رواية ذئاب لا تعرف الحب الجزء الثاني2الفصل التاسع عشر19بقلم نجمه براقه
كنت عاوزه اعرف ايه اللي هيقوله عن ريان لكن للأسف بيجاد دخل علينا وقاطع كلامنا وبعد ما قال الكلمتين بتوعه سيبتهم ودخلت ف جه ورايا بعد شوية يقولي بنرفزة
_ يعني بتخافي من كل الناس وتيجي عند الاستاذ بدر تقعدي معاه علي السلم ولوحدكم انا مش قولتلك قبل كدة الموضوع دة ميتكررش
خفضت جفوني ومنطقتش ب ولا كلمة لغيت ما زهق من سكوتي وسابني ودخل اوضته
#خلود
كنت متوقعة انها لما تشوف كلام زيد عنها في الشات تيجي تقولي بس مجتش ولا اتكلمت وانا مرضتش اتكلم كمان وكنت مستنياها هي تبدء ولأن الموضوع دة شغلني مقدرتش اتجاهله وكنت حابة اعرف إية اللي بيحصل ولما كلمت زيد رجعت افتحه وقولت
_ عامل اية مع المعجبة لبيت النداء ولا لسة
_ مش ممكن البي اي نداء غير ندائك ، هي مستحيل تشغلني لحظة واحده
_ باين عليها بتحاول كتير
_ يوووه كتير قوي قوي لسة بعد ما قفلت معاكي لقيتها مستنياني عند مدخل العمارة وبتتحجج بمسألة محيراها مع اننا اجازة ومفيش دراسة ، بس تصدقي بفكر اصدها بشكل صريح
_ وايه مانعك
_ خايف اتكلم بصراحه اجرح اخويا هو ميعرفش اللي بيحصل
_ وهي متعرفش انه بيحبها
_ حتي لو عارفة هي مبتفكرش غير في نفسها وبتتعامل معاه علي انه مصباح علاء الدين وكل اللي عليها تطلب وهو ينفذ وبس
_ باين انك بتكرها قوي
_ مش بكرها بس تصرفاتها متخلنيش اثق ان واحده زيها تصون بيت
سكت شويه افكر في كلامه معقول يكون كلامه صح وهي مبتحكليش ، طيب ليه تخبي عني مكنتش عارفه ولكن مكنتش هتكلم وهي الشات قدامها وهتشوف كلامه وقتها يكون لينا كلام مع بعض
_ روحتي فين
بعتهالي لما اتأخر ردي عليه ف قولت
_ معاك
_ سرحتي في ايه
_ ولا حاجه الشبكة راحت بس
_ اها
_ طيب انا هقفل دلوقتي
_ لا انا صدقت ما كلمتك
_ هكلمك تاني
_ لااا... خليكي معايا
قولت بإبتسامة
_ ليه
_ وحشاني
زادت ابتسامتي وانا بقول
_ وانت كمان
_ اقولك حاجه
_ قول
_ نفسي أغمض عيني وافتحها الاقيكي معايا وفي حضني
رديت بارتباك بسبب كلامه وقولت
_ احم انا بقول اقفل احسن ، شكلك رومانسي دلوقتي وانا مصدعة
_ اوعي لو قفلتي هنزعل
_ طيب بس بلاش الكلام دة
_ بلاش احضان تمشي بحبك
_ هههههه تمشي ، وانا كمان
_ وانتي كمان أية
_ مش عارفة
_ وووانتي كمان إيه
_ هههه بحبك
عدت ساعة وهو بيحب فيه بسبب ومن غير سبب ومع ان كان رومانسي شوية زيادة بس انا كنت مبسوطة ولكن ردودي مكنتش جريئة زيه
#زيد
كنت عايز اشوف هتتنازل قد ايه بسبب لعبته دي ، ولولا الخوف والعيب كنت تماديت اكتر من كده بس هي في النهاية بنت عمي وكنت بعتبرها اختي ، واللي هيجنني ان هي كمان طول عمرها بتعاملني علي اني اخوها ف ازاي قدرت تنزل للمستوي ده وتسمحلي وتسمح لنفسها ان يكون كدة الحوار بينا ، مش قادر استوعب ومش عارف ازاي هبصلها بعد كده
...
بعد ما قفلت معاها قعدت في الصالون وندهت علي خلود تجبلي علبة الاسعافات وجابتها ولما جت تمشي قولت
_ رايحه فين
قالت بربكة
_ داخله جوه
_ ايه الوطينة دي امال لو مكنتش اتعورت بسببك ، تعالي ساعديني خالتي مش فاضيه واخواتي في الشغل
قال بارتباك
_ حاضر
قعدت جمبي وبصعوبة مسكت ايدي ف قولت
_ علي فكره انتي بتغيرلي علي الجرح مش هتلبسيني خاتم الخطوبه
_ ما انا مش متعودة .. هغير اهو
بدات تفكلي الشاشه وهي لسه مرتبكة وانا بقيت اراقب تعابيرها وبفكر لو طلعت هي صح اللي بتكلمني زي ما كنت فاكر في الاول كانت هتتصرف ازاي لما تلاقيني بحب فيها بأسمها الوهمي في حين إني في العادي دائما بشد معاها ويا سلام بقا لو الكلام اللي قولته من شويه لهاجر قولته ليها هي كان منظرها هيكون ازاي وهترتبك قد ايه اذا كانت مرتبكة بشكل ده من مسكت ايدي
_ قربت اهو
قالتها بعد ما رجعت تبصلي وعينينا اتقابلوا ف قولت برخامة
_ خلود ، شهلي كل ده علشان تغيري علي الجرح
_ ما انا خايفه اوجعك
_ملكيش دعوة شهلي بس
_ حاضر
اسرعت شويه وده خلا ايدي توجعني ف تأؤهت بألم وقتها مسكت ايدي وقالت وتعابير الالم علي وشها وكأنها هي اللي اتوجعت
_ اسسسسفة
ظهرت ابتسامتي وانا شايف خضتها وقولت
_ مفيش حاجه ، انا تمام
_ طـ.. طيب انا هعمل براحة وانت متتحركش ، عشان ما ما...
_ متوجعش
_ علشان متتوجعش
_ هههههه ماشي
بعدت وشي عنها وسبتها تكمل ورجعت افكر في هاجر وفي اللي مفروض اعمله اقول لبشر و اوريله المحادثه والغزل ف ينجرح ولا اسكت
#هاجر
مش سهل عليه ان اللي كنت بعتبرة اخ او يمكن اب اعتبرة دلوقتي حبيب وافكر فيه بالشكل ده ومع اني فهمت انا حاسه بأية ناحيته بس مكسوفة اني اقولها بيني وبين نفسي وبعد ساعات قضيتها في التردد والربكة بسبب الأفكار دي اتصلت بيه ف قالي انه راجع علي البيت وطلب اطلع نتغدا مع بعض ف استنيته عند الباب لغيت ما جه ولأول مره احس بالكسوف من البصة ليه ف قال لما لاحظ ده
_ في إيه
_ مفيش حاجه ، اتاخرت لية
_ متأخرتش ولا حاجه... مطلعتيش ليه
_ كنت طالعه
قال بإبتسامة
_ مالك يابنتي في حاجه
_ لا... يلا نمشي
قولت كده وطلعت قدامه وبسبب الارتباك كنت ماشيه رجليه متلخبطة وبتخبط في بعضها وكنت هقع بس هو لحقني وسندني بدراعه وقال
_ يابنتي مالك هتقعي
بعدت بسرعه وقولت بارتباك
_ ولا هقع ولا حاجه بيتهيألك
قولتها ومشيت خطوه ورجليه اتزحلقت ولحقني تاني ف قال بضحك
_ يابنتي مااالك... انتي كويسة
قولت وانا ببعد وبتسدير ليه بكل جسمي
_ يعني ، متوترة شوية
_ من أية
_ مش عارفه
طالت نظرته ليه ف قولت
_ إيه
_ حاسس فيكي حاجة النهاردة
_ مفيش اي حاجة خالص خالص ، هيكون ايه يعني اللي فيه
_ أكيد
_ اه
قال بإبتسامة ولمعة في عيني
_ طيب هاتي ايدك
مدلي ايدة وبعد ما ثبت نظري عليها شوية مسكتها بربكة ف قال بإبتسامة خفيفة
_ علشان متوقعيش
_ اه...
_ اتفضلي
خطي قبالي وهو محتضن ايدي بلطف ومشينا لفوق ولما وصلنا عند الباب سابها وقال ولسة لمعة عينيه منطفتش
_ مش هيفهموا ان عمك مسك ايدك علشان متوقعيش
_ صح
ابتسملي ابتسامة غريبة وكأنه فهم انا حاسة بأية وبفكر في ايه وبعدين فتح الباب ودخلنا لقينا زيد في الصاله وعلشان اهرب من نظراته واخفي التوتر ده سيبته وقعدت هناك وهو دخل جوة ف جاني صوت زيد بيقولي بنبرة ونظرات غريبة
_ مالك
_ هه... لا لا مفيش
_ امال مش علي بعضك ليه
_ مالي ما انا كويسة اهو
_ كدة كويسة
_ اه كدة كويسة
حديت من نظرتي وقولت
_ حضرتك!!!
_ ايه حكاية حضرتك اللي طلعالي فيها دي
_ إيه وحشه نغيرها ونخليها دكتور زيد
_ خليها زيد حاف ملهاش لازم التكليف بينا دلوقتي
قولت برخامة
_ طيب يا زيد
_ اممم اسكتي مش انا قررت ارتبط بالبنت اياها
قولت بذهول
_ البنت بتاعت الاب توب
_ اه
_ بتهزر
_ والله
بهتت ملامحي لما افتكرت انه لو عرف انها خلود هيزعل ف قولت
_ طيب وقولتلها
_ اه و وافقت
_ وافقت ازاي... هو انت عارف هي تكون مين
_ اعرفها طبعاً امال بكلمها ازاي
_ يعني هي بنت نعرفها
_ اه
قولت بارتباك
_ عرفت هي مين
_ يعني ايه عرفت ما انا عارفها... هو حد قالك اني معرفهاش
_ لا مش كده بس.... طيب طيب تمام الف مبروك
_ الله يبارك فيكي عقبالك
_ ماشي
قولت كده ودخلت عند خلود لقيتها سرحانه. ابتسامتها علي وشها ف قولت
_ بت!!!
فاقت من شرودها وتلاشت ابتسامتها لما شافتني ف قولت
_ زيد عرف انك انتي
_ لأ ليه
_ يبقي شاكك فيكي
_ اشمعنا
_ بيقولي انه هيتجوزك وانه عارفك ، اكيد اكيد عرفك وبيحاول يوقعني ماهو عارف اني صحبتك وهقولك
بصتلي بصه جامدة من غير ولا كلمة ف قولت
_ مالك
_ انتي بتقري الشات
_ انا قولتلك مش هقراه
_ ومقرتهوش فعلاً
_ والله ما قريته
_ طيب واية فتح السيرة بينك وبينه
توترت من سؤالها ولكن قولت اللي حصل وهو
_ أبداً بس انا حبيت ارخم عليه واسأله مشغول مع مين طول الوقت في الاب توب ف قالي عليكي دي كل الحكاية
_ اه... طيب زيد معرفنيش ولا حاجة يا هاجر
_ اية البرود دة بقولك عرفك لازم تنهي الحوار فوراً ، او تعترفـ...
قاطعت كلامي بنرفزة
_ انهيه! ... هو في ايه ، اول مره تزني عليه علشان اكمل وبالمرة اعرف اذا كان بتاع بنات ولا لا ، وبعدين تقوليلي كملي واتجنني وجايه دلوقتي بعد ما اتجننت تقوليلي انهيه... انتي عاوزه توصلي لأية بالظبط... حابة تعرفي اخره فين مع البنات علي قفاية
_ ايه اللي بتقوليه ده ، مالك يا خلود
_ مالك انتي... انتي عايزة مين فيهم
_ يعني ايه عاوزة مين
_ معرفش يا هاجر
_ لا تعرفي... في ايه اتكلمي ايه مخليكي تقولي كدة
_ شوفي نفسك بتعملي اية وانتي حرة انا مش هحاسبك علي اي حاجة ، انا بس اللي مزعلني انك بتنصحيني أكمل في اللي بعمله وانتي....
قولت بمقاطعة
_ انتي فاكره اني عيني من زيد
_ معرفش انا معرفش انتي مش راسية علي واحد.. مره معجبه ب بدر ومهتمه بيه وفي نفس الوقت بتهزري مع بيجاد هزار اتنين بينكشوا في بعض واااالله دول لايقين علي بعض مووووت .. ومرة بتغيري علي بشر ومره توقفي زيد عند البوابة
نزلت دموعي وانا بقول
_ انتي بتقولي ليه انا كدة ... يعني انا صايعة
قالت بعد ما نزلت دموعها
_ لا لا انا بس مش فاهمه في ايه... هاجر انا اتأذيت من اقرب واحده ليه مش هستحمل التانية لو عينك من زيد او محتارة بينه وبين اخواته مدخلاني انا في النص ليه
_ نعم! مين دي اللي مدخلاكي في النص ، شكلك نسيتي انك انتي اللي كلمتيه لوحدك ونسيتي لما قولتلك اتجنني وحبيه يمكن لما يعرف يحبك هو كمان وتجوزوا ..لا يا خلود انا عمري ما كنت ولا هكون زي نيرة مش انا اللي تغدر ولا تطعن في الضهر ... ومتشكرة قوي علي حسن ظنك فيه
قولت كده وطلعت علي طول وروحت شقتنا وبعد شوية الباب خبط ولما فتحت لقيته بشر بيقولي بقلق
_ مالك
قولت وانا بمسح دموعي
_ مفيش حاجة
_ بقولك مالك!!!
_ مفيش يا بشر شدينا انا وخلود شوية بس
_ شديتوا في ايه
_ موضوع كدة
_ سر يعني
_ مش سر ولا حاجه.. شدينا علشان حاجة تافهة متشغلش بالك
_ انتوا الاتنين تافهين
_ صح
_ طيب يلا اغسلي وشك وتعالي بيجهزوا الغدا
_ لا مش جايه
_ بقولك يلا
_ بشر علشان خاطري سيبني مش هقدر اطلع
_ طيب هاتي ناكل علي السلم
_ علي السلم؟
_ اه مش بدل ما تاكلي لوحدك
قولت بإبتسامة
_ ماشي
_ انا هروح اقولهم يتغدوا واجيلكم
_ ماشي
#بشر
طلعت قولتلهم يتغدوا ف قال زيد
_ وانت رايح فين
_ هتغدا مع المجنونة علي السلم
قالت خالتي
_ لية
_ شدت هي وخلود ومش راضيه تيجي
قال زيد
_ شدوا ليه
_ مش عارف.. هروح انا
_ طيب استني هاجي معاكم نفسي اغير جو
قولت لنفسي
_ يا رزالتك يا زيد حبكت
قال
_ مالك
_ لا مفيش تعاله
نزلنا تحت وقعدنا علي السلم يكون جت ف قال
_ امتي هتروحوا تتقفوا علي معاد الخطوبة
_ طيب والله كنت ناسي وانت فكرتني.. هنروح النهاردة بليل
_ يا راجل وده معقول تنسي معاد زي ده
_ الشغل ودوشته بقا
_ لا الف سلامة عليك من الشغل ودوشته... شاغلك قوي الشغل انت
_ بطل تلميح ملهوش لازمة يا زيد
_ طالما فهمته يبقي صحيح... بس لو عاوز نصيحتي خرجها من دماغك ، صدقني مش هترتاح كل ما هتتكلم مع بدر هتقلق والشك يدخل قلبك
قولت بنرفزة
_ زيد قولتلك مفيش الكلام ده متتكلمش في الموضوع دة تاني
_ مش قبل ما اقول اللي اللي انا عايز اقوله
_ مش عايز.....
قاطع كلامي وهو بيقول
_ اسمعني!! ، هاجر لا عمرها حبتك ولا عمرها هتحبك... هي شيفاك عمها اللي بيجيبلها حلويات ويفسحها وبس... مش هتحبك مهما تهتم ومهما تجبلها الحاجات اللي بتحبها وألا كانت حست بيك للحظة واحدة... بالعكس دة جريك وراها وصلحك ليها في كل مرة هيجرحك انت بعدين
قولت باختناق معترف بكلامه
_ زيد ، انا مش عارف هتفهمني ولا لا، بس هاجر لو كبرت شوية وفهمت هتلاقي انها محبتش غيري دي مزعلتش لحظة ان بدر بيحب جويرية ولسه زعلانة اني خطبت اسراء
_ زعلانة علشان هتتحرم من عمها ومن الدلع اللي بيدلعهولها
_
_ يابشر هاجر متنفعكش مش علشان هي صغيرة علشان مستهترة وعاملة عيلة بتهزر مع الكل وناسية اننا ولاد عمها واي واحد فينا يحللها.. عندك خلود متربية معانا بس عامله حدود مع الكل .. جويرية من وقت ما كانت عيلة وطبيعية وهي عاملة حدود ، الا دي
_ انت بتقول إيه هاجر بتعتبرنا اخواتها...هي عمرها ما كانت قليلة الادب علشان تتكلم عنها بشكل ده
_ انت اللي مش عايز تشوف فيها عيب... بتقل ادبها وتطول لسانها بحجة الهزار وانت اللي تصالحها
_ كفاية يا زيد مش عايز اسمع ولا كلمة
_ ماشي كفاية لو ده هيريحك
_ مش علشان هيريحني علشان ده الصح ، انا عارف هاجر اكتر منك عارف انها مبتغلطش
مردش وكأنه مش مقتنع بكلامي ف ديرت وشي عنه وانا متنرفز منه وماسك نفسي بالعافية علشان مشدش في خناقة ويقولوا اتخانقوا عشانها وبعد شوية جت ولما هو شافها قام وقال
_ ماشي يا بشر ، انا طالع في شغل مهم ، واعمل حسابك انا هروح معاكم عند بيت عمي السبع نتفق علي الخطوبة ، وربنا يتمملك علي خير
قال كده ومشي ولما رجعت ابصلها لقيت دموعها في عينيها ف قومت خدت منها الصينية حطيتها علي السلم ورجعت وقفت قدامها وقولت
_ مالك بتبكي لية
_ مفيش
_ لسة زعلانه من خلود
هزت دماغها بالموافقة ف قولت
_ انتوا صحاب وبعدين هتصتلحوا ملهوش لازمة كل الزعل ده
قالت بصوت مخنوق
_ انا تعبانه قوي يا بشر
_ في ايه يابنتي قلقتيني ، كل دة عشان خلود
_ مش عارفة
_ طيب اهدي
كملت وانا بمسك وشها بين ايدية
_ مش عايز اشوف دموعك دي...
ذات دموعها وهي بصالي ف قولت
_ هاجر مالك
نزلت ايدية وقالت ببكاء
_ مش عارفه.... انا مش هاكل
قالت كده ودخلت وقفلت الباب ومرضتش تفتح ولا ترد عليه
#اسراء
دخل عليه ريان بعد ما جهزت ولمعة فرح في عينيه وقالي بإبتسامة
_ طالعة زي القمر
قولت بذهول مصطنع
_ اية ده.. مالك يا ريان انت كويس اجبلك دكتور
_ يا رزله يعني انا عمري ما قولتلك حاجة حلوة عليكي
_ عمرك ما قولت ، هتتبلي عليه
_ تصدقي صح.... بس عادي هما الاخوات كدة
كمل بإبتسامة
_ ربنا يتملك علي خير
_ عقبالك يا حبيبي
بهتت ابتسامته وهو بيقول
_ امين حد يكره
_ لأ ، ربنا ينولك اللي في بالك ويجعل جويرية من حظك ونصيبك... بس لسة بردو مش عايز تديلها القصة
_ مش هستفاد حاجة
_ اهو تعرف قصدها إيه
_ هعرف بطريقة تانيه
_ هتحاول تكلمها
_ لو جت فرصة
_ ان شاءلله تيجي النهاردة وتقدر تكلمها
_ لا مبيتهيأليش مفتكرش هتيجي
#ريان
بعد وقت جم الضيوف وبدر معاهم وقعدنا كلنا وبدؤء يتكلموا في التفاصيل وفي وسط الكلام قال عمي بدر
_ ولا إيه رأيك يا ريان متشاركنا
قال بابا قبل ما انطق بحرف
_ هيقول ايه ده كلام رجاله... اقصد كلام كبار
قالها ورمقني بنظرة تقليل بعدت عيني عنه وشردت لدرجة مبقتش سامع اللي بيتقال وفوقت بعد شويه علي لمست ايد بدر وهو بيهمسلي
_ متزعلش
ابتسمتله مجاملة ورجعت اتابع اللي بيتقال لغيت ما كملوا عليه لما قال عمي بدر
_ خطوبة بدر وجويرية هتكون معاهم في نفس اليوم
رجعت اشرد ورجع بدر يمسك ايدي ورجعت ارد عليه بإبتسامة وبعدين استأذنت منهم ودخلت جوه وبعد دقايق بدر جه ورايا يقولي
_ مالك يابني
خفيت وشي عنه علشان اداري دموعي اللي مقدرتش احبسها ف وقف قدامي ولما شافها قال
_ ايه يا ريان كل دة علشان كلمه قالها يا راجل
مقدرتش ارد بكلمة وحسيت بصوتي واقف بين حنجرتي ف قال وهو بيحضني
_ انت هتعيط ، خلاص بقا عيب الراجل لما يعيط
قولت بصوت متحشرج
_ حرام اللي بيحصل ده والله حرام هو انا إيه مش مكتوبلي افرح ولا مفيش فرح علي مقاسي
_ يابني في ايه كل دة علشان كلمة اتقالت... اهدي بس واستهدا بالله مش كده
قال بعد ما حررني من بين ايدية
_ مين قالك ان مش مكتوبلك تفرح ، هتفرح وهتنجح والكل هيحترمك واولهم ابوك
_ تعبت يا بدر والله ما بقيت مستحمل
_ يابني في ايه جاي دلوقتي تضعف بعد ما خلاص باقي خطوة وتبقي كاتب كبير ومعروف.. انت غاوي وجع قلب وخلاص
_ مش غاوية انا نفسي بس ارتاح منه شوية ، انا خلااااص طاقتي خلصت.. كنت فاكر ان بعد السنين اللي فاتت ربنا هيعوضني.. بس لا دي زادت سؤ .. واديني واديك لو القصة اتطبعت.. مش تشاؤم ولا غاوي نكد بس والله ما هتطبع ولا هشوف نجاح بعيني
_ الله يخربيتك.. ولا اقسم بالله غمتني في ايه استهدا بالله انت هتكفر ، ده مش يأس ده كفر بالله عارف يعني ايه كفر
_ لا اله إلا الله محمد رسول الله
_ ايوه كده ، تفائلوا بالخير تجدوة جاك الهم
_ هم إيه اكتر من كـدة هو انا...
قاطع كلامي بحط ايده علي بوقي
_ اخرس اخرس متتكلمش انا خطوبتي بعد ايام ودة فال وحش عليه
#فاطمة
كنت قاعده مع بابا في اوضته ف دخل علينا بيجاد وقال وهو بيتقدم ناحيته
_ بقينا احسن اهو
قال بإبتسامة خفيفة
_ الحمدلله
_ حاسس بتحسن
_ الحمدلله احسن بكتير
_ كدة ممكن تخرج النهاردة
_ قالوا بكرة
_مش مشكله مفرقتش ليلة
_ الحمدلله
_ كلت؟
_ اه
_ طيب عاوز حاجة اجبهالك
_ لا متشكر... بس لو لازم ممكن تساعدني ادخل الحمام
_ اه طبعا
دخلناه الحمام و وقفنا بعيد شوية نستناه انا من ناحية وهو من ناحية ساند ضهره علي الحيط وعاقد درعاته قدامه ومهما حاولت اغض البصر عنه مكنتش اقدر وكنت برجع ابصله تاني ، فيه حاجة تجذب غصب ولا ارادي العين بتجري عليه وكأنة في مغنطيس بيجذب وبعد ما طالت وقفتنا بصلي وقال
_ روحي وانا هجيبه واجي
_ مستنيه
_ شكلك مرهقة روحي
_ وعرفت ازاي اني مرهقة
_ باين من وقفتك
_ ايوه.. بس هستني ونرجع مع بعض
بعد ما طلع بابا رجعناه الاوضه وقعدنا جمبه ف قال
_ امال فين وفاء
قال
_ في البيت مع جويرية شوية وهتيجي
_ تمام...
كمل بعد سكوت
_ تعبينك معانا
_ كلام إيه ده ياخالي عيب عليك
قولت
_ هي دي فائدة العيلة
قال بقرف
_ هي دي بس
_ اه
رمقني باشمئزاز وقال بعد ما شاح بنظره عني
_ حمدالله علي سلامتك يا خالي
_ الله يسلمك ياحبيبي
فضل شوية قرفان مني بس من جوعي مدتلهوش اهتمام كتير ومكنتش قادرة اطلب منه يجيبلي لغيت ما صدمني وهو بيقول
_ كلتي؟
_ هه
_ كلتتتي؟!!
_ بصراحه لأ وهموت من الجوع
قال بابا
_ مش قولتي كلت.. بتكدبي ليه
قال بيجاد برخامة
_ قال يعني مش عاوزه تشغلك عليها.. هجيب اكل واجي
مشي وانا رفعت النقاب عن وشي ف قال بابا بإبتسامة
_ لسانة طويل بس شهم
_ هههههه انا مش عارفة هو مش طايقني ليه
_ يمكن لسة ميعرفش انك صاحبة الطرحة
_ لا والمرة الوحيدة اللي كلمني بلطف لما سألني عنها
_ واضح انها عجبته وشغلته كمان
قولت بكسوف
_ عادي
_ متاكده انه عادي
ديرت وشي عنه اخفي ابتسامتي ف قال
_ إيه رأيك فيه
_ رأيي فيه ازاي
_ ينفع يكون جوزك
_ هههههه إيه اللي بتقوله ده يا بابا انت هتخطبهولي
_ لو هو عرف ان انتي صاحبة الطرحة هيخطبك لوحده
_ لا مش عاوزه كدة
_ امال عايزة اية
_ يعني لو حصل وخطبني علي اني انا المنتقبة وعجبته انا بشكلي دة ممكن اوافق ، بس انه يخطبني لو عرف ان انا صاحبة الطرحة ف لا ، هو عجبه شكلي مش شخصيتي
_ مانتوا الاتنين واحد
قولت بحرج
_ احنا بنتكلم في ايه صحيح يمكن مش في باله
_ حتي لو مش في باله دلوقتي بعدين هيكون في باله ، انتي مفيش حد يعرفك وميتمناش تكوني ليه
_ القرد في عين امه بقا
_ قرد؟ انتي قرد يا شيخة حرام عليكي
_ هههههههه انا مش عارفه شايفني حلوه ليه امريكا كان فيها بنات كتير احلي
_ حلاوة ماسخة مفيش روح بس انتي جمال غربي عربي واخدة الجمال والروح
_ هههههههه حبيبي يا بابا ، لازم اكون حلوة مانت بابا
قعدنا شوية نتكلم ونهزر لغيت ما جه وجاب كشري وقال وهو بيديني العلبة
_ عارف انه مش من مستواكي وهتقرفي بس هو ده اللي هيملا بطنك
قال بابا بضحك
_ علي فكره هي بتحبه قوي وكان نفسها تجربة لغيت ما جينا مصر وادمنته
_ حقيقي؟ ده انا قولت مش هيعجبها
قولت
_ كلها نعمة من ربنا هنتبتر
قال
_ نتبتر؟.. انتوا كنتوا عايشين فين بجد
قال بابا بضحك
_ هههههههه امريكا
_ يعني مش شوبرا مانت
قولت
_ ليه حياتك كلها تريقة علي خلق ربنا
_ انا مبتريقش بس المفروض في كلمة انجليزي طايرة وسط الكلام ده احنا هنا معظم كلامنا انجليزي
_ العربية لغة القرآن يا مسلم ، وانا بفتخر جداً بعوربيتي ومش شايفة ان ليها لازمه اعرف الناس انا بيرفكت في الانجلش كفاية اني هناك كنت بتكلم زيهم
رفع بابا حاجبة ف قولت بضحك
_ هههههههه طبعاً عارفه وفاكرة جدا وقفتك ليه علي الكلمة بس انا حقيقي بحب اتكلم عربي
قال بيجاد بسخرية
_ هصلحلك معلومة ، دي لهجة مصرية مش عربية
قولت باشمئزاز
_ اعلم ذلك جيدا ولست بحاجة لتوضيحك هذا ولكن اذا اردت التحدث مع اهل بلدة ستتحدث معهم بلهجتهم وليس بلهجة اخري كما كنت افعل في امريكا كنت دائماً اتحدث الانجليزية لان تلك هي لغتهم ف لا يصح ان اتحدث العبرية في بلد يتحدثون فيها اليابانية مثلا
ضيق عينه لغيت ما خلصت وبعدين رفع حاجبة وقال
_ احم ما علينا
قال بابا
_ احسنلك متحاولش تجادلها
قال بقرف
_ ربنا يخلي
قعدنا شوية وانا بحاول مضحكش علي طريقته في الكلام لغيت ما بابا خد الدوا ونام ف قال وهو بيقوم
_ انا همشي ولو في حاجة اتصلي
_ شكرا
_ محتاجة حاجة
_ شكرا
_ تصبحي علي خير
مشي وانا اكلت الكشري وبعدين حسيت بالزهق ف طلعت اتمشي وخرجت من المستشفي وقفت شوية في الشارع وبعدين رجلية خدتني لمسافة و وقفت ابص حولية بزهق وفجاة جاني صوت من ورايا بيقولي
_ بتعملي اية عندك!!