رواية مزاولة حب الفصل التاسع عشر19والعشرون20بقلم دودو محمد
مر عدة أيام على وفاة ام يارا وبدأت تنزل الشغل لكن كانت موجوعه من جواها على فراق امها ضحكتها مكسوره حاولوا البنات كتير معاها لكن فراق امها كان كسرها تروح البيت تدخل اوضتها ودموعها متفارقش خدها بدر بيحاول يعوضها غياب امها لكن مفيش اى شئ فى الدنيا يعوض غياب الام مهما كان
اشرقت شمس صباح يوم جديد بنورها الساطع فى سماء القاهره لتبدء يارا بفتح عيونها قامت قعدت على السرير ودموعها نزلت منها واتنهدت وقامت خرجت من اوضتها دخلت الحمام وبعد وقت خرجت لاقت الاكل محطوط على الترابيزه سابته ودخلت الاوضه غيرت هدومها وأدت فرضها وفى الوقت ده خبط باب اوضتها راحت فتحت الباب لاقته بدر بيقولها
بدر :- صباح الخير
يارا :- صباح النور
بدر :- يلا علشان تفطرى انا حضرت الفطار
يارا :- معلش يا بدر مليش نفس
بدر :- اتنهد وقال واخرتها يا يارا انتى مش شايفه نفسك بقيتى ازاى عارف انك حزينه على موت ماما وانا كمان حزين عليها بس مش مستعد اخسرك انتى كمان احنا خلاص مبقاش لينا غير بعض فى الدنيا يا يارا فكرى فيا شويه لو حصلك حاجه انا هعمل ايه فكرى فى ماما دلوقتى وهى حاسه بيكى بتموتى نفسك بالبطئ خلى الحزن فى القلب يا حبيبتى وعيشى حياتك الطبيعيه بقى ورجعى ضحكتك بتاعة زمان واحشتنى اوى الضحكه دى يا حبيبتى
يارا :- بدموع انا لحد دلوقتى مش قادره اتقبل فكرة أن ماما خلاص ماتت ومش هشوفها تانى اوقات كتير بقعد وابص على الباب على أمل الاقيها بتفتح باب اوضى علشان تدخل تطمن عليا فكرة موتها دى بعيد عن تفكيرى يا بدر
بدر :- ماما عايشه يا يارا بس عايشه فى قلوبنا بكلامها معانا وذكرياتها الجميله اللى عمرها ما تنتهى بس لازم تتقبلى وتتأقلمى مع الوضع الجديد علشان تقدرى تدعلها علطول أن ربنا يرحمها ويجمعنا بيها على خير فى الجنه أن شاءالله
يارا :- بدموع الله يرحمك يا ماما يارب
بدر :- شاطره وباس راسها وقال تعالى يلا افطرى
يارا :- راحت قعدت وبدأت تاكل مع بدر
بدر :- رحمه عامله ايه
يارا :- كويسه
بدر :- جدعه اوى البت دى ومش متكبره خالص رغم المستوى اللى عايشه فيه بس تحسى أنها عاديه زينا
يارا :- فعلا انا معرفهاش من كتير بس دخلت قلبى وبحس أن انا اعرفها من زمان اوى روحها حلوه اوى وطيبه بجد
بدر :- فعلا اليومين اللى فاتوا حسيت انها قريبه مننا اوى وان انا اعرفها من زمان
يارا :- انت شكلك حبيتها يا بدر
بدر :- اتنهد وقال حتى لو حبيتها هى فين وانا فين يا يارا انا لو عشيت عمرى كله اشتغل مش هعرف اعيشها ربع المستوى اللى هى عايشه فيه
يارا :- بس انت لسه بتقول انها متواضعه ومش متكبره ولو هى حبيتك بجد مش هتفرق معاها الفرق الاجتماعى اللى ما بينكم
بدر :- ايوه انا مقولتش عليها هى انا بتكلم على أهلها مستحيل يقبلوا يعيشوا بنتهم فى مستوانا ده احنا اللى زينا يا يارا اتخلق علشان يحلم وبس
يارا :- اتنهدت بوجع وقالت عندك حق يا بدر
بدر :- سيبك انتى من الكلام ده كلى يلا علشان متتأخريش على شغلك
وقعدوا الاتنين ياكلوا وبعد وقت خلصوا ونزلوا الاتنين مع بعض ركبوا الاتوبيس وكل واحد راح على شغله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى فيلا عماد
فى اوضت تمارا
صحيت تمارا من نومها دخلت الحمام وبعد وقت خرجت لبست هدومها وأدت فرضها وبصت اتجاه الشباك وهزت كتافها وفتحت الباب وراحت عند باب اوضت كريم خبطت عليه ودخلت وقعدت جمبه على السرير ولعبة فى شعره وقالت
تمارا :- كريم كيمو كوكى رد عليا يالا انا عارفه انك صاحى
كريم :- قعد على السرير وقال نعم عايزه ايه
تمارا :- ما خلصنا بقى يا ابنى انت لا اول واحد ولا اخر واحد يتنصب عليه
كريم :- ياريت الموضوع كان على نصب ولا على الفلوس انتى عارفه يعنى ايه لما شاب فى سنى يتصور فى اوضاع مقرفه انتى عارفه يعنى ايه ابقى متكتف وذليل ليهم انتى عارفه يعنى ايه أن انا انزل من نظرى وابقى كره ابص فى المرايا على نفسى انا التجربه دى كرهتنى فى نفسى وكتير اتمنيت الموت يا تمارا
تمارا :- حضنته وقالت عارفه انها صعبه عليك وعارفه أن اللى انت مريت بيه ده صعب عليك اوى بس اهم اخدوا جزائهم وبيتعاقبوا واهو درس اتعلمت منه حاجات كتير هو اه كان الدرس صعب بس هى الدنيا كده كل ما الاختبار يكون صعب وقاسى كل ما تكون نتيجة معرفتك بالاشياء اكبر وأوسع قوم كده اغسل وشك وادى فرضك واستعيذ بالله من الشيطان الرجيم وانزل شوف مصلحتك حبستك فى اوضك مفيش منها فايده وباسته فى خده وابتسمت ليه وخرجت من عنده نزلت تحت وقالت صباحو عسل على احلى جوز عصافير
عماد :- صباح النور يا حبيبتى
تمارا :- راحت باسته فى خده وقالت عسل يا ناس فيه اب عسل كده فى الدنيا
عماد :- باسها وقال انا عسل علشان عندى بنوته قمر زيك
سميه :- اممم يا عينى عليا انا احمل واشيل فى بطنى تسع شهور واولد واربى وفى الاخر تطلع بتاعة ابوها
تمارا :- خراشى يا ناس على سمسمه وغيرتها وراحت باستها من خدها وقالت ولا تزعلى يا سميه ده انتى الخير والبركه برضه
سميه :- اضحكى عليا بكلمتين
تمارا :- شكلك بتدلعى وغيرانه على عماد منى وعايزاه هو اللى يصلحك صح يا سمسمه
سميه :- بت اتلمى عيب الكلام اللى بتقوليه ده
تمارا :- ضحكت وقالت مكسووووووفه
عماد :- ضحك وقال على يدى كسوفها ده على يدى
سميه :- والله العظيم انتوا الاتنين عجينه واحده تعرفوا تسكتوا بقى
تمارا :- حطت ايديها على بؤقها بمعنى أنها سكتت
سميه :- برضه اخوكى مش عايز ينزل يفطر معانا
كريم :- وهو نازل من على السلم قال صباح الخير
تمارا :- ابن حلال امك لسه بتسأل عليك
سميه :- اخيرآ يا حبيبى خرجت من اوضك تعال اقعد جمبى
كريم :- اتنهد وراح قعد جمب أمه
عماد :- مش هتقول كان مالك اليومين اللى فاتوا دول
كريم :- ها م.م.مفيش
تمارا :- اقولكم انا ماله
كريم :- بصلها بصدمه
تمارا :- الاخ كريم كان عاشق ولهان والمزه خلعت منه
كريم :- اتنهد بأرتياح
سميه :- فى ستين داهيه هى اللى خسرانه هى كانت تطول أن ابنى يحبها بكره يحب واحده احلى واجمل منها مليون مره
عماد :- ايه اللى انتى بتقوليه ده يا سميه حب ايه ونيلة ايه مش لما ينتبه لدراسته الاول يبقى يحب بدل ما تقوليله الكلام ده رايحه تقوليه تطول ومش تطول
تمارا :- الله عليك يا ابو تمارا يا جامد هو ده الكلام المظبوط
سميه :- اخرسى انتى وبصت لعماد وقالت وهو يعنى الحب كان بأيده ما هو شاب زى كل الشباب اللى فى سنه بيحب ويتحب ايه المشكله يعنى
عماد :- المشكله ان ابنك فى ثانويه عامه ومحتاج كل دقيقه علشان يركز فيها ويدخل الكليه اللى بيحلم بيها
تمارا :- اهدوا يا جماعه مش كده وقامت وقفت وقالت استعيذوا بالله يا جماعه ده شيطان ودخل ما بينكم
سميه :- هو فيه غيرك انتى يا سوسه
تمارا :- ضحكت وقالت انا عملت اللى عليا بقى باى وخرجت لاقت رحمه ندهت عليها وقالت بت يا رحمه اخلصى يلا تعالى اركبى
رحمه :- جات وقالت صباح الفل
تمارا :- صباح الورد وشغلت العربيه ولسه هتمشى سمعت صوت سميحه بتنادى عليها بصت لرحمه وقالت امك عايزه ايه
رحمه :- معرفش
سميحه :- جات عند العربيه وقالت صباح الخير يا بنتى
تمارا :- صباح النور يا طنط خير
سميحه :- عايزه اطلب منك طلب
تمارا :- اتفضلى يا طنط
سميحه :- عايزاكى تقنعى يوسف يرجع الفيلا بقى بقاله اسبوع سايب البيت ومش بيكلمنا ولا حتى بيرد على التليفون بتاعه
تمارا :- اتنهدت وقالت حاضر يا طنط من عينيا
سميحه :- تسلم عيونك يا حبيبتى يلا روحوا شغلكم علشان متتأخروش ورجعت تانى الفيلا
تمارا :- امك دى بتاعة مصلحه يعنى من يوم اللى حصل فى الفيلا كانت قطعه معايا الكلام ومش بتكلمنى ودلوقتى كلمتنى علشان مصلحتها قد ايه انتوا عيله واطيه
رحمه :- ثانكس يا روحى ده اقل حاجه عندنا فى العيله وقعدت تضحك
تمارا :- ضحكت وشغلت العربيه وراحت على الشركه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى شقة مالك
صحى مالك من نومه على صوت تليفونه بص فيه لاقها ندى ابتسم ورد عليها وقال
مالك :- صباح الورد والفل والياسمين
ندى :- صباح النور لسه نايم كل ده
مالك :- سهران لصبح منه لله اللى كان السبب بقى
ندى :- اوعى تقولى كانت معاك واحده
مالك :- يا شيخه اتنيلى هو انا عارف اتجوزك واجيبك هنا فى الشقه علشان اروح اجيب واحده غيرك
ندى :- انت عارف اى حركه هكه ولا هكه هتبقى أيامك عسل معايا يا لوكه
مالك :- يا ساتر يارب هو انا مستغنى عن حياتى علشان العب بديلى
ندى :- ضحكت وقالت جدع قوم بقى اجهز علشان هتتأخر على الشغل باااااى وقفلت السكه
مالك :- ابتسم بحب وقال بعشق جنانك ده اوى وقام من على سريره دخل الحمام وبعد وقت خرج ولبس هدومه واده فرضه وخرج من اوضه لاقه يوسف واقف فى المطبخ قال صباح الخير يا صاحبى
يوسف :- وهو ماسك المج فى أيده قال صباح النور
مالك :- ايه ده اللى فى ايدك
يوسف :- نسكافيه
مالك :- طيب معملتش ليا واحد معاك ليه
يوسف :- وانا ايه عرفنى انك صحيت ادخل اعمل لنفسك بقى وسابه وراح قعد على الكنبه
مالك :- ربنا على المفترى ودخل عمل لنفسه واحد وراح قعد قصاد يوسف وقال مش ناوى تحن على مراتك بقى وترجعلها
يوسف :- لدرجاتى انا تقلت عليك
مالك :- بلاش كلام اهبل ايه تقلت عليك دى انا بقولك كده علشان بقالك اسبوع سايب البيت ومحدش يعرف مكانك فين زمان قلب امك عليك نار خلى عندك دم بقى وروح ليها
يوسف :- مش قادر ابص فى وش ارين مكنتش عايز أنها تحمل
مالك :- والله وهى حملت كده باللاسلكى ما انت مشترك معاها وبعدين يعنى ما انت عارف ان مدام فيه جواز هيكون فيه اطفال متعاقبش الناس على ذنب انت اللى مذنب فيه يا يوسف
يوسف :- اتنهد وقال ربنا يسهل وقام وقف وقال هروح اجهز علشان الشغل وسابه ودخل الاوضه
مالك :- اتنهد وقال بقيت تايه يا يوسف ومش عارف بتعمل ايه ربنا يصلح حالك وقعد يشرب النسكافيه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى الشركه
دخلت يارا على المكتب بتاعها وقعدت وقالت
يارا :- صباح الخير
تمارا ورحمه :- صباح النور
تمارا :- عامله ايه دلوقتى
يارا :- بحاول اعيش
رحمه :- حبيبتى حاولى تتأقلمى على الوضع الجديد ده عارفه انها صعبه بس هتعملى ايه ده قضاء ربنا يا يارا
يارا :- اتنهدت وقالت ونعم بالله
وفى الوقت ده دخلت ندي وقالت
ندي :- صباح منور مشرق بحضورى واحشتونى يا بنات
تمارا :- يا سلام على التواضع
ندى :- تبآ لتواضعى وقعدت على المكتب بتاعها
رحمه :- بت انتى مش ناويين تزفتوا بقى انتى وسى مالك ده
ندى :- نزفت ده الموضوع متزفت على الاخر ما انتوا عارفين لا مالك طايق انس ولا انس طايق مالك وانا ولا طايقه الاتنين
التلاته ضحكوا على كلام ندى
يارا :- طيب والحل ايه
ندى :- وحياتك عندى ولا أعرف
تمارا :- نتيجة غبائك يا حبيبتى حد قالك قولى ليه أنه متقدم ليارا
ندى :- انا عارفه بقى انا قولت كده من خوفى سعتها وبعدين انا لما بشوف عيون مالك بسرح فيهم ومبقاش عارفه انا بعمل ايه
رحمه :- هيييييح وايه كمان
ندى :- انا مش عارفه هعمل ايه يوم ما يبقى بتاعى وملكى انا ويبقى جوزى على سنة الله ورسوله بيتهيألى كده هقطعه بوس واحنا لسه فى القاعه
مالك :- اوعدنا يارب باليوم ده وضحك
ندى :- لاااا ما انا مش هتفاجئ بقى متعوده دايمآ وانت عامل ايه بقى
مالك :- بضحك كويس
ندي :- طيب مش خلاص سمعتنى كالعاده اتفضل بقى على مكتبك وارجع كمان شويه فى فضيحه جديده
مالك :- ضحك على كلامها وقال هدخل احلم ببوس القاعه وما بعدها وغمز ليها ومشى
ندى :- اتكسفت وبصت للبنات وقالت شوفتونى وانا مفضوحه
رحمه :- انتى علطول مقفوشه كده يا حبيبتى ايه الجديد
تمارا :- انا لو مكانك انتحر والله على الكلام اللى هو بيسمعه منك
يارا :- لاء والوقت اللى بيجى فيه مميز جدآ بيجى على قلة الأدب
ندى :- انا بدأت أشك أن المكان ده فيه سماعات تجسس وانه اول ما اجى اتكلم يجى يطب عليا كده زى كل مره يلا إلى لقاء جديد فى فضيحه تانيه
وقعدوا الاربعه يضحكوا على اللى حصل ده
تمارا :- وقفت وقالت هروح اشوف يوسف جه ولا لسه
ندى :- ليه
تمارا :- أمه يا ستى عايزانى أكلمه علشان يرجع البيت
يارا :- وهو كل ده مرجعش
تمارا :- لاء مقموص أن مراته طلعت حامل منه شكله فاهم الجواز غلط وضحكت ومشيت
ندى :- والله العظيم الله يكون فى عون تمارا بتحاول تدارى وجعها بضحكها ده
يارا :- ربنا معاها أن شاءالله وتقدر تعدى المرحله دى بقى
ندى :- ساكته ليه يا رحمه
رحمه :- انا لو اتكلمت هتقولوا أن انا مع اخويه يوسف
يارا :- لاء اتكلمى
رحمه :- انا شايفه أن العلاج الوحيد لتمارا أنها تبقى مع يوسف لأنها مهما عملت مش هتقدر تنساه وحتى لو اتجوزت واحد تانى مش هتكون سعيده وهتفشل فى جوازها ده لان يوسف هو اللى عايش فى قلبها
ندى :- فعلا انا بقول كده برضه تمارا عمرها ما هتنسى حب يوسف
يارا :- انا بقى مختلفه معاكم تمارا متعلقه بحب يوسف علشان مجربتش حب تانى انما لو سابت قلبها شويه هتحب وهتعيش حياتها طبيعى مع حد يستاهلها بجد
رحمه :- ممكن برضه محدش عارف بكره فيه ايه المهم ربنا يريح قلبها
وقعدوا كل واحده تشوف شغله
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى مكتب يوسف
خبطت تمارا على الباب ودخلت ابتسمت ليه وقالت
تمارا :- صباح الخير
يوسف :- بحب صباح النور تعالى يا تمارا
تمارا :- دخلت وقعدت على الكرسى وقالت ايه بقى مش ناوى ترجع البيت امك هتموت عليك
يوسف :- اتنهد وقال مش عايز ارجع علشان مشوفش ارين
تمارا :- رفعت حاجبها وقالت والله مش ارين دى اللى صممت تتجوزها ايه حصل دلوقتى
يوسف :- غلط يا تمارا وكنت بصلح غلطتى مفيش حد مبيغلطش احنا بشر وكنت ناوى أطلقها معملتش حسابى أن يكون فيه ما بينا اولاد
تمارا :- والله بالسهوله دى كنت ناوى أطلقها ممكن اسألك سؤال
يوسف :- اسألى
تمارا :- هو البيبى ده جه ازاى
يوسف :- بصلها بصدمه وقال نعم
تمارا :- احم م.م.مقصدش قصدى يعنى مش المفروض كان فيه ما بينكم اتفاق إذا كانت هتحمل دلوقتى ولا بعدين
يوسف :- ايوه المفروض انها عامله حسابها على أننا مش هنخلف دلوقتى
تمارا :- اه وبعدين
يوسف :- حملت
تمارا :- طيب ليه متقولش أن ربنا ليه إراده فى كده والحمل ده جه علشان يقربكم من بعض اكتر ومطلقهاش
يوسف :- مستحيل يا تمارا انا مش هقدر اكمل حياتى معاها
تمارا :- اتنهدت وقالت عمومآ دى حياتك وانت حر فيها المهم دلوقتى ترجع الفيلا النهارده حرام عليك طنط سميحه هتتجنن عليك
يوسف :- حاضر مدام انتى عايزه كده يبقى هرجع علشان خاطرك
تمارا :- على فكره انا مقولتش كده انا بقولك امك هى اللى عايزاك ترجع إنما أنا مالى ترجع ولا لاء انت حر
يوسف :- اتنهد وقال برضه علشان انتى كلمتينى هرجع
تمارا :- وقفت وقالت اوك عن اذنك
يوسف :- تمارا
تمارا :- بصت ليه وقالت نعم
يوسف :- انتى حلوه اوى النهارده
تمارا :- بأستغراب واشمعنا النهارده يعنى
يوسف :- مش عارف انتى جميله كل يوم بس النهارده زياده شويه
تمارا:- جايز عمومآ شكرآ ده من ذوقك عن اذنك وخرجت وقفلت الباب وراها ومشيت ايديها على وشها وابتسمت وراحت على المكتب بتاعها لاقت ياسين قاعد مستنيها قالت بأستغراب ياسين انت هنا من امته
ياسين :- من شويه جيت سألت عليكى قالوا ليا انك عند يوسف
تمارا :- ها ا.ا.ايوه كنت عنده المهم حمدالله على السلامه
ياسين :- الله يسلمك يا تمارا
تمارا :- وماما عامله ايه
ياسين :- بتسألنى عليكى علطول
ندى :- طيب يا بنات تعالوا معايا عايزاكم وخرجوا التلاته من المكتب وسابوا تمارا وياسين مع بعض
ياسين :- واحشتينى
تمارا :- ابتسمت ليه بتوتر ومردتش عليه
ياسين :- اتنهد وقال تمارا انا عايز اتجوزك
تمارا :- بتوتر ها ا.ا ايه اللى انت بتقوله ده
ياسين :- مش كان ده طلبك
تمارا :- ا.ا.ايوه ب.ب.بس
ياسين :- انا عارف هتقولى ايه بس احنا الاتنين محتاجين بعض يا تمارا انتى محتاجانى علشان انسيكى يوسف وانا محتاجك جمبى علشان مش قادر اعيش من غيرك خلاص
تمارا :- ب.ب.بص ا.ا.انا عارفه أن انا اللى طلبت منك كده بس انت بنفسك قولتلى أن ده كان وقت عصبيه مش اكتر
ياسين :- انا عارف قولتلك ايه بس لما قعد مع نفسى وفكرت شويه قولت وفيها ايه مدام بحبك هقدر انسيكى يوسف واخليكى تحبينى
تمارا :- رجعت شعرها لوراه بتوتر وقالت مش عارفه يا ياسين اقولك ايه
ياسين :- مسك ايديها وقال وافقى يا تمارا ومش هتندمى
وفى الوقت ده دخل يوسف وشاف ياسين ماسك ايد تمارا اتعصب وقال
يوسف :- والله هو المكان بقى لمقابلات الشخصيه
تمارا :- غمضت عينيها بتوتر وسحبت ايديها من ايد ياسين وقالت احم ر.ر.روح انت يا ياسين وانا هرد عليك فى التليفون
ياسين :- وقف وبص بغيظ ليوسف ورجع بص لتمارا وقال هستنى تليفونك يا تمارا خلى بالك على نفسك
تمارا:- بتوتر ح.ح.حاضر
ياسين :- بص ليوسف بقرف ومشى وسابهم
يوسف :- ممكن افهم البنى ادم ده بيعمل ايه هنا
تمارا :- احم ك.ك.كان جاى يسأل عليا
يوسف :- ويسأل عليكى بتاع ايه
تمارا :- وانت مالك بيسأل عليا ليه انا حره على فكره محدش قالك انك وصى عليا
يوسف :- يا تمارا انا خايف عليكى البنى ادم ده مش مرتاح ليه حاسس انه غامض ووراه حاجه غلط احنا مش اتفقنا نكون اصحاب
تمارا :- والله انا مش صغيره وعارفه بعمل ايه كويس اوى ياريت متتخطاش حدودك حتى لو كنا أصحاب فاهم وقعدت على المكتب
يوسف :- والله العظيم انا خايف عليكى
تمارا :- بصت ليه ومردتش عليه
يوسف :- بص ليها وهز راسه يمين وشمال وسابها ومشى
تمارا :- اتنهدت بوجع ورجعت شعرها لوراه وقالت هتعملى ايه يا تمارا هتعملى ايه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
انتهى وقت الشغل ونزلوا البنات الاربعه ووقفوا مع بعض على الرصيف
تمارا :- مين هيركب معايا أوصله
رحمه :- اكيد انا راشقه معاكى
تمارا :- وانتى يا ندى
ندى :- لاء هروح بتاكسى
تمارا :- ليه تعالى انتى ويارا اوصلكم على سكتى
ندى :- لاء وعلى ايه لو يارا عايزه تروح معاكى تروح
رحمه :- الراجل الغامض بسلامته جاى هناك
ندى :- انس الله دى أحلوت اوى
انس :- السلام عليكم
الاربعه :- وعليكم السلام ورحمه الله وبركاته
ندى :- خير يا انس كان عندك مشوار قريب من هنا برضه
انس :- ششش اسكتى
ندى :- هو انا اتكلمت اصلا
انس :- عامله ايه دلوقتى يا يارا
يارا :- كويسه
انس :- تعالى معايا يا يارا
يارا :- اروح معاك فين
انس :- عايز اتكلم معاكى كلمتين
ندى :- طيب وانا يا انس مش عايز تكلمنى كلمتين
انس :- بص ليها نظرة تحذير علشان تسكت
يارا :- انا مش رايحه معاك فى حته انا هروح مع البنات
انس :- بصدمه نعم
يارا :- زى ما سمعت انا مش هروح معاك فى حته
البنات التلاته بصوا لبعض بأستغراب
انس :- بعصبيه انتى ازاى تتكلمى معايا بالاسلوب ده
يارا:- انا حره اتكلم زى ما انا عايزه انت مش هتعلمنى اتكلم ازاى
انس :- لسه هيقرب من يارا
ندى :- وقفت قصاده وقالت وربنا ما انت متعصب اهدا خليك هاااااادى
انس :- شكلك نسيتى انا مين يا يارا
يارا :- لاء انا عارفه انت مين كويس اوى يا انس
انس :- ماشى يا يارا ومسك ندى من دراعها بعصبيه وقال امشى قدامى
ندى :- طيب براحه أنا مالى طاب
انس :- بزعيق امشى واخد ندى ومشوا الاتنين مع بعض
رحمه :- ليه يا يارا عملتى كده معاه
يارا :- علشان خلاص بعد موت ماما مش عايزه حاجه خالص من الدنيا كنت الاول عبيطه وبجرى وراه لكن دلوقتى خلاص فؤقت انا مش تحت امر حد
تمارا :- بس هو شكله بيحبك يا يارا وكان واقف جمبك اليومين اللى فاته
يارا :- اتنهدت بدموع وقالت وانا مش عايزه اصعب على حد هو معاملته اتغيرت معايا كده بعد موت امى يعنى بيعطف عليا مش اكتر
رحمه :- انتى مجنونه والله العظيم؛ يعنى قعدى تجرى وراه قد ايه علشان ياخد باله من حبك ليه ويوم ما ياخد باله تضيعيه من ايدك
يارا :- ضحكت بوجع وقالت اللى زى ده مستحيل يتغير مجرد أن كسرت كلمته رجع انس القديم اللى بعرفه من زمان اوى انا خلاص قلبى مبقاش حمل مناهده ولا وجع الوجع اللى فيه كتير اوى عليا امشوا يلا بينا ومشوا التلاته مع بعض
🦋مزاولة حب🦋20
🐝الفصل العشرون 🐝
وصلت تمارا ورحمه الفيلا ودخلت تمارا على اوضتها غيرت هدومها واترمت على السرير وقعدت تفكر فى طلب ياسين وتفكر فى يوسف واتنهدت وقالت
تمارا :- انسي يوسف يا تمارا وفكرى فى نفسك بقى عمرك كلك بتفكرى فيه وهو مع غيرك كفايه غباء بقى كفايه وفى الوقت ده باب اوضتها خبط قالت ادخل
عماد :- فتح الباب ودخل وقال ايه يا حبيبتى جيتى ودخلتى على اوضك علطول ليه
تمارا :- قعدت وقالت مفيش يا بابا
عماد :- دخل وقعد جمبها على السرير وقال بس انا عارفك لما تكونى مشغوله بحاجه وبتفكرى فيها
تمارا :- اتنهدت وقالت مش عارفه بس انا خلاص بقيت تايهه مش عارفه اعمل ايه ولا اتصرف ازاى
عماد :- قوليلى محتاره فى ايه يا بنتى
تمارا :- ياسين يا بابا النهارده جاي يطلب ايدى
عماد :- وايه المشكله مش انتى قولتيلى أنه عايز يقابلنى
تمارا :- انا قولت كده من نفسى يا بابا لكن هو مطلبش ايدى ولا حاجه بالعكس أنا اللى طلبت منه يتجوزنى
عماد :- بصدمه انتى تعملى كده يا تمارا ؟!
تمارا :- مش عارفه عملت كده ازاى بس مجرد ما سمعت أن ارين حامل اتجننت واتصرفت من غير عقل بس المشكله مش فى كده
عماد :- امال فين
تمارا :- هو كان شهم اوى ورفض الصراحه يستغل ضعفى ده
عماد :- اه وبعدين
تمارا :- جاى النهارده بيقولى أنه فكر فى طلبى ده وموافق يتجوزنى وأنه هيقدر ينسينى حب يوسف
عماد :- وانتى رأيك ايه
تمارا :- وقفت وقالت أنا لسه بحب يوسف يا بابا بس نفسى أنساه واعيش حياتى زى اى واحده فى سنى
عماد :- يعنى معنى كلامك ده هتوافقى على طلب ياسين
تمارا :- اتنهدت وقالت مش عارفه خايفه اوافق ابقى بكده بظلمه وبظلم نفسى معاه
عماد :- تعالى يا حبيبتى اقعدى جمبى
تمارا :- قعدت جمب ابوها وقالت اتفضل يا بابا اتكلم
عماد :- انا من رأى توافقى على طلب ياسين ونطول فترة الخطوبه شويه علشان تقدرى تشوفى نفسك هتقدرى تكملى معاه كزوج ولا لاء وبرضه تشوفى طبعه ايه معاكى
تمارا :- وحب يوسف اللى لسه عايش جوايا مش كده هتبقى خيانه بالنسبه لياسين لما اكون مخطوبه ليه وقلبى مع واحد تانى
عماد :- اللى فى القلوب ميعلمش بيه غير ربنا سبحانه وتعالى ولو ياسين ده فيه الخير ربنا هينزل محبته فى قلبك من غير ما انتى تحسى وهتلاقى نفسك بتحبيه
تمارا :- اترمت فى حضنه وقالت ربنا يخليك ليا يا بابا انا من غيرك ببقى عامله شبه الغريق اللى مبيعرفش يعوم وحضرتك اللى بيجى ينقذنى فى الوقت المناسب انا بحبك اوى يا بابا اوى
عماد :- باس راسها وطبطب عليها وقال ربنا يريح قلبك ويسعدك يا حبيبتى يارب شوفى الميعاد اللى هيناسب ياسين امته وانا فى انتظاره يلا بقى ننزل نقعد شويه مع بعض تحت
تمارا :- يلا ونزلوا الاتنين تحت لاقوا سميه وكريم قاعدين تحت
سميه :- اموت واعرف انتوا بتقعدوا مع بعض بتقولوا ايه
عماد :- عادى بتكلم انا وبنتى شويه فيها ايه دى وبعدين ما انتى علطول مقعده المحروس جمبك حد قالك حاجه
سميه :- كريم ده قلبى من جوه بيفهمنى من غير ما اتكلم مش زيكم محدش بيعبرنى
سميه :- دلعى يا اختى فيه بكره تندمى على دلعك ده
كريم :- انت ليه محسسنى أن انا ابن مراتك مش ابنك ليه معاملة جوز الام دى
عماد :- علشان امك بدلع فيك من صغرك وطلعتك مش راجل معندكش استعداد تتحمل المسؤوليه أبدآ
سميه :- ابنى ؛ ده انا ابنى راجل وسيد الرجال كمان وبكره يتخرج ويبقى محدش قده
عماد :- اممم ابقى قابلينى
تمارا :- بقولكم ايه الواحد مش ناقص خنقه كفايه اللى هو فيه خلينا قاعدين اسره مع بعضينا
رحمه :- السلام عليكم
سميه :- وعليكم السلام تعالى يا رحمه
رحمه :- ربنا يخليكى يا طنط انا بس عايزه تمارا فى حاجه
تمارا :- تعالى نطلع اوضى
رحمه :- لاء تعالى انتى معايا اوضى
تمارا :- اوك عن اذنك يا بابا وقامت وراحت الفيلا عند رحمه وطلعت الاوضه بتاعتها وقالت خير فيه ايه
رحمه :- قفلت الباب وقالت اقعدى عايزه اقولك على حاجه
تمارا :- قعدت وقالت خير يا رحمه
رحمه :- بصى انا كنت بلاحظ أن ارين بتختفى بليل ولما أسأل ماما عليها تقولى أنها نايمه فى اوضتها بس كنت بستغرب الصراحه وانزل ابص الاقيها نايمه فعلا على السرير ومن شويه سألت عليها ماما قالت إنها نايمه قولت ادخل اتكلم معاها شويه دخلت وخبط عليها لاقتها مش بترد رفعت الغطا لاقيت المخده اللى موجوده وهى مش فى الاوضه معنى كده أنها بتخرج كل يوم وبتحط المخده علشان لو حد بص يقول إنها نايمه بس بقى مش عارفه اعمل ايه اقول ليوسف وليهم فى البيت ولا اعمل ايه
تمارا :- اوعى تقولى ليهم حاجه علشان ممكن تنكر كلامك ده وانتى مش معاكى إثبات
رحمه :- طيب اعمل ايه
تمارا :- احنا نراقبها بكره ونمشى وراها ونشوفها بتروح فين ونصورها ويبقى معانا حاجه ثبت كلامك؛ هو يوسف مرجعش
رحمه :- رجع بس مدخلش الاوضه بتاعته نام فى اوضه تانيه وهى عارفه أن يوسف هيعمل كده علشان كده خرجت زى كل يوم
تمارا :- اممم خلاص بكره أن شاءالله نعمل زى ما قولتلك نامى دلوقتى يلا تصبحى على خير
رحمه :- وانتى من أهله
تمارا :- خرجت من اوضت رحمه ولسه بتلف علشان تنزل لاقت يوسف واقف وراها اتوترت وقالت ي.ي.يوسف واقف كده ليه
يوسف :- كنت بشرب ميه وشوفتك وانتى خارجه من اوضت رحمه
تمارا :- م.م.ماشى عايز ايه يعنى
يوسف :- مفيش حمدالله على السلامه أو نورت البيت برجوعك ولا اى حاجه خالص ده انا حتى رجعت علشانك انتى
تمارا :- بعدت عنه وقالت والله ترجع ولا مترجعش شئ ميخصنيش امك طلبت منى طلب وانا نفذته بس مش اكتر
يوسف :- قرب منها وقال يعنى مش فرحانه برجوعى
تمارا :- بعدت عنه وقالت لاء مش فرحانه بالعكس أنا كنت مبسوطه وسعيده وانت بعيد عن وشى
يوسف :- قرب منها اكتر وقال عينى فى عينك كده
تمارا :- بلعت ريقها بصعوبه واتوترت وقالت ل.ل لو سمحت متقربش اكتر من كده
يوسف :- قرب اكتر وقال نفسى نرجع اطفال صغيرين تانى كنت بقدر اخدك فى حضنى براحتى
تمارا :- بصت ليه بتوتر وقالت ها
يوسف :- قرب اكتر ليها وبصلها بحب ومشى أيده على خدها وقال ياريتنا كنا فضلنا صغيرين يا تمارا كنا مع بعض علطول رغم انك علطول كنتى بتعملى مقالب فيا كتير بس كنت بحب ضحكتك ليا لما اتعصب عليكى واجى اصالحك واخدك فى حضنى ياااااه لو الزمن يرجع لوراه
تمارا :- غمضت عينيها علشان تحبس دموعها وقالت عن اذنك ولسه هتمشى
يوسف :- مسكها من دراعها وقرب من ودنها وقال احنا كبرنا وكل حاجه اتغيرت من حاولينا الا حبنا لبعض يا تمارا حبنا لبعض عايش فى قلوبنا ومهما عملنا عمرنا ما هنقدر نكره بعض واتنهد جمب ودنها وقال تصبحى على خير يا تمارا وسابها ودخل اوضه
تمارا :- دموعها نزلت منها وطلعت تجرى على اوضتها واترمت على سريرها وقعدت تعيط
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
اشرقت شمس صباح يوم جديد بنورها الساطع فى سماء القاهره لتبدء ندي بفتح عيونها على صوت تليفونها بصت فيه لاقته مالك ابتسمت بحب وردت عليه وقالت
ندى :- صباح الخير
مالك :- صباح الورد والفل والياسمين واحشتينى
ندى :- صاحى بدرى النهارده
مالك :- علشان نمت بدرى امبارح المهم بقولك واحشتينى
ندى :- ه.ه.هى الساعه كام
مالك :- متغيريش الكلام يا ندى
ندى :- بس بقى يا مالك بتكسف
مالك :- على يدى بأمارة ما انتى هتقطعينى بوس فى القاعه
ندى :- بكسوف والله العظيم انت قليل الادب
مالك :- وانا مالى مش انتى اللى قولتى كده امبارح
ندى :- احم د.د.ده كلام بنات ملكش دعوه انتى بيه بقى
مالك :- ضحك وقال ماشى خلاص هسكت اهو
ندى :- يلا باى بقى علشان اجهز نفسى لشغل
مالك :- باى يا قلبى
ندى :- قفلت السكه وحضنت التليفون وقالت بحبك بحبك بحبببببببك وابتسمت وقامت من على سريرها خرجت من اوضتها وقالت لامها صباح الخير
ام ندى:- صباح النور يا بنتى
ندى :- حضرى الفطار بسرعه يا ماما احسن هموت من الجوع
ام ندى :- ماشى يا بنتى ادخلى اجهزى وانا هقوم احضرك الفطار
ندى :- ربنا يخليكى ليا يا ست الكل ودخلت الحمام وبعد وقت خرجت ودخلت اوضتها جهزت نفسها وأدت فرضها وخرجت من الاوضه وقعدت على الترابيزه علشان تفطر وفى الوقت ده خرج انس من اوضه وهو متعصب وقال
انس :- من هنا ورايح ملكيش دعوه باللى اسمها يارا دى فاهمه
ندى :- يعنى ايه مليش دعوه بيها
انس :- يعنى اقطعى علاقتك بيها
ندى :- ايه اللى انت بتقوله ده يا أنس يارا صديقة عمرى طول عمرنا مع بعض ازاى تطلب منى اقطع علاقتى بيها مقدرش اعمل كده
انس :- بزعيق انا قولتلك كلمه واحده مش عايز مناقشه؛ لو شوفتك واقفه معاها ولا كلمتيها يبقى انتى اللى جبتيه لنفسك يا ندى هقعدك من الشغل خالص
ندى :- وقفت وقالت ليه كل ده علشان رفضت أوامرك هى مش ملزومه تسمع كلامك على فكره انت اخد انك تأمر وبس وأن الكل يقولك سمعآ وطاعه اخد أن الكل يوافق على كلامك من غير مناقشه بس الدنيا كلها مش تحت امرك يا انس يارا حره توافق ولا ترفض على طلبك وانا برضه حره فى علاقتى مع اصحابى ومش هقطع علاقتى بحد منهم
انس :- رفع أيده وضربها بالقلم وقال انتى اتجننتى ازاى تتكلم معايا كده ها انتى شكلك محتاجه تربيه من اول وجديد يا ندى
ام ندى :- انس ايه اللى انت عملته ده
ندى :- حطت ايديها على خدها ودموعها نزلت منها وقالت انت بتضربنى يا انس اول مره تعملها من يوم ما بابا مات قد ايه بقيت شخص قاسى وانانى مش بتفكر غير فى نفسك وبس عايز الدنيا كلها تحت امرك
انس :- اه بضربك واكسر رقابتك كمان علشان انتى ناقصه تربيه
ندى :- بدموع لاء يا انس انا مش ناقصه تربيه انا متربيه كويس اوى عارف ليه علشان انا تربيتك انت
انس :- بصلها بغيظ وراح فتح باب الشقه وخرج ورزع الباب وراه
ندى :- اترمت فى حضن امها وقعدت تعيط
ام ندى :- متزعليش من اخوكى هو طيب وبيحبك وبيخاف عليكى بس هو عصبى شويه يا بنتى يعنى انا هعرفك اخوكى ايه
ندى :- لاء مش هتعرفينى يا ماما انس ايه بس اول مره يمد أيده عليا
ام ندى :- معلش يا حبيبتى يمكن فيه حاجه مضايقه فى الشغل ولا حاجه هو لما يهدا شويه هيجى يصالحك
ندى :- انا ولا عايزه يصالحنى ولا ليه دعوه بيا من أساسه واصحابى مش هبعد عنهم مهما حصل عن اذنك واخدت شنتطها ومشيت راحت على الشركه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى فيلا يوسف
صحى يوسف من نومه قام قعد على السرير ومسك تليفونه بص فى الساعه واتنهد قام دخل الحمام اخد شاور وخرج لبس هدومه واده فرضه وخرج من الاوضه نزل تحت وقال
يوسف :- صباح الخير
سميحه وحسام ورحمه :- صباح النور
سميحه :- يااااه الفيلا كانت مضلمه من غيرك يا حبيبى إياك تبعد تانى وتسيبنا يا ابنى
يوسف :- انا اسف يا ماما بس كنت محتاج ابعد شويه واريح اعصابى
حسام :- اللى انت عملته ده اسمه هروب يا ابنى مش تريح اعصابك
يوسف :- اتنهد وقال تسموا زى ما تسموا بس المهم بعد عن ارين اليومين اللى فاتوا وريحة اعصابى
سميحه :- البت يا حبة عينى علطول فى اوضتها نايمه من وجعها منك
رحمه :- بصوت واطى ده انتى على نياتك اوى يا ماما
يوسف :- هى اللى غلطة تتحمل غلطها بقى
حسام :- غلطة فى ايه يا حبيبى
يوسف :- غلطة لما ضحكت عليا وقالت إنها بتاخد الحبوب وهى مش بتخدها وحملت
سميحه :- يا ابنى ما يمكن نسيتها ولا حاجه وبعدين مفيش وسيلة مضمونه ميه فى الميه وحتى لو هى سابت نفسها علشان تحمل ما هى زى اى واحده متجوزه نفسها تبقى ام
يوسف :- مين دى اللى نفسها تبقى ام ارين؟! دى هى اللى قالت ليا بلسانها مش مستعده تجيب اطفال دلوقتى علشان خايفه على جسمها انا فاهم دماغ ارين يا ماما وعارف هى عملت كده ليه
حسام :- عمومآ يا ابنى اللى حصل حصل ومراتك دلوقتى حامل فى ابننا ادخل راضيها وانسوا كل اللى فات
يوسف :- اسف يا بابا انا مش عايز اكلمها لحد ما ربنا يسهل تولد واخد ابنى وكل واحد مننا يروح فى طريق
سميحه :- ايه اللى انت بتقوله ده طلاق ايه ده انت لسه عريس مش بقالك شهرين
يوسف :- مش وقته الكلام ده بعد ما تولد يبقى يحلها ربنا وقام وقف وقال انا ماشى
حسام :- امته هتعقل بقى يا ابنى
يوسف :- طلاق ارين هو عين العقل يا بابا صفحه ولازم تتقطع من حياتى
سميحه :- ربنا يهديك يا حبيبى يارب
يوسف :- اتنهد وقال اتأخرت على الشغل سلام وخرج وسابهم
رحمه :- ما تسيبوا براحته واحد ومش مرتاح فى جوازه وعايز يطلق هو حر
سميحه :- لاء مش حر لما تبقى مراته حامل يبقى لازم نكلمه ونخليه يتراجع عن قراره ده
رحمه :- وقفت وقالت يارب يطلقها ونخلص منها بقى يلا سلام انا ماشيه وخرجت وسابتهم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى فيلا عماد
صحيت تمارا من نومها على صوت تليفونها بصت فيه لاقته ياسين قامت قعدت على السرير وردت عليه وقالت
تمارا :- صباح الخير يا ياسين
ياسين :- صباح النور يا تمارا عامله ايه
تمارا :- الحمدالله كويسه
ياسين :- انتظرت اتصالك امبارح كتير متصلتيش زى ما قولتيلى
تمارا :- اسفه يا ياسين بس امبارح كنت مصدعه شويه ونمت علطول
ياسين :- الف سلامه عليكى
تمارا :- الله يسلمك
ياسين :- فكرتى فى الكلام اللى قولته ليكى
تمارا :- بتوتر س.س.سبنى شويه افكر وهرد عليك انت راجع اسكندريه امته
ياسين :- انا خلصت شغل فى اسكندريه وقاعد فى القاهره خلاص
تمارا :- ب.ب.بجد
ياسين :- ايوه عمومآ انا هسيبك براحتك فكرى ووقت ما تخدى القرار بلغينى
تمارا :-شكرآ يا ياسين
ياسين :- على ايه يا تمارا ده انا اللى لازم اشكرك على وجودك فى حياتى
تمارا :- ا.ا.انا لازم اقفل علشان اجهز لشغل
ياسين :- اوك باى
تمارا :- باى وقفلت التليفون وحدفته جمبها واتنهدت وقامت دخلت الحمام وبعد وقت جهزت وأدت فرضها ونزلت من اوضتها وقالت صباح الخير
عماد وسميه وكريم :- صباح النور
عماد :- امبارح جيتى من عند رحمه وطلعتى على اوضك علطول ليه
تمارا :- ها ا.ا.اصل كان عندى صداع جامد رجعت من عند رحمه ونمت علطول
سميه :- ايه حكاية الصداع معاكى علطول لازم تروحى تكشفى
عماد :- صداع من الضعف اللى عندها انتى مش شايفها خست اوى ازاى مش بتاكل خالص
تمارا :- والله يا بابا نفسى بقت تقفل من نحية الاكل معرفش ليه
عماد :- يا حبيبتى لازم تاكلى علشان كده انتى ممكن يحصلك هبوط فى اى وقت
تمارا :- متقلقش عليا وبصت لكريم وقالت كيمو محدش بقى يسمع صوتك ليه
كريم :- كفايه حضرتك اذاعه متنقله مش بتفصل
تمارا :- اخرس ياض انا غلطانه أن عايزه صوتك يظهر
كريم :- وقف وقال انا ماشى
تمارا:- قامت تجرى ووقفت قصاده وقالت كيمو انت زعلان منى
كريم :- انا لا زعلان منك ولا من غيرك يا تمارا
تمارا :- اتنهدت وقالت استنا انا ماشيه معاك عايزاك وبصت لابوها وامها وقالت سلام
سميه :- مش هتاكلى
تمارا :- لاء مليش نفس وخرجت هى وكريم وقالت فيك ايه بقى يا معلم
كريم :- ولا حاجه مفيش
تمارا :- يا كيمو هتخبى على تيمو حبيبتك
كريم :- اعمل ايه يا تمارا مش قادر انسى اللى حصل ليا فى اسكندريه
تمارا :- لسه برضه يا كريم
كريم :- انتى عارفه انا كنت بحب واحده وبعد اللى حصل ليا ده بعد عنها وسيبتها حسيت انها تستحق واحد احسن منى راجل بجد مش وسكت
تمارا :- انت عبيط يالا وهو اللى حصلك ده بمزاجك انت ازاى تفكر كده فى نفسك انت لا اول واحد ولا اخر واحد يتعمل فيه كده النصابين موجودين اشكال والوان وبطرق كتير اوى يعرفوا يضحكوا على الناس وكتير اوى رجاله وقعت فى نفس الفخ اللى انت وقعت فيه اللى حصلك ده ملهوش علاقه بالرجوله فوق كده وانتبه لحالك وبلاش تهز ثقتك بنفسك يا عبيط طيب والله العظيم انا بشوفك ارجل من ناس كتير بتبقى اسم فى البطاقه يلا بقى فك التكشيره دى مش عايزه اشوفها تانى على وشك فرفش كده يا كيمو
كريم :- اترمى فى حضنها وقال ربنا يخليكى ليا يا تيمو
تمارا :- ويخليك ليا يا حبيبى يلا بقى هتأخر على الشغل بسببك
كريم :- بعد عنها وابتسم ليها
تمارا :- ليا قاعده معاك تانى علشان اعرف مين دى اللى خطفت قلب اخويا ازاى بس تحب ومتقوليش ازاى
كريم :- خلاص بقى مبقتش حبيبتى ما انا سيبتها يلا باى وسابها ومشى
تمارا :- ركبت عربيتها وقعدت تنادى على رحمه
رحمه :- جات تجرى وركبت جمب تمارا وقالت صباح الخير يا تيمو
تمارا :- صباح الخير يا اختى هو لازم يعنى صوتى يتنبح لحد ما حضرتك تيجى
رحمه :- اسكتى احسن انا فرحانه اوى
تمارا:- ربنا يفرحك بس ايه السبب
رحمه :- يوسف خلاص قرر يطلق ارين
تمارا :- احم و.و.وايه الجديد ما انا عارفه بس محدش بياخد على كلام اخوكى يوسف مجرد ما هتدلع عليه شويه هينسى نفسه واللى حاوليه وشغلت العربيه ومشيت بيها
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
وصلوا البنات الاربعه الشركه ودخلوا قعدوا على المكاتب الخاصه بيهم والكل كان مستغرب سكوت ندى بصوا لبعض وقالوا
تمارا :- مالك يا ندى
ندى :- وهى بتشتغل قالت مفيش
رحمه :- انا اول مره اشوفك ساكته كده
ندى :- عندى شغل كتير
يارا :- شغل ايه ده اللى عندك واحنا اول مره يكون عندنا شغل كتير طول عمرك بتهونى علينا تعب الشغل بدمك الخفيف وهزارك
ندى :- انا كويسه سبونى فى حالى بقى خلونى اشوف شغلى
تمارا :- قامت وقالت لاء مش هنسيبك فى حالك لأن حالك هو حالنا احنا كمان
ندى :- دموعها نزلت منها وقالت مفيش مخنوقه شويه
يارا :- قامت راحت قعدت على المكتب قصادها وشدتها فى حضنها وقالت اتكلمى يا ندى مالك
ندى :- قعدت تعيط ومردتش عليها
يارا :- بعدتها عنها وقالت ده فيه حاجه كبيره حصلت انتى زعلانه انتى ومالك
ندى :- هزت راسها بمعنى لاء
رحمه :- يا بنتى اتكلمى
تمارا :- ايه ده يا ندى
ندى :- ايه
تمارا :- اللى فى خدك ده انتى حد ضربك بالقلم
ندى :- بتوتر ل.ل لاء
يارا :- بصت وقالت لاء ايه واضحه فى خدك اهى ايد على وشك هو صح اخوكى اللى ضربك كده اتكلمى يا ندى
ندى :- يا جماعه مفيش حاجه
رحمه :- يا بنتى يعنى اللى فى وشك ده جه منين
يارا :- مفيش غيره ؛هو اللى عمل كده واكيد انا السبب صح
ندى :- لاء و.و وانتى مالك بس
تمارا :- طيب قولى السبب اللى خلاه عمل فيكى كده ايه
ندى :- بكدب م.م.مفيش ب.ب.بس انا رديت عليه بطريقه وحشه عصبته وضربنى بالقلم
يارا :- كدابه يا ندى انا عرفاكى لما بتكدبى
ندى :- بصت الاتجاه التانى ومردتش عليها
يارا :- شدت وش ندى ليها وقالت كلامى صح يا ندى اخوكى عمل فيكى كده بسببى
ندى :- هزت راسها بمعنى ايوه واترمت فى حضن يارا وعيطت
يارا :- ماشى يا انس انا هوريك
ندى :- بعدت عنها وقالت لالالا يا يارا ابوس ايدك بلاش تعملى معاه حاجه تانى سبيه كده وهو هينسى
تمارا :- اتنهدت وقالت اخوكى ده بجد غلس اوى هو طيب وجدع بس كلامه دبش وجد اوى زياده عن اللزوم ده انا اتعاملت معاه مره كنت هولع فيه من أسلوبه
رحمه :- هو طبيعة شغله مأثره فيه اوى ياريت كنتى روحتى معاه يا يارا وشوفتيه عايز ايه مكانش كل ده حصل
يارا :- انا مش تحت امر حد هو نسى كان بيعاملنى ازاى مسموح ليه بس يعمل كده إنما لو غيروا عامله بنفس المعامله ميعجبهوش انا لازم أوقفه عند حدوده ووقفت وقالت أنا ماشيه
البنات بصوا لبعض بأستغراب
تمارا :- رايحه فين
يارا :- انا لازم اروح اتكلم مع الأستاذ ده أخته ذنبها ايه علشان يعمل فيها كده
ندى :- لاء يا يارا ابوس ايدك بلاش
يارا:- بصت ليهم ومردتش عليهم
رحمه :- أهدى يا يارا انتى اساسآ بقيتى عصبيه
يارا :- رجعت قعدت على المكتب بتاعها وقالت انا لازم اتصرف معاه لازم
تمارا :- أهدى بس وبعد الشغل نقعد ما بعض ونشوف هنعمل معاه ايه
وقعدوا الاربعه يشوفوا شغلهم
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
انتهى اليوم ونزلوا البنات الاربعه من الشركه واجتمعوا مع بعض على الرصيف وقالوا
تمارا :- بصى يا يارا انا عارفه انتى حاسه بأيه دلوقتى بس عايزه الصراحه انس وقف جمبك فى موت امك كتير و غير معاملته معاكى فى الفتره الاخيره وشكله كمان بيحبك كان لازم تقعدى معاه وتسمعيه
يارا :- انس مش بيعرف يحب هو بس بيحب يدى أوامر ويزعق إنما يحب ويكون عنده قلب زينا ويحس ده مستحيل هو ممكن يكون رأف بحالى بعد موت امى شويه غير كده مفيش
رحمه :- طيب بس علشان جاى اهو هناك
ندى :- اتوترت وقعدت تدعك فى ايديها بخوف
يارا :- حلو جه لقضاه
ندى :- ابوس ايدك يا يارا بلاش تتكلمى معاه خالص
انس :- جه ومسك ندى من دراعها وقال امشى معايا وشدها وراه
ندى :- بألم حاضر بس براحه
يارا :- مسكت أيده وبصت ليه بتحدى وقالت سيب دراعها
انس :- بص لايديها اللى على أيده وقال شيلى ايدك ملكيش دعوه بأختى وياريت تبعدى عنها خالص فاهمه
يارا :- داست اكتر على أيده وقالت قولتلك سيبها
انس :- بأيده التانيه مسك ايد يارا وداس عليها جامد وقال انتى عايزه ايه ها كنتى هتموتى عليا ايه اللى حصل عملتى لنفسك قيمه دلوقتى وشوفتى نفسك بس انا انس يا يارا وغلط لما عملت ليكى قيمه وخليتك تفكرى نفسك واحده ابعدى عن ندى يا يارا يا اما قسمآ عظمآ هخليكى تندمى على اليوم اللى فكرتى تتحدينى فيه فاهمه وزقها بعيد وشد ندى من دراعها وروحوا على البيت
يارا :- مسكت ايديها بألم ودموعها نزلت منها
تمارا :- بصت لرحمه وراحت اخدت يارا فى حضنها وقعدت تطبطب عليها
يارا :- بدموع انا غلطانه يا تمارا علشان نزلت من نفسى وحبيت واحد زيه انا غلطانه
رحمه :- ده فظيع يعنى كان عارف بحب يارا ليه وحاسس بكل حاجه ولا كان مبين بجد رهيب
تمارا :- طيب بس علشان اخوكى جاى
بدر :- بقلق يارا مالك
يارا :- مسحت دموعها وقالت مفيش يا بدر انا كويسه
بدر :- كويسه ازاى وانتى دموعك على خدك كده
رحمه :- متقلقش يا بدر دى مشكله صغيره فى الشغل والمدير زعقلها شويه
بدر :- لا عاش ولا كان اللى يزعق لاختى انا هطلع اعرفه مقامه
تمارا :- لالالا اهدا يا بدر مش هى بس اللى زعق ليها كلنا زعقلنا وكلنا غلطانين
رحمه :- خلاص بقى يا بدر حصل خير صح يا يارا
يارا :- اتنهدت وقالت خلاص يا بدر انا كويسه يلا بينا
تمارا :- طيب خدوا رحمه معاكم على السكه
رحمه :- ليه
تمارا :- شاورت براسها وقالت ياسين جاى هناك
رحمه :- اوك يلا بينا احنا ومشوا التلاته مع بعض
ياسين :- عامله ايه
تمارا :- تمام الحمدالله خير يا ياسين
ياسين :- واحشتينى
تمارا :- يعنى انت جاى علشان تقولى كده
ياسين :- لاء طبعآ بس ماما عايزه تشوفك
تمارا :- وانا والله عايزه اشوفها بس مش هقدر اروح معاك النهارده
ياسين :- طيب امته
تمارا :- مش عارفه لسه
ياسين :- مسك ايديها وقال انا مش عايز طلبى منك بالجواز يغير معاملتك معايا يا تمارا احنا حصل نصيب ولا محصلش احنا هنفضل أصحاب زى ما احنا
تمارا :- اتوترت وقالت ا.ا.اه طبعآ وابتسمت ليه وفى الوقت ده نزل يوسف وشاف ياسين وهو ماسك ايد تمارا اتعصب ولسه هيروح عنده
مالك :- اهدا يا يوسف هى حره تعمل اللى هى عايزه تعمله
يوسف :- بعصبيه شايف ماسك ايديها ازاى انا هروح اقطع أيده اللى ماسكها بيها دى
مالك :- امشى يا يوسف علشان خاطرى
يوسف :- لاء يا مالك وسابه وراح عند تمارا وياسين
ياسين :- مفكرتيش فى طلبى يا تمارا
تمارا :- اتنهدت وبصت ليه بتوتر
ياسين :- مش عايزك تخافى منى يا تمارا اوعدك أن انا هعوضك عن كل اللى فات هنسيكى كل حاجه وجعتك وافقى يا تمارا وافقى ومش هتندمى وفى الوقت ده جه يوسف وسمع كلام ياسين بص لتمارا وقال
يوسف :- اوعى توافقى يا تمارا
ياسين :- سيبك منه ووافقى يا تمارا
يوسف :- انتى بتحبينى انا يا تمارا وعمرك ما تقدرى تبقى مع حد غيرى
ياسين :- اوعى تسمعى كلامه يا تمارا مش ده يوسف اللى خان حبك وراح اتجوز واحده غيرك
يوسف :- داس على أسنانه وضرب ياسين بالبوكس فى وشه
ياسين :- رد ليه الضربه وضربه بالبوكس فى وشه
الاتنين مسكوا فى بعض
تمارا :- بس انت وهو انا خلاص اخد قرارى
الاتنين واقفوا وبصوا ليها علشان يعرفوا ايه هو القرار
تمارا :- انا..................