رواية سلطان زمانه الفصل السابع7بقلم مريم اليوسف
طالع هشام من الحمام ولابس برنس وعنك ينشف شعرو بمنشفة تانية ... وشاف الاء قاعدة على التخت وضامة رجليها وعم تتظاهر الزعل
هشام : شبو عمري زعلان
ماردت
هشام : اي دخيلو يلي عم يتدلل علي ... اي الووء مابدها وحياتك لعوضك باحلى شهر عسل انت اختاري المكان وماعليكي
زورتو وماردت
مسك ايدها وباسها وقال : نسيت باركلك يا عروس .... الف مبروك يا حبي وان شاء الله جازة الدهر
الاء : اي بعد هيك انا زعلانة منك
قامت لتدخل على الحمام
هشام : ليه زعلانة بالعكس لازم تكوني مبسوطة
الاء : ع شو بدي انبسط لانك اخدتني غدر
قام لعندها وقال : يقبرني المغدور
حاول يضمها هية بعدت عنو
هشام : طيب تعالي خديني غدر متل ماغدرتك انا مبارح
الاء : بالله شوو .. واثق من حالك
هشام : مابيعجبكن العجب انتو النسوان
الاء ؛وانتو الرجال مالكن امان
هشام ؛ قدام هيك عسل اكيد ما النا امان .. وخصوصا اذا كان بشهدو متل اميرتي الصغيرة
ماقدرت تخفي ابتسامتها بكلامو الحلو
هشام : يااااربي ضحك سنها
سحبها بحب ضمها وصار يلمس على شعراتها .. وبعدها رفعلها وجهها لعندو وصار يمرر ايدو على خدها بكل لطف
هشام : بعتذر مابعرف شو كان صايبني ليلة مبارح ... بس بنفس الوقت مو ندمان من اجمل اللحظات يلي عشتها بحياتي ... لك انت شو عم تعملي يا بنت
الاء : قد ما عملت مابعمل عمايلك
هشام : هههه لك يسعدلي اياكي يا احلى عرووس
الاء : خلص عاد لسه كل مابحاول انسى شو صار بتيجي بتذكرني
هشام : ليش هالشي بينتسى ... هي احلى ذكرى بحياتنا
الاء : انا اول ذكرى بس حضرتك هي تالت ذكرى
هشام : والتالتة ثابتة وحياتك عندي
الاء : بعدلي هيك خليني اعمل دوش سريع وننزل لعندن
هشام : ماني طالع انا اليوم
الاء ؛ وليش بالله
هشام ؛ عريس مابحقلي
الاء : ههههههه مصدق حالك
هشام : وكتيير
الاء : مو حلوة .. كرمال ام عمر وكرمال حلا خطي بتكون زعلانة (وحكتها بشماتة )
هشام : معك حق بتكون زعلت مني
الاء بغيرة : وبهمك زعلها
هشام : اكيد .. بس مو اكتر من زعلك
الاء : اي كول بعقلي حلاوة
هشام ؛ هههه شوبدي اعمل انتو النسوان بتحبو يلي بيضحك عليكن
الاء : عم تضحك عليي
هرب من قدامها وهية صارت تركض وراه بالجناح
وهو عم يضحك من كل قلبو ومبسوط
~~~~~~~~~~~~~~•
قاعدة حلا بالصالون تحت ولافة رجل على رجل ومبين عليها كتيير معصبة
نزلت لعندها نور وشافتها على هالحالة وقربت منها
نور : صباحو
ردت : اهلين
نور : شبك
حلا : هي الخنفسة عم تلعبنا على اصابيعها
نور : قصدك الاء
حلا : مين في غيرها
نور : شو عملت
حلا : اخدت هشام من عندي بعد ماكنت مجهزة سهرة واخر رواق .. اتصلت فيه وهو ماصدق وقام يركض لعندا وبعتلي انو تعبانة وبدو ينام عندها وصرت اتصل فيه سكر موبايلو .. قلتلك هالبنت عقربة ومن تحت لتحت ماصدقتيني
نور : ههههه طيب بركي عنجد تعبانة
حلا : اطمني مافيها شي متل حية التبن بس هيك جكر فيني .. وهداك بس بدو كلمة ... قلتلك وجودها خطر بيناتنا قلتلي حرام ادمية
نور : اي الحق عليكي انت يلي بلشتي بالاول .. وهية اكيد مارح تسكت على اهانتك الها
حلا: ما اختلفنا بس شو مشان هشام نسي انو عندو غيرها لست بدور
نور : اجباري مارح يزعلها وهية لساتها عروس وخصوصا انو بلشت تتقبل الوضع
حلا : بسيطة انا بفرجيه وفرجيها
نور : ههههه مابدها قومي لنجهز الفطور ام عمر كانت عم تجهز حالها مشان تنزل
حلا : ماابدي
نور : تسطفلي هههه
تركاها وراحت على المطبخ تأشرف على الفطور
نزلوا الكل على السفرة والاء شافت حلا قاعدة على جنب اسرعت بمشيتها لتجي لعندها وتحججت انها عم تاخد محرمة من قدامها تحت انظار حلا يلي كلها حقد وقربت وهمست جنب ادنها وقالت : يااحرام راح عذابك على الفاضي ... واخدتو من حضنك وخليتي تموتي بدودك .. مشان تعرفي انو ماني قصيرة حربة وانتبهي لتعاملك معي تاني مرة
حلا بهمس كمان : اي لاتفرحي كتير هو ماردك لانك عروس بس بكرا مرجوعو لعندي بعد مايمل منك لأنو بالاخير الرجال بهمو الجمال .. واكيد انت مابتتقارني جنبي
الاء : اسمعتي بالمتل يلي بقول الحب اعمى
وتركتها ومشت وحلا تغير لون وجهها .. قعدو على السفرة وحلا بعدها مكانها .. بس هشام ماقعد وكمل لعند حلا قعد جنبها وصار يراضيها تحت انظار الاء يلي انقهرت
ام عمر : شو القصة
نور : هههه حلا بتكون زعلانة عشي شغلة وهشام عم يراضيها
ماكان مسموع الحكي بس مبين انو هشام عم يحاول معها يخليها تضحك وضمها لعندو من كتفها
الاء بقلبها شو انك ابن حرام ...كيف بتقدر تضحك علينا كلنا .. لانو نحنا عنجد مضحكة
هشام لحلا : حبيبة قلبي ... والله ماعد عيدها ووعد اليوم رح نعوضها .. ماشفتيها بالسهرة كانت عم تحكي عن اهلها ومشتاقتلن وكانت حالتها مابطمن مشان هيك نمت عندها وخصوصا انو لسه مامتعودة ع الغربة
حلا : ماشغلتي ما اجت تحن على اهلها غير مبارح .. بس هية قصد عملت هيك مشان تاخدك مني
هشام :خلص اليوم بنعوضها شو رأيك
حلا : مشان يصير فينا متل مبارح
هشام : لا مارح اسمح يصير هيك شي ... رح نطلع على شي اوتيل حلو وبنطفي موبايلاتنا شو رأيك ومابنخلي حدا يوصللنا
ابتسمت وقالت : اذا هيك موافقة
هشام : يلا خلينا نقوم نفطر مابدي اختي تحس على شي
حلا : يلا
قامو انضمو على السفرة والاء وحلا عم يتبادلو نظرات نارية وتحدي
مضو الصبح بالبيت، بعدها طلعو تغدو برا مع ام عمر وملك وجوزها وطلعو على اليخت وقضو وقت كتير حلو وبين مناقرات بين حلا والاء بس بدون ماحدا ينتبه
ورجعو على الفيلا .. ونزلو وهشام نزل معن .. ودخلت الاء على جناحها تخطط كيف تخربها الليلة كمان على حلا وهشام .. بدلت تيابها ولحقت صلاة المغرب قبل اذان العشا .. وطلعت من جناحها ونزلت لقت نور وام عمر قاعدين بالصالون
الاء : وين حلا
نور : ليه
الاء : عايزتها بشغلة
نور : راحت هية وهشام
الاء: ع وين
نور : مابعرف
ام عمر : تعي اسهري معنا
الاء : يلا شوي وجاي
رجعت فورا على غرفتها وصارت تتصل بهشام كان مغلق .. واتصلت بحلا كمان مغلق
الاء : هيك لكن .. بسيطة يا هشام ... طلعتو من الفيلا كلا مشان ما ازعجكن لهل الدرجة بتخاف منها وبدك رضاها ... ولأ شو بقلي بحبك بس الك ... والله انك اكبر كذاب وانا اكبر غبية .. ضل يضحك علي لأخد يلي بدو اياه وهلق ماعد تفرق معو المهم امن علي صرت مرتو ... غبيية .. غبية كيف وثقت فيك .... حقييررر ... واااطي ... انا بفرجيكن .... مابقدر انو عروس جديدة .. بس لأ مافيه يخسر ولا وحدة فيهن ... اي انت جبتو لحالك ياهشام ...
اجتها رسالة وفورا فتحتها وكانت من حلا: صح اخدتيه مني مبارح .. بس هو اليوم هرب فيني منك مشان ماتخربيها عليه متل مبارح ... بين عندك لمين بحب ؟؟؟؟
ماردت عليها ورمت التلفون بقهر على التخت ... كان بدا تصرخ وتكسر ... بس لانو ام عمر ونور تحت ماطلعت اي صوت ... اكتفت بالبكي بصمت
بعتتلها نور مابدك تنزلي اعملنا قهوة
بعتتلها : لا تعبت كتير اليوم رح صلي ونام فورا
نور : اوك تصبحي على خير
الاء : وانت من اهلو
ضلت سهرانة لوقت متأخر من الليل وهية عم تبكي
رن تلفونها برسالة
اخدتو وفتحو كان هشام : نمتي ؟
فتحت وماردت
رجع بعتلها : اشتقتلك
كمان ماردت
هشام : زعلانة ياعمري
كمان ماردت .. كان جاري الكتابة .. بس ماعطتو مجال يكمل وفورا دخلت وعملتلو بلوك
وطفت الموبايل كلو ورمتو جنبها ونامت ودموعها عم تنزل على المخدة
تقلبت كتير وماقدرت تنام .. قامت من تختها واتوضت وبلشت تصلي قيام ليل وعيونها عم تذرف على سجادة الصلاة .. ولما خلصت رفعت ايدها وصارت تدعي من رب العالمين انو يهدي طريقها ويصبر قلبها ويكون معها
خلصت وحست برياحة كبيرة ورجعت على تختها وهية عم تستغفر ربها .. رجعت تناولت موبايلها وشافت رفيقتها ميساء اون لاين ... الملجئ الامن .. حكتها وميساء فورا ردت عليها
ميساء : شو سهرانة
الاء : اي والله ... تعبانة يا ميساء
ميساء : سلامة قلبك من التعب احكيلي شو صاير معك
الاء : ماعم اتحمل الوضع.. رح موت من غيرتي
ميساء : طولي بالك ولوو .. لازم تكوني عم تتعودي
الاء : ماعم اتعود على شي ... كرهانة كلشي
ميساء : شو صار احكيلي
صارت الاء تسرد عليها شو صار
الاء: اخدها وراحو يقضو ليلتهن باوتيل مشان ما ازعجو .. وماقدر مشاعري .. وقال هي عروس ولازم كون جنبها ... ماحسسني انو عروس ابدا ... كرهتو واحد كذاب منافق عم يضحك على الكل .. لأ وانا الجدبة صدقتو انو بحبني ... اكتشفت انو بحب يلي بتجي عمراقو وشكلي انا ماعجبتو
ميساء : لا ولوو انت التانية مو لهل الدرجة ... لاتنسي انك عروس وماعندك خبرتهن
الاء : يمكن ماعجبتو ماا دخل الخبرة
ميساء : لا تحكي هيك وتقللي من ثقتك من حالك
الاء : لك ماعندي ثقة بحدا من حالي وانت ماشية
ميساء :طيب ما اتفقنا نلتفت لمصالحنا .. وتعيشي حياتك وقلبك خليه على جنب
الاء : لأنو الشغلة على كيفي ... قلبي حاسستو انفطر
ميساء : يا عمري انت .. بس لا تخلي الافكار السودة تجتاح عقلك اكيد هي حلا الحرباية كانت مخططة لكلشي واخدتو لبرا مشان ماتزعجيهن لانها متأكدة اذا قلتيلو لهشام تعال لعندي رح يجي بدون تردد
الاء باقتناع : معقولة
ميساء : معقولة ونص .. وهية كل هما انها تغيظك ولو مو مقهورة منك مابتغيظك .. ليش مانها منغاظة من نور وبس منغاظة منك لانو شايفة شقد هشام بحبك وعم تحاول بكل جهدا تكسبو ... وانت كمان لعد تسمحيلا انو تسمعك حكي هية قاصدتو لحتى تقهرك .. انت بس شوفي شو عم تعمل لحتى بس تقهرك
الاء : ماعم اسمحلا وعم رد عليها بس هية عندا خباثة انا ماعندي اياها
ميساء : لكن اتجاهليها
الاء : كيف
ميساء : خليها تعمل يلي بدا اياه وانت لا تهتمي واذا حكتك لاتردي واعملي حالك ماسمعتي شي حتى كلام لاتخلي بيناتكن .. عدم الرد رد احياناً
الاء ؛ معك حق انا لما عم رد عليها عم اعملا حجم .... وهشام شو اعمل معو
ميساء : ههههه انا حاسة انو هشام هو الضحية
الاء : اي ضحية كتييير .... يلي صايرلو ماصاير لغيرو
ميساء : بس مالاحظتي انو عم يحاول يرضيكن كلكن وماعم يفرق بيناتكن .. وهالشي كتير منيح
الاء : بس انا بدي اياه الي ع القليلة هالفترة لك انا عروس
ميساء : بهي معك حق .. واعترضي وفهميه شوبدك ولاتقبلي بالقليل ... وكمان حاولي تصبري كرمالك وكرمال اهلك .. نسيتي شو عمل كرمال ابوكي
الاء : معك حق ... بس مارح مرقلو اياها هيك وانا بفرجيه
سكرت الموبايل وحست تجددلها الحيوية وحطت راسها ونامت
~~~~~~~~~~~~~~•
الصبح كانت غرقانة بالنوم بعد سهرة مبارح الطويلة ... وحست شي عم يداعب انفها ... صارت تتحرك بانزعاج والتفتت على جنبها التاني بس لساتو عم يدايقها فتحت عيونها بأنزعاج وشافتو قاعد على مستواها وعم يحركلها وردة حمرا على انفها وعلى وجها
زورتو والتفتت على الجنب التاني وهو التفت معها وقعد على حرف التخت وقال : يسعدلي صباحك
الاء : خير .. قوم ارجاع محل ماكنت
هشام ؛ جاي اتصبح بهل الوجه الحلو يلي مابيبدى نهاري الا لما شوفو
الاء :اي حاج حاج انا فهمت عليك انت اكتر واحد بياع حكي وكذاب
هشام : هلق انا كذاب
الاء : ومنافق
وغطت وجهها
سحب الغطا عنها وقال ؛ انا بعتذر
الاء : بس شاطر انا اسف وانا بعتذر ... بتعمل يلي بدك اياه وبالاخير بتقول انا اسف
هشام : طيب فهميني ليش زعلانة
الاء : على شو عم تعتذر لكن
هشام : لانوشايفك زعلانة وقلبي مابطاوعني شوفك زعلانة
الاء : لا ماني زعلانة
هشام : والبلوك يلي عملتيه شو .. رمز المحبة
ابتسمت غصب عنها
هشام : بدفع عمري بس لحتى شوف هالضحكة على وجهك
الاء : قلتلك بياع كلام
هشام ؛ مع غيرك ممكن بس معك والله من كل قلبي
سحبها من ايدها وجلسها وقربها لعندو وباسها من راسها وقال: قوليلي شو يلي مزعلك
الاء : انت ... في حدا بيترك مرتو يلي مبارح كانت دخلتو عليها وبيتركها وبياخد ضرتها على اوتيل وبقضو ليلة حلوة ... ع القليلة عوضني لو بجزء بسيط وضل جنبي هالفترة .. انا احق فيك من غيري
هشام : معك حق .. بس كانت زعلانة عشان ليلة اول مبارح واضطريت راضيها بهي الطريقة
الاء : لكن ناس باوتيلات خمس نجوم وانا ليلة كتير عادية وكان لازم تكون اكتر ليلة مميزة
هشام : ليلة عادية ؟؟ ... هي اجمل ليلة بتاريخ حياتي كلوو ... مو مهم المكان ... المهم مع مين نكون
سكتت ومعد ردت .. ماعم تعرف تجيبها معو من ولا ناحية لانو باهر بالكلام الحلو .. وخبير بالنسوان
هشام : قوليلي شوبدك وانا جاهز
الاء : هي الفترة تنام عندي وبس لحتى نروح على شهر العسل ونرجع وبعدها بترجع بتعدل بيناتنا متل مابدك
هشام : تكرم عيونك رح احكي مع نور وحلا وفهمن مشان مايصير مشاكل وغيرو
الاء : بس
هشام ؛ بتعرفي انو انت اكتر وحدة بتكون طمعانة فيني مو بشي تاني
الاء : شي تاني متل شو
هشام : شي هدية مثلا
الاء : لا مابفكر بهي الامور .. بس مازال حكيت انت كريم وانا بستاهل
هشام : واحلى هدية كمان
وسحب ايدها وباسها بكل حب ورومنسية
~~~~~~~~~~~~~•
مر يومين الجو كان كتير رايق ... والاء كتير مبسوطة انو هشام مشي على هواها عم ينام عندا بعد مافهم نور وحلا وماحدا عم يزعجن .. بس مابيمنع تسميع حلا حكي طالع نازل لالاء بس هية استعملت اسلوب التطنيش ...
كانت قاعدة قدام المراية وعم تضبط حالها .. كانت تكتفي بكريم واحد للوجه مع حمرة خدود وايلاينر وتطلع مميزة وفاتحة خط مع اختها اسماء
اسماء : وهيك والله بلشنا نطلع ع المشافي نعمل دوارت عملية
الاء : متل شو
اسماء : قياس ضغط .. ابرة .. تركيب سيروم ... ضماد ... وبدنا نتعلم التقطيب
الاء : برافو
اسماء : اي والله ... وانت مابلشتي شغل
الاء : لا بعد .. بس عم علم حنين بنت نور وساعدها بدورسها بالمدرسة .. بس بالشركة لبعد ماتروح ام عمر وبعدها بدنا نطلع شي اسبوع اسبوعين زمان نغير جو انا وهشام كتعويض عن شهر العسل .. وبعدها رح انزل معو على الشغل
اسماء : ياعيني شو هالدلال
الاء : هههه ومين قلك عاجبني
اسماء : بحقلك والله .
الاء: هههههه كيف لكن
اسماء : صح بدي اسالك عم تشوفي ملك
الاء : اي تقريبا كل يوم ... يمكن تستقر هون هية وجوزها .. بس ليش عم تسألي
اسماء : حاسستها متغيرة بعد هالجازة حكيتها مرتين تلاتة بترد بلا نفس وبس بدها تنهي المحادثة
الاء : وبالناقص منها ليش عم تقللي من قيمتك وتحكي معها
اسماء : بتضل رفيقة عمري شبك ولو .. يمكن مشغولة
الاء : لا مو مشغولة بس هية صايرة نفسية ومابتتحكى ... اصلا الي مابتحكيني الا ع الضرورة
اسماء : اف ليش
الاء : ههههه ماقلتلك
اسماء : لا والله
الاء :طلع جوزها بالزمنات كان يحبني ويمكن مشان هيك ناقمة علي وعليكي هههه
اسماء : عنجد .. ليش من وين بيعرفك
الاء : كان معي بالثانوية
اسماء : انابعرفو
الاء : لااا .. لانو انا كنت عاشر وهو بكالوريا وانت كنت اعدادي ... ولما جيتي عالثانوية كان هو ناجح
اسماء : اممم ... وانت كنت تحبيه وقتها
الاء : لك ماعرفت غير لأمس .. سالت عنو ميساء وهية حكتلي كلشي .. بس تخيلي بعرف من زمان
اسماء : ههههه .. مشان هيك ملك ماعم تحكيني لكن
الاء :بجوز .. حسيت تصرفاتها غريبة بعد هداك اليوم يمكن جوزها حكالها
اسماء : معقول
الاء : مابعرف مابهمني لا هية ولا جوزها ينباعو بالعزا
اسماء : ههههه يلا سلام
~~~~~~~~~~~~~•
اندق الباب ودخلت نجود
نجود : مدام الفطور جاهز
الاء : ومين في تحت
نجود : الكل ما عدا جوز ملك
الاء : امم يعني مافي داعي البس
نجود : لا لانو كانت ملك تحكيه وقلا مسافر هو ورفيقو ع مدينة تانية .. يمكن يستقروا هون
الاء : اي منيح
قامت طلعت فستان من الخزانة قطني طويل بيجي طبقات و حمالاتو بينربطو على شكل شريطة وفردت شعرها الكيرلي مع حلقات مشنشلين
طبعا يوم عن يوم عم تعتني بحالها وتصير اجمل .. ومشاية عالية بلون الدهبي ..
نزلت وصبحت عليهن وقعدت جنب هشام يلي ابتسملها بالخفى .. ونكعها من رجلها وهية ابتسمت بدون ماتحسس حدا
ام عمر : هشام ايمت بدك تحجزلي بطاقة للطيارة وارجع على البيت
هشام : عشو مستعجلة والله لسه ما شبعت منك
ام عمر : والله بالي عند عمر شب لحالو مافي حدا يطبخلو ولا يغسلو ... وغير هيك بعد مية اتصال ليرد ... مهمل كتير هالولد
نور ؛ ليش مابتزوجيه
ام عمر : يوم المنى بس كل مابقلو على بنت مابتعجبو
نور : الله يخترلو الخير
حلا : الاء عندها اخت شوفولو اياها
ملك : اسمااء؟
حلا : اي يمكن هية .. بتكون رفيقتك كمان
ام عمر : صح كيف ماخطرت عبالي البنت محترمة ومافي منها
ملك : لا لا
هشام : ليش لأ انا برأيي خيار منيح
ملك : اسماء رفيقتي وبعرفها كتير منيح هية وعمر مابيزبطو على بعض
الاء انقهرت على اختها وحكت : مزبوط حتى اسماء يمكن ماتوافق .. يسطفل الشب يختار يلي بدو اياها
ملك بغيظ : هاا ما توافق ؟؟ اي يصحلا
الاء : على شوو بالله
ملك : حارتنا ضيقة وبنعرف بعض
الاء : هاتي عرفينا شو عندك
هشام ؛ خللصصص بكفيي شو هالحكي هاد
الاء : مو شايف كيف عم تحكي عن اختي ورفيقتها بنفس الوقت ... يعني واذا اخوها بس مابصير تقلل من قيمة اختي
ملك : انا ماحكيت شي قلت مابيزبطو
الاء :وانا ما اعترضت وقلت اختي يمكن ماتوافق ... متل ما انت قدمتي رأيك انا قدمت رأيي
ام عمر : ملك الغلط منك ... خلص اسكتي وبعدين ياريت عمر يوافق مارح لاقي احسن من اسماء واخلاقها ... الاء انا بعتذر نيابة عن ملك
الاء : استغفر الله .. امانة لاتحكي هيك اصلا انا وملك عم نتناقر عادي .. بالعكس نحنا يلي بنتشرف بعمر بس الدنيا قسمة ونصيب ومابدنا نتقاتل ع شي يمكن مايصير ... انا يلي بعتذر منك خالة ام عمر
ام عمر : تسلميلي يارب
هشام : شيلونا من هالقصة وسمو بالله
ملك : الاء بعتذر
الاء ببرود : ولا يهمك
بلشو اكل ع الصامت
~~~~~~~~~~~~~~~~~•
بهل الاثناء بسوريا
اسماء ماشية مع دكتور وممرضة عم تتعلم وتسجل الملاحظات بالملف يلي معها
ليطلع صوت عمكبرات الصوت : الدكتور امجد الرجاء التوجه الى قسم الطوارئ
الدكتور : عم يندهو علي .. ليلى اعملي الاجراءات الكاملة للمريض وانت (لاسماء )تعي معي
راحت اسماء مع الدكتور على قسم الطوارئ
الدكتور : شو القصة
الممرض : دكتور هاد الشب حدا ملاقيه على جنب الطريق يمكن متعرض لاعتداء بالضرب النبض مستقر والتنفس منتظم بس ماعم يفيق
الدكتور : في اصابة براسو
الممرض : اي في ضربة ظاهرة على جبينو بس مافي جرح
الدكتور : مافي اي معلومات عنو
الممرض : لا مامعو اي شي بيثبت شخصيتو ولا حتى موبايل
الدكتور : اتصلو بالشرطة .. وجهزو الطبق المحوري
الممرض : حاضر
الدكتور لاسماء : وانت فتشي جيابو واذا لابس ساعة او اي شي شلحيه اياهن واندهي لحدا يساعدك تبدلولو تيابو وتلبسوه مريول
اسماء : حاضر
قربت اسماء منو وهية حاسة انو وجهو مألوف .. بس اثار الضرب مغطية وجهو ووجهو عم يتحول للون الازرق ... فتشت بجيابو مالقت شي حتى مو لابس ساعة .. لمحت شي عم يلمع برقبتو كشفت لشوف شو هو وكان سنسال فضة .. حررتو منو واخدت كيس لتحطو فيه بس استوقفا نقش على السنسنال مكتوب : عليه اخي وضو عيوني
وحرف o m
فورا راحت بذاكرتها لمرة هية وملك فاتو عمحل اكسسوار
ملك : شو بدي جيب لاخي هدية بعيد ميلادو
اسماء : ساعة
ملك : لا ولوو عندو ساعات كتير
اسماء :طيب خديلو من هدول السناسل الفضة واكتبيلو عليها شي شغلة بتضل ذكرة منك
ملك : والله فكرة .. بس شو اكتب
اسماء : شو بعرفني .. اخي حبيبي وحرفك وحرفو
ملك : لا رح اكتبلو اخي وضو عيوني
فاقت من ذاكرتها واتطلع بعمر بصدمة وقالت : عمررر!!!!
فورا طلعت الموبايل وصورتو ووتابعت شغلها وهية بس بدا تخلص مشان تخبر اهلو
طلعت لبرا بعد ماخلصت ونقلوه على التصوير و بلشت تتصل بملك بس ماردت عليها
اسماء : شو اعمل ياربي
طلع الدكتور وراحت لعندو وحكت دكتور شو صار معو
الدكتور : بدو دكتور متخصص شكلو فايت بغيبوبة ... مابين حدا من اهلو
اسماء : لا بس انا يمكن بعرف رح حاول اتصل مع حدا من قرايبو
الدكتور : اي حاولي بسرعة الشب بدو نقل عمشفى فيه اجهزة حديثة ودكتور مختص
رجعت اتصلت بملك اكتر من مرة بس مافي رد ... اتذكرت هشام وصارت تتصل فيه .. كمان مافي رد .. واتصلت بالاء
~~~~~~~~~~~~~•
رن تلفون الاء واستغربت انو اسماء وهنن قاعدين على الفطور بس سكرت بوجهها
هشام : مين ؟
الاء :اسماء .. هلق بعد شوي بحكيها
اجتها رسالة : الاء ردي بسرعةةة
بين التوتر على وجهها
هشام ؛ هية ؟؟
االاء :اي
اتصلت فيها : اسماء شبك ....اييي ... ايي .. رفعت نظرها على هشام وام عمر .. وقالت متأكدة .... طيب طيب .. ماشي ابعتيلي الصورة
سكرت وحكي هشام : شوفي
الاء بتوتر : بدي احكي معك بموضوع ممكن تجي معي
قامت قدامو وهو قام وراها
ام عمر : شو القصة
حلا بملل : بكون ابوها تعبان وبدو مصاري
نور : لا تستبقي الاحداث
مشو عجنب وحكي هشام : حبيبتي شوفي .. ابوكي فيه شي
الاء : لا لا
رن الموبايل وفتحتو وظهرت قدامها الصورة : وفرجتها لهشام : بتعرف مين هاد
اتطلع فيه بس مابين معو لانو التصوير مو واضح وفي كدمات : لا مين هاد
الاء : مو عمر ابن اختك
اخد التلفون منها بسرعة وكبر الصورة وقال : ايي هاد عمر شبوو .. شو صايرلو
الاء : في حدا ضاربو وراميه على الطريق ونقلوه على المشفى الحكومي يلي عم تتدرب فيه اسماء .. مامعو اي شي يثبت شخصيتو .. بس اسماء عرفتو .. حالتو خطرة بدو نقل لمشفى خاص بسرعة
هشام : انت شووعم تحكي
مد ايدو على جيبتو مالقى موبايلو : موبايلي وينو
الاء : يمكن فوق رح جيبو
هشام : انا بجيبو ...طلعو ركض على الغرفة تحت انظار الجميع ... ومافي ثواني الا ونازل وهو عم يحكي على التلفون .. بترجااك بدر بدي تنقلوه على احسن مشفى بالبلد .. انا نازل باول طيارة .. اسم المشفى .. الاءء شو اسم المشفى
الاء : الوطني
هشام : الوطني .. الوطنيي
قامو انلهفو عليه ووقفو جنبو باستنفار
ام عمر : شوفي
هشام : جهزي حالك نازلين عسوريا
رجع عمل تلفون تاني : بدي تحجزلي ع اول طيارة نازلة على البلد ... فوراا ...
ام عمر بخوف : شوو في اخي
سكر هشام واخد نفس وقال : اخدتي دواكي
ام عمر : هشاام شو في .. عمر فيه شي
هشام : لا تخافي هو بخير
ام عمر : عمرررر .... شبوو
هشام : لاتخافي ... ان شاء الله رح يكون بخير
ملك : خااالي شبوو عمر ... ماااات
هشام ؛ لااا شو مات الحمد لله عايش .. متعرض لحادث
انهارت ام عمر .. نزل لعندها وسندها وصار يقويها : اختيي قوي حالك .. مو وقت تنهاري بدنا نروح لعندوو ...شدي حيلك
ملك : بدي انزل معكن
هشام : بتنزلي انت وجوزك ... نور جهزولنا شنطنا
نور : حاضر
ملك : طيب شو القصة ومين خبركن
هشام : جيبولنا مي
جابو مي وصار يشرب اختو لحتى تهدا
ام عمر : قلي شو صاير معو طمني دخيلك يا خيي
هشام : متعرض للضرب ونقلوه على المشفى يلي عم تشتغل فيه اسماء .. مامعو اثبات بس اسماء الحمد لله تعرفت عليه ومتصلة فيني كتير كان موبايلي فوق واتصلت بالاء ... وانا خبرت رفيقي بدر ينقلوه فورا على مشفى خاص .. وناطرين هلق يخبروني عن اول طيارة نازلة على البلد
ام عمر صارت تبكي : قلبي كان حاسسني ... ماكان لازم اتركو
هشام : مشان الله طولي بالك يعني لو انك تحت شو كنتي بدك تعمليلو .. بس الا ما اعرف مين ولاد هالحرام .. خلينا ننزل ونطمن عليه وبعدها لكل حادث حديث
ام عمر : ما خطرة نزلتك .
هشام : مافي شي لاتخافي .. المهم نكون جنب عمر
ام عمر : الاء بترجاكي اتصلي بأسماء
اتصلت الاء باسماء وفورا ردت
الاء : اسماء طمنينا
اسماء : هلق بهل الثانية اجت سيارة اسعاف ومعن دكتور مختص وعم ينقلوه ... الدكتور عن يقول وضعو مستقر حاليا ..
الاء : اي الحمد لله ...
اسماء : اي والله .. الله يحميه يارب .. ليكي بدي سكر عم يندهو علي
الاء : ماشي اختي الله يقويكي
سكرت وحكت لتطمن ام عمر :اسمعتي وضعو منيح
ام عمر ؛ الحمد لله .. الحمد لله .. ياارب تكون معو ولاتضرني فيه
الكل :آمين
رن موبايل هشام : ايي... بعد ساعتين .. كتيير منيح ...
سكر وقال : الطيارة بعد ساعتين
قامت ام عمر وقالت رح جهز حالي بسرعة
ملك : خالي بترجاك خدوني معكن
هشام : الاحسن تنزلي مع جوزك
ملك : ماشي رح حكيه ونلحقكن فورا
وقف هشام وقال : رح جهز حالي
الاء بنفسها تقلو خدني معكن بس حست الوقت مو مناسب
التفت عليها هشام وقال: تيجي معنا
ابتسمت وقالت : ياريت
ابتسملها وقال : جهزي حالك
الاء : أوراقي وين
هشام : معي ... جهزي حالك بسرعة
حاولت قدر الامكان تخفي فرحتها كرمال عمر وطلعت بسرعة وبلشت تضب تيابها
~~~~~~~~~~~~~~~•
مطار دمشق الدولي
بوابة القادمون
طلع هشام وام عمر والاء من ختم الجوازات .. مشو شوي وهشام قرب عشخص وسلم عليه وهاد كان رفيقو بدر
بدر : الحمد لله عسلامتكن
هشام : الله يسلمك
بدر : السيارة جاهزة
هشام : والله انك كفو يا شريك
بدر : ولو يا هشام بدنا خدمة تحرز
راحو ركبو بالسيارة والاء طول السفرة ضلت جنب ام عمر .. ركبو بالسيارة وحكي بدر ع وين
ام عمر : ع المشفى دخيلك
بدر : ماشي
وصلو على المشفى .. وماسمحوا لحد يدخل لعندو لانو بالعناية .. قعدت الاء وام عمر قدام باب العناية وهشام راح هو وبدر يشوفو الدكتور
~~~~~~~~~~~~~~•
الدكتور : مابخفي عليكن الوضع خطير .. وبنفس الوقت الامل كبير
هشام : دكتور بدي اعرف كل التفاصيل
الدكتور : الحمد لله انو الضربة جاية ع ناصيتو (جبينو ) وهون المنطقة اقل خطورة من مؤخرة الراس .. في تجمع دم على الدماغ وهاد الشي عاملو غيبوبة مؤقتة ... رح نراقب الوضع اذا كمية الدم عم تكبر في خطورة لانو النزيف مستمر .. اما اذا ضلت ثابتة فا وضعو منيح والامل كتير كبير
هشام : رح يصير تدخل جراحي
الدكتور : ان شاء الله مانحتاج ... شرحتلك الوضع
هشام : طيب فيني طلعو برات البلد اذا احسن الو
الدكتور : مارح تستفاد شي حاليا ... خلينا نراقبو ٢٤ ساعة وبعدها ان شاء الله خير
هشام : يعطيك العافية دكتور
قام هو وبدر وراحو لعند ام عمر والاء
وهشام طمنها لاختو عن وضع عمر واقنعها انو يروحو يرتاحو بالبيت
~~~~~~~~~~~~•
دخلو على البيت ..والبيت كان حالة فوضى لانو عمر كان بالبيت لحالو واكيد شب عزابي البيت رح يكون وراه خرابة
ام عمر قعدت على اول كنبة وصار تبكي
ام عمر : تقبر قلبي يا امي ... البيت مو حلو بدونك ياعمري يا عمر
هشام : اختي مشان الله لا تفاولي عليه .. والدكتور طمنا .. قومي اتوضي وصلي وادعيلو
عمر : ليش جبتني من عندو كان بدي ضل جنبو
هشام ؛ والله وجودنا مارح يفيدنا وانا توصيت فيه واذا صار معو شي فورا رح يخبرونا ... بترجاكي اختي اشربي دواكي وقومي ارتاحي شوي ... لازم تكوني قوية
اختو : ياااارب
الاء : لما شافت وضع البيت كيف فورا بدلت تيابها وبلشت تنضف
وخلال ساعتين كان البيت عم يلمع والغدا جاهز
دخلت على هشام يلي قاعد على اللاب عم يكبس عليه وحكت : شو عم تعمل حبيبي
هشام ؛ عم مشي الشغل لانو تركت كلشي فجأة وعم وصي رياض وحسن يتابعوه
قربت وقفت وراه وحطت اديها على كتافو وقالت ؛ يعطيك العافية
سحب ايدها وباسها وقال: وانت كمان يعطيكي العافية ...
الاء : واجبي حبيبي .. يلا قوم انده لام عمر مشان تاكلو شي لقمة
هشام : جاهز ؟
الاء : اي بس رح اسكبو
قام هو واياها وسألها : خبرتي اهلك انك هون
الاء : لسه ..
هشام : اي لاتخبريهن لحتى قلك
الاء : ماشي
~~~~~~~~~~~~~•
تاني يوم اجت ملك وجوزها وبعدها راحو كلن على المشفى.... عند العصر رجعو الكل كان الاء مجهزة الغدا
واول مادخلو حست انهن فرحانين
الاء : طمنونا
هشام : الحمد لله تعدى مرحلة الخطر
الاء : اي الحمد لله .. وصحي
هشام : لا بس طمنا الدكتور بالكتير يومين وبفيق
الاء : الحمد لله ... الحمد لله .. يلا تفضلو الغدا جاهز
ام عمر بتعب : يسلم هالايدين حبيبتي
الاء : ماعملت شي .. يلا غسلوا بالاول
ملك : معك حق المشفى كلو جراثيم
راجو يغسلوا وهشام قرب من الاء وحاكاها بصوت واطي : بعد الغدا جهزي حالك لوصلك لعند اهلك
الاء : ماشي .. يا الله شو اشتقتلن
هشام : كان بدي نمر نشتري شوي هدايا ماحلوة تفوتي وايديكي فاضية
الاء : اكيد مارح يعتبوا علينا .. وخصوصا جينا بهيك وضع
هشام : انا قلت بس نطمن على عمر بنروح انا واياكي قام اجى محمود
الاء :امممم قول هيك من الاول
هشام : ههه
الاء : اي صح بدك تجي معي ..
هشام: رح وصلك وسلم عليهن ورح ضل هون مع اختي لاطمن على عمر طلع ع البيت
الاء : يعني مارح شوفك منيح
هشام : مع انو رح اشتقلك كتير ... بس في شي ابدا
الاء : معك حق .. الله يشفيه ويعافيه يارب ويردو لاهلو
~~~~~~~~~~~~~•
وقفت السيارة قدام البناية والاء متحمسة تنزل وتشوف اهلها وفتحت الباب بحماس بس هو فورا وقفها ومسكها من ايدها
الاء : شو القصة
هشام : هيك بدك تنزلي بدون ماتودعيني
الاء : ليش مو نازل معي
هشام : مبلى بس رح اشتقلك
قربت ضمتو وقالت : وانا كمان
هشام : من هلق ها بس اعملك رنة بتنزلي فورا لعندي
الاء : ههههه بنشوف
هشام : شو هية بنشوف
الاء : انو حسب الوضع بركي مابقدر انزل
هشام : لا بدنا نتفق من هلق
سحبت ايدها من ايدو وقالت بنحكي هشاام بنحكي .. بدي شوف اهلي ناطف قلبي عليهن
نزلت من السيارة وهو نزل وراها وقال : طيب وقفي شوي خلينا نفوت سوا
وصلوا لقدام الباب والاء حطتت ايدها على الجرس فرد كبسةة
هشام : شوي شوي هلق بتحرقي الجرس
الاء : مابأثر
فتحت امها وتفاجأت فيها
امها : الااااء
الاء : ياااعمري اشتقتلك
ضمت امها وامها ضمتها وصارو يبوسو بعض
امها : اهلين ياعيون امك اهلين بوردة هالدار المقطوفة
بعدت عنها ورجعت ضمتها من جديد
هشام : بدكن تضلو موقفينا كتير
امها : لا تواخذيني ياصهري تفضلوا فوتوا مية اهلا وسهلاا .. والله نورتووو
دخلت الاء وهشام سلم على حماتو مصافحة ودخل وهو حامل شنتة الاء ... وشافت الاء ابوها يلي قاعد قدام التلفزيون بس عيونو على الباب لانو سمع الضجة والاء ركضت لعندو ونزلت لمستواه وضمتو وصارت تبكي
الاء : كيفك يا سندي .. يا تااج رااسي
ابوها : هاد انت يا ابي والله مو مصدق عيوني ... اهلين بالغالية
باستو من راسو وقالت ؛ اهلين فيك يا عمري انت .. طمني عنك كيفك
ابوها : بشوفتك يا ابي صرت منيح
بعدت عنو واجا هشام نزل لمستواه صافحو وباسو على خدودو وختمها ببوسة على راسو
ابوحمزة : الله يرضى عليكن ويعطيكن ليرضيكن
~~~~~~~~~~•
بعد فترة من الوقت كانو كلن قاعدين من حمزة ومرتو واسماء مع الاء واهلا وهشام
هشام : انا بدي استأذن يا جماعة
حمزة : ع وين لسه ماشفناك
هشام ؛ بدي ارجع لعند اختي مافيني اتركها لحالها
ام حمزة : ع القليلة خلينا نتعشى سوى
هشام : صحة ومية هنا غير مرة
قاموا كلن يودعوه بس هو حلف انو ماحدا بيلحقو وغمز الاء
الاء : خلص ارتاحوا انا بوصلو على الباب
رجعوا قعدوا اماكنن والاء مشت لعند الباب وهو سحبها وضمها بقوة واخد نفس عميق وهو ضاممها
هشام : رح اشتقلك كتيير يا نحلة حياتي
الاء : نحلة ؟؟؟
هشام : ههههه خلي موبايل عطول فيه نت
الاء ؛ اوك ... يلا الله معك
هشام ؛ مستعجلة على تقليعتي
الاء : مو هيك بس شوبدك قلك
هشام : قوليلي انك رح تشتاقيلي
الاء : من هلق عم اشتقلك والله
هشام ؛ وانا كمان
قرب باسها وهية رجعت فورا لورا وايدها على تمها وعم تشوف اذا حدا شايفهن
الاء : شو صاير معك .. عيب هلق حدا بشوفنا
هشام : هههه يلا سلام
الاء : الله معك
طلع وهية سكرت الباب وراه والابتسامة على وجهها
ورجعت لعند اهلا حستن عم يتطلعوا فيها
الاء : في شي
اسماء : هههه لا ابدا الجو حلو
خجلت الاءوقالت : رايحة جدد المتة
اسماء : اقعدي انا بجيبها
الاء ؛ ماباثر خليني احرك عم نقضيها قعود لاشغلة ولا عملة
حمزة : لكن ياعمي خدم وحشم
الاء : خمسة وخميسة من عينك
~~~~~~~~~~~~~~~•
بعد يومين قاعدين الاء واسماء وميساء
بغرفة البنات مقربين التخوتة من بعضها وقاعدين جنب بعض وقدامن شوية نقرشات ومتة
.. والاء قاعدة جنب ميساء وحاضنتها من ايدها وقالت : يا الله شو اشتقتلك
ميساء : وانا كمان ماصدقت خبرتيني انك هون بالبلد وجيتك ركض
الاء : الليلة صباحية
ميساء : اكيدد
اسماء : انا مابوعدكن
ميساء : لك صحي كيف دوامك بالمشفى
اسماء : ماشي الحال
ميساء : اي تمام .. وانت الاء كيف صار ابن اختو لهشام
الاء : صار منيح كتير ويمكن بكرا يخرجوه
ميساء : رحتي شقيتي عليه
الاء : لا بس يطلع بروح
اسماء : اي منيح الله لايضرو وماعرفوا مين عامل فيه هيك
الاء : سألت هشام قلي بعدين بعدين بس افهمت انو الموضوع انحل ويمكن انعرفوا ..
ميساء : شو بيشتغل هاد عمر
الاء ؛ محل تلفونات
ميساء : اي المهم .. شو اخبارك انت وهشام
تنهدت بهيام وقالت : هشام ااااه ... زينة الرجال هشام
ميساء : الله الله على الحب
الاء : اي والله احلى شي هو الحب والاهتمام
رن موبايل الاء اخدتو الاء وحكت اسماء : هلق شوفي بتصير بغير عالم ..عم تقلك السهرة صباحية بس مو معك
الاء ؛ وهوا .. انت عم تنامي شو اعملك
اسماء : بس مو لهل الدرجة والله يلي بشوفكن بقول مخطوبين
ميساء : هاد هشام
الاء : اي هو يقبر قلبي
ميساء : شو عم يبعتلك
الاء ؛ مابقدر قلكن
ميساء : شغلات قليلة ادب
اسماء : هههه لكن بدو يقلا كيف حال العيلة
قربا ميساء منها وقالت : حبابة الاء فرجينا شو عم يبعتلك
اسماء تشجعت وقربت : اي الوء حبابة
الاء : بالله شوو
ميساء : بشرفك ولوو .. انا واختك عنا جفاف ومابنعرف بهي الامور حبابة .. والله مابنقول لحدا
الاء : طيب بس بالاول بقرا انا واذا شي مناسب الكن بخليكن تقروه
ميساء : ليك الكلبة
الاء : ههههه خلص تعو
فتحت على اسمو كان باعتلها : كيفها نحلتي
ميساء : نحلة ؟؟ هههههه
اسماء : كل هي نحلة هههههه
الاء: بلاا مسخرتكن .. روحو من هون بطلت فرجيكن
ميساء عم تكتم ضحكتها وقالت : خلص والله سكتنا
اسماء حطت ايدها على تما وقالت : خلص خلص
رجعت حكت اسماء : ليش نحلة عن باقي الحشرات
اسماء فرطت ضحك وقالت: شكلها بتوز كتير
ميساء وهية كمان فارطة ضحك : او بتقرص خههههههه
الاء : تضربو صحيي قوموا انقلعوا من هون
ميساء : خلص سكتنا وعد .. بس ليش عم يقلك نحلة
الاء : مابعرف .. خلص ابلعوها ولا بغير رأيي
اسماء وهية عم تاخد نفس بعد الضحك وقالت : خلص سكتنا
بعتتلو : من وين جايبلي لقب النحلة
هشام :ههههه لأنك حلوة وصغيرة متلها وكلك عسلل
الاء : اي ماعجبني
هشام : متل مابدك .. المهم شو عم تعملي
ميساء : بشرفك قوليلو لحالي
الاء : فشرتي
بعتتلو : سهرانة مع رفيقتي واختي
هشام : اممم .. وايمت بدا تخلص السهرة
الاء : صباحية
هشام : بالله شوو
الاء : في شي
هشام : اي في .. انا كنت جاي اخدك
الاء : ع وين
هشام : سر .. المهم اصرفيهن وجهزي حالك وابعتيلي
ميساء : ليك الندل
اسماء : شايفة انت هالدبور
الاء : اخرسي انت واياها
الاء : مافيني حبيبي رفيقتي صرلي زمان ماشفتا واخدت اذن مشان تنام عندي اليوم
هشام : طيب اشتقتلك وبدي شوفك
الاء : الوقت بكير تعال اسهر عنا شوي
هشام : اسهر وشوي 😒
الاء : طيب شو اعمل
هشام : قومو البسوا جاي
ميساء : عم يقول البسووا ؟؟؟
اسماء : بكون عم يقلها البسي
ميساء : وليه الاء اذا بتروحي بتنسي انو عندك رفيقة
الاء : وحياتك مابتركك
ميساء : اي هيك ها افردي شخصيتك عليه ولاتخليه يتحكم فيكي
الاء: لا تجي مارح اتركن
هشام : لك انت واياهن البسوا جاي طلعكن مشوار
الاء اتطلعت بالبنات وقالت ؛ شوووو ؟؟
ميساء : اكيددد بنطلع
الاء : ههههه يلا بسرعة لكن
اسماء : دخيل قلبك ياصهري شو انو موجب وبيفهم
~~~~~~~~~~~~~•
اجا بسيارتو ووقف قدام البناية ومافي دقايق الا ونزلو الصبايا
وركبو بحماس بالمقعد الخلف
اسماء ؛ روح يا صهري الله يفرح قلبك متل مافرحت قلبنا بهل المشوار
هشام : تسلميلي يا اسماء انت بتستاهلي كل خير انت وميساء
ركبت الاء بهدوء جنبو عكسهن وحكت ميساء : بتعرفني
هشام ؛ مو بالشكل بس كنت اسمع الاء وهية تحكي معك .. وتعجبني النصايح يلي كنتي تنصحيها فيهن
ميساء : هههه عم اعمل واجبي
الاء : احم احم
هشام : هي انت هون .. يا اهلا وسهلا نورتت
الاء ؛ لأ اذا ماخلصتو السوالف بنرجع بعدين
هشام ؛ شو ترجعي بعدين اذا انت محور السالفة ومحور حياتي
الاء : اي وين بدك تاخدنا
هشام : عندكن مكان محدد ولا عزوقي
اسماء : صهري خدنا على الملاهي وبعدين على زوقك
هشام : تكرمي
حرك المقود ومشي واسماء وميساء كل وحدة استلمت شباك وطلعو جوالاتهم وصارو يصورو .. وهشام التفت على الاء وابتسم كانت عم تطلع من الشباك وشادرة مد ايدو ومسك ايدها .. التفتت عليه وابتسمت وهو شد عليها اكتر وتابع الطريق وايدو بأيدها حاولت تسحبها بس ماسمحلا .. والبنات انتبهوا وصاروا يضحكوا
اخدهن على الملاهي كانت الملاهي كتير حلوة ليل واضوية وعجقة .. والبنات لعبو بكلشي والاء مع هشام يلي ماتركها ولا لحظة ولا ترك ايدها .. مالعب زيادة هو بس لعب بالسيارات وهية جمبو وبعد ماخلصو اشترو غزلة وطلعوا بالسيارة
وراحوا على مطعم راقي وبصعوبة قدر هشام يبرطل حدا من الموظفين ليأمنلو طاولة .
الاء : كنا رحنا ع مطعم تاني
وصلو على الطاولة وقعدو وقال: هاد المطعم غير.... وانا كل مابنزل على الشام بجي عليه
اكلو طيب والقعدة فيه رواق
الاء : ماصرلنا زمان ماكلين بناكل شي خفيف
ميساء : كريب مثلا
الاء : طيب
هشام : متل مابتحبوا
نده للكرسون وقال : افرشلنا الطاولة مقبلات خفيفة مع فواكه وحلو مع عصير وهيك .. مو عشا شي خرج سهرة
الكروسون : فهمت عليك
هشام : بدي شي على زوقك ماتجيب حيالله
الكرسون: ولا يهمك يا بيك وصلت
هشام : مع اركيلة
اسماء : خليهن تنتين
اتطلع فيها وماعجبو الحكي وقال : متل ماقلتلك اركيلة
خجلت اسماء وماعد حكت
هشام : مو حلوة بنات تأركل بمكان عام ..
اسماء :مو مشكلة .. اصلا نحنا ماكتير بنشربها
هشام ؛ وبلاها احسن .. صدقوني مضرة للجسم ... انا كمان عم حاول بطلها .. وقليل كتير لحتى أركل
الاء ؛مزبوط .. مابأركل كتير
قرب كرسيه من كرسي الاء يلي جنبو وحاوطها من كتافها وهمس بادنها : طالعة بتجنني
الاء : لأنو مبسوطة عاكس علي
هشام : مبسوطة لأنك معي
الاء : وكمان لانو بين اهلي
هشام ؛ اممم اصبح اذا هيك جهزي حالك كل شهر بننزل زيارة
الاء : ياريت ... قد الواحد مالف مابلاقي متل اهلو وبلدو
هشام : معك حق ... بس ياحسرة على هالبلد شو صار فيها
الاء : ومع هيك حلوة
هشام : بتجنن مو بس حلوة .. بس بتزعل بنفس الوقت
الاء : معك حق
اجت الطلبات وانفرشت الطاولة من كل مالذ وطاب من فواكه شي معروف وشي مو معروف وشيبسات ومكسرات .. كريب .. وعصائر كوكتيل واركيلة هشام .. يلي كان مسترخي على الكرسي ولافف رجل على رجل وايد الاء بأيدو حاطتها على رجلو وعم يتهامس هو واياه واسماء وميساء قضوها تصوير وتصوير ايديهن
~~~~~~~~~~~~•
الساعة وحدة ووقفت سيارة هشام قدام بناية اهلا لألاء
اسماء : انا فارطة .. بوجهي على النوم
ميساء : وانا متلك تعبنا كتير
فتحو الباب لينزلو وحكي هشام : يعني رايحين تنامو دغري
اسماء : الله يستر ما انام على الدرج
هشام : تمام يعني مارح تسهرو للصبح مع الاء
ميساء : لااا
الاء : اي والله اتعبنا .. يلا تصبح على خير حبيبي
بس هو مسكها من ايدها وماخلاها تنزل
هشام : صبايا مازال هيك هيك نايمين تسمحولي اسرق الاء منكن
ميساء : ههههه عحسابك
الاء : يا ندلة ما عأساس سهرة صباحية
ميساء : بكرا بكرا ... انا فارط قلبي من النعس انت اذا مانك نعسانة روحي كفي سهرتك مع جوزك
الاء : هيك لكن
اسماء : انبسطوا صهري بتستاهل كل خير
هشام : هههه .. يلا اطلعو انا رح ضل واقف هون لأمن انو صرتو بالبيت..اعملولي رنة
اسماء : ماشي تصبحوا على خير
هشام : وانتو بخير
ومد ايدو وسحب الباب يلي جنب الاء وسكرو وقال : بدا تهرب ... انا كل هاد عملتو مشان اخطفك اخر السهرة يا سندريلا
الاء : من وين عم تجبلي هالمسميات
هشام ؛ هههههه لانو طيبة وكربوجة كل المسميات بتيجي عليكي ومع هيك مابتعطيكي حقك
رن موبايل هشام باسم اسماء وهو ابتسم وحرك المقود ومشي
الاء : ع وين
هشام : حاجز بالأوتيل
الاء ؛ انت كيف بتلحق لكل هالشغلات
ضحك وجذبها وضمها على صدرو وتابع طريقو
~~~~~~~~~~~~~~•
عم تجهز ام حمزة الغدا والاء جنبها عم تعطيها قوادير الطبخة
وميساء واسماء عم يفرموا التبولة
امها : وليش لتنامي عند بنت حماكي مازال بيت اهلك موجود
الاء بلبكة : اتاخر الوقت ونمنا هنيك .. مافيها شي
امها وهية فهمانة على بنتها : وعندن برغش (بعوض) كتير ؟
الاء : لا ليه
امها : لأنو رقبتك مبقعة
مدت ايدها على رقبتها بخجل وقالت : وين ؟ في كتير؟
اسماء : ماما هاد دبور مو برغش
الاء : انت اخرسي
امها : روحي اتضبضبي ولفي شي عرقبتك ماحلوة حدا يشوفك بهل المنظر
الاء : رايحة
غابت شوي واجت لافة شال على رقبتها
وميساء واسماء عم يتهامسوا ويتضحكوا
الاء : سكري تمك انت واياها اصلا كلو منكن .. قولو بدنا نسهر مع الاء
ميساء : ههههه طيب كنا مفحمين من النعس
الاء : قولو بدنا الاء ومارح سهركن اصلا انا كنت تعبانة وبدي نام
اسماء : بعد كرمو معنا بدك نزعلو منا
الاء : لكن بتسكتو بتضبو لساناتكن وحاج تتوتو علي .. بكرا بنشوفك لما تتزوجو
ميساء : اذا في بعوض ودبابير مابدي
الاء : هههههه
اسماء : صحي الاء احكيلنا شو عملتو
الاء : ماما .. ليكي بنتك
امها : اسماء شو هالحكي ماعيب عليكي
اسماء : قصدي انها كانت نعسانة ايمت نامت
الاء ؛ هيك لكن هكلانة همي
اسماء : زعلتيني عليكي قلتي كنت تعبانة
الاء : اي والله .. كلو منكن كنت نزلت معكن وشبعت نوم
ميساء : لايمت ضليتو سهرانين
الاء : صلينا الصبح ونمنا
طلعت امها من المطبخ واسماء بترجي : الاء حبابة احكيلنا
الاء : يوه انتو مابتستحو
ميساء : طيب اذا نمتو عصلاة الصبح ايمت فقتو
الاء : من شوي فقنا وفورا وصلني لهون وهو راح ع المشفى
اسماء : يعني اليوم رح يخرجوه
الاء : ع الاغلب
دخلت امها وكانت سمعانة اخر الحديث : وبدك تروحي تسلمي عليه
الاء ؛ مابعرف لشوف هشام اخدني بروح ما اخدني بكون اريح ... لك صحي اسماء عم تحكي مع ملك
اسماء : لا ... هية بعتتلي مرتين وحاولت تتصل وانا تحججت بشغلي وسكر
الاء : مابتقصري وحدة ندلة
ميساء : شو صاير
اسماء : فجأة تغيرت معي وحكيها ماترد .. طلعت مدايقة ليش ..( وسكتت لانو انتبهت لامها
امها :ليش ؟
اسماء : شو بعرفني غيرتها الجازة .. وبركي خايفة على جوزها تضرب منها لألو .. ويوم شفت اخوها بالمشفى دقيتلها كتير ماترد
الاء : بوقتها كنا كلنا قاعدين على السفرة وماسمعت تلفونها رن يمكن ماكان معها مشان مانظلما
اسماء ؛ معها ولا مو معها .. تجاهلا الي بكفي .. ليش شوعملتلا لتعمل فيني هيك ..
الاء : مزبوط .. بس ومع هيك بتضلو رفقات اذا رجعت ندمانة صالحيها
اسماء : بشوف
رن الجرس
اسماء : محدا بيجي لعنا بهل الوقت قومي شوفي اكيد بكون دبورك
الاء : اخرسي احسنلك
قامت الاء وفتحت واتفاجئت بأخوها لؤي ولما شافها تفاجئ مع ضحكة وقال : الاء ؟؟
الاء : لؤي .. يا عمررييي
ضمتو بلهفة وهو رما شتنو يلي معو وضمها بقوة ومن شدة ضمتو الها حملها وصار ييرم فيها
لؤي : ماكنا بنعرف انك غالية علينا لهل الدرجة يا بنت
الاء : ههههه وانا كمان ماكنت بعرف انكن رح تشتاقتولي لهل الدرجة
حط ايدو على كتفها ودخلو لجوا
~~~~~~~~~~~~~•
مجتمعة العيلة من جديد والاء قاعدة جنب اخوها يلي شكلو متغير بعد ماتحمم ولبس بجامة نضيفة ،وبهل الاثناء ميساء كانت رايحة .. شبكت الاء ايدها ببعضن وحطتن على كتفو وحكت : احكيلي طمني عنك .. وين عم تخدم .. ليش ماعندك نت ... عطول ببعتلك ماعندك نت
لؤي ؛ عم نخدم ع الحدود مع العراق والتغطية معدومة يادوب بكتب رسالة وببعتها لامي وهية لتلقط تغطية بتطلع .. والجو امان الحمد لله
الاء : شقد لسه لتسريحك
لؤي : ١٠ شهور
الاء : وبعدها ع الاحتياط
لؤي : اي الاحتياط اشوا بصير داوم بمكان قريب ويومين بالاسبوع
الاء : واذا دفعت مصاري
لؤي : هههه من هلق بتسرح اذا في مصاري
الاء : لكن شغلتك محلولة
لؤي : وكيف بالله ربحتو اليانصيب وانا مو عرفان
الاء : مني
لؤي : كيف ؟
الاء : رح اخدن من هشام وبعدها بوفيه اياهن من شغلي
لؤي : لك صحي مستلمتيني عشرة بلدي وانا لسه ما اتطمنت عنك ... طمنيني كيفك على هالجازة وكيفو جوزك معك .. وكيف لقيتي الغربة حلوة دبي
الاء : دبي ؟؟
لؤي : اي ماهشام بيشتغل بدبي ... صحي وينو
الاء : انتو ماخبرتوه للؤي
لؤي : لا شوفي
امها : من يوم تزوجتي لؤي مانزل اجازة
لؤي ؛ عنجد شوفي
الاء : لا مافي شي .. بس هشام طلع بيشتغل بقطر مو بدبي
لؤي : ههه اي هاي هية مازالن حد بعض مابتفرق ... اي كيفها قطر لكن
الاء: بتجنن كتير كتتير حلوة
لؤي : اي تمام .. وهشام كيفو معك
الاء : مافي منو بحبني كتير وبس بدو رضايي
لؤي : اي الحمد لله طمنتيني عنك .. لانو تزوجك ومابنعرف عنو شي .. خفنا يكون ابن حرام
الاء : لا هشام ابن حلال وبخاف الله
لؤي : وكيف شغلو
الاء : كمان شغلو كتير منيح
لؤي : وشو كنت عم بدك تشتغلي
الاء : اي هشام رح يشغلني بالشركة معو
لؤي : بمون ع صحاب الشركة يعني
الاء: هههه لا هو صاحب الشركة
لؤي بصدمة : عنجد
الاء : والله
لؤي : لكن ليش كذب انو بيشتغل بدبي وانو موظف بشركة
الاء : مشان اقبل فيه
لؤي : يعني اذا صاحب شركة مارح تقبلي فيه
تلبكت الاء وقالت : لأنو تقدملي بشخصيتو الحقيقة وانا رفضتو مشان هيك كذب علي
لؤي : وليش لترفضيه
نزلت راسها وقالت : لأنو متزوج
لؤي : شووو ... متزوج؟؟ ... نزلك ع ضرة
رفعت ايدها واشرت بالرقم ٢ ✌️ وقالت : ضرتين