رواية الحب اللطيف
الفصل الرابع4
بقلم نور محمد
سمعته وانا قلبي هيقف من الخوف وهزيت رأسي بسرعه ودموع وانا عنيا بقت زي الشلال من الخوف على بابا وهوب لقيت فهد شاله بسرعه وجري بيه لخارج الشقه وانا قومت وحاولت اجري وراه بس مقدرتش من ألم رجلي
فقولتله بسرعه: فهد خد بابا بسرعه على المستشفي وانا هحصلك فورا
اللتفت فهد تجاهي قبل ما يخرج من باب الشقه وقال: لا انتي افضلي هنا علشان رجلك واختك كمان مينفعش تفضل لوحدها وهي بالحاله دي وماقلقيش بباكي في عنيا ياملك
خرج فهد بسرعه وهو شايل بابا وانا رجعت تاني جنب مريم وحضنتها بدموع وقولت:اهدي ياحبيبتي بابا ان شاء الله هيكون بخير ادعي ليه بس يامريومه
فضلت جنب مريم لغايه الصبح واحنا على نفس الحال ده وانا قلبي هيقف حرفيا من الخوف والقلق على بابا وفجأه لقيت فهد رن عليا ففتحت بسرعه
وسمعت صوته وهو بيقول:ملك انتي كويسه طمنيني عليكي وعلى اختك كمان
رديت عليه بسرعه وقولتله:انا تعبانه اوي يافهد من الخوف على بابا هو كويس دلوقتي مش كده ارجوك طمني عليه المهم
اجاب فهد بتوتر وقال:متقلقيش بباكي ان شاء الله هيبقى كويس المهم انتي خدي بالك من نفسك ومن اختك كمان وانا هبعت شخص يقف على الباب الشقه علشان يحرسكم لحد ما اطمن على بباكي هنا وهاجي بنفسي اطمن عليكي ياملك اوك
هزيت رأسي بالموافقه وكأنه قدامي شايفني وقولتله:حاضر هعمل كده بس خد بالك كويس من بابا يافهد ارجوك
رد فهد بهدووء وقال:حاضر ياحبيبتي سلام
قفلت مع فهد وصحيت مريم علشان نفطر سوى لاننا مأكلناش حاجه من امبارح من بعد الي حصل مع بابا
مر الوقت وعدا اسبوع كامل وانا واختي مريم واحدنا في الشقه وفهد كل يوم يرن يطمن عليا انا ومريم اختي ويطمنا على بابا .. وكمان كان في شخص الي اتكلم عليه فهد دايما واقف قدام باب الشقه زي البودي جارد واي طلب بنطلبه بينزل هو ويجيبه وكمان كان يبعد حد مع اختي مريم لغايه المدرسه علشان يفضل معاها يحرسها
وانا فضلت في الشقه مطلعتش الاسبوع كله بسبب ألم رجلي بس بعد مرور الاسبوع ده بقيت كويسه الحمد لله وقررت اخرج اشوف بابا بدون مااقول لفهد كونت عاوزه اعملها ليه مفاجأه
وفعلا طلعت بدون ماالحارس ده ياخد باله مني وركبت تاكسي وبعد وقت وصلت للمستشفي وانا دقات قلبي بقت زي الطبول
مش عارفه ده خوف او قلق دخلت وسئلت على غرفه بابا وجريت بسرعه عليها لاني مشتاقه اشوفه اوي فات اسبوع كامل وانا مشوفتش فيه وجه بابا قد ايه واحشني اشوفه واحضنه كمان بقوه لانه بنسبالي مش بابا بس لا
هو بابا وماما وصديقي وقت حاجتي ليه في حزني من الدنيا كلها
دخلت غرفه بابا وانا قلبي بيدق بقوه وعنيا مصوبه على السرير قدامي قربت منه وشلت الغطاء بسرعه وفرحه بس كل فرحتي اتبخرت لما ملقتش حاجه على السرير فرجعت للخلف بخوف
وقلق وعقلي بقى بيعرض سيناريوهات كتير على حاله بابا بس انا هزيت رأسي بالرفض
وقولت بصوت مهزوز من الخوف: لا مستحيل اكيد بابا نقلوه في غرفه تاني بس ايوه هو في غرفه تاني وانا هخرج علشان اشوفه فورا
وفعلا خرجت زي المجنونه وانا بعيط بخوف وعدم تصديق فضلت اجري لغايه ماوصلت لاخر الممر قدامي
ولقيت فهد هناك قاعد قدام غرفه وهو حاطط ايديه على وشه وكأنه بيعيط فتقدمت بتجاهه وانا جسدي كله بيترعش بخوف
وقولتله بقلق: فهد انت كويس وكمان بابا كويس مش كده
سكت وانا منتظره رده علشان يطمني على بابا اكيد بابا كويس بس هو بيهزر معايا دلوقتي.. بس حالته دي قلقتني اكتر وقلبي بقى بيدق بقوه من الخوف
فصرخت فيه بقوه وقولت:فهد رد عليا ارجوك انا قلبي هيقف والله من الخوف على بابا هو كويس مش كده رد عليا بسرعه
وبعد ماخلصت كلامي وانا بتنفس بخوف وصوت عالي
رفع فهد عنيه تجاهي ولقت لونها بقى احمر من العياط وقال بصوت مهزوز وتعبان:انا اسف ياملك اسف صدقيني حاولت كتير حاولت كتير والله بس قضاء ربنا كان اكبر مني ادعيله بالرحمه ياحبيبتي ده الي نقدر نعمله ليه دلوقتي
سمعته من هنا وحسيت قلبي هيقف من هنا حرفيا ولقيت نفسي بترنح وخلاص هقع على الارض من الصدمه بس فهد لحقني بسرعه ووقعت في حضنه هو
وبعدها قال فهد بلهفه وخوف عليا:ملك انتي كويسه مالك ردي عليا ارجوكي انتي كويسه؟!
كونت بسمعه وانا في دنيا تاني من الصدمه بابا سابني سندي وقوتي في الدنيا مات وسابني انا واختي لوحدنا طب حلاقي مين دلوقتي ابكي في حضنه وقت زعلي وحزني؟! حلاقي مين اول ماافرح اجري على حضنه هو اول واحد واحكيله على فرحتي دي؟! بابا هو كل عيلتي صحيح انا خسرت ماما زمان بس كونت صغيره ووقتها لقيت بابا هو عوض ربنا ليا من بعدها
بس دلوقتي بابا كمان مات وسابني لمين في الدنيا بعد ربنا يكون سبب وياخد باله مني انا واختي الصغيره كمان
كونت منهاره اوي وانا بشهق بقوه في حضن فهد وهو كان بيضمني بقوه وخوف علشان اهدى
وبيهمس بدموع وحزن عليا : ملك اهدي انا معاكي ياحبيبتي وصدقيني هفضل معاكي دايما ومش هسيبك ابدا انتي مش لوحدك ياملك انا جنبك وسندك العمر كله بس اهدي ارجوكي ياقلبي
نزل كلامه ده زي دواء على قلبي وفجأه حسيت نفسي بهدى ولقيت الدنيا ظلمت قدامي وغبت عن الوعي و...