![](https://blogger.googleusercontent.com/img/b/R29vZ2xl/AVvXsEgJgluw7W5B0v7oaPTnNvL_Oy0XSgPEYikrnGqpp52bi7UaSKxKU3ORDf2K3EkURnnHjbQfPVlAzwdOXnhsT1ERiEj_OhqI-OaR-wxSirerOMdaJyIy2HDAbxO0RT5CETbkg9_d1FeSvkwNAiknil5dqSsbgBfkJiChOog1PRD46N9dzWSgpOT81bAZrziR/s320-rw/FB_IMG_1716669532845.jpg)
رواية يومين في الحرام الفصل السادس6بقلم حنان حسن
بعدما اتكررت معايا عملية الاغتصاب..
سلمت للي بيحصل
بدون ما اعرف.... ولا اشوف مين الي عمل معايا كده
لاني اتاكدت طبعا ...
من كلام الست الي طلعلي عفريتها
..(الست الطيبة)
لما قالتلي..
ان الجن العاشق... اعتبرني زوجتة ...
وبيتصرف علي الاساس ده
فعلا
واستمر الامر لاكتر من شهرين .بنفس الوضع
لغاية...
ما بدات اشعر اني تعبانة..
وزاد عليا التعب
لدرجة....
اني كنت حاسة
اني بموت
فا قررت ...اروح لاي دكتور في البندر..
وفعلا روحت للدكتور...
وبعدما كشف عليا.... وعرف علتي...
سالتة ...
انا عندي ايه يا دكتور؟
فا لقيتة بيفاجئني
وبيقولي...
انتي حامل
بعدما سمعت الي قالة الدكتور
مصدقتش وداني
فا رجعت سالتة تاني
وقلت..
انت بتقول ايه يا دكتور؟
هي مين دي الي حامل؟
ابتسم الدكتور
لانه كان فاكرني مش مصدقة نفسي من الفرحة
وقالي...
بقولك تاني الف مبروك
انا كشفت عليكي وانتي حامل
في اللحظة دي
رجعت لورا...
وانا بكدب كلامة
ولقيتني بقولة...
لا طبعا
الكلام ده مستحيل يكون حقيقي
رد الدكتور...
وقالي ...
يا ستي بقولك انا كشفت عليكي...
ولقيتك حامل
وعموما لو مش مصدقة
روحي اعملي تحليل
عشان... تتاكدي
قلت...ايوه هعمل تحليل
فا بصلي الدكتور ورد عليا
وهو بيكتب الروشتة الي هاخدها معايا
وقالي...
عموما لو هتعملي تحليل
يبقي اعمليلي معاكي التحاليل دي كمان
عشان نطمن علي صحتك بالمرة
ولازم تتابعي عند دكتور نساء...
لغاية ...
ما الحمل يكمل بسلام
فضلت ابص للدكنور
وهو بيتكلم
وانا مش مركزة في حاجة
غير خبر الحمل الي سمعتة
ولقيتة بينهي كلامة
وهو بيقولي...
اشوفك بعد اسبوع..
وياريت تعملي التحاليل دي
وتجيبيهالي معاكي
وانتي جاية في الاعادة
بصيت للدكتور وانا باخد منه الروشتة
بدون ما اتكلم
وخرجت للمرضة
الي قاعدة علي الباب
وسالتها
وقلت..
اعمل التحاليل الي الدكتور كاتب عليها فين؟
فا شاورت لي الممرضة
علي الشقة الي قصاد العيادة مباشرة
وقالتلي
المعمل ادامك اهوه
فا بصيت علي الشقة المقابلة
للعيادة
وكانت عبارة عن معمل للتحاليل فعلا
فا روحت المعمل
واخدوا مني ا العينات
وقالولي... تعالي يوم السبت خدي النتيجة
فا اتوسلت لدكتور التحاليل
وقلتلة...
ابوس ايديك يا دكتور
انا ممكن اصبر للسبت علي باقي التحاليل
لكن... عايزة اعرف نتيجة التحليل بتاع الحمل
دلوقتي
حتي لو هدفع فلوس مضاعفة
المهم انا مش عايزة امشي
غير لما اعرف ان كنت حامل ؟
ولا... لا؟
فا هز الدكتور راسة
وقالي..ماشي
اتفضلي استريحي لغاية ما اجيبلك النتيجة
وفعلا قعدت
.. وانتظرت
وانا كلي قلق ....وفضلت اعد الثواني
والدقايق
علي ما النتيجة تظهر
وبعدما ما حاسبت علي ثمن التحاليل...
و اديت للمرضة بياناتي
رجعت تاني انتظر نتيجة التحليل
وانا بتقلي علي نار هادية
وشوية..
ولاقيت الدكتور جاي...
وجايبلي في ايده ورقة
وقالي...
دي نتيجة تحليل الحمل
وباقي التحاليل تيجي تاخديهم يوم السبت
فا سالتة
و قولت...
ايه نتيجة تحليل الحمل يا دكتور؟
رد الدكتور
وقالي..النتيجة ايجابية
يعني انتي حامل فعلا
فا بصيت للدكتور بزهول
وسيبتة ومشيت
بدون ما انطق بكلمة
ونزلت من علي السلالم
ولما لقيت نفسي لوحدي
فضلت الطم ...واعيط
واقول.... يلهوي ياني...
يا فضيحتك يا فاطنة
حامل ازاي؟ ومن مين؟
وهقول ايه لاهل البلد ؟
هو في حد هيصدق الي بيحصلي
ولا في حد هيصدق اصلا اني متجوزة من جن عاشق؟
يلهوي لو رفاعي عرف بحملي
ده لو عرف هو اول واحد هيفضحني
وهيقول انه مدخلش عليا
من يوم ما اتجوزنا
يلهوي يا امة
طيب هعمل ايه دلوقتي؟
وفضلت اعيط...
لكن الي وقفني عن العياط
اني شوفت الناس
الي طالعين ...
والي نازلين ...بدؤا يتلموا عليا
علي السلم
عشان يعرفوا انا بعيط ليه؟
فا مسحت عيني..
وقولتلهم ... مفيش حاجة
انا اصلي تعبانة شوية
وقمت بسرعة...
وسيبتهم ونزلت امشي في الشوارع
وفضلت ماشية...ماشية
لغاية ...
ما لقيت رجلي وخداني لمحطة القطر
فا قعدت علي المحطة
وانا برضوا عمالة اعيط...
وبكلم نفسي
و بقول...
وبعدين ؟
هتعملي ايه في المصيبة الي انتي فيها دلوقتي
يا فاطنة ؟
حل ايه ؟
المصيبة دي ملهاش حل
خلاص
انا طلعت حامل ...
يعني هتفضح
مجرد ما بطني تبان
يلهوي يامة ...دي فضيحتي هتبقي علي كل لسان
في البلد
ولقيتني بتخيل الناس وهما بيتكلموا عليا
ولقيتني بقول
لا...لا....لا...
انا لايمكن اتحمل الفضيحة دي
دنا افضل اموت علي اني اتفضح
وفضلت انعي حالي
لغاية ما سمعت صوت القطر...
وشوفت الناس
الي واقفين علي المحطة
وهما... بيبعدوا عن شريط القطر...
وبيخلوا بالهم ...
عشان في قطر جاي..
لاحسن حد يقع تحت القطر ...ويفرمة
وفي اللحظة دي
هانت عليا نفسي
وانتظرت...
و اول ما القطر قرب
كنت رايحة ارمي نفسي تحت القطر...
لكن ....
قبل ما ارتكب الذنب الكبير ده...
لقيت حد شدني من ايدي... ورجعني لورا بسرعة....
وبعدني عن شريط القطر..
وبعدها... ضمني بين ايديه
لغاية.... ما القطر يعدي
وفضلت بين ايدين الشخص ده
لغاية..
ما العربيات بتاعة القطر كلها مرت من جنبنا...
وفي اللحظة دي
انا غمضت عنيا لما سمعت صوت القطر المرعب
وبعدما القطر مشي....
وانا فوقت من الخضة
فتحت عيني
وخرجت من حضن الشخص الي حماني من جناني
فا بصيت ادامي
عشان اشوف مين الشخص الشهم ده؟
وفي اللحظة دي
شوفت ادامي شاب
عمال يفض الناس الي اتلموا عليا
ويقولهم..
حصل خير يا جماعة
يلا كلة يروح لحالة
وبعدما الناس مشيوا
فضلت اتحقق من الشاب الي انقذني
وبمجرد ما بصيتلة
اتفاجئت اني اعرفة...
ايوه انا اعرف الشخص ده فعلا
لان ده نفس الشاب
الي انقذني قبل كده ...وهربني من بيت العمدة
ساعة ما العمدة كان عايز (يقت..لني)...
فا بصيتلة بدهشة
وسالتة
وقلتلة..مش انت الي انقذتني وهربتني من بيت العمدة
ساعة ما كان عايز يقت..لني؟
فا رد الشاب
وقالي..ايوه انا
وانا كمان الي الصدفة جابتني في طريقك دلوقتي
و لتاني مرة
عشان انقذك
قبل ما ترمي نفسك ادام القطر
وسالني
انتي ليه كنتي عايزة تموتي نفسك؟
انتي متعرفيش ان الي..
( بينت..حر)
بيبقي كفر بالله؟
وبيروح جهنم والعياذ بالله؟
قلت..ايوه عارفة
بس انا لو فضلت عايشة هعيش في جهنم برضوا
فا طبطب الشاب عليا
وقالي..
هوني علي نفسك
انا مش عايز اتطفل واسالك مالك ؟
لكن لو عايزة تشركيني في مشاكلك ..
فا انا مستعد اسمعك و احلها معاكي كمان
بصيت للشاب الشهم
وقلتلة..
انت صاحب فضل عليا
وانا مديونالك بحياتي مرتين
بس انا لو حكيتلك عن مصيبتي
مش هترضي تبص في وشي تاني
ويمكن ...
تقلع الجذمة الي في رجلك وتضربني بيها
فا رد الشاب
وقال..يا ساتر يارب
و ليه كل ده؟
قلت..
عشان انا كنت عند الدكتور دلوقتي
وقالي... اني حامل؟
رد الشاب
وقالي..وايه المشكلة ؟
انتي مش كنتي متزوجة من ابن العمدة ؟
قلت...ابن العمدة مات في ليلة الدخلة
والناس كلها شاهدين علي كدة
واتجوزت بعدها
من فرغلي ابن مراة ابويا
الي انت وصلتني لبيتة يوم موت ابن العمدة
لكن فرغلي..مدخلش عليا من يوم ما اتجوزني
وعشان كدة.....
وقبل ما اكمل كلامي ..وقفني الشاب عن الكلام
وقالي..
خلاص.... خلاص
فهمت
قلت..فهمت ايه ؟
انا مش زي منتا فهمت خالص
فا رد الشاب
وقالي..
مش مهم انا فهمت ايه؟
المهم دلوقتي انك مينفعش تخسري دينك ...
لاي سبب من الاسباب
وقومي دلوقتي استغفري ...
وسيبيها لله
وكل مشكلة وليها حل
واكيد هتلاقي حل لمشكلتك
فا استغفرت ربنا
قلت..ونعم بالله
وفي اللخظة دي
مد الشاب ايده ليا
وقالي..
يلا تعالي لما اركبك عشان تروحي بيتك
فا بصيتلة بخجل
وقلت.. عايزة اطلب منك طلب اللهي تتستر
قالي..اطلبي
قلت..
ياريت محدش يعرف السر الي قولتهولك
رد الشاب
وقالي
انا مسمعتش منك حاجة اصلا عشان اقولها
ويلا بقي عشان التاكسي واقف
وفعلا ركبت التاكسي
لكن قبل ما التاكسي يمشي
ناديت علي الشاب
وسالتة
وقلت..هو انت اسمك ايه؟
رد الشاب
وقالي ..
انا اسمي ابراهيم
لكن... الكل البلد بيندهولي
ب(هيما الخواجة)
قلت...عاشت الاسامي يا سي ابراهيم
وقبل ما هيما الخواجة
يرد عليا
كان التاكسي طلع بيا
ولما روحت علي البيت ..
ودخلت و قعدت مع نفسي
افتكرت بلوتي
وفضلت اعيط تاني
لكن ...المرة دي
افتكرت كلام هيما الخواجة
لما قالي...
ان كل مشكلة وليها حل
وفضلت افكر في حل للمصيبة الي انا فيها
وبعد تفكير طويل
وصلت لحل اخيرا
وهو..
بما اني متجوزة فعلا من فرغلي
فا لو الناس عرفت اني حامل...
مش هيقولوا حاجة
لانهم عارفين اني متجوزة
الا لو ....
فرغلي فضحني وقال انه مدخلش بيا
لكن... لو فرغلي قال انه دخل بيا
كده المشكلة هتتحل
يبقي دلوقتي الحل عند فرغلي
وبما ان الحمل لسة في اولة...
فا انا ممكن اوهم فرغلي اني حامل منه
واولد في ميعادي
وابقي اقولة...
اني ولدت في السابع مش مشكلة
لكن ازاي اوهم فرغلي انه دخل عليا؟
هنا مربط الفرس
عشان كدة...
لازم فرغلي
يدخل عليا
ولو مره واحدة
وساعتها انا ممكن افهم فرغلي اني حملت منه
لكن ازاي؟
اخلي فرغلي يرجع للبيت ؟
واحنا بينا ...وبين بعض
كل المشاكل الي حصلت دي؟
ده غير القضية الي انا رفعاها
وقررت في اللحظة دي
اني ارجع لفرغلي
ولو لمدة ليلة واحدة
قبل ما المحكمة تحكم بالخلع...
وفضلت استغفر ربنا
واقول..سامحني يارب
انا عارفة اني كده بنيلها ...وبعك الدنيا اكتر
لكن..
اعمل ايه؟
الحمل الي حصل كان غصب عني
و انا استحالة اتحمل الفضيحة..
والناس في بلدنا مبترحمش
ومكنتش في حل
غير اني
استدرج فرغلي للبيت عندي
بعدما اشتري حبوب مخدرة..
واخدرة ليلة ما هيبات عندي
وبعدما ينام...
الصبح اوهمة انه دخل عليا..
وفعلا...
روحت اشتريت الحبوب م الاجزاخانة
وقررت فعلا اني..اروح لغاية فرغلي....
واستسمحة
عشان يرجع معايا علي بيتي
وعشان خوفت من مراة ابويا
بعد الي عملتة معايا..
هي النسوان الي كانوا معاها
مروحتش علي بيتها
لا...
انا انتظرت الوقت الي بيكون فيه فرغلي في القهوة
وروحتله علي هناك
ووقفت بعيد عن القهوة...
وبعتلة عيل صغير
يناديلة
وبالفعل...
جه فرغلي
وهو مستغرب من وجودي جنب القهوة.
فا سالني
وقال..
خير ؟ عايزة ايه؟
فا عملت نفسي متاثرة
وقلت..
انا قعدت مع نفسي يا فرغلي... وعرفت اني غلطانة
وجاية دلوقتي ندمانة...
وعايزاك ترجع معايا البيت
علي الشروط الي تريحك انت
فا بصلي فرغلي بصة الندل الي بيتحكم
وسالني
وقالي...
انتي بتقولي ارجع بالشروط الي انا اقول عليها؟
قلت...ايوه طبعا ..
وموافقة علي كل الي هتقولة..
بس ارجع معايا
لاني مبقتش قادرة اعيش من غيرك
فا رد فرغلي
وقالي...
خلاص طالما هرجع علي شروطي
يبقي تكتبيلي كل الي وراكي والي قدامك
بيع ...وشراء
فا فكرت شوية
بدون ما ارد عليه
وقلت لنفسي...
بعدما فرغلي حط الشرط التعجيزي ده
فا لازم اوافق علي شرطة
مؤقتا
لغاية ...
ما استدرجة للبيت ...واوهمة انه دخل عليا
وبعدها ارجع في كلامي معاه
في اللحظة دي
لقيتني بقولة..
انا فلوسي هي فلوسك يا فرغلي...
وعمري كلة ما يغلاش عليك
بس تعالي ارجع معايا البيت
وانا اجيب المحامي واتنازلك عن كل شيئ
فا بصلي فرغلي وابتسم
وقالي..
ماشي يلا بينا
وفعلا..
وركبنا انا ...وفرغلي الميكروباص
ورجعنا فعلا علي البيت بتاعي
وبعدما دخلنا البيت
استاذنت منه...
ودخلت الحمام..
وفي الحمام ...كلمت المحامي...
واتفقت معاه كل حاجة
وفهمتة..
اني لما اتصل بيه
يخلي حد يرد بدالة
ويقول... انه مسافر
وجاي بعد يومين
وعرفتة اني هبقي فاتحة صوت الموبيل
عشان ياخد باله
المهم..
... خرجت من الحمام...
وقعدت مع فرغلي
ولقيتة بيسالني بغضب
و بيقولي..
انتي لسة هتقعدي؟
قلت..ايوه هقعد ...وهنتكلم
عشان انت وحشتني يا فرغلي
فا رد فرغلي
وقالي..
قبل اي كلام بينا
لازم تتصلي بالمحامي... وتتنازلي
قبل اي صلح
فا ابتسمت
وقلتلة...
بس كده؟... عنيا
وبسرعة اتصلت علي المحامي
وفتحت الاسبيكر..
(صوت الموبيل)
وقلت...الووه
فا رد صوت حريمي
وقالت...ايوه مين ؟
قلت... مش ده مكتب عبد العزيز المحامي؟
فا ردت
وقالت..ايوه هو
وانا السكرتيرة بتاعتة
اي خدمة؟
قلت...امال فين استاذ عبد العزيز؟
قالت..الاستاذ مسافر... وهيرجع بعد يومين ..
اي خدمة اقدر اقوم بيها؟
قلت..لا خلاص شكرا
انا هستناه لما يرجع...
وابقي اتصل بيه تاني
وقفلت الموبيل
وبعدها ...لقيت فرغلي
بيقولي..
احنا لسة هنستني يومين؟
ما نشوف اي محامي تاني؟
قلت...لا
الاستاذ عبد العزيز
عارف كل كبيرة وصغيرة في ممتلكاتي
وعارف كمان
كل حاجة عن الارض بتاعتي
الي ورثتها ...
وبعدين انت من مصلحتك
ان استاذ عبد العزيز
يشهد اني اتنازلتلك
عن كل حاجة بيع... وشراء
يعني ده فايدة ليك انت يا فرغلي
ثم يعني مش هتيجي من يومين ؟
فا هرش فرغلي في راسة
وهو بيفكر
وبعدين قال..
ماشي
نستني يومين
ميجراش حاجة
فا ابتسمتلة
وقلت...الحمد الله انك رجعت لبيتك يا جوزي ...يا غالي
قوم بقي لما تريح في فرشتك شوية
فا بصلي فرغلي بلؤم
وقالي..
بقولك ايه يا بت
بلاش كهن الحريم ده
انا مش هرجع اعيش معاكي... ولا هعتبرك زوجة ليا...
ولا هتصالح معاكي
غير لما ...تتنازلي ليا عن كل حاجة ادام المحامي
ولما كل ممتلكاتك تبقي تحت ايدي رسمي
ابقي انسي الي عملتية فيا انا وامي ....
وساعتها ابقي اصالحك وتنامي معايا في اوضة واحدة
وبعدما فرغلي خلص ذل فيا
بصلي بقرف وزعق فيا
وقالي...
يلا غوري روحي اعمليلي شاي
فا بصيتلة وابتسمت
وقلت..
اشخط وانطر واتبغدد زي منتا عايز
برضوا مش هزعل منك
يا جوزي يا حبيبي
المهم انك رجعت بيتك بالسلامة
وهروح اعملك احلي كوباية شاي
وبسرعة روحت وعملت الشاي..
وحطيتلة في الشاي
قرصين منوم
وبعدما فرغلي شرب الشاي
لقيتة قام ودخل اوضتة النوم
وفضلت اتابعة من بعيد
ولما شكيت انه يكون داخ
فا دخلت وراه الاوضة
و بدات اقرب منه ...
واتدلع عليه
وكل ده..
عشان فرغلي يصحي يفتكر
ان اخر حاجة عملها قبل ما يروح في النوم
( انه كان معايا)
وكنت بضحك... والعب معاه
وانا معتمدة ...
ان فرغلي هيرفضني...
وهيفضل مصمم
انه ميقربش مني زي ما قال
ده غير كمان ان المخدر زمانة اشتغل
و دماغة زمانها بقت تقيلة...
وهيسيبني ويسلم للنوم
فا فضلت اقرب منه وزودت العيار شويتين
لغاية ما اتفاجئت بفرغلي بيتحول
وبيحاول يفترسني
وفي اللحظة دي
انا مكنش في ايدي حاجة اعملها
وكنت قربت استسلم فعلا
لكن...في اللحظة دي
حصلت حاجة كانت اغرب من الخيال
وهي..
ان النور انطفي ...
وحسيت بشيئ بيشيل فرغلي من عليا
وسمعت صوت ضربة قوية
وبعدها سكت فرغلي خالص
وبمجرد ما اتحررت من فرغلي
فهمت ساعتها ...
ان ...
الجن العاشق هو الي كان بيحميني كا العادة
بدون ما اشوقة
وهو الي حماني من فرغلي
وكان عندي فضول اعرف ايه الي حصل لفرغلي
ولحسن حظي ان الموبيل كان علي المخدة جنبي
فا اخدت بسرعة الموبيل من علي المخدة
وفتحت الكشاف
عشان اشوف ايه الي حصل لفرغلي
وكنت فاهمة...
اني استحالة اشوف الجن العاشق ...كا العادة
لكن المفاجئة
اني لما سلطت الضؤ علي فرغلي
شوفتة وهو مغمي عليه
وفاقد الوعي
والاغرب .. اني
شوفت جنب فرغلي شخص تاني
ووقفت ابص للشخص التاني وانا مزهولة
معقول يكون الي انا شايفاه دلوقتي ده؟
هو.. الجن العاشق ؟؟؟؟
استحالة طبعا
اصلكم مش هتتخيلوا انا شوفت مين......؟