![](https://blogger.googleusercontent.com/img/b/R29vZ2xl/AVvXsEiWGcURrkAXh7V5jMw4gCEnMW3Yta-opM0WR5kMsekzbhI3e9aDaQyZGvof_9HbiUxGyMJbf5a8qCYwIZX5tbsN_1H_sit5a0I61gunQ_NiavuQp0g00ubEiwgGg1u-McceKmcP9nZFsli04xMD-y3Zlk_FxDpNzVr6z5KYabvUysfHeErkIYBgPwl76GZK/s320-rw/FB_IMG_1714493315564.jpg)
رواية الجميله والشعر الابيض الفصل الثاني عشر12بقلم رحاب القاضي
_اكثر الاماكن المحببه لقلبي، تلك التي تحمل ذكرياتي.. وخيباتي🙂
_في مكان هادي علي البحر كان واقف زكريا، ووقفت ورااه بهدوء وما قالتش اي حاجه، وبعظين قربت منه ووقفت جنبيه وقالت..
دارين
هو انت لسه بتيجي هنا؟..
زكريا بصلها وقال
المفروض انا اللي اسألك ايه اللي بيجيبك هنا؟
دارين بسخريه
هو انت يعني كنت كتبت المكان ده بأسمك..
زكريا بجمود
بس المكان ده انا اللي جيبتك فيه زمان، المكان ده كان اكتر مكان بنقعد فيه لما كنتي بتحبيني او انا كنت فاكر انك بتحبيني..
دراين بحزن
معاك حق انا كنت مرتبطه بيك عشان كنت زكريا المنشاوي وقتها رجل الاعمال المشهور وكنت فاكره برضو اني بحبك بس انا ما كنتش بحبك يا زكريا، عشان انا عرفت يعني ايه حب لما شوفته هو..
زكريا بنبره متألمه
يونس الصاوي..
بصتله بتوتر وهو ضحك بسخريه وقال
ههههههه لا ما تستغربيش كده ده طوب الارض عارف انك بتحبيه وبتجري وراه وهو ولا معبرك، بس عيب تبصي لواحد متجوز..
مسحت دموعها وقالت
مطلق هو مش متجوز دلوقتي...
اتنهدت ببكاء وقالت
بس برضو مش بيحبني، الكل خد باله اني بحبه وهو لا، انا سيبت كل حاجه عشانه بقيت اعمله كل اللي يطلبه مني وبتعب عشان اعمله والله وبرضو مش شايفني، في الاخر بيقولي شكراً انتي زميله وصديقه وبس، وبكل بجاحه يجي ويكلمني عليها هي واد ايه بيحبها، خلاني اشك في نفسي هو انا وحشه وما اتحبش طيب..
زكريا بهدوء
بالعكس انتي تتحبي اووي يا دارين، بس انتي غبيه وعمرك ما هتلاقيه بيحبك عشان هو بيستغلك وبس..
_ قال كلامه وكان هيمشي بس هي مسكت ايده بسرعه وقالت ببكاء..
دارين
انت مش هتقولو حاجه صح، انا مش عايزاه يعرف حاجه..
سحب ايده من ايدها وقال
لا مش هقول عشان افضل شايفك موجوعه كده ديماً..
ابتسم بشماته وتابع كلامه
عشان اشوفك في نفس الموقف اللي انا كنت فيه من سنين لما سبتيني عشان ما بقيتش شريك عمار وافلست...
_وسابها واخد عربيته ومشي وهي قعدت علي الكنبه الخشب القديمه اللي موجوده هناك، وفضلت علي حالها كده وقت كبير وبعدين قامت ومشيت..
ــــــ #بقلم_الكاتبه_رحاب_القاضي ـــــــ
_ وتاني يوم الصبح في بيت الست نورا..
دخلت اوضتها وكانت جهاد نايمه من امبارح من لما جات وهي بتعيط وخايفه من اقرب مالها وهو اخوها واتخبت عندها وفضلت خايفه وبتتنفض برعب لحد ما نامت، ابتسمت نورا بحزن علي شكلها الطفولي وقرب منها وقالت..
نورا
جهاد.. جهاد قومي يا حبيبتي..
فتحت جهاد عيونها الخضرا بهدوء وقالت
في ايه؟..
نورا
ما فيش حاجه بس عايزاكي تروحي تجيبي حاجتك كلها من شقة اخوكي ، هو لسه نازل من شويه..
قعدت جهاد وقالت بقلق
هو اكيد مش هيخليني اقعد عندك..
نورا
ده لو احنا اصلا قعدنا هنا، انا عندي بيت امي انا وانتي هنروح نقعد فيه هو بعيد اووي عن هنا، يعني اخوكي وصاحبه مش هيوصلو لينا خالص.
جهاد بحزن
بس انتي ذنبك ايه تسيبي بيتك عشاني، انا هرجع عنده وو..
نورا بحده
ترجعي فين يا بت انتي ده اخوكي جابلك واحد حيوان للبيت والله واعلم هيعمل ايه اكتر من كده، وبعدين مش انتي بتقولي انك مالكيش غيري بعد ربنا انا بقي اعتبرتك بنتي، فيلا بقي روحي اعملي زي ما قولتلك..
ابتسمت جهاد وقالت
حاضر يا طنط نورا هروح اجيب حاجتي من هناك..
_ وقامت فعلا جهاد وراحت شقة اخوها وجابت حاجتها وقبل ما تطلع من اوضتها افتكرت اللي حصل بالليل واتملت عيونها دموع بحزن وقالت لنفسها...
جهاد
كابوس مجرد كابوس وهنسااه واكيد هقدر اكمل حياتي بعد كل اللي حصل ده، اكيد هقدر..
_ فضلت تقول لنفسها كده لحد ما وصلت بيت نورا القديم وكان بيت بسيط جداً، ونورا قالتلها اول ما دخلوو..
نورا
انا كلمت الحج المنشاوي واخدتلك اذن النهارده عشان نروق الشقه دي..
جهاد
انا اسفه بس الشقه دي قديمه اووي وكمان عايزين شهر عشان ننضفها..
نورا
همتك معايا وهنخليها ولا الثريا، وبعدين احنا هنظبطها لما ناجر الشقه التانيه وانتي تشتغلي هنبقي نعمل اللي نفسنا فيه..
حضنتها جهاد وقالت
انا بحبك اووي انا مش عارفه من غيرك كنت هعمل ايه..
ابتسمت نورا وهي بتحضنها وردت عليها
ده انا اللي بشكرك انك بقيتي ماليه عليا حياتي يا جهاد..
_ تفتكرو كده جهاد بعدت عن زكريا وعماد اخوها ولا لسه الموضوع هيتفتح من جديد؟..
ــــــ #بقلم_الكاتبه_رحاب_القاضي ـــــ
_وتاني يوم الصبح في بيت جميله..
كانت قااعده بتفطر وقالت لمامتها..
جميله
برضو عمي ما قالكيش هو جاي عايزك في ايه؟..
فريده
لا ما قالش بس تفتكري هو ممكن يكون جاي خلاص عشان نقسم وكل حد ياخد ورثه..
جميله بسخريه
مين عمي احمد ليه القيامه قامت، يا ماما عمي احمد لو الجنيه كله من جيبه بيزغرت..
ضحكت فريده وقالت
ههههه طيب كفايه اكل يلا وروحي علي شغلك عشان ما تتاخريش..
جميله
لا لسه ما شبعتش ولسه بدري.
فريده
يا بت كفايه احنا علي الصبح بطنك هتوجعك وترجعي تعيطي..
جميله بغيظ
جرا ايه يا ماما هي كانت بطني اشتكتلك مثلا؟..
_ ورن موبيلها بوصول رساله، ولما بصت في الموبيل ابتسمت لما لقيتها من عمار وفتحتها بسرعه ولقيته باعتلها..
عمار
انا تحت يلا عشان هنروح مع بعض الشركه..
فريده بخبث
اسمه ايه اللي خلي ضحكتك من الودن للودن يا جوجو..
جميله قفلت الفون بسرعه وقالت
هاا لا ده جروب الشغل وكده، انا همشي بقي عشان ما اتأخرش..
فريده
انتي مش لسه جعانه اقعدي كملي اكلك انا لهزر معاكي..
قربت منها جميله وباستها
لا شبعت وبعدين هفطر مع فيروز في الشغل تاني..
ابتسمت فريده وقالت
طيب وابقي هاتي فيروز معاكي النهارده عشان تتعرف عليا وعلي اختك..
طلعت في الوقت ده ايتن وقالت
هي مين دي اللي اتعرف عليها...
فريده بحده
انتي ايه اللي طلعك من اوضتك يا بت خشي ذاكري..
ايتن بغيظ
رايحه الحمام يا ماما والله وراجعه تاني..
ضحكت جميله وقالت
ههههه ياااه ده الحمد لله وعديت مرحلة الثانويه دي..
فريده
امشي انتي كمان علي شغلك انتي لسه واقفه..
ايتن غمزتلها وقالت
ابقي سلميلي علي عمو عمار يا جوجو...
_ مشيت جميله بسرعه ونزلت تحت لقيت عمار واقف بعربيته قدام بيتها، ركبت جنبيه بسرعه وقالت..
جميله
والله العظيم انت ناوي تفضحني وتخلي ماما تعملني كفته، امشي بسرعه بقي..
عمار ببرود
لا مش همشي بصراحه فرصتي وهستغلها..
جميله بقلق
تستغل ايه ماما لو طلعت البلكونه وشافتك هتخلي يومك ويومي اسود..
عمار
ده ياريت عشان اخطبك منها رسمي واخلص.
جميله بغيظ
لا وانا عليا ايه انا هنزل اخد عربية ماما وانت خليك قاعد براحتك..
عمار بجديه
بصي يا جميله انا هكبر دماغي وهبرر هروبك من انك تحكي اللي بينا لمامتك هو انك خايفه من رد فعلها مش حاجه تاني، واتمني ما تكونش في حاجه تاني ومخبياها عليا...
جميله بهدوء
طيب ممكن نمشي الاول وانا هبقي افهمك كل حاجه، بس لا ده وقته ولا مكانه يا عمار..
عمار بهدوء
خليها يا عموري مش عمار واما همشي علي طول..
جميله ابتسمت وقالت
والله الحاجات دي بتطلع لوحدها يعني مش بايدي..
عمار بهدوء
براحتك خالص خليكي بخيله عليا براحتك وانا علي قلبي زي العسل برضو....
_ ضحكت هي بهدوء وبعدين اخدها وراحو الشركه، واول ما وصلو هناك جميله قالتله..
جميله
خلي كل واحد فينا يدخل لوحده هيكون احسن معلش.
اتنهد عمار بضيق وقالها
انتي تعرفي اني ما بحبش اسوق العربيه وجيت بيها عشانك الصبح وبقول حاضر علي كل اللي عايزااه، بس لامتي بقي انا هيفضل يتقالي لا يا جميله؟..
جميله
وللمره التانيه بقولك ان لا ده وقته ولا مكانه يا عمار..
عمار بضيق
ما انا هتجنن بصراحه منين بتحبيني ومنين مش عايزه حد يعرف باللي بينا.
جميله بحده
الله ما انا قولتلك بعدين نتكلم ولا انت اكمنك واقف قدام الشركه بتاعتك هتستقوي عليا ولما كنا قدام بيتنا مشيت علي طول..
بصلها عمار بغضب وقال
مش عايز افهم حاجه يا جميله..
_ قال كلامه ونزل من العربيه وهي نزلت ورااه ودخلت الشركه وهي مدايقه، ووقفها مهاب وقالها.
مهاب
كويس انك جيتي يا جميله ها عملتي ايه في الموضوع اللي قولتلك عليه؟..
_ في الوقت ده كان واقف عمار عند الاسانسير وبصلهم بغضب وبعدين طلع فوق وهو مدايق جداً، وقابلته فيروز وقالت..
فيروز
حمد لله علي سلامة حضرتك يا عمار بيه..
عمار بحده
بلغي جميله لما تطلع تجيلي علي طول..
فيروز
حاضر.. هجيب لحضرتك القهوه ولا فطار..
عمار وهو داخل مكتبه
لا مش عايز حاجه.
دخل مكتبه وبعد شويه جات جميله وقالت
صباح الخير..
فيروز
صباح النور هو انتي مزعله عمار بيه في حاجه؟..
جميله بحزن
تؤتؤ هو اللي مزعلني..
فيروز
ايه الثقه دي علي العموم ادخلي هو عايزك..
جميله بقلق
هو كان متعصب اووي؟..
فيروز
اوووي، اول مره في حياتي اشوفو كده..
جميله بقلق
طيب تعالي ادخلي معايا..
فيروز
هو انا ناقصه ادخلي وانا لو لقيتك اتاخرتي جوه هعمل نفسي جايه اقولو مواعيد النهارده وادخل..
جميله بقلق
اووف بقي هات العواقب سليمه ياارب.. استرها معانا يااارب..
_دخلت جميله وكان هو واقف عند الشباك وشكله فعلا مدايق، وقبل ما تتكلم جميله هو قال..
عمار
مهاب كان عايزك في ايه، ومش دلوقتي بس المره اللي فاتت كمان؟..
جميله بهدوء
موضوع كده هو محلفني ما اقولش عليه لحد..
عمار بصلها بحده وقال
انطقي يا جميله والا والله هببقي اخر يوم ليه هنا..
جميله بضيق
هي ايه الطريقه دي، لا علي فكره انا مش بحب كده ومش بحب حد يزعقلي.
عمار بعصبيه
طيب ما تقولي كان عايز منك ايه وانا مش هزعق،والمفروض اصلا ان من غير ما اسأل انتي تيجي وتحكيلي..
جميله بضيق
احنا لسه ما بقاش بينا حاجه رسمي عشان تتعامل معايا كده علي فكره وحتي لو كان مش من حقك..
عمار قرب منها بغضي وهي ىجعت لورا وقال بغضب
والله العظيم لو ما اتعدلتي يا جميله لاكون رايح لاامك وقايلها كل حاجه..
جميله ابتسمت بخوف وقالت
كده برضو يا عموري، ده انا حتي اهو كنت جايه اقولك بس اوعدني الاول ما تقولش لحد..
عمار بحده
اخلصي يا جميله الواد ده كان عايز منك ايه؟..
جميله بصوت واطي
معجب بفيروز وعايزني افاتحها في موضوع انه يروح يخطبها..
عمار ابتسم وقال
احلفي؟..
جميله بغيظ
بقيت مبسوط دلوقتي انت لما فتنتلك علي الواد..
عمار راح قعد علي مكتبه وقال
طبعا وبعدين مدام الموضوع بعيد عن حبيبتي يبقي ما يخصنيش..
_ ابتسمت جميله وهو كلم فيروز وقالها تدخل، وجميله برقت وقالتله..
جميله
اوعي تكون هتقولها والله ازعل منك يا عمار..
دخلت فيروز وقالت
تحت امرك يا عمار بيه؟..
عمار بجديه
بصي يا فيروز عزالدين ريان هيمسك منصب نائب مدير الاداره مكان زكريا وطبعا هو جديد وانا عايز حد يكون ثقه معاه اعرف كل حاجه بيعملها، مش هنخونه في حاجه بس زيادة امان..
فيروز
تمام يا عمار بيه، بس المكتب هنا يعني جميله هتبقي لوحدها..
عمار بهدوء
انا هتصرف ما تقلقيش المهم روحي تابعي بقي اللي قولتلك عليه وسيبي كل حاجه تخص مكتبي لجميله.
فيروز
حاضر.. بعد اذن حضرتك...
طلعت فيروز وجميله قالتله
انت لو ناوي تخليني امسك المكتب لوحدي يبقي بتحلم، انا لسه والله بتعلم وكل يوم بكتشف حاجات جديده..
عمار بهدوء
طبيعي انا نفسي لحد النهارده لسه بتعلم حاجات جديده، وهفضل كده ديما عشان ابقي التوب.
جميله
ماشي يا عم نجيب سويرس، انا مش هبقي اد المسؤليه دي..
عمار
عارف وعشان كده هيبقي معاكي زكريا اخويا لحد ما الاقي سكرتيره كويسه وامشيكم انتو الاتنين..
جميله بحده
نعمم هتمشيني؟!..
عمار بخبث
طبعا مش هنتجوز وممكن وقتها اخليكي سكرتيره خاصه بس في البيت..
ـ اتكسفت جميله وطلعت من عنده، ولقست فيروز يتجمع في حاجتها عشان هتمشي..
جميله
ساره مكاتب هتقطعي بيا..
ضحكت فيروز وقالت
هو انا مهاجره ده انا هبقي في المكتب اللي جنبك.. المهم ما تعرفيش عمار بيه هيجيب مين تساعدك..
جميله
لا هيجيب زكريا اخوه تقريباً عايز يعلمه الشغل وكده..
فيروز بصدمه
يعلم مين يا جميله زكريا بيه كان نائب رئيس مجلس الاداره هنا، بصراحه كلنا هنا بنحب زكريا بيه وبندايق من تصرفات عمار بيه معاه..
جميله بضيق
مش عارفه بقي، المهم بعد الشغل هنروح سوا ابقي قولي لمامتم عشان ما تقلقش عليكي..
فيروز بسخريه
لا انا ماما ما بتقلقش عليا، هي ممكن تقلق علي اخويا انما انا مستحيل..
جميله غمزتلها وقالت
بلاش طيب البوز ده وانتي رايحه عند الكراش..
ضحكت فيروز وقالت
بس يا رخمه، وتعالي بقي اوريكي الحاجات المهمه اللي كانت معايا..
ـــــــ #بقلم_الكاتبه_رحاب_القاضي ـــــــ
_في بيت صبري..
رجعت شهد من الكورس بتاعها واتفتجيت لما لقيت يونس قااعد مع يوسف ابنها ولما شافها قام وقال بغضب....
يونس
كنتي فين، وازاي تخرجي وتسيبي الولاد لوحدهم؟..
شهد بهدوء
كنت مكان ما كنت، فين يزن يا يوسف؟..
يوسف
قالي انه نايم يا ماما وما رضيش يسلم علي بابا..
يونس بحده
كنتي فين يا شهد؟..
شهد بجمود
وانت مالك مش من حقك تسألني عن اي حاجه بعيد عن ولادك...
يونس بعصبيه
ده اللي هو ازاي يعني ان شاء الله، وبعدين مش احنا اتفقنا انك هتفكري في رجوعنا.
شهد ببرود
بطلت افكر ومش هرجع...
مسكها من ايدها جامد وقال بحده
بطلي ام طريقتك دي، وانا مش لعبه في ايدك يا شهد..
طلعت زهره وقالت بقلق
صلو علي النبي انت وهي الواد واقف بينكم خايف..
سحبت شهد ايدها من يونس وقالت بنبره عاليه
بص لشكل ابنك وهو خايف عليا منك ومن همجيتك، اهو انا عشانه مش هرجعلك مش هسيبه يتعقد زي اخوه بسببك، ومش هرجعلك عشان انت راجل واطي وخاين وعمرك ما هتتغير، روح للي خونتني معاها او اللي خونتني معاهم هما شبهك انما انا وولادي مش شبهك، وايااك تفكر تدخل في حياتي يا يونس..
_ قالت كلامها ومسكت ايد يوسف اللي كان واقف فعلاً خايف ودخلت اوضتها وقفلت الباب وراها، ويونس نزل تحت وهو متعصب جداً.. وعند شهد اول ما دخلت قام يزن بسرعه وحضنها وقالها..
يزن ببكاء
مم مش تخليه يي يجي تامي..
_شالته شهد وحضنه وراحت قعدت علي سريرها وحضنت ولادها، وقالت لنفسها بنبره مهزوزه..
شهد
مش هعيط عليك يا يونس مش هخليك توجعني تاني ولا توجع ولادي، وزي ما كنت راكني في حياتك ودافني بالحيا انا هخليك ما تشوف غيري وتندم علي كل اللي عملته فيا ده..
يوسف
ماما انتي بتكلمي مين انا خايف..
ضحكت غصب عنها وحضنته اكتر وقالت
بكلم نفسي يا ابن الهبله، تعالو نجيب بيتزا ونروح ناكلها مع الواد اسر ونرخم عليه..
دخل اسر وقعد جنبيهم وقال
وانا جيتلك بنفسي، وبعدين بتحضني ولادك من غيري..
شهد
مع انك بقيت طويل زي الشحط بس تعالي انا اصلا عندي تلات ولاد مش اتنين..
_ وفي الوقت ده كان يونس سايق عربيته وهو متعصب جداً، وافتكر ذكرياته مع شهد ابتسامتها اللي كانت اغلب الوقت بتكون ليه هو وبس، وكلامها الهادي معاه واهتمامها بيه، وقف بالعربيه قدام بيته ونزل من عربيته ودخل البيت وهو متعصب جداً ولقي هناء قاعده في الصاله بتتفرج علي التلفزيون، راح قعد جنبيها وهو ساكت وهي سألته وقالت..
هناء
مالك يا ابني في ايه؟..
بصلها بدموع وقال
انا مش ابنك وامشي من هنا، علي الاقل انتي لسه بتحبيني امشي قبل ما تكرهيني..
هناء بحزن
لا مش هكرهك يا يونس.
يونس بحده
يبقي بلاش تتعاملي علي انك امي، عشان انا لوحدي يونس اتولد يتيم وهيفضل عمره كله لوحده..
نزلت دموعه وقال
حتي لما بقي عنده عيله خسرها بنفسه وبفضله خلاهم يكرهوه، انا مش عايز غير اني ابقي لوحدي..
قامت هناء ومسكت ايده وخلته قعدت وقالت
والله العظيم ما بعاملك غير زي ابني، وعرفت غلطي اني سيبتك لما ربنا خد مني مازن بقيت اخاف عليك انت ومحمد من الهوا الطاير، مش هقدر اتحمل واحد منكم يروح مني تاني، ومش همشي ومش هسيبك لو انت بقي عايز ترميني في الشارع اعملها.
ابتسم يونس بهدوء وقال
المشكله اني بحبك يا هناء ومهما حاولت اكرهك ما اعرفش.
ضربته علي كتفه وقالت
ماما هناء يا واد، ها نفسك في ايه تاكله وانا اعملهولك...
يونس بخبث
في اكله كده زمان كنت بحبها واقولك علي طول تعمليها..
ضحكت هناء بهدوء وقالت
طبعا فاكراها فاصوليا بيضه بالدمعه ورز بالشعريه..
يونس بحماس
ولو معاهم حتتين لحمه يبقي زي الفل..
هناء
كان علي عيني انا الخشونه شاده علي ركبي، ابقي بكره اعملهالك..
يونس بخبث
براحتك ما اهو انا لو كنت محمد حبيب القلب اا..
ضربته هناء بالمخده وقالت
قايمه يا قامت قيامتك، انا واخده منك انت واخواتك ايه غير التعب..
_ ودخلت المطبخ ويونس ابتسم بهدوء، ولما افتكر كلام شهد رجع ادايق تاني، وكان فعلا ندمان لانها كانت معاه وكانت مخليااه اسعد راجل في الدنيا وهو ما قدرش ده وخسر ثقتها وحبها ليه..
ـــــــ #بقلم_الكاتبه_رحاب_القاضي ـــــــ
_ وفي بيت جميله...
كان قاعد احمد مع فريده وطلعت ايتن من اوضتها وهي لابسه وماسكه شنطتها واول ما شافت احمد اتنفضت بخوف وهو قالها..
احمد
ايه يا حبيبت عمو مش هتسلمي عليا..
ايتن بتوتر
ازاي حضرتك؟..
احمد
كويس يا بنت الغالي، والله يا فريده انتي ما عرفتيش تربي غير البت دي..
فريده بضيق
انا بناتي الاتنين متربين احسن تربيه يا احمد، تعالي يا ايتن اقعدي مع عمك لحد ما اجيبله الشاي من جوه..
_ وقامت فريده ودخلت المطبخ، وايتن راحت فعدت مكانها وهي بتتنفض بخوف وهو بصلها بخبث وقال..
احمد
علي فين كده؟..
ايتن بنبره مهزوزه
را.. رايحه السنتر..
احمد بجمود
شاطره وطول ما انتي مش بتقولي لحد علي اللي بينا شاطره يا ايتن..
اتملت عيونها دموع وقامت وقالت
انا لازم امشي..
_ قالت كلامها ومشيت بس قبل ما تطلع مت العماره قعدت علي السلم وفضلت تعيط، وافتكرت اللي حصل من 10 سنين لما كان عندها 8 سنين..
_ فلاااش باااك..
ــــــــــــــــــ
_ بعد ما مات باباها بيومين، كانت قاعده في الجنينه بتاعت الفيلا بتاعت باباهم مدايقه، وبعدين قامت ودخلت جوه وهي معديه من قدام مكتب باباها سمعت احمد بيقول للمحامي بتاع باباها..
احمد بعصبيه
يعني ايييه، يعني بعد ما قتلت اخويا كل حاجه تروح لبناته وانا برضو ماليش حاجه..
بص المحامي لاين وقال
الحق الحق البت واقفه وراك..
_بصلها احمد بعصبيه، وهي جات تجري بس مسكها من شعرها وكتم بوزها بأيده ودخل المكتب وقفل الباب وقالها بغضب....
احمد
عارفه يا بت الك*لب انتي لو قولتي لحد اللي سمعتيه ده انا هخليكي تموتي زي ابوكي، لااا تومتي ايه ده انا هموت امك واختك وادفنك انتي صاحيه فاهمه..
_شال ايده من علي بوقها وهي بتعيط وبتتنفض، وشد شعرها اكتر وقال بكل كره..
احمد
انا ما بكرهش في حياتي اد ابوكي وامك واختك وانتي، فلو سمعتي كلامي مش هعملهم حاجه بس لو اتكلمتي هولع فيهم..
المحامي
هي شاطره ومش هتقول حاجه..
ضربها احمد علي وشها بالقلم وقال
انطقي يا بت فاهمه ولا لا..
_وقعت ايتن علي الارض وهي بتعيط وقالت بخوف وهي بتتنفض....
ايتن
حح حاضر..
_ باااك...
ــــــــــــــــــــ
قامت من علي السلم ومسحت دموعها وهي ماشيه في الشارع وبرغم ان الكل بيقول عليها قويه وجريئه الا انها من جواها رعب مش خوف وبس..
_ راحت وقفت جنب مروان اللي مستنيها بعيد عن بيتهم شويه بالموتسيكل بتاعه وقالت...
ايتن
انا مش عايزه اروح السنتر....
مروان
هيكلمو امك ويقولولها، وبعدين مالك..
مسكت ايدها وقالت
عشان خاطري تعالي نتمشي او نعمل اي حاجه، انا لو روحت مش نعرف اركز..
مروان بحماس
طيب اركبي هنروح اي مكان هادي كده نقعد فيه..
ايتن ابتسمت وقالت
ما انا مش بحبك من قليل يا ميروووو..
ـــــــــــــــــــــــــــ
_ وعند. فريده واحمد، بصلها بخبث وقال..
احمد
هاا ما ردتيش عليا يا فريده؟..
فريده بقلق
ارد اقول ايه يا احمد بس، مش لازم الاول اعرف رأي جميله..
احمد
وهي بنتك لسه هتقول رئيها ، وهي بنتك تلاقي احسن من حسين فين، هي لاقيه اصلا؟..
فريده بحده
لا اقعد معوج واتكلم عدل يا احمد انا بنتي العرسان بتجيلها علي قفا مين يشيل بس جميله ما تاخدش اي حد..
احمد
المهم يعني كلمي بنتك وقوليلها ان حسين بيحبها وعايزها في الحلال وما حدش هيخاف عليها وعلي حقها غير حسين، وفكري يا فريده عشان الجوازه دي لو تمت يبقي كده ما فيش غريب وسطينا واحنا هنبقي عيله واحده..
فريده بضيق
طيب يا احمد هفكر واقولها وابلغك بردنا..
قام احمد وقال
يبقي علي بركة الله..
_ في الوقت ده دخلت جميله ومعاها فيروز، ولما شافت عمها قالت..
جميله
يا ساتر ياارب مين عمي ايه اللي جابك عندنا..
فريده
يا بنت عيب كده؟..
احمد
سبيها براحتها يا فريده خليها تدلع علي عمها براحتها..
جميله
والله يا عمي لو طلعت الدلع اللي نفسي اتدلعه عليك هتلاقيني ماسكه في زمارة رقبتك..
بصلها بحده وهي قالت
عشان هكون حضناااك يا عمو اسلك شويه..
_كتمت فيروز وفريده ضحكتهم واحمد قرب من فيروز وقال..
احمد
بعيد عن طولة لسانك مش تعرفينا بالقمر..
وقفت جميله قدام فيروز وقالت
دي فيروز صحبتي ومعلش هي امها قالتلها ما تتعرفيش علي عيال غريبه.. قصدي رجاله غريبه..
فريده
شرفتنا يا احمد وان شاء الله هرد عليك..
_قربت جميله من عمها وحطت دراعها علي كتفه وقالت..
جميله
نصيحه ليك بلاش تقعد في قعدت ستات هتطلع منها من غير قيمتك وانت راجل عجوز رجله والقبر فعيب في حقك يا عمو الحج..
_ نفض احمد ايدها من علي كتفه ومشي، وجميله قفلت الباب وراه وقالت لمامتها..
جميله
اهي يا ماما دي فيروز اللي قولتلك عليها...
قربت منها فريده وقالت
ازيك يا ساره مكاتب..
ضحكت جميله وفيروز قالت
حتي انتي كمان يا طنط، بس كله من بنتك..
فريده
بنهزر معاكي ياا حبيبتي، نورتينا والله انا كان نفسي اشوفك اووي من كلام جميله عنك..
فيروز
الشرف ليا طبعا يا طنط..
جميله
المهم يا ماما فيروز بايته معايا النهارده، وانا كلمت ايتن تجيبلنا شوية حاجات وهي راجعه وشهد هتنيم عيالها وجايه..
فريده
خدو راحتكم يا حبيبي البيت بيتكم...وانا هدخل اعملكم العشا بتعرفي تعملي اكل ولا خايبه زي اللي جنبك دي يا فيروز..
فيروز باحراج
احمم خايبه زي اللي جنبي يا طنط..
ــــــــ #بقلم_الكاتبه_رحاب_القاضي ــــــ
_ وفي بيت مجدي اخو شيماء..
كان عماد قااعد هناك مع اخواته مجدي وشيمااء وقالهم بحده..
عماد
اخص عليكم تضحكو عليا انا، طيب جهاد عشان امها بتكرهوها انما انا ده احنا شقايق.
شيماء
انا ماليش اخوات غير مجدي..
مجدي
وانا لتكسف اقول انك اخويا ياد يا شمام انت، وكويس وجيت ومراتي وولادي مش هنا عشان مش ناقص فضايح..
عماد
طيب اللعبه بتاعتكم اتكشفت ممكن بقي اخد كقي بالذوق في ورث ابويا بدل ما اقلبها عليكم..
مجدي حط رجل علي رجل وقال
مالكش حاجه عندنا واعلي ما في خيلك اركبه، وبعدين مش انت طلعت مدور اختك في الشغل الشمال خليكم فيه بقي..
عماد بحده
يعني انت عارف طيب كنت يا راجل تعالي وامنعني هي مش دي شرفك انت كمان..
مجدي بعصبيه
انت هتطلع بره ياا ولد انت ولا اخلي الامن يدوك علقه معتبره وتترمي بره..
قام عماد وقال
ماشي يا اخواتي همشي بس حقي انا هعرف اجيبه كويس..
_ وقام عماد مشي ومي وشيماء بصو لبعض وافتكرو اللي حصل مع المحامي بعد ما ابوهم مات....
فلاااش باااااااك..
ـــــــــــــــــ
_مجدي وشيماء قاعدين مع المحامي بتاع باباهم وبيقولهم...
المحامي _
طبعا الوصيه دي كانت لازم تتفتح قدام اخواتكم عماد وجهاد..
مجدي _
اعتبرهم موجودين يا استاذ قول بس فيها ايه الوصيه دي، ونبقي احنا نقولهم وانا هظبطك..
المحامي _
الحج الله يرحمه قبل ما يروح قسم التركه بتاعته بينكم انتو الاربعه بالتساوي..
اتعصب مجدي وقال _
نعمم ده اللي هو ازاي، الفلوس دي انا اللي تعبت فيها مع ابويا وهما هيجو ياخدوها علي الجاهز..
شيماء بحده _
تعبت ولا متعبتش دي فلوس بابا وحقنا..
بصلها مجدي بخبث وقال _
طيب وايه رئيك لو الورث اتقسم علي اتنين بدل اربعه..
شيماء بحماس _
ازااي بعني مش فاهمه..
المحامي بعصبيه _
انت بتقول ايه يا مجدي بيه كده مينفعش...
قعد. مجدي جنبيه وقال بخبث_
مالك بس يا استاذ عبد الدايم قافش كده ليه، ده لو اللي بقوله ده حصل انت هتكسب اووي...
عبد الدايم بعصبيه _
لا اكسب ولا غيره انا عمري ما ابيع ضميري وذمتي ابدا...
مجدي بخبث رد عليه وقال _
انت بعد ما الورث يتقسم كل واحد يروح لحاله وانت محامي علي قدك، فلو نفذت اللي انا عايزه هتبقي المحامي الرسمي بتاعي وكمان همسكك الشؤون القانونيه في الشركه..
اتوتر عبد الدايم وقال _
طط طيب انت عايزني اعمل ايه بالظبط؟..
ضحك مجدي بخبث وقال_
هههههه كده يبقي اتفقنا...
شيماء بحقد قالت _
انا المهم عندي ان البنت اللي اسمها جهاد دي بنت مرات ابونا ما تطولش ولا قرش....
مجدي بغيظ وحقد رد عليها وقاال _
اصبري انتي بس وانا هريح الدنيا كلها معايا انا وانتي، انما البنت اللي اسمها جهاد اللي ابونا سابنا وراح اتجوز امها زمان وكمان اخوكي عماد الصايع مش هيطولو ولا قرش..
_بااااااااااك..
ـــــــــــــــــــ
شيماء
هو ايه اللي حصل لجهاد يا مجدي؟..
مجدي
جرا ايه قلبك حن عليها، افتكري يا اختي لما ابةكي سابنا جعانين وبنعيط عليه وراح اداها هي كل حاجه..
شيماء بقلق
طيب وعماد لو فتح في القدبم هنعمل ايه؟..
مجدي
يحصل ابوه بسيطه.
شيماء بحده
انت اتجننت مهما كان اللي بينا ما يوصلش لكده ده اخوك عماد شاف الغلب معانا وطول عمره حظه قليل في كل حاجه،والله لو عماد حصلتله حاجه هيبقي عليا وعلي اعدائي يا مجدي.
مجدي بضيق
اووف اهي كلمه اتقالت وقت عصبيه، انا هفكر في حل ولا انتي معاكي تديهم؟..
شيماء بسخريه
منين يا حسره ما انت عارف اللي فيها انا بعالج بنتي من المرض ايااه يعني محتاجه كل قرش..
مجدي
يبقي تسكتي وتسبيني اتصرف..
ـــــــ #بقلم_ الكاتبه_رحاب_القاضي ــــــــ
_ وبعد اسبوع في بيت نورا..
كانت قاعده قلقانه جداً، وطلعت جهاد من الحمام وعيونها مليانه دموع وحطت قدام نورا اختبار الحمل وقالت..
جهاد
ما فيش حمل صح، اكيد اللي عندي ده دور برد صح؟..
مسكت نورا الاختبار وقالت بحزن
انتي حامل يا جهاد..
لطمت جهاد علي وشها وقالت ببكاء
يا نهار اسود يا نهار اسود هو انا مش هخلص من الكابوس ده، اعمل ايه بس دلوقتي..
نورا بحده
اسكتي خالص انا مش هقولك ان ده غلطك برضو لانك اكيد عارفه ان ده غلطك لما روحتي هناك..
جهاد ببكاء
بس والله كنت همشي واللي حصل كان غصب عني والله العظيم، انا هنزله ما غيش حل غير كده..
نورا بجديه
وده مش حل يا جهاد، لة ما كانش ده خير ما كانش ربنا خلقه في بطنك..
جهاد مسحت دموعها وقالت
طيب اعمل ايه انا كل ما احلها من ناحيه تبوظ من ناحيه تانيه، انا لو جيبته هيتقال عليه ابن حرام..
نورا
ابوه عايش اهو يبقي ليها حل..
جهاد
ازاي يعني انا مش فاهمه؟..
نورا بجمود
خليكي هنا وانا هروح مشوار مهم وجايه..
جهاد بقلق
طيب انا هعمل ايه، الشغل والجامعه اللي هقدملها بعد شهرين هعمل ايه؟..
نورا بهدوء
انا معاكي ما تخافيش يا جهاد...
_ قالت كلامها ومشيت وراحت للمطعم اللي فيه المنشاوي، وراحت سألت عليه رمزي اللي قالها..
رمزي
لا الحج المنشاوي لسه ما نزلش واحتمال ما ينزلش النهارده..
نورا
طيب هو قااعد في الدور الكام فووق..
رمزي
التاني الشقه اللي علي اليمين..
نورا
طيب ما تعرفش ابنه اللي اسمه زكريا معاه فوق..
رمزي
لا والله يا مدام نورا ما اعرفش..
_ طلعت نورا وفتحلها المنشاوي وقعدو في الصاله وقالتا وهو مبتسم..
المنشاوي
نورتي البيت يا نورا والله..
نورا بجمود
زكريا ابنك فين يا حج منشاوي؟..
المنشاوي
نايم جوه يا نورا، بس ماله زكريا في ايه؟..
نورا
معلش هتعبك بس خليه يطلع يكلمني، انا عايزاه في حاجه مهمه..
المنشاوي
طيب معلش قوليلي زكريا عملك حاجه، انا والله هه..
قاطعته نورا وقالت
معلش بس خليني اشوفه واتكلم معاه وقدامك دلوقتي هتعرف كل حاجه..
_ ودخل فعلا المنشاوي وطلع وجاب زكريا ورااه اللي كان شكله فعلا نايم وقعد هو والمنشاوي قدام نورا اللي كانت بتبص لزكريا بقرف وقالت..
نورا
شوفتك كتير قبل كده وكنت ديماً بستحقرك..
زكريا بحده
في ايه يا وليه ما تتكلمي كويس..
المنشاوي
زكريا احترم نفسك، ايه الحكايه يا نورا؟..
نورا بجمود
جهاد عندي يا زكريا...
بصلها زكريا بسرعه وهي كملت كلامها
وعارفه كل حاجه حصلت..
زكريا بهدوء
نعم برضو عايزه ايه؟..
نورا بضيق
جهاد حامل وانت هارف كويس من امتي..
زكريا اتوتر وقال
لا.. لا ما اعرفش وروحي شوفي هي حامل من مين..
نورا بحده
اتلم واحترم نفسك، جهاد دي انضف منك ومن اخوها الحيوان اللي رمهالك وانت ضيعتها...
المنشاوي بقلق
ايه الحكايه يا نورا، وجهاد دي اللي عندي في المطعم..
نورا بتحدي
ايوه يا حج وحامل من ابنك اللي خدها غصب عنها في الحرام بالاتفاق مع اخوها.
المنشاوي بغضب
عشان كده البنت لما شافتك خافت، انت ايه فاضل اييييييه غلط ما عملتوش..
زكريا بجمود
ولسه هعمل كمان..
وبص لنورا وقال
وانتي قوليلها تنزله انا مس هعترف انه مني ولا عايز اشوفها تاني حتي هنا في المطعم فاهمه..
نورا بحده
ده ابنك ربنا خلق حته منك اكيد ليها سبب، شوف حياتك دي راجع كل اللي بتعمله هتلاقي ان ربنا جابه عشان يرحمك ويرحم البنت الغلبانه دي من ظلم اخواتها والدنيا ليها، فكر كويس ده روح مربوطه بكلمه منك...
_ غمض زكريا عيونه وهو بيحاول ما يقنعش بكلامها ودخل اوضته وطلع وهو دغير هدومه ومشي بسرعه...
المنشاوي بحزن
مش عارف اقولك ايه يا نورا، مش هو ابني بس انا بقولك اهو خلي البت دي تنزل اللي في بطنها، ابني وحش وما يستهاهلش الخير ده اللي انتي بتتكلمب عنه..
_ وبعد شويه في شقه فاضيه قدام مدرسه مشهوره، كان واقف زكريا في شبااك صغير وفي ايده سلا*ح كبير وموجهه علي شاب في التلاتين ومراته ماشيه جنبيه مستنين ابنهم الصغير يطلع من المدرسه، وبعد كام دقيقه طلع ولد صغير تقريباً عنده 7 سنين من المدرسه وجري علي باباه وحضنه وفي الوقت ده وجه زكريا سلا*حه علي الطفل وكان لسه هيضرب بس افتكر كلام نورا اللي قالته ليه..
نورا
ده ابنك ربنا خلق حته منك اكيد ليها سبب، شوف حياتك دي راجع كل اللي بتعمله هتلاقي ان ربنا جابه عشان يرحمك ويرحم
البنت الغلبانه دي من ظلم اخواتها والدنيا ليها، فكر كويس ده روح مربوطه بكلمه منك...
_ اتلمت عيونه دموعه وضرب بالسلاح طلقه جات في؟...