![](https://blogger.googleusercontent.com/img/b/R29vZ2xl/AVvXsEjVGuhE2772toGpG9wWUrm9yzqjqjOJ9MmRbB2H_IQ0MAUC5Xv-MMO0GlTNGcJVe_-asepdtyOb2b2T0HcpjhaF1PwZ25wXzqbeHmMwxy05qzZqeALWgnJ0xVrc4zB91q3hXsmYSB-mzR1QJ9qBoKSvjEwS0_csIKbR9z8_jtyax56QjifpkUwvqeUgG3ra/s320-rw/FB_IMG_1715644431771.jpg)
رواية مزاولة حب الفصل التاسع9والعاشر10بقلم دودو محمد
فى الشركه
دخل السكرتير المكتب عند تمارا وبلغها أن يوسف عايزها بصت لأصحابها واتنهدت وقالت
تمارا :- ماشى انا جايه وراك
يارا :- اللهى تنسترى طمنينى على بدر اخويه عايش ولا اروح ابلغ امى الخبر
رحمه :- متخافيش يا بت اخويه بيضرب بس مش بيموت
يارا :- يا قلب اختك يا اخويه تلاقى وشك بقى شوارع
تمارا :- بصت ليهم وابتسمت وقامت من على مكتبها ولسه هتخرج من الباب لاقت ندى داخله قالت ربنا ما يحرمك من الجنان اللى انتى فيه ده
ندى :- اسكتى بقى انا على كل اللى بيحصل ده المفروض اختفى من وشه خالص سنه اتنين لحد ما ينسى المهم رايحه فين
تمارا :- رايحه عند يوسف عايزينى
ندى :- ربنا معاكى
تمارا :- بوجع يارب وسابتها ومشيت راحت خبطت على الباب وسمعت صوت يوسف بيأذن ليها بدخول فتحت الباب ودخلت وقالت افندم
يوسف :- تعالى يا تمارا
تمارا :- مش فاضيه ورايا شغل
يوسف :- ادخلى يا تمارا بلاش عند
تمارا :- بصت ليه بغيظ ونفخت ودخلت قعدت وقالت اتزفت اهو عايز ايه
يوسف :- ليه عملتى المسلسل الهابط ده
تمارا :- بتوتر م.م.مسلسل ايه
يوسف :- مسلسل بدر
تمارا :- احم م.م.مش فاهمه
يوسف :- مش فاهمه ولا مش عايزه تفهمى
تمارا :- انت مالك بيا يا اخى حياتى وانا حره فيها بتدخل فيها ليه روح لست ارين بتاعتك وركز معاها هى مش معايا انا
يوسف :- وقف وراح عندها وقال انا عارف انك زعلانه منى ومن حقك تعملى كده وزياده بس انا غصب عنى مينفعش اتخلى عن ارين يا تمارا
تمارا :- انت يا ابنى مش بتفهم انا مقولتش انك تتخلى عنها انا بقولك شيلنى من دماغك وركز معاها هى وانا اه كنت متفقه مع بدر بس الاتفاق ده ممكن يبقى حقيقه فى اى وقت مع اى واحد دى حياتى وانا حره فيها ومش من حقك انك تتدخل فيها
يوسف :- تمارا افهمينى
تمارا :- قطعته وقالت انا لا عايزه افهمك ولا تفهمنى ولحد كده وكفايه بقى أطلع من حياتى زى ما انا هعتبرك انك مش موجود اصلا عن اذنك وسابته ومشيت
يوسف :- بص ليها بوجع واتنهد وقعد على الكرسى بتاعه وفى الوقت ده تليفونه رن بيبص فيه لاقه رقم ارين كتم الصوت وحدف التليفون على المكتب ونفخ وحط راسه ما بين ايديه
تمارا :- خرجت من المكتب عند يوسف وهى ماسكه دموعها بالعافيه ودخلت تجرى على الحمام وحطت ايديها على بؤقها وقعدت تعيط
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
انتهى وقت العمل ونزلت تمارا وندى ويارا ورحمه مع بعض ووقفوا على الرصيف وقالت ندى
ندى :- ما بلاش تروحى معاهم يا تمارا علشان خاطرى هتتعبى
تمارا :- لاء هروح علشان اثبت ليه أنه ولا حاجه
يارا :- يا بنتى انتى بتفكرى ازاى ما هو خلاص فهم انك لسه بتحبيه
تمارا :- يوووه بقى انا هروح يعنى هروح وسابتهم ومشيت
رحمه :- متقلقوش انا معاها
ندى :- خلى بالك منها يا رحمه احسن تمارا دماغها ناشفه ومش بتفكر أنها بتأذى نفسها كده
رحمه :- اكيد طبعآ هخلى بالى منها دى اختى يا ندى مش محتاجه توصينى عليها
ندى :- عارفه والله روحى يلا بتنادى عليكى
رحمه :- اوك باى وسابتهم وراحت عند تمارا ركبت معاها عربيتها
ندى :- وانتى يا يارا هتيجى معايا ولا هتروحى
يارا :- معاكى طبعآ واحشنى اخوكى الصراحه
ندى :- يخربيت كده مش بتحرمى
يارا :- مش بأيدى حاجه غير أن احبه واستحمل رخامته وفى الوقت ده جه بدر
ندى :- بضحك بدر ايه اللى عمل فيك كده
بدر :- لا ولا حاجه كنت بتمشى ودخلت فى قطر
يارا :- بضحك بتتريق
بدر :- اعملكم ايه ما انتو عارفين أن سى زفت ده هو اللى ضربنى وعمل فيا كده
ندى :- بضحك يعنى لا بتعرف تمثل ولا بتعرف تدافع عن نفسك كمان
بدر :- ادافع ايه بس ده عليه كفوف يخربيت كده بتنزل على الواحد بتعملوا حول اقسم بالله
ندى :- لالالا انت مشكله وشكلك مسخره
بدر :- سيبك منى المهم البت القمر دى اخت اللى ما يتسمى راحت فين
يارا :- تقصد مين
بدر :- يا بت اللى اسمها رحمه دى
ندى :- اااه رحمه دى مشيت مع تمارا بتسأل عليها ليه
بدر :- وهو بيعدل هدومه قال اصل البت شكلها معجبه بيا
يارا :- معجبه بيك انت وبشكلك اللى عايز مكانيكى ده احمد ربنا انها مشيت قبل ما تشوف منظرك ده
ندى :- انت تختفى خالص اليومين دول لحد ما اللى فى وشك ده يختفى
بدر :- عندك حق لازم اظبط نفسى كده علشان البت متتصدمش يا عين امها
الاتنين ضحكوا على كلام بدر
بدر :- يلا يا يارا
يارا :- لاء روح انت انا رايحه مع ندى
بدر :- طيب بس متتأخريش
يارا :- حاضر ومشيت هى وندى ووقفوا تاكسى وراحوا على البيت وبعد وقت وصل التاكسى على بيت ندى وطلعوا الاتنين عند باب الشقه ورنت ندى الجرس وفتحت امها الباب وقالت
ام ندى :- ايه اخرك كده يا بنتى
ندى :- معلش يا ماما كان عندى شغل كتير ليه فيه حاجه
ام ندى :- ايوه اخوكى تعبان وكل شويه يسأل عليكى
يارا :- بقلق مسكت ايد ندى
ام ندى :- ازيك يا بنتى معلش مأخدش بالى
يارا :- الحمدالله يا خالتى الف سلامه على انس
ام ندى :- الله يسلمك يا بنتى ادخلوا وسابتهم ودخلت المطبخ
ندى :- دخلت وقالت هروح اشوف انس عايز ايه وجايه ليكى بسرعه
يارا :- ندى بالله عليكى سيبى الباب مفتوح علشان ابص عليه واطمن هموت من ساعه ما امك قالت إنه تعبان
ندى :- حاضر وخبطت على الباب ودخلت عند انس وقالت نعم يا انس
انس :- وهو بيكح قال اتأخرتى كده ليه
ندى :- كان عندى شغل كتير
يارا :- كانت بتبص عليه وهى حابسه دموعها من كتر القلق عليه
انس :- كح وقال حضرى ليا الهدوم اللى هنزل بيها الشغل
ندى :- هتنزل وانت تعبان كده
انس :- لاء هقعد فى البيت علشان شوية برد
ندى :- بزعل انت حر هحضرك هدومك حاضر واخدت هدومه تكويها
يارا :- كانت عماله تبص عليه وهو فى اوضه
انس :- اخد باله من يارا وهى بتبص عليه راح عند الباب وقفله فى وشها
يارا :- نفخت وقالت رخم حتى وانت مريض ودخلت اوضت ندى
وبعد شويه دخلت ندى اوضتها لاقت يارا قاعده على السرير وهى بتاكل فى ضوافيرها بصت ليها بأستغراب وقالت
ندى :- مالك
يارا :- اخوكى ده مش بيتهد أبدآ حتى وهو مريض متعجرف
ندى :- ليه عمل ايه
يارا :- قفل باب الاوضه فى وشى مش عارفه هو ليه بيكرهنى كل الكره ده
ندى:- انس لا بيحبك ولا بيكرهك يا يارا انتى مش فى باله خالص ولا شاغل تفكيره بيكى وده اللى لازم تعرفيه وعلى طريقته معاكى دى انس اخويه بيتعامل بيها مع اى حد مش معاكى انتى بس
يارا :- انا تعبت اوى يا ندى من حبى ليه وهو لا هنا
ندى :- مش اخويه بس بتمنى انك تشليه من قلبك وتفكيرك ده خالص ونفسى ربنا يرزقك بأبن الحلال اللى يسعدك ويحبك بجد
يارا :- انا مش عايزه حد غير انس اخوكى يا ندى
ندى :- يبقى هتتعبى كتير اوى فى حياتك يارا ربنا يهديه عليكى يارب
يارا :- بتنهيده يارب يا ندى يارب
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى الاتيليه
وصلت رحمه وتمارا وبعد وقت وصل يوسف ومعاه ارين ودخلوا الاربعه على الاتيليه وكانت ارين ماسكه ايد يوسف وعين تمارا عليهم في كل مكان يدخلوه قربت رحمه لتمارا وقالت بصوت واطى
رحمه :- مش كنتى روحتى البيت احسن بدل وجع القلب اللى انتى فيه ده
تمارا :- بزعل لازم اثبت لنفسى يا رحمه أن هو خلاص مش هيبقى ليا
رحمه :- ازاى وانتى عينك مش بتنزل من عليهم فى كل مكان يدخلوه
تمارا :- سيبك منى وبلاش شغل الوشوشه ده احسن اخوكى متابع وامشى يلا نروح عندهم
وراحوا الاتنين عند ارين ويوسف
رحمه :- ايه يا ارين مفيش حاجه عجباكى ولا ايه
ارين :- لاء مش لاقيه الفستان اللى بحلم بيه يا رحمه
صاحبة الاتيليه :- تقدرى تختارى من الكتالوج اللى حضرتك عايزاه واحنا هنصممه ليكى فى أيام
ارين :- اخدت الكتالوج منها وقالت تعال يا يوسف اختار معايا
يوسف :- كان سرحان فى تمارا ومأخدش باله من كلام ارين
ارين :- يوسف يا يوسف
يوسف :- ها ا.ا.ايوه يا ارين
ارين :- بقولك تعال اختار معايا الفستان
يوسف :- انا مش بفهم فى الحاجات دى يا ارين عندك رحمه وتمارا اختاروا مع بعض
ارين :- بزعل ماشى
رحمه :- ايه رأيك فى ده يا ارين
ارين :- ايه ده ده مقفول خالص يا رحمه
رحمه :- مقفول ازاى يعنى ده شكله شيك ورقيق جدآ على فكره
ارين :- لالالا مش عجبنى
رحمه :- طيب بزمتك ده وحش يا تمارا
تمارا :- شافت فستان عجبها وسرحت فيه
رحمه :- تمارا انتى يا بنتى
تمارا :- ها ايوه
رحمه :- بقولك الفستان ده وحش
تمارا :- لاء جميل اوى تحفه
ارين :- على فكره انتوا الاتنين مش عندكم ذوق خالص
تمارا :- والله وانتى بقى اللى عندك ذوق ولا علشان مش بنختار فساتين عريانه وبتظهر كل جسمنا يبقى معندناش ذوق
ارين :- هى دى الموضه يا جاهله
تمارا :- اظهرى جسمك بالموضه وافرحى بيه اوى علشان لما تتشوى فى نار جهنم تعرفى أن الله حق وسابتها ومشيت
ارين :- بنى ادمه خنيقه
رحمه :- ارين مش هسمح ليكى انك تغلطى فيها قدامى هى مغلطتش هى بتنصحك وانتى حره تقبلى النصيحه ولا لاء عن اذنك وسابتها وراحت وراه تمارا
ارين :-بصت ليوسف بغيظ وقالت عجبك كده
يوسف :- مليش دعوه انتو بنات مع بعض ايه هيدخلنى ما بينكم
ارين :- انت ليه بقيت كده معايا يا يوسف
يوسف :- كده ازاى مش فاهم
ارين :- يعنى مبقتش تزعل لما حد بيغلط فيا ولا بدافع عنى يعنى ده غير ان انا مش حاسه انك فرحان بجوازنا ده يا يوسف
يوسف :- اتنهد وقال يا ارين يا حبيبتى انتوا بنات مع بعض مينفعش ادخل ما بينكم وبعدين انا فرحان اوى أننا خلاص هنتجوز بس كل الحكايه أن انا عليا ضغط شغل بسبب أننا قدمنا الفرح وعايز اخلصه قبل الجواز
ارين :- يعنى انت لسه بتحبنى يا يوسف
يوسف :- بضحكة توتر ا.ا.ايوه طبعآ يا ارين
ارين :- بعدم تصديق مش باين يعنى
يوسف :- ارين انتى عايزه تعملى اى مشكله وخلاص ركزى بقى فى اللى انتى بتعمليه علشان نروح وسابها ومشى
ارين :- بصت عليه بدموع واتنهدت وبصت فى الكتالوج واختارت فستان عجبها جدآ وراحت عند يوسف وقالت انا خلصت
يوسف :- طيب يلا اركبى
ارين :- ركبت وقالت ممكن بقى بكره ننزل انا وانت بس من غير جوز الخيل دول نشترى باقى حاجات الفرح
يوسف :- شغل العربيه وقال ربنا يسهل ومشى بيها
تمارا :- اتحركت وراهم بالعربيه وقالت مش ملاحظه ان اخوكى اتغير مع ارين ومبقاش يدافع عنها زى الاول
رحمه :- ايوه انا ملاحظه ده من بدرى وقولت هيرد عليكى ساعة الفستان مردش انا استغربت الصراحه
تمارا :- اتنهدت وقالت اخوكى فاق بس متأخر اوى
رحمه :- ربنا يصلح حاله يارب
تمارا :- اتنهدت وقالت يارب وبعد وقت وصلوا الاربعه على الفيلا
سميه :- عملتوا ايه
رحمه :- هزت كتفها وقالت مفيش حاجه عجبتها
سميحه :- يعنى ايه لسه الفستان
ارين :- لاء يا طنط اخترت فستان تحفه
تمارا :- امممم تلاقيها اختارت قميص نوم مش فستان فرح
سميه :- ليه مش انتوا كنتوا مع بعض
رحمه :- ايوه بس زهقنا سبناها وخرجنا
سميحه :- طيب يلا علشان تاكلوا
تمارا :- وقفت وقالت مليش نفس انا طالعه اوضى
سميه :- يا بنتى كلى لقمه الاول
تمارا :- معلش يا ماما تعبانه ومش قادره وسابتهم وطلعت اوضتها
يوسف :- بص عليها وهى طالعه وقام وقف وقال عن اذنكم
سميحه :- رايح فين مش هتاكل انت كمان
يوسف :- لاء مليش نفس وسابهم ومشى
سميه :- هو فيه ايه مالهم الاتنين دول
رحمه :- ها م.م.مفيش بس ضغط الشغل جامد عليهم سيبك منهم انا هاكل
سميحه :- وانتى يا ارين
ارين :- لاء مش عايزه وسابتهم ومشيت
سميه :- هقوم احضرك الاكل يا بنتى
رحمه :- هو بابا فين
سميحه :- ولا نعرف الاتنين بيروحوا فين
رحمه :- ايه يا سوسو شكه فيهم ولا ايه
سميحه :- انا عمرى ما اشك فى ابوكى انا كنت ببقى واثقه فيه واحنا عايشين وسط الأجانب هاجى هنا واشك فيه
رحمه :- يا واد يا واثق من نفسك انت
وفى الوقت ده سميه حضرت الاكل لرحمه وقعدوا التلاته يتكلموا لحد ما جه الليل وكل واحد راح على اوضه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى اوضت يوسف
وقف يوسف فى الشباك بتاعه يبص على شباك اوضت تمارا بس مخرجتش تمارا خالص الشباك اتنهد بوجع ودخل قعد على سريره وفى الوقت ده باب اوضه خبط ودخلت ارين وقعدت جنبه على السرير ونامت على كتفه وقالت
ارين :- مالك يا يوسف
يوسف :- مليش يا ارين تعبان شويه من ضغط الشغل
ارين :- حسست على صدره وقالت تعال وانا انسيك كل التعب
يوسف :- اتوتر وقام وقف وراح عند الشباك وقال ا.ا.ارين روحى اوضك احسن ما حد يشوفنا
ارين :- راحت عنده وحضنته من ضهره وقالت يوسف انت واحشتنى اوى
يوسف :- يا ارين قولتلك مش هينفع يحصل كده تانى كلها كام يوم نبقى مع بعض علطول
ارين :- انت اتغيرت يا يوسف مش انت يوسف اللى انا حبيته
يوسف :- لف ليها وقال ارين افهمينى احنا غلطنا كتير اوى ومكانش لازم يحصل اللى حصل ما بينا ده انا بأنب نفسى على كل لحظه غضبت فيها ربنا
ارين :- ده مش كلامك يا يوسف ده كلام الزفته اللى اسمها تمارا
يوسف :- تمارا كانت سبب علشان افوق من اللى كنت بعمله
ارين :- يوووووه انا زهقت من يوم ما جينا هنا ودخلت حياتنا واحنا كل حاجه اتغيرت ما بينا
يوسف :- انتى شاربه يا ارين
ارين :- اه عادى فيها ايه
يوسف :- يا بنتى افهمى بقى احنا فى مصر مينفعش اللى بتعمليه ده
ارين :- انا مش هغير اللى اتعود عليه يا يوسف
يوسف :- لاء يا ارين انتى لازم تتغيرى علشانى لو بتحبينى بجد
ارين :- انت حبتنى كده يا يوسف ايه اللى اتغير دلوقتى انا حابه شخصيتى ومش هغيرها عن اذنك وسابته ومشيت
يوسف :- نفخ وراح قعد على السرير وحط راسه ما بين ايديه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى اوضت تمارا
كان النور مطفى وهى واقفه وراه الشباك بتابع نظرات يوسف على الشباك بتاعها ودموعها نازله منها وشويه لاقته دخل اتنهدت بوجع وقعدت تبص على الشباك شويه ولسه هتدخل لاقت يوسف رجع وقف تانى وارين بتحضنه من ضهره اتنهدت بوجع ودخلت اترمت على السرير وقعدت تعيط وحست بأيد على كتفها بصت لاقته ابوها قامت قعدت ومسحت دموعها
عماد :- مالك يا بنتى
تمارا :- م.م.مفيش يا بابا انا كويسه
عماد :- لاء مش كويسه يا بنتى مفيش حد كويس بيعيط بوجع وحرقه كده
تمارا :- اترمت فى حضنه وقعدت تعيط
عماد :- طبطب عليها وقال انسيه يا بنتى
تمارا :- بحاول مش قادره اصله مش حب عادى يا بابا ده حب عاش معايا سنين عمرى وصحيت على خزلان وخيبة امل صعبه اوى عليا يا بابا
عماد :- حاسس بيكى يا بنتى طيب ايه رأيك لو تروحى شرم الشيخ ولا الغردقه تغيرى جو شويه وتريحى اعصابك
تمارا :- اممم مش عارفه طيب والشغل
عماد :- هخلى عمك حسام يكلم المدير يديكى اجازه
تمارا:- فعلا يا بابا انا محتاجه اريح اعصابى شويه انا هروح اسكندريه احسن برتاح اكتر هناك
عماد :- اللى انتى عايزاه الصبح حضرى شنتطك وهروح اوصلك المطار
تمارا :- اترمت فى حضنه وقالت ربنا يخليك ليا يا بابا انا من غيرك ولا حاجه
عماد :- طبطب عليها وقال ربنا يريح قلبك يا بنتى يلا نامى يا حبيبتى تصبحى على خير وباس راسها
تمارا :- ابتسمت ليه بحب وقالت وحضرتك من اهل الخير
عماد :- غطاها كويس وطفى النور وخرج وقفل الباب وراه
تمارا :- اتنهدت وغمضت عينيها ونامت
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
اشرقت شمس صباح يوم جديد بنورها الساطع فى سماء القاهره لتبدء تمارا بفتح عيونها قامت من على السرير راحت عند شباك اوضتها بصت منه على شباك اوضت يوسف لاقته قاعد فى الجنينه بيبص عليها دخلت تجرى قعدت على حرف السرير واتنهدت بوجع بصت على الدولاب بتاعها وافتكرت كلام ابوها ليها قبل ما تنام قامت مسكت الشنطه بتاعتها من فوق الدولاب وحطتها على السرير وفتحتها وراحت فتحت الدولاب بتاعها واخدت الهدوم بتاعتها حطتها فى الشنطه واخدت كل اللى هى محتاجه وقفلت الشنطه ودخلت الحمام وبعد وقت خرجت ولبست هدومها وأدت فرضها ونزلت وقالت
تمارا :- صباح الخير
سميه :- بأستغراب صباح النور ايه الشنطه دى
عماد :- بنتك استأذنت منى هتروح يومين اسكندريه تريح اعصابها شويه
سميه :- طيب استنى بعد فرح يوسف كلنا نروح معاكى
تمارا :- بوجع لاء مش هستنا لو عايزه تيجى بعد الفرح تعالى انتى براحتك
كريم :- طيب اصبرى انا اجى معاكى
عماد :- ومدرستك
كريم :- مالها
عماد :- انت هتستعبط يالا
كريم :- ايه فيه ايه بس دول يومين اريح فيهم شويه من المذاكره
عماد :- بص ليه شويه ومتكلمش
كريم :- بالله عليك وافق قوليلوا حاجه يا تيمو
تمارا :- خلاص يا بابا سيبه يجى معايا علشان خاطرى
عماد :- اتنهد وقال ماشي بس خدى بالك عليه يا تمارا انتى عارفه اخوكى
تمارا :- متقلقش يا بابا
كريم :- ايوه بقى هطلع اجهز نفسى هوا وسابهم وطلع يجرى على اوضه
سميه :- واحنا هنيجى ليكم بعد فرح يوسف
تمارا :- احنا تقصدى انتو مين
سميه :- انا وبابا وسميحه وحسام ورحمه
تمارا :- اتنهدت وقالت اه إن شاءالله
سميه :- خلى بالك على نفسك وعلى اخوكى وكلى كويس والبسى هدوم تقيله شويه هناك الجو هوا عن هنا
تمارا :- متقلقيش يا ماما وبصت فوق وقالت بصوت عالى يلا يا كريم اخلص
كريم :- بصوت عالى هو انا لحقت اصبرى شويه
رحمه :- بأستغراب صباح الخير
سميه :- صباح النور يا بنتى
رحمه :- ايه الشنطه دى
تمارا :- رايحه اسكندريه
رحمه :- نعم يا اختى اسكندريه واخدى القرار ده امته ما احنا كنا مع بعض طول النهار امبارح
تمارا :- اخدوا بليل هروح اريح اعصابى شويه
سميه :- واحنا هنروحوا ليها بعد فرح يوسف
رحمه :- سكتت شويه وقالت احسن حاجه هتعمليها روحى يا قلبى وخلى بالك من نفسك
كريم :- نزل من فوق ومعاه شنتطه وقال انا خلصت
رحمه :- كريم رايح معاكى
تمارا :- ايوه
رحمه :- احسن برضه علشان يخلى باله منك
تمارا :- بتريقه هو اللى هيخلى باله منى ؟
كريم :- انتوا هتتكلموا كتير كده امال عماله تستعجلينى ليه بقى
تمارا :- حط لسانك جوه بؤقك وافصل شويه
كريم :- ايه معاملة مرات الاب دى خلينا لذاذ مع بعضينشا ده احنا رايحين اسكندريه يعنى البحر والهوا اللى يردوا الروح بلاش كرشة نفس اللهى تنسترى يا اختى
تمارا :- هوف مش هخلص من غلاستك امشي يا اخويه امشي وبصت لابوها وامها ورحمه وقالت يلا باى خلى بالكم من نفسكم
عماد :- استنى انا جاى اوصلكم
تمارا :- خليك انت يا بابا هروح بعربيتى
عماد :- الطريق هيبقى طويل عليكى
تمارا :- متقلقش يلا سلام وسابتهم وخرجت هى وكريم حطت الشنط فى العربيه وركبت هى وكريم وشغلت العربيه ومشيت بيها على اسكندريه
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى فيلا حسام
دخلت رحمه وهى حاسه بالزعل على تمارا وقعدت على السفره من غير ولا كلمه
سميحه :- بأستغراب ايه رجعك تانى
رحمه :- هروح الشغل مع يوسف
يوسف :- ليه بقى أن شاءالله انتى مش بتيجى مع تمارا
رحمه :- ايوه بس تمارا مش رايحه الشركه اليومين دول
يوسف :- بلهفه ليه مالها
ارين :- بصت ليوسف بغيظ
رحمه :- مفيش هى كويسه بس اخدت اجازه يومين وراحت اسكندريه
يوسف :- بصدمه راحت اسكندريه
رحمه :- ايوه واحنا هنروح ليها بعد الفرح
يوسف :- قفل أيده بعصبيه وغمض عينه وداس على أسنانه ووقف وقال انا ماشي
سميحه :- اقعد كمل أكلك
يوسف :- شبعت وبص لرحمه وقال قومى يلا اخلصى
رحمه :- وقفت وقالت يلا
وخرجوا الاتنين مع بعض وراحوا على الشركه
ارين :- فرحت لما عرفت أن تمارا مشيت وضحكت بأنتصار وكملت اكلها
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى الشركه
وصل يوسف ورحمه ودخلوا الاتنين مع بعض وكل واحد راح على مكتبه
رحمه :- صباح الخير يا بنات
ندى ويارا :- صباح الفل
ندي :- امال فين تمارا
رحمه :- تمارا اخدت اجازه وراحت يومين اسكندريه
يارا :- احسن قرار اخدته تمارا كانت هتتعب اوى لو حضرت فرح يوسف
رحمه :- فعلا حالتها كانت هتسوء اكتر من كده ربنا يريح قلبها
ندي ويارا :- يارب
رحمه :- ايه رأيكم يا بنات تخدوا اجازه انتوا كمان وتيجوا معانا اسكندريه بعد فرح يوسف
يارا :- فكره حلوه انا موافقه وهيجى معايا بدر وانتى يا ندي
ندي :- معرفش لسه بس انس ممكن ميرضاش
رحمه :- اتحايلى عليه وهو هيوافق
ندي :- انس اخويه يوافق بالمحايله قلبك ابيض اصلك متعرفيش اخويه انس صعب قد ايه
يارا :- اسألينى انا على انس ده واحد شايل مخه وحاطط مكانه حجر
رحمه :- لدرجاتى
ندي :- واكتر وحياتك
رحمه :- حاولى معاه يمكن يوافق
مالك :- هو مين ده اللى يوافق ويوافق على ايه
ندي :- غريبه اول مره متدخلش وانا بتكلم
مالك :- لاء ما خلاص بقى ما انا عرفت كل حاجه وغمز ليها
ندي :- اتكسفت وبصت فى الارض
مالك :- المهم مين ده اللى يوافق
رحمه :- انس اخوه ندي
مالك :- بقلق يوافق على ايه
رحمه :- يوافق أن ندي تيجى معانا اسكندريه بعد فرح يوسف
مالك :- بأرتياح اااااه ياريت وانا كمان هروح معاكم
رحمه :- بفرحه بجد دى هتبقى رحله عنب
مالك :- حاولى يا ندي تيجى معانا
ندي :- بكسوف هحاول
مالك :- يلا هسيبكم يا بنات واروح اشوف شغلى وسابهم ومشي
ندي :- هييييييح هو فيه كده يا ناس
يارا :- اتهدى بقى هو انتى اخدى أن كل يوم يسمعك
ندي :- شوفتى غمزته ليا يا لهوى يا جدعان هو فيه كده
رحمه :- يارب يقفشك زى كل يوم علشان ترتاحى
ندي :- بضحك ربنا يجعل كلامنا خفيف عليهم والتلاته قعدوا يضحكوا
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى مكتب يوسف
دخل مالك عند يوسف لاقه متعصب دخل قعد على الكرسي وقال
مالك :- مالك فيه ايه
يوسف :- بعصبيه تمارا
مالك :- مالها تمارا
يوسف :- راحت اسكندريه
مالك :- ما تروح هى حره انت ايه مزعلك
يوسف :- ها ز.ز.زعلان علشان مش هتحضر فرحى
مالك :- بجد زعلان علشان كده بس
يوسف :- ا.ا.ايوه هو ده السبب بس
مالك :- يوسف انا عرفك اكتر من نفسك واللى زعلك أنها بعدت عنك بعد ما اخد على وجودها بس على فكره بقى اللى عملته تمارا ده اسلم حل ركز فى فرحك بس يا يوسف مينفعش اللى انت عامله فى نفسك وفيها ده
يوسف :- انا مبقتش انام خالص يا مالك مش قادر ابطل افكر فيها
مالك :- انت لازم تخرج من الدايره دى يا يوسف علشان هتتعب اوى فى حياتك
يوسف :- انت اكتر واحد عارف ان تمارا حب عمرى اللى عاش فى قلبى من طفولتى
مالك :- عارف بس انا كتير قولتلك بلاش تمشي وراه شهواتك وانك تبعد عن سكت ارين بس انت كنت ماشى وراه شيطانك وده النتيجه يا صاحبى ومش قدامك اى حل غير انك تتجوز ارين
يوسف :- سكت شويه وقال لاء فيه يا مالك
مالك :- بأستغراب ايه هو
يوسف :- ............
🦋مزاولة حب 🦋 10
📌الفصل العاشر📌
فى اسكندريه
وصلت تمارا بالعربيه هى وكريم وراحوا الشاليه الخاص بيهم واول ما دخلت قعدت على الكرسي بتعب وقالت
تمارا :- خلااااااص مش قادره هموت واناااام
كريم :- هو ايه اللى خلاص مش قادره هموت وانام قومى كده ربنا يهديكى حد يشوف منظر البحر ده وينام
تمارا :- اه ما انت كنت قاعد ومش حاسس بحاجه انا اللى اتكسر ضهرى من السواقه
كريم :- انتى مالك بتتكلمى كده شبه الناس العواجيز قومى كده خلى عندك نشاط من هوا اسكندريه اللى يرد الروح
تمارا :- كريم روح انت احيات عيالك يا شيخ واطلع من دماغى انا هنام يعنى هنام
كريم :- انا الغلطان وعايز ضرب الجزم أن جيت معاكى اللهى الناموس يفضل يقرص فيكى ومتعرفيش تنامى يا بعيده ها وسابها وخرج
تمارا :- اللهى يوعدك بمعزه حوله يا كريم يا ابن ام كريم وقامت دخلت اوضتها واترمت على السرير وقالت اااااااه يا جسمى يا انى يا اما وغمضت عينيها بتعب ونامت
كريم :- خرج من الشاليه ووقف قصاد البحر وقال بصوت عالى حماااااار يا اسكندريه
الكل بص لكريم بأستغراب
كريم :- بص لناس وقال انا لو حلفتلكم أن قصدى اقول عمار يا اسكندريه محدش هيصدق صح وقال احم فرصه سعيده يا اخواننا وطلع يجرى على الشاليه من تانى وقال يا كسفتك السوده يا كيمو هو الحرف ده اللى خرب الدنيا ونام على الكنبه وقال حلو النوم ماله ما زى الفل ومحترم اهو وغمض عينه ونام
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى القاهره
فى فيلا حسام
كان يوسف قاعد فى اوضه وبيفكر فى الكلام اللى قاله لمالك صحبه فى المكتب والباب خبط قال بصوت عالى
يوسف :- ادخل
سميحه :- دخلت وقالت لسه صاحى يا ابنى
يوسف :- ايوه يا ماما خير
سميحه :- دخلت قعدت جنب يوسف وقالت مالك يا حبيبى
يوسف :- ابتسم ليها وقال مفيش يا امى شوية إرهاق من ضغط الشغل
سميحه :- انت بتكدب يا يوسف أنا امك واعرفك اكتر من نفسك قول مالك ومتخبيش عليا يا حبيبى
يوسف :- وقف وقال يا حبيبتى متقلقيش عليا انتى عارفه بقى اليومين دول بفكر فى الفرح وكده عريس بقى يا امى وابتسم ليها
سميحه :- ربنا يسعدك يا حبيبى نام بقى بكره عندك يوم طويل علشان تحضير الفرح ولسه هتمشى
يوسف :- ماما
سميحه :- ايوه يا حبيبى
يوسف :- كنت عايز اقولك على حاجه
سميحه :- قعدت وقالت خير يا حبيبى
يوسف :-.........
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى بيت ندي
راحت ندي عند باب اوضت أنس وخبطت بتوتر وسمعت صوت انس بيقولها تدخل فتحت الباب بخوف وقالت
ندي :- ا.ا.انت لسه صاحي
انس :- بجديه انتى شايفه ايه
ندي :- احم ص.ص.صاحي
انس :- يبقى بلاش اسأله غبيه وادخلى فى الموضوع علطول
ندي :- ها و.و وانت عرفت ازاى أن انا عايزه اكلمك فى موضوع
انس :- من شكلك طبعآ انا مش لسه قايلك بلاش اسأله غبيه اخلصى مش فاضى ليكى انا
ندي :- وهى بتدعك ايديها فى بعض قالت بتوتر ك.ك.كنت ع.ع.عايزه اطلع رحله مع البنات اصحابي
انس :- نعم يا اختى ومن امته انا بسمح ليكى تطلعى رحله مع اى حد غيرنا
ندي :- انس بالله عليك وافق الشله كلها هتروح اسكندريه تمارا ويارا ورحمه صحبتنا
انس :- لاء
ندي :- بدموع وغلاوة بابا عندك وافق
انس :- بجديه قولتلك لاء
ندي :- انت مش واثق فى اختك
انس :- واثق طبعآ علشان انتى عارفه لو يوم فكرتى تعملى غلط هدفنك بالحياه
ندي :- وانا عمرى ما افكر اعمل حاجه غلط علشان متربيه كويس وبخاف من ربنا وافق بقى
انس :- بصوت عالى قولتلك لاء
ندي :- احنا بنات مع بعض يا انس مفيش غير مالك وبدر اخوه يارا ودول محترمين جدآ وتقدر تسأل عليهم
انس :- امشي يا ندى علشان ممديش ايدى عليكى
ندي :- علشان خاطرى وافق
انس :- بصوت عالى قولتلك امشي خلصنا بقى
ندي :- بصت ليه بدموع وطلعت تجرى على اوضتها
ام ندي :- جات تجرى وقالت فيه ايه يا انس بتزعق ليه
انس :- بعصبيه الست هانم بنتك عايزه تطلع رحله لوحدها مع اصحابها وفيها شباب
ام ندي :- وفيها ايه يا ابنى اختك متربيه كويس سيبها تروح تفك عن نفسها شويه
انس :- ايه اللى انتى بتقوليه ده يا ماما انتى عايزه اختى تروح رحله فيها شباب واحنا كمان مش معاها
ام ندى :- مش قصدى يا حبيبى بس قولت تروح مع البنات تفك شويه بدل ما احنا حرمنها من الخروج خالص كده علطول من الشغل للبيت ومن البيت لشغل
انس :- لاء يا ماما ندي مش هتروح الرحله دى
ام ندي :- يا حبيبى علشان خاطري سيبها تروح
انس :- يا امى خلصنا بقى قولت لاء يعنى لاء
ام ندي :- طيب ايه رأيك نروح معاها انا كمان مخنوقه من قعدت البيت طول النهار
انس :- مش هينفع اخد اجازه من الشغل دلوقتى
ام ندي :- خلاص خليك انت فى شغلك هنا واروح انا وهى
انس :- مش هينفع برضه يا ماما مش هأمن عليكم وانتو لوحديكم
ام ندي :- يعنى يا ابنى لا كده نافع ولا كده نافع نعمل ايه بقى
انس :- اتنهد وقال بصى يا امى اصبرى شويه وانا اوعدك هاخد اجازه واخدكم فى المكان اللى انتوا عايزينه بس مينفعش دلوقتى خالص
ام ندي :- اتنهدت وقالت ربنا يسهل تصبح على خير وسابته ومشيت راحت خبطت على باب اوضت ندي وفتحته ودخلت لاقتها نايمه على السرير وعماله تعيط راحت قعدت جنبها وطبطبت عليها وقالت اهدي يا حبيبتى
ندي :- بدموع هو ليه بيعمل معايا كده المفروض أنه مكان بابا الله يرحمه ويبقى حنين عليا مش كل حاجه اطلبها منه يقولى لاء لاء انا لو بابا كان عايش مكانش هيقبل أن ابنك يعمل معايا كل ده
ام ندي :- يا حبيبتى اخوكى خايف عليكى وعلى سمعتك مش عايز حد يتكلم عليكى ويجيب سيرتك لما يعرف انك مسافره مع شباب
ندي :- يا ماما دول اصحابى البنات وبدر اخوه يارا وانتى عارفه بدر مؤدب ازاى ومالك وده شاب محترم جدآ واصلا مليش كلام معاه كتير انا كان ممكن اخبى ومقولش أن فيه شباب طالعين معانا ومكانش حد فيكم هيعرف بس انا مش بحب الكدب وبحب اكون صريحه معاكم
ام ندي :- يا بنتى احنا واثقين فيكى والله وعارفين بدر كويس اوى بس اللى اسمه مالك ده اول مره نسمع عنه
ندي :- بتوتر ها د.د.ده شاب مؤدب جدآ يا ماما هو لسه بقاله كام يوم فى الشركه كان عايش فى إيطاليا ورجع يستقر فى مصر
ام ندي :- بأبتسامه شكلك عارفه كل حاجه عنه
ندي :- ها م.م.ما هو شغال معانا وصاحب يوسف صديقنا برضه فى الشغل
ام ندي :- بغمزه وخاطب على كده ولا متجوز
ندي :- بأندفاع لاء لا ده ولا ده
ام ندي :- بصت ليها بأبتسامه
ندي :- احم اقصد يعنى اكيد لاء علشان عايش هنا لوحده ومش لابس دبله لا هنا ولا هنا
ام ندى :- طبطبت على كتفها وقالت لو فيه خير ربنا يقربه منك ويجعله من نصيبك لو فيه الشر يبعده عنك ويكفيكى شره ويرزقك بأبن الحلال اللى يسعدك تصبحى على خير يا حبيبتى وسابتها وخرجت وقفلت الباب وراها
ندي :- اتنهدت وقالت يارب يا ماما يجعله من نصيبى وافتكرت انها مش هتطلع معاهم الرحله دموعها نزلت منها وقالت اعمل ايه بقى يا ربى هوف انا اتخنقت من تحكماته توب عليا يارب من العيشه دى ونامت على السرير وغمضت عينيها
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
اشرقت شمس صباح يوم جديد لتبدء تمارا بفتح عيونها قامت قعدت على السرير ومسكت تليفونها بصت على الساعه وشافت مين اتصل بيها وحطته تانى جنبها وقالت
تمارا :- يااااه انا نمت كل ده ازاى وحطت ايديها على بطنها وقالت انا جوعت اوى لما اطلع اشوف الولا كريم وقامت خرجت من الاوضه لاقت كريم نايم على الكنبه راحت عنده وقالت زفت الطين يا كريم
كريم :- شششش اسكتى بقي
تمارا :- قوم يالا
كريم :- لاء انا عايز انام
تمارا :- يا ابنى قوم شكلك سهرت بليل
كريم :- سهرت ايه بس انا اتحرجت ونمت علطول
تمارا :- ليه هببت ايه
كريم :- قام قعد وقال اول ما شوفت المايه اندفعت اوى وراه مشاعرى وبصوت حمش كده وعالى قولت حمااااار يا اسكندريه حسيت الناس هتبلعنى دخلت اجرى ومن ساعتها نايم النومه دى
تمارا :- وهى مش قادره تبطل ضحك قالت يا نهار اسوس على الكسفه كان لازم مشاعرك تندفع اوى كده
كريم :- اعمل ايه اهبل بقى
تمارا :- بضحك طيب قوم يا اهبل علشان نفطر هموت من الجوع
كريم :- وانا كمان هموت من الجوع بس استنى ثوانى ومسك التليفون بتاعه
تمارا :- ايه هتعمل ايه
كريم :- هعمل فيديو على التيك توك
تمارا :- يخربيت التيك توك وسنينه وسابته ودخلت الحمام
كريم :- عمل الفيديو وقام جهز نفسه واده فرضه وتمارا جهزت والاتنين خرجوا مع بعض وفطروا وقام كريم وقف
تمارا :- رايح فين
كريم :- ايه هنطلق بقى وانا جاى معاكى علشان اقعد جنبك سلام يا مزه وسابها ومشي
تمارا :- اتنهدت ودفعت الحساب وقامت تتمشى شويه على البحر
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى شقة ندي
صحيت ندي من نومها على صوت جرس الباب بتاعهم قامت بأستغراب من على سريرها علشان تشوف مين وفتحت الباب بتاع اوضتها وخرجت لاقت امها فاتحه الباب وبتسلم على يارا بصت ليها بأستغراب وقالت
ندي :- يارا خير فيه ايه
يارا :- هو ايه اللى فيه ايه هو علشان اجى لصحبتى يبقى فيه حاجه
ندي :- فهمت أن يارا جايه علشان تشوف اخوها ابتسمت ليها وقالت لاء طبعآ ده بيتك تيجى فيه فى اى وقت تعالى واخدتها ودخلت الاوضه وقالت بقى انتى جايه ليا انا يا واطيه
يارا :- ما هو انا منمتش طول الليل من القلق على اخوكى علشان كان تعبان وما صدقت النهار طلع علشان اجى اشوفه واطمن عليه
ندي :- هيييح يقطع الحب وسنينه
يارا :- طيب يلا بسرعه روحى وافتحى الباب خلينى اطمن عليه
ندي :- لاء مش هروح انا مش طيقه ابص فى وشه
يارا :- نااااااعم يا اختى ده اللى زيك يحمد ربنا أن معاها اخ زى انس ده ياريته معايا وانا ابص فى وشه ومنزلش عينى من عليه ولا ثانيه واحده
ندي :- علشان انتى بعيده عنه لكن لو شايفه اللى انا شيفاه مش هتقولى كده خالص
يارا:- ليه يعنى عملك ايه بقى
ندي :- اتحايلت عليه انا وماما امبارح علشان يوافق اروح معاكم اسكندريه ومرضاش
يارا :- ما انتى عارفه من الاول أنه مش هيوافق ايه الجديد
ندي :- بس انا تعبت وزهقت يا يارا كل حاجه لاء لاء وفى الوقت ده سمعت صوت خبط على باب اوضتها قالت ادخلى يا ماما
انس :- فتح الباب وقال احم فاضيه
ندى :- بصت ليارا بصدمه وبصت لانس وقالت انس
انس :- انتى شايفه مين
يارا :- كانت واقفه مصدومه وفاتحه بؤقها وبتبص لانس
ندي :- ت.ت تعال يا انس خير فيه حاجه
انس :- وقف قصادها ومسك وشها بين ايديه وقال جهزى نفسك علشان بكره رايحين اسكندريه
ندي :- ها
انس :- ايه مش موافقه الغي الاجازه بتاعتى
ندي :-بفرحه ها تلغى ايه لاء طبعآ يعنى انت وافقت اروح اسكندريه علشان ابقى مع اصحابى
انس :- لاء لسه بفكر
ندي :- نعم
انس :- هتبطلى اسألتك الغبيه دى امته ما انا لسه بقولك جهزى نفسك علشان رايحين بكره
ندي :- حضنت انس بفرحه وقالت انت احلى واجمل اخ فى الدنيا بحبك يا انس بحبك
انس :- طبطب عليها وبعد عنها وبص على يارا وبعدين بص لأخته وقال تبقى شوفى صحبتك مالها احسن شكلها اتحنطت مكانها وسابها وخرج
ندي :- ضحكت على كلام انس وراحت عند يارا وقالت بت يا يارا انتى يا بت ايه حصلك وخبطت على وشها وقالت يخربيتك مالك يا بت وقعدت تضحك على منظر يارا
يارا :- ها هو انا صاحيه يعنى مش بحلم فعلا اخوكى كان هنا معانا فى الاوضه
ندي :- بضحك ايوه يا بت ووافق على رحلة اسكندريه وكمان هيجى هو معانا افرحى بقى يعنى هيبقى معاكى طول الوقت
يارا :- اترمت على السرير وقالت الحقينى انا أغمي عليا خلاص
ندي :- بس كده عندى مشكله
يارا :- ايه تانى
ندي :- انس لما يجى معانا مش هعرف اتكلم خالص مع مالك
يارا :- يا اختى احمدى ربنا أنه وافق ده انا حاسه انى بحلم مش قادره اصدق ان انس أتنازل ووافق وبعدين المهم انكم هتبقوا مع بعض وخلاص
ندي :- بفرحه على رأيك المهم بقى قدمى ليا وليكى على اجازه واجهزى علشان تيجى انتى وبدر معانا
يارا :- بس
ندي :- بس ايه
يارا :- بس ممكن انس اخوكى ميرضاش أننا نروح معاكم
ندي :- سيبى الموضوع ده على ماما روحى بقى بسرعه
يارا :- وانتى مش جايه معايا الشغل
ندي :- لالالا ورايا حاجات كتير علشان بكره
يارا :- ماشي يلا باى
ندي :- يارا
يارا :- نعم
ندي :- بلغى مالك بقى وسلميلى عليه
يارا :- عونيا سلام يا قمر وخرجت من اوضت ندي وقعدت تبص على باب اوضت أنس بحب وهى ماشيه ولسه بتلف لاقته قصادها وخبطت فيه اتوترت وبصت ليه بصدمه
انس :- خير بتبصى على باب اوضي ليه
يارا :- بتوتر ه.ه ها م.م.مكنتش ببص
انس :- بس انا شوفتك وانتى بتبصي على الباب
يارا :- غمضت عينيها بتوتر وقعدت تدعك فى ايديها
انس :- رفع حاجبه وقال انتى نمتى ولا ايه
يارا :- حست أن قلبها هيوقف عليها من الموقف زقته وطلعت تجرى فتحت الباب ونزلت تجرى
انس :- بص ليها بأستغراب ودخل اوضه
يارا :- وقفت على السلم وهى نفسها سريع وحطت ايديها على قلبها وقالت هو انا بحلم ولا ايه اشوفه النهارده مرتين ويكلمنى كمان لالالا دى شكلها تهيؤات من كتر من انا بتمنى أن أكلمه لاء اكيد كل ده محصلش اكيد ونزلت تجرى وقفت تاكسى وراحت على الشغل
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى الشركه
دخل مالك الشركه وراح عند مكتب البنات ملاقاش حد موجود استغرب ومشى قابل رحمه فى سكته قال
مالك :- هما فين البنات محدش فيهم موجود فى المكتب ليه
رحمه :- تمارا انت عارف انها فى اسكندريه ويارا وندي معرفش اتأخروا ليه النهارده
مالك :- بقلق طيب مكلمتيش حد فيهم علشان نطمن عليهم
رحمه :- محدش فيهم بيرد
مالك :- بس كده حاجه تقلق طيب هاتى رقم ندي اطمن عليهم
رحمه :- بص هو مش هينفع اديك رقمها علشان ممكن هى تزعل منى أو يحصل ليها مشكله فى البيت بس اطمن انا مش هسكت وهفضل اتصل بيهم لحد ما حد فيهم يرد عليا ويطمنى
مالك :- اوك بس ابقى قوليلى عملتى ايه
رحمه :- حاضر متزعلش منى
مالك :- بس يا عبيطه مقدرش ازعل منك انتى اختى يا بت يلا هروح اشوف يوسف ونيجى نشتغل ماشي
رحمه :- استنا يوسف مش هنا
مالك :- مش هنا امال فين
رحمه:- وصلنى وراح مشوار
مالك :- خلاص ماشي يلا نشتغل
رحمه :- يلا وراحوا الاتنين مع بعض على المكتب
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
فى اسكندريه
كانت تمارا بتتمشي على البحر و سرحانه وبتفكر فى يوسف ودموعها نزلت منها وهى ماشيه بتعيط ومش حاسه بحاجه اتكعبلت فى حاجه ووقعد فى الارض وسمعت صوت شاب بيقولها
_ بعصبيه مش تفتحى وانتى ماشيه
تمارا :- نفضت هدومها وقالت بتوتر ا.ا.انا اسفه مأخدش بالى انك نايم فى الارض والله
الشاب_ والله واصرف اسفك ده فين مش شيفانى ازاى نمله نايمه على الأرض انتى واحده عاميه وحط أيده على جنبه مكان ما وقعت عليه
تمارا :- داست على أسنانها وقالت لو سمحت متغلطش قولتلك مأخدش بالى ياريت متتكلمش معايا بالاسلوب ده
الشاب_ يا بجاحتك غلطانه وليكى عين تتكلمى معايا بالطريقه دى تلاقيكى من البنات اللى بتعمل كده قصد علشان تشقط الرجاله من على الشواطئ
تمارا :- بعصبيه انت واحد قليل الادب ومتربتش ولمى لسانك بدل ما اقطعولك فاهم
الشاب :- بلاش تعمليهم عليا اشكال و****
تمارا :- رفعت ايديها ولسه هتضربه بالقلم
الشاب :- مسك ايديها وقال لا عاشت ولا كانت اللى تمد ايديها على ياسين عبدالعزيز
تمارا :- داست على اسنانها وقالت سيب ايدى يا حيوان
ياسين :- انا ممكن اوريكى شغل الحيوانات اللى بتقولى عليهم دول
تمارا :- بألم اااه سيب ايدى بقولك
ياسين :- بصلها بقرف وحدف ايديها بغيظ
تمارا :- مسكت ايديها بألم وقالت حيوان
ياسين :- لمى لسانك
تمارا :- بصت ليه بقرف ومشيت وسابته
ياسين :- بصلها بقرف ونام تانى على الأرض وحس برمله بتيجى عليه فتح عينه لاقها تمارا بتحدف عليه رمله وقالت
تمارا :- وهى بتحدف عليه الرمله قالت احسن علشان تتعامل مع الناس بأحترام يا حيوان وطلعت تجرى
ياسين :- اتغاظ وقام وقف ونزل الرمله من على شعره وجسمه وكانت تمارا اختفت داس على أسنانه وقال يا بنت ال وربنا ما هسيبك
تمارا :- دخلت الشاليه بتاعهم وهى بتضحك وماسكه بطنها من كتر الضحك
كريم :- دخل الشاليه وبص ليها بأستغراب وقال مالك انتى اتجننتى ولا ايه يا تمارا
تمارا :- وهى بتضحك هموت مش قادره
كريم :- بعد الشر عليكى يا تيمو بس ليه الضحك ده كله
تمارا :- وهى بتضحك اصل غرقت واحد دايقنى بالرمله كان شكله مسخره
كريم :- نعم يا اختى واحد دايقك مين ده وروهونى وانا هعرفه مقامه
تمارا :- يا شيخ اتنيل انت لو وقفت قصاده هتيجى عند ركبته
كريم :- احم نعم أنا بقول المسامح كريم وانا كريم
تمارا :- وهى بتضحك جباااان
كريم :- الجبن سيد الاخلاق
تمارا :- الجبن
كريم :- ايوآ
تمارا :- متأكد
كريم :- ايوه يا بنتى بس نسوا يقولوا جبن رومى ولا جبن كيري
تمارا :- ههه دمك سم على فكره امشى يا ض
كريم :- الحق عليا قولت اطمن عليكى انا ماشي وسابها ومشى
تمارا :- اتنهدت ومسكت تليفونها وجابت رقم امها واتصلت بيها وانتظرت الرد
سميه :- كده برضه يا تمارا متتصليش بيا لحد دلوقتى وتطمنينى عليكم
تمارا :- معلش والله يا ماما تعبت من السواقه جيت نمت علطول ولسه صاحيه من شويه قولت افطر واكلمك
سميه :- المهم طمنيني عامله ايه واخوكى كريم مش بيرد هو كمان عليا ليه هو كويس
تمارا :- يا ماما والله العظيم احنا كويسين وكريم فرحان وعايش حياته
سميه :- طيب الحمدالله خلى بالك على نفسك وعلى اخوكى يا تمارا
تمارا :- حاضر يا ماما متقلقيش باى وقفلت السكه وسمعت صوت دوشه خرجت تجرى تشوف فيه ايه لاقت الناس بتقول فيه واحد بيغرق قلقت وخافت ليكون اخوها طلعت تجرى تطمن وتشوف مين لاقته فعلا كريم اخوها قعدت تصرخ وتقول كريم الحقوا اخويه بسرعه وطلعت تجرى جوه المايه بس حست بأيد بتمنعها بصت ليه وقالت انت