رواية جوازة ميراث الفصل الحادي عشر11والثاني عشر12بقلم رانيا عماره
لميس(مصدومه) :ضياء؟؟
ضياء(ببرود) :كنتي فاكره نفسك هتهربي مني؟
••ولفلها الناحيه التانيه..وفتح الباب وشدها برا••
ضياء(بصوت حاد) :عايزه تهربي.. اهربي لواحدك!..لكن واخده هنا ويمنى معاكي ليه؟
لميس(بخوف) :انا..انا مش بهرب ولا حاجه.. انا كنت عايزه آخدهم ونغير جو كام يوم!
ضياء:ولما انتي عايزه تغيري جو مقولتيش ليه؟
لميس:انت مش خرجتني برا حياتك..يبقى آخد الاذن منك ليه؟
ضياء(بزعيق) :وكمان ليكي عين تردي؟..اسمع يا اسمك ايه انت..تاخد البنات وترجعهم البيت
لميس(بعياط) : لا ياضياااء متحرمنيش منهم..انا محتاجاهم!.. بلاش تعمل كده!...علشان خاطري!
ضياء(بسخريه) :خاطرك؟.. هاهاها..ومين قالك انك ليكي خاطر عندي؟..انتي انسانه خاينه..وانا الخاين بدوس عليه بـ جزمتي أفعصه زي الحشره!
لميس(بخوف) :انت فاهمني غلط..اديني فرصه افهمك!
ضياء(بزعيق) :مسمعش ولا كلمه!
••وسحبها..لحد عربيته..وبناته محدش فيهم قدر يتكلم نص كلمه!..وكانت لميس بتترعش من كتر الخوف!••
ضياء(بزعيق) :ادخلي جوا!!
••وبيزقها جوا عربيته، وهى بتصوت..والناس بتبص ومحدش قادر يتكلم خصوصاً ان شكله باين عليه زعيم مافيا! ••
لميس(بصويت) :الحقووني...حد يلحقني!!...علشان خاطري ياضياء.. طب بلاش علشان خاطري.. علشان خاطر أغلى حاجه عندك بلاش تعمل أي تصرف مجنون!
ضياء:هو انا مقولتلكيش؟.. أصل انا مليش غالي..ببيع اللي يبيعني في Minute
لميس(بصويت) :أبوس ايدك بلاش تعمل حاجه!
••وطلع بالعربيه وهى كانت بتصرخ!••
<عـنـد دالـيـدا>
••كانت قاعده مع رشاد بيتابعوا الشغل في المكتب..وكان أغلب الوقت مفيش شغل وقاعدين مش بيعملوا حاجه••
داليدا:انا خلصت يااستاذ رشاد
رشاد:طيب كويس..انا هطلب أكل..تاكلي ايه؟
داليدا:انا مليش نفس
رشاد:مانا كمان مليش نفس..بس احنا بناكل علشان نعيش مش بنعيش علشان ناكل!..تفرق!
داليدا:وهو حضرتك مين يجيله نفس يعيش بعد كل اللي بيحصل ده؟..انا عن نفسي بقيت جسد بلا روح..مش شايفه الدنيا ولا حاسه بيها
رشاد:علشان موت والدك؟
داليدا:أكيد...موت والدي هدني..بس اللي هدني أكتر..عمي وعياله..كنت فاكره انهم هيكونوا ضهري وسندي!..لقيتهم أول ناس بيإذوني..وبيتمنوا موتي!
رشاد:طيب وبتفكري تعملي ايه الايام الجايه؟
داليدا:انا لازم أقف على رجلي الأول..علشان ارجع حقي منهم واحد واحد!..أي حد يعرف داليدا..عارف كويس ان داليدا مش بتسيب حقها مهما يحصل.. انا كنت طول عمري قويه بس هما اتسببوا في وقوعي!
رشاد:دي حاجه كويسه انك مش بتسيبي حقك..بكرا يندموا
داليدا:دول هيندموا اووي.. الأيام لسه جايه..المهم اسفه لو دايقت حضرتك.. بس هو الكلام جاب بعضه!
رشاد:ممكن أطلب منك طلب يا داليدا؟
داليدا:اتفضل يااستاذ رشاد
رشاد:ممكن بلاش أستاذ رشاد دي تاني؟..انا شايف ان فرق السن بينا مش كتير!
داليدا:انا بقول كده احتراماً لـ حضرتك!
رشاد:وبلاش حضرتك دي كمان..داليدا احنا فرق السن مابينا سنتين بس!..فا ياريت نشيل الرسميات مابينا..هو اه الشغل شغل بس بلاش تكون دي الطريقه مابينا!
داليدا:خلاص زي ماتحب
رشاد:ماشي.. قوليلي هتاكلي ايه؟
<عـنـد مـايـا>
••كانت رايحه شادي في الجامعه..وفي الوقت ده كان شادي ابتدى يحبها!..واول ما شافها جايه من بعيد ابتسم! ••
شادي:عامله ايه يا مايا؟
مايا:الحمدلله ياشادي..انت اخبارك ايه؟
شادي:الحمدلله..عملتي ايه بتحضري؟
مايا:لا ده انا لسه جايه من البيت..هحضر محاضره واحده وهرجع تاني..الفتره دي مابقاش ليا نفس لأي حاجه..المود زفت اوي!..حتى مش عارفه لما أرجع البيت هكون أحسن ولا هدايق أكتر!
شادي:طب خلاص انا عندي فكره..ايه رأيك نخرج سوا في المكان اللي تحبيه؟
مايا:طب وفاكس المحاضره دي كمان ولا ايه؟ أصل بصراحه انا بتلكك
••ضحك شادي وهى كمان ضحكت••
شادي:طيب ودرجات أعمال السنه؟
مايا:يعني هما الدرجتين تلاته دول..هيعملوا اللي متعملش؟
شادي:انتي المفروض تخافي على مصلحتك أكتر من كده
مايا:اذا كان أهلي ذات نفسهم مش فارق معاهم مصلحتي..ومحدش فيهم مهتم بيا..يبقى أخاف انا ليه؟
شادي:لان دي مصلحتك انتي ومحدش هيخاف عليها غيرك
مايا:مش مهم..المهم المود يتظبط
شادي:طيب عايزه تخرجي فين؟
مايا:تعالى معايا وسيبلي نفسك خالص
شادي(مبتسم) :ماشي..اما نشوف هنروح فين!
••وخدته وهما خارجين..مايا شافت باباها مستنيها في العربيه..وأول ماشافته اتخضت••
شادي:ايه مالك في ايه؟
مايا:بقولك ايه انت متعرفنيش ها!
شادي:ومعرفكيش ليه..هو في ايه اصلاً؟
مايا:اسمع بس وانا هكلمك لما اروح.. اوكي؟
شادي:خلاص ماشي
••وراحت مايا ناحية العربيه••
والدها:اركبي
••ركبت مايا العربيه••
مايا:هاي يا بابي ازيك؟
والدها:مين اللي كنتي واقفه معاه هناك ده؟
مايا:ده زميلي في الجامعه..كان بيسألني على حاجه وقولتله معرفش
والدها:طيب..محضرتيش ليه؟
مايا(بتوتر) :عادي يا بابي..مكنش في محاضرات
باباها:ازاي مكنش في محاضرات..امال اللي داخلين دول.. داخلين يعملوا ايه؟
مايا:لسه ميعرفوش..اكيد لما يدخلوا.. هيعرفوا ان مفيش..ويمكن هما مش نفس الكليه ولا المدرج اصلاً!
باباها:ماشي..هاخدك ونطلع على جدتك عايزه تشوفك
مايا:اوكي
••ودَور العربيه وطلع••
<عـنـد سـامـي>
••راح العماره اللي فيها شقة عمه..وخبط على جارتها أم خالد..فا جه ابنها خالد وهو اللي فتح بنفسه••
خالد:انت مين؟
سامي:انا سامي ياعم انت نسيتني
خالد:ااه ازيك عامل ايه؟
سامي:مش تمام
خالد:ليه؟
سامي:اندهلي الحجه من جوا عايزها في كلمتين
خالد:طب خش
••دخل سامي ورا خالد وقعد على الكنبه..وخالد دخل ينده أمه من جوا وخرجوا••
ام خالد:ياالف اهلاً وسهلاً ده احنا زارنا النبي
سامي:داليدا راحت فين؟
ام خالد:داليدا؟
••وقعدت هى وابنها••
سامي:اه داليدا
ام خالد:طب وانا اعرف منين الكلام ده؟
سامي:يعني انتي مشوفتيهاش؟
ام خالد:لا مشوفتهاش
••راح سامي مطلع فلوس من جيبه واداها لـ خالد••
سامي:طب وكده؟.. ايه برضه متعرفيش؟
••ولما أم خالد لقيت ان فيها فلوس قررت تتكلم••
ام خالد:بص يابني هو انا اه معرفش مكانها.. لكن شوفتها وهى طالعه مع اختها.. وشويه ونزلوا بـ شنط وحاجات
سامي:متعرفيش راحوا في أي اتجاه؟
ام خالد:مقدرش أقولك
••راح سامي مطلع فلوس واداها لـ أم خالد••
سامي:اتكلمي وقوليلي مشيت من أي طريق!.. ده انتي ماشاءالله عليكي رادار المنطقه وعارفه كل حاجه من اولها لآخرها!
••بلعت أم خالد ريقها وبصيت لابنها بتردد..وبعدين قامت••
ام خالد:اطلع ورايا اوريك
••وخدته وطلعوا البلاكونه..ورفعت ايديها تشاورله••
. <فـلاش بـاك>
••كانت أم خالد بتراقب داليدا واختها من البلاكونه بعد مانزلوا من العماره••
____________.
ام خالد:مشوا من الشارع ده..وحودوا يمين
سامي:حلو اوي
••مشى سامي..وأم خالد خرجت وراه••
ام خالد:طب استنى اشرب حاجه طيب
سامي:لا مش عايز شكراً
••وبعد مامشى..قفلت الباب..وكان ابنها ماصدق انه مسك فلوس••
خالد:طب حلو.. ده انا كنت عايز اكمل حق المكنه ومش عارف
ام خالد(بزعيق) :لا بقولك ايه الفلوس دي بتاعتي..انت ملكش حاجه فيها!
خالد(بزعيق) :يعني ايه؟..هطلع من المولد بلا حمص؟..ده ابنك حتى ده بدل ماتساعديني وتقفي جنبي؟
ام خالد(بزعيق) :هات الفلوس دي.... هاات
••وشدتها من ايده بكل غل••
ام خالد:خد دول 200 جنيه.. مشي حالك
خالد(بزعيق) :وانا اعمل ايه بالـ200 جنيه دول؟..طب انتي ست كبيره وعايشه لواحدك..وانا عندي التزامات ومصاريف بعدد شعر راسي..وبرضه بخلانه عليا بدل ماتساعديني؟؟
ام خالد(بزعيق) :ده اللي عندي ان كان عاجبك.. ووسع كده من طريقي بلاش وجع دماغ..جاتكوا الهم
••وزقيته ودخلت المطبخ..وعند سامي كان مشى في الشارع اللي داليدا مشيت فيه..ودخل محل محل يسأل فيه••
سامي:بقولك مشوفتش بنتين معديين..واحده شابه والتانيه عيله عندها بتاع 13، 14 سنه ولا حاجه
_لا مشوفتش
••راح مطلع الموبايل ووراله صورتهم••
_لا مشوفتش برضه
سامي:طيب متشكرين
••وراح محل تاني••
سامي:السلام عليكم، اما بقولك ياحاج مشوفتش البنتين دول معديين من الشارع؟
=لا.. انت عايزهم في ايه؟
سامي:وانت مالك؟..سألت سؤال وانت رديت وخلصنا.. متكترش
••وخرج من المحل..وكان بيلف في كل المنطقه..لحد مادخل لواحد تاني••
سامي:مشوفتش الاتنين دول ياحاج؟
_مش دي داليدا بنت الحاج طاهر الله يرحمه؟
سامي:ايوه انت عارفها؟
_اه جات اشتريت مني كام مره
سامي:حلو اوي..مشوفتهاش من اسبوع كده..معديه من الشارع هنا؟
••وكان الراجل بيحاول يفتكر.. لحد ماافتكر لما كان قاعد مع صاحبه على القهوه وداليدا وأختها معديين وماشيين بسرعه! ••
_ايوه افتكرت..داليدا كانت ماشيه من هنا هى وأختها
سامي:حلو اوي تُشكر.. السلام عليكم
_وعليكم السلام ورحمة الله وبركاته
••وراح الموقف يسأل هناك••
سامي:بقولك ياسطا..مشوفتش البنتين دول من اسبوع؟
_انا بيعدي عليا اعداد كبيره كل يوم هفتكر مين ولا مين؟
سامي(بإحباط) :طيب
••ومشى وهو محبط، وكان نفسه يلاقي داليدا••
سامي:انا لما بحط حد في دماغي مش بسيبه إلا وانا جايب قراره..وانا مش هسيبك يا داليدا..اصبري عليا بس!
<عـنـد دالـيـدا>
••كانت قاعده مع رشاد في الشغل وبياكلوا••
رشاد:ايه رأيك في الأكل؟
داليدا:حلو اوي
رشاد:الحمدلله انه عجبك..عارفه ياداليدا..اكتر حاجه بتهون على الانسان..هى قربه من ربنا..انا حاسس اني ابتديت اشوف الدنيا على طبيعتها..رغم ان من كام يوم كانت الدنيا سوده في عيني.. بس اللي مستغربه ازاي حصل كل ده بسرعه كده!..المفروض أي حد مكاني كان هياخدله شهور لحد مايفوق بس من الصدمه!..مش عارف هل انا كده طبيعي؟..خايف انسى اللي حصل..استحقر نفسي واحس ان انا مليش غالي ولا عزيز..وخايف منساش افضل متعذب! داليدا انتي فاهماني؟
داليدا:أكيد فاهمه..هو يمكن عشان حضرتك مكنتش راضي عن الجوازه دي مثلاً؟
رشاد:مش قولنا بلاش حضرتك دي؟
داليدا:انا اسفه بس بنسى بجد!
رشاد:ولا يهمك...ماهو ده اللي بقوله لنفسي يمكن ده لإني مكنتش راضي عن الجوازه..بس ده ميمنعش ان انا تعبت جداً لما شوفت كل ده حصل قدام عينيا.. والمشكله هنا كل مابحاول أفوق بفتكر يوسف.. ويرجع قلبي يتقبض تاني!.. انا لو لقيت يوسف هرتاح!.. بجد هرتاح اوي!
داليدا:ولو لقيته هتكون مرتاح فعلاً ولا مجرد كلام؟
رشاد:بصراحه هكون مرتاح أكتر لما أرجع حق دينا وأهلها..ساعتها هقدر انام وانا قلبي مرتاح وراضي!
داليدا:طيب ليه مخدتش خطوه في انك تلاقيه؟
رشاد:يمكن علشان مش قادر اخد خطوه دلوقتي
داليدا:لو عايز تلاقيه فعلاً وترجع حق مراتك الله يرحمها..يبقى لازم تاخد خطوه من دلوقت وتقرر صح
رشاد:ده اللي انا هعمله..بس انتي شايفه يعني ايه اللي المفروض يتعمل؟
داليدا:انا في دماغي افكار كتير..تنفع لأعدائك ولأعدائي..هما الاتنين لازم يتشالوا من على وش الأرض ويعرفوا حجمهم قد ايه!
رشاد:يعني انا الد اعدائي هو ضياء لاشين..وانتي ألد اعدائك عمك ومراته وولاده..يبقى نربطهم ببعض!
داليدا:نربطهم ببعض ازاي؟
رشاد:نوقعهم في بعض بمعنى أصح
داليدا:مش يمكن يتفقوا علينا؟
رشاد:ايه اللي ممكن يخليهم يتفقوا علينا..إلا لو هما أصحاب مصلحه واحده!
داليدا:قصدك يعني اننا نخليهم مصالحهم عكس بعض؟
رشاد:بالظبط
داليدا:ازاي برضه؟
رشاد:ماهي دي بقى محتاجه تخطيط،انا مبحبش اسيب حقي
داليدا:ولا انا بحب اسيب حقي!
••بص رشاد لـ داليدا..بصة انتقام من اعدائهم!••
<عـنـد ضـيـاء>
••كان رابط لميس في العمود..في مكان ضلمه..ووقف بعيد وطلع المسدس من جيبه••
لميس(بخوف) :انت هتعمل ايه؟..اوعى تعمل حاجه ياضياء!
ضياء(ببرود) :متخافيش مش هموتك
••ابتسمت لميس وحسيت بإطمئنان••
ضياء:انا هخليكي تعيشي حياتك ميته
••وضربها رصاصه في كتفها!..وواحده في رجليها..صرخت صرخه قويه..وأغم عليها!.. وهو قرب منها وشدها من شعرها بكل غل••
ضياء(بعصبيه) :هندمك عليا بقيت حياتك يا لميس..ياخساره..ياخسارة كل حاجه..خااااينه..زباااااله!!!
••وبعدين حط المسدس في جيبه..ومشى من المكان••
<عـنـد مـصـطـفـى>
••كان قاعد في البلاكونه وملامحه حزينه وباهته..وكانت دماغه مش مرتاحه من كتر التفكير..كان بيكدب نفسه وبيقول اللي شافها مش مروه!..نزلت دموعه غصب عنه••
مصطفى:انا مش عارف انتي اتخطفتي ولا لا!..طب لو كل ده فيلم روحتي فين؟.. وبتعملي ايه؟..وايه الدافع اللي يخليكي تعملي كل ده!..وعلشان ايه ومين؟..انا بكدب نفسي مع ان شايف كل حاجه قدام عينيا..طب قدرتي تمثلي عليا انا.. طب ووالدتك مثلتي عليها هى كمان ليه؟..وعلشان ايه انا نفسي افهم!..ده انا مابقتش انام الليل!..وبقيت مقصر في شغلي وحياتي!..حتى مكانك مش عارف اوصله!
••وبعدين فكر انه يروح المكان اللي راحه هو ورشاد قبل كده ويفهم هى علاقتها ايه بيه وكانت بتروح ليه؟..لحد ما لبس هدومه وركب عربيته وراح هناك!..ونزل من العربيه..وكانت عينيه باصه لكل حته..عايز يروح وخايف!..لحد ما دخل ولقى بودي جارد واقف قدامه.. بيزقه لـ برا••
_رايح فين؟؟
مصطفى:عايز ادخل جوا
_تدخل بصفتك مين؟..وريني بطاقتك!
مصطفى:مروه بتعمل ايه عندكم وايه علاقتها بيكم؟
_مروه مين؟ وتخصك في ايه؟
مصطفى(بزعيق) :ليه هو في كام مروه جوا؟؟..انا عايز اعرف مروه علاقتها بيكم ايه! وايه اللي بيجيبها عندكم!..انطق!!
_امشي من هنا..وإلا هتندم ندم كبير اووي
••وطلعله المسدس ورفعه في وشه..راح مصطفى ضحك••
مصطفى:نزل البتاع ده
_امشي من هنا!!
مصطفى(بزعيق) :مش همشي غير لما اعرف!!
••راح البودي جارد شد الاجزاء، وضرب مصطفى في رجله..وقع مصطفى على الأرض وهو بيتألم وبيصرخ••
_لو ممشيتش دلوقتي انا هضربك في الرجل التانيه!!يلااااا
••فضل مصطفى يزحف على الأرض لحد ماوصل لـ عربيته وهو بيموت من الألم..لحد مافتح الباب وركب..واتصل بـ رشاد••
مصطفى(بتعب) :اااه... اااه... الووو.. الحقني يارشاد انا...اتض..اتضربت بالنار في رجلي!!
رشاد(مصدوم) :يانهار اسود ومنيل!!..ازااي؟؟..انت فين؟؟
داليدا:في ايه؟
مصطفى(بتعب) :مش قادر يا رشاد...هبعتلك اللوك.. اللوكيشن.. ااااه
••والسكه اتقفلت..وكان رشاد ماسك موبايله زي المجنون.. لحد ما اتبعتله اللوكيشن..وراح عند مصطفى••
رشاد:مصطفى
••وفتح باب العربيه وشده وهو مرعوب على أخوه! ••
رشاد(بخوف) :مالك.. فيك ايه؟؟
••وبيبص على رجله لقاها منزله دم..مغرق العربيه!..راح ضارب ايده على جبينه من الصدمه!!..وابتدا يزعق••
رشاد(بزعيق) :ايه اللي جابك هنا؟؟.. ومين اللي عمل كده؟؟
مصطفى(بتعب) :مش وقته.. وديني... المستشفى!
رشاد:حاضر...براحه
••ونزله ووصله للكنبه التانيه..وركب وساق بداله لحد ماوصلوا المستشفى..وأول حاجه عملها دخل ريسيبشن المستشفى••
رشاد:الحقوو معايا واحد واخد رصاصه.. بسرعه
••رجع رشاد ومعاه الدكاتره..وشالوا مصطفى ودخل العمليات..وبرا كان رشاد رايح جاي على أعصابه..لحد ماطلع موبايله واتصل على باباهم••
رشاد(بعصبيه) :ابنك اتضرب بالنار وانت ولا هنا!!..انا مش عارف اعمل ايه وكل يوم بيقع واحد مننا.. هما عايزين مننا ايه؟؟
والد رشاد(مصدوم) :مصطفى ماله؟
رشاد(بعصبيه) :بقولك اتضرب بالنار!!.. دي بقيت عيشه زباااله..انا مش هسمح لحد انه يإذينا تاني.. هو احنا ملطشه للـ يسوا واللي ميسواش ولا ايه؟؟والله لأعرفه مقامه
والد رشاد(بزعيق) :انت بتتكلم عن مين ياولد انت؟
رشاد(بعصبيه) :هو في غيره اللي طايح فينا كلنا؟..ده زاد فيها قتل مراتي وأهلها.. وخطف ابني..وكمان مصطفى مسلمش من اذاه؟؟
والد رشاد(بزعيق) :انتوا فين؟ قولي مكانكم بسرعه!
<عـنـد سـامـي>
••كان لف كتير وموصلش لإجابه..لحد مارجع البيت تاني••
حسناء:مالك ياسامي..وشك مقلوب ليه؟
سامي:انا مش لاقي داليدا ومش عارف اوصلها!
حسناء:يالهوي هو انت من صباحية ربنا وانت بتلف كل ده علشان تدور عليها؟
سامي:مانا مش هسكت إلا لما اوصلها!!
حسناء:طب اقعد ارتاح..شكلك جايب آخرك
سامي:ده انا مقتول مش جايب أخري بس
••وقعد على الكرسي••
حسناء:طيب انا هدخل اسخن الأكل وناكل كلنا
سامي(بتعب) :ماشي
••خرجت صفاء من اوضتها وهى بتلعب في شعرها..وبتغني••
حسناء(بتغني) :حبيته بيني وبين نفسي، وما قلتلوش عـ اللي في نفسي ما أعرفش إيه بيحصل لي لما بشوف عينيه ما بقتش عارفة أقوله إيه، ما أعرفش ليه خبيت عليه بضعف أوي وأنا جنبه وبسلم عليه
سامي(بعصبيه) :هو مين ده ياروح امك؟
صفاء:ايه في ايه؟.. انا بغني عادي
سامي:بتغني عادي برضه ولا بتحبي على نفسك ياصايعه؟
صفاء(بزعيق) :احترم نفسك وإلا هقول لـ بابا لما يرجع!
سامي:ماتلمي نفسك بدل ماارزعك على وشك بالايد!
صفاء(بزعيق) :يووه ماتيجي تقولي حاجه ياماما!!.. ياماماااا
••طلعت حسناء من المطبخ على زعيقهم••
حسناء:في ايه؟
صفاء:ابنك نازل غلط فيا من ساعتها!!
حسناء:ليه كده ياسامي؟
سامي:السافله عماله تغني وواقعه في شوشتها اوي
صفاء(بزعيق) :متقولش سافله!!
حسناء:اهدوا وبطلوا خناق..مفيش حاجه مستاهله..وانتي ياصفاء تعالي اغرفي معايا الأكل
صفاء(بزعيق) :هاتيلي حقي الاول وبعدين هدخل معاكي!
سامي(بزعيق) :حقك من مين يابت؟؟
••وراح قايملها وهو متعصب••
سامي(بزعيق) :ماتقولي حقك من مين؟ انطقي!
صفاء(بزعيق) :يووه ابعد ايدك عني!
حسناء(بزعيق) :اسكتوا بقى متصدعونااش.. هو انتوا عيال صغيره لما هتعملوا الحركات دي؟
صفاء:قوليله!
سامي:يابت هرزعك كف!
صفاء:يووه
حسناء:تعالي معايا بس... تعاالي!
••وشدت صفاء ودخلت المطبخ، وصفاء لسه بتنفخ••
<عـنـد رشـاد>
••جه باباهم ومامتهم وأختهم،وكانت مامت مصطفى بتعيط!••
سلمى:ان شاء الله خير ياماما..اهدي بس!
عائشه(بعياط) :والله يابنتي احنا ما حِمل كل ده!..كده كتير اوي!
سلمى:هيبقى كويس ان شاء الله
عائشه:يارب!
والد رشاد:اخوك دخل من قد ايه؟
رشاد:من نص ساعه
••و فضلوا مستنين 10 دقايق كمان، وخرج الدكتور من أوضة العمليات..وأول ماخرج كلهم جروا عليه••
عائشه:ايه يادكتور طمنا!
والد رشاد:مصطفى عامل ايه دلوقتي؟
الدكتور:للاسف حصله شلل في الرجل المصابه
الفصل الثاني عشر
عائشه(بصويت) :قول كلام غير ده يادكتور!!..يعني ايه؟ ابني هيعيش طول حياته عاجز!!..ليه كده ياااارب ليييه؟؟؟
الدكتور:انتي ست مؤمنه بالله..والمؤمن دايماً مصاب..يمكن ربنا يشفيه مفيش حاجه بعيده على ربنا..شدوا حيلكم
••وسابهم ومشى..وانهارت عائشه هى وسلمى أخته..ورشاد كان مصدوم هو وابوه وحاسس انه بيحلم!••
رشاد(بعصبيه) :لييه كل ده.. ليه؟؟؟
••وخبط ايده في الحيطه من كتر العصبيه!••
عائشه(بعياط) :احنا مكانا مش في الدنيا دي!..احنا جينا وسط ناس مابترحمش!..دول لا يمكن يكونوا بشر ابداً!!..دول كفره...والله العظيم كفره!!
••وزاد عياطها أضعاف!..وكانت سلمى بتطبطب عليها تواسيها..وفجأه رشاد قرر انه يروح يبلغ الشرطه عن المكان ده ويحكيلهم كل اللي حصل••
والد رشاد(بحزن) :رايح فين يارشاد؟والمصيبه اللي احنا فيها دي؟
رشاد:انا مش هسيب حق حد منكم!..لازم اللي بيحصل ده يكون له نهايه!!
عائشه(بعياط) :يااارب...يااارب
<عـنـد دالـيـدا>
••كانت بتتصل بـ رشاد مبيردش..وفجأه لقيت فريده راجعه من الدروس بشنطتها••
داليدا:عملتي ايه؟
فريده:دفعت فلوس الدرس..بس مستر درس الانجلش طالب الفلوس من كله وانا هيبقى شكلي وحش لو مدفعتهاش الحصه الجايه
داليدا:ان شاء الله المره الجايه هتروحي وانتي معاكي الفلوس ياحبيبتي..اقعدي
••قعدت فريده قصادها••
داليدا:طبعاً مكلتيش حاجه
فريده:اشتريت شيبسي
داليدا:خلاص ان شاء الله هبقى اعملك ساندوتشات تاخديها معاكي تكفيكي لحد آخر اليوم علشان متتعبيش
فريده:ماشي..هنمشي امتى؟
داليدا:انا بتصل بـ رشاد مبيردش..شكل في مشكله حصلت!
فريده:يعني هنفضل قاعدين لحد مايرجع؟
داليدا:لا.. هو قالي انتي آخرك الساعه ٩..ودلوقتي ٨ونص..هنستنى نص ساعه كمان حتى انا عايزه اشتري حاجات كتير للبيت
فريده:انتي معاكي فلوس لكل ده؟
داليدا:ايوه الحمدلله..لحد مانشوف موضوع ورث بابا الله يرحمه
فريده:محدش هيرضى يدينا حاجه ياداليدا
داليدا:هيدونا غصب عنهم.. ده حقنا ياحبيبتي!!..نسيبهم ياكلوا حقنا ويتهنوا بيه واحنا هنا مذلولين؟
فريده:الناس دي بجد وحشه اوي
داليدا:هما وحشين بعقل؟..دول شياطين.. فعلاً اللي تفكره موسى يطلع فرعون..واحنا اتخدعنا فيهم وفكرناهم الضهر والسند..طلع مفيش لا ضهر ولا سند إلا ربنا!
<عـنـد ضـيـاء>
••كان قاعد في جنينة الفيلا لقى بناته الاتنين جايين..وملامحهم باين عليها الخوف••
يمنى(بخوف) :انت عملت في مامي ايه؟
هنا:حقك يا بابي..ماهو اصل انا سمعتها كتير وهى بتتكلم مع رجاله تانيه غير اونكل مجدي
••قام ضياء وهو مبرق!..وابتدا يزعق••
ضياء:انتي عرفتي الكلام ده منين؟؟
هنا:هكرت الواتس آب بتاع مامي
ضياء(بزعيق) :يعني ايه كانت بتكلم رجاله تانيه غير مجدي؟.. انتي عرفتي كل ده ازاي؟؟
هنا:من هنا يا بابي...انا هوريك
••وطلعت الموبايل ووريته الواتس آب بتاع لميس••
مجدي(بزعيق) :اعمل فيكي ايه يا لميس اكتر من اللي عملته؟؟..مانا مش مالي عينك!!..وريني الموبايل ده.. هااتي!
••وشد الموبايل منها..وقلب في الشات..وكانت لميس على علاقه بأكتر من ٣ أشخاص..ولما دخل شات واحد منهم..شاف كلامها عنه••
لميس:مبحبوش ولا بطيق أشوفه قصادي..أعصابي بتسيب وبتعب نفسياً..ضياء ده المفروض يبوس ايده وش و ضهر ان انا رضيت اتجوزه..لولايا مكنتش واحده بصيت في وشه
_عندك حق انا شوفت صوره جالي قرفه..الله يكون عونك مستحمله معاه كل ده ازاي!..انتي اللي زيك المفروض تتشال على الراس وتعيش مع واحد شبهها
••وبعد ما ضياء شاف المسدجات..اتجنن ورمى الموبايل على الأرض..وراح يركب عربيته ومشى••
يمنى(بزعيق) :ايه اللي انتي قولتيه ده؟؟..انتي اتجننتي؟؟..انتي بجد مش طبيعيه علشان تفضحي مامي!!
هنا(بزعيق) :اسكتي خالص مانتي مشوفتيش اللي انا شوفته..انا شوفت الأكتر من كده بكتير..بس خليني ساكته أحسن
يمنى(بقرف) :انا استحقرتك بعد اللي عملتيه..انتي ملكيش أمان..ولا يمكن الواحد يدي سره ليكي مهما حصل!
••وسابتها ومشيت..وهنا واقفه بكل برود وبتضحك••
<عـنـد رشـاد>
••راح القسم..يعمل بلاغ..بكل حاجه حصلت••
الظابط:اتفضل
••قعد رشاد وكان باين عليه التعب••
رشاد:انا عايز اعمل محضر
الظابط:محضر لـ ايه؟
رشاد:حضرتك عارف ان مصطفى جه لـ حضرتك من فتره يعمل بلاغ بـ خطف مراته..المشكله هنا ان انا شوفتها واتصلت بيه قولتلهم حصل 1 2 3...ولما عرف جالي على المكان.. مكان مريب ومحدش فاهمله حاجه..دخلنا جوا وكل اللي هناك شكلهم مافيا من لبسهم ومشيتهم...كان مصمم يعرف مراته بتعمل ايه جوا
الظابط:يعني مراته دخلت المكان ده؟.. وانت شوفتها وهى داخله؟
رشاد:انا شوفتها داخله محل هى وواحده..ولما مصطفى جالي..مشينا وراهم لحد المكان اللي قولته لـ حضرتك..وبعدين دخلنا
الظابط:يعني انت شوفتها ومتأكد انها هى؟
رشاد:ايوه طبعاً ولو انا عيني خانتني فا مش هتخون مصطفى هو كمان..والنهارده لقيت مصطفى بيكلمني وهو تعبان وبيقولي انه اتضرب بالرصاصه في رجله..وبالفعل روحتله ولقيته سايح في دمه!..في نفس المكان اللي شوفنا مروه داخله فيه!
الظابط:وايه اللي ودى مصطفى هناك؟
رشاد:هو مقالش بس من فهمي للي حصل..هو راح لتاني مره علشان يتأكد من اللي في دماغه..وأكيد حد من الموجودين..هو اللي اتسبب في كل ده.. مصطفى لما بيحط حاجه في دماغه مش بيهدى إلا لما يعملها وهو كان حاطط الموضوع ده في دماغه اوي
الظابط:حاضر هنفتح محضر بس اديني دقايق
رشاد:اتفضل
<عـنـد صـفـاء>
••كانت لابسه وخارجه..ولـ سوء الحظ كان سامي أخوها قاعد في الصاله••
سامي:رايحه فين؟
صفاء:رايحه لـ واحده صاحبتي..أصلها تعبانه وعامله عمليه.. ادعيلها دي حالتها وحشه اوي
سامي:وانتي سايبه طول اليوم..وجايه تخرجي دلوقتي؟..انتي عارفه الساعه كام دلوقتي؟
صفاء:هى نص ساعه.. ده مشوار صد رد
سامي:وابوكي عارف الكلام ده على كده؟؟
صفاء:اه عارف وأمي عارفه ومحدش فيهم بيتكلم غيرك..ده واجب عليا ولازم أقضيه..الا الناس تاكل وشي!
سامي:شوفيها بكرا بالنهار..أيام ربنا كتير الحمدلله
صفاء:مينفعش ده انا قولتلها ان انا جايه كده هيبقى شكلي وحش اوي ياسامي..سيبني بس وهو مشوار على السريع..أما قولي مش عايز حاجه اجيبهالك معايا؟...طيب سلام علشان اتأخرت
••وسابته ومشيت قبل ماينطق بأي كلمه!..وده اللي خلاه يشك فيها وقرر انه يمشي وراها! ••
حسناء:رايح فين ياسامي؟
سامي:نازل القهوه لـ صحابي
حسناء:طيب هاتلي معاك كيس عيش وانت جاي
سامي:طيب.. سلام
حسناء:مع الف سلامه
••وفتح باب الشقه وخرج••
<عـنـد دالـيـدا>
••خدت أختها وراحوا هايبر ماركت،يشتروا منه كل اللي ناقصهم من خضار وفاكهه ولحوم وجبن••
فريده:يفرض الفلوس مكفتش؟
داليدا:لا هتكفي ان شاء الله..احنا هنجيب الحاجات الضروريه مش عايزين نشتري حاجات كتير
فريده:عايزين فراخ ولحمه و مكرونه ورز
داليدا:و جبن وعيش
فريده:بس انا حاسه ان الحاجات دي هتطلع غاليه
داليدا:ان شاء الله الفلوس هتكفي وزياده..البيت فاضي بقاله اسبوع يا فريده..هو اه رشاد كان بيبعت اكل بس ميكفيش للبيت..روحي هاتيلي إكياس من هناك
فريده:حاضر
••وجابت الأكياس ورجعت..وكانت داليدا بتنقي الخضار والفاكهه وبتحاول تجيب من كل حاجه بس بكميات قليله علشان الفلوس تكفي!••
داليدا:عايزه عيش بلدي ولا فينو؟
فريده:فينو أحسن
داليدا:ماشي
<عـنـد مـصـطـفـى>
••دخلوله الأوضه..وكان فايق بس باين عليه الحزن..ومامته مكنتش مبطله عياط••
مصطفى:متخافيش عليا.. انا كويس
عائشه(بعياط) :ازاي مخافش عليكم؟..ده انتوا ولادي..حته مني!.. واللي يمسكم يمسني!..ازاي مخافش بس يابني..ده انت واخوك اتدمرتوا!!..انا الود ودي اهرب بيكم لـ بعيد!..بيبقى هاين عليا اقطع اللي يزعلكم بـ ايدي واسناني!
والد رشاد:انت ايه اللي وداك هناك يامصطفى..وليه حصل كل ده؟
مصطفى(بحزن) :كنت هموت واعرف مروه علاقتها ايه بالمكان ده!
عائشه(بعياط) :وانت عرفت حاجه؟..لأ معرفتش!..بالعكس ضربوك بالنار..عجزوك يابني!!
سلمى:ليه بتتكلمي ياماما بس؟؟
مصطفى:عجزوني ازاي؟
••بصوا التلاته لـ بعض وسكتوا••
مصطفى(بعصبيه) :عجزوني ازاي!!!..انا حصلي ايه؟؟
عائشه(بعياط) :رجلك ات..
••ولسه بتكمل الجمله..راحت سلمى حاطه ايديها على بؤها••
سلمى:لا ياماما متتكلميش!!
مصطفى(بيضحك) :خلاص!..انا فهمت!..رجلي ضاعت.. مش كده يا بابا؟
والد رشاد:لا ياحبيبي ان شاء الله هتتعالج..مفيش حاجه بعيده عن ربنا
مصطفى(بيضحك) :كنت عارف..بس عادي!..ايه اللي حصل يعني؟..ولا أي حاجه.. مانا كنت عايش ميت..ايه اللي جد؟
عائشه(بعياط) :لا ياحبيبي متقولش كده..ربنا يفرحك بـ شبابك انت واخواتك..ويخليكوا ليا
مصطفى(بضحكة سخريه) :شبابي؟..ااه ممكن برضه!
••وبدل ما كان بيضحك بـ سخريه..بقى يعيط••
مصطفى(بعياط) :شبابي اتهد..وحياتي اتدمرت انا ورشاد..بقينا شبه التماثيل..حسبنا الله ونعم الوكيل!
والد رشاد:اوعى تعمل في نفسك كده!!..حقكم هيرجع وانا اللي هرجعه
••وكان بيتكلم بكل ثقه!كأنه عارف هيعمل ايه! ••
<عـنـد صـفـاء>
••كانت ماشيه في الشارع هى والولد اللي اتعرفت عليه في المركب••
رجب:يعني انتي مفهماه انك عند واحده صاحبتك؟
صفاء:ايوه بس حاسه ان الكلام ده مدخلش عليه..كأنه مش مصدقني ولا مقتنع باللي بقوله
رجب:حقه ميصدقكيش..هو في واحده تخرج دلوقتي برضه إلا لو هى رايحه تقابل واحد مش واحده؟
صفاء:في ايه يارجب متحسسنيش ان انا وحشه!..انا عملت كده عشان زهقانه وعايزه اغير جو.. ولعلمك انا كنت ممكن اخرج من غيرك عادي انت بس اللي شبطت في الخروجه
رجب:وانا مقدرش اسيبك تخرجي لواحدك..يفرض حد دايقك.. اعمل ايه ساعتها؟
صفاء:يدايقني؟... ههههه انت متعرفنيش
رجب:انا لسه بعرفك..بس معرفة الخير ان شاء الله
صفاء:ان شاء الله..اما قولي انت ليه متجوزتش لحد دلوقتي؟
رجب:علشان مش لاقي بنت الحلال.. بس شكلي خلاص لقيتها
صفاء(بتريقه) :ولقيتها فين ان شاء الله؟
رجب:لا بعدين هقولك..بس لما اظبط الدنيا الأول..ماهو أصل بنات الناس مش لعبه
صفاء:عندك حق
رجب:وانتي متجوزتيش ليه لحد دلوقتي؟
صفاء:اتجوز وأبلي نفسي بواحد واعيشله خدامه؟..ده انا قاعده في بيت اهلي معززه مكرمه..ويوم ماافكر اتجوز بس لازم يشيلني على كفوف الراحه..ماهو أقل من عيشتي مش هقبل
رجب:طب ولو جالك اللي يعيشك معززه مكرمه هتعملي ايه؟
صفاء:هوافق طبعاً
رجب:يبقى على بركة الله..تشربي ايه؟
صفاء:هاتلي مانجا
رجب:من عينيا الاتنين..اديني ثواني
صفاء(مبتسمه) :اشطاا
<عـنـد دالـيـدا>
••اشتروا اللي هما عايزينه ودفعوا..وهما ماشيين..داليدا خدت اختها ودخلوا محل تشتريلها شوية حلويات••
فريده:انا عايزه دونتس
داليدا:لو سمحت هاتلنا 4 دونتس..واتنين من دي
_دي؟
داليدا:لا اللي هناك جنبها
فريده:مش هنجيب حاجه تاني بقى..انتي صرفتي فلوس كتير!
داليدا:حاضر..انا بس مش عايزه احرمك من أي حاجه!..الفتره اللي فاتت كانت صعبه اوي علينا
فريده:فعلاً.. ربنا يخليكي ليا ياداليدا
داليدا(مبتسمه) :ويخليكي ليا يارب
••وراحوا يدفعوا تمن الحاجه••
داليدا:كام؟
_130 جنيه
داليدا:اتفضل
••وخدت الحاجه ومشوا..وأثناء ماهما ماشيين..شافوا خناقه على أول الشارع..وكانت الناس ملمومه••
داليدا(مستغربه) :هو ايه اللي بيحصل هناك ده؟
فريده:مش عارفه
••ولما قربوا.. لقوا واحد بيضرب واحده وبيتخانق مع واحد••
سامي(بزعيق) :بتستغفليني يا صفاء؟..بتضحكي عليا يابنت الكلب ياكدابه
صفاء(بصويت) :اوعى.. انت ملكش حكم عليا..انت اخويا مش ابويا.. ملكش دعوه بياا
سامي(بزعيق) :ده انا هفرمكم انتوا الاتنين تحت عربيتي ياصايعه ياضايعه يالي مش لاقيه حد يلمك
رجب(بزعيق) :ماتحترم نفسك ياجدع..وبلاش تسوء فيها ألا وربنا انا اللي هفرمك.. مانت متعرفنيش كويس
••وبما ان داليدا فيها طبع الجدعنه..لما قربت منهم قررت تدخل..وتبعدهم عن بعض••
داليدا:ابعد عنها!!..انتوا ايه هتفضلوا صنف زبا....
••ولسه بتكمل كلامها اكتشفت ان ده سامي واخته صفاء..وأول ماشافته تنحت ورجعت بضهرها لـ ورا.. وهو ساب الخناقه وطلع يجري وراهم••
داليدا(بصويت) :اجري بسرررعه
فريده(بصويت) :انا خايفه ياداليدا!
داليدا:متخافيش!
••وطلعوا يجروا وسامي بيجري وراهم••
سامي(بزعيق) :داليدااااا...داليدااااا.. استني عندك!!..اقفي بقولك!
••ولكن داليدا هربت منه هى وأختها ومعرفش يوصلهم••
سامي(بعصبيه) :اااااااه ماااااشي
••ورجع تاني وهو متعصب على آخره..وكانت صفاء في الوقت ده في طريقها للبيت••
فريده(بعياط) :انا بقيت اخاف اخرج!!
داليدا:انا شكلي همشي من هنا خالص!..مابقاش ينفع نستنى هنا تاني!!
فريده:هو أكيد عرف مكانا.. وهيرجع تاني!
داليدا(بصويت) :مايسيبنا في حالنا بقى!!.. ايه القرف ده!!.. هو عايز مننا ايه؟؟. مش مكفيهم كل اللي عملوه..وكمان مش عاجب بعد كل اللي حصل؟
فريده(بعياط) :انا خايفه الا يعملوا حاجه فينا!!
داليدا:متخافيش ان شاء الله مش هيحصل حاجه!
••وحضنت اختها..وبعدين طلعوا ودخلوا شقتهم وقفلوها عليهم كويس••
<عـنـد صـفـاء>
••رجعت من برا وهى مرعوبه وبتعيط..ودخلت أوضتها وقفلت على نفسها كويس..جات حسناء وهى مستغربه وخبطت عليها••
حسناء:في ايه ياصفاء مالك؟
صفاء(بعياط) :سامي جاي دلوقتي..ابعديه عني ياماما..سامي ضربني في الشارع وفضحني وسط الناس
حسناء(بصويت) :يانهار اسود هى حصلت انه يضربك؟..الولا ده لازم يقف عند حده
صفاء(بصويت) :علشان خاطري ابعديه عني.. اعملي اي حاجه المهم تبعديه
حسناء(بزعيق) :هو ايه اللي حصل لكل ده؟
••لقيت سامي داخل وهو متعصب وبيزعق••
سامي(بزعيق) :الصايعه رجعت مش كده؟؟..بنتك دي فضحتنا وخليت راسنا في الطين!.. الزباله الواطيه بتقولي رايحه لـ صاحبتها وهى رايحه تقابل واحد!!
حسناء(بزعيق) :وطي صوتك..الناس هتسمع!..ايه الكلام العبيط اللي انت بتقوله ده؟
سامي(بزعيق) :علشان بقول الحق.. بقى كلامي عبيط؟؟..افتحي يازباله...ده انا هكسر عضمك
••وكان بيخبط على الباب بكل عنف، وهى جوا بتعيط لحد ما ماهر رجع من برا••
حسناء:احترم نفسك وملكش دعوه بـ أختك!
ماهر:في ايه؟؟
سامي:الزباله كانت بتقابل واحد ومفهماني انها رايحه لـ صاحبتها
ماهر(بزعيق) :احترم نفسك ومتتكلمش كده على اختك..انت هتسوء سمعتها وسط الناس؟..بدل ماتداري على عرضك؟
سامي(بزعيق) :اداري عليها ولا قصدك اطبلها...المره الجايه هبقى اسقفلها من بعيد...بنتك هتجيبلنا العار!!
ماهر(بزعيق) :اطلع شقتك يلااا... يلاااا اطلع متتنحش!
سامي(بزعيق) :مش طالع..وبنتك دي لازم تلاقيلها حل..واااه صحيح..انا شوفت داليدا واختها..وجريت وراهم بس خلعوا مني.. بس بإذن الله بكرا الصبح هروح المنطقه واسأل عليها في كل حته لحد مااوصلها
حسناء:شوفتها ازاي وامتى؟
سامي:شوفتها وقت الخناقه..ولما شافتني كأن لبسها عفريت..وهربت بس مش عليا انا..هجيبها لو في آخر الكون
ماهر:بكرا الصبح انا جاي معاك.. بس اطلع شقتك وكفايه فضايح.. مش عايزين الناس تاكل وشنا
حسناء:اسمع كلام أبوك يابني..واطلع..الصباح رباح
••بصلها سامي بتردد وبعدين راح طالع••
<عـنـد رشـاد>
••رجع المستشفى بعد ما عمل محضر..وكان مصطفى نايم وقاعدين برا••
رشاد:مصطفى عامل ايه دلوقت؟
والد رشاد:اهو نايم..ربنا يشفيه ويعافيه
رشاد:يارب..طيب يلا ياماما علشان تروحوا.. انا هبات معاه هنا
عائشه:قلبي مش مطاوعني امشي واسيبه
رشاد:مانتي هتجيله بكرا ان شاء الله..تعالي اوصلكم
سلمى:يلا ياماما
••قامت عائشه..ورشاد خدهم يوصلهم..وأثناء ما هو كان سايق فتح موبايله واكتشف ان داليدا اتصلت بيه كتير..راح متصل بيها••
رشاد:الو ياداليدا.. انا اسف ان مردتش
داليدا:ولا يهمك..حضرتك كويس؟
رشاد:لا..هحكيلك بعدين.. انتي روحتي أكيد
داليدا:ايوه
رشاد:هو في حاجه ياداليدا؟
داليدا:لا كله تمام
رشاد:خلاص هكلمك تاني
داليدا:ماشي باي
رشاد:سلام
•• وشويه وكانوا وصلوا••
رشاد:خدوا بالكم من نفسكم
عائشه:حاضر يابني وانت كمان
رشاد:حاضر
<عـنـد صفاء>
••بعد مااخوها طلع فوق..كانت لسه بتعيط لحد ما حسناء دخلتلها وقعدت جنبها على السرير••
حسناء:الكلام اللي قاله اخوكي ده بجد؟
صفاء(بعياط) :اه بجد..بس رجب ده مجرد معرفه ومفيش بيني وبينه حاجه.. وكل اللي سامي عمله مكنش له لازمه!
حسناء:طب وانتي عرفتيه منين؟
صفاء:كنت في المركب واتعرفت عليه..وبعدين ده واد محترم..مش من الناس إياهم
حسناء :خفي تعامل معاه..انتي عارفه اخوكي مجنون ويعمل أي حاجه بدل ما في مره من المرات يعمل فيكم حاجه!
صفاء(بعياط) :سامي مالوش حكم عليا..خليه بس يتشطر على داليدا الأول..ولا هو مش قادر يتشطر عليها فا جاي عليا انا؟
حسناء:سيبك من داليدا وخلينا فيكي..وياخايبه لما تحبي تخرجي..خليها بالنهار..لكن مش في إنصاص الليالي انتي كده خلتيه يشك فيكي اكتر
صفاء:اهو ده اللي حصل بقى
<عـنـد دالـيـدا>
••كانت واقفه في المطبخ بتجهز الأكل رغم ان نفسيتها متدمره اوي!..لقيت رشاد بيتصل بيها••
داليدا:الو يارشاد
رشاد:طبعاً انتي كنتي عايزه تعرفي ايه اللي حصل!
داليدا:اه
رشاد:وقت مانا مشيت..كنت عند اخويا مصطفى..اتضرب بالنار
داليدا(بصدمه) :يانهاار!! ده بجد؟؟.. ازاي طيب؟
رشاد:مروه مراته شكلها ورا حاجات كتير...بس قريب هنعرف
داليدا:ألف سلامه على أستاذ مصطفى..ربنا يقومه بالسلامه
رشاد:الله يسلمك ياداليدا
داليدا:ان شاء الله هيكون بخير
رشاد:ان شاء الله..قوليلي بقى في ايه؟
داليدا(بتنهيده) :سامي كان بيطاردني من شويه انا وفريده اختي..هربت منه على آخر لحظه!.. بجد انا مابقتش حاسه بالأمان..لدرجة ان انا بفكر اسافر محافظه تانيه
رشاد:لا ده قرار مش صح..طيب هو عرف مكانك؟
داليدا:لا بس عرف المنطقه اللي انا فيها
رشاد:دي مشكله كبيره لانه ممكن يجي تاني علشان يعرف انتي في أي عماره!
داليدا(بحزن) :مانا علشان كده بفكر أمشي من المحافظه كلها..المهم متشغلش بالك كفايه اللي انت فيه
رشاد:الحال من بعضه يا داليدا..ربنا يحلها
داليدا:يارب
رشاد:متدايقيش نفسك أكيد ليها حل
••ولسه بيكلمها لقيت حد بيخبط على باب الشقه••
داليدا:أكيد إن شاء الله..دقيقه خليك معايا
••وبصيت من العين السحريه!••