتكر الجنان ف يحب يطبق علي ارض الواقع واحنا بنات عائلات محترمات
_ هههههههه اتلمي
_ اوك هتلم بس علشان متندمجيش قووووي مش هحذف الحساب من عندي ، ف استشعري وجودي و وجود ربنا قبلي... ياشيخة حرام عليكي هتودونا جهنم بصاروخ ، والله البنات ما ليها تليفونات
قولت بقرف
_ ونسبة للمقال عن فوائد الجنان اللي بتلقية الي مسامعي من الصبح كان إيه
قالت بغرور مصطنع
_ كمثل الشيطان إذ قال للإنسان اكفر فلما كفر قال إني برئ منك إني أخاف الله رب العالمين
_ هههههههه اعوذ بالله منك
بعد ما مشيت دخلت علي حساب اسيل ولقيت ان هاجر فاتحه كل رسايلة ف دخلت علي الشات وقريت اخر الرسايل اللي بعتها وهي
_ مبترديش ليه.. فينك وكلام من ده ف كتبت بعد ما استجمعت شجاعتي
_ انا اسفة
جاني ردة بعد دقايق بيقولي
_ كل ده علشان تقولي اسفة ، فينك ببعتلك تعملي سين ومبترديش
_ كان عندنا ضيوف مكنتش الحق ارد
_ مكنتيش تلحقي تردي ولا مش عاوزة تردي
_ هههههه كنت عارفه اني هتكشف ، الصراحة اه... كنت مترددة
_ ليه
_ علشان كلامك اللي قولته
_ اني بحبك
_ اه
_ ليه يعني وانتي مكنتيش عارفة اني بحبك
_ انا مش عارفه اخرت اللي بيحصل ده ايه.. خوفت اقبل كلامك انت متقبلنيش لما تشوفني
_ ما انا قولتلك يا اسيل السبب الوحيد اللي هيخليني مقبلكش
_ ماشي وانت مش هتشتري سمك في ميه انت مشوفتنيش ولا تعرف البيئة اللي انا عايشة فيها
_ طيب دي ساهله عرفيني علي البيئة دي.. اديني عنوانك وانا اجي اتقدم رسمي
_ مش جاهزة لكدة دلوقتي
_ وهتجهزي امتي
_ اقولك حاجة ومتفهمنيش غلط
_ قولي
_ انا خايفة انك لما تشوفني وتيجي البيئة دي تمشي واي كلام بينا ينتهي... انا حالياً بعيش قصة خيالية جميلة وحابه استمر فيها شوية ف خلينا كدة فترة وبعدين اديك عنواني علشان اتصدم بالواقع المرير
_ متتحججيش ، قولي انك خايفة توافقي ف اموت زي اللي قبلي مش كدة
كان ردة ده طوق نجاة ليه من نقاش طويل جاي قدام ف قولت
_ يعني
_ طيب انا مضحي بنفسي بس اشوفك
_ طيب لو كدة ف خلينا شوية قبل ما ندخل في الغم والموت والواقع
_ شوية قد ايه
_ لما احس اني اكتفيت من الخيال اللي عايشة فيه
_ اممم اوكي معاكي لغييييت ما تشبعي خيال
_ متشكرة
_ علي ايه.. انا كمان حبيت الفكرة
قولت بعد ما استجمعت شجاعتي
_ وانا حبيتك انت
_ هههههههه لا لا عيديها تاني
_ بحبك
_ بحبك يا أيه
_ هههههههه بحبك يا زيد
_ ايوووة لا كده ندخل في التفاصيل ، حبتيني ليه
_ حبيتك
_ ليه يعني
رديت بإبتسامة
_ علشان انت تتحب
_ يا عييييني... لا لا احكيلي من الاول خالص
_ هههههههه... بتتريق عليه
_ أبداً بس حابب اعرف حبتيني ليه ولا الكلمة دي رد علي كلامي
_ دي عشان انا بحبك فعلاً..
_ يعني من قلبك ولا دي حلاوة البدايات
_ من كل قلبي..
_ الطريقة دي مش هتنفع انا حاسس اني محتاج تعبير وشرح اكتر ، حبتيني ليه
_ هههههههه واضح انك متحبتش قبل كدة
_ اتحبيت مره واحده
_ طيب وحصل إيه
_ ولا حاجه انا حسيت بشعورها ناحيتي وكنت بحاول اوصلها انها اختي وبس "
حسيته يقصدني ف قولت بتوتر
_ وهي تكونلك إيه
_ بنت عمي ، بنت هبلة هي مش عارفه عايزة ايه ، لدرجة انها حبتني انا واخويا الصغير
_ بنت عمك
_ اه.. انتي تعرفيها
_ لا... ممكن تحكيلي اللي حصل وايه خلاك تقول كده وانت بتقول مقلتلكش
_ كانت بتهتم تطلع حلوة قدامي ، بتيجي كتير عندنا ، بتقابلني علي السلم وتحاول تفتح كلام معايا ، وتستدرجني علشان تشوف في حد في حياتي او لا... كتير كانت بتحكيلي قصة عن صحبتها اللي بتحب ابن عمها وكدة
نزلت دموعي وانا بقرا رسايلة ومش متخيلة ان هاجر تكون فعلاً بتعمل كدة ومتقوليش وهي عارفه اني بحبه
وبعد ما طال سكوتي قالي
_ روحتي فين
_ هنا... طيب وانت إيه شعورك ناحيتها
_ ولا الهوي ، ومتخافيش انا عمري ما هحبها اولاً لانها اختي ثانيا لأن هي تافهه ومستهترة وثالثاً اخويا الكبير بيحبها
_ اخوك بيحبها
_ من سنين بيحبها وهي غبيه مش فهماه وبتجرحه باهتمامها بينا اللي باين زي عين الشمس
_ اه... طيب بيندهوا عليه هكلمك تاني
قفلت معاه وانا محتارة بين كلامه وبين اللي بشوفه من هاجر ، في حاجه غلط لأما هو فاهم غلط لأما هي بتخبي عني ، ومش بعيد تكون حست اني بحبه ف سكتت وخبت شعورها
#ريان
كنت واقف بحاسب الناس لما جاني بدر يقولي
_ البت اتصلت وبتقول خدت معاد مع مدير الدار ومستنينا النهاردة الساعة تلاته
_ طيب والشغل
_ سيبك من الشغل انا هتصرف واخلي حد يوقف بدالك
_ ياعم ابوك وعمامك يزعلوا
_ مللللكش دعوه وبردو هتروح متتهربش انا عارفك فقري
_ ماشي انت حر هو شغلي ولا شغلك
_ اديك قولت شغلي ، هجيلك علي الساعة اتنين عشان نروح
سابني ورجع الساعة اتنين وروحنا قابلنا البنت وروحنا علي الدار علي طول وقعدت مع المدير وسألني عن القصة واذا متعاقد مع دور نشر تانيه او لا وهل دي اول قصة ليه ولا لا وبعد ما جاوبت علي كل حاجة اتفقنا اني همضي علي عقد بأن نشر القصة واي قصص تانيه هتكون حصري عندهم هما وبس.. طبعاً يبان أنه عقد احتكار وطمعانين في افكاري لنفسهم بس انا محستش الاحساس ده لأني كنت متاكد ان في حاجة هتحصل ومش هكمل ف واقفت وقولت ميجراش حاجة لو فشلت فشل جديد ، ف قالنا نلف شوية ونرجع بعد ساعتين يكون جهز العقد ، باين عليه كان متحمس جداً للقصة وفاكر انها هتتباع وهو ميعرفش ان كاتبها نحس ومش بعيد تخسره وخرجنا احنا التلاته قعدنا علي كافيتريا قريبة بدر ومليكة مبطلوش كلام وانا كنت برد علي قد الكلمة وده تقريباً ادا انطباع عني لمليكة اني مغرور او سودوي من جوايا وقدرت افهم كدة من نظراتها ليه ومن كلامها لما قالت
_ هو انت متضايق اني اتدخلت وحبيت اساعدك.. شكلك مبتحبش حد يتدخل في حياتك
_ عادي
قال بدر
_ لا طبعا ده واد اهبل وبيحب اي حد يتدخل بس متشائم وبوزه يجيب الفقر
_ اسفة بس حساه شوية متكبر
معلقتش علي كلامها مش تكبر مني بس انا مش من عادتي اقعد مع بنات اصلا ولا اتكلم معاهم مش الا اناقشهم و اوضحلهم شخصيتي عاملة ازاي وده تقريبا كرها فيه اكتر ف توقعت ان النحس هيدخلي من الحتة دي وانها هتوقف كل حاجة بس موقفتش حاجة وروحنا للمدير ومضيت علي العقد ومشينا وبعد ما سابتنا قال بدر
_ يابني افرد خلقتك كرهت البنت فيك
_ ما تكرهني وانا اعملها ايه، مانت عارف اني مليش كلام مع البنات
_ بس مش كدة البنت كانت معجبة بيك
_ ياعم متعجبش بيه هي ناقصة غم
#مليكة
اكتر حاجة ندمت عليها اني حكمت عليه من غير ما اعرفه بني ادم متكبر وشايف نفسه خلاني ارجع البيت وانا متعكننة بسببه ومفيش حاجة هدتني شوية غير خالتي مريم وانكل احمد وايسل لما لقيتهم عندنا
_ إيه المفاجأة الحلوة دي
قالت ايسل
_ جينا نشرفكم ، روحي اعملي عصير
_ بس يابت
قولت وانا بقعد جمب خالتي
_ وحشااااني
قالت بإبتسامة
_ وانتي كمان ، كنتتتي فين
_ ايه نبرة الشك دي لا لا كده محبكش.. زك اعمو... ايه مين عملك سايلنت
قال بإبتسامة خفيفة
_ خالتك وبنتها
ضحكوا ف قولت
_ خالتو طيبة اكيد السرينة دي هي اللي مزعلاك
_ انا سرينة.. طيب والله ما انا متغديه معاكم
_ هههههههه هي البت دي ليها خال اهبل يا مريومه طيب متتغديش ده حتي توفري
#احمد
عشرين سنة من وقت اللي حصل لا انا ولا مريم قادرين ننسي اللي حصل ، ولا انا قادر احذف صورة ايسل وهي مدبوحه وبحفظها من مومري ل مومري ومن تليفون لتليفون علشان متضعش وكل دة علشان لما اشوف اللي عمل فيها كدة اخليها قدام عيني وانا بدوقه العذاب الوان وانا بموته ابشع موتة ، وبتعدي السنين ومفيش اي خبر عنه لا هو كلمني تاني يفهمني عمل كدة ليه ولا مها شافته تاني وكل اللي مخوفني انه يكون مات ف يموت سره معاه او انا اموت قبل ما اعرفه وانتقم منه
_ رحت فين
قالتلي مها بعد ما البنات دخلوا وسبونا ف قولت
_ معاكم
_بتفكر في ايه
قالت مريم بنبرة كلها حزن
_ هو كدة في كل سنة قريب عيد ميلاد ايسل
_ اه صحيح ده عيد ميلادها قرب ، تعيش وتفتكر يا احمد ربنا يصبرك وينتقم من اللي حرق قلبنا عليها
قالت مريم والدموع في عينيها
_ ربنا يوجع قلبه علي اعز ما ليه زي ما وجع قلوبنا علي بنتنا ، انا نفسي بس اشوفه بيتعذب وقلبه محروق زينا هو ده بس اللي انا عاوزاه
قالت مها
_ ربنا يحرق قلبه
قولت
_ لسة فاكرة شكله
_ طبعاً ده اتحفر في عقلي مش ممكن انساه لغيت ما اموت
_ شكله إيه اوصفهولي
_ وصفتهولك كتير يا احمد
_ اوصفي تاني
كان شاب يجي 35 بالكتير بشرته فاتحة شوية دقنه خفيفة وسودة قوي كان لابس جاكت جلد اسود وبنطلون جنز... شكله محترم مش مجرم ولا قتال قتله يعني واللي هيجنني هو عمل كده ليه انت بتقول مأذتش حد عشان يعمل فيها كده
_ حتي لو اذيت.. مهما كان اللي عملته ميكونش ده عقابه ، كان جه قتلني انا
خبيت حاجات كتيره عنهم وطبعا مثلت دور المستقيم اللي عمره ما بيغلط ولكن مهما كان الغلط اللي عملته ميستحقش ان بنتي اللي مكملتش سنه تدبح...
اوقات كتير كان بيجي في بالي ان اللي عمل كده حد من اهل حامد بس ارجع واقول هما ميعرفوش اني انا اللي شاركت في قتله ف مين ممكن يعمل كده مش عارف...
#بيجاد
روحت المستشفي لقيت فاطمة قاعدة عند ابوها وهو نايم ف قولت
_ عامل ايه دلوقتي
_ كويس
_ وانتي مروحتيش لسة
_ لا
_ليه
_ مش هسيبه
_ روحي ارتاحي شويه وتعالي
_ مش هسيبه
_ انتي حره
سكتت شويه وبعدين قالت بنبرة فيها اشمئزاز
_ انت بتقولي روحي علي اساس ساكنه هنا انا لو خرجت هتوه
_ طيب ما تقولي وصلني بدل الرغي الفاضي
_ المفروض انت تفهم لوحدك... اتفضل وصلني
_ كلميني بطريقة أحسن من كده
_ ماشي اتفضل بقا وصلني وارجع بعد ساعة خدني
_ هتهببي ايه في الساعه ما تتخمدي في البيت وتيجي الصبح
_ هخاف لوحدي في شقة غريبة
_ تخاافي
_ اه هخاف
_ طيب ، قدامي
خدتها بالعربية ومشينا وطول الطريق موجهة وشها الناحية التانية وشكلها سرحانة ف قولت بعد ما خنقني منظر نقابها
_ انتي مبتحسيش بضيق تنفس بسبب البتاع اللي علي وشك دة دة انا نفسي اتكتم
وجهت وشها ليه وقالت
_ خانقني بس ساترني
_ يا سلام ، يعني لو وشك بان هنفتتن بيه مثلا إيه التخلف ده.. فين المُغري في شكل عين ومنخير وبوق
_ انا ملبستهوش غير علشان جمالي بيلفت الانتباه
ضحكت بسخرية وقولت
_ هههههههههاااااااي الله يحظك دمك شربات
_ بتسخر مني
_ لا بس مغرورة قوي
_ انا قولت بيلفت الانتباه مقولتش اني حلوة
_ الاتنين واحد وعلي العموم اطمني اسكندريه مليانة بنات حلوة كتير اكيد شكلك مش احلي منهم حتي لو امك امريكانية
سكتت شوية بس كنت حاسسها بتمنع ضحكتها وبعدين بصتلي وقالت
_ ممكن اعرف انت ليه مبتحبش المنتقبات
_ ده سبب منهم
_ هو ايه
_ كلامك معايا
_ مش فاهمه
_ يعني النقاب المفروض انه ستر عورة مع اني مش مقتنع ان الوش ولا حتي الشعر يعتبر عورة بس دة تفكيركم وبنسبالكم بردو الصوت كمان عورة ف انك تداري جسمك كله وتتكلمي معايا ف ده تناقد كبير منك
_ فعلاً ، وركوبي معاك العربية كمان تناقد... بس حط نفسك مكاني ، انا عيشت طول عمري متمنية يكونلي عيلة وفجاة لقيت حد قريب ليه هعمل ايه غير اني ادخل واسلم علية واتكلم في وجود بابا
_ ماشي اول مره تمام وتاني مره بقا لما بقيتي تطولي في لسانك ، كان ايه حجتك
_ حط نفسك مكاني واحد ضيف عندكم بيبجح هتسكت وتدخل اوضتك ولا تسأله ماله وممكن تمسك في خناقة
_ بنسبالي انا بطنش
_ يابختك
_ ماشي بس بردو مأقنعتنيش
_ ومين قالك اني بقنعك ، ومين قالك انك تهمني اصلا
_ اللي قالي تبريرك من غير ما اطلب
_ حد قالك انك رزل
_ كتتتتتير قوي
_ طيب الحمدلله
_ اه.. وعلي كده انتي خلصتي تعليمك هناك ولا جايه تتعلمي هنا
_
_ إيه
_
_ صوت المرأة عورة؟
_ لا انا مبردش علشان مجادلة السفهاء سفاهه
_ انا سفية
_ افتكر كده
_ طيب انا بقول نسكت احسن ، اكرملنا احنا الاتنين
سكتنا احنا الاتنين لغيت ما وصلنا وفتحت الباب ف قولت قبل ما تقفل
_ عارفه رقم حد فينا
_ تليفون بابا جوه هتصل بيكم منه
_ طيب باي
مشيت وسيبتها ورجعت المستشفي لقيت ماما بتلف هناك زي المجنونة ولما شافتني جت تجري عليه وتقولي
_ شوفت فاطمة
_ ايوه انا وصلتها البيت في أيه
_ ياخي حرام عليك وقعت قلبي في رجليه وخالك هيتجنن عليها
_ يتجنن ايه البنت روحت ترتاح
_ كنتوا قولتوا... رايحه اطمن خالك
روحنا علي هناك لقيناه قلقان جداً واول ما شافنا قال وهو بيحاول يقوم
_ لقيتيها
_ ايوه طلعت روحت البيت بيجاد وصلها متقلقش
_ صح يا بيجاد
_ ايوه هي كويسة متقلقش شوية وهروح اجيبها
ريح دماغه علي المخده وغمض عينيه قبل ما تسقط دموعه منها ف قربت ماما منه وقالت
_ متخفش مفيش حاجة هتحصلها
كان صوته مخنوق ومقدرش يرد ف قولت
_ ده انت بتحبها قوي ، بس مش عاوزك تقلق احنا كلنا معاها مش هنسيبها تتوه يعني
بصلي بعيون مليانة دموع وقال
_ اعتبر ده وعد ليه حتي بعد ما اموت
مفهمتش قصدة ف قولت
_ بعد الشر عليك متقولش كده
قالت ماما
_ متخافش يا بيجاد بنتك بخير وانت هتخف وهترجعلها ومحدش هياخد باله منها غيرك
بصتلي وقالت
_ اوصل البيت شوف جويرية بلاش نسيبها وحدها المره اللي فاتت لقيتها خايفة
_ حاضر
#بدر
رجعت العمارة ف اتفاجأت ب جويرية قاعدة علي السلم قربت منها وانا بقول بتفاجيء
_ جويرية! قاعدة هنا ليه
_ قاعدة
_ انتي كويسة
_ اه
قعدت جمبها وقولت
_ طيب قاعدة هنا ليه
_ زهقت من القعدة لوحدي
_ طيب ينفع استأذن عمي ونطلع نتمشي
_ مش عاوزه
_ انا هكون معاكي
_ لا
_ مش مشكلة خلينا هنا .. انتي اخبارك ايه
_ تمام
_ خلصتي القصص
_ اه
_ طيب اقدر اخدهم
_ رجعتهم
_ رجعتيهم مع مين
_ مع اسراء
_ غريبة ريان مجبليش سيرة
_ مش عارفة
_ طيب اجبلك منه تاني
_
_ مالك
_ مفيش
_ طيب عاوزه ولا لا
_ لأ
_ طيب اجبلك كتب
_ لا
_ لا لا لا... غيري الكلمة دي ، احنا امتي ممكن نكون صحاب ايه اللي محتجاه اجبهولك علشان نكسر الحاجز اللي بينا
_ مش محتاجة حاجة
_ ازاي بس اي انسان ليه احتياجات مهما كانت بسيطة
_ الا انا
_ اشمعنا
_ كدة
_ اه... طيب ممكن سؤال
_
_ مين اقرب حد ليكي
_ ماما.. بابا.. بيجاد
_ مفيش صحاب
_ تؤ
_ ومليكة
_ مش صحبتي صاحبة هاجر
_ امال بتزورك ليه
_ عاوزة تكون صحبتي
_ ايووه... بس انتي عارفه اهي جت بفايدة بفضلها ريان مضي عقد اول روايه ليه
وجهت نظرها ليه وقالت
_ هينزله رواية
_ ايوه قريب قوي هينقراله راوية علي شكل كتاب
_ فرحان قوي عشانه؟
_ طبعاً ريان ده صاحبي من زمان واد غلبان وطيب ويستاهل انه ينجح
_ وهو ليه محاولش ينزل قصص بنفسه
_ مش عارف بس هو فقري وغاوي نكد متشائم دايما وشايف الدنيا سودة في وشه وكأنه مستكتر علي نفسه يفرح او ينجح في حاجة ، اصل مر بشوية ظروف خلته يأسان من حياته وفقد الثقة في نفسه
_ ظروف إيه
قولت بتنهيدة
_ قبل كام سنه بقا مـ......
قاطع كلامي صوت بيجاد وهو داخل علينا يقول وهو بيوزع نظراته بينا
_ ايه القعدة دي.