رواية ابي بواب وامك خدامه الفصل الخامس عشر15والسادس عشر16بقلم رانيا عماره
متولي(بإستغراب) :اية يا وجيدة اللي عملتيه ده؟؟
وجيدة(بزعيق) :انا مش عايزة حد يتكلم معايا نص كلمة...دي بنتي واتصرف معاها زي مانا عايزه!!..وجواز مفيش جواز، انا لا بنتي قليله ولا رمية عشان تستغلوا انها يتيمة وعاوزين تجوزوها ببلاش، ولو على سفركم سوا فانا ليا حساب تاني معاكم بعدين، يلا قدامي على البيت!
{بكيت مهرة، ووجيدة خدتها ومشيت، وحاتم كان بيضرب ايده في الحيطة من كتر ماهو مدايق..وبعد ما وجيدة خدت مهره و رجعوا البيت، دخلت مهره أوضتها وقفلت الباب وفضلت تعيط، ووجيدة قعدت على الكنبة في الصالة وحاطة ايديها على دماغها اللي هتنفجر من كتر التفكير!...وعند حاتم دخل الأوضة ومتولي دخل وراه وهو مش فاهم حاجة}
متولي:هو اية اللي بيحصل ده؟..وجواز اية ده يا حاتم؟...هو احنا في اية ولا اية بس يابني!
حاتم(بعصبية) :انا مش فاهم هي مالها بتضيق علينا من كل ناحية كده ليه؟...هو احنا كنا ناقصين؟؟
{قعد متولي جنب حاتم على السرير}
متولي:انت اللي طلقك حامي ومش قادر تستحمل، يا حاتم انتوا لسة راجعين يابني!!...كنتوا اصبروا كام يوم، يمكن وقتها كانت وافقت!
حاتم:ومين قالك ان احنا كنا هنرجع؟...احنا رجعنا مخصوص عشان نفاتحكم في الموضوع ونتجوز!!
متولي:يعني انت مش راجع عشاني انا واخواتك يا حاتم؟..راجعين عشان تتجوزوا مش عشان أهاليكم اللي كانوا بيموتوا عليكم كل يوم بالبطئ؟
حاتم:لا يا بابا أكيد عشانكم برضة، بس عشان مبقاش كداب السبب الاساسي اللي رجعنا هو موضوع جوازنا!!
متولي:مش قادر أصدقك يا حاتم...بس اللي مالوش خير في أهله مالوش خير في حد عشان تبقي عارف!
{شد حاتم، راس ابوه وقرب منها وباسها وباس ايده}
حاتم:والله راجع عشانك وعشان أمي واخواتي، انا بس مش هقدر أعيش من غير مهره..انا عايز اتجوزها، ونكمل حياتنا مع بعض..علي الأقل لو سافرنا تاني مبقاش قلقان من وجودنا مع بعض!!
متولي:أمك لحد دلوقتي متعرفش انك عايش، لازم تروحلها البلد، اعملهالها مفاجأة دي هتفرح بيك اوي!
حاتم:انا ناوي أعمل كده، بس قولت أعدي عليك الأول أبرد نار قلبك اللي زادت في غيابي!
متولي:ربنا ما يحرمني منك ولا من دخلتك عليا يابني
حاتم:يارب يا بابا
{وقام}
متولي:رايح فين؟
حاتم:راجع البلد
متولي:خد بالك من نفسك
حاتم:حاضر
{قام متولي وحضنه، وبعدين حاتم مشى}
متولي(بصوت عالي) :روح ربنا يسترها في طريقك!
===============================
{عند زهرة وأنيسة، كانوا قاعدين في المركب، لحد ما المساعد جه ندههم عشان ياكلوا}
_القبطان بيقولكم الأكل جاهز
أنيسة:كتر ألف خيره
{قامت أنيسة ووراها زهرة وخرجوا وقعدوا مع القبطان قصاد الأكل}
القبطان:يلا قولوا بسم الله
زهرة:بسم الله الرحمن الرحيم...انا بجد محرجة منك يا قبطان، احنا من ساعة ما جينا وانت كارمنا..مش عارفين نودي جمايلك دي كلها فين!
القبطان:اللي بيعمل الخير بيلاقيه، وانا بعمله لله، يمكن يوم ما أقع ألاقي اللي بيمدلي ايده عشان يساعدني!
زهرة:ربنا مايجيب وقعة ولا أي حاجة وحشة يا قبطان
القبطان:يارب
{وبعد ما زهرة وأنيسة داقوا الأكل}
زهرة:تسلم ايديك، الأكل حلو اوي!
القبطان:بالهنا والشفا
زهرة(بتردد) :وانت متجوز يا قبطان وعندك ولاد ولالا؟
القبطان(بيضحك) :طبعاً عندي ٣ أولاد، وكلهم متجوزين وليهم حياتهم
زهرة:ربنا يباركلك فيهم...أصل حسيت ان الخير اللي بتعمله معانا ده، عشان عندك ولاد ويمكن تكون حاسس بينا عشان كده!
القبطان:انا بعمل كل ده عشان ربنا أولاً، وأولادي ثانياً، بعيداً عن أي مشاكل مابينا لكن انا بتمنالهم كل خير!
زهرة:اية دة هو في مشاكل مابينكم؟
{راحت أنيسة دغزت زهرة، وبصتلها بنظرة حادة}
زهرة:اممم انا مش قصدي اتدخل يعني ولا أقلب عليك المواجع، معلش انا أسفة!
القبطان:بالعكس انا لأول مره محسش بـ زعل!...صحيح كتر القسا يعلم الجفا...كأنك بتعصري الهدوم بعزم قوتك لحد ما نشفتي كل الماية اللي فيها، هما بقى عصروا قلبي، خدوه غسيل ومكواه!
زهرة:الهدوم؟
القبطان:لا قلبي!!
زهرة(بتردد) :امممم، معلش يا قبطان..طب آقولك حاجة اعتبرني زي بنتك..حتي انا يتيمة وابويا ميت
القبطان:حاضر، انتي شكلك بنت حلال
زهرة:ربنا يخليك يا قبطان
==============================
{عند متولي في الأوضة..لقى بيري بتتصل عليه، فااستغرب اتصالها و رد عليها}
متولي:الو
بيري:ازيك يا عم متولي، أخبارك اية؟
متولي:الحمدلله، خير ياست بيري في حاجة ولا اية؟
بيري:كنت عايزاك، تدخل الشقة بس من غير ما علاء يعرف أي حاجة..وتقلبهالي على شوية ورق متداريين،انا عايزة الورق ده ضروري!
متولي(بإستغراب) :ورق؟...ورق اية؟..دي الشقة على البلاط!!
بيري:ايواااه على البلاط بالظبط كده هو ده المطلوب
متولي:ازاي يعني هخلع بلاط الشقة عشان أدور؟
بيري:لا بس لو حسيت ان في حاجة بتتحرك تحت رجليك، متتردش انك ترفع السيراميك وتشوف اية اللي تحت منه، لو عملت اللي بقولك عليه هديلك ١٥٠٠ جنية، بس خلص!
متولي(بتفكير) :طب يفرض جوز سعادتك جه في أي لحظة وشافني، هعمل اية ساعتها؟
بيري:لا متقلقش ده هربان في الجحر زي الفار، انت نسيت انه هربان من السجن؟
متولي:امممم بس هو جه ليلة امبارح، وطلع ونزل، انا بقول يعني شكله كان بيجيب نفس الحاجة اللي انتي عايزاها!!
بيري(بصوت حاد) :يانهار اسود ومنيل، وانت معرفتنيش ليه؟
متولي:وهو سعادتك بتردي على حد؟...ده حتى أستاذ حسن، كان بيسألني عليكم وبيقول ان محدش فيكم بيرد على مكالماته!
بيري:بقولك اية انا جاية!
متولي:جاية امتى؟
بيري:دلوقتي!..مسافة الطريق وتلاقيني عندك!
{وفي الوقت ده كان علاء، سامع كل المكالمة اللي مابينهم بعد ما عمل تحويل المكالمات على تليفون متولي بدون علمه}
=============================
{عند حاتم، بعد ما وصل البلد، وراح بيت هويدا، خبط على الباب..واللي فتحتله أخته ضحى...ولما شافته تنحت ولسانها اتربط من الصدمة!}
ضحى(بصدمة) :حاتم؟؟؟... ازاي؟...ازاي انت عايش؟؟...حاتم اخويا...اخوياااا
{وحضنته وهى بتصرخ مش مصدقة}
حاتم:أه والله حاتم أخوكي، انا عايش مموتش!!
ضحى:لولولولولولوي
{جات هويدا وجوزها سميح من جوا وهما مستغربين}
هويدا:اية يابت في اية؟
{بتبص لقيته حاتم، طلعت تجري وكلبشت فيه وهى بتعيط ومش مصدقه انه طلع عايش}
هويدا(بصويت) :ابني، ضنايااا...حبيبي...حبيبي...انت عايش؟؟....بسم الله الرحمن الرحيم!!...انت عايش بحج وحجيجي؟؟؟
حاتم(بلهفه) :اه والله عايش، وحشتيني اوي اوي يا ماما...انا كنت مستني اللحظة اللي هرجع مصر فيها وهشوفكم!!...عاملة ايه طمنيني عليكي!!
هويدا(بصويت) :ابني طلع عااايش...ابني عايش... ابني مماتش...يافرحة جلبك برچوع ابنك يا هويداا...اللهم لك الحمد والشكر يارب...لولولولولولوي
سميح:حمدالله على السلامه يا حاتم
حاتم:الله يسلمك يا جوز أمي
هويدا(بصويت) :اجري يابت بسرعة...اتصلي بأختك نسمة وعرفيها، يااما تروحيلها، يلا بسرعة
ضحى:حاضر
{طلعت تجري ضحى واتصلت على نسمة، وبعد ما نسمة جات هى وجوزها وسلموا على حاتم، كانوا كلهم قاعدين في الصالة..وهويدا قاعدة جنب حاتم وواخداه في حضنها كأنها ما صدقت شافته!!}
نسمة:الف حمدالله على سلامتك ياغالي
حاتم:الله يسلمك يا نسمة
عبدالله:نورت الدنيا كلها يا حاتم، انا حاسس ان غيابك عننا كان بالسنين مش كام شهر!
حاتم:والله العظيم انا كمان حاسسهم مليون سنة مش كام شهر، وحشتيني أوي يا أمي!!
هويدا(بدموع) :وانت كمان يا غالي ياابن بطني، ياحبيب قلب أمك
{وباست راسه، راح حاتم بايس راسها وايديها}
سميح:وانت كنت فين يا حاتم؟
حاتم:انا سافرت اليونان
كلهم:اليونان؟
حاتم:هو حوار طويل كده، هبقى أحكيلكم بعدين
هويدا(بزعيق) :ماتسيبوه يرتاح، الواد بجاله شهور مسافر واخيراً رچعلنا بألف سلامة ولا هنجعد نجضيها سين وچيم ونتعبه أكتر ماهو تعبان؟
نسمة:خلاص بعد ما ترتاح يا حاتم، تبقى تحكيلنا الحكاية كلها من طأطأ لـ سلامو عليكو!
حاتم:حاضر، هتعرفوا كل حاجة بس بعدين
{قامت هويدا وشدت حاتم يقوم معاها}
هويدا:يلا ياجلب أمك عشان ترتاح في أوضتك، وانتي يابت منك ليها حضروا العشا، واعملوله عصير..يلااا
{دخلت نسمة وضحى المطبخ، وهويدا شدت حاتم ودخلت الأوضة}
هويدا:اقعد هنا ياجلب أمك ورَيَح چتتك،بس أمانة عليك بلاش تنام قبل ما تاكل، ألا هزعل منك اوي اوي
حاتم:حاضر يا أمي، انا مبسوط اني رجعت وسطكم!
هويدا:واحنا كمان والله يا حاتم، ده ربنا العالم ده احنا هندبح عچل بمناسبة رجوعك وهنوزعه على البلد كلها
{باس حاتم ايد أمه، وحضنها}
حاتم:ربنا مايحرمني منك يا غالية
هويدا:ولا يحرمني منك يا حبيبي، ارتاح يلا
{وسابته وخرجت وقفلت الباب وراها...راح حاتم قعد على السرير وطلع الموبايل..ومكنش عارف هيتصل ازاي بمهره وهى ممعاهاش موبايل، كان كل اللي يقدر يعمله في الوقت ده،انه يفتح صورتها ويبص فيها}
حاتم:وحشتيني أوي يا مهره!
{وباس الصورة وضمها لـ حضنه!}
==============================
{عند بيري بعد ما وصلت، كان متولي مستنيها في مدخل العمارة}
متولي:يا الف مرحب بـ ست بيري
بيري:يلا يا عم متولي
{وخدته وطلعوا في الأسانسير، وبعد ما وصلوا و متولي فتحلها الشقة، و لسة هيدخل وراها}
بيري:استنى انت رايح فين؟؟
متولي:هدخل مع سعاتك!
بيري:لا انزل شوف اللي وراك، وانا لما اخلص هقفل الباب وهمشي ولا كأن حاجة حصلت!
متولي:خلاص مفيش مشكلة، اللي تشوفيه!
{نزل متولي في الأسانسير، وبيري قفلت الباب وراها، ولفيت في الشقة تدور، لحد ما لقيت واحد خارج من الأوضة وبيقرب منها}
بيري(مصدومة) :يانهار اسود انت مين؟؟؟....انت مين؟؟
{وابتدت تصرخ، وهو بيجري وراها في الشقة، وفي الوقت ده علاء جه وفتح باب الشقة ودخل}
علاء(مصدوم) :مين ده وبيعمل ايه في الشقة؟؟؟
بيري(بصويت) :معرفش!!!...معرفش!!
{راح علاء مقرب منه ونزلوا ضرب في بعض، وبيري بتصرخ، ولما الجيران سمعوا الصويت خرجوا، ومتولي طلع مخضوض من الصوت}
متولي:في اية يا استاذ علاء؟؟
علاء(بزعيق) :اشهدواا يا ناس، اشهدوا...مراتي اللي سرقت عفش الشقة وبهدلتني في المحاكم ظلم...جايبة واحد غريب في الشقة...ماهي أصلها ضامنه ان انا مش هاجي ولا هقدر أعتب باب العمارة، بس سبحان الله، ربنا أراد ان انا آجي في اللحظة دي عشان اكتشف نيتها الزبالة..وانا اللي كنت جاي اعاين الشقة من أول وجديد عشان نرجع لبعض عشان خاطر بنتنا اللي هى معملتش حساب ليها!!!
بيري(بصويت) :انت بتقول ايه؟؟؟...الكلام ده كدب ومحصلش!!!
علاء(بزعيق) :لا حصل...لو انا عينيا خانتني وبكدب، فااهو الناس شاهدة وشايفه كل حاجة قصاد عينيها، انا لو راجل كداب وابن ستين كلب، كنتوا هتسمعوا وبس مش هتشوفوا...انما الدليل قصادكم اهو، ناقص اية تاني عشان تصدقوا انها ست خاينة؟؟؟
{قربت بيري من علاء وهى بتصرخ}
بيري(بصويت) :انا مش خاينة، انت الل خاين وكداب..منك لله يا علاء، روح اللهي يوريني فيك يوم
{ووقعت في الأرض أغم عليها!!...اتلمت الناس حواليها وودوها المستشفى!}
===============================
{في أوضة مهرة..كانت بتعيط ولسة زعلانة، خبطت وجيدة على الباب و مهرة فتحتلها وهى باصة في الأرض، وبعدين قعدت على السرير..ووجيدة قعدت قصادها وسكتت شوية، كانت مترددة تتكلم}
وجيدة:انا عايزة مصلحتك يا مهره..عايزة أشوفك مع اللي يصونك ويحافظ عليكي، اللي يعرف قيمتك ويتاقلك بالدهب..مش معنى ان ابوكي واخواتك ماتوا ومبقاش غيرنا احنا الاتنين ولايا مكسورين الجناح، ان انا أفرط فيكي وأرميكي لأي حد..لا يا مهره انتي غالية وقيمتك في العالي ومش أقل من حد.
مهره(بعياط) :ومين قالك ان حاتم شايفني قليلة؟...لية مصممه انه شايفني بالصورة دي؟
وجيدة:حتى لو بيحبك زي مابتقولي، بس بينه وبين نفسه هيجي في يوم ويقول دي كانت هربانة ويايا، كانت نايمة جاري في نفس المكان اللي نايم فيه، و..... أوعي يابت يكون قرب منك...ده انا أقتلك!!!!!
مهره(بصويت) :والله ما حصل..انا وحاتم عمرنا ما نعمل كدة ابداً...حاتم بيخاف عليا أكتر ما بيخاف على نفسه،وطول المدة اللي فاتت مكنش على لسانة غير انا لازم أرجعك لأهلك سليمة، ده انتي أمانة في رقبتي، انا بعتبرك بنتي مش حبيبتي!!
وجيدة(بصوت حاد) :كل ده كلام في الهوا، انتي اللي عشان لساكي صغيرة، فا كل بعقلك حلاوة، وعملك غسيل مخ...حاتم لو بيحبك بحق وحقيقي، كان من تاني يوم اتصرف و رجعك ليا، كان سأل في كل الأقسام والمستشفيات، اللي عايز حاجة بيتصرف، لكن كل اللي اتقال دي حجج فارغة ملهاش ستين لازمة!!
مهره(بعياط) :انتي لية مستخسره فيا أفرح؟...ده انا قولت هتفرحي برجوعي، ومش هترفضيلي طلب ولا هتوجعيلي قلبي!!...لية كده ياماما لية؟؟
وجيدة(بصوت حاد) :يابت افهمي، مصيرك هيجي اليوم اللي تتعايري فيه، مهما قالك كلام حلو وضحك عليكي، بعد الجواز كل حاجة بتتغير وكل واحد بيبان على حقيقته لما القناع بيتشال!
مهره(بعياط) :بس حاتم مبيضحكش عليا، انتي متعرفيهوش كويس زي مانا أعرفه...حاتم هد الدنيا كلها عشاني، انا لولاه كان زماني ميته ولا عمرك كنتي هتشوفيني تاني، ده بدل ما تشكريه على وقفته جنبي؟
وجيدة:يشكر، كتر ألف خيره، لكن حوار الجواز ده طلعيه من دماغك وانسيه، انتي خلاص رجعتي لأمك بألف سلامة، ورجعتي لحياتك الطبيعية اللي كنتي عايشاها قبل ما كل ده يحصل..الدنيا مش هتقف على حاتم ولا غير حاتم، بكرا يجيلك اللي يصونك ويشيلك في عينيه الاتنين!
مهره(بعياط) :انا مقدرش اعيش من غير حاتم، انا بحبه ومش عايزه حد غيره، الكلام ده بيدمرني مش قادره استحمله!! ، ولو مش عايزاني اتجوزه مفيش مشكلة، بس مش هتجوز بالكل وهعيش عمري كله عازبة!!
{قامت وجيدة، بملامحها الحادة، وكلام بنتها محركش مشاعرها ولا حتى حسيته}
وجيدة:انا أمك وعارفة مصلحتك كويس، مااحنا كنا زيك في سن الشباب وياما حصلنا كده وأكتر وفي الآخر طلع لعب عيال...انا هدعيلك ربنا يهديكي يمكن تفوقي لعقلك.
{وخرجت من الأوضة، و زاد عياط مهره أكتر!}
==============================
{عند حاتم في أوضته على السرير...كانت هويدا واخواته البنات قاعدين جنبه وهو بياكل}
هويدا:بألف هنا وشفا ياحبيبي
حاتم:تسلم ايديكي يا أمي
{وحط المعلقة وبطل أكل}
هويدا(بإستغراب) :بسم الله الرحمن الرحيم، هى دي أكلتك يا حاتم؟... هى الغربة لاويت معدتك للدرچة دي؟
نسمة:ماتكمل أكلك يا حاتم هو انت لحقت تاكل؟
حاتم:صدقوني مليش نفس، انا كلت حاجة بسيطة عشان ماما متزعلش
هويدا:لا يابني، أمانة عليك تكمل أكلك!
حاتم:صدقيني مش هقدر
هويدا:خلاص منين ما تچوع قولي وآني هسخنلك الأكل...جولي بجى..مين الحلوة اللي حاطط صورتها في خلفية التليفون؟
{ضحك حاتم، ضحكة باهته وحزينة}
حاتم:انتي خدتي بالك؟
نسمة(بتضحك) :مش هى بس اللي خدت بالها، احنا كمان خدنا بالنا!
حاتم:دي مهره
ضحى:مهره مين؟
حاتم:بنت ست وجيدة...اللي شغالة في العمارة اللي ابويا ماسكها
هويدا(بتفكير) :وجيدة؟...هى دي بتها؟
حاتم:ايوه هى
هويدا:وانت حاطط صورتها على تليفونك لية؟
حاتم(بتردد) :عشان انا بحبها وعايز أتجوزها، بس الفلوس اللي معايا مش مكفية..وأمها فاهمة الحوار كله من أولة لآخره غلط!
هويدا:انت لحجت تكلم أمها امتى يا حاتم؟؟
حاتم:النهاردة، بس حصل حوار والدنيا باظت
نسمة:انا كنت حاسة ان فيك حاجة مدايقاك
هويدا:تجصد إن امها موافجتش؟
حاتم(بتردد) :ايوه
هويدا:انشالله عنها ما وافجت، ياواد اياك تبجى مدلوج عليهم، عشان مياخدوش في نفسهم جَلم وتجِل من نفسك جصادهم!!..فكك منها وآني أچوزك ست ستها
حاتم(بصوت حاد) :يلا ماهي كملت، ياريتني مااتكلمت
{وقام وهو متعصب}
نسمة:هو كان بيحكيلك عشان تعطليلة المراكب السايره انتي كمان؟؟
هويدا:لا يا نسمة، احنا اللي ميعوزناش يابتي، يبجى ميلزمناش، وبعدين مش من جِلة البنات يعني!
{مشى حاتم وهو مدايق، ومحسش بنفسه غير وهو راجع عند متولي!!!}
===============================
{في المستشفى عند بيري، كانت فاتن وفيروز و غادة ونبيل قاعدين على الكنب حواليها}
فاتن(بعياط) :انا مش قادرة أصدق اللي حصل يا بيري، ازاي جاله قلب يتهمك ظلم!!
غادة:الشخص ده انا بقول انه مزقوق على بيري!
نبيل:ازاي طيب؟...وهو الزفت علاء ده اية عرفه ان بيري رايحه الشقة؟
غادة:مش عارفه، مش يمكن بيري متراقبه وعارف خط سيرها؟
نبيل:كل شئ وارد...بس اللي انا مستغربه، ازاي قدر يتهم مراته أم بنته بالشكل الحقير ده..مخافش على سمعة بنته لما تكبر؟
غادة:خلاص يا نبيل، مش وقته
{وبصيت لـ فيروز وهى خايفة الكلام يأثر عليها}
فيروز:ماما مالها، ايه اللي حصلها؟
غادة:مفيش ياحبيبتي، اتخانقت هى وباباكي وزعلها شوية وهي كان ضغطها واطي.
فيروز:هو بابا اتهمها في اية؟
{سكتت غادة ووقتها أيقنت إن فيروز فاهمة كل حاجة بيقولوها}
غادة:امممم..اتهمها انها بطلت توديكي المدرسة والدروس، وانك بقيتي منعزلة عن كل صحابك و...
فيروز(يتقاطعها) :بس دي مش الحقيقة!
فاتن(بعياط) :خلاص يا فيروز، كفاية مامتك تعبانة ومش مستحمله كتر كلام!
غادة:متخافيش يا حبيبتي، هنبقى نتكلم بعدين في الموضوع ده، ماشي؟
فيروز:ماشي
{دخلت الممرضة تدي الحقنة لـ بيري، قامت فاتن وقربت منها}
فاتن(بخوف) :بيري هتتحسن امتى؟
الممرضة:يومين تلاته، وهترجع كويسه، متقلقيش
فاتن:يسمع من بؤك ربنا، يارب
{وبعد ما الممرضة اديتها الحقنة}
الممرضة:بالشفا
{ومشيت، وفاتن رجعت قعدت}
غادة:اتطمني ياماما، ما الكلام يطمن اهو، خايفة ليه؟
فاتن:طبيعي اخاف، ماهي بنتي!
نبيل:خير ان شاء الله ياطنط
================================
{بعد يومين في العمارة عند متولي..كان متولي قاعد مع حاتم....ومهره بما انها بتروح العمارة مع وجيدة، نزلت وكانت معدية قدامهم والحزن والقهر على وشها، حتى حاتم كان حزين جداً ومشافش مهره من ساعة ما رجعوا من السفر..وأول ما حاتم لقاها معدية من قدامهم قام وراها}
حاتم:وحشتيني اوي!
{بصيت مهره لحاتم بحزن وكانت بتحاول تمنع دموعها رغم ان عينيها مليانة بالدموع}
مهره(بحزن) :خلاص..عيش حياتك كأني مكنتش فيها، وأكيد هتعدي الأيام وهتنسى حبي، وهتلاقي واحدة بنت حلال تستاهلك!
حاتم:انتي حياتي كلها يا مهره..انا اليومين اللي فاتوا كنت بتقطع عليكي، انا متعودتش أغيب عنك يوم واحد..احنا كنا ليل نهار مع بعض، مبنغيبش لحظة!
مهره(بحزن) :بس المره دي غير أي مرة..انا مش هقدر أتجوزك من غير موافقة ماما!!...خلاص...ماما مش موافقة والموضوع بالنسبالها مُنتهي!
حاتم:للدرجادي سهل عليكي تنسيني على انك تقنعي أمك؟...حبي ليكي ده كان مجرد يومين حلوين وخلاص انتهى؟
مهره(بعياط) :الموضوع كله مش كده يا حاتم، انت متعرفش اية اللي جرا من ساعة ما رجعنا من السفر، انا من ساعة ما رجعت وانا مشوفتش يوم راحة، ولا عيني غفلت دقيقة!...انا حاولت معاها بكل الطرق وبرضة مصممه على رأيها!
حاتم:خلاص يبقى انا اللي هكلمها في الموضوع ده، ومش هسكت غير لما توافق!
مهره(بخوف) :لا ياحاتم، اوعي تعمل كده، هتعرف اننا رجعنا نتكلم، والمشكلة هتكبر أكتر!
حاتم:انا مشوفتكيش من آول امبارح يا مهره، وكلامي معاها هيبقى عن سبب رفضها ليا، سيبيني اتعامل بطريقتي!!
مهره(بخوف) :لا يا حاتم بلاش!..انا ما صدقت ان تقطيمها فيا وكلامها الجارح خف شوية!
حاتم:يبقى انتي محبتنيش، انا كنت مستعد اعمل عشانك أي حاجة، وانتي مش عايزه تضحي ولا تيجي على نفسك شوية!
مهره(بعياط) :انا محبتكش يا حاتم؟...بعد كل ده وبتقول محبتكش؟..ده انا حبيتك حب محبتهوش لنفسي ولا لأهلي!...ده انا اشتريتك وبيعت الدنيا كلها عشانك!
حاتم:اشتريتيني فين بقى؟...ده انتي خايفة تكلمي أمك..ماشي يا مهره شوفي اية يريحك واعمليه!...بس خلي ده معاكي!
{وطلع موبايل صغير من جيبه}
حاتم:خلي الموبايل ده معاكي، عشان اعرف اتطمن عليكي.
مهره(بحزن) :ازاي وانت اعتبرت الموضوع منتهي؟
حاتم:الموضوع ده منتهاش ولا هينتهي، انا مش هسيبك ولا هتخلى عنك...انا قد الوعد اللي وعدتهولك!...انا لو بعدت عنك، حياتي هتضيق عليا لحد ما أموت بقهرتي!
مهره(بخوف) :لا بعد الشر عنك، ولا انا هتخلى عنك يا حاتم، ومستعده اعمل عشانك أي حاجة!
حاتم:وعد؟
مهره:وعد
حاتم:انتي رايحة فين دلوقتي؟
مهره:هرجع البيت أجيب حاجات وآجي تاني
حاتم:خدي بالك من نفسك يا مهره
مهره:حاضر
{مشيت مهره، وحاتم رجع قعد مع متولي}
متولي:الموضوع وصل لـ اية؟
حاتم:زي ماهو متغيرش
متولي:سيبها عليا، انا هبقى أكلم ست وجيده وافهمها
حاتم:لا خليك زي مانت، انا اللي هبقى أكلمها!
===============================
{عند عادل و علا لأول مرة في العربية}
عادل:انتي لية رافضة تروحي، رغم انك بتقولي انها صاحبتك وكنتوا شغالين مع بعض في نفس المكان؟
علا:انت عارفني بتحرج أقعد في بيوت حد، بحس إن انا مش واخده راحتي
عادل:هو انتي رايحة تباتي؟...ده هى نص ساعة بس مش أكتر...ولا انتي عايزة تصغريني قدام نبيل؟
علا:طب ماتخليها في يوم تاني أحسن!
عادل:يابنتي انتي لية مش عايزة تفهمي ان كان المفروض نروح أول يوم تعبت فيه، عدى يومين وكل ماالوقت يعدي شكلي بيكون وحش!
علا:مانا مش جاهزة يا عادل، وانا اية عرفني انها هتتعب؟
عادل:بصراحة مستغربك، ومابقتش قادر أفهم، هتجهزي لـ اية معلش؟..هى مناسبة؟..دي حالة مرضية طارئه!
علا:طيب يا عادل، مادام هنشتغل بـ جو النحلة الزنانة ده، هروح وأمري لله، بس اية هندخل بإيدينا فاضية؟
عادل:لا طبعاً، هنعدي على أي ماركت كويس ونجيبلها حاجة حلوه، وبعدين نعدي عليهم، ها كدة تمام؟
علا:تمام
{دَوَر عادل...العربية..واتحرك بيها}
==============================
{عند نويري وعلاء في الفيلا...كانوا قاعدين في الجنينة}
نويري:الله يخربيتك، ويخربيت سنينك...انت ازاي مقولتليش حاجة زي دي في ساعتها؟...انت كده كشفت نفسك، و زمانك محطوط تحت جهاز المراقبة!
علاء:مش فارقة كتير، مش احنا كده كده رايحين ليبيا؟
نويري:ايوه بس ممكن في أي وقت تتكشف!
علاء:مااحنا عشان منحطش نفسنا في المصيبة دي مره تانية، نتحرك وننجز شوية
نويري:عندك استعداد نسافر امتى؟
علاء:من دلوقتي
نويري:تمام، انا هقوم آخد الضروريات
علاء:ماشي
{قام نويري وخد الضروريات من لبس واحتياجات شخصية، وبعدها جهز شنط الفلوس، وخد علاء وركبوا العربية، وراحوا الميناء}
===============================
{عند مهرة بعد ما رجعت البيت، دخلت أوضتها لقيت حاتم بيرن}
حاتم:وصلتي يا مهرة؟
مهرة:اه لسة واصله أهو
حاتم:حمدالله على السلامه
مهرة:الله يسلمك
حاتم:عشان خاطري، خدي بالك من نفسك، انا لولا الظروف اللي اتحطينا فيها، كنت جيت ومسيبتكيش لواحدك لحظة!...بس عشان عارف اية اللي هيحصل، انا برضة مش عايز أجيبلك الكلام!
مهرة:لا يا حاتم، من ناحية الكلام فا هيزيد الضعف، وانا والله ما بقيت متحمله
حاتم:انا شوية كدة وهطلع لـ أمك، هحاول اتكلم معاها وافهمها الكلام الغلط اللي بتقوله عننا!
مهرة:انا والله خايفة، بس الخوف مش هيفيدنا بحاجة..اتكل على الله يا حاتم
حاتم:ماشي يا مهره، هبقى اكلمك اطمنك
مهرة:طيب ماشي، مع السلامة
{قفلت مهرة مع حاتم، وقعدت على السرير ترتاح}
مهره(بصوتها الداخلي) :يارب حِلها من عندك، وأجبر بخاطرنا وفرح قلوبنا وعديها على خير يارب
=============================
{في بيت فاتن...خبط عادل و علا على الباب، وجات فاتن فتحتلهم}
فاتن:ازيك يا عادل؟
عادل:الحمدلله، انتي عاملة ايه يا طنط؟
فاتن:الحمدلله بخير...ازيك يا علا؟
علا:الحمدلله
فاتن:اتفضلوا
{وخدت منهم العلبة، ودخلوا الأوضة عند بيري، ولما بيري شافتها اتخضت، قربت علا وحضنتها}
علا:حمدالله على السلامه يا بيري، اخبارك ايه دلوقتي؟
بيري:أحسن الحمدلله
عادل:ربنا يبين الحق، ويهد الظالم
بيري:يارب، الواحد مبقاش فيه صحة يستحمل قرف الناس...بس هيروح مني فين؟...ده انا وراه والزمن طويل
علا:طبعاً اوعي تسكتي على حقك مهما يحصل، واحنا كلنا في ضهرك يا بيري لحد ما حقك يرجع
بيري:ربنا يخليكم ليا، كفاية بس وقفتكم جنبي في الظروف اللي زي دي
علا:حبيبتي يا بيري
{وكانت بيري بتبصلها من تحت لـ تحت بنظرات خبيثة!}
بيري:وهتتجوزوا امتى صحيح؟
عادل:لسة كده يعني، حوالي سنه ونص أو سنتين
بيري:لية كده ما كنتوا اتجوزتوا عالطول، انا مش شايفه ان الخطوبة ليها لازمة مادام تعرفوا بعض كويس!
عادل:لا هي الفكرة مش فكرة تعارف، احنا بس مديين نفسنا فرصة نكون جهزنا الشقة وكل حاجة!
بيري:ااه، ربنا يتمملكم بخير
علا:يارب
===============================
{في العمارة عند وجيدة، كانت بتعمل الشغل لصحاب الشقة، لقيت الباب بيخبط، راحت تفتح لقيته حاتم، وأول ما شافته وشها اتقلب!}
حاتم:انا عايز اتكلم معاكي في كلمتين يا ست وجيدة، وياريت تسمعيني للآخر ومتهاجمنيش!
وجيدة:مفيش كلام يتقال يا استاذ حاتم، انا اللي عندي خلاص قولته!
حاتم:طيب اديني فرصة، يمكن انتي فاهمة غلط!
وجيدة:وده مش وقت كلام، احنا هنا في مكان أكل عيش، روح يا حاتم ربنا يكرمك
حاتم:فرصة واحدة طيب، اديني من وقتك نص ساعة، انا في كلام كتير عايز أقوله!
وجيدة(بتنهيده) :طيب، هخلص الشغل اللي ورايا وبالليل وانا نازلة نبقى نتكلم
حاتم:ماشي، وانا مستنيكي
{نزل حاتم، ووجيدة قفلت الباب وكملت شغل!}
=============================
{عند غسان وكمال و ليلى في البيت المهجور..كان غسان نايم وفجأة قام وفضل يتشنج ويصرخ ، قام كمال وهو مخضوض، وحاول يثبته مكانه}
كمال(بصويت) :غسااان...غساااان..مالك؟؟
{وفجأة أغم عليه!!}
الفصل السادس عشر
كمال(بخوف) :غسان فوق!!...غسان!!
{ولكن غسان مردش عليه، واضطر انه يشيله وخده وراحوا المستشفى، وبعد ما الدكتور كشف عليه}
كمال:عنده اية؟
الدكتور:μια απότομη πτώση της κυκλοφορίας του αίματος. (هبوط حاد في الدورة الدموية)
كمال:مش فاهم!
الدكتور:Θα του γράψω την κατάλληλη θεραπεία (سوف أكتب له العلاج المناسب)
كمال:ايه؟
{قعد الدكتور على المكتب وابتدا يكتب الروشته، وبعدين اداها لـ كمال...خدها كمال يقراها ولكن مفهمش حاجة منها!}
كمال:هي باينلها الروشته، تمام..شكرا يا دكتور...Thank You
{وشاورله بإيده، وقام يشد غسان وخد ليلى في ايده ولسه هيخرجوا من الأوضة}
الدكتور(بصوت عالي) :Πού είναι τα χρήματα; (أين المال؟)
كمال:ايه؟
{قرب الدكتور منه وهو بيعمله إشارة الفلوس بإيديه}
الدكتور:€100
{راح كمال مطلع فلوس من جيبه، وادهاله، وبعد ما الدكتور عد الفلوس إداله الباقي}
كمال:كدة تمام؟
الدكتور :Καλό (جيد)
{مشى كمال بـ غسان وليلى، وراحوا الصيدلية}
================================
{عـند علا و عادل في بيت فاتن، كانوا قاعدين مع فاتن وفيروز في أوضة بيري، وقصادهم العصير..قام عادل وعلا}
فاتن(بإستغراب) :انتوا رايحين فين؟..هو احنا لحقنا نقعد معاكم؟
عادل:معلش يا طنط أصل انا ورايا شغل، احنا والله كنا عايزين نيجي امبارح بس لولا ظروف الشغل
فاتن:اه ياحبيبي، ربنا معاكم يارب
عادل:يارب
{قربت علا من بيري وحضنتها وباستها}
علا:حمدالله على السلامه ياحبيبتي، الحمدلله اننا اتطمنا عليكي
بيري:الله يسلمك
عادل:نجيلكم المره الجاية في نجاح فيروز ان شاء الله
فاتن:ربنا يخليك يا عادل
عادل:عن اذنكم
فاتن:اتفضلوا، ده انتوا نورتونا
{خرج عادل ووراه علا و فاتن..لحد ما خرجوا من الشقه وفاتن قفلت وراهم، ورجعت عند بيري}
بيري(بـ غل) :وحياة أمك يا علا..لأوريكي أيام أسود من شعر راسك!!
{وتحت بعد ما عادل و علا نزلوا، عدى من جنبهم شخص ودخل العمارة..علا لمحته وحسيت انها شافته قبل كده، وبعد ما ركبوا العربية..كانت طول الطريق تشبه عليه لحد ما افتكرت!}
===========فلاش باك==========
علا(بخوف) :انت اللي هتستلم الفلوس؟
_اه أنا، دول الـ ٣٠٠ ألف كاملين؟
علا:اه هما
_تمام
===========================
علا(في سرها) :معقول يكون ده هو ده؟؟
===========================
{عند حاتم ومتولي بعد ما وجيدة خلصت شغلها بالليل وكانت نازلة، عدت من جنبهم ولا كأن حاتم قالها حاجة..ولما شافها قام وراها وندهها}
حاتم:انا مستنيكي من بدري علفكرا!
وجيدة:خير، عاوز اية؟
حاتم:الكلام مش هينفع واحنا واقفين هنا، ممكن نقعد جوا؟
وجيدة:وانا مش هتكلم غير هنا!
حاتم:طيب..بصي ياست وجيدة مبدأياً كده انتي في مقام أمي، وانا بحترمك وبقدرك، انا عارف ان مكنش ينفع اتكلم في الموضوع ده أول ما رجعنا، كنت صبرت كام يوم..بس معلش كل واحد بيتعلم من غلطه..انا كل اللي عايز أوضحهولك ان انا بحب مهره بجد، وشاريها وعارف قيمتها كويس..انا لو مش بحبها مكنتش فاتحتك في الموضوع، وكنت قضيتها حب وغراميات من برا برا..لكن انا ابويا وأمي مربونيش على كده، انا راجل مش عيل مراهق هيسرح بـ عيله من سنه ويعيشها الحب وهو من تاني ناحية بيتسلى بيها!
وجيدة:الحب مش كلام يا حاتم، الحب أفعال
حاتم:انا معاكي ان الحب أفعال، واسألي مهره وهي هتقولك انا عملت عشانها اية، وهي كمان عملت عشاني اية..انا مبتكلمش انا بعمل وبس، لكن انا بوضحلك سوء التفاهم!
وجيدة:بس مش معنى إن مهره يتيمة الأب، يبقى أرميها لأي واحد كده وخلاص..انا بنتي يوم ماتتجوز..
لازم تتجوز اللي يعيشها عيشة مرتاحه، احنا مش هنغلط نفس الغلطة مرتين!
حاتم:بس الفلوس مش هتسندها لو وقعت!...ولا هتقف جنبها لو....
وجيدة(بتقاطعه) :في الزمن ده تسندها وتبقى ضهرها وعزوتها كمان...مهره خلاص فقدت كل عيلتها مبقاش فاضلها غيري، ويابني العمر مش مضمون، عشان يوم ما ربنا يفتكرني أكون متطمنه عليها!
حاتم:ليه هو انتي مش متطمنه عليها وهى معايا؟...ده انتي لو لفيتي الدنيا كلها مش هتلاقي اللي يحافظ عليها قدي!!
وجيدة:الجواز قسمة ونصيب يا حاتم، ارضوا بنصيبكم يمكن ربنا يكرمكم بالأحسن!
حاتم(منفعل) :انا لو لفيت الدنيا كلها عمري ماهعوض مهره ولا هلاقي ربعها!!...وهى لو لفيت الدنيا كلها عمرها ما هتلاقي اللي يخاف عليها ويحبها زي!!..انتي لية مصممه تحرمينا من بعض؟...وفلوس اية اللي بتفكري فيها؟...انا اسف يعني بس لما مستوانا يكون زي بعض مينفعش حد فينا يشوف نفسه على التاني، ويعجزه ويطلع عينه وعين اللي جابوه، مع انه لو كان معاه مكنش هيتأخر ثانية!!
{برقت وجيدة من كلام حاتم!}
وجيدة(بزعيق) :انت بتقل من بنتي؟...هو عشان احنا غلابة يبقى اتكتبلنا الغلابة اللي زينا؟...و ليه متعش في مستوى حلو...طب اهلها وهنقول غصب عنها مختارتهمش..دي حاجة مش بإيديها...انما جوزها ده بإختيارها هي!
حاتم:أديكي قولتي بإختيارها هي، يبقي سيبيها تختار بنفسها، انا عايز اسألك سؤال..هو انتي كل مشكلك الفلوس؟
وجيدة:لا مشكلتي مش في الفلوس وبس..مشكلتي في هروبكم ويا بعض لبلاد برا..والله أعلم اية اللي حصل بدون علمنا!
حاتم(بصوت حاد) :محصلش حاجة!!...مهره دي كانت ومازالت أمانة في رقبتي...شكلك لسة متعرفنيش كويس يا ست وجيدة.. بس اللي أقدر اقولهولك انك فاهماني غلط!
{بصيت له وجيدة نظرة حادة، ومشيت من غير ما ترد..وحاتم رجع قعد جنب متولي وهو مدايق!}
==============================
{عند مهره كانت قاعدة في البيت، لقيت وجيدة راجعه وعلى وشها ملامح حادة..وقتها حسيت ان في حاجة جديدة حصلت}
مهره:مالك هو في حاجة حصلت؟
{ودخلت وراها الأوضة، حطيت وجيدة شنطتها على السرير ولفيت لـ مهره بكل غضب}
وجيدة(بزعيق) :البيه اللي انتي عايزة تتجوزيه، ووجعالي دماغي بيه من ساعة ما رجعتي..لا طلع عارف قيمتك ولا نيلة..مش قولتلك كله كلام في الهوا؟
مهره(بإستغراب) :ليه ياماما...ماتفهميني حصل ايه؟
وجيدة(بزعيق) :قالهالي صريحة في وشي..معنى الكلام انتوا جايين تطلبوا وتتشرطوا وانتوا غلابة زيكم زينا!!...هو عشان احنا غلابة، يبقى مش من حقنا نطلب لبنتنا زي ما بقيت البنات بيجيلهم؟...عرفتي انه مينفعناش يا مهره؟
مهره:اهدي بس...هو كلمك في الموضوع ده امتى؟
وجيدة(بعصبية) :وانا نازلة..ندهني..وياريتني ما وقفت ولا اديته فرصة زي ما كان عايز!...ليه يابنتي تقلي من نفسك وعشان اية؟...حرام عليكم اللي بتعملوه فيا ده، انا مش مستحمله!!
مهره(بحزن) :انتي لية مصممه على رأيك ومش عايزة تغيريه؟...ياماما بقولك بحبه وبيحبني!..انا معنديش استعداد أكمل بقيت حياتي من غيره!
وجيدة(بزعيق) :بلا حب بلا زفت...هو انا هفضل أعيد وأزيد كل شوية؟...بقولك اية يا مهره اقفلي الموضوع ده، انتوا بترفعولي الضغط!!!
{خرجت مهره وهى كاتمة دموعها، ووجيدة قفلت الباب بعنف، قعدت مهره على الكنبه وفضلت تعيط، وطلعت البلاكونة، وخرجت الموبايل من هدومها واتصلت بـ حاتم وهى منهاره}
مهره(بصوت واطي+عياط) :الو يا حاتم..هو اية اللي حصل بالظبط بينك انت وماما؟
===============================
{عند غسان وكمال، رجعوا البيت المهجور، بعد ما جابوا العلاج من الصيدلية..وكان غسان فاق ولكنه تعبان}
كمال:حمدالله على السلامه يا غسان
غسان:-------------
كمال:انا مفهمتش حاجة من الدكتور، كل اللي فهمته انك هتاخد العلاج ده كل يوم!..بس انا شايف ان قعدتنا هنا مش صح وهتزود تعبك أكتر
غسان(بتعب) :بالعكس، انا برتاح هنا أكتر من المستشفى
{بص كمال حواليه يقارن كلام غسان...لقى المكان مهجور ومش نضيف، فيه زبالة وحشرات..وضلمه!}
كمال (بتردد) :امممم ازاي بس ده مكان نجس
غسان:مش هيكون أنجس من زهرة وأنيسة..وبالأخص زهرة...يا ويلها على اللي هتشوفه مني!
كمال:خلينا بس فيك وفي تعبك ده...احنا هنرجع مصر امتى صحيح؟
غسان:لما ألاقي زهرة..وعلفكرا انا عارف مكانها!
{وفجأه غسان استرد قوته وقام ولا كأن حصله حاجة، تنح كمال من الموقف، وقام وراه بـ ليلى}
كمال(بخوف) :امممم عرفت ازاي؟
غسان(بصوت حاد) :متسألش!
{مشى غسان ووراه كمال وليلى، لحد ماوصلوا مركب القبطان..كانت زهرة وأنيسة قاعدين مع القبطان والمساعد، وأول ما غسان وكمال و ليلى دخلوا عليهم تنحوا...قامت زهرة ودخلت الأوضة بسرعة وهى بتصرخ وقفلت على نفسها، دخل غسان وراها جوا وابتدا يرزع على الباب بعنف..دخل وراه القبطان والمساعد وهما مش فاهمين في اية؟}
القبطان(مصدوم) :في اية انت ازاي تقتحم المركب علينا بالشكل ده!!!
غسان(بزعيق) :انت تخرس خالص!!
{وكان بيخبط الباب بقوته، وزهرة بتصرخ جوا، وكل ما القبطان يشد غسان..يقوم زاقه واصراره يزيد أكتر...لحد ما كسر الباب على زهرة..ودخل جابها من شعرها وهى بتصرخ، وخدها برا وخرج..وخدهم كلهم هو وكمال وركبوا المركب التانية عشان يرجعوا مصر!}
================================
{تاني يوم صحيت مهره من النوم وعينيها وارمة من عياط ليلة امبارح..دخلت الحمام تغسل وشها، وبعدين وقفت قصاد المرايا، تداري عينيها بالكريم..وكانت وجيدة في شغل البيوت..وفجأه مهره لقيت الباب بيخبط، راحت تفتح لقيته حاتم!!}
مهره(مصدومه) :يانهار اسود حاتم؟؟...انت اية اللي جابك هنا؟؟
حاتم:جيت أشوفك، عشان نشوف حل في المشكلة اللي اتحطينا فيها بسبب أمك!!
مهره:لا امشي ابوس ايدك بدل ما حد يشوفك هنا ويفهم غلط!...ماما لو عرفت هتطين عيشتنا!
حاتم:أمك في الشغل، وراها عزومة النهاردة..انا أكيد مش هتصرف من دماغي...وبصراحة كلام التليفونات ده مش هينفع!
{وفجأه مهره سمعت صوت حد نازل على السلم، راح حاتم داخل جوا بسرعة وقفل الباب}
مهره(منفعله) :شوفت بقى انك هتعملنا مشاكل؟
حاتم:محدش شافني!...انا بفكر أخلي أبويا يكلمها..ولو منفعش، هخلي امي وأخواتي يروحوا يفاتحوها في موضوعنا، يمكن تقتنع!..ماهو بصي انا مش هرتاح غير لما هى توافق!!
مهره:مش دلوقتي يا حاتم، اصبر كام يوم يكون الموضوع هدى شوية...يمكن المحاولة الجاية توافق!
حاتم:الوقت اللي بيعدي مش لصالحنا يا مهرة، لازم نستغل كل دقيقة بتعدي علينا صح!
مهره:الحل انا قولتهولك يا حاتم، نصبر كام يوم تكون ماما هديت...ياخوفي بعد كل ده ترفض برضه!
حاتم:انشالله ترفض مليون مره، انا مش هسيبك يا مهره...انا بحبك وشاريكي وعايز أكمل حياتي كلها معاكي!
{ومسك ايد مهره وباسها بكل حب، وفجأة باب الشقة خبط، وهوب الباب كان بيتفتح بالمفتاح ووجيدة برا..كانت جاية تاخد حاجة وراجعه تاني!...وأول ما حاتم و مهره سمعوها ارتبكوا ارتباك شديد، وطلعوا يجروا يمين في شمال مش عارفين هما رايحين فين، لحد ما دخلوا الأوضة وحاتم نزل تحت السرير!...دخلت وجيدة لقيت مهره واقفة قصادها متوتره ومش قادره تبص في عينيها!}
مهره(بتوتر) :حمدالله على السلامه...في حاجة نسيتيها هنا ولا اية؟
وجيدة:اه نسيت البوك بتاعي، ودكر البط في الفريزر، كانت ست منال شايلاه عندي عشان عزومة النهاردة
{دخلت وجيدة المطبخ وفتحت الفريزر، طلعت منه البط..وخرجت تدور على البوك، و مهره وشها احمر من كتر الخوف والارتباك}
وجيدة:انتي غيرتي مكانه يا مهره؟
مهره(بتوتر) :لا... اه كان هنا...تقريبا انتي شيلتيه في الصالة
وجيدة:لا انا فاكرة انه كان هنا في الأوضة، كنت حاطاه على الترابيزه...اللهم رد إلي ضالتي...بسم الله الرحمن الرحيم
مهره(بتوتر) :خليكي انتي، انا هدور عليه
وجيدة:هدور معاكي، ادعي نلاقيه، ده انا شايله فيه كل الفلوس والله
{وبعد ما وجيدة دورت في كل الأوضة مع مهره، راحت موطيه تبص تحت السرير، صرخت أول ما شافت حاتم!!...خرج حاتم من تحت السرير، ومهره حاطة ايديها على بؤ وجيدة ومرعوبه منها...راحت وجيدة قالعه الجزمة ونزلت ضرب في مهره لحد ماوقعوا هما الاتنين وحاتم بيشد فيهم!}
وجيدة(بصويت) :يا زباااالة....يا قليلة الادب يا واطية...اتفووه على دي رباية... في بيتي؟؟؟... في بيتي يا &@#$@....و تقوليلي بيخاف عليا؟؟؟؟؟....حرام عليكم...حرام عليكم انتوا عاوزين مني ايه؟؟...عاوزين تموتوني بالحياه؟؟؟
حاتم:والله العظيم ما حصل أي حاجة!!...انا بقسملك بالله!!!
وجيدة(بصويت) :اطلع براااا...انا كلامي مش معاك، انا كلامي مع ابوك وامك...اطلع برا بيتي... اااه
{خرج حاتم من الشقة، ولسة وجيدة بتصرخ وبتضرب مهره}
مهره(بصويت) :والله العظيم انتي فاهمة غلط، والله ما حصل أي حاجة من اللي بتفكري فيها!!...في سوء تفاهم والله سوء تفاهم صدقيني!!
وجيدة(بصويت) :مستخبي تحت السرير في الأوضة وتقوليلي سوء تفاهم؟؟؟...هو اللي مبيعملش حاجة غلط هيستخبى؟؟؟...ااه يا رخيصة...انتي رخيصة يا مهره...حطيتي راسي في الطين...فضحتيناااااا
{ونزلت ضرب في مهره وهى لسة بتصرخ!}
===============================
{عند متولي كان قاعد لقى حاتم رجع وهو وشه مخطوف ومصدوم...قعد وهو ساكت مبينطقش}
متولي(بإستغراب) :مالك يا حاتم في اية؟
حاتم:---------------
متولي:الله...مالك جرالك اية...انت بلعت لسانك؟
حاتم(بخوف وتردد) :اممممم... أاا... مش عارف
متولي:في اية؟...اتخانقت مع حد؟
حاتم(بعصبية) :انا غبي!!!!...عملتلها مشكلة!!!...انا بقيت مصدر أذيتها!!!...ياريتني ما روحت...ياريتني!!
متولي:انت بتتكلم عن اية يا حاتم؟؟
حاتم:انا عملت مشكلة كبيره اوي اوي لـ مهره، ولازم اصلح غلطتي
متولي(بزعيق) :تصلح غلطتك؟...يانهارك اسود ومنيل، انت هببت اية؟؟
حاتم(بعصبية) :أكيد مش ده قصدي، بس احنا اتفهمنا غلط..كان عقلي فين لما روحت!!
متولي(بزعيق) :ماتنطق وتخلصنا...عملت اية؟
حاتم:روحت البيت لـ مهره، وست وجيدة طبت علينا!
{قام متولي وهو مصدوم ومسك حاتم من هدومه وهو مبرق}
متولي(بزعيق) :الله يخربيتك...انت عبيط يالا؟؟...يخربيتك على يخربيت سنينك السودة...وانت تروحلها البيت بتاع اية؟؟؟
حاتم(بخوف) :والله العظيم كانت نيتي شريفة، بس اتفهمنا غلط!...وست وجيدة أول ما شافتني، فضلت تصرخ وتضرب في مهرة وطردتني من البيت!
متولي(بزعيق) :تستاهل...ايوة تستاهل الأكتر من كدة كمان!...انت جيبتلها شُبهه...زمان أمها مطربقة الدنيا فوق دماغها...انت بتتصرف من دماغك لية؟؟
حاتم(متعصب) :وهو انا عيل صغير لما هاخد رأيك؟؟
متولي:طول ما أبوك على وش الدنيا، هتفضل عيل صغير...لية يابني كده، لية بس؟؟...شكلنا اية قصاد ست وجيدة دلوقتي؟؟؟
حاتم(متعصب) :طب اعمل اية طيب، انا مش عارف اتصرف!!!
متولي:اسكت بقى وخلينا نتهبب نتصرف
===============================
{عند وجيدة...كانت بتشد مهره بالعافية ومصممه توديها للدكتور}
مهره(بصويت) :والله ما عملت حاجة، اقسم بالله العظيم ما عملت حاجة...انا مظلومه!!
وجيدة(بزعيق) :اخرسي خالص، مسمعش صوتك يارخيصة...فضحتينا وخليتي وشنا في الأرض من عملتك السودة!!
{طلعت تجري مهره، وجابت المصحف تحلف عليه وهي بتعيط}
مهره(بصويت) :وحياة المصحف ده، حاتم ما قرب ناحيتي...حاتم مكنش جاي عشان كده...كان جاي نحل الموضوع ونشوفله حل، ولما لقينا حد نازل على السلم مكنش قدامه غير انه يدخل جوا، وفي ساعتها كنتي انتي دخلتي، خوفنا تفهمينا غلط!!
وجيدة(بصويت) :وهو يجي من ورايا لية؟؟...يجي من غير علمي لية؟؟...مستنية اية تاني يحصل عشان تتأكدي انه مبيحبكيش وبيلعب بيكي!!...هو لو بيحبك كان جه يقابلك من ورا أمك؟؟
مهره(بصويت) :بسببك...كله بسببك...انتي اللي مش عايزه تدي فرصة لحد فينا ومصممة تتعبينا وخلاص!
وجيدة(بزعيق) :انتي بتبرري اية يابت انتي؟؟؟..بتبرري قلة أدبك؟؟؟...أختك اللي ماتت دي كان ضوفرها برقبة ١٠٠ واحدة زيك...انا اتخدعت في تربيتي ليكي، كنت فاكرة ان انا كده بطلع واحدة محترمه وصاينة ثقة أهلها ليها، طلع العكس!!
مهره(بصويت) :حرام عليكي بقى، حرام انا مابقتش مستحملة..ياريتني ما رجعت...كان أرحملي مليون مره من إني أعيش في الهم ده!!
وجيدة(بزعيق) :هم لما ياخدك يا زبالة...ده انتوا حسابكم معايا بيتقل، وحاتم ده انا هعرف ازاي اتصرف معاه!
==============================
{بعد ما غسان وكمال رجعوا البيت، زق غسان..زهرة على الأرض، ابتدت ليلى تعيط لواحدها!}
غسان(بزعيق) :أقسملك بأم الطبيعة لأنفذ كل اللي وعدتك بيه يا زهرة..ده انتي عقابك لا هيكون قبله ولا بعده
{وبعدين بص لـ كمال}
غسان:هاتلي السلك وتعالى ورايا
زهرة(بصويت) :سلك اية؟؟
أنيسة(بصويت) :لا يا غسان..حرام عليك، دي أختك وفي صلة قرابة ما بينكم...عشان خاطري يا غسان ملكش دعوه بـ زهرة!!
{راح غسان ضرب أنيسة بالقلم على وشها}
غسان(بزعيق) :اخرسي
{جه كمال بالسلك وشدوا زهرة وهى بتصرخ وطلعوها فوق في الأوضة...راحت غسان موصل سلك الكهربا في الحيطة ودخله في بؤ زهرة!!!!....ابتدت زهرة تترعش وتتشنج، وهو مكمل...ووراه كمال بيموت ومش قادر ينطق...لحد ما شد السلك من الحيطة، كانت زهرة تعبانه جداً}
غسان(بصوت حاد) :انتي لسة شوفتي حاجة؟؟...اصبري اصبري ده اللي جاي تقيل...روح هاتلي الكرباج...يلا انجز!!!!
{خرج كمال وجاب الكرباج و رجع، كان بيقدم رجل ويأخر رجل لحد ما دخل الأوضة واداهوله!...راح غسان نازل ضرب في زهرة بكل قوته وهي بتصرخ، طلعت أنيسة فوق وفضلت تخبط علي الباب وتصرخ ولكن مكنش حد بيفتحلها}
غسان(بزعيق) :وشوية الأوساخ اللي كانوا معاكي في الأوضة، انا عارف مكانهم، وهخلي الجاي سواد فوق دماغهم يا زهرة...خليهم ينفعوكي، ده انا هندمكم كلكم على اليوم اللي اتفقتوا عليا فيه!!!
انيسة(بتخبط بصويت) :افتح يا غسااان...افتح...متعملش فيها كده....دي أختك...أختك والله حرام عليك اتقي ربنا!
غسان(بزعيق) :اخرسي يا زبالة الشوارع يالي برا، مش عايز أسمع صوتك، دورك جاي متقلقيش!!
{وكمل ضرب في زهرة وهى لسة بتصرخ}
=============================
{عند علاء و نويري بعد ما وصلوا ليبيا...في الجبل...كانوا قاعدين مع ناس معارفهم، ومولعين النار وقاعدين على نورها}
_أخيراً نورتوا ليبيا، ههههه فينكم من زمان؟
علاء:ده بنورك انت، احنا خلاص هنستقر هنا
نويري:بس مش بذمتك هنا هدوء وراحة بال؟
علاء:بصراحة اه...أحلي هدوء و راحة بال...لا تقولي بيري وحواراتها، ولا الشغل وحواراته!
نويري:لأ وفي حاجة نسيتها!
علاء:حاجة اية؟
نويري:الفلوس هنا ضعف المرتب اللي كنت بتاخده في شغلك!
علاء:انا اتعودت محكمش على حاجة قبل ما اجربها!
نويري:هتجرب وهتشوف
{يقرب واحد منهم بـ سلاح شكله مميز}
علاء:حلو اوي، ده يعملة كام؟
_١٠٠ ألف
علاء:غريبة مع انه مميز وشكله حلو
=السلاح ده قاتـ.ـل ١٠ أفراد قبل كده!
نويري:ههههه لا ده احنا نخاف بقى!
=سلاحنا مبيقـ.ـتلش غير الخاين، الخسيس!
{شرق علاء، فا بص له نويري وضحك}
علاء:اية مالك في اية؟
_ماية بسرعة
{جه شخص بكوباية الماية، خدها علاء وشرب}
علاء:تسلملي
_دي ماية آبار...فيها....سم
{شرق علاء وفضل يكح ووقع على الآرض، وبرق، وهما لسة بيضحكوا..لحد ما واحد منهم سنده وقومه}
_متخافش مفيهاش سم ولا حاجة...ده كان اختبار لـ ثقتك فينا...بس شكلك بتخاف على نفسك اوي!
نويري:بصراحة، بيترعب على نفسه مش بيخاف بس
علاء(بخوف) :مفيهاش سم ولا بتحوروا؟
نويري:متخافش يا علاء، ماهما عملوا معايا كده قبل كده، هما بس حبوا يلعبوا بأعصابك شوية
علاء(بخوف) :طب الحمدلله
================================
{عند حاتم، خد متولي وراح عند هويدا واخواته البنات، وكانوا كلهم متجمعين في الصالة}
هويدا:لا اله الا الله، لية كده بس يا حاتم، كده عملت مشاكل لـ بت الناس؟
حاتم:عشان خاطري تيجي معايا انتي ونسمة وتتكلموا معاها كلمتين يهدوها من ناحيتي
نسمة:ده انت عكيت الدنيا اوي يا حاتم...الله يكون في عونها دلوقتي، زمان امها طلعت روحها
هويدا:ماشي يا حاتم، انا هاچي وأمري لله
سميح(بصوت حاد) :وانا رأي فين يا هويدا؟...بجى بتلغي شخصيتي، ولا كأني ميت؟؟
هويدا:حاچة زي دي مفيهاش رأي و رأيك...حاتم ابني غلطان ولازم نصلح غلطته قصاد أم البت
سميح(بزعيق) :لاااا، وآني بجول مفيش مرواح
حاتم(بصوت حاد) :مابقولك اية ياعم سميح، ماتطلع نفسك منها وتريحنا...ولا هو فرض رأي وخلاص؟
هويدا:استنى انت بس يا حاتم...چرا اية يا سميح انت هتعملي فيها خدوهم بالصوت؟..ماتسيبني اساعد الواد!
متولي:استهدوا بالله، احنا جايين ناخد اللي يحللنا مشكلتنا، مش يعقدها زيادة!
حاتم:يلا ياماما قومي، انا مستنيكم برا
{قام حاتم ووراه متولي وعبدالله، راح سميح قايم}
سميح(بزعيق) :طلا....
هويدا(بزعيق) :حلفاني على حلفانك..لا كلامي انا اللي يمشي، انا داخلة البس!
{وعدت من جنب سميح وهى بتبصله بنظره حادة}
================================
{في بيت وجيدة، كانت قاعدة على الكنبة تعيط، لحد ما صاحبة الشقة اتصلت عليها}
وجيدة(بحزن) :الو ياست منال
_انتي ازاي مجيتيش لحد دلوقتي؟؟..كل ده بتجيبي الطلبات؟؟...انتي عارفة انتي عملتي اية؟؟...الضيوف قاعدين برا وانا في نص هدومي!!
وجيدة(بحزن) :حاضر انا جاية اهو!
_لالا تيجي اية؟...وهو انا هلحق اخلص العزومة في نص ساعة؟...انتي خليكي مكانك وانا هبعتلك يومين الشغل اللي اشتغلتيهم عندي، وياريت متجيش تاني
وجيدة(بحزن) :اسمعيني بس يا....
{ولسه وجيدة بتكمل كلامها، كانت الست قفلت في وشها}
وجيدة:الو ياست منال...روحتي فين؟؟
{حطت وجيدة الموبايل على الكنبة...وزاد عياطها... وجوا في الأوضة كانت مهره قاعده على الأرض وسانده ضهرها على الحيطة، وضامة ايديها ورجليها مع بعض، وبتعيط}
مهره(بحزن) :وانا اللي فاكره انها هتفرح بيا، مفرحتش!...بالعكس زعلت مني وزعلت منها!...وعلاقتنا ببعض اتدمرت!...هى لية بتعند معايا أوي كده؟..وواقفة في طريق سعادتي!...هو انا بنتها ولا عدوتها؟...لية كده يا ماما، فلوس اية اللي بتفكري فيها، ما حاتم عنده حق..كل حله وليها غطاها..ده انا اتولدت وعيشت عيشة فقر، ويمكن لو اتجوزت واحد غني زي مانتي عايزه...يطلع عيني...ماهو هيشوف نفسه عليا، ابن الناس الغني لكن اللي معاه جربوعه فقيره ولا تسوى جنية!...فاكره انك كده بتحافظي عليا وانتي بتدمريني بإيديكي!
===============================
{وعند حاتم ومتولي و هويدا ونسمة، ركبوا المواصلات واتجهوا لـ بيت وجيدة..وطلعوا وخبطوا على الباب، وكان حاتم ومتولي مستنين تحت في الشارع..قامت وجيدة وفتحت لقيتها هويدا وبنتها}
وجيدة(بصوت حاد) :جايين هنا عايزين اية؟؟؟
هويدا:صلي على النبي ياست وچيدة
وجيدة:علية الصلاة والسلام...نعم؟
هويدا:هنتكلم على الباب ولا اية، مش هندخل؟
{دخلت وجيدة جوا من غير ما ترد، وهما دخلوا وراها}
هويدا:انا چاية أوضحلك الصورة الغلط اللي اترسمتلك!...اسمعي يا وچيدة، كل واحد فينا عارف تربية عياله كويس اوي...عارف عمايل ايديه الاتنين من الآخر يعني...وانا ابني حاتم متربي تربية زي الفل، طول عمري مربياه علي الأصول والأدب والأخلاق
وجيدة(بصوت حاد) :اخلاق مين يا أم اخلاق؟..هو اللي يعمل عامله سوده زي دي يبقى عنده اخلاق ولا يعرف سكتها منين؟
هويدا(بصوت حاد) :انا مسمحلكيش تتكلمي على حاتم بالشكل ده...انا ابني لمؤاخذة معملش حاچة غلط ولا حرام، لو ابني فيه الداء المنيل ده، كان عمل اللي ما يتعمل في بلاد الغربة...هناك مكنش في لا أب يربط ولا أم تظبط يا وجيدة!
وجيدة:وانا اية ضمني انه معملش حاجة؟..مش يمكن عمل؟
هويدا:طب هقول انك مش واثقة في ابني لانه مش ابنك ولا تعرفي تربيته، لكن بنتك اللي مربياها بإيديكي الاتنين، مش عارفه غلطت ولالا؟؟
وجيدة(بصوت حاد) :انا بتكلم على ابنك، مبتكلمش على بنتي...انا الحمدلله واثقه فيها، وعارفة انها مبتعملش حاجة غلط!
هويدا:كلامك غريب يا وچيدة..منين واثقة في بتك ومنين بتجولي الكلام ده؟
وجيدة:حاجة متخصكيش
هويدا:كتر خيرك يا محترمة...انا على العموم چيت أوضحلك، ان حاتم كان چاي يتكلم وياها من على الباب ودخل چوا لما لجى حد چاي، خاف يشوفهم ويفهم غلط، وانتي عارفة الناس متتوصاش في الإشاعات!
نسمة:انا شايفة انكم تستهدوا بالله، احنا جايين نحل المشكلة مش نعقدها...اخويا حاتم والله ما هتلاقي أحسن منه لا في أخلاقه ولا أدبه
هويدا:شرفتونا
{بصيت هويدا لـ نسمة بإحراج، وخدتها وخرجوا..راحت وجيدة رازعه الباب وراهم، كل ده و مهره سامعه كل حاجة بتحصل!}
حاتم:اية حصل اية؟؟؟
هويدا(بصوت حاد) :الناس دي تنساهم، وعلى الله تفتح موضوعهم ويايا مرة تانية!!
{ومشيت وحاتم مصدوم!}
حاتم:هو اية اللي حصل يا نسمة؟؟
نسمة:شدوا في الكلام مع بعض يا حاتم!
================================
{تاني يوم عند بيري...اتفاجئت فاتن، بإن بيري لابسة ونازلة!}
فاتن :رايحة فين؟
بيري:رايحة مشوار
فاتن:مشوار اية ده وانتي لسة تعبانه!
بيري:لا انا خلاص بقيت كويسة
فاتن:معقول لحقتي؟
بيري:اه لحقت عادي، يلا عشان متأخرش، باي
{نزلت بيري و فاتن مستغربة،لحد ما بيري ركبت عربيتها ووصلت عند شغل علا، ونزلت من عربيتها ودخلت جوا البيوتي سنتر}
بيري:عايزة أقابل مديرة المكان
_اتفضلي
بيري:شكراً
{دخلت بيري ورا الموظفة، وخبطت ودخلت}
بيري:انا بيري صاحبة علا
المديرة:اتفضلي، اهلاً بيكي
بيري:اهلاً
{وقعدت}
بيري:بصي انا مش هطول عليكي، عندي فيديوهات حلوه اوي لـ علا، ممكن أوريهالك؟
المديرة:فيديوهات اية؟
{فتحت بيري الموبايل ووريتها فيديوهات ليها وهى بتسرق فلوس من البيوتي سنتر بتاعها}
بيري(بإبتسامه) :ايه رايك؟
المديرة(مصدومة) :لا يمكن تكون دي علا!!!!