رواية احتواء القاسي
الفصل العاشر10
بقلم سوسو تويكس
قمتا الصباح من النوم واول نفس شلتو كان كان مخلوط بي ريحة عطر حق القميص النمتا وانا حاضناهو، ابتسمت وقمتا بنشاط صليت جيت رتبتا السري وشلتها القميص دخلتوا دولابي، بالحد ريحة العطر ده بقا إدمان وبيبعث الأمان، الأمان الانا حسيتو وقت استنشقت ريحه عطرو وهو بحاول يفتح الباب وغسان خاف وهرب_اتذكرت كلام غسان، لقيت انو فعلا معتصم معاهو حق قررتا بعدين انزل السوق مع ملاذ اشتري لي طرح وعبايات وفساتين طويله شويه لانو العندي ديل كلهم مع الركبه، لبستا لي توب كان ادتني ليهو خالتي ساميه توب ظريف كده ومناسب للبيت ما كنت بعرف البسو عديل المهم لبست وصممتا انو شعري ما يظهر ونزلنا تحت لقيتهم كلهم مجتمعين لانو يوم جمعه وبشربو في الشاي ما عدا معتصم ما معاهم زعلتا والله كان عايزه يشوف اني اتغيرت وما زي زمان، شفتا في عيونهم نظره إعجاب اني لابسه توب وكده_عايزه اسأل عن معتصم بس ما قادره لحدي ما همستا لي ملاذ:اليله معتصم وين_عاينت لي بي مكر وهي بتقول:معتصم يدو وارمه اظنو اترضخت من مكان الكتف وما بقدر يحركها عشان كده ما نزل قال وقع بيها _عرفتا السبب الحقيقي اكيد وقت امبارح حاول يفتح الباب بقوة، تاني همست لي وهي بتبتسم بخبث :ماشه تشوفي_قلتا ارتباك وخجل:لالا انا طالعه نسيت تلفوني فوق ماشه اجيبو_قعدت تضحك فيني، وقفت قدام عرفتو وانا متردده ادخل بعداك استئذنتا دخلتا، بقيت اتمتم:ك.. كيف يدك.. ق.. قصدى قال. والله انك.. _قاطعني وهو بقول ببرود:انا كويس ما فيني شي_عرفتو زعلان مني، لينه:انا اسفه على الحصل ده كلو بسببي و.. وشكرا لانك جيت انقذتني وو_معتصم:المرة الجايه لمن تمشي بيوت الاولاد وتقعي في مشكله حليها براك لانو دي حياتك وماف زول يدخل فيها _زعلتا من طريقة اتهامو لي، لينه:قصدك اني بمشي للأولاد في بيوتهم_انفعل وهو بقرب علي :وتفسير انك مع الزفت داك في بيتو شنو هاا؟ البوديك معاهو شنو اصلا؟ مليون مره كلمتك البسي عديل وماتظهزي شعرك البسي ليك طرحه زي الناس بس راسك القوي ده ما بسمع الكلام_ابتسمتا وانا شايفه منفعل كده عشاني كنت محاصرة مع الباب وقلتا وانا ببتيم ومركزه مع عيونو الناعسه المعصبةمن الغضب:الله سخرك لي عشان تحميني ف اكيد ما بحصل لي شي سيء بوجودك_ملامحو اتحولت من غضب لي صدمه، وعيت على نفسي انا قلتا شنو...
يتبع