رواية جوازة ميراث الفصل الحادي والعشرون21والثاني والعشرون22بقلم رانيا عماره
••بعد ما مروه قتلت امها..كانت في حالة صدمه شديده من اللي عملته!..لدرجة انها هربت من البيت وسابت الباب مفتوح!••
<عـنـد شـادي>
••رجع ومعاه أكل لـ يوسف وكان بيتسحب وكان حذر جداً ان ضياء يشوفه او يحس بيه..وأول ماوصل طلع الأكل وأكله..وشويه ولقى ضياء وراه فا ارتبك!
ضياء(بـ شر) :انت بتعمل ايه؟؟
شادي(بخوف) :انا خوفت يموت ويجيبلنا مصيبه ياضياء بيه
ضياء(بزعيق) :انت بتتصرف من نفسك يازباله ياحقير؟؟..مين فينا الريس انا ولا انت؟؟؟
شادي(بخوف) :حضرتك طبعاً
ضياء(بزعيق) :خد القرف اللي في ايدك ده وغور من وشي...وبسبب الحركه اللي انت عملتها دي هيتخصم منك نص مرتبك
شادي(بخوف) :بس...
ضياء(بزعيق) :مفيش بس..ويلا امشي من قدامي يلااااا
••خاف شادي منه وساب الأكل ومشى..وضياء كان بيبص لـ يوسف بكل غل••
<عـنـد جـايـده>
••كانت بتلف حوالين نفسها بعد ما مروه خدت 10 مليون جنيه يعني معاها15 مليون جنيه..وجايده ممعاهاش غير 5 مليون بس! ••
جايده:يعني ايه تاخد 15 مليون وانا لأ؟؟..يعني انا اتضحك عليا؟؟..تعيش هى متمرمغه في العز والفلوس والفلل والعربيات وانا هنا بغرق؟؟..هعمل ايه بالـ5 مليون جنيه دول؟؟..وبعدين هى عرفت مكان يوسف ازاي اصلاً!..طب ايه رأيك بقى ان انا مش هسيبك في حالك يامروه وهفضل وراكي لحد مااخرب علاقتك بكل اللي حواليكي...خليهم يعرفوا قد ايه انتي نصابه وكلبة فلوس!!...مانا مش هخليها تضحك عليا وتديني على قفايا وانا واقفه اتفرج..حقي هيرجعلي يامروه وعلى داير مليم!
<عـنـد عائـشـه>
••خدوا مصطفى ورجعوا البيت..وبعد مانام..كانت عائشه قاعده مع ساهر ورشاد في البلاكونه..و كانت الدنيا ليل••
عائشه:والله يابني انا عن نفسي مرتاحه وموافقه..البنت مفيهاش غلطه وطيبه وأي حد يحبها..المشكله ان ده مش وقته المناسب يعني انت مش شايف الظروف اللي أحنا فيها دي؟..هيجيلنا نفس نفرح ازاي وسط كل ده؟
رشاد:عارف والله ان ده مش وقته المناسب..انا لما روحت الشغل كنت تعبان نفسياً ومتدمر..هى اللي وقفت جنبي وساعدتني..مفتكرش مره كنت مخنوق وفضلت كده لآخر اليوم!..داليدا قايمه بدورها على أكمل وجه..ومش مقصره في أي حاجه..انا عمري ماارتاحت اوي كده غير معاها!..لان هى الوحيده اللي عرفت ازاي تخليني مبسوط!..عرفت نقطة ضعفي ايه وجاتلي منها!..وبصراحه مكنش ينفع أضيع كل ده ولقيتني فجأه بقولها بحبك!
والد رشاد(بيضحك) :ايوه ياعم الحَبيب..شوف احنا في ايه.. وانت في ايه!..بس بصراحه داليدا بنت محترمه وانا اتمنى انها تكون زوجتك في يوم من الايام..بس ياريت نختار الوقت المناسب.. يابني احنا بالنا مش رايق ومش عارفين آخرة ده كله ايه!
رشاد:انا متفائل خير وحاسس ان اللي جاي هيكون أحسن من اللي راح
عائشه:ربنا يقدملك اللي فيه الخير يابني ويوقفلك ولاد الحلال في طريقك..شوفلنا حد من أهل داليدا نتفق معاهم
رشاد:ده أكيد..بس انا هستنى شويه علشان خاطركم وربنا يسهل الحال ونهاية التعب تكون قربت
<عـنـد دالـيـدا>
••كانت قاعده مع أختها قدامي التلفزيون بيشربوا الشاي••
فريده:قوليلي بقى يا داليدا وهو اعترفلك ليه دلوقتي ؟
داليدا:مش عارفه بس اللي اعرفه انه محتاجني جنبه..عارفه يا فريده..انا حاسه كأني أعرف رشاد من ٢٠ سنه..مش من سنه فاتت..انا كنت بشوف رشاد دايماً بس لا انا كنت اعرفه ولا هو يعرفني..مبدأناش نعرف بعض غير من ٧ شهور فاتوا..بس فعلاً دول أحلى ٧شهور عدوا عليا بعيداً عن أي حاجه حصلت!
فريده:إحمدي ربنا انك مخلفتيش من الزفت اللي اسمه سامي..كان زمانك حياتك واقفه ومش عارفه تتجوزي
داليدا:ولو كان حصل..معتقدش ان حاجه زي دي هتوقفلي حياتي!..طيب ما رشاد مخلف ولد..ورغم كل ده عايز يتجوزني ونكمل حياتنا مع بعض!
فريده:هو لو رشاد لقى ابنه..هتعامليه كويس؟..بصي انا عارفه انك أكيد هتعامليه كويس لانك طيبه من جوا وانا حافظاكي..بس اقصد مش هتدايقي ولو حتى بينك وبين نفسك؟
داليدا:لا بالعكس هعتبره ابني!..الولد لسه صغير خالص ومامته ماتت وسابته!.. ومالوش غير رشاد..وانا مش عايزه احسسه ان في حاجه ناقصاه..بالعكس يافريده اللي مجرب فراق الاب والام هيكون أكتر واحد حاسس بالوجع.. واللي بيحس بالوجع وبيجربه مينفعش يكون قاسي وجاف مع اللي جرب نفس وجعه العكس بيكون حاسس بيه جداً.. وانا هكون حاسه بـ يوسف ومعتبراه ابني!
فريده:علشان انتي حنينه وقلبك أبيض يا داليدا والحمدلله ان ربنا بعتلك اللي شبهك..رشاد باين عليه انه محترم وابن ناس..على عكس سامي..مفيش حد قادر عليه هو وأهله
داليدا:متجيبيش سيرة الناس دي تاني لإني بجد بتعب كل مابفتكر سيرتهم!
فريده:ليكي حق..طيب هتكلمي خالتوا وتحكيلها امتى؟
داليدا:مش عارفه هتكون صاحيه دلوقتي ولالا
فريده:جربي تكلميها يمكن صاحيه
داليدا:ماشي
••وقامت داليدا تجيب الموبايل علشان تكلم خالتها..لقيت رشاد باعتلها مسدج (وحشتيني♥️)...ولما داليدا شافتها ضحكت وردت عليه (لحقت أوحشك؟)...وفي ساعتها كان رشاد رد (انتي بتوحشيني كل ثانيه..ويمكن علشان متعود انك عالطول قصادي..فلما بتغيبي بحس بحاجه ناقصاني♥️)..ردت عليه داليدا وقالتله(وانت كمان بجد مفتقداك اوي❤️😘)...ولما فريده لقيت داليدا ماسكه الموبايل وبتضحك كانت لازم تدخل••
فريده:ايه يا داليدا اتصلتي ولا لسه؟
داليدا:بتصل اهو
••وبالفعل اتصلت بـ خالتها صابرين••
داليدا:الو يا خالتو عامله ايه؟
صابرين:ايه ده داليدا ازيك انتي ياحبيبتي..عامله ايه انتي واختك فريده؟
داليدا:الحمدلله ياحبيبتي..وإزي عمو عصام..وغاده؟
صابرين:كلهم بخير الحمدلله..كنتي لسه في بالي من شويه سبحان الله لقيتك بتتصلي كأنك سامعاني
داليدا:القلوب عند بعضها
صابرين:الحمدلله..انتوا لسه في الشقه الجديده ولا رجعتوا شقتكم؟
داليدا:لا احنا مش هنرجع شقتنا تاني خلاص..وغصب عني هبيعها بس انا الفتره اللي فاتت مكنتش دماغي فاضيه وفيها مليون حاجه!
صابرين:ياه يا داليدا هتبيعوا الشقه اللي اتربيتوا وكبرتوا فيها؟.. دي فيها ريحة ابوكي وامك الله يرحمهم
داليدا:الله يرحمهم..ماهو ده اللي مصعب عليا الموقف..ومش جايلي قلب اعمل كده بس لو مبيعتهاش هفضل في العذاب ده كتير خصوصاً ان سامي مش هيسيبني في حالي!
صابرين:وهو عايز منك ايه مش اتطلقتي منه وخلصتي؟
داليدا(بتضحك) :وانتي فكرك انه كده خلاص خرجني من دماغه؟.. اللي زي سامي مش بيتهد ولا بيزهق..المهم سيبك من سيرته دي خالص وخلينا في المهم
صابرين:ايه ياحبيبتي؟
داليدا:انا متقدملي واحد محترم وابن حلال والصراحه مابينا مشاعر حلوه ومرتحاله جداً..بس هو عايز حد من عيلتي علشان يقعد ويتفق معاه انتي عارفه ان عمي ماهر مش هينفع خالص وده أول واحد هيبوظلي الموضوع هو وابنه!
صابرين:بجد والله؟
داليدا:اه والله
صابرين:ياالف الف مبروك ياداليدا..طب والله فرحتيني!
داليدا :الله يبارك فيكي ياخالتو وعقبال غاده
صابرين:ياحبيبتي يابنت الغاليه..طب هو مين ومعاه ايه؟
داليدا:مديري في الشغل الأخير..أكبر مني بسنتين..بس محترم وابن ناس..ومعاه بكالريوس تجاره
صابرين:ماشاءالله انتي شوقتيني اشوفه هو وأهله..وعلى كده ساكن فين؟
داليدا:لا بعيد عننا خالص..بس بيته في مكان حلو يعني
صابرين:انتي طيبه وتستاهلي كل خير يا داليدا..وعقبال كده لما أشوفك في بيت عريسك انتي واختك فريده
داليدا:يارب يا خالتو
صابرين:يارب ياحبيبتي..طيب انا هكلم عمك عصام وهقوله ده هيطير من الفرحه والله.. ده انتوا مقامكم عنده من مقام غاده بنتي
داليدا:عارفه والله ياخالتو وانتوا كمان غاليين علينا اوي
صابرين:ياحبيبة قلب خالتك..وبإذن الله نحدد يوم نقعد فيه مع العريس ونتفق على كل حاجه
داليدا:خلاص ان شاء الله
<تـانـي يـوم>
••راح ماهر وسامي وحسناء في بيت اهل العريس عشان يشوفوا الشقه زي مااتفقوا..وكانوا بيلفوا بيتفرجوا••
سامي:مش بطاله..اهي تقضي الغرض
ماهر:مش بطالة ايه؟ دي شقه بسم الله ماشاء الله يرمح فيها الخيل
حسناء:ماشاءالله.. الله اكبر.. ربنا يجعلها من حظك ونصيبك ياصفاء يابنتي
سماح:ده احنا هنعملهالكم على أعلى مستوي..شوفوا انتوا بس عايزين ايه ومن العين دي قبل العين دي
حسناء:الله يخليكي..ده احنا مش هنلاقي أحسن منكم لبنتنا
متولي:عارف انت بقى الديكورات اللي طالعه جديد دي..الفورم والورد والكلام ده
سامي:فورم ايه ياعم الحاج اللي حاجات طالعه جديد؟ دي من على أيام العصر الحجري
متولي:معلش اعذرونا احنا مهما كان ناس كبيره ومنفهمش زيكم في الكلام ده
ماهر(بيضحك) :بس ياسامي متحرجش عمك متولي..احنا ملناش دعوه بأي حاجه..العريس والعروسه يختاروا على زوقهم
رجب:خد بالك ياعمي..انا مستعد ادفع من نص مليون لـ ٣ مليون في الجوازه دي أهم حاجه عندي راحتكم!
ماهر:مانا علشان كده قلبي متطمن..اصل صفاء دي بنت حلال وأمها داعيالها
حسناء(بتضحك) :اه والله مببطلش دعا ليل نهار سواء ليها ولا لـ سامي أخوها
رجب:ربنا يخليكي ليهم ياست الكل
حسناء:الله يخليك يارجب
متولي:ولا الفرح بقى هعملكم حتة دين فرح..مصر كلها هتحلف بيه
سامي:انا عندي الأهم من ده كله..أختي تتشال فوق راسكم..وتتعامل أحسن معامله..اصل صفاء أختي طول عمرها متدلعه وعايشه عيشه كل البنات تحلم بيها..فا متجيش بعد ده كله تترمي راميه زفت
متولي:طب وليه الفال الوحش ده؟..انت هتفَول من اولها؟
ماهر:ماجرا ايه ياسامي انت عاوز اي شؤم في الجوازه دي وخلاص؟.. ياخي تفائل خير!
سامي:انا بسبق بس علشان محدش يشوف مني الوش التاني!
حسناء:ماخلاص بقى ياسامي متحرجناش قصاد الناس أكتر من كده!
سماح:ياختي لا احراج ولا حاجه بكرا نبقى أهل وحبايب ويعرف ان صفاء دي غاليه علينا
رجب:اه والله ربنا العالم
حسناء:اهو.. يبقى خلاص طمن قلبك!
سامي(بسخريه) :طب يلا خلصونا عاوز اشوف السطح
متولي(بيضحك) :السطح عندنا بقى حاجه تانيه..ده جو تاني خالص..هتنسوا نفسكم وهتفكروا انكم قاعدين في قريه في الساحل الشمالي
••راح سامي متكلم بصوت واطي بكل سخريه••
سامي(بسخريه) :وانتوا ايه اللي عرفكم بالساحل الشمالي..انتوا آخركم ماية مجاري
رجب:بتقول حاجه؟
سامي:لا بقول يامسهل الحال ياارب..توكلنا على الله!
<عـنـد هـدى>
••بما ان الاسانسير شغال فا مكنش حد بيطلع على السلالم..وجيرانها اللي في الوش مكانوش جم بقالهم فتره..و لسوء الحظ ان واحده وولادها كانوا لسه جايين••
الأم:امسك الشنطه في ايدك
_حاضر
••وأثناء ماهى بتفتح..لقيت باب الشقه مفتوح..وقلبها حس ان في حاجه مش طبيعيه..لحد ما قربت من باب الشقه بـ بطء واتفاجئت ان هدى واقعه في الأرض وجسمها أزرق..لحد ماصرخت ووقعت على الأرض••
الأم(بصويت) :مقتووله... ااااه... مقتوووله...الحقوووونيي
••لحد ماالشرطه جات وخدوها على القسم..وهناك كانت الست أعصابها تعبانه جداً وبتترعش من المنظر!••
<فـي الـطـب الـجـنـائـي>
••كانت دكاترة الطب الشرعي بتشرح الجثه علشان تعرف سبب الوفاه!••
دكتور1 :انا حاسس انها كانت في محاولة انتحار منها شنقاً..او تم الاعتداء عليها من حد كان هو اللي بيحاول انه يشنقها!
دكتور2:مش بالاحساس..كمل وخدلي كل العينات المطلوبه لحد ماالشرطه تيجي
••جه ظابط من برا••
الظابط:النتيجه هتظهر بعد قد ايه؟
الدكتور1:زي مااحنا متعودين بعد 24 ساعه
الظابط:طب انتوا تتوقعوا ايه؟
الدكتور1:انا متوقع انها حاولت تنتحر شنقاً
الظابط:لالا..السيده هدى مكنش جنبها أي حِبال..هى لو كانت عايزه تنتحر..كان هيبقى جنبها أي حبال او سلك يساعد في عملية الانتحار.. ده بالإضافه إلا انها مكنتش هتسيب الباب مفتوح..ده حد دخل وخلص عليها..وبعد ما وصل لـ غرضه هرب وساب باب البيت مفتوح
الدكتور1:احنا شغالين على فحص الجسم بالكامل ده غير البصمات اللي وجدتوها على باب الشقه وجسم المجني عليها
الدكتور:تمام..هرجعلكم بعد 24 ساعه
الدكتور1:تمام
••مشى الظابط وهو بيبص لـ جسد المجني عليها بكل شك••
<عـنـد دالـيـدا فـي الـشـغـل>
••كانت بتتابع الشغل في المطبخ مع الشيفات••
الشيف:حضرتك بقالك كتير مجربتيش تدوقي حاجه من عمايل ايديا!
داليدا(بتضحك) :ماهو ده لإن مكنش في مزاج خالص..بس ماشي يا شيف انا مستعده أكل أي حاجه مادام من ايد حضرتك انت
الشيف(بيضحك) :خلاص انا هعملكم أحلى 2 ريد فيلفيت وعلى شكل قلوب..واخده بالك انتي؟
داليدا(بتضحك) :اشمعنا بقى على شكل قلوب؟
الشيف(بيضحك) :استاذ رشاد بقى فاضح نفسه..ده كفايه نظراته ليكي بس اللي احنا كلنا بقينا واخدين بالنا منها
داليدا(بتضحك) :يعني انت سايب الشغل ومركز في نظرات أستاذ رشاد؟
الشيف(بيضحك) :اعمل ايه ماهو اللي مش قادر يستر نفسه
داليدا(بتضحك) :ماشي يا شيف..خليك في شغلك علشان أي غلطه فيها خصم ومفيهاش تهاون!
الشيف:حاضر من عينيا
داليدا:تسلملي عينيك
••وابتسمتله وبعدين سابته وخرجت لقيت رشاد في وشها..وكان واقف بيضحك وساكت مبيتكلمش..فا هى كمان ضحكت ومشيت من غير ماتتكلم!..لحد ما رشاد دخل للشيف••
الشيف:يااهلاً وسهلاً بـ أستاذ رشاد اللي منور الدنيا بحالها
••ضرب رشاد بـ ايده على كتف الشيف وابتسمله••
رشاد:انا سمعت ان الحلويات الفتره دي مابقتش مخدومه وفيها كام غلطه كده..وده يدل انك مش مركز في شغلك ومركز في حاجه تانيه!..بس ايه هى بقى الله اعلم!
الشيف:لا محصلش يااستاذ رشاد..ده انا والله بعمل شغلي على قد مابقدر وزياده..ده حتى الناس بقيت تشكر في مشروبات وحلويات الكافيه وبيقولوا انه أحسن كافيه جربوه في حياتهم ده حتى الريفيوهات عنه حلوه اوي على السوشيال ميديا..انت بس اللي بتوقعني في الكلام!
رشاد(بيضحك) :كنت بتقول آيه لـ داليدا يا شيفنا؟
الشيف(بيضحك) :كنت بقولها ان نظراتك فاضحاك اوي الايام دي
رشاد:ياسلام وانت مركز معايا ليه بقى؟
الشيف:قلبي عليك..طب أقولك..أستاذه داليدا هى كمان نظراتها ليك بقيت فاضحاها اوي..انتوا الاتنين مابقتوش قادرين تخبوا أكتر من كده..وانا صراحةً شايفكم لايقين على بعض اوي..ماتخطبها وتفرحنا!
رشاد:علفكرا انت لئيم ومش سهل..انا هعمل كده فعلاً..وهتجوزها!
الشيف(فرحان) :ده بجد يااستاذ رشاد؟
رشاد:ايوه طبعاً..كفايه بقى ده كل الناس بقيت ملاحظه بما فيهم انت!
الشيف(فرحان) :هتعزمني صح؟
رشاد(بيضحك) :اول الحاضرين ان شاء الله
الشيف(بصوت عالي) :الف مبروووك يااستاذ رشاااد... الف مبرووك
••راح رشاد حاطط ايده على بؤه يسكته••
رشاد:شششش كفايه فضايح!.. كمل شغلك!
••وسابه وخرج..وهما الاتنين بيضحكوا••
<عـنـد هـنـا ويـمـنـى>
••كانت يمنى قاعده مكتئبه بعد وفاة مامتها لميس..وهنا كان ضميرها بيأنبها..لحد ما هنا دخلت يمنى عينيها مدمعه!••
هنا:مالك؟
يمنى:مفيش حاجه
هنا:ازاي مفيش؟
••وقعدت جنبها••
يمنى:يعني مفيش..كلامي واضح
هنا:وانتي مالك بتتكلمي كده ليه؟
يمنى:بتكلم ازاي يعني؟
هنا:ايه المعامله دي؟..ده بدل ماتفرحي انك فارقه معايا؟
يمنى:انا عمري ماكنت فارقه معاكي!..ولا فارقه مع حد..سواء بابي ولا مامي الله يرحمها..طول عمري وانا حاسه ان لواحدي مهما كنتوا حواليا!..وانا صغيره كان نفسي يبقى عندي أخت تونسني وتكون جنبي!.ولما جيتي فرحت بيكي وقولت أخيراً مش هكون لواحدي تاني!.. بس اكتشفت ان تفكيري كان غلط وقتها..وعرفت ان انا هفضل لواحدي دايماً مهما كان حواليا ناس!
هنا:ايه الكلام ده؟..انا اول مره أشوفك بتتكلمي كده!
يمنى:علشان طول عمري ساكته وشايله في قلبي كتير..لحد مابقيتوا كلكم تتعاملوا معايا على إني مبحسش!..لدرجة انكم بقيتوا توجعوني وانتوا متأكدين ان مهما اتوجعت هفضل قويه وثابته مبتحركش!
هنا(ببرود) :جو المسلسلات ده مينفعش معانا في واقعنا..متبقيش دراما كوين يا يمنى..خلاص ياحبيبتي مامي ماتت..وبابي مش هنشوفه تاني..مبقاش لينا حد غير خالتو
يمنى:حتى خالتو مش هتستحملنا ومهما استحملت هيجيلها يوم وهتزهق..هى مش ملزمه تاخدنا عندها ولا تصرف علينا من جيبها..وفي الآخر هتعرفي ان ملكيش حد غير اختك!
هنا(بزعيق) :هو انتي ليه بقيتي تتعاملي معايا إني مبحسش وان معنديش دم؟.. هو مفيش حد بيحس غيرك انتي يا يمنى؟..لكن انا جبل؟
يمنى(بزعيق) :انا مهما يحصل عمري ماهثق فيكي تاني..انتي بالذات ملكيش أمان والغدر والخيانه بيجروا في دمك..وعمري ماهفكر أحكيلك اللي جوايا مهما يحصل!
••وقامت بكل عصبيه وحدفت المخده في وش أختها••
<عـنـد الـظـابـط>
••مكنش عارف يطلع بمعلومه واحده من جارة هدى من كتر ماهى بتترعش وخايفه••
الظابط:ممكن خضرتك تهدي وتحاولي تقوليلنا أي معلومه!
_مش قادره يا حضرة الظابط.. المنظر كان صعب اوي محدش يستحمله!
الظابط:هما كلمتين وارجعي على بيتك..ممكن؟
_اتفضل
الظابط:احكي اللي حصل من الأول
_انا بقالي سنه برا مصر..والنهارده رجعت انا وولادي..وانا بفتح الباب لاحظت ان الباب اللي في وشي مفتوح..مش عارفه ليه قربت منه وايه اللي خلاني اعمل كده! لحد مالقيت جارتي مرميه في الأرض وجسمها أزرق!
الظابط:يعني متعرفيش أي تفاصيل عن حياتها؟
_لا والله.. الحاجه الوحيده اللي اعرفها ان عندها بنت وحيده اسمها مروه وكانت مخطوبه أيام ماانا كنت لسه موجوده في الشقه
الظابط:حاولي تفتكري أي معلومه،يمكن تفيدنا في القضيه!
_لا صدقني معرفش
الظابط:طيب اتفضلي
_شكراً
••وقامت الست وهى بتترعش من الخوف لحد ما مشيت••
<عـنـد رشـاد>
••كان قاعد في المكتب هو وداليدا••
رشاد:طيب خالتك وجوزها فاضيين امتى؟
داليدا:انا كلمتها امبارح وقالتلي هترد عليا تاني..بس خالتو فعلاً كويسه
رشاد:اكيد كويسه امال انتوا طالعين كده لمين!
داليدا:ازاي؟
رشاد:يعني انتي واختك كويسين..لان اهاليكم كويسين بإستثناء عمك ده طبعاً
داليدا:قرايب ماما كويسين بس انا مبحبش أتقل على حد فيهم..بجد مبحبش آكون تقيله على حد..ومن ساعة وفاة بابا مفتكرش ان انا طلبت حاجه منهم!
رشاد:تطلبي منهم ليه وانا موجود؟..انا مش عايزك تحتاجي لأي حد طول مانا معاكي ياداليدا..وأي حاجه عايزاها قوليلي في ثواني هتلاقيها عندك!
••ضحكت داليدا واتحرجت من كلامه الحلو! ••
رشاد(مبتسم) :انتي اغلى حاجه في حياتي!..انا ذات نفسي مستغرب ازاي حبيتك بسرعه كده!..يمكن علشان جيتي كملتي الناقص اللي فيا!
داليدا(بإبتسامه) :احنا الاتنين كان ناقصنا بعض يا رشاد.. والحمدلله ان ربنا حطنا في طريق بعض!
رشاد:دي أحلى هديه من ربنا انه حطك في طريقي!
••ابتسمتله داليدا..وبعدين الباب خبط••
رشاد:ادخل
_في حد عايز حضرتك
رشاد:خليه يدخل
••دخلت واحده لابسه نضاره شمس وأول ما قلعتها••
رشاد(بصدمه) :جايده؟؟
الفصل الثاني والعشرون
جايده:وحشتني اوي يارشاد..انت ازاي قدرت تكمل حياتك من بعدي!
••قام رشاد وهو متنح انها ازاي خرجت من السجن!••
داليدا(بعصبيه) :مين دي؟؟
رشاد(بزعيق) :انتي خرجتي ازاي من السجن؟؟
جايده:مش مهم خرجت ازاي المهم ان انا خرجت..مين دي يارشاد..السكرتيره بتاعتك؟
رشاد(بزعيق) :اطلعي براااا...مش عايز أشوف وشك هنا تاني يازباله..بقى انتي يطلع منك كل ده!!..ده انا هوديكي في ستين داهيه انتي ومروه..بقى انا واخويا نكون ضحية طمعكم!!
جايده:مروه هربت من السجن يارشاد..وبعد ماهربت وصلت يوسف ابنك لحد ضياء لاشين والمره دي مقابل 10 مليون جنيه.. يعني مروه طالعه من بداية الحوار لـ نهايته بـ 15 مليون جنيه..انا مليش زنب في حاجه!.. انا مظلومه وهى السبب في كل اللي حصل!
رشاد(مصدوم) :يوسف؟؟.. هو يوسف عايش؟؟
جايده:ايوه عايش..وانا الوحيده اللي عارفه مكانه
••راح رشاد مقرب منها وهو مقهور وكله عصبيه..كل ده وداليدا بتتفرج في صمت! ••
رشاد(بزعيق) :يوسف فييين؟؟؟..انطقي الا اقسم بالله العظيم اكون حابسك هنا لحد مايبانلك صاحب..يوسف فين؟
جايده:براحه عليا يارشاد انا مستاهلش منك كل ده
••راح رشاد ماسكها من دراعها بكل غل••
رشاد(بزعيق) :ده انتي حيه..انتي ابليس ماشي على الأرض..انا اتصدمت فيكي صدمة عمري..وشوفي كده لو بينك وبين الجنه خطوه واحده متوقفه على مسامحتي ليكي.. فانا مش مسامحك..ياتنطقي يوسف فين..يااما هوديكي في ستين داهيه!!
جايده:مانا قولتلك يوسف مع ضياء لاشين..مروه باعت ابنك له مقابل 10 مليون جنيه..قولي بقى مين دي؟
داليدا(بزعيق) :انتي اللي مين وعايزه ايه!!!.. وايه جابك هنا اصلاً
جايده(بزعيق) :انا جايده أول حب في حياة رشاد..معقول محكلكيش عني؟
رشاد(بزعيق) :ملكيش دعوه بـ داليدا يا جايده..داليدا دي هتبقى مراتي.. دي اللي وقفت جنبي بعد ماانتي كسرتيني ودوستي عليا وعلى قلبي.. دي اللي تستحق فعلاً ان انا اتجوزها وأكمل حياتي معاها..لكن واحده زيك آخرها تترمي في السجون وسط قتالين القتله
جايده:ارجعلي يا رشاد ونصلح اللي اتكسر مابينا..ويوسف يرجع لـ حضنك من تاني!
داليدا(بصدمه) :انتي ازاي بجد رخيصه اوي كده!!
رشاد(بزعيق) :انا مش هعيد كلامي تاني.. فين يوسف؟؟؟
جايده:في ايه يارشاد مانا قولتلك هو احنا هنعيد ونزيد في نفس السؤال واجابته؟..لو عايز يوسف يرجعلك.. ارجعلي..و..
رشاد(بزعيق) :ااه ماهي حاجه قصاد حاجه..طب لعلمك يوسف هيرجع ومن غير أي رجوع مابيني وبينك..لان اللي قدامك دي ماليه عينيا وبمليون واحده زيك..مفيش مقارنه اصلاً..دي كانت غلطتي انا.. بس انا اتعلمت منها
جايده(بحزن) :خدتيه مني خلاص يا داليدا؟..عارف يارشاد انا عمري مااتمنيت حاجه وكانت ليا..طول عمري كل حاجه بتمناها بتروح لغيري وانا واقفه اتفرج من بعيد..بس المره دي لأ.. مش هقف اتفرج من بعيد زي كل مره..انا المره دي مش هسيب حاجتي لحد مهما حصل!
داليدا(بزعيق) :كل اللي بيحصل ده كتير اووي.. بجد كتير!!..لو هى ممشيتش من هنا دلوقتي انا اللي همشي!
رشاد:استني انتي ياداليدا.. ده مكانك انتي..هى اللي هتمشي.. ولا لأ.. استني ياجايده
••بصيتله جايده بصة انتصار..وقرب رشاد من الموبايل واتصل بـ اللي شغالين معاه••
رشاد:الو يا علي..اقفل باب الكافيه كويس...تمام
جايده(بتوتر) :ليه يارشاد في ايه؟
رشاد:هتعرفي دلوقتي
••ولسه بيتصل بالشرطه..جات جايده ساحبه الموبايل من ايده وفضلت تعيط••
جايده(بعياط) :لا ياا رشاد انا مليش زنب في اي حاجه..مروه هى السبب في كل حاجه حصلت!.. هو لو انا السبب كان زماني هنا دلوقتي!.. ده انا جيت ابلغك يمكن تفرح ان ابنك عايش..علشان خاطري بلاش تتصل بالشرطه..انا فعلاً مليش زنب..ابوس ايديك يارشاد... سيبني امشي..انا مظلومه ومعملتش اي حاجه!
••راح رشاد زاقق ايديها بعيد عنه..وشاورلها بـ راسه ناحية الباب بمعنى امشي..لحد مامشيت وهى بتعيط..وشاور للي واقف على الباب إنه يفتحهولها لحد ماخرجت..ولما رجع المكتب..لقى داليدا بتلم حاجتها بكل توتر وحزن..قرب منها وشدها ناحيته ولما بصيت في وشه دموعها نزلت! ••
رشاد:مش هتمشي يا داليدا!..انا بحبك انتي وعايزك انتي!..انا مش عايزها ولا عايز حد غيرك!.. متمشيش ياداليدا!.. علشان خاطري ده انتي كل حاجه في حياتي!
••زادت دموع داليدا أكتر لحد ماخدت شنطتها ومشيت••
رشاد:داليدا متمشيش.. داليدااا!!
••ولما داليدا رجعت البيت..كانت فريده قاعده قصاد التلفزيون..لقيتها دخلت من باب الشقه على الأوضه عالطول من غير ماتتكلم••
فريده: داليدا!...هى مالها!
••وقامت وراها وكانت بتخبط ولكن داليدا مش بترد••
فريده:داليدا.. يا داليداا..ردي عليا!
••ولكن داليدا جوا كانت بتعيط..وكانت حاسه انها مش هتعرف تفرح بعد ظهور جايده في حياة رشاد مره تانيه..وكانت حاسه انها ممكن تاخده منها في أي وقت ده بالإضافه إلى انها كانت حاسه ب الغيره الشديده على رشاد وده اللي كان مخليها مدايقه وزعلانه جدا••
فريده:يابنتي ردي!..داليدا!
••وبعدين لقيت فريده موبايلها بيرن.. راحت ترد••
فريده:الو يااستاذ رشاد
رشاد:داليدا رجعت ولا لسه!
فريده:داليدا رجعت من برا وقافله على نفسها وبتعيط..وبخبط عليها مش بترد عليا
رشاد(زعلان) :حاولي معاها يا فريده وقوليلها ان ده سوء فهم وإن مهما حصل انا مش هكون لحد غيرها!
فريده(بإستغراب) :انا مش فاهمه حاجه!.. هو ايه اللي حصل؟
رشاد:لو داليدا فتحت الباب قوليلها ترد عليا ضروري
فريده:طيب ماشي
••وقفلت معاه وكملت تخبيط وداليدا برضه مش بترد••
<عـنـد شـادي>
••راح يقابل مايا وأول ماشافها رجعت مشاعره تتحرك ليها من تاني وكأن روحه ردت فيه••
مايا:بقى كل الغيبه دي ياشادي؟
شادي:غصب عني يا مايا..الظروف بقيت صعبه..مابقتش عارف الاقيها منين ولا منين..انا بجد مكبوت نفسياً ومش لاقي حد أحكيله
مايا:ايه الكلام اللي يزعل ده امال انا لازمتي ايه؟..مش قولتلك مليون مره لما تكون مدايق تيجي تحكيلي!
شادي:مانا مش عايز أدايقك..وأزود عليكي همومك
مايا:لا يا شادي متقولش كده احنا بجد واحد ومفيش أي فرق مابينا صح ولا ايه؟
شادي(بتنهيده) :صح.. وبما اننا واحد..عايز آخد رأيك في موضوع بس ياريت متحكيش قصاد حد
مايا:وانا هحكي قصاد حد ليه؟
شادي:لا يعني ممكن تكوني بتحكي بـ حسن نيه لواحده من صحاباتك مانا عارف جو البنات ده..فا ياريت تخليه سر مابينا
مايا:طبعاً سر ومن امتى وانا بطلع اسرار حد؟اتكلم متقلقش
شادي(بتردد) :انتي كان نفسك تعرفي انا شغال ايه..وانا عارف ان اجابة سؤالك طولت..انا شغال مع زعيم مافيا
مايا:زعيم مافيا؟؟
شادي:ايوه..بس متقلقيش هو مخصصني في حاجات بسيطه لا بقتل ولا بسرق ولا ليا في الكلام ده..بس انا اللي واجع قلبي الايام دي..الطفل الصغير اللي هو خاطفه..الواد مبيبطلش عياط معرفش جعان ولا ايه نظامه..وكل مااحاول اساعده الاقي ضياء جاي..حتى معاملته لينا زباله بيعاملنا اننا كلاب عنده..كأنه بيدينا فلوس لوجه الله..مش على تعبنا ومجهودنا معاه!
مايا(بخبث) :طفل ايه ده؟.. هو بيخطف أطفال؟
شادي:لا بس خاطف ولد صغير عن طريق واحده اسمها مروه..انتقاماً من واحد اسمه ساهر..ماعلينا انتي مش هتعرفيهم المهم انا اللي تاعبني أذيته للناس وحاسس ان انا حطيت نفسي في المكان الغلط..حتى مش عارف امشي من عنده لو مشيت هيحطني في دماغه وهيإذيني وانا الصراحه أهلي ناس غلابه ومش هيستحملوا شره
مايا:بس انت ازاي تشتغل مع واحد شر بالشكل ده؟.. ايه يجبرك على كده اصلاً!
شادي(بتنهيده) :الحوجه مُره يا مايا..انا اخواتي عددهم كبير وابويا مش ملاحق على مصاريفهم..وانا الكبير فيهم..كان لازم اتصرف علشان اساعد معاه
مايا:طيب ما في شغل كتير.. خلاص ملقيتش غير ده؟
شادي:اهو نصيبي هعمل ايه بقى!..المهم انتي معندكيش أي فكره ازاي اسيب الشغل؟
مايا:لا دي عايزه تفكير عميق..مش هينفع هنا خالص.. بس ليها حل
شادي:ياريت..المهم انتي عامله ايه؟
مايا:بخير وانت؟
شادي:الحمدلله
••وعلى الجهه الأخرى كان ساهر بيسمع كل كلمه مابينهم!••
<عـنـد صـفـاء>
••كانت بتتكلم مع زينه في الموبايل بعد مااتصاحبوا على بعض••
صفاء:ههههه انتي هتنقيلي في الجوازه ولا ايه ياحبيبتي؟
زينه(بتضحك) :وانا هنق ليه.. مش لاقيه ولا ايه ياصفاء؟..ماانا عندي اللي ماليلي عينيا
صفاء:بقى عندك ومخبيه على صفاء حبيبتك؟..قوليلي بقى يطلع مين سعيد الحظ؟
زينه(بتضحك) :متحرجنيش بقى ياصفاء..مش يمكن هو مش حاططني في دماغه؟
صفاء:طب ماتقوليلي يمكن حاطك في دماغه
زينه:هو في غيره؟.. سامي اخوكي
صفاء:ههههه لا اتطمني سامي حاساه ميال ليكي الفتره دي..وبصراحه متفائله خير
زينه:بجد والله؟.. هو قالك حاجه طيب؟
صفاء:مقالش حاجه.. بس عينيه بتقول كلام كتير لما بيشوفك..طب أقولك جِسي نبضه كده عايزين نعرف ايه اللي جوا قلبه
زينه:تصدقي فكره برضه..طب اقوله ايه؟
صفاء:قوليله ان جايلك عريس وابوكي وامك موافقين
زينه:ياه دي حركه قديمه اوي واتعملت مليون مره
صفاء:خلاص قوليله ان في واحد بيطاردك في كل حتة ونفسه ومنى عينه يرتبط بيكي لدرجة انه جه اعترفلك
زينه:فكره برضه.. طب اقفلي ونبدأ الخطه
صفاء:خلاص اشطا.. ابقي طمنيني
زينه:حاضر من عينيا الاتنين.. سلام دلوقتي
صفاء:سلام ياقطه
••وبعد ماقفلت معاها راحت متصله بـ سامي.. وفي الوقت ده كان قاعد مع أبوه في الورشه••
ماهر:بس شكلهم ناس جدعان
سامي:ادينا هنشوف.. استنى التليفون بيرن
••وقام بعيد و رد على زينه••
زينه:ازيك ياسماسيمو عامل ايه؟
سامي(بيضحك) :فل وعشره على عشره.. انتي عامله ايه يا زوزا؟
زينه:كله تمام ياحياتي
سامي:حياتي؟..انتي مين؟
زينه:هههه زينه امال هكون مين يعني؟
سامي:انا بتأكد بس ههههه
زينه:اتأكد براحتك.. انا كنت واقعه في مشكله ومش عارفه اتصرف وملقتش حد غيرك اللي آخد رأيه
سامي:مشكلة ايه دي؟
زينه:في واحد بيجري ورايا في كل حته وبيطاردني يا سماسيمو..قولتله مش عايزاك مبحبكش..هددني وقالي لو مبقتيش معايا انا هعمل وهخلي وهسوي
سامي(بعصبيه) :مين ابن الكلب ده؟..مين؟
زينه(بتمثيل) :واحد اسمه حسام..انا بقيت بعيط كل يوم وخايفه على نفسي منه يا سامي
سامي(بعصبيه) :وهو مال اللي خلفوه بيكي؟..قوليله انك تخصيني..ولو راجل يقرب ناحيتك تاني وانا هدفن أمه!!
زينه(بتضحك) :أخصك ازاي يعني؟
سامي:يعني تخصيني..زي ماسمعتي كده..انا مكنتش عايز اتكلم دلوقت بس يلا كله قدر ومكتوب.. وأهو ربنا اراد ان انا اتكلم دلوقتي
زينه(بسهوكه) :انا مش فاهمه حاجه..انت تقصد ايه؟
سامي:إيه يابت انتي اتغابيتي على كبر؟..ما كلامي واضح..انتي تلزميني يا زينه..بس نخلص من موال صفاء أختي الأول
زينه:تقصد انك بتحبني؟
سامي:اه بحبك بس بلاش ابوكي وامك يعرفوا الحوار ده دلوقتي لما ابقى جاهز ابقي قوليلهم
زينه:انا مش مصدقه نفسي معقول قولتها اخيراً؟
سامي:وهو حد بيتحكم في قلبه؟ دي حاجات بتيجي كده
زينه(بسهوكه) :اخيراً..ده أحلى يوم في حياتي هو انا كنت أطول واحد زيك يحبني؟
سامي:انتي أجدع من اللي ماتتسمى اللي اسمها داليدا.. انتي جدعه وبنت بلد وبتفهمي في الأصول.. وروحك حلوه مش متصعنه زيها.. وانا قلبي اتفتحلك
زينه:علشان تعرف ان انا مش زي أي حد بس
سامي:ربنا يحرصك ده انتي تتحسدي..ويلا خدي بالك من نفسك وعلى الله حد يقربلك
زينه(بتمثيل) :محدش يقدر يقربلي طول مانت معايا
••ضحك سامي والكلام دخل دماغه••
سامي:طيب نتكلم بعدين عشان ابويا
زينه:طيب سلام
سامي:سلام
<عـنـد رشـاد>
••كان هيتجنن بعد اللي حصل..ومكنش قادر يستحمل زعل داليدا منه..لحد ماخد المفاتيح ورجع بيت أهله..وكانت أمه قاعدة بتقرأ قرآن••
عائشه:صدق الله العظيم..انت جيت ياحبيبي؟
رشاد(بحزن) :داليدا مابتردش عليا ياماما
••وراح قاعد جنبها••
عائشه:ازاي مابتردش عليك؟ هو في حاجه حصلت بينكم؟
رشاد:جايده جاتلي المكتب و..
عائشه(بصدمه) :جات ازاي؟؟.. هى مش مرميه في السجن مع مروه؟؟
رشاد:جايده ومروه هربووا!!!..ومروه سلمت يوسف لـ الكلب اللي اسمه ضياء لاشين!!
عائشه:يانهار اسود!.. استغفرالله العظيم ياارب..مروه تاني؟؟؟..ازاااي يارشاد؟؟
رشاد:ايوه مروه..هى سبب المصايب اللي حصلتلنا في حياتنا..انا مش عايز غير حاجه واحده يوسف يرجع عشان قلبي يرتاح!
عائشه:استنى يارشاد خلينا نتصرف!!..انا هكلم هدى واحكيلها عن كل حاجه بتحصل..هى الوحيده اللي هتقدر تتحكم في بنتها
••وطلعت الموبايل تتصل بـ هدى..ورشاد كان قاعد ودماغه هتنفجر من كتر التفكير••
عائشه:مابتردش!
رشاد:وهى هتعملها ايه يعني!..انا هروح أبلغ الشرطه وهما يتصرفوا بمعرفتهم
••وخد موبايل وقام••
<عـنـد دالـيـدا>
••فتحت الباب لـ فريده وكانت قاعده جنبها تواسيها••
فريده:بس رشاد مالوش ذنب في أي حاجه حصلت!
داليدا:عارفه.. بس خايفه أعلق نفسي بيه أكتر من كده يقوم باعد ويسيبني..انا مابقتش عارفه أفرح يا فريده!
فريده:لو رشاد كان عايز يعمل كده مكنش قالها الكلام ده..لان الكلام ده ميطلعش غير من واحد شاري!
داليدا:مش عارفه يافريده
••ومسكت موبايلها لقيت رشاد باعتلها مسدجات ومتصل بيها كتير••
Rashad:داليدا ردي عليا!..بلاش انتي كمان تيجي عليا أكتر من كده!.. انا مش عايز حد غيرك!.. هى صفحه واتقفلت!
••ولكن داليدا مرضتش ترد..ولقيت خالتها بتتصل بيها••
صابرين:الو يا داليدا ياحبيبتي
داليدا:الو يا خالتو
صابرين:عامله ايه انتي وفريده؟
داليدا:الحمدلله
صابرين:انا كلمت عمك عصام في الموضوع وقال ماشي منين مايحبوا يجوا هيلاقونا في انتظارهم.. ده والله فرحلك اوي
داليدا:طيب الحمدلله
صابرين:مالك انتي تعبانه ولا ايه؟
داليدا:ايوه تعبانه شويه
صابرين:عندك ايه؟
داليدا:شوية برد بس هبقى كويسه ان شاء الله
صابرين:ماهو باين على صوتك عموماً الف مليون سلامتك..اعمليلك ليمون بالنعناع وان شاء الله هتبقي كويسه
داليدا:حاضر
صابرين:سلامتك ياحبيبتي من أي شر
داليدا:شكراً يا خالتو على العموم لما رشاد يكون جاهز هبقى اكلمكم
صابرين:خلاص ياحبيبتي طيب مش محتاجين اي مساعده؟
داليدا:لا كتر الف خيرك
صابرين:بجد والله مش عزومه!
داليدا:لا والله احنا كده الحمدلله مستورين
صابرين:طب الحمدلله
<عـنـد رشـاد>
••راح يبلغ في القسم ان جايده ومروه هربوا••
رشاد:عايز اعمل بلاغ بهروب مروه وجايده
الظابط:احنا بندور عليهم من ساعة ماهربوا من عندنا..ومازالنا مستمرين في البحث
رشاد:انا عارف انكم أكيد بتدوروا عليهم.. بس جايده جات عندي وقالتلي انها لقيت يوسف ابني..ومروه هى اللي سلمته لـ زعيم العصابه ضياء لاشين
الظابط:وهى مروه وصلتله ازاي؟
رشاد:مش عارف..ولما حاولت احتجز جايده عندي على ماابلغ حضراتكم كانت هربت مننا
الظابط:هى مروه دي ايه مابتزهقش!..طيب ده احنا لقينا جثة والدتها في الشقه ولسه فاتحين قضيه جديده
••وأول ما رشاد سمع كلام الظابط تنح واتصدم! ••
رشاد:جثة مين؟؟
الظابط:مدام هدى والدة مروه..ولسه نتيجة البصمات المفروض تظهر كمان شويه
رشاد:ازاي؟؟..جثتها ازاي؟
الظابط:والله اللي اتبينلنا انها جريمة قتل مش محاولة انتحار..واللي عمل كده بعد ماخلص عليها هرب وساب باب الشقه مفتوح
••رن التليفون الأرضي••
الظابط:الو...ايه النتيجه ظهرت؟...ايوه نتيجة البصمات مانا عارف تحديد سبب الوفاه لسه هيظهر بكرا...ايوه تمام....و شوفتوا البصمات على الكمبيوتر؟...يعني اتأكدتوا!!...بصمات مروه بنتها!...حلو الكلام..ابعتلي حد بالنتيجه... طيب انا مستني.... تمام شكراً
رشاد(مصدوم) :بصمات ايه ومروة ايه؟
الظابط:لقوا بصمات مروه بنتها في الشقه..وعلى الباب من جوا
رشاد:قصد حضرتك ان مروه ليها يد في اللي حصل؟
الظابط:ده اللي هنتأكد منه..عموماً متقلقش هنعرف كل حاجه
<عـنـد عائشه>
••كانت بتتصل بـ هدى مابتردش لحد ما جات سلمى بنتها••
سلمى:انا هرتاح شويه من المذاكره
عائشه:هى مابتردش ليه؟
سلمى:هى مين؟
عائشه:هدى..اتصلت بيها فوق الـ10 مرات مابتردش
سلمى:يمكن مشغوله دلوقتي ياماما.. اتصلي بيها وقت تاني
عائشه:خلاص هفوت نص ساعه وهتصل تاني..انا لازم اوصل لحل جذري معاها في اللي بنتها بتعمله ده!
سلمى:ايه اللي مروه بتعمله مش هى اتسجنت؟
عائشه:اتسجنت ايه! دي هربت هى وقليلة الأصل اللى أخوكي كان عايز يتجوزها زمان
سلمى:يانهار اسود هربت بجد؟؟
عائشه(بحزن) :ايوه هربت..وسلمت يوسف لـ ضياء لاشين
سلمى(مصدومه) :ازااي؟؟هو جابته ازاي اصلاً؟
عائشه:مش عارفه
••لقيت رشاد داخل الشقه ووشه مقلوب••
عائشه:اتصلت بـ هدى فوق الـ 10 مرات ومابتردش!
رشاد:ومش هترد
عائشه:ومتردش ليه هما كمان بعد اللي...
رشاد:مروه قتلت أمها وهربت
عائشه(بصويت) :لااااااا