رواية ندبات قدر
الفصل السابع والعشرون 27
بقلم الشيماء مسعد
قد تبدو لك الحياة غير عادلة ، قد تشعر ان دعواتك لا تستجاب
لكنك لا تعلم أن الطاف الله تحيط بك دائما ، تذكر فقط كم مرة انجاك من حافة الهلاك ، عليك ان تحسن ظنك بالله ،تيقن بأنه يوما ما سيولد من رحم الظلمة نورا يضئ حياتك، ويجعل الله لك قرة عين لا تنقطع ، فقط ثق بالله ❤️❤
تحركت قدر لتصعد غرفتها لكن اوقفها رازي قائلا : قدر
نظرت إليه اقترب منها بابتسامة جذابة التقط كفها وقبض عليه وقال : عندي ليكي مفاجأة
أخذها إلى غرفتها وما ان فتحتها اتسعت عيناها من المفاجأة
وقالت وهي تصيح من الفرحة : مكتبة
احتضنت رازي وهي تقول بامتنان وسعادة : شكرا يا رازي انك في حياتي
بادلها العناق وهو يقول : أنتي اللي لازم اشكرك لأنك رجعتي الحياة تاني لقلب رازي .
ابتعد عنها وقال : فيه حاجة تاني كان نفسي تبقى مفاجأة لكن مش هقدر اخبيها
استمعت له بانتباه وهو يكمل : هاعملك احلى فرح يا ست البنات ، جهزي نفسك واستعدي كويس للفرح
اتسعت ضحكتها وهي تطالعه محاولة استيعاب كم هو شخص جميل رائع في كل شئ
امسكها من ارنبة انفها وقال : أي أوامر تانية سمو الأميرة
زمت شفتيها وأخذت تفكر لبرهة ثم قالت : فيه حاجة كده نفسي فيها بس خايفة تتريق عليا
ضحك وقال : لا مش هتريق وعد
تنهدت بحماس وقالت : نفسي اجرب احساس المخطوبين عن حب ايه رأيك فترة قبل الفرح نبقى مخطوبين
رفع حاجبه وقال : مخطوبين ؟! يعني هدايا ورد ودباديب وكده
هزت رأسها بنعم
ضيق عينيه وقال : ماشي ، مانا اللي جيته لنفسي على كل حال
قرب وجهه من وجهها واغمض عينيه وقال : مافيش شكرا
دفعته للخارج وهي تقول : مافيش واحدة مخطوبة بتبوس خطيبها يا سيد رازي
ضحك وهمس لها : تصدقي واحشتني
قالت بعدم استيعاب: هي ايه دي
قال : سيد رازي
ابتسمت له وقالت : طب يلا يا سيد رازي امشي عشان عايزة اغير هدومي
قال هو بغيظ : ماشي ، بكرة تندم يا جميل ، أنا في مكتبتي تحت وماحدش يجي يلتصق فيا ويقول محتاج استلف كتب
ضحكت وهي تشير الى مكتبتها وقالت محاولة تسير استفزازه : عندي واحدة
ضغط على شفته السفلى بأسنانه وهو يقول : مانا اللي جيته نفسي فعلا
____________________
في المستشفى
استفاق إياد بعد إجراء جراحة له بعدما تلقى طعنة من أبناء عمومة نورين
كانت نورين مازالت تنتحب وهي تعض يدها من الخوف والقلق على إياد بجوارها الاستاذ عبد الناصر الذي لم يتركها لحظة
وصلت السيدة مريم لأن نورين هي من هاتفتها وطلبت منها الحضور وقصت عليها كل ما حدث
أتت مريم واحتضنت ابنتها التي ما ان رأتها حتى ازداد نحيبها وكأنها قد وجدت من تفرغ معه كل ما تشعر به من آسى وحزن بعد ذلك اخرجت السيدة مريم نقود من حقيبتها واتجهت ناحية الحسابات لكنها تفاجأت حينما علمت ان الاستاذ عبد الناصر قد دفع تكاليف المستشفى
عادت لهما وقالت بحرج وهي تمد النقود لعبد الناصر : احنا بنتعبك معانا اوي يا استاذ عبد الناصر ، اتفضل دا حساب المستشفى
بهت وجهه وقال : عيب في دا يا مدام مريم ، شيلي الفلوس بتاعتك
اعادت النقود إلى حقيبتها وقالت : شكرا ، المهم إياد كويس
قبل أن يتفوه عبد الناصر خرج الطبيب وأعلن ان إياد استعاد وعيه وهو بحالة جيدة الآن
تنفست نورين الصعداء ودلفوا جميعا للداخل للاطمئنان عليه
اقتربت نورين وقالت بقلق : إياد ، بقيت كويس ، حاسس بإيه
ابتسم لها رغم المه وقال محاولا ان يبدو طبيعي ولا يتفوه بما يستفز مريم : الحمد لله انا بخير يا حبيب...
بتر كلمته حينما حدجته مريم بنظرة مرعبة
اكمل هو : الحمد لله بخير يا نورين
اطمئنت مريم وقال عبد الناصر : الدكتور قال انك ممكن تخرج
اسرع إياد يرد : انا مش هينفع اروح البيت ، ابويا هيفتحلي تحقيق وممكن يكبر الحوار ، مش عايز نورين تدخل في حوارات لحد ما اشوف هاتصرف ازاي مع ولاد عمها
ابتسمت مريم فهي منذ ان عرفت كم يعشق إياد ابنتها احبته كثيرا ، فهي تعلم أن نورين لن تجد أحد يحبها يتلك الطريقة التي تحبها
قالت نورين : ناخده عند مهاب والياس يا ماما مش يرفضوا هما زي اخواتي ومستحيل يرفضوا ليا طلب
ابتسم إياد وقد فكر ان تلك فرصة ليكون قريبا من نورين طوال الوقت
قال : دي فكرة حلوة انا موافق
____________________________
كانت مايا جالسة مستندا برأسها على صدر نزار ورغد ممرضة رازي القديمة قابعة في المقعد المقابل لهما
قالت مايا وهي تهز سائر جسدها : رني على الخدامة واعرفي منها بطريقتك فيه طفل في القصر ولا لا
وما ان انهت كلماتها حتى استقبلت رسالة على موقع التواصل الاجتماعي واتس اب
أسرعت تفتحها وجدت مقطع فيديو لادم في صورة ليست حقيقية إنما هي تركيب لكن مايا من هول الصدمة لم تنتبه
كانت الصورة لادم يجلس على حافة الهرم الأكبر
صرخت مايا والقت الهاتف من يدها
التقطه نزار وقال بغضب وغل : بالله لدفعه ثمن هاد كتير غالي
وأمر رغد قائلا : هلأ بتتصلي على الخادمة تعرفي منها كل التفاصيل ومن هي مرته وكل اشى عن حياتها
اومأت رغد بالموافقة وهاتفت سناء التي أسرعت بالرد وهي تقول : ازيك يا بت يا رغد ، اسكتي فيه اخبار حلوة اوي ، رازي باشا هيعمل فرح كبير اوي والبشمهندس الياس خطب وهيكتب كتابه
كانت مايا ونزار يستمعان للمحادثة
قالت رغد : أنا فرحت من قلبي لرازي بيه ، ولازم اجي بنفسي ابارك
قالت سناء : طبعا تعالي بس الفرح كمان اسبوعين
ابقي تعالي قبل الفرح بأسبوع نقعد مع بعض ونظبط الفرح واحشتني ايام ما كنا بنتلم مع بعض على سطح القصر ونرقص ونغني بعد ما رازي بيه ينام
ضحكت رغد وقالت : طبعا هاجي انا مافيش حد أغلى من رازي بيه عندي ، بس العروسة دي منين أصلها ايه احكيلي يا سناء
قالت سناء بعجلة : مش وقته دلوقتي يا بت لما تيجي هاحكيلك كل حاجة عنها ، دي حكايتها حكاية
ابتسمت رغد لمايا بخبث وقالت : اكيد هاجي ، يلا سلام
أقفلت الخط رغد
ونظرت لمايا وقالت : أنا هاروح ادور بنفسي على البيه الصغير لحد ما اعرف هو فين يا ست مايا
هزت مايا رأسها وكانت تنظر للفراغ وقالت : أنا عندي خطة هاعرف ارجع بيها إبني وانتقم من رازي أشد انتقام على اللي عمله فيا
__________________________
بعدما طلبت مريم من الياس ان يستضيف إياد في شقته وافق الياس
أصبحت نورين تأتي لتراه كل يوم قبل أن تذهب لدروسها ومريم وتعد له أطعمة صحيه تساعده على الشفاء سريعا
وفي صباح ثالث يوم له في منزل الياس ومهاب وبعدما خرجا للعمل حضرت نورين وهي تحمل طعام الإفطار له
دقت الباب ودلفت وتركته موارب
قالت بابتسامة: صباح الخير ، عامل ايه انهاردة
رد هو : صباح الفل يا حبيب بابا ، أنا لو أعرف اني كل يوم الصبح أول وش هاشوفه انتي كنت اضربت من زمان
قالت هي بلهفة : هي بعد الشر عليك يا إياد
حاول ان يعتدل من نومته لكنه اطلق تأوها من المه
هوى قلبها واسرعت تقف جواره وهي تقول: إياد هاسعدك
وضعت الطعام على الكمود المجاورة للسرير وسندت ظهره بحذر
نظر في عينيها مباشرة وقال : خايفة عليا يا قلب بابا
أبعدت عينيها عن خاصته وقالت: طبعا خايفة عليك دانا كنت هموت من القلق عليك وانت في اوضة العمليات
رد هو : بعد الشر عنك يا حبيبي دانا افديكي بروحي
وضعت حاملة الطعام أمام إياد وجلست على طرف الفراش
بدأ هو يأكل وهي تراقبه بسعادة
قالت وهي تنظر في ساعة يدها : إياد انا اتأخرت ع الدرس
نظر إليها بحب وقال : ربنا يوفقك يا حبيبتي
دلفت مريم وهي تقول : نورين روحي درسك وانا هاشوف الباشمهندس إياد لو محتاج حاجة
ركدت للخارج وهي تقول : تمام يا ماما خلى بالك عليه
ابتسم هو ونظر لمريم وجدها رافعة حاجبها حمحم وكبح ضحكته وقال : منورة يا ست مريم
لوت فمها وقالت : دا نورك ، أنا كنت حابة اشكرك على اللي عملته ما بنتي ، انت بجد شهم
ترك الملعقة وهو يقول : أنا معملتش كده عشان شهم ، أنا بحب نورين وافديها بروحي يا ست مريم
ابتسمت وقد شعرت ببعض الراحة فهذا الفتى يبدو صادقا جدا في مشاعره التي تظهر جلية على عينيه ووجه
_________________________
اما عن رازي فقد كان يستعد للذهاب في مهمة في عمله وقد ابلغ قدر انه سيظل بعيدا عنها اسبوعين وقبل ان يغادر
كانت تعد له حقيبة السفر وهي حزينة
دلف إلى الغرفة وكان ممسكا بصندوق هدايا وقف أمامها وحك خلف رأسه بحرج وقال : دي هدية عشانك
ابتسمت رغم حزنها وقالت بمشاكسة : حركات مخطوبين يعني
حك أنفه بحرج وقال : امم
فتحت الصندوق وجدت به عروسة لعبة ممسكة بيدها زهرة اللوتس ومجموعة شوكولاتات
ابتسمت وقالت : إنت شكلك بتحب زهرة اللوتس اوي
التقط كفها وقبل باطنه وقال : حبيتها من يوم ما عرفتك
قالت وبدا عليها الحزن : ما تتأخرش عليا ، وخلى بالك على نفسك
هز رأسه وحاول ان يقبلها لكنها ابتعدا عنه قائلا : قلنا ايه ، إحنا في مرحلة الخطوبة
ابتسم وقال : هانت
قبل جبهتها والتقط حقيبته وغادر
مر الاسبوع على قدر بليله الطويل من كثرة التفكير في حبيبها الغائب ونهاره المتكدس بالمهام التي تبذل قصارى جهدها لانهائها قبل رجوع رازي
لكن هناك شخص آخر انضم لمساعدتها كانت رغد التي تمثل أنها أتت للمساعدة وأنها فرحة للغاية لكنها ما أتت الا لإفساد كل شئ كانت تتلصص وتسترق السمع وعلمت كل شئ عن حياة قدر حتى ممدوح
كانت تسترق السمع على قدر حينما هاتفت قدر فاطمة
وقالت بغضب : أنا زعلانة منك يا فاطمة كده برضو سيباني لوحدي في وقت زي دا
قالت فاطمة بصدق حقيقي : وانا اقدر برضو اتخلى عنك دانا ما بصدق اروح القصر ، أنا مستنية اتجوز بفارغ الصبر عشان نبقى أصحاب اكتر ، المشكلة ان احنا بنسابق الزمن عشان نسلم مشروع القرية السياحية لازم المشروع يتسلم في معاده عشان المصداقية وعشان نكسب ثقة الشريك الأجنبي
قالت قدر : تمام بس لأسبوع اللي جاي تكوني هنا بأي طريقة مش هاقبل أعذار
_________________
ذهب مهاب الي النادي الذي تتدرب فيه هاجر وصل عندها ووقف ينظر إلي طريقتها فى التدرب وتركيزها فى خطوات التمرين
وقال : يارتني كنت كيس رمل وتركزي معايا كده حتي لو كنت هتضرب
نظرت له هاجر بضيق وقالت : كيس رمل يا جاهل ، مهو طبعا انت اخرك الجيم اللى فوق سطوح بيتكم
رد ضاحكا : وحشتيني يا كابتن قلبي ، بالحضن بقى وكان سيقترب منها وهو يفرد دراعه
أوقفته هاجر بضربه في صدره : دا بعينك ، وبعدين انت لسه فاكر تسال لا وكمان وحشتك ، ده انا قلت انك فقدت الذاكرة
قال بصدق حقيقي: حقك عليا ، انتي عارفه اني هارب من الشركه عشان اشوفك لانك فعلا وحشتيني ، والله حتي مش فاضي اكلم امي واخواتي
تعاطفت معه هاجر ولكن دون أن تظهر له وقالت : فى اختراع اسمه موبايل ، تسمع عنه
قال بغضب مصطنع : برن عليكي تلفونك مغلق ، اعمل ايه يعني اكتر من كده
قالت هي بلامبالاة : بكون نايمه
قال هو باستعجال : طب انا كنت جاي اعزمك على فرح رازي اخو الياس ، وبصراحه عايزك تكوني معايا ، ها هتعرفي تتصرفي وتيجي
كان داخلها فرحا جدا لانه يريدها معه وقالت : هحاول اتصرف
تأفف وقال : هاجي اخدك مفيش هشوف ولا هحاول
فكرت قليلا ثم قالت : تمام اتفقنا هاخترع اي حجه وقتها
قال قبل أن يغادر : من هنا لوقتها هتوحشيني اوي يا كابتن الكبتنات
ضحكت على كلامه ولكن اتجهت للجهه الأخري وهو لاحظ ابتسامتها وقال بصوت جوهري وهو يغادر المكان : باي يا حبيبي اشوفك بعدين
نظر الجميع إليها اتسعت عيناها من الصدمة واخفضت هي رأسها وهي تتمتم : يخربيت جنانك هتجبلي شبهه
______________________
في شركة ممدوح الصاوي
بعدما تلقى مكالمة من رقم غير معروف كانت مايا التي طلبت منه ان تقابله
هي الآن جالسة في المقعد الذي أمامه على مكتبه
تحدثت معه عن قدر وعرفت اكثر عنها
وبعدما انهت حديثها معه قالت له : واللي يرجعلك قدر لحد عندك
ابتسم بهيام وقال : ساعتها هاقولك شبيك لبيك ، اللي تطلبيه أوامر
نظرت للفراغ وقالت : تأمنلي خروجي من مصر
مد يده لها وقال : ببقي اتفقنا
صافحته وقالت : ديل
____________________
عاد رازي إلى القصر بعدما أنهى مهمته بنجاح كانت قدر في انتظاره احتضنته قدر باشتياق وهمست : حمدلله على السلامة
همس لها بشوق أيضا : وحشتيني
ثم اكمل بمشاكسة : ما تيجي نطلع فوق
حاولت التملص منه وهي تقول : ماتنساش إننا مخطوبين
قال هو بمشاكسة : هو فيه مخطوبين في حضن بعض كده
بالكاد تحررت من قبضته وقالت وهي تتحرك : مش فاضية للجدال معاك سيد رازي ورايا مليون حاجة عايزة اخلصها قبل بكرة
ابتسم لأنه يراها بهذه السعادة وهذا الحماس ظل ينظر إلى اثرها وقال : ربنا يقدرني واخليكي على طول سعيدة
صعد إلى غرفته لينال قسطا من الراحة ، اما قدر فقد كانت منهمكة جدا في ترتيب زفافها الذي هو غدا
حينما استيقظ رازي وجد الجميع مشغول والقصر يعج بالضوضاء ، يكره الضوضاء جدا
دلف إلى مكتبته لينعم بالهدوء ويغوص وسط الكتب وما بها من عوالم رائعة تأخذه في رحلة خيالية رائعة
انتهت قدر تقريبا من كل الاعدادات للزفاف
ألقت نفسها على الفراش وكأنها لم تنم منذ سنوات
استغرقت في النوم ، نام الجميع وأصبح القصر هادئ تماما
و كانت قدر قد غطت في نوم عميق سمعت خبطا خفيفا على باب غرفتها بالكاد استطاعت ان تفتح عينيها
اعتدلت من نومها وقالت : مين ؟
سمعت صوت يهمس بهدوء: افتحي يا قدر انا رازي
تحركت بسرعة ناحية الباب فتحته فركت عينيها لتتخلص من اثار النوم وقالت بقلق : رازي فيه حاجة
قال هو مقلدا نبرتها : انتي لازم تصلحي غلطتك، انا مش قادر انام بجد ، أنا خايف انام لوحدي ..
عقدت حاجبيها وقالت: غلطتي ؟ انا عملت ايه ؟ وبتتكلم كده ليه وايه خايف دي ؟
تذكرت موقف مشابه لهذا حينما قرأت رواية رعب وخافت وقالت له يجب أن تصلح خطأك وتبقى معي
ظهرت ابتسامة على وجهها و رفعت حاجبها وعقدت ذراعيها أمام صدرها
وقالت: عايز إيه يا رازي ؟
دلف وأغلق الباب خلفه وقال برجاء : مش قادر انام بجد ، خليني انام هنا الليلة دي
قالت وهي مازالت عاقدة ذراعيها أمام صدرها : لا روح اوضتك انت دلوقتي خطيبي ، مش دا كان وعدك ليا ، الراجل لازم يوفي بوعده
اقترب منها اكثر وهمس : دا لو راجل عادي
عقدت حاجبيها وقالت : اومال انت ايه سوبر مان
قال بنبرة كادت حصونها تنهار أمامها وهو يحاوط خصرها : تؤ ، أنا راجل عاشق
ابتعلت لعابها وقالت : لا برضو ، روح اوضتك
قال بنبرة بريئة كطفل صغير : عشان خاطري خليني جمبك انهاردة
تنهدت وقالت مستسلمة لرغياته : هاسمحلك تنام بس تقعد عاقل
قال ببرأة : عيب عليكي
ثم تمتم بما لم تسمعه : هو فيه حد يقدر يفضل بعقله قدام الجمال دا
قالت هي بشك : بتقول حاجة
تابع هو بنفس تمثيله للبرأة : بقول نبطل رغي وننام مؤدبين بقى ، بكرة معانا يوم طويل
هزت رأسها وقالت بابتسامة : صح
تمددت على الفراش وسحبت الغطاء دثرت نفسها جيدا
لكنه استلقي جوارها وشاركها الغطاء ليلتصق بها تماما
اتسعت عينيها وهي تقول : ابعد يا رازي بدل ما اطردك من الأوضة كلها
قال وهو يقترب اكثر : وماله هابعد اه
قالت محذرة : لو ما بعدتش هاخرج انا من ال.....
ابتلع باقي كلماتها في فمه حينما لم يترك لها مجال حتى للحركة وكانت تلك المرة الثانية التي ينقض عهده لها ويتخطى أسوار قلعتها بدون استئذان
في الصباح كانت قد وصلت فاطمة مع الياس لتشارك قدر فرحتها القت حقيبة يدها باهمال على الاريكة في الرواق واندفعت للأعلى فتحت باب غرفة قدر بدون استئذان وقد تجمدت مكانها حينما وجدت رازي بجوارها يحتضنها ويناما في سلام ابتلعت لعابها ومعالم الصدمة تحتل ملامحها اغلقت الباب مرة أخرى ومازالت لا تستوعب ما رأته عيناها
همست : وانا اللى فاكراك مؤدب يا رازي نايم كده من غير التيشيرت
حركت عينيها يمينا ويسارا تتأكد ان لا يوجد احد يراقبها وقالت بنبرة خبيثة : مافيش مانع اخطف نظرة سريعة انحنت وظلت تنظر اليهما من فتحة باب الغرفة
خبط الياس على ظهرها لم تنظر إليه وقالت : اششش دقيقة بس عايز اتفرج
همس بجانب اذنها : تتفرجي على ايه
انتفضت واقفة ما إن سمعت صوت الياس نظرت بتوتر وهي تقف أمام الباب خوفا منها ان يفتح الياس الباب
قالت بتلعثم : ها ، لا ابدا مافيش انا بس كنت بطمن قدر نايمة لوحدها ولا لا
رفع الياس حاجبه وقال : لوحدها؟
أسرعت تصحح : قصدي نايمة ولا صاحية
هز الياس رأسه وقال : تمام وانا هاروح اصحي رازي
صرخت: لااااا رازي لا
نظر إليها بشك وقال : فاطمة هو فيه حاجة ، مش على بعض كده ليه
قالت بتوتر : أنا فعلا تعبانة تعالى نتمشى شوية في الجنينة
ابتسم لها وقال : زي ما تحبي
تنفست الصعداء وهي تزيح قطرات العرق من جبينها وهمست : وقعتك سودة يا قدر
___________________________
في المساء كانت قد انتهت قدر من ارتداء فستان زفافها والان تضع اللمسات الأخيرة وفاطمة معها في كل لحظة
قالت فاطمة وهي تلوي فمها بعدما خرجت مصففة الشعر : بت إنتي انا شوفت حاجة في الصبح مش قادرة اتخطاها ، انتب فرطتي في شرفك يا بت
اتسعت أعين قدر من الصدمة وقالت : ايه شرفي ايه ، رازي دا جوزي
اكملت ببرأة وهي تقول : وهو قالي عايز انام جمبك انهاردة
قالت فاطمة : اسمعيني كويس يا بت خدي نصيحة من اختك الكبيرة ، ما تبقيش سهلة المنال كده، خليكي تقيلة زيي كده ايه اللي عايز انام جمبك نام يا رازي ، لا مش حلوة منك دي ، اتعلمي مني دانا ممشية الياس على العجين ما يلخبطهوش
كان الياس يمر بجانب الغرفة وكان باب الغرفة موارب
سمع فاطمة ابتسم وقال : بقى كده طيب يا فاطمة
صدح بصوت جوهري : فاطمة ، يا طماطم
اتسعت ابتسامتها وركدت نحو خارج الغرفة وهي تقول بصوت رقيق : نعم يا الياس
همس هو بنبرة ساحرة : وحشتيني
احمرت خجلا ونظرت للاسفل كانت قدر تتابع وهي رافعة حاجبها لأعلى
أكمل الياس بتهكم : مين بقى دلوقتي اللي ماشي على العجين يا فاطوم
ضحكت قدر اما هي فقد اتسعت عيناها من الصدمة ضحك الياس وتركها وغادر
قالت قدر وهي تضحك بسخرية : السيطرة والتقل هيفروا من عينك ، امسكي نفسك كده دانتي كنتي هتقعي مننا
قطع كلامها دخول رازي وهو يرتدي بذة رائعة سوادء وقميص ابيض ورابطة عنق بيضاء
نظر رازي إلى قدر وكأنه يراها لأول مرة ثبت ناظره عليها لبرهة ثم نطق : ماشاء الله تبارك الرحمن ، اللى يشوفك كده ما يقدرش الا يذكر الله اللي خلق وابدع
نظرت إلى أسفل وقد احمرت وجنتيها من الخجل وبجوراها فاطمة تخرج فراشات من عينيها
مسك رازي يد قدر وقبلها
قالت فاطمة بصوت مخدر لا يتناسب مع الجملة التي قالتها : ممنوع العريس يشوف العروسة الا لما تجهز خالص ، أخرج يا رازي
نظر إليها وعقد حاجبيه على تلك النبرة وهمس لقدر : مال فاطمة
قالت قدى وهي تضحك : معلش اصل لسة واخدة جرعة وحشتيني من الياس مخلياها متخدرة
ضحك رازي ودلفت رغد الغرفة وهي تقول : يلا يارازي بيه اطلع ما ينفعش تشوف العروسة قبل ما تجهز
خرج رازي وبعد مرور وقت بدأ القصر بقتظ بالمدعويين
كانت قدر حزينة وهي تقول لفاطمة : كان نفسي يكون فيه حد من عيلتي ياخدني يسلمني لعريسي
دلف الياس وهو يقول : وانا مش اخوكي يا قدر انا اللي هاسلمك لعريسك
قال رازي قاطعا كلامهما : أنا اللى هاخد قدر وننزل سوا ، مش كده يا قدر ، أنا عيلتك صح
ابتسمت وقالت : إنت كل عيلتي يا رازي والياس اخويا اللي مافيش احن منه في الدنيا كلها
تأبطت ذراع رازي وهبطوا جميعا إلى الحديقة كان مهاب قد وصل للتو ومعه هاجر
وصل رازي وقدر منتصف الحديقة وحاوطهم الياس ومهاب وفاطمة وهاجر ورغد وبدأوا في الرقص على الموسيقى الهادئة
همست له قدر : أنا مش بعرف ارقص سلو
همس لها : طب سيبي نفسك ليا
رفعها رازي قليلا عن الأرض ابدأ يتحرك بها بخفة ورشاقة وكأنها فراشة بين يديه
كانت رغد تحمل كاميرا تعرض الفرح بالبث المباشر لمايا
كانت مايا تعتصر من الغيرة والحقد عندما رأت رازي يحتضن قدر ويتراقص بها
ابتعدت رغد وبدأت توزع المشروبات المنعشة للمعازيم وبدأت أجواء الفرح تشتد بهجة
مال رازي على اذن قدر وهمس لها : أنا هانفذ لك أمنية كنت شفتك كتباها في الرواية اللي قرأتيها
عقدت حاجبيها وقالت : أمنية ايه ؟
غمز لالياس فأخرج الياس جوكي من الحظيرة حمل رازي قدر وركب الحصان وانطلق تحت انظار الجميع وهو يقول لها : مش كنتي عايزة فارس يجي يخطفك على حصانه الابيض
شهقت هي عندما حملها وقالت : إنت بجد مجنون يا رازي
صرخ هو غير آبه بالجمع وهو يقود جوكي بأعلى سرعة : أنا مجنون بيكي يا قدر
لف بها والجميع يتنظر قدومهم على أحر من الجمر ، وأخيرا عادوا
بدأ الوقت يمر إلى أن انتهى الزفاف ، لم يتبقى سوى افراد العائلة ورغد
أتت رغد حاملة معاها حامل معدني به مشروبات وقالت : لازم نشرب العصير احتفالا بالعرسان
قال مهاب وهو ينظر في ساعة يده : أنا لازم ارجع هاجر عشان ابوها ما يعرفش أنها هنا
خرج هو وهاجر
بدأ الباقي يرتشف العصير ، لم تكن فاطمة معهم سأل الياس رغد قبل أن يرتشف عصيره : فاطمة فين من حوالي نص ساعة مختفية
أجابت رغد بصراحة : مش عارفة
تحرك ليبحث عنها
أسرعت رغد وقالت : طب اشرب العصير
نظر الي العصير وقال : هاشرب أنا وفاطمة
ذهب للبحث عنها
اما رازي فقد ارتشف العصير على جرعة واحدة ليأخذ قدر ويصعد غرفتهم
حملها واتجه إلى المصعد وهو يقول : البيت بيتكم يا جماعة نجاملكم في الأفراح ان شاء الله
ضحك الجميع وصعد رازي إلى غرفته التي كانت مزينة بالورو وضع قدر على الفراش ، قبل رأسها وأغلق باب الغرفة ..